diff --git a/data/tlg7000/tlg001/tlg7000.tlg001.perseus-grc1.tracking.json b/data/tlg7000/tlg001/tlg7000.tlg001.perseus-grc1.tracking.json deleted file mode 100644 index c8d6b1818..000000000 --- a/data/tlg7000/tlg001/tlg7000.tlg001.perseus-grc1.tracking.json +++ /dev/null @@ -1,14 +0,0 @@ -{ - "epidoc_compliant": false, - "fully_unicode": true, - "git_repo": "canonical-greekLit", - "has_cts_metadata": false, - "has_cts_refsDecl": false, - "id": "2008.01.0472", - "last_editor": "", - "note": "", - "src": "texts/sdl/Anth/01_gk.xml", - "status": "migrated", - "target": "canonical-greekLit/data/tlg7000/tlg001/tlg7000.tlg001.perseus-grc1.xml", - "valid_xml": true -} \ No newline at end of file diff --git a/data/tlg7000/tlg001/tlg7000.tlg001.perseus-grc1.xml b/data/tlg7000/tlg001/tlg7000.tlg001.perseus-grc1.xml deleted file mode 100644 index df2878774..000000000 --- a/data/tlg7000/tlg001/tlg7000.tlg001.perseus-grc1.xml +++ /dev/null @@ -1,11230 +0,0 @@ - - - - - - -Greek Anthology, Volume I -William Roger Paton -Perseus Project, Tufts University -Gregory Crane - - Prepared under the supervision of - Lisa Cerrato - Rashmi Singhal - Bridget Almas - -The National Endowment for the Humanities -Google Digital Humanities Awards Program - - - - Trustees of Tufts University - Medford, MA - Perseus Digital Library Project - Perseus 4.0 - tlg7000.tlg001.perseus-grc2.xml - - Available under a Creative Commons Attribution-ShareAlike 4.0 International License - - - - - - -The Greek Anthology -William Roger Paton - -London -William Heinemann Ltd. - New York, NY - G. P. Putnam's Sons -1917 - -1 - - The Internet Archive - - - - - - - - -

optical character recognition

- - - - - - -

This pointer pattern extracts book and epigram.

- - -

This pointer pattern extracts book.

- - - - - - -Greek -Latin - - - - - Epidoc and CTS conversion and header review for best practices - tagged and parsed - - - - - -
- -
- -
- - -Anonymi Epigrammatici - - - -ἃς οἱ πλάνοι καθεῖλον ἐνθάδʼ εἰκόνας - ἄνακτες ἐστήλωσαν εὐσεβεῖς πάλιν. -
-
- - -Anonymi Epigrammatici - - - -θεῖος Ἰουστῖνος, Σοφίης πόσις, ᾧ πόρε Χριστὸς - πάντα διορθοῦσθαι, καὶ κλέος ἐν πολέμοις, -μητρὸς ἀπειρογάμοιο δόμον σκάζοντα νοήσας, - σαθρὸν ἀποσκεδάσας τεῦξέ μιν ἀσφαλέως. -
-
- - -Anonymi Epigrammatici - - - -ὁ πρὶν Ἰουστῖνος περικαλλέα δείματο νηὸν -τοῦτον μητρὶ Θεοῦ, κάλλεϊ λαμπόμενον· -ὁπλότερος δὲ μετʼ αὐτὸν Ἰουστῖνος βασιλεύων -κρείσσονα τῆς προτέρης ὤπασεν ἀγλαΐην. - -
-
- - -Anonymi Epigrammatici - - - -τοῦτον Ἰωάννῃ, Χριστοῦ μεγάλῳ θεράποντι, - Στούδιος ἀγλαὸν οἶκον ἐδείματο· καρπαλίμως δὲ - τῶν κάμεν εὕρετο μισθόν, ἑλὼν ὑπατηίδα ῥάβδον. -
-
- - -Anonymi Epigrammatici - - - -τόνδε Θεῷ κάμες οἶκον, Ἀμάντιε, μεσσόθι πόντου, -τοῖς πολυδινήτοις κύμασι μαρνάμενος. -οὐ νότος, οὐ βορέης ἱερὸν σέο δῶμα τινάξει, - νηῷ θεσπεσίῳ τῷδε φυλασσόμενον. -ζώοις ἤματα πολλά· σὺ γὰρ νεοθηλέα Ῥώμην, - πόντῳ ἐπαΐξας, θήκαο φαιδροτέρην. -
-
- - -Anonymi Epigrammatici - - - -Σφωράκιος ποίησε φυγὼν φλόγα μάρτυρι νηόν. -
-
- - -Anonymi Epigrammatici - - - -Σφωράκιε, ζώοντι φίλα θρεπτήρια τίνων - γήθεεν Ἀντόλιος, σὸς ἀνεψιός· οἰχομένῳ δὲ -αἰεί σοι γεραρὴν τελέει χάριν ὥστε καὶ ἄλλην - εὗρε, καὶ ἐν νηῷ ς1ʼ ἀνεθήκατο, τὸν κάμες αὐτός. -
-
- - -Anonymi Epigrammatici - - - -Χριστὸν παμβασιλῆα φίλοις καμάτοισι γεραίρων -τοῦτον Ἰουστινιανὸς ἀγακλέα δείματο νηὸν - -Πέτρῳ καὶ Παύλῳ· θεράπουσι γὰρ εὖχος ὀπάζων -αὐτῷ δή τις ἄνακτι φέρει πολυκυδέα τιμήν, -ἐνθάδε καὶ ψυχῇ καὶ ὄμμασι κέρδος ἑτοῖμον -εὐχαῖσιν μὲν ἕκαστος ὅ τι χρέος ἐστὶν ἑλέσθω, - τερπέσθω δὲ ὁρῶν κάλλος καὶ δώματος αἴγλην. -
-
- - -Anonymi Epigrammatici - - - -καὶ τόδε σῶν καμάτων παναοίδιμον ἔργον ἐτύχθη, -Γερράδιε κλυτόμητι· σὺ γὰρ περικαλλέα νηὸν - ἀγγελικῆς στρατιῆς σημάντορος αὖτις ἔδειξας. -
-
- - -Anonymi Epigrammatici - - - -Εὐδοκίη μὲν ἄνασσα Θεὸν σπεύδουσα γεραίρειν, - πρώτη νηὸν ἔτευξε θεοφραδέος Πολυεύκτου - ἀλλʼ οὐ τοῖον ἔτευξε καὶ οὐ τόσον οὔ τινι φειδοῖ, -οὐ κτεάτων χατέουσα — τίνος βασίλεια χατίζει; — -ἀλλʼ ὡς θυμὸν ἔχουσα θεοπρόπον, ὅττι γενέθλην - καλλείψει δεδαυῖαν ἀμείνονα κόσμον ὀπάζειν. - ἔνθεν Ἰουλιανή, ζαθέων ἀμάρυγμα τοκήων, - τέτρατον ἐκ κείνων βασιλήιον αἷμα λαχοῦσα, - ἐλπίδας οὐκ ἔψευσεν ἀριστώδινος ἀνάσσης· -ἀλλά μιν ἐκ βαιοῖο μέγαν καὶ τοῖον ἐγείρει, - κῦδος ἀεξήσασα πολυσκήπτρων γενετήρων - πάντα γὰρ ὅσσα τέλεσσεν ὑπέρτερα τεῦξε τοκήων, - ὀρθὴν πίστιν ἔχουσα φιλοχρίστοιο μενοινῆς. -τίς γὰρ Ἰουλιανὴν οὐκ ἔκλυεν, ὅττι καὶ αὐτοὺς -εὐκαμάτοις ἔργοισιν ἑοὺς φαίδρυνε τοκῆας, -εὐσεβίης ἀλέγουσα; μόνη δʼ ἱδρῶτι δικαίῳ - ἄξιον οἶκον ἔτευξεν ἀειζώῳ Πολυεύκτῳ. - καὶ γὰρ ἀεὶ δεδάηκεν ἀμεμφέα δῶρα κομίζειν - πᾶσιν ἀεθλητῆρσιν ἐπουρανίου βασιλῆος. - -πᾶσα χθὼν βοάᾳ, πᾶσα πτόλις, ὅττι τοκῆας - φαιδροτέρους ποίησεν ἀρειοτέροισιν ἐπʼ ἔργοις, - ποῦ γὰρ Ἰουλιανὴν ἁγίοις οὐκ ἔστιν ἰδέσθαι - νηὸν ἀναστήσασαν ἀγακλέα; ποῦ σέο μούνης -εὐσεβέων οὐκ ἔστιν ἰδεῖν σημήια χειρῶν; -ποῖος δʼ ἔπλετο χῶρος, ὃς οὐ μάθε σεῖο μενοινὴν -εὐσεβίης πλήθουσαν; ὅλης χθονὸς ἐνναετῆρες - σοὺς καμάτους μέλπουσιν ἀειμνήστους γεγαῶτας. - ἔργα γὰρ εὐσεβίης οὐ κρύπτεται· οὐ γὰρ ἀέθλους - λήθη ἀποσβέννυσιν ἀριστοπόνων ἀρετάων. -ὅσσα δὲ σὴ παλάμη θεοπειθέα δώματα τεύχει -οὐδʼ αὐτὴ δεδάηκας· ἀμετρήτους γάρ, ὀίω, - μούνη σὺ ξύμπασαν ἀνὰ χθόνα δείμαο ναούς, -οὐρανίου θεράποντας ἀεὶ τρομέουσα Θεοῖο. -ἴχνεσι δʼ εὐκαμάτοισιν ἐφεσπομένη γενετήρων -πᾶσιν, ἀειζώουσαν ἑὴν τεκτήνατο φύτλην, -εὐσεβίης ξύμπασαν ἀεὶ πατέουσα πορείην. -τοὔνεκά μιν θεράποντες ἐπουρανίου βασιλῆος, - ὅσσοις δῶρα δίδωσιν, ὅσοις δωμήσατο νηούς, - προφρονέως ἐρύεσθε σὺν υἱέι, τοῖό τε κούραις· -μίμνοι δʼ ἄσπετον εὖχος ἀριστοπόνοιο γενέθλης, - εἰσόκεν ἠέλιος πυριλαμπέα δίφρον ἐλαύνει. - - -ποῖος Ἰουλιανῆς χορὸς ἄρκιός ἐστιν ἀέθλοις, -ἣ μετὰ Κωνσταντῖνον ἑῆς κοσμήτορα Ῥώμης, -καὶ μετὰ Θευδοσίου παγχρύσεον ἱερὸν ὄμμα, -καὶ μετὰ τοσσατίων προγόνων βασιληίδα ῥίζαν, - ἄξιον ἧς γενεῆς καὶ ὑπέρτερον ἤνυσεν ἔργον - εἰν ὀλίγοις ἔτεσιν; χρόνον ἥδʼ ἐβιήσατο μούνη, - -καὶ σοφίην παρέλασσεν ἀειδομένου Σολομῶνος, - νηὸν ἀναστήσασα θεηδόχον, οὗ μέγας αἰὼν -οὐ δύναται μέλψαι χαρίτων πολυδαίδαλον αἴγλην - οἷος μὲν προβέβηκε βαθυρρίζοισι θεμέθλοις, - νέρθεν ἀναθρώσκων καὶ αἰθέρος ἄστρα διώκων - οἷος δʼ ἀντολίης μηκύνεται ἐς δύσιν ἕρπων, -ἀρρήτως Φαέθοντος ὑπαστράπτων ἀμαρυγαῖς, -τῇ καὶ τῇ πλευρῇσι· μέσης δʼ ἑκάτερθε πορείης - κίονες ἀρρήκτοις ἐπὶ κίοσιν ἑστηῶτες -χρυσορόφου ἀκτῖνας ἀερτάζουσι καλύπτρης. - κόλποι δʼ ἀμφοτέρωθεν ἐπʼ ἀψίδεσσι χυθέντες - φέγγος ἀειδίνητον ἐμαιώσαντο σελήνης· -τοῖχοι δʼ ἀντιπέρηθεν ἀμετμήτοισι κελεύθοις - θεσπεσίους λειμῶνας ἀνεζώσαντο μετάλλων, -οὓς φύσις ἀνθήσασα μέσοις ἐνὶ βένθεσι πέτρης -ἀλγλαΐην ἔκλεπτε, Θεοῦ δʼ ἐφύλασσε μελάθροις, - δῶρον Ἰουλιανῆς, ἵνα θέσκελα ἔργα τελέσσῃ -ἀχράντοις κραδίης ὑπὸ νεύμασι ταῦτα καμοῦσα. -τίς δὲ φέρων θοὸν ἴχνος ἐπὶ ζεφυρηίδας αὔρας - ὑμνοπόλος σοφίης, ἑκατὸν βλεφάροισι πεποιθώς, - τοξεύσει ἑκάτερθε πολύτροπα δήνεα τέχνης, -οἶκον ἰδὼν λάμποντα, περίδρομον, ἄλλον ἐπʼ ἄλλῳ, -ἔνθʼ ἵνα καὶ γραφίδων ἱερῶν ὑπὲρ ἄντυγος αὐλῆς - ἔστιν ἰδεῖν μέγα θαῦμα, πολύφρονα Κωνσταντῖνον, - πῶς προφυγὼν εἴδωλα θεημάχον ἔσβεσε λύσσην, - καὶ Τριάδος φάος εὗρεν ἐν ὕδασι γυῖα καθήρας. -τοῖον Ἰουλιανή, μετὰ μυρίον ἑσμὸν ἀέθλων, -ἤνυσε τοῦτον ἄεθλον ὑπὲρ ψυχῆς γενετήρων, -καὶ σφετέρου βιότοιο, καὶ ἐσσομένων καὶ ἐόντων. - - -
-
- - -Anonymi Epigrammatici - - - -τοῖς σοῖς θεράπουσιν ἡ θεράπαινα προσφέρω - σοφία τὸ δῶρον. χριστέ, προσδέχου τὰ σά, - καὶ τῷ βασιλεῖ μου μισθὸν Ἰουστίνῳ δίδου, - νίκας ἐπὶ νίκαις κατὰ νόσων καὶ βαρβάρων. -
-
- - -Anonymi Epigrammatici - - - -εἰμὶ δόμος Τριάδος, τρισσὴ δέ με τεῦξε γενέθλη· -πρώτη μὲν πολέμους καὶ βάρβαρα φῦλα φυγοῦσα -τεύξατο καὶ μʼ ἀνέθηκε Θεῷ ζωάγρια μόχθων - Θευδοσίου θυγάτηρ Εὐδοξία· ἐκ δέ με κείνης -Πλακιδίη κόσμησε σὺν ὀλβίστῳ παρακοίτῃ·̓· -εἰ δέ που ἀγλαΐης ἐπεδεύετο κάλλος ἐμεῖο, -τὴν δέ μοι ὀλβιόδωρος ὑπὲρ μνήμης γενετήρων - δῶκεν Ἰουλιανή, καὶ ὑπέρτατον ὤπασε κῦδος - μητέρι καὶ γενέτῃ καὶ ἀγακλέι μητρὶ τεκούσης, -κόσμον ἀεξήσασα παλαίτερον. ὧδʼ ἐμὸν ἔργον. -
-
- - -Anonymi Epigrammatici - - - -κάλλος ἔχον καὶ πρόσθεν ἐπήρατον ἀλλʼ ἐπὶ μορφῇ -τῇ πρὶν ἀρειοτέρην νῦν λάχον ἀγλαΐην. -
-
- - -Anonymi Epigrammatici - - - -οὕτω γῆρας ἐμὸν μετὰ μητέρα καὶ μετὰ τηθὴν - ξῦσεν Ἰουλιανή, καὶ νέον ἄνθος ἔχω. -
-
- - -Anonymi Epigrammatici - - - -ἦν ἄρα καὶ κάλλους ἔτι κάλλιον εὖτʼ ἐμὸν ἔργον, - καὶ πρὶν ἐὸν περίπυστον, ἀοίδιμον ἐς χθόνα πᾶσαν, -ἀγλαΐης προτέρης ἐς ὑπέρτερον ἤγαγε κάλλος - τόσσον Ἰουλιανή, ὅσον ἄστρασιν ἀντιφερίζειν. - -
-
- - -Anonymi Epigrammatici - - - -αὐτὴν ἐργοπόνοισιν ἐπιπνείουσαν ἀρωγὴν -εἶχεν Ἰουλιανὴ μάρτυρα νηοπόλον - οὔποτε γὰρ τοῖόν τε τόσον τʼ εὐδαίδαλον ἔργον - ἤνυσεν, οὐρανίης ἔμπλεον ἀγλαΐης. -
-
- - -Anonymi Epigrammatici - - - -οὐκέτι θαυμάζεις προτέρων κλέος· οὐ διὰ τέχνης -εὖχος ἐν ὀψιγόνοις λίπον ἄσπετον, ὁσσάτιόν περ - κῦδος Ἰουλιανῆς πινυτόφρονος, ἣ χάριν ἔργων - ἀρχεγόνων νίκησε νοήματα πάνσοφα φωτῶν. -
-
- - -Anonymi Epigrammatici - - - -τῆς ἀγαθῆς ἀγαθὸς μὲν ἐγὼ κύκλος Ἀγαθονίκης - - -ἄνθετο δʼ ἀχράντῳ μάρτυρί με Τροφίμῳ. -
-
- - -Claudianus - - - -πυρὸς ἀενάοιο σοφὴν ὠδῖνα φυλάσσων, - ἐμβεβαὼς κόσμοιο παλινδίνητον ἀνάγκην, - χριστέ, θεορρήτοιο βίου φυσίζοε πηγή, - πατρὸς ἀσημάντοιο Θεοῦ πρωτόσπορε φωνή, -ὃς μετὰ μητρῴων τοκετῶν ἐγκύμονα φόρτον - καὶ γόνον αὐτοτέλεστον ἀνυμφεύτων ὑμεναίων - στήσας Ἀσσυρίης γενεῆς ἑτερόφρονα λύσσαν, -ὄργια δʼ εἰδώλων κενεῶν ψευδώνυμα λύσας, -αἰθέρος ἀμφιβέβηκας ἐφʼ ἑπτάζωνον ὀχῆα, -ἀγγελικαῖς πτερύγεσσιν ἐν ἀρρήτοισι θαάσσων - ἵλαθι, παγγενέταο Θεοῦ πρεσβήιον ὄμμα, -φρουρὲ βίου, σῶτερ μερόπων, αἰῶνος ἀνάσσων. - -
-
- - -Claudianus - - - -Ἀρτιφανές, πολοοῦχε, παλαιγενές, υἱὲ νεογνέ, - αἰὲν ἐὼν προεών τε, ὑπέρτατε, ὕστατε, Χριστέ, - ἀθανάτοιο πατρός τε ὁμόχρονε, πάμπαν ὁμοῖε. -
-
- - -Anonymi Epigrammatici - - - -παῖ, γέρον, αἰώνων προγενέστερε, πατρὸς ὁμῆλιξ· -
-
- - -Anonymi Epigrammatici - - - -πατρὸς ἐπουρανίου λόγε πάνσοφε, κοίρανε κόσμου, -ὁ βροτέην γενεὴν τιμήσας εἰκόνι σεῖο, - σὴν χάριν ἄμμιν ὄπαζε καὶ ὀλβιόδωρον ἀρωγὴν - εἰς σὲ γὰρ εἰσορόωσιν ἐν ἐλπίσιν ὄμματα πάντων. -
-
- - -Marinus - - - -ἀθανάτου πατρὸς υἱὲ συνάχρονε, κοίρανε πάντων, - αἰθερίων μεδέων, εἰναλίων, χθονίων, -δμωὶ τεῷ, τῷ τήνδε βίβλον γράψαντι , Μαρίνῳ - δὸς χάριν εὐεπίης καὶ λογικῆς σοφίας. -
-
- - -Anonymi Epigrammatici - - - -Σύνθρονε καὶ συνάναρχε τεῷ πατρί, πνεύματί τʼ· ἐσθλῷ, - οἰχομένων ὄντων τε καὶ ἐσσομένων βασιλεύων, -τῷ ταῦτα γράψαντι τεὴν χάριν αὐτὸς ὀπάζοις, -ὄφρα κε σῇς ἐφετμῇσι καλῶς βίου οἶμον ὁδεύοι. - -
-
- - -Anonymi Epigrammatici - - - -χριστέ, Θεοῦ σοφίη, κόσμου μεδέων καὶ ἀνάσσων - ἡμετέρην τὸ πάροιθε πλάσας μεροπηίδα φύτλην, -δός με θέειν βίου οἶμον ἐν ὑμετέραις ἐφετμῇσι. -
-
- - -Anonymi Epigrammatici - - - -ὑψιμέδων Θεοῦ υἱέ, φαοσφόρον ἀίδιον φῶς, -σήν μοι ὄπαζε χάριν καὶ νῦν καὶ ἔπειτα καὶ αἰεί, -ὡς προθέλυμνον ἐοῦσαν ὅτῳ καὶ ὅπῃ κατανεύσεις. -
-
- - -Anonymi Epigrammatici - - - -Πανσθενὲς υἱὲ Θεοῦ, Χριστέ, προάναρχε ἁπάντων, -πᾶσιν ἐπιχθονίοις σωτήρια νάματα βλύζων, - μητρὸς ἀπειρογάμοιο τεῆς λιτέων ἐπακούων, - σὴν χάριν ἄμμιν ὄπαζε καὶ ἐν μύθοις καὶ ἐν ἔργοις. -
-
- - -Marinus - - - -χριστέ, Θεοῦ σοφίη, χάριν ὤπασον εὐεπιάων, -καὶ λογικῆς σοφίης ἐμπέραμον τέλεσον, -ὃς τόδε τεῦχος ἔγραψεν ἑαῖς χείρεσσι Μαρῖνος, - φάρμακον ἀφραδίης, πρόξενον εὐφραδίης. -
-
- - -Anonymi Epigrammatici - - - -χριστέ, τεὴν προΐαλλε χάριν καμάτοισιν ἐμεῖο. -ὁ Χριστὸς καὶ ἐμοῖς ἐπιτάρροθος ἔσσεται ἔργοις. - Χριστὸς ἐμοῖς καμάτοισιν ἀρηγόνα χεῖρα τιταίνοι. -χριστέ, σύ μοι προΐαλλε τεὴν πολύολβον ἀρωγήν. -χριστέ, τεὴν καμάτοισιν ἐμοῖς χάριν αὐτὸς - -
-
- - -Anonymi Epigrammatici - - - -χριστὲ μάκαρ, μερόπων φάος ἄφθιτον, ἐλπὶς ἁπάντων, - ἐσθλὰ δίδου χατέουσι, τὰ δʼ οὐ καλὰ νόσφιν ἐρύκοις,. -
-
- - -Anonymi Epigrammatici - - - -Παμμεδέοντα, ἄνασσα, Θεοῖο, γόνον τεόν, υἱόν, - ἄγγελοι ὃν τρομέουσι, τεῇς παλάμῃσι κρατοῦσα, - πρευμενέα πραπίδεσσιν ὑπὲρ μερόπων τελέουσα, - ῥύεο συντηροῦσα ἀπήμονα κόσμον ἅπαντα. -
-
- - -Anonymi Epigrammatici - - - -ὧδε ταλαιπαθέων χραισμήια θέσκελα κεῖται -ἢ δέμας ἢ κραδίην τειρομένων μερόπων - καὶ γὰρ ἀνιάζουσα πόνων φύσις αὐτίκα φεύγει -οὔνομα σόν, Μιχαήλ, ἢ τύπον, ἢ θαλάμους. -
-
- - -Neilus - - - -ὡς θρασὺ μορφῶσαι τὸν ἀσώματον ἀλλὰ καὶ εἰκὼν -ἐς νοερὴν ἀνάγει μνῆστιν ἐπουρανίων. -
-
- - -Agathias Scholasticus - - - -ἄσκοπον ἀγγελίαρχον, ἀσώματον εἴδεϊ μορφῆς, -ἆ μέγα τολμήεις κηρὸς ἀπεπλάσατο· - ἔμπης οὐκ ἀχάριστον, ἐπεὶ βροτὸς εἰκόνα λεύσσων -θυμὸν ἀπιθύνει κρέσσονι φαντασίῃ· - -οὐκέτι δʼ ἀλλοπρόσαλλον ἔχει σέβας, ἀλλʼ ἐν ἑαυτῷ - τὸν τύπον ἐγγράψας ὡς παρεόντα τρέμει· -ὄμματα δʼ ὀτρύνουσι βαθὺν νόον οἶδε δὲ τέχνη - χρώμασι πορθμεῦσαι τὴν φρενὸς ἱκεσίην. -
-
- - -Agathias Scholasticus - - - -Καρικὸς Αἰμιλιανὸς, Ἰωάννης τε σὺν αὐτῷ, - Ῥουφῖνος Φαρίης, Ἀγαθίης Ἀσίης, - τέτρατον, ἀγγελίαρχε, νόμων λυκάβαντα λαχόντες, - ἄνθεσαν εἰς σέ, μάκαρ, τὴν σφετέρην γραφίδα, -αἰτοῦντες τὸν ἔπειτα καλὸν χρόνον· ἀλλὰ φανείης - ἐλπίδας ἰθύνων ἐσσομένου βιότου. -
-
- - -Agathias Scholasticus - - - -ἵλαθι μορφωθείς, ἀρχάγγελε· σὴ γὰρ ὀπωπὴ - ἄσκοπος· ἀλλὰ βροτῶν δῶρα πέλουσι τάδε· -ἐκ σέο γὰρ Θεόδωρος ἔχει ζωστῆρα μαγίστρου - καὶ δὶς ἀεθλεύει πρὸς θρόνον ἀνθυπάτων -τῆς δʼ εὐγνωμοσύνης μάρτυς γραφίς· ὑμετέρην γὰρ - χρώμασι μιμηλὴν ἀντετύπωσε χάριν. -
-
- - -Anonymi Epigrammatici - - - -σάλπιγγες, στεροπαί, γαῖα τρέμει· ἀλλʼ ἐπὶ μήτρην - παρθενικὴν κατέβης ἄψοφον ἴχνος ἔχων. - -
-
- - -Anonymi Epigrammatici - - - -οὐρανὸς ἡ φάτνη, καὶ οὐρανοῦ ἔπλετο μείζων -οὐρανὸς ἐργασίη τοῦδε πέλει βρέφεος. -
-
- - -Anonymi Epigrammatici - - - -εἷς χορός, ἓν μέλος ἀνθρώποισι καὶ ἀγγελιώταις, -οὕνεκεν ἄνθρωπος καὶ θεὸς ἓν γέγονε. -
-
- - -Anonymi Epigrammatici - - - -οὐρανὸς ἡ φάτνη, καὶ οὐρανοῦ ἔπλετο μείζων, -οὕνεκεν ὅνπερ ἔδεκτο ἄναξ πέλεν οὐρανιώνων. -
-
- - -Anonymi Epigrammatici - - - -οὐκέτι δῶρʼ ἀνάγουσι μάγοι πυρὶ ἠελίῳ τε· - ἠέλιον γὰρ ἔτευξε τόδε βρέφος, ὡς πυρὸς αὐγάς. -
-
- - -Anonymi Epigrammatici - - - -Δέχνυσο, Βηθλεέμ, ὃν προέειπε προφήτης ἐσθλὸς - ἵξεσθαι λαῶν ἡγούμενον ἐκ σοῦ ἁπάντων. -
-
- - -Anonymi Epigrammatici - - - -τίπτε, Ῥαχήλ, γοόωσα πικρὸν κατὰ δάκρυον εἴβεις; - Ὀλλυμένην ὁρόωσα γονὴν κατὰ δάκρυον εἴβω. -
-
- - -Anonymi Epigrammatici - - - -χαῖρε, κόρη χαρίεσσα, μακαρτάτη, ἄφθορε νύμφη· - υἷα Θεοῦ λαγόνεσσιν ἄτερ πατρὸς ἔμβρυον ἕξεις. - -
-
- - -Anonymi Epigrammatici - - - -ἔνδοθι γαστρὸς ἐὼν σκιρτήμασιν εἶδε προφήτης - σὸν γόνον ὡς θεός ἐστι, καὶ ᾔνεσε πότνια μήτηρ. -
-
- - -Anonymi Epigrammatici - - - -πρεσβύτα, παῖδα δέχοιο, Ἀδὰμ προγενέστερον ὄντα, -ὅς σε βίου λύσει τε καὶ ἐς βίον ἄφθιτον ἄξει. -
-
- - -Anonymi Epigrammatici - - - -πατρὸς ἀπʼ ἀθανάτοιο μεγασθενὲς ἤλυθε πνεῦμα, - υἱὸς ἐπεὶ βαπτίζετʼ Ἰορδάνου ἀμφὶ ῥέεθρα. -
-
- - -Anonymi Epigrammatici - - - -Ἀδὰμ ἦν ζο - -
-
- - -Anonymi Epigrammatici - - - -Χριστὸς ἔφη, πρόμολʼ ὧδε· καὶ ἔλλιπε Λάζαρος ᾅδην, -αὐαλέῳ μυκτῆρι πάλιν σόον ἆσθμα κομίζων. -
-
- - -Anonymi Epigrammatici - - - -ψυχὴν αὐτὸς ἔτευξε, δέμας μόρφωσεν ὁ αὐτός· -Λάζαρον ἐκ νεκύων ἐς φάος αὐτὸς ἄγει. -
-
- - -Gregorius Nazianzenus - - - -τέτρατον ἦμαρ ἔην, καὶ Λάζαρος ἔγρετο τύμβου, - -
-
- - -Anonymi Epigrammatici - - - -χαῖρε, Σιὼν θύγατερ, καὶ δέρκεο Χριστὸν ἄνακτα - πώλῳ ἐφεζόμενον, καὶ ἐς πάθος αἶψα κιόντα. -
-
- - -Anonymi Epigrammatici - - - -ἀμνὸν ἔπαυσε νόμου καὶ ἄμβροτον ὤπασε θῦμα - Χριστός, ἐὼν ἱερεύς, αὐτὸς ἐὼν θυσίη. -
-
- - -Anonymi Epigrammatici - - - -πάθος, ὦ σταυρός, παθέων ἐλατήριον αἷμα, -πλῦνον ἐμῆς ψυχῆς πᾶσαν ἀτασθαλίην -
-
- - -Anonymi Epigrammatici - - - -παρθένου υἱὸν ἔφη τὸν παρθένον, ἄλλον ἑαυτόν. -ἵλαθι τῆς καθαρῆς δέσποτα παρθενίης. -
-
- - -Anonymi Epigrammatici - - - -Χριστὸς ἐὼν Θεὸς εἷλε νέκυς ἐξ ᾅδου πάντας· -μοῦνον δὲ βροτολοιγὸν ἀκήριον ἔλλιπεν ᾍδην. -
-
- - -Anonymi Epigrammatici - - - -ψυχῆς ἐν φλιῇσιν ἐμῆς σωτήριον αἷμα -ἀμνοῦ ὀλοθρεύων, φεῦγε, μὴ ἐγγὺς ἴθι. -
-
- - -Anonymi Epigrammatici - - - -εἷς πόκος ὄμβρον ἔχει λεκάνῃ δρόσον ὤπασεν αὐτός, - ἄβροχος αὐτὸς ὅδε· κρύπτε νόῳ κρύφια. - -
-
- - -Anonymi Epigrammatici - - - -Αἰγυπτίη, κρύφιόν τε βρέφος, καὶ ἐγγύθεν ὕδωρ· -ἃ προτυποῖ μούνοις εὐσεβέεσσι Λόγον. -
-
- - -Anonymi Epigrammatici - - - -τὸν Ἀμαλήκ - Σταυροφανῶς τανύεις παλάμας τίνος εἵνεκα, Μωσῆ; - -τῷδε τύπῳ Ἀμαλὴκ ὄλλυται ἀμφότερος. -
-
- - -Anonymi Epigrammatici - - - -ῥύεο σὴν ἐθνικὴν νύμφην παρὰ ὕδασι, Μωσῆ, - νυμφίου ἀψευδοῦς οὕνεκέν ἐσσι τύπος. -
-
- - -Anonymi Epigrammatici - - - -λάρνακι χρυσείῃ ῥόος εἴκαθεν. ἵλαθι, Χριστέ - σὸς τύπος ἡ λάρναξ, τῇδε λοεσσομένου. -
-
- - -Anonymi Epigrammatici - - - -ἐξ ἐθνῶν καὶ Ἄγαρ· τί δὲ ἄγγελος; ἢ τί τὸ ὕδωρ; -ἐξ ἐθνῶν καὶ ἐγώ· τοὔνεκεν οἶδα τάδε. -
-
- - -Anonymi Epigrammatici - - - -ἑπτάκι τοὺς δέκα φοίνικας, δυοκαίδεκα πηγὰς - Χριστοῦ τοσσατίων ἴσθι τύπους ἑτάρων. -
-
- - -Anonymi Epigrammatici - - - -Ἀβραὰμ υἱὸν ἄγει θυσίην Θεῷ· ἵλαθι, ποίην - νοῦς ὁράᾳ θυσίην, ἧς τόδε γράμμα τύπος; - -
-
- - -Anonymi Epigrammatici - - - -Μελχισεδὲκ βασιλεῦ, ἱερεῦ, ἄρτους τε καὶ οἶνον -ὡς τίς ἐὼν παρέχεις; ὡς τύπος ἀτρεκίης. - -
-
- - -Anonymi Epigrammatici - - - -μορφὴν ἐνθάδε μοῦνον ἔχει Θεός· ὕστερον αὖτε -ἐς φύσιν ἀτρεκέως ἤλυθεν ἀνδρομέην. -
-
- - -Anonymi Epigrammatici - - - -πνοιὴν μὲν διὰ πνεῦμα, δέρας δὲ λάχον διὰ γράμμα -εὐφραίνει πατέρα νοῦς Θεὸν εἰσορόων. -
-
- - -Anonymi Epigrammatici - - - -Νυμφίε μουνογενές, νύμφη ἐθνική σε φιλοῦσα - κάτθορεν ἐξ ὕψους σώματος οὐ καθαροῦ. -
-
- - -Anonymi Epigrammatici - - - -τηλόθεν οὐχ ὑδάτων μνηστεύετο πότνα Ῥεβέκκα, - νύμφης ἐξ ἐθνῶν οὕνεκέν ἐστι τύπος. -
-
- - -Anonymi Epigrammatici - - - -εὐχὴ Ἐλισσαίου, Σωμανίτι, δὶς πόρεν υἱόν, -πρῶτα μὲν ἐκ γαστρός, δεύτερα δʼ ἐκ νεκύων. -
-
- - -Anonymi Epigrammatici - - - -τοῦτο δέρας προλέγει ἀμνὸν Θεοῦ εἵνεκα πάντων - ἀνθρώπων ζωῆς τῇδε λοεσσόμενον. - -
-
- - -Anonymi Epigrammatici - - - -ἐν νῷ ἔχων πέφρικα πατὴρ τίνος ἔκλυε Δαβὶδ - οὗτος, ὃν εἰσοράᾳς ἐνθάδε χριόμενον. -
-
- - -Anonymi Epigrammatici - - - -οὔνομα τῇ πηγῇ Ἐσταλμένος· ἀλλὰ τίς ἐκ τοῦ - ἔσταλται νοέεις, ὄφρα τέλεια βλέποις; -
-
- - -Anonymi Epigrammatici - - - -οὐ τύπος, ἀλλὰ Θεὸς καὶ νυμφίος ἐνθάδε νύμφην -σῴζει, τὴν ἐθνικήν, ὕδατος ἐγγὺς ἰδών. -
-
- - -Anonymi Epigrammatici - - - -τεῦξε μὲν ἀτρεκέως οἶνον Θεός· ὅσσα δὲ κρυπτὰ -θαύματος, εἰ Χριστοῦ πνεῦμά ς1ʼ ἔχει, νοέεις. -
-
- - -Anonymi Epigrammatici - - - -βλύζει ἐλαιηρὴ κάλπις καὶ κίστη ἀλεύρου, - ἔμπεδον ἡ χήρη οὕνεκα πίστιν ἔχει. -
-
- - -Anonymi Epigrammatici - - - -πάντων ἀρχιερεὺς Πέτρος Θεοῦ ἀρχιερήων, -ὃς Θεοῦ ἐκ φωνῆς ἔλλαχε τοῦτο γέρας. -
-
- - -Anonymi Epigrammatici - - - -Παῦλος ἐπεὶ θεῖον σέλας οὐρανοῦ ἔδρακεν ἄντην, - φωτὸς ἀπειρεσίου γαῖαν ἔπλησεν ὅλην. - -
-
- - -Anonymi Epigrammatici - - - -ἀρχιερεὺς Ἐφέσοιο θεηγόρος ἐκ Θεοῦ εἶπεν -πρῶτος Ἰωάννης, ὡς Θεὸς ἦν ὁ λόγος. -
-
- - -Anonymi Epigrammatici - - - -καὶ λαλέοντος ἄκουσε Λόγου καὶ πέφραδεν αὐτὸς - πρῶτος Ἰωάννης, ὡς Θεὸς ἦν ὁ λόγος. -
-
- - -Anonymi Epigrammatici - - - -οὐρανίης σοφίης θεοτερπὲς δῶμα κιχήσας -εἶπεν Ἰωάννης, ὡς Θεὸς ἦν ὁ λόγος. -
-
- - -Anonymi Epigrammatici - - - -γράψε Θεοῦ σαρκώσιος ἔξοχα θαύματα πάντα - Ματθαῖος σελίδεσσιν, ἐπεὶ λίπε δῶμα τελώνου. -
-
- - -Anonymi Epigrammatici - - - -ἀθανάτου βιότοιο τελεσφόρα ἔργματα Χριστοῦ -πυκτίου ἐν λαγόνεσσι σαφῶς ἐνέπασσέ γε Λουκᾶς. -
-
- - -Anonymi Epigrammatici - - - -οὐ κατʼ ἐπωνυμίην Αἰγύπτιον ἔλλαχε λαὸν -ὄρφνη, ἐπεὶ φωνῆς Μάρκου ἔδεκτο φάος. -
-
- - -Anonymi Epigrammatici - - - -παρθενίην Βασίλειος Ἰωάννου σοφίην τε - ἔλλαχεν, ἶσα λαχὼν καὶ τάδε Γρηγορίῳ. - -
-
- - -Anonymi Epigrammatici - - - -οἰκτίρμων Οἰκτίρμων Πολύκαρπος ὃ καὶ θρόνον ἀρχιερῆος - ἔσχε καὶ ἀτρεκέως μαρτυρίης στεφάνους, -
-
- - -Anonymi Epigrammatici - - - -οὐρανίων θιάσων ἱεραρχικὰ τάγματα μέλψας, - μορφοφανῶν τε τύπων κρύφιον νόον εἰς φάος ἕλκων, - ζωοσόφων λογίων θεοτερπέα πυρσὸν ἀνάπτεις. -
-
- - -Anonymi Epigrammatici - - - -Νικόλεων Πολύκαρπος ἔχει σχεδόν, οὕνεκεν ἄμφω - εἰς ἔλεον παλάμας ἔσχον ἑτοιμοτάτας. -
-
- - -Sophronius - - - -Κύρῳ, ἀκεστορίης πανυπέρτατα μέτρα λαχόντι, -καὶ τῷ Ἰωάννῃ, μάρτυσι θεσπεσίοις, - Σωφρόνιος, βλεφάρων ψυχαλγέα νοῦσον ἀλύξας, - βαιὸν ἀμειβόμενος τήνδʼ ἀνέθηκε βίβλον. -
-
- - -Anonymi Epigrammatici - - - -Ἰουστινιανὸν καὶ ἠγαθέην Θεοδώρην - στέψεν Ἰωάννης Χριστοῦ ἐφημοσύναις. -
-
- - -Gregorius Nazianzenus - - - -ἦν ὅτε Χριστὸς ἴαυεν ἐπʼ ὁλκάδος ἔμφυτον ὕπνον, - τετρήχει δὲ θάλασσα κυδοιμοτόκοισιν ἀήταος - -δείματί τε πλωτῆρες ἀνίαχον “ἔγρεο, σῶτερ· -ὀλλυμένοις ἐπάμυνον.” ἄναξ δὲ κέλευεν ἀναστὰς -ἀτρεμέειν ἀνέμους καὶ κύματα, καὶ πέλεν οὕτως· - θαύματι δὲ φράζοντο Θεοῦ φύσιν οἱ παρεόντες. -
-
- - -Anonymi Epigrammatici - - - -Ζωογόνων ἀρετῶν τετρακτύος εἰκόνα λεύσσων, - σεῦε νόον πρὸς μόχθον ἑκούσιον εὐσεβίης γὰρ - ἱδρῶτες δεδάασιν ἀγήραον ἐς βίον ἕλκειν. -
-
- - -Anonymi Epigrammatici - - - -νεύμασι θεσπεσίοις μετάρσιοι ἤλυθον ἄρδην, -ἐς δόμον ἀχράντοιο ἀμωμήτοιο γυναικὸς - κεκλόμενοι, μαθηταὶ ἀλλήλοισιν αἰγλήεντες, -οἱ μὲν ἀπʼ ἀντολίης, οἱ δʼ ἑσπερίοισιν γαίης, -ἄλλοι μεσημβρίης, ἕτεροι βαῖνον δʼ ἀπʼ ἀρκτῴων, - διζήμενοι κηδεῦσαι σῶμα τὸ σωσικόσμοιο. -
-
- - -Anonymi Epigrammatici - - - -σοί, μάκαρ, ἐκ σέο δῶκα τάπερ πόρες ἄμμιν ἄρηι. -
-
- - -Anonymi Epigrammatici - - - -τοῦτο γέρας λάχεν ἐσθλὸς Ἀμάντιος, ὡς βασιλῆι - πιστὸς ἐών, Χριστὸν δὲ θεουδείῃσιν ἰαίνων. -
-
- - -Anonymi Epigrammatici - - - -νηὸς ἐγὼ κύδιστος Ἰουστίνοιο ἄνακτος, -καὶ μʼ ὕπατος Θεόδωρος, ὁ καρτερός, ὁ τρὶς ὕπαρχος, - ἄνθετο καὶ βασιλῆι, καὶ υἱέι παμβασιλῆος, -Ἰουστινιανῷ, στρατιῆς ἡγήτορι πάσης. - -
-
- - -Anonymi Epigrammatici - - - -ἔργον ὁρᾷς περίπυστον Ἰουστίνου βασιλῆος, -Ἰουστινιανοῦ τε μεγασθενέος στρατιάρχου, - λαμπόμενον στεροπῇσιν ἀμετρήτοιο μετάλλου· -τοῦτο κάμεν Θεόδωρος ἀοίδιμος, ὃς πόλιν ἄρας -τὸ τρίτον ἀμφιβέβηκεν ἔχων ὑπατηίδα τιμήν. -
-
- - -Flavius Cyrus - - - -μεσσηγὺς γαίης τε καὶ οὐρανοῦ ἵσταται ἀνήρ, - πάντοθεν ὀρνυμένους οὐ τρομέων ἀνέμους. - - -ἴχνια ῥιζώσας κίονι διχθάδια· - λιμῷ δʼ ἀμβροσίᾳ τρέφεται καὶ ἀπήμονι δίψῃ, - υἱέα κηρύσσων μητρὸς ἀπειρογάμου. -
-
- - -Anonymi Epigrammatici - - - -Νείλου μὲν ποταμοῖο ῥόος χθόνα οἶδε ποτίζειν, -Νείλου δʼ αὖ μοναχοῖο λόγος φρένας οἶδεν ἰαίνειν. -
-
- - -Menander Protector - - - -ἦν πάρος ἐν Πέρσῃσιν ἐγὼ μάγος Ἰσβοζήτης, - εἰς ὀλοὴν ἀπάτην ἐλπίδας ἐκκρεμάσας· -εὖτε δὲ πυρσὸς ἔδαπτεν ἐμὴν πόλιν, ἦλθον ἀρῆξαι, -ἦλθε δὲ καὶ Χριστοῦ πανσθενέος θεράπων -κείνῳ δʼ ἐσβέσθη δύναμις πυρός· ἀλλὰ καὶ ἔμπης - νικηθεὶς νίκην ἤνυσα θειοτέρην. - -
-
- - -Anonymi Epigrammatici - - - -ὤ πάντων ἐπέκεινα — τί γὰρ πλέον ἄλλο σε μέλψω; - πῶς σὲ τὸν ἐν πάντεσσιν ὑπείροχον ἐξονομήνω; - πῶς δὲ λόγῳ μέλψω σὲ τὸν οὐδὲ λόγῳ περιληπτόν, -
-
- - -Anonymi Epigrammatici - - - -Μῶμε μιαιφόνε, σός σε κατέκτανε πικρὸς ὀιστός· - ῥύσατο γὰρ μανίης με τεῆς Θεὸς ὄλβιον οἶκον. -
-
- - -Anonymi Epigrammatici - - - -μάρτυρος Ἀκακίοιο, Ἀλεξάνδρου θʼ ἱερῆος - ἐνθάδε σώματα κεῖται, τάπερ χρόνος ὄλβιος ηὗρε. -
-
- - -Anonymi Epigrammatici - - - -ἡ μὲν σοφὴ δέσποινα τῆς οἰκουμένης, -ὑπʼ εὐσεβοῦς ἔρωτος ἠρεθισμένη, - πάρεστι δούλη, προσκυνεῖ δʼ ἑνὸς τάφον, -ἡ πᾶσιν ἀνθρώποισι προσκυνουμένη. -ὁ γὰρ δεδωκὼς τὸν θρόνον καὶ τὸν γάμον - τέθνηκεν ὡς ἄνθρωπος, ἀλλὰ ζῇ θεός· - κάτω μὲν ἠνθρώπιζεν ἦν δʼ ὡς ἦν ἄνω. -
-
- - -Anonymi Epigrammatici - - - -ἔλαμψεν ἀκτὶς τῆς ἀληθείης πάλιν, - καὶ τὰς κόρας ἤμβλυνε τῶν ψευδηγόρων - -ηὔξησεν εὐσέβεια, πέπτωκε πλάνη, - καὶ πίστις ἀνθεῖ καὶ πλατύνεται χάρις. -ἰδοὺ γὰρ αὖθις Χριστὸς εἰκονισμένος - λάμπει πρὸς ὕψος τῆς καθέδρας τοῦ κράτους, - καὶ τὰς σκοτεινὰς αἱρέσεις ἀνατρέπει. - τῆς εἰσόδου δʼ ὕπερθεν, ὡς θεία πύλη, -στηλογραφεῖται καὶ φύλαξ ἡ παρθένος, -ἄναξ δὲ καὶ πρόεδρος ὡς πλανοτρόποι - σὺν τοῖς συνεργοῖς ἱστοροῦνται πλησίον - κύκλῳ δὲ παντὸς οἷα φρουροὶ τοῦ δόμου, - νόες, μαθηταί, μάρτυρες, θυηπόλοι, - ὅθεν καλοῦμεν χριστοτρίκλινον νέον, -τὸν πρὶν λαχόντα κλήσεως χρυσωνύμου, -ὡς τὸν θρόνον ἔχοντα Χριστοῦ κυρίου, - Χριστοῦ δὲ μητρός, χριστοκηρύκων τύπους, - καὶ τοῦ σοφουργοῦ Μιχαὴλ τὴν εἰκόνα. -
-
- - -Anonymi Epigrammatici - - - -ὡς τὴν φαεινὴν ἀξίαν τῆς εἰκόνος - τῆς πρὶν φυλάττων, Μιχαὴλ αὐτοκράτωρ, - κρατῶν τε πάντων σαρκικῶν μολυσμάτων, - ἐξεικονίζεις καὶ γραφῇ τὸν δεσπότην, -ἔργῳ κρατύνων τοὺς λόγους τῶν δογμάτων. -
-
- - -Anonymi Epigrammatici - - - -οὐ σοφίης ἀπάνευθεν Ἀδὰμ τὸ πρὶν ἐκαλεῖτο, -τέσσαρα ,γράμματʼ ἔχων εἰς τέσσαρα κλίματα κόσμου· -Ἄλφαγὰρ ἀντολίης ἔλαχεν δύσεως δὲ τὸ δέλτα, -ἄλφα πάλιν δʼ ἄρκτοιο, μεσημβρίης δὲ τὸ λοιπόν. - -
-
- - -Ignatius - - - -Πτωθέντα κοσμεῖ τὸν ναὸν τῆς Παρθένου -βασίλειός τε σὺν, Κωνσταντίνῳ Λέων. -
-
- - -Anonymi Epigrammatici - - - -ἐκ γῆς ἀνελθὼν πατρικόν σου πρὸς θρόνον, - τὸν μητρικόν σου, σῶτερ, οἶκον δεικνύεις - πηγὴν νοητὴν κρειττόνων χαρισμάτων. -
-
- - -Anonymi Epigrammatici - - - -ὁ νεκρὸς Ἅδης ἐξεμεῖ τεθνηκότας, - κάθαρσιν εὑρὼν σάρκα τὴν τοῦ δεσπότου. -
-
- - -Anonymi Epigrammatici - - - -λάμψας ὁ Χριστὸς ἐν Θαβὼρ φωτὸς πλέον, - σκιὰν πέπαυκε τοῦ παλαιτάτου νόμου. -
-
- - -Anonymi Epigrammatici - - - -ὁρώμενος νῦν χερσὶ πρεσβύτου βρέφος -παλαιός ἐστι δημιουργὸς τῶν χρόνων. -
-
- - -Anonymi Epigrammatici - - - -Προοιμιάζει κοσμικὴν σωτηρίαν, - εἰπὼν τὸ Χαῖρε ταῖς γυναιξὶ δεσπότης. -
-
- - -Anonymi Epigrammatici - - - -παρθένος υἱέα τίκτε· μεθʼ υἱέα παρθένος ἦεν. - -
-
- - -Anonymi Epigrammatici - - - -χριστὲ μάκαρ, μερόπων φάος ἄφθιτον, υἱὲ Θεοῖο, -δῶρʼ ἀπὸ κρυστάλλων, δῶρʼ ἀπὸ σαρδονύχων -Δέχνυσο, παρθενικῆς τέκος ἄφθιτον, υἱὲ Θεοῖο, -δῶρʼ ἀπὸ κρυστάλλων, δῶρʼ ἀπὸ σαρδονύχων. -
-
- - -Anonymi Epigrammatici - - - -ἔβλεψε τυφλὸς ἐκ τόκου μεμυσμένος, - Χριστὸς γὰρ ἦλθεν ἡ πανόμματος χάρις· -
-
- - -Anonymi Epigrammatici - - - -ἤγειρεν ἡμῖν τῶν παθῶν τρικυμίαν - ἐχθρὸς κάκιστος, πνευματώσας τὸν σάλον, - ὅθεν ταράσσει καὶ βυθίζει καὶ βρέχει - τὸν φόρτον ἡμῶν ψυχικῆς τῆς ὁλκάδος· -ἀλλʼ, ὦ γαλήνη καὶ στορεστὰ τῆς ζάλης, -σύ, Χριστέ, δείξαις ἀβρόχους ἁμαρτίας, -τῷ σῷ πρὸς ὅρμῳ προσφόρως προσορμίσας, - ἐχθρὸν δὲ τοῦτον συμφοραῖς βεβρεγμένον. -
-
- - -Anonymi Epigrammatici - - - -βίβλος Πατρικίοιο θεουδέος ἀρητῆρος, -ὃς μέγα ἔργον ἔρεξεν, ὁμηρείης ἀπὸ βίβλου - κυδαλίμων ἐπέων τεύξας ἐρίτιμον ἀοιδήν, - πρήξιας ἀγγέλλουσαν ἀνικήτοιο Θεοῖο· -ὡς μόλεν ἀνθρώπων ἐς ὁμήγυριν, ὡς λάβε μορφὴν - ἀνδρομέην, καὶ γαστρὸς ἀμεμφέος ἔνδοθι κούρης -κρύπτετο τυτθὸς ἐών, ὃν ἀπείριτος οὐ χάδε κύκλος· -ἠδʼ ὡς παρθενικῆς θεοκύμονος ἔσπασε μαζὸν - παρθενίοιο γάλακτος ἀναβλύζοντα ῥέεθρον -ὡς κτάνεν Ἡρώδης ἀταλάφρονας εἰσέτι παῖδας - -νήπιος, ἀθανάτοιο Θεοῦ διζήμενος οἶτον -ὥς μιν Ἰωάννης λοῦσεν ποταμοῖο ῥεέθροις· -ὥς τε δυώδεκα φῶτας ἀμύμονας ἔλλαβʼ ἑταίρους· - ὅσσων τʼ ἄρτια πάντα Θεὸς τεκτήνατο γυῖα, -νούσους τʼ ἐξελάσας στυγερὰς βλεφάρων τʼ ἀλαωτύν, -ἠδʼ ὅππως ῥείοντας ἀπέσβεσεν αἵματος ὁλκοὺς - ἁψαμένης ἑανοῖο πολυκλαύτοιο γυναικός· -ἠδʼ ὅσσους μοίρῃσιν ὑπʼ ἀργαλέῃσι δαμέντας - ἤγαγεν ἐς φάος αὖθις ἀπὸ χθονίοιο βερέθρου· -ὥς τε πάθους ἁγίου μνημήια κάλλιπεν ἄμμιν -ὥς τε βροτῶν ὑπὸ χερσὶ τάθη κρυεροῖς ἐνὶ δεσμοῖς, -αὐτὸς ἑκών οὐ γάρ τις ἐπιχθονίων πολεμίζοι -ὑψιμέδοντι Θεῷ, ὅτε μὴ αὐτός γε κελεύοι· -ὡς θάνεν, ὡς Ἀίδαο σιδήρεα ῥῆξε θύρετρα, -κεῖθεν δὲ ψυχὰς θεοπειθέας οὐρανὸν εἴσω - ἤγαγεν ἀχράντοισιν ὑπʼ ἐννεσίῃσι τοκῆος, - ἀνστὰς ἐν τριτάτᾐ φαεσιμβρότῳ ἠριγενείῃ - ἀρχέγονον βλάστημα θεοῦ γενετῆρος ἀνάρχου. -
-
- - -Anonymi Epigrammatici - - - -εἰ φρικτὸν ἐν γῇ τοῦ Θεοῦ ζητεῖς θρόνον, - ἰδὼν τὸν οἶκον θαύμασον τῆς παρθένου· -ἡ γὰρ φέρουσα τὸν Θεὸν ταῖς ἀγκάλαις, - φέρει τὸν αὐτὸν εἰς τὸ τοῦ τόπου σέβας· -ἐνταῦθα τῆς γῆς οἱ κρατεῖν τεταγμένοι -τὰ σκῆπτρα πιστεύουσι τῆς νίκης ἔχειν -ἐνταῦθα πολλὰς κοσμικὰς περιστάσεις -ὁ πατριάρχης ἀγρυπνῶν ἀνατρέπει· -οἱ βάρβαροι δὲ προσβαλόντες τῇ πόλει, -αὐτὴν στρατηγήσασαν ὡς εἶδον μόνον, - ἔκαμψαν εὐθὺς τοὺς ἀκαμπεῖς αὐχένας. - -
-
- - -Anonymi Epigrammatici - - - -ἔδει γενέσθαι δευτέραν Θεοῦ πύλην - τῆς παρθένου τὸν οἶκον, ὡς καὶ τὸν τόκον - κιβωτὸς ὤφθη τῆς πρὶν ἐνθεεστέρα, -οὐ τὰς πλάκας φέρουσα τὰς θεογράφους, -ἀλλʼ αὐτὸν ἔνδον τὸν Θεὸν δεδεγμένη. - ἐνταῦθα κρουνοὶ σαρκικῶν καθαρσίων, - καὶ ψυχικῶν λύτρωσις ἀγνοημάτων - ὅσαι γάρ εἰσι τῶν παθῶν περιστάσεις, -βλύζει τοσαύτας δωρεὰς τῶν θαυμάτων. -ἐνταῦθα νικήσασα τοὺς ἐναντίους, - ἀνεῖλεν αὐτοὺς ἀντὶ λόγχης εἷς1ʼ ὕδωρ· - τροπῆς γὰρ ἀλλοίωσιν οὐκ ἔχει μόνην, - Χριστὸν τεκοῦσα καὶ κλονοῦσα βαρβάρους, -
-
- - -Michael - - - -αὕτη τεκοῦσα παρθένος πάλιν μένει· - καὶ μὴ θροηθῇς· ἔστι γὰρ τὸ παιδίον -θεός, θελήσας προσλαβέσθαι σαρκίον. -
-
- - -Sophronius - - - -πέτρα τρισμακάριστἐ θεόσσυτον αἷμα λαχοῦσα, - οὐρανίη γενεή σε πυρίπνοος ἀμφιπολεύει, - καὶ χθονὸς ἐνναετῆρες ἀνάκτορες ὑμνοπολοῦσι. -
-
- -
-
- -Δηΐφοβος μὲν πρῶτος ἐυγλύπτῳ ἐπὶ βωμῷ - ἵστατο, τολμήεις, κεκορυθμένος, ὄβριμος ἥρως, -τοῖος ἐών, οἷός περ ἐπορνυμένῳ Μενελάῳ - περθομένων ἤντησεν ἑῶν προπάροιθε μελάθρων. -ἵστατο δὲ προβιβῶντι πανείκελος· εὖ δʼ ἐπὶ κόσμῳ - δόχμιος ἦν, μανίῃ δὲ κεκυφότα νῶτα συνέλκων -δριμὺ μένος ξυνάγειρεν· ἕλισσε δὲ φέγγος ὀπωπῆς, -οἷά τε δυσμενέων μερόπων πεφυλαγμένος ὁρμήν. - λαιῇ μὲν σάκος εὐρὺ προΐσχετο, δεξιτερῇ δὲ -φάσγανον ὑψός1ʼ ἄειρεν ἔμελλε δὲ μαινομένη χείρ - ἀνέρος ἀντιβίοιο κατὰ χροὸς ἆορ ἐλάσσαι· - ἀλλʼ οὐ χαλκὸν ἔθηκε φύσις πειθήμονα λύσσῃ. - Κεκροπίδης δʼ ἤστραπτε, νοήμονος ἄνθεμα Πειθοῦς, -Αἰσχίνης· λασίης δὲ συνείρυε κύκλα παρειῆς, -οἷα πολυτροχάλοισιν ἀεθλεύων ἀγορῇσιν - στείνετο γὰρ πυκινῇσι μεληδόσιν. ἄγχι δʼ ἐκείνου - ἦεν Ἀριστοτέλης, σοφίης πρόμος· ἱστάμενος δὲ - χεῖρε περιπλέγδην συνεέργαθεν, οὐδʼ ἐνὶ χαλκῷ - ἀφθόγγῳ φρένας εἶχεν ἀεργέας, ἀλλʼ ἔτι βουλὴν - -σκεπτομένῳ μὲν ἔικτο· συνιστάμεναι δὲ παρειαὶ - ἀνέρος ἀμφιέλισσαν ἐμαντεύοντο μενοινήν, - καὶ τροχαλαὶ σήμαινον ἀολλέα μῆτιν ὀπωπαί. - καὶ Παιανιέων δημηγόρος ἔπρεπε σάλπιγξ, - ῥήτρης εὐκελάδοιο πατὴρ σοφός, ὁ πρὶν Ἀθήναις -πειθοῦς θελξινόοιο νοήμονα πυρσὸν ἀνάψας. - ἀλλʼ οὐκ ἠρεμέων διεφαίνετο, πυκνὰ δὲ βουλὴν - ἐστρώφα, πυκινὴν γὰρ ἐείδετο μῆτιν ἑλίσσειν, - οἷα κατʼ εὐόπλων τεθοωμένος Ἠμαθιήων. -ἦ τάχα κεν κοτέων τροχαλὴν ἐφθέγγετο φωνήν, -ἄπνοον αὐδήεντα τιθεὶς τύπον ἀλλὰ ἑ τέχνη - χαλκείης ἐπέδησεν ὑπὸ σφραγῖδα σιωπῆς. - ἵστατο δʼ Εὐρίποιο φερώνυμος· ὡς δὲ δοκεύω, -λάθρῃ ὑπὸ κραδίην τραλικαῖς ὡμίλεε Μούσαις, - ἔργα σαοφροσύνης διανεύμενος· ἦν γὰρ ἰδέσθαι -οἷὰ τέ που θυμέλῃσιν ἐν Ἀτθίσι θύρσα τινάσσων. - δάφνῃ μὲν πλοκαμῖδα Παλαίφατος ἔπρεπε μάντις - στεψάμενος, δόκεεν δὲ χέειν μαντώδεα φωνήν. - Ἡσίοδος δʼ Ἀσκραῖος ὀρειάσιν εἴδετο Μούσαις - φθεγγόμενος, χαλκὸν δὲ βιάζετο θυιάδι λύσσῃ, -ἔνθεον ἱμείρων ἀνάγειν μέλος. ἐγγύθι δʼ αὐτοῦ - μαντιπόλος πάλιν ἄλλος ἔην Φοιβηίδι δάφνῃ - -κοσμηθεὶς Πολύειδος· ἀπὸ στομάτων δὲ τινάξαι - ἤθελε μὲν κελάδημα θεοπρόπον ἀλλὰ ἑ τέχνη - δεσμῷ ἀφωνήτῳ κατερήτυεν. οὐδὲ σὺ μολπῆς -εὔνασας ἁβρὸν ἔρωτα, Σιμωνίδη, ἀλλʼ ἔτι χορδῆς - ἱμείρεις, ἱερὴν δὲ λύρην οὐ χερσὶν ἀράσσεις. -ὤφελεν ὁ πλάσσας σε, Σιμωνίδη, ὤφελε χαλκῷ - συγκεράσαι μέλος ἡδύ· σὲ δʼ ἂν καὶ χαλκὸς ἀναυδὴς -αἰδόμενος, ῥυθμοῖσι λύρης ἀντήχεε μολπήν. -ἦν μὲν Ἀναξιμένης νοερὸς σοφός· ἐν δὲ μενοινῇ - δαιμονίης ἐλέλιζε νοήματα ποικίλα βουλῆς. - Θεστορίδης δʼ ἄρα μάντις ἐύσκοπος ἵστατο Κάλχας, -οἷά τε θεσπίζων, ἐδόκει δέ τε θέσφατα κεύθειν, -ἢ στρατὸν οἰκτείρων Ἑλλήνιον, ἢ ἔτι θυμῷ -δειμαίνων βασιλῆα πολυχρύσοιο Μυκήνης. -Δέρκεό μοι σκύμνον πτολιπόρθιον Αἰακιδάων, - Πύρρον Ἀχιλλείδην, ὅσον ἤθελε χερσὶν ἑλίσσειν - τεύχεα χαλκήεντα, τὰ μὴ οἱ ὤπασε τέχνη· - γυμνὸν γάρ μιν ἔτευξεν ὁ δʼ ὑψόσε φαίνετο λεύσσων, -οἷά περ ἠνεμόεσσαν ἐς Ἴλιον ὄμμα τιταίνων. -ἧστο δʼ Ἀμυμώνη ῥοδοδάκτυλος· εἰσοπίσω μὲν - βόστρυχον ἀκρήδεμνον ἑῆς συνέεργεν ἐθείρης· - γυμνὸν δʼ εἶχε μέτωπον ἀναστέλλουσα δʼ ὀπωπὰς - εἰνάλιον σκοπίαζε μελαγχαίτην παρακοίτην. -ἐγγύθι δʼ εὐρύστερνος ἐφαίνετο Κυανοχαίτης - γυμνὸς ἐών, πλόκαμον δὲ καθειμένον εἶχεν ἐθείρης, - -καὶ διερὸν δελφῖνα προΐσχετο, χειρὶ κομίζων - δῶρα πολυζήλοιο γάμων μνηστήρια κούρης. - Πιερικὴ δὲ μέλισσα λιγύθροος ἕζετο Σαπφὼ -Λεσβιάς, ἠρεμέουσα· μέλος δʼ εὔϋμνον ὑφαίνειν - σιγαλέαις δοκέεσκεν ἀναψαμένη φρένα Μούσαις. - Φοῖβος δʼ εἱστήκει τριποδηλάλος· ἦν δʼ ἄρα χαίτης -εἰσοπίσω σφίγξας ἄδετον πλόκον ἀλλʼ ἐνὶ χαλκῷ - γυμνὸς ἔην, ὅτι πᾶσιν ἀνειρομένοισιν Ἀπόλλων -γυμνῶσαι δεδάηκεν ἀληθέα δήνεα Μοίρης, -ἢ ὅτι πᾶσιν ὁμῶς ἀναφαίνεται· ἠέλιος γὰρ - Φοῖβος ἄναξ, καθαρὴν δὲ φέρει τηλέσκοπον αἴγλην. -ἄγχι δὲ Κύπρις ἔλαμπεν ἔλειβε δὲ νώροπι χαλκῷ -ἀγλαΐης ῥαθάμιγγας· ἀπὸ στέρνοιο δὲ γυμνὴ -φαίνετο μέν, φᾶρος δὲ συνήγαγεν ἄντυγι μηρῶν, - χρυσείῃ πλοκαμῖδας ὑποσφίγξασα καλύπτρῃ. - Κλεινιάδην δὲ τέθηπα, περιστίλβοντα νοήσας -ἀγλαΐῃ χαλκῷ γὰρ ἀνέπλεκε κάλλεος αὐγὴν, - τοῖος ἐὼν, οἷός περ ἐν Ἀτθίδι, μητέρι μύθων, -ἀνδράσι Κεκροπίδῃσι πολύφρονα μῆτιν ἐγείρων. - Χρύσης δʼ αὖθʼ ἱερεὺς πέλας ἵστατο, δεξιτερῇ μὲν -σκῆπτρον ἀνασχόμενος Φοιβήϊον, ἐν δὲ καρήνῳ - στέμμα φέρων μεγέθει δὲ κεκασμένος ἔπρεπε μορφῆς, -οἷά περ ἡρώων ἱερὸν γένος· ὡς δοκέω δέ, - -Ἀτρείδην ἱκέτευε· βαθὺς δὲ οἱ ἤνθεε πώγων, - καὶ ταναῆς ἄπλεκτος ἐσύρετο βότρυς ἐθείρης. - Καῖσαρ δʼ ἐγγὺς ἔλαμπεν Ἰούλιος, ὅς ποτε Ῥώμην - ἀντιβίων ἔστεψεν ἀμετρήτοισι βοείαις. - αἰγίδα μὲν βλοσυρῶπιν ἐπωμαδὸν ἦεν ἀείρων, -δεξιτερῇ δὲ κεραυνὸν ἀγάλλετο χειρὶ κομίζων, - οἷα Ζεὺς νέος ἄλλος ἐν Αὐσονίοισιν ἀκούων. - εἱστήκει δὲ Πλάτων θεοείκελος, ὁ πρὶν Ἀθήναις - δείξας κρυπτὰ κέλευθα θεοκράντων ἀρετάων. -ἄλλην δʼ εὐπατέρειαν ἴδον χρυσῆν Ἀφροδίτην, -γυμνὴν παμφανόωσαν ἐπὶ στέρνων δὲ θεαίνης - αὐχένος ἐξ ὑπάτοιο χυθεὶς ἐλελίζετο κεστός. - ἵστατο δʼ Ἑρμαφρόδιτος ἐπήρατος, οὔθʼ ὅλος ἀνήρ, - οὐδὲ γυνή· μικτὸν γὰρ ἔην βρέτας ἦ τάχα κοῦρον -Κύπριδος εὐκόλποιο καὶ Ἑρμάωνος ἐνίψεις· -μαζοὺς μὲν σφριγόωντας ἐδείκνυεν, οἷά τε κούρη· - σχῆμα δὲ πᾶσιν ἔφαινε φυτοσπόρον ἄρσενος αἰδοῦς, - ξυνῆς ἀγλαΐης κεκερασμένα σήματα φαίνων. -παρθενικὴ δʼ Ἤριννα λιγύθροος ἕζετο κούρη, -οὐ μίτον ἀμφαφόωσα πολύπλοκον, ἀλλʼ ἐνὶ σιγῇ -Πιερικῆς ῥαθάμιγγας ἀποσταλάουσα μελίσσης. - -μήτε λίπῃς Τέρπανδρον ἐΰθροον, οὗ τάχα φαίης - ἔμπνοον, οὐκ ἄφθογγον ἰδεῖν βρέτας· ὡς γὰρ ὀίω, - κινυμέναις πραπίδεσσιν ἀνέπλεκε μύστιδα μολπήν, -ὥς ποτε δινήεντος ἐπʼ Εὐρώταο ῥοάων -μυστιπόλῳ φόρμιγγι κατεπρήϋνεν ἀείδων - ἀγχεμάχων κακότητας Ἀμυκλαίων ναετήρων. -Ἠγασάμην δʼ ὁρόων σε, Περίκλεες, ὅττι καὶ αὐτῷ - χαλκῷ ἀναυδήτῳ δημηγόρον ἦθος ἀνάπτεις, -ὡς ἔτι Κεκροπίδῃσι θεμιστεύων πολιήταις, -ἢ μόθον ἐντύνων Πελοπήιον. ἱστάμενος δὲ - ἔπρεπε Πυθαγόρας, Σάμιος σοφός, ἀλλʼ ἐν Ὀλύμπῳ - ἐνδιάειν ἐδόκευε, φύσιν δʼ ἐβιάζετο χαλκοῦ, -πλημμύρων νοερῇσι μεληδόσιν· ὡς γὰρ ὀίω, - οὐρανὸν ἀχράντοισιν ἐμέτρεε μοῦνον ὀπωπαῖς. -Στησίχορον δʼ ἐνόησα λιγύθροον, ὅν ποτε γαῖα -Σικελικὴ μὲν ἔφερβε, λύρης δʼ ἐδίδαξεν Ἀπόλλων - ἁρμονίην, ἔτι μητρὸς ἐνὶ σπλάγχνοισιν ἐόντα· - τοῦ γὰρ τικτομένοιο καὶ ἐς φάος ἄρτι μολόντος - ἔκποθεν ἠερόφοιτος ἐπὶ στομάτεσσιν ἀηδὼν -λάθρῃ ἐφεζομένη λιγυρὴν ἀνεβάλλετο μολπήν. -χαῖρέ μοι Ἀβδήρων Δημόκριτε κῦδος ἀρούρης, - ὅττι σὺ καλλιτόκοιο φυῆς ἐφράσσαο θεσμούς, - λεπτὰ διακρίνων πολυΐδμονος ὄργια Μούσης· - αἰεὶ δὲ σφαλερὰς ἐγέλας βιότοιο κελεύθους, -εὖ εἰδὼς ὅτι πάντα γέρων παραμείβεται Αἰών. - -Ἡρακλέης δʼ ἀνίουλον ἐδείκνυε κύκλον ὑπήνης, -μῆλα λεοντοφόνῳ παλάμᾐ χρύσεια κομίζων, - γαίης ὄλβια δῶρα Λιβυστίδος. ἐγγύθι δʼ αὐτοῦ - Παλλάδος ἀρήτειρα παρίστατο, παρθένος Αὔγη, -φᾶρος ἐπιστείλασα κατωμαδὸν οὐ γὰρ ἐθείρας -κρηδέμνῳ συνέεργεν· ἑὰς δʼ ἀνετείνετο χεῖρας, -οἷά τε κικλήσκουσα Διὸς γλαυκώπιδα κούρην, - Ἀρκαδικῆς Τεγέης ὑπὸ δειράδος. ἵλαθι, γαίης -Τρωϊάδος βλάστημα σακεσπάχον, ἵλαθι, λάμπων -Αἰνεία Τρώων βουληφόρε· σαῖς γὰρ ὀπωπαῖς -ἀγλαΐης πνείουσα σοφὴ. περιλείβεται αἰδώς, - θέσκελον ἀγγέλλουσα γένος χρυσῆς Ἀφροδίτης. -Ἠγασάμην δὲ Κρέουσαν ἰδὼν πενθήμονι κόσμῳ, - σύγγαμον Αἰνείαο κατάσκιον ἀμφὶ γὰρ αὐταῖς -ἀμφοτέραις κρήδεμνον ἐφελκύσσασα παρειαῖς, - πάντα πέριξ ἐκάλυψε ποδηνεκέι χρόα πέπλῳ, -οἷά τε μυρομένη· τὰ δὲ χάλκεα δάκρυα νύμφης -Ἄρεϊ δουρίκτητον ἐμαντεύοντο τιθήνην, - Ἴλιον Ἀργείοισιν ἐελμένον ἀσπιδιώταις, -%2οὔθʼ Ἕλενος κοτέων ἀπεπαύετο· πατρίδι νηλὴς - φαίνετο δινεύων ἔτι που χόλον ἦν μὲν ἀείρων - δεξιτερῇ φιάλην ἐπιλοίβιον· ὡς δοκέω δέ, - ἐσθλὰ μὲν Ἀργείοις μαντεύετο, καδδὲ τιθήνης - ἀθανάτοις ἠρᾶτο πανύστατα πήματα φαίνειν. -Ἀνδρομάχη δʼ ἕστηκε ῥοδόσφυρος Ἠετιώνη, - οὔτι γόον σταλάουσα πολύστονον ὡς γὰρ ὀίω, - οὔπω ἐνὶ πτολέμῳ κορυθαίολος ἤριπεν Ἕκτωρ, - οὐδὲ φερεσσακέων ὑπερήνορες υἷες Ἀχαιῶν - Δαρδανίην ξύμπασαν ἐληΐσσαντο τιθήνην, - -ἦν δʼ ἐσιδεῖν Μενέλαον ἀρήιον, ἀλλʼ ἐπὶ νίκῃ - γηθόσυνον σχεδόθεν γὰρ ἐθάλπετο χάρματι πολλῷ - δερκόμενος ῥοδόπηχυν ὁμόφρονα Τυνδαρεώνην. -ἠγασάμην δʼ Ἑλένης ἐρατὸν τύπον, ὅττι καὶ αὐτῷ - χαλκῷ κόσμον ἔδωκε πανίμερον ἀγλαΐη γὰρ -ἔπνεε θερμὸν ἔρωτα. καὶ ἀψύχῳ ἐνὶ τέχνῃ. - πυκναῖς δὲ πραπίδεσσιν ἀγάλλετο δῖος Ὀδυσσεύς· -οὐ γὰρ ἔην ἀπάνευθε πολυστρέπτοιο μενοινῆς, - ἀλλʼ ἔτι κόσμον ἔφαινε σοφῆς φρενός· ἦν δʼ ἐνὶ θυμῷ - καγχαλόων Τροίην γὰρ ἐγήθεε πᾶσαν ὀλέσσας -ᾗσι δολοφροσύνῃσι. σὺ δʼ Ἕκτορος ἔννεπε μῆτερ, -τίς σε, πολυτλήμων Ἑκάβη, τίς δάκρυα λείβειν - ἀθανάτων ἐδίδαξεν ἀφωνήτῳ ἐνὶ κόσμῳ; -οὐδέ σε χαλκὸς ἔπαυσεν ὀιζύος, οὐδέ σε τέχνη - ἄπνοος οἰκτείρασα δυσαλθέος ἔσχεθε λύσσης· -ἀλλʼ ἔτι δακρυχέουσα παρίστασαι ὡς δὲ δοκεύω, -οὐκέτι δυστήνου μόρον Ἕκτορος, οὐδὲ ταλαίνης - Ἀνδρομάχης βαρὺ πένθος ὀδύρεαι, ἀλλὰ πεσοῦσαν - πατρίδα σήν· φᾶρος γὰρ ἐπικρεμὲς ἀμφὶ προσώπῳ - πήματα μὲν δείκνυσιν, ἀπαγγέλλουσι δὲ πέπλοι -πένθος ὑποβρύχιον κεχαλασμένοι ἄχρι πεδίλων -ἄλγεϊ γὰρ πυμάτῳ δέδεσαι φρένα, καδδὲ παρειῆς -δάκρυα μὲν σταλάεις, τὸ δὲ δάκρυον ἔσβεσε τέχνη, - ἄπλετον ἀγγέλλουσα δυσαλθέος αὐχμὸν ἀνίης. -Κασσάνδρην δʼ ἐνόησα θεοπρόπον, ἀλλʼ ἐνὶ σιγῇ -μεμφομένη γενετῆρα, σοφῆς ἀνεπίμπλατο λύσσης., -οἷά τε θεσπίζουσα πανύστατα πήματα πάτρης. - -Πύρρος δʼ ἄλλος ἔην πτολιπόρθιος· οὐκ ἐπὶ χαίτης - ἱππόκομον τρυφάλειαν ἔχων, οὐκ ἔγχος ἑλίσσων, - ἀλλʼ ἄρα γυμνὸς ἔλαμπε, καὶ ἄχνοον εἶχεν ὑπήνην -δεξιτερὴν δʼ ἀνέτεινεν ἑήν, ἐπιμάρτυρα νίκης, - λοξὰ Πολυξείνην βαρυδάκρυον ὄμματι λεύσσων. -εἰπέ, Πολυξείνη δυσπάρθενε, τίς τοι ἀνάγκη -χαλκῷ ἐν ἀφθόγγῳ ;κεκρυμμένα δάκρυα λείβειν; - πῶς δὲ τεῷ κρήδεμνον ἐπειρύσσασα προσώπῳ -ἵστασαι, αἰδομένῃ μὲν ἀλίγκιος, ἀλλʼ ἐνὶ θυμῷ - πένθος ἔχεις ; μὴ δή σε τεὸν πτολίεθρον ὀλέσσας - ληΐδα Πύρρος ἔχοι Φθιώτιος; οὐδέ σε μορφὴ -ῥύσατο τοξεύσασα Νεοπτολέμοιο μενοινήν, -ἥ ποτε θηρεύσασα τεοῦ γενετῆρα φονῆος -εἰς λίνον αὐτοκέλευστον ἀελπέος ἦγεν ὀλέθρου. - ναὶ μὰ τὸν ἐν χαλκῷ νοερὸν τύπον, εἴ νύ τε τοίην -ἔδρακε Πύρρος ἄναξ, τάχα κεν ξυνήονα λέκτρων - ἤγετο, πατρῴης προλιπὼν μνημήια μοίρης, - Ἠγασάμην δʼ Αἴαντα, τὸν ὀβριμόθυμος Ὀιλεὺς -Λοκρίδος ἐσπέρμηνε πελώριον ἕρκος ἀρούρης. - φαίνετο μὲν νεότητι κεκασμένος· οὐδὲ γὰρ ἦεν -ἄνθεϊ λαχνήεντι γενειάδος ἄκρα χαράξας· - γυμνὸν δʼ εἶχεν ἅπαν στιβαρὸν δέμας· ἠνορέῃ δὲ - βεβριθὼς ἐλέλιζε μαχήμονος οἶστρον Ἐνυοῦς. -Οἰνώνη δὲ χόλῳ φρένας ἔζεεν, ἔζεε πικρῷ -ζήλῳ θυμὸν ἔδουσα, Πάριν δʼ ἐδόκευε λαθοῦσα -ὄμματι μαινομένῳ κρυφίην δʼ ἤγγειλεν ἀπειλήν, -δεξιτερῇ βαρύποτμον ἀναινομένη παρακοίτην, -αἰδομένῳ μὲν ἔοικεν ὁ βουκόλος, εἶχε δʼ ὀπωπὴν - -πλαζομένην ἑτέρωσε δυσίμερος· αἴδετο γάρ που -Οἰνώνην βαρύδακρυν ἰδεῖν, Κεβρηνίδα νύμφην. -Αὐαλέῳ δὲ Δάρης ἐζώννυτο χεῖρας ἱμάντι, - πυγμαχίης κήρυκα φέρων χόλον ἠνορέης δὲ - ἔπνεε θερμὸν ἄημα πολυστρέπτοισιν ὀπωπαῖς. -Ἔντελλος δέ, Δάρητος ἐναντίον ὄμμα τιταίνων, -γυιοτόρους μύρμηκας ἐμαίνετο χερσὶν ἑλίσσων - πυγμαχίης δʼ ὤδινε φόνον διψῶσαν ἀπειλήν. -ἦν δὲ παλαισμοσύνην δεδαημένος ὄβριμος ἀνήρ -εἰ δὲ Φίλων ἤκουε πελώριος, εἴτε Φιλάμμων, -εἴτε Μίλων Σικελῆς ἔρυμα χθονός, οἶδεν Ἀπόλλων -οὐ γὰρ ἐγὼ δεδάηκα διακρῖναι καὶ ἀεῖσαι - οὔνομα θαρσαλέου κλυτὸν ἀνέρος, ἀλλὰ καὶ ἔμπης - ἔπνεεν ἠνορέης· λάσιος δὲ οἱ εἵλκετο πώγων, -καὶ φόβον ἠκούτιζον ἀεθλητῆρα παρειαί, -καὶ κεφαλῆς ἔφρισσον ἐθειράδες· ἀμφὶ δὲ πυκνοῖς - μυῶνες μελέεσσιν ἀνοιδαίνοντο ταθέντες -τρηχαλέοι, δοιοὶ δέ, συνισταμένων παλαμάων, -εὐρέες ἐσφήκωντο βραχίονες, ἠΰτε πέτραι, - καὶ παχὺς ἀλκήεντι τένων ἐπανίστατο νώτῳ, -αὐχένος εὐγνάμπτοιο περὶ πλατὺν αὐλὸν ἀνέρπων. -Δέρκεό μοι Χαρίδημον, ὃς Ἀτθίδος ἡγεμονεύων - Κεκροπίδην στρατὸν εἶχεν ἑῇς πειθήμονα βουλῇς. -ἦ κεν ἰδὼν ἀγάσαιο Μελάμποδα· μαντιπόλου μὲν - ἱερὸν εἶδος ἔφαινεν, ἔοικε δὲ θέσπιδος ὀμφῆς -σιγηλοῖς στομάτεσσι θεοπρόπον ἄσθμα τιταίνων. - -Πάνθοος ἦν Τρώων βουληφόρος, ἀλλʼ ἔτι δεινὴν - οὔπω μῆτιν ἔπαυσε κατʼ Ἀργείων στρατιάων. -Δημογέρων δὲ νόημα πολύπλοκον εἶχε Θυμοίτης - ἀμφασίης πελάγεσσιν ἐελμένος· ἦ γὰρ ἐῴκει -σκεπτομένῳ τινὰ μῆτιν ἔτι Τρώεσσιν ὑφαίνειν. - Λάμπων δʼ ἀχνυμένῳ ἐναλίγκιος ἦεν ἰδέσθαι· -οὐ γὰρ ἔτι φρεσὶν εἶχε κυλινδομένοιο κυδοιμοῦ - τειρομένοις Τρώεσσι τεκεῖν παιήονα βουλήν. -εἱστήκει Κλυτίος μὲν ἀμήχανος· εἶχε δὲ δοιὰς -χεῖρας ὁμοπλεκέας, κρυφίης κήρυκας ἀνίης. - χαῖρε φάος ῥήτρης Ἰσόκρατες, ὅττι σὺ χαλκῷ -κόσμον ἄγεις· δοκέεις γὰρ ἐπίφρονα μήδεα φαίνειν, -εἰ καὶ ἀφωνήτῳ σε πόνῳ χαλκεύσατο τέχνη. -ἔστενε δʼ Ἀμφιάρηος ἔχων πυριλαμπέα χαίτην -στέμματι δαφναίῳ· κρυφίην δʼ ἐλέλιζεν ἀνίην, - θεσπίζων, ὅτι πᾶσι βοόκτιτος ἀνδράσι Θήβη - ἀνδράσιν Ἀργείοισιν ὑπότροπον ἦμαρ ὀλέσσει. -ἀγλαὸς εἱστήκει χρησμηγόρος, ὅντινά φασιν - μαντιπόλου γενετῆρα θεοφραδέος Πολυείδου· -εὐπετάλῳ δὲ κόμας ἐστεμμένος ἔπρεπε δάφνῃ. -εἶδον ἀκερσεκόμην Ἕκατον θεόν, εἶδον ἀοιδῆς - κοίρανον, ἀδμήτοισι κεκασμένον ἄνθεσι χαίτην -εἶχε γὰρ ἀμφοτέροισι κόμης μεμερισμένον ὤμοις - βόστρυχον αὐτοέλικτον· ἕλισσε δὲ μάντιν ὀπωπήν, -οἷά τε μαντοσύνῃ μεροπήια πήματα λύων. - -γυμνὸς δʼ ὀβριμόθυμος ἔην Τελαμώνιος Αἴας, - μήπω πρῶτον ἴουλον ἔχων ἐκέκαστο δὲ μορφῆς - ἄνθεσι πατρῴης· πλοκάμους δʼ ἐσφίγγετο μίτρῃ· -οὐ γὰρ ἔην τρυφάλειαν ἔχων, οὐκ ἔγχος ἑλίσσων, -οὐ σάκος ἑπταβόειον ἐπωμαδόν, ἀλλὰ τοκῆος - θαρσαλέην ἀνέφαινεν ἀγηνορίην Τελαμῶνος. - ἵστατο Σαρπηδών, Λυκίων πρόμος· ἠνορέῃ μὲν -φρικτὸς ἔην ἁπαλοῖς δὲ νεοτρεφέεσσιν ἰούλοις - οἴνοπος ἄκρα χάρασσε γενειάδος· ἀμφὶ δὲ χαίταις -εἶχε κόρυν γυμνὸς μὲν ἔην δέμας, ἀλλʼ ἐνὶ μορφῇ - σπέρμα Διὸς σήμαινεν ἀπʼ ἀμφοτέρης γὰρ ὀπωπῆς - μαρμαρυγὴν ἀπέπεμπεν ἐλευθερίου γενετῆρος, - καὶ τρίτος ;εὐχαίτης τριποδηλάλος ἦεν Ἀπόλλων, - καλὸς ἰδεῖν· πλόκαμος γὰρ ἕλιξ ἐπιδέδρομεν ὤμοις -ἀμφοτέροις· ἐρατὴ δὲ θεοῦ διεφαίνετο μορφή, - χαλκῷ κόσμον ἄγουσα· θεὸς δʼ ἐτίταινεν ὀπωπήν, -οἷά τε μαντιπόλοισιν ἐπὶ τριπόδεσσι δοκεύων. - καὶ τριτάτην θάμβησα πάλιν χρυσῆν Ἀφροδίτην, -φάρεϊ κόλπον ἔχουσαν ἐπίσκιον ἀμφὶ δὲ μαζοῖς -κεστὸς ἕλιξ κεχάλαστο, χάρις δʼ ἐνενήχετο κεστῷ. -αἰχμητὴς δʼ ἀνίουλος ἐλάμπετο δῖος Ἀχιλλεύς, - γυμνὸς ἐὼν σαγέων ἐδόκευε μὲν ἔγχος ἑλίσσειν - δεξιτερῇ, σκαιῇ δὲ σάκος χάλκειον ἀείρειν, - σχήματι τεχνήεντι· μόθου δʼ ἀπέπεμπεν ἀπειλὴν -θάρσεϊ τολμήεντι τεθηγμένος· αἱ γὰρ ὀπωπαὶ - γνήσιον ἦθος ἔφαινον ἀρήιον Αἰακιδάων. - -ἦν δὲ καὶ Ἑρμείας χρυσόρραπις· ἱστάμενος δὲ - δεξιτερῇ πτερόεντος ἀνείρυε δεσμὰ πεδίλου, - εἰς ὁδὸν ἀίξαι λελιημένος· εἶχε γὰρ ἤδη -δεξιὸν ὀκλάζοντα θοὸν πόδα, τῷ ἔπι λαιὴν - χεῖρα ταθεὶς ἀνέπεμπεν ἐς αἰθέρα κύκλον ὀπωπῆς, -οἷά τε πατρὸς ἄνακτος ἐπιτρωπῶντος ἀκούων. - καὶ νοερῆς ἄφθεγκτα Λατινίδος ὄργια Μούσης -ἅζετο παπταίνων Ἀπολήιος, ὅντινα μύστην -Αὐσονὶς ἀρρήτου σοφίης ἐθρέψατο Σειρήν. - Φοίβου δʼ οὐρεσίφοιτος ὁμόγνιος ἵστατο κούρη -Ἄρτεμις, ἀλλʼ οὐ τόξον ἑκηβόλον, οὐδὲ φαρέτρην - ἰοδόκην ἀνέχουσα κατωμαδὸν ἦν δʼ ἐπὶ γούνων - παρθένιον λεγνωτὸν ἀναζωσθεῖσα χιτῶνα, -καὶ τριχὸς ἀκρήδεμνον ἀνιεμένη πλόκον αὔραις. - ἔμφρονα χαλκὸν Ὅμηρος ἐδείκνυεν, οὔτε μενοινῆς -ἄμμορον, οὔτε νόου κεχρημένον, ἀλλʼ ἄρα μούνης - φωνῆς ἀμβροσίης, ἀνέφαινε δὲ θυιάδα τέχνην. -ἦ καὶ χαλκὸν ἔχευσεν ὁμῆ θεὸς εἴδεϊ μορφῆς· -οὐ γὰρ ἐγὼ κατὰ θυμὸν ὀίομαι ὅττι μιν ἀνὴρ - ἐργοπόνος χάλκευσε παρʼ ἐσχαρεῶνι θαάσσων, - ἀλλʼ αὐτὴ πολύμητις ἀνέπλασε χερσὶν Ἀθήνη -εἶδος ἐπισταμένη τόπερ ᾤκεεν ἐν γὰρ Ὁμήρῳ -αὐτὴ ναιετάουσα σοφὴν ἐφθέγγετο μολπήν. -σύννομος Ἀπόλλωνι πατὴρ ἐμός, ἰσόθεος φὼς - ἵστατο θεῖος Ὅμηρος· ἔικτο μὲν ἀνδρὶ νοῆσαι - γηραλέῳ· τὸ δὲ γῆρας ἔην γλυκύ· τοῦτο γὰρ αὐτῷ - -πλειοτέρην ἔσταζε χάριν· κεκέραστο δὲ κόσμῳ - αἰδοίῳ τε φίλῳ τε· σέβας δʼ ἀπελάμπετο μορφῆς. -αὐχένι μὲν κύπτοντι γέρων ἐπεσύρετο βότρυς -χαίτης, εἰσοπίσω πεφορημένος, ἀμφὶ δʼ ἀκουὰς - πλαζόμενος κεχάλαστο· κάτω δʼ εὐρύνετο πώγων - ἀμφιταθείς, μαλακὸς δὲ καὶ εὔτροχος· οὐδὲ γὰρ ἦεν -ὀξυτενής, ἀλλʼ εὐρὺς ἐπέπτατο, κάλλος ὑφαίνων -στήθεϊ γυμνωθέντι καὶ ἱμερόεντι προσώπῳ. - γυμνὸν δʼ εἶχε μέτωπον, ἐπʼ ἀπλοκάμῳ δὲ μετώπῳ - ἧστο σαοφροσύνη κουροτρόφος· ἀμφὶ δʼ ἄρʼ ὀφρῦς -ἀμφοτέρας προβλῆτας ἐύσκοπος ἔπλασε τέχνη, - οὔτι μάτην· φαέων γὰρ ἐρημάδες ἦσαν ὀπωπαί. -ἀλλʼ οὐκ ἦν ἀλαῷ ἐναλίγκιος ἀνδρὶ νοῆσαι· -ἕζετο γὰρ κενεοῖς χάρις ὄμμασιν ὡς δὲ δοκεύω, - τέχνη τοῦτο τέλεσσεν, ὅπως πάντεσσι φανείη - φέγγος ὑπὸ κραδίην σοφίης ἄσβεστον ἀείρων. - δοιαὶ μὲν ποτὶ βαιὸν ἐκοιλαίνοντο παρειαί, -γήραϊ ῥικνήεντι κατάσχετοι ἀλλʼ ἐνὶ κείναις -αὐτογενής, Χαρίτεσσι συνέστιος, ἵζανεν Αἰδώς· - Πιερικὴ δὲ μέλισσα περὶ στόμα θεῖον ἀλᾶτο, - κηρίον ὠδίνουσα μελισταγές. ἀμφοτέρας δὲ - χεῖρας ἐπʼ ἀλλήλαισι τιθεὶς ἐπερείδετο ῥάβδῳ, -οἷά περ ἐν ζωοῖσιν ἑὴν δʼ ἔκλινεν ἀκουὴν - δεξιτερήν, δόκεεν δὲ καὶ Ἀπόλλωνος ἀκούειν, -ἢ καὶ Πιερίδων τινὸς ἐγγύθεν. ἐν δʼ ἄρα θυμῷ - σκεπτομένῳ μὲν ἔικτο, νόος δὲ οἱ ἔνθα καὶ ἔνθα -ἐξ ἀδύτων πεφόρητο πολυστρέπτοιο μενοινῆς, -Πιερικῆς Σειρῆνος ἀρήιον ἔργον ὑφαίνων. -καὶ Σύριος σελάγιζε σαοφροσύνῃ Φερεκύδης - ἱστάμενος· σοφίης δὲ θεουδέα κέντρα νομεύων, -οὐρανὸν ἐσκοπίαζε, μετάρσιον ὄμμα τιταίνων. - -καὶ σοφὸς Ἡράκλειτος ἔην, θεοείκελος ἀνήρ, -ἔνθεον ἀρχαίης Ἐφέσου κλέος, ὅς ποτε μοῦνος - ἀνδρομέης ἔκλαιεν ἀνάλκιδος ἔργα γενέθλης. - καὶ τύπος ἁβρὸς ἔλαμπεν ἀριστονόοιο Κρατίνου, -ὅς ποτε δημοβόροισι πολισσούχοισιν Ἰώνων - θυμοδακεῖς ἐθόωσεν ἀκοντιστῆρας ἰάμβους, -κῶμον ἀεξήσας, φιλοπαίγμονος ἔργον ἀοιδῆς. - εἱστήκει δὲ Μένανδρος, ὃς εὐπύργοισιν Ἀθήναις -ὁπλοτέρου κώμοιο σελασφόρος ἔπρεπεν ἀστήρ· - πολλάων γὰρ ἔρωτας ἀνέπλασε παρθενικάων, -καὶ Χαρίτων θεράποντας ἐγείνατο παῖδας ἰάμβους, -ἅρπαγας οἰστρήεντας ἀεδνώτοιο κορείης, - μίξας σεμνὸν ἔρωτι μελίφρονος ἄνθος ἀοιδῆς. - Ἀμφιτρύων δʼ ἤστραπτεν, ἀπειρογάμῳ τρίχα δάφνῃ - στεψάμενος· πᾶσιν μὲν ἐύσκοπος εἴδετο μάντις· - ἀλλʼ οὐ μάντις ἔην Ταφίης δʼ ἐπὶ σήματι νίκης -στέμμα πολυστρέπτοισιν ἐπάρμενον εἶχεν ἐθείραις, - Ἀλκμήνης μενέχαρμος ἀριστοτόκου παρακοίτης, - Θουκυδίδης δʼ ἐλέλιξεν ἑὸν νόον ἦν δὲ νοῆσαι -οἷά περ ἱστορίης δημηγόρον ἦθος ὑφαίνων - δεξιτερὴν γὰρ ἀνέσχε μετάρσιον, ὡς πρὶν ἀείδων -Σπάρτης πικρὸν Ἄρηα καὶ αὐτῶν Κεκροπιδάων, - Ἑλλάδος ἀμητῆρα πολυθρέπτοιο τιθήνης. - -%2οὐδʼ Ἁλικαρνησοῦ με παρέδραμε θέσπις ἀηδών, - Ἡρόδοτος πολύιδρις, ὃς ὠγυγίων κλέα φωτῶν, - ὅσσα περ ἠπείρων δυὰς ἤγαγεν, ὅσσα περ αἰὼν -ἔδρακεν ἑρπύζων, ἐνάταις ἀνεθήκατο Μούσαις, - μίξας εὐεπίῃσιν Ἰωνίδος ἄνθεα φωνῆς. - Θήβης δʼ Ὠγυγίης Ἑλικώνιος ἵστατο κύκνος, - Πίνδαρος ἱμερόφωνος, ὃν ἀργυρότοξος Ἀπόλλων - ἔτρεφε Βοιωτοῖο παρὰ σκοπιὴν Ἑλικῶνος, -καὶ μέλος ἁρμονίης ἐδιδάξατο· τικτομένου γὰρ - ἑζόμεναι λιγυροῖσιν ἐπὶ στομάτεσσι μέλισσαι - κηρὸν ἀνεπλάσσαντο, σοφῆς ἐπιμάρτυρα μολπῆς. - Ξεινοφόων δʼ ἤστραπτε, φεράσπιδος ἀστὸς Ἀθήνης, -ὃς πρὶν Ἀχαιμενίδαο μένος Κύροιο λιγαίνων, -εἵπετο φωνήεντι Πλατωνίδος ἤθεϊ Μούσης, -ἱστορίης φιλάεθλον ἀριστώδινος ὀπώρην -συγκεράσας ῥαθάμιγξι φιλαγρύπνοιο μελίσσης. - ἵστατο δʼ Ἀλκμάων κεκλημένος οὔνομα μάντις· - ἀλλʼ οὐ μάντις ἔην ὁ βοώμενος, οὐδʼ ἐπὶ χαίτης -δάφνης εἶχε κόρυμβον· ἐγὼ δʼ Ἀλκμᾶνα δοκεύω, -ὃς πρὶν ἐυφθόγγοιο λύρης ἠσκήσατο τέχνην, -Δώριον εὐκελάδοισι μέλος χορῇσιν ὑφαίνων. - καὶ πρόμος εὐκαμάτων Πομπήιος Αὐσονιήων, - φαιδρὸν ἰσαυροφόνων κειμήλιον ἠνορεάων, -στειβομένας ὑπὸ ποσσὶν Ἰσαυρίδας εἶχε μαχαίρας, - -σημαίνων ὅτι δοῦλον ὑπὸ ζυγὸν αὐχένα Ταύρου - εἴρυσεν, ἀρρήκτῳ πεπεδημένον ἅμματι Νίκης. - κεῖνος ἀνήρ, ὃς πᾶσιν ἔην φάος, ὃς βασιλῆος - ἠγαθέην ἐφύτευσεν Ἀναστασίοιο γενέθλην. -τοῦτο δὲ πᾶσιν ἔδειξεν ἐμὸς σκηπτοῦχος ἀμύμων, - δῃώσας σακέεσσιν Ἰσαυρίδος ἔθνεα γαίης. - ἵστατο δʼ ἄλλος Ὅμηρος, ὃν οὐ πρόμον εὐεπιάων - θέσκελον υἷα Μέλητος ἐυρρείοντος ὀίω, - ἀλλʼ ὃν Θρηικίῃσι παρʼ ᾐόσι γείνατο μήτηρ -Μοιρὼ κυδαλίμη Βυζαντιάς, ἣν ἔτι παιδνὴν -ἔτρεφον εὐεπίης ἡρωίδος ἴδμονα Μοῦσαι· - κεῖνος γὰρ τραγικῆς πινυτὴν ἠσκήσατο τέχνην, - κοσμήσας ἐπέεσσιν ἑὴν Βυζαντίδα πάτρην. -καὶ φίλος Αὐσονίοισι λιγύθροος ἔπρεπε κύκνος -πνείων εὐεπίης Βεργίλλιος, ὅν ποτε Ῥώμης -Θυμβριὰς ἄλλον Ὅμηρον ἀνέτρεφε πάτριος Ἠχώ. -
-
- -
- -

ἐν τῷ Κυζίκῳ εἰς τὸν ναὸν Ἀπολλωνίδος, τῆς μητρὸς Ἀττάλου καὶ Εὐμένους, Ἐπιγράμματα, ἃ εἰς τὰ στυλοπινάκια ἐγέγραπτο, περιέχοντα ἀναγλύφους ἱστορίας, ὡς ὑποτέτακται.

-
- - -Anonymi Epigrammatici - - - -τάνδε Διὸς δμαθεῖσαν ἐν ὠδίνεσσι κεραυνῷ, - καλλίκομον Κάδμου παῖδα καὶ Ἁρμονίης, - ματέρα θυρσοχαρὴς ἀνάγει γόνος ἐξ Ἀχέροντος, - τὰν ἄθεον Πενθέως ὕβριν ἀμειβόμενος. -
-
- - -Anonymi Epigrammatici - - - -τὸν βαθὺν Ἀρκαδίης προλιπὼν πάτον εἵνεκα ματρὸς - Αὔγης, τᾶσδʼ ἐπέβην γᾶς Τεϋθραντιάδος, - Τήλεφος, Ἡρακλέους φίλος γόνος αὐτὸς ὑπάρχων, -ὄφρα μιν ἂψ ἀγάγω ἐς πέδον Ἀρκαδίης. -
-
- - -Anonymi Epigrammatici - - - -Ἀλκιμέδη ξύνευνον Ἀμύντορα παιδὸς ἐρύκει, - φοίνικος δʼ ἐθέλει παῦσαι χόλον γενέτου, - -ὅττι περ ἤχθετο πατρὶ ʽσαόφρονος εἵνεκα μητρός, -παλλακίδος δούλης λέκτρα προσιεμένῳ· -κεῖνος δʼ αὖ δολίοις ψιθυρίσμασιν ἤχθετο κούρῳ, - ἦγε δʼ ἐς ὀφθαλμοὺς λαμπάδα παιδολέτιν, -
-
- - -Anonymi Epigrammatici - - - -μητρυιὰν Κλυτίος καὶ Κλυτόνοος Πολυμήδης -κτείνουσι Φρυγίην, ματρὸς ὑπὲρ σφετέρας. - Κλειοπάτρη δʼ ἐπὶ τοῖσιν ἀγάλλεται, ἣ πρὶν ἐπεῖδεν - τὰν Φινέως γαμετὰν δαμναμένην ὁσίως, -
-
- - -Anonymi Epigrammatici - - - -Κρεσφόντου γενέτην πέφνες τὸ πάρος, Πολυφόντα, - κουριδίης ἀλόχου λέκτρα θέλων μιάναι· - ὀψὲ δέ σοι πάϊς ἧκε φόνῳ γενέτῃ προσαμύνων, -καί σε κατακτείνει ματρὸς ὑπὲρ Μερόπας. -τοὔνεκα καὶ δόρυ πῆξε μεταφρένῳ, ἁ δʼ ἐπαρήγει, - βριθὺ κατὰ κροτάφων βάκτρον ἐρειδομένα. -
-
- - -Anonymi Epigrammatici - - - -Γηγενέα Πυθῶνα, μεμιγμένον ἑρπετὸν ὁλκοῖς, - ἐκνεύει Λατώ, πάγχυ μυσαττομένη· - -σκυλᾶν γὰρ ἐθέλει πινυτὰν θεὸν ἀλλά γε τόξῳ -θῆρα καθαιμάσσει Φοῖβος ἀπὸ σκοπιῆς· -Δελφὸν δʼ αὖ θήσει τρίπον ἔνθεον ἐκ δʼ ὅδʼ ὀδόντων -πικρὸν ἀποπνεύσει ῥοῖζον ὀδυρόμενος -
-
- - -Anonymi Epigrammatici - - - -Ἀμφίων καὶ Ζῆθε, Διὸς σκυλακεύματα, Δίρκην - κτείνατε τάνδʼ ὀλέτιν ματέρος Ἀντιόπας, - δέσμιον ἣν πάρος εἶχε διὰ ζηλήμονα μῆνιν· - νῦν δʼ ἱκέτις αὐτὴ λίσσετʼ ὀδυρομένη. -ᾇ γε καὶ ἐκ ταύροιο καθάπτετε δίπλακα σειρήν, -ὄφρα δέμας σύρῃ; τῆσδε κατὰ ξυλόχου. -
-
- - -Anonymi Epigrammatici - - - -μᾶτερ Ὀδυσσῆος πινυτόφρονος Ἀντίκλεια, - ζῶσα μὲν εἰς Ἰθάκην οὐχ ὑπέδεξο πάιν· -ἀλλά σε νῦν Ἀχέροντος ἐπὶ ῥηγμῖσι γεγῶσαν - θαμβεῖ, ἀνὰ γλυκεροὰν ματέρα δερκόμενος. -
-
- - -Anonymi Epigrammatici - - - -μὴ Τυρὼ τρύχοι σε περισπείρημα Σιδηροῦς - Σαλμωνεῖ γενέτᾳ τῷδʼ ὑποπτησσομένην· - -οὐκέτι γὰρ δουλώσει ἐν ἕρκεσιν, ἐγγύθι λεύσσων - Νηλέα καὶ Πελίαν τούσδε καθεξομένους. -
-
- - -Anonymi Epigrammatici - - - -φαῖνε, Θόαν, Βάκχοιο φυτὸν τόδε· ματέρα γάρ σου - ῥύσῃ τοῦ θανάτου, οἰκέτιν Ὑψιπύλαν· -ἃ· τὸν ἀπʼ Εὐρυδίκας ἔτλη χόλον, ἦμος † ἀφοῦθαρ -ὕδρος ὁ γαγενέτας ὤλεσεν Ἀρχέμορον. -στεῖχε δὲ καὶ σὺ λιπὼν Ἀσωπίδος Εὔνοε † κούραν -γειναμένην ἄξων Λῆμνον ἐς ἠγαθέην, -
-
- - -Anonymi Epigrammatici - - - -ἔτλης καὶ σὺ λέχη Δανάης, Πολύδεκτα, μιαίνειν, - δυσφήμοις εὐναῖς τὸν Δίʼ ἀμειψάμενος· - ἀνθʼ ὧν ὄμματʼ ἔλυσε τὰ ;Γοργόνος ἐνθάδε Περσεύς, - γυῖα λιθουργήσας, ματρὶ χαριζόμενος. -
-
- - -Anonymi Epigrammatici - - - -Φόρβαν καὶ Πολύμηλον ὅδʼ Ἰξίων βάλε γαίῃ;, -ποινὰν τᾶς ἰδίας ματρὸς ἀμυνόμενος. - -
-
- - -Anonymi Epigrammatici - - - -Ἀλκίδας ὁ θρασὺς Ῥαδαμάνθυϊ ματέρα τάνδε, - Ἀλκμήναν, ὅσιον πρὸς λέχος ἐξέδοτο. -
-
- - -Anonymi Epigrammatici - - - -μάργε καὶ ἀφροσύνῃ μεμεθυσμένε, τίπτε βιαίως - εἰς εὐνὰς ἐτράπης τᾶς Διὸς εὐνέτιδος; -ὅς σε δὴ αἵματι φύρσε κατάξια, θηρσὶ δὲ βορρὰν - καὶ πτανοῖς ἐπὶ γᾷ εἴασε νῦν ὁσίως. -
-
- - -Anonymi Epigrammatici - - - -οὐκέτι Προιτιάδου φόνον ἔσχεθε Βελλεροφόντης, -οὐδʼ ἐκ τοῦ πατρὸς † τειρομένου θάνατον. - γλαῦκʼ ἄκραντα † γένους δόλον Ἰοβάτου δʼ ὑπαλύξει, -οὕτως γὰρ Μοιρῶν ἐπέκλωσε λίνα. - καὶ σὺ πατρὸς φόνον αὐτὸς ἀπήλασας ἐγγύθεν ἐλθών, -καὶ μύθων ἐσθλῶν μάρτυς ἐπεφράσαο. - -
-
- - -Anonymi Epigrammatici - - - -Αἴολε καὶ Βοιωτέ, σοφὸν φιλομήτορα μόχθον -πρήξατε, μητέρʼ ἑὴν ῥυόμενοι θανάτου· -τοὔνεκα γὰρ καὶ κάρτα πεφήνατε ἄλκιμοι ἄνδρες, -ὃς μὲν ἀπʼ Αἰολίης, ὃς δʼ ἀπὸ Βοιωτίης -
-
- - -Anonymi Epigrammatici - - - -πυρὸς καὶ γαίης - -
-
- - -Anonymi Epigrammatici - - - -οὐ ψευδὴς ὅδε μῦθος, ἀληθείῃ δὲ κέκασται, -Κυδίππης παίδων εὐσεβίης θʼ ὁσίης. -ἡδυχαρὴς γὰρʼ ἔην κόπος ἀνδράσι χʼ ὥριος οὗτος, -μητρὸς ἐπʼ εὐσεβίῃ κλεινὸν ἔθεντο πόνον. -χαίροιτʼ εἰν ἐνέροισιν ἐπʼ εὐσεβίῃ κλυτοὶ ἄνδρες, - καὶ τὸν ἀπʼ αἰώνων μῦθον ἔχοιτε μόνοι. - -
-
- - -Claudianus - - - -τόνδε σὺ μὲν παίδων κρύφιον γόνον Ἄρεϊ τίκτεις, -Ῥῆμόν τε ξυνῶν καὶ Ῥωμύλον λεχέων, -θὴρ δὲ λύκαινʼ ἄνδρωσεν ὑπὸ σπήλυγγι τιθηνός, -οἵ σε δυσηκέστων ἥρπασαν ἐκ καμάτων. -
-
- -
-
- - -Meleager - - -Μοῦσα φίλα, τίνι τάνδε φέρεις πάγκαρπον ἀοιδάν; -ἢ τίς ὁ καὶ τεύξας ὑμνοθετᾶν στέφανον; - ἄνυσε μὲν Μελέαγρος, ἀριζάλῳ δὲ Διοκλεῖ -μναμόσυνον ταύταν ἐξεπόνησε χάριν, -πολλὰ μὲν ἐμπλέξας Ἀνύτης κρίνα, πολλὰ δὲ Μοιροῦς -λείρια, καὶ Σαπφοῦς βαιὰ μέν, ἀλλὰ ῥόδα· -νάρκισσόν τε τορῶν Μελανιππίδου ἔγκυον ὕμνων, -καὶ νέον οἰνάνθης κλῆμα Σιμωνίδεω· - σὺν δʼ ἀναμὶξ πλέξας μυρόπνουν εὐάνθεμον ἶριν -Νοσσίδος, ἧς δέλτοις κηρὸν ἔτηξεν Ἔρως· -τῇ δʼ ἅμα καὶ σάμψυχον ἀφʼ ἡδυπνόοιο Ῥιανοῦ, - καὶ γλυκὺν Ἠρίννης παρθενόχρωτα κρόκον, - Ἀλκαίου τε λάληθρον ἐν ὑμνοπόλοις ὑάκινθον, - καὶ Σαμίου δάφνης κλῶνα μελαμπέταλον -ἐν δὲ Λεωνίδεω θαλεροὺς κισσοῖο κορύμβους, - Μνασάλκου τε κόμας ὀξυτόρου πίτυος· -βλαισήν τε πλατάνιστον ἀπέθρισε Παμφίλου οἴμης, - σύμπλεκτον καρύης ἔρνεσι Παγκράτεος, - -Τύμνεὼ τʼ εὐπέταλον λεύκην, χλοερόν τε σίσυμβρον -Νικίου, Εὐφήμου τʼ ἀμμότροφον πάραλον -ἐν δʼ ἄρα Δαμάγητον, ἴον μέλαν, ἡδύ τε μύρτον - Καλλιμάχου, στυφελοῦ μεστὸν ἀεὶ μέλιτος, - λυχνίδα τʼ Εὐφορίωνος, ἰδʼ ἐν Μούσαις κυκλάμινον, -ὃς Διὸς ἐκ κούρων ἔσχεν ἐπωνυμίην. -τῇσι δʼ ἅμʼ Ἡγήσιππον ἐνέπλεκε, μαινάδα βότρυν, - Πέρσου τʼ εὐώδη σχοῖνον ἀμησάμενος, - σὺν δʼ ἅμα καὶ γλυκὺ μῆλον ἀπʼ ἀκρεμόνων Διοτίμου, - καὶ ῥοιῆς ἄνθη πρῶτα Μενεκράτεος, - σμυρναίους τε κλάδους Νικαινέτου, ἠδὲ Φαέννου -τέρμινθον, βλωθρὴν τʼ ἀχράδα Σιμμίεω· -ἐν δὲ καὶ ἐκ λειμῶνος ἀμωμήτοιο σελίνου - βαιὰ διακνίζων ἄνθεα Παρθενίδος, -λείψανὰ τʼ εὐκαρπεῦντα μελιστάκτων ἀπὸ Μουσέων, - ξανθοὺς ἐκ καλάμης Βακχυλίδεω στάχυας· -ἐν δʼ ἄρʼ Ἀνακρείοντα, τὸ μὲν γλυκὺ κεῖνο μέλισμα, -νέκταρος, εἰς δʼ ἐλέγους ἄσπορον ἀνθέμιον -ἐν δὲ καὶ ἐκ φορβῆς σκολιότριχος ἄνθος ἀκάνθης - Ἀρχιλόχου, μικρὰς στράγγας ἀπʼ ὠκεανοῦ· - τοῖς δʼ ἅμʼ Ἀλεξάνδροιο νέους ὄρπηκας ἐλαίης, -ἠδὲ Πολυκλείτου πορφυρέην κύανον. -ἐν δʼ ἄρʼ ἀμάρακον ἧκε, Πολύστρατον, ἄνθος ἀοιδῶν, -φοίνισσάν τε νέην κύπρον ἀπʼ Ἀντιπάτρου· -καὶ μὴν καὶ Συρίαν σταχυότριχα θήκατο νάρδον, - ὑμνοθέταν, Ἑρμοῦ δῶρον ἀειδόμενον -ἐν δὲ Ποσείδιππόν τε καὶ Ἡδύλον, ἄγριʼ ἀρούρης, -Σικελίδεὼ τʼ ἀνέμοις ἄνθεα φυόμενα. - -ναὶ μὴν καὶ χρύσειον ἀεὶ θείοιο Πλάτωνος - κλῶνα, τὸν ἐξ ἀρετῆς πάντοθι λαμπόμενον - ἄστρων τʼ ἴδριν Ἄρατον ὁμοῦ βάλεν, οὐρανομάκεως -φοίνικος κείρας πρωτογόνους ἕλικας, -λωτὸν τʼ εὐχαίτην Χαιρήμονος, ἐν φλογὶ μίξας - Φαιδίμου, Ἀνταγόρου τʼ εὔστροφον ὄμμα βοός, -τάν τε φιλάκρητον Θεοδωρίδεω νεοθαλῆ -ἕρπυλλον, κυάμων τʼ ἄνθεα Φανίεω, -ἄλλων τʼ ἔρνεα πολλὰ νεόγραφα· τοῖς δʼ ἅμα Μούσης - καὶ σφετέρης ἔτι που πρώιμα λευκόια. - ἀλλὰ φίλοις μὲν ἐμοῖσι φέρω χάριν ἔστι δὲ μύσταις - κοινὸς ὁ τῶν Μουσέων ἡδυεπὴς στέφανος. -
-
- - -Philippus - - -ἄνθεά σοι δρέψας Ἑλικώνια, καὶ κλυτοδένδρου - Πιερίης κείρας πρωτοφύτους κάλυκας, - καὶ σελίδος νεαρῆς θερίσας στάχυν, ἀντανέπλεξα - τοῖς Μελεαγρείοις ὡς ἴκελον στεφάνοις. -ἀλλὰ παλαιοτέρων εἰδὼς κλέος, ἐσθλὲ Κάμιλλε, - γνῶθι καὶ ὁπλοτέρων τὴν ὀλιγοστιχίην. - Ἀντίπατρος πρέψει στεφάνῳ στάχυς· ὡς δὲ κόρυμβος - Κριναγόρας λάμψει δʼ ὡς βότρυς Ἀντίφιλος, - Τύλλιος ὡς μελίλωτον, ἀμάρακον ὣς Φιλόδημος· -μύρτα δʼ ὁ Παρμενίων· ὡς ῥόδον Ἀντιφάνης· - κισσὸς δʼ Αὐτομέδων Ζωνᾶς κρίνα δρῦς δὲ Βιάνωρ· - Ἀντίγονος δʼ ἐλάη, καὶ Διόδωρος ἴον -Εὔηνον δάφνῃ, συνεπιπλεκτοὺς δὲ περισσοὺς -εἴκασον οἷς ἐθέλεις ἄνθεσιν ἀρτιφύτοις. - -
-
- - -Agathias Scholasticus - - -

συλλογὴ νέων ἐπιγραμμάτων ἐκτεθεῖσα ἐν Κωνσταντίνου πόλει πρὸς Θεόδωρον Δεκουρίωνα τὸν Κοσμᾶ· εἴρηται δὲ τὰ προοίμια μετὰ τὰς συνεχεῖς ἀκροάσεις τὰς κατʼ ἐκεῖνο καιροῦ γενομένας.

-οἶμαι μὲν ὑμᾶς, ἄνδρες, ἐμπεπλησμένους -ἐκ τῆς τοσαύτης τῶν λόγων πανδαισίας, - ἔτι που τὰ σιτία προσκόρως ἐρυγγάνειν· - καὶ δὴ κάθησθε τῇ τρυφῇ σεσαγμένοι· -λόγων γὰρ ἡμῖν πολυτελῶν καὶ ποικίλων - πολλοὶ προθέντες παμμιγεῖς εὐωχίας, -περιφρονεῖν πείθουσι τῶν εἰθισμένων. -τί δὲ νῦν ποιήσω; μὴ τὰ προὐξειργασμένα -οὕτως ἐάσω συντετῆχθαι κείμενα; -ἢ καὶ προθῶμαι τῆς ἀγορᾶς ἐν τῷ μέσῳ, - παλιγκαπήλοις εὐτελῶς ἀπεμπολῶν; - καὶ τίς μετασχεῖν τῶν ἐμῶν ἀνέξεται; -τίς δʼ ἂν πρίαιτο τοὺς λόγους τριωβόλου, -εἰ μὴ φέροι πως ὦτα μὴ τετρημένα; -ἀλλʼ ἐστὶν ἐλπὶς εὐμενῶς τῶν δρωμένων - ὑμᾶς μεταλαβεῖν, κοὐ κατεβλακευμένως· - ἔθος γὰρ ὑμῖν τῇ προθυμίᾳ μόνῃ -τῇ τῶν καλούντων ἐμμετρεῖν τὰ σιτία. - καὶ πρός γε τούτῳ δεῖπνον ἠρανισμένον -ἥκω προθήσων ἐκ νέων ἡδυσμάτων. - ἐπεὶ γὰρ οὐκ ἔνεστιν ἐξ ἐμοῦ μόνου - ὑμᾶς μεταλαβεῖν, ἄνδρες, ἀξίας τροφῆς, - πολλοὺς ἔπεισα συλλαβεῖν μοι τοῦ πόνου, - καὶ συγκαταβαλεῖν καὶ συνεστιᾶν πλέον. - -καὶ δὴ παρέσχον ἀφθόνως οἱ πλούσιοι -ἐξ ὧν τρυφῶσι· καὶ παραλαβὼν γνησίως -ἐν τοῖς ἐκείνων πέμμασι φρυάττομαι. -τοῦτο δέ τις αὐτῶν προσφόρως, δεικνὺς ἐμέ, - ἴσως ἐρεῖ πρὸς ἄλλον “ἀρτίως ἐμοῦ -μάζαν μεμαχότος μουσικήν τε καὶ νέαν, -οὗτος παρέθηκεν τὴν ὑπʼ ἐμοῦ μεμαγμένην.” -ταυτὶ μὲν οὖν ἐρεῖ τις † οὐδὲ τῶν σοφωτάτων, -τῶν ὀψοποιῶν, ὧν χάριν δοκῶ μόνος -εἶναι τοσαύτης ἡγεμὼν πανδαισίας. -θαρρῶν γὰρ αὐτοῖς λιτὸν οἴκοθεν μέρος -καὐτὸς παρέμιξα, τοῦ δοκεῖν μὴ παντελῶς - ξένος τις εἶναι τῶν ὑπʼ ἐμοῦ συνηγμένων. - ἀλλʼ ἐξ ἑκάστου σμικρὸν εἰσάγω μέρος, - ὅσον ἀπογεῦσαι· τῶν δὲ λοιπῶν εἰ θέλοι -τυχεῖν τις ἁπάντων καὶ μετασχεῖν εἰς κόρον, - ἴστω γε ταῦτα κατʼ ἀγορὰν ζητητέα. -κόσμον δὲ προσθεὶς τοῖς ἐμοῖς πονήμασι, -ἐκ τοῦ Βασιλέως τοὺς προλόγους ποιήσομαι· -ἅπαντα γάρ μοι δεξιῶς προβήσεται. -καί μοι μεγίστων πραγμάτων ὑμνουμένων - εὑρεῖν γένοιτο καὶ λόγους ἐπηρμένους. -μή τις ὑπαυχενίοιο λιπὼν ζωστῆρα λεπάδνου - βάρβαρος ἐς Βασιλῆα βιημάχον ὄμμα τανύσσῃ· - μηδʼ ἔτι Περσὶς ἄναλκις ἀναστείλασα καλύπτρην -ὄρθιον ἀθρήσειεν ἐποκλάζουσα δὲ γαίῃ, - καὶ λόφον αὐχήεντα καταγνάμπτουσα τενόντων, -Αὐσονίοις ἄκλητος ὑποκλίνοιτο ταλάντοις. - ἑσπερίη θεράπαινα, σὺ δʼ ἐς κρηπῖδα Γαδείρων, - καὶ παρὰ πορθμὸνἼβηρα καὶ Ὠκεανίτιδα Θούλην, -ἤπιον ἀμπνεύσειας, ἀμοιβαίων δὲ τυράννων - -κράατα μετρήσασα τεῇ κρυφθέντα κονίῃ, - θαρσαλέαις παλάμῃσι φίλην ἀγκάζεο Ῥώμην -Καυκασίῳ δὲ τένοντι καὶ ἐν ῥηγμῖνι Κυταίῃ, -ὁππόθι ταυρείοιο ποδὸς δουπήτορι χαλκῷ -σκληρὰ σιδηρείης ἐλακίζετο νῶτα κονίης, - σύννομον Ἀδρυάδεσσιν ἀναπλέξασα χορείην - Φασιὰς εἱλίσσοιτο φίλῳ σκιρτήματι νύμφη, - καὶ καμάτους μέλψειε πολυσκήπτρου βασιλῆος, - μόχθον ἀπορρίψασα γιγαντείου τοκετοῖο. -μηδὲ γὰρ αὐχήσειεν Ἰωλκίδος ἔμβολον Ἀργοῦς, - ὅττι πόνους ἥρωος ἀγασσαμένη Παγασαίου - οὐκέτι Κολχὶς ἄρουρα, γονῇ πλησθεῖσα Γιγάντων, -εὐπτολέμοις σταχύεσσι μαχήμονα βῶλον ἀνοίγει. - κεῖνα γὰρ ἢ μῦθός τις ἀνέπλασεν, ἢ διὰ τέχνης -οὐχ ὁσίης τετέλεστο, πόθων ὅτε λύσσαν ἑλοῦσα -παρθενικὴ δολόεσσα μάγον κίνησεν ἀνάγκην - ἀλλὰ δόλων ἔκτοσθε καὶ ὀρφναίου κυκεῶνος - Βάκτριος ἡμετέροισι Γίγας δούπησε βελέμνοις. -οὐκέτι μοι χῶρός τις ἀνέμβατος, ἀλλʼ ἐνὶ πόντῳ -Ὑρκανίου κόλποιο καὶ ἐς βυθὸν Αἰθιοπῆα - Ἰταλικαῖς νήεσσιν ἐρέσσεται ἥμερον ὕδωρ. -ἀλλʼ ἴθι νῦν, ἀφύλακτος ὅλην ἤπειρον ὁδεύων, -Αὐσόνιε, σκίρτησον, ὁδοιπόρε· Μασσαγέτην δὲ -ἀμφιθέων ἀγκῶνα καὶ ἄξενα τέμπεα Σούσων, -Ἰνδῴης ἐπίβηθι κατʼ ὀργάδος, ἐν δὲ κελεύθοις -εἴποτε διψήσειας, ἀρύεο δοῦλον Ὑδάσπην· - ναὶ μὴν καὶ κυανωπὸν ὑπὲρ δύσιν ἄτρομος ἕρπων - κύρβιας Ἀλκείδαο μετέρχεο· θαρσαλέως δὲ - ἴχνιον ἀμπαύσειας ἐπὶ ψαμάθοισιν Ἰβήρων, -ὁππόθι, καλλιρέεθρον ὑπὲρ βαλβῖδα θαλάσσης, - δίζυγος ἠπείροιο συναντήσασα κεραίη - ἐλπίδας ἀνθρώποισι βατῆς εὔνησε πορείης. - -ἐσχατιὴν δὲ Λίβυσσαν ἐπιστείβων Νασαμώνων - ἔρχεο καὶ παρὰ Σύρτιν, ὅπῃ νοτίῃσι θυέλλαις -ἐς κλίσιν ἀντίπρωρον ἀνακλασθεῖσα Βορῆος, - καὶ ψαφαρὴν ἄμπωτιν ὕπερ, ῥηγμῖνι ἁλίπλῳ - ἀνδράσι δῖα θάλασσα πόρον χερσαῖον ἀνοίγει. -οὐδὲ γὰρ ὀθνείης σε δεδέξεται ἤθεα γαίης, - ἀλλὰ σοφοῦ κτεάνοισιν ὁμιλήσεις Βασιλῆος, -ἔνθα κεν ἀίξειας, ἐπεὶ κυκλώσατο κόσμον -κοιρανίῃ· Τάναϊς δὲ μάτην ἤπειρον ὁρίζων -ἐς Σκυθίην πλάζοιτο καὶ ἐς Μαιώτιδα λίμνην. -τοὔνεκεν, ὁππότε πάντα φίλης πέπληθε γαλήνης, -ὁππότε καὶ ξείνοιο καὶ ἐνδαπίοιο κυδοιμοῦ -ἐλπίδες ἐθραύσθησαν ὑφʼ ἡμετέρῳ Βασιλῆι, - δεῦρο, μάκαρ Θεόδωρε, σοφὸν στήσαντες ἀγῶνα - παίγνια κινήσωμεν ἀοιδοπόλοιο χορείης. - σοὶ γὰρ ἐγὼ τὸν ἄεθλον ἐμόχθεον εἰς σὲ δὲ μύθων - ἐργασίην ἤσκησα, μιῇ δʼ ὑπὸ σύζυγι βίβλῳ -ἐμπορίην ἤθροισα πολυξείνοιο μελίσσης, - καὶ τόσον ἐξ ἐλέγοιο πολυσπερὲς ἄνθος ἀγείρας, - στέμμα σοι εὐμύθοιο καθήρμοσα Καλλιοπείης, -ὡς φηγὸν Κρονίωνι καὶ ὁλκάδας Ἐννοσιγαίῳ, -ὡς Ἄρεϊ ζωστῆρα καὶ Ἀπόλλωνι φαρέτρην, -ὡς χέλυν Ἑρμάωνι καὶ ἡμερίδας Διονύσῳ. -οἶδα γὰρ ὡς ἄλληκτον ἐμῆς ἱδρῶτι μερίμνης -εὖχος ἐπιστάξειεν ἐπωνυμίη Θεοδώρου. -πρῶτα δέ σοι λέξαιμι, παλαιγενέεσσιν ἐρίζων, -ὅσσαπερ ἐγράψαντο νέης γενετῆρες ἀοιδῆς -ὡς προτέροις μακάρεσσιν ἀνειμένα· καὶ γὰρ ἐῴκει - γράμματος ἀρχαίοιο σοφὸν μίμημα φυλάξαι. -ἀλλὰ πάλιν μετʼ ἐκεῖνα % παλαίτερον εὖχος ἀγείρει -ὅσσαπερ ἢ γραφίδεσσι χαράξαμεν ἤ τινι χώρῳ, - -εἴτε καὶ εὐποίητον ἐπὶ βρέτας, εἴτε καὶ ἄλλης -τέχνης ἐργοπόνοιο πολυσπερέεσσιν ἀέθλοις. -καὶ τριτάτην βαλβῖδα νεήνιδος ἔλλαχε βίβλου - ὅσσα θέμις, τύμβοισι τάπερ Θεὸς ἐν μὲν ἀοιδῇ - ἐκτελέειν νεύσειεν, ἐν ἀτρεκίῃ δὲ διώκειν. -ὅσσα δὲ καὶ βιότοιο πολυσπερέεσσι κελεύθοις -γράψαμεν, ἀσταθέος δὲ τύχης σφαλεροῖσι ταλάντοις, -δέρκεό μοι βίβλοιο παρὰ κρηπῖδα τετάρτην. -ναὶ τάχα καὶ πέμπτοιο χάρις θέλξειεν ἀέθλου, - ὁππόθι κερτομέοντες ἐπεσβόλον ἦχον ἀοιδῆς - γράψαμεν. ἑκταῖον δὲ μέλος κλέπτουσα Κυθήρη -εἰς ὀάρους ἐλέγοιο παρατρέψειε πορείην - καὶ γλυκεροὺς ἐς ἔρωτας. ἐν ἑβδομάτῃ δὲ μελίσσῃ -εὐφροσύνας Βάκχοιο, φιλακρήτους τε χορείας, - καὶ μέθυ, καὶ κρητῆρα, καὶ ὄλβια δεῖπνα νοήσεις. -
-
- - -Agathias Scholasticus - - -στῆλαι καὶ γραφίδες καὶ κύρβιες, εὐφροσύνης μὲν - αἴτια τοῖς ταῦτα κτησαμένοις μεγάλης, - ἀλλʼ ἐς ὅσον ζώουσι τὰ γὰρ κενὰ κύδεα φωτῶν - ψυχαῖς οἰχομένων οὐ μάλα συμφέρεται -ἡ δʼ ἀρετὴ σοφίης τε χάρις καὶ κεῖθι συνέρπει, - κἀνθάδε μιμνάζει μνῆστιν ἐφελκομένη. -οὕτως οὔτε Πλάτων βρενθύεται οὔτʼ [ἄρʼ] Ὅμηρος - χρώμασιν ἢ στήλαις, ἀλλὰ μόνῃ σοφίῃ. -ὄλβιοι ὧν μνήμη πινυτῶν ἐνὶ τεύχεσι βίβλων, -ἀλλʼ οὐκ ἐς κενεὰς εἰκόνας ἐνδιάει. -
-
- -
- -
- - -Constantinus Cephalas - - - -ἀρχὴν Ἔρωτα τῶν λόγων ποιήσομαι· - πυρσὸν γὰρ οὗτος ἐξανάπτει τοῖς νέοις. -
-
- - -Anonymi Epigrammatici - - -τὴν καταφλεξίπολιν Σθενελαΐδα, τὴν βαρύμισθον, - τὴν τοῖς βουλομένοις χρυσὸν ἐρευγομένην -γυμνήν μοι διὰ νυκτὸς ὅλης παρέκλινεν ὄνειρος -ἄχρι φίλης ἠοῦς προῖκα χαριζομένην. -οὐκέτι γουνάσομαι τὴν βάρβαρον, οὐδʼ ἐπʼ ἐμαυτῷ -κλαύσομαι, ὕπνον ἔχων κεῖνα χαριζόμενον. -
-
- - -Antipater - - -ὄρθρος ἔβη, Χρύσιλλα, πάλαι δʼ ἠῷος ἀλέκτωρ - κηρύσσων φθονερὴν Ἠριγένειαν ἄγει. - ὀρνίθων ἔρροις φθονερώτατος, ὅς με διώκεις - οἴκοθεν εἰς πολλοὺς ἠιθέων ὀάρους. -γηράσκεις, Τιθωνέ· τί γὰρ σὴν εὐνέτιν Ἠῶ -οὕτως ὀρθριδίην ἤλασας ἐκ λεχέων; - -
-
- - -Philodemus - - -τὸν σιγῶντα, Φιλαινί, συνίστορα τῶν ἀλαλήτων - λύχνον ἐλαιηρῆς ἐκμεθύσασα δρόσου, - ἔξιθι· μαρτυρίην γὰρ Ἔρως μόνος οὐκ ἐφίλησεν - ἔμπνουν καὶ πηκτὴν κλεῖε, Φιλαινί, θύρην. -καὶ σύ, φίλη Ξανθώ, με· σὺ δʼ, ὦ φιλεράστρια κοίτη, - ἤδη τῆς Παφίης ἴσθι τὰ λειπόμενα. -
-
- - -Statyllius Flaccus - - -ἀργύρεον νυχίων με συνίστορα πιστὸν ἐρώτων -οὐ πιστῇ λύχνον Φλάκκος ἔδωκε Νάπῃ, -ἧς παρὰ νῦν λεχέεσσι μαραίνομαι, εἰς ἐπιόρκου - παντοπαθῆ κούρης αἴσχεα δερκόμενος. -Φλάκκε, σὲ δʼ ἄγρυπνον χαλεπαὶ τείρουσι μέριμναι· -ἄμφω δʼ ἀλλήλων ἄνδιχα καιόμεθα. -
-
- - -Callimachus - - -ὤμοσε Καλλίγνωτος Ἰωνίδι, μήποτε κείνης -ἕξειν μήτε φίλον κρέσσονα μήτε φίλην. -ὤμοσεν· ἀλλὰ λέγουσιν ἀληθέα, τοὺς ἐν ἔρωτι - ὅρκους.μὴ δύνειν οὔατʼ ἐς ἀθανάτων. -νῦν δʼ ὁ μὲν ἀρσενικῷ θέρεται πυρί· τῆς δὲ ταλαίνης - νύμφης, ὡς Μεγαρέων, οὐ λόγος οὐδʼ ἀριθμός. . -
-
- - -Asclepiades - - -λύχνε, σὲ γὰρ παρεοῦσα τρὶς ὤμοσεν Ἡράκλεια -ἥξειν, κοὐχ ἥκει· λύχνε, σὺ δʼ, εἰ θεὸς εἶ, - -τὴν δολίην ἀπάμυνον ὅταν φίλον ἔνδον ἔχουσα - παίζῃ, ἀποσβεσθεὶς μηκέτι φῶς πάρεχε. -
-
- - -Meleager - - -νὺξ ἱερὴ καὶ λύχνε, συνίστορας οὔτινας ἄλλους - ὅρκοις, ἀλλʼ ὑμέας, εἱλόμεθʼ ἀμφότεροι -χὠ μὲν ἐμὲ στέρξειν, κεῖνον δʼ ἐγὼ οὔ ποτε λείψειν - ὠμόσαμεν κοινὴν δʼ εἴχετε μαρτυρίην. -νῦν δʼ ὁ μὲν μὲν ὅρκια φησιν ἐν ὕδατι κεῖνα φέρεσθαι, - λύχνε, σὺ δʼ ἐν κόλποις αὐτὸν ὁρᾷς ἑτέρων. -
-
- - -Rufinus - - -Ῥουφῖνος τῇ μῇ γλυκερωτάτῃ Ἐλπίδι πολλὰ -χαίρειν, εἰ χαίρειν χωρὶς ἐμοῦ δύναται. -οὐκέτι βαστάζω, μὰ τὰ ς1ʼ ὄμματα, τὴν φιλέρημον - καὶ τὴν μουνολεχῆ σεῖο διαζυγίην -ἀλλʼ αἰεὶ δακρύοισι πεφυρμένος ἢ πὶ Κορησσὸν -ἔρχομαι ἢ μεγάλης νηὸν ἐς Ἀρτέμιδος. -αὔριον ἀλλὰ πάτρη με δεδέξεται· ἐς δὲ σὸν ὄμμα - πτήσομαι, ἐρρῶσθαι μυρία ς1ʼ εὐχόμενος. -
-
- - -Alcaeus - - -ἐχθαίρω τὸν Ἔρωτα· τί γὰρ βαρὺς οὐκ ἐπὶ θῆρας -ὄρνυται, ἀλλʼ ἐπʼ ἐμὴν ἰοβολεῖ κραδίην; -τί πλέον, εἰ θεὸς ἄνδρα καταφλέγεί; ἢ τί τὸ σεμνὸν - δῃώσας ἀπʼ ἐμῆς ἆθλον ἔχει κεφαλῆς; -
-
- - -Anonymi Epigrammatici - - -εἰ τοὺς ἐν πελάγει σῴζεις, Κύπρι, κἀμὲ τὸν ἐν γᾷ - ναυαγόν, φιλίη, σῶσον ἀπολλύμενον. - -
-
- - -Rufinus - - -λουσάμενοι, Προδίκη, πυκασώμεθα, καὶ τὸν ἄκρατον -ἕλκωμεν, κύλικας μείζονας αἰρόμενοι. -βαιὸς ὁ χαιρόντων ἐστὶν βίος· εἶτα τὰ λοιπὰ - γῆρας κωλύσει, καὶ τὸ τέλος θάνατος. -
-
- - -Philodemus - - -ἑξήκοντα τελεῖ Χαριτὼ λυκαβαντίδας ὥρας, - ἀλλʼ ἔτι κυανέων σύρμα μένει πλοκάμων, -κἠν στέρνοις ἔτι κεῖνα τὰ λύγδινα κώνια μαστῶν -ἕστηκεν, μίτρης γυμνὰ περιδρομάδος, -καὶ χρὼς ἀρρυτίδωτος ἔτʼ ἀμβροσίην, ἔτι πειθὼ - πᾶσαν, ἔτι στάζει μυριάδας χαρίτων. - ἀλλὰ πόθους ὀργῶντας ὅσοι μὴ φεύγετʼ ἐρασταί, - δεῦρʼ ἴτε, τῆς ἐτέων ληθόμενοι δεκάδος. -
-
- - -Rufinus - - -Εὐρώπης τὸ φίλημα, καὶ ἢν ἄχρι χείλεος ἔλθῃ, -ἡδύ γε, κἂν ψαύσῃ μοῦνον ἄκρου στόματος· - ψαύει δʼ οὐκ ἄκροις τοῖς χείλεσιν, ἀλλʼ ἐρίσασα -τὸ στόμα τὴν ψυχὴν ἐξ ὀνύχων ἀνάγει. -
-
- - -Rufinus - - -ποῦ νῦν Πραξιτέλης; ποῦ δʼ αἱ χέρες αἱ Πολυκλείτου, -αἱ ταῖς πρόσθε τέχναις πνεῦμα χαριζόμεναι ; -τίς πλοκάμους Μελίτης εὐώδεας, ἢ πυρόεντα -ὄμματα καὶ δειρῆς φέγγος ἀποπλάσεται; -ποῦ πλάσται; ποῦ δʼ εἰσὶ λιθοξόοι; ἔπρεπε τοίῃ - μορφῇ νηὸν ἔχειν, ὡς μακάρων ξοάνῳ. - -
-
- - -Marcus Argentarius - - -μήνη χρυσόκερως, δέρκευ τάδε, καὶ περιλαμπεῖς - ἀστέρες, οὓς κόλποις Ὠκεανὸς δέχεται, -ὥς με μόνον προλιποῦσα μυρόπνοος ᾤχετʼ Ἀρίστη· - ἑκταίην δʼ εὑρεῖν τὴν μάγον οὐ δύναμαι. -ἀλλʼ ἔμπης αὐτὴν ζωγρήσομεν, ἢν ἐπιπέμψω - Κύπριδος ἰχνευτὰς ἀργυρέους σκύλακας. -
-
- - -Gaetulicus I - - -ἀγχιάλου ῥηγμῖνος ἐπίσκοπε, σοὶ τάδε πέμπω - ψαιστία καὶ λιτῆς δῶρα θυηπολίης· -αὔριον Ἰονίου γὰρ ἐπὶ πλατὺ κῦμα περήσω, - σπεύδων ἡμετέρης κόλπον ἐς Εἰδοθέης· -οὔριος ἀλλʼ ἐπίλαμψον ἐμῷ καὶ ἔρωτι καὶ ἱστῷ, - δεσπότι καὶ θαλάμων, Κύπρι, καὶ ἠιόνων. -
-
- - -Rufinus - - -μᾶλλον τῶν σοβαρῶν τὰς δουλίδας ἐκλεγόμεσθα, -οἱ μὴ τοῖς σπαταλοῖς κλέμμασι τερπόμενοι. - ταῖς μὲν χρὼς ἀπόδωδε μύρου, σοβαρόν τε φρύαγμα, - καὶ μέχρι † κινδύνου ἑσπομένη σύνοδος· -ταῖς δὲ χάρις καὶ χρὼς ἴδιος, καὶ λέκτρον ἑτοῖμον, -δώροις ἐκ σπατάλης οὐκ † ἀλεγιζόμενον. - μιμοῦμαι Πύρρον τὸν Ἀχιλλέος, ὃς προέκρινεν - Ἑρμιόνης ἀλόχου τὴν λάτριν Ἀνδρομάχην. -
-
- - -Rufinus - - -οὐκέτι παιδομανὴς ὡς πρίν ποτε, νῦν δὲ καλοῦμαι -θηλυμανής, καὶ νῦν δίσκος ἐμοὶ κρόταλον· - -ἀντὶ δέ μοι παίδων ἀδόλου χροὸς ἤρεσε γύψου - χρώματα, καὶ φύκους ἄνθος ἐπεισόδιον. -βοσκήσει δελφῖνας ὁ δενδροκόμης Ἐρύμανθος, - καὶ πολιὸν πόντου κῦμα θοὰς ἐλάφους. -
-
- - -Honestus - - -οὔτε με παρθενικῆς τέρπει γάμος, οὔτε γεραιῆς· - τὴν μὲν ἐποικτείρω, τὴν δὲ καταιδέομαι. - εἴη μήτʼ ὄμφαξ, μήτʼ ἀσταφίς· ἡ δὲ πέπειρος -ἐς Κύπριδος θαλάμους ὥρια καλλοσύνη, -
-
- - -Rufinus - - -οὐκ ἔλεγον, Προδίκη, Γηράσκομεν ; οὐ προεφώνουν - -ἥξουσιν ταχέως αἱ διαλυσίφιλοι ; - -νῦν ῥυτίδες καὶ θρὶξ πολιὴ καὶ σῶμα ῥακῶδες, -καὶ στόμα τὰς προτέρας οὐκέτʼ ἔχον χάριτας. -μή τις σοι, μετέωρε, προσέρχεται, ἢ κολακεύων - λίσσεται; ὡς δὲ τάφον νῦν σε παρερχόμεθα. -
-
- - -Rufinus - - -σοί με λάτριν γλυκύδωρος Ἔρως παρέδωκε, Βοῶπι, -ταῦρον ὑποζεύξας εἰς πόθον αὐτόμολον, -αὐτοθελῆ, πάνδουλον, ἑκούσιον, αὐτοκέλευστον, - αἰτήσοντα πικρὴν μήποτʼ ἐλευθερίην -ἄχρι, φίλη, πολιῆς καὶ γήραος· ὄμμα βάλοι δὲ - μήποτʼ ἐφʼ ἡμετέραις ἐλπίσι βασκανίη. - -
-
- - -Callimachus - - -οὕτως ὑπνώσαις, Κωνώπιον, ὡς ἐμὲ ποιεῖς -κοιμᾶσθαι ψυχροῖς τοῖσδε παρὰ προθύροις -οὕτως ὑπνώσαις, ἀδικωτάτη, ὡς τὸν ἐραστὴν - κοιμίζεις· ἐλέου δʼ οὐδʼ ὄναρ ἠντίασας. -γείτονες οἰκτείρουσι· σὺ δʼ οὐδʼ ὄναρ . ἡ πολιὴ δὲ -αὐτίκʼ ἀναμνήσει ταῦτά σε πάντα κόμη. -
-
- - -Meleager - - -ψυχή μοι προλέγει φεύγειν πόθον Ἡλιοδώρας, - δάκρυα καὶ ζήλους τοὺς πρὶν ἐπισταμένη. -φησὶ μὲν ἀλλὰ φυγεῖν οὔ μοι σθένος· ἡ γὰρ ἀναιδὴς -αὐτὴ καὶ προλέγει, καὶ προλέγουσα φιλεῖ. -
-
- - -Philodemus - - -ὁσσάκι Κυδίλλης ὑποκόλπιος, εἴτε κατʼ ἦμαρ, - εἴτʼ ἀποτολμήσας ἤλυθον ἑσπέριος, -οἶδʼ ὅτι πὰρ κρημνὸν τέμνω πόρον, οἶδʼ ὅτι ῥιπτῶ - πάντα κύβον κεφαλῆς αἰὲν ὕπερθεν ἐμῆς. -ἀλλὰ τί μοι πλέον ἐστί; † γὰρ θρασύς, ἠδʼ ὅταν ἕλκῃ - πάντοτʼ Ἔρως, ἀρχὴν οὐδʼ ὄναρ οἶδε φόβου. -
-
- - -Anonymi Epigrammatici - - -εἴτε σε κυανέῃσιν ἀποστίλβουσαν ἐθείραις, - εἴτε πάλιν ξανθαῖς εἶδον, ἄνασσα, κόμαις, - ἴση ἀπʼ ἀμφοτέρων λάμπει χά̆ς. ἦ ῥά γε ταύταις -θριξὶ συνοικήσει καὶ, πολιῇσιν Ἔρως. - -
-
- - -Rufinus - - -ποῦ σοι κεῖνα, Μέλισσα, τὰ χρύσεα καὶ περίοπτα - τῆς πολυθρυλήτου κάλλεα φαντασίης; - ποῦ δʼ ὀφρύες, καὶ γαῦρα φρονήματα, καὶ μέγας αὐχὴν, -καὶ σοβαρῶν ταρσῶν χρυσοφόρος σπατάλη; -νῦν πενιχρὴ ψαφαρή τε κόμη, παρὰ ποσσί τε τρύχη· - ταῦτα τὰ τῶν σπαταλῶν τέρματα παλλακίδων. -
-
- - -Rufinus - - -νῦν μοι χαῖρε λέγεις, ὅτε σου τὸ πρόσωπον ἀπῆλθεν -κεῖνο, τὸ τῆς λύγδου, βάσκανε, λειότερον· -νῦν μοι προσπαίζεις, ὅτε τὰς τρίχας ἠφάνικάς σου, -τὰς ἐπὶ τοῖς σοβαροῖς αὐχέσι πλαζομένας. -μηκέτι μοι, μετέωρε, προσέρχεο, μηδὲ συνάντα· - ἀντὶ ῥόδου γὰρ ἐγὼ τὴν βάτον οὐ δέχομαι. -
-
- - -Callicter - - -ἁδὺ τὸ βινεῖν ἐστι· τίς οὐ λέγει; ἀλλʼ ὅταν αἰτῇ - χαλκόν, πικρότερον γίνεται ἐλλεβόρου. -
-
- - -Antipater - - -πάντα καλῶς, τό γε μήν, χρυσῆν ὅτι τὴν Ἀφροδίτην, -ἔξοχα καὶ πάντων εἶπεν ὁ Μαιονίδας. -ἢν μὲν γὰρ τὸ χάραγμα φέρῃς, φίλος, οὔτε θυρωρὸς -ἐν ποσίν, οὔτε κύων ἐν προθύροις δέδεται· -ἢν δʼ ἑτέρως ἔλθῃς, καὶ ὁ Κέρβερος. ὦ πλεονέκται, -οἱ πλούτου, πενίην ὡς ἀδικεῖτε νόμοι. - -
-
- - -Antipater - - -χρύσεος ἦν γενεὴ καὶ χάλκεος ἀργυρέη τε -πρόσθεν· παντοίη δʼ ἡ Κυθέρεια τανῦν, - καὶ χρυσοῦν τίει, καὶ χάλκεον ἄνδρʼ ἐφίλησεν, -καὶ τοὺς ἀργυρέους οὔ ποτʼ ἀποστρέφεται. -Νέστωρ ἡ Παφίη. δοκέω δʼ ὅτι καὶ Δανάῃ Ζεὺς -οὐ χρυσός, χρυσοῦς δʼ ἦλθε φέρων ἑκατόν. -
-
- - -Marcus Argentarius - - -ποιεῖς πάντα, Μέλισσα, φιλανθέος ἔργα μελίσσης· -οἶδα καὶ ἐς κραδίην τοῦτο, γύναι, τίθεμαι. -καὶ μέλι μὲν στάζεις ὑπὸ χείλεσιν ἡδὺ φιλεῦσα· -ἢν δʼ αἰτῇς, κέντρῳ τύμμα φέρεις ἄδικον. -
-
- - -Parmenion - - -ἐς Δανάην ἔρρευσας, Ὀλύμπιε, χρυσός, ἵνʼ ἡ παῖς -ὡς δώρῳ πεισθῇ, μὴ τρέσῃ ὡς Κρονίδην. -
-
- - -Parmenion - - -ὁ Ζεὺς τὴν Δανάην χρυσοῦ, κἀγὼ δέ σε χρυσοῦ· -πλείονα γὰρ δοῦναι τοῦ Διὸς οὐ δύναμαι. -
-
- - -Rufinus - - -πυγὰς αὐτὸς ἔκρινα τριῶν εἵλοντο γὰρʼ αὐταὶ, - δείξασαι γυμνὴν ἀστεροπὴν μελέων. -καὶ ῥʼ ἡ μὲν τροχαλοῖς σφραγιζομένη γελασίνοις - λευκῇ ἀπὸ γλουτῶν ἤνθεεν εὐαφίῃ· - -τῆς δὲ διαιρομένης φοινίσσετο χιονέη σάρξ,. - πορφυρέοιο ῥόδου μᾶλλον ἐρυθροτέρη· -ἡ δὲ γαληνιόωσα χαράσσετο κύματι κωφῷ, - αὐτομάτη τρυφερῷ χρωτὶ σαλευομένη. -εἰ ταύτας ὁ κριτὴς ὁ θεῶν ἐθεήσατο πυγάς, -οὐκέτʼ ἂν οὐδʼ ἐσιδεῖν ἤθελε τὰς προτέρας. -
-
- - -Rufinus - - -ἤρισαν ἀλλήλαις Ῥοδόπη, Μελίτη, Ῥοδόκλεια, - τῶν τρισσῶν τίς ἔχει κρείσσονα μηριόνην, -καί με κριτὴν εἵλοντο· καὶ ὡς θεαὶ αἱ περίβλεπτοι - ἔστησαν γυμναί, νέκταρι λειβόμεναι. -καὶ Ῥοδόπης μὲν ἔλαμπε μέσος μηρῶν Πολύφημος -οἷα ῥοδὼν πολίῳ σχιζόμενος ζεφύρῳ - - τῆς δὲ Ῥοδοκλείης ὑάλῳ ἴσος, ὑγρομέτωπος, - οἷα καὶ ἐν νηῷ πρωτογλυφὲς ξόανον. - ἀλλὰ σαφῶς ἃ πέπονθε Πάρις διὰ τὴν κρίσιν εἰδὼς, -τὰς τρεῖς ἀθανάτας εὐθὺ συνεστεφάνουν. -
-
- - -Rufinus - - -%2Μήτʼ ἰσχνὴν λίην περιλάμβανε, μήτε παχεῖαν - τούτων δʼ ἀμφοτέρων τὴν μεσότητα θέλε. -τῇ μὲν γὰρ λείπει σαρκῶν χύσις, ἡ δὲ περισσὴν - κέκτηται· λεῖπον μὴ θέλε, μηδὲ πλέον· -
-
- - -Nicarchus II - - -εὐμεγέθης πείθει με καλὴ γυνή, ἄν τε καὶ ἀκμῆς -ἅπτητʼ, ἄν τε καὶ ᾖ, Σιμύλε, πρεσβυτέρη. -ἡ μὲν γάρ με νέα περιλήψεται, ἡ δὲ παλαιὴ -γραῖά με καὶ ῥυσή, Σιμύλε, λειχάσεται. - -
-
- - -Nicarchus II - - -οὐκ ἀποθνῄσκειν δεῖ με; τί μοι μέλει, ἤν τε ποδαγρὸς -ἤν τε δρομεὺς γεγονὼς εἰς Ἀίδην ὑπάγω; - πολλοὶ γάρ μʼ ἀροῦσιν. ἔα χωλόν με γενέσθαι· - τῶνδʼ ἕνεκεν γὰρ ἴδʼ ὡς οὔποτʼ ἐῶ θιάσους. -
-
- - -Nicarchus II - - -τῆς μητρὸς μὴ ἄκουε, Φιλουμένη· ἢν γὰρ ἀπέλθω - καὶ θῶ ἅπαξ ἔξω τὸν πόδα τῆς πόλεως, - τῶν καταπαιζόντων μὴ σχῇς λόγον, ἀλλὰ γʼ ἐκείνοις - ἐμπαίξας1ʼ, ἄρξαι πλεῖον ἐμοῦ τι ποεῖν -πάντα λίθον κίνει. σαυτὴν τρέφε, καὶ γράφε πρός με - εἰς ποίην ἀκτὴν εὐφρόσυνον γέγονας. -εὐτακτεῖν πειρῶ· τὸ δʼ ἐνοίκιον, ἤν τι περισσὸν - γίνηται, καὶ ἐμοὶ φρόντισον ἱμάτιον. -ἢν ἐν γαστρὶ λάβῃς, τέκε, ναὶ τέκε μὴ θορυβηθῇς· -εὑρήσει πόθεν ἔστʼ, ἐλθὸν ἐς ἡλικίην. -
-
- - -Rufinus - - -τίς γυμνὴν οὕτω σε καὶ ἐξέβαλεν καὶ ἔδειρεν; -τίς ψυχὴν λιθίνην εἶχε, καὶ οὐκ ἔβλεπε; - μοιχὸν ἴσως ηὕρηκεν ἀκαίρως κεῖνος ἐσελθών. - γινόμενον πᾶσαι τοῦτο ποοῦσι, τέκνον. -πλὴν ἀπὸ νῦν, ὅταν ᾖ τις ἔσω, κεῖνος δʼ ὅταν ἔξω, -τὸ πρόθυρον σφήνου, μὴ πάλι ταὐτὸ πάθῃς. -
-
- - -Rufinus - - -μισῶ τὴν ἀφελῆ, μισῶ τὴν σώφρονα λίαν· -ἡ μὲν γὰρ βραδέως, ἡ δὲ θέλει ταχέως. - -
-
- - -Rufinus - - -ἐκβάλλει γυμνήν τις, ἐπὴν εὕρῃ ποτὲ μοιχόν, -ὡς μὴ μοιχεύσας, ὡς ἀπὸ Πυθαγόρου; -εἶτα, τέκνον, κλαίουσα κατατρίψεις τὸ πρόσωπον, - καὶ παραριγώσεις μαινομένου προθύροις; -ἔκμαξαι, μὴ κλαῖε, τέκνον χεὑρήσομεν ἄλλον, - τὸν μὴ καὶ τὸ βλέπειν εἰδότα καὶ τὸ δέρειν. -
-
- - -Rufinus - - -Λέμβιον, ἡ δʼ ἑτέρα Κερκούριον, αἱ δύʼ ἑταῖραι -αἰὲν ἐφορμοῦσιν τῷ Σαμίων λιμένι. - ἀλλά, νέοι, πανδημὶ τὰ λῃστρικὰ τῆς Ἀφροδίτης - φεύγεθʼ· ὁ συμμίξας καὶ καταδὺς πίεται. -
-
- - -Callicter - - -Παρθενικὰ κούρα τὰ ἃ κέρματα πλείονα ποιεῖ, -οὐκ ἀπὸ τᾶς τέχνας, ἀλλʼ ἀπὸ τᾶς φύσιος. -
-
- - -Philodemus - - - - χαιρε σύ. καὶ σύ γε χαῖρε. τί δεῖ σε καλεῖν; σὲ δέ; μή πω -τοῦτο φιλόσπουδος. μηδὲ σύ· μὴ τινʼ ἔχεις; - - ἀεὶ τὸν φιλέοντα θέλεις ἅμα σήμερον ἡμῖν - δειπνεῖν; εἰ σὺ θέλεις. εὖγε· πόσου παρέσῃ; - - μηδέν μοι προδίδου. τοῦτο ξένον. ἀλλʼ ὅσον ἄν σοι - κοιμηθέντι δοκῇ, τοῦτο δός. οὐκ ἀδικεῖς. - -ποῦ γίνῃ; πέμψω. καταμάνθανε. πηνίκα δʼ ἥξεις; - - ἣν σὺ θέλεις ὥρην. εὐθὺ θέλω. πρόαγε. -
-
- - -Rufinus - - -πολλάκις ἠρασάμην σε λαβὼν ἐν νυκτί, Θάλεια, -πληρῶσαι θαλερῇ θυμὸν ἐρωμανίῃ·̓· -νῦν δʼ ὅτε μοι γυμνὴ γλυκεροῖς; μελέεσσι πέπλησαι, - ἔκλυτος ὑπναλέῳ γυῖα κέκμηκα κόπῳ. -θυμὲ τάλαν, τί πέπονθας; ἀνέγρεο, μηδʼ ἀπόκαμνε· - ζητήσεις ταύτην τὴν ὑπερευτυχίην. -
-
- - -Rufinus - - -ὄμματα μὲν χρύσεια, καὶ ὑαλόεσσα παρειή, -καὶ στόμα πορφυρέης τερπνότερον κάλυκος, -δειρὴ λυγδινέη, καὶ στήθεα μαρμαίροντα, - καὶ πόδες ἀργυρέης λευκότεροι Θέτιδος. -εἰ δέ τι καὶ πλοκαμῖσι διαστίλβουσιν ἄκανθαι, - τῆς λευκῆς καλάμης οὐδὲν ἐπιστρέφομαι. -
-
- - -Gallus - - -ἡ τρισὶ λειτουργοῦσα πρὸς ἓν τάχος ἀνδράσι Λύδη, -τῷ μὲν ὑπὲρ νηδύν, τῷ δʼ ὑπό, τῷ δʼ ὄπιθεν, - εἰσδέχομαι φιλόπαιδα, γυναικομανῆ, φιλυβριστήν. -εἰ σπεύδεις, ἐλθὼν σὺν δυσί, μὴ κατέχου. -
-
- - -Anonymi Epigrammatici - - -καὶ πενίη καὶ ἔρως δύο μοι κακά· καὶ τὸ μὲν οἴσω - κούφως· πῦρ δὲ φέρειν Κύπριδος οὐ δύναμαι. - -
-
- - -Anonymi Epigrammatici - - -;Ἡράσθην, ἐφίλουν, ἔτυχον, κατέπραξʼ, ἀγαπῶμαι· -τίς δέ, καὶ ἧς, καὶ πῶς, ἡ θεὸς οἶδε μόνη. -
-
- - -Dioscorides - - -ὅρκον κοινὸν Ἔρωτʼ ἀνεθήκαμεν ὅρκος ὁ πιστὴν -Ἀρσινόης θέμενος Σωσιπάτρῳ φιλίην. - ἀλλʼ ἡ μὲν ψευδὴς κενὰ δʼ ὅρκια, τῷ δʼ ἐφυλάχθη -ἵμερος· ἡ δὲ θεῶν οὐ φανερὴ δύναμις. -θρήνους, ὦ Ὑμέναιε, παρὰ κληῖσιν ἀΰσαις - Ἀρσινόης, παστῷ μεμψάμενος προδότῃ]. -
-
- - -Dioscorides - - -ἡ πιθανὴ μʼ ἔτρωσεν Ἀριστονόη, φίλʼ Ἄδωνι, - κοψαμένη τῇ σῇ στήθεα πὰρ καλύβῃ. -εἰ δώσει ταύτην καὶ ἐμοὶ χάριν, ἢν ἀποπνεύσω, -μὴ πρόφασις, σύμπλουν σύμ με λαβὼν ἀπάγου. -
-
- - -Dioscorides - - -μήποτε γαστροβαρῆ πρὸς σὸν λέχος ἀντιπρόσωπον -παιδογόνῳ κλίνῃς Κύπριδι τερπόμενος. - μεσσόθι γὰρ μέγα κῦμα καὶ οὐκ ὀλίγος πόνος ἔσται, - τῆς μὲν ἐρεσσομένης, σοῦ δὲ σαλευομένου. -ἀλλὰ πάλιν στρέψας ῥοδοειδέι τέρπεο πυγῇ, - τὴν ἄλοχον νομίσας ἀρσενόπαιδα Κύπριν. -
-
- - -Dioscorides - - -Δωρίδα τὴν ῥοδόπυγον ὑπὲρ λεχέων διατείνας -ἅψεσιν ἐν χλοερῖς ἀθάνατος γέγονα. - -ἡ γὰρ ὑπερφυέεσσι μέσον διαβᾶσά με ποσσίν, -ἤνυσεν ἀκλινέως τὸν Κύπριδος δόλιχον; -ὄμμασι νωθρὰ βλέπουσα· τὰ δʼ ἠύτε πνεύματι φύλλα, -ἀμφισαλευομένης, ἔτρεμε πορφύρεα, -μέχρις ἀπεσπείσθη λευκὸν μένος ἀμφοτέροισιν, - καὶ Δωρὶς παρέτοις ἐξεχύθη μέλεσι. -
-
- - -Dioscorides - - -ἐκμαίνει χείλη με ῥοδόχροα, ποικιλόμυθα, - ψυχοτακῆ στόματος νεκταρέου πρόθυρα, - καὶ γλῆναι λασίαισιν ὑπʼ ὀφρύσιν ἀστράπτουσαι, - σπλάγχνων ἡμετέρων δίκτυα καὶ παγίδες, -καὶ μαζοὶ γλαγόεντες, ἐύζυγες, ἱμερόεντες, -εὐφυέες, πάσης τερπνότεροι κάλυκος. - ἀλλὰ τί μηνύω κυσὶν ὀστέα; μάρτυρὲς εἰσιν - τῆς ἀθυροστομίης οἱ Μίδεοι κάλαμοι. -
-
- - -Meleager - - -τὴν περιφρυγομένην ψυχὴν ἂν πολλάκι καίῃς, - φεύξετʼ, Ἔρως· καὐτή, σχέτλιʼ, ἔχει πτέρυγας. -
-
- - -Archias - - -νήπιʼ Ἔρως, πορθεῖς μὲ τὸ κρήγυον εἴς μὲ κένωσον - πᾶν σὺ βέλος, λοιπὴν μηκέτʼ ἀφεὶς γλυφίδα, -ὡς ἂν μοῦνον ἕλοις ἰοῖς ἐμέ, καί τινα χρῄζων - ἄλλον ὀιστεῦσαι, μηκέτʼ ἔχοις ἀκίδα. -
-
- - -Archias - - - -φεύγειν δεῖ τὸν Ἔρωτα κενὸς πόνος· οὐ γὰρ ἀλύξω - πεζὸς ὑπὸ πτηνοῦ πυκνὰ διωκόμενος. -Lilia O. Perry, From the Garden of Hellas, p. 109. - -
-
- - -Rufinus - - -παρθένος ἀργυρόπεζος ἐλούετο, χρύσεα μαζῶν -χρωτὶ γαλακτοπαγεῖ μῆλα διαινομένη· -πυγαὶ δʼ ἀλλήλαις περιηγέες εἱλίσσοντο, -ὕδατος ὑγροτέρῳ χρωτὶ σαλευόμεναι. ˘ ˘ -τὸν δʼ ὑπεροιδαίνοντα κατέσκεπε πεπταμένη χεὶρ -οὐχ ὅλον Εὐρώταν, ἀλλʼ ὅσον ἠδύνατο. -
-
- - -Rufinus - - -τῇ κυανοβλεφάρῳ παίζων κόνδακα Φιλίππῃ, -ἐξ αὐτῆς κραδίης ἡδὺ γελᾶν ἐπόουν· ¯ -“δώδεκά σοι βέβληκα, καὶ αὔριον ἄλλα βαλῶ σοι, -ἢ πλέον, ἠὲ πάλιν δώδεκʼ ἐπιστάμενος.” -εἶτα κελευομένη † ἦλθεν γελάσας δὲ πρὸς αὐτήν - -εἴθε σε καὶ νύκτωρ ἐρχομένην ἐκάλουν. -
-
- - -Rufinus - - -οὔπω σου τὸ καλὸν χρόνος ἔσβεσεν, ἀλλʼ ἔτι πολλὰ - λείψανα τῆς προτέρης σῴζεται ἡλικίης, ˘ ˘ - καὶ χάριτες μίμνουσιν ἀγήραοι, οὐδὲ τὸ κάλλος - τῶν ἱλαρῶν μήλων ἢ ῥόδου ἐξέφυγεν. -ὦ πόσσους κατέφλεξε τὸ πρὶν θεοείκελον ἄνθος. -
-
- - -Marcus Argentarius - - -Ἀντιγόνη, Σικελὴ πάρος ἦσθά μοι· ὡς δʼ ἐγενήθης - Αἰτωλή, κἀγὼ Μῆδος ἰδοὺ γέγονα. -
-
- - -Asclepiades - - -Νῖφε, χαλαζοβόλει, ποίει σκότος, αἶθε, κεραύνου, - πάντα τὰ πορφύροντʼ ἐν χθονὶ σεῖε νέφη. - -ἢν γάρ με κτείνῃς, τότε παύσομαι· ἢν δὲ μʼ ἀφῇς ζῆν, - καὶ διαδὺς τούτων χείρονα, κωμάσομαι -ἕλκει γάρ μʼ ὁ κρατῶν καὶ σοῦ θεός, ᾧ ποτε πεισθείς, - Ζεῦ, διὰ χαλκείων χρυσὸς ἔδυς θαλάμων. -
-
- - -Anonymi Epigrammatici - - -αἰετὸς ὁ Ζεὺς ἦλθεν ἐπʼ ἀντίθεον Γανυμήδην, - κύκνος ἐπὶ ξανθὴν μητέρα τὴν Ἑλένης. -οὕτως ἀμφότερʼ ἐστὶν ἀσύγκριτα· τῶν δύο δʼ αὐτῶν - ἄλλοις ἄλλο δοκεῖ κρεῖσσον, ἐμοὶ τὰ δύο. -
-
- - -Rufinus - - -εὐκαίρως μονάσασαν ἰδὼν Προδίκην ἱκέτευον, - καὶ τῶν ἀμβροσίων ἁψάμενος γονάτων, - -σῶσον, ἔφην, “ἄνθρωπον ἀπολλύμενον παρὰ μικρόν -καὶ φεῦγον ζωῆς πνεῦμα σύ μοι χάρισαι.” -ταῦτα λέγοντος ἔκλαυσεν ἀποψήσασα δὲ δάκρυ, - ταῖς τρυφεραῖς ἡμᾶς χερσὶν ὑπεξέβαλεν. -
-
- - -Capito - - -κάλλος ἄνευ χαρίτων τέρπει μόνον, οὐ κατέχει δέ, -ὡς ἄτερ ἀγκίστρου νηχόμενον δέλεαρ. -
-
- - -Polemon I - - -ἢ τὸ φιλεῖν περίγραψον, Ἔρως, ὅλον, ἢ τὸ φιλεῖσθαι - πρόσθες, ἵνʼ ἢ λύσῃς τὸν πόθον, ἢ κεράσῃς. -R. Garnett, chaplet from the Greek Anthology, IIi. - -
-
- - -Rufinus - - -Παλλὰς ἐσαθρήσασα καὶ Ἥρη χρυσοπέδιλος - Μαιονίδʼ, ἐκ κραδίης ἴαχον ἀμφότεραι· - “οὐκέτι γυμνούμεσθα· κρίσις μία ποιμένος ἀρκεῖ· -οὐ καλὸν ἡττᾶσθαι δὶς περὶ καλλοσύνης.” -
-
- - -Rufinus - - -κάλλος ἔχεις Κύπριδος;, Πειθοῦς στόμα, σῶμα καὶ ἀκμὴν - εἰαρινῶν Ὡρῶν, φθέγμα δὲ Καλλιόπης, - νοῦν καὶ σωφροσύνην Θέμιδος, καὶ χεῖρας Ἀθήνης· - σὺν σοὶ δʼ αἱ Χάριτες τέσσαρές εἰσι, Φίλη. -
-
- - -Palladas - - -Πρωτομάχου πατρὸς καὶ Νικομάχης γεγαμηκὼς - θυγατέρα, Ζήνων, ἔνδον ἔχεις πόλεμον. - ζήτει Λυσίμαχον μοιχὸν φίλον, ὃς ς1ʼ ἐλεήσας -ἐκ τῆς Πρωτομάχου λύσεται Ἀνδρομάχης. -
-
- - -Palladas - - -τοῦτο βίος, τοῦτʼ αὐτό· τρυφὴ βίος. ἔρρετʼ ἀνῖαι· - ζωῆς ἀνθρώποις ὀλίγος χρόνος. ἄρτι Λύαιος, -ἄρτι χοροί, στέφανοί τε φιλανθέες, ἄρτι γυναῖκες· - σήμερον ἐσθλὰ πάθω· τὸ γὰρ αὔριον οὐδενὶ δῆλον. - -
-
- - -Rufinus - - -δαίμονες, οὐκ ᾔδειν ὅτι λούεται ἡ Κυθέρεια, - χερσὶ καταυχενίους λυσαμένη πλοκάμους. - ἱλήκοις, δέσποινα, καὶ ὄμμασιν ἡμετέροισι - μήποτε μηνίσῃς, θεῖον ἰδοῦσι τύπον. -νῦν ἔγνων Ῥοδόκλεια, καὶ οὐ Κύπρις. εἶτα τὸ κάλλος - τοῦτο πόθεν; σύ, δοκῶ, τὴν θεὸν ἐκδέδυκας. -
-
- - -Rufinus - - -πέμπω σοι, Ῥοδόκλεια, τόδε στέφος, ἄνθεσι καλοῖς -αὐτὸς ὑφʼ ἡμετέραις πλεξάμενος παλάμαις. - ἔστι κρίνον, ῥοδέη τε κάλυξ, νοτερὴ τʼ ἀνεμώνη, -καὶ νάρκισσος ὑγρός, καὶ κυαναυγὲς ἴον. -ταῦτα στεψαμένη, λῆξον μεγάλαυχος ἐοῦσα· - ἀνθεῖς καὶ λήγεις καὶ σὺ καὶ ὁ στέφανος. -
-
- - -Rufinus - - -γείτονα παρθένον εἶχον Ἀμυμώνην, Ἀφροδίτη, -ἥ μου τὴν ψυχὴν ἔφλεγεν οὐκ ὀλίγον. -αὕτη μοι προσέπαιξε,1 καί, εἴ ποτε καιρός, ἐτόλμων - ἠρυθρία. τί πλέον; τὸν πόνον ᾐσθάνετο· -ἤνυσα πολλὰ καμών. παρακήκοα νῦν ὅτι τίκτει· -ὥστε τί ποιοῦμεν; φεύγομεν ἢ μένομεν; -
-
- - -Rufinus - - -αὕτη πρόσθεν ἔην ἐρατόχροος, εἰαρόμασθος, - εὔσφυρος, εὐμήκης, εὔοφρυς, εὐπλόκαμος· - -ἠλλάχθη δὲ χρόνῳ καὶ γήραϊ καὶ πολιαῖσι, -καὶ νῦν τῶν προτέρων οὐδʼ ὄναρ οὐδὲν ἔχει, -ἀλλοτρίας δὲ τρίχας, καὶ ῥυσῶδες τὸ πρόσωπον, - οἷον γηράσας οὐδὲ πίθηκος ἔχει. -
-
- - -Rufinus - - -εἰ τοίην χάριν εἶχε γυνὴ μετὰ Κύπριδος εὐνήν, -οὐκ ἄν τοι κόρον ἔσχεν ἀνὴρ ἀλόχοισιν ὁμιλῶν. - πᾶσαι γὰρ μετὰ κύπριν ἀτερπέες εἰσὶ γυναῖκες. -
-
- - -Plato - - -τὴν ψυχήν, Ἀγάθωνα φιλῶν, ἐπὶ χείλεσιν ἔσχον - ἦλθε γὰρ ἡ τλήμων ὡς διαβησομένη. -
-
- - -Plato - - -τῷ μήλῳ βάλλω σε· σὺ δʼ εἰ μὲν ἑκοῦσα φιλεῖς με, - δεξαμένη, τῆς σῆς παρθενίης μετάδος· -εἰ δʼ ἄρʼ ὃ μὴ γίγνοιτο νοεῖς, τοῦτʼ αὐτὸ λαβοῦσα - σκέψαι τὴν ὥρην ὡς ὀλιγοχρόνιος. -
-
- - -Plato - - -μῆλον ἐγώ· βάλλει με φιλῶν σέ τις. ἀλλʼ ἐπίνευσον, -Ξανθίππη· κἀγὼ καὶ σὺ μαραινόμεθα. -
-
- - -Dionysius Sophista - - -ἡ τὰ ῥόδα, ῥοδόεσσαν ἔχεις χάριν ἀλλὰ τί πωλεῖς; -σαυτήν, ἢ τὰ ῥόδα; ἠὲ συναμφότερα; - -
-
- - -Anonymi Epigrammatici - - -ὦ σοβαρὴ βαλάνισσα, τί δή ποτέ μʼ ἔκπυρα λούεις; -πρὶν μʼ ἀποδύσασθαι, τοῦ πυρὸς αἰσθάνομαι, -
-
- - -Anonymi Epigrammatici - - -εἴθʼ ἄνεμος γενόμην, σὺ δʼ ἐπιστείχουσα παρʼ ἀγὰς - στήθεα γυμνώσαις, καί με πνέοντα λάβοις. -
-
- - -Anonymi Epigrammatici - - -εἴθε ῥόδον γενόμην ὑποπόρφυρον, ὄφρα με χερσὶν - ἀρσαμένη χαρίσῃ στήθεσι χιονέοις. -
-
- - -Asclepiades - - -φείδῃ παρθενίης· καὶ τί πλέον; οὐ γὰρ ἐς ᾍδην - ἐλθοῦς1ʼ εὑρήσεις τὸν φιλέοντα, κόρη. -ἐν ζωοῖσι τὰ τερπνὰ τὰ Κύπριδος·; ἐν δʼ Ἀχέροντι - ὀστέα καὶ σποδιή, παρθένε, κεισόμεθα. -
-
- - -Claudius Claudianus - - -ἵλαθί μοι, φίλε Φοῖβε· σὺ γὰρ θοὰ τόξα τιταίνων - ἐβλήθης ὑπʼ Ἔρωτος ὑπʼ ὠκυπόροισιν ὀιστοῖς. - -
-
- - -Rufinus - - -ἀρνεῖται τὸν ἔρωτα Μελισσιάς, ἀλλὰ τὸ σῶμα -κέκραγʼ ὡς βελέων δεξάμενον φαρέτρην, - καὶ βάσις ἀστατέουσα, καὶ ἄστατος ἄσθματος ὁρμή, - καὶ κοῖλαι βλεφάρων ἰοτυπεῖς βάσιες. -ἀλλά, Πόθοι, πρὸς μητρὸς ἐϋστεφάνου Κυθερείης, - φλέξατε τὴν ἀπιθῆ, μέχρις ἐρεῖ Φλέγομαι. - -
-
- - -Rufinus - - -εἰ δυσὶν οὐκ ἴσχυσας ἴσην φλόγα, πυρφόρε, καῦσαι, - τὴν ἑνὶ καιομένην ἢ σβέσον ἢ μετάθες. -
-
- - -Marcus Argentarius - - -οὐκ ἔσθʼ οὗτος ἔρως, εἴ τις καλὸν εἶδος ἔχουσαν - βούλετʼ ἔχειν, φρονίμοις ὄμμασι πειθόμενος· - ἀλλʼ ὅστις κακόμορφον ἰδών, τετορημένος ἰοῖς - στέργει, μαινομένης ἐκ φρενὸς αἰθόμενος, -οὗτος ἔρως, πῦρ τοῦτο· τὰ γὰρ καλὰ πάντας ὁμοίως - τέρπει τοὺς κρίνειν εἶδος ἐπισταμένους. -
-
- - -Anonymi Epigrammatici - - -πέμπω σοι μύρον ἡδύ, μύρῳ τὸ μύρον θεραπεύων, -ὡς Βρομίῳ σπένδων νᾶμα τὸ τοῦ Βρομίου. -
-
- - -Anonymi Epigrammatici - - -πέμπω σοι μύρον ἡδύ, μύρῳ παρέχων χάριν, οὐ σοί· -αὐτὴ γὰρ μυρίσαι καὶ τὸ μύρον δύνασαι, - -
-
- - -Rufinus - - -ὑψοῦται Ῥοδόπη τῷ κάλλεϊ· κἤν ποτε “χαῖρε” -εἴπω, ταῖς σοβαραῖς ὀφρύσιν ἠσπάσατο. -ἤν ποτε καὶ στεφάνους προθύρων ὕπερ ἐκκρεμάσωμαι, - ὀργισθεῖσα πατεῖ τοῖς σοβαροῖς ἴχνεσιν. -ὦ ῥυτίδες, καὶ γῆρας ἀνηλεές, ἔλθετε θᾶσσον, - σπεύσατε· κἂν ὑμεῖς πείσατε τὴν Ῥοδόπην, -
-
- - -Rufinus - - -ὥπλισμαι πρὸς ;ἔρωτα περὶ στέρνοισι λογισμόν, -οὐδέ με νικήσει, μοῦνος ἐὼν πρὸς ἕνα· - θνατὸς δʼ ἀθανάτῳ συστήσομαι· -ἢν δὲ βοηθὸν - Βάκχον ἔχῃ, τί μόνος πρὸς δύʼ ἐγὼ δύναμαι; -
-
- - -Rufinus - - -ὄμματʼ ἔχεις Ἥρης, Μελίτη, τὰς χεῖρας Ἀθήνης, - τοὺς μαζοὺς Παφίης, τὰ σφυρὰ τῆς Θέτιδος. -εὐδαίμων ὁ βλέπων σε· ;τρισόλβιος ὅστις ἀκούει· - ἡμίθεος δʼ ὁ φιλῶν ἀθάνατος δʼ ὁ γαμῶν. -
-
- - -Anonymi Epigrammatici - - -Τέσσρες αἱ Χάριτες, Παφίαι δύο, καὶ δέκα Μοῦσαι· - Δερκυλὶς ἐν πάσαις Μοῦσα, Χάρις, Παφίη. -
-
- - -Meleager - - -ἰξὸν ἔχεις τὸ φίλημα, τὰ δʼ ὄμματα, Τιμάριον, πῦρ· -ἢν ἐσίδῃς, καίεις· ἢν δὲ θίγῃς, δέδεκας. - -
-
- - -Rufinus - - -εἰ μὲν ἐπʼ ἀμφοτέροισιν, Ἔρως, ἴσα τόξα τιταίνεις, -εἶ θεός· εἰ δὲ ῥέπεις πρὸς μέρος, οὐ θεὸς εἶ. -
-
- - -Anonymi Epigrammatici - - -Ὁπλίζευ, Κύπρι, τόξα, καὶ εἰς σκοπὸν ἥσυχος ἐλθὲ - ἄλλον ἐγὼ γὰρ ἔχω τραύματος οὐδὲ τόπον. -
-
- - -Anonymi Epigrammatici - - -ἤθελον, ὦ κιθαρῳδέ, παραστάς, ὡς κιθαρίζεις, -τὴν ὑπάτην κροῦσαι, τήν τε μέσην χαλάσαι. -
-
- - -Anonymi Epigrammatici - - -εἲ μοί τις μέμφοιτο, δαείς ὅτι λάτρις Ἔρωτος -φοιτῶ, θηρευτὴν ὄμμασιν ἰξὸν ἔχων, - εἰδείη καὶ Ζῆνα, καὶ Ἄϊδα, τόν τε θαλάσσης -σκηπτοῦχον, μαλερῶν δοῦλον ἐόντα Πόθων, -εἰ δὲ θεοὶ τοιοίδε, θεοῖς δʼ ἐνέπουσιν ἕπεσθαι - ἀνθρώπους, τί θεῶν ἔργα μαθὼν ἀδικῶ; -
-
- - -Anonymi Epigrammatici - - - - χαῖρε κόρη. καὶ δὴ σύ. τίς ἡ προιοῦσα; τί πρὸς σέ; - - - οὐκ ἀλόγως ζητῶ. δεσπότις ἡμετέρη. - - - ἐλπίζειν ἔστι; ζητεῖς δέ τί; νύκτα. φέρεις τι; - - - χρυσίον. Εὑθύμει. καὶ τόσον. οὐ δύνασαι. - -
-
- - -Marcus Argentarius - - -τὴν ἰσχνὴν Διόκλειαν, ἀσαρκοτέρην Ἀφροδίτην, -ὄψεαι, ἀλλὰ καλοῖς ἤθεσι τερπομένην. -οὐ πολύ μοι τὸ μεταξὺ γενήσεται· ἀλλʼ ἐπὶ λεπτὰ - στέρνα πεσὼν, ψυχῆς κείσομαι ἐγγυτάτω. -
-
- - -Rufinus - - -μέχρι τίνος, Προδίκη, παρακλαύσομαι; ἄχρι τίνος σε - γουνάσομαι, στερεή, μηδὲν ἀκουόμενος; - ἤδη καὶ λευκαί σοι ἐπισκιρτῶσιν ἔθειραι, - καὶ τάχα μοι δώσεις ὡς Ἑκάβη Πριάμῳ. -
-
- - -Marcus Argentarius - - -αἶρε τὰ δίκτυα ταῦτα, κακόσχολε, μηδʼ ἐπίτηδες - ἰσχίον ἐρχομένη σύστρεφε, Λυσιδίκη. -εὖ σε περισφίγγει λεπτὸς στολιδώμασι πέπλος, - πάντα δέ σου βλέπεται γυμνά, καὶ οὐ βλέπεται. -εἰ τόδε σοι χαρίεν καταφαίνεται, αὐτὸς ὁμοίως - ὀρθὸν ἔχων βύσσῳ τοῦτο περισκεπάσω. -
-
- - -Marcus Argentarius - - -ἄλλος ὁ Μηνοφίλας λέγεται παρὰ μαχλάσι κόσμος, - ἄλλος, ἐπεὶ πάσης γεύεται ἀκρασίης. - ἀλλʼ ἴτε Χαλδαῖοι κείνης πέλας· ἦ γὰρ ὁ ταύτης -οὐρανὸς ἐντὸς ἔχει καὶ κύνα καὶ διδύμους. -
-
- - -Diotimus - - -γραῖα, φίλη θρέπτειρα, τί μου προσιόντος ὑλακτεῖς, -καὶ χαλεπὰς βάλλεις δὶς τόσον εἰς ὀδύνας; - -παρθενικὴν γὰρ ἄγεις περικαλλέα, τῆς ἐπιβαίνων - ἴχνεσι τὴν ἰδικὴν οἶμον ἴδʼ ὡς φέρομαι, -εἶδος ἐσαυγάζων μοῦνον γλυκύ. τίς φθόνος ὄσσων, - δύσμορε; καὶ μορφὰς ἀθανάτων βλέπομεν. -
-
- - -Philodemus - - - “ γινώσκω, χαρίεσσα, φιλεῖν πάνυ τὸν φιλέοντα, - καὶ πάλι γινώσκω τόν με δακόντα δακεῖν -μὴ λύπει με λίην στέργοντά σε, μηδʼ ἐρεθίζειν - τὰς βαρυοργήτους σοι θέλε Πιερίδας.” -τοῦτʼ ἐβόων αἰεὶ καὶ προὔλεγον ἀλλʼ ἴσα πόντῳ - Ἰονίῳ μύθων ἔκλυες ι;ἡμετέρων. -τοιγὰρ νῦν σὺ μὲν ὧδε μέγα κλαίουσα βαΰζεις· - ἡμεῖς δʼ ἐν κόλποις ἥμεθα Ναϊάδος. -
-
- - -Crinagoras - - -δειλαίη, τί σε πρῶτον ἔπος, τί δὲ δεύτατον εἴπω; - δειλαίη· τοῦτʼ ἐν παντὶ κακῷ ἔτυμον. - οἴχεαι, ὦ χαρίεσσα γύναι, καὶ ἐς εἴδεος ὥρην - ἄκρα καὶ εἰς ψυχῆς ἦθος ἐνεγκαμένη. -πρώτη σοι ὄνομʼ ἔσκεν ἐτήτυμον ἦν γὰρ ἅπαντα - δεύτερʼ ἀμιμήτων τῶν ἐπὶ σοὶ χαρίτων. -
-
- - - Antipater [Θεσσαλονικεος] - - -δραχμῆς Εὐρώπην τὴν Ἀτθίδα, μήτε φοβηθεὶς - μηδένα, μήτʼ ἄλλως ἀντιλέγουσαν, ἔχε, -καὶ στρωμνὴν παρέχουσαν ἀμεμφέα, χὠπότε χειμών, - ἄνθρακας. ἦ ῥα μάτην, Ζεῦ φίλε, βοῦς ἐγένου. - -
-
- - -Marcus Argentarius - - -ἔγχει Λυσιδίκης κυάθους δέκα, τῆς δὲ ποθεινῆς - Εὐφράντης ἕνα μοι, λάτρι, δίδου κύαθον. - φήσεις Λυσιδίκην με φιλεῖν πλέον. οὐ μὰ τὸν ἡδὺν - Βάκχον, ὃν ἐν ταύτῃ λαβροποτῶ κύλικι· -ἀλλά μοι Εὐφράντη μία πρὸς δέκα· καὶ γὰρ ἀπείρους - ἀστέρας ἓν μήνης φέγγος ὑπερτίθεται. -
-
- - -Antiphilus - - -εἶπον ἐγὼ καὶ πρόσθεν, ὅτʼ ἦν ἔτι φίλτρα Τερείνης - νήπια, Συμφλέξει πάντας ἀεξομένη. - -οἱ δʼ ἐγέλων τὸν μάντιν. ἴδʼ, ὁ χρόνος ὃν ποτʼ ἐφώνουν, - οὗτος· ἐγὼ δὲ πάλαι τραύματος ᾐσθανόμην. - καὶ τί πάθω; λεύσσειν μέν, ὅλαι φλόγες· ἢν δʼ ἀπονεύσω, - φροντίδες· ἢν δʼ αἰτῶ, παρθένος. οἰχόμεθα. -
-
- - -Philodemus - - -ἠράσθην τίς δʼ οὐχί; κεκώμακα· τίς δʼ ἀμύητος - κώμων; ἀλλʼ ἐμάνην ἐκ τίνος; οὐχὶ θεοῦ; - ἐρρίφθω· πολιὴ γὰρ ἐπείγεται ἀντὶ μελαίνης - θρὶξ ἤδη, συνετῆς ἄγγελος ἡλικίης. -καὶ παίζειν ὅτε καιρός, ἐπαίξαμεν ἡνίκα καὶ νῦν -οὐκέτι, λωϊτέρης φροντίδος ἁψόμεθα. -
-
- - -Marcus Argentarius - - -ἠράσθης πλουτῶν, Σωσίκρατες· ἀλλὰ πένης ὢν -οὐκέτʼ ἐρᾷς· λιμὸς φάρμακον οἷον ἔχει. - -ἡ δὲ πάρος σε καλεῦσα μύρον καὶ τερπνὸν Ἄδωνιν - Μηνοφίλα, νῦν σου τοὔνομα πυνθάνεται, - -τίς πόθεν εἶς ἀνδρῶν, πόθι τοι πτόλις; ἦ μόλις ἔγνως - τοῦτʼ ἔπος, ὡς οὐδεὶς οὐδὲν ἔχοντι φίλος. -
-
- - -Quintus Maecius - - -ἡ χαλεπὴ κατὰ πάντα Φιλίστιον, ἡ τὸν ἐραστὴν - μηδέποτʼ ἀργυρίου χωρὶς ἀνασχομένη, - φαίνετʼ ἀνεκτοτέρη νῦν ἢ πάρος. οὐ μέγα θαῦμα - φαίνεσθʼ ἠλλάχθαι τὴν φύσιν οὐ δοκέω. -καὶ γὰρ πρηϋτέρη ποτὲ γίνεται ἀσπὶς ἀναιδής; - δάκνει δʼ οὐκ ἄλλως ἢ θανατηφορίην. -
-
- - -Philodemus - - -ἠράσθην Δημοῦς Παφίης γένος· οὐ μέγα θαῦμα -καὶ Σαμίης Δημοῦς δεύτερον οὐχὶ μέγα· -καὶ πάλι Ναξιακῆς Δημοῦς τρίτον οὐκέτι ταῦτα - παίγνια· καὶ Δημοῦς τέτρατον Ἀργολίδος. -αὐταί που Μοῖραί με κατωνόμασαν Φιλόδημον, -ὡς αἰεὶ Δημοῦς θερμὸς ἔχει με πόθος. -
-
- - -Marcus Argentarius - - -θῆλυς ἔρως κάλλιστος ἐνὶ θνητοῖσι τέτυκται, - ὅσσοις ἐς φιλίην σεμνὸς ἔνεστι νόος. -εἰ δὲ καὶ ἀρσενικὸν στέργεις πόθον, οἶδα διδάξαι - φάρμακον, ᾧ παύσεις τὴν δυσέρωτα νόσον. -στρέψας Μηνοφίλαν εὐίσχιον, ἐν φρεσὶν ἔλπου -αὐτὸν ἔχειν κόλποις ἄρσενα Μηνόφιλον. - -
-
- - -Quintus Maecius - - -θερμαίνει μʼ ὁ καλὸς Κορνήλιος· ἀλλὰ φοβοῦμαι -τοῦτο τὸ φῶς, ἤδη πῦρ μέγα γιγνόμενον. -
-
- - -Marcus Argentarius - - -Ἰσιὰς ἡδύπνευστε, καὶ εἰ δεκάκις μύρον ὄσδεις, - ἔγρεο καὶ δέξαι χερσὶ φίλαις στέφανον, -ὃν νῦν μὲν θάλλοντα, μαραινόμενον δὲ πρὸς ἠῶ -ὄψεαι, ὑμετέρης σύμβολον ἡλικίης. -
-
- - -Crinagoras - - -κἢν ῥίψῃς ἐπὶ λαιά, καὶ ἢν ἐπὶ δεξιὰ ῥίψῃς, -Κριναγόρη, κενεοῦ σαυτὸν ὕπερθε λέχους, -εἰ μή σοι χαρίεσσα παρακλίνοιτο Γέμελλα, - γνώσῃ κοιμηθεὶς οὐχ ὕπνον, ἀλλὰ κόπον. -
-
- - -Philodemus - - -καὶ νυκτὸς μεσάτης τὸν ἐμὸν κλέψασα σύνευνον -ἦλθον, καὶ πυκινῇ τεγγομένη ψακάδι. - τοὔνεκʼ ἐν ἀπρήκτοισι καθήμεθα, κοὐχὶ λαλεῦντες -εὕδομεν, ὡς εὕδειν τοῖς φιλέουσι θέμις; -
-
- - -Philodemus - - -Μικκὴ καὶ μελανεῦσα Φιλαίνιον, ἀλλὰ σελίνων - οὐλοτέρη, καὶ μνοῦ χρῶτα τερεινοτέρη, -καὶ κεστοῦ φωνεῦσα μαγώτερα, καὶ παρέχουσα - πάντα, καὶ αἰτῆσαι πολλάκι φειδομένη· -τοιαύτην στέργοιμι Φιλαίνιον, ἄχρις ἂν εὕρω -ἄλλην, ὦ χρυσέη Κύπρι, τελειοτέρην. - -
-
- - -Diodorus - - -μὴ σύ γε, μηδʼ εἴ τοι πολὺ φέρτερος εἴδεται ὄσσων - ἀμφοτέρων, κλεινοῦ κοῦρε Μεγιστοκλέους, - κἢν στίλβῃ Χαρίτεσσι λελουμένος, ἀμφιδονοίης - τὸν καλὸν οὐ γὰρ ὁ παῖς ἤπιος οὐδʼ ἄκακος, -ἀλλὰ μέλων πολλοῖσι, καὶ οὐκ ἀδίδακτος ἐρώτων. - τὴν φλόγα ῥιπίζειν δείδιθι, δαιμόνιε. -
-
- - -Philodemus - - -Νυκτερινή, δίκερως, φιλοπάννυχε, φαῖνε, Σελήνη, -φαῖνε, διʼ εὐτρήτων βαλλομένη θυρίδων - αὔγαζε χρυσέην Καλλίστιον ἐς τὰ φιλεύντων - ἔργα κατοπτεύειν οὐ φθόνος ἀθανάτῃ. -ὀλβίζεις καὶ τήνδε καὶ ἡμέας, οἶδα, Σελήνη· -καὶ γὰρ σὴν ψυχὴν ἔφλεγεν Ἐνδυμίων. -
-
- - -Philodemus - - -οὔπω σοι καλύκων γυμνὸν θέρος, οὐδὲ μελαίνει - βότρυς ὁ παρθενίους πρωτοβολῶν χάριτας· - ἀλλʼ ἤδη θοὰ τόξα νέοι θήγουσιν Ἔρωτες, - Λυσιδίκη, καὶ πῦρ τύφεται ἐγκρύφιον. -φεύγωμεν, δυσέρωτες, ἕως βέλος οὐκ ἐπὶ νευρῇ· - μάντις ἐγὼ μεγάλης αὐτίκα πυρκαϊῆς. -
-
- - -Lollius Bassus - - -οὐ μέλλω ῥεύσειν χρυσός ποτε· βοῦς δὲ γένοιτο - ἄλλος, χὠ μελίθρους κύκνος ἐπῃόνιος. - Ζηνὶ φυλασσέσθω τάδε παίγνια· τῇ δὲ Κορίννῃ - τοὺς ὀβολοὺς δώσω τοὺς δύο, κοὐ πέτομαι. - -
-
- - -Philodemus - - -πέντε δίδωσιν ἑνὸς τῇ δεῖνα ὁ δεῖνα τάλαντα, - καὶ βινεῖ φρίσσων, καὶ μὰ τὸν οὐδὲ καλὴν - πέντε δʼ ἐγὼ δραχμὰς τῶν δώδεκα Λυσιανάσσῃ, - καὶ βινῶ πρὸς τῷ κρείσσονα καὶ φανερῶς. -πάντως ἤτοι ἐγὼ φρένας οὐκ ἔχω, ἢ τό γε λοιπὸν - τοὺς κείνου πελέκει δεῖ διδύμους ἀφελεῖν. -
-
- - -Marcus Argentarius - - -παρθένον Ἀλκίππην ἐφίλουν μέγα, καί ποτε πείσας -αὐτὴν λαθριδίως εἶχον ἐπὶ κλισίῃ. - ἀμφοτέρων δὲ στέρνον ἐπάλλετο, μή τις ἐπέλθῃ, -μή τις ἴδῃ τὰ πόθων κρυπτὰ περισσοτέρων. -μητέρα δʼ οὐκ ἔλαθεν κείνης λάλον ἀλλʼ ἐσιδοῦσα - ἐξαπίνης, Ἑρμῆς κοινός, ἔφη. θύγατερ. - -
-
- - -Marcus Argentarius - - -στέρνα περὶ στέρνοις, μαστῷ δʼ ἔπι μαστὸν ἐρείσας, -χείλεά τε γλυκεροῖς χείλεσι συμπιέσας - Ἀντιγόνης, καὶ χρῶτα λαβὼν πρὸς χρῶτα, τὰ λοιπὰ - σιγῶ, μάρτυς ἐφʼ οἷς λύχνος ἐπεγράφετο. -
-
- - -Automedon - - -τὴν ἀπὸ τῆς Ἀσίης ὀρχηστρίδα, τὴν κακοτέχνοις - σχήμασιν ἐξ ἁπαλῶν κινυμένην ὀνύχων, - -αἰνέω, οὐχ ὅτι πάντα παθαίνεται, οὐδʼ ὅτι βάλλει - τὰς ἁπαλὰς ἁπαλῶς ὧδε καὶ ὧδε χέρας· -ἀλλʼ ὅτι καὶ τρίβακον περὶ πάσσαλον ὀρχήσασθαι -οἶδε, καὶ οὐ φεύγει γηραλέας ῥυτίδας. - γλωττίζει, κνίζει, περιλαμβάνει· ἢν δʼ ἐπιρίψῃ -τὸ σκέλος, ἐξ ᾅδου τὴν κορύνην ἀνάγει. -
-
- - -Quintus Maecius - - -τί στυγνή; τί ταῦτα κόμης εἰκαῖα, Φιλαινί, - σκύλματα, καὶ νοτερῶν σύγχυσις ὀμματίων; -μὴ τὸν ἐραστὴν εἶδες ἔχονθʼ ὑποκόλπιον ἄλλην; -εἶπον ἐμοί· λύπης φάρμακʼ ἐπιστάμεθα. -δακρύεις, οὐ φὴς δέ· μάτην ἀρνεῖσθʼ ἐπιβάλλῃ· - ὀφθαλμοὶ γλώσσης ἀξιοπιστότεροι. -
-
- - -Philodemus - - -ψαλμός, καὶ λαλιή, καὶ κωτίλον ὄμμα, καὶ ᾠδὴ - Ξανθίππης, καὶ πῦρ ἄρτι καταρχόμενον, -ὦ ψυχή, φλέξει σε· τὸ δʼ ἐκ τίνος, ἢ πότε, καὶ πῶς, -οὐκ οἶδα· γνώσῃ, δύσμορε, τυφομένη. -
-
- - -Philodemus - - -ὦ ποδός, ὦ κνήμης, ὦ τῶν ἀπόλωλα δικαίως - μηρῶν, ὦ γλουτῶν, ὦ κτενός, ὦ λαγόνων, -ὦ ὤμοιν, ὦ μαστῶν, ὦ τοῦ ῥαδινοῖο τραχήλου, -ὦ χειρῶν, ὦ τῶν μαίνομαι ὀμματίων, -ὦ κατατεχνοτάτου κινήματος, ὦ περιάλλων - γλωττισμῶν, ὦ τῶν θῦʼ ἐμὲ φωναρίων. -εἰ δʼ Ὀπικὴ καὶ Φλῶρα καὶ οὐκ ᾄδουσα τὰ Σαπφοῦς, -καὶ Περσεὺς Ἰνδῆς ἠράσατʼ Ἀνδρομέδης. - -
-
- - -Quintus Maecius - - -Ὤμος1ʼ ἐγώ, δύο νύκτας ἀφʼ Ἡδυλίου, Κυθέρεια, - σὸν κράτος, ἡσυχάσειν ὡς δοκέω δʼ, ἐγέλας, - τοὐμὸν ἐπισταμένη τάλανος κακὸν οὐ γὰρ ὑποίσω - τὴν ἑτέρην, ὅρκους δʼ εἰς ἀνέμους τίθεμαι. -αἱροῦμαι δʼ ἀσεβεῖν κείνης χάριν, ἢ τὰ σὰ τηρῶν - ὅρκιʼ ἀποθνῄσκειν, πότνιʼ, ὑπʼ εὐσεβίης. -
-
- - -Posidippus - - -Κεκροπὶ ῥαῖνε λάγυνε πολύδροσον ἰκμάδα Βάκχου, -ῥαῖνε· δροσιζέσθω συμβολικὴ πρόποσις. - σιγάσθω Ζήνων ὁ σοφὸς κύκνος, ἅ τε Κλεάνθους -μοῦσα μέλοι δʼ ἡμῖν ὁ γλυκύπικρος ἔρως. -
-
- - -Anonymi Epigrammatici - - -στρογγύλη, εὐτόρνευτε, μονούατε, μακροτράχηλε, - ὑψαύχην, στεινῷ φθεγγομένη στόματι, - Βάκχου καὶ Μουσέων ἱλαρὴ λάτρι καὶ Κυθερείης, - ἡδύγελως, τερπνὴ συμβολικῶν ταμίη, -τίφθʼ ὁπόταν νήφω, μεθύεις σύ μοι, ἢν δὲ μεθυσθῶ, - ἐκνήφεις; ἀδικεῖς συμποτικὴν φιλίην. -
-
- - -Meleager - - -ἔγχει, καὶ πάλιν εἰπέ, πάλιν, πάλιν Ἡλιοδώρας - -εἰπέ, σὺν ἀκρήτῳ τὸ γλυκὺ μίσγʼ ὄνομα· -καί μοι τὸν βρεχθέντα μύροις καὶ χθιζὸν ἐόντα, -μναμόσυνον κείνας ἀμφιτίθει στέφανον. -δακρύει φιλέραστον ἰδοὺ ῥόδον, οὕνεκα κείναν - ἄλλοθι, κοὐ κόλποις ἁμετέροις ἐσορᾷ. - -
-
- - -Meleager - - -ἔγχει τᾶς Πειθοῦς καὶ Κύπριδος Ἡλιοδώρας, -καὶ πάλι τᾶς αὐτᾶς ἁδυλόγω Χάριτος. -αὐτὰ γὰρ μίʼ ἐμοὶ γράφεται θεός, ἇς τὸ ποθεινὸν - οὔνομʼ ἐν ἀκρήτῳ συγκεράσας πίομαι. -
-
- - -Dioscorides - - -ἵππον Ἀθήνιον ᾖσεν ἐμοὶ κακόν ἐν πυρὶ πᾶσα - Ἴλιος ἦν, κἀγὼ κείνῃ ἅμʼ ἐφλεγόμαν, -οὐ δείσας Δαναῶν δεκέτη πόνον ἐν δʼ ἑνὶ φέγγει -τῷ τότε καὶ Τρῶες κἀγὼ ἀπωλόμεθα. -
-
- - -Meleager - - -ἁδὺ μέλος, ναὶ Πᾶνα τὸν Ἀρκάδα, πηκτίδι μέλπεις, - Ζηνοφίλα, ναὶ Πᾶνʼ , ἁδὺ κρέκεις τι μέλος. - ποῖ σε φύγω; πάντῃ με περιστείχουσιν Ἔρωτες, -οὐδʼ ὅσον ἀμπνεῦσαι βαιὸν ἐῶσι χρόνον. -ἢ γάρ μοι μορφὰ βάλλει πόθον, ἢ πάλι μοῦσα, -ἢ χάρις, ἢ τί λέγω; πάντα πυρὶ φλέγομαι. -
-
- - -Meleager - - -Ἡδυμελεῖς Μοῦσαι σὺν πηκτίδι, καὶ λόγος ἔμφρων -σὺν Πειθοῖ, καὶ Ἔρως Κάλλος ὑφηνιοχῶν, - Ζηνοφίλα, σαὶ σκῆπτρα Πόθων ἀπένειμαν, ἐπεί σοι -αἱ τρισσαὶ Χάριτες τρεῖς ἔδοσαν χάριτας. - -
-
- - -Meleager - - -ναὶ τὸν Ἔρωτα, θέλω τὸ παρʼ οὔασιν Ἡλιοδώρας· -φθέγμα κλύειν ἢ τᾶς Λατοΐδεω κιθάρας. -
-
- - -Anonymi Epigrammatici - - -τίς, ῥόδον ὁ στέφανος Διονυσίου, ἢ ῥόδον αὐτὸς - τοῦ στεφάνου; δοκέω, λείπεται ὁ στέφανος. -
-
- - -Meleager - - -ὁ στέφανος περὶ κρατὶ μαραίνεται Ἡλιοδώρας -αὐτὴ δʼ ἐκλάμπει τοῦ στεφάνου στέφανος. -
-
- - -Meleager - - -ἤδη λευκόιον θάλλει, θάλλει δὲ φίλομβρος - νάρκισσος, θάλλει δʼ οὐρεσίφοιτα κρίνα - ἤδη δʼ ἡ φιλέραστος, ἐν ἄνθεσιν ὥριμον ἄνθος, - Ζηνοφίλα Πειθοῦς ἡδὺ τέθηλε ῥόδον. -λειμῶνες, τί μάταια κόμαις ἔπι φαιδρὰ γελᾶτε; -ἁ γὰρ παῖς κρέσσων ἁδυπνόων στεφάνων. -
-
- - -Asclepiades - - -αὐτοῦ μοι στέφανοι παρὰ δικλίσι ταῖσδε κρεμαστοὶ - μίμνετε, μὴ προπετῶς φύλλα τινασσόμενοι, -οὓς δακρύοις κατέβρεξα· κάτομβρα γὰρ ὄμματʼ ἐρώντων - ἀλλʼ, ὅταν οἰγομένης αὐτὸν ἴδητε θύρης, -στάξαθʼ ὑπὲρ κεφαλῆς ἐμὸν ὑετόν, ὡς ἂν % ἄμεινον -ἡ ξανθή γε κόμη τἀμὰ πίῃ δάκρυα. - -
-
- - -Callimachus - - -τέσσαρες αἱ Χάριτες· ποτὶ γὰρ μία ταῖς τρισὶ κείναις - ἄρτι ποτεπλάσθη, κἦτι μύροισι νοτεῖ -εὐαίων ἐν πᾶσιν ἀρίζαλος Βερενίκα, -ἇς ἄτερ οὐδʼ αὐταὶ ταὶ Χάριτες Χάριτες. -
-
- - -Meleager - - -Πλέξω λευκόιον, πλέξω δʼ ἁπαλὴν ἅμα μύρτοις - νάρκισσον, πλέξω καὶ τὰ γελῶντα κρίνα, - πλέξω καὶ κρόκον ἡδὺν ἐπιπλέξω δʼ ὑάκινθον - πορφυρέην, πλέξω καὶ φιλέραστα ῥόδα, -ὡς ἂν ἐπὶ κροτάφοις μυροβοστρύχου Ἡλιοδώρας -εὐπλόκαμον χαίτην ἀνθοβολῇ στέφανος. -
-
- - -Meleager - - -φαμὶ ποτʼ ἐν μύθοις τὰν εὔλαλον Ἡλιοδώραν - νικάσειν αὐτὰς τὰς Χάριτας χάρισιν. -
-
- - -Meleager - - -τίς μοι Ζηνοφίλαν λαλιὰν παρέδειξεν ἑταίραν; -τίς μίαν ἐκ τρισσῶν ἤγαγέ μοι Χάριτα; -ἦ ῥʼ ἐτύμως ἁνὴρ κεχαρισμένον ἄνυσεν ἔργον, - δῶρα διδούς, καὐτὰν τὰν Χάριν ἐν χάριτι. -
-
- - -Asclepiades - - -Ὡμολόγης1ʼ ἥξειν εἰς νύκτα μοι ἡ πιβόητος -Νικώ, καὶ σεμνὴν ὤμοσε Θεσμοφόρον - -κοὐχ ἥκει, φυλακὴ δὲ παροίχεται. ἆρʼ ἐπιορκεῖν - ἤθελε; τὸν λύχνον, παῖδες, ἀποσβέσατε. -
-
- - -Meleager - - -Ὀξυβόαι κώνωπες, ἀναιδέες, αἵματος ἀνδρῶν - σίφωνες, νυκτὸς κνώδαλα διπτέρυγα, - βαιὸν Ζηνοφίλαν, λίτομαι, πάρεθʼ ἥσυχον ὕπνον -εὕδειν, τἀμὰ δʼ ἰδοὺ σαρκοφαγεῖτε μέλη, -καίτοι πρὸς τί μάτην αὐδῶ; καὶ θῆρες ἄτεγκτοι - τέρπονται τρυφερῷ χρωτὶ χλιαινόμενοι. - ἀλλʼ ἔτι νῦν προλέγω, κακὰ θρέμματα, λήγετε τόλμης, -ἢ γνώσεσθε χερῶν ζηλοτύπων δύναμιν. -
-
- - -Meleager - - -Πταίης μοι, κώνωψ, ταχὺς ἄγγελος, οὔασι δʼ ἄκροις -Ζηνοφίλας ψαύσας προσψιθύριζε τάδε· -ἄγρυπνος “μίμνει σε· σὺ δʼ, ὦ λήθαργε φιλούντων, -εὕδεις.” εἶα, πέτευ; ναί, φιλόμουσε, πέτευ· -ἥσυχα δὲ φθέγξαι, μὴ καὶ σύγκοιτον ἐγείρας -κινήσῃς ἐπʼ ἐμοὶ ζηλοτύπους ὀδύνας, -ἢν δʼ ἀγάγῃς τὴν παῖδα, δορᾷ στέψω σε λέοντος, - κώνωψ, καὶ δώσω χειρὶ φέρειν ῥόπαλον. -
-
- - -Asclepiades - - -Νικαρέτης τὸ πόθοισι βεβαμμένον ἡδὺ πρόσωπον, - πυκνὰ διʼ ὑψορόφων φαινόμενον θυρίδων, -αἱ χαροπαὶ Κλεοφῶντος ἐπὶ προθύροις ἐμάραναν, - Κύπρι φίλη, γλυκεροῦ βλέμματος ἀστεροπαί. - -
-
- - -Meleager - - -ναὶ τὰν νηξαμέναν χαροποῖς ἐνὶ κύμασιν Κύπριν, -ἔστι καὶ ἐκ μορφᾶς ἁ Τρυφέρα τρυφερά. -
-
- - -Meleager - - -ἐντὸς ἐμῆς κραδίης τὴν εὔλαλον Ἡλιοδώραν - ψυχὴν τῆς ψυχῆς αὐτὸς ἔπλασσεν Ἔρως. -
-
- - -Meleager - - -ἁ φίλερως χαροποῖς Ἀσκληπιὰς οἷα γαλήνης -ὄμμασι συμπείθει πάντας ἐρωτοπλοεῖν. -
-
- - -Meleager - - -τρηχὺς ὄνυξ ὑπʼ Ἔρωτος ἀνέτραφες Ἡλιοδώρας· - ταύτης γὰρ δύνει κνίσμα καὶ ἐς κραδίην. -
-
- - -Asclepiades - - -Ἑρμιόνῃ πιθανᾖ ποτʼ ἐγὼ συνέπαιζον, ἐχούσῃ - ζωνίον ἐξ ἀνθέων ποικίλον, ὦ Παφίη, - χρύσεα γράμματʼ ἔχον διόλου δʼ ἐγέγραπτο, “ φίλει με· - καὶ μὴ λυπηθῇς, ἤν τις ἔχῃ μʼ ἕτερος.” -
-
- - -Simonides - - -Βοίδιον ηὑλητρὶς καὶ Πυθιάς, αἳ ποτʼ ἐρασταί, - σοί, Κύπρι, τὰς ζώνας τάς τε γραφὰς ἔθεσαν. - ἔμπορε καὶ φορτηγέ, τὸ σὸν βαλλάντιον οἶδεν - καὶ πόθεν αἱ ζῶναι καὶ πόθεν οἱ πίνακες. - -
-
- - -Meleager - - -Δημὼ λευκοπάρειε, σὲ μέν τις ἔχων ὑπόχρωτα - τέρπεται· ἁ δʼ ἐν ἐμοὶ νῦν στενάχει κραδία. -εἰ δέ σε σαββατικὸς κατέχει πόθος, οὐ μέγα θαῦμα· - ἔστι καὶ ἐν ψυχροῖς σάββασι θερμὸς ἔρως. -
-
- - -Hedylus - - -Εὐφρὼ καὶ Θαῒς καὶ Βοίδιον, αἱ Διομήδους -γραῖαι, ναυκλήρων ὁλκάδες εἰκόσοροι, -Ἆγιν καὶ Κλεοφῶντα καὶ Ἀνταγόρην, ἕνʼ ἑκάστη, - γυμνούς, ναυηγῶν ἥσσονας, ἐξέβαλον. -ἀλλὰ σὺν αὐταῖς νηυσὶ τὰ λῃστρικὰ τῆς Ἀφροδίτης - φεύγετε· Σειρήνων αἵδε γὰρ ἐχθρότεραι. -
-
- - -Asclepiades - - -ἡ λαμυρὴ μʼ ἔτρωσε Φιλαίνιον εἰ δὲ τὸ τραῦμα -μὴ σαφές, ἀλλʼ ὁ πόνος δύεται εἰς ὄνυχα. - οἴχομʼ, Ἔρωτες, ὄλωλα, διοίχομαι· εἰς γὰρ ἑταίραν - νυστάζων ἐπέβην, οἶδʼ, ἔθιγον τʼ Ἀίδα. -
-
- - -Meleager - - -Ἀνθοδίαιτε μέλισσα, τί μοι χροὸς Ἡλιοδώρας - ψαύεις, ἐκπρολιποῦς1ʼ εἰαρινὰς κάλυκας; -ἦ σύ γε μηνύεις ὅτι καὶ γλυκὺ καὶ δυσύποιστον, - πικρὸν ἀεὶ κραδίᾳ, κέντρον Ἔρωτος ἔχει; -ναὶ δοκέω, τοῦτʼ εἶπας. ἰώ, φιλέραστε, παλίμπους - στεῖχε· πάλαι τὴν σὴν οἴδαμεν ἀγγελίην. - -
-
- - -Asclepiades - - -νύξ· σὲ γὰρ οὐκ ἄλλην μαρτύρομαι, οἷά μʼ ὑβρίζει - Πυθιὰς ἡ Νικοῦς, οὖσα φιλεξαπάτις· - κληθείς, οὐκ ἄκλητος, ἐλήλυθα. ταὐτὰ παθοῦσα -σοὶ μέμψαιτʼ ἔτʼ ἐμοῖς στᾶσα παρὰ προθύροις, -
-
- - -Meleager - - -ἓν τόδε, παμμήτειρα θεῶν, λίτομαί σε, φίλη Νύξ, - ναὶ λίτομαι, κώμων σύμπλανε, πότνια Νύξ, -εἴ τις ὑπὸ χλαίνῃ βεβλημένος Ἡλιοδώρας - θάλπεται, ὑπναπάτῃ χρωτὶ χλιαινόμενος, -κοιμάσθω μὲν λύχνος· ὁ δʼ ἐν κόλποισιν ἐκείνης - ῥιπτασθεὶς κείσθω δεύτερος Ἐνδυμίων. -
-
- - -Meleager - - -ὦ Νύξ, ὦ φιλάγρυπνος ἐμοὶ πόθος Ἡλιοδώρας, - καὶ † σκολιῶν ὄρθρων κνίσματα δακρυχαρῆ, -ἆρα μένει στοργῆς ἐμὰ λείψανα, καὶ τὸ φίλημα -μνημόσυνον ψυχρᾷ θάλπετʼ ἐν εἰκασίᾳ; -ἆρά γʼ ἔχει σύγκοιτα τὰ δάκρυα, κἀμὸν ὄνειρον - ψυχαπάτην στέρνοις ἀμφιβαλοῦσα φιλεῖ; -ἢ νέος ἄλλος ἔρως, νέα παίγνια; μήποτε, λύχνε, - ταῦτʼ ἐσίδῃς, εἴης δʼ ἧς παρέδωκα φύλαξ. -
-
- - -Asclepiades - - -ὑετὸς ἦν καὶ νύξ, καὶ τὸ τρίτον ἄλγος ἔρωτι, -οἶνος· καὶ Βορέης ψυχρός, ἐγὼ δὲ μόνος. - -ἀλλʼ ὁ καλὸς Μόσχος πλέον ἴσχυεν. “αἰ σὺ γὰρ οὕτως -ἤλυες, οὐδὲ θύρην πρὸς μίαν ἡσύχασας.” -τῇδε τοσαῦτʼ ἐβόησα βεβρεγμένος· “ἄχρι τίνος, Ζεῦ; -Ζεῦ φίλε, σίγησον καὐτὸς ἐρᾶν ἔμαθες.” -
-
- - -Anonymi Epigrammatici - - -καὶ πυρὶ καὶ νιφετῷ με καί, εἰ βούλοιο, κεραυνῷ - βάλλε, καὶ εἰς κρημνοὺς ἕλκε καὶ εἰς πελάγη· - τὸν γὰρ ἀπαυδήσαντα πόθοις καὶ Ἔρωτι δαμέντα -οὐδὲ Διὸς τρύχει πῦρ ἐπιβαλλόμενον. -
-
- - -Asclepiades - - -ἡδὺ θέρους διψῶντι χιὼν ποτόν ἡδὺ δὲ ναύταις -ἐκ χειμῶνος ἰδεῖν εἰαρινὸν ζέφυρον· -ἥδιον δʼ ὁπόταν κρύψῃ] μία τοὺς φιλέοντας - χλαῖνα, καὶ αἰνῆται Κύπρις ὑπʼ ἀμφοτέρων. -
-
- - -Nossis - - -ἅδιον οὐδὲν ἔρωτος, ἃ δʼ ὄλβια, δεύτερα πάντα -ἐστὶν ἀπὸ στόματος δʼ ἔπτυσα καὶ τὸ μέλι. -τοῦτο λέγει Νοσσίς· τίνα δʼ ἁ Κύπρις οὐκ ἐφίλασεν, -οὐκ οἶδεν κήνα γʼ ἄνθεα ποῖα ῥόδα. - -
-
- - -Meleager - - -τὸ σκύφος ἁδὺ γέγηθε, λέγει δʼ ὅτι τᾶς φιλέρωτος - Ζηνοφίλας ψαύει τοῦ λαλιοῦ στόματος. -ὄλβιον εἴθʼ ὑπʼ ἐμοῖς νῦν χείλεσι χείλεα θεῖσα - ἀπνευστὶ ψυχὰν τὰν ἐν ἐμοὶ προπίοι. -
-
- - -Meleager - - -ὄρθρε, τί μοι, δυσέραστε, ταχὺς περὶ κοῖτον ἐπέστης - ἄρτι φίλας Δημοῦς χρωτὶ χλιαινομένῳ; - εἴθε πάλιν στρέψας ταχινὸν δρόμον Ἕσπερος εἴης, -ὦ γλυκὺ φῶς βάλλων εἰς ἐμὲ πικρότατον. -ἤδη γὰρ καὶ πρόσθεν ἐπʼ Ἀλκμήνῃ Διὸς ἦλθες - ἀντίος· οὐκ ἀδαής ἐσσι παλινδρομίης. -
-
- - -Meleager - - -ὄρθρε, τί νῦν, δυσέραστε, βραδὺς περὶ κόσμον ἑλίσσῃ, - ἄλλος ἐπεὶ Δημοῦς θάλπεθʼ ὑπὸ χλανίδι; - ἀλλʼ ὅτε τὰν ῥαδινὰν κόλποις ἔχον, ὠκὺς ἐπέστης, -ὡς βάλλων ἐπʼ ἐμοὶ φῶς ἐπιχαιρέκακον. -
-
- - -Meleager - - -εὕδεις, Ζηνοφίλα, τρυφερὸν θάλος. εἴθʼ ἐπὶ σοὶ νῦν -ἄπτερος εἰσῄεινὝπνος ἐπὶ βλεφάροις, -ὡς ἐπὶ σοὶ μηδʼ οὗτος, ὁ καὶ Διὸς ὄμματα θέλγων, -φοιτήσαι, κάτεχον δʼ αὐτὸς ἐγώ σε μόνος. - -
-
- - -Meleager - - -οἶδʼ ὅτι μοι κενὸς ὅρκος, ἐπεὶ σέ γε τὴν φιλάσωτον - μηνύει μυρόπνους ἀρτιβρεχὴς πλόκαμος, - μηνύει δʼ ἄγρυπνον ἰδοὺ βεβαρημένον ὄμμα, - καὶ σφιγκτὸς στεφάνων ἀμφὶ κόμαισι μίτος· -ἔσκυλται δʼ ἀκόλαστα πεφυρμένος ἄρτι κίκιννος, - πάντα δʼ ὑπʼ ἀκρήτου γυῖα σαλευτὰ φαρεῖς. - ἔρρε, γύναι πάγκοινε· καλεῖ σε γὰρ ἡ φιλόκωμος -πηκτὶς καὶ κροτάλων χειροτυπὴς πάταγος. -
-
- - -Meleager - - -δεινὸς Ἔρως, δεινός. τί δὲ τὸ πλέον, ἢν πάλιν εἴπω, - καὶ πάλιν, οἰμώζων πολλάκι, δεινὸς Ἔρως ; - -ἦ γὰρ ὁ παῖς τούτοισι γελᾷ, καὶ πυκνὰ κακισθεὶς -ἥδεται· ἢν δʼ εἴπω λοίδορα, καὶ τρέφεται. -θαῦμα δέ μοι, πῶς ἆρα διὰ γλαυκοῖο φανεῖσα -κύματσς, ἐξ ὑγροῦ, Κύπρι, σὺ πῦρ τέτοκας. -
-
- - -Meleager - - -κηρύσσω τὸν ἔρωτα, τὸν ἄγριον ἄρτι γὰρ ἄρτι - ὀρθρινὸς ἐκ κοίτας ᾤχετʼ ἀποπτάμενος. - ἔστι δʼ ὁ παῖς γλυκύδακρυς, ἀείλαλος, ὠκύς, ἀθαμβής, - σιμὰ γελῶν, πτερόεις νῶτα, φαρετροφόρος. -πατρὸς δʼ οὐκέτʼ ἔχω φράζειν τίνος· οὔτε γὰρ Αἰθήρ, -οὐ Χθών φησι τεκεῖν τὸν θρασύν, οὐ Πέλαγος· - πάντῃ γὰρ καὶ πᾶσιν ἀπέχθεται. ἀλλʼ ἐσορᾶτε -μή που νῦν ψυχαῖς ἄλλα τίθησι λίνα. - καίτοι κεῖνος, ἰδού, περὶ φωλεόν. οὔ με λέληθας, -τοξότα, Ζηνοφίλας ὄμμασι κρυπτόμενος. -H. C. Beeching, In a Garden, p. 101. - -
-
- - -Meleager - - -Πωλείσθω, καὶ ματρὸς ἔτʼ ἐν κόλποισι καθεύδων, - πωλείσθω. τί δέ μοι τὸ θρασὺ τοῦτο τρέφειν; -καὶ γὰρ σιμὸν ἔφυ καὶ ὑπόπτερον, ἄκρα δʼ ὄνυξιν - κνίζει, καὶ κλαῖον πολλὰ μεταξὺ γελᾷ· -πρὸς δʼ ἔτι λοιπὸν ἄθρεπτον, ἀείλαλον, ὀξὺ δεδορκός, - ἄγριον, οὐδʼ αὐτῇ μητρὶ φίλῃ τιθασὸν - πάντα τέρας, τοιγὰρ πεπράσεται. εἴ τις ἀπόπλους - ἔμπορος ὠνεῖσθαι παῖδα θέλει, προσίτω. - καίτοι λίσσετʼ, ἰδού, δεδακρυμένος. οὒ ς1ʼ ἔτι πωλῶ· -θάρσει· Ζηνοφίλᾳ σύντροφος ὧδε μένε, -
-
- - -Meleager - - -ναὶ τὰν Κύπριν, Ἔρως, φλέξω τὰ σὰ πάντα πυρώσας, - τόξα τε καὶ Σκυθικὴν ἰοδόκον φαρέτρην - φλέξω, ναί, τί μάταια γελᾷς, καὶ σιμὰ σεσηρὼς - μυχθίζεις; τάχα που σαρδάνιον γελάσεις. -ἦ γάρ σευ τὰ ποδηγὰ Πόθων ὠκύπτερα κόψας, -χαλκόδετον σφίγξω σοῖς περὶ ποσσὶ πέδην. -καίτοι Καδμεῖον κράτος οἴσομεν, εἴ σε πάροικον -ψυχῇ συζεύξω, λύγκα παρʼ αἰπολίοις. - ἀλλʼ ἴθι, δυσνίκητε, λαβὼν δʼ ἔπι κοῦφα πέδιλα -ἐκπέτασον ταχινὰς εἰς ἑτέρους πτέρυγας. -
-
- - -Meleager - - -τί ξένον, εἰ βροτολοιγὸς Ἔρως τὰ πυρίπνοα τόξα - βάλλει, καὶ λαμυροῖς ὄμμασι πικρὰ γελᾷ; - -οὐ μάτηρ στέργει μὲν Ἄρη γαμέτις δὲ τέτυκται -Ἁφαίστου, κοινὰ καὶ πυρὶ καὶ ξίφεσιν; -ματρὸς δʼ οὐ μάτηρ ἀνέμων μάστιξι Θάλασσα -τραχὺ βοᾷ; γενέτας δʼ οὔτε τις οὔτε τινός. - τοὔνεκεν Ἁφαίστου μὲν ἔχει φλόγα. κύμασι δʼ ὀργὰν - στέρξεν ἴσαν, Ἄρεως δʼ αἱματόφυρτα βέλη. -
-
- - -Asclepiades - - -τῶν † καρίων ἡμῖν λάβε † κώλακας ʽἀλλὰ πόθʼ ἤξεἰ, - καὶ πέντε στεφάνους τῶν ῥοδίνων. τί τὸ Πάξ; -οὐ φὴς κέρματʼ ἔχειν; διολώλαμεν. οὐ τροχιεῖ τις - τὸν Λαπίθην; λῃστήν, οὐ θεράποντʼ ἔχομεν. -οὐκ ἀδικεῖς; οὐδέν; φέρε τὸν λόγον ἐλθὲ λαβοῦσα, - Φρύνη, τὰς ψήφους. ὦ μεγάλου κινάδους. - πέντʼ οἶνος δραχμῶν ἀλλᾶς δύο - -ὦτα λέγεις σκόμβροι σησαμίδες, σχάδονες. - αὔριον αὐτὰ καλῶς λογιούμεθα· νῦν δὲ πρὸς Αἴσχραν -τὴν μυρόπωλιν ἰὼν, πέντε λάβʼ ἀργυρέας. - εἰπὲ δὲ σημεῖον, Βάκχων ὅτι πέντʼ ἐφίλησεν - ἑξῆς, ὧν κλίνη μάρτυς ἐπεγράφετο. -
-
- - -Meleager - - -ἄγγειλον τάδε, Δορκάς· ἰδοὺ πάλι δεύτερον αὐτῇ - καὶ τρίτον ἄγγειλον, Δορκάς, ἅπαντα. τρέχε· - μηκέτι μέλλε, πέτου — βραχύ μοι, βραχύ, Δορκάς, ἐπίσχες.. - Δορκάς, ποῖ σπεύδεις, πρίν σε τὰ πάντα μαθεῖν; - -πρόσθες δʼ οἷς εἴρηκα πάλαι — μᾶλλον δὲ ʽτί ληρῶ;ʼ - μηδὲν ὅλως εἴπῃς — ἀλλʼ ὅτι — πάντα λέγε· -μὴ φείδου τὰ ἅπαντα λέγειν. καίτοι τί σε Δορκάς, - ἐκπέμπω, σὺν σοὶ καὐτός, ἰδού, προάγων; -
-
- - -Posidippus - - -τέσσαρες οἱ πίνοντες· ἐρωμένη ἔρχεθʼ ἑκάστῳ· - ὀκτὼ γινσμένοις ἓν Χίον οὐχ ἱκανόν. -παιδάριον, βαδίσας πρὸς Ἀρίστιον, εἰπὲ τὸ πρῶτον - ἡμιδεὲς πέμψαι· χοῦς γὰρ ἄπεισι δύο -ἀσφαλέως· οἶμαι δʼ ὅτι καὶ πλέον. ἀλλὰ τρόχαζε· -ὥρας γὰρ πέμπτης πάντες ἀθροιζόμεθα. -
-
- - -Meleager - - -ἔγνων, οὒ μʼ ἔλαθες· τί θεούς; οὐ γάρ με λέληθας· - ἔγνων μηκέτι νῦν ὄμνυε· πάντʼ ἔμαθον. -ταῦτʼ ἦν, ταῦτʼ, ἐπίορκε; μόνη σὺ πάλιν, μόνη ὑπνοῖς; -ὦ τόλμης καὶ νῦν, νῦν ἔτι φησί, μόνη. - -οὐχ ὁ περίβλεπτός σε Κλέων; κἂν μὴ τί δʼ ἀπειλῶ; - ἔρρε, κακὸν κοίτης θηρίον, ἔρρε τάχος. - καίτοι σοι δώσω τερπνὴν χάριν οἶδʼ ὅτι βούλει - κεῖνον ὁρᾶν αὐτοῦ δέσμιος ὧδε μένε. -
-
- - -Asclepiades - - -εἰς ἀγορὰν βαδίσας, Δημήτριε, τρεῖς παρʼ Ἀμύντου - γλαυκίσκους αἴτει, καὶ δέκα φυκίδια· - -καὶ κυφὰς καρῖδας ʽἀριθμήσει δέ σοι αὐτόσ̓ - εἴκοσι καὶ τέτορας δεῦρο λαβὼν ἄπιθι. -καὶ παρὰ Θαυβορίου ῥοδίνους ἓξ πρόσλαβε . - καὶ Τρυφέραν ταχέως ἐν παρόδῳ κάλεσον. -
-
- - -Posidippus - - -μή με δόκει πιθανοῖς ἀπατᾷν δάκρυσσι, Φιλαινί. -οἶδα· φιλεῖς γὰρ ὅλως οὐδένα μεῖζον ἐμοῦ, -τοῦτον ὅσον παρʼ ἐμοὶ κέκλισαι χρόνον εἰ δʼ ἕτερός σε -εἶχε, φιλεῖν ἂν ἔφης μεῖζον ἐκεῖνον ἐμοῦ. -
-
- - -Meleager - - -εἰπὲ Λυκαινίδι, Δορκάς· “ἴδʼ ὡς ἐπίτηκτα φιλοῦσα -ἥλως· οὐ κρύπτει πλαστὸν ἔρωτα χρόνος.” -
-
- - -Leonidas - - -οὐκ ἀδικέω τὸν Ἔρωτα. γλυκύς, μαρτύρομαι αὐτὴν - Κύπριν βέβλημαι δʼ ἐκ δολίου κέραος, - καὶ πᾶς τεφροῦμαι· θερμὸν δʼ ἐπὶ θερμῷ ἰάλλει - ἄτρακτον, λωφᾷ δʼ οὐδʼ ὅσον ἰοβολῶν. -χὠ θνητὸς τὸν ἀλιτρὸν ἐγώ, κεἰ πτηνὸς ὁ δαίμων, -τίσομαι· ἐγκλήμων δʼ ἔσσομʼ ἀλεξόμενος; -
-
- - -Asclepiades - - -νὺξ μακρὴ καὶ χεῖμα, μέσην δʼ ἐπὶ Πλειάδα δύνει· - κἀγὼ πὰρ προθύροις νίσσομαι ὑόμενος, - -τρωθεὶς τῆς δολίης κείνης πόθῳ· οὐ γὰρ ἔρωτα - Κύπρις, ἀνιηρὸν δʼ ἐκ πυρὸς ἧκε βέλος. -
-
- - -Meleager - - -κῦμα τὸ πικρὸν Ἔρωτος, ἀκοίμητοί τε πνέοντες -ζῆλοι, καὶ κώμων χειμέριον πέλαγος, - ποῖ φέρομαι; πάντῃ δὲ φρενῶν οἴακες ἀφεῖνται, -ἦ πάλι τὴν τρυφερὴν Σκύλλαν ἐποψόμεθα; -
-
- - -Meleager - - -ἄστρα, καὶ ἡ φιλέρωσι καλὸν φαίνουσα Σελήνη, -καὶ Νύξ, καὶ κώμων σύμπλανον ὀργάνιον, -ἆρά γε τὴν φιλάσωτον ἔτʼ ἐν κοίταισιν ἀθρήσω - ἄγρυπνον, λύχνῳ πόλλʼ ἀποκλαομένην; -ἦ τινʼ ἔχει σύγκοιτον ; ἐπὶ προθύροισι μαράνας - δάκρυσιν ἐκδήσω τοὺς ἱκέτας στεφάνους, -ἓν τόδʼ ἐπιγράψας· “ Κύπρι, σοὶ Μελέαγρος, ὁ μύστης - σῶν κώμων, στοργῆς σκῦλα τάδʼ ἐκρέμασεν.” -
-
- - -Meleager - - -γυμνὴν ἢν ἐσίδῃς Καλλίστιον, ὦ ξένε, φήσεις· -ἤλλακται διπλοῦν γράμμα Συρηκοσίων. - -
-
- - -Dioscorides - - -ἡ τρυφερὴ μʼ ἤγρευσε Κλεὼ τὰ γαλάκτινʼ, Ἄδωνι, -τῇ σῇ κοψαμένη στήθεα παννυχίδι. - -εἰ δώσει κἀμοὶ ταύτην χάριν, ἢν ἀποπνεύσω, -μὴ πρόφασις, σύμπλουν σύν με λαβὼν ἀπάγου. -
-
- - -Posidippus - - -αὐτοὶ τὴν ἁπαλὴν Εἰρήνιον ἦγον Ἔρωτες, - Κύπριδος ἐκ χρυσέων ἐρχομένην θαλάμων, -ἐκ τριχὸς ἄχρι ποδῶν ἱερὸν θάλος, οἷά τε λύγδου - γλυπτήν, παρθενίων βριθομένην χαρίτων -καὶ πολλοὺς τότε χερσὶν ἐπʼ ἠιθέοισιν ὀιστοὺς -τόξου Ἰτορφνρέης ἧκαν ἀφʼ ἁρπεδόνης. -
-
- - -Meleager - - -αἱ τρισσαὶ Χάριτες τρισσὸν στεφάνωμα συνείραν - Ζηνοφίλᾳ, τρισσᾶς σύμβολα καλλοσύνας· -ἁ μὲν ἐπὶ χρωτὸς θεμένα πόθον, ἁ δʼ ἐπὶ μορφᾶς - ἵμερον, ἁ δὲ λόγοις τὸ γλυκύμυθον ἔπος. -Τρισσάκις εὐδαίμων, ἇς καὶ Κύπρις ὥπλισεν εὐνὰν, -καὶ Πειθὼ μύθους, καὶ γλυκὺ κάλλος Ἔρως. -
-
- - -Meleager - - -Ζηνοφίλᾳ κάλλος μὲν Ἔρως, σύγκοιτα δὲ φίλτρα - Κύπρις ἔδωκεν ἔχειν, αἱ Χάριτες δὲ χάριν. -
-
- - -Meleager - - -ναὶ μὰ τὸν εὐπλόκαμον Τιμοῦς φιλέρωτα κίκιννον, - ναὶ μυρόπνουν Δημοῦς χρῶτα τὸν ὑπναπάτην, -ναὶ πάλιν Ἰλιάδος φίλα παίγνια, ναὶ φιλάγρυπνον - λύχνον, ἐμῶν κώμων πόλλʼ ἐπιδόντα τέλη, - -βαιὸν ἔχω τό γε λειφθέν, Ἔρως, ἐπὶ χείλεσι πνεῦμα· -εἰ δʼ ἐθέλεις καὶ τοῦτʼ, εἰπέ, καὶ ἐκπτύσομαι, -
-
- - -Meleager - - -οὐ πλόκαμον Τιμοῦς, οὐ σάνδαλον Ἡλιοδώρας, -οὐ τὸ μυρόρραντον Δημαρίου πρόθυρον, -οὐ τρυφερὸν μείδημα βοώπιδος Ἀντικλείας, -οὐ τοὺς ἀρτιθαλεῖς Δωροθέας στεφάνους· -οὐκέτι σοὶ φαρέτρη πτερόεντας ὀιστοὺς - κρύπτει, Ἔρως· ἐν ἐμοὶ πάντα γάρ ἐστι βέλη. -
-
- - -Hedylus - - -οἶνος καὶ προπόσεις κατεκοίμισαν Ἀγλαονίκην -αἱ δόλιαι, καὶ ἔρως ἡδὺς ὁ Νικαγόρεω, -ἧς πάρα Κύπριδι ταῦτα μύροις ἔτι πάντα μυδῶντα - κεῖνται, παρθενίων ὑγρὰ λάφυρα πόθων, -σάνδαλα, καὶ μαλακαί, μαστῶν ἐνδύματα, μίτραι. -ὕπνου καὶ σκυλμῶν τῶν τότε μαρτύρια. -
-
- - -Anonymi Epigrammatici - - -ὁ κρόκος, οἵ τε μύροισιν ἔτι πνείοντες Ἀλεξοῦς -σὺν μίτραις κισσοῦ κυάνεοι στέφανοι -τῷ γλυκερῷ καὶ θῆλυ κατιλλώπτοντι Πριήπῳ - κεῖνται, τῆς ἱερῆς ξείνια παννυχίδος. -
-
- - -Anonymi Epigrammatici - - -Ἠγρύπνησε Λεοντὶς ἕως πρὸς καλὸν Ἑῷον - ἀστέρα, τῷ χρυσέῳ τερπομένη Σθενίῳ· -ἧς πάρα Κύπριδι τοῦτο τὸ σὺν Μούσαισι μελισθὲν - βάρβιτον ἐκ κείνης κεῖτʼ ἔτι παννυχίδσς. - -
-
- - -Posidippus - - -πορφυρέην μάστιγα καὶ ἡνία σιγαλόεντα - Πλαγγὼν εὐίππων θῆκεν ἐπὶ προθύρων, - νικήσασα κέλητι Φιλαινίδα τὴν πολύχαρμον, - ἑσπερινῶν πώλων ἄρτι φρυασσομένων. -Κύπρι φίλη, σὺ δὲ τῇδε πόροις νημερτέα νίκης - δόξαν, ἀείμνηστον τήνδε τιθεῖσα χάριν. -
-
- - -Asclepiades - - -Λυσιδίκη σοί, Κύπρι, τὸν ἱππαστῆρα μύωπα, - χρύσεον εὐκνήμου κέντρον ἔθηκε ποδός, -ᾧ πολὺν ὕπτιον ἵππον ἐγύμνασεν οὐ δὲ ποτʼ αὐτῆς - μηρὸς ἐφοινίχθη κοῦφα τινασσομένης· -ἦν γὰρ ἀκέντητος τελεοδρόμος· οὕνεκεν ὅπλον - σοὶ κατὰ μεσσοπύλης χρύσεον ἐκρέμασεν. -
-
- - -Meleager - - -οὐκέτι, Τιμάριον, τὸ πρὶν γλαφυροῖο κέλητος - πῆγμα φέρει πλωτὸν Κύπριδος εἰρεσίην· - ἀλλʼ ἐπὶ μὲν νώτοισι μετάφρενον, ὡς κέρας ἱστῷ, -κυρτοῦται, πολιὸς δʼ ἐκλέλυται πρότονος· -ἱστία δʼ αἰωρητὰ χαλᾷ σπαδονίσματα μαστῶν -ἐκ δὲ σάλου στρεπτὰς γαστρὸς ἔχει ῥυτίδας· - νέρθε δὲ πάνθʼ ὑπέραντλα νεώς, κοίλῃ δὲ θάλασσα -πλημμύρει, γόνασιν δʼ ἔντρομός ἐστι σάλος. -δύστανός τοι ζωὸς ἔτʼ ὢν Ἀχερουσίδα λίμνην -πλεύσετʼ ἄνωθʼ ἐπιβὰς γραὸς ἐπʼ εἰκοσόρῳ. - -
-
- - -Anonymi Epigrammatici - - -ἴυγξ ἡ Νικοῦς, ἡ καὶ διαπόντιον ἕλκειν -ἄνδρα καὶ ἐκ θαλάμων παῖδας ἐπισταμένη, -χρυσῷ ποικιλθεῖσα, διαυγέος ἐξ ἀμεθύστου - γλυπτή, σοὶ κεῖται, Κύπρι, φίλον κτέανον, -πορφυρέης ἀμνοῦ μαλακῇ τριχὶ μέσσα δεθεῖσα, - τῆς Λαρισσαίης ξείνια φαρμακίδος. -
-
- - -Leonidas - - -Μηλὼ καὶ Σατύρη τανυήλικες, Ἀντιγενείδεω - παῖδες, ταὶ Μουσῶν εὔκολοι ἐργάτιδες· - Μηλὼ μὲν Μούσαις Πιμπληΐσι τοὺς ταχυχειλεῖς -αὐλοὺς καὶ ταύτην πύξινον αὐλοδόκην -ἡ φίλερως Σατύρη δὲ τὸν ἕσπερον οἰνοποτήρων - σύγκωμον, κηρῷ ζευξαμένη, δόνακα, - ἡδὺν συριστῆρα, σὺν ᾧ πανεπόρφνιος ἠῶ - ηὔγασεν αὐλείοις οὐ κοτέουσα θύραις. -
-
- - -Asclepiades - - -αἱ Σάμιαι Βιττὼ καὶ Νάννιον εἰς Ἀφροδίτης -φοιτᾶν τοῖς αὐτῆς οὐκ ἐθέλουσι νόμοις, -εἰς δʼ ἕτερʼ αὐτομολοῦσιν, ἃ μὴ καλά. δεσπότι Κύπρι, - μίσει τὰς κοίτης τῆς παρὰ σοὶ φυγάδας, -
-
- - -Meleager - - -οὔ μοι παιδομανὴς κραδία· -τί δὲ τερπνόν,Ἔρωτες , -ἀνδροβατεῖν εἰ μὴ δούς τι λαβεῖν ἐθέλει; -ἁ χεὶρ γὰρ τὰν χεῖρα. καλά με μένει παράκοιτις· -ἔρροι πᾶς ἄρσην ἀρσενικαῖς λαβίσιν. - -
-
- - -Posidippus - - -σῇ, Παφίη Κυθέρεια, παρʼ ᾐόνι εἶδε Κλέανδρος - Νικοῦν ἐν χαροποῖς κύμασι νηχομένην· -καιόμενος δʼ ὑπʼ Ἔρωτος ἐνὶ φρεσὶν ἄνθρακας ὡνὴρ - ξηροὺς ἐκ νοτερῆς παιδὸς ἐπεσπάσατο. -χὠ μὲν ἐναυάγει γαίης ἔπι· τὴν δέ, θαλάσσης - ψαύουσαν, πρηεῖς εἴχοσαν αἰγιαλοί. - νῦν δʼ ἴσος ἀμφοτέροις φιλίης πόθος οὐκ ἀτελεῖς γὰρ -εὐχαί, τὰς κείνης εὔξατʼ ἐπʼ ἠιόνος. -
-
- - -Asclepiades - - -τῷ θαλλῷ Διδύμη με συνήρπασεν ὤ μοι. ἐγὼ δὲ - τήκομαι, ὡς κηρὸς πὰρ πυρί, κάλλος ὁρῶν. -εἰ δὲ μέλαινα, τί τοῦτο ; καὶ ἄνθρακες· ἀλλʼ ὅτʼ ἐκείνους - θάλψωμεν, λάμπους1ʼ ὡς ῥόδεαι κάλυκες. -
-
- - -Posidippus - - -δάκρυα καὶ κῶμοι, τί μʼ ἐγείρετε, πρὶν πόδας ἆραι -ἐκ πυρός, εἰς ἑτέρην Κύπριδος ἀνθρακιήν; - λήγω δʼ οὔποτʼ ἔρωτος ἀεὶ δέ μοι ἐξ Ἀφροδίτης - ἄλγος ὁ μὴ κρίνων καινὸν ἄγει τι Πόθος· -
-
- - -Meleager - - -αἰεί μοι δινεῖ μὲν ἐν οὔασιν ἦχος Ἔρωτος, -ὄμμα δὲ σῖγα Πόθοις τὸ γλυκὺ δάκρυ φέρει· -οὐδʼ ἡ νύξ, οὐ φέγγος ἐκοίμισεν, ἀλλʼ ὑπὸ φίλτρων - ἤδη που κραδίᾳ γνωστὸς ἔνεστι τύπος. -ὦ πτανοί, μὴ καὶ ποτʼ ἐφίπτασθαι μέν, Ἔρωτες, - οἴδατʼ, ἀποπτῆναι δʼ οὐδʼ ὅσον ἰσχύετε; - -
-
- - -Posidippus - - -Πυθιάς, εἰ μὲν ἔχει τινʼ, ἀπέρχομαι· εἰ δὲ καθεύδει - ὧδε μόνη, μικρόν, πρὸς Διός, ἐσκαλέσαις. - εἰπὲ δὲ σημεῖον, μεθύων ὅτι καὶ διὰ κλωπῶν -ἦλθον, Ἔρωτι θρασεῖ χρώμενος ἡγεμόνι, -
-
- - -Meleager - - -Σφαιριστὰν τὸν Ἔρωτα τρέφω· σοὶ δʼ, Ἡλιοδώρα, - βάλλει τὰν ἐν ἐμοὶ παλλομέναν κραδίαν. - ἀλλʼ ἄγε συμπαίκταν δέξαι Πόθον εἰ δʼ ἀπὸ σεῦ -ῥίψαις, οὐκ οἴσει τὰν ἀπάλαιστρον ὕβριν. -
-
- - -Meleager - - -λίσσομʼ, Ἔρως, τὸν ἄγρυπνον ἐμοὶ πόθον Ἡλιοδώρας - κοίμισον, αἰδεσθεὶς Μοῦσαν ἐμὴν ἱκέτιν. - ναὶ γὰρ δὴ τὰ σὰ τόξα, τὰ μὴ δεδιδαγμένα βάλλειν - ἄλλον, ἀεὶ δʼ ἐπʼ ἐμοὶ πτηνὰ χέοντα βέλη, -εἰ καί με κτείναις, λείψω φωνὴν προϊέντα - γράμματʼ -ἔρωτος ὅρα, ξεῖνε, μιαιφονίην. -
-
- - -Agathias Scholasticus - - -εἰ φιλέεις, μὴ πάμπαν ὑποκλασθέντα χαλάσσῃς - θυμὸν ὀλισθηρῆς ἔμπλεον ἱκεσίης· -ἀλλά τι καὶ φρονέοις στεγανώτερον, ὅσσον ἐρύσσαι - ὀφρύας, ὅσσον ἰδεῖν βλέμματι φειδομένῳ. -ἔργον γάρ τι γυναιξὶν ὑπερφιάλους ἀθερίζειν - καὶ κατακαγχάζειν τῶν ἄγαν οἰκτροτάτων. - κεῖνος δʼ ἐστὶν ἄριστος ἐρωτικός, ὃς τάδε μίξει -οἶκτον ἔχων ὀλίγῃ ξυνὸν ἀγηνορίῃ, - -
-
- - -Paulus Silentiarius - - -χρύσεος ἀψαύστοιο διέτμαγεν ἅμμα κορείας -Ζεύς, διαδὺς Δανάας χαλκελάτους θαλάμους. - φαμὶ λέγειν τὸν μῦθον ἐγὼ τάδε· “ χάλκεα νικᾷ - τείχεα καὶ δεσμοὺς χρυσὸς ὁ πανδαμάτωρ.” -χρυσὸς ὅλους ῥυτῆρας, ὅλας κληῖδας ἐλέγχει, - χρυσὸς ἐπιγνάμπτει τὰς σοβαροβλεφάρους· - καὶ Δανάας ἐλύγωσεν ὅδε φρένα. μή τις ἐραστὴς - λισσέσθω Παφίαν, ἀργύριον παρέχων. -
-
- - -Agathias Scholasticus - - -τὸν σοβαρὸν Πολέμωνα, τὸν ἐν θυμέλῃσι Μενάνδρου - κείραντα γλυκεροὺς τῆς ἀλόχου πλοκάμους, - ὁπλότερος Πολέμων μιμήσατο, καὶ τὰ Ῥοδάνθης - βόστρυχα παντόλμοις χερσὶν ἐληίσατο, -καὶ τραγικοῖς ἀχέεσσι τὸ κωμικὸν ἔργον ἀμείψας, - μάστιξεν ῥαδινῆς ἅψεα θηλυτέρης. - ζηλομανὲς τὸ κόλασμα· τί γὰρ τόσον ἤλιτε κούρη, -εἴ με κατοικτείρειν ἤθελε τειρόμενον; -σχέτλιος· ἀμφοτέρους δὲ διέτμαγε, μέχρι καὶ αὐτοῦ -βλέμματος ἐνστήσας αἴθοπα βασκανίην, - ἀλλʼ ἔμπης τελέθει Μισούμενος· αὐτὰρ ἔγωγε - δύσκολος, οὐχ ὁρόων τὴν Περικειρομένην. -
-
- - -Paulus Silentiarius - - -Κλέψωμεν, Ῥοδόπη, τὰ φιλήματα, τὴν τʼ ἐρατεινὴν -καὶ περιδήριτον Κύπριδος ἐργασίην. -ἡδὺ λαθεῖν, φυλάκων τε παναγρέα κανθὸν ἀλύξαι· - φώρια δʼ ἀμφαδίων λέκτρα μελιχρότερα, - -
-
- - -Agathias Scholasticus - - -εἰ καὶ νῦν πολιή σε κατεύνασε, καὶ τὸ θαλυκρὸν -κεῖνο κατημβλύνθη κέντρον ἐρωμανίης, -ὤφελες, ὦ Κλεόβουλε, πόθους νεότητος ἐπιγνούς, - νῦν καὶ ἐποικτείρειν ὁπλοτέρων ὀδύνας, -μηδʼ ἐπὶ τοῖς ξυνοῖς κοτέειν μέγα, μηδὲ κομάων - τὴν ῥαδινὴν κούρην πάμπαν ἀπαγλαΐσαι. -ἀντὶ πατρὸς τῇ παιδὶ πάρος μεμέλησο ταλαίνῃ, - καὶ νῦν ἐξαπίνης ἀντίπαλος γέγονας. -
-
- - -Paulus Silentiarius - - -μέχρι τίνος φλογόεσσαν ὑποκλέπτοντες ὀπωπὴν - φώριον ἀλλήλων βλέμμα τιτυσκόμεθα; - λεκτέον ἀμφαδίην μελεδήματα· κἤν τις ἐρύξῃ] -μαλθακὰ λυσιπόνου πλέγματα συζυγίης, -φάρμακον ἀμφοτέροις ξίφος ἔσσεται· ἥδιον ἡμῖν - ξυνὸν ἀεὶ μεθέπειν ἢ βίον ἢ θάνατον. -
-
- - -Agathias Scholasticus - - - -εἴ ποτε μὲν κιθάρης ἐπαφήσατο πλῆκτρον ἑλοῦσα - κούρη, Τερψιχόρης ἀντεμέλιζε μίτοις· -εἴ ποτε δὲ τραγικῷ ῥοιζήματι ῥήξατο φωνήν, -αὐτῆς Μελπομένης βόμβον ἀπεπλάσατο· -εἰ δὲ καὶ ἀγλαΐης κρίσις ἵστατο, μᾶλλον ἂν αὐτὴ - Κύπρις ἐνικήθη, κἀνεδίκαζε Πάρις. - σιγῇ ἐφ̓ʼ ἡμείων, ἵνα μὴ Διόνυσος ἀκούσας - τῶν Ἀριαδνείων ζῆλον ἔχοι λεχέων. - -
-
- - -Macedonius II - - -Φωσφόρε, μὴ τὸν Ἔρωτα βιάζεο, μηδὲ διδάσκου, -Ἄρεϊ γειτονέων, νηλεὲς ἦτορ ἔχειν -ὡς δὲ πάρος, Κλυμένης ὁρόων Φαέθοντα μελάθρῳ, -οὐ δρόμον ὠκυπόδην εἶχες ἐπʼ ἀντολίης, -οὕτω μοι περὶ νύκτα, μόγις ποθέοντι φανεῖσαν, - ἔρχεο δηθύνων ὡς παρὰ Κιμμερίοις. -
-
- - -Macedonius II - - -λῆξον,Ἔρως, κραδίης τε καὶ ἥπατος· εἰ δʼ ἐπιθυμεῖς - βάλλειν, ἄλλο τί μου τῶν μελέων μετάβα. -
-
- - -Macedonius II - - -ἕλκος ἔχω τὸν ἔρωτα· ῥέει δέ μοι ἕλκεος ἰχώρ, - δάκρυον, ὠτειλῆς οὔποτε τερσομένης. - εἰμὶ γὰρ ἐκ κακότητος ἀμήχανος, οὐδὲ Μαχάων -ἤπιά μοι πάσσει φάρμακα δευομένῳ. -Τήλεφός εἰμι, κόρη, σὺ δὲ γίνεο πιστὸς Ἀχιλλεύς -κάλλεϊ σῷ παῦσον τὸν πόθον, ὡς ἔβαλες. -
-
- - -Paulus Silentiarius - - -ὀφθαλμοί, τέο μέχρις ἀφύσσετε νέκταρ Ἐρώτων, - κάλλεος ἀκρήτου ζωροπόται θρασέες; -τῆλε; διαθρέξωμεν ὅπῃ σθένος· ἐν δὲ γαλήνῃ - νηφάλια σπείσω Κύπριδι Μειλιχίῃ. -εἰ δʼ ἄρα του καὶ κεῖθι κατάσχετος ἔσσομαι οἴστρῳ, - γίνεσθε κρυεροῖς δάκρυσι μυδαλέοι, - ἔνδικον ὀτλήσοντες ἀεὶ πόνον· ἐξ ὑμέων γάρ, - φεῦ, πυρὸς ἐς τόσσην ἤλθομεν ἐργασίην. - -
-
- - -Macedonius II - - -Ἡμερίδας τρυγόωσιν ἐτήσιον, οὐδέ τις αὐτῶν -τοὺς ἕλικας, κόπτων βότρυν, ἀποστρέφεται. - ἀλλά σε τὴν ῥοδόπηχυν, ἐμῆς ἀνάθημα μερίμνης, - ὑγρὸν ἐνιπλέξας ἅμματι δεσμόν;, ἔχω, -καὶ τρυγόω τὸν ἔρωτα· καὶ οὐ θέρος, οὐκ ἔαρ ἄλλο -οἶδα μένειν, ὅτι μοι πᾶσα γέμεις χαρίτων. -ὧδε καὶ ἡβήσειας ὅλον χρόνον εἰ δέ τις ἔλθῃ - λοξὸς ἕλιξ ῥυτίδων, τλήσομαι ὡς φιλέων. -
-
- - -Paulus Silentiarius - - -εἰπὲ τίνι πλέξεις ἔτι βόστρυχον, ἢ τίνι χεῖρας - φαιδρυνέεις, ὀνύχων ἀμφιτεμὼν ἀκίδα; -ἐς τί δὲ κοσμήσεις ἁλιανθέι φάρεα κόχλῳ, - μηκέτι τῆς καλῆς ἐγγὺς ἐὼν Ῥοδόπης; -ὄμμασιν οἷς Ῥοδόπην οὐ δέρκομαι, οὐδὲ φαεινῆς - φέγγος ἰδεῖν ἐθέλω χρύσεον Ἠριπόλης. -
-
- - -Macedonius II - - -τὴν Νιόβην κλαίουσαν ἰδών ποτε βουκόλος ἀνὴρ - θάμβεεν, εἰ λείβειν δάκρυον οἶδε λίθος· -αὐτὰρ ἐμὲ στενάχοντα τόσης κατὰ νυκτὸς ὁμίχλην - ἔμπνοος Εὐίππης οὐκ ἐλέαιρε λίθος. -αἴτιος ἀμφοτέροισιν ἔρως, ὀχετηγὸς ἀνίης -τῇ Νιόβῃ τεκέων, αὐτὰρ ἐμοὶ παθέων. -
-
- - -Paulus Silentiarius - - -χρυσῆς εἰρύσσασα μίαν τρίχα Δωρὶς ἐθείρης, - οἷα δορικτήτους δῆσεν ἐμεῦ παλάμας· - -αὐτὰρ ἐγὼ τὸ πρὶν μὲν ἐκάγχασα, δεσμὰ τινάξαι - Δωρίδος ἱμερτῆς εὐμαρὲς οἰόμενος· -ὡς δὲ διαρρῆξαι σθένος οὐκ ἔχον, ἔστενον ἤδη, -οἷά τε χαλκείῃ σφιγκτὸς ἀλυκτοπέδῃ. -καὶ νῦν ὁ τρισάποτμος ἀπὸ τριχὸς ἠέρτημαι, - δεσπότις ἔνθʼ ἐρύσῃ, πυκνὰ μεθελκόμενος. -
-
- - -Macedonius II - - -τὸ στόμα ταῖς Χαρίτεσσι, προσώπατα δʼ ἄνθεσι θάλλει, -ὄμματα τῇ παφίῃ, τὼ χέρε τῇ κιθάρῃ. - συλεύεις βλεφάρων φάος ὄμμασιν, οὖας ἀοιδῇ· - πάντοθεν ἀγρεύεις τλήμονας ἠιθέους. -
-
- - -Paulus Silentiarius - - -Ἱππομένην φιλέουσα, νόον προσέρεισα Λεάνδρῳ· -ἐν δὲ Λεανδρείοις χείλεσι πηγνυμένη, - εἰκόνα τὴν Ξάνθοιο φέρω φρεσί· πλεξαμένη δὲ - Ξάνθον, ἐς Ἱππομένην νόστιμον ἦτορ ἄγω. -πάντα τὸν ἐν παλάμῃσιν ἀναίνομαι· ἄλλοτε δʼ ἄλλον - αἰὲν ἀμοιβαίοις πήχεσι δεχνυμένη, - ἀφνειὴν Κυθέρειαν ὑπέρχομαι. εἰ δέ τις ἡμῖν - μέμφεται, ἐν πενίῃ μιμνέτω οἰογάμῳ. -
-
- - -Macedonius II - - - -αὔριον ἀθρήσω σε. τὸ δʼ οὔ ποτε γίνεται ἡμῖν, - ἠθάδος ἀμβολίης αἰὲν ἀεξομένης. -ταῦτά μοι ἱμείροντι χαρίζεαι· ἄλλα δʼ ἐς ἄλλους - δῶρα φέρεις, ἐμέθεν πίστιν ἀπειπαμένη. - -ὄψομαι ἑσπερίη σε. τί δʼ ἕσπερός ἐστι γυναικῶν; - γῆρας ἀμετρήτῳ πληθόμενον ῥυτίδι. - -
-
- - -Paulus Silentiarius - - -ὁ πρὶν ἀμαλθάκτοισιν ὑπὸ φρεσὶν ἡδὺν ἐν ἥβῃ - οἰστροφόρου Παφίης θεσμὸν ἀπειπάμενος, - γυιοβόροις βελέεσσιν ἀνέμβατος ὁ πρὶν Ἐρώτων, -αὐχένα σοι κλίνω, Κύπρι, μεσαιπόλιος. -δέξο με καγχαλόωσα, σοφὴν ὅτι Παλλάδα νικᾷς - νῦν πλέον ἢ τὸ πάρος μήλῳ ἔφʼ Ἑσπερίδων. -
-
- - -Macedonius II - - -ἦλθες ἐμοὶ ποθέοντι παρʼ ἐλπίδα· τὴν δʼ ἐνὶ θυμῷ - ἐξεσάλαξας ὅλην θάμβεϊ φαντασίην, - καὶ τρομέω, κραδίη τε βυθῷ πελεμίζεται οἴστρῳ, - ψυχῆς πνιγομένης κύματι Κυπριδίῳ. -ἀλλʼ ἐμὲ τὸν ναυηγὸν ἐπʼ ἠπείροιο φανέντα - σῶε, τεῶν λιμένων ἔνδοθι δεξαμένη. -
-
- - -Paulus Silentiarius - - -ναὶ τάχα Τανταλέης Ἀχερόντια πήματα ποινῆς - ἡμετέρων ἀχέων ἐστὶν ἐλαφρότερα. -οὐ γὰρ ἰδὼν σέο κάλλος, ἀπείργετο χείλεα μῖξαι -χείλεϊ σῷ, ῥοδέων ἁβροτέρῳ καλύκων, -Τάνταλος ἀκριτόδακρυς, ὑπερτέλλοντα δὲ πέτρον - δείδιεν ἀλλὰ θανεῖν δεύτερον οὐ δύναται. -αὐτὰρ ἐγὼ ζωὸς μὲν ἐὼν κατατήκομαι οἴστρῳ, -ἐκ δʼ ὀλιγοδρανίης καὶ μόρον ἐγγὺς ἔχω. -
-
- - -Agathias Scholasticus - - -πᾶσαν ἐγὼ τὴν νύκτα κινύρομαι· εὖτε δʼ ἐπέλθῃ -ὄρθρος ἐλινῦσαι μικρὰ χαρίζόμενος, - -ἀμφιπεριτρύζουσι χελιδόνες, ἐς δέ με δάκρυ - βάλλουσιν, γλυκερὸν κῶμα παρωσάμεναι. -ὄμματα δʼ οὐ λάοντα φυλάσσεται· ἡ δὲ Ῥοδάνθης -αὖθις ἐμοῖς στέρνοις φροντὶς ἀναστρέφεται. -ὦ φθονεραὶ παύσασθε λαλητρίδες· οὐ γὰρ ἔγωγε - τὴν Φιλομηλείην γλῶσσαν ἀπεθρισάμην - ἀλλʼ Ἴτυλον κλαίοιτε κατʼ οὔρεα, καὶ γοάοιτε -εἰς ἔποπος κραναὴν αὖλιν ἐφεζόμεναι, - βαιὸν ἵνα κνώσσοιμεν ἴσως δέ τις ἥξει ὄνειρος, -ὅς με Ῥοδανθείοις πήχεσιν ἀμφιβάλοι. -
-
- - -Macedonius II - - -τὸ ξίφος ἐκ κολεοῖο τί σύρεται; οὐ μὰ σέ, κούρη, -οὐχ ἵνα τι πρήξω Κύπριδος ἀλλότριον, - ἀλλʼ ἵνα σοι τὸν Ἄρηα, καὶ ἀζαλέον περ ἐόντα, - δείξω τῇ μαλακῇ Κύπριδι πειθόμενον. -οὗτος ἐμοὶ πτοθέοντι συνέμπορος, οὐδὲ κατόπτρου -δεύομαι, ἐν δʼ αὐτῷ δέρκομαι αὑτὸν ἐγώ, -κἀλαὸς ὡς ἐν ἔρωτι. σὺ δʼ ἢν ἀπʼ ἐμεῖο λάθηαι, -τὸ ξίφος ἡμετέρην δύσεται ἐς λαγόνα. -
-
- - -Paulus Silentiarius - - -ἐσβέσθη φλογεροῖο πυρὸς μένος· οὐκέτι κάμνω, - ἀλλὰ καταθνῄσκω ψυχόμενος, Παφίῃ· -ἤδη γὰρ μετὰ σάρκα διʼ ὀστέα καὶ φρένας ἕρπει - παμφάγον ἀσθμαίνων οὗτος πικρὸς Ἔρως. -καὶ φλὸξ ἐν τελεταῖς ὅτε θύματα πάντα λαφύξῃ, - φορβῆς ἠπανίῃ ψύχεται αὐτομάτως. - -
-
- - -Macedonius II - - -τῷ χρυσῷ τὸν ἔρωτα μετέρχομαι· οὐ γὰρ ἀρότρῳ - ἔργα μελισσάων γίνεται ἢ σκαπάνῃ, - ἀλλʼ ἔαρι δροσερῷ· μέλιτός γε μὲν Ἀφρογενείης -ὁ χρυσὸς τελέθει ποικίλος ἐργατίνης. -
-
- - -Paulus Silentiarius - - - -Σῴζεό σοι μέλλων ἐνέπειν, παλίνορσον ἰωὴν -ἂψ ἀνασειράζω, καὶ πάλιν ἄγχι μένω· - σὴν γὰρ ἐγὼ δασπλῆτα διάστασιν οἷά τε πικρὴν -νύκτα καταπτήσσω τὴν Ἀχεροντιάδα. -ἤματι γὰρ σέο φέγγος ὁμοίιον ἀλλὰ τὸ μέν που - ἄφθογγον σὺ δέ μοι καὶ τὸ λάλημα φέρεις, - κεῖνο τὸ Σειρήνων γλυκερώτερον, ᾧ ἔπι πᾶσαι - εἰσὶν ἐμῆς ψυχῆς ἐλπίδες ἐκκρεμέες. -
-
- - -Eratosthenes Scholasticus - - -ὡς εἶδον Μελίτην, ὦχρός μʼ ἕλε· καὶ γὰρ ἀκοίτης -κείνη ἐφωμάρτει· τοῖα δʼ ἔλεξα τρέμων - “ τοῦ σοῦ ἀνακροῦσαι δύναμαι πυλεῶνος ὀχῆας, - δικλίδος ὑμετέρης τὴν βάλανον χαλάσας, - καὶ δισσῶν προθύρων πλαδαρὴν κρηπῖδα περῆσαι, - ἄκρον ἐπιβλῆτος μεσσόθι πηξάμενος;” -ἡ δὲ λέγει γελάσασα, καὶ ἀνέρα λοξὸν ἰδοῦσα· - -τῶν προθύρων ἀπέχου, μή σε κύων ὀλέσῃ. - -
-
- - -Macedonius II - - -τὴν φιλοπουλυγέλωτα κόρην ἐπὶ νυκτὸς ὀνείρου -εἶχον, ἐπισφίγξας πήχεσιν ἡμετέροις. - -πείθετό μοι ξύμπαντα, καὶ οὐκ ἀλέγιζεν, ἐμεῖο - κύπριδι παντοίῃ σώματος ἁπτομένου· -ἀλλὰ βαρύζηλός τις Ἔρως καὶ νύκτα λοχήσας - ἐξέχεεν φιλίην, ὕπνον ἀποσκεδάσας. -ὧδέ μοι οὐδʼ αὐτοῖσιν ἐν ὑπναλέοισιν ὀνείροις -ἄφθονός ἐστιν Ἔρως κέρδεος ἡδυγάμου. -
-
- - -Paulus Silentiarius - - -μακρὰ φιλεῖ Γαλάτεια καὶ ἔμψοφα, μαλθακὰ Δημώ, - Δωρὶς ὀδακτάζει. τίς πλέον ἐξερέθει; -οὔατα μὴ κρίνωσι φιλήματα· γευσάμενοι δὲ -τριχθαδίων στομάτων, ψῆφον ἐποισόμεθα. -ἐπλάγχθης, κραδίη· τὰ φιλήματα μαλθακὰ Δημοῦς - ἔγνως καὶ δροσερῶν ἡδὺ μέλι στομάτων· - μίμνʼ ἐπὶ τοῖς· ἀδέκαστον ἔχει στέφος. εἰ δέ τις ἄλλῃ - τέρπεται, ἐκ Δημοῦς ἡμέας οὐκ ἐρύσει. -
-
- - -Macedonius II - - -Κιχλίζεις, χρεμέτισμα γάμου προκέλευθον ἱεῖσα -ἥσυχά μοι νεύεις· πάντα μάτην ἐρέθεις. -ὤμοσα τὴν δυσέρωτα κόρην, τρισὶν ὤμοσα πέτραις, - μήποτε μειλιχίοις ὄμμασιν εἰσιδέειν. -παῖζε μόνη τὸ φίλημα. μάτην πόππυζε σεαυτῇ - χείλεσι γυμνοτάτοις, οὔ τινι μισγομένοις. -αὐτὰρ ἐγὼν ἑτέρην ὁδὸν ἔρχομαι· εἰσὶ γὰρ ἄλλαι - κρέσσονες εὐλέκτρου Κύπριδος ἐργάτιδες. -
-
- - -Paulus Silentiarius - - -μαλθακὰ μὲν Σαπφοῦς τὰ φιλήματα, μαλθακὰ γυίων - πλέγματα χιονέων, μαλθακὰ πάντα μέλη· - -ψυχὴ δʼ ἐξ ἀδάμαντος ἀπειθέος· ἄχρι γὰρ οἴων - ἔστιν ἔρως στομάτων, τἆλλα δὲ παρθενίης. -καὶ τίς ὑποτλαίη; τάχα τις τάχα τοῦτο ταλάσσας - δίψαν Τανταλέην τλήσεται εὐμαρέως. -
-
- - -Macedonius II - - -Παρμενὶς οὐκ ἔργῳ· τὸ μὲν οὔνομα καλὸν ἀκούσας - ὠισάμην σὺ δέ μοι πικροτέρη θανάτου· -καὶ φεύγεις φιλέοντα, καὶ οὐ φιλέοντα διώκεις, -ὄφρα πάλιν κεῖνον καὶ φιλέοντα φύγῃς. -κεντρομανὲς δʼ ἄγκιστρον ἔφυ στόμα, καί με δακόντα -εὐθὺς ἔχει ῥοδέου χείλεος ἐκκρεμέα. -
-
- - -Paulus Silentiarius - - -ὦ παλάμη πάντολμε, σὺ τὸν παγχρύσεον ἔτλης - ἀπρὶξ δραξαμένη βόστρυχον αὐερύσαι· - ἔτλης· οὐκ ἐμάλαξε τεὸν θράσος αἴλινος αὐδή, - σκύλμα κόμης, αὐχὴν μαλθακὰ κεκλιμένος. -νῦν θαμινοῖς πατάγοισι μάτην τὸ μέτωπον ἀράσσεις· - οὐκέτι γὰρ μαζοῖς σὸν θέναρ ἐμπελάσει. -μή, λίτομαι, δέσποινα, τόσην μὴ λάμβανε ποινὴν -μᾶλλον ἐγὼ τλαίην φάσγανον ἀσπασίως. -
-
- - -Irenaeus - - -ὦ σοβαρὴ Ῥοδόπη, Παφίης εἴξασα βελέμνοις - καὶ τὸν ὑπερφίαλον κόμπον ἀπωσαμένη, - ἀγκὰς ἑλοῦσὰ μʼ ἔχεις παρὰ σὸν λέχος· ἐν δʼ ἄρα δεσμοῖς - κεῖμαι, ἐλευθερίης οὐκ ἐπιδευόμενος. -οὕτω γὰρ ψυχή τε καὶ ἔκχυτα σώματα φωτῶν - συμφέρεται, φιλίης ῥεύμασι μιγνύμενα. - -
-
- - -Paulus Silentiarius - - -ἡδύ, φίλοι, μείδημα τὸ Λαΐδος· ἡδὺ κατʼ αὖ τῶν -ἠπιοδινήτων δάκρυ χέει βλεφάρων. -χθιζά μοι ἀπροφάσιστον ἐπέστενεν, ἐγκλιδὸν ὤμῳ - ἡμετέρῳ κεφαλὴν δηρὸν ἐρεισαμένη· -μυρομένην δʼ ἐφίλησα· τὰ δʼ ὡς δροσερῆς ἀπὸ πηγῆς -δάκρυα μιγνυμένων πῖπτε κατὰ στομάτων. -εἶπε δʼ ἀνειρομένῳ, τίνος εἵνεκα δάκρυα λείβεις; - - -δείδια μή με λίπῃς· ἐστὲ γὰρ ὁρκαπάται. - -
-
- - -Irenaeus - - -ὄμματα δινεύεις κρυφίων ἰνδάλματα πυρσῶν, - χείλεα δʼ ἀκροβαφῆ λοξὰ παρεκτανύεις, - καὶ πολὺ κιχλίζουσα σοβεῖς εὐβόστρυχον αἴγλην, - ἐκχυμένας δʼ ὁρόω τὰς σοβαρὰς παλάμας. -ἀλλʼ οὐ σῆς κραδίης ὑψαύχενος ὤκλασεν ὄγκος· - οὔπω ἐθηλύνθης, οὐδὲ μαραινομένη. -
-
- - -Paulus Silentiarius - - -ῥίψωμεν, χαρίεσσα, τὰ φάρεα· γυμνὰ δὲ γυμνοῖς -ἐμπελάσει γυίοις γυῖα περιπλοκάδην· - μηδὲν ἔοι τὸ μεταξύ· Σεμιράμιδος γὰρ ἐκεῖνο - τεῖχος ἐμοὶ δοκέει λεπτὸν ὕφασμα σέθεν -στήθεα δʼ ἐζεύχθω, τὰ [τε] χείλεα· τἆλλα δὲ σιγῇ -κρυπτέον· ἐχθαίρω τὴν ἀθυροστομίην. -
-
- - -Irenaeus - - -τίπτε πέδον, Χρύσιλλα, κάτω νεύουσα δοκεύεις, - καὶ ζώνην παλάμαις οἷά περ ἀκρολυτεῖς; -αἰδὼς νόσφι πέλει τῆς Κύπριδος· εἰ δʼ ἄρα σιγᾷς, - νεύματι τὴν Παφίην δεῖξον ὑπερχομένη, - -
-
- - -Paulus Silentiarius - - -ὤμοσα μιμνάζειν σέο τηλόθεν, ἀργέτι κούρη, -ἄχρι δυωδεκάτης, ὦ πόποι, ἠριπόλης· -οὐ δʼ ἔτλην ὁ τάλας· τὸ τὰρ αὔριον ἄμμι φαάνθη - τηλοτέρω μήνης, ναὶ μὰ σέ, δωδεκάτης. -ἀλλὰ θεοὺς ἱκέτευε, φίλη, μὴ ταῦτα χαράξαι - ὅρκια ποιναίης νῶτον ὑπὲρ σελίδος· - θέλγε δὲ σαῖς χαρίτεσσιν ἐμὴν φρένα· μὴ δέ με μάστιξ, - πότνα, κατασμύξῃ καὶ σέο καὶ μακάρων. -
-
- - -Paulus Silentiarius - - -εἶδον ἐγὼ ποθέοντας· ὑπʼ ἀτλήτοιο δὲ λύσσης - δηρὸν ἐν ἀλλήλοις χείλεα πηξάμενοι, -οὐ κόρον εἶχον ἔρωτος ἀφειδέος· ἱέμενοι δέ, -εἰ θέμις, ἀλλήλων δύμεναι ἐς κραδίην, -ἀμφασίης ὅσον ὅσσον ὑπεπρήυνον ἀνάγκην, - ἀλλήλων μαλακοῖς φάρεσιν ἑσσάμενοι. -καὶ ῥʼ ὁ μὲν ἦν Ἀχιλῆι πανείκελος, οἷος ἐκεῖνος - τῶν Λυκομηδείων ἔνδον ἔην θαλάμων - κούρη δʼ ἀργυφέης ἐπιγουνίδος ἄχρι χιτῶνα -ζωσαμένη, Φοίβης εἶδος ἀπεπλάσατο. - καὶ πάλιν ἠρήρειστο τὰ χείλεα· γυιοβόρον γὰρ -εἶχον ἀλωφήτου λιμὸν ἐρωμανίης. -ῥεῖά τις ἡμερίδος στελέχη δύο σύμπλοκα λύσει, - στρεπτά, πολυχρονίῳ πλέγματι συμφυέα, -ἢ κείνους ʽφιλέοντας, ὑπʼ ἀντιπόροισὶ τʼ ἀγοστοῖς - ὑγρὰ περιπλέγδην ἅψεα δησαμένους. - τρὶς μάκαρ, ὃς τοίοισι, φίλη, δεσμοῖσιν ἑλίχθη, -τρὶς μάκαρ· ἀλλʼ ἡμεῖς ἄνδιχα καιόμεθα. - -
-
- - -Paulus Silentiarius - - -δικλίδας ἀμφετίναξεν ἐμοῖς Γαλάτεια προσώποις -ἕσπερος, ὑβριστὴν μῦθον ἐπευξαμένη. - -ὕβρις ἔρωτας ἔλυσε. μάτην ὅδε μῦθος ἀλᾶται· -ὕβρις ἐμὴν ἐρέθει μᾶλλον ἐρωμανίην. -ὤμοσα γὰρ λυκάβαντα μένειν ἀπάνευθεν ἐκείνης· -ὦ πόποι· ἀλλʼ ἱκέτης πρώιος εὐθὺς ἔβην. -
-
- - -Palladas - - -νῦν καταγιγνώσκω καὶ τοῦ Διὸς ὡς ἀνεράστου, -μὴ μεταβαλλομένου τῆς σοβαρᾶς ἕνεκα· - οὔτε γὰρ Εὐρώπης, οὐ τῆς Δανάης περὶ κάλλος, - οὔθʼ ἁπαλῆς Λήδης ἐστʼ ἀπολειπομένη· -εἰ μὴ τὰς πόρνας παραπέμπεται· οἶδα γὰρ αὐτὸν - τῶν βασιλευουσῶν παρθενικῶν φθορέα, -
-
- - -Paulus Silentiarius - - -Πρόκριτός ἐστι, Φίλιννα, τεὴ ῥυτὶς ἢ ὀπὸς ἥβης - πάσης· ἱμείρω δʼ ἀμφὶς ἔχειν παλάμαις -μᾶλλον ἐγὼ σέο μῆλα καρηβαρέοντα κορύμβοις, -ἢ μαζὸν νεαρῆς ὄρθιον ἡλικίης. -σὸν γὰρ ἔτι φθινόττωρον ὑπέρτερον εἴαρος ἄλλης, - χεῖμα σὸν ἀλλοτρίου θερμότερον θέρεος. -
-
- - -Paulus Silentiarius - - -ὄμματά σευ βαρύθουσι, πόθου πνείοντα, Χαρικλοῖ, -οἷάπερ ἐκ λέκτρων ἄρτι διεγρομένης· - ἔσκυλται δὲ κόμη, ῥοδέης δʼ ἀμάρυγμα παρειῆς -ὦχρος ἔχει λευκός, καὶ δέμας ἐκλέλυται. - -κεἰ μὲν παννυχίῃσιν ὁμιλήσασα παλαίστραις - ταῦτα φέρεις, ὄλβου παντὸς ὑπερπέτεται -ὅς σε περιπλέγδην ἔχε πήχεσιν εἰ δέ σε τήκει· - θερμὸς ἔρως, εἴης εἰς ἐμὲ τηκομένη. -
-
- - -Paulus Silentiarius - - -Κεκρύφαλοι σφίγγουσι τεὴν τρίχα; τήκομαι οἴστρῳ - Ῥείης πυργοφόρου δείκελον εἰσορόων. -ἀσκεπές ἐστι κάρηνον; ἐγὼ ξανθίσμασι χαίτης -ἔκχυτον ἐκ στέρνων ἐξεσόβησα νόον. -ἀργενναῖς ὀθόνῃσι κατήορα βόστρυχα κεύθεις; -οὐδὲν ἐλαφροτέρη φλὸξ κατέχει κραδίην. - μορφὴν τριχθαδίην Χαρίτων τριὰς ἀμφιπολεύει· -πᾶσα δέ μοι μορφὴ πῦρ ἴδιον προχέει. -
-
- - -Agathias Scholasticus - - -εἰμί μὲν οὐ φιλόοινος· ὅταν δʼ ἐθέλῃς με μεθύσσαι, -πρῶτα σὺ γευομένη πρόσφερε, καὶ δέχομαι. -εἰ γὰρ ἐπιψαύσεις τοῖς χείλεσιν, οὐκέτι νήφειν -εὐμαρὲς, οὐδὲ φυγεῖν τὸν γλυκὺν οἰνοχόον -πορθμεύει γὰρ ἔμοιγε κύλιξ παρὰ σοῦ τὸ φίλημα, -καί μοι ἀπαγγέλλει τὴν χάριν ἣν ἔλαβεν. -
-
- - -Paulus Silentiarius - - -φεῦ φεῦ, καὶ τὸ λάλημα τὸ μείλιχον ὁ φθόνος εἴργει, - βλέμμα τε λαθριδίως φθεγγομένων βλεφάρων· - ἱσταμένης δʼ ἄγχιστα τεθήπαμεν ὄμμα γεραιῆς, - οἷα πολύγληνον βουκόλον Ἰναχίης. -ἵστασο, καὶ σκοπίαζε, μάτην δὲ σὸν ἦτορ ἀμύσσου· -οὐ γὰρ ἐπὶ ψυχῆς ὄμμα τεὸν τανύσεις. - -
-
- - -Agathias Scholasticus - - -μήποτε, λύχνε, μύκητα φέροις, μηδʼ ὄμβρον ἐγείροις, -μὴ τὸν ἐμὸν παύσῃς νυμφίον ἐρχόμενον, - αἰεὶ σὺ φθονέεις τῇ Κύπριδι, καὶ γὰρ ὅθʼ Ἡρὼ -ἥρμοσε Λειάνδρῳ. . θυμέ, τὸ λοιπὸν ἔα. -Ἡφαίστου τελέθεις· καὶ πείθομαι, ὅττι χαλέπτων - Κύπριδα, θωπεύεις δεσποτικὴν ὀδύνην. -
-
- - -Paulus Silentiarius - - -βόστρυχον ὠμογέροντα τί μέμφεαι, ὄμματά θʼ ὑγρὰ - δάκρυσιν; ὑμετέρων παίγνια ταῦτα πόθων - φροντίδες ἀπρήκτοιο πόθου τάδε, ταῦτα βελέμνων -σύμβολα, καὶ δολιχῆς ἔργα νυχεγρεσίης. -καὶ γάρ που λαγόνεσσι ῥυτὶς παναώριος ἤδη, - καὶ λαγαρὸν δειρᾖ δέρμα περικρέμαται. - ὁππόσον ἡβάσκει φλογὸς ἄνθεα, τόσσον ἐμεῖο -ἅψεα γηράσκει φροντίδι γυιοβόρῳ. - ἀλλὰ κατοικτείρασα δίδου χάριν· αὐτίκα γάρ μοι -χρὼς ἀναθηλήσει κρατὶ μελαινομένῳ, -
-
- - -Cometas Chartularius - - -ὄμματα Φυλλὶς ἔπεμπε κατὰ πλόον ὅρκος ἀλήτης - πλάζετο, Δημοφόων δʼ ἦεν ἄπιστος ἀνήρ. - νῦν δέ, φίλη, πιστὸς μὲν ἐγὼ παρὰ θῖνα θαλάσσης -Δημοφόων σὺ δὲ πῶς, Φυλλίς, ἄπιστος ἔφυς; - -
-
- - -Paulus Silentiarius - - -ἀνέρα λυσσητῆρι κυνὸς βεβολημένον ἰῷ -ὕδασι θηρείην εἰκόνα φασὶ βλέπειν. - λυσσώων τάχα πικρὸν Ἔρως ἐνέπηξεν ὀδόντα - εἰς ἐμέ, καὶ μανίαις θυμὸν ἐληίσατο· -σὴν γὰρ ἐμοὶ καὶ πόντος ἐπήρατον εἰκόνα φαίνει, -καὶ ποταμῶν δῖναι, καὶ δέπας οἰνοχόον, -
-
- - -Agathias Scholasticus - - - τί στενάχεις; β. φιλέω. α. τίνα; β. παρθένον. α. ἦ ῥά γε καλήν; - καλὴν ἡμετέροις ὄμμασι φαινομένην. - ποῦ δέ μιν εἰσενόησας; β. ἐκεῖ ποτὶ δεῖπνον ἐπελθὼν - ξυνῇ κεκλιμένην ἔδρακον ἐν στιβάδι. - ἐλπίζεις δὲ τυχεῖν; β. ναὶ, ναί, φίλος· ἀμφαδίην δὲ -οὐ ζητῶ φιλίην, ἀλλʼ ὑποκλεπτομένην. - τὸν νόμιμον μᾶλλον φεύγεις γάμον. β. ἀτρεκὲς ἔγνων, - ὅττι γε τῶν κτεάνων πουλὺ τὸ λειπόμενον. - ἔγνως; οὐ φιλέεις, ἐψεύσαο· πῶς δύναται γὰρ -ψυχὴ ἐρωμανέειν ὀρθὰ λογιζομένη; -
-
- - -Paulus Silentiarius - - -μηκέτι τις πτήξειε πόθου βέλος· ἰοδόκην γὰρ - εἰς ἐμὲ λάβρος Ἔρως ἐξεκένωσεν ὅλην. -μὴ πτερύγων τρομέοι τις ἐπήλυσιν ἐξότε γάρ μοι - λὰξ ἐπιβὰς στέρνοις πικρὸν ἔπηξε πόδα, - -ἀστεμφής, ἀδόνητος ἐνέζεται, οὐδὲ μετέστη, - εἰς ἐμὲ συζυγίην κειράμενος πτερύγων. -
-
- - -Agathias Scholasticus - - -δισσῶν θηλυτέρων μοῦνός ποτε μέσσος ἐκείμην, - τῆς μὲν ἐφιμείρων, τῇ δὲ χαριζόμενος· -εἷλκε δέ μʼ ἡ φιλέουσα· πάλιν δʼ ἐγώ, οἷά τε τις φώρ, -χείλεϊ φειδομένῳ τὴν ἑτέρην ἐφίλουν, -ζῆλον ὑποκλέπτων τῆς γείτονος, ἧς τὸν ἔλεγχον - καὶ τὰς λυσιπόθους ἔτρεμον ἀγγελίας. - ὀχθήσας δʼ ἄρʼ ἔειπον Ἐμοὶ τάχα καὶ τὸ φιλεῖσθαι -ὡς τὸ φιλεῖν χαλεπόν, δισσὰ κολαζομένῳ. -
-
- - -Paulus Silentiarius - - -οὔτε ῥόδον στεφάνων ἐπιδεύεται, οὔτε σὺ πέπλων, -οὔτε λιθοβλήτων, πότνια, κεκρυφάλων. -μάργαρα σῆς χροιῆς ἀπολείπεται, οὐδὲ κομίζει - χρυσὸς ἀπεκτήτου σῆς τριχὸς ἀγλαΐην -Ἰνδῴη δʼ ὑάκινθος ἔχει χάριν αἴθοπος αἴγλης, - ἀλλὰ τεῶν λογάδων πολλὸν ἀφαυροτέρην· - χείλεα δὲ δροσόεντα, καὶ ἡ μελίφυρτος ἐκείνη - στήθεος ἁρμονίη, κεστὸς ἔφυ Παφίης. -Γούτοις πᾶσιν ἐγὼ καταδάμναμαι· ὄμμασι μούνοις -θέλγομαι, οἷς ἐλπὶς μείλιχος ἐνδιάει. -
-
- - -Macedonius II - - -τήν ποτε βακχεύουσαν ἐν εἴδεϊ θηλυτεράων, - τὴν χρυσέῳ κροτάλῳ σειομένην σπατάλην, - γῆρας ἔχει καὶ νοῦσος ἀμείλιχος· οἱ δὲ φιληταί, -οἵ ποτε τριλλίστως ἀντίον ἐρχόμενοι - -νῦν μέγα πεφρίκασι· τὸ δʼ αὐξοσέληνον ἐκεῖνο - ἐξέλιπεν, συνόδου μηκέτι γινομένης. -
-
- - -Paulus Silentiarius - - -μαζοὺς χερσὶν ἔχω, στόματι στόμα καὶ περὶ δειρὴν - ἄσχετα λυσσώων βόσκομαι ἀργυφέην, -οὔπω δʼ ἀφρογένειαν ὅλην ἕλον ἀλλʼ ἔτι κάμνω, - παρθένον ἀμφιέπων λέκτρον ἀναινομένην. -ἥμισυ γὰρ Παφίῃ, τὸ δʼ ἄρʼ ἥμισυ δῶκεν Ἀθήνῃ· -αὐτὰρ ἐγὼ μέσσος τήκομαι ἀμφοτέρων. -
-
- - -Agathias Scholasticus - - -ἡ πάρος ἀγλαΐῃσι μετάρσιος, ἡ πλοκαμῖδας - σειομένη πλεκτὰς, καὶ σοβαρευομένη, -ἡ μεγαλαυχήσασα καθʼ ἡμετέρης μελεδώνης, -γήραϊ ῥικνώδης, τὴν πρὶν ἀφῆκε χάριν. -μαζὸς ὑπεκλίνθη, πέσον ὀφρύες, ὄμμα τέτηκται, - χείλεα βαμβαίνει φθέγματι γηραλέῳ. - τὴν πολιὴν καλέω Νέμεσιν πόθου, ὅττι δικάζει - ἔννομα, ταῖς σοβαραῖς θᾶσσον ἐπερχομένη, -
-
- - -Paulus Silentiarius - - -τὴν πρὶν ἐνεσφρήγισσεν Ἔρως θρασὺς εἰκόνα μορφῆς -ἡμετέρης θερμῷ βένθεϊ σῆς κραδίης, -φεῦ φεῦ, νῦν ἀδόκητος ἀπέπτυσας· αὐτὰρ ἐγώ τοι - γραπτὸν ἔχω ψυχῇ σῆς τύπον ἀγλαΐης. -τοῦτον καὶ Φαέθοντι καὶ Ἄϊδι, βάρβαρε, δείξω, -Κρῆσσαν ἐπισπέρχων εἰς σὲ δικασπολίην. - -
-
- - -Paulus Silentiarius - - -Δειελινῷ χαρίεσσα Μενεκρατὶς ἔκχυτος ὕπνῳ - κεῖτο περὶ κροτάφους πῆχυν ἑλιξαμένη·;· - τολμήσας δʼ ἐπέβην λεχέων ὕπερ. ὡς δὲ κελεύθου -ἥμισυ κυπριδίης ἤνυον ἀσπασίως, -ἡ παῖς ἐξ ὕπνοιο διέγρετο, χερσὶ δὲ λευκαῖς - κράατος ἡμετέρου πᾶσαν ἔτιλλε κόμην - μαρναμένης δὲ τὸ λοιπὸν ἀνύσσαμεν ἔργον ἔρωτος. -ἡ δʼ ὑποπιμπλαμένη δάκρυσιν εἶπε τάδε· -“σχέτλιε, νῦν μὲν ἔρεξας ὅ τοι φίλον, ᾧ ἔπι πουλὺν - πολλάκι σῆς παλάμης χρυσὸν ἀπωμοσάμην - οἰχόμενος δʼ ἄλλην ὑποκόλπιον εὐθὺς ἑλίξεις· - ἐστὲ γὰρ ἀπλήστου κύπριδος ἐργατίναι.” -
-
- - -Agathias Scholasticus - - -σοὶ τόδε τὸ κρήδεμνον, ἐμὴ μνήστειρα, κομίζω, - χρυσεοπηνήτῳ λαμπόμενον γραφίδι - βάλλε δὲ σοῖς πλοκάμοισιν ἐφεσσαμένη δʼ ὑπὲρ ὤμων -στήθεϊ παλλεύκῳ τήνδε δὸς ἀμπεχόνην -ναὶ ναὶ στήθεϊ μᾶλλον, ὅπως ἐπιμάζιον εἴη - ἀμφιπεριπλέγδην εἰς σὲ κεδαννύμενον. - καὶ τόδε μὲν φορέοις ἅτε παρθένος· ἀλλὰ καὶ εὐνὴν - λεύσσοις καὶ τεκέων εὔσταχυν ἀνθοσύνην, -ὄφρα σοι ἐκτελέσαιμι καὶ ἀργυφέην ἀναδέσμην -καὶ λιθοκολλήτων πλέγματα κεκρυφάλων. -
-
- - -Eratosthenes Scholasticus - - -ἄρσενας ἄλλος ἔχοι· φιλέειν δʼ ἐγὼ οἶδα γυναῖκας, -ἐς χρονίην φιλίην οἷα φυλασσομένας. -οὐ καλὸν ἡβητῆρες ἀπεχθαίρω γὰρ ἐκείνην -τὴν τρίχα, τὴν φθονερήν, τὴν ταχὺ φυομένην. - -
-
- - -Agathias Scholasticus - - -αὐτή μοι Κυθέρεια καὶ ἱμερόεντες Ἔρωτες - τήξουσιν κενεὴν ἐχθόμενοι κραδίην, -ἄρσενας εἰ σπεύσω φιλέειν ποτέ· μήτε τυχήσω, - μήτʼ ἐπολισθήσω μείζοσιν ἀμπλακίαις. -ἄρκια θηλυτέρων ἀλιτήματα· κεῖνα κομίσσω, - καλλείψω δὲ νέους ἄφρονι Πιτταλάκῳ. -
-
- - -Paulus Silentiarius - - -δηθύνει Κλεόφαντις· ὁ δὲ τρίτος ἄρχεται ἤδη - λύχνος ὑποκλάζειν ἦκα μαραινόμενος. - αἴθε δὲ καὶ κραδίης πυρσὸς συναπέσβετο λύχνῳ, -μηδὲ μʼ ὑπʼ ἀγρύπνοις δηρὸν ἔκαιε πόθοις. - πόσα τὴν Κυθέρειαν ἐπώμοσεν ἕσπερος ἥξειν, - ἀλλʼ οὔτʼ ἀνθρώπων φείδεται, οὔτε θεῶν. -
-
- - -Agathias Scholasticus - - -ἦ ῥά γε καὶ σύ, Φίλιννα, φέρεις πόνον; ἦ ῥα καὶ αὐτὴ - κάμνεις, αὐαλέοις ὄμμασι τηκομένη; -ἢ σὺ μὲν ὕπνον ἔχεις γλυκερώτατον, ἡμετέρης δὲ - φροντίδος οὔτε λόγος γίνεται οὔτε ἀριθμός; -εὑρήσεις τὰ ὅμοια, τεὴν δʼ, ἀμέγαρτε, παρειὴν - ἀθρήσω θαμινοῖς δάκρυσι τεγγομένην. - Κύπρις γὰρ τὰ μὲν ἄλλα παλίγκοτος· ἓν δέ τι καλὸν - ἔλλαχεν, ἐχθαίρειν τὰς σοβαρευομένας. -
-
- - -Paulus Silentiarius - - -χθιζά μοι Ἑρμώνασσα φιλακρήτους μετὰ κώμους - στέμμασιν αὐλείας ἀμφιπλέκοντι θύρας - -ἐκ κυλίκων ἐπέχευεν ὕδωρ· ἀμάθυνε δὲ χαίτην, -ἣν μόλις ἐς τρισσὴν πλέξαμεν ἀμφιλύκην. -ἐφλέχθην δʼ ἔτι μᾶλλον ὑφʼ ὕδατος· ἐκ γὰρ ἐκείνης - λάθριον εἶχε κύλιξ πῦρ γλυκερῶν στομάτων. -
-
- - -Agathias Scholasticus - - -ἡ ῥαδινὴ Μελίτη ταναοῦ ἐπὶ γήραος οὐδῷ - τὴν ἀπὸ τῆς ἥβης οὐκ ἀπέθηκε χάριν, - ἀλλʼ ἔτι μαρμαίρουσι παρηίδες, ὄμμα δὲ θέλγειν -οὐ λάθε· τῶν δʼ ἐτέων ἡ δεκὰς οὐκ ὀλίγη· -μίμνει καὶ τὸ φρύαγμα τὸ παιδικόν. ἐνθάδε δʼ ἔγνων - ὅττι φύσιν νικᾶν ὁ χρόνος οὐ δύναται. -
-
- - -Paulus Silentiarius - - -δάκρυά μοι σπένδουσαν ἐπήρατον οἰκτρὰ Θεανὼ -εἶχον ὑπὲρ λέκτρων πάννυχον ἡμετέρων - ἐξότε γὰρ πρὸς Ὄλυμπον ἀνέδραμεν ἕσπερος ἀστήρ, - μέμφετο μελλούσης ἄγγελον ἠριπόλης. -οὐδὲν ἐφημερίοις καταθύμιον· εἴ τις Ἐρώτων - λάτρις, νύκτας ἔχειν ὤφελε Κιμμερίων. -
-
- - -Ruf(in)us - - -πάντα σέθεν φιλέω· μοῦνον δὲ σὸν ἄκριτον ὄμμα -ἐχθαίρω, στυγεροῖς ἀνδράσι τερπόμενον. -
-
- - -Agathias Scholasticus - - -εἰργομένη φιλέειν με κατὰ στόμα δῖα Ῥοδάνθη - ζώνην παρθενικὴν ἐξετάνυσσε μέσην, - -καὶ κείνην φιλέεσκεν ἐγὼ δέ τις ὡς ὀχετηγὸς -ἀρχὴν εἰς ἑτέρην εἷλκον ἔρωτος ὕδωρ, -αὐερύων τὸ φίλημα· περὶ ζωστῆρα δὲ κούρης - μάστακι ποππύζων, τηλόθεν ἀντεφίλουν. -ἦν δὲ πόνου καὶ τοῦτο παραίφασις· ἡ γλυκερὴ γὰρ - ζώνη πορθμὸς ἔην χείλεος ἀμφοτέρου, -
-
- - -Paulus Silentiarius - - -Φράξεό μοι, Κλεόφαντις, ὅση χάρις, ὁππότε δοιοὺς -λάβρον ἐπαιγίζων ἶσος ἔρως κλονέει. - ποῖος ἄρης, ἢ τάρβος ἀπείριτον, ἠὲ τίς αἰδὼς - τούσδε διακρίνει, πλέγματα βαλλομένους; -εἴη μοι μελέεσσι τὰ Λήμνιος ἥρμοσεν ἄκμων -δεσμά, καὶ Ἡφαίστου πᾶσα δολορραφίη· -μοῦνον ἐγώ, χαρίεσσα, τεὸν δέμας ἀγκὰς ἑλίξας - θελγοίμην ἐπὶ σοῖς ἅψεσι βοσκόμενος -δὴ τότε καὶ ξεῖνός με καὶ ἐνδάπιος καὶ ὁδίτης, -πότνα, καὶ ἀρητήρ, χἠ παράκοιτις ἴδοι. -
-
- - -Agathias Scholasticus - - -σπεύδων εἰ φιλέει με μαθεῖν εὐῶπις Ἐρευθώ, - πείραζον κραδίην πλάσματι κερδαλέῳ· - “ βήσομαι ἐς ξείνην τινά που χθόνα· μίμνε δέ, κούρη, -ἀρτίπος, ἡμετέρου μνῆστιν ἔχουσα πόθου.” -ἡ δὲ μέγα στονάχησε καὶ ἥλατο, καὶ τὸ πρόσωπον - πλῆξε, καὶ εὐπλέκτου βότρυν ἔρηξε κόμης, -καί με μένειν ἱκέτευεν ἐγὼ δέ τις ὡς βραδυπειθὴς -ὄμματι θρυπτομένῳ συγκατένευσα μόνον. -ὄλβιος ἐς πόθον εἰμί· τὸ γὰρ μενέαινον ἀνύσσαι -πάντως, εἰς μεγάλην τοῦτο δέδωκα χάριν. - -
-
- - -Paulus Silentiarius - - -ἐξότε μοι πίνοντι συνεψιάουσα Χαρικλὼ -λάθρῃ τοὺς ἰδίους ἀμφέβαλε στεφάνους, - πῦρ ὀλοὸν δάπτει με· τὸ γὰρ στέφος, ὡς δοκέω, τι -εἶχεν, ὃ καὶ Γλαύκην φλέξε Κρεοντιάδα. -
-
- - -Agathias Scholasticus - - -ἡ γραῦς ἡ τρικόρωνος, ἡ ἡμετέρους διὰ μόχθους - μοίρης ἀμβολίην πολλάκι δεξαμένη, -ἄγριον ἦτορ ἔχει, καὶ θέλγεται οὔτʼ ἐπὶ χρυσῷ, - οὔτε ζωροτέρῳ μείζονι κισσυβίῳ· -τὴν κούρην δʼ αἰεὶ περιδέρκεται· εἰ δὲ ποτʼ αὐτὴν - ἀθρήσει κρυφίοις ὄμμασι ῥεμβομένην, -ἆ μέγα τολμήεσσα ῥαπίσμασιν ἀμφὶ πρόσωπα - πλήσσει τὴν ἁπαλὴν οἰκτρὰ κινυρομένην. -εἰ δʼ ἐτεὸν τὸν Ἄδωνιν ἐφίλαο, Περσεφόνεια, -οἴκτειρον ξυνῆς ἄλγεα τηκεδόνος. - ἔστω δʼ ἀμφοτέροισι χάρις μία· τῆς δὲ γεραιῆς - ῥύεο τὴν κούρην, πρίν τι κακὸν παθέειν. -
-
- - -Paulus Silentiarius - - -ὄμμα πολυπτοίητον ὑποκλέπτουσα τεκούσης, - συζυγίην μήλων δῶκεν ἐμοὶ ῥοδέων - θηλυτέρη χαρίεσσα. μάγον τάχα πυρσὸν ἐρώτων - λαθριδίως μήλοις μῖξεν ἐρευθομένοις -εἰμὶ γὰρ ὁ τλήμων φλογὶ σύμπλοκος· ἀντὶ δὲ μαζῶν, -ὦ πόποι, ἀπρήκτοις μῆλα φέρω παλάμαις. -
-
- - -Paulus Silentiarius - - -εἴ ποτʼ ἐμοί, χαρίεσσα, τεῶν τάδε σύμβολα μαζῶν -ὤπασας, ὀλβίζω τὴν χάριν ὡς μεγάλην - -εἰ δʼ ἐπὶ τοῖς μίμνεις, ἀδικεῖς, ὅτι λάβρον ἀνῆψας -πυρσόν, ἀποσβέσσαι τοῦτον ἀναινομένη. -Τήλεφον ὁ τρώσας καὶ ἀκέσσατο μὴ σύγε, κούρη, - εἰς ἐμὲ δυσμενέων γίνεο πικροτέρη. -
-
- - -Agathias Scholasticus - - - -ἐνθάδε μὲν χλοάουσα τεθηλότι βῶλος ὀράμνῳ -φυλλάδος εὐκάρπου πᾶσαν ἔδειξε χάριν - ἐνθάδε δὲ κλάζουσιν ὑπὸ σκιεραῖς κυπαρίσσοις -ὄρνιθες δροσερῶν μητέρες ὀρταλίχων -καὶ λιγυρὸν βομβεῦσιν ἀκανθίδες· ἡ δʼ ὀλολυγὼν -τρύζει, τρηχαλέαις ἐνδιάουσα βάτοις. - ἀλλὰ τί μοι τῶν ἦδος, ἐπεὶ σέο μῦθον ἀκούειν - ἤθελον ἢ κιθάρης κρούσματα Δηλιάδος; -καί μοι δισσὸς ἔρως περικίδναται· εἰσοράαν γὰρ -καὶ σέ, μάκαρ, ποθέω, καὶ γλυκερὴν δάμαλιν, -ἧς με περισμύχουσι μεληδόνες· ἀλλά με θεσμοὶ - εἴργουσιν ῥαδινῆς τηλόθι δορκαλίδος. -
-
- - -Paulus Silentiarius - - - -θεσμὸν Ἔρως οὐκ οἶδε βιημάχος, οὐδέ τις ἄλλη -ἀνέρα νοσφίζει πρῆξις ἐρωμανίης. -εἰ δέ σε θεσμοπόλοιο μεληδόνος ἔργον ἐρύκει -οὐκ ἄρα σοῖς στέρνοις λάβρος ἔνεστιν ἔρως. -ποῖος ἔρως, ὅτε βαιὸς ἁλὸς πόρος οἶδε μερίζειν - σὸν χρόα παρθενικῆς τηλόθεν ὑμετέρης; - -νηχόμενος Λείανδρος ὅσον κράτος ἐστὶν ἐρώτων - δείκνυεν, ἐννυχίου κύματος οὐκ ἀλέγων - σοὶ δέ, φίλος, παρέασι καὶ ὁλκάδες· ἀλλὰ θαμίζεις -μᾶλλον Ἀθηναίῃ, Κύπριν ἀπωσάμενος. - θεσμοὺς Παλλὰς ἔχει, Παφίη πόθον. εἰπέ· τίς ἀνὴρ - εἰν ἑνὶ θητεύσει Παλλάδι καὶ Παφίῃ; -
-
- - -Agathias Scholasticus - - -ἡ γραῦς ἡ φθονερὴ παρεκέκλιτο γείτονι κούρῃ - δόχμιον ἐν λέκτρῳ νῶτον ἐρεισαμένη, - προβλὴς ὥς τις ἔπαλξις ἀνέμβατος· οἷα δὲ πύργος -ἔσκεπε τὴν κούρην ἁπλοῒς ἐκταδίη· -καὶ σοβαρὴ θεράπαινα πύλας σφίγξασα μελάθρου - κεῖτο χαλικρήτῳ νάματι βριθομένη. - ἔμπης οὔ μʼ ἐφόβησαν ἐπεὶ στρεπτῆρα θυρέτρου -χερσὶν ἀδουπήτοις βαιὸν ἀειράμενος, -φρυκτοὺς αἰθαλόεντας ἐμῆς ῥιπίσμασι λώπης -ἔσβεσα· καὶ διαδὺς λέχριος ἐν θαλάμῳ - τὴν φύλακα κνώσσουσαν ὑπέκφυγον ἦκα δὲ λέκτρου - νέρθεν ὑπὸ σχοίνοις γαστέρι συρόμενος, - ὠρθούμην κατὰ βαιόν, ὅπη βατὸν ἔπλετο τεῖχος· - ἄγχι δὲ τῆς κούρης στέρνον ἐρεισάμενος, -μαζοὺς μὲν κρατέεσκον· ὑπεθρύφθην δὲ προσώπῳ, - μάστακα πιαίνων χείλεος εὐαφίῃ. -ἦν δʼ ἄρα μοι τὰ λάφυρα καλὸν στόμα, καὶ τὸ φίλημα -σύμβολον ἐννυχίης εἶχον ἀεθλοσύνης. - οὔπω δʼ ἐξαλάπαξα φίλης πύργωμα κορείης, -ἀλλʼ ἔτʼ ἀδηρίτῳ σφίγγεται ἀμβολίῃ. - ἔμπης ἢν ἑτέροιο μόθου στήσωμεν ἀγῶνα, - ναὶ τάχα πορθήσω τείχεα παρθενίης, -οὐ δʼ ἔτι με σχήσουσιν ἐπάλξιες. ἢν δὲ τυχήσω, - στέμματα σοὶ πλέξω, Κύπρι τροπαιοφόρε. - -
-
- - -Leontius Minotaurus - - -Ψαῦε μελισταγέων στομάτων, δέπας· εὗρες, ἄμελγε· -οὐ φθονέω, τὴν σὴν δʼ ἤθελον αἶσαν ἔχειν. -
-
- - -Agathias Scholasticus - - -ἐξότε τηλεφίλου πλαταγήματος ἠχέτα βόμβος - γαστέρα μαντῴου μάξατο κισσυβίου, - ἔγνων ὡς φιλέεις με· τὸ δʼ ἀτρεκὲς αὐτίκα πείσεις -εὐνῆς ἡμετέρης πάννυχος ἁπτομένη. -τοῦτό σε γὰρ δείξει παναληθέα· τοὺς δὲ μεθυστὰς - καλλείψω λατάγων πλήγμασι τερπομένους. -
-
- - -Agathias Scholasticus - - -Ἠϊθέοις οὐκ ἔστι τόσος πόνος, ὁππόσος ἡμῖν - ταῖς ἀταλοψύχοις ἔχραε θηλυτέραις. - τοῖς μὲν γὰρ παρέασιν ὁμήλικες, οἷς τὰ μερίμνης - ἄλγεα μυθεῦνται φθέγματι θαρσαλέῳ, -παίγνιὰ τʼ ἀμφιέπουσι παρήγορα, καὶ κατʼ ἀγυιὰς - πλάζονται γραφίδων χρώμασι ῥεμβόμενοι - ἡμῖν δʼ οὐδὲ φάος λεύσσειν θέμις, ἀλλὰ μελάθροις - κρυπτόμεθα, ζοφεραῖς φροντίσι τηκόμεναι. -W. M. Hardinge, in The Nineteenth Century, Nov.1878, p. 887. -
-
- - -Julianus - - -ἱμερτὴ Μαρίη μεγαλίζεται· ἀλλὰ μετέλθοις - κείνης, πότνα Δίκη, κόμπον ἀγηνορίης· - -μὴ θανάτῳ, βασίλεια· τὸ δʼ ἔμπαλιν, ἐς τρίχας ἥξοι - γήραος, ἐς ῥυτίδας σκληρὸν ἵκοιτο ῥέθος -τίσειαν πολιαὶ τάδε δάκρυα· κάλλος ὑπόσχοι - ψυχῆς ἀμπλακίην, αἴτιον ἀμπλακίης. -
-
- - -Agathias Scholasticus - - - -μηδὲν ἄγαν, σοφὸς εἶπεν ἐγὼ δέ τις ὡς ἐπέραστος, -ὡς καλός, ἠέρθην ταῖς μεγαλοφροσύναις, - καὶ ψυχὴν δοκέεσκον ὅλην ἐπὶ χερσὶν ἐμεῖο - κεῖσθαι τῆς κούρης, τῆς τάχα κερδαλέης· -ἡ δʼ ὑπερηέρθη, σοβαρὴν θʼ ὑπερέσχεθεν ὀφρύν, -ὥσπερ τοῖς προτέροις ἤθεσι μεμφομένη. - καὶ νῦν ὁ βλοσυρωπός, ὁ χάλκεος, ὁ βραδυπειθής, -ὁ πρὶν ἀερσιπότης, ἤριπον ἐξαπίνης· - πάντα δʼ ἔναλλα γένοντο· πεσὼν δʼ ἐπὶ γούνασι κούρῃ -ἴαχον· ἱλήκοις, ἤλιτεν ἡ νεότης. - -
-
- - -Paulus Silentiarius - - -ὁ θρασὺς ὑψαύχην τε, καὶ ὀφρύας εἰς ἓν ἀγείρων - κεῖται παρθενικῆς παίγνιον ἀδρανέος· -ὁ πρὶν ὑπερβασίῃ δοκέων τὴν παῖδα χαλέπτειν, -αὐτὸς ὑποδμηθεὶς ἐλπίδος ἐκτὸς ἔβη. -καὶ ῥʼ ὁ μὲν ἱκεσίοισι πεσὼν θηλύνεται οἴκτοις· -ἡ δὲ κατʼ ὀφθαλμῶν ἄρσενα μῆνιν ἔχει. - παρθένε θυμολέαινα, καὶ εἰ χόλον ἔνδικον αἶθες, - σβέσσον ἀγηνορίην, ἐγγὺς ἴδες Νέμεσιν. -
-
- - -Paulus Silentiarius - - -εἰ καὶ τηλοτέρω Μερόης τεὸν ἴχνος ἐρείσεις, - πτηνὸς Ἔρως πτηνῷ κεῖσε μένει με φέρει. - -εἰ καὶ ἐς ἀντολίην πρὸς ὁμόχροον ἵξεαι Ἠῶ, - πεζὸς ἀμετρήτοις ἕψομαι ἐν σταδίοις. -εἰ δέ τι σοι στέλλω βύθιον γέρας, ἵλαθι, κούρη. - εἰς σὲ θαλασσαίη τοῦτο φέρει Παφίη, ˘ -κάλλεϊ νικηθεῖσα τεοῦ χροὸς ἱμερόεντος, -τὸ πρὶν ἐπʼ ἀγλαΐῃ θάρσος ἀπωσαμένη. -
-
- - -Agathias Scholasticus - - -ποίην τις πρὸς Ἔρωτος ἴοι τρίβον; ἐν μὲν ἀγυιαῖς - μαχλάδος οἰμώξεις χρυσομανεῖ σπατάλῃ· -εἰ δʼ ἐπὶ παρθενικῆς πελάσεις λέχος, ἐς γάμον ἥξεις - ἔννομον, ἢ ποινὰς τὰς περὶ τῶν φθορέων. -κουριδίαις δὲ γυναιξὶν ἀτερπέα κύπριν ἐγείρειν -τίς κεν ὑποτλαίη, πρὸς χρέος ἑλκόμενος; - μοίχια λέκτρα κάκιστα, καὶ ἔκτοθέν εἰσιν ἐρώτων, -ὧν μέτα παιδομανὴς κείσθω ἀλιτροσύνη. - χήρη δʼ, ἡ μὲν ἄκοσμος ἔχει πάνδημον ἐραστήν, -καὶ πάντα φρονέει δήνεα μαχλοσύνης· -ἡ δὲ σαοφρονέουσα μόλις φιλότητι μιγεῖσα - δέχνυται ἀστόργου κέντρα παλιμβολίης, - καὶ στυγέει τὸ τελεσθὲν ἔχουσα δὲ λείψανον αἰδοῦς, -ἂψ ἐπὶ λυσιγάμους χάζεται ἀγγελίας. -ἢν δὲ μιγῇς ἰδίῃ θεραπαινίδι, τλῆθι καὶ αὐτὸς - δοῦλος ἐναλλάγδην δμωίδι γινόμενος· -εἰ δὲ καὶ ὀθνείῃ, τότε σοι νόμος αἶσχος ἀνάψει, -ὕβριν ἀνιχνεύων σώματος ἀλλοτρίου. - πάντʼ ἄρα Διογένης ἔφυγεν τάδε, τὸν δʼ ὑμέναιον -ἤειδεν παλάμῃ, Λαΐδος οὐ χατέων. - -
-
- - -Anonymi Epigrammatici - - -κλαγγῆς πέμπεται ἦχος ἐς οὔατα, καὶ θόρυβος δὲ - ἄσπετος ἐν τριόδοις, οὐδʼ ἀλέγεις, Παφίη; - ἐνθάδε γὰρ σέο κοῦρον ὁδοιπορέοντα κατέσχον - ὅσσοι ἐνὶ κραδίῃ πυρσὸν ἔχουσι πόθου. -
-
- - -Anonymi Epigrammatici - - -Ὄμφαξ οὐκ ἐπένευσας· ὅτʼ ἦς σταφυλή, παρεπέμψω. -μὴ φθονέσῃς δοῦναι κἂν βραχὺ τῆς σταφίδος. -
-
- - -Anonymi Epigrammatici - - -κούρη τίς μʼ ἐφίλησεν ὑφέσπερα χείλεσιν ὑγροῖς. - νέκταρ]ἔην τὸ φίλημα· τὸ γὰρ στόμα νέκταρος ἔπνει· - καὶ μεθύω τὸ φίλημα, πολὺν τὸν ἔρωτα πεπωκώς. -
-
- - -Philodemus - - -δακρύεις, ἐλεεινὰ λαλεῖς, περίεργα θεωρεῖς, - ζηλοτυπεῖς, ἅπτῃ πολλάκι,πυκνὰ φιλεῖς. - ταῦτα μέν ἐστιν ἐρῶντος· ὅταν δʼ εἴπω παράκειμαι , - καὶ μέλλῃς,1 ἁπλῶς οὐδὲν ἐρῶντος ἔχεις. -
-
- - -Antiphilus - - -χεῦμα μὲν Εὐρώταο Δακωνικόν· ἁ δʼ ἀκάλυπτος -Λήδα· χὠ κύκνῳ κρυπτόμενος Κρονίδας. -οἳ δέ με τὸν δυσέρωτα καταίθετε, καὶ τί γένωμαι -ὄρνεον; εἰ γὰρ Ζεὺς κύκνος, ἐγὼ κόρυδος. - -
-
- - -Philodemus - - -ἡ κομψή, μεῖνόν με. τί σοι καλὸν οὔνομα,; ποῦ σε - ἔστιν ἰδεῖν; ὃ θέλεις δώσομεν. οὐδὲ λαλεῖς. - ποῦ γίνῃ; πέμψω μετὰ σοῦ τινα. μή τις ἔχει σε; -ὦ σοβαρή, ὑγίαινʼ. οὐδʼ ὑγίαινε λέγεις; -καὶ πάλι καὶ πάλι σοι προσελεύσομαι· οἶδα μαλάσσειν - καὶ σοῦ σκληροτέρας. νῦν δʼ ὑγίαινε, γύναι. -
-
- - -Diophanes - - -τρὶς λῃστὴς ὁ Ἔρως καλοῖτʼ ἂν ὄντως· - ἀγρυπνεῖ, θρασύς ἐστιν, ἐκδιδύσκει. -
-
- -
- -
-εἷς λίθος ἀστράπτει τελετὴν πολύμορφον Ἰάκχου - καὶ πτηνῶν τρυγόωντα χορὸν καθύπερθεν Ἐρώτων. -
-
- - -Plato - - -ἡ σοβαρὸν γελάσασα καθʼ Ἑλλάδος, ἥ ποτʼ ἐραστῶν -ἑσμὸν ἐπὶ προθύροις Λαῒς ἔχουσα νέων, -τῇ Παφίῃ τὸ κάτοπτρον· ἐπεὶ τοίη μὲν ὁρᾶσθαι -οὐκ ἐθέλω, οἵη δʼ ἦν πάρος οὐ δύναμαι. -
-
- - -Simonides - - -τόξα τάδε πτολέμοιο πεπαυμένα δακρυόεντος - νηῷ Ἀθηναίης κεῖται ὑπορρόφια, - πολλάκι δὴ στονόεντα κατὰ κλόνον ἐν δαῒ φωτῶν - Περσῶν ἱππομάχων αἵματι λουσάμενα. - -
-
- - -Dionysius - - -Ἡράκλεες, Τρηχῖνα πολύλλιθον ὅς τε καὶ Οἴτην - καὶ βαθὺν εὐδένδρου πρῶνα πατεῖς Φολόης, -τοῦτό σοι ἀγροτέρης Διονύσιος αὐτὸς ἐλαίης -χλωρὸν ἀπὸ δρεπάνῳ θῆκε ταμὼν ῥόπαλον. -
-
- - -Leonidas - - -Εὐκαπὲς ἄγκιστρον, καὶ δούρατα δουλιχόεντα, -χὠρμιήν, καὶ τὰς ἰχθυδόκους σπυρίδας, -καὶ τοῦτον νηκτοῖσιν ἐπʼ ἰχθύσι τεχνασθέντα - κύρτον, ἁλιπλάγκτων εὕρεμα δικτυβόλων, -τρηχύν τε τριόδοντα, Ποσειδαώνιον ἔγχος, - καὶ τοὺς ἐξ ἀκάτων διχθαδίους ἐρέτας, -ὁ γριπεὺς Διόφαντος ἀνάκτορι θήκατο τέχνας, -ὡς θέμις, ἀρχαίας λείψανα τεχνοσύνας. -
-
- - -Philippus - - -Δούνακας ἀκροδέτους, καὶ τὴν ἁλινηχέα κώπην, - γυρῶν τʼ ἀγκίστρων λαιμοδακεῖς ἀκίδας, - καὶ λίνον ἀκρομόλιβδον, ἀπαγγελτῆρά τε κύρτου -φελλόν, καὶ δισσὰς σχοινοπλεκεῖς σπυρίδας, -καὶ τὸν ἐγερσιφαῆ πυρὸς ἔγκυον ἔμφλογα πέτρον, -ἄγκυράν τε, νεῶν πλαζομένων παγίδα. -Πείσων ὁ γριπεὺς Ἑρμῇ πόρεν, ἔντρομος ἤδη -δεξιτερήν, πολλοῖς βριθόμενος καμάτοις. -
-
- - -Anonymi Epigrammatici - - -Ἀμφιτρύων μʼ ἀνέθηκεν ἑλὼν ἀπὸ Τηλεβοάων, - -
-
- - -Anonymi Epigrammatici - - -Σκαῖος πυγμαχέων με ἑκηβόλῳ Ἀπόλλωνι - νικήσας ἀνέθηκε τεῒν περικαλλὲς ἄγαλμα. -
-
- - -Anonymi Epigrammatici - - -Λαοδάμας τρίποδʼ αὐτὸς ἐϋσκόπῳ Ἀπόλλωνι - μουναρχέων ἀνέθηκε τεῒν περικαλλὲς ἄγαλμα. -
-
- - -Mnasalces - - -σοὶ μὲν καμπύλα τόξα, καὶ ἰοχέαιρα φαρέτρη, - δῶρα παρὰ Προμάχου, Φοῖβε, τάδε κρέμαται· - ἰοὺς δὲ πτερόεντας ἀνὰ κλόνον ἄνδρες ἔχουσιν -ἐν κραδίαις, ὀλοὰ ξείνια δυσμενέων. -
-
- - -Antipater - - -Τριτογενές, Σώτειρα, Διὸς φυγοδέμνιε κούρα, - Παλλάς, ἀπειροτόκου δεσπότι παρθενίης, -βωμόν τοι κεραοῦχον ἐδείματο τόνδε Σέλευκος, - Φοιβείαν ἰαχὰν φθεγγομένου στόματος. -
-
- - -Satrius - - -θηρευτὴς δολιχὸν τόδε δίκτυον ἄνθετο Δᾶμις -Πίγρης δʼ ὀρνίθων λεπτόμιτον νεφέλην, -τριγλοφόρους δὲ χιτῶνας ὁ νυκτερέτης θέτο Κλείτωρ -τῷ Πανί, τρισσῶν ἐργάτιναι καμάτων. -ἵλαος εὐσεβέεσσιν ἀδελφειοῖς ἐπίνευσον -πτηνά, καὶ ἀγροτέρων κέρδεα καὶ νεπόδων. - -
-
- - -Julianus - - -γνωτῶν τρισσατίων ἐκ τρισσατίης λίνα θήρης - δέχνυσο, Πὰν Πίγρης σοὶ γὰρ ἀπὸ πτερύγων - ταῦτα φέρει, θηρῶν Δᾶμις, Κλείτωρ δὲ θαλάσσης. -καί σφι δὸς εὐαγρεῖν ἠέρα, γαῖαν, ὕδωρ. -
-
- - -Leonidas - - -οἱ τρισσοί τοι ταῦτα τὰ δίκτυα θῆκαν ὅμαιμοι, - ἀγρότα Πάν, ἄλλης ἄλλος ἀπʼ ἀγρεσίης· -ὧν ἀπὸ μὲν πτηνῶν Πίγρης τάδε, ταῦτα δὲ Δᾶμις - τετραπόδων, Κλείτωρ δʼ ὁ τρίτος εἰναλίων. -ἀνθʼ ὧν τῷ μὲν πέμπε διʼ ἠέρος εὔστοχον ἄγρην, -τῷ δὲ διὰ δρυμῶν, τῷ δὲ διʼ ἠϊόνων. -
-
- - -Antipater - - -Πανὶ τάδʼ αὔθαιμοι τρισσοὶ θέσαν ἄρμενα τέχνας· - Δᾶμις μὲν θηρῶν ἄρκυν ὀρειονόμων, - Κλείτωρ δὲ πλωτῶν τάδε δίκτυα, τὰν δὲ πετηνῶν -ἄρρηκτον Πίγρης τάνδε δεραιοπέδαν· -τὸν μὲν γὰρ ξυλόχων, τὸν δʼ ἠέρος, ὃν δʼ ἀπὸ λίμνας -οὔ ποτε σὺν κενεοῖς οἶκος ἔδεκτο λίνοις. -
-
- - -Zosimus - - -Εἰναλίων Κλείτωρ τάδε δίκτυα, τετραπόδων δὲ - Δᾶμις, καὶ Πίγρης θῆκεν ἀπʼ ἠερίων -Πανί, κασιγνήτων ἱερὴ τριάς· ἀλλὰ σὺ θήρην - ἠέρι κἠν πόντῳ κἠν χθονὶ τοῖσδε νέμε. - -
-
- - -Archias - - -σοὶ τάδε, Πὰν σκοπιῆτα, παναίολα δῶρα σύναιμοι - τρίζυγες ἐκ τρισσῆς θέντο λινοστασίης· -δίκτυα μὲν Δᾶμις θηρῶν, Πίγρης δὲ πετηνῶν - λαιμοπέδας, Κλείτωρ δʼ εἰναλίφοιτα λίνα· -ὧν τὸν μὲν καὶ ἐσαῦθις ἐν ἠέρι, τὸν δʼ ἔτι θείης - εὔστοχον ἐν πόντῳ, τὸν δὲ κατὰ δρυόχους. -
-
- - -Pseudo-Lucianus - - -αἱ τρισσαί τοι ταῦτα τὰ παίγνια θῆκαν ἑταῖραι, -Κύπρι μάκαιρʼ, ἄλλης ἄλλη ἀπʼ ἐργασίης· -ὧν ἀπὸ μὲν πυγῆς Εὐφρὼ τάδε, ταῦτα δὲ Κλειὼ -ὡς θέμις, ἡ τριτάτη δʼ Ἀτθὶς ἀπʼ οὐρανίων. -ἀνθʼ ὧν τῇ μὲν πέμπε τὰ παιδικά, δεσπότι, κέρδη, -τῇ δὲ τὰ θηλείης, τῇ δὲ τὰ μηδετέρης. -
-
- - -Julianus - - -Λαῒς ἀμαλδυνθεῖσα χρόνῳ περικαλλέα μορφήν, - γηραλέων στυγέει μαρτυρίην ῥυτίδων - ἔνθεν πικρὸν ἔλεγχον ἀπεχθήρασα κατόπτρου, - ἄνθετο δεσποίνῃ τῆς πάρος ἀγλαΐης. - “ ἀλλὰ σύ μοι, Κυθέρεια, δέχου νεότητος ἑταῖρον - δίσκον, ἐπεὶ μορφὴ σὴ χρόνον οὐ τρομέει.” -
-
- - -Julianus - - -κάλλος μέν, Κυθέρεια, χαρίζεαι· ἀλλὰ μαραίνει -ὁ χρόνος ἑρπύζων σήν, βασίλεια, χάριν. - δώρου δʼ ὑμετέροιο παραπταμένου με, Κυθήρη, - δέχνυσο καὶ δώρου, πότνια, μαρτυρίην. - -
-
- - -Julianus - - -Ἑλλάδα νικήσασαν ὑπέρβιον ἀσπίδα Μήδων -Λαῒς θῆκεν ἑῷ κάλλεϊ ληιδίην - μούνῳ ἐνικήθη δʼ ὑπὸ γήραϊ, καὶ τὸν ἔλεγχον -ἄνθετό σοι, Παφίη, τὸν νεότητι φίλον -ἧς γὰρ ἰδεῖν στυγέει πολιῆς παναληθέα μορφήν, - τῆσδε συνεχθαίρει καὶ σκιόεντα τύπον. -
-
- - -Anonymi Epigrammatici - - -Σκάπτειραν κήποιο φιλυδρήλοιο δίκελλαν, - καὶ δρεπάνην καυλῶν ἄγκυλον ἐκτομίδα, -τὴν τʼ ἐπινωτίδιον βροχετῶν ῥακόεσσαν ἀρωγόν, - καὶ τὰς ἀρρήκτους ἐμβάδας ὠμοβοεῖς, -τόν τε διʼ εὐτρήτοιο πέδου δύνοντα κατʼ ἰθὺ -ἀρτιφυοῦς κράμβης πάσσαλον ἐμβολέα, - καὶ σκάφος ἐξ ὀχετῶν πρασιὴν διψεῦσαν ἐγείρειν -αὐχμηροῖο θέρευς οὔ ποτε παυσάμενον, - σοὶ τῷ κηπουρῷ Ποτάμων ἀνέθηκε, Πρίηπε, -κτησάμενος ταύτης ὄλβον ἀπʼ ἐργασίης, -
-
- - -Diodorus Zonas - - -Ἀρτιχανῆ ῥοιάν τε, καὶ ἀρτίχνουν τόδε μῆλον, -καὶ ῥυτιδόφλοιον σῦκον ἐπομφάλιον, -πορφύρεόν τε βότρυν μεθυπίδακα, πυκνορρᾶγα· -καὶ κάρυον χλωρῆς ἀρτίδορον λεπίδος, -ἀγροιώτῃ τῷδε μονοστόρθυγγι Πριήπῳ - θῆκεν ὁ καρποφύλαξ, δενδριακὴν θυσίην. -
-
- - -Anonymi Epigrammatici - - -Ἑρμεία, σήραγγος ἁλίκτυπον ὃς τόδε ναίεις -εὐστιβὲς αἰθυίαις ἰχθυβόλοισι λέπας, - -δέξο σαγηναίοιο λίνου τετριμμένον ἅλμῃ - λείψανον, αὑχμηρῶν ξανθὲν ἐπʼ ἠιόνων, -γρίπους τε, πλωτῶν τε πάγην, περιδινέα κύρτον, -καὶ φελλὸν κρυφίων σῆμα λαχόντα βόλων, -καὶ βαθὺν ἱππείης πεπεδημένον ἅμματι χαίτης, - οὐκ ἄτερ ἀγκίστρων,λιμνοφυῆ δόνακα. -
-
- - -Anonymi Epigrammatici - - -δαίμονι τῇ Συρίῃ τὸ μάτην τριβὲν Ἡλιόδωρος - δίκτυον ἐν νηοῦ τοῦδʼ ἔθετο προπύλοις· - ἁγνὸν ἀπʼ ἰχθυβόλου θήρας τόδε· πολλὰ δʼ ἐν αὐτῷ - φυκίʼ ἐπʼ εὐόρμων εἵλκυσεν αἰγιαλῶν. -
-
- - -Julianus - - -κεκμηὼς χρονίῃς πεπονηκότα δίκτυα θήρᾐ - ἄνθετο ταῖς Νύμφαις ταῦτα γέρων Κινύρης· -οὐ γὰρ ἔτι τρομερῇ παλάμῃ περιηγέα κόλπον -εἶχεν ἀκοντίζειν οἰγομένοιο λίνου. -εἰ δʼ ὀλίγου δώρου τελέθει δόσις, οὐ τόδε, Νύμφαι, - μέμψις, ἐπεὶ Κινύρου ταῦθʼ ὅλος ἔσκε βίος. -
-
- - -Julianus - - -ταῖς Νύμφαις Κινύρης τόδε δίκτυον οὐ γὰρ ἀείρει -γῆρας ἀκοντιστὴν μόχθον ἑκηβολίης. - ἰχθύες ἀλλὰ νέμοισθε γεγηθότες, ὅττι θαλάσσῃ - δῶκεν ἔχειν Κινύρου γῆρας ἐλευθερίην. - -
-
- - -Theaetetus - - -Ἰχθυβόλον πολυωπὲς ἀπʼ εὐθήρου λίνον ἄγρης, - τῶν τʼ ἀγκιστροδέτων συζυγίην δονάκων, - καὶ πιστὸν βυθίων παγίδων σημάντορα φελλόν, - καὶ λίθον ἀντιτύπῳ κρούσματι πυρσοτόκον, -ἄγκυρὰν τʼ ἐπὶ τοῖς ἐχενηίδα, δεσμὸν ἀέλλης, - στρεπτῶν τʼ ἀγκίστρων ἰχθυπαγῆ στόματα, - δαίμοσιν ἀγροδότῃσι θαλασσοπόρος πόρε Βαίτων, -γήραϊ νουσοφόρῳ βριθομένης παλάμης. -
-
- - -Julianus - - -καμπτομένους δόνακας, κώπην θʼ ἅμα, νηὸς ἱμάσθλην, - γυρῶν τʼ ἀγκίστρων καμπυλόεσσαν ἴτυν, -εὐκόλπου τε λίνοιο περίπλεα κύκλα μολύβδῳ, - καὶ φελλοὺς κύρτων μάρτυρας εἰναλίων, -ζεῦγὸς τʼ εὐπλεκέων σπυρίδων, καὶ μητέρα πυρσῶν - τήνδε λίθον, νηῶν θʼ ἕδρανον ἀσταθέων - ἄγκυραν, γριπεύς, Ἐριούνιε, σοὶ τάδε Βαίτων - δῶρα φέρει, τρομεροῦ γήραος ἀντιάσας. -
-
- - -Julianus - - -Ἑρμείῃ Βαίτων ἁλινηχέος ὄργανα τέχνης - ἄνθετο, δειμαίνων γήραος ἀδρανίην -ἄγκυραν, γυρόν τε λίθον, σπυρίδας θʼ ἅμα φελλῷ, - ἄγκιστρον, κώπην, καὶ λίνα καὶ δόνακας. -
-
- - -Macedonius II - - -δίκτυον ἀκρομόλιβδον Ἀμύντιχος ἀμφὶ τριαίνῃ - δῆσε γέρων, ἁλίων παυσάμενος καμάτων, - -ἐς δὲ Ποσειδάωνα καὶ ἁλμυρὸν οἶδμα θαλάσσης -εἶπεν, ἀποσπένδων δάκρυον ἐκ βλεφάρων - “ οἶσθα, μάκαρ· κέκμηκα· κακοῦ δʼ ἐπὶ γήραος ἡμῖν - ἄλλυτος ἡβάσκει γυιοτακὴς πενίη. - θρέψον ἔτι σπαῖρον τὸ γερόντιον, ἀλλʼ ἀπὸ γαίης, -ὡς ἐθέλει, μεδέων κἀν χθονὶ κἀν πελάγει.” -
-
- - -Nicarchus I - - -Αἰγιβάτῃ τόδε Πανὶ, καὶ εὐκάρπῳ Διονύσῳ, -καὶ Δηοῖ Χθονίῃ ξυνὸν ἔθηκα γέρας. - αἰτέομαι δʼ αὐτοὺς καλὰ πώεα καὶ καλὸν οἶνον, -καὶ καλὸν ἀμῆσαι καρπὸν ἀπʼ ἀσταχύων. -
-
- - -Agathias Scholasticus - - -Δικραίρῳ δικέρωτα, δασυκνάμῳ δασυχαίταν, - ἴξαλον εὐσκάρθμῳ, λόχμιον ὑλοβάτᾳ, - Πανὶ φιλοσκοπέλῳ λάσιον παρὰ πρῶνα Χαρικλῆς -κνακὸν ὑπηνήταν τόνδʼ ἀνέθηκε τράγον. -
-
- - -Quintus Maecius - - -Αἰγιαλῖτα Πρίηπε, σαγηνευτῆρες ἔθηκαν - δῶρα παρακταίης σοὶ τάδʼ ἐπωφελίης, - θύννων εὐκλώστοιο λίνου βυσσώμασι ῥόμβον - φράξαντες γλαυκαῖς ἐν παρόδοις πελάγευς, -φηγίνεον κρητῆρα, καὶ αὐτούργητον ἐρείκης - βάθρον, ἰδʼ ὑαλέην οἰνοδόκον κύλικα, -ὡς ἂν ὑπʼ ὀρχησμῶν λελυγισμένον ἔγκοπον ἴχνος - ἀμπαύσῃς, ξηρὴν δίψαν ἐλαυνόμενος· - -
-
- - -Rhianus - - -τὸ ῥόπαλον τῷ Πανὶ καὶ ἰοβόλον Πολύαινος - τόξον καὶ κάπρου τούσδε καθᾶψε πόδας, - καὶ ταύταν γωρυτόν, ἐπαυχένιόν τε κυνάγχαν - θῆκεν ὀρειάρχᾳ δῶρα συαγρεσίης. -ἀλλʼ, ὦ Πὰν σκοπιῆτα, καὶ εἰσοπίσω Πολύαινον - εὔαγρον πέμποις, υἱέα Σιμύλεω. -
-
- - -Leonidas - - -τοῦτο χιμαιροβάτᾳ Τελέσων αἰγώνυχι Πανὶ -τὸ σκύλος ἀγρείας τεῖνε κατὰ πλατάνου· - καὶ τὰν ῥαιβόκρανον ἐυστόρθυγγα κορύναν, -ἃ πάρος αἱμωποὺς ἐστυφέλιξε λύκους, -γαυλούς τε γλαγοπῆγας, ἀγωγαῖόν τε κυνάγχαν, - καὶ τὰν εὐρίνων λαιμοπέδαν σκυλάκων. -
-
- - -Philippus - - -δράγματά σοι χώρου μικραύλακος, ὦ φιλόπυρε - Δηοῖ, Σωσικλέης θῆκεν ἀρουροπόνος, - εὔσταχυν ἀμήσας τὸν νῦν σπόρον· ἀλλὰ καὶ αὖτις , -ἐκ καλαμητομίης ἀμβλὺ φέροι δρέπανον. -
-
- - -Anonymi Epigrammatici - - -γήραϊ δὴ καὶ τόνδε κεκυφότα φήγινον ὄζον -οὔρεσιν ἀγρῶται βουκόλοι ἐξέταμον - Πανὶ δέ μιν ξέσσαντες ὁδῷ ἔπι καλὸν ἄθυρμα - κάτθεσαν, ὡραίων ῥύτορι βουκολίων. - -
-
- - -Philippus - - -δίκτυά σοι μολίβῳ στεφανούμενα, δυσιθάλασσα, - καὶ κώπην, ἅλμης τὴν μεθύουσαν ἔτι, -κητοφόνον τε τρίαιναν, ἐν ὕδασι καρτερὸν ἔγχος, - καὶ τὸν ἀεὶ φελλοῖς κύρτον ἐλεγχόμενον, -ἄγκυράν τε, νεῶν στιβαρὴν χέρα, καὶ φιλοναύτην - σπέρμα πυρὸς σῴζειν πέτρον ἐπιστάμενον, - ἀρχιθάλασσε Πόσειδον, Ἀμύντιχος ὕστατα δῶρα - θήκατʼ, ἐπεὶ μογερῆς παύσαθʼ ἁλιπλανίης. -
-
- - -Archias - - -αἱ τρισσαί, Σατύρη τε, καὶ Ἡράκλεια, καὶ Εὐφρώ, - θυγατέρες Ξούθου καὶ Μελίτης, Σάμιαι· -ἁ μέν, ἀραχναίοιο μίτου πολυδινέα λάτριν, - ἄτρακτον, δολιχᾶς οὐκ ἄτερ ἀλακάτας· -ἁ δὲ πολυσπαθέων μελεδήμονα κερκίδα πέπλων - εὔθροον ἁ τριτάτα δʼ εἰροχαρῆ τάλαρον - οἷς ἔσχον· χερνῆτα βίον δηναιόν, Ἀθάνα - πότνια, ταῦθʼ αἱ σαὶ σοὶ θέσαν ἐργάτιδες. -
-
- - -Macedonius II - - -τὼ βόε μοι· σῖτον δὲ τετεύχατον ἵλαθι, Δηοῖ, - δέχνυσο δʼ ἐκ μάζης, οὐκ ἀπὸ βουκολίων - δὸς δὲ βόε ζώειν ἐτύμω, καὶ πλῆσον ἀρούρας -δράγματος, ὀλβίστην ἀντιδιδοῦσα χάριν. -σῷ γὰρ ἀρουροπόνῳ Φιλαλήθεϊ τέτρατος ἤδη - ὀκτάδος ἑνδεκάτης ἐστὶ φίλος λυκάβας, -οὐδέποτʼ ἀμήσαντι Κορινθικόν, οὔ ποτε πικρᾶς - τῆς ἀφιλοσταχύου γευσαμένῳ πενίης. - -
-
- - -Agathias Scholasticus - - -χαλκὸν ἀροτρητήν, κλασιβώλακα, νειοτομῆα, - καὶ τὴν ταυροδέτιν βύρσαν ὑπαυχενίην, - καὶ βούπληκτρον ἄκαιναν, ἐχετλήεντά τε γόμφον - Δηοῖ Καλλιμένης ἄνθετο γειοπόνος, -τμήξας εὐαρότου ῥάχιν ὀργάδος· εἰ δʼ ἐπινεύσεις - τὸν στάχυν ἀμῆσαι, καὶ δρεπάνην κομίσω. -
-
- - -Anonymi Epigrammatici - - -Ἀλκιμένης ὁ πενιχρὸς ἐπὶ σμικρῷ τινι κήπῳ - τοῦ φιλοκαρποφόρου γευσάμενος θέρεος, - ἰσχάδα καὶ μῆλον καὶ ὕδωρ γέρα Πανὶ κομίζων, -εἶπε· “σύ μοι βιότου τῶν ἀγαθῶν ταμίας· -ὧν τὰ μὲν ἐκ κήποιο, τὰ δʼ ὑμετέρης ἀπὸ πέτρης - δέξο, καὶ ἀντιδιδοὺς δὸς πλέον ὧν ἔλαβες.” -
-
- - -Plato - - -τὸν Νυμφῶν θεράποντα, φιλόμβριον, ὑγρὸν ἀοιδόν, - τὸν λιβάσιν κούφαις τερπόμενον βάτραχον - χαλκῷ μορφώσας τις ὁδοιπόρος εὖχος ἔθηκε, - καύματος ἐχθροτάτην δίψαν ἀκεσσάμενος· -πλαζομένῳ γὰρ ἔδειξεν ὕδωρ, εὔκαιρον ἀείσας - κοιλάδος ἐκ δροσερῆς ἀμφιβίῳ στόματι. - φωνὴν δʼ ἡγήτειραν ὁδοιπόρος οὐκ ἀπολείπων - εὗρε πόσιν γλυκερῶν ὧν ἐπόθει ναμάτων. -
-
- - -Leonidas - - -Γλευκοπόταις Σατύροισι καὶ ἀμπελοφύτορι Βάκχῳ -Ἡρῶναξ πρώτης δράγματα φυταλιῆς, - -τρισσῶν οἰνοπέδων τρισσοὺς ἱερώσατο τούσδε, - ἐμπλήσας οἴνου πρωτοχύτοιο, κάδους· -ὧν ἡμεῖς σπείσαντες, ὅσον θέμις, οἴνοπι Βάκχῳ - καὶ Σατύροις, Σατύρων πλείονα πιόμεθα. -
-
- - -Anonymi Epigrammatici - - -ὀξέσι λαχνήεντα δέμας κέντροισιν ἐχῖνον - ῥαγολόγον, γλυκερῶν σίντορα θειλοπέδων, - σφαιρηδὸν σταφυλῇσιν ἐπιτροχάοντα δοκεύσας, - Κώμαυλος Βρομίῳ ζωὸν ἀνεκρέμασεν. -
-
- - -Antipater - - -τὰν πρὶν Ἐνυαλίοιο καὶ Εἰράνας ὑποφᾶτιν, - μέλπουσαν κλαγγὰν βάρβαρον ἐκ στομάτων, -χαλκοπαγῆ σάλπιγγα, γέρας Φερένικος Ἀθάνᾳ. - λήξας καὶ πολέμου καὶ θυμέλας, ἔθετο. -
-
- - -Antipater - - -κερκίδα τὴν φιλαοιδὸν Ἀθηναίῃ θέτο Βιττὼ - ἄνθεμα, λιμηρῆς ἄρμενον ἐργασίης, -εἶπε δέ· “ χαῖρε, θεά, καὶ τήνδʼ ἔχε· χήρη ἐγὼ γὰρ - τέσσαρας εἰς ἐτέων ἐρχομένη δεκάδας, - ἀρνεῦμαι τὰ σὰ δῶρα· τὰ δʼ ἔμπαλι Κύπριδος ἔργων -ἅπτομαι· ὥρης γὰρ κρεῖσσον ὁρῶ τὸ θέλειν.” -
-
- - -Anonymi Epigrammatici - - -κερκίδα τὴν φιλοεργὸν Ἀθηναίῃ θέτο Βιττὼ - ἄνθεμα, λιμηρῆς ἄρμενον ἐργασίης, - -πάντας ἀποστύξασα γυνὴ τότε τοὺς ἐν ἐρίθοις - μόχθους καὶ στυγερὰς φροντίδας ἱστοπόνων -εἶπε δʼ Ἀθηναίῃ· “ τῶν Κύπριδος ἅψομαι ἔργων, - τὴν Πάριδος κατὰ σοῦ ψῆφον ἐνεγκαμένη·” -
-
- - -Anonymi Epigrammatici - - -χάλκεός εἰμι τρίπους· Πυθοῖ δʼ ἀνάκειμαι ἄγαλμα, -καὶ μʼ ἐπὶ Πατρόκλῳ θῆκεν πόδας ὠκὺς Ἀχιλλεύς· - Τυδείδης δʼ ἀνέθηκε βοὴν ἀγαθὸς Διομήδης, - νικήσας ἵπποισιν ἐπὶ πλατὺν Ἑλλήσποντον. -
-
- - -Simonides - - -τόνδε ποθʼ Ἕλληνες ῥώμῃ χερός, ἔργῳ Ἄρηος, -εὐτόλμῳ ψυχῆς λήματι πειθόμενοι, -Πέρσας ἐξελάσαντες, ἐλεύθερον Ἑλλάδι κόσμον - ἱδρύσαντο Διὸς βωμὸν Ἐλευθερίου. -
-
- - -Anonymi Epigrammatici - - -μῆτερ ἐμή Ῥείη, Φρυγίων θρέπτειρα λεόντων, - Δίνδυμον ἧς μύσταις οὐκ ἀπάτητον ὄρος, - σοὶ τάδε θῆλυς Ἄλεξις ἑῆς οἰστρήματα λύσσης - ἄνθετο, χαλκοτύπου παυσάμενος μανίης, -κύμβαλά τʼ ὀξύφθογγα, βαρυφθόγγων τʼ ἀλαλητὸν -αὐλῶν, οὓς μόσχου λοξὸν ἔκαμψε κέρας, -τυμπανά τʼ ἠχήεντα, καὶ αἵματι φοινιχθέντα - φάσγανα, καὶ ξανθάς, τὰς πρὶν ἔσεισε, κόμας. - ἵλαος, ὦ δέσποινα, τὸν ἐν νεότητι μανέντα -γηραλέον προτέρης παῦσον ἀγριοσύνης - -
-
- - -Simonides - - -οὕτω τοι, μελία ταναά, ποτὶ κίονα μακρὸν -ἧσο, Πανομφαίῳ Ζηνὶ μένους1ʼ ἱερά· - ἤδη γὰρ χαλκός τε γέρων, αὐτά τε τέτρυσαι -πυκνὰ κραδαινομένα δαΐῳ ἐν πολέμῳ. -
-
- - -Bacchylides - - -Εὔδημος τὸν νηὸν ἐπʼ ἀγροῦ τόνδʼ ἀνέθηκεν -τῷ πάντων ἀνέμων πιοτάτῳ Ζεφύρῳ· -εὐξαμένῳ γάρ οἱ ἦλθε βοαθόος, ὄφρα τάχιστα - λικμήσῃ πεπόνων καρπὸν ἀπʼ ἀσταχύων. -
-
- - -Paulus Silentiarius - - -τὸν χαλκοῦν τέττιγα Λυκωρέϊ Λοκρὸς ἀνάπτει -Εὔνομος, ἀθλοσύνας μνᾶμα φιλοστεφάνου. -ἦν γὰρ ἀγὼν φόρμιγγος· ὁ δʼ ἀντίος ἵστατο Πάρθις· - ἀλλʼ ὅκα δὴ πλάκτρῳ Λοκρὶς ἔκρεξε χέλυς, -βραγχὸν τετριγυῖα λύρας ἀπεκόμπασε χορδά· - πρὶν δὲ μέλος σκάζειν εὔποδος ἁρμονίας, - ἁβρὸν ἐπιτρύζων κιθάρας ὕπερ ἕζετο τέττιξ, - καὶ τὸν ἀποιχομένου φθόγγον ὑπῆλθε μίτου, - τὰν δὲ πάρος λαλαγεῦσαν ἐν ἄλσεσιν ἀγρότιν ἀχὼ -πρὸς νόμον ἁμετέρας τρέψε λυροκτυπίας, -τῷ σε, μάκαρ Λητῷε, τεῷ τέττιγι γεραίρει, - χάλκεον ἱδρύσας ᾠδὸν ὑπὲρ κιθάρας. -
-
- - -Joannes Barbucallus - - -πειθοῖ καὶ Παφίᾳ πακτὰν καὶ κηρία σίμβλων - τᾶς καλυκοστεφάνου νυμφίος Εὐρυνόμας -Ἑρμοφίλας ἀνέθηκεν ὁ βωκόλος· ἀλλὰ δέχεσθε - ἀντʼ αὐτᾶς πακτάν, ἀντʼ ἐμέθεν τὸ μέλι. - -
-
- - -Macedonius II - - -Κισσοκόμαν Βρομίῳ Σάτυρον σεσαλαγμένον οἴνῳ - ἀμπελοεργὸς ἀνὴρ ἄνθετο Ληναγόρας· -τῷ δὲ καρηβαρέοντι δορήν, τρίχα, κισσόν, ὀπώπην, - πάντα λέγοις μεθύειν, πάντα συνεκλέλυται· -καὶ φύσιν ἀφθόγγοισι τύποις μιμήσατο τέχνη, -ὕλης ἀντιλέγειν μηδὲν ἀνασχομένης. -
-
- - -Paulus Silentiarius - - -σοὶ τόδε πενταίχμοισι ποδῶν ὡπλισμένον ἀκμαῖς, -ἀκροχανές, φοινῷ κρατὶ συνεξερύσαν, - ἄνθετο δέρμα λέοντος ὑπὲρ πίτυν, αἰγιπόδη Πάν, - Τεῦκρος Ἄραψ, καὐτὰν ἀγρότιν αἰγανέαν. -αἰχμῇ δʼ ἡμιβρῶτι τύποι μίμνουσιν ὀδόντων, -ᾇ ἔπι βρυχητὰν θὴρ ἐκένωσε χόλον. -ὑδριάδες Νύμφαι δὲ σὺν ὑλονόμοισι χορείαν - στᾶσαν, ἐπεὶ καὐτὰς πολλάκις ἐξεφόβει. -
-
- - -Isidorus - - -
-
- - -Agathias Scholasticus - - -τῇ Παφίῃ στεφάνους, τῇ Παλλάδι τὴν πλοκαμῖδα, -Ἀρτέμιδι ζώνην ἄνθετο Καλλιρόη· -εὕρετο γὰρ μνηστῆρα τὸν ἤθελε, καὶ λάχεν ἥβην - σώφρονα, καὶ τεκέων ἄρσεν ἔτικτε γένος. - -
-
- - -Palladas - - -ἀντὶ βοὸς χρυσέου τʼ ἀναθήματος Ἴσιδι τούσδε - θήκατο τοὺς λιπαροὺς Παμφίλιον πλοκάμους· -ἡ δὲ θεὸς τούτοις γάνυται πλέον, ἤπερ Ἀπόλλων -χρυσῷ, ὃν ἐκ Λυδῶν Κροῖσος ἔπεμψε θεῷ. -
-
- - -Palladas - - -ὦ ξυρὸν οὐράνιον, ξυρὸν ὄλβιον, ᾧ πλοκαμῖδας - κειραμένη πλεκτὰς ἄνθετο Παμφίλιον, -οὔ σέ τις ἀνθρώπων χαλκεύσατο· πὰρ δὲ καμίνῳ - Ἡφαίστου, χρυσέην σφῦραν ἀειραμένη -ἡ λιπαροκρήδεμνος, ἵνʼ εἴπωμεν καθʼ Ὅμηρον, -χερσί σε ταῖς ἰδίαις· ἐξεπόνησε Χάρις. -
-
- - -Philippus - - -κυκλοτερῆ μόλιβον,1. σελίδων σημάντορα πλευρῆς, - καὶ σμίλαν, δονάκων ἀκροβελῶν γλυφίδα, -καὶ κανονῖδʼ ὑπάτην, καὶ τὴν παρὰ θῖνα κίσηριν, -αὐχμηρὸν πόντου τρηματόεντα λίθον, -Καλλιμένης Μούσαις, ἀποπαυσάμενος καμάτοιο, -θῆκεν ἐπεὶ γήρᾳ κανθὸς ἐπεσκέπετο. -
-
- - -Damocharis - - -Γραμμοτόκῳ πλήθοντα μελάσματι κυκλομόλιβδον -καὶ κανόνα γραφίδων Ἰθντάτων φύλακα, -καὶ γραφικοῖο δοχεῖα κελαινοτάτοιο ῥεέθρου, -ἄκρα τε μεσσοτόμους εὐγλυφέας καλάμους, - -τρηχαλέην τε λίθον, δονάκων εὐθηγέα κόσμον, - ἔνθα περιτριβέων ὀξὺ χάραγμα πέλει, - καὶ γλύφανον καλάμου, πλατέος γλωχῖνα σιδήρου, - ὅπλα σοὶ ἐμπορίης ἄνθετο τῆς ἰδίης - κεκμηὼς Μενέδημος ὑπʼ ἀχλύος ὄμμα παλαιόν, -Ἑρμεία· σὺ δʼ ἀεὶ φέρβε σὸν ἐργατίνην, -
-
- - -Paulus Silentiarius - - -Γυρὸν κυανέης μόλιβον σημάντορα γραμμῆς, -καὶ σκληρῶν ἀκόνην τρηχαλέην καλάμων, - καὶ πλατὺν ὀξυντῆρα μεσοσχιδέων δονακήων, - καὶ κανόνα γραμμῆς ἰθυπόρου ταμίην, -καὶ χρόνιον γλυπτοῖσι μέλαν πεφυλαγμένον ἄντροις, - καὶ γλυφίδας καλάμων ἄκρα μελαινομένων - Ἑρμείῃ Φιλόδημος, ἐπεὶ χρόνῳ ἐκκρεμὲς ἤδη - ἦλθε κατʼ ὀφθαλμῶν ῥυσὸν ἐπισκύνιον. -
-
- - -Paulus Silentiarius - - -τὸν τροχόεντα μόλιβδον, ὃς ἀτραπὸν οἶδε χαράσσειν -ὀρθὰ παραξύων ἰθυτενῆ κανόνα, - καὶ χάλυβα σκληρὸν καλαμηφάγον, ἀλλὰ καὶ αὐτὸν - ἡγεμόνα γραμμῆς ἀπλανέος κανόνα, -καὶ λίθον ὀκριόεντα, δόναξ ὅθι δισσὸν ὀδόντα - θήγεται ἀμβλυνθεὶς ἐκ δολιχογραφίης, -καὶ βυθίην Τρίτωνος ἁλιπλάγκτοιο χαμεύνην, - σπόγγον, ἀκεστορίην πλαζομένης γραφίδος, - καὶ κίστην πολύωπα μελανδόκον, εἰν ἑνὶ πάντα -εὐγραφέος τέχνης ὄργανα ῥυομένην, - Ἑρμῇ Καλλιμένης, τρομερὴν ὑπὸ γήραος ὄκνῳ - χεῖρα καθαρμόζων ἐκ δολιχῶν καμάτων. - -
-
- - -Paulus Silentiarius - - -ἄβροχον ἀπλανέος μόλιβον γραπτῆρα κελεύθου, -ἧς ἔπι ῥιζοῦται γράμματος ἁρμονίη, - καὶ κανόνα τροχαλοῖο κυβερνητῆρα μολίβδου, - καὶ λίθακα τρητὴν σπόγγῳ ἐειδομένην, -καὶ μέλανος σταθεροῖο δοχήιον, ἀλλὰ καὶ αὐτῶν -εὐγραφέων καλάμων ἀκροβαφεῖς ἀκίδας, - σπόγγον, ἁλὸς βλάστημα, χυτῆς λειμῶνα θαλάσσης, - καὶ χαλκὸν δονάκων τέκτονα λεπταλέων, - ἐνθάδε Καλλιμένης φιλομειδέσιν ἄνθετο Μούσαις, -γήραϊ κεκμηὼς ὄμματα καὶ παλάμην. -
-
- - -Julianus - - -Ἀκλινέας γραφίδεσσιν ἀπιθύνοντα πορείας - τόνδε μόλιβδον ἄγων, καὶ μολίβου κανόνα -σύνδρομον ἡνιοχῆα, πολυτρήτου τʼ ἀπὸ πέτρης - λᾶαν, ὃς ἀμβλεῖαν θῆγε γένυν καλάμου, -σὺν δʼ αὐτοῖς καλάμοισι μέλαν, μυστήρια φωνῆς - ἀνδρομέης, σμίλης τʼ ὀξυτόμον κοπίδα, - Ἑρμείῃ Φιλόδημος, ἐπεὶ χρόνος ὄμματος αὐγὴν - ἀμβλύνας παλάμῃ δῶκεν ἐλευθερίην. -
-
- - -Julianus - - -αὔλακας ἰθυπόρων γραφίδων κύκλοισι χαράσσων -ἄνθεμά σοι τροχόεις οὗτος ἐμὸς μόλιβος, - καὶ μολίβῳ χρωστῆρι κανὼν τύπον ὀρθὸν ὀπάζων, - καὶ λίθος εὐσχιδέων θηγαλέη καλάμων, -σὺν καλάμοις ἄγγος τε μελανδόκον, οἷσι φυλάσσει - αἰὼν ἐσσομένοις γῆρυν ἀποιχομένων. - -δέχνυσο καὶ γλυπτῆρα σιδήρεον ᾧ θρασὺς Ἄρης -σὺν Μούσαις ἰδίην δῶκε διακτορίην, - Ἑρμείη· σὰ γὰρ ὅπλα· σὺ δʼ ἀδρανέος Φιλοδήμου -ἴθυνε ζωήν, λειπομένοιο βίου. -
-
- - -Macedonius II - - -νῆα Ποσειδάωνι πολύπλανος ἄνθετο Κράντας, - ἔμπεδον ἐς νηοῦ πέζαν ἐρεισάμενος, -αὔρης οὐκ ἀλέγουσαν ἐπὶ χθονός· ἧς ἔπι Κράντας -εὐρὺς ἀνακλινθεὶς ἄτρομον ὕπνον ἔχει. -
-
- - -Macedonius II - - -νῆά σοι, ὦ πόντου βασιλεῦ καὶ κοίρανε γαίης, - ἀντίθεμαι Κράντας, μηκέτι τεγγομένην, - νῆα, πολυπλανέων ἀνέμων πτερόν, ἧς ἔπι δειλὸς - πολλάκις ὠισάμην εἰσελάαν Ἀίδῃ· -πάντα δʼ ἀπειπάμενος, φόβον, ἐλπίδα, πόντον, ἀέλλας, - πιστὸν ὑπὲρ γαίης ἴχνιον ἡδρασάμην. -
-
- - -Paulus Silentiarius - - -σοὶ τὰ λιποστεφάνων διατίλματα μυρία φύλλων, - σοὶ τὰ νοοπλήκτου κλαστὰ κύπελλα μέθης, -βόστρυχα σοὶ τὰ μύροισι δεδευμένα, τῇδε κονίῃ - σκῦλα ποθοβλήτου κεῖται Ἀναξαγόρα, -σοὶ τάδε, Λαΐς, ἅπαντα· παρὰ προθύροις γὰρ ὁ δειλὸς - τοῖσδε σὺν ἀκρήβαις πολλάκι παννυχίσας, -οὐκ ἔπος, οὐ χαρίεσσαν ὑπόσχεσιν, οὐδὲ μελιχρῆς - ἐλπίδος ὑβριστὴν μῆθον ἐπεσπασατο· - -φεῦ φεῦ, γυιοτακὴς δὲ λιπὼν τάδε σύμβολα κώμων, -μέμφεται ἀστρέπτου κάλλεϊ θηλυτέρης. -
-
- - -Agathias Scholasticus - - -εἶδον ἐγὼ τὸν πτῶκα καθήμενον ἐγγὺς ὀπώρης - βακχιάδος, πουλὺν βότρυν ἀμεργόμενον· - ἀγρονόμῳ δʼ ἀγόρευσα, καὶ ἔδρακεν ἀπροϊδὴς δὲ - ἐγκέφαλον πλήξας ἐξεκύλισε λίθῳ. -εἶπε δὲ καὶ χαίρων ὁ γεωπόνος· “ἆ τάχα Βάκχῳ - λοιβῆς καὶ θυέων μικτὸν ἔδωκα γέρας.” -
-
- - -Macedonius II - - -Δάφνις ὁ συρικτὰς τρομερῷ περὶ γήραϊ κάμνων, - χειρὸς ἀεργηλᾶς τάνδε βαρυνομένας - Πανὶ φιλαγραύλῳ νομίαν ἀνέθηκε κορύναν, -γήραϊ ποιμενίων παυσάμενος καμάτων. -εἰσέτι γὰρ σύριγγι μελίσδομαι, εἰσέτι φωνὰ - ἄτρομος ἐν τρομερῷ σώματι ναιετάει. - ἀλλὰ λύκοις σίντῃσιν ἀνʼ οὔρεα μή τις ἐμεῖο - αἰπόλος ἀγγείλῃ γήραος ἀδρανίην. -
-
- - -Agathias Scholasticus - - -Βασσαρὶς Εὐρυνόμη σκοπελοδρόμος, ἥ ποτε ταύρων - πολλὰ τανυκραίρων στέρνα χαραξαμένη, -ἡ μέγα καγχάζουσα λεοντοφόνοις ἐπὶ νίκαις, - παίγνιον ἀτλήτου θηρὸς ἔχουσα κάρη, -ἱλήκοις, Διόνυσε, τεῆς ἀμέλησα χορείης, - Κύπριδι βακχεύειν μᾶλλον ἐπειγομένη. - θῆκα δέ σοι τάδε ῥόπτρα· παραρρίψασα δὲ κισσόν, -χεῖρα περισφίγξω χρυσοδέτῳ σπατάλῃ. - -
-
- - -Paulus Silentiarius - - -Ἄνδροκλος, ὤπολλον, τόδε σοὶ κέρας, ᾧ ἐπὶ πουλὺν - θῆρα βαλὼν, ἄγρας εὔσκοπον εἶχε τύχην. - οὔποτε γὰρ πλαγκτὸς γυρᾶς ἐξᾶλτο κεραίας - ἰὸς ἐπʼ ἠλεμάτῳ χειρὸς ἑκηβολίᾳ· -ὁσσάκι γὰρ τόξοιο παναγρέτις ἴαχε νευρά, - τοσσάκις ἦν ἀγρεὺς ἠέρος ἢ ξυλόχου. - ἀνθʼ ὧν σοὶ τόδε, Φοῖβε, τὸ Λύκτιον ὅπλον ἀγινεῖ, - χρυσείαις πλέξας μείλιον ἀμφιδέαις. -
-
- - -Agathias Scholasticus - - -σὸς πόσις Ἀγχίσης, τοῦ εἵνεκα πολλάκι, Κύπρι, -τὸ πρὶν ἐς Ἰδαίην ἔτρεχες ἠιόνα, - νῦν μόλις εὗρε μέλαιναν ἀπὸ κροτάφων τρίχα κόψαι, - θῆκε δὲ σοὶ προτέρης λείψανον ἡλικίης. -ἀλλά, θεά, δύνασαι γὰρ ἢ ἡβητῆρά με τεῦξον, -ἢ καὶ τὴν πολιὴν ὡς νεότητα δέχου. -
-
- - -Eratosthenes Scholasticus - - -Οἰνοπότας Ξενοφῶν κενεὸν πίθον ἄνθετο, Βάκχε -δέχνυσο δʼ εὐμενέως· ἄλλο γὰρ οὐδὲν ἔχει. -
-
- - -Eratosthenes Scholasticus - - -τὼς τρητὼς δόνακας, τὸ νάκος τόδε, τάν τε κορύναν -ἄνθεσο Πανὶ φίλῳ, Δάφνι γυναικοφίλα. -ὦ Πάν, δέχνυσο δῶρα τὰ Δάφνιδος· ἶσα γὰρ αὐτῷ - καὶ μολπὰν φιλέεις καὶ δύσερως τελέθεις. - -
-
- - -Agathias Scholasticus - - -ἄσπορα, Πὰν λοφιῆτα, τάδε Στρατόνικος ἀροτρεὺς - ἀντʼ εὐεργεσίης ἄνθετό σοι τεμένη. - -βόσκε δʼ, ἔφη, “ χαίρων τὰ σὰ ποίμνια, καὶ σέο χώρην - δέρκεο τὴν χαλκῷ μηκέτι τεμνομένην. - αἴσιον εὑρήσεις τὸ ἐπαύλιον ἐνθάδε γάρ σοι -ἠχὼ τερπομένη καὶ γάμον ἐκτελέσει.” -
-
- - -Agathias Scholasticus - - -Δαφνιακῶν βίβλων Ἀγαθία ἡ ἐννεάς εἰμι· -ἀλλὰ μʼ ὁ τεκτήνας ἄνθετο σοί, Παφίη· -οὐ γὰρ Πιερίδεσσι τόσον μέλω, ὅσσον Ἔρωτι, -ὄργια τοσσατίων ἀμφίέπουσα πόθων. -αἰτεῖ δʼ ἀντὶ πόνων, ἵνα οἱ διὰ σεῖο παρείη -ἤ τινα μὴ φιλέειν, ἢ ταχὺ πειθομένην. -
-
- - -Paulus Silentiarius - - -ἀσπίδα ταυρείην, ἔρυμα χροός, ἀντιβίων τε - πολλάκις ἐγχείην γευσαμένην χολάδων, - καὶ τὸν ἀλεξιβέλεμνον ἀπὸ στέρνοιο χιτῶνα, - καὶ κόρυν, ἱππείαις θριξὶ δασυνομένην -ἄνθετο Λυσίμαχος γέρας Ἄρεϊ, γηραλέον νῦν - ἀντὶ πανοπλίης βάκτρον ἀμειψάμενος. -
-
- - -Paulus Silentiarius - - -αὐλοὺς Πανὶ Μελίσκος· ὁ δʼ ἔννεπε μὴ γέρας αἴρειν - τούτοις· ἐκ καλάμων οἶστρον ἐπεσπασάμην, - - -
-
- - -Macedonius II - - -τὴν κιθάρην Εὔμολπος ἐπὶ τριπόδων ποτὲ Φοίβῳ -ἄνθετο, γηραλέην χεῖρʼ ἐπιμεμφόμενος, -εἶπε δέ· “μὴ ψαύσαιμι λύρης ἔτι, μηδʼ ἐθελήσω - τῆς πάρος ἁρμονίης ἐμμελέτημα φέρειν . - ἠϊθέοις μελέτω κιθάρης μίτος· ἀντὶ δὲ πλήκτρου - σκηπανίῳ τρομερὰς χεῖρας ἐρεισάμεθα.” -
-
- - -Paulus Silentiarius - - -Ζηνὶ τόδʼ ὀμφάλιον σάκεος τρύφος, ᾧ ἔπι λαιὰν - ἔσχεν ἀριστεύων, ἄνθετο Νικαγόρας· - πᾶν δὲ τὸ λοιπὸν ἄκοντες, ἰσήριθμός τε χαλάζῃ - χερμὰς καὶ ξιφέων ἐξεκόλαψε γένυς. -ἀλλὰ καὶ ἀμφίδρυπτον ἐὸν τόδε χειρὶ μεναίχμᾳ -σῴζετο Νικαγόρᾳ, σῷζε δὲ Νικαγόραν. - θεσμὸν τὸν Σπάρτας μενεφύλοπιν ἀμφὶ βοείᾳ -τῇδέ τις ἀθρήσει πάντα φυλασσόμενον. -
-
- - -Palladas - - - -τὸν θώ, καὶ τὰς κνῆ, τὰν τʼ ἀσπίδα, καὶ δόρυ,, καὶ κρᾶ, -Γορδιοπριλάριος ἄνθετο Τιμοθέῳ. -
-
- - -Eutolmius - - - -κνημῖδας, θώρηκα, σάκος;, κόρυν, ἔγχος Ἀθήνῃ - Ῥοῦφος Μεμμιάδης Γέλλιος ἐκρέμασεν. - -
-
- - -Anonymi Epigrammatici - - -ἄνθετό σοι κορύνην καὶ νεβρίδας ὑμέτερος Πάν, - εὔιε, καλλείψας σὸν χορὸν ἐκ Παφίης. -ἠχὼ γὰρ φιλέει, καὶ πλάζεται ἀλλὰ σύ, Βάκχε, - ἵλαθι τῷ ξυνὴν ἀμφιέποντι τύχην. -
-
- - -Antiphanes - - -αὐτή σοι Κυθέρεια τὸν ἱμερόεντʼ ἀπὸ μαστῶν, - Ἰνώ, λυσαμένη κεστὸν ἔδωκεν ἔχειν, -ὡς ἂν θελξινόοισιν ἀεὶ φίλτροισι δαμάζῃς - ἀνέρας· ἐχρήσω δʼ εἰς ἐμὲ πᾶσι μόνον. -
-
- - -Quintus Maecius - - -ἀκταίης νησῖδος ἁλιξάντοισι, Πρίηπε, - χοιράσι καὶ τρηχεῖ τερπόμενε σκοπέλῳ, - σοὶ Πάρις ὀστρακόδερμον ὑπʼ εὐθήροισι δαμέντα -ὁ γριπεὺς καλάμοις κάραβον ἐκρέμασεν. -σάρκα μὲν ἔμπυρον αὐτὸς ὑφʼ ἡμίβρωτον ὀδόντα -θεὶς μάκαρ, αὐτὸ δὲ σοὶ τοῦτο πόρε σκύβαλον. -τῷ σὺ δίδου μὴ πολλά, διʼ εὐάγρου δὲ λίνοιο, - δαῖμον, ὑλακτούσης νηδύος ἡσυχίην. -
-
- - -Philippus - - -ἄγκυραν ἐμβρύοικον, ἐρυσινηίδα, - κώπας τε δισσὰς τὰς ἀπωσικυμάτους, -καὶ δικτύοις μόλιβδον ἡψιδωμένον, -κύρτους τε φελλοῖς τοὺς ἐπεσφραγισμένους, -καὶ πῖλον ἀμφίκρηνον ὑδασιστεγῆ, - λίθον τε ναύταις ἑσπέρης πυρσητόκον, - ἁλὸς τύραννε, σοί, Πόσειδον, Ἀρχικλῆς - ἔθηκε, λήξας τῆς ἐπʼ ᾐόνων ἄλης. - -
-
- - -Antonius Thallus - - -ἀσπίδα μὲν Πρόμαχος, τὰ δὲ δούρατα θῆκεν Ἀκοντεύς, -τὸ ξίφος Εὐμήδης, τόξα δὲ ταῦτα Κύδων, -Ἱππομέδων τὰ χαλινά, κόρυν δʼ ἀνέθηκε Μελάντας, - κνημῖδας Νίκων, κοντὸν Ἀριστόμαχος, -τὸν θώρηκα Φιλῖνος· ἀεὶ δʼ, Ἆρες Ἆροτολοιγέ, - σκῦλα φέρειν δῴης πᾶσιν ἀπʼ ἀντιπάλων. -
-
- - -Philippus - - -αὐλὸν καμινευτῆρα τὸν φιλήνεμον, - ῥίνην τε κνησίχρυσον ὀξυδήκτορα, -καὶ τὸν δίχηλον καρκίνον πυραγρέτην, - πτωκὸς πόδας τε τούσδε λειψανηλόγους, -ὁ χρυσοτέκτων Δημοφῶν Κυλληνίῳ - ἔθηκε, γήρᾳ κανθὸν ἐζοφωμένος. -
-
- - -Antipater - - -Ἁρπαλίων ὁ πρέσβυς, ὁ πᾶς ῥυτίς, οὑπιλινευτής, - τόνδε παῤʼ Ἡρακλεῖ θῆκέ με τὸν σιβύνην, -ἐκ πολλοῦ πλειῶνος ἐπεὶ βάρος οὐκέτι χεῖρες - ἔσθενον, εἰς κεφαλὴν δʼ ἤλυθε λευκοτέρην. -
-
- - -Philippus - - -Ἀραξόχειρα ταῦτά σοι τὰ τύμπανα, - καὶ κύμβαλʼ ὀξύδουπα κοιλοχείλεα, - διδύμους τε λωτοὺς κεροβόας, ἐφʼ οἷς ποτε - ἐπωλόλυξεν αὐχένα στροβιλίσας, -λυσιφλεβῆ τε σάγαριν ἀμφιθηγέα, - λεοντόδιφρε, σοί, Ῥέη, Κλυτοσθένης - ἔθηκε, λυσσητῆρα γηράσας πόδα. - -
-
- - -Antiphilus - - -Βουστρόφον, ἀκροσίδαρον, ἀπειλητῆρα μύωπα - καὶ πήραν μέτρον σιτοδόκον σπορίμου, -γαμψόν τε δρέπανον σταχυητόμον, ὅπλον ἀρούρης, - καὶ παλινουροφόρον, χεῖρα θέρευς τρίνακα, -καὶ τρητοὺς ποδεῶνας ὁ γατόμος ἄνθετο Δηοῖ - Πάρμις, ἀνιηρῶν παυσάμενος καμάτων. -
-
- - -Erycius - - -Γλαύκων καὶ Κορύδων, οἱ ἐν οὔρεσι βουκολέοντες, - Ἀρκάδες ἀμφότεροι, τὸν κεραὸν δαμάλην - Πανὶ φιλωρείτᾳ Κυλληνίῳ αὐερύσαντες - ἔρρεξαν, καὶ οἱ δωδεκάδωρα κέρα -ἅλῳ μακροτένοντι ποτὶ πλατάνιστον ἔπαξαν -εὐρεῖαν, νομίῳ καλὸν ἄγαλμα θεῷ. -
-
- - -Antiphilus - - -Δοῦρας Ἀλεξάνδροιο· λέγει δέ σε γράμματʼ ἐκεῖνον -ἐκ πολέμου θέσθαι σύμβολον Ἀρτέμιδι - ὅπλον ἀνικήτοιο βραχίονος. ἆ καλὸν ἔγχος, -ᾧ πόντος καὶ χθὼν εἶκε κραδαινομένῳ. -ἵλαθι, δοῦρας ἀταρβές· ἀεὶ δέ σε πᾶς τις ἀθρήσας - ταρβήσει, μεγάλης μνησάμενος παλάμης. -
-
- - -Diodorus Zonas - - -Δηοῖ λικμαίῃ καὶ ἐναυλακοφοίτισιν Ὥραις - Ἡρῶναξ πενιχρῆς ἐξ ὀλιγηροσίης - μοῖραν ἀλωΐτα στάχυος, πάνσπερμά τε ταῦτα -ὄσπριʼ ἐπὶ πλακίνου τοῦδʼ ἔθετο τρίποδος, -ἐκ μικρῶν ὀλίγιστα· πέπατο γὰρ οὐ μέγα τοῦτο -κληρίον ἐν λυπρῇ τῇδε γεωλοφίῃ. - -
-
- - -Philippus - - -κόψας ἐκ φηγοῦ σε τὸν αὐτόφλοιον ἔθηκεν - Πᾶνα Φιλοξενίδης, ὁ κλυτὸς αἰγελάτης, - θύσας αἰγιβάτην πολιὸν τράγον, ἔν τε γάλακτι - πρωτογόνῳ βωμοὺς τοὺς ἱεροὺς μεθύσας. -ἀνθʼ ὧν ἐν σηκοῖς διδυμητόκοι αἶγες ἔσονται - γαστέρα, φεύγουσαι τρηχὺν ὀδόντα λύκου, -
-
- - -Crinagoras - - -λαμπάδα, τὴν κούροις ἱερὴν ἔριν, ὠκὺς ἐνέγκας, - οἷα Προμηθείης μνῆμα πυροκλοπίης, - νίκης κλεινὸν ἄεθλον, ἔτʼ ἐκ χερὸς ἔμπυρον Ἑρμῇ -θῆκεν † ὁμωνυμίῃ παῖς πατρὸς Ἀντιφάνης. -
-
- - -Philippus - - -ξίφη τὰ πολλῶν κνωδάλων λαιμητόμα - πυριτρόφους τε ῥιπίδας πορηνέμους, -ἠθμόν τε πουλύτρητον, ἠδὲ τετράπουν - πυρὸς γέφυραν, ἐσχάρην κρεηδόκον, -ζωμήρυσίν τε τὴν λίπους ἀφρηλόγον, - ὁμοῦ κρεάγρῃ τῇ σιδηροδακτύλῳ, - βραδυσκελὴς Ἥφαιστε, σοὶ Τιμασίων - ἔθηκεν, ἀκμῆς γυῖον ὠρφανωμένος. -
-
- - -Philippus - - -Ῥοιὴν ξανθοχίτωνα, γεραιόφλοιά τε σῦκα, - καὶ ῥοδέας σταφυλῆς ὠμὸν ἀποσπάδιον, -μῆλὸν θʼ ἡδύπνουν λεπτῇ πεποκωμένον ἄχνῃ, - καὶ κάρυον χλωρῶν ἐκφανὲς ἐκ λεπίδων, - -καὶ σίκυον χνοάοντα, τὸν ἐν φύλλοις πεδοκοίτην, - καὶ πέρκην ἤδη χρυσοχίτωνʼ ἐλάην, - σοί, φιλοδῖτα Πρίηπε, φυτοσκάφος ἄνθετο Λάμων, - δένδρεσι καὶ γυίοις εὐξάμενος θαλέθειν, -
-
- - -Philippus - - -στάθμην ἰθυτενῆ μολιβαχθέα, δουριτυπῆ - σφῦραν, καὶ γυρὰς ἀμφιδέτους ἀρίδας, - καὶ στιβαρὸν πέλεκυν στελεχητόμον, ἰθύδρομόν τε - πρίονα, μιλτείῳ στάγματι πειθόμενον, -τρύπανά θʼ ἑλκεσίχειρα, τέρετρά τε, μιλτοφυρῆ ρε - σχοῖνον, ὑπʼ ἀκρονύχῳ ψαλλομένην κανόνι, . - σοί, κούρη γλαυκῶπι, Λεόντιχος ὤπασε δῶρον, - ἄνθος ἐπεὶ γυίων πᾶν ἀπέδυσε χρόνος. -
-
- - -Philippus - - -Σπερμοφόρον πήρην ὠμαχθέα, κὠλεσίβωλον - σφῦραν, καὶ γαμψὰς πυρολόγους δρεπάνας, - καὶ τριβόλους ὀξεῖς ἀχυρότριβας, ἱστοβόην τε -σὺν γυροῖς ἀρότροις, καὶ φιλόγαιον ὕνιν, -κέντρα τʼ ὀπισθονυγῆ, καὶ βουστρόφα δεσμὰ τενόντων, -καὶ τρίνακας ξυλίνας, χεῖρας ἀρουροπονων, -γυῖʼ ἅτε πηρωθεὶς Λυσίξενος αὔλακι πολλῇ - ἐκρέμασεν Δηοῖ τῇ σταχυοστεφάνῳ. - -
-
- - -Apollonides - - -Τρῖγλαν ἀπʼ ἀνθρακιῆς καὶ φυκίδα σοί, λιμενῖτι -Ἄρτεμι, δωρεῦμαι Μῆνις ὁ δικτυβόλος, - καὶ ζωρόν, κεράσας ἰσοχειλέα, καὶ τρύφος ἄρτου, -αὖον ἐπιθραύσας, τὴν πενιχρὴν θυσίην -ἀνθʼ ἧς μοι πλησθέντα δίδου θηράμασιν αἰὲν - δίκτυα· σοὶ δέδοται πάντα, μάκαιρα, λίνα. -
-
- - -Diodorus Zonas - - -τοῦτό σοί, ὑληκοῖτα, κατʼ ἀγριάδος πλατάνοιο - δέρμα λυκορραίστης ἐκρέμασεν Τελέσων, - καὶ τὰν ἐκ κοτίνοιο καλαύροπα, τάν ποκα τῆνος - πολλάκι ῥομβητὰν ἐκ χερὸς ἠκροβόλει. -ἀλλὰ τύ, Πὰν βουνῖτα, τὰ μὴ πολύολβά τε δέξαι - δῶρα, καὶ εὐαγρεῖ τῷδε πέτασσον ὄρος. -
-
- - -Philippus - - -Ὑλησκόπῳ με Πανὶ θηρευτὴς Γέλων - ἔθηκε λόγχην, ἧς ἀπέθρισε χρόνος - ἀκμὴν ἐν ἔργῳ, καὶ λίνων πολυστρόφων - γεραιὰ τρύχη, καὶ πάγας δεραγχέας, -νευροπλεκεῖς τε κνωδάλων ἐπισφύρους - ὠκεῖς ποδίστρας, καὶ τραχηλοδεσπότας - κλοιοὺς κυνούχους· γυῖα γὰρ δαμεὶς χρόνῳ - ἀπεῖπεν ἤδη τὴν ὀρεινόμον πλάνην. -
-
- - -Myrinus - - -ὑψηλῶν ὀρέων ἔφοροι, κεραοὶ χοροπαῖκται, -Πᾶνες, βουχίλου κράντορες Ἀρκαδίης, -εὔαρνον θείητε καὶ εὐχίμαρον Διότιμον, - δεξάμενοι λαμπρῆς δῶρα θυηπολίης, - -
-
- - -Antipater - - -γηραλέον νεφέλας τρῦχος τόδε, καὶ τριέλικτον - ἰχνοπέδαν, καὶ τὰς νευροτενεῖς παγίδας, -κλωβοὺς τʼ ἀμφιρρῶγας, ἀνασπαστούς τε δεράγχας, - καὶ πυρὶ θηγαλέους ὀξυπαγεῖς στάλικας, -καὶ τὰν εὔκολλον δρυὸς ἰκμάδα, τόν τε πετηνῶν - ἀγρευτὰν ἰξῷ μυδαλέον δόνακα, - καὶ κρυφίου τρίκλωστον ἐπισπαστῆρα βόλοιο, - ἄρκυν τε κλαγερῶν λαιμοπέδαν γεράνων, - σοί, Πὰν ὦ σκοπιῆτα, γέρας θέτο παῖς Νεολᾴδα -Κραῦγις ὁ θηρευτάς, Ἀρκὰς ἀπʼ Ὀρχομενοῦ. -
-
- - -Mnasalces - -Some attribute this to Leonidas. - -τὰν ἔλαφον Κλεόλαος ὑπὸ κναμοῖσι λοχήσας, - ἔκτανε Μαιάνδρου πὰρ τριέλικτον ὕδωρ, - θηκτῷ σαυρωτῆρι· τὰ δʼ ὀκτάρριζα μετώπων - φράγμαθʼ ὑπὲρ ταναὰν ἇλος ἔπαξε πίτυν. -
-
- - -Antipater - - -τὰν ἔλαφον, Λάδωνα καὶ ἀμφʼ Ἐρυμάνθιον ὕδωρ -νῶτά τε θηρονόμου φερβομέναν Φολόας, - παῖς ὁ Θεαρίδεω Λασιώνιος εἷλε Λυκόρμας - πλήξας ῥομβητῷ δούρατος οὐριάχῳ· -δέρμα δὲ καὶ δικέραιον ἀπὸ στόρθυγγα μετώπων - σπασσάμενος, κούρᾳ θῆκε παῤʼ ἀγρότιδι. -
-
- - -Perses - - -τρεῖς ἄφατοι κεράεσσιν ὑπʼ αἰθούσαις τοι, Ἄπολλον - ἄγκεινται κεφαλαὶ Μαιναλίων ἐλάφων, -ἃς ἕλον ἐξ ἵππων Γύγεω χέρε Δαΐλοχός τε -καὶ Προμένης, ἀγαθοῦ τέκνα Λεοντιάδου, - -
-
- - -Simias - - -πρόσθε μὲν ἀγραύλοιο δασύτριχος ἰξάλου αἰγὸς - δοιὸν ὅπλον χλωροῖς ἐστεφόμαν πετάλοις· - νῦν δέ με Νικομάχῳ κεραοξόος ἥρμοσε τέκτων, - ἐντανύσας ἕλικος καρτερὰ νεῦρα βοός. -
-
- - -Simias - - -δέρμα καὶ ὀργυιαῖα κέρα βοὸς ἐκ βασιλῆος - Ἀμφιτρυωνιάδᾳ κείμεθʼ ἀνὰ πρόπυλον, -τεσσαρακαιδεκάδωρα, τὸν αὐχήεντα Φιλίππῳ - ἀντόμενον κατὰ γᾶς ἤλασε δεινὸς ἄκων, -βούβοτον Ὀρβηλοῖο παρὰ σφυρόν. ἆ πολύολβος -Ἠμαθίς, ἃ τοίῳ κραίνεται ἁγεμόνι. -
-
- - -Antipater - - -τὸν πάρος Ὀρβηλοῖο μεμυκότα δειράσι ταῦρον, - τὸν πρὶν ἐρημωτὰν θῆρα Μακηδονίας, - Δαρδανέων ὀλετήρ, ὁ κεραύνιος εἷλε Φίλιππος, - πλήξας αἰγανέᾳ βρέγμα κυναγέτιδι· -καὶ τάδε σοὶ βριαρᾶς, Ἡράκλεες, οὐ δίχα βύρσας - θῆκεν, ἀμαιμακέτου κρατὸς ἔρεισμα, κέρα. - σᾶς τοι ὅδʼ ἐκ ῥίζας ἀναδέδρομεν οὒ οἱ ἀεικὲς - πατρῴου ζαλοῦν ἔργα βοοκτασίας. - -
-
- - -Samus - - -σοὶ γέρας, Ἀλκείδα Μινυαμάχε, τοῦτο Φίλιππος - δέρμα ταναιμύκου λευρὸν ἔθηκε βοὸς -αὐτοῖς σὺν κεράεσσι, τὸν ὕβρεϊ κυδιόωντα - ἔσβεσεν Ὀρβηλοῦ τρηχὺν ὑπὸ πρόποδα. -ὁ φθόνος αὐαίνοιτο τεὸν δʼ ἔτι κῦδος ἀέξει - ῥίζα Βεροιαίου κράντορος Ἠμαθίας. -
-
- - -Pancrates - - -ἐκ πυρὸς ὁ ῥαιστήρ, καὶ ὁ καρκίνος, ἥ τε πυράγρη - ἄγκεινθʼ Ἡφαίστῳ, δῶρα Πολυκράτεος, -ᾧ πυκνὸν κροτέων ὑπὲρ ἄκμονος εὕρετο παισὶν -ὄλβον, ὀϊζυρὴν ὠσάμενος πενίην. -
-
- - -Antipater - - -ἁ φόρμιγξ, τά τε τόξα, καὶ ἀγκύλα δίκτυα Φοίβῳ - Σώσιδος, ἔκ τε Φίλας, ἔκ τε Πολυκράτεος. -χὠ μὲν ὀϊστευτὴρ κεραὸν βιόν, ἁ δὲ λυρῳδὸς - τὰν χέλυν, ὡγρευτὴς ὤπασε πλεκτὰ λίνα· -ἀλλʼ ὁ μὲν ὠκυβόλων ἰῶν κράτος, ἁ δὲ φέροιτο -ἄκρα λύρας, ὁ δʼ ἔχοι πρῶτα κυναγεσίας. -
-
- - -Moero - - -κεῖσαι δὴ χρυσέαν ὑπὸ παστάδα τὰν Ἀφροδίτας, - βότρυ, Διωνύσου πληθόμενος σταγόνι· -οὐδʼ ἔτι τοι μάτηρ ἐρατὸν περὶ κλῆμα βαλοῦσα - φύσει ὑπὲρ κρατὸς νεκτάρεον πέταλον· - -
-
- - -Leonidas - - -οὐ μόνον ὑψηλοῖς ἐπὶ δένδρεσιν οἶδα καθίζων - ἀείδειν, ζαθερεῖ καύματι θαλπόμενος, - προίκιος ἀνθρώποισι κελευθίτῃσιν ἀοιδός, - θηλείης ἔρσης ἰκμάδα γευόμενος· -ἀλλὰ καὶ εὐπήληκος Ἀθηναίης ἐπὶ δουρὶ - τὸν τέττιγʼ ὄψει μʼ, ὦνερ, ἐφεζόμενον. -ὅσσον γὰρ Μούσαις ἐστέργμεθα, τόσσον Ἀθήνη -ἐξ ἡμέων ἡ γὰρ παρθένος αὐλοθέτει. -
-
- - -Callimachus - - -Κυνθιάδες, θαρσεῖτε· τὰ γὰρ τοῦ Κρητὸς Ἐχέμμα - κεῖται ἐν Ὀρτυγίῃ τόξα παρʼ Ἀρτέμιδι, - οἷς ὑμέων ἐκένωσεν ὄρος μέγα. νῦν δὲ πέπαυται, -αἶγες, ἐπεὶ σπονδὰς ἡ θεὸς εἰργάσατο. -
-
- - -Nicias - - -μαινὰς Ἐνυαλίου, πολεμαδόκε, θοῦρι κράνεια, -τίς νύ σε θῆκε θεᾷ δῶρον ἐγερσιμάχᾳ; - “ μήνιος· ἦ γὰρ τοῦ παλάμας ἄπο ῥίμφα θοροῦσα -ἐν προμάχοις Ὀδρύσας δήιον ἀμπεδίον.” -
-
- - -Anyte - - -ἕσταθι τεῖδε, κράνεια βροτοκτόνε, μηδʼ ἔτι λυγρὸν - χάλκεον ἀμφʼ ὄνυχα στάζε φόνον δαΐων - ἀλλʼ ἀνὰ μαρμάρεον δόμον ἡμένα αἰπὺν Ἀθάνας, - ἄγγελλʼ ἀνορέαν Κρητὸς Ἐχεκρατίδα. - -
-
- - -Hegesippus - - -ἀσπὶς ἀπὸ βροτέων ὤμων Τιμάνορος ἇμμαι - ναῷ ὑπορροφία Παλλάδος ἀλκιμάχας, - πολλὰ σιδαρείου κεκονιμένα ἐκ πολέμοιο, -τόν με φέροντʼ αἰεὶ ῥυομένα θανάτου. -
-
- - -Mnasalces - - -ἤδη τῇδε μένω πολέμου δίχα, καλὸν ἄνακτος - στέρνον ἐμῷ νώτῳ πολλάκι ῥυσαμένα. - καίπερ τηλεβόλους ἰοὺς καὶ χερμάδιʼ αἰνὰ - μυρία καὶ δολιχὰς δεξαμένα κάμακας, -οὐδέποτε Κλείτοιο λιπεῖν περιμάκεα πᾶχυν - φαμὶ κατὰ, βλοσυρὸν φλοῖσβον Ἐνυαλίου. -
-
- - -Dioscorides - - -σᾶμα τόδʼ οὐχὶ μάταιον ἐπʼ ἀσπίδι παῖς ὁ Πολύττου -Ὕλλος ἀπὸ Κρήτας θοῦρος ἀνὴρ ἔθετο, - Γοργόνα τὰν λιθοεργὸν ὁμοῦ καὶ τριπλόα γοῦνα - γραψάμενος· δῄοις τοῦτο δʼ ἔοικε λέγειν - “ ἀσπίδος ὦ κατʼ ἐμᾶς πάλλων δόρυ, μὴ κατίδῃς με, -καὶ φεῦγε τρισσοῖς τὸν ταχὺν ἄνδρα ποσίν.” -
-
- - -Nicias - - -μέλλον ἄρα στυγερὰν κἀγώ ποτε δῆριν Ἄρηος -ἐκπρολιπγοῦσα χορῶν παρθενίων ἀΐειν -Ἀρτέμιδος περὶ ναόν, Ἐπίξενος ἔνθα μʼ ἔθηκεν, - λευκὸν ἐπεὶ κείνου γῆρας ἔτειρε μέλη. - -
-
- - -Mnasalces - - -ἧσο κατʼ ἠγάθεον τόδʼ ἀνάκτορον, ἀσπὶ φαεννά, - ἄνθεμα Λατῴᾳ δήιον Ἀρτέμιδι. -πολλάκι γὰρ κατὰ δῆριν Ἀλεξάνδρου μετὰ χερσὶν - μαρναμένα χρυσέαν εὖ κεκόνισαι ἴτυν. -
-
- - -Leonidas - - -ὀκτώ τοι θυρεούς, ὀκτὼ κράνη, ὀκτὼ ὑφαντοὺς - θώρηκας, τόσσας θʼ αἱμαλέας κοπίδας, - ταῦτʼ ἀπὸ Λευκανῶν Κορυφασίᾳ ἔντεʼ Ἀθάνᾳ - Ἅγνων Εὐάνθευς θῆχʼ ὁ βιαιομάχας. -
-
- - -Leonidas - - -τοὺς θυρεοὺς ὁ Μολοσσὸς Ἰτωνίδι δῶρον Ἀθάνᾳ - Πύρρος ἀπὸ θρασέων ἐκρέμασεν Γαλατᾶν, - πάντα τὸν Ἀντιγόνου καθελὼν στρατὸν οὐ μέγα θαῦμα· -αἰχμηταὶ καὶ νῦν καὶ πάρος Αἰακίδαι. -
-
- - -Leonidas - - -αἵδʼ ἀπὸ Λευκανῶν θυρεάσπιδες, οἱ δὲ χαλινοὶ -στοιχηδόν, ξεσταὶ τʼ ἀμφίβολοι κάμακες - δέδμηνται, ποθέουσαι ὁμῶς ἵππους τε καὶ ἄνδρας, - Παλλάδι· τοὺς δʼ ὁ μέλας ἀμφέχανεν θάνατος. -
-
- - -Nossis - - -ἔντεα Βρέττιοι ἄνδρες ἀπʼ αἰνομόρων βάλον ὤμων, - θεινόμενοι Λοκρῶν χερσὶν ὕπʼ ὠκυμάχων, - -ὧν ἀρετὰν ὑμνεῦντα θεῶν ὑπʼ ἀνάκτορα κεῖνται, -οὐδὲ ποθεῦντι κακῶν πάχεας, οὓς ἔλιπον. -
-
- - -Archilochus - - -Ἀλκιβίη πλοκάμων ἱερὴν ἀνέθηκε καλύπτρην -Ἥρῃ, κουριδίων εὖτʼ ἐκύρησε γάμων. -
-
- - -Anacreon - - -ἡ τὸν θύρσον ἔχους1ʼ Ἑλικωνιάς, ἥ τε παρʼ αὐτὴν -Ξανθίππη, Γλαύκη τʼ, εἰς χορὸν ἐρχόμεναι, -ἐξ ὄρεος χωρεῦσι, Διωνύσῳ δὲ φέρουσι - κισσὸν καὶ σταφυλήν, πίονα καὶ χίμαρον. -
-
- - -Anacreon - - -οὗτος Φειδόλα ἵππος ἀπʼ εὐρυχόροιο Κορίνθου -ἄγκειται Κρονίδᾳ, μνᾶμα ποδῶν ἀρετᾶς. -
-
- - -Anacreon - - -Πρηξιδίκη μὲν ἔρεξεν, ἐβούλευσεν δὲ Δύσηρις - εἷμα τόδε· ξυνὴ δʼ ἀμφοτέρων σοφίη. -
-
- - -Anacreon - - -πρόφρων, Ἀργυρότοξε, δίδου χάριν Αἰσχύλου υἱῷ - Ναυκράτει, εὐχωλὰς τάσδʼ ὑποδεξάμενος. -
-
- - -Anacreon - - -πρὶν μὲν Καλλιτέλης μʼ ἱδρύσατο· τόνδε δʼ ἐκείνου - ἔκγονοι ἐστάσανθʼ, οἷς χάριν ἀντιδίδου. - -
-
- - -Anacreon - - -Πραξαγόρας τάδε δῶρα θεοῖς ἀνέθηκε, Λυκαίου - υἱός· ἐποίησεν δʼ ἔργον Ἀναξαγόρας. -
-
- - -Anacreon - - -παιδὶ φιλοστεφάνῳ Σεμέλας [μʼ] ἀνέθηκε Μέλανθος - μνᾶμα χοροῦ νίκας, υἱὸς Ἀρηιφίλου. -
-
- - -Anacreon - - -Ῥυσαμένα Πύθωνα δυσαχέος ἐκ πολέμοιο, - ἀσπὶς Ἀθηναίης ἐν τεμένει κρέμαται, -
-
- - -Anacreon - - -σάν τε χάριν, Διόνυσε, καὶ ἀγλαὸν ἄστεϊ κόσμον - Θεσσαλίας μʼ ἀνέθηκʼ ἀρχὸς Ἐχεκρατίδας. -
-
- - -Anacreon - - -εὔχεο Τιμώνακτι θεῶν κήρυκα γενέσθαι - ἤπιον, ὃς μʼ ἐρατοῖς ἀγλαΐην προθύροις -Ἑρμῇ τε κρείοντι καθέσσατο τὸν δʼ ἐθέλοντα -ἀστῶν καὶ ξείνων γυμνασίῳ δέχομαι, -
-
- - -Anacreon - - -Στροίβου παῖ, τόδʼ ἄγαλμα, Λεώκρατες, εὖτʼ ἀνέθηκας - Ἑρμῇ, καλλικόμους οὐκ ἔλαθες Χάριτας, -οὐδʼ Ἀκαδημίαν πολυγαθέα, τῆς ἐν ἀγοστῷ - σὴν εὐεργεσίην τῷ προσιόντι λέγω, - -
-
- - -Anacreon - - -βωμοὺς τούσδε θεοῖς Σοφοκλῆς ἱδρύσατο πρῶτος, -ὃς πλεῖστον Μούσης εἷλε κλέος τραγικῆς. -
-
- - -Callimachus - - -καὶ πάλιν, Εἰλείθυια, Λυκαινίδος ἐλθὲ καλεύσης, - εὔλοχος, ὠδίνων ὧδε σὺν εὐκολίῃ· -ἧς τόδε νῦν μέν, ἄνασσα, κόρης ὕπερ· ἀντὶ δὲ παιδὸς -ὕστερον εὐώδης ἄλλο τι νηὸς ἔχοι. -
-
- - -Callimachus - - -τὸ χρέος ὡς ἀπέχεις, Ἀσκληπιέ, τὸ πρὸ γυναικὸς - Δημοδίκης Ἀκέσων ὤφελεν εὐξάμενος, -γιγνώσκεις· ἢν δʼ ἆρα λάθῃ καὶ † μιν ἀπαιτῇς, - φησὶ παρέξεσθαι μαρτυρίην ὁ πίναξ. -
-
- - -Callimachus - - -τῷ με Κανωπίτᾳ Καλλίστιον εἴκοσι μύξαις - πλούσιον, ἁ Κριτίου, λύχνον ἔθηκε θεῷ, -εὐξαμένα περὶ παιδὸς Ἀπελλίδος· ἐς δʼ ἐμὰ φέγγη -ἀθρήσας φήσεις· Ἕσπερε, πῶς ἔπεσες. - -
-
- - -Callimachus - - -φησὶν ὅ με στήσας Εὐαίνετος οὐ γὰρ ἔγωγε -γιγνώσκὠ νίκης ἀντί με τῆς ἰδίης - ἀγκεῖσθαι χάλκειον ἀλέκτορα Τυνδαρίδῃσι· -πιστεύω Φαίδρου παιδὶ Φιλοξενίδεω, - -
-
- - -Callimachus - - -Ἰναχίης ἕστηκεν ἐν Ἴσιδος ἡ Θάλεω παῖς -Αἰσχυλίς, Εἰρήνης μητρὸς ὑποσχεσίῃ. -
-
- - -Tymnes - - -Μίκκος ὁ Πελλαναῖος Ἐνυαλίου βαρὺν αὐλὸν - τόνδʼ ἐς Ἀθαναίας ἐκρέμας1ʼ Ἰλιάδος, -Τυρσηνὸν μελέδαμα, διʼ οὗ ποκα πόλλʼ ἐβόασεν -ὡνὴρ εἰράνας σύμβολα καὶ πολέμου. -
-
- - -Agis - - -καὶ στάλικας καὶ πτηνὰ λαγωβόλα σοὶ τάδε Μείδων, - Φοῖβε, σὺν ἰξευταῖς ἐκρέμασεν καλάμοις, -ἔργων ἐξ ὀλίγων ὀλίγην δόσιν ἢν δέ τι μεῖζον -δωρήσῃ, τίσει τῶνδε πολυπλάσια. -
-
- - -Anyte - - -Βουχανδὴς ὁ λέβης· ὁ δὲ θεὶς -Ἐριασπίδα υἱὸς - Κλεύβοτος· ἁ πάτρα δʼ εὐρύχορος Τεγέα· -τάθάνᾳ δὲ τὸ δῶρον· Ἀριστοτέλης δʼ ἐπόησεν - Κλειτόριος, γενέτᾳ ταὐτὸ λαχὼν ὄνομα. -
-
- - -Leonidas - - -Ἀγρονόμῳ τάδε Πανὶ καὶ εὐαστῆρι Λυαίῳ -πρέσβυς καὶ Νύμφαις Ἀρκὰς ἔθηκε Βίτων -Πανὶ μὲν ἀρτίτοκον χίμαρον συμπαίστορα ματρός, -κισσοῦ δὲ Βρομίῳ κλῶνα πολυπλανέος· - -νύμφαις δὲ σκιερῆς εὐποίκιλον ἄνθος ὀπώρης, - φύλλα τε πεπταμένων αἱματόεντα ῥόδων. - ἀνθʼ ὧν εὔυδρον, Νύμφαι, τόδε δῶμα γέροντος - αὔξετε, Πὰν γλαγερόν, Βάκχε πολυστάφυλον -
-
- - -Theodoridas - - -ἅλικες αἵ τε κόμαι καὶ ὁ Κρωβύλος, ἃς ἀπὸ Φοίβῳ -πέξατο μολπαστᾷ κῶρος ὁ τετραετής· - αἰχμητὰν δʼ ἐπέθυσεν ἀλέκτορα, καὶ πλακόεντα - παῖς Ἡγησιδίκου πίονα τυροφόρον. -Ὤπολλον, θείης τὸν Κρωβύλον εἰς τέλος ἄνδρα, -οἴκου καὶ κτεάνων χεῖρας ὕπερθεν ἔχων. -
-
- - -Theodoridas - - -καλῷ σὺν τέττιγι Χαρίξεινος τρίχα τήνδε -κουρόσυνον κούραις θῆκʼ Ἀμαρυνθιάσι - σὺν βοῒ χερνιφθέντα· πάις δʼ ἴσον ἀστέρι λάμπει, - πωλικὸν ὡς ἵππος χνοῦν ἀποσεισάμενος. -
-
- - -Theodoridas - - -Ἄρτεμις, ἡ Γόργοιο φύλαξ κτεάνων τε καὶ ἀγροῦ, - τόξῳ μὲν κλῶπας βάλλε, σάου δὲ φίλους· -καί σοι ἐπιρρέξει Γόργος χιμάροιο νομαίης -αἷμα καὶ ὡραίους ἄρνας ἐπὶ προθύροις. -
-
- - -Tullius Sabinus - - -Πανὶ Βίτων χίμαρον, Νύμφαις ῥόδα, θύρσα Λυαίῳ, - τρισσὸν ὑπʼ εὐπετάλοις δῶρον ἔθηκε φόβαις - -δαίμονες ἀλλὰ δέχοισθε κεχαρμένοι, αὔξετε δʼ αἰεὶ - Πὰν ἀγέλην, Νύμφαι πίδακα, Βάκχε γάνος. -
-
- - -Antipater - - -ἁ πάρος αἱματόεν πολέμου μέλος ἐν δαῒ σάλπιγξ -καὶ γλυκὺν εἰράνας ἐκπροχέουσα νόμον, - ἄγκειμαι, Φερένικε, τεὸν Τριτωνίδι κούρᾳ -δῶρον, ἐριβρύχων παυσαμένα κελάδων. -
-
- - -Antipater - - -κερκίδα τὰν ὀρθρινά, χελιδονίδων ἅμα φωνᾷ, - μελπομέναν, ἱστῶν Παλλάδος ἀλκυόνα, -τόν τε καρηβαρέοντα πολυρροίβδητον ἄτρακτον, -κλωστῆρα στρεπτᾶς εὔδρομον ἁρπεδόνας, -καὶ πήνας, καὶ τόνδε φιληλάκατον καλαθίσκον, - στάμονος ἀσκητοῦ καὶ τολύπας φύλακα, - παῖς ἀγαθοῦ Τελέσιλλα Διοκλέος ἁ φιλοεργὸς - εἰροκόμων Κούρᾳ θήκατο δεσπότιδι. -
-
- - -Crinagoras - - -ἑσπερίου Μάρκελλος ἀνερχόμενος πολέμοιο -σκυλοφόρος κραναῆς τέλσα παρʼ Ἰταλίης, - ξανθὴν πρῶτον ἔκειρε γενειάδα· βούλετο πατρὶς -οὕτως, καὶ πέμψαι παῖδα καὶ ἄνδρα λαβεῖν. - -
-
- - -Meleager - - -ἄνθεμά σοι Μελέαγρος ἑὸν συμπαίστορα λύχνον, - Κύπρι φίλη, μύστην σῶν θέτο παννυχίδων. -
-
- - -Meleager - - -τίς τάδε μοι θνητῶν τὰ περὶ θριγκοῖσιν ἀνῆψε - σκῦλα, παναισχίστην τέρψιν Ἐνυαλίου ; - οὔτε γὰρ αἰγανέαι περιαγέες, οὔτε τι πήληξ - ἄλλοφος, οὔτε φόνῳ χρανθὲν ἄρηρε σάκος· -ἀλλʼ αὔτως γανόωντα καὶ ἀστυφέλικτα σιδάρῳ -οἷά περ οὐκ ἐνοπᾶς, ἀλλὰ χορῶν ἔναρα· - οἷς θάλαμον κοσμεῖτε γαμήλιον ὅπλα δὲ λύθρῳ - λειβόμενα βροτέῳ σηκὸς Ἄρηος ἔχοι. -
-
- - -Lucillius - - -Γλαύκῳ καὶ Νηρῆι καὶ Ἰνώῳ Μελικέρτῃ, - καὶ βυθίῳ Κρονίδῃ, καὶ Σαμόθρᾳξι θεοῖς, - σωθεὶς ἐκ πελάγους Λουκίλλιος ὧδε κέκαρμαι - τὰς τρίχας ἐκ κεφαλῆς· ἄλλο γὰρ οὐδὲν ἔχω. -
-
- - -Phalaecus - - -στρεπτὸν Βασσαρικοῦ ῥόμβον θιάσοιο μύωπα, - καὶ σκύλος ἀμφιδόρου στικτὸν ἀχαιίνεω, - καὶ κορυβαντείων ἰαχήματα χάλκεα ῥόπτρων, - καὶ θύρσου χλοερὸν κωνοφόρου κάμακα, -καὶ κούφοιο βαρὺν τυπάνου βρόμον, ἠδὲ φορηθὲν -πολλάκι μιτροδέτου λῖκνον ὕπερθε κόμης, -Εὐάνθη Βάκχῳ, τὴν ἔντρομον ἁνίκα θύρσοις -ἄτρομον εἰς προπόσεις χεῖρα μετημφίασεν. - -
-
- - -Lucillius - - -εἰκόνα τῆς κήλης Διονύσιος ὧδʼ ἀνέθηκεν, - σωθεὶς ἐκ ναυτῶν τεσσαράκοντα μόνος· - τοῖς μηροῖς αὐτὴν γὰρ ὑπερδήσας ἐκολύμβα. -ἔστʼ οὖν καὶ κήλης ἔν τισιν εὐτυχίη. -
-
- - -Agathias Scholasticus - - -σοί, μάκαρ αἰγίκναμε, παράκτιον ἐς περιωπὰν -τὸν τράγον ὦ δισσᾶς ἀγέτα θηροσύνας — - σοὶ γὰρ καστορίδων ὑλακὰ καὶ τρίστομος αἰχμὴ - εὔαδε, καὶ ταχινῆς ἔργα λαγωσφαγίης, -δίκτυὰ τʼ ἐν ῥοθίοις ἁπλούμενα, καὶ καλαμευτὰς - κάμνων, καὶ μογερῶν πεῖσμα σαγηνοβόλων — - ἄνθετο δὲ Κλεόνικος, ἐπεὶ καὶ πόντιον ἄγραν - ἄνυε, καὶ πτῶκας πολλάκις ἐξεσόβει. -
-
- - -Paulus Silentiarius - - -Βοτρυΐων ἀκάμαντα φυτῶν λωβήτορα κάπρον, - τὸν θρασὺν ὑψικόμων ἐνναέταν δονάκων, - πολλάκις ἐξερύσαντα θοῶν ἀκμαῖσιν ὀδόντων - δένδρεα, καὶ νομίους τρεψάμενον σκύλακας, -ἀντήσας ποταμοῖο πέλας, πεφρικότα χαίτας, - ἄρτι καὶ ἐξ ὕλας πάγχυ λιπόντα βάθος, - χαλκῷ Ξεινόφιλος κατενήρατο, καὶ παρὰ φηγῷ - θηρὸς ἀθωπεύτου Πανὶ καθῆψε δέρας, -
-
- - -Anonymi Epigrammatici - - -Κώμαυλος τὸν ἐχῖνον ἰδὼν ἐπὶ νῶτα φέροντα - ῥᾶγας, ἀπέκτεινεν τῷδʼ ἐπὶ θειλοπέδῳ· -αὐήνας δʼ ἀνέθηκε φιλακρήτῳ Διονύσῳ - τὸν τὰ Διωνύσου δῶρα λεϊζόμενον, - -
-
- - -Thyillus - - -αἱ πτελέαι τῷ Πανί, καὶ αἱ τανυμήκεες αὗται -ἰτέαι ἥ. θʼ ἱερὰ κἀμφιλαφὴς πλάτανος, -χαἰ λιβάδες, καὶ ταῦτα βοτηρικὰ Πανὶ κύπελλα - ἄγκειται, δίψης φάρμακʼ ἀλεξίκακα. -
-
- - -Anonymi Epigrammatici - - -αὐτῷ σοὶ πρὸς Ὄλυμπον ἐμακύναντο κολοσσὸν - τόνδε Ῥόδου ναέται Δωρίδος, Ἀέλιε, - χάλκεον ἁνίκα κῦμα κατευνάσαντες Ἐνυοῦς - ἔστεψαν πάτραν δυσμενέων ἐνάροις. -οὐ· γὰρ ὑπὲρ πελάγους μόνον † κάτθεσαν, ἀλλὰ - καὶ ἐν γᾷ, - ἁβρὸν ἀδουλώτου φέγγος ἐλευθερίας· - τοῖς γὰρ ἀφʼ Ἡρακλῆος ἀεξηθεῖσι γενέθλας - πάτριος ἐν πόντῳ κἠν χθονὶ κοιρανία. -
-
- - -Anonymi Epigrammatici - - -πορφυρὶς ἡ Κνιδίη τὰ στέμματα, καὶ τὸ δίθυρσον -τοῦτο τὸ λογχωτόν, καὶ τὸ περισφύριον, - οἷς ἀνέδην βάκχευεν, ὅτʼ ἐς Διόνυσον ἐφοίτα - κισσωτὴν στέρνοις νεβρίδʼ ἀναπτομένη, -αὐτῷ σοί, Διόνυσε, πρὸ παστάδος ᾐώρησε -ταῦτα τὰ καὶ κάλλευς κόσμια καὶ μανίης. -
-
- - -Rhianus - - -Ἀχρυλὶς ἡ Φρυγίη θαλαμηπόλος, ἡ περὶ πεύκας - πολλάκι τὰς ἱερὰς χευαμένη πλοκάμους, - γαλλαίῳ Κυβέλης ὀλολύγματι πολλάκι δοῦσα - τὸν βαρὺν εἰς ἀκοὰς ἦχον ἀπὸ στομάτων, - -τάσδε θεῇ χαίτας περὶ δικλίδι θῆκεν ὀρειᾳ, - θερμὸν ἐπεὶ λύσσης ὧδʼ ἀνέπαυσε πόδα. -
-
- - -Antipater - - -Παλλάδι ταὶ τρισσαὶ θέσαν ἅλικες, ἶσον ἀράχνᾳ - τεῦξαι λεπταλέον στάμονʼ ἐπιστάμεναι, - Δημὼ μὲν ταλαρίσκον ἐύπλοκον, Ἀρσινόα δὲ - ἐργάτιν εὐκλώστου νήματος ἠλακάταν -κερκίδα δʼ εὐποίητον, ἀηδόνα τὰν ἐν ἐρίθοις, - Βακχυλίς, εὐκρέκτους ᾇ διέκρινε μίτους· - ζώειν γὰρ δίχα παντὸς ὀνείδεος ἤθελʼ ἑκάστα, - ξεῖνε, τὸν ἐκ χειρῶν ἀρνυμένα βίοτον. -
-
- - -Macedonius II - - -τὸν κύνα, τὸν πάσης κρατερῆς ἐπιΐδμονα θήρης, - ἔξεσε μὲν Λεύκων, ἄνθετο δʼ Ἀλκιμένης. -Ἀλκιμένης δʼ οὐχ εὗρε τί μέμψεται· ὡς δʼ ἴδʼ ὁμοίην -εἰκόνα παντοίῳ σχήματι φαινομένην, -κλοιὸν ἔχων πέλας ἦλθε, λέγων Λεύκωνι κελεύειν -τῷ κυνὶ καὶ βαίνειν πεῖθε γὰρ ὡς ὑλάων. -
-
- - -Macedonius II - - -τὸν κύνα, τὰν πήραν τε καὶ ἀγκυλόδοντα σίγυνον, -Πανί τε καὶ Νύμφαις ἀντίθεμαι Δρυάσιν· - τὸν κύνα δὲ ζώοντα πάλιν ποτὶ ταὔλιον ἄξω, - ξηρὰς εἰς ἀκόλους ξυνὸν ἔχειν ἕταρον. -
-
- - -Anonymi Epigrammatici - - -Δάφνις ὁ λευκόχρως, ὁ καλᾷ σύριγγι μελίσδων -βουκολικοὺς ὕμνους, ἄνθετο Πανὶ τάδε· - -τοὺς τρητοὺς δόνακας, τὸ λαγωβόλον, ὀξὺν ἄκοντα, - νεβρίδα, τὰν πήραν, ᾇ ποτʼ ἐμαλοφόρει. -
-
- - -Hegesippus - - -δέξαι μʼ, Ἡράκλεις, Ἀρχεστράτου ἱερὸν ὅπλον, -ὄφρα, ποτὶ ξεστὰν παστάδα κεκλιμένα, - γηραλέα τελέθοιμι, χορῶν ἀίουσα καὶ ὕμνων - ἀρκείτω στυγερὰ δῆρις Ἐνυαλίου. -
-
- - -Archias - - -Ἀγραύλῳ τάδε Πανὶ βιαρκέος ἄλλος ἀπʼ ἄλλης -αὔθαιμοι τρισσοὶ δῶρα λινοστασίης, - Πίγρης μὲν δειραχθὲς ἐΰβροχον ἅμμα πετανῶν, - Δᾶμις δʼ ὑλονόμων δίκτυα τετραπόδων, -ἄρκυν δʼ εἰναλίων Κλείτωρ πόρεν· οἷς σὺ διʼ αἴθρας -καὶ πελάγευς καὶ γᾶς εὔστοχα πέμπε λίνα. -
-
- - -Archias - - -ταῦτά σοι ἔκ τʼ ὀρέων, ἔκ τʼ αἰθέρος, ἔκ τε θαλάσσης - τρεῖς γνωτοὶ τέχνης σύμβολα, Πάν, ἔθεσαν - ταῦτα μὲν εἰναλίων Κλείτωρ λίνα, κεῖνα δὲ Πίγρης - οἰωνῶν, Δᾶμις τὰ τρίτα τετραπόδων -οἷς ἅμα χερσαίαισιν, ἅμʼ ἠερίαισιν ἐν ἄγραις, - Ἀγρεῦ, ἅμʼ ἐν πλωταῖς, ὡς πρίν ἀρωγὸς ἴθι. -
-
- - -Archias - - -Τρίζυγες, οὑρεσιοικε, κασίγνητοι τάδε τέχνας -ἄλλος ἀπʼ ἀλλοίας σοὶ λίνα, Πάν, ἔθεσαν, - -καὶ τὰ μὲν ὀρνίθων Πίγρης, τὰ δὲ δίκτυα θηρῶν - Δᾶμις, ὁ δὲ Κλείτωρ εἰναλίων ἔπορεν -τῶν ὁ μὲν ἐν ξυλόχοισιν, ὁ δʼ ἠερίῃσιν ἐν ἄγραις - αἰέν, ὁ δʼ ἐν πελάγει εὔστοχον ἄρκυν ἔχοι. -
-
- - -Alexander - - -Πίγρης ὀρνίθων ἄπο δίκτυα, Δᾶμις ὀρείων, - Κλείτωρ δʼ ἐκ βυθίων, σοὶ τάδε, Πάν, ἔθεσαν, - ξυνὸν ἀδελφειοὶ θήρης γέρας, ἄλλος ἀπʼ ἄλλης, -ἴδρι τὰ καὶ γαίης, ἴδρι τὰ καὶ πελάγευς· -ἀνθʼ ὧν τῷ μὲν ἁλός, τῷ δʼ ἠέρος, ᾧ δʼ ἀπὸ δρυμῶν - πέμπε κράτος ταύτῃ, δαῖμον, ἐπʼ εὐσεβίῃ. -
-
- - -Zosimus - - -σοὶ τάδε, Πάν, θηρευταὶ ἀνηρτήσαντο σύναιμοι - δίκτυα, τριχθαδίης δῶρα κυναγεσίης· - Πίγρης μὲν πτανῶν, Κλείτωρ ἁλός, ὃς δʼ ἀπὸ χέρσου, - Δᾶμις, τετραπόδων ἀγκύλος ἰχνελάτης. -ἀλλὰ σὺ κἠν δρυμοῖσι, καὶ εἰν ἁλί, καὶ διὰ μέσσης - ἠέρος εὔαγρον τοῖσδε δίδου κάματον. -
-
- - -Zosimus - - -τρισσὰ τάδε τρισσοὶ θηραγρέται, ἄλλος ἀπʼ ἄλλης - τέχνης, πρὸς νηῷ Πανὸς ἔθεντο λίνα· - Πίγρης μὲν πτανοῖσιν ἐφεὶς βόλον, ἐν δʼ ἁλίοισιν - Κλείτωρ, ἐν θηρσὶν Δᾶμις ἐρημονόμοις. -τοὔνεκα, Πάν, τὸν μέν γε διʼ αἰθέρος, ὃν δʼ ἀπὸ λόχμης, - τὸν δὲ διʼ αἰγιαλῶν θὲς πολυαγρότερον. - -
-
- - -Zosimus - - -βριθὺ μὲν ἀγραύλων τόδε δίκτυον ἄνθετο θηρῶν - Δᾶμις, καὶ Πίγρης πτηνολέτιν νεφέλην, -ἁπλότατον δʼ ἁλὶ τοῦτο μιτορραφὲς ἀμφίβληστρον -Κλείτωρ εὐθήρῳ Πανὶ προσευξάμενοι. -τοὔνεκα, Πάν, κρατερῷ πόρε Δάμιδι ληΐδα θηρῶν, -Πίγρῃ δʼ οἰωνῶν, Κλείτορι δʼ εἰναλίων. -
-
- - -Julius Diocles - - -δίκτυα σοὶ τάδε, Πάν, ἀνεθήκαμεν οἶκος ἀδελφῶν -οἱ τρεῖς, ἐξ ὀρέων, ἠέρος, ἐκ πελάγευς. -δικτυβόλει τούτῳ δὲ παρʼ ἠιόνων κροκάλαισιν· -θηροβόλει τούτῳ δʼ ἄγκεσι θηροτόκοις· -τὸν τρίτον ἐν πτηνοῖσιν ἐπίβλεπε· τῆς γὰρ ἁπάντων, - δαῖμον, ἔχεις ἡμέων δῶρα λινοστασίας. -
-
- - -Alpheus - - -Πανὶ κασιγνήτων ἱερὴ τριάς , ἄλλος ἀπʼ ἄλλης, - ἄνθετʼ ἀπʼ οἰκείης σύμβολον ἐργασίης, -Πίγρης ὀρνίθων, ἁλίων ἀπομοίρια Κλείτωρ - ἔμπαλιν ἰθυτόμων Δᾶμις ἀπὸ σταλίκων. -ἀνθʼ ὧν εὐαγρίην τῷ μὲν χθονός, ᾧ δὲ διδοίης -ἐξ ἁλός, ᾧ δὲ νέμοις ἠέρος ὠφελίην. -
-
- - -Leonidas - - -ὁ Κρὴς Θηρίμαχος τὰ λαγωβόλα Πανὶ Λυκαίῳ -ταῦτα πρὸς Ἀρκαδικοῖς ἐκρέμασε σκοπέλοις. - ἀλλὰ σὺ Θηριμάχῳ δώρων χάριν, ἀγρότα δαῖμον, -χεῖρα κατιθύνοις τοξότιν ἐν πολέμῳ, - -ἔν τε συναγκείαισι παρίστασο δεξιτερῇ οἱ, -πρῶτα διδοὺς ἄγρης, πρῶτα καὶ ἀντιπάλων. . -
-
- - -Moero - - -νύμφαι Ἀνιγριάδες, ποταμοῦ κόραι, αἳ τάδε βένθη - ἀμβρόσιαι ῥοδέοις στείβετε ποσσὶν ἀεί, - χαίρετε καὶ σῴζοιτε Κλεώνυμον, ὃς τάδε καλὰ -εἵσαθʼ ὑπαὶ πιτύων ὔμμι, θεαί, ξόανα. -
-
- - -Gaetulicus I - - -λάζεο, τιμήεσσα Κυθηριάς, ὑμνοπόλοιο - λιτὰ τάδʼ ἐκ λιτοῦ δῶρα Λεωνίδεω· - πεντάδα τὴν σταφυλῆς εὐρώγεα, καὶ μελιηδὲς - πρώιον εὐφύλλων σῦκον ἀπʼ ἀκρεμόνων, -καὶ ταύτην ἀπέτηλον ἁλινήκτειραν ἐλαίην, -καὶ ψαιστῶν ὀλίγον δρᾶγμα πενιχραλέων, -καὶ σταγόνα σπονδῖτιν, ἀεὶ θυέεσσιν ὀπηδόν, - τὴν κύλικος βαιῷ πυθμένι κευθομένην. -εἰ δʼ, ὥς εὑ βαρύγυιον ἀπώσαο νοῦσον, ἐλάσσεις -καὶ πενίην, δώσω πιαλέον χίμαρον. -
-
- - -Cornelius Long(in)us - - -ἐκ πενίης, ὡς οἶσθʼ, ἀκραιφνέος ἀλλὰ δικαίης, - Κύπρις, ταῦτα δέχευ δῶρα Λεωνίδεω· - πορφυρέην ταύτην ἐπιφυλλίδα, τὴν θʼ ἁλίπαστον - δρύπεπα, καὶ ψαιστῶν τὴν νομίμην θυσίην, -σπονδὴν θʼ, ἣν ἀσάλευτον ἀφύλισα, καὶ τὰ μελιχρὰ - σῦκα. σὺ δʼ, ὡς νούσου, ῥύεο καὶ πενίης· -καὶ τότε βουθυτέοντὰ μʼ ἐσόψεαι. ἀλλὰ σύ, δαῖμον, - σπεύδοις ἀντιλαβεῖν τὴν ἀπʼ ἐμεῦ χάριτα. - -
-
- - -Archias - - -ταῦτα σαγηναίοιο λίνου δηναιὰ Πριήπῳ - λείψανα καὶ κύρτους Φιντύλος ἐκρέμασεν, - καὶ γαμψὸν Χαίτῃσιν ἐφʼ ἱππείῃσι πεδηθὲν -ἄγκιστρον, κρυφίην εἰναλίοισι πάγην, -καὶ δόνακα τριτάνυστον, ἀβάπτιστόν τε καθʼ ὕδωρ -φελλόν, ἀεὶ κρυφίων σῆμα λαχόντα βόλων· -οὐ γὰρ ἔτι στείβει ποσὶ χοιράδας, οὐδʼ ἐπιαύει - ἠιόσιν, μογερῷ γήραϊ τειρόμενος. -
-
- - -Statyllius Flaccus - - -Πρίηπʼ αἰγιαλῖτα, φυκόγειτον, - Δαμοίτας ἁλιεύς, ὁ βυσσομέτρης, -τὸ πέτρης ἁλιπλῆγος ἐκμαγεῖον, -ἡ βδέλλα σπιλάδων, ὁ ποντοθήρης, -σοὶ τὰ δίκτυα τἀμφίβληστρα ταῦτα, - δαῖμον, εἵσατο, τοῖς ἔθαλπε γῆρας. -
-
- - -Anonymi Epigrammatici - - - -σῷζε, θεὰ Τριτοῖ, τὰ τεθέντα [τε] τὸν τʼ ἀναθέντα. -
-
- - -Archias - - -Τρῳάδι Παλλαναῖος ἀνηέρτησεν Ἀθάνᾳ -αὐλὸν ἐριβρεμέταν Μίκκος Ἐνυαλίου, -ᾧ ποτε καὶ θυμέλῃσι καὶ ἐν πολέμοισιν ἔμελψεν - πρόσθε, τὸ μὲν στοναχᾶς σῆμα, τὸ δʼ εὐνομίας. - -
-
- - -statyllius Flaccus - - -Ῥαιβοσκελῆ, δίχαλον, ἀμμοδύτορα - ὀπισθοβάμονʼ, ἀτράχηλον, ὀκτάπουν, - νήκταν, τερεμνόνωτον, ὀστρακόχροα, -τῷ Πανὶ τὸν πάγουρον ὁρμιηβόλος, -ἄγρας ἀπαρχάν, ἀντίθησι Κώπασος. -
-
- - -Simonides - - -Ἑλλάνων ἀρχαγὸς ἐπεὶ στρατὸν ὤλεσα Μήδων - Παυσανίας Φοίβῳ μνᾶμʼ ἀνέθηκα τόδε. -
-
- - -Antipater - - -ὥριον ἀνθήσαντας ὑπὸ κροτάφοισιν ἰούλους - κειράμενος, γενύων ἄρσενας ἀγλαΐας, - Φοίβῳ θῆκε Λύκῶν, πρῶτον γέρας· εὔξατο δʼ οὕτως - καὶ πολιὴν λευκῶν κεῖραι ἀπὸ κροτάφων. -τοίην ἀλλʼ ἐπίνευε, τίθει δέ μιν, ὡς πρό γε τοῖον, -ὣς αὖτις πολιῷ γήραϊ νιφόμενον. -
-
- - -Antiphilus - - -Εἰνοδίη, σοὶ τόνδε φίλης ἀνεθήκατο κόρσης - πῖλον, ὁδοιπορίης σύμβολον, Ἀντίφιλος· -ἦσθα γὰρ εὐχωλῇσι κατήκοος, ἦσθα κελεύθοις - ἵλαος· οὐ πολλὴ δʼ ἡ χάρις, ἀλλʼ ὁσίη. -μὴ δέ τις ἡμετέρου μάρψῃ χερὶ μάργος ὁδίτης - ἀνθέματος· συλᾶν ἀσφαλὲς οὐδʼ ὀλίγα. - -
-
- - -Leonidas - - -ἐκ τόκου, Εἰλείθυια, πικρὰν ὠδῖνα φυγοῦσα, - ἀμβροσίη κλεινῶν θήκατό σοι πρὸ ποδῶν -δεσμὰ κόμας καὶ πέπλον, ἐφʼ ᾧ δεκάτῳ ἐνὶ μηνὶ - δισσὸν ἀπὸ ζώνης κῦμʼ ἐλόχευσε τέκνων. -
-
- - -Marcus Argentarius - - -σάνδαλα καὶ μίτρην περικαλλέα, τόν τε μυρόπνουν - βόστρυχον ὡραίων οὖλον ἀπὸ πλοκάμων, -καὶ ζώνην, καὶ λεπτὸν ὑπένδυμα τοῦτο Χιτῶνος, -καὶ τὰ περὶ στέρνοις ἀγλαὰ μαστόδετα, -ἔμβρυον εὐώδινος ἐπεὶ φύγε νηδύος ὄγκον, -Εὐφράντη νηῷ θῆκεν ὕπʼ Ἀρτέμιδος. -
-
- - -Leonidas - - -Εὐθύσανον ζώνην τοι ὁμοῦ καὶ τόνδε κύπασσιν -Ἀτθὶς παρθενίων θῆκεν ὕπερθε θυρῶν, -ἐκ τόκου, ὦ Λητωΐ, βαρυνομένης ὅτε νηδὺν - ζωὸν ἀπʼ ὠδίνων λύσαο τῆσδε βρέφος. -
-
- - -Philippus - -Others attribute this to Lacon. - -ἡ γρῆϋς ἡ χερνῆτις, ἡ γυιὴ πόδας, - πύστιν κατʼ ἐσθλὴν ὕδατος παιωνίου , -ἦλθέν ποθερπύζουσα σὺν δρυὸς ξύλῳ, -τό μιν διεσκήριπτε τὴν τετρωμένην· -οἶκτος δὲ Νύμφας εἷλεν, αἵτʼ ἐριβρόμου - Αἴτνης παρωρείῃσι Συμαίθου πατρὸς - ἔχουσι δινήεντος ὑγρὸν οἰκίον. - καὶ τῆς μὲν ἀμφίχωλον ἀρτεμὲς σκέλος - θερμὴ διεστήριξεν Αἰτναίη λιβάς· -νύμφαις δʼ ἔλειπε βάκτρον, αἵτʼ ἐπῄνεσαν - πέμπειν μιν ἀστήρικτον, ἡσθείσαις δόσει. - -
-
- - -Leonidas - - -Θῆρις ὁ δαιδαλόχειρ τᾷ Παλλάδι πῆχυν ἀκαμπῆ, - καὶ τετανὸν νώτῳ καμπτόμενον πρίονα, - καὶ πέλεκυν ῥυκάναν τʼ εὐαυγέα, καὶ περιαγὲς -τρύπανον, ἐκ τέχνας ἄνθετο παυσάμενος. -
-
- - -Leonidas - - -τέκτονος ἄρμενα ταῦτα Λεοντίχου, αἵ τε χαρακταὶ -ῥῖναι, καὶ κάλων οἱ ταχινοὶ βορέες, - στάθμαι καὶ μιλτεῖα, καὶ αἱ σχεδὸν ἀμφιπλῆγες -σφῦραι, καὶ μίλτῳ φυρόμενοι κανόνες, -αἳ τʼ ἀρίδες, ξυστήρ τε, καὶ ἐστελεωμένος οὗτος -ἐμβριθής, τέχνας ὁ πρύτανις, πέλεκυς, -τρύπανά τʼ εὐδίνητα, καὶ ὠκήεντα τέρετρα, - καὶ γόμφων οὗτοι τοὶ πίσυρες τορέες, - ἀμφίξουν τε σκέπαρνον· ἃ δὴ χαριεργῷ Ἀθάνᾳ -ὡνὴρ ἐκ τέχνας θήκατο παυόμενος. -
-
- - -Antipater - - -σάνδαλα μὲν τὰ ποδῶν θαλπτήρια ταῦτα Βίτιννα, -εὐτέχνων ἐρατὸν σκυτοτόμων κάματον -τὸν δὲ φιλοπλάγκτοιο κόμας σφιγκτῆρα Φιλαινίς, - βαπτὸν ἁλὸς πολιῆς ἄνθεσι κεκρύφαλον· -ῥιπίδα δʼ Ἀντίκλεια· καλύπτειραν δὲ προσώπου, - ἔργον ἀραχναίοις νήμασιν ἰσόμορον, -ἁ καλὰ Ἡράκλεια· τὸν εὐσπειρῆ δὲ δράκοντα, - χρύσειον ῥαδινῶν κόσμον ἐπισφυρίων, - πατρὸς Ἀριστοτέλους συνομώνυμος· αἱ συνομήθεις -ἅλικες Οὐρανίῃ δῶρα Κυθηριάδι. - -
-
- - -Archias - - -σάνδαλα ταῦτα Βίτιννα· πολυπλάγκτου δὲ Φιλαινὶς - πορφύρεον χαίτας ῥύτορα κεκρύφαλον· - ξανθὰ δʼ Ἀντίκλεια νόθον κεύθουσαν ἄημα - ῥιπίδα, τὰν μαλερὸν θάλπος ἀμυνομέναν· -λεπτὸν δʼ Ἡράκλεια τόδε προκάλυμμα προσώπου, - τευχθὲν ἀραχναίῃς εἴκελον ἁρπεδόσιν -ἁ δὲ καλὸν σπείραμα περισφυρίοιο δράκοντος - οὔνομʼ Ἀριστοτέλεω πατρὸς ἐνεγκαμένα· -ἅλικες ἀγλαὰ δῶρα, γαμοστόλε, σοὶ τάδε, Κύπρι, -ὤπασαν, αἱ γυάλων Ναυκράτιδος ναέται. -
-
- - -Antipater - - -ἡ τὰ πέδιλα φέρουσα, Μενεκράτις· ἡ δὲ τὸ φᾶρος, - Φημονόη· Πρηξὼ δʼ, ἣ τὸ κύπελλον ἔχει. - τῆς Παφίης δʼ ὁ νεὼς καὶ τὸ βρέτας· ἄνθεμα δʼ αὐτῶν -ξυνὸν· Στρυμονίου δʼ ἔργον Ἀριστομάχου. -πᾶσαι δʼ ἀσταὶ ἔσαν καὶ ἑταιρίδες· ἀλλὰ τυχοῦσαι -κύπριδος εὐκρήτου, νῦν ἑνός εἰσι μία. -
-
- - -Antipater - - -Βιθυνὶς Κυθέρη με τεῆς ἀνεθήκατο, Κύπρι, -μορφῆς εἴδωλον λύγδινον, εὐξαμένη. - ἀλλὰ σὺ τῇ μικκῇ μεγάλην χάριν ἀντιμερίζου, -ὡς ἔθος· ἀρκεῖται δʼ ἀνδρὸς ὁμοφροσύνῃ. - -
-
- - -Philitas - - -Πεντηκονταέτις καὶ ἐπὶ πλέον ἡ φιλέραστος - Νικιὰς εἰς νηὸν Κύπριδος ἐκρέμασεν - σάνδαλα καὶ χαίτης ἀνελίγματα, τὸν δὲ διαυγῆ - χαλκόν, ἀκριβείης οὐκ ἀπολειπόμενον, -καὶ ζώνην πολύτιμον, ἅ τʼ οὐ φωνητὰ πρὸς ἀνδρός· - ἀλλʼ ἐσορῇς πάσης Κύπριδος ὀπτασίην. -
-
- - -Leonidas - - -τὸν ἀργυροῦν Ἔρωτα, καὶ περίσφυρον -πέζαν, τὸ πορφυρεῦν τε Λεσβίδος κόμης -ἕλιγμα, καὶ μηλοῦχον ὑαλόχροα, -τὸ χάλκεὸν τʼ ἔσοπτρον, ἠδὲ τὸν πλατὺν -τριχῶν σαγηνευτῆρα, πύξινον κτένα, -ὧν ἤθελεν τυχοῦσα, γνησία Κύπρι, -ἐν σαῖς τίθησι Καλλίκλεια παστάσιν, -
-
- - -Simonides - - -εὔχεό τοῖς δώροισι, Κύτων, θεὸν ὧδε χαρῆναι -Λητοΐδην ἀγορῆς καλλιχόρου πρύτανιν, -ὥσπερ ὑπὸ ξείνων τε, καὶ οἳ ναίουσι Κόρινθον, -αἶνον ἔχεις χαρίτων μεστοτάτοις στεφάνοις, -
-
- - -Simonides - - -ἓξ ἐπὶ πεντήκοντα, Σιμωνίδη, ἤραο ταύρους -καὶ τρίποδας, πρὶν τόνδʼ ἀνθέμεναι πίνακα· - τοσσάκι δʼ ἱμερόεντα διδαξάμενος χορὸν ἀνδρῶν, -εὐδόξου Νίκας ἀγλαὸν ἅρμʼ ἐπέβης. - -
-
- - -Simonides - - -φημὶ Γέλωνʼ, Ἱέρωνα, Πολύζηλον, Θρασύβουλον, - παῖδας Δεινομένευς, τὸν τρίποδʼ ἀνθέμεναι, -ἐξ ἑκατὸν λιτρῶν καὶ πεντήκοντα ταλάντων -Δαμαρέτου χρυσοῦ, τᾶς δεκάτας δεκάταν. -
-
- - -Simonides - - -ταῦτʼ ἀπὸ δυσμενέων Μήδων ναῦται Διοδώρου - ὅπλʼ ἀνέθεν Λατοῖ μνάματα ναυμαχίας. -
-
- - -Simonides - - -Σῶσος καὶ Σωσὼ σωτήρια τόνδʼ ἀνέθηκαν -Σῶσος μὲν σωθείς, Σωσὼ δʼ ὅτι Σῶσος ἐσώθη. -
-
- - -Simonides - - -χειμερίην νιφετοῖο κατήλυσιν ἡνίκʼ ἀλύξας - Γάλλος ἐρημαίην ἤλυθʼ ὑπὸ σπιλάδα, - ὑετὸν ἄρτι κόμης ἀπομόρξατο· τοῦ δὲ κατʼ ἴχνος - βουφάγος εἰς κοίλην ἀτραπὸν ἷκτο λέων. -αὐτὰρ ὁ πεπταμένῃ μέγα τύμπανον ὃ σχέθε χειρὶ -ἤραξεν, καναχῇ δʼ ἴαχεν ἄντρον ἅπαν. -οὐδʼ ἔτλη Κυβέλης ἱερὸν βρόμον ὑλονόμος θὴρ - μεῖναι, ἀνʼ ὑλῆεν δʼ ὠκὺς ἔθυνεν ὄρος, - δείσας ἡμιγύναικα θεῆς λάτριν, ὃς τάδε Ῥείᾳ -ἐνδυτὰ καὶ ξανθοὺς ἐκρέμασε πλοκάμους. - -
-
- - -Alcaeus - - -κειράμενος γονίμην τις ἄπο φλέβα Μητρὸς ἀγύρτης - Ἴδης εὐδένδρου πρῶνας ἐβουνοβάτει· -τῷ δὲ λέων ἤντησε πελώριος, ὡς ἐπὶ θοίνην - χάσμα φέρων χαλεπὸν πειναλέου φάρυγος. -δείσας δʼ ὠμηστέω θηρὸς μόρον ὡς αὔγαξε, - τύμπανον ἐξ ἱερᾶς ἐπλατάγησε νάπης. -χὠ μὲν ἐνέκλεισεν φονίαν γένυν, ἐκ δὲ τενόντων - ἔνθους ῥομβητὴν ἐστροφάλιζε φόβην - κεῖνος δʼ ἐκπροφυγὼν ὀλοὸν μόρον, εἵσατο Ῥείῃ -θῆρα, τὸν ὀρχησμῶν αὐτομαθῆ Κυβέλης. -
-
- - -Antipater - - -ἐκ ποτέ τις φρικτοῖο θεᾶς σεσοβημένος οἴστρῳ - ῥομβητοὺς δονέων λυσσομανεῖς πλοκάμους, - θηλυχίτων, ἀσκητὸς ἐϋσπείροισι κορύμβοις, - ἁβρῷ τε στρεπτῶν ἅμματι κεκρυφάλων, -ἴθρις ἀνήρ, κοιλῶπιν ὀρειάδα δύσατο πέτραν, - Ζανὸς ἐλαστρησθεὶς γυιοπαγεῖ νιφάδι. - τὸν δὲ μέτʼ ἀρρίγητος ἐπείσθορε ταυροφόνος θήρ, - εἰς τὸν ἑὸν προμολὼν φωλεὸν ἑσπέριος· - ἀθρήσας δʼ εἰς φῶτα, καὶ εὐτρήτοισιν ἀυτμὰν -μυκτῆρσιν βροτέας σαρκὸς ἐρυσσάμενος, - ἔστα μὲν βριαροῖσιν ἐπʼ ἴχνεσιν ὄμμα δʼ ἑλίξας - βρυχᾶτο σφεδανῶν ὄβριμον ἐκ γενύων. - ἀμφὶ δʼ οἱ σμαράγει μὲν ἐναυλιστήριον ἄντρον, - ἄχει δʼ ὑλάεις ἀγχινεφὴς σκόπελος. -αὐτὰρ ὃ θαμβήσας φθόγγον βαρύν, ἐκ μὲν ἅπαντα -ἐν στέρνοις ἐάγη θυμὸν ὀρινόμενον - -ἀλλʼ ἔμπας ἐρίμυκον ἀπὸ στομάτων ὀλολυγὰν - ἧκεν, ἐδίνησεν δʼ εὐστροφάλιγγα κόμαν - χειρὶ δʼ ἀνασχόμενος μέγα τύμπανον, ἐπλατάγησεν, -δινωτὸν Ῥείας ὅπλον Ὀλυμπιάδος -τὸ ζωᾶς ἐπαρωγὸν ἀήθεα γὰρ τότε βύρσης -ταυρείου κενεὸν δοῦπον ἔδεισε λέων, -ἐκ δὲ φυγὼν ὤρουσεν. ἴδʼ ὡς ἐδίδαξεν ἀνάγκα - πάνσοφος ἐξευρεῖν ἔκλυσιν Ἀίδεω. -
-
- - -Dioscorides - - -Σάρδις Πεσσινόεντος ἀπὸ Φρυγὸς ἤθελʼ ἱκέσθαι - ἔκφρων, μαινομένην δοὺς ἀνέμοισι τρίχα, - ἁγνὸς Ἄτυς, Κυβέλης θαλαμηπόλος· ἄγρια δʼ αὐτοῦ - ἐψύχθη χαλεπῆς πνεύματα θευφορίης, -ἑσπέριον στείχοντος ἀνὰ κνέφας· εἰς δὲ κάταντες - ἄντρον ἔδυ, νεύσας βαιὸν ἄπωθεν ὁδοῦ. - τοῦ δὲ λέων ὤρουσε κατὰ στίβον, ἀνδράσι δεῖμα - θαρσαλέοις, Γάλλῳ δʼ οὐδʼ ὀνομαστὸν ἄχος, -ὃς τότʼ ἄναυδος ἔμεινε δέους ὕπο, καί τινος αὔρῃ -δαίμονος ἐς στονοὲν τύμπανον ἧκε χέρας· -οὗ βαρὺ μυκήσαντος, ὁ θαρσαλεώτερος ἄλλων - τετραπόδων, ἐλάφων ἔδραμεν ὀξύτερον, - τὸν βαρὺν οὐ μείνας ἀκοῆς ψόφον ἐκ δὲ βόησεν· - “ μῆτερ, Σαγγαρίου χείλεσι πὰρ ποταμοῦ - ἱρὴν σοὶ θαλάμην, ζωάγρια, καὶ λαλάγημα - τοῦτο, τὸ θηρὶ φυγῆς αἴτιον, ἀντίθεμαι.” -
-
- - -Leonidas - - -χειμερίην διὰ νύκτα, χαλαζήεντά τε συρμὸν -καὶ νιφετὸν φεύγων καὶ κρυόεντα πάγον, - -μουνολέων, καὶ δὴ κεκακωμένος ἀθρόα γυῖα, -ἦλθε φιλοκρήμνων αὖλιν ἐς αἰγινόμων. -οἱ δʼ οὐκ ἀμφʼ αἰγῶν μεμελημένοι, ἀλλὰ περὶ σφέων, -εἵατο σωτῆρα Ζῆνʼ ἐπικεκλόμενοι. - χεῖμα δὲ θὴρ μείνας, θὴρ νύκτιος, οὔτε τινʼ ἀνδρῶν -οὔτε βοτῶν βλάψας, ᾠχετʼ ἀπαυλόσυνος. -οἱ δὲ πάθης ἔργον τόδʼ ἐϋγραφὲς ἀκρολοφίτᾳ -Πανὶ παρʼ εὐπρέμνῳ τᾷδʼ ἀνέθεντο δρυΐ; -
-
- - -Theodoridas - - -Μυριόπουν σκολόπενδραν ὑπʼ Ὠρίωνι κυκηθεὶς - πόντος Ἰαπύγων ἔβρας1ʼ ἐπὶ σκοπέλους· - καὶ τόδʼ ἀπὸ βλοσυροῦ σελάχευς μέγα πλευρὸν ἀνῆψαν - δαίμοσι βουφόρτων κοίρανοι εἰκοσόρων, -
-
- - -Antipater - - -λείψανον ἀμφίκλαστον ἁλιπλανέος σκολοπένδρης -τοῦτο κατʼ εὐψαμάθου κείμενον ἠϊόνος, - δισσάκι τετρόργυιον, ἅπαν πεφορυγμένον ἀφρῷ, - πολλὰ θαλασσαίῃ ξανθὲν ὑπὸ σπιλάδι, -Ἑρμῶναξ ἐκίχανεν, ὅτε γριπηίδι τέχνῃ - εἷλκε τὸν ἐκ πελάγους ἰχθυόεντα βόλον - εὑρὼν δʼ ἠέρτησε Παλαίμονι παιδὶ καὶ Ἰνοῖ, - δαίμοσιν εἰναλίοις δοὺς τέρας εἰνάλιον. -
-
- - -Theodoridas - - -Εἰνάλιε λαβύρινθε, τύ μοι λέγε· τίς ς1ʼ ἀνέθηκεν - ἀγρέμιον πολιᾶς ἐξ ἁλὸς εὑρόμενος; — “ - -παίγνιον ἀντριάσιν Διονύσιος ἄνθετο Νύμφαις -ʽδ̔ῶρον δʼ ἐξ ἱερᾶς εἰμι Πελωριάδος,ʼ - υἱὸς Πρωτάρχου· σκολιὸς δʼ ἐξέπτυσε πορθμός, -ὄφρʼ εἴην λιπαρῶν παίγνιον Ἀντριάδων.” -
-
- - -Nicaenetus - - -ἡρῷσσαι Λιβύων, ὄρος ἄκριτον αἵτε νέμεσθε, - αἰγίδι καὶ στρεπτοῖς ζωσάμεναι θυσάνοις, - τέκνα θεῶν, δέξασθε Φιλήτιδος ἱερὰ ταῦτα - δράγματα καὶ χλωροὺς ἐκ καλάμης στεφάνους, -ἅσς1ʼ ἀπὸ λικμητοῦ δεκατεύεται· ἀλλὰ καὶ οὕτως -ἡρῷσσαι Λιβύων χαίρετε δεσπότιδες. -
-
- - -Leonidas - - -τοῦτʼ ὀλίγον Κλείτωνος ἐπαύλιον, ἥ τʼ ὀλιγῶλαξ - σπείρεσθαι, λιτός θʼ ὁ σχεδὸν ἀμπελεὼν, -τοῦτό τε † ῥωπεῖον ὀλιγόξυλον ἀλλʼ ἐπὶ τούτοις - Κλείτων ὀγδώκοντʼ ἐξεπέρης1ʼ ἔτεα. -
-
- - -Crinagoras - - -ἀργύρεόν σοι τόνδε, γενέθλιον ἐς τεὸν ἦμαρ, - Πρόκλε, νεόσμηκτον † δουρατίην κάλαμον, -εὖ μὲν ἐυσχίστοισι διάγλυπτον κεράεσσιν, -εὖ δὲ ταχυνομένην εὔροον εἰς σελίδα, -πέμπει Κριναγόρης, ὀλίγην δόσιν, ἀλλʼ ἀπὸ θυμοῦ - πλείονος, ἀρτιδαεῖ σύμπνοον εὐμαθίῃ. - -
-
- - -Adaeus - - -αὔλακι καὶ γήρᾳ τετρυμένον ἐργατίνην βοῦν -Ἄλκων οὐ φονίην ἤγαγε πρὸς κοπίδα, - αἰδεσθεὶς ἔργων ὁ δέ που βαθέῃ ἐνὶ ποίῃ - μυκηθμοῖς ἀρότρου τέρπετʼ ἐλευθερίῃ. -
-
- - -Crinagoras - - -αἰετοῦ ἀγκυλοχείλου ἀκρόπτερον ὀξὺ σιδήρῳ -γλυφθέν, καὶ βαπτῇ πορφύρεον κυάνῳ, -ἤν τι λάθῃ μίμνον μεταδόρπιον ἐντὸς ὀδόντων, -κινῆσαι πρηεῖ κέντρῳ ἐπιστάμενον, -βαιὸν ἀπʼ οὐκ ὀλίγης πέμπει φρενός, οἷα δὲ δαιτὸς -δῶρον, ὁ πᾶς ἐπὶ σοί, Λεύκιε, Κριναγόρης. -
-
- - -Quintus Maecius - - -Ἀκρείτᾳ Φοίβῳ, Βιθυνίδος ὃς τόδε χώρης -κράσπεδον αἰγιαλοῖς γειτονέον συνέχεις, - Δᾶμις ὁ κυρτευτής, ψάμμῳ κέρας αἰὲν ἐρείδων, -φρουρητὸν κήρυκʼ αὐτοφυεῖ σκόλοπι -θῆκε γέρας, λιτὸν μέν, ἐπʼ εὐσεβίῃ δʼ, ὁ γεραιός, -εὐχόμενος νούσων ἐκτὸς ἰδεῖν Ἀίδην. -
-
- - -Philippus - - -Αἰγύπτου μεδέουσα μελαμβώλου, λινόπεπλε - δαῖμον, ἐπʼ εὐϊέρους βῆθι θυηπολίας. - σοὶ γὰρ ὑπὲρ σχιδάκων λαγαρὸν ποπάνευμα πρόκειται, - καὶ πολιὸν χηνῶν ζεῦγος ἐνυδροβίων, - -καὶ νάρδος ψαφαρὴ κεγχρίτισιν ἰσχάσιν ἀμφί, -καὶ σταφυλὴ γραίη, χὠ μελίπνους λίβανος. -εἰ δʼ ὡς ἐκ πελάγους ἐρρύσαο Δᾶμιν, ἄνασσα, -κἠκ πενίης, θύσει χρυσόκερων κεμάδα. -
-
- - -Crinagoras - - -βότρυες οἰνοπέπαντοι, ἐυσχίστοιό τε ῥοιῆς - θρύμματα, καὶ ξανθοὶ μυελοὶ ἐκ στροβίλων, -καὶ δειλαὶ δάκνεσθαι ἀμυγδάλαι, ἥ τε μελισσῶν - ἀμβροσίη, πυκναὶ τʼ ἰτρινέαι ποπάδες, -καὶ πότιμοι γέλγιθες, ἰδʼ † ὑελακύκαδες ὄγχναι, - δαψιλῆ οἰνοπόταις γαστρὸς ἐπεισόδια· - Πανὶ φιλοσκήπωνι καὶ εὐστόρθυγγι Πριήπῳ - ἀντίθεται λιτὴν δαῖτα Φιλοξενίδης. -
-
- - -Quintus Maecius - - -Γομφιόδουπα χαλινά, καὶ ἀμφίτρητον ὑπειρκτὰν -κημόν, καὶ γενύων σφίγκτορʼ ἐυρραφέα, - τάνδε τʼ ἐπιπλήκτειραν ἀπορρηκτοῖο διωγμοῦ - μάστιγα, σκαιοῦ δῆγμὰ τʼ ἐπιψελίου, -κέντρα τʼ ἐναιμήεντα διωξίπποιο μύωπος, - καὶ πριστὸν ψήκτρας κνῆσμα σιδηρόδετον, - διπλοῖς ἀιόνων ὠρύγμασιν, Ἴσθμιε, τερφθείς, - δῶρα, Πόσειδον, ἔχεις ταῦτα παρὰ Στρατίου. -
-
- - -Erycius - - -Γάλλος ὁ χαιτάεις, ὁ νεήτομος, ὡπὸ Τυμώλου -Λύδιος ὀρχηστὰς μάκρʼ ὀλολυζόμενος, - -τᾷ παρὰ Σαγγαρίῳ τάδε Ματέρι τύμπανʼ ἀγαυᾷ -θήκατο, καὶ μάστιν τὰν πολυαστράγαλον, -ταῦτὰ τʼ ὀρειχάλκου λάλα κύμβαλα, καὶ μυρόεντα - βόστρυχον, ἐκ λύσσας ἄρτια παυσάμενος. -
-
- - -Antonius Thallus - - -ἑσπερίοις μέγα χάρμα καὶ ἠῴοις περάτεσσι, - Καῖσαρ, ἀνικάτων ἔκγονε Ῥωμυλιδῶν, - αἰθερίην γένεσιν σέο μέλπομεν, ἀμφὶ δὲ βωμοῖς - γηθοσύνους λοιβὰς σπένδομεν ἀθανάτοις. -ἀλλὰ σὺ παππῴοις ἐπὶ βήμασιν ἴχνος ἐρείδων, -εὐχομένοις ἡμῖν πουλὺ μένοις ἐπʼ ἔτος. -
-
- - -Philippus - - -ἔμβολα χαλκογένεια, φιλόπλοα τεύχεα νηῶν, -Ἀκτιακοῦ πολέμου κείμενα μαρτύρια, - ἠνίδε σιμβλεύει κηρότροφα δῶρα μελισσῶν, - ἑσμῷ βομβητῇ κυκλόσε βριθόμενα. -Καίσαρος εὐνομίης χρηστὴ χάρις· ὅπλα γὰρ ἐχθρῶν - καρποὺς εἰρήνης ἀντεδίδαξε τρέφειν. -
-
- - -Antistius - - -ἐνδυτὰ καὶ πλοκάμους τούτους θέτο Γάλλος ὀρείῃ - μητρὶ θεῶν, τοίης εἵνεκα συντυχίης. - μούνῳ οἱ στείχοντι λέων ἄντασε καθʼ ὕλαν - ἀργαλέος, ζωᾶς δʼ ἆθλος ἐπεκρέματο. -ἀλλὰ θεὴ Γάλλῳ μὲν ἐπὶ φρένας ἧκεν ἀράξαι -τύμπανον· ὠμηστὰν δʼ ἔτραπε φυζαλέον, - φθόγγον ὑποδδείσαντα πελώριον εἵνεκα τοῦδε - πλοχμοὶ συρικτᾶν κεῖνται ἀπʼ ἀκρεμόνων. - -
-
- - -Apollonides - - -εὔφρων οὐ πεδίου πολυαύλακός εἰμʼ ὁ γεραιὸς -οὐδὲ πολυγλεύκου γειομόρος βότρυος· - ἀλλʼ ἀρότρῳ βραχύβωλον ἐπικνίζοντι χαράσσω - χέρσον, καὶ βαιοῦ πίδακα ῥαγὸς ἔχω. -εἴη δʼ ἐξ ὀλίγων ὀλίγη χάρις· εἰ δὲ διδοίης - πλείονα, καὶ πολλῶν, δαῖμον, ἀπαρξόμεθα, -
-
- - -Apollonides - - -Σμήνεος ἔκ με ταμὼν γλυκερὸν θέρος ἀντὶ νομαίων - γηραιὸς Κλείτων σπεῖσε μελισσοπόνος, - ἀμβροσίων ἔαρος κηρῶν μέλι πολλὸν ἀμέλξας, - δῶρον ἀποιμάντου τηλεπέτευς ἀγέλης. -θείης δʼ ἑσμοτόκον χορὸν ἄπλετον, εὖ δὲ μελιχροῦ - νέκταρος ἐμπλήσαις κηροπαγεῖς θαλάμας. -
-
- - -Philippus - - -Ζηνὸς καὶ Λητοῦς θηροσκόπε τοξότι κούρη, -Ἄρτεμις, ἣ θαλάμους τοὺς ὀρέων ἔλαχες, -νοῦσον τὴν στυγερὴν αὐθημερὸν ἐκ βασιλῆος -ἐσθλοτάτου πέμψαις ἄχρις Ὑπερβορέων· -σοὶ γὰρ ὑπὲρ βωμῶν ἀτμὸν λιβάνοιο Φίλιππος - ῥέξει, καλλιθυτῶν κάπρον ὀρειονόμον. -
-
- - -Antipater - - -ἡ κόρυς ἀμφοτέρην ἔλαχον χάριν εἰμὶ δʼ ὁρᾶσθαι -καὶ τερπνὴ φιλίοις, καὶ φόβος ἀντιπάλοις. -ἐκ δὲ Πυλαιμένεος Πείσων μʼ ἔχει· ἔπρεπεν ἄλλαις -οὔτε κόρυς χαίταις, οὔτε κόμη κόρυθι. - -
-
- - -Crinagoras - - -ἠοῖ ἐπʼ εὐκταίῃ τάδε ῥέζομεν ἱρὰ τελείῳ - Ζηνὶ καὶ ὠδίνων μειλίχῳ Ἀρτέμιδι. - τοῖσι γὰρ οὑμὸς ὅμαιμος ἔτʼ ἄχνοος εὔξατο θήσειν -τὸ πρῶτον γενύων ἠιθέοισιν ἔαρ. -δαίμονες ἀλλὰ δέχοισθε καὶ αὐτίκα τῶνδʼ ἀπʼ ἰούλων -Εὐκλείδην πολιῆς ἄχρις ἄγοιτε τριχός. -
-
- - -Diodorus - - - “ἥ τε Σάμου μεδέουσα καὶ λάχες Ἴμβρασον Ἥρη, - δέξο γενεθλιδίους, πότνα, θυηπολίας, - μόσχων ἱερὰ ταῦτα, τά σοι πολὺ φίλτατα πάντων, -εἰ ὅσιοι μακάρων θεσμὸν ἐπιστάμεθα.” -εὔχετʼ ἐπισπένδων τάδε Μάξιμος· ἡ δʼ ἐπένευσεν - ἔμπεδα· Μοιράων δʼ οὐκ ἐμέγηρε λίνα. -
-
- - -Crinagoras - - -Ἥρη, Ἐλειθυιῶν μήτηρ, Ἥρη τε τελείη, - καὶ Ζεῦ, γινομένοις ξυνὸς ἅπασι πατήρ, - ὠδῖνας νεύσαιτʼ Ἀντωνίῃ ἵλαοι ἐλθεῖν - πρηείας, μαλακαῖς χερσὶ σὺν Ἠπιόνης, -ὄφρα κε γηθήσειε πόσις, μήτηρ θʼ, ἑκυρά τε. -ἡ νηδὺς οἴκων αἷμα φέρει μεγάλων. -
-
- - -Diodorus - - -Καρπαθίην ὅτε νυκτὸς ἅλα στρέψαντος ἀήτου - λαίλαπι Βορραίῃ κλασθὲν ἐσεῖδε κέρας, - -εὔξατο κῆρα φυγών, Βοιώτιε, σοί με, Κάβειρε - δέσποτα, χειμερίης ἄνθεμα ναυτιλίης, -ἀρτήσειν ἁγίοις τόδε λώπιον ἐν προπυλαίοις -Διογένης ἀλέκοις δʼ ἀνέρι καὶ πενίην. -
-
- - -Philodemus - - -κέντρα διωξικέλευθα, φιλορρώθωνά τε κημόν, -τόν τε περὶ στέρνοις κόσμον ὀδοντοφόρον, -κοἰσυΐνην ἔτι ῥάβδον ἐπὶ προθύροισι, Πόσειδον, -ἄνθετο σοὶ νίκης Χάρμος ἀπʼ Ἰσθμιάδος, -καὶ ψήκτρην ἵππων ἐρυσίτριχα, τὴν τʼ ἐπὶ νώτων - μάστιγα, ῥοίζου μητέρα καρχαλέην. -ἀλλὰ σύ, Κυανοχαῖτα, δέχευ τάδε, τὸν δὲ Λυκίνου - υἷα καὶ εἰς μεγάλην στέψον Ὀλυμπιάδα. -
-
- - -Philippus - - -κερκίδας ὀρθρολάλοισι χελιδόσιν εἰκελοφώνους, - Παλλάδος ἱστοπόνου λειομίτους κάμακας, - καὶ κτένα κοσμοκόμην, καὶ δακτυλότριπτον ἄτρακτον - σφονδυλοδινήτῳ νήματι νηχόμενον, -καὶ τάλαρον σχοίνοις ὑφασμένον, ὃν ποτʼ ὀδόντι - ἐπλήρου τολύπη πᾶσα καθαιρομένη, - σοί, φιλέριθε κόρη Παλλαντιάς, ἡ βαθύγηρως - Αἰσιόνη, πενίης δῶρον, ἀνεκρέμασεν. -
-
- - -Marcus Argentarius - - -Κύπριδι κεῖσο, λάγυνε μεθυσφαλές, αὐτίκα δῶρον - κεῖσο, κασιγνήτη νεκταρέης κύλικος, -βακχιάς, ὑγρόφθογγε, συνέστιε δαιτὸς ἐίσης, - στειναύχην ψήφου συμβολικῆς θύγατερ, - -θνητοῖς αὐτοδίδακτε διήκονε, μύστι φιλούντων - ἡδίστη, δείπνων ὅπλον ἑτοιμότατον - εἴης ἐκ Μάρκου γέρας ἀγλαόν, ὃς σέ, φίλοινε, -ᾔνεσεν, ἀρχαίην σύμπλανον ἀνθέμενος. -
-
- - -Antipater - - -Δαμπάδα κηροχίτωνα, Κρόνου τυφήρεα λύχνον, - σχοίνῳ καὶ λεπτῇ σφιγγομένην παπύρῳ, -Ἀντίπατρος Πείσωνι φέρει γέρας· ἢν δὲ μʼ ἀνάψας - εὔξηται, λάμψω φέγγος ἀκουσίθεον. -
-
- - -Antiphilus - - -λιτὸς ἐγὼ τὰ τύχης, ὦ δεσπότι· φημὶ δὲ πολλῶν -ὄλβον ὑπερκύπτειν τὸν σὸν ἀπὸ κραδίης. - ἀλλὰ δέχευ μνιαροῖο βαθυρρήνοιο τάπητος -ἐνδυτὸν εὐανθεῖ πορφύρῃ εἰδόμενον, -εἴριά τε ῥοδόεντα, καὶ ἐς κυανότριχα χαίτην - νάρδον, ὑπὸ γλαυκῆς κλειομένην ὑάλου, -ὄφρα χιτὼν μὲν χρῶτα περισκέπῃ, ἔργα δʼ ἐλέγχῃ - χεῖρας, ὁ δʼ εὐώδης ἀτμὸς ἔχῃ πλοκάμους. -
-
- - -Philippus - - -Λευκάδος· αἰπὺν ἔχων ναύταις τηλέσκοπον ὄχθον, - Φοῖβε, τὸν Ἰονίῳ λουόμενον πελάγει, - δέξαι πλωτήρων μάζης χεριφυρέα δαῖτα, -καὶ σπονδὴν ὀλίγῃ κιρναμένην κύλικι, - -καὶ βραχυφεγγίτου λύχνου σέλας ἐκ βιοφειδοῦς -ὄλπης ἡμιμεθεῖ πινόμενον στόματι· - ἀνθʼ ὧν ἱλήκοις, ἐπὶ δʼ ἱστία πέμψον ἀήτην -οὔριον Ἀκτιακοὺς σύνδρομον εἰς λιμένας. -
-
- - -Antiphilus - - -μῆλον ἐγὼ στρούθειον ἀπὸ προτέρης ἔτι ποίης -ὥριον ἐν νεαρῷ χρωτὶ φυλασσόμενον, - ἄσπιλον, ἀρρυτίδωτον, ἰσόχνοον ἀρτιγόνοισιν, - ἀκμὴν εὐπετάλοις συμφυὲς ἀκρεμόσιν, -ὥρης χειμερίης σπάνιον γέρας; εἰς σὲ δʼ, ἄνασσα, - τοίην χὠ νιφόεις κρυμὸς ὀπωροφορεῖ. -
-
- - -Crinagoras - - -σπήλυγγες Νυμφῶν ἐυπίδακες, αἱ τόσον ὕδωρ - εἴβουσαι σκολιοῦ τοῦδε κατὰ πρεόνος, -Πανὸς τʼ ἠχήεσσα πιτυστέπτοιο καλιή, - τὴν ὑπὸ βησσαίης ποσσὶ λέλογχε πέτρης, -ἱερὰ τʼ ἀγρευταῖσι γερανδρύου ἀρκεύθοιο -πρέμνα, λιθηλογέες θʼ Ἑρμέω ἱδρύσιες, -αὐταί θʼ ἱλήκοιτε, καὶ εὐθήροιο δέχεσθε - Σωσάνδρου ταχινῆς σκῦλʼ ἐλαφοσσοΐης. -
-
- - -Myrinus - - -τὴν μαλακὴν Παφίης Στατύλλιον ἀνδρόγυνον δρῦν -ἕλκειν εἰς Ἀίδην ἡνίκʼ ἔμελλε χρόνος, - τἀκ κόκκου βαφθέντα καὶ ὑσγίνοιο θέριστρα, - καὶ τοὺς ναρδολιπεῖς ἀλλοτρίους πλοκάμους, - -φαικάδα τʼ εὐτάρσοισιν ἐπʼ ἀστραγάλοισι γελῶσαν, - καὶ τὴν γρυτοδόκην κοιτίδα, παμβακίδων, -αὐλούς θʼ ἡδὺ πνέοντας ἑταιρείοις ἐνὶ κώμοις, - δῶρα Πριηπείων θῆκεν ἐπὶ προθύρων. -
-
- - -Erycius - - -τοῦτο Σάων τὸ δίπαχυ κόλον κέρας Ὡμβρακιώτας - βουμολγὸς ταύρου κλάσσεν ἀτιμαγέλου, -οππότε μιν κνημούς τε κατὰ λασίους τε χαράδρας - ἐξερέων ποταμοῦ φράσσατʼ ἐπʼ ἀιόνι -ψυχόμενον χηλάς τε καὶ ἰξύας· αὐτὰρ ὃ βούτεω -ἀντίος ἐκ πλαγίων ἵεθʼ -ὁ δὲ ῥοπάλῳ - γυρὸν ἀπεκράνιξε βοὸς κέρας, ἐκ δέ μιν αὐτᾶς - ἀχράδος εὐμύκῳ πᾶξε παρὰ κλισίᾳ. . -
-
- - -Antipater - - -Ταύρου βαθὺν τένοντα, καὶ σιδαρέους - Ἄτλαντος ὤμους, καὶ κόμαν Ἡρακλέους -σεμνὰν θʼ ὑπήναν, καὶ λέοντος ὄμματα - Μιλησίου γίγαντος οὐδʼ Ὀλύμπιος - Ζεὺς ἀτρόμητος εἶδεν, ἄνδρας ἡνίκα -πυγμὰν ἐνίκα Νικοφῶν Ὀλύμπια, -
-
- - -Antiphilus - - -τίς με, Διωνύσῳ πεπλασμένον ἀμφιφορῆα, -τίς με, τὸν Ἀδριακοῦ νέκταρος οἰνοδόκον, - Δηοῦς ἐπλήρωσε; τίς ὁ φθόνος εἰς ἐμὲ Βάκχου, -ἢ σπάνις οἰκείου τεύχεος ἀσταχύων; - ἀμφοτέρους ᾔσχυνε· σεσύληται μὲν ὁ Βάκχος, - Δημήτηρ δὲ Μέθην σύντροφον οὐ δέχεται, - -
-
- - -Adaeus - - -τὰν ὄιν, ὦ Δάματερ ἐπόγμιε, τὰν τʼ ἀκέρωτον - μόσχον, καὶ τροχιὰν ἐν κανέῳ φθοΐδα, - σοὶ ταύτας ἐφʼ ἅλωος, ἐφʼ ᾇ πολὺν ἔβρασεν ἄντλον -Κρήθων καὶ λιπαρὰν εἶδε γεωμορίαν, -ἱρεύει, πολύσωρε· σὺ δὲ Κρήθωνος ἄρουραν - πᾶν ἔτος εὔκριθον καὶ πολύπυρον ἄγοις. -
-
- - -Philippus - - -τίς τὸν ἄχνουν Ἑρμῆν σε παρʼ ὑσπλήγεσσιν ἔθηκεν;— Ἑρμογένης. — τίνος ὤν; — Δαϊμένευς. — ποδαπός; — - -Ἀντιοχεύς. — τιμῶν σε χάριν τίνος;— “ὡς συναρωγὸν -ἐν σταδίοις.”— ποίοις;— Ἰσθμόθι κἠν Νεμέᾳ. — - ἔτρεχε γάρ; — καὶ πρῶτος. — ἑλὼν τίνας; — “Ἐννέ παῖδας· - ἔπτη δʼ ὡς ἂν ἔχων τοὺς πόδας ἡμετέρους.” -
-
- - -Tullius Geminus - - -Φρύνη τὸν πτερόεντα, τὸν εὐτέχνητον Ἔρωτα - μισθὸν ὑπὲρ λέκτρων, ἄνθετο ʽΘεσπιέσιν. -Κύπριδος ἡ τέχνη ζηλούμενον, οὐκ ἐπιμεμφὲς - δῶρον ἐς ἀμφοτέρους δʼ ἔπρεπε μισθὸς Ἔρως. -δοιῆς ἐκ τέχνης αἰνέω βροτόν, ὅς γε καὶ ἄλλοις - δοὺς θεὸν ἐν σπλάγχνοις εἶχε τελειότερον. -
-
- - -Crinagoras - - -χάλκεον ἀργυρέῳ με πανείκελον, Ἰνδικὸν ἔργον, -ὄλπην, ἡδίστου ξείνιον εἰς ἑτάρου, - -ἦμαρ ἐπεὶ τόδε σεῖο γενέθλιον, υἱὲ Σίμωνος, - πέμπει γηθομένῃ σὺν φρενὶ Κριναγόρης, -
-
- - -Leonidas - - -τὸν ποίμνην καὶ ἔπαυλα βοῶν καὶ βώτορας ἄνδρας - σινόμενον, κλαγγὰν τʼ οὐχὶ τρέσαντα κυνῶν, - Εὐάλκης ὁ Κρὴς ἐπινύκτια μῆλα νομεύων - πέφνε, καὶ ἐκ ταύτης ἐκρέμασεν πίτυος. -
-
- - -Leonidas - - -Πυρσῶ τοῦτο λέοντος ἀπʼ ὦν φλοιώσατο δέρμα -Σῶσος ὁ βουπάμων, δουρὶ φονευσάμενος, - ἄρτι καταβρύκοντα τὸν εὐθηλήμονα μόσχον, -οὐδʼ ἵκετʼ ἐκ μάνδρας αὖθις ἐπὶ ξύλοχον -μοσχείω δʼ ἀπέτισεν ὁ θὴρ ἀνθʼ αἵματος αἷμα, - βληθείς· ἀχθεινὰν δʼ εἶδε βοοκτασίαν. -
-
- - -Mnasalces - - -ἀσπὶς Ἀλεξάνδρου τοῦ Φυλλέος ἱερὸν ἅδε - δῶρον Ἀπόλλωνι χρυσοκόμῳ δέδομαι, - γηραλέα μὲν ἴτυν πολέμων ὕπο, γηραλέα δὲ -ὀμφαλὸν ἀλλʼ ἀρετᾷ λάμπομαι, ἃν ἔκιχον -ἀνδρὶ κορυσσαμένα σὺν ἀριστέι, ὃς μʼ ἀνέθηκε. - ἐμμὶ δʼ ἀήσσατος πάμπαν ἀφʼ οὗ γενόμαν. -
-
- - -Nossis - - -Ἥρα τιμήεσσα, Λακίνιον ἃ τὸ θυῶδες - πολλάκις οὐρανόθεν νεισομένα καθορῇς, - δέξαι βύσσινον εἷμα, τό τοι μετὰ παιδὸς ἀγαυᾶς - Νοσσίδος ὕφανεν Θευφιλὶς ἁ Κλεόχας. - -
-
- - -Hegesippus - - -τάνδε παρὰ τριόδοις τὰν Ἄρτεμιν Ἁγελόχεια, -ἔτʼ ἐν πατρὸς μένουσα παρθένος δόμοις, -εἵσατο, Δαμαρέτου θυγάτηρ· ἐφάνη γάρ οἱ αὐτὰ - ἱστοῦ παρὰ κρόκαισιν ὡς αὐγὰ πυρός. - -
-
- - -Diotimus - - -φωσφόρος ὦ σώτειρʼ, ἐπὶ Πόλλιδος ἕσταθι κλήρων, -Ἄρτεμι, καὶ χαρίεν φῶς ἑὸν ἀνδρὶ δίδου, -αὐτῷ καὶ γενεῇ τόπερ εὐμαρές· οὐ γὰρ ἀφαυρῶς -ἐκ Διὸς ἰθείης οἶδε τάλαντα δίκης. -ἄλσος δʼ,Ἄρτεμι, τοῦτο καὶ ἂν Χαρίτεσσι θεούσαις - εἴη ἐπʼ ἀνθεμίδων σάμβαλα κοῦφα βαλεῖν, -
-
- - -Mnasalces - - -τοῦτό σοι, Ἄρτεμι δῖα, Κλεώνυμος εἵσατʼ ἄγαλμα, -† τοῦτο· σὺ δʼ εὐθήρου τοῦδʼ ὑπέρισχε ῥίου, -εὖτε κατʼ εἰνοσίφυλλον ὄρος ποσί, πότνια, βαίνεις, - δεινὸν μαιμώσαις ἐγκονέουσα κυσίν. -
-
- - -Sappho - - -παῖδες, ἄφωνος ἐοῖσα τορʼ ἐννέπω, αἴ τις ἔρηται, - φωνὰν ἀκαμάταν κατθεμένα πρὸ ποδῶν· - “ Αἰθοπίᾳ με κόρᾳ Λατοῦς ἀνέθηκεν Ἀρίστα -ἁ Ἑρμοκλείδα τῶ Σαϋναϊάδα, - -σὰ πρόπολος, δέσποινα γυναικῶν· ᾇ σὺ χαρεῖσα - πρόφρων ἁμετέραν εὐκλέισον γενεάν.” -
-
- - -Nicias - - -Ἀμφαρέτας κρήδεμνα καὶ ὑδατόεσσα καλύπτρα, -Εἰλείθυια, τεᾶς κεῖται ὑπὲρ κεφαλᾶς, -ἇς σε μετʼ ἐκαλέσσατο λευγαλέας οἱ -κῆρας ἀπʼ ὠδίνων τῆλε βαλεῖν λοχίων. -
-
- - -Phaedimus - - -Ἄρτεμι, σοὶ τὰ πέδιλα Κιχησίου εἵσατο υἱός, - καὶ πέπλων ὀλίγον πτύγμα Θεμιστοδίκη, -οὕνεκά οἱ πρηεῖα λεχοῖ δισσὰς ὑπερέσχες -χεῖρας, ἄτερ τόξου, πότνια, νισσομένη. -Ἄρτεμι, νηπίαχον δὲ καὶ εἰσέτι παῖδα Λέοντι - νεῦσον ἰδεῖν κοῦρον γυῖʼ ἐπαεξόμενον. -
-
- - -Perses - - -ζῶμά τοι, ὦ Λατωΐ, καὶ ἀνθεμόεντα κύπασσιν, -καὶ μίτραν μαστοῖς σφιγκτὰ περιπλομέναν, - θήκατο Τιμάεσσα, δυσωδίνοιο γενέθλας -ἀργαλέον δεκάτῳ μηνὶ φυγοῦσα βάρος. -
-
- - -Nossis - - -Ἄρτεμι, Δᾶλον ἔχουσα καὶ Ὀρτυγίαν ἐροεσσαν, - τόξα μὲν εἰς κόλπους ἅγνʼ ἀπόθου Χαρίτων, -λοῦσαι δʼ Ἰνωπῷ καθαρὸν χρόα, βᾶθι δὲ Λοκροὺς - λύσους1ʼ ὠδίνων Ἀλκέτιν ἐκ χαλεπῶν. - -
-
- - -Perses - - -πότνια κουροσόος, ταύταν ἐπιπορπίδα νυμφᾶν, - καὶ στεφάναν λιπαρῶν ἐκ κεφαλᾶς πλοκάμων, - ὀλβία Εἰλείθυια, πολυμνάστοιο φύλασσε -Τισίδος ὠδίνων ῥύσια δεξαμένα. -
-
- - -Nossis - - -Χαίροισάν τοι ἔοικε κομᾶν ἄπο τὰν Ἀφροδίταν - ἄνθεμα κεκρύφαλον τόνδε λαβεῖν Σαμύθας· -δαιδάλεός τε γάρ ἐστι, καὶ ἁδύ τι νέκταρος ὄσδει, - τοῦ, τῷ καὶ τήνα καλὸν Ἄδωνα χρίει. -
-
- - -Antipater - - -ἡ πολύθριξ οὔλας ἀνεδήσατο παρθένος Ἵππη -χαίτας, εὐώδη σμηχομένα κρόταφον - ἤδη γάρ οἱ ἐπῆλθε γάμου τέλος· αἱ δʼ ἐπὶ κόρσῃ - μίτραι παρθενίας αἰτέομεν χάριτας. -Ἄρτεμι, σῇ δʼ ἰότητι γάμος θʼ ἅμα καὶ γένος εἴη -τῇ Λυκομηδείδου παιδὶ λιπαστραγάλῃ. -
-
- - -Damagetus - - -Ἄρτεμι, τόξα λαχοῦσα καὶ ἀλκήεντας ὀιστούς, -σοὶ πλόκον οἰκείας τόνδε λέλοιπε κόμης - Ἀρσινόη θυόεν παρʼ ἀνάκτορον, ἡ Πτολεμαίου - παρθένος, ἱμερτοῦ κειραμένη πλοκάμου, - -
-
- - -Rhianus - - -παῖς Ἀσκληπιάδεω καλῷ καλὸν εἵσατο Φοίβῳ - Γόργος ἀφʼ ἱμερτᾶς τοῦτο γέρας κεφαλᾶς. - Φοῖβε, σὺ δʼ ἵλαος, Δελφίνιε, κοῦρον ἀέξοις -εὔμοιρον λευκὴν ἄχρις ἐφʼ ἡλικίην. -
-
- - -Euphorion - - -πρώτας ὁππότʼ ἔπεξε καλὰς Εὔδοξος ἐθείρας, - Φοίβῳ παιδείην ὤπασεν ἀγλαΐην. - ἀντὶ δὲ οἱ πλοκαμῖδος, Ἑκηβόλε, καλὸς ἐπείη -ὡχαρνῆθεν ἀεὶ κισσὸς ἀεξομένῳ. -
-
- - -Anonymi Epigrammatici - - -Τιμαρέτα πρὸ γάμοιο τὰ τύμπανα, τὴν τʼ ἐρατεινὴν -σφαῖραν, τόν τε κόμας ῥύτορα κεκρύφαλον, -τάς τε κόρας, Λιμνᾶτι, κόρᾳ κόρα, ὡς ἐπιεικές, - ἄνθετο, καὶ τὰ κορᾶν ἐνδύματʼ, Ἀρτέμιδι. -Λατῴα τὺ δὲ παιδὸς ὑπὲρ χέρα Τιμαρετείας - θηκαμένα, σῴζοις τὰν ὁσίαν ὁσίως. -
-
- - -Leonidas - - -Δίνδυμα καὶ Φρυγίης πυρικαέος ἀμφιπολεῦσα - πρῶνας, τὴν μικρήν, Μῆτερ, Ἀριστοδίκην, - κούρην Σειλήνης, παμπότνια, κεἰς ὑμέναιον -κεἰς γάμον ἁδρύναις, πείρατα κουροσύνας· -ἀνθʼ ὧν σοι κατὰ πολλὰ προνήια καὶ παρὰ βωμῷ -παρθενικὴν ἐτίναξʼ ἔνθα καὶ ἔνθα κόμην. - -
-
- - -Theodorus - - -σοὶ τὸν πιληθέντα διʼ εὐξάντου τριχὸς ἀμνοῦ, -Ἑρμᾶ, Καλλιτέλης ἐκρέμασεν πέτασον, -καὶ δίβολον περόναν, καὶ στλεγγίδα, κἀποτανυσθὲν - τόξον, καὶ τριβάκην γλοιοπότιν χλαμύδα, -καὶ σχίζας, καὶ σφαῖραν ἀείβολον ἀλλὰ σὺ δέξαι, -κωροφίλʼ, εὐτάκτου δῶρον ἐφηβοσύνας. -
-
- - -Anonymi Epigrammatici - - -ἡ τὸ πρὶν αὐχήσασα πολυχρύσοις ἐπʼ ἐρασταῖς, -ἡ Νέμεσιν δεινὴν οὐχὶ κύσασα θεόν, - μίσθια νῦν σπαθίοις πενιχροῖς πηνίσματα κρούει. -ὀψὲ Ἀθηναίη Κύπριν ἐληίσατο. -
-
- - -Anonymi Epigrammatici - - -λάθρῃ κοιμηθεῖσα Φιλαίνιον εἰς Ἀγαμήδους - κόλπους τὴν φαιὴν εἰργάσατο χλανίδα. -αὐτὴ Κύπρις ἔριθος· ἐΰκλωστον δὲ γυναικῶν - νῆμα καὶ ἠλακάτην ἀργὸς ἔχοι τάλαρος. -
-
- - -Nicarchus I - - -ἡ πρὶν Ἀθηναίης ὑπὸ κερκίσι καὶ τὰ καθʼ ἱστῶν -νήματα Νικαρέτη πολλὰ μιτωσαμένη, - Κύπριδι τὸν κάλαθον τά τε πηνία καὶ τὰ σὺν αὐτοῖς - ἄρμενʼ ἐπὶ προδόμου πάντα πυρῆς ἔθετο, - -ἔρρετε, φωνήσασα, “ κακῶν λιμηρὰ γυναικῶν - ἔργα, νέον τήκειν ἄνθος ἐπιστάμενα.” - -εἵλετο δὲ στεφάνους καὶ πηκτίδα καὶ μετὰ κώμων -ἡ παῖς τερπνὸν ἔχειν ἐν θαλίαις βίοτον -εἶπε δέ· “παντός σοι δεκάτην ἀπὸ λήμματος οἴσω, -Κύπρι σὺ δʼ ἐργασίην καὶ λάβε καὶ μετάδος.” -
-
- - -Leonidas - - -τῆς πέζης τὰ μὲν ἄκρα τὰ δεξιὰ μέχρι παλαιστῆς -καὶ σπιθαμῆς οὔλης Βίττιον εἰργάσατο· - θάτερα δʼ Ἀντιάνειρα προσήρμοσε· τὸν δὲ μεταξὺ - Μαίανδρον καὶ τὰς παρθενικὰς Βιτίη. -κουρᾶν καλλίστη Διός, Ἄρτεμι, τοῦτο τὸ νῆμα - πρὸς ψυχῆς θείης, τὴν τριπόνητον ἔριν. -
-
- - -Antipater - - -Ἄρτεμι, σοὶ ταύταν, ἐυπάρθενε, πότνα γυναικῶν, - τὰν μίαν αἱ τρισσαὶ πέζαν ὑφηνάμεθα. - καὶ Βιτίη μὲν τάσδε χοροιθαλέας κάμε κούρας, -λοξά τε Μαιάνδρου ῥεῖθρα παλιμπλανέος· -ξανθὰ δʼ Ἀντιάνειρα τὸν ἀγχόθι μήσατο κόσμον, - πρὸς λαιᾷ ποταμοῦ κεκλιμένον λαγόνι· -τὸν δέ νυ δεξιτερῶν νασμῶν πέλας ἰσοπάλαιστον -τοῦτον ἐπὶ σπιθαμῇ Βίττιον ἠνύσατο, -
-
- - -Leonidas - - -αἱ Λυκομήδευς παῖδες, Ἀθηνὼ καὶ Μελίτεια -καὶ Φιντὼ Γληνὶς θʼ, αἱ φιλοεργόταται, - ἔργων ἐκ δεκάτας ποτιθύμια, τόν τε πρόσεργον -ἄτρακτον, καὶ τὰν ἄτρια κριναμέναν - -κερκίδα, τὰν ἱστῶν μολπάτιδα, καὶ τὰ τροχαῖα - πανία, † κερταστὰς τούσδε ποτιρρογέας, - καὶ † σπάθας εὐβριθεῖς πολυάργυρα· τὼς δὲ πενιχραὶ -ἐξ ὀλίγων ὀλίγην μοῖραν ἀπαρχόμεθα, - τῶν χέρας αἰέν, Ἀθάνα, ἐπιπλήσαις μὲν ὀπίσσω, -θείης δʼ εὐσιπύους ἐξ ὀλιγησιπύων. -
-
- - -Leonidas - - -Αὐτονόμα, Μελίτεια, Βοΐσκιον, αἱ Φιλολᾴδεω - καὶ Νικοῦς Κρῆσσαι τρεῖς, ξένε, θυγατέρες, -ἁ μὲν τὸν μιτόεργον ἀειδίνητον ἄτρακτον, -ἁ δὲ τὸν ὀρφνίταν εἰροκόμον τάλαρον, -ἁ δʼ ἅμα τὰν πέπλων εὐάτριον ἐργάτιν, ἱστῶν - κερκίδα, τὰν λεχέων Πανελόπας φύλακα, - δῶρον Ἀθαναίᾳ Πανίτιδι τῷδʼ ἐνὶ ναῷ -θῆκαν, Ἀθαναίας παυσάμεναι καμάτων. -
-
- - -Dioscorides - - -ῥιπίδα τὴν μαλακοῖσιν ἀεὶ πρηεῖαν ἀήταις - Παρμενὶς ἡδίστῃ θῆκε παρʼ Οὐρανίῃ, -ἐξ εὐνῆς δεκάτευμα· τὸ δʼ ἠελίου βαρὺ θάλπος -ἡ δαίμων μαλακοῖς ἐκτρέπεται Ζεφύροις. -
-
- - -Anonymi Epigrammatici - - -Βακχυλὶς ἡ Βάκχου κυλίκων σποδός, ἒν ποτενούσῳ -κεκλιμένα, Δηοῖ τοῖον ἔλεξε λόγον· - “ἢν ὀλοοῦ διὰ κῦμα φύγω πυρός, εἰς ἑκατόν σοι - ἠελίους δροσερᾶν πίομαι ἐκ λιβάδων, - ἀβρόμιος καὶ ἄοινος.” ἐπεὶ δʼ ὑπάλυξεν ἀνίην, -αὐτῆμαρ τοῖον μῆχος ἐπεφράσατο - τρητὸν γὰρ θεμένα χερὶ κόσκινον, εὖ διὰ πυκνῶν - σχοίνων ἠελίους πλείονας ηὐγάσατο. - -
-
- - -Hedylus - - -αἱ μίτραι, τὸ θʼ ἁλουργὲς ὑπένδυμα, τοί τε Λάκωνες - πέπλοι, καὶ ληρῶν οἱ χρύσεοι κάλαμοι, - πάνθʼ ἅμα Νικονόῃ † συνέκπιεν· ἦν γὰρ Ἐρώτων - καὶ Χαρίτων ἡ παῖς ἀμβρόσιόν τι θάλος. -τοιγὰρ τῷ κρίναντι τὰ καλλιστεῖα Πριήπῳ - νεβρίδα καὶ χρυσέην τήνδʼ ἔθετο προχόην. -
-
- - -Leonidas - - -ὁ σκήπων καὶ ταῦτα τὰ βλαυτία, πότνια Κύπρι, - ἄγκειται κυνικοῦ σκῦλʼ ἀπὸ Σωχάρεος, -ὄλπη τε ῥυπόεσσα, πολυτρήτοιό τε πήρας - λείψανον, ἀρχαίης πληθόμενον σοφίης· -σοὶ δὲ Ῥόδων ὁ καλός, τὸν πάνσοφον ἡνίκα πρέσβυν - ἤγρευσεν, στεπτοῖς θήκατʼ ἐπὶ προθύροις, -
-
- - -Phanias - - -Σκήπωνα προποδαγὸν, ἱμάντα τε, καὶ παρακοίταν - νάρθηκα, κροτάφων πλάκτορα νηπιάχων, -κέρκον τʼ εὐμόλπαν φιλοκαμπέα, καὶ μονόπελμον - συγχίδα, καὶ στεγάναν κρατὸς ἐρημοκόμου, -Κάλλων Ἑρμείᾳ θέτʼ ἀνάκτορι, σύμβολʼ ἀγωγᾶς - παιδείου, πολιῷ γυῖα δεθεὶς καμάτῳ. -
-
- - -Phanias - - -Σμῖλαν Ἀσκώνδας δονακογλύφον, ὅν τʼ ἐπὶ μισθῷ - σπόγγον ἔχεν καλάμων ψαίστορα τῶν Κνιδίων, - -καὶ σελίδων κανόνισμα φιλόρθιον, ἔργμα τε λείας -σαμοθέτον, καὶ τὰν εὐμέλανον βροχίδα, -κάρκινά τε σπειροῦχα, λεάντειράν τε κίσηριν, - καὶ τὰν ἁδυφαῆ πλινθίδα καλλαΐναν, - μάζας ἁνίκʼ ἔκυρσε τελωνιάδος φιλολίχνου, - Πιερίσιν πενίας ἄρμενʼ ἀνεκρέμασεν. -
-
- - -Leonidas - - -Ἀστεμφῆ ποδάγρην, καὶ δούνακας ἀνδικτῆρας, -καὶ λίνα, καὶ γυρὸν τοῦτο λαγωοβόλον, - ἰοδόκην, καὶ τοῦτον ἐπʼ ὄρτυγι τετρανθέντα -αὐλὸν, καὶ πλωτῶν εὐπλεκὲς ἀμφίβολον, -Ἑρμείῃ Σώσιππος, ἐπεὶ παρενήξατο τὸ πλεῦν -ἥβης, ἐκ γήρως δʼ ἀδρανίῃ δέδεται. -
-
- - -Phanias - - -ἄλκιμος ἀγρίφαν κενοδοντίδα, καὶ φιλοδούπου - φάρσος ἄμας, στελεοῦ χῆρον ἐλαϊνέου, - ἀρθροπέδαν † στεῖμόν τε, καὶ ὠλεσίβωλον ἀρούρης -σφῦραν, καὶ δαπέδων μουνορυχὰν ὄρυγα, -καὶ κτένας ἑλκητῆρας, ἀνὰ προπύλαιον Ἀθάνας -θήκατο, καὶ ῥαπτὰς γειοφόρους σκαφίδας, -θησαυρῶν ὅτʼ ἔκυρσεν, ἐπεὶ τάχʼ ἂν ἁ πολυκαμπὴς - ἰξὺς κεἰς Ἀίδαν ᾤχετο κυφαλέα. -
-
- - -Leonidas - - -πήρην, κάδέψητον ἀπεσκληρυμμένον αἰγὸς - στέρφος, καὶ βάκτρον τοῦτὸ γʼ ὁδοιπορικόν, -κὤλπαν ἀστλέγγιστον, ἀχάλκωτόν τε κυνοῦχον, - καὶ πῖλον κεφαλᾶς οὐχ ὁσίας σκέπανον -ταῦτα καταφθιμένοιο μυρικίνεον περὶ θάμνον - σκῦλʼ ἀπὸ Σωχάρεος Λιμὸς ἀνεκρέμασεν, - -
-
- - -Phanias - - -φάρσος σοὶ γεραροῦ τόδε βότρυος, εἰνόδιʼ Ἑρμᾶ, - καὶ τρύφος ἰπνεύτα πιαλέου φθόιος - πάρκειται, σῦκόν τε μελαντραγές, ἅ τε φιλουλὶς -δρύππα, καὶ τυρῶν δρύψια κυκλιάδων, -ἀκτά τε Κρηταιὶς, ἐυτριβέος τε ῥόειπα -θωμὸς, καὶ Βάκχου πῶμʼ ἐπιδορπίδιον - τοῖσιν ἅδοι καὶ Κύπρις, ἐμὰ θεός· ὔμμι δὲ ῥέξειν - φημὶ παρὰ κροκάλαις ἀργιπόδαν χίμαρον. -
-
- - -Leonidas - - -Λαθρίη, ἐκ πλανίου ταύτην χάριν ἔκ τε πενέστεω -κἠξ ὀλιγησιπύου δέξο Λεωνίδεω, -ψαιστά τε πιήεντα καὶ εὐθήσαυρον ἐλαίην, -καὶ τοῦτο χλωρὸν σῦκον ἀποκράδιον, -κεὐοίνου σταφυλῆς ἔχʼ ἀποσπάδα πεντάρραγον, -πότνια, καὶ σπονδὴν τήνδʼ ὑποπυθμίδιον. -ἢν δὲ μέ γʼ, ὡς ἐκ νούσου ἀνειρύσω, ὧδε καὶ ἐχθρῆς -ἐκ πενίης ῥύσῃ, δέξο χιμαιροθύτην. -
-
- - -Callimachus - - -τὴν ἁλίην Εὔδημος, ἀφʼ ἧς ἅλα λιτὸν ἐπέσθων - χειμῶνας μεγάλους ἐξέφυγεν δανέων, - θῆκε θεοῖς Σαμόθρᾳξι, λέγων ὅτι τήνδε, κατʼ εὐχήν, -ὦ μεγάλοι, σωθεὶς ἐξ ἁλός, ὧδʼ ἔθετο. -
-
- - -Leonidas - - -Φεύγεθʼ ὑπὲκ καλύβης, σκότιοι μύες· οὔτι πενιχρὴ - μῦς σιπύη βόσκειν οἶδε Λεωνίδεω. - -αὐτάρκης ὁ πρέσβυς ἔχων ἅλα καὶ δύο κρῖμνα· -ἐκ πατέρων ταύτην ᾐνέσαμεν βιοτήν. -τῷ τί μεταλλεύεις τοῦτον μυχόν, ὦ φιλόλιχνε, -οὐδʼ ἀποδειπνιδίου γευόμενος σκυβάλου; -σπεύδων εἰς ἄλλους οἴκους ἴθι ʽ τἀμὰ δὲ λιτἄ, -ὧν ἄπο πλειοτέρην οἴσεαι ἁρμαλιήν. -
-
- - -Ariston - - -μύες, εἰ μὲν ἐπʼ ἄρτον ἐληλύθατʼ, ἐς μυχὸν ἄλλον - στείχετʼ ʽ ἐπεὶ λιτὴν οἰκέομεν καλύβηνʼ, -οὗ καὶ πίονα τυρὸν ἀποδρέψεσθε καὶ αὔην - ἰσχάδα, καὶ δεῖπνον συχνὸν ἀπὸ σκυβάλων. -εἰ δʼ ἐν ἐμαῖς βίβλοισι πάλιν καταθήξετʼ ὀδόντα, - κλαύσεσθʼ, οὐκ ἀγαθὸν κῶμον ἐπερχόμενοι. -
-
- - -Phanias - - -Ἀκτῖτʼ ὦ καλαμευτά, ποτὶ ξερὸν ἔλθʼ ἀπὸ πέτρας, -καί με λάβʼ εὐάρχαν πρώιον ἐμπολέα. - αἴτε σὺ γʼ ἐν κύρτῳ μελανουρίδας, αἴτε τινʼ ἀγρεῖς - μορμύρον, ἢ κίχλην, ἢ σπάρον, ἢ σμαρίδα, -αἴσιον αὐδάσεις με τὸν οὐ κρέας, ἀλλὰ θάλασσαν - τιμῶντα, ψαφαροῦ κλάσματος εἰς ἀπάταν. - χαλκίδας ἢν δὲ φέρῃς φιλακανθίδας, ἤ τινα θρίσσαν, -εὐάγρει· λιθίναν οὐ γὰρ ἔχω φάρυγα. -
-
- - -Leonidas - - -Λαβροσύνᾳ τάδε δῶρα φιλευχύλῳ τε Λαφυγμῷ - θήκατο † δεισόζου Δωριέος κεφαλά· - -τὼς Λαρισσαίως βουγάστορας ἑψητῆρας, -καὶ χύτρως, καὶ τὰν εὐρυχαδῆ κύλικα, -καὶ τὰν εὐχάλκωτον ἐύγναμπτόν τε κρεάγραν, - καὶ κνῆστιν, καὶ τὰν ἐτνοδόνον τορύναν. -Λαβροσύνα;, σὺ δὲ ταῦτα κακοῦ κακὰ δωρητῆρος - δεξαμένα, νεύσαις μή ποκα σωφροσύναν. -
-
- - -Ariston - - -Χύτρον τοι, ταύτην τε κρεαγρίδα, καὶ βαθυκαμπῆ -κλεῖδα συῶν, καὶ τὰν ἐτνοδόνον τορύναν, -καὶ πτερίναν ῥιπῖδα, ταναίχαλκόν τε λέβητα, - σὺν πελέκει, καὶ τὰν λαιμοτόμον σφαγίδα, -ζωμοῦ τʼ ἀμφʼ ὀβελοῖσιν ἀρυστρίδα, τόν τε μαγῆα - σπόγγον ὑπὸ στιβαρᾷ κεκλιμένον κοπίδι, - καὶ τοῦτον δικάρανον ἁλοτρίβα, σὺν δὲ θυείαν - εὔπετρον, καὶ τὰν κρειοδόκον σκαφίδα, - οὑψοπόνος Σπίνθηρ Ἑρμῇ τάδε σύμβολα τέχνας -θήκατο, δουλοσύνας ἄχθος ἀπωσάμενος. -
-
- - -Phanias - - -Εὐγάθης Λαπιθανὸς ἐσοπτρίδα, καὶ φιλέθειρον - σινδόνα, καὶ πετάσου φάρσος ὑποξύριον, - καὶ ψήκτραν δονακῖτιν ἀπέπτυσε, καὶ λιποκόπτους -φασγανίδας, καὶ τοὺς συλόνυχας στόνυχας· - ἔπτυσε δὲ ψαλίδας, ξυρὰ καὶ θρόνον, εἰς δʼ Ἐπικούρου, -κουρεῖον προλιπών, ἅλατο κηπολόγος, - ἔνθα λύρας ἤκουεν ὅπως ὄνος· ὤλετο δʼ ἄν που - λιμώσσων, εἰ μὴ στέρξε παλινδρομίαν· - -
-
- - -Asclepiades - - -νικήσας τοὺς παῖδας, ἐπεὶ καλὰ γράμματʼ ἔγραψεν, -Κόνναρος ὀγδώκοντʼ ἀστραγάλους ἔλαβεν, -κἀμέ, χάριν Μούσαις, τὸν κωμικὸν ὧδε Χάρητα - πρεσβύτην θορύβῳ θήκατο παιδαρίων. -
-
- - -Leonidas - - -εὔφημόν τοι σφαῖραν, ἐυκρόταλόν τε Φιλοκλῆς - Ἑρμείῃ ταύτην πυξινέην πλατάγην, - ἀστραγάλας θʼ αἷς πόλλʼ ἐπεμήνατο, καὶ τὸν ἑλικτὸν - ῥόμβον, κουροσύνης παίγνιʼ ἀνεκρέμασεν. -
-
- - -Callimachus - - -Εὐμαθίην ᾐτεῖτο διδοὺς ἐμὲ Σῖμος ὁ Μίκκου - ταῖς Μούσαις· αἱ δέ, Γλαῦκος ὅκως, ἔδοσαν - ἀντʼ ὀλίγου μέγα δῶρον ἐγὼ δʼ ἀνὰ τῇδε κεχηνὼς - κεῖμαι τοῦ Σαμίου διπλόον, ὁ τραγικὸς -παιδαρίων Διόνυσος ἐπήκοος· οἱ δὲ λέγουσιν, - -ἱερὸς ὁ πλόκαμος, τοὐμὸν ὄνειαρ ἐμοί. -
-
- - -Callimachus - - -τῆς Ἀγοράνακτός με λέγε, ξένε, κωμικὸν ὄντως - ἀγκεῖσθαι νίκης μάρτυρα τοῦ Ῥοδίου - Πάμφιλον, οὐ μὲν ἔρωτι δεδαγμένον, ἥμισυ δʼ ὀπτῇ - ἰσχάδι καὶ λύχνοις Ἴσιδος εἰδόμενον. - -
-
- - -Anyte - - -ἡνία δή τοι παῖδες ἐνί, τράγε, φοινικόεντα - θέντες καὶ λασίῳ φιμὰ περὶ στόματι, - ἵππια παιδεύουσι θεοῦ περὶ ναὸν ἄεθλα, -ὄφρʼ αὐτοὺς ἐφορῇ νήπια τερπομένους. -
-
- - -Bacchylides - - -κούρα Πάλλαντος πολυώνυμε, πότνια Νίκα, - πρόφρων Καρθαίων ἱμερόεντα χορὸν - αἰὲν ἐποπτεύοις, πολέας δʼ ἐν ἀθύρμασι Μουσᾶν - Κηίῳ ἀμφιτίθει Βακχυλίδῃ στεφάνους. -
-
- - -Nicodemus - - -Πηνελόπη, τόδε σοὶ φᾶρος καὶ χλαῖναν Ὀδυσσεὺς - ἤνεγκεν, δολιχὴν ἐξανύσας ἀτραπόν. -
-
- - -Nicodemus - - -τὸν τραγόπουν ἐμὲ Πᾶνα, φίλον Βρομίοιο καὶ υἱὸν - Ἀρκάδος, ἀντʼ ἀλκᾶς ἔγραφεν Ὠφελίων. -
-
- - -Nicodemus - - -Ἀερόπης δάκρυον διερῆς, καὶ λείψανα δείπνων - δύσνομα, καὶ ποινὴν ἔγραφεν Ὠφελίων. - -
-
- - -Nicodemus - - -Πραξιτέλης ἔπλασε Δαναὴν καὶ φάρεα Νυμφῶν - λύγδινα, καὶ πέτρης Πᾶνʼ ἐμὲ Πεντελικῆς. -
-
- - -Nicodemus - - -Κύπριδι κουροτρόφῳ δάμαλιν ῥέξαντες ἔφηβοι - χαίροντες νύμφας ἐκ θαλάμων ἄγομεν. -
-
- - -Nicodemus - - -αἰθομέναις ὑπὸ δᾳσὶν ἐν εὐρυχόρῳ πατρὸς οἴκῳ -παρθένον ἐκ χειρῶν ἠγαγόμην ;Κύπριδος. -
-
- - -Nicodemus - - -Ἀσκανίη μέγα χαῖρε καλή, καὶ χρύσεα Βάκχου -ὄργια, καὶ μύσται πρόκριτοι Εὐίεω. -
-
- - -Julius Leonidas - - -θύει σοι τόδε γράμμα γενεθλιακαῖσιν ἐν ὥραις, - Καῖσαρ, Νειλαίη Μοῦσα Λεωνίδεω. - Καλλιόπης γὰρ ἄκαπνον ἀεὶ θύος. εἰς δὲ νέωτα, -ἢν ἐθέλῃς, θύσει τοῦδε περισσότερα. -
-
- - -Julius Leonidas - - -τήνδε Λεωνίδεω θαλερὴν πάλι δέρκεο Μοῦσαν, - δίστιχον εὐθίκτου παίγνιον εὐεπίης. - ἔσται δʼ ἐν Κρονίοις Μάρκῳ περικαλλὲς ἄθυρμα - τοῦτο, καὶ ἐν δείπνοις, καὶ παρὰ μουσοπόλοις - -
-
- - -Nicodemus - - -Ἀναστρέφον ἢ Ἀνακυκλικόν -Οἰδιπόδης κάσις ἦν τεκέων, καὶ μητέρι πόσσις - γίνετο, καὶ παλάμης ἦν τυφλὸς ἐκ σφετέρης. -
-
- - -Julius Leonidas - - -πέμματα τίς λιπόωντα, τίς Ἄρεϊ τῷ πτολιπόρθῳ - βότρυς, τίς δὲ ῥόδων θῆκεν ἐμοὶ κάλυκας; - νύμφαις ταῦτα φέροι τις ἀναιμάκτους δὲ θυηλὰς -οὐ δέχομαι βωμοῖς ὁ θρασύμητις Ἄρης. -
-
- - -Julius Leonidas - - -ἄλλος ἀπὸ σταλίκων, ὁ δʼ ἀπʼ ἠέρος, ὃς δʼ ἀπὸ πόντου, - Εὔπολι, σοὶ πέμπει δῶρα γενεθλίδια· - ἀλλʼ ἐμέθεν δέξαι Μουσῶν στίχον, ὅστις ἐς αἰεὶ - μίμνει, καὶ φιλίης σῆμα καὶ εὐμαθίης. -
-
- - -Julius Leonidas - - -Λὐκτιον ἰοδόκην καὶ καμπύλον, Ἄρτεμι, τόξον - Νῖκις ὁ Λυσιμάχου παῖς ἀνέθηκε Λίβυς· - ἰοὺς γὰρ πλήθοντας ἀεὶ λαγόνεσσι φαρέτρης -δορκάσι καὶ βαλίαις ἐξεκένως1ʼ ἐλάφοις. -
-
- - -Julius Leonidas - - -εἷς πρὸς ἕνα ψήφοισιν ἰσάζεται, οὐ δύο δοιοῖς -οὐ γὰρ ἔτι στέργω τὴν δολιχογραφίην. -
-
- - -Julius Leonidas - - -τὴν τριτάτην Χαρίτων ἀπʼ ἐμεῦ πάλι λάμβανε βύβλον, -Καῖσαρ ἰσηρίθμου σύμβολον εὐεπίης, - Νεῖλος ὅπως καὶ τήνδε διʼ Ἑλλάδος ἰθύνουσαν -τῇ χθονὶ σᾖ πέμψει δῶρον ἀοιδότατον. - -
-
- - -Julius Leonidas - - -ἄλλος μὲν κρύσταλλον, ὁ δʼ ἄργυρον, οἱ δὲ τοπάζους - πέμψουσιν, πλούτου δῶρα γενεθλίδια· -ἀλλʼ ἴδʼ Ἀγρειππίνῃ δύο δίστιχα μοῦνον ἰσώσας, -ἀρκοῦμαι δώροις, ἃ φθόνος οὐ δαμάσει. -
-
- - -Aeschines - - -θνητῶν μὲν τέχναις ἀπορούμενος, εἰς δὲ τὸ θεῖον - ἐλπίδα πᾶσαν ἔχων, προλιπὼν εὔπαιδας Ἀθήνας, - ἰάθην ἐλθών, Ἀσκληπιέ, πρὸς τὸ σὸν ἄλσος, -ἕλκος ἔχων κεφαλῆς ἐνιαύσιον, ἐν τρισὶ μησίν. -
-
- - -Gaetulicus I - - -παῖδα πατὴρ Ἄλκων ὀλοῷ σφιγχθέντα δράκοντι - ἀθρήσας, δειλῇ τόξον ἔκαμψε χερί· - θηρὸς δʼ οὐκ ἀφάμαρτε· διὰ στόματος γὰρ ὀιστὸς - ἤιξεν, τυτθοῦ βαιὸν ὕπερθε βρέφους. -παυσάμενος δὲ φόβοιο, παρὰ δρυῒ τῇδε φαρέτρην -σῆμα καὶ εὐτυχίης θῆκε καὶ εὐστοχίης, -
-
- - -Hadrianus Imperator - - -Ζηνὶ τόδʼ Αἰνεάδης Κασίῳ Τραϊανὸς ἄγαλμα, - κοίρανος ἀνθρώπων κοιράνῳ ἀθανάτων, - ἄνθετο, δοιὰ δέπα πολυδαίδαλα, καὶ βοὸς οὔρου - ἀσκητὸν χρυσῷ παμφανόωντι κέρας, -ἔξαιτα προτέρης ἀπὸ ληΐδος, ἦμος ἀτειρὴς - πέρσεν ὑπερθύμους ᾧ ὑπὸ δουρὶ Γέτας, - -ἀλλὰ σὺ οἱ καὶ τήνδε, Κελαινεφὲς, ἐγγυάλιξον -κρῆναι ἐυκλειῶς δῆριν Ἀχαιμενίην, -ὄφρα τοι εἰσορόωντι διάνδιχα θυμὸν ἰαίνῃ -δοιά, τὰ μὲν Γετέων σκῦλα, τὰ δʼ Ἀρσακιδέων. -
-
- - -Marcus Argentarius - - -ἤδη, φίλτατε λύχνε, τρὶς ἔπταρες· ἦ τάχα τερπνὴν -εἰς θαλάμους ἥξειν Ἀντιγόνην προλέγεις; -εἰ γάρ, ἄναξ, εἴη τόδʼ ἐτήτυμον, οἷος Ἀπόλλων - θνητοῖς μάντις ἔσῃ καὶ σὺ παρὰ τρίποδι. -
-
- - -Leonidas - - -αὔλια καὶ Νυμφέων ἱερὸς πάγος, αἳ θʼ ὑπὸ πέτρῃ - πίδακες, ἥ θʼ ὕδασιν γειτονέουσα πίτυς, - καὶ σὺ τετραγλώχιν, μηλοσσόε, Μαιάδος Ἑρμᾶ, -ὅς τε τὸν αἰγιβότην, Πάν, κατέχεις σκόπελον, -ἵλαοι τὰ ψαιστὰ τό τε σκύφος ἔμπλεον οἴνης - δέξασθʼ, Αἰακίδεω δῶρα Νεοπτολέμου. -
-
- - -Antipater - - -Καυσίη, ἡ τὸ πάροιθε Μακηδόσιν εὔκολον ὅπλον, -καὶ σκέπας ἐν νιφετῷ, καὶ κόρυς ἐν πολέμῳ, -ἱδρῶ διψήσασα πιεῖν τεόν, ἄλκιμε Πείσων, - Ἡμαθὶς Αὐσονίους ἦλθον ἐπὶ κροτάφους. -ἀλλὰ φίλος δέξαι με· τάχα κρόκες, αἵ ποτε Πέρσας -τρεψάμεναι, καὶ σοὶ Θρῇκας ὑπαξόμεθα. - -
-
- - -Theocritus - - -τὰ ῥόδα τὰ δροσόεντα, καὶ ἁ κατάπυκνος ἐκείνα -ἕρπυλλος κεῖται ταῖς Ἑλικωνιάσιν - ταὶ δὲ μελάμφυλλοι δάφναι τίν, Πύθιε Παιάν, - δελφὶς ἐπεὶ πέτρα τοῦτό τοι ἀγλάϊσεν. -βωμὸν δʼ αἱμάξει κεραὸς τράγος οὗτος ὁ μᾶλος, -τερμίνθου τρώγων ἔσχατον ἀκρεμόνα. -
-
- - -Theocritus - - -ἦλθε καὶ ἐς Μίλατον ὁ τῶ Παιήονος υἱός, - ἰητῆρι νόσων ἀνδρὶ συνοισόμενος, - Νικίᾳ, ὅς μιν ἐπʼ ἆμαρ ἀεὶ θυέεσσιν ἱκνεῖται, -καὶ τόδʼ ἀπʼ εὐώδους γλύψατʼ ἄγαλμα κέδρου, -Ἠετίωνι χάριν γλαφυρᾶς χερὸς ἄκρον ὑποστὰς -μισθὸν ὁ δʼ εἰς ἔργον πᾶσαν ἀφῆκε τέχναν. -
-
- - -Theocritus - - -ὑμῖν τοῦτο, θεαί, κεχαρισμένον ἄνθετο πάσαις -τὤγαλμα Ξενοκλῆς τοῦτο τὸ μαρμάρινον, - μουσικός· οὐχ ἑτέρως τις ἐρεῖ· σοφίᾳ δʼ ἐπὶ τᾷδε -αἶνον ἔχων, Μουσέων οὐκ ἐπιλανθάνεται. -
-
- - -Theocritus - - -Δαμομένης ὁ χοραγός, ὁ τὸν τρίποδʼ ὦ Διόνυσε, - καὶ σὲ τὸν ἅδιστον θεῶν μακάρων ἀναθείς, - μέτριος ἦν ἐν πᾶσι, χορῷ δʼ ἐκτήσατο νίκαν -ἀνδρῶν, καὶ τὸ καλὸν καὶ τὸ προσῆκον ὁρῶν. - -
-
- - -Theocritus - - -ἁ Κύπρις οὐ πάνδαμος· ἱλάσκεο τὰν θεόν, εἰπὼν -Οὐρανίαν, ἁγνᾶς ἄνθεμα Χρυσογόνας - οἴκῳ ἐν Ἀμφικλέους, ᾧ καὶ τέκνα, καὶ βίον ἔσχε - ξυνόν, ἀεὶ δέ σφιν λώιον εἰς ἔτος ἦν -ἐκ σέθεν ἀρχομένοις, ὦ πότνια· κηδόμενοι γὰρ - ἀθανάτων αὐτοὶ πλεῖον ἔχουσι βροτοί. -
-
- - -Anonymi Epigrammatici - - -Βόσπορον ἰχθυόεντα γεφυρώσας ἀνέθηκε - Μανδροκλέης Ἥρῃ, μνημόσυνον σχεδίας, - αὑτῷ μὲν στέφανον περιθείς, Σαμίοισι δὲ κῦδος, -Δαρείου βασιλέως ἐκτελέσας κατὰ νοῦν. -
-
- - -Anonymi Epigrammatici - - -ἄθρησον Χαρίτων ὑπὸ παστάδι τᾷδε τριήρους - στυλίδα· τᾶς πρώτας τοῦθʼ ὑπόδειγμα τέχνας· - ταύταν γὰρ πρώταν ποτʼ ἐμήσατο Παλλὰς Ἀθάνα, - τάνδε πόλει καλὰν ἀντιδιδοῦσα χάριν, -οὕνεκεν ὑψίστᾳ Τριτωνίδι νηὸν ἔτευξεν -Κύζικος ἅδʼ, ἱρᾷ πρῶτον ἐν Ἀσιάδι· -δεῖγμα δὲ καὶ πλίνθων χρυσήλατον ἤγαγεν ἄχθος -Δελφίδα γᾶν, Φοίβῳ τάνδε νέμουσα χάριν. -
-
- - -Anonymi Epigrammatici - - -ἔθνεα Βοιωτῶν καὶ Χαλκιδέων δαμάσαντες - παῖδες Ἀθηναίων ἔργμασιν ἐν πολέμου, - -δεσμῷ ἐν ἀχνυόεντι σιδηρέῳ ἔσβεσαν ὕβριν - τῶν ἵππους, δεκάτην Παλλάδι, τάσδʼ ἔθεσαν. -
-
- - -Anonymi Epigrammatici - - -Θεσπιαὶ εὐρύχοροι πέμψαν ποτὲ τούσδε σὺν ὅπλοις -τιμωροὺς προγόνων βάρβαρον εἰς Ἀσίην, -οἳ μετʼ Ἀλεξάνδρου Περσῶν ἄστη καθελόντες - στῆσαν Ἐριβρεμέτῃ δαιδάλεον τρίποδα. -
-
- - -Crinagoras - - -εἴαρος ἤνθει μὲν τὸ πρὶν ῥόδα, νῦν δʼ ἐνὶ μέσσῳ - χείματι πορφυρέας ἐσχάσαμεν κάλυκας, -σῇ ἐπιμειδήσαντα γενεθλίῃ ἄσμενα τῇδε - ἠοῖ, νυμφιδίων ἀσσοτάτῃ λεχέων. -καλλίστης ὀφθῆναι ἐπὶ κροτάφοισι γυναικὸς - λώιον ἢ μίμνειν ἠρινὸν ἠέλιον. -
-
- - -Anacreon - - -Τέλλιδι ἱμερόεντα βίον πόρε, Μαιάδος υἱέ, - ἀντʼ ἐρατῶν δώρων τῶνδε χάριν θέμενος· - δὸς δέ μιν εὐθυδίκων Εὐωνυμέων ἐνὶ δήμῳ - ναίειν, αἰῶνος μοῖραν ἔχοντʼ ἀγαθήν. -
-
- - -Callimachus - - -Ἄρτεμι, τὶν τόδʼ ἄγαλμα Φιληρατὶς εἵσατο τῇδε - ἀλλὰ σὺ μὲν δέξαι, πότνια, τὴν δὲ σάω. -
-
- - -Diodorus - - -αἴλινον ὠκυμόρῳ με λεχωίδι τοῦτο κεκόφθαι - τῆς Διοδωρείου γράμμα λέγει σοφίης, - -κοῦρον ἐπεὶ τίκτουσα κατέφθιτο παῖδα δὲ Μήλας - δεξάμενος θαλερὴν κλαίω Ἀθηναΐδα, -Λεσβιάδεσσιν ἄχος καὶ Ἰήσονι πατρὶ λιποῦσαν. -Ἄρτεμι, σοὶ δὲ κυνῶν θηροφόνων ἔμελεν. -
-
- - -Philodemus - - -Ἰνοῦς ὦ Μελικέρτα, σύ τε γλαυκὴ μεδέουσα -Λευκοθέη πόντου, δαῖμον ἀλεξίκακε, -Νηρῄδων τε χοροί, καὶ κύματα, καὶ σύ, Πόσειδον, -καὶ Θρήιξ, ἀνέμων πρηΰτατε, Ζέφυρε, -ἵλαοί με φέροιτε, διὰ πλατὺ κῦμα φυγόντα, -σῶον ἐπὶ γλυκερὰν ᾐόνα Πειραέως. -
-
- - -Crinagoras - - -Τυρσηνῆς κελάδημα διαπρύσιον σάλπιγγος, - πολλάκι Πισαίων στρηνὲς ὑπὲρ πεδίων - φθεγξαμένης, ὁ πρὶν μὲν ἔχει χρόνος ἐν δυσὶ νίκαις· -εἰ δὲ σὺ καὶ τρισσοὺς ἤγαγες εἰς στεφάνους -ἀστὸν Μιλήτου Δημοσθένεʼ, οὔ ποτε κώδων - χάλκεος ἠχήσει πλειοτέρῳ στόματι. -
-
- - -Callimachus - - - τίν με, λεοντάγχʼ ὦνα συοκτόνε, φήγινον ὄζον - θῆκε τίς; α. Ἀρχῖνος. β. ποῖος; α. ὁ Κρής. - δέχομαι. - -
-
- - -Erinna - - -ἐξ ἁπαλᾶν χειρῶν τάδε γράμματα· λῷστε Προμαθεῦ, - ἔντι καὶ ἄνθρωποι τὶν ὁμαλοὶ σοφίαν. - -ταύταν γοῦν ἐτύμως τὰν παρθένον ὅστις ἔγραψεν, -αἰ καὐδὰν ποτέθηκʼ, ἦς κʼ Ἀγαθαρχὶς ὅλα. -
-
- - -Nossis - - -Αὐτομέλιννα τέτυκται· ἴδʼ ὡς ἀγανὸν τὸ πρόσωπον - ἁμὲ ποτοπτάζειν μειλιχίως δοκέει· -ὡς ἐτύμως θυγάτηρ τᾷ ματέρι πάντα ποτῴκει. -ἦ καλὸν ὅκκα πέλῃ τέκνα γονεῦσιν ἴσα. -
-
- - -Nossis - - -γνωτὰ καὶ τηνῶθε Σαβαιθίδος εἴδεται ἔμμεν -ἅδʼ εἰκὼν μορφᾷ καὶ μεγαλειοσύνᾳ. - θάεο τὰν πινυτὰν τὸ δὲ μείλιχον αὐτόθι τήνας - ἔλπομʼ ὁρῆν χαίροις πολλά, μάκαιρα γύναι. -
-
- - -Leonidas - - -ἁ μάτηρ ζῷον τὸν Μίκυθον, οἷα πενιχρὰ - Βάκχῳ δωρεῖται, ῥωπικὰ γραψαμένα. - Βάκχε, σὺ δʼ ὑψῴης τὸν Μίκυθον εἰ δὲ τὸ δῶρον - ῥωπικόν, ἁ λιτὰ ταῦτα φέρει πενία. -
-
- - -Pancrates - - -Κλειοῦς αἱ δύο παῖδες Ἀριστοδίκη καὶ Ἀμεινὼ - Κρῆσσαι, πότνια, σῆς, Ἄρτεμι, νειοκόρου - τετραετεῖς ἀπὸ μητρός. ἴδοις, ὤνασσα, τὰ τῆσδε - εὔτεκνα, κἀντὶ μιῆς θὲς δύο νειοκόρους. - -
-
- - -Theaetetus - - - ὄλβια τέκνα γένοισθε· τίνος γένος ἐστέ; τί δʼ ὑμῖν - ὧδε καλοῖς χαρίεν κείμενὸν ἐστʼ ὄνομα; - “Νικάνωρ ἐγώ εἰμι, πατὴρ δέ μοι Αἰπιόρητος, - μήτηρ δʼ Ἡγησώ, κεἰμὶ γένος Μακεδών.” - καὶ μὲν ἐγὼ Φίλα εἰμί, καὶ ἐστί μοι οὗτος ἀδελφός -ἐκ δʼ εὐχῆς τοκέων ἕσταμες ἀμφότεροι.” -
-
- - -Diotimus - - -χαῖρέ μοι, ἁβρὲ κύπασσι, τὸν Ὀμφάλη ἥ ποτε Λυδὴ -λυσαμένη φιλότητʼ ἦλθεν ἐς Ἡρακλέους. -ὄλβιος ἦσθα, κύπασσι, καὶ ἐς τότε καὶ πάλιν, ὡς νῦν. -
-
-
- - - diff --git a/data/tlg7000/tlg001/tlg7000.tlg001.perseus-grc2.tracking.json b/data/tlg7000/tlg001/tlg7000.tlg001.perseus-grc2.tracking.json deleted file mode 100644 index 0935e6874..000000000 --- a/data/tlg7000/tlg001/tlg7000.tlg001.perseus-grc2.tracking.json +++ /dev/null @@ -1,14 +0,0 @@ -{ - "epidoc_compliant": false, - "fully_unicode": true, - "git_repo": "canonical-greekLit", - "has_cts_metadata": false, - "has_cts_refsDecl": false, - "id": "2008.01.0473", - "last_editor": "", - "note": "", - "src": "texts/sdl/Anth/02_gk.xml", - "status": "migrated", - "target": "canonical-greekLit/data/tlg7000/tlg001/tlg7000.tlg001.perseus-grc2.xml", - "valid_xml": true -} \ No newline at end of file diff --git a/data/tlg7000/tlg001/tlg7000.tlg001.perseus-grc2.xml b/data/tlg7000/tlg001/tlg7000.tlg001.perseus-grc2.xml deleted file mode 100644 index 03bd32d24..000000000 --- a/data/tlg7000/tlg001/tlg7000.tlg001.perseus-grc2.xml +++ /dev/null @@ -1,12784 +0,0 @@ - - - - - - - Ἀνθολογία, Volume II - William Roger Paton - Perseus Project, Tufts University - Gregory Crane - - Prepared under the supervision of - Lisa Cerrato - Rashmi Singhal - Bridget Almas - - The National Endowment for the Humanities - Google Digital Humanities Awards Program - - - - Trustees of Tufts University - Medford, MA - Perseus Digital Library Project - Perseus 4.0 - tlg7000.tlg001.perseus-grc7.xml - - Available under a Creative Commons Attribution-ShareAlike 4.0 International License - - - - - - - The Greek Anthology - William Roger Paton - - London - William Heinemann Ltd. - New York, NY - G. P. Putnam's Sons - 1917 - - 2 - - The Internet Archive - - - - - - - - -

optical character recognition

- - - - - - -

This pointer pattern extracts book and epigram.

- - -

This pointer pattern extracts book.

- - - - - - - Greek - Latin - - - - - Epidoc and CTS conversion and header review for best practices - tagged and parsed - - - - - -
- -
-
- - -Alcaeus - - - -ἡρώων τὸν ἀοιδὸν Ἴῳ ἔνι παῖδες Ὅμηρον -ἤκαχον, ἐκ Μουσέων γρῖφον ὑφηνάμενοι· -νέκταρι δʼ εἰνάλιαι Νηρηίδες ἐχρίσαντο, -καὶ νέκυν ἀκταίῃ θῆκαν ὑπὸ σπιλάδι, -ὅττι Θέτιν κύδηνε καὶ υἱέα, καὶ μόθον ἄλλων -ἡρώων, Ἰθακοῦ τʼ ἔργματα Λαρτιάδεω. -ὀλβίστη νήσων πόντῳ Ἴος, ὅττι κέκευθε -βαιὴ Μουσάων ἀστέρα καὶ Χαρίτων. -
-
- - -Antipater - - -τὰν μερόπων Πειθώ, τὸ μέγα στόμα, τὰν ἴσα Μούσαις -φθεγξαμέναν κεφαλάν, ὦ ξένε, Μαιονίδεω -ἅδʼ ἔλαχον νασῖτις Ἴου σπιλάς· οὐ γὰρ ἐν ἄλλᾳ -ἱερόν, ἀλλʼ ἐν ἐμοί, πνεῦμα θανὼν ἔλιπεν, - -ᾧ νεῦμα Κρονίδαο τὸ παγκρατές, ᾦ καὶ Ὄλυμπον -καὶ τὰν Αἴαντος ναύμαχον εἶπε βίαν, -καὶ τὸν Ἀχιλλείοις Φαρσαλίσιν Ἕκτορα, πώλοις -ὀστέα Δαρδανικῷ δρυπτόμενον πεδίῳ. -εἰ δʼ ὀλίγα κρύπτω τὸν ταλίκον, ἴσθʼ ὅτι κεύθει -καὶ Θέτιδος γαμέταν ἁ βραχύβωλος Ἴκος. -
-
- - -Antipater - - -εἰ καὶ βαιὸς ὁ τύμβος, ὁδοιπόρε, μή με παρέλθῃς, -ἀλλὰ κατασπείσας, ἶσα θεοῖσι σέβου· -τὸν γὰρ Πιερίδεσσι τετιμένον ἔξοχα Μούσαις -ποιητὴν ἐπέων θεῖον Ὅμηρον ἔχω. -
-
- - -Anonymi Epigrammatici - - -ἐνθάδε τὴν ἱερὴν κεφαλὴν κατὰ γαῖα καλύπτει, -ἀνδρῶν ἡρώων κοσμήτορα, θεῖον Ὅμηρον. -
-
- - -Paulus Silentiarius - - -ἐνθάδε Πιερίδων τὸ σοφὸν στόμα, θεῖον Ὅμηρον, -κλεινὸς ἐπʼ ἀγχιάλῳ τύμβος ἔχει σκοπέλῳ. -εἰ δʼ ὀλίγη γεγαυῖα τόσον χάδεν ἀνέρα νῆσος, -μὴ τόδε θαμβήσῃς, ὦ ξένε, δερκόμενος· -καὶ γὰρ ἀλητεύουσα κασιγνήτη ποτὲ Δῆλος -μητρὸς ἀπʼ ὠδίνων δέξατο Λητοΐδην. - -
-
- - -Anonymi Epigrammatici - - -Οὐδʼ εἴ με χρύσειον ἀπὸ ῥαιστῆρος Ὅμηρον -στήσητε φλογέαις ἐν Διὸς ἀστεροπαῖς, -οὐκ εἴμʼ οὐδʼ ἔσομαι Σαλαμίνιος, οὐδʼ ὁ Μέλητος -Δμησαγόρου· μὴ ταῦτʼ ὄμμασιν Ἑλλὰς ἴδοι. -ἄλλον ποιητὴν βασανίζετε· τἀμὰ δέ, Μοῦσαι -καὶ Χίος, Ἑλλήνων παισὶν ἀείσετʼ ἔπη. -
-
- - -Antipater - - -ἡρώων κάρυκʼ ἀρετᾶς, μακάρων δὲ προφήταν, -Ἑλλάνων βιοτᾷ δεύτερον ἀέλιον, -Μουσῶν φέγγος Ὅμηρον, ἀγήραντον στόμα κόσμου -παντός, ἁλιρροθία, ξεῖνε, κέκευθε κόνις. -
-
- - -Anonymi Epigrammatici - - -ἐνθάδε θεῖος Ὅμηρος, ὃς Ἑλλάδα πᾶσαν ἄεισε, -Θήβης ἐκγεγαὼς τῆς ἑκατονταπύλου. -
-
- - -Antipater - - -οὐκέτι θελγομένας, Ὀρφεῦ, δρύας, οὐκέτι πέτρας -ἄξεις, οὐ θηρῶν αὐτονόμους ἀγέλας· -οὐκέτι κοιμάσεις ἀνέμων βρόμον, οὐχὶ χάλαζαν, -οὐ νιφετῶν συρμούς, οὐ παταγεῦσαν ἅλα. - -ὤλεο γάρ· σὲ δὲ πολλὰ κατωδύραντο θύγατρες -Μναμοσύνας, μάτηρ δʼ ἔξοχα Καλλιόπα. -τί φθιμένοις στοναχεῦμεν ἐφʼ υἱάσιν, ἁνίκʼ ἀλαλκεῖν -τῶν παίδων Ἀΐδην οὐδὲ θεοῖς δύναμις ; -
-
- - -Damagetus - - -Ὀρφέα Θρηικίῃσι παρὰ προμολ̆σιν Ὀλύμπου -τύμβος ἔχει, Μούσης υἱέα Καλλιόπης, -ᾧ δρύες οὐκ ἀπίθησαν, ὅτῳ σὺν ἀμʼ ἕσπετο πέτρη -ἄψυχος, θηρῶν θʼ ὑλονόμων ἀγέλα, -ὅς ποτε καὶ τελετὰς μυστηρίδας εὕρετο Βάκχου, -καὶ στίγον ἡρῴῳ ζευκτὸν ἔτευξε ποδί, -ὃς καὶ ἀμειλίκτοιο βαρὺ Κλυμένοιο νόημα -καὶ τὸν ἀκήλητον θυμὸν ἔθελξε λύρᾳ. -
-
- - -Anonymi Epigrammatici - - - -Καλλιόπης Ὀρφῆα καὶ Οἰάγροιο θανόντα -ἔκλαυσαν ξανθαὶ μυρία Βιστονίδες· -στικτοὺς δʼ ᾑμάξαντο βραχίονας, ἀμφιμελαίνῃ -δευόμεναι σποδιῇ Θρηίκιον πλόκαμον· -καὶ δʼ αὐταὶ στοναχεῦντι σὺν εὐφόρμιγγι Λυκείῳ -ἔρρηξαν Μοῦσαι δάκρυα Πιερίδες, -μυρόμεναι τὸν ἀοιδὸν ἐπωδύραντο δὲ πέτραι -καὶ δρύες, ἃς ἐρατῇ τὸ πρὶν ἔθελγε λύρῃ. -
-
- - -Asclepiades - - -Ὁ γλυκὺς Ἠρίννης οὗτος πόνος, οὐχὶ πολὺς μέν, -ὡς ἂν παρθενικᾶς ἐννεακαιδεκέτευς, - -ἀλλʼ ἑτέρων πολλῶν δυνατώτερος· εἰ δʼ Ἀίδας μοι -μὴ ταχὺς ἦλθε, τίς ἂν ταλίκον ἔσχʼ ὄνομα; -
-
- - -Anonymi Epigrammatici - - -ἄρτι λοχευομένην σε μελισσοτόκων ἔαρ ὕμνων, -ἄρτι δὲ κυκνείῳ φθεγγομένην στόματι, -ἤλασεν εἰς Ἀχέροντα διὰ πλατὺ κῦμα καμόντων -μοῖρα, λινοκλώστου δεσπότις ἠλακάτης· -σὸς δʼ ἐπέων, Ἤριννα, καλὸς πόνος οὔ σε γεγωνεῖ -φθίσθαι, ἔχειν δὲ χοροὺς ἄμμιγα Πιερίσιν. -
-
- - -Meleager - - -Παρθενικὰν νεαοιδὸν ἐν ὑμνοπόλοισι μέλισσαν -Ἤρινναν, Μουσῶν ἄνθεα δρεπτομέναν, -ᾍδας εἰς ὑμέναιον ἀνάρπασεν. ἦ ῥα τόδʼ ἔμφρων -εἶπʼ ἐτύμως ἁ παῖς. βάσκανός ἐσς1ʼ, Ἀίδα. - -
-
- - -Antipater - - -Σαπφώ τοι κεύθεις, χθὼν Αἰολί, τὰν μετὰ Μούσαις -ἀθανάταις θνατὰν Μοῦσαν ἀειδομέναν, -ἃν Κύπρις καὶ Ἔρως συνάμʼ ἔτραφον, ἇς μέτα Πειθὼ -ἔπλεκʼ ἀείζωον Πιερίδων στέφανον, -Ἑλλάδι μὲν τέρψιν, σοὶ δὲ κλέος. ὦ τριέλικτον -Μοῖραι δινεῦσαι νῆμα κατʼ ἠλακάτας, -πῶς οὐκ ἐκλώσασθε πανάφθιτον ἦμαρ ἀοιδῷ -ἄφθιτα μησαμένᾳ δῶρʼ Ἑλικωνιάδων ; - -
-
- - -Antipater - - -οὔνομά μευ Σαπφώ. τόσσον δʼ ὑπερέσχον ἀοιδὰν -θηλειᾶν, ἀνδρῶν ὅσσον ὁ Μαιονίδας. -
-
- - -Pinytus - - -ὀστέα μὲν καὶ κωφὸν ἔχει τάφος οὔνομα Σαπφοῦς· -αἱ δὲ σοφαὶ κείνης ῥήσιες ἀθάνατοι. -
-
- - -Tullius Laurea - - -Αἰολικὸν παρὰ τύμβον ἰών, ξένε, μή με θανοῦσαν -τὰν Μυτιληναίαν ἔννεπʼ ἀοιδοπόλον -τόνδε γὰρ ἀνθρώπων ἔκαμον χέρες· ἔργα δὲ φωτῶν -ἐς ταχινὴν ἔρρει τοιάδε ληθεδόνα. -ἢν δέ με Μουσάων ἐτάσῃς χάριν, ὧν ἀφʼ ἑκάστης -δαίμονος ἄνθος ἐμῇ θῆκα παρʼ ἐννεάδι, -γνώσεαι ὡς Ἀίδεω σκότον ἔκφυγον οὐδέ τις ἔσται -τῆς λυρικῆς Σαπφοῦς νώνυμος ἠέλιος. -
-
- - -Antipater - - -ἀνέρα μὴ πέτρῃ τεκμαίρεο. λιτὸς ὁ τύμβος -ὀφθῆναι, μεγάλου δʼ ὀστέα φωτὸς ἔχει. -εἰδήσεις Ἀλκμᾶνα, λύρης ἐλατῆρα Λακαίνης -ἔξοχον, ὃν Μουσέων ἐννέʼ ἀριθμὸς ἔχει· -κεῖται δʼ ἠπείροις διδύμοις ἔρις, εἴθʼ ὅγε Λυδὸς, -εἴτε Λάκων πολλαὶ μητέρες ὑμνοπόλων. - -
-
- - -Leonidas - - -τὸν χαρίεντʼ Ἀλκμᾶνα, τὸν ὑμνητῆρʼ ὑμεναίων -κύκνον, τὸν Μουσῶν ἄξια μελψάμενον, -τύμβος ἔχει, Σπάρτας μεγάλαν χάριν, †εἰθʼ ὅ γε λοῖσθος -ἄχθος ἀπορρίψας οἴχεται εἰς Ἀίδαν. -
-
- - -Simonides - - -Ἐσβέσθης, γηραιὲ Σοφόκλεες, ἄνθος ἀοιδῶν, -οἰνωπὸν Βάκχου βότρυν ἐρεπτόμενος. -
-
- - -Simmias - - -τόν σὲ χοροῖς μέλψαντα Σοφοκλέα, παῖδα Σοφίλλου, -τὸν τραγικῆς Μούσης ἀστέρα Κεκρόπιον, -πολλάκις ὃν θυμέλῃσι καὶ ἐν σκηνῇσι τεθηλὼς -βλαισὸς· Ἀχαρνίτης κισσὸς ἔρεψε κόμην, -τύμβος ἔχει καὶ γῆς ὀλίγον μέρος· ἀλλʼ ὁ περισσὸς -αἰὼν ἀθανάτοις δέρκεται ἐν σελίσιν. -
-
- - -Simmias - - -ἠρέμʼ ὑπὲρ τύμβοιο Σοφοκλέος, ἠρέμα, κισσέ -ἑρπύζοις, χλοεροὺς ἐκπροχέων πλοκάμους, -καὶ πέταλον πάντῃ θάλλοι ῥόδου, ἥ τε φιλορρὼξ -ἄμπελος, ὑγρὰ πέριξ κλήματα χευαμένη, -εἵνεκεν εὐεπίης πινυτόφρονος, ἣν ὁ μελιχρὸς -ἤσκης1ʼ ἐκ Μουσέων ἄμμιγα καὶ Χαρίτων. - -
-
- - -Antipater - - -θάλλοι τετρακόρυμβος, Ἀνάκρεον, ἀμφὶ σὲ κισσός, -ἁβρά τε λειμώνων πορφυρέων πέταλα· -πηγαὶ δʼ ἀργινόεντος ἀναθλίβοιντο γάλακτος, -εὐῶδες δʼ ἀπὸ γῆς ἡδὺ χέοιτο μέθυ, -ὄφρα κέ τοι σποδιή τε καὶ ὀστέα τέρψιν ἄρηται, -εἰ δή τις φθιμένοις χρίμπτεται εὐφροσύνα. -
-
- - -Anonymi Epigrammatici - - -ὦ τὸ φίλον στέρξας, φίλε, βάρβιτον, ὦ σὺν ἀοιδᾷ -πάντα διαπλώσας καὶ σὺν ἔρωτι βίον. -
-
- - -Simonides - - -Ἡμερὶ πανθέλκτειρα, μεθυτρόφε, μῆτερ ὀπώρας, -οὔλης ἣ σκολιὸν πλέγμα φύεις ἕλικος, -Τηίου ἡβήσειας Ἀνακρείοντος ἐπʼ ἄκρῃ -στήλῃ καὶ λεπτῷ χώματι τοῦδε τάφου, -ὡς ὁ φιλάκρητός τε καὶ οἰνοβαρὴς φιλοκώμοις -παννυχίσιν κρούων τὴν φιλόπαιδα χέλυν, -κἠν χθονὶ πεπτηὼς, κεφαλῆς ἐφύπερθε φέροιτο -ἀγλαὸν ὡραίων βότρυν ἀπʼ ἀκρεμόνων, -καί μιν ἀεὶ τέγγοι νοτερὴ δρόσος, ἧς ὁ γεραιὸς -λαρότερον μαλακῶν ἔπνεεν ἐκ στομάτων. -
-
- - -Simonides - - -οὗτος Ἀνακρείοντα, τὸν ἄφθιτον εἵνεκα Μουσέων -ὑμνοπόλον, πάτρης τύμβος ἔδεκτο Τέω, - -ὃς Χαρίτων πνείοντα μέλη, πνείοντα δʼ Ἐρώτων, -τὸν γλυκὺν ἐς παίδων ἵμερον ἡρμόσατο. -μοῦνος δʼ εἰν Ἀχέροντι βαρύνεται, οὐχ ὅτι λείπων -ἠέλιον, Λήθης ἐνθάδʼ ἔκυρσε δόμων -ἀλλʼ ὅτι τὸν χαρίεντα μετʼ ἠιθέοισι Μεγιστέα, -καὶ τὸν Σμερδίεω Θρῇκα λέλοιπε πόθον. -μολπῆς δʼ οὐ λήγει μελιτερπέος, ἀλλʼ ἔτʼ ἐκεῖνον -βάρβιτον οὐδὲ θανὼν εὔνασεν εἰν Ἀίδῃ. -
-
- - -Antipater - - -ξεῖνε, τάφον παρὰ λιτὸν Ἀνακρείοντος ἀμείβων, -εἲ τί τοι ἐκ βίβλων ἦλθεν ἐμῶν ὄφελος, -σπεῖσον ἐμῇ σποδιῇ σπεῖσον γάνος, ὄφρα κεν οἴνῳ -ὀστέα γηθήσῃ τἀμὰ νοτιζόμενα, -ὡς ὁ Διωνύσου μεμελημένος εὐάσι κώμοις, -ὡς ὁ φιλακρήτου σύντροφος ἁρμονίης -μηδὲ καταφθίμενος Βάκχου δίχα τοῦτον ὑποίσω -τὸν γενεῇ μερόπων χῶρον ὀφειλόμενον. -
-
- - -Antipater - - -εἴης ἐν μακάρεσσιν, Ἀνάκρεον, εὖχος Ἰώνων, -μήτʼ ἐρατῶν κώμων ἄνδιχα, μήτε λύρης· -ὑγρὰ δὲ δερκομένοισιν ἐν ὄμμασιν οὖλον ἀείδοις, -αἰθύσσων λιπαρῆς ἄνθος ὕπερθε κόμης, -ἠὲ πρὸς Εὐρυπύλην τετραμμένος, ἠὲ Μεγιστῆ, -ἢ Κίκονα Θρῃκὸς Σμερδίεω πλόκαμον, -ἡδὺ μέθυ βλύζων, ἀμφίβροχος εἵματα Βάκχῳ, -ἄκρητον λείβων νέκταρ ἀπὸ στολίδων. -τρισσοῖς γάρ, Μούσαισι, Διωνύσῳ καὶ Ἔρωτι, -πρέσβυ, κατεσπείσθη πᾶς ὁ τεὸς βίοτος. - -
-
- - -Anonymi Epigrammatici - - -ὦ ξένε, τόνδε τάφον τὸν Ἀνακρείοντος ἀμείβων, -σπεῖσόν μοι παριών εἰμὶ γὰρ οἰνοπότης. -
-
- - -Antipater - - -εὕδεις ἐν φθιμένοισιν, Ἀνάκρεον, ἐσθλὰ πονήσας, -εὕδει δʼ ἡ γλυκερὴ νυκτιλάλος κιθάρη· -εὕδει καὶ Σμέρδις, τὸ Πόθων ἔαρ, ᾧ σὺ μελίσδων -βάρβιτʼ ἀνεκρούου νέκταρ ἐναρμόνιον. -ἠϊθέων γὰρ Ἔρωτος ἔφυς σκοπός· εἰς δὲ σὲ μοῦνον -τόξα τε καὶ σκολιὰς εἶχεν ἑκηβολίας. -
-
- - -Antipater - - -τύμβος Ἀνακρείοντος· ὁ Τήιος ἐνθάδε κύκνος -εὕδει, χἠ παίδων ζωροτάτη μανίη. -ἀκμὴν οἱ λυρόεν τι μελίζεται ἀμφὶ Βαθύλλῳ -ἵμερα, καὶ κισσοῦ λευκὸς ὄδωδε λίθος. -οὐδʼ Ἀίδης σοι ἔρωτας ἀπέσβεσεν, ἐν δʼ Ἀχέροντος -ὢν ὅλος ὠδίνεις κύπριδι θερμοτέρῃ. -
-
- - -Dioscorides - - -Σμερδίῃ ὦ ἐπὶ Θρῃκὶ τακεὶς καὶ ἐπʼ ἔσχατον ὀστεῦν, -κώμου καὶ πάσης κοίρανε παννυχίδος, - -τερπνότατε Μούσῃσιν Ἀνάκρεον, ὦ πὶ Βαθύλλῳ -χλωρὸν ὑπὲρ κυλίκων πολλάκι δάκρυ χέας, -αὐτόματαί τοι κρῆναι ἀναβλύζοιεν ἀκρήτου, -κἠκ μακάρων προχοαὶ νέκταρος ἀμβροσίου; -αὐτόματοι δὲ φέροιεν ἴον, τὸ φιλέσπερον ἄνθος, -κῆποι, καὶ μαλακῇ μύρτα τρέφοιτο δρόσῳ· -ὄφρα καὶ ἐν Δηοῦς οἰνωμένος ἁβρὰ χορεύσῃς, -βεβληκὼς χρυσέην χεῖρας ἐπʼ Εὐρυπύλην. -
-
- - -Julianus - - -πολλάκι μὲν τόδʼ ἄεισα, καὶ ἐκ τύμβου δὲ βοήσω· - - πίνετε, πρὶν ταύτην ἀμφιβάλησθε, κόνιν, - -
-
- - -Julianus - - - - πολλὰ πιὼν τέθνηκας, Ἀνάκρεον. ἀλλὰ τρυφήσας· -καὶ σὺ δὲ μὴ πίνων ἵξεαι εἰς Ἀίδην. -
-
- - -Antipater - - -Πιερικὰν σάλπιγγα, τὸν εὐαγέων βαρὺν ὕμνων -χαλκευτάν, κατέχει Πίνδαρον ἅδε κόνις, -οὗ μέλος εἰσαΐων φθέγξαιό κεν, ὥς ἀπὸ Μουσῶν -ἐν Κάδμου θαλάμοις σμῆνος ἀπεπλάσατο. - -
-
- - -Leonidas - - -ἄρμενος ἦν ξείνοισιν ἀνὴρ ὅδε καὶ φίλος ἀστοῖς, -Πίνδαρος, εὐφώνων Πιερίδων· πρόπολος. -
-
- - -Erycius - - -αἰεί τοι λιπαρῷ ἐπὶ σήματι, δῖε Σοφόκλεις, -σκηνίτης μαλακοὺς κισσὸς ἅλοιτο πόδας, -αἰεί τοι βούπαισι περιστάζοιτο μελίσσαις -τύμβος, Ὑμηττείῳ λειβόμενος μέλιτι, -ὡς ἄν τοι ῥείῃ μὲν ἀεὶ γάνος Ἀτθίδι δέλτῳ -κηρός, ὑπὸ στεφάνοις δʼ αἰὲν ἔχῃς πλοκάμους. -
-
- - -Dioscorides - - - - τύμβος ὅδʼ ἔστʼ, ὤνθρωπε, Σοφοκλέος, ὃν παρὰ Μουσέων -ἱρὴν παρθεσίην, ἱερὸς ὢν, ἔλαχον· -ὅς με τὸν ἐκ Φλιοῦντος, ἔτι τρίβολον πατέοντα, -πρίνινον, ἐς χρύσεον σχῆμα μεθηρμόσατο, -καὶ λεπτὴν ἐνέδυσεν ἁλουργίδα· τοῦ δὲ θανόντος -εὔθετον ὀρχηστὴν τῇδʼ ἀνέπαυσα πόδα. - - - ὄλβιος, ὡς ἁγνὴν ἔλαχες στάσιν ἡ δʼ ἐνὶ χερσὶν -κούριμος, ἐκ ποίης ἥδε διδασκαλίης; - - εἴτε σοὶ Ἀντιγόνην εἰπεῖν φίλον, οὐκ ἂν ἁμάρτοις, -εἴτε καὶ Ἠλέκτραν ἀμφότεραι γάρ ἄκρον. -
-
- - -Diodorus - - -θεῖος Ἀριστοφάνευς ὑπʼ ἐμοὶ νέκυς· εἰ τινα πεύθῃ], -κωμικός, ἀρχαίης μνᾶμα χοροστασίης. -
-
- - -Antipater - - -ὁ τραγικὸν φώνημα καὶ ὀφρυόεσσαν ἀοιδὴν -πυργώσας στιβαρῇ πρῶτος ἐν εὐεπίῃ, -Αἰσχύλος Εὐφορίωνος, Ἐλευσινίης ἑκὰς αἴης -κεῖται, κυδαίνων σήματι Τρινακρίην. -
-
- - -Diodorus - - -Αἰσχύλον ἥδε λέγει ταφίη λίθος ἐνθάδε κεῖσθαι -τὸν μέγαν, οἰκείης τῆλʼ ἀπὸ Κεκροπίης, -λευκὰ Γέλα Σικελοῖο παρʼ ὕδατα· τίς φθόνος, αἰαῖ, -Θησείδας ἀγαθῶν ἔγκοτος αἰὲν ἔχει; -
-
- - -Anonymi Epigrammatici - - -ἆ μάκαρ ἀμβροσίῃσι συνέστιε φίλτατε Μούσαις, -χαῖρε καὶ εἰν Ἀίδεω δώμασι, Καλλίμαχε, - -
-
- - -Anonymi Epigrammatici - - -ἆ μέγα Βαττιάδαο σοφοῦ περίπυστον ὄνειαρ, -ἦ ῥʼ ἐτεὸν κεράων, οὐδʼ ἐλέφαντος ἔης. -τοῖα γὰρ ἄμμιν ἔφηνας, ἅτʼ οὐ πάρος ἀνέρες ἴδμεν, -ἀμφί τε ἀθανάτους, ἀμφί τε ἡμιθέους, -εὖτέ μιν ἐκ Λιβύης ἀναείρας εἰς Ἑλικῶνα -ἤγαγες ἐν μέσσαις Πιερίδεσσι φέρων -αἱ δʼ οἱ εἰρομένῳ ἀμφʼ ὠγυγίων ἡρώων -αἴτια καὶ μακάρων εἶρον ἀμειβόμεναι. -
-
- - -Ion - - -χαῖρε μελαμπετάλοις, Εὐριπίδη, ἐν γυάλοισι -Πιερίας τὸν ἀεὶ νυκτὸς ἔχων θάλαμον -ἴσθι δʼ ὑπὸ χθονὸς ὤν, ὅτι σοι κλέος ἄφθιτον ἔσται -ἶσον Ὁμηρείαις ἀενάοις χάρισιν. -
-
- - -Anonymi Epigrammatici - - -εἰ καὶ δακρυόεις, Εὐριπίδη, εἷλέ σε πότμος, -καί σε λυκορραῖσται δεῖπνον ἔθεντο κύνες, -τὸν σκηνῇ μελίγηρυν ἀηδόνα, κόσμον Ἀθηνῶν, -τὸν σοφίῃ Μουσέων μιξάμενον χάριτα, -ἀλλʼ ἔμολες Πελλαῖον ὑπʼ ἠρίον, ὡς ἂν ὁ λάτρις -Πιερίδων ναίῃς ἀγχόθι Πιερίδων. - -
-
- - -Thucydides - - -μνῆμα μὲν Ἑλλὰς ἅπας1ʼ Εὐριπίδου· ὀστέα δʼ ἴσχει -γῆ Μακεδών ἢ γὰρ δέξατο τέρμα βίου. -πατρὶς δʼ Ἑλλάδος Ἑλλάς, Ἀθῆναι· πλεῖστα δε Μούσαις -τέρψας, ἐκ πολλῶν καὶ τὸν ἔπαινον ἔχει. -
-
- - -Anonymi Epigrammatici - - -οὐ σὸν μνῆμα τόδʼ ἔστʼ, Εὐριπίδη, ἀλλὰ σὺ τοῦδε· -τῇ σῇ γὰρ δόξῃ μνῆμα τόδʼ ἀμπέχεται. -
-
- - -Anonymi Epigrammatici - - -ἅπας1ʼ Ἀχαιὶς μνῆμα σόν, Εὐριπίδη· -οὔκουν ἄφωνος, ἀλλὰ καὶ λαλητέος. -
-
- - -Anonymi Epigrammatici - - -Αἰθαλέοιο πυρὸς σάρκες ῥιπῇσι τρυφηλαὶ -ληφθεῖσαι, νοτίην ὦσαν ἄπʼ αἰθόμεναι· -μοῦνα δʼ ἔνεστι τάφῳ πολυδακρύῳ ὀστέα κωφά, -καὶ πόνος εἰνοδίοις τῇδε παρερχομένοις. -
-
- - -Bianor - - -ἁ Μακέτις σε κέκευθε τάφου κόνις· ἀλλὰ πυρωθεὶς -Ζανὶ κεραυνείῳ, γαῖαν ἀπημφίασας. -τρὶς γὰρ ἐπαστράψας, Εὐριπίδη, ἐκ Διὸς αἰθὴρ -ἥγνισε τὰν θνατὰν σώματος ἱστορίαν - -
-
- - -Archimelus - - -τὴν Εὐριπίδεω μήτʼ ἔρχεο, μήτʼ ἐπιβάλλου, -δύσβατον ἀνθρώποις οἶμον, ἀοιδοθέτα. -λείη μὲν γὰρ ἰδεῖν καὶ ἐπίρροθος· ἢν δέ τις αὐτὴν -εἰσβαίνῃ, χαλεποῦ τρηχυτέρη σκόλοπος· -ἢν δὲ τὰ Μηδείης Αἰητίδος ἄκρα χαράξῃς, -ἀμνήμων κείσῃ νέρθεν. ἔα στεφάνους. -
-
- - -Adaeus - - -οὔ σε κυνῶν γένος εἷλʼ, Εὐριπίδη, οὐδὲ γυναικὸς -οἶστρος, τὸν σκοτίης Κύπριδος ἀλλότριον, -ἀλλʼ Ἀίδης καὶ γῆρας· ὑπαὶ Μακέτῃ δʼ Ἀρεθούσῃ -κεῖσαι, ἑταιρείῃ τίμιος Ἀρχέλεω. -σὸν δʼ οὐ τοῦτον ἐγὼ τίθεμαι τάφον, ἀλλὰ τὰ Βάκχου -βήματα καὶ σκηνὰς ἐμβάδʼ ˘ ἐρειδομένας. -
-
- - -Demiurgus - - -Ἑλλάδος εὐρυχόρου στέφανον καὶ κόσμον ἀοιδῆς, -Ἀσκραῖον γενεὴν Ἡσίοδον κατέχω. -
-
- - -Anonymi Epigrammatici - - -Ἡσίοδος Μούσαις Ἑλικωνίσι τόνδʼ ἀνέθηκα, -ὕμνῳ νικήσας ἐν Χαλκίδι θεῖον Ὅμηρον. - -
-
- - -Mnasalces - - -Ἄσκρη μὲν πατρὶς πολυλήιος, ἀλλὰ θανόντος -ὀστέα πληξίππων γῆ Μινυῶν κατέχει -Ἡσιόδου, τοῦ πλεῖστον ἐν ἀνθρώποις κλέος ἐστὶν -ἀνδρῶν κρινομένων ἐν βασάνῳ σοφίης. -
-
- - -Alcaeus - - -Λοκρίδος ἐν νέμεϊ σκιερῷ νέκυν Ἡσιόδοιο -νύμφαι κρηνίδων λοῦσαν ἀπὸ σφετέρων, -καὶ τάφον ὑψώσαντο· γάλακτι δὲ ποιμένες αἰγῶν -ἔρραναν, ξανθῷ μιξάμενοι μέλιτι· -τοίην γὰρ καὶ γῆρυν ἀπέπνεεν ἐννέα Μουσέων -ὁ πρέσβυς καθαρῶν γευσάμενος λιβάδων. -
-
- - -Anonymi Epigrammatici - - -ἦν ἄρα Δημοκρίτοιο γέλως τόδε, καὶ τάχα λέξει· -“ οὐκ ἔλεγον γελόων, Πάντα πέλουσι γέλως; - καὶ γὰρ ἐγὼ σοφίην μετʼ ἀπείρονα, καὶ στίχα βίβλων - τοσσατίων, κεῖμαι νέρθε τάφοιο γέλως.” -
-
- - -Diogenes Laertius - - -καὶ τίς ἔφυ σοφὸς ὧδε; τίς ἔργον ἔρεξε τοσοῦτον, -ὅσσον ὁ παντοδαὴς ἤνυσε Δημόκριτος; - -ὃς θάνατον παρεόντα τρίʼ ἤματα δώμασιν ἔσχεν, -καὶ θερμοῖς ἄρτων ἄσθμασιν ἐξένισεν. -
-
- - -Julianus - - -εἰ καὶ ἀμειδήτων νεκύων ὑπὸ γαῖαν ἀνάσσεις, -Φερσεφόνη, ψυχὴν δέχνυσο Δημοκρίτου -εὐμενέως γελόωσαν, ἐπεὶ καὶ σεῖο τεκοῦσαν -ἀχνυμένην ἐπὶ. σοὶ μοῦνος ἔκαμψε γέλως. -
-
- - -Julianus - - -Πλούτων δέξο μάκαρ Δημόκριτον, ὥς κεν ἀνάσσων -αἰὲν ἀμειδήτων καὶ γελόωντα λάχοις. -
-
- - -Simmias - - -σωφροσύνῃ προφέρων θνητῶν ἤθει τε δικαίῳ -ἐνθάδε κεῖται ἀνὴρ θεῖος Ἀριστοκλέης -εἰ δέ τις ἐκ πάντων σοφίης μέγαν ἔσχεν ἔπαινον, -οὗτος ἔχει πλεῖστον, καὶ φθόνον οὐ φέρεται. -
-
- - -Anonymi Epigrammatici - - -γαῖα μὲν ἐν κόλποις κρύπτει τόδε σῶμα Πλάτωνος, -ψυχὴ δʼ ἀθάνατον τάξιν ἔχει μακάρων - -υἱοῦ Ἀρίστωνος, τόν τις καὶ τηλόθι ναίων -τιμᾷ ἀνὴρ ἀγαθός, θεῖον ἰδόντα βίον. -
-
- - -Anonymi Epigrammatici - - - - - αἰετέ, τίπτε βέβηκας ὑπὲρ τάφον ; ἢ τίνος, εἰπέ, -ἀστερόεντα θεῶν οἶκον ἀποσκοπέεις; - - ψυχῆς εἰμι Πλάτωνος ἀποπταμένης ἐς Ὄλυμπον -εἰκών· σῶμα δὲ γῆ γηγενὲς Ἀτθὶς ἔχει. -
-
- - -Anonymi Epigrammatici - - -τὸν κύνα Διογένη, νεκυοστόλε, δέξο με, πορθμεῦ, -γυμνώσαντα βίου παντὸς ἐπισκύνιον. -
-
- - -Anonymi Epigrammatici - - - - εἰπέ, κύον, τίνος ἀνδρὸς· ἐφεστὼς σῆμα φυλάσσεις; - - τοῦ Κυνός. ἀλλὰ τίς ἦν οὗτος ἀνὴρ ὁ κύων; - - Διογένης. γένος εἰπέ. Σίνωπεύς. ὃς -πίθον ᾤκει ; - - καὶ μάλα· νῦν δὲ θανὼν ἀστέρας οἶκον ἔχει. -
-
- - -Antipater - - -Διογένευς τόδε σῆμα, σοφοῦ κυνός, ὅς ποτε θυμῷ -ἄρσενι γυμνήτην ἐξεπόνει βίοτον, - -ᾧ μία τις πήρα, μία διπλοΐς, εἷς ἅμʼ ἐφοίτα -σκίπων, αὐτάρκους ὅπλα σαοφροσύνας. -ἀλλὰ τάφου τοῦδʼ ἐκτὸς ἴτʼ, ἄφρονες, ὡς ὁ Σινωπεὺς -ἐχθαίρει φαῦλον πάντα καὶ εἰν Ἀίδῃ. -
-
- - -Honestus - - -βάκτρον καὶ πήρη καὶ διπλόον εἷμα σοφοῖο -Διογένευς βιότου φόρτος ὁ κουφότατος. -πάντα φέρω πορθμῆι· λέλοιπα γὰρ οὐδὲν ὑπὲρ γῆς· -ἀλλὰ κύον σαίνοις Κέρβερε τόν με κύνα. -
-
- - -Leonidas - - -Ἀίδεω λυπηρὲ διήκονε, τοῦτʼ Ἀχέροντος -ὕδωρ ὃς πλώεις πορθμίδι κυανέῃ, -δέξαι μʼ, εἰ καί σοι μέγα βρίθεται ὀκρυόεσσα -βᾶρις ἀποφθιμένων, τὸν κύνα Διογένην. -ὄλπη μοι καὶ πήρη ἐφόλκια, καὶ τὸ παλαιὸν -ἔσθος, χὠ φθιμένους ναυστολέων ὀβολός. -πάνθʼ ὅσα κἠν ζωοῖς ἐπεπάμεθα, ταῦτα παρʼ ᾍδαν -ἔρχομʼ ἔχων λείπω δʼ οὐδὲν ὑπʼ ἠελίῳ. -
-
- - -Archias - - -Ἄϊδος ὦ νεκυηγέ, κεχαρμένε δάκρυσι πάντων, -ὃς βαθὺ πορθμεύεις τοῦτʼ Ἀχέροντος ὕδωρ, -εἰ καί σοι βέβριθεν ὑπʼ εἰδώλοισι καμόντων -ὁλκάς, μὴ προλίπῃς Διογένη με κύνα. - -ὄλπην καὶ σκίπωνα φέρω, καὶ διπλόον εἷμα, -καὶ πήρην, καὶ σοὶ ναυτιλίης ὀβολόν. -καὶ ζωὸς τάδε μοῦνον, ἃ καὶ νέκυς ὧδε κομίζω, -εἶχον· ὑπʼ ἠελίου δʼ οὔ τι λέλοιπα φάει. -
-
- - -Julianus - - -Κέρβερε δειμαλέην ὑλακὴν νεκύεσσιν ἰάλλων, -ἤδη φρικαλέον δείδιθι καὶ σὺ νέκυν· -Ἀρχίλοχος τέθνηκε· φυλάσσεο θυμὸν ἰάμβων -δριμύν, πικροχόλου τικτόμενον στόματος. -οἶσθα βοῆς κείνοιο μέγα σθένος, εὖτε Λυκάμβεω -νηῦς μία σοι δισσὰς ἤγαγε θυγατέρας. -
-
- - -Julianus - - -νῦν πλέον ἢ τὸ πάροιθε πύλας κρατεροῖο βερέθρου -ὄμμασιν ἀγρύπνοις τρισσὲ φύλασσε κύον. -εἰ γὰρ φέγγος ἔλειπον ἀλυσκάζουσαι ἰάμβων -ἄγριον Ἀρχιλόχου φλέγμα Λυκαμβιάδες, -πῶς οὐκ ἂν προλίποι σκοτίων πυλεῶνας ἐναύλων -νεκρὸς ἅπας, φεύγων τάρβος ἐπεσβολίης; -
-
- - -Gaetulicus I - - -σῆμα τόδʼ Ἀρχιλόχου παραπόντιον, ὅς ποτε πικρὴν -μοῦσαν ἐχιδναίῳ πρῶτος ἔβαψε χόλῳ, - -αἱμάξας Ἑλικῶνα τὸν ἥμερον. οἶδε Λυκάμβης, -μυρόμενος τρισσῶν ἅμματα θυγατέρων. -ἠρέμα δὴ παράμειψον, ὁδοιπόρε, μή ποτε τοῦδε -κινήσῃς τύμβῳ σφῆκας ἐφεζομένους. -
-
- - -Menander - - -χαῖρε, Νεοκλείδα, δίδυμον γένος, ὧν ὁ μὲν ὑμῶν -πατρίδα δουλοσύνας ῥύσαθʼ, ὁ δʼ ἀφροσύνας. -
-
- - -Tullius Geminus - - -ἀντὶ τάφου λιτοῖο θὲς Ἑλλάδα, θὲς δʼ ἐπὶ ταύταν -δούρατα, βαρβαρικᾶς σύμβολα ναυφθορίας, -καὶ τύμβῳ κρηπῖδα περίγραφε Περσικὸν Ἄρη -καὶ Ξέρξην· τούτοις θάπτε Θεμιστοκλέα. -στάλα δʼ ἁ Σαλαμὶς ἐπικείσεται, ἔργα λέγουσα -τἀμά τί με σμικροῖς τόν μέγαν ἐντίθετε; -
-
- - -Diodorus - - -τοῦτο Θεμιστοκλεῖ ξένον ἠρίον εἵσατο Μάγνης -λαός, ὅτʼ ἐκ Μήδων πατρίδα ῥυσάμενος -ὀθνείην ὑπέδυ χθόνα καὶ λίθον. ἦ θέλεν οὕτως -ὁ φθόνος· αἱ δʼ ἀρεταὶ μεῖον ἔχουσι γέρας. - -
-
- - -Antipater - - -Στασίχορον, ζαπληθὲς ἀμέτρητον στόμα Μούσης, -ἐκτέρισεν Κατάνας αἰθαλόεν δάπεδον, -οὗ, κατὰ Πυθαγόρου φυσικὰν φάτιν, ἁ πρὶν Ὁμήρου -ψυχὰ ἐνὶ στέρνοις δεύτερον ᾠκίσατο. -
-
- - -Dioscorides - - -Ἐμπορίης λήξαντα Φιλόκριτον, ἄρτι δʼ ἀρότρου -γευόμενον, ξείνῳ Μέμφις ἔκρυψε τάφῳ, -ἔνθα δραμὼν Νείλοιο πολὺς ῥόος ὕδατι λάβρῳ -τἀνδρὸς τὴν ὀλίγην βῶλον ἀπημφίασε. -καὶ ζωὸς μὲν ἔφευγε πικρὴν ἅλα· νῦν δὲ καλυφθεὶς -κύμασι ναυηγὸν σχέτλιος ἔσχε τάφον. -
-
- - -Simonides - - -οὗτος ὁ τοῦ Κείοιο Σιμωνίδεω ἐστὶ σαωτήρ, -ὃς καὶ τεθνηὼς ζῶντʼ ἀπέδωκε χάριν. -
-
- - -Dionysius - - -Πρηΰτερον γῆράς σε, καὶ οὐ κατὰ νοῦσος ἀμαυρὴ -ἔσβεσεν εὐνήθης δʼ ὕπνον ὀφειλόμενον, -ἄκρα μεριμνήσας, Ἐρατόσθενες· οὐδὲ Κυρήνη -μαῖά σε πατρῴων ἐντὸς ἔδεκτο τάφων, - -Ἀγλαοῦ υἱέ· φίλος δὲ καὶ ἐν ξείνῃ κεκάλυψαι -πὰρ τόδε Πρωτῆος κράσπεδον αἰγιαλοῦ. -
-
- - -Meleager - - - - ὤνθρωπʼ, Ἡράκλειτος ἐγὼ σοφὰ μοῦνος ἀνευρεῖν -φαμί τὰ δʼ ἐς πάτραν κρέσσονα καὶ σοφίης· -λὰξ γὰρ καὶ τοκεῶνας, ἰὼ ξένε, δύσφρονας ἄνδρας -ὑλάκτευν. λαμπρὰ θρεψαμένοισι χάρις. - - οὐκ ἀπʼ ἐμεῦ; μὴ τρηχύς. ἐπεὶ τάχα καὶ σύ τι πεύσῃ -τρηχύτερον Πάτρας. χαῖρε. σὺ δʼ ἐξ Ἐφέσου. -
-
- - -Callimachus - - -εἶπέ τις, Ἡράκλειτε, τεὸν μόρον, ἐς δέ με δάκρυ -ἤγαγεν, ἐμνήσθην δʼ ὁσσάκις ἀμφότεροι -ἥλιον ἐν λέσχῃ κατεδύσαμεν ἀλλὰ σὺ μέν που, -ξεῖνʼ Ἁλικαρνησεῦ, τετράπαλαι σποδιή· -αἱ δὲ τεαὶ ζώουσιν ἀηδόνες, ᾗσιν ὁ πάντων -ἁρπακτὴς Ἀίδης οὐκ ἐπὶ χεῖρα βαλεῖ. -
-
- - -Antipater - - -ἑπτὰ σοφῶν, Κλεόβουλε, σὲ μὲν τεκνώσατο Λίνδος -φατὶ δὲ Σισυφία χθὼν Περίανδρον ἔχειν - -Πιττακὸν ἁ Μιτυλᾶνα· Βίαντα δὲ δῖα Πριήνη· -Μίλητος δὲ Θαλῆν, ἄκρον ἔρεισμα Δίκας· -ἁ Σπάρτα Χίλωνα· Σόλωνα δὲ Κεκροπὶς αἶα, -πάντας ἀριζάλου σωφροσύνας φύλακας. -
-
- - -Anonymi Epigrammatici - - -Δωρίδος ἐκ Μούσης κεκορυθμένον ἀνέρα Βάκχῳ -καὶ Σατύροις Σικελὸν τῇδʼ Ἐπίχαρμον ἔχω. -
-
- - -Anonymi Epigrammatici - - -τόνδε Θαλῆν Μίλητος Ἰὰς θρέψας1ʼ ἀνέδειξεν, -ἀστρολόγων πάντων πρεσβύτατον σοφίῃ. -
-
- - -Anonymi Epigrammatici - - -ἦ ὀλίγον τόδε σᾶμα, τὸ δὲ κλέος οὐρανόμηκες -τοῦ πολυφροντίστου τοῦτο Θάλητος ὅρη. -
-
- - -Diogenes Laertius - - -γυμνικὸν αὖ ποτʼ ἀγῶνα θεώμενον, ἠέλιε Ζεῦ, -τὸν σοφὸν ἄνδρα Θαλῆν ἥρπασας ἐκ σταδίου. -αἰνέω ὅττι μιν ἐγγὺς ἀπήγαγες· ἦ γὰρ ὁ πρέσβυς -οὐκέθʼ ὁρᾶν ἀπὸ γῆς ἀστέρας ἠδύνατο. - -
-
- - -Anonymi Epigrammatici - - -ἡ Μήδων ἄδικον παύσας1ʼ ὕβριν ἥδε Σόλωνα -τόνδε τεκνοῖ Σαλαμὶς θεσμοθέτην ἱερόν. -
-
- - -Diogenes Laertius - - -σῶμα μὲν ἦρε Σόλωνος ἐν ἀλλοδαπῇ Κύπριον πῦρ, -ὀστὰ δʼ ἔχει Σαλαμίς, ὧν κόνις ἀστάχυες· -ψυχὴν δʼ ἄξονες εὐθὺς ἐς οὐρανὸν ἤγαγον εὖ γὰρ -θῆκε νόμοις ἀστοῖς ἄχθεα κουφότατα. -
-
- - -Diogenes Laertius - - -Φωσφόρε σοί Πολύδευκες ἔχω χάριν, οὕνεκεν υἱὸς -Χίλωνος πυγμῇ χλωρὸν ἕλεν κότινον - εἰ δʼ ὁ πατὴρ στεφανοῦχον ἰδὼν 〈τέκνον〉 ἤμυσεν ἡσθείς, -οὐ νεμεσητὸν ἐμοὶ τοῖος ἴτω θάνατος. -
-
- - -Callimachus - - -ξεῖνος Ἀταμνείτης τις ἀνείρετο Πιττακὸν οὕτω -τὸν Μυτιληναῖον, παῖδα τὸν Ὑρράδιον· -“ ἄττα γέρον, δοιός με καλεῖ γάμος· ἡ μία μὲν δὴ -νύμφη καὶ πλούτῳ καὶ γενεῇ κατʼ ἐμέ· - -ἡ δʼ ἑτέρη προβέβηκε. τί λώιον; εἰ δʼ ἄγε σύν μοὶ -βούλευσον, ποτέρην εἰς ὑμέναιον ἄγω.” -εἶπεν· ὁ δὲ σκίπωνα, γεροντικὸν ὅπλον, ἀείρας, - -Ἡνιδʼ, ἐκεῖνοί σοι πᾶν ἐρέουσιν ἔπος· - -ʽὁἱ δʼ ἄρʼ ὑπὸ πληγῇσι θοὰς βέμβικας ἔχοντες -ἔστρεφον εὐρείῃ παῖδες ἐνὶ τριόδῳ·̓ - -κείνων ἔρχεο, φησί, μετʼ ἴχνια. χὠ μὲν ἐπέστη -πλησίον· οἱ δʼ ἔλεγον τὴν κατὰ σαυτὸν ἔλα. - -ταῦτʼ ἀίων ὁ ξεῖνος ἐφείσατο μείζονος οἴκου -δράξασθαι, παίδων κληδόνα συνθέμενος. -τὴν δʼ ὀλίγην ὡς κεῖνος ἐς οἶκον ἐπήγετο νύμφην, -οὕτω καὶ σὺ γʼ ἰὼν τὴν κατὰ σαυτὸν ἔλα. -
-
- - -Anonymi Epigrammatici - - -κλεινοῖς ἐν δαπέδοισι Πριήνης φύντα καλύπτει -ἥδε Βίαντα πέτρη, κόσμον Ἴωσι μέγαν. -
-
- - -Diogenes Laertius - - -τῇδε Βίαντα κέκευθα, τὸν ἀτρέμας ἤγαγεν Ἑρμῆς -εἰς Ἀίδην, πολιῷ γήραϊ νιφόμενον -εἶπε γάρ, εἶπε δίκην Βίαντα τινός· εἶτʼ ἀποκλινθεὶς -παιδὸς ἐς ἀγκαλίδας μακρὸν ἔτεινεν ὕπνον. - -
-
- - -Diogenes Laertius - - -ἐς Σκυθίην Ἀνάχαρσις ὅτʼ ἤλυθε πολλὰ μογήσας, -πάντας ἔπειθε βιοῦν ἤθεσιν ἑλλαδικοῖς· -τὸν δʼ ἔτι μῦθον ἄκραντον ἐνὶ στομάτεσσιν ἔχοντα -πτηνὸς ἐς ἀθανάτους ἥρπασεν ὦκα δόναξ, -
-
- - -Anonymi Epigrammatici - - - -τῆς σοφίης πάσης ἐν ἐμοὶ τέλος· ἢν δέ τι πάσχω, -Πυθαγόρῃ τῷ μῷ λέγε ταῦθʼ, ὅτι πρῶτος ἀπάντων -ἔστιν ἀνʼ Ἑλλάδα γῆν. οὐ ψεύδομαι ὧδʼ ἀγορεύων. -
-
- - -Anonymi Epigrammatici - - -ἐνθάδε, πλεῖστον ἀληθείας ἐπὶ τέρμα περήσας -οὐρανίου κόσμου, κεῖται Ἀναξαγόρας. -
-
- - -Diogenes Laertius - - -ἠέλιον πυρόεντα μύδρον ποτὲ φάσκεν ὑπάρχειν, -καὶ διὰ τοῦτο θανεῖν μέλλεν Ἀναξαγόρας· -ἀλλʼ ὁ φίλος Περικλῆς μὲν ἐρύσατο τοῦτον· ὁ δʼ αὑτὸν -ἐξάγαγεν βιότου μαλθακίῃ σοφίης, - -
-
- - -Diogenes Laertius - - -πῖνέ νυν ἐν Διὸς ὤν, ὦ Σώκρατες· ἦ σε γὰρ ὄντως -καὶ σοφὸν εἶπε θεὸς, καὶ θεὸς ἡ Σοφία. -πρὸς γὰρ Ἀθηναίων κώνειον ἁπλῶς σὺ ἐδέξω, -αὐτοὶ δʼ ἐξέπιον τοῦτο τεῷ στόματι. -
-
- - -Diogenes Laertius - - -οὐ μόνον ἐς Πέρσας ἀνέβη Ξενοφῶν διὰ Κῦρον, -ἀλλʼ ἄνοδον ζητῶν ἐς Διὸς ἥτις ἄγοι· -παιδείης γὰρ ἑῆς Ἑλληνικὰ πράγματα δείξας, -ὡς καλὸν ἡ σοφίη μνήσατο Σωκράτεος. -
-
- - -Diogenes Laertius - - -εἰ καὶ σέ, Ξενοφῶν, Κραναοῦ Κέκροπός τε πολῖται -φεύγειν κατέγνων τοῦ φίλου χάριν Κύρου, -ἀλλὰ Κόρινθος ἔδεκτο φιλόξενος, ᾗ σὺ φιληδῶν -οὕτως ἀρέσκῃ κεῖθι καὶ μένειν ἔγνως. -
-
- - -Plato - - -δάκρυα μὲν Ἑκάβῃ τε καὶ Ἰλιάδεσσι γυναιξὶ -Μοῖραι ἐπέκλωσαν δή ποτε γεινομέναις· -σοὶ δέ, Δίων, ῥέξαντι καλῶν ἐπινίκον ἔργων -δαίμονες εὐρείας ἐλπίδας ἐξέχεαν· - -κεῖσαι δʼ εὐρυχόρῳ ἐν πατρίδι τίμιος ἀστοῖς, -ὦ ἐμὸν ἐκμήνας θυμὸν ἔρωτι Δίων. -
-
- - -Plato - - -νῦν ὅτε μηδέν, Ἄλεξις, ὅσον μόνον εἶφʼ, ὅτι καλός, -ὦπται, καὶ πάντῃ πᾶσι περιβλέπεται. -θυμέ, τί μηνύεις κυσὶν ὀστέον, εἶτʼ ἀνιήσει -ὕστερον; οὐχ οὕτω Φαῖδρον ἀπωλέσαμεν; -
-
- - -Diogenes Laertius - - -ἀλλʼ εἰ μὴ Σπεύσιππον ἐμάνθανον ὧδε θανεῖσθαι, -οὐκ ἂν ἔπεισὲ μέ τις τόδε λέξαι, -ὡς ἦν οὐχὶ Πλάτωνι πρὸς αἵματος· οὐ γὰρ ἀθυμῶν -κάτθανεν ἂν διά τι σφόδρα μικρόν. -
-
- - -Diogenes Laertius - - -χαλκῇ προσκόψας λεκάνῃ ποτέ, καὶ τὸ μέτωπον -“ πλήξας, ἴαχεν ὤ σύντονον, εἶτʼ ἔθανεν, -ὁ πάντα πάντη Ξενοκράτης ἀνὴρ γεγώς.” - -
-
- - -Antagoras - - -μνήματι τῷδε Κράτητα θεουδέα καὶ Πολέμωνα -ἔννεπε κρύπτεσθαι, ξεῖνε, παρερχόμενος, -ἄνδρας ὁμοφροσύνῃ μεγαλήτορας, ὧν ἀπὸ μῦθος -ἱερὸς ἤισσεν δαιμονίου στόματος, -καὶ βίοτος καθαρὸς σοφίας ἐπὶ θεῖον ἐκόσμει -αἰῶνʼ ἀστρέπτοις δόγμασι πειθόμενος. -
-
- - -Diogenes Laertius - - -Ἀρκεσίλαε, τί μοι τί τοσοῦτον ἄκρητον ἀφειδῶς -ἔσπασας, ἔσπασας φρενῶν ἐκτὸς ὄλισθες ἑῶν; -οἰκτείρω ς1ʼ οὐ τόσσον ἐπεὶ θάνες, ἀλλʼ ὅτι Μούσας -ὕβρισας, οὐ μετρίῃ χρησάμενος κύλικι. -
-
- - -Diogenes Laertius - - -καί σέο, Λακύδη, φάτιν ἔκλυον, ὡς ἄρα καί σε -Βάκχος ἑλὼν ἀίδην ποσσὶν ἔσυρεν ἄκροις. -ἦ σαφὲς ἦν Διόνυσος ὅτʼ ἀν πολὺς ἐς δέμας ἔλθῃ, -λῦσε μέλη· διὸ δὴ μήτι Λυαῖος ἔφυ; -
-
- - -Diogenes Laertius - - - - χαίρετε καὶ μέμνησθε τὰ δόγματα· τοῦτʼ Ἐπίκουρος -ὕστατον εἶπε φίλοις οἷσιν ἀποφθίμενος· -θερμὴν ἐς πύελον γὰρ ἐσήλυθε, καὶ τὸν ἄκρητον -ἔσπασεν, εἶτʼ ἀίδην ψυχρὸν ἐπεσπάσατο. - -
-
- - -Diogenes Laertius - - -μέλλων Εὐρυμέδων ποτʼ Ἀριστοτέλην ἀσεβείας -γράψασθαι, Δηοῦς μύστιδος ὢν πρόπολος, -ἀλλὰ πιὼν ἀκόνιτον ὑπέκφυγε· τοῦτʼ ἀκονιτὶ -ἦν ἄρα νικῆσαι συκοφάσεις ἀδίκους. -
-
- - -Diogenes Laertius - - -καὶ πῶς εἰ μὴ Φοῖβος ἀνʼ Ἑλλάδα φύσε Πλάτωνα, -ψυχὰς ἀνθρώπων γράμμασιν ἠκέσατο; -καὶ γὰρ ὁ τοῦδε γεγὼς Ἀσκληπιός ἐστιν ἰητὴρ -σώματος, ὡς ψυχῆς ἀθανάτοιο Πλάτων. -
-
- - -Diogenes Laertius - - -Φοῖβος ἔφυσε βροτοῖς Ἀσκληπιὸν ἠδὲ Πλάτωνα, -τὸν μὲν ἵνα ψυχήν, τὸν δʼ ἵνα σῶμα σάοι -δαισάμενος δὲ γάμον, πόλιν ἤλυθεν ἥν ποθʼ ἑαυτῷ -ἔκτισε, καὶ δαπέδῳ Ζηνὸς ἐνιδρύσατο. -
-
- - -Diogenes Laertius - - -οὐκ ἄρα τοῦτο μάταιον ἔπος μερόπων τινὶ λέχθη, -ῥήγνυσθαι σοφίης τόξον ἀνιέμενον -δὴ γὰρ καὶ Θεόφραστος ἕως ἐπόνει μὲν ἄπηρος -ἦν δέμας, εἶτʼ ἀνεθεὶς κάτθανε πηρομελής. - -
-
- - -Diogenes Laertius - - -λεπτὸς ἀνὴρ δέμας ἦν — εἰ μὴ προσέχῃς, ἀπόχρη μοι· -Στράτωνα τοῦτʼ οὖν φημί γε, -Λάμψακος ὃν ποτʼ ἔφυσεν ἀεὶ δὲ νόσοισι παλαίων -θνῄσκει λαθὼν, οὐδʼ ᾔσθετο. -
-
- - -Diogenes Laertius - - -οὐ μὰ τόν, οὐδὲ Λύκωνα παρήσομεν, ὅττι ποδαλγὴς -κάτθανε· θαυμάζω τοῦτο μάλιστα δʼ ἐγώ, -τὴν οὕτως ἀίδαο μακρὴν ὁδὸν εἰ πρὶν ὁ ποσσὶν -ἀλλοτρίοις βαδίσας ἔδραμε νυκτὶ μιῇ. -
-
- - -Diogenes Laertius - - -ἀνεῖλεν ἀσπὶς τὸν σοφὸν Δημήτριον -ἰὸν ἔχουσα πολὺν -ἄσμηκτον, οὐ στίλβουσα φῶς ἀπʼ ὀμμάτων, -ἀλλʼ ἀίδην μέλανα. -
-
- - -Diogenes Laertius - - -ἤθελες ἀνθρώποισι λιπεῖν φάτιν, Ἡρακλείδη, -ὥς ῥα θανὼν ἐγένου ζωὸς ἅπασι δράκων -ἀλλὰ διεψεύσθης σεσοφισμένε· δὴ γὰρ ὁ μὲν θὴρ -ἦε δράκων, σὺ δὲ θήρ, οὐ σοφὸς ὢν, ἑάλως. - -
-
- - -Diogenes Laertius - - -τὸν βίον ἦσθα κύων, Ἀντίσθενες, ὧδε πεφυκώς, -ὥστε δακεῖν κραδίην ῥήμασιν, οὐ στόμασιν. -ἀλλʼ ἔθανες φθισικός, τάχʼ ἐρεῖ τις ἴσως· τί δὲ τοῦτο; - - πάντως εἰς ἀίδην δεῖ τινʼ ὁδηγὸν ἔχειν. - -
-
- - -Diogenes Laertius - - -Διόγενες, ἄγε λέγε, τίς ἔλαβέ σε μόρος -ἐς Ἄϊδος; ἔλαβέ με κυνὸς ἄγριον ὀδάξ. -
-
- - -Zenodotus - - -ἔκτισας αὐτάρκειαν, ἀφεὶς κενεαυχέα πλοῦτον, -Ζήνων, σὺν πολιῷ σεμνὸς ἐπισκυνίῳ· -ἄρσενα γὰρ λόγον εὗρες, ἐνηθλήσω δὲ προνοίᾳ, -αἵρεσιν ἀτρέστου αἵρεσιν ἐλευθερίης. -εἰ δὲ πάτρα Φοίνισσα, τίς ὁ φθόνος; ἦν καὶ ὁ Κάδμος -κεῖνος, ἀφʼ οὗ γραπτὰν Ἑλλὰς ἔχει σελίδα. -
-
- - -Diogenes Laertius - - -τὸν Κιτιέα Ζήνωνα θανεῖν λόγος ὡς ὑπὸ γήρως -πολλὰ καμὼν ἐλύθη μένων ἄσιτος - -οἱ δʼ ὅτι προσκόψας ποτʼ ἔφη χερὶ γᾶν ἀλοήσας, - - - -ἔρχομαι αὐτόματος· τί δὴ καλεῖς με; - - - -
-
- - -Anonymi Epigrammatici - - -ἡνίκα Πυθαγόρης τὸ περικλεὲς εὕρετο γράμμα -κεῖνʼ, ἐφʼ ὅτῳ κλεινὴν ἤγαγε βουθυσίην. -
-
- - -Xenophanes - - -καὶ ποτέ μιν στυφελιζομένου σκύλακος παριόντα -φασὶν ἐποικτεῖραι, καὶ τόδε φάσθαι ἔπος· -“ παῦσαι, μηδὲ ῥάπιζʼ, ἐπειὴ φίλου ἀνέρος ἐστὶ - ψυχή, τὴν ἔγνων, φθεγξαμένης ἀίων.” -
-
- - -Diogenes Laertius - - -οὐ μόνος ἐμψύχων ἄπεχες χέρας, ἀλλὰ καὶ ἡμεῖς· -τίς γὰρ ὃς ἐμψύχων ἥψατο, Πυθαγόρη; -ἀλλʼ ὅταν ἑψηθῇ τι καὶ ὀπτηθῇ καὶ ἁλισθῇ -δὴ τότε καὶ ψυχὴν οὐκ ἔχον ἐσθίομεν. -
-
- - -Diogenes Laertius - - -αἰαῖ, Πυθαγόρης τί τόσον κυάμους ἐσεβάσθη, -καὶ θάνε φοιτηταῖς ἄμμιγα τοῖς ἰδίοις; -χωρίον ἦν κυάμων ἵνα μὴ τούτους δὲ πατήσῃ -ἐξ Ἀκραγαντίνων κάτθανʼ ἐνὶ τριόδῳ. - -
-
- - -Diogenes Laertius - - -καὶ σὺ ποτʼ, Ἐμπεδόκλεις, διερῇ φλογὶ σῶμα καθήρας -πῦρ ἀπὸ κρητήρων ἔκπιες ἀθάνατον -οὐκ ἐρέω δʼ ὅτι σαυτὸν ἑκὼν βάλες ἐς ῥόον Αἴτνης, -ἀλλὰ λαθεῖν ἐθέλων ἔμπεσες οὐκ ἐθέλων. -
-
- - -Diogenes Laertius - - -ναὶ μὴν Ἐμπεδοκλῆα θανεῖν λόγος ὥς ποτʼ ἀμάξης -ἔκπεσε, καὶ μηρὸν κλάσσατο δεξιτερὸν -εἰ δὲ πυρὸς κρητῆρας ἐσήλατο καὶ πίε τὸ ζῆν, -πῶς ἂν ἔτʼ ἐν Μεγάροις δείκνυτο τοῦδε τάφος; -
-
- - -Anonymi Epigrammatici - - -εἴ τι παραλλάσσει φαέθων μέγας ἅλιος ἄστρων, -καὶ πόντος ποταμῶν μείζονʼ ἔχει δύναμιν, -φαμὶ τοσοῦτον ἐγὼ σοφίᾳ προέχειν Ἐπίχαρμον, -ὃν πατρὶς ἐστεφάνως1ʼ ἅδε Συρακοσίων. -
-
- - -Diogenes Laertius - - -τὴν ὑπόνοιαν πᾶσι μάλιστα λέγω θεραπεύειν -εἰ γὰρ καὶ μὴ δρᾷς, ἀλλὰ δοκεῖς, ἀτυχεῖς. -οὕτω καὶ Φιλόλαον ἀνεῖλε Κρότων ποτὲ πάτρη, -ὥς μιν ἔδοξε θέλειν δῶμα τύραννον ἔχειν. - -
-
- - -Diogenes Laertius - - -πολλάκις Ἡράκλειτον ἐθαύμασα, πῶς ποτε τὸ ζῆν -ὧδε διαντλήσας δύσμορος, εἶτʼ ἔθανεν -σῶμα γὰρ ἀρδεύουσα κακὴ νόσος ὕδατι, φέγγος -ἔσβεσεν ἐκ βλεφάρων καὶ σκότον ἠγάγετο. -
-
- - -Anonymi Epigrammatici - - -Ἡράκλειτος ἐγώ· τί μʼ ἄνω κάτω ἕλκετʼ ἄμουσοι; -οὐχ ὑμῖν ἐπόνουν, τοῖς δʼ ἔμʼ ἐπισταμένοις. -εἷς ἐμοὶ ἄνθρωπος τρισμύριοι, οἱ δʼ ἀνάριθμοι -οὐδείς. ταῦτʼ αὐδῶ καὶ παρὰ Περσεφόνῃ. -
-
- - -Diogenes Laertius - - -ἤθελες, ὦ Ζήνων, καλὸν ἤθελες, ἄνδρα τύραννον -κτείνας ἐκλῦσαι δουλοσύνης Ἐλέαν -ἀλλʼ ἐδάμης· δὴ γάρ σε λαβὼν ὁ τύραννος ἐν ὅλμῳ -κόψε· τί τοῦτο λέγω; σῶμα γάρ, οὐχὶ δὲ σέ. -
-
- - -Diogenes Laertius - - -καὶ σεῦ, Πρωταγόρη, φάτιν ἔκλυον, ὡς ἄρʼ Ἀθηνῶν -ἔκ ποτʼ ἰὼν καθʼ ὁδὸν πρέσβυς ἐὼν ἔθανες· -εἵλετο γάρ σε φυγεῖν Κέκροπος πόλις· ἀλλὰ σὺ -μέν που -Παλλάδος ἄστυ φύγες, Πλουτέα δʼ οὐκ ἔφυγες. - -
-
- - -Anonymi Epigrammatici - - -Πρωταγόρην λόγος ὧδε θανεῖν φέρει· ἀλλὰ γὰρ † οὔτι -ἥκατο σῶμα γαῖαν, ψυχὰ δʼ ἇλτο σοφοῖς. -
-
- - -Anonymi Epigrammatici - - -καὶ σέο, Πρωταγόρη, σοφίης ἴδμεν βέλος ὀξύ, -ἀλλʼ οὐ τιτρῶσκον, † "ὢν δὲ γλυκὺ {"κρῆμα.˘ -
-
- - -Diogenes Laertius - - -πτίσσετε, Νικοκρέων, ἔτι καὶ μάλα, θύλακός ἐστι· -πτίσσετʼ, Ἀνάξαρχος δʼ ἐν Διός ἐστι πάλαι· -καὶ σὲ διαστείλασα γνάφοις ὀλίγον τάδε λέξει -ῥήματα Περσεφόνη· ἔρρε μυλωθρὲ κακέ. - -
-
- - -Anonymi Epigrammatici - - -ἐνθάδε Γοργίου ἡ κεφαλὴ κυνικοῦ κατάκειμαι, -οὐκέτι χρεμπτομένη, οὔτʼ ἀπομυσσομένη. -
-
- - -Anonymi Epigrammatici - - -Θεσσαλὸς Ἱπποκράτης, Κῷος γένος, ἐνθάδε κεῖται, -Φοίβου ἀπὸ ῥίζης ἀθανάτου γεγαώς. - -πλεῖστα τρόπαια νόσων στήσας ὅπλοις Ὑγιείης, -δόξαν ἑλὼν πολλῶν οὐ τύχᾳ, ἀλλὰ τέχνᾳ. -
-
- - -Antipater - - -ἥρωος Πριάμου βαιὸς τάφος· οὐχ ὅτι τοίου -ἄξιος, ἀλλʼ ἐχθρῶν χερσὶν ἐχωννύμεθα. -
-
- - -Anonymi Epigrammatici - - -μή με τάφῳ σύγκρινε τὸνἝκτορα, μηδʼ ἐπὶ τύμβῳ -μέτρει τὸν πάσης Ἑλλάδος ἀντίπαλον, -Ἰλιάς, τὐτὸς Ὅμηρος ἐμοὶ τάφος, Ἑλλάς, Ἀχαιοὶ -φεύγοντες — τούτοις πᾶσιν ἐχωννύμεθα· -[εἰ δʼ ὀλίγην ἀθρεῖς ἐπʼ ἐμοὶ κόνιν, οὐκ ἐμοὶ αἶσχος· -Ἑλλήνων ἐχθραῖς χερσὶν ἐχωννύμεθα.] -
-
- - -Aceratus - - -Ἕκτορ Ὁμηρείῃσιν ἀεὶ βεβοημένε βίβλοις, -θειοδόμου τείχευς ἕρκος ἐρυμνότατον, -ἐν σοὶ Μαιονίδης ἀνεπαύσατο· σοῦ δὲ θανόντος, -Ἕκτορ, ἐσιγήθη καὶ σελὶς Ἰλιάδος. -
-
- - -Anonymi Epigrammatici - - -Ἕκτορι μὲν Τροίη συγκάτθανεν, οὐδʼ ἔτι χεῖρας -ἀντῆρεν Δαναῶν παισὶν ἐπερχομένοις· -Πέλλα δʼ Ἀλεξάνδρῳ συναπώλετο. πατρίδες ἆρα -ἀνδράσιν, οὐ πάτραις ἄνδρες ἀγαλλόμεθα. - -
-
- - -Archias - - -καὶ γενέταν τοῦ νέρθε καὶ οὔνομα καὶ χθόνα φώνει, -στάλα, καὶ ποίᾳ κηρὶ δαμεὶς ἔθανε. — -“πατὴρ μὲν Πρίαμος, γᾶ δʼ Ἴλιον, οὔνομα δʼ Ἕκτωρ, -ὦνερ, ὑπὲρ πάτρας δʼ ὤλετο μαρνάμενος.” -
-
- - -Antiphilus - - -Θεσσαλὲ Πρωτεσίλαε, σὲ μὲν πολὺς ᾅσεται αἰὼν, -Τροίᾳ ὀφειλομένου πτώματος ἀρξάμενου· -σῆμα δέ τοι πτελέῃσι συνηρεφὲς ἀμφικομεῦσι -νύμφαι, ἀπεχθομένης Ἰλίου ἀντιπέρας· -δένδρα δὲ δυσμήνιτα, καὶ ἢν ποτὶ τεῖχος ἴδωσι -Τρώιον, αὐαλέαν φυχλλοχοεῦντι κόμην, -ὅσσος ἐν ἡρώεσσι τότʼ ἦν χόλος, εἰ μέρος ἀκμὴν -ἐχθρὸν ἐν ἀψύχοις σώζεται ἀκρεμόσιν ; -
-
- - -Anonymi Epigrammatici - - -τύμβος Ἀχιλλῆος ῥηξήνορος, ὃν ποτʼ Ἀχαιοὶ -δώμησαν, Τρώων δεῖμα καὶ ἐσσομένων -αἰγιαλῷ δὲ νένευκεν, ἵνα στοναχῇσι θαλάσσης -κυδαίνοιτο πάις τῆς ἁλίας Θέτιδος. -
-
- - -Anonymi Epigrammatici - - -ἄνδρε δύω φιλότητι καὶ ἐν τεύχεσσιν ἀρίστω, -χαίρετον, Αἰακίδη, καὶ σύ, Μενοιτιάδη. - -
-
- - -Anonymi Epigrammatici - - -ἡδυεπὴς Νέστωρ Πύλιος Νηλήιος ἥρως -ἐν Πύλῳ ἠγαθέῃ τύμβον ἔχει τριγέρων. -
-
- - -Asclepiades - - -ἅδʼ ἐγὼ ἁ τλάμων Ἀρετὰ παρὰ τῷδε κάθημαι -Αἴαντος τύμβῳ κειραμένα πλοκάμους, -θυμὸν ἄχει μεγάλῳ βεβολημένα, εἰ παρʼ Ἀχαιοῖς -ἁ δολόφρων Ἀπάτα κρέσσον ἐμεῦ δύναται. -
-
- - -Antipater - - -σῆμα παρʼ Αἰάντειον ἐπὶ Ῥοιτηίσιν ἀκταῖς -θυμοβαρὴς Ἀρετὰ μύρομαι ἑζομένα, -ἀπλόκαμος, πινόεσσα, διὰ κρίσιν ὅττι Πελασγῶν -οὐκ ἀρετὰ νικᾶν ἔλλαχεν, ἀλλὰ δόλος. -τεύχεα δʼ ἂν λέξειεν Ἀχιλλέος· “ἄρσενος ἀκμᾶς, -οὐ σκολιῶν μύθων ἄμμες ἐφιέμεθα.” -
-
- - -Archias - - -μοῦνος ἐναιρομένοισιν ὑπέρμαχος ἀσπίδα τείνας, -νηυσὶ βαρὺν Τρώων, Αἶαν, ἔμεινας ἄρην· -οὐδέ σε χερμαδίων ὦσεν κτύπος, οὐ νέφος ἰῶν, -οὐ πῦρ, οὐ δοράτων, οὐ ξιφέων πάταγος· -ἀλλʼ αὔτως προβλής τε καὶ ἔμπεδος, ὥς τις ἐρίπνα -ἱδρυθείς, ἔτλης λαίλαπα δυσμενέων. - -εἰ δέ σε μὴ τεύχεσσιν Ἀχιλλέος ὥπλισεν Ἑλλάς, -ἄξιον ἀντʼ ἀρετᾶς ὅπλα ποροῦσα γέρας, -Μοιράων βουλῇσι τάδʼ ἤμπλακεν, ὡς ἂν ὑπʼ ἐχθρῶν -μή τινος, ἀλλὰ σὺ σῇ πότμον ἕλῃς παλάμῃ. -
-
- - -Anonymi Epigrammatici - - -σῆμα τόδʼ Αἴαντος Τελαμωνίου, ὃν κτάνε Μοῖρα, -αὐτοῦ χρησαμένα καὶ χερὶ καὶ ξίφεϊ. -οὐδὲ γὰρ ἐν θνητοῖσι δυνήσατο καὶ μεμαυῦα -εὑρέμεναι Κλωθὼ τῷδʼ ἕτερον φονέα. -
-
- - -Leontius Minotaurus - - -κεῖται ἐνὶ Τροίῃ Τελαμώνιος, οὔ τινι δʼ ἔμπης -ἀντιβίων ὀπάσας εὖχος ἑοῦ θανάτου· -τόσσης γὰρ Χρόνος ἄλλον ἐπάξιον ἀνέρα τόλμης -οὐχ εὑρὼν, παλάμῃ θῆκεν ὑπʼ αὐτοφόνῳ. -
-
- - -Leontius Minotaurus - - -Αἴας ἐν Τροίῃ μετὰ μυρίον εὖχος ἀέθλων -μέμφεται οὐκ ἐχθροῖς κείμενος, ἀλλὰ φίλοις. -
-
- - -Anonymi Epigrammatici - - -Ἕκτωρ Αἴαντι ξίφος ὤπασεν, Ἕκτορι δʼ Αἴας -ζωστῆρʼ· ἀμφοτέρων ἡ χάρις εἷς θάνατος. - -
-
- - -Anonymi Epigrammatici - - -πικρὴν ἀλλήλοις Ἕκτωρ χάριν ἠδὲ φέρασπις -Αἴας ἐκ πολέμου μνῆμʼ ἔπορον φιλίης· -Ἕκτωρ γὰρ ζωστῆρα λαβὼν ξίφος ἔμπαλι δῶκε· -τὴν δὲ χάριν δώρων πείρασαν ἐν θανάτῳ· -τὸ ξίφος εἷλʼ Αἴαντα μεμηνότα, καὶ πάλι ζωστὴρ -εἵλκυσε Πριαμίδην δίφρια συρόμενον. -οὕτως ἐξ ἐχθρῶν αὐτοκτόνα πέμπετο δῶρα, -ἐν χάριτος προφάσει μοῖραν ἔχοντα μόρου. -
-
- - -Cleobulus - - -χαλκῆ παρθένος εἰμί, Μίδα δʼ ἐπὶ σήματι κεῖμαι. -ἔστʼ ἂν ὕδωρ τε νάῃ, καὶ δένδρεα μακρὰ τεθήλῃ, -αὐτοῦ τῇδε μένουσα πλουκλαύτῳ ἐπὶ τύμβῳ, -ἀγγελέω παριοῦσι, Μίδας ὅτι τῇδε τέθαπται. -
-
- - -Anonymi Epigrammatici - - - -κοινὸν ἐγὼ Μεγαρεῦσι καὶ Ἰναχίδαισιν ἄθυρμα -ἵδρυμαι, Ψαμάθης ἔκδικον οὐλομένης· -εἰμὶ δὲ Κὴρ τυμβοῦχος· ὁ δὲ κτείνας με Κόροιβος· -κεῖται δʼ ὧδʼ ὑπʼ ἐμοῖς ποσσὶ διὰ τρίποδα· -δελφὶς γὰρ φάμα τόδʼ ἐθέσπισεν, ὄφρα γενοίμαν -τᾶς κείνου νύμφας σῆμα καὶ ἱστορίης. - -
-
- - -Anonymi Epigrammatici - - - -ὁ τὸν πολυστένακτον ἀνθρώπων βίον -γέλωτι κεράσας Νικαεὺς Φιλιστίων -ἐνταῦθα κεῖμαι, λείψανον παντὸς βίου, -πολλάκις ἀποθανών, ὧδε δʼ οὐδεπώποτε. -
-
- - -Isidorus - - -ἰξῷ καὶ καλάμοισιν ἀπʼ ἠέρος αὑτὸν ἔφερβεν -Εὔμηλος, λιτῶς, ἀλλʼ ἐν ἐλευθερίῃ. -οὔποτε δʼ ὀθνείην ἔκυσεν χέρα γαστρὸς ἕκητι· -τοῦτο τρυφὴν κείνῳ, τοῦτʼ ἔφερʼ εὐφροσύνην. -τρὶς δὲ τριηκοστὸν ζήσας ἔτος ἐνθάδʼ ἰαύει, -παισὶ λιπὼν ἰξὸν καὶ πτερὰ καὶ καλάμους. -
-
- - -Anonymi Epigrammatici - - -τρεῖς ἐτέων δεκάδας, τριάδας δύο, μέτρον ἔθηκαν -ἡμετέρης βιοτῆς μάντιες αἰθέριοι. -ἀρκοῦμαι τούτοισιν ὁ γὰρ χρόνος ἄνθος ἄριστον -ἡλικίης· ἔθανεν χὠ τριγέρων Πύλιος. -
-
- - -Anonymi Epigrammatici - - - -Μαρκέλλου τόδε σῆμα περικλυτοῦ ἰητῆρος, -φωτὸς κυδίστοιο τετιμένου ἀθανάτοισιν, -οὗ βίβλους ἀνέθηκεν ἐυκτιμένῃ ἐνὶ Ῥώμῃ -Ἀδριανός προτέρων προφερέστερος ἡγεμονήων, -καὶ πάις Ἀδριανοῖο μέγʼ ἔξοχος Ἀντωνῖνος, - -ὄφρα καὶ ἐσσομένοισι μετʼ ἀνδράσι κῦδος ἄροιτο -εἵνεκεν εὐεπίης, τὴν οἱ πόρε Φοῖβος Ἀπόλλων, -ἡρῴῳ μέλψαντι μέτρῳ θεραπήια νούσων -βίβλοις ἐν πινυταῖς Χειρωνίσι τεσσαράκοντα. -
-
- - -Nicarchus I - - -Ὀρφεὺς μὲν κιθάρᾳ πλεῖστον γέρας εἵλετο θνητῶν, -Νέστωρ δὲ γλώσσης ἡδυλόγου σοφίῃ, -τεκτοσύνῃ δʼ ἐπέων πολυίστωρ θεῖος Ὅμηρος, -Τηλεφάνης δʼ αὐλοῖς, οὗ τάφος ἐστὶν ὅδε. -
-
- - -Anacreon - - -καρτερὸς ἐν πολέμοις Τιμόκριτος, οὗ τόδε σᾶμα -Ἄρης δʼ οὐκ ἀγαθῶν φείδεται, ἀλλὰ κακῶν. -
-
- - -Antipater - - - - ὄρνι, Διὸς Κρονίδαο διάκτορε, τεῦ χάριν ἔστας -γοργὸς ὑπὲρ μεγάλου τύμβον Ἀριστομένους·; - - ἀγγέλλω μερόπεσσιν ὅθʼ οὕνεκεν ὅσσον ἄριστος -οἰωνῶν γενόμαν, τόσσον ὅδʼ ἠιθέων. -δειλαί τοι δειλοῖσιν ἐφεδρήσσουσι πέλειαι· -ἄμμες δʼ ἀτρέστοις ἀνδράσι τερπόμεθα. -
-
- - -Dioscorides - - -Εὐφράτην μὴ καῖε, Φιλώνυμε, μηδὲ μιήνῃς -πῦρ ἐπʼ ἐμοί· Πέρσης εἰμὶ καὶ ἐκ πατέρων, -Πέρσης αὐθιγενής, ναὶ δέσποτα· πῦρ δὲ μιῆναι -ἡμῖν τοῦ χαλεποῦ πικρότερον θανάτου. -ἀλλὰ περιστείλας με δίδου χθονί· μηδʼ ἐπὶ νεκρῷ -λουτρὰ χέῃς· σέβομαι, δέσποτα, καὶ ποταμούς, - -
-
- - -Leonidas - - - - τίς τίνος εὖσα, γύναι, Παρίην ὑπὸ κίονα κεῖσαι; - - Πρηξὼ Καλλιτέλευς. καὶ ποδαπή; Σαμίη. - - τίς δέ σε καὶ κτερέιξε; Θεόκριτος, ᾧ με γονῆες -ἐξέδοσαν. θνῄσκεις δʼ ἐκ τίνος ; ἐκ τοκετοῦ. - - εὖσα πόσων ἐτέων ; δύο κεἴκοσιν. ἦ ῥὰ γʼ ἄτεκνος ; - - οὔκ, ἀλλὰ τριετῆ Καλλιτέλην ἔλιπον. - - Ζώοι σοι κεῖνός γε, καὶ ἐς βαθὺ γῆρας ἵκοιτο. - - καὶ σοί, ξεῖνε, πόροι πάντα Τύχη τὰ καλά. -
-
- - -Antipater - - - - φράζε, γύναι, γενεήν, ὄνομα, χθόνα. Καλλιτέλης μὲν -ὁ σπείρας, Πρηξὼ δʼ οὔνομα, γῆ δὲ Σάμος. - - σῆμα δὲ τίς τόδʼ ἔχωσε ; Θεόκριτος, ὁ πρὶν ἄθικτα -ἡμετέρας λύσας ἅμματα παρθενίης. - - πῶς δʼ ἔθανες; Λοχίοισιν ἐν ἄλγεσιν· εἰπὲ δὲ ποίην -ἦλθες ἐς ἡλικίην. Δισσάκις ἑνδεκέτις. - - ἦ καὶ ἄπαις; οὐ, ξεῖνε· λέλοιπα γὰρ ἐν νεότητι -Καλλιτέλη, τριετῆ παῖδʼ ἔτι νηπίαχον. - - ἔλθοι ἐς ὀλβίστην πολιὴν τρίχα. καὶ σόν, ὁδῖτα, -οὔριον ἰθύνοι πάντα Τύχη βίοτον. - -
-
- - -Archias - - - - εἰπὲ γύναι τίς ἔφυς. Πρηξώ. τίνος ἔπλεο πατρός ; - - Καλλιτέλευς. πάτρας δʼ ἐκ τίνος ἐσσί; Σάμου. - - μνᾶμα δέ σου τίς ἔτευξε; θεόκριτος, ὅς με σύνευνον -ἤγετο. πῶς δʼ ἐδάμης; β. ἄλγεσιν ἐν λοχίοις. - - εἰν ἔτεσιν τίσιν εὖσα; δὶς ἕνδεκα. παῖδα δὲ λείπεις ; - - νηπίαχον τρισσῶν Καλλιτέλην ἐτέων. - - ζωῆς τέρμαθʼ ἵκοιτο μετʼ ἀνδράσι. καὶ σέο δοίη -παντὶ Τύχη βιότῳ τερπνόν, ὁδῖτα, τέλος. -
-
- - -Nicarchus I - - -τὴν γοεραῖς πνεύσασαν ἐν ὠδίνεσσι Λαμίσκην -ὕστατα, Νικαρέτης παῖδα καὶ Εὐπόλιδος, -σὺν βρέφεσιν διδύμοις, Σαμίην γένος, αἱ παρὰ Νείλῳ -κρύπτουσιν Λιβύης ᾐόνες εἰκοσέτιν. -ἀλλά, κόραι, τῇ παιδὶ λεχώια δῶρα φέρουσαι, -θερμὰ κατὰ ψυχροῦ δάκρυα χεῖτε τάφου. -
-
- - -Hecataeus - - -Ἀρχέλεώ με δάμαρτα Πολυξείνην, Θεοδέκτου -παῖδα καὶ αἰνοπαθοῦς ἔννεπε Δημαρέτης, -ὅσσον ἐπʼ ὠδῖσιν καὶ μητέρα· παῖδα δὲ δαίμων -ἔφθασεν οὐδʼ αὐτῶν εἴκοσιν ἠελίων. -ὀκτωκαιδεκέτις δʼ αὐτὴ θάνον, ἄρτι τεκοῦσα, -ἄρτι δὲ καὶ νύμφη, πάντʼ ὀλιγοχρόνιος. - -
-
- - -Antipater - - - - εὐχέσθω τις ἔπειτα γυνὴ τόκον, εἶπε Πολυξώ, -γαστέρʼ ὑπὸ τρισσῶν ῥηγνυμένη τεκέων -μαίης δʼ ἐν παλάμῃσι χύθη νέκυς· οἱ δʼ ἐπὶ γαῖαν -ὤλισθον κοίλων ἄρρενες ἐκ λαγόνων, -μητέρος ἐκ νεκρῆς ζωὸς γόνος· εἷς ἄρα δαίμων -τῆς μὲν ἀπὸ ζωὴν εἵλετο, τοῖς δʼ ἔπορεν. -
-
- - -Anonymi Epigrammatici - - - -Ἰναχίης οὐκ εἰμὶ βοὸς τύπος, οὐδʼ ἀπʼ ἐμεῖο -κλῄζεται ἀντωπὸν Βοσπόριον πέλαγος. -κείνην γὰρ τὸ πάροιθε βαρὺς χόλος ἤλασενἭρης -ἐς Φάρον ἥδε δʼ ἐγὼ Κεκροπίς εἰμι νέκυς. -εὐνέτις ἦν δὲ Χάρητος· ἔπλων δʼ ὅτʼ ἔπλωεν ἐκεῖνος -τῇδε, Φιλιππείων ἀντίπαλος σκαφέων. -Βοιίδιον δὲ καλεῦμαι ἐγὼ τότε· νῦν δὲ Χάρητος -εὐνέτις ἠπείροις τέρπομαι ἀμφοτέραις. -
-
- - -Posidippus - - -τὸν τριετῆ παίζοντα περὶ φρέαρ Ἀρχιάνακτα -εἴδωλον μορφᾶς κωφὸν ἐπεσπάσατο -ἐκ δʼ ὕδατος τὸν παῖδα διάβροχον ἥρπασε μάτηρ -σκεπτομένα ζωᾶς εἴ τινα μοῖραν ἔχει· -νύμφας δʼ οὐκ ἐμίηνεν ὁ νήπιος, ἀλλʼ ἐπὶ γούνων -ματρὸς κοιμαθεὶς τὸν βαθὺν ὕπνον ἔχει. - -
-
- - -Mnasalces - - -Ἀμπαύσει καὶ τῇδε θοὸν πτερὸν ἱερὸς ὄρνις, -τᾶσδʼ ὑπὲρ ἁδείας ἑζόμενος πλατάνου· -ὤλετο γὰρ Ποίμανδρος ὁ Μάλιος, οὐδʼ ἔτι νεῖται -ἰξὸν ἐπʼ ἀγρευταῖς χευάμενος καλάμοις. -
-
- - -Antipater - - -ὁ πρὶν ἐγὼ καὶ ψῆρα καὶ ἁρπάκτειραν ἐρύκων -σπέρματος, ὑψιπετῆ Βιστονίαν γέρανον, -ῥινοῦ χερμαστῆρος ἐΰστροφα κῶλα τιταίνων, -Ἀλκιμένης, πτανῶν εἶργον ἄπωθε νέφος· -καὶ μέ τις οὐτήτειρα παρὰ σφυρὰ διψὰς ἔχιδνα -σαρκὶ τὸν ἐκ γενύων πικρὸν ἐνεῖσα χόλον -ἠελίου χήρωσεν ἴδʼ ὡς τὰ κατʼ αἰθέρα λεύσσων -τοὐμ ποσὶν οὐκ ἐδάην πῆμα κυλινδόμενον. -
-
- - -Leonidas - - -αὐτόμαται δείλῃ ποτὶ ταὔλιον αἱ βόες ἦλθον -ἐξ ὄρεος, πολλῇ νιφόμεναι χιόνι· -αἰαῖ, Θηρίμαχος δὲ παρὰ δρυῒ τὸν μακρὸν εὕδει -ὕπνον ἐκοιμήθη δʼ ἐκ πυρὸς οὐρανίου. -
-
- - -Erycius - - -οὐκέτι συρίγγων νόμιον μέλος ἀγχόθι ταύτας -ἁρμόζῃ βλωθρᾶς, Θηρίμαχε, πλατάνου· -οὐδέ σευ ἐκ καλάμων κερααὶ βόες ἁδὺ μέλισμα -δέξονται, σκιερᾷ πὰρ δρυῒ κεκλιμένου. -ὤλεσε γὰρ πρηστήρ σε κεραύνιος· αἱ δʼ ἐπὶ μάνδραν -ὀψὲ βόες νιφετῷ σπερχόμεναι κατέβαν. - -
-
- - -Antiphilus - - -οὕτω πᾶς1ʼ ἀπόλωλε, γεωπόνε, βῶλος ἀρότροις, -ἤδη καὶ τύμβους νωτοβατοῦσι βόες, -ἡ δʼ ὕνις ἐν νεκύεσσι; τί τοι πλέον; ἢ πόσος οὗτος -πυρός, ὃν ἐκ τέφρης, κοὐ χθονὸς ἁρπάσετε; -οὐκ αἰεὶ ζήσεσθε, καὶ ὑμέας ἄλλος ἀρώσει, -τοίης ἀρξαμένους πᾶσι κακοσπορίης. -
-
- - -Antiphilus - - -οὐχ ὅτι με φθίμενον κῆδος λίπεν, ἐνθάδε κεῖμαι -γυμνὸς ὑπὲρ γαίης πυροφόροιο νέκυς· -ταρχύθην γὰρ ἐγὼ τὸ πρίν ποτε, νῦν δʼ ἀροτῆρος -χερσὶ σιδηρείη μʼ ἐξεκύλισεν ὕνις. -ἦ ῥα κακῶν θάνατόν τις ἐρεῖ λύσιν, ὁππότʼ ἐμεῖο, -ξεῖνε, πέλει παθέων ὕστατον οὐδὲ τάφος; -
-
- - -Simonides - - -σᾶμα τόδε Σπίνθηρι πατὴρ ἐπέθηκε θανόντι. -
-
- - -Dioscorides - - -Λυδὸς ἐγώ, ναὶ Λυδός, ἐλευθερίῳ δέ με τύμβῳ, -δέσποτα, Τιμάνθη τὸν σὸν ἔθευ τροφέα. -εὐαίων ἀσινῆ τείνοις βίον ἢν δʼ ὑπὸ γήρως -πρός με μόλῃς, σὸς ἐγώ, δέσποτα, κἠν Ἀίδῃ. - -
-
- - -Anonymi Epigrammatici - - -σοὶ καὶ νῦν ὑπὸ γῆν, ναί, δέσποτα, πιστὸς ὑπάρχω, -ὡς πάρος, εὐνοίης οὐκ ἐπιληθόμενος, -ὥς με τότʼ ἐκ νούσου τρὶς ἐπʼ ἀσφαλὲς ἤγαγες ἴχνος, -καὶ νῦν ἀρκούσᾐ τῇδʼ ὑπέθου καλύβῃ, -Μάνην ἀγγείλας, Πέρσην γένος. εὖ δέ με ῥέξας -ἕξεις ἐν χρείῃ δμῶας ἑτοιμοτέρους. -
-
- - -Apollonides - - -ἠλλάχθη θανάτοιο τεὸς μόρος, ἀντὶ δὲ σεῖο, -δέσποτα, δοῦλος ἐγὼ στυγνὸν ἔπλησα τάφον -ἡνίκα σεῦ δακρυτὰ κατὰ χθονὸς ἠρία τεῦχον, -ὡς ἂν ἀποφθιμένου κεῖθι δέμας κτερίσω· -ἀμφὶς ˘ ἔμʼ ὤλισθεν γυρὴ κόνις. οὐ βαρὺς ἡμῖν -ἔστʼ Ἀίδης· ζήσω τὸν σὸν ὑπʼ ἠέλιον. -
-
- - -Andronicus - - -οἰκτρὰ δὴ δνοφερὸν δόμον ἤλυθες εἰς Ἀχέροντος, -Δαμοκράτεια φίλα, ματρὶ λιποῦσα γόους. -ἁ δέ, σέθεν φθιμένας, πολιοὺς νεοθῆγι σιδάρῳ -κείρατο γηραλέας ἐκ κεφαλᾶς πλοκάμους. -
-
- - -Meleager - - -οὐ γάμον, ἀλλʼ Ἀίδαν ἐπινυμφίδιον Κλεαρίστα -δέξατο, παρθενίας ἅμματα λυομένα. -ἄρτι γὰρ ἑσπέριοι νύμφας ἐπὶ δικλίσιν ἄχευν -λωτοί, καὶ θαλάμων ἐπλαταγεῦντο θύραι· - -ἠῷοι δʼ ὀλολυγμὸν ἀνέκραγον, ἐκ δʼ Ὑμέναιος -σιγαθεὶς γοερὸν φθέγμα μεθαρμόσατο· -αἱ δʼ αὐταὶ καὶ φέγγος ἐδᾳδούχουν παρὰ παστῷ -πεῦκαι, καὶ φθιμένᾳ νέρθεν ἔφαινον ὁδόν. -
-
- - -Parmenion - - - -ᾅδης τὴν Κροκάλης ἔφθασε παρθενίην -εἰς δὲ γόους Ὑμέναιος ἐπαύσατο· τὰς δὲ γαμούντων -ἐλπίδας οὐ θάλαμος κοίμισεν, ἀλλὰ τάφος. -
-
- - -Parmenion - - -παρθενικῆς τάφος εἴμʼ Ἑλένης, πένθει δʼ ἐπʼ ἀδελφοῦ -προφθιμένου διπλᾶ μητρὸς ἔχω δάκρυα· -μνηστῆρσιν δʼ ἔλιπον κοίνʼ ἄλγεα· τὴν γὰρ ἔτʼ οὔπω -οὐδενὸς ἡ πάντων ἐλπὶς ἔκλαυσεν ἴσως. -
-
- - -Antipater - - -Αὐσονίη με Λίβυσσαν ἔχει κόνις, ἄγχι δὲ Ῥώμης -κεῖμαι παρθενικὴ τῇδε παρὰ ψαμάθῳ· -ἡ δέ με θρεψαμένη Πομπηίη ἀντὶ θυγατρός, -κλαυσαμένη τύμβῳ θῆκεν ἐλευθερίῳ, -πῦρ ἕτερον σπεύδουσα· τὸ δʼ ἔφθασεν, οὐδὲ κατʼ εὐχὴν -ἡμετέραν ἧψεν λαμπάδα Περσεφόνη. - -
-
- - -Philippus - - -ἄρτι μὲν ἐν θαλάμοις Νικιππίδος ἡδὺς ἐπήχει -λωτός, καὶ γαμικοῖς † ὕμνος ἔχαιρε κρότοις· -θρῆνος δʼ εἰς ὑμέναιον ἐκώμασεν ἡ δὲ τάλαινα, -οὔπω πάντα γυνή, καὶ νέκυς ἐβλέπετο. -δακρυόεις Ἀίδη, τί πόσιν νύμφης διέλυσας, -αὐτὸς ἐφʼ ἁρπαγίμοις τερπόμενος λέχεσιν; -
-
- - -Philippus - - -ἡ γρῆυς Νικὼ Μελίτης τάφον ἐστεφάνωσε -παρθενικῆς. Ἀίδη, τοῦθʼ ὁσίως κέκρικας; -
-
- - -Antonius thallus - - -δύσδαιμον Κλεάνασσα, σὺ μὲν γάμῳ ἔπλεο, κούρη, -ὥριος, ἀκμαίης οἷὰ τʼ ἐφʼ ἡλικίης· -ἀλλὰ τεοῖς θαλάμοισι γαμοστόλος οὐχ Ὑμέναιος, -οὐδʼ Ἥρης ζυγίης λαμπάδες ἠντίασαν, -πένθιμος ἀλλʼ Ἀίδης ἐπεκώμασεν, ἀμφὶ δʼ Ἐρινὺς -φοίνιος ἐκ στομάτων μόρσιμον ἧκεν ὄπα· -ἤματι δʼ ᾧ νυμφεῖος ἀνήπτετο λαμπάδι παστάς, -τούτῳ πυρκαϊῆς, οὐ θαλάμων ἔτυχες. -
-
- - -Aristodicus - - -οὐκέτι δή σε λίγεια κατʼ ἀφνεὸν Ἀλκίδος οἶκον -ἀκρὶ μελιζομέναν ὄψεται ἀέλιος· -ἤδη γὰρ λειμῶνας ἐπὶ Κλυμένου πεπότησαι -καὶ δροσερὰ χρυσέας ἄνθεα Περσεφόνας. - -
-
- - -Leonidas - - -Ἀκρίδι τᾷ κατʼ ἄρουραν ἀηδόνι, καὶ δρυοκοίτᾳ -τέττιγι ξυνὸν τύμβον ἔτευξε Μυρώ, -παρθένιον στάξασα κόρα δάκρυ· δισσὰ γὰρ αὐτᾶς -παίγνιʼ ὁ δυσπειθὴς ᾤχετʼ ἔχων Ἀίδας. -
-
- - -Archias - - -ἁ πάρος ἀντίφθογγον ἀποκλάγξασα νομεῦσι -πολλάκι καὶ δρυτόμοις κίσσα καὶ ἰχθυβόλοις, -πολλάκι δὲ κρέξασα πολύθροον, οἷά τις ἀχώ, -κέρτομον ἀντῳδοῖς χείλεσιν ἁρμονίαν, -νῦν εἰς γᾶν ἄγλωσσος ἀναύδητός τε πεσοῦσα -κεῖμαι, μιμητὰν ζᾶλον ἀνηναμένα. -
-
- - -Mnasalces - - -οὐκέτι δὴ πτερύγεσσι λιγυφθόγγοισιν ἀείσεις, -ἀκρί, κατʼ εὐκάρπους αὔλακας ἑζομένα, -οὐδέ με κεκλιμένον σκιερὰν ὑπὸ φυλλάδα τέρψεις, -ξουθᾶν ἐκ πτερύγων ἁδὺ κρέκουσα μέλος. -
-
- - -Simias - - -τάνδε κατʼ εὔδενδρον στείβων δρίος εἴρυσα χειρὶ -πτώσσουσαν βρομίης οἰνάδος ἐν πετάλοις, -ὄφρα μοι εὐερκεῖ καναχὰν δόμῳ ἔνδοθι θείη, -τερπνὰ διʼ ἀγλώσσου φθεγγομένα στόματος. - -
-
- - -Mnasalces - - -ἀκρίδα Δημοκρίτου μελεσίπτερον ἅδε θανοῦσαν -ἄργιλος δολιχὰν ἀμφὶ κέλευθον ἔχει, -ἇς καί, ὅτʼ ἰθύσειε πανέσπερον ὕμνον ἀείδειν, -πᾶν μέλαθρον μολπᾶς ἴαχʼ ὑπʼ εὐκελάδου. -
-
- - -Meleager - - -Ἀκρίς, ἐμῶν ἀπάτημα πόθων, παραμύθιον ὕπνου, -ἀκρίς, ἀρουραίη Μοῦσα, λιγυπτέρυγε, -αὐτοφυὲς μίμημα λύρας, κρέκε μοί τι ποθεινόν, -ἐγκρούουσα φίλοις ποσσὶ λάλους πτέρυγας, -ὥς με πόνων ῥύσαιο παναγρύπνοιο μερίμνης, -ἀκρί, μιτωσαμένη φθόγγον ἐρωτοπλάνον. -δῶρα δέ σοι γήτειον ἀειθαλὲς ὀρθρινὰ δώσω, -καὶ δροσερὰς στόματι σχιζομένας ψακάδας. -
-
- - -Meleager - - -Ἀχήεις τέττιξ, δροσεραῖς σταγόνεσσι μεθυσθείς, -ἀγρονόμαν μέλπεις μοῦσαν ἐρημολάλον -ἄκρα δʼ ἐφεζόμενος πετάλοις, πριονώδεσι κώλοις -αἰθίοπι κλάζεις χρωτὶ μέλισμα λύρας. -ἀλλά, φίλος, φθέγγου τι νέον δενδρώδεσι Νύμφαις -παίγνιον, ἀντῳδὸν Πανὶ κρέκων κέλαδον, -ὄφρα φυγὼν τὸν Ἔρωτα, μεσημβρινὸν ὕπνον ἀγρεύσω -ἐνθάδʼ ὑπὸ σκιερᾷ κεκλιμένος πλατάνῳ. - -
-
- - -Phae+nnus - - -Δαμοκρίτῳ μὲν ἐγώ, λιγυρὰν ὅκα μοῦσαν ἐνείην -ἀκρὶς ἀπὸ πτερύγων, τὸν βαθὺν ἆγον ὕπνον -Δαμόκριτος δʼ ἐπʼ ἐμοὶ τὸν ἐοικότα τύμβον, ὁδῖτα, -ἐγγύθεν Ὠρωποῦ χεῦεν ἀποφθιμένᾳ. -
-
- - -Leonidas - - -εἰ καὶ μικρὸς ἰδεῖν καὶ ἐπʼ οὔδεος, ὦ παροδῖτα, -λᾶας ὁ τυμβίτης ἄμμιν ἐπικρέμαται, -αἰνοίης, ὤνθρωπε, Φιλαινίδα· τὴν γὰρ ἀοιδὸν -ἀκρίδα, τὴν εὖσαν τὸ πρὶν ἀκανθοβάτιν, -διπλοῦς ἐς λυκάβαντας ἐφίλατο τὴν καλαμῖτιν, -κἀμφίεφʼ ὑμνιδίῳ χρησαμένην πατάγῳ· -καὶ μʼ οὐδὲ φθιμένην ἀπανήνατο· τοῦτο δʼ ἐφʼ ἡμῖν -τὠλίγον ὤρθωσεν σᾶμα πολυστροφίης. -
-
- - -Tymnes - - -ὄρνεον ὦ Χάρισιν μεμελημένον, ὦ παρόμοιον -ἀλκυόσιν τὸν σὸν φθόγγον ἰσωσάμενον, -ἡρπάσθης, φίλʼ ἐλαιέ· σὰ δʼ ἤθεα καὶ τὸ σὸν ἡδὺ -πνεῦμα σιωπηραὶ νυκτὸς ἔχουσιν ὁδοί. -
-
- - -Nicias - - -οὐκέτι δὴ τανύφυλλον ὑπὸ κλάκα κλωνὸς ἑλιχθεὶς -τέρψομʼ ἀπὸ ῥαδινῶν φθόγγον ἱεὶς πτερύγων· -χεῖρα γὰρ εἰς † ἀρετὰν παιδὸς πέσον, ὅς με λαθραίως -μάρψεν, ἐπὶ χλωρῶν ἑζόμενον πετάλων. - -
-
- - -Pamphilus - - -οὐκέτι δὴ χλωροῖσιν ἐφεζόμενος πετάλοισιν -ἁδεῖαν μέλπων ἐκπροχέεις ἰαχὰν -ἀλλά σε γηρύοντα κατήναρεν, ἠχέτα τέττιξ, -παιδὸς ἀπʼ ἠλιθίου χεὶρ ἀναπεπταμένα. -
-
- - -Anyte - - -οὐκέτι μʼ ὡς τὸ πάρος πυκιναῖς πτερύγεσσιν ἐρέσσων -ὄρσεις ἐξ εὐνῆς ὄρθριος ἐγρόμενος· -ἦ γάρ ς1ʼ ὑπνώοντα σίνις λαθρηδὸν ἐπελθὼν -ἔκτεινεν λαιμῷ ῥίμφα καθεὶς ὄνυχα. -
-
- - -Simias - - -οὐκέτʼ ἀνʼ ὑλῆεν δρίος εὔσκιον, ἀγρότα πέρδιξ, -ἠχήεσσαν ἵης γῆρυν ἀπὸ στομάτων, -θηρεύων βαλιοὺς συνομήλικας ἐν νομῷ ὕλης· -ᾤχεο γὰρ πυμάταν εἰς Ἀχέροντος ὁδόν. -
-
- - -Agathias Scholasticus - - -οὐκέτι που, τλῆμον, σκοπέλων μετανάστρια πέρδιξ, -πλεκτὸς λεπταλέαις οἶκος ἔχει σε λύγοις, -οὐδʼ ὑπὸ μαρμαρυγῇ θαλερώπιδος Ἠριγενείης -ἄκρα παραιθύσσεις θαλπομένων πτερύγων. -σὴν κεφαλὴν αἴλουρος ἀπέθρισε, τἄλλα δὲ πάντα -ἥρπασα, καὶ φθονερὴν οὐκ ἐκόρεσσε γένυν. -νῦν δέ σε μὴ κούφη κρύπτοι κόνις, ἀλλὰ βαρεῖα, -μὴ τὸ τεὸν κείνη λείψανον ἐξερύσῃ. - -
-
- - -Agathias Scholasticus - - -οἰκογενὴς αἴλουρος ἐμὴν πέρδικα φαγοῦσα -ζώειν ἡμετέροις ἔλπεται ἐν μεγάροις; -οὔ σε, φίλη πέρδιξ, φθιμένην ἀγέραστον ἐάσω, -ἀλλʼ ἐπὶ σοὶ κτείνω τὴν σέθεν ἀντιβίην. -ψυχὴ γὰρ σέο μᾶλλον ὀρίνεται, εἰσόκε ῥέξω -ὅσς1ʼ ἐπʼ Ἀχιλλῆος Πύρρος ἔτευξε τάφῳ. -
-
- - -Damocharis - - -Ἀνδροβόρων ὁμότεχνε κυνῶν, αἴλουρε κακίστη, -τῶν Ἀκταιονίδων ἐσσὶ μία σκυλάκων. -κτήτορος Ἀγαθίαο τεοῦ πέρδικα φαγοῦσα, -λυπεῖς, ὡς αὐτὸν κτήτορα δασσαμένη. -καὶ σὺ μὲν ἐν πέρδιξιν ἔχεις νόον οἱ δὲ μύες νῦν -ὀρχοῦνται, τῆς σῆς δραξάμενοι σπατάλης. -
-
- - -Meleager - - -τὸν ταχύπουν, ἔτι παῖδα συναρπασθέντα τεκούσης -ἄρτι μʼ ἀπὸ στέρνων, οὐατόεντα λαγὼν -ἐν κόλποις στέργουσα διέτρεφεν ἁ γλυκερόχρως -Φανίον, εἰαρινοῖς ἄνθεσι βοσκόμενον. -οὐδέ με μητρὸς ἔτʼ εἶχε πόθος· θνῄσκω δʼ ὑπὸ θοίνης -ἀπλήστου, πολλῇ δαιτὶ παχυνόμενος. -καί μου πρὸς κλισίαις κρύψεν νέκυν, ὡς ἐν ὀνείροις -αἰὲν ὁρᾶν κοίτης γειτονέοντα τάφον. - -
-
- - -Anyte - - -μνᾶμα τόδε φθιμένου μενεδαΐου εἵσατο Δᾶμις -ἵππου, ἐπεὶ στέρνον τοῦδε δαφοινὸς Ἄρης -τύψε· μέλαν δέ οἱ αἷμα ταλαυρίνου διὰ χρωτὸς -ζέσς1ʼ, ἐπὶ δʼ ἀργαλέᾳ βῶλον ἔδευσε φονᾷ. -
-
- - -Antipater - - -αὐτοῦ σοὶ παρʼ ἅλωνι, δυηπαθὲς ἐργάτα μύρμηξ, -ἠρίον ἐκ βώλου διψάδος ἐκτισάμαν, -ὄφρα σε καὶ φθίμενον Δηοῦς σταχυητρόφος αὖλαξ -θέλγῃ, ἀροτραίᾐ κείμενον ἐν θαλάμῃ. -
-
- - -Antipater - - -.ἄρτι νεηγενέων σε, χελιδονί, μητέρα τέκνων, -ἄρτι σε θάλπουσαν παῖδας ὑπὸ πτέρυγι, -ἀίξας ἔντοσθε νεοσσοκόμοιο καλιῆς -νόσφισεν ὠδίνων τετραέλικτος ὄφις, -καὶ σὲ κινυρομέναν ὁπότʼ ἀθρόος ἦλθε δαΐζων, -ἤριπεν ἐσχαρίου λάβρον ἐπʼ ἄσθμα πυρός. -ὡς θάνεν ἠλιτοεργός· ἴδʼ ὡς Ἥφαιστος ἀμύντωρ -τὰν ἀπʼ Ἐριχθονίου παιδὸς ἔσωσε γονάν. -
-
- - -Tymnes - - -τῇδε τὸν ἐκ Μελίτης ἀργὸν κύνα φησὶν ὁ πέτρος -ἴσχειν, Εὐμήλου πιστότατον φύλακα. -ταῦρόν μιν καλέεσκον, ὅτʼ ἦν ἔτι· νῦν δὲ τὸ κείνου -φθέγμα σιωπηραὶ νυκτὸς ἔχουσιν ὁδοί. - -
-
- - -Mnasalces - - -Αἰθυίας, ξένε, τόνδε ποδηνέμου ἔννεπε τύμβον, -τᾶς ποτʼ ἐλαφρότατον χέρσος ἔθρεψε γόνυ· -πολλάκι ˘ γὰρ νάεσσιν ἰσόδρομον ἄνυσε μᾶκος, -ὄρνις ὅπως δολιχὰν ἐκπονέουσα τρίβον. -
-
- - -Archias - - -πρὶν μὲν ἐπὶ χλωροῖς ἐριθηλέος ἔρνεσι πεύκας -ἥμενος, ἢ σκιερᾶς ἀκροκόμου πίτυος, -ἔκρεκες εὐτάρσοιο διʼ ἰξύος ἀχέτα μολπὰν -τέττιξ, οἰονόμοις ἐλαφρότατον χέλυος. -νῦν δέ σε, μυρμάκεσσιν ὑπʼ εἰνοδίοισι δαμέντα, -Ἄϊδος ἀπροϊδὴς ἀμφεκάλυψε μυχός. -εἰ δʼ ἑάλως, συγγνωστόν, ἐπεὶ καὶ κοίρανος ὕμνων -Μαιονίδας γρίφοις ἰχθυβόλων ἔθανεν. -
-
- - -Archias - - -οὐκέτι παφλάζοντα διαΐσσων βυθὸν ἅλμης -δελφίς, πτοιήσεις εἰναλίων ἀγέλας, -οὐδὲ πολυτρήτοιο μέλος καλάμοιο χορεύων -ὑγρὸν ἀναρρίψεις ἅλμα παρὰ σκαφίσιν -οὐδὲ σὺ γʼ, ἀφρηστά, Νηρηίδας ὡς πρὶν ἀείρων -νώτοις πορθμεύσεις Τηθύος εἰς πέρατα. -ἦ γὰρ ἴσον; πρηῶνι Μαλείης ὡς ἐκυκήθη, -κῦμα πολυψάμμους ὦσέ ς1ʼ ἐπὶ ψαμάθους. - -
-
- - -Anyte - - -οὐκέτι δὴ πλωτοῖσιν ἀγαλλόμενος πελάγεσσιν -αὐχένʼ ἀναρρίψω βυσσόθεν ὀρνύμενος, -οὐδὲ περὶ † σκαλάμοισι νεὼς περικαλλέα χείλη -ποιφύσσω, τἀμᾷ τερπόμενος προτομᾷ· -ἀλλά με πορφυρέα πόντου νοτὶς ὦς1ʼ ἐπὶ χέρσον, -κεῖμαι δὲ † ῥαδινὰν τάνδε παρʼ ἠιόνα. -
-
- - -Antipater - - -κύματα καὶ τρηχύς με κλύδων ἐπὶ χέρσον ἔσυρεν -δελφῖνα, ξείνοις κοινὸν ὅραμα τύχης. -ἀλλʼ ἐπὶ μὲν γαίης ἐλέῳ τόπος· οἱ γὰρ ἰδόντες -εὐθύ με πρὸς τύμβους ἔστεφον εὐσεβέες· -νῦν δὲ τεκοῦσα θάλασσα διώλεσε. τίς παρὰ πόντῳ -πίστις, ὃς οὐδʼ ἰδίης φείσατο συντροφίης; -
-
- - -Asclepiades - - -Ἀρχεάνασσαν ἔχω, τὰν ἐκ Κολοφῶνος ἑταίραν, -ἇς καὶ ἐπὶ ῥυτίδων ὁ γλυκὺς ἕζετʼ Ἔρως. -ἆ νέον ἥβης ἄνθος ἀποδρέψαντες ἐρασταὶ -πρωτοβόλου, διʼ ὅσης ἤλθετε πυρκαϊῆς. -
-
- - -Antipater - - -τὴν καὶ ἅμα χρυσῷ καὶ ἁλουργίδι καὶ σὺν Ἔρωτι -θρυπτομένην, ἁπαλῆς Κύπριδος ἁβροτέραν -Λαΐδʼ ἔχω, πολιῆτιν ἁλιζώνοιο Κορίνθου, -Πειρήνης λευκῶν φαιδροτέραν λιβάδων, - -τὴν θνητὴν Κυθέρειαν, ἐφʼ ᾗ μνηστῆρες ἀγαυοὶ -πλείονες ἢ νύμφης εἵνεκα Τυνδαρίδος, -δρεπτόμενοι χάριτάς τε καὶ ὠνητὴν ἀφροδίτην· -ἧς καὶ ὑπʼ εὐώδει τύμβος ὄδωδε κρόκῳ, -ἧς ἔτι κηώεντι μύρῳ τὸ διάβροχον ὀστεῦν, -καὶ λιπαραὶ θυόεν ἄσθμα πνέουσι κόμαι -ᾗ ἔπι καλὸν ἄμυξε κάτα ῥέθος Ἀφρογένεια, -καὶ γοερὸν λύζων ἐστονάχησεν Ἔρως. -εἰ δʼ οὐ πάγκοινον δούλην θέτο κέρδεος εὐνήν, -Ἑλλὰς ἄν, ὡς Ἑλένης, τῆσδʼ ὕπερ ἔσχε πόνον. -
-
- - -Pompeius Macer Junior - - -ἡ τὸ καλὸν καὶ πᾶσιν ἐράσμιον ἀνθήσασα, -ἡ μούνη Χαρίτων λείρια δρεψαμένη, -οὐκέτι χρυσοχάλινον ὁρᾷ δρόμον ἠελίοιο -Λαΐς, ἐκοιμήθη δʼ ὕπνον ὀφειλόμενον, -κώμους, καὶ τὰ νέων ζηλώματα, καὶ τὰ ποθεύντων -κνίσματα, καὶ μύστην λύχνον ἀπειπαμένη. -
-
- - -Agathias Scholasticus - - -ἕρπων εἰς Ἐφύρην τάφον ἔδρακον ἀμφὶ κέλευθον -Λαΐδος ἀρχαίης, ὡς τὸ χάραγμα λέγει. -δάκρυ δʼ ἐπισπείσας, “ χαίροις, γύναι, ἐκ γὰρ ἀκουῆς - οἰκτείρω σέ” γʼ, ἔφην, “ἣν πάρος οὐκ ἰδόμην. -ἆ πόσον ἠϊθέων νόον ἤκαχες· ἀλλʼ ἴδε, Λήθην - ναίεις, ἀγλαΐην ἐν χθονὶ κατθεμένη.” - -
-
- - -Anonymi Epigrammatici - - -Ἀκμαίη πρὸς ἔρωτα καὶ ἡδέα Κύπριδος ἔργα, -Πατροφίλα, κανθοὺς τοὺς γλυκεροὺς ἔμυσας· -ἐσβέσθη δὲ τὰ φίλτρα τὰ κωτίλα, χὠ μετʼ ἀοιδῆς -ψαλμὸς, καὶ κυλίκων αἱ λαμυραὶ προπόσεις. -ᾍδη δυσκίνητε, τί τὴν ἐπέραστον ἑταίρην -ἥρπασας; ἢ καὶ σὴν Κύπρις ἔμηνε φρένα; -
-
- - -Philodemus - - -ἐνθάδε τῆς τρυφερῆς μαλακὸν ῥέθος, ἐνθάδε κεῖται -Τρυγόνιον, σαβακῶν ἄνθεμα Σαλμακίδων -ᾗ καλύβη καὶ δοῦπος ἐνέπρεπεν, ᾗ φιλοπαίγμων -στωμυλίη, Μήτηρ ἣν ἐφίλησε θεῶν -ἡ μούνη στέρξασα τὰ Κύπριδος ἡμιγυναίκων -ὄργια, καὶ φίλτρων Λαΐδος ἁψαμένη. -φῦε κατὰ στήλης, ἱερὴ κόνι, τῇ φιλοβάκχῳ -μὴ βάτον, ἀλλʼ ἁπαλὰς λευκοΐων κάλυκας. -
-
- - -Thyillus - - -ἡ κροτάλοις ὀρχηστρὶς Ἀρίστιον, ἡ περὶ πεύκας -τῇ Κυβέλῃ πλοκάμους ῥῖψαι ἐπισταμένη, -ἡ λωτῷ κερόεντι φορουμένη, ἡ τρὶς ἐφεξῆς -εἰδυῖʼ ἀκρήτου χειλοποτεῖν κύλικας, -ἐνθάδʼ ὑπὸ πτελέαις ἀναπαύεται, οὐκέτʼ ἔρωτι, -οὐκέτʼ παννυχίδων τερπομένη καμάτοις. - κῶμοι καὶ μανίαι, μέγα χαίρετε· κεῖθʼ 〈ἱερὰ θρίξ〉 -ἡ τὸ πρὶν στεφάνων ἄνθεσι κρυπτομένη. - -
-
- - -Anonymi Epigrammatici - - -εἴκοσι Καλλικράτεια καὶ ἐννέα τέκνα τεκοῦσα, -οὐδʼ ἑνὸς οὐδὲ μιῆς ἐδρακόμην θάνατον -ἀλλʼ ἑκατὸν καὶ πέντε διηνυσάμην ἐνιαυτούς, -σκίπωνι τρομερὰν οὐκ ἐπιθεῖσα χέρα. -
-
- - -Anonymi Epigrammatici - - -Ψήχει καὶ πέτρην ὁ πολὺς χρόνος, οὐδὲ σιδήρου -φείδεται, ἀλλὰ μιῇ πάντʼ ὀλέκει δρεπάνῃ· -ὣς καὶ Λαέρταο τόδʼ ἠρίον, ὃ σχεδὸν ἀκτῆς -βαιὸν ἄπο, ψυχρῶν λείβεται ἐξ ὑετῶν. -οὔνομα μὴν ἥρωος ἀεὶ νέον οὐ γὰρ ἀοιδὰς -ἀμβλύνειν αἰών, κἢν ἐθέλῃ, δύναται. -
-
- - -Anacreon - - -Ἀβδήρων προθανόντα τὸν αἰνοβίην Ἀγάθωνα -πᾶς1ʼ ἐπὶ πυρκαϊῆς ἥδʼ ἐβόησε πόλις. -οὔ τινα γὰρ τοιόνδε νέων ὁ φιλαίματος Ἄρης -ἠνάρισεν στυγερῆς ἐν στροφάλιγγι μάχης. -
-
- - -Diotimus - - -οὐδὲ λέων ὣς δεινὸς ἐν οὔρεσιν, ὡς ὁ Μίκωνος -υἱὸς Κριναγόρης ἐν σακέων πατάγῳ. -εἰ δὲ κάλυμμʼ ὀλίγον, μὴ μέμφεο μικρὸς ὁ χῶρος, -ἀλλʼ ἄνδρας πολέμου τλήμονας οἶδε φέρειν. -
-
- - -Anonymi Epigrammatici - - -αὑτῷ καὶ τεκέεσσι γυναικί τε τύμβον ἔδειμεν -Ἀνδροτίων οὔπω δʼ οὐδενός εἰμι τάφος. -οὕτω καὶ μείναιμι πολὺν χρόνον εἰ δʼ ἄρα καὶ δεῖ, -δεξαίμην ἐν ἐμοὶ τοὺς προτέρους προτέρους. - -
-
- - -Dioscorides - - -τᾷ Πιτάνᾳ Θρασύβουλος ἐπʼ ἀσπίδος ἤλυθεν ἄπνους, -ἑπτὰ πρὸς Ἀργείων τραύματα δεξάμενος, -δεικνὺς ἀντία πάντα· τὸν αἱματόεντα δʼ ὁ πρέσβυς -παῖδʼ ἐπὶ πυρκαϊὴν Τύννιχος εἶπε τιθείς· -“ δειλοὶ κλαιέσθωσαν ἐγὼ δὲ σέ, τέκνον, ἄδακρυς - θάψω, τὸν καὶ ἐμὸν καὶ Αακεδαιμόνιον.” -
-
- - -Erycius - - -ἁνίκʼ ἀπὸ πτολέμου τρέσσαντά σε δέξατο μάτηρ, -πάντα τὸν ὁπλιστὰν κόσμον ὀλωλεκότα, -αὐτά τοι φονίαν, Δαμάτριε, αὐτίκα λόγχαν -εἶπε διὰ πλατέων ὠσαμένα λαγόνων -“ κάτθανε, μηδʼ ἐχέτω Σπάρτα ψόγον οὐ γὰρ ἐκείνα - ἤμπλακεν, εἰ δειλοὺς τοὐμὸν ἔθρεψε γάλα.” -
-
- - -Damagetus - - -ὧδʼ ὑπὲρ Ἀμβρακίας ὁ βοαδρόμος ἀσπίδʼ ἀείρας -τεθνάμεν ἢ φεύγειν εἵλετʼ Ἀρισταγόρας, -υἱὸς ὁ Θευπόμπου. μὴ θαῦμʼ ἔχε· Δωρικὸς ἀνὴρ -πατρίδος, οὐχ ἥβας ὀλλυμένας ἀλέγει. -
-
- - -Antipater - - -Λύδιον οὖδας ἔχει τόδʼ Ἀμύντορα, παῖδα Φιλίππου, -πολλὰ σιδηρείης χερσὶ θιγόντα μάχης· -οὐδέ μιν ἀλγινόεσσα νόσος δόμον ἄγαγε Νυκτός, -ἀλλʼ ὄλετʼ ἀμφʼ ἑτάρῳ σχὼν κυκλόεσσαν ἴτυν. - -
-
- - -Apollonides - - -Αἴλιος, Αὐσονίης στρατιῆς πρόμος, ὁ χρυσέοισι -στέμμασι σωρεύσας αὐχένας ὁπλοφόρους, -νοῦσον ὅτʼ εἰς ὑπάτην ὠλίσθανε τέρμα τʼ ἄφυκτον -εἶδεν, ἀριστείην † ἐμφανὲς εἰς ἰδίην -πῆξε δʼ ὑπὸ σπλάγχνοισιν ἑὸν ξίφος, εἶπέ τε θνῄσκων - - αὐτὸς ἑκὼν ἐδάμην, μὴ νόσος εὖχος ἔχῃ. - -
-
- - -Philippus - - -Αἴλιος ὁ θρασύχειρ Ἄρεος πρόμος, ὁ ψελιώσας -αὐχένα χρυσοδέτοις ἐκ πολέμου στεφάνοις, -τηξιμελεῖ νούσῳ κεκολουμένος, ἔδραμε θυμῷ -ἐς προτέρην ἔργων ἄρσενα μαρτυρίην, -ὦσε δʼ ὑπὸ σπλάγχνοις πλατὺ φάσγανον, ἓν μόνον εἰπών - -ἄνδρας Ἄρης κτείνει, δειλοτέρους δὲ νόσος. - -
-
- - -Diodorus - - -μὴ μέτρει Μάγνητι τὸ πηλίκον οὔνομα τύμβῳ, -μηδὲ Θεμιστοκλέους ἔργα σε λανθανέτω. -τεκμαίρου Σαλαμῖνι καὶ ὁλκάσι τὸν φιλόπατριν -γνώσῃ δʼ ἐκ τούτων μείζονα Κεκροπίης. -
-
- - -Antipater - - -οὐχὶ Θεμιστοκλέους Μάγνης τάφος· ἀλλὰ κέχωσμαι -Ἑλλήνων φθονερῆς σῆμα κακοκρισίης. - -
-
- - -Alpheus - - -οὔρεά μευ καὶ πόντον ὑπὲρ τύμβοιο χάρασσε, -καὶ μέσον ἀμφοτέρων μάρτυρα Λητοΐδην, -ἀενάων τε βαθὺν ποταμῶν ῥόον, οἵ ποτε ῥείθροις -Ξέρξου μυριόναυν οὐχ ὑπέμειναν Ἄρην. -ἔγγραφε καὶ Σαλαμῖνα, Θεμιστοκλέους ἵνα σῆμα -κηρύσσει Μάγνης δῆμος ἀποφθιμένου. -
-
- - -Adaeus - - -Ἠμαθίην ὃς πρῶτος ἐς Ἄρεα βῆσα Φίλιππος, -Αἰγαίην κεῖμαι βῶλον ἐφεσσάμενος, -ῥέξας οἷʼ οὔπω βασιλεὺς τὸ πρὶν εἰ δέ τις αὐχεῖ -μεῖζον ἐμεῦ, καὶ τοῦθʼ αἵματος ἡμετέρου. -
-
- - -Parmenion - - -φθίσθαι Ἀλέξανδρον ψευδὴς φάτις, εἴπερ ἀληθὴς -Φοῖβος. ἀνικήτων ἅπτεται οὐδʼ Ἀίδης. -
-
- - -Adaeus - - -τύμβον Ἀλεξάνδροιο Μακηδόνος ἤν τις ἀείδῃ, -ἠπείρους κείνου σῆμα λέγʼ ἀμφοτέρας. -
-
- - -Antipater - - -μυρία σοι, Πτολεμαῖε, πατήρ ἔπι, μυρία μάτηρ -τειρομένα θαλεροὺς ᾐκίσατο πλοκάμους· -πολλὰ τιθηνητήρ ὀλοφύρατο, χερσὶν ἀμήσας -ἀνδρομάχοις δνοφερὰν κρατὸς ὕπερθε κόνιν. - -ἁ μεγάλα δʼ Αἴγυπτος ἑὰν ὠλόψατο χαίταν, -καὶ πλατὺς Εὐρώπας ἐστονάχησε δόμος. -καὶ δʼ αὐτὰ διὰ πένθος ἀμαυρωθεῖσα Σελάνα -ἄστρα καὶ οὐρανίας ἀτραπιτοὺς ἔλιπεν. -ὤλεο γὰρ διὰ λοιμὸν ὅλας θοινήτορα χέρσου, -πρὶν πατέρων νεαρᾷ σκᾶπτρον ἑλεῖν παλάμᾳ· -οὐ δέ σε νὺξ ἐκ νυκτὸς ἐδέξατο· δὴ γὰρ ἄνακτας -τοίους οὐκ Ἀίδας, Ζεὺς δʼ ἐς Ὄλυμπον ἄγει. -
-
- - -Mnasalces - - -οἵδε πάτραν, πολύδακρυν ἐπʼ αὐχένι δεσμὸν ἔχουσαν, -ῥυόμενοι, δνοφερὰν ἀμφεβάλοντο κόνιν -ἄρνυνται δʼ ἀρετᾶς αἶνον μέγαν. ἀλλά τις ἀστῶν -τούσδʼ ἐσιδὼν θνᾴσκειν τλάτω ὑπὲρ πατρίδος. -
-
- - -Lollius Bassus - - -Φωκίδι πὰρ πέτρῃ δέρκευ τάφον εἰμὶ δʼ ἐκείνων -τῶν ποτε μηδοφόνων μνᾶμα τριηκοσίων, -οἳ Σπάρτας ἀπὸ γᾶς τηλοῦ πέσον, ἀμβλύναντες -Ἄρεα καὶ Μῆδον καὶ Λακεδαιμόνιον. -ἣν δʼ ἐσορῇς ἐπʼ ἐμεῖο † βοόστρυχον εἰκόνα θηρός, -ἔννεπε· τοῦ ταγοῦ μνᾶμα Λεωνίδεω. -
-
- - -Gaetulicus I - - -δισσὰ τριηκοσίων τάδε φάσγανα θούριος Ἄρης -ἔσπασεν Ἀργείων καὶ Λακεδαιμονίων, -ἔνθα μάχην ἔτλημεν ἀνάγγελον, ἄλλος ἐπʼ ἄλλῳ -πίπτοντες· Θυρέαι δʼ ἦσαν ἄεθλα δορός. - -
-
- - -Gaetulicus I - - -ὦ Χρόνε, παντοίων θνητοῖς πανεπίσκοπε δαῖμον, -ἄγγελος ἡμετέρων πᾶσι γενοῦ παθέων· -ὡς ἱερὰν σώζειν πειρώμενοι Ἑλλάδα χώρην, -Βοιωτῶν κλεινοῖς θνῄσκομεν ἐν δαπέδοις. -
-
- - -Antipater - - -Ἰσσοῦ ἐπὶ προμολῇσιν ἁλὸς παρὰ κῦμα Κιλίσσης -ἄγριον αἱ Περσῶν κείμεθα μυριάδες, -ἔργον Ἀλεξάνδροιο Μακηδόνος, οἳ ποτʼ ἄνακτι -Δαρείῳ πυμάτην οἶμον ἐφεσπόμεθα. -
-
- - -Alcaeus - - -Ἄκλαυστοι καὶ ἄθαπτοι, ὁδοιπόρε, τῷδʼ ἐπὶ τύμβῳ -Θεσσαλίας τρισσαὶ κείμεθα μυριάδες, -Ἠμαθίῃ μέγα πῆμα· τὸ δὲ θρασὺ κεῖνο Φιλίππου -πνεῦμα θοῶν ἐλάφων ᾤχετʼ ἐλαφρότερον. -
-
- - -Simonides - - -μυριάσιν ποτὲ τῇδε τριηκοσίαις ἐμάχοντο -ἐκ Πελοποννάσου χιλιάδες τέτορες. -
-
- - -Simonides - - -ὦ ξεῖνʼ, ἄγγειλον Λακεδαιμονίοις ὅτι τῇδε -κείμεθα, τοῖς κείνων ῥήμασι πειθόμενοι. - -
-
- - -Simonides - - -ἀκμᾶς ἑστακυῖαν ἐπὶ ξυροῦ Ἑλλάδα πᾶσαν -ταῖς αὑτῶν ψυχαῖς κείμεθα ῥυσάμενοι. -
-
- - -Simonides - - -ἄσβεστον κλέος οἵδε φίλῃ περὶ πατρίδι θέντες -κυάνεον θανάτου ἀμφεβάλοντο νέφος. -οὐδὲ τεθνᾶσι θανόντες, ἐπεὶ σφʼ ἀρετὴ καθύπερθε -κυδαίνους1ʼ ἀνάγει δώματος ἐξ Ἀίδεω. -
-
- - -Antipater - - -οἵδʼ Ἀίδαν στέρξαντες ἐνόπλιον, οὐχ, ἅπερ ἄλλοι, -στάλαν, ἀλλʼ ἀρετὰν ἀντʼ ἀρετᾶς ἔλαχον. -
-
- - -Simonides - - -εἰ τὸ καλῶς θνῄσκειν ἀρετῆς μέρος ἐστὶ μέγιστον, -ἡμῖν ἐκ πάντων τοῦτʼ ἀπένειμε τύχη· -Ἑλλάδι γὰρ σπεύδοντες ἐλευθερίην περιθεῖναι -κείμεθʼ ἀγηράτῳ χρώμενοι εὐλογίῃ. -
-
- - -Simonides - - -χαίρετʼ ἀριστῆες πολέμου μέγα κῦδος ἔχοντες, -κοῦροι Ἀθηναίων, ἔξοχοι ἱπποσύνῃ, -οἵ ποτε καλλιχόρου περὶ πατρίδος ὠλέσαθʼ ἥβην -πλείστοις Ἑλλήνων ἀντία μαρνάμενοι. - -
-
- - -Simonides - - -Κρὴς γενεὰν Βρόταχος Γορτύνιος ἐνθάδε κεῖμαι, -οὐ κατὰ τοῦτʼ ἐλθών, ἀλλὰ κατʼ ἐμπορίην. -
-
- - -Aeschylus - - -κυανέη καὶ τούσδε μενεγχέας ὤλεσεν ἄνδρας -μοῖρα, πολύρρηνον πατρίδα ῥυομένους. -ζωὸν δὲ φθιμένων πέλεται κλέος, οἵ ποτε γυίοις -τλήμονες Ὀσσαίαν ἀμφιέσαντο κόνιν, -ρ. μ. -
-
- - -Plato - - -οἵδε ποτʼ Αἰγαίοιο βαρύβρομον οἶδμα λιπόντες -Ἐκβατάνων πεδίῳ κείμεθʼ ἐνὶ μεσάτῳ. -χαῖρε, κλυτή ποτε πατρὶς Ἐρέτρια· χαίρετʼ, Ἀθῆναι -γείτονες Εὐβοίης· χαῖρε, θάλασσα φίλη. -
-
- - -Anonymi Epigrammatici - - -παῖδες Ἀθηναίων Περσῶν στρατὸν ἐξολέσαντες -ἤρκεσαν ἀργαλέην πατρίδι δουλοσύνην. -
-
- - -Simonides - - -οἵδε παρʼ Εὐρυμέδοντά ποτʼ ἀγλαὸν ὤλεσαν ἥβην -μαρνάμενοι Μήδων τοξοφόρων προμάχοις -αἰχμηταὶ πεζοί τε καὶ ὠκυπόρων ἐπὶ νηῶν· -κάλλιστον δʼ ἀρετῆς μνῆμʼ ἔλιπον φθίμενοι. - -
-
- - -Plato - - -Εὐβοίης γένος ἐσμὲν Ἐρετρικόν, ἄγχι δὲ Σούσων -κείμεθα· φεῦ, γαίης ὅσσον ἀφʼ ἡμετέρης. -
-
- - -Carphyllides - - -μὴ μέμψῃ παριὼν τὰ μνήματά μου, παροδῖτα -οὐδὲν ἔχω θρήνων ἄξιον οὐδὲ θανών. -τέκνων τέκνα λέλοιπα· μιῆς ἀπέλαυσα γυναικὸς -συγγήρου· τρισσοῖς παισὶν ἔδωκα γάμους, -ἐξ ὧν πολλάκι παῖδας ἐμοῖς ἐνεκοίμισα κόλποις, -οὐδενὸς οἰμώξας οὐ νόσον, οὐ θάνατον, -οἵ με κατασπείσαντες ἀπήμονα, τὸν γλυκὺν ὕπνον -κοιμᾶσθαι, χώρην πέμψαν ἐπʼ εὐσεβέων. -
-
- - -Diotimus - - -τί πλέον εἰς ὠδῖνα πονεῖν, τί δὲ τέκνα τεκέσθαι, -ἣ τέκοι εἰ μέλλει παιδὸς ὁρᾶν θάνατον; -ἠιθέῳ γὰρ σῆμα Βιάνορι χεύατο μήτηρ· -ἔπρεπε δʼ ἐκ παιδὸς μητέρα τοῦδε τυχεῖν. -
-
- - -Theocritus - - -αὐδήσει τὸ γράμμα τί σᾶμά τε καί τίς ὑπʼ αὐτῷ. - -Γλαύκης εἰμὶ τάφος τῆς ὀνομαζομένης. - -
-
- - -Anacreon - - -καὶ σέ, Κλεηνορίδη, πόθος ὤλεσε πατρίδος αἴης -θαρσήσαντα Νότου λαίλαπι χειμερίῃ. -ὥρη γάρ σε πέδησεν ἀνέγγυος· ὑγρὰ δὲ τὴν σὴν -κύματʼ ἀφʼ ἱμερτὴν ἔκλυσεν ἡλικίην. - -
-
- - -Leonidas - - -εἴη ποντοπόρῳ πλόος οὔριος· ὃν δʼ ἄρʼ ἀήτης, -ὡς ἐμέ, τοῖς Ἀίδεω· προσπελάσῃ λιμέσιν, -μεμφέσθω μὴ λαῖτμα κακόξενον, ἀλλʼ ἕο τόλμαν, -ὅστις ἀφʼ ἡμετέρου πείσματʼ ἔλυσε τάφου. -
-
- - -Plato - - -Ναυηγοῦ τάφος εἰμί ὁ δʼ ἀντίον ἐστὶ γεωργοῦ· -ὡς ἁλὶ καὶ γαίῃ ξυνὸς ὕπεστʼ Ἀίδης. -
-
- - -Leonidas - - -Ναυηγοῦ τάφος εἰμὶ Διοκλέος· οἱ δʼ ἀνάγονται, -φεῦ τόλμης, ἀπʼ ἐμοῦ πείσματα λυσάμενοι. -
-
- - -Posidippus - - -ναυτίλοι, ἐγγὺς ἁλὸς τί με θάπτετε; πολλὸν ἄνευθε -χῶσαι ναυηγοῦ τλήμονα τύμβον ἔδει. -φρίσσω κύματος ἦχον, ἐμὸν μόρον, ἀλλὰ καὶ οὕτως -χαίρετε, Νικήτην οἵτινες οἰκτίρετε. -
-
- - -Plato - - -Ναυηγόν με δέδορκας. ὃν οἰκτείρασα θάλασσα -γυμνῶσαι πυμάτου φάρεος ᾐδέσατο, -ἄνθρωπος παλάμῃσιν ἀταρβήτοις μʼ ἀπέδυσε, -τόσσον ἄγος τόσσου κέρδεος ἀράμενος. -κεῖνο καὶ ἐνδύσαιτο, καὶ εἰς Ἀίδαο φέροιτο, -καί μιν ἴδοι Μίνως τοὐμὸν ἔχοντα ῥάκος. - -
-
- - -Plato - - -πλωτῆρες, σῴζοισθε καὶ εἰν ἁλὶ καὶ κατὰ γαῖαν -ἴστε δὲ ναυηγοῦ σῆμα παρερχόμενοι. -
-
- - -Simonides - - -τούσδε ποτʼ ἐκ Σπάρτας ἀκροθίνια Φοίβῳ ἄγοντας -ἓν πέλαγος, μία νύξ, ἓν σκάφος ἐκτέρισεν. -
-
- - -Callimachus - - -ὤφελε μηδʼ ἐγένοντο θοαὶ νέες· οὐ γὰρ ἂν ἡμεῖς -παῖδα Διοκλείδου Σώπολιν ἐστένομεν -νῦν δʼ ὁ μὲν εἰν ἁλί που φέρεται νέκυς· ἀντὶ δʼ ἐκείνου -οὔνομα καὶ κενεὸν σῆμα παρερχόμεθα, -η. ο. Βθθομιῐ, Ζπ α Οανάβη, ρ. θδ. -
-
- - -Callimachus - - -Νάξιος οὐκ ἐπὶ γῆς ἔθανεν Λύκος, ἀλλʼ ἐνὶ πόντῳ -ναῦν ἅμα καὶ ψυχὴν εἶδεν ἀπολλυμένην, -ἔμπορος Αἰγίνηθεν ὅτʼ ἔπλεε· χὠ μὲν ἐν ὑγρῇ -νεκρός· ἐγὼ δʼ ἄλλως οὔνομα τύμβος ἔχων, -κηρύσσω πανάληθες ἔπος τόδε· “ φεῦγε θαλάσσῃ - συμμίσγειν Ἐρίφων, ναυτίλε, δυομένων.” -
-
- - -Leonidas - - -Εὔρου με τρηχεῖα καὶ αἰπήεσσα καταιγίς, -καὶ νύξ, καὶ δνοφερῆς κύματα πανδυσίης - -ἔβλαψʼ Ὠρίωνος· ἀπώλισθον δὲ βίοιο -Κάλλαισχρος, Λιβυκοῦ μέσσα θέων πελάγευς. -κἀγὼ μὲν πόντῳ δινεύμενος, ἰχθύσι κύρμα, -οἴχημαι· ψεύστης δʼ οὗτος ἔπεστι λίθος. -
-
- - -Honestus - - -οὔνομα κηρύσσω Τιμοκλέος, εἰς ἅλα πικρὴν -πάντῃ σκεπτομένη ποῦ ποτʼ ἄρʼ ἐστὶ νέκυς. -αἰαῖ· τὸν δʼ ἤδη φάγον ἰχθύες· ἡ δὲ περισσὴ -πέτρος ἐγὼ τὸ μάτην γράμμα τορευθὲν ἔχω. -
-
- - -Gaetulicus I - - -ἁ Πέλοπος νᾶσος καὶ δύσπλοος ὤλεσε Κρήτα, -καὶ Μαλέου τυφλαὶ καμπτομένου σπιλάδες -Δάμιδος Ἀστυδάμαντα Κυδώνιον. ἀλλʼ ὁ μὲν ἤδη -ἔπλησεν θηρῶν νηδύας εἰναλίων -τὸν ψεύσταν δέ με τύμβον ἐπὶ χθονὶ θέντο. τί θαῦμα; -Κρῆτες ὅπου ψεῦσται, καὶ Διὸς ἔστι τάφος, -
-
- - -Hegesippus - - -ἐξ ἁλὸς ἡμίβρωτον ἀνηνέγκαντο σαγηνεῖς -ἄνδρα, πολύκλαυτον ναυτιλίης σκύβαλον -κέρδεα δʼ οὐκ ἐδίωξαν ἃ μὴ θέμις· ἀλλὰ σὺν αὐτοῖς -ἰχθύσι τῇδʼ ὀλίγῃ θῆκαν ὑπὸ ψαμάθῳ. -ὦ χθών, τὸν ναυηγὸν ἔχεις ὅλον ἀντὶ δὲ λοιπῆς -σαρκὸς τοὺς σαρκῶν γευσαμένους ἐπέχεις. - -
-
- - -Callimachus - - -τίς, ξένος ὦ ναυηγέ; Λεόντιχος ἐνθάδε νεκρὸν -εὗρέ ς1ʼ ἐπʼ αἰγιαλοῦ, χῶσε δὲ τῷδε τάφῳ, -δακρύσας ἐπίκηρον ἑὸν βίον οὐδὲ γὰρ αὐτὸς -ἥσυχος, αἰθυίῃ δʼ ἶσα θαλασσοπορεῖ. -
-
- - -Archias - - -οὐδὲ νέκυς, ναυηγὸς ἐπὶ χθόνα Θῆρις ἐλασθεὶς -κύμασιν, ἀγρύπνων λήσομαι ἠιόνων. -ἦ γὰρ ἁλιρρήκτοις ὑπὸ δειράσιν, ἀγχόθι πόντου -δυσμενέος, ξείνου χερσὶν ἔκυρσα τάφου· -αἰεὶ δὲ βρομέοντα καὶ ἐν νεκύεσσι θαλάσσης -ὁ τλήμων ἀίω δοῦπον ἀπεχθόμενον -μόχθων οὐδʼ Ἀίδης με κατεύνασεν, ἡνίκα μοῦνος -οὐδὲ θανὼν λείῃ κέκλιμαι ἡσυχίῃ. -
-
- - -Anonymi Epigrammatici - - -παῦσαι νηὸς ἐρετμὰ καὶ ἔμβολα τῷδʼ ἐπὶ τύμβῳ -αἰὲν ἐπὶ ψυχρῇ ζωγραφέων σποδιῇ. -ναυηγοῦ τὸ μνῆμα. τί τῆς ἐνὶ κύμασι λώβης -αὖθις ἀναμνῆσαι τὸν κατὰ γῆς ἐθέλεις; -
-
- - -Isidorus - - -τὸ χῶμα τύμβος ἐστὶν ἀλλὰ τὼ βόε -ἐπίσχες οὗτος, τὰν ὕνιν τʼ ἀνάσπασον -κινεῖς σποδὸν γάρ. ἐς δὲ τοιαύταν κόνιν -μὴ σπέρμα πυρῶν, ἀλλὰ χεῦε δάκρυα. - -
-
- - -Heraclides - - -Ἄπισχʼ, ἄπισχε χεῖρας, ὦ γεωπόνε, -μηδʼ ἀμφίταμνε τὰν ἐν ἠρίῳ κόνιν. -αὐτὰ κέκλαυται βῶλος· ἐκ κεκλαυμένας δʼ -οὔτοι κομάτας ἀναθαλήσεται στάχυς. -
-
- - -Theodoridas - - -Ναυηγοῦ τάφος εἰμί· σὺ δὲ πλέε· καὶ γὰρ ὅθʼ ἡμεῖς -ὠλλύμεθʼ, αἱ λοιπαὶ νῆες ἐποντοπόρουν. - -
-
- - -Leonidas - - -τετρηχυῖα θάλασσα, τί μʼ οὐκ οἰζυρὰ παθόντα -τηλός1ʼ ἀπὸ ψιλῆς ἔπτυσας ἠιόνος; -ὡς σεῦ μηδʼ Ἀίδαο κακὴν ἐπιειμένος ἀχλὺν -Φυλεὺς Ἀμφιμένευς ἆσσον ἐγειτόνεον. -
-
- - -Asclepiades - - -ὀκτώ μευ πήχεις ἄπεχε, τρηχεῖα θάλασσα, -καὶ κύμαινε, βόα θʼ ἡλίκα σοι δύναμις· -ἢν δὲ τὸν Εὐμάρεω καθέλῃς τάφον, ἄλλο μὲν οὐδὲν -κρήγυον, εὑρήσεις δʼ ὀστέα καὶ σποδιήν. -
-
- - -Glaucus - - -οὐ κόνις οὐδʼ ὀλίγον πέτρης βάρος, ἀλλʼ Ἐρασίππου -ἣν ἐσορᾷς αὕτη πᾶσα θάλασσα τάφος· -ὤλετο γὰρ σὺν νηί· τὰ δʼ ὀστέα ποῦ ποτʼ ἐκείνου -πύθεται, αἰθυίαις γνωστὰ μόναις ἐνέπειν. - -
-
- - -Antipater - - -δύσμορε Νικάνωρ, πολιῷ μεμαραμμένε πόντῳ, -κεῖσαι δὴ ξείνῃ γυμνὸς ἐπʼ ἠιόνι, -ἢ σύ γε πρὸς πέτρῃσι· τὰ δʼ ὄλβια κεῖνα μέλαθρα - φροῦδα 〈καὶ ἡ〉 πάσης ἐλπὶς ὄλωλε Τύρου. -οὐδὲ τί σε κτεάνων ἐρρύσατο· φεῦ, ἐλεεινέ, -ὤλεο μοχθήσας ἰχθύσι καὶ πελάγει. -
-
- - -Antipater - - -καὶ νέκυν ἀπρήυντος ἀνιήσει με θάλασσα -Λῦσιν, ἐρημαίῃ κρυπτὸν ὑπὸ σπιλάδι, -στρηνὲς ἀεὶ φωνεῦσα παρʼ οὔατι, καὶ παρὰ κωφὸν -σῆμα. τί μʼ, ὤνθρωποι, τῇδε παρῳκίσατε, -ἣ πνοιῆς χήρωσε τὸν οὐκ ἐπὶ φορτίδι νηὶ -ἔμπορον, ἀλλʼ ὀλίγης ναυτίλον εἰρεσίης -θηκαμένη ναυηγόν; ὁ δʼ ἐκ πόντοιο ματεύων -ζωήν, ἐκ πόντου καὶ μόρον εἱλκυσάμην. -
-
- - -Antipater - - -οὐδετέρης ὅλος εἰμὶ θανὼν νέκυς, ἀλλὰ θάλασσα -καὶ χθὼν τὴν ἀπʼ ἐμεῦ μοῖραν ἔχουσιν ἴσην. -σάρκα γὰρ ἐν πόντῳ φάγον ἰχθύες· ὀστέα δʼ αὖτε -βέβρασται ψυχρῇ τῇδε παρʼ ἠιόνι. -
-
- - -Antipater - - -ἀνθέα τὸν ναυηγὸν ἐπὶ στόμα Πηνειοῖο -νυκτὸς ὑπὲρ βαιῆς νηξάμενον σανίδος, -μούνιος ἐκ θάμνοιο θορὼν λύκος, ἄσκοπον ἄνδρα, -ἔκτανεν. ὦ γαίης κύματα πιστότερα, - -
-
- - -Statyllius flaccus - - -λαίλαπα καὶ μανίην ὀλοῆς προφυγόντα θαλάσσης -ναυηγόν, Λιβυκαῖς κείμενον ἐν ψαμάθοις, -οὐχ ἑκὰς ἠιόνων, πυμάτῳ βεβαρημένον ὕπνῳ, -γυμνόν, ἀπὸ στυγερῆς ὡς κάμε ναυφθορίης, -ἔκτανε λυγρὸς ἔχις. τί μάτην πρὸς κύματʼ ἐμόχθει, -τὴν ἐπὶ γῆς φεύγων μοῖραν ὀφειλομένην; -
-
- - -Xenocritus - - -χαῖταί σου στάζουσιν ἔθʼ ἁλμυρά, δύσμορε κούρη, -ναυηγέ, φθιμένης εἰν ἁλί, Λυσιδίκη. -ἦ γάρ, ὀρινομένου πόντου, δείσασα θαλάσσης -ὕβριν ὑπὲρ κοίλου δούρατος ἐξέπεσες. -καὶ σὸν μὲν φωνεῖ τάφος οὔνομα, καὶ χθόνα Κύμην, -ὀστέα δὲ ψυχρῷ κλύζετʼ ἐπʼ αἰγιαλῷ, -πικρὸν Ἀριστομάχῳ γενέτῃ κακόν, ὅς σε κομίζων -ἐς γάμον, οὔτε κόρην ἤγαγεν οὔτε νέκυν. -
-
- - -Theon - - -ἀλκυόσιν, Ληναῖε, μέλεις τάχα· κωφὰ δὲ μήτηρ -μύρεθʼ ὑπὲρ κρυεροῦ δυρομένη σε τάφου. -
-
- - -Isidorus - - -οὐ χεῖμα Νικόφημον, οὐκ ἄστρων δύσις -ἁλὸς Λιβύσσης κύμασιν κατέκλυσεν -ἀλλʼ ἐν γαλήνῃ, φεῦ τάλας, ἀνηνέμῳ -πλόῳ πεδηθείς, ἐφρύγη δίψευς ὕπο. -καὶ τοῦτʼ ἀήτεων ἔργον· ἆ πόσον κακὸν -ναύταισιν ἢ πνέοντες ἢ μεμυκότες. - -
-
- - -Tullius Laurea - - -Γρυνέα τὸν πρέσβυν, τὸν ἁλιτρύτου ἀπὸ κύμβης -ζῶντα, τὸν ἀγκίστροις καὶ μογέοντα λίνοις, -ἐκ δεινοῦ τρηχεῖα Νότου κατέδυσε θάλασσα, -ἔβρασε δʼ ἐς κροκάλην πρώϊον ἠϊόνα, -χεῖρας ἀποβρωθέντα. τίς οὐ νόον ἰχθύσιν εἴποι -ἔμμεναι, οἳ μούνας, αἷς ὀλέκοντο, φάγον; -
-
- - -Leonidas - - -Θῆριν τὸν τριγέροντα, τὸν εὐάγρων ἀπὸ κύρτων -ζῶντα, τὸν αἰθυίης πλείονα νηξάμενον, -ἰχθυσιληϊστῆρα, σαγηνέα, χηραμοδύτην, -οὐχὶ πολυσκάλμου πλώτορα ναυτιλίης, -ἔμπης οὔτʼ Ἀρκτοῦρος ἀπώλεσεν, οὔτε καταιγὶς -ἤλασε τὰς πολλὰς τῶν ἐτέων δεκάδας· -ἀλλʼ ἔθανʼ ἐν καλύβῃ σχοινίτιδι, λύχνος ὁποῖα, -τῷ μακρῷ σβεσθεὶς ἐν χρόνῳ αὐτόματος. -σῆμα δὲ τοῦτʼ οὐ παῖδες ἐφήρμοσαν, οὐδʼ ὁμόλεκτρος, -ἀλλὰ συνεργατίνης ἰχθυβόλων θίασος. -
-
- - -Simonides - - -ἐξ οὗ γʼ Εὐρώπην Ἀσίας δίχα πόντος ἔνειμε, -καὶ πόλεμον λαῶν θοῦρος Ἄρης ἐφέπει, -οὐδαμά πω κάλλιον ἐπιχθονίων γένετʼ ἀνδρῶν -ἔργον ἐν ἠπείρῳ καὶ κατὰ πόντον ἅμα. -οἵδε γὰρ ἐν Κύπρῳ Μήδων πολλοὺς ὀλέσαντες, -Φοινίκων ἑκατὸν ναῦς ἕλον ἐν πελάγει -ἀνδρῶν πληθούσας· μέγα δʼ ἔστενεν Ἀσὶς ὑπʼ αὐτῶν -πληγεῖς1ʼ ἀμφοτέραις χερσὶ κράτει πολέμου. - -
-
- - -Polystratus - - -τὸν μέγαν Ἀκροκόρινθον Ἀχαιικὸν, Ἑλλάδος ἄστρον, -καὶ διπλῆν Ἰσθμοῦ σύνδρομον ἠιόνα -Λεύκιος ἐστυφέλιξε· δοριπτοίητα δὲ νεκρῶν -ὀστέα σωρευθεὶς εἷς ἐπέχει σκόπελος. -τοὺς δὲ δόμον Πριάμοιο πυρὶ πρήσαντας Ἀχαιοὺς -ἀκλαύστους κτερέων νόσφισαν Αἰνεάδαι. -
-
- - -Anonymi Epigrammatici - - -αἰαῖ, τοῦτο κάκιστον, ὅταν κλαίωσι θανόντα -νυμφίον ἢ νυμφίον ἡνίκα δʼ ἀμφοτέρους, -Εὔπολιν ὡς ἀγαθήν τε Λυκαίνιον, ὧν ὑμέναιον -ἔσβεσεν ἐν πρώτῃ νυκτὶ πεσὼν θάλαμος, -οὐκ ἄλλῳ τόδε κῆδος ἰσόρροπον, ᾧ σὺ μὲν υἱόν, -Νῖκι, σὺ δʼ ἔκλαυσας, Θεύδικε, θυγατέρα. -
-
- - -Nicomachus - - -ἅδʼ ἔσθʼ — ἅδε Πλάταια τί τοι λέγω; — ἅν ποτε σεισμὸς -ἐλθὼν ἐξαπίνας κάββαλε πανσυδίῃ· -λείφθη δʼ αὖ μοῦνον τυτθὸν γένος· οἱ δὲ θανόντες -σᾶμʼ ἐρατὰν πάτραν κείμεθʼ ἐφεσσάμενοι. -
-
- - -Simonides - - -ἐνθάδε Σιμωνίδου κασίγνητόν τε κέκευθεν -γαῖʼ, ἐρατῆς ἥβης πρὶν τέλος ἄκρον ἰδεῖν. -μνῆμα δʼ ἀποφθιμένοισι πατὴρ Μεγάριστος ἔθηκεν -ἀθάνατον θνητοῖς παισὶ χαριζόμενος. - -
-
- - -Simonides - - -εὐκλέας αἶα κέκευθε, Λεωνίδα, οἳ μετὰ σεῖο -τῇδʼ ἔθανον, Σπάρτης εὐρυχόρου βασιλεῦ, -πλείστων δὴ τόξων τε καὶ ὠκυπόδων σθένος ἵππων -Μηδείων ἀνδρῶν δεξάμενοι πολέμῳ. -
-
- - -Simonides - - -τῶν αὐτοῦ τις ἕκαστος ἀπολλυμένων ἀνιᾶται· -Νικόδικον δὲ φίλοι καὶ πόλις ἥδε † πολή. -
-
- - -Antipater - - -τὸν μικρὸν Κλεόδημον ἔτι ζώοντα γάλακτι, -ἴχνος ὑπὲρ τοίχων νηὸς ἐρεισάμενον, -ὁ Θρήιξ ἐτύμως Βορέης βάλεν εἰς ἁλὸς οἶδμα, -κῦμα δʼ ἀπὸ ψυχὴν ἔσβεσε νηπιάχου. -Ἰνοῖ, ἀνοικτίρμων τις ἔφυς θεός, ἣ Μελικέρτεω -ἥλικος οὐκ Ἀίδην πικρὸν ἀπηλάσαο. -
-
- - -Pisander - - -ἀνδρὶ μὲν Ἱππαίμων ὄνομʼ ἦν, ἵππῳ δὲ Πόδαργος, -καὶ κυνὶ Λήθαργος, καὶ θεράποντι Βάβης, -Θεσσαλός, ἐκ Κρήτης, Μάγνης γένος, Αἵμονος υἱός· -ὤλετο δʼ ἐν προμάχοις ὀξὺν Ἄρη συνάγων. - -
-
- - -Adaeus - - -ὁ γριπεὺς Διότιμος, ὁ κύμασιν ὁλκάδα πιστὴν -κἠν χθονὶ τὴν αὐτὴν οἶκον ἔχων πενίης, -νήγρετον ὑπνώσας Ἀΐδαν τὸν ἀμείλιχον ἷκτο -αὐτερέτης, ἰδίῃ νηὶ κομιζόμενος· -ἣν γὰρ ἔχε ζωῆς παραμύθιον, ἔσχεν ὁ πρέσβυς -καὶ φθίμενος πύματον πυρκαϊῆς ὄφελος. -
-
- - -Anonymi Epigrammatici - - -Ἀβρότονον Θρήισσα γυνὴ πέλον ἀλλὰ τεκέσθαι -τὸν μέγαν Ἕλλησίν φημι Θεμιστοκλέα. -
-
- - -Paulus Silentiarius - - - - οὔνομά μοι. τί δὲ τοῦτο; πατρὶς δέ μοι. - - ἐς τί δὲ τοῦτο; - - κλεινοῦ δʼ εἰμὶ γένους. εἰ γὰρ ἀφαυροτάτου; - - ζήσας δʼ ἐνδόξως ἔλιπον βίον. εἰ γὰρ ἀδόξως; - - κεῖμαι δʼ ἐνθάδε νῦν. τίς τίνι ταῦτα λέγεις; -
-
- - -Pseudo-lucianus - - -παῖδά με πενταέτηρον, ἀκηδέα θυμὸν ἔχοντα, -νηλειὴς Ἀίδης ἥρπασε Καλλίμαχον. -ἀλλά με μὴ κλαίοις· καὶ γὰρ βιότοιο μετέσχον -παύρου, καὶ παύρων τῶν βιότοιο κακῶν. - -
-
- - -Anonymi Epigrammatici - - -ἑξηκοντούτης Διονύσιος ἐνθάδε κεῖμαι, -Ταρσεύς, μὴ γήμας· αἴθε δὲ μηδʼ ὁ πατήρ. -
-
- - -Anonymi Epigrammatici - - -Θάψεν ὅ με κτείνας κρύπτων φόνον εἰ δέ με τύμβῳ -δωρεῖται, τοίης ἀντιτύχοι χάριτος. -
-
- - -Anonymi Epigrammatici - - - -ὁ τύμβος οὗτος ἔνδον οὐκ ἔχει νεκρὸν -ὁ νεκρὸς οὗτος· ἐκτὸς οὐκ ἔχει τάφον, -ἀλλʼ αὐτὸς αὑτοῦ νεκρός ἐστι καὶ τάφος. -
-
- - -Gaius Asinius Quadratus - - - -οἱ πρὸς Ῥωμαίους δεινὸν στήσαντες Ἄρηα -κεῖνται, ἀριστείης σύμβολα δεικνύμενοι· -οὐ γάρ τις μετὰ νῶτα τυπεὶς θάνεν, ἀλλʼ ἅμα πάντες -ὤλοντο κρυφίῳ καὶ δολερῷ θανάτῳ. -
-
- - -Anonymi Epigrammatici - - - -ἐνθάδʼ ἀπορρήξας ψυχὴν βαρυδαίμονα κεῖμαι· -τοὔνομα δʼ οὐ πεύσεσθε, κακοὶ δὲ κακῶς ἀπόλοισθε. - -
-
- - -Ptolemaeus - - - -μὴ πόθεν εἰμὶ μάθῃς, μηδʼ -οὔνομα· πλὴν ὅτι θνῄσκειν -τοὺς παρʼ ἐμὴν στήλην ἐρχομένους ἐθέλω. -
-
- - -Zenodotus - - - -τρηχεῖαν κατʼ ἐμεῦ, ψαφαρὴ κόνι, ῥάμνον ἑλίσσοις -πάντοθεν, ἢ σκολιῆς ἄγρια κῶλα βάτου, -ὡς ἐπʼ ἐμοὶ μηδʼ ὄρνις ἐν εἴαρι κοῦφον ἐρείδοι -ἴχνος, ἐρημάζω δʼ ἥσυχα κεκλιμένος. -ἦ γὰρ ὁ μισάνθρωπος, ὁ μηδʼ ἀστοῖσι φιληθεὶς -Τίμων οὐδʼ Ἀίδῃ γνήσιός εἰμι νέκυς. -
-
- - -Leonidas - - - -τὴν ἐπʼ -ἐμεῦ στήλην παραμείβεο, μήτε με χαίρειν -εἰπὼν, μήθʼ -ὅστις, μὴ τίνος ἐξετάσας· -ἢ μὴ τὴν ἀνύεις τελέσαις ὁδὸν ἢν δὲ παρέλθῃς -σιγῇ, μηδʼ οὕτως ἣν ἀνύεις τελέσαις. -
-
- - -Callimachus - - - - - Τίμων ʽοὐ γὰρ ἔτʼ ἐσσἴ, τί τοι, σκότος ἢ φάος, -ἐχθρόν, τὸ σκότος· ὑμέων γὰρ πλείονες εἰν Ἀίδῃ. - -
-
- - -Callimachus - - - -μὴ χαίρειν εἴπῃς με, κακὸν κέαρ, ἀλλὰ πάρελθε -ἶσον ἐμοὶ χαίρειν ἐστὶ τὸ μὴ σὲ πελᾶν. -
-
- - -Anonymi Epigrammatici - - - -καὶ νέκυς ὢν Τίμων ἄγριος· σὺ δὲ γʼ, ὦ πυλαωρὲ -Πλούτωνος, τάρβει, Κέρβερε, μή σε δάκῃ. -
-
- - -Hegesippus - - - -ὀξεῖαι πάντῃ περὶ τὸν τάφον εἰσὶν ἄκανθαι -καὶ σκόλοπες· βλάψεις τοὺς πόδας, ἢν προσίῃς· -Τίμων μισάνθρωπος ἐνοικέω· ἀλλὰ πάρελθε, -οἰμώζειν εἴπας πολλά, πάρελθε μόνον. -
-
- - -Anonymi Epigrammatici - - -γαῖα φίλη, τὸν πρέσβυν Ἀμύντιχον ἔνθεο κόλποις, -πολλῶν μνησαμένη τῶν ἐπὶ σοὶ καμάτων. -καὶ γὰρ ἀειπέταλόν σοι ἐνεστήριξεν ἐλαίην -πολλάκι, καὶ Βρομίου κλήμασιν ἠγλάισεν, -καὶ Δηοῦς ἔπλησε, καὶ ὕδατος αὔλακας ἕλκων -θῆκε μὲν εὐλάχανον, θῆκε δʼ ὀπωροφόρον. -ἀνθʼ ὧν σὺ πρηεῖα κατὰ κροτάφου πολιοῖο -κεῖσο, καὶ εἰαρινὰς ἀνθοκόμει βοτάνας. -
-
- - -Anonymi Epigrammatici - - -Κνωσίου Ἰδομενῆος ὅρα τάφον αὐτὰρ ἐγώ τοι -πλησίον ἵδρυμαι Μηριόνης ὁ Μόλου. - -
-
- - -Anonymi Epigrammatici - - -εἷς δύʼ ἀδελφειοὺς ἐπέχει τάφος· ἓν γὰρ ἐπέσχον -ἦμαρ καὶ γενεῆς οἱ δύο καὶ θανάτου. -
-
- - -Anonymi Epigrammatici - - - -ἅδʼ ἐγὼ ἁ περίβωτος ὑπὸ πλακὶ τῇδε τέθαμμαι, -μούνῳ ἑνὶ ζώναν ἀνέρι λυσαμένα. -
-
- - -Anonymi Epigrammatici - - - -Τόσς1ʼ ἔχω ὅσς1ʼ ἔφαγον καὶ ἔπιον, καὶ μετʼ ἐρώτων -τέρπνʼ ἐδάην τὰ δὲ πολλὰ καὶ ὄλβια πάντα λέλειπται. -
-
- - -Crates - - -ταῦτʼ ἔχω ὅσς1ʼ ἔμαθον καὶ ἐφρόντισα, καὶ μετὰ Μουσῶν -σέμνʼ ἐδάην τὰ δὲ πολλὰ καὶ ὄλβια τῦφος ἔμαρψεν -
-
- - -Anonymi Epigrammatici - - - -μὴ σύγε θνητὸς ἐὼν ὡς ἀθάνατός τι λογίζου· -οὐδὲν γὰρ βιότου πιστὸν ἐφημερίοις, -εἰ καὶ τόνδε Κάσανδρον ἔχει σορὸς ἥδε θανόντα, -ἄνθρωπον φύσεως ἄξιον ἀθανάτου. - -
-
- - -Anonymi Epigrammatici - - -τίς λίθος οὐκ ἐδάκρυσε, σέθεν φθιμένοιο, Κάσανδρε; -τίς πέτρος, ὃς τῆς σῆς λήσεται ἀγλαΐης; -ἀλλά σε νηλειὴς καὶ βάσκανος ὤλεσε δαίμων -ἡλικίην ὀλίγην εἴκοσιν ἓξ ἐτέων, -ὃς χήρην ἄλοχον θῆκεν, μογερούς τε τοκῆας -γηραλέους, στυγερῷ πένθεϊ τειρομένους. -
-
- - -Anonymi Epigrammatici - - -Μυρτάδα τὴν ἱεραῖς με Διωνύσου παρὰ ληνοῖς -ἄφθονον ἀκρήτου σπασσαμένην κύλικα, -οὐ κεύθει φθιμένην βαιὴ κόνις· ἀλλὰ πίθος μοι, -σύμβολον εὐφροσύνης, τερπνὸς ἔπεστι τάφος. -
-
- - -Anonymi Epigrammatici - - -ἐν τῷ Δορυλαίῳ -τὴν σορόν, ἣν ἐσορᾷς, ζῶν Μάξιμος αὐτὸς ἑαυτῷ -θῆκεν, ὅπως ναίῃ παυσάμενος βιότου· -σύν τε, γυναικὶ Καληποδίῃ τεῦξεν τόδε σῆμα, -ὣς ἵνα τὴν στοργὴν κἠν φθιμένοισιν ἔχοι. -
-
- - -Anonymi Epigrammatici - - - -τύμβον ἐμοὶ τοῦτον γαμέτης δωρήσατο Φρούρης, -ἄξιον ἡμετέρης εὐσεβίης στέφανον· -λείπω δʼ ἐν θαλάμοις γαμέτου χορὸν εὐκλέα παίδων, -πιστὸν ἐμοῦ βιότου μάρτυρα σωφροσύνης. -μουνόγαμος θνῄσκω, δέκα δʼ ἐν ζωοῖσιν ἔτι ζῶ, -νυμφικὸν εὐτεκνίης καρπὸν ἀειραμένη. - -
-
- - -Anonymi Epigrammatici - - - -αἰνόμορον βάκχη με κατέκτανε θηροτρόφον πρίν, -οὐ κρίσει ἐν σταδίοις, γυμνασίαις δὲ κλυταῖς. -
-
- - -Anonymi Epigrammatici - - - -μηδὲ καταχθονίοις μετὰ δαίμοσιν ἄμμορος εἴης -ἡμετέρων δώρων, ὧν ς1ʼ ἐπέοικε τυχεῖν, -ἀμμία, οὕνεκα Νικόμαχος θυγάτηρ τε Διώνη -τύμβον καὶ στήλην σὴν ἐθέμεσθα χάριν. -
-
- - -Anonymi Epigrammatici - - - -νηλεὲς ὦ δαῖμον, τί δέ μοι καὶ φέγγος ἔδειξας -εἰς ὀλίγων ἐτέων μέτρα μινυνθάδια; -ἢ ἵνα λυπήσῃς διʼ ἐμὴν βιότοιο τελευτὴν -μητέρα δειλαίην δάκρυσι καὶ στοναχαῖς, -ἥ μʼ ἔτεχʼ, ἥ μʼ ἀτίτηλε, καὶ ἣ πολὺ μείζονα πατρὸς -φροντίδα παιδείης ἤνυσεν ἡμετέρης; -ὃς μὲν γὰρ τυτθόν τε καὶ ὀρφανὸν ἐν μεγάροισι -κάλλιπεν· ἡ δʼ ἐπʼ ἐμοὶ πάντας ἔτλη καμάτους. -ἦ μὲν ἐμοὶ φίλον ἦεν ἐφʼ ἁγνῶν ἡγεμονήων -ἐμπρεπέμεν μύθοις ἀμφὶ δικασπολίας· -ἀλλά μοι οὐ γενύων ὑπεδέξατο κούριμον ἄνθος -ἡλικίης ἐρατῆς, οὐ γάμον, οὐ δαΐδας· - -οὐχ ὑμέναιον ἄεισε περικλυτόν, οὐ τέκος εἶδε, -δύσποτμος, ἐκ γενεῆς λείψανον ἡμετέρης, -τῆς πολυθρηνήτου· λυπεῖ δέ με καὶ τεθνεῶτα -μητρὸς Πωλίττης πένθος ἀεξόμενον, -Φρόντωνος γοεραῖς ἐπὶ φροντίσιν, ἣ τέκε παῖδα -ὠκύμορον, κενεὸν χάρμα φίλης πατρίδος. -
-
- - -Anonymi Epigrammatici - - - - Πώλιττα, τλῆθι πένθος, εὔνασον δάκρυ. -πολλαὶ θανόντας εἶδον υἱεῖς μητέρες. - - ἀλλʼ οὐ τοιούτους τὸν τρόπον καὶ τὸν βίον, -οὐ μητέρων σέβοντας ἡδίστην θέαν. - - τί περισσὰ θρηνεῖς; τί δὲ μάτην ὀδύρεαι; -εἰς κοινὸν ᾍδην πάντες ἥξουσι βροτοί. -
-
- - -Anonymi Epigrammatici - - -γήραϊ καὶ πενίῃ τετρυμένος, οὐδʼ ὀρέγοντος -οὐδενὸς ἀνθρώπου δυστυχίης ἔρανον, -τοῖς τρομεροῖς κώλοισιν ὑπήλυθον ἠρέμα τύμβον, -εὑρὼν οἰζυροῦ τέρμα μόλις βιότου. -ἠλλάχθη δʼ ἐπʼ ἐμοὶ νεκύων νόμος· οὐ γὰρ ἔθνῃσκον -ἔπειτʼ, ἔπειτʼ ἐτάφην ἀλλὰ ταφεὶς ἔθανον. -
-
- - -Anonymi Epigrammatici - - -μή με θοῶς, κύδιστε, παρέρχεο τύμβον, ὁδῖτα, -σοῖσιν ἀκοιμήτοις ποσσί, κελευθοπόρε· -δερκόμενος δʼ ἐρέεινε, τίς ἢ πόθεν; ἁρμονίαν γὰρ -γνώσεαι, ἧς γενεὴ λάμπεται ἐν Μεγάροις· - -πάντα γάρ, ὅσσα βροτοῖσι φέρει κλέος, ἦεν ἰδέσθαι, -εὐγενίην ἐρατήν, ἤθεα, σωφροσύνην. -τοίης τύμβον ἄθρησον ἐς οὐρανίας γὰρ ἀταρποὺς -ψυχὴ παπταίνει σῶμʼ ἀποδυσαμένη. -
-
- - -Anonymi Epigrammatici - - -ἅδε τοι Ἀρχίου υἱὲ Περίκλεες, ἁ λιθίνα γὼ -ἕστακα στάλα, μνᾶμα κυναγεσίας· -πάντα δέ τοι περὶ σᾶμα τετεύχαται, ἵπποι, ἄκοντες, -αἱ κύνες, αἱ στάλικες, δίκτυʼ ὑπὲρ σταλίκων, -αἰαῖ, λάινα πάντα· περιτροχάουσι δὲ θῆρες· -αὐτὸς δʼ εἰκοσέτας νήγρετον ὕπνον ἔχεις. -
-
- - -Anonymi Epigrammatici - - -οὐδὲν ἁμαρτήσας γενόμην παρὰ τῶν με τεκόντων -γεννηθεὶς δʼ ὁ τάλας ἔρχομαι εἰς Ἀίδην. -ὦ μίξις γονέων θανατηφόρος· ὤ μοι ἀνάγκης, -ἥ με προσπελάσει τῷ στυγερῷ θανάτῳ. -οὐδὲν ἐὼν γενόμην πάλιν ἔσσομαι, ὡς πάρος, οὐδὲν -οὐδὲν καὶ μηδὲν τῶν μερόπων τὸ γένος· -λοιπόν μοι τὸ κύπελλον ἀποστίλβωσον, ἑταῖρε, -καὶ λύπης † ὀδύνην τὸν Βρόμιον πάρεχε· -
-
- - -Anonymi Epigrammatici - - -εὑρέθη ἐν Θεσσαλονίκῃ -Νικόπολιν Μαράθωνις ἐθήκατο τῇδʼ ἐνὶ πέτρῃ, -ὀμβρήσας δακρύοις λάρνακα μαρμαρέην. -ἀλλʼ οὐδὲν πλέον ἔσχε· τί γὰρ πλέον ἀνέρι κήδευς -μούνῳ ὑπὲρ γαίης, οἰχομένης ἀλόχου; - -
-
- - -Proclus - - -Πρόκλος ἐγὼ Λύκιος γενόμην γένος, ὃν Συριανὸς -ἐνθάδʼ ἀμοιβὸν ἑῆς θρέψε διδασκαλίης. -ξυνὸς δʼ ἀμφοτέρων ὅδε σώματα δέξατο τύμβος, -αἴθε δὲ καὶ ψυχὰς χῶρος ἕεις λελάχοι. -
-
- - -Anonymi Epigrammatici - - -Κάτθανον, ἀλλὰ μένω σε· μενεῖς δέ τε καὶ σὺ τινʼ ἄλλον -πάντας ὁμῶς θνητοὺς εἷς Ἀίδης δέχεται. -
-
- - -Anonymi Epigrammatici - - -Πατέριον λιγύμυθον, ἐπήρατον, ἔλλαχε τύμβος, -Μιλτιάδου φίλον υἷα καὶ Ἀττικίης βαρυτλήτου, -Κεκροπίης βλάστημα, κλυτὸν γένος Αἰακιδάων, -ἔμπλεον Αὐσονίων θεσμῶν σοφίης τʼ ἀναπάσης, -τῶν πισύρων ἀρετῶν ἀμαρύγματα πάντα φέροντα· -ἠίθεον χαρίεντα, τὸν ἥρπασε μόρσιμος αἶσα, -οἷά τε ἀγλαόμορφον ἀπὸ χθονὸς ἔρνος ἀήτης, -εἰκοσικαιτέτρατον βιότου λυκάβαντα περῶντα· -λεῖψε φίλοις δὲ τοκεῦσι γόον καὶ πένθος ἄλαστον. -
-
- - -Simonides - - -θηρῶν μὲν κάρτιστος ἐγώ, θνατῶν δʼ ὃν ἐγὼ νῦν -φρουρῶ, τῷδε τάφῳ λαΐνῳ ἐμβεβαώς. -
-
- - -Callimachus - - -ἀλλʼ εἰ μὴ θυμόν γε Λέων ἐμὸν οὔνομὰ τʼ εἶχεν, -οὐκ ἂν ἐγὼ τύμβῳ τῷδʼ ἐπέθηκα πόδας, - -
-
- - -Aeschrion - - -ἐγὼ Φιλαινὶς ἡ πίβωτος ἀνθρώποις -ἐνταῦθα γήρᾳ τῷ μακρῷ κεκοίμημαι. -μὴ μʼ, ὦ μάταιε ναῦτα, τὴν ἄκραν κάμπτων, -χλεύην τε ποιεῦ καὶ γέλωτα καὶ λάσθην. -οὐ γάρ, μὰ τὸν Ζῆνʼ οὐδὲ τοὺς κάτω Κούρους, -οὐκ ἦν ἐς ἄνδρας μάχλος οὐδὲ δημώδης· -Πολυκράτης δὲ τὴν γονὴν Ἀθηναῖος, -λόγων τι παιπάλημα καὶ κακὴ γλῶσσα, -ἔγραψεν οἷʼ ἔγραψʼ, ἐγὼ γὰρ οὐκ οἶδα. -
-
- - -Anonymi Epigrammatici - - -τοῦτό τοι ἡμετέρης μνημήιον, ἐσθλὲ Σαβῖνε, -ἡ λίθος ἡ μικρή, τῆς μεγάλης φιλίης. -αἰεὶ ζητήσω σε· σὺ δʼ, εἰ θέμις, ἐν φθιμένοισι -τοῦ Λήθης ἐπʼ ἐμοὶ μή τι πίῃς ὕδατος. -Goldsin Smith, in The Greek Anthology (Bohn), xliv. -
-
- - -Anonymi Epigrammatici - - -οὗτος Ἀδειμάντου κείνου τάφος, οὗ διὰ βουλὰς -Ἑλλὰς ἐλευθερίης ἀμφέθετο στέφανον. -
-
- - -Simonides - - -πολλὰ πιὼν καὶ πολλὰ φαγὼν, καὶ πολλὰ κάκʼ εἰπὼν -ἀνθρώπους, κεῖμαι Τιμοκρέων Ῥόδιος. -W. Peter, in his Specimens, p. 53; W. H. D. Rouse, An Echo of Greek Song, p. 72. - -
-
- - -Simonides - - -βαιὰ φαγὼν καὶ βαιὰ πιὼν καὶ πολλὰ νοσήσας, -ὀψὲ μέν, ἀλλʼ ἔθανον. ἔρρετε πάντες ὁμοῦ. -
-
- - -Anonymi Epigrammatici - - -Ναυτίλε, μὴ πεύθου τίνος ἐνθάδε τύμβος ὅδʼ εἰμί, -ἀλλʼ αὐτὸς πόντου τύγχανε χρηστοτέρου. -
-
- - -Dioscorides - - -οὐ μὰ τόδε φθιμένων σέβας ὅρκιον, αἵδε Λυκάμβεω, -αἳ λάχομεν στυγερὴν κλῃδόνα, θυγατέρες, -οὔτε τι παρθενίην ᾐσχύναμεν, οὔτε τοκῆας, -οὔτε Πάρον νήσων αἰπυτάτην ἱερῶν. -ἀλλὰ καθʼ ἡμετέρης γενεῆς ῥιγηλὸν ὄνειδος -φήμην τε στυγερὴν ἔβλυσεν Ἀρχίλοχος. -Ἀρχίλοχον, μὰ θεοὺς καὶ δαίμονας, οὔτʼ ἐν ἀγυιαῖς -εἴδομεν, οὔθʼ Ἥρης ἐν μεγάλῳ τεμένει. -εἰ δʼ ἦμεν μάχλοι καὶ ἀτάσθαλοι, οὐκ ἂν ἐκεῖνος -ἤθελεν ἐξ ἡμέων γνήσια τέκνα τεκεῖν. -
-
- - -Meleager - - -δεξιτερὴν Ἀίδαο θεοῦ χέρα καὶ τὰ κελαινὰ -ὄμνυμεν ἀρρήτου δέμνια Περσεφόνης, -παρθένοι ὡς ἔτυμον καὶ ὑπὸ χθονί· πολλὰ δʼ ὁ πικρὸς -αἰσχρὰ καθʼ ἡμετέρης ἔβλυσε παρθενίης - -Ἀρχίλοχος· ἐπέων δὲ καλὴν φάτιν οὐκ ἐπὶ καλὰ -ἔργα, γυναικεῖον δʼ ἔτραπεν ἐς πόλεμον. -Πιερίδες, τί κόρῃσιν ἔφʼ ὑβριστῆρας ἰάμβους -ἐτράπετʼ, οὐχ ὁσίῳ φωτὶ χαριζόμεναι; -
-
- - -Antipater - - -τῆς πολιῆς τόδε σῆμα Μαρωνίδος, ἧς ἐπὶ τύμβῳ -γλυπτὴν ἐκ πέτρης αὐτὸς ὁρᾷς κύλικα. -ἡ δὲ φιλάκρητος καὶ ἀείλαλος οὐκ ἐπὶ τέκνοις -μύρεται, οὐ τεκέων ἀκτεάνῳ πατέρι· -ἓν δὲ τόδʼ αἰάζει καὶ ὑπʼ ἠρίον, ὅττι τὸ Βάκχου -ἄρμενον οὐ Βάκχου πλῆρες ἔπεστι τάφῳ. -
-
- - -Gaetulicus I - - -παίδων Μηδείης οὗτος τάφος, οὓς ὁ πυρίπνους -ζᾶλος τῶν Γλαύκης θῦμʼ ἐποίησε γάμων, -οἷς αἰεὶ πέμπει μειλίγματα Σισυφὶς αἶα, -μητρὸς ἀμείλικτον θυμὸν ἱλασκομένα. -
-
- - -Damagetus - - -τὴν ἱλαρὰν φωνὴν καὶ τίμιον, ὦ παριόντες, -τῷ χρηστῷ χαίρειν εἴπατε Πραξιτέλει· -ἦν δʼ ὡνὴρ Μουσέων ἱκανὴ μερίς, ἠδὲ παρʼ οἴνῳ -κρήγυος. ὦ χαίροις Ἄνδριε Πραξίτελες. - -
-
- - -Anonymi Epigrammatici - - -εἴς τινα ὑπὸ λῃστοῦ ἀναιρεθέντα καὶ ὑπʼ αὐτοῦ πάλιν θαπτόμενον -ζωὴν συλήσας, δωρῇ τάφον ἀλλά με κρύπτεις, -οὐ θάπτεις. τοίου καὐτὸς ὄναιο τάφου. - -
-
- - -Anonymi Epigrammatici - - - -κἄν με κατακρύπτῃς, ὡς οὐδενὸς ἀνδρὸς ὁρῶντος, -ὄμμα Δίκης καθορᾷ πάντα τὰ γινόμενα. -
-
- - -Anonymi Epigrammatici - - - -ἔκτανες, εἶτά μʼ ἔθαπτες, ἀτάσθαλε, χερσὶν ἐκείναις -αἷς με διεχρήσω· μή σε λάθοι Νέμεσις. -
-
- - -Anonymi Epigrammatici - - - -εἴ με νέκυν κατέθαπτες ἰδὼν οἰκτίρμονι θυμῷ, -εἶχες ἂν ἐκ μακάρων μισθὸν ἐπʼ εὐσεβίῃ· -νῦν δʼ ὅτε δὴ τύμβῳ με κατακρύπτεις ὁ φονεύσας, -τῶν αὐτῶν μετέχοις ὧνπερ ἐμοὶ παρέχεις. -
-
- - -Anonymi Epigrammatici - - - -χερσὶ κατακτείνας τάφον ἔκτισας, οὐχ ἵνα θάψῃς, -ἀλλʼ ἵνα με κρύψῃς· ταὐτὸ δὲ καὶ σὺ πάθοις. -
-
- - -Anonymi Epigrammatici - - -υἷϊ πατήρ τόδε σῆμα· τὸ δʼ ἔμπαλιν ἦν τὸ δίκαιον -ἦν δὲ δικαιοσύνης ὁ φθόνος ὀξύτερος. -
-
- - -Philippus - - -ἐνθάδε τὴν ἱερὴν κεφαλὴν σορὸς ἥδε κέκευθεν -Ἀετίου χρηστοῦ, ῥήτορος ἐκπρεπέος. - -ἦλθεν δʼ -εἰς Ἀίδαο δέμας, ψυχὴ δʼ ἐν Ὀλύμπῳ -τέρπεθʼ ἅμα Ζηνὶ καὶ ἄλλοισιν μακάρεσσι -ἀθάνατον δὲ -οὔτε λόγος ποιεῖν οὔτε θεὸς δύναται. -
-
- - -Anonymi Epigrammatici - - -ʽ ʽΤετμενάνης ὅδε τύμβος ἐυγλύπτοιο μετάλλου -ἥρωος μεγάλου νέκυος κατὰ σῶμα καλύπτει -Ζηνοδότου· ψυχὴ δὲ κατʼ οὐρανόν, ᾗχί περ Ὀρφεύς, -ᾗχι Πλάτων, ἱερὸν θεοδέγμονα θῶκον ἐφεῦρεν. -ἱππεὺς μὲν γὰρ ἔην βασιλήιος ἄλκιμος οὗτος, -κύδιμος, ἀρτιεπής, θεοείκελος· ἐν δʼ ἄρα μύθοις -Σωκράτεος μίμημα παρʼ Αὐσονίοισιν ἐτύχθη· -παισὶ δὲ καλλείψας πατρώϊον αἴσιον ὄλβον, -ὠμογέρων τέθνηκε, λιπὼν ἀπερείσιον ἄλγος -εὐγενέεσσι φίλοισι καὶ ἄστεϊ καὶ πολιήταις. -
-
- - -Marcus Argentarius - - -Ἀκρίδι καὶ τέττιγι Μυρὼ τόδε θήκατο σῆμα, -λιτὴν ἀμφοτέροις χερσὶ βαλοῦσα κόνιν, -ἵμερα δακρύσασα πυρῆς ἔπι· τὸν γὰρ ἀοιδὸν -ᾅδης, τὴν δʼ ἑτέρην ἥρπασε Περσεφόνη. -
-
- - -Diodorus Zonas - - -Ἀίδῃ ὃς ταύτης καλαμώδεος ὕδατι λίμνης -κωπεύεις νεκύων βᾶριν, † ἐλῶν ὀδύνην, -τῷ Κινύρου τὴν χεῖρα βατηρίδος ἐμβαίνοντι -κλίμακος ἐκτείνας, δέξο, κελαινὲ Χάρον -πλάζει γὰρ τὸν παῖδα τὰ σάνδαλα· γυμνὰ δὲ θεῖναι -ἴχνια δειμαίνει ψάμμον ἔπʼ ᾐονίην. - -
-
- - -Antistius - - -Ἀώου προχοαὶ σέ, Μενέστρατε, καὶ σέ, Μένανδρε, -λαῖλαψ Καρπαθίη, καὶ σὲ πόρος Σικελὸς -ὤλεσεν ἐν πόντῳ, Διονύσιε· φεῦ πόσον ἄλγος -Ἑλλάδι· τοὺς πάντων κρέσσονας ἀθλοφόρων. -
-
- - -Antipater - - -Αὔσονος Ἠγερίου με λέγειν νέκυν, ᾧ μετιόντι -νύμφην ὀφθαλμοὺς ἀμβλὺ κατέσχε νέφος, -ὄμμασι δὲ πνοιὴν συναπέσβεσε μοῦνον ἰδόντος -κούρην. φεῦ κείνης, Ἥλιε, θευμορίης· -ἔρροι δὴ κεῖνο φθονερὸν σέλας, εἴθʼ Ὑμέναιος -ἧψέ μιν οὐκ ἐθέλων, εἴτʼ Ἀίδης ἐθέλων. -
-
- - -Erycius - - -Ἀτθὶς ἐγώ· κείνη γὰρ ἐμὴ πόλις· ἐκ δὲ μʼ Ἀθηνῶν -λοιγὸς Ἄρης Ἰταλῶν πρὶν ποτʼ ἐληίσατο, -καὶ θέτο Ῥωμαίων πολιήτιδα· νῦν δὲ θανούσης -ὀστέα νησαίη Κύζικος ἠμφίασε. -χαίροις ἡ θρέψασα, καὶ ἡ μετέπειτα λαχοῦσα -χθών με, καὶ ἡ κόλποις ὕστατα δεξαμένη. -
-
- - -Antipater - - -Ἀντιπάτρου ῥητῆρος ἐγὼ τάφος· ἡλίκα δʼ ἔπνει -ἔργα, Πανελλήνων πεύθεο μαρτυρίης. -κεῖται δʼ ἀμφήριστος, Ἀθηνόθεν, εἴτʼ ἀπὸ Νείλου -ἦν γένος· ἠπείρων δʼ ἄξιος ἀμφοτέρων. -ἄστεα καὶ δʼ ἄλλως ἑνὸς αἵματος, ὡς λόγος Ἕλλην -κλήρῳ δʼ ἡ μὲν ἀεὶ Παλλάδος, ἡ δὲ Διός. - -
-
- - -Diodorus - - -Βάκχῳ καὶ Μούσῃσι μεμηλότα, τὸν Διοπείθους, -Κεκροπίδην ὑπʼ ἐμοί, ξεῖνε, Μένανδρον ἔχω, -ἐν πυρὶ τὴν ὀλίγην ὃς ἔχει κόνιν εἰ δὲ Μένανδρον -δίζηαι, δήεις ἐν Διὸς ἢ μακάρων. -
-
- - -Crinagoras - - -γῆ μευ καὶ μήτηρ κικλήσκετο· γῆ με καλύπτει -καὶ νέκυν. οὐ κείνης ἥδε χερειοτέρη· -ἔσσομαι ἐν ταύτῃ δηρὸν χρόνον ἐκ δέ με μητρὸς -ἥρπασεν ἠελίου καῦμα τὸ θερμότατον. -κεῖμαι δʼ ἐν ξείνῃ, ὑπὸ χερμάδι, μακρὰ γοηθείς, -Ἴναχος, εὐπειθὴς Κριναγόρου θεράπων. -
-
- - -Lollius Bassus - - -γαῖα Ταραντίνων, ἔχε μείλιχος ἀνέρος ἐσθλοῦ -τόνδε νέκυν. ψεῦσται δαίμονες ἁμερίων -ἦ γὰρ ἐὼν Θήβηθεν Ἀτύμνιος οὐκέτι πρόσσω -ἤνυσεν, ἀλλὰ τεὴν βῶλον ὑπῳκίσατο· -ὀρφανικῷ δʼ ἐπὶ παιδὶ λιπὼν βίον, εὖνιν ἔθηκεν -ὀφθαλμῶν. κείνῳ ˘ μὴ βαρὺς ἔσσο τάφος. -
-
- - -Antonius thallus - - -δισσὰ φάη, Μίλητε, τεῆς βλαστήματα γαίης, -Ἰταλὶς ὠκυμόρους ἀμφεκάλυψε κόνις· -πένθεα δὲ στεφάνων ἠλλάξαο· λείψανα δʼ, αἰαῖ, -ἔδρακες ἐν βαιῇ κάλπιδι κευθόμενα. -φεῦ, πάτρα τριτάλαινα· πόθεν πάλιν ἢ πότε τοίους -ἀστέρας αὐχήσεις Ἑλλάδι λαμπομένους; - -
-
- - -Marcus Argentarius - - -δύσμορος ἐκρύφθην πόντῳ νέκυς, ὃν παρὰ κῦμα -ἔκλαυσεν μήτηρ μυρία Λυσιδίκη, -ψεύστην αὐγάζουσα κενὸν τάφον ἀλλά με δαίμων -ἄπνουν αἰθυίαις θῆκεν ὁμορρόθιον -Πνυταγόρην· ἔσχον δὲ κατʼ Αἰγαίην ἅλα πότμον, -πρυμνούχους στέλλων ἐκ Βορέαο κάλους. -ἀλλʼ οὐδʼ ὣς ναύτην ἔλιπον δρόμον, ἀλλʼ ἀπὸ νηὸς -ἄλλην πὰρ φθιμένοις εἰσανέβην ἄκατον. -
-
- - -Antiphilus - - -δώματά μοι σεισθέντα κατήριπεν· ἀλλʼ ἐμὸς ἀπτὼς -ἦν θάλαμος, τοίχων ὀρθὰ τιναξαμένων, -οἷς ὑποφωλεύουσαν ὑπήλυθον αἱ κακόμοιροι -ὠδῖνες· σεισμῷ δʼ ἄλλον ἔμιξα φόβον. -μαῖα δέ μοι λοχίων αὐτὴ φύσις· ἀμφότεροι δὲ -κοινὸν ὑπὲρ γαίης εἴδομεν ἠέλιον. -
-
- - -Crinagoras - - -δείλαιοι, τί κεναῖσιν ἀλώμεθα θαρσήσαντες -ἐλπίσιν, ἀτηροῦ ληθόμενοι θανάτου; -ἦν ὅδε καὶ μύθοισι καὶ ἤθεσι πάντα Σέλευκος -ἄρτιος, ἀλλʼ ἥβης βαιὸν ἐπαυρόμενος, -ὑστατίοις ἐν Ἴβηρσι, τόσον δίχα τηλόθι Λέσβου, -κεῖται ἀμετρήτων ξεῖνος ἐπʼ αἰγιαλῶν. -
-
- - -Erycius - - -εἰ καὶ ὑπὸ χθονὶ κεῖται, ὅμως ἔτι καὶ κατὰ πίσσαν -τοῦ μιαρογκώσσου χεύατε Παρθενίου, - -οὕνεκα Πιερίδεσσιν ἐνήμεσε μυρία κεῖνα -φλέγματα καὶ μυσαρῶν ἀπλυσίην ἐλέγων. -ἤλασε καὶ μανίης ἐπὶ δὴ τόσον, ὥστʼ ἀγορεῦσαι -πηλὸν Ὀδυσσείην καὶ βάτον Ἰλιάδα. -τοιγὰρ ὑπὸ ζοφίαισιν Ἐρινύσιν ἀμμέσον ἧπται -Κωκυτοῦ κλοιῷ λαιμὸν ἀπαγχόμενος. -
-
- - -Apollonides - - -ἔφθανεν Ἡλιόδωρος, ἐφέσπετο δʼ, οὐδʼ ὅσον ὥρῃ -ὕστερον, ἀνδρὶ φίλῳ Διογένεια δάμαρ. -ἄμφω δʼ, ὡς ἅμʼ ἔναιον, ὑπὸ πλακὶ τυμβεύονται, -ξυνὸν ἀγαλλόμενοι καὶ τάφον ὡς θάλαμον. -
-
- - -Antiphilus - - - - εἰπέ, Δικαιάρχεια, τί σοι τόσον εἰς ἅλα χῶμα -βέβληται, μέσσου γευόμενον πελάγους; -Κυκλώπων τάδε χεῖρες ἐνιδρύσαντο θαλάσσῃ -τείχεα· μέχρι πόσου, Γαῖα, βιαζόμεθα; - - κόσμου νηίτην δέχομαι στόλον εἴσιδε Ῥώμην -ἐγγύθεν, εἰ ταύτης μέτρον ἔχω λιμένα. -
-
- - -Crinagoras - - -εἰ καὶ τὸ σῆμα λυγδίνης ἀπὸ πλακὸς -καὶ ξεστὸν ὀρθῇ λαοτέκτονος στάθμῃ, -οὐκ ἀνδρὸς ἐσθλοῦ. μὴ λίθῳ τεκμαίρεο, - -ὦ λῷστε, τὸν θανόντα. κωφὸν ἡ λίθος, -τῇ καὶ ζοφώδης ἀμφιέννυται νέκυς. -κεῖται δὲ τῇδε τὠλιγηπελὲς ῥάκος -Εὐνικίδαο, σήπεται δʼ ὑπὸ σποδῷ. -
-
- - -Etruscus - - -ἡ μία καὶ βιότοιο καὶ Ἄϊδος ἤγαγεν εἴσω -ναῦς Ἱεροκλείδην, κοινὰ λαχοῦσα τέλη. -ἔτρεφεν ἰχθυβολεῦντα, κατέφλεγε τεθνειῶτα, -σύμπλοος εἰς ἄγρην, σύμπλοος εἰς Ἀίδην. -ὄλβιος ὁ γριπεὺς ἰδίῃ καὶ πόντον ἐπέπλει -νηί, καὶ ἐξ ἰδίης ἔδραμεν εἰς Ἀίδην. -
-
- - -Philippus - - -ἠπείρῳ μʼ ἀποδοῦσα νέκυν, τρηχεῖα θάλασσα, -σύρεις καὶ τέφρης λοιπὸν ἔτι σκύβαλον. -κἠν Ἀίδῃ ναυηγὸς ἐγὼ μόνος, οὐδʼ ἐπὶ χέρσου -εἰρήνην ἕξω φρικαλέης σπιλάδος. -ἢ τύμβευέ κενοῦσα καθʼ ὕδατος, ἢ παραδοῦσα -γαίῃ, τὸν κείνης μηκέτι κλέπτε νέκυν. -
-
- - -Philippus - - -ᾘόνιον τόδε σῶμα βροτοῦ παντλήμονος ἄθρει -σπαρτόν, ἁλιρραγέων ἐκχύμενον σκοπέλων -τῇ μὲν ἐρημοκόμης κεῖται καὶ χῆρος ὀδόντων -κόρση· τῇ δὲ χερῶν πενταφυεῖς ὄνυχες, -πλευρά τε σαρκολιπῆ, ταρσοὶ δʼ ἑτέρωθεν ἄμοιροι -νεύρων, καὶ κώλων ἔκλυτος ἁρμονίη. -οὗτος ὁ πουλυμερὴς εἷς ἦν ποτε. φεῦ μακαριστοί, -ὅσσοι ἀπʼ ὠδίνων οὐκ ἴδον ἠέλιον. - -
-
- - -Marcus Argentarius - - -ἡ Βρόμιον στέρξασα πολὺ πλέον ἢ τροφὸς Ἰνώ, -ἡ λάλος ἀμπελίνη γρῆυς Ἀριστομάχη, -ἡνίκα τὴν ἱερὴν ὑπέδυ χθόνα, πᾶν τʼ ἐμαράνθη -πνεῦμα πάρος κυλίκων πλεῖστον ἐπαυρομένῃ, -εἶπε τάδʼ· “ὦ Μινοῖ, πῆλαι, φέρε, κάλπιν ἐλαφρὴν - οἴσω κυάνεον τοὐξ Ἀχέροντος ὕδωρ· -καὐτὴ παρθένιον γὰρ ἀπώλεσα.” τοῦτο δʼ ἔλεξε -ψευδές, ἵνʼ αὐγάζῃ κἠν φθιμένοισι πίθον. -
-
- - -Philippus - - -ἥρως Πρωτεσίλαε, σὺ γὰρ πρώτην ἐμύησας -Ἴλιον Ἑλλαδικοῦ θυμὸν ἰδεῖν δόρατος, -καὶ περὶ σοῖς τύμβοις ὅσα δένδρεα μακρὰ τέθηλε, -πάντα τὸν εἰς Τροίην ἐγκεκύηκε χόλον -Ἴλιον ἢν ἐσίδῃ γὰρ ἀπʼ ἀκρεμόνων κορυφαίων, -καρφοῦται, πετάλων κόσμον ἀναινόμενα. -θυμὸν ἐπὶ Τροίῃ πόσον ἔζεσας, ἡνίκα τὴν σὴν -σῴζει καὶ στελέχη μῆνιν ἐπʼ ἀντιπάλους. -
-
- - -Lollius Bassus - - -ἥδʼ ἐγὼ ἡ τοσάκις Νιόβη λίθος, ὁσσάκι μήτηρ· -δύσμορος ἣ μαστῶν [θερμὸν] ἔπηξα γάλα· -Ἀίδεω πολὺς ὄλβος ἐμῆς ὠδῖνος ἀριθμός, -ᾧ τέκον. ὦ μεγάλης λείψανα πυρκαϊῆς. -
-
- - -Bianor - - -Θειονόης ἔκλαιον ἐμῆς μόρον, ἀλλʼ ἐπὶ παιδὸς -ἐλπίσι κουφοτέρας ἔστενον εἰς ὀδύνας. - -νῦν δέ με καὶ παιδὸς φθονερὴ γʼ ἀπενόσφισε Μοῖρα· -φεῦ· βρέφος ἐψεύσθην καὶ σὲ τὸ λειπόμενον. -Περσεφόνη, τόδε πατρὸς ἐπὶ θρήνοισιν ἄκουσον -θὲς βρέφος ἐς κόλπους μητρὸς ἀποιχομένης. -
-
- - -Bianor - - -ἰχθύσι καὶ ποταμῷ Κλειτώνυμον ἐχθρὸς ὅμιλος -ὦσεν, ὅτʼ εἰς ἄκρην ἦλθε τυραννοφόνος. -ἀλλὰ Δίκα μιν ἔθαψεν ἀποσπασθεῖσα γὰρ ὄχθα -πᾶν δέμας ἐς κορυφὴν ἐκ ποδὸς ἐκτέρισεν· -κεῖται δʼ οὐχ ὑδάτεσσι διάβροχος· αἰδομένα δὲ -γᾶ κεύθει τὸν ἑᾶς ὅρμον ἐλευθερίας. -
-
- - -Apollonides - - -καὶ τίς ὃς οὐκ ἔτλη κακὸν ἔσχατον υἱέα κλαύσας; -ἀλλʼ ὁ Ποσειδίππου πάντας ἔθαψε δόμος -τέσσαρας, οὓς Ἀίδαο συνήριθμον ἥρπασεν ἦμαρ, -τὴν πολλὴν παίδων ἐλπίδα κειραμένου. -πατρὸς δʼ ὄμματα λυγρὰ κατομβρηθέντα γόοισιν -ὤλετο· κοινή που νὺξ μία πάντας ἔχει. -
-
- - -Antipater - - -Κυλλήνην ὄρος Ἀρκάδων ἀκούεις· -αὕτη σῆμʼ ἐπίκειτʼ Ἀπολλοδώρῳ. -Πίσηθέν μιν ἰόντα νυκτὸς ὥρῃ -ἔκτεινεν Διόθεν πεσὼν κεραυνός. -τηλοῦ δʼ Αἰανέης τε καὶ Βεροίης -νικηθεὶς Διὸς ὁ δρομεὺς καθεύδει. - -
-
- - -Lollius Bassus - - -Κλειδοῦχοι νεκύων, πάσας Ἀίδαο κελεύθους -φράγνυτε· καὶ στομίοις κλεῖθρα δέχοισθε, πύλαι. -αὐτὸς ἐγὼν Ἀίδας ἐνέπω· Γερμανικὸς ἄστρων, -οὐκ ἐμός· οὐ χωρεῖ νῆα τόσην Ἀχέρων. -
-
- - -Heraclides - - -λαῖλαψ καὶ πολὺ κῦμα καὶ ἀντολαὶ Ἀρκτούροιο, -καὶ σκότος, Αἰγαίου τʼ οἶδμα κακὸν πελάγευς, -ταῦθʼ ἅμα πάνθʼ ἐκύκησεν ἐμὴν νέα· τριχθὰ δὲ κλασθεὶς -ἱστὸς ὁμοῦ φόρτῳ κἀμὲ κάλυψε βυθῷ. -ναυηγὸν κλαίοιτε παρʼ αἰγιαλοῖσι, γονῆες, -Τλησιμένη, κωφὴν στησάμενοι λίθακα. -
-
- - -Julius diocles - - -μή με κόνι κρύψητε, τί γάρ; πάλι, μηδʼ ἔτι ταύτης -ᾐόνος οὐκ ὀνοτὴν γαῖαν ἐμοὶ τίθετε. -μαίνεται εἴς με θάλασσα, καὶ ἐν χέρσοιό με δειλὸν -εὑρίσκει ῥαχίαις· οἶδέ με κἠν Ἀίδῃ. -χέρσῳ ἐπεκβαίνειν εἰ ἐμεῦ χάριν ὕδατι θυμός, -† πάρκειμαι σταθερῇ μιμνέμεν ὡς ἄταφος. -
-
- - -Philippus - - -Μυλεργάτας ἀνήρ με κἠν ζωᾶς χρόνοις -βαρυβρομήταν εἶχε δινητὸν πέτρον, - -πυρηφάτον Δάματρος εὐκάρπου λάτριν, -καὶ κατθανὼν στάλωσε τῷδʼ ἐπʼ ἠρίῳ, -σύνθημα τέχνας· ὣς ἔχει μʼ ἀεὶ βαρύν, -καὶ ζῶν ἐν ἔργοις, καὶ θανὼν ἐπʼ ὀστέοις. -
-
- - -Marcus Argentarius - - -οὗτος ὁ Καλλαίσχρου κενεὸς τάφος, ὃν βαθὺ χεῦμα -ἔσφηλεν Λιβυκῶν ἐνδρομέοντα πόρων, -συρμὸς ὅτʼ Ὠρίωνος ἀνεστρώφησε θαλάσσης -βένθος ὑπὸ στυγερῆς οἴδματα πανδυσίης. -καὶ τὸν μὲν δαίσαντο κυκώμενον εἰν ἁλὶ θῆρες, -κωφὸν δὲ στήλη γράμμα λέλογχε τόδε. -
-
- - -Bianor - - -Οἰδίποδος παίδων Θήβη τάφος· ἀλλʼ ὁ πανώλης -τύμβος ἔτι ζώντων αἰσθάνεται πολέμων. -κείνους οὔτʼ Ἀίδης ἐδαμάσσατο, κἠν Ἀχέροντι -μάρνανται· κείνων χὠ τάφος ἀντίπαλος, -καὶ πυρὶ πῦρ ἤλεγξαν ἐναντίον. ὦ ἐλεεινοὶ -παῖδες, ἀκοιμήτων ἁψάμενοι δοράτων. -
-
- - -Erycius - - -οὐχ ὅδε δειλαίου Σατύρου τάφος, οὐδʼ ὑπὸ ταύτῃ, -ὡς λόγος, εὔνηται πυρκαϊῇ Σάτυρος· -ἀλλʼ εἲ πού τινα πόντον ἀκούετε, πικρὸν ἐκεῖνον, -τὸν πέλας αἰγονόμου κλυζόμενον Μυκάλας, -κείνῳ δινήεντι καὶ ἀτρυγέτῳ ἔτι κεῖμαι -ὕδατι, μαινομένῳ μεμφόμενος Βορέῃ. - -
-
- - -Antipater - - -οὐκ οἶδʼ εἰ Διόνυσον ὀνόσσομαι, ἢ Διὸς ὄμβρον -μέμψομʼ ὀλισθηροὶ δʼ εἰς πόδας ἀμφότεροι. -ἀγρόθε γὰρ κατιόντα Πολύξενον ἔκ ποτε δαιτὸς -τύμβος ἔχει γλίσχρων ἐξεριπόντα λόφων -κεῖται δʼ Αἰολίδος Σμύρνης ἑκάς. ἀλλά τις ὄρφνης -δειμαίνοι μεθύων ἀτραπὸν ὑετίην. -
-
- - -Antiphilus - - -τηλοτάτω χεύασθαι ἔδει τάφον Οἰδιπόδαο -παισὶν ἀπʼ ἀλλήλων, οἷς πέρας οὐδʼ Ἀίδας· -ἀλλὰ καὶ εἰς Ἀχέροντος ἕνα πλόον ἠρνήσαντο, -χὠ στυγερὸς ζώει κἠν φθιμένοισιν Ἄρης. -ἠνίδε πυρκαϊῆς ἄνισον φλόγα· δαιομένα γὰρ -ἐξ ἑνὸς εἰς δισσὰν δῆριν ἀποστρέφεται. -
-
- - -Serapion - - -τοῦτʼ ὀστεῦν φωτὸς πολυεργέος. ἦ ῥά τις ἦσθα -ἔμπορος, ἢ τυφλοῦ κύματος ἰχθυβόλος. -ἄγγειλον θνητοῖσιν ὅτι σπεύδοντες ἐς ἄλλας - - ἐλπίδας εἰς τοίην ἐλπίδα λυόμεθα. - -
-
- - -Crinagoras - - -τήνδʼ ὑπὸ δύσβωλον θλίβει χθόνα φωτὸς ἀλιτροῦ -ὀστέα μισητῆς τύμβος ὑπὲρ κεφαλῆς, -στέρνα τʼ ἐποκριόεντα, καὶ οὐκ εὔοδμον ὀδόντων -πρίονα, καὶ κώλων δούλιον οἰοπέδην, - -ἄτριχα καὶ κόρσην, Εὐνικίδου ἡμιπύρωτα -λείψανʼ, ἔτι χλωρῆς ἔμπλεα τηκεδόνος. -χθὼν ὦ δυσνύμφευτε, κακοσκήνευς ἐπὶ τέφρης -ἀνδρὸς μὴ κούφη κέκλισο, μηδʼ ὀλίγη, -
-
- - -Antipater - - -χειμερίου νιφετοῖο περὶ θριγκοῖσι τακέντος -δῶμα πεσὸν τὴν γραῦν ἔκτανε Λυσιδίκην -σῆμα δέ οἱ κωμῆται ὁμώλακες οὐκ ἀπʼ ὀρυκτῆς -γαίης, ἀλλʼ αὐτὸν πύργον ἔθεντο τάφον, -
-
- - -Marcus Argentarius - - -Ψύλλος, ὁ τὰς ποθινὰς ἐπιμισθίδας αἰὲν ἑταίρας -πέμπων ἐς τὰ νέων ἡδέα συμπόσια, -οὗτος ὁ θηρεύων ἀταλόφρονας, ἐνθάδε κεῖται, -αἰσχρὸν ἀπʼ ἀνθρώπων μισθὸν ἐνεγκάμενος. -ἀλλὰ λίθους ἐπὶ τύμβον, ὁδοιπόρε, μήτε σὺ βάλλε, -μήτʼ ἄλλον πείσῃς· σῆμα λέλογχε νέκυς. -φεῖσαι δʼ οὐχ ὅτι κέρδος ἐπῄνεσεν, ἀλλʼ ὅτι κοινὰς -θρέψας, μοιχεύειν οὐκ ἐδίδαξε νέους. -
-
- - -Diodorus Zonas - - -ψυχράν σευ κεφαλᾶς ἐπαμήσομαι αἰγιαλῖτιν -θῖνα κατὰ κρυεροῦ χευάμενος νέκυος· -οὐ γάρ σευ μήτηρ ἐπιτύμβια κωκύουσα -εἶδεν ἁλίξαντον σὸν μόρον εἰνάλιον -ἀλλὰ ς1ʼ ἐρημαῖοί τε καὶ ἄξεινοι πλαταμῶνες -δέξαντʼ Αἰγαίης γείτονες ἠιόνος· -ὥστʼ ἔχε μὲν ψαμάθου μόριον βραχύ, πουλὺ δὲ δάκρυ, -ξεῖνʼ, ἐπεὶ εἰς ὀλοὴν ἔδραμες ἐμπορίην, - -
-
- - -Philippus - - -ξεῖνε, φεῦγε τὸν χαλαζεπῆ τάφον -τὸν φρικτὸν Ἱππώνακτος, οὗτε χἀ τέφρα -ἰαμβιάζει Βουπάλειον ἐς στύγος, -μή πως ἐγείρῃς σφῆκα τὸν κοιμώμενον, -ὃς οὐδʼ ἐν ᾅδῃ νῦν κεκοίμικεν χόλον, -σκάζουσι μέτροις ὀρθὰ τοξεύσας ἔπη -
-
- - -Theodoridas - - -Εὐφορίων, ὁ περισσὸν ἐπιστάμενός τι ποῆσαι, -Πειραϊκοῖς κεῖται τοῖσδε παρὰ σκέλεσιν. -ἀλλὰ σὺ τῷ μύστῃ ῥοιὴν ἢ μῆλον ἄπαρξαι, -ἢ μύρτον καὶ γὰρ ζωὸς ἐὼν ἐφίλει. -
-
- - -Dioscorides - - -ἥδιστον φιλέουσι νέοις προσανάκλιμʼ ἐρώτων, -Σαπφώ, σὺν Μούσαις ἦ ῥά σε Πιερίη -ἢ Ἑλικὼν εὔκισσος, ἴσα πνείουσαν ἐκείναις, -κοσμεῖ, τὴν Ἐρέσῳ Μοῦσαν ἐν Αἰολίδι, -ἢ καὶ Ὑμὴν Ὑμέναιος ἔχων εὐφεγγέα πεύκην -σὺν σοὶ νυμφιδίων ἵσταθʼ ὑπὲρ θαλάμων -ἢ Κινύρεω νέον ἔρνος ὀδυρομένῃ Ἀφροδίτῃ -σύνθρηνος, μακάρων ἱερὸν ἄλσος ὁρῇς· -πάντῃ, πότνια, χαῖρε θεοῖς ἴσα· σὰς γὰρ ἀοιδὰς -ἀθανάτων ἄγομεν νῦν ἔτι θυγατέρας. - -
-
- - -Leonidas - - -ἀτρέμα τὸν τύμβον παραμείβετε, μὴ τὸν ἐν ὕπνῳ -πικρὸν ἐγείρητε σφῆκʼ ἀναπαυόμενον. -ἄρτι γὰρ Ἱππώνακτος ὁ καὶ τοκεῶνε βαΰξας -ἄρτι κεκοίμηται θυμὸς ἐν ἡσυχίῃ. -ἀλλὰ προμηθήσασθε· τὰ γὰρ πεπυρωμένα κείνου -ῥήματα πημαίνειν οἶδε καὶ εἰν Ἀίδῃ. -
-
- - -Antipater - - -ὄβριμον ἀκαμάτου στίχον αἴνεσον Ἀντιμάχοιο, -ἄξιον ἀρχαίων ὀφρύος ἡμιθέων, -Πιερίδων χαλκευτὸν ἐπʼ ἄκμοσιν, εἰ τορὸν οὖας -ἔλλαχες, εἰ ζαλοῖς τὰν ἀγέλαστον ὄπα, -εἰ τὰν ἄτριπτον καὶ ἀνέμβατον ἀτραπὸν ἄλλοις -μαίεαι. εἰ δʼ ὕμνων σκᾶπτρον Ὅμηρος ἔχει, -καὶ Ζεύς τοι κρέσσων Ἐνοσίχθονος· ἀλλʼ Ἐνοσίχθων -τοῦ μὲν ἔφυ μείων, ἀθανάτων δʼ ὕπατος· -καὶ ναετὴρ Κολοφῶνος ὑπέζευκται μὲν Ὁμήρῳ, -ἁγεῖται δʼ ἄλλων πλάθεος ὑμνοπόλων. -
-
- - -Dioscorides - - -Θέσπις ὅδε, τραγικὴν ὃς ἀνέπλασε πρῶτος ἀοιδὴν -κωμήταις νεαρὰς καινοτομῶν χάριτας, -Βάκχος ὅτε τριετῆ ˘ κατάγοι χορόν, ᾧ τράγος ἄθλων -χὠττικὸς ἦν σύκων ἄρριχος ἆθλον ἔτι. -οἱ δὲ μεταπλάσσουσι νέοι τάδε· μυρίος αἰὼν -πολλὰ προσευρήσει χἄτερα· τἀμὰ δʼ ἐμά. - -
-
- - -Dioscorides - - -Θέσπιδος εὕρεμα τοῦτο, τὰ τʼ ἀγροιῶτιν ἀνʼ ὕλαν -παίγνια, καὶ κώμους τούσδε, τελειοτέρους -Αἰσχύλος ἐξύψωσεν, ὁ μὴ σμιλευτὰ χαράξας -γράμματα, χειμάρρῳ δʼ οἷα καταρδόμενα, -καὶ τὰ κατὰ σκηνὴν μετεκαίνισεν. ὦ στόμα πάντη -δεξιόν, ἀρχαίων ἦσθά τις ἡμιθέων. -
-
- - -Alcaeus - - -πᾶσά τοι οἰχομένῳ, Πυλάδη, κωκύεται Ἑλλάς, -ἄπλεκτον χαίταν ἐν χροῒ κειραμένα· -αὐτὸς δʼ ἀτμήτοιο κόμας ἀπεθήκατο δάφνας -Φοῖβος, ἑὸν τιμῶν ᾗ θέμις ὑμνοπόλον -Μοῦσαι δʼ ἐκλαύσαντο· ῥόον δʼ ἔστησεν ἀκούων -Ἀσωπὸς γοερῶν ἦχον ἀπὸ στομάτων -ἔλληξεν δὲ μέλαθρα Διωνύσοιο χορείης, -εὖτε σιδηρείην οἶμον ἔβης Ἀίδεω. -
-
- - -Antipater - - -οὐχὶ βαθυστόλμων Ἱππαρχία ἔργα γυναικῶν, -τῶν δὲ Κυνῶν ἑλόμαν ῥωμαλέον βίοτον -οὐδέ μοι ἀμπεχόναι περονήτιδες, οὐ βαθύπελμος -εὔμαρις, οὐ λιπόων εὔαδε κεκρύφαλος· -οὐλὰς δὲ σκίπωνι συνέμπορος, ἅ τε συνῳδὸς -δίπλαξ, καὶ κοίτας βλῆμα χαμαιλεχέος. -ἄμμι δὲ Μαιναλίας κάρρων † ἄμιν Ἀταλάντας -τόσσον, ὅσον σοφία κρέσσον ὀριδρομίας. - -
-
- - -Nossis - - -καὶ καπυρὸν γελάσας παραμείβεο, καὶ φίλον εἰπὼν -ῥῆμʼ ἐπʼ ἐμοί. Ῥίνθων εἴμʼ ὁ Συρακόσιος, -Μουσάων ὀλίγη τις ἀηδονίς· ἀλλὰ φλυάκων -ἐκ τραγικῶν ἴδιον κισσὸν ἐδραψάμεθα, -
-
- - -Callimachus - - -Βαττιάδεω παρὰ σῆμα φέρεις πόδας, εὖ μὲν ἀοιδὴν -εἰδότος, εὖ δʼ οἴνῳ καίρια συγγελάσαι. -
-
- - -Anonymi Epigrammatici - - -Εὐκράτεω Μελέαγρον ἔχω, ξένε, τὸν σὺν Ἔρωτι -καὶ Μούσαις κεράσανθʼ ἡδυλόγους Χάριτας. -
-
- - -Meleager - - -νᾶσος ἐμὰ θρέπτειρα Τύρος· πάτρα δέ με τεκνοῖ -Ἀτθὶς ἐν Ἀσσυρίοις ναιομένα, Γάδαρα· -Εὐκράτεω δʼ ἔβλαστον ὁ σὺν Μούσαις Μελέαγρος -πρῶτα Μενιππείοις συντροχάσας Χάρισιν. -εἰ δὲ Σύρος, τί τὸ θαῦμα; μίαν, ξένε, πατρίδα κόσμον -ναίομεν· ἓν Θνατοὺς πάντας ἔτικτε Χάος. -πουλυετὴς δʼ ἐχάραξα. τάδʼ ἐν δέλτοισι πρὸ τύμβου· -γήρως γὰρ γείτων ἐγγύθεν Ἀίδεω. -ἀλλά με τὸν λαλιὸν καὶ πρεσβύτην προτιειπὼν -χαίρειν εἰς γῆρας καὐτὸς ἵκοιο λάλον, - -
-
- - -Meleager - - -πρώτα μοι Γαδάρων κλεινὰ πόλις ἔπλετο πάτρα, -ἤνδρωσεν δʼ ἱερὰ δεξαμένα με Τύρος· -εἰς γῆρας δʼ ὅτʼ ἔβην, ἁ καὶ Δία θρεψαμένα Κῶς -κἀμὲ θετὸν Μερόπων ἀστὸν ἐγηροτρόφει. -Μοῦσαι δʼ εἰν ὀλίγοις με, τὸν Εὐκράτεω Μελέαγρον -παῖδα, Μενιππείοις ἠγλάισαν Χάρισιν. -
-
- - -Meleager - - -ἀτρέμας, ὦ ξένε, βαῖνε· παρʼ εὐσεβέσιν γὰρ ὁ πρέσβυς -εὕδει, κοιμηθεὶς ὕπνον ὀφειλόμενον, -Εὐκράτεω Μελέαγρος, ὁ τὸν γλυκύδακρυν Ἔρωτα -καὶ Μούσας ἱλαραῖς συστολίσας Χάρισιν -ὃν θεόπαις ἤνδρωσε Τύρος Γαδάρων θʼ ἱερὰ χθών -κῶς δʼ ἐρατὴ Μερόπων πρέσβυν ἐγηροτρόφει. -ἀλλʼ εἰ μὲν Σύρος ἐσσί, Σαλάμ· εἰ δʼ οὖν σύ γε Φοῖνιξ, -Ναίδιος· · εἰ δʼ Ἕλλην, Χαῖρε· τὸ δʼ αὐτὸ φράσον. -
-
- - -Diotimus - - -ἐλπίδες ἀνθρώπων, ἐλαφραὶ θεαὶ — οὐ γὰρ ἂν ὧδε -Λέσβονʼ ὁ λυσιμελὴς ἀμφεκάλυψʼ Ἀίδης, -ὅς ποτε καὶ βασιλῆι συνέδραμε, — ναὶ μετʼ Ἐρώτων -χαίρετε κουφόταται δαίμονες ἀθανάτων. -αὐλοὶ δʼ ἄφθεγκτοι καὶ ἀπευθέες, οἷς ἐνέπνευσε, - κεῖσθʼ, ἐπεὶ οὐ θιάσους οἶδʼ Ἀχέρων. - -
-
- - -Meleager - - - -πτανέ, τί σοι σιβύνης, τί δὲ καὶ συὸς εὔαδε δέρμα; -καὶ τίς ἐὼν στάλας σύμβολον ἐσσὶ τίνος; -οὐ Ἔρωτʼ ἐνέπω σε — τί γάρ; νεκύεσσι πάροικος -ἵμερος; αἰάζειν ὁ θρασὺς οὐκ ἔμαθεν — -οὐδὲ μὲν οὐδʼ αὐτὸν ταχύπουν Κρόνον· ἔμπαλι γὰρ δὴ -κεῖνος μὲν τριγέρων, σοὶ δὲ τέθηλε μέλη. -ἀλλʼ ἄρα, ναὶ δοκέω γάρ, ὁ γᾶς ὑπένερθε σοφιστὰς -ἐστί· σὺ δʼ ὁ πτερόεις, τοὔνομα τοῦδε, λόγος. -Λατῴας δʼ ἄμφηκες ἔχεις γέρας, ἔς τε γέλωτα -καὶ σπουδάν, καί που μέτρον ἐρωτογράφον. -ναὶ μὲν δὴ Μελέαγρον ὀμώνυμον Οἰνέος υἱῷ -σύμβολα σημαίνει ταῦτα συοκτασίης. -χαῖρε καὶ ἐν φθιμένοισιν, ἐπεὶ καὶ Μοῦσαν Ἔρωτι -καὶ Χάριτας σοφίαν εἰς μίαν ἡρμόσαο. -
-
- - -Leonidas - - -τί στοχασώμεθά σου, Πεισίστρατε, χῖον ὁρῶντες -γλυπτὸν ὑπὲρ τύμβου κείμενον ἀστράγαλον; -ἦ ῥά γε μὴ ὅτι Χῖος; ἔοικε γάρ· ἢ ῥʼ ὅτι παίκτας -ἦσθά τις, οὐ λίην δʼ, ὦ ʼγαθέ, πλειστοβόλος; -ἢ τὰ μὲν οὐδὲ σύνεγγυς, ἐν ἀκρήτῳ δὲ κατέσβης -Χίῳ; ναὶ δοκέω, τῷδε προσηγγίσαμεν. -
-
- - -Antipater - - -τὰν μὲν ἀεὶ πολύμυθον, ἀεὶ λάλον, ὦ ξένε, κίσσα -φάσει, τὰν δὲ μέθας σύντροφον ἅδε κύλιξ, - -τὰν Κρῆσσαν δὲ τὰ τόξα, τὰ δʼ εἴρια τὰν φιλοεργόν, -ἄνδεμα δʼ αὖ μίτρας τὰν πολιοκρόταφον· -τοιάνδε σταλοῦχος ὅδʼ ἔκρυφε Βιττίδα τύμβος -† τιμελάχραντον νυμφιδίαν ἄλοχον. -ἀλλʼ, ὦνερ, καὶ χαῖρε, καὶ οἰχομένοισιν ἐς ᾅδαν -τὰν αὐτὰν μύθων αὖθις ὄπαζε χάριν. -
-
- - -Antipater - - - - Μαστεύω τί σευ Ἆγις ἐπὶ σταλίτιδι πέτρᾳ, -Λυσιδίκα, γλυπτὸν τόνδʼ ἐχάραξε νόον· -ἁνία γὰρ καὶ κημός, ὃ τʼ εὐόρνιθι Τανάγρᾳ -οἰωνὸς βλαστῶν, θοῦρος ἐγερσιμάχας, -οὐχ ἅδεν οὐδʼ ἐπέοικεν ὑπωροφίαισι γυναιξίν, -ἀλλὰ τὰ τʼ ἠλακάτας ἔργα τὰ θʼ ἱστοπόδων. - - τάν μὲν ἀνεγρομέναν με ποτʼ εἴρια νύκτερος ὄρνις, -ἁνία δʼ αὐδάσει δώματος ἁνίοχον -ἱππαστὴρ δʼ ὅδε κημὸς ἀείσεται οὐ πολύμυθον, -οὐ λάλον, ἀλλὰ καλᾶς ἔμπλεον ἁσυχίας. -
-
- - -Antipater - - -μὴ θάμβει, μάστιγα Μυροῦς ἐπὶ σάματι λεύσσων, -γλαῦκα, βιόν, χαροπὰν χᾶνα, θοὰν σκύλακα. -τόξα μὲν αὐδάσει με πανεύτονον ἁγέτιν οἴκου, -ἁ δὲ κύων τέκνων γνήσια καδομέναν -μάστιξ δʼ οὐκ ὀλοάν, ξένε, δεσπότιν, οὐδʼ ἀγέρωχον -δμωσί, κολάστειραν δʼ ἔνδικον ἀμπλακίας· - χὰν δὲ δόμων φυλακᾶς μελεδήμονα τὰν δʼ ἄ〈ρʼ ἄγρυπνον〉 -γλαῦξ ἅδε γλαυκᾶς Παλλάδος ἀμφίπολον. -τοιοῖσδʼ ἀμφʼ ἔργοισιν ἐγάθεον ἔνθεν ὅμευνος -τοιάδʼ ἐμᾷ στάλᾳ σύμβολα τεῦξε Βίτων. - -
-
- - -Antipater - - - - εἰπέ, λέων, φθιμένοιο τίνος τάφον ἀμφιβέβηκας, -βουφάγε; τίς τᾶς σᾶς ἄξιος ἦν ἀρετᾶς; - - υἱὸς Θευδώροιο Τελευτίας, ὃς μέγα πάντων -φέρτερος ἦν, θηρῶν ὅσσον ἐγὼ κέκριμαι. -οὐχὶ μάταν ἕστακα, φέρω δέ τι σύμβολον ἀλκᾶς -ἀνέρος· ἦν γὰρ δὴ δυσμενέεσσι λέων. -
-
- - -Antipater - - -ἁ στάλα, φέρʼ ἴδω, τίνʼ ἔχει νέκυν. ἀλλὰ δέδορκα -γράμμα μὲν οὐδέν πω τμαθὲν ὕπερθε λίθου, -ἐννέα δʼ ἀστραγάλους πεπτηότας· ὧν πίσυρες μὲν -πρᾶτοι Ἀλεξάνδρου μαρτυρέουσι βόλον, -οἱ δὲ τὸ τᾶς νεότατος ἐφήλικος ἄνθος, ἔφηβον, -εἷς δʼ ὅ γε μανύει Χῖον ἀφαυρότερον. -ἦ ῥα τόδʼ ἀγγέλλοντι, Καὶ ὁ σκάπτροισι μεγαυχὴς -χὠ θάλλων ἥβᾳ τέρμα τὸ μηδὲν ἔχει; -ἢ τὸ μὲν οὔ· δοκέω δὲ ποτὶ σκοπὸν ἰθὺν ἐλάσσειν -ἰόν, Κρηταιεὺς ὥς τις ὀιστοβόλος. -ἦς ὁ θανὼν Χῖος μέν, Ἀλεξάνδρου δὲ λελογχὼς -οὔνομʼ, ἐφηβαίῃ δʼ ὤλετʼ ἐν ἁλικίᾳ. -ὡς εὖ τὸν φθίμενον νέον ἄκριτα καὶ τὸ κυβευθὲν -πνεῦμα διʼ ἀφθέγκτων εἶπέ τις ἀστραγάλων. -
-
- - -Meleager - - - -ἁ στάλα, σύνθημα τί σοι γοργωπὸς ἀλέκτωρ -ἔστα, καλλαΐνᾳ σκαπτοφόρος πτέρυγι, -ποσσὶν ὑφαρπάζων νίκας κλάδον; ἄκρα δʼ ἐπʼ αὐτᾶς -βαθμῖδος προπεσὼν κέκλιται ἀστράγαλος. - -ἦ ῥά γε νικάεντα μάχᾳ σκαπτοῦχον ἄνακτα -κρύπτεις; ἀλλὰ τί σοι παίγνιον ἀστράγαλος; -πρὸς δέ, τί λιτὸς ὁ τύμβος; ἐπιπμέπει ἀνδρὶ πενιχρῷ, -ὄρνιθος κλαγγαῖς νυκτὸς ἀνεγρομένῳ. -οὐ δοκέω· σκᾶπτρον γὰρ ἀναίνεται. ἀλλὰ σὺ κεύθεις -ἀθλοφόρον, νίκαν ποσσὶν ἀειράμενον. -οὐ ψαύω καὶ τῇδε· τί γὰρ ταχὺς εἴκελος ἀνὴρ -ἀστραγάλῳ; νῦν δὴ τὠτρεκὲς ἐφρασάμαν -φοῖνιξ οὐ νίκαν ἐνέπει, πάτραν δὲ μεγαυχῆ -ματέρα Φοινίκων, τὰν πολύπαιδα Τύρον -ὄρνις δʼ, ὅττι γεγωνὸς ἀνήρ, καί που περὶ Κύπριν -πρᾶτος κἠν Μούσαις ποικίλος ὑμνοθέτας. -σκᾶπτρα δʼ ἔχει σύνθημα λόγου· θνάσκειν δὲ πεσόντα -οἰνοβρεχῆ, προπετὴς ἐννέπει ἀστράγαλος. -καὶ δὴ σύμβολα ταῦτα τὸ δʼ οὔνομα πέτρος ἀείδει, -Ἀντίπατρον προγόνων, φύντʼ ἀπʼ ἐρισθενέων. -
-
- - -Alcaeus - - -δίζημαι κατὰ θυμὸν ὅτου χάριν ἁ παροδῖτις -δισσάκι φῖ μοῦνον γράμμα λέλογχε πέτρος, -λαοτύποις σμίλαις κεκολαμμένον. ἆρα γυναικὶ -τᾷ χθονὶ κευθομένᾳ Χιλιὰς ἦν ὄνομα; -τοῦτο γὰρ ἀγγέλλει κορυφούμενος εἰς ἓν ἀριθμός. -ἢ τὸ μὲν εἰς ὀρθὰν ἀτραπὸν οὐκ ἔμολεν, -ἁ δʼ οἰκτρὸν ναίουσα τόδʼ ἠρίον ἔπλετο Φιδίς; -νῦν Σφιγγὸς γρίφους Οἰδίπος ἐφρασάμην. -αἰνετὸς οὑκ δισσοῖο καμὼν αἴνιγμα τύποιο, -φέγγος μὲν ξυνετοῖς, ἀξυνέτοις δʼ ἔρεβος - -
-
- - -Dioscorides - - -τίς τὰ νεοσκύλευτα ποτὶ δρυῒ τᾷδε καθᾶψεν -ἔντεα; τῷ πέλτα Δωρὶς ἀναγράφεται; -πλάθει γὰρ Θυρεᾶτις ὑφʼ αἵματος ἅδε λοχιτᾶν, -χἀμὲς ἀπʼ Ἀργείων τοὶ δύο λειπόμεθα. -πάντα νέκυν μάστευε δεδουπότα, μή τις, ἔτʼ ἔμπνους -λειπόμενος, Σπάρτᾳ κῦδος ἔλαμψε νόθον. -ἴσχε βάσιν. νίκα γὰρ ἐπʼ ἀσπίδος ὧδε Λακώνων -φωνεῖται θρόμβοις αἵματος Ὀθρυάδα, -χὠ τόδε μοχθήσας σπαίρει πέλας. ἆ πρόπατορ Ζεῦ, -στύξον ἀνικάτω σύμβολα φυλόπιδος. -
-
- - -Simonides - - -οἵδε τριηκόσιοι, Σπάρτα πατρί, τοῖς συναρίθμοις -Ἰναχίδαις Θυρέαν ἀμφὶ μαχεσσάμενοι, -αὐχένας οὐ στρέψαντες, ὅπᾳ ποδὸς ἴχνια πρᾶτον -ἁρμόσαμεν, ταύτᾳ καὶ λίπομεν βιοτάν. -ἄρσενι δʼ Ὀθρυάδαο φόνῳ κεκαλυμμένον ὅπλον -καρύσσει· Θυρέα, Ζεῦ, Λακεδαιμονίων. - -αἰ δέ τις Ἀργείων ἔφυγεν μόρον, ἦς ἀπʼ Ἀδράστου· -Σπάρτᾳ δʼ οὐ τὸ θανεῖν, ἀλλὰ φυγεῖν θάνατος. -
-
- - -Damagetus - - -ὦ Λακεδαιμόνιοι, τὸν ἀρήιον ὔμμιν ὁ τύμβος -Γύλλιν ὑπὲρ Θυρέας οὗτος ἔχει φθίμενον, -ἄνδρας ὃς Ἀργείων τρεῖς ἔκτανε, καὶ τόδʼ ἔειπεν· - - τεθναίην Σπάρτας ἄξια μησάμενος. - - -
-
- - -Tymnes - - -τὸν παραβάντα νόμους Δαμάτριον ἔκτανε μάτηρ -ἁ Λακεδαιμόνιον τὸν Λακεδαιμόνιον. -θηκτὸν δʼ ἐν προβολᾷ θεμένα ξίφος, εἶπεν, ὀδόντα -ὀξὺν ἐπιβρύκους1ʼ, οἷα Λάκαινα γυνά· -“ἔρρε κακὸν σκυλάκευμα, κακὰ μερίς, ἔρρε ποθʼ ᾅδαν -ἔρρε· τὸν οὐ Σπάρτας ἄξιον οὐδʼ ἔτεκον.” -
-
- - -Dioscorides - - - -παῖδας, ὑπὸ στήλῃ πάντας ἔθαπτε μιᾷ. -δάκρυα δʼ οὐκ ἔρρηξʼ ἐπὶ πένθεσιν ἀλλὰ τόδʼ εἶπεν -μοῦνον ἰώ, Σπάρτα, σοὶ τέκνα ταῦτʼ ἔτεκον. - -
-
- - -Nicander - - -Εὐπυλίδας, Ἐράτων, Χαῖρις, Λύκος, Ἆγις, Ἀλέξων -ἓξ Ἰφικρατίδα παῖδες, ἀπωλόμεθα -Μεσσάνας ὑπὸ τεῖχος· ὁ δʼ ἕβδομος ἄμμε Γύλιππος -ἐν πυρὶ θεὶς μεγάλαν ἦλθε φέρων σποδιάν, -Σπάρτᾳ μὲν μέγα κῦδος, Ἀλεξίππᾳ δὲ μέγʼ ἄχθος -ματρί τὸ δʼ ἓν πάντων καὶ καλὸν ἐντάφιον. -
-
- - -Hegemon - - -εἴποι τις παρὰ τύμβον ἰὼν ἀγέλαστος ὁδίτας -τοῦτʼ ἔπος· “ Ὀγδώκοντʼ ἐνθάδε μυριάδας - Σπάρτας χίλιοι ἄνδρες ἐπέσχον λήματι Περσῶν, - καὶ θάνον ἀστρεπτεί· Δώριος ἁ μελέτα.” - -
-
- - -Phae+nnus - - -οὐκ ἔτλας, ὤριστε Λεωνίδα, αὖτις ἱκέσθαι -Εὐρώταν, χαλεπῷ σπερχόμενος πολέμῳ· -ἀλλʼ ἐπὶ Θερμοπύλαισι τὸ Περσικὸν ἔθνος ἀμύνων -ἐδμάθης, πατέρων ἁζόμενος νόμιμα. -
-
- - -Damagetus - - -ὤλεο δὴ πατέρων περὶ ληίδα καὶ σύ, Μαχάτα, -δριμὺν ἐπʼ Αἰτωλοῖς ἀντιφέρων πόλεμον, -πρωθήβας· χαλεπὸν γὰρ Ἀχαιικὸν ἄνδρα νοῆσαι -ἄλκιμον, εἰς πολιὰν ὅστις ἔμεινε τρίχα. -
-
- - -Theodoridas - - -οὕτω δὴ Πύλιον τὸν Ἀγήνορος, ἄκριτε Μοῖρα, -πρώιον ἐξ ἥβας ἔθρισας Αἰολέων, -κῆρας ἐπισσεύσασα. βίου κύνας. ὦ πόποι, ἀνὴρ -οἷος ἀμειδήτῳ κεῖται ἕλωρ Ἀίδῃ. -
-
- - -Leonidas - - -ἠρίον, οἷον νυκτὶ καταφθιμένοιο καλύπτεις -ὀστέον, οἵην, γαῖʼ, ἀμφέχανες κεφαλήν, -πολλὸν μὲν ξανθαῖσιν ἀρεσκομένου Χαρίτεσσι, -πολλοῦ δʼ ἐν μνήμῃ πᾶσιν Ἀριστοκράτης. -ᾔδει Ἀριστοκράτης καὶ μείλιχα δημολογῆσαι, -[ στρεβλὴν οὐκ ὀφρὺν ἐσθλὸς ἐφελκόμενος· -ᾔδει καὶ Βάκχοιο παρὰ κρητῆρος ἄδηριν] -ἰθῦναι κείνην εὐκύλικα λαλιὴν -ᾔδει καὶ ξείνοισι καὶ ἐνδήμοισι προσηνέα -ἔρδειν. γαῖʼ ἐρατή, τοῖον ἔχεις φθίμενον. - -
-
- - -Archilochus - - -ὑψηλοὺς Μεγάτιμον Ἀριστοφόωντά τε Νάξου -κίονας, ὦ μεγάλη γαῖʼ, ὑπένερθεν ἔχεις. -
-
- - -Simonides - - -Εὐθυμάχων ἀνδρῶν μνησώμεθα, τῶν ὅδε τύμβος, -οἳ θάνον εὔμηλον ῥυόμενοι Τεγέαν, -αἰχμηταὶ πρὸ πόληος, ἵνα σφίσι μὴ καθέληται -Ἑλλὰς ἀποφθιμένου κρατὸς ἐλευθερίαν. -
-
- - -Simonides - - -τῶνδέ ποτὲ στέρνοισι τανυγλώχινας ὀιστοὺς -λοῦσεν φοινίσσᾳ θοῦρος Ἄρης ψακάδι. -ἀντὶ δʼ ἀκοντοδόκων ἀνδρῶν μνημεῖα θανόντων. -ἄψυχʼ ἐμψύχων, ἅδε κέκευθε κόνις. -
-
- - -Theaetetus - - -χείματος οἰνωθέντα τὸν Ἀνταγόρεω μέγαν οἶκον -ἐκ νυκτῶν ἔλαθεν πῦρ ὑπονειμάμενον -ὀγδώκοντα δʼ ἀριθμὸν ἐλεύθεροι ἄμμιγα δούλοις -τῆς ἐχθρῆς ταύτης πυρκαϊῆς ἔτυχον. -οὐκ εἶχον διελεῖν προσκηδέες ὀστέα χωρίς· -ξυνὴ δʼ ἦν κάλπις, ξυνὰ δὲ τὰ κτέρεα· -εἷς καὶ τύμβος ἀνέστη· ἀτὰρ τὸν ἕκαστον ἐκείνων -οἶδε καὶ ἐν τέφρᾐ ῥηιδίως Ἀίδης. -
-
- - -Perses - - -Μαντιάδας, ὦ ξεῖνε, καὶ Εὔστρατος, υἷες Ἐχέλλου, -Δυμαῖοι, κραναῇ κείμεθʼ ἐνὶ ξυλόχῳ, -ἄγραυλοι γενεῆθεν ὀροιτύποι. οἱ δʼ ἐπὶ τύμβῳ, -μανυταὶ τέχνας, δουροτόμοι πελέκεις. - -
-
- - -Hegesippus - - -Ἑρμιονεὺς ὁ ξεῖνος, ἐν ἀλλοδαπῶν δὲ τέθαπται, -Ζωίλος, Ἀργείαν γαῖαν ἐφεσσάμενος, -ἃν ἐπὶ οἱ βαθύκολπος ἀμάσατο δάκρυσι νύμφα -λειβομένα, παῖδὲς τʼ εἰς χρόα κειράμενοι. -
-
- - -Callimachus - - -σύντομος ἦν ὁ ξεῖνος· ὃ καὶ στίχος· οὐ μακρὰ λέξω· - - Θῆρις Ἀρισταίου, Κρὴς ἐπʼ ἐμοὶ δολιχός. -
-
- - -Leonidas - - -Πραταλίδα τὸ μνᾶμα Λυκαστίω, ἄκρον ἐρώτων -εἰδότος, ἄκρα μάχας, ἄκρα λινοστασίας, - ἄκρα χοροιτυπίας. χθόνιοι, 〈Μίνωϊ τὸν ἄνδρα〉 -τοῦτον, Κρηταιεῖς Κρῆτα, παρῳκίσατε. -
-
- - -Anonymi Epigrammatici - - -Πραταλίδᾳ παιδεῖον Ἔρως πόθον, Ἄρτεμις ἄγραν, -Μοῦσα χορούς, Ἄρης ἐγγυάλιξε μάχαν. -πῶς οὐκ εὐαίων ὁ Λυκάστιος, ὃς καὶ ἔρωτι -ἆρχε καὶ ἐν μολπᾷ, καὶ δορὶ καὶ στάλικι; -
-
- - -Dioscorides - - -τῆς Σαμίης τὸ μνῆμα Φιλαινίδος· ἀλλὰ προσειπεῖν -τλῆθί με, καὶ στήλης πλησίον, ὦνερ, ἴθι. -οὐκ εἴμʼ ἡ τὰ γυναιξὶν ἀναγράψασα προσάντη -ἔργα, καὶ Αἰσχύνην οὐ νομίσασα θεὸν - -ἀλλὰ φιλαιδήμων, ναὶ ἐμὸν τάφον εἰ δέ τις ἡμέας -αἰσχύνων λαμυρὴν ἔπλασεν ἱστορίην, -τοῦ μὲν ἀναπτύξαι χρόνος οὔνομα· τἀμὰ δὲ λυγρὴν -ὀστέα τερφθείη κληδόνʼ ἀπωσαμένης. -
-
- - -Callimachus - - -τᾷδε Σάων ὁ Δίκωνος Ἀκάνθιος ἱερὸν ὕπνον -κοιμᾶται. θνάσκειν μὴ λέγε τοὺς ἀγαθούς. -
-
- - -Leonidas - - -Μεμνησθʼ Εὐβούλοιο σαόφρονος, ὦ παριόντες. -πίνωμεν κοινὸς πᾶσι λιμὴν Ἀίδης. -
-
- - -Callimachus - - -Δωδεκέτη τὸν παῖδα πατὴρ ἀπέθηκε Φίλιππος -ἐνθάδε, τὴν πολλὴν ἐλπίδα, Νικοτέλην. -
-
- - -Callimachus - - -τὸν βαθὺν οἰνοπότην Ἐρασίξενον ἡ δὶς ἐφεξῆς -ἀκρήτου προποθεῖς1ʼ ᾤχετʼ ἔχουσα κύλιξ. -
-
- - -Leonidas - - -Μαρωνὶς ἡ φίλοινος, ἡ πίθων σποδός, -ἐνταῦθα κεῖται γρῆϋς, ἧς ὑπὲρ τάφου -γνωστὸν πρόκειται πᾶσιν Ἀττικὴ κύλιξ. -στένει δὲ καὶ γᾶς νέρθεν, οὐχ ὑπὲρ τέκνων, -οὐδʼ ἀνδρός, οὓς λέλοιπεν ἐνδεεῖς βίου· -ἓν δʼ ἀντὶ πάντων, οὕνεχʼ ἡ κύλιξ κενή. - -
-
- - -Dioscorides - - -τὴν τίτθην Ἱέρων Σειληνίδα, τήν, ὅτε πίνοι -ζωρόν, ὑπʼ -οὐδεμιῆς θλιβομένην κύλικος, -ἀγρῶν ἐντὸς ἔθηκεν, ἵνʼ ἡ φιλάκρητος ἐκείνη -καὶ φθιμένη ληνῶν γείτονα τύμβον ἔχοι. -
-
- - -Ariston - - -ἀμπελὶς ἡ φιλάκρητος ἐπὶ σκήπωνος ὁδηγοῦ -ἤδη τὸ σφαλερὸν γῆρας ἐρειδομένη, -λαθριδίη Βάκχοιο νεοθλιβὲς ἦρʼ ἀπὸ ληνοῦ -πῶμα Κυκλωπείην πλησομένη κύλικα· -πρὶν δʼ ἀρύσαι μογερὰν ἔκαμεν χέρα· γραῦς δὲ παλαιή, -ναῦς ἅθʼ ὑποβρύχιος ζωρὸν ἔδυ πέλαγος. -Εὐτέρπη δʼ ἐπὶ τύμβῳ ἀποφθιμένης θέτο σῆμα -λάινον, οἰνηρῶν γείτονα θειλοπέδων. -
-
- - -Callimachus - - -τὴν Φρυγίην Αἴσχρην, ἀγαθὸν γάλα, πᾶσιν ἐν ἐσθλοῖς -Μίκκος καὶ ζωὴν οὖσαν ἐγηροκόμει, -καὶ φθιμένην ἀνέθηκεν, ἐπεσσομένοισιν ὁρᾶσθαι -ἡ γρηῢς μαστῶν ὡς ἀπέχει χάριτας. -
-
- - -Callimachus - - -Κρηθίδα τὴν πολύμυθον, ἐπισταμένην καλὰ παίζειν, -δίζηνται Σαμίων πολλάκι θυγατέρες, -ἡδίστην συνέριθον, ἀείλαλον· ἡ δʼ ἀποβρίζει -ἐνθάδε τὸν πάσαις ὕπνον ὀφειλόμενον. - -
-
- - -Callimachus - - -εἶχον ἀπὸ σμικρῶν ὀλίγον βίον, οὔτε τι δεινὸν -ῥέζων, οὔτʼ ἀδικῶν οὐδένα. γαῖα φίλη, -Μικύλος εἴ τι πονηρὸν ἐπῄνεσα, μήτε συ κούφη -γίνεο, μήτʼ ἄλλοι δαίμονες, οἳ μʼ ἔχετε, -
-
- - -Meleager - - -παμμῆτορ γῆ, χαῖρε· σὺ τὸν πάρος οὐ βαρὺν εἰς σὲ -Αἰσιγένην καὐτὴ νῦν ἐπέχοις ἀβαρής. -
-
- - -Dionysius - - -Ἀγχιτόκον Σατύραν Ἀίδας λάχε, Σιδονία δὲ -κρύψε κόνις, πάτρα δʼ ἐστονάχησε Τύρος. -
-
- - -Leonidas - - -αὕτα Τιμόκλειʼ, αὕτα Φιλώ, αὕτα Ἀριστώ, -αὕτα Τιμαιθώ, παῖδες Ἀριστοδίκου, -πᾶσαι ὑπʼ ὠδῖνος πεφονευμέναι· αἷς ἔπι τοῦτο -σᾶμα πατὴρ στάσας κάτθανʼ Ἀριστόδικος. -
-
- - -Antipater - - -ἤπου σὲ χθονίας, Ἀρετημιάς, ἐξ ἀκάτοιο -Κωκυτοῦ θεμέναν ἴχνος ἐπʼ ἀιόνι, -οἰχόμενον βρέφος ἄρτι νέῳ φορέουσαν ἀγοστῷ -ᾤκτειραν θαλεραὶ Δωρίδες εἰν ἀίδᾳ, -πευθόμεναι τέο κῆρα σὺ δὲ ῥαίνουσα παρειὰς -δάκρυσιν, ἄγγειλας κεῖνʼ ἀνιαρὸν ἔπος· -“ διπλόον ὠδίνασα, φίλαι, τέκος, ἄλλο μὲν ἀνδρὶ - εὔφρονι καλλιπόμαν, ἄλλο δʼ ἄγω φθιμένοις.” - -
-
- - -Heraclitus - - -ἁ κόνις ἀρτίσκαπτος, ἐπὶ στάλας δὲ μετώπων -σείονται φύλλων ἡμιθαλεῖς στέφανοι -γράμμα διακρίναντες, ὁδοιπόρε, πέτρον ἴδωμεν, -λευρὰ περιστέλλειν ὀστέα φατὶ τίνος. — -“ ξεῖνʼ, Ἀρετημιάς εἰμι· πάτρα Κνίδος· Εὔφρονος ἦλθον - εἰς λέχος· ὠδίνων οὐκ ἄμορος γενόμαν - δισσὰ δʼ ὁμοῦ τίκτουσα, τὸ μὲν λίπον ἀνδρὶ ποδηγὸν - γήρως· ὃν δʼ ἀπάγω μναμόσυνον πόσιος.” -
-
- - -Leonidas - - -ἆ δείλʼ Ἀντίκλεις, δειλὴ δʼ ἐγὼ ἡ τὸν ἐν ἥβης -ἀκμῇ καὶ μοῦνον παῖδα πυρωσαμένη, -ὀκτωκαιδεκέτης ὃς ἀπώλεο, τέκνον ἐγὼ δʼ -ὀρφάνιον κλαίω γῆρας ὀδυρομένη. -βαίην εἰς Ἄϊδος σκιερὸν δόμον οὔτε μοι ἠὼς -ἡδεῖʼ οὔτʼ ἀκτὶς ὠκέος ἠελίου. -ἆ δείλʼ Ἀντίκλεις, μεμορημένε, πένθεος εἴης -ἰητήρ, ζωῆς ἔκ με κομισσάμενος. -
-
- - -Antipater - - -τοῦτό τοι, Ἀρτεμίδωρε, τεῷ ἐπὶ σάματι μάτηρ -ἴαχε, δωδεκέτη σὸν γοόωσα μόρον -ὤλετʼ “ ἐμᾶς ὠδῖνος ὁ πᾶς πόνος εἰς σποδὸν εἰς πῦρ, -ὤλεθʼ ὁ παμμέλεος γειναμένου κάματος· -ὤλετο χἀ ποθινὰ τέρψις σέθεν ἐς γὰρ ἄκαμπτον, -ἐς τὸν ἀνόστητον χῶρον ἔβης ἐνέρων -οὐδʼ ἐς ἐφηβείαν ἦλθες, τέκος· ἀντὶ δὲ σεῖο - στάλα καὶ κωφὰ λείπεται ἄμμι κόνις.” - -
-
- - -Meleager - - -οἰκτρότατον μάτηρ σε, Χαρίξενε, δῶρον ἐς ᾅδαν, -ὀκτωκαιδεκέταν ἐστόλισεν χλαμύδι. -ἦ γὰρ δὴ καὶ πέτρος ἀνέστενεν, ἁνίκʼ ἀπʼ οἴκων -ἅλικες οἰμωγᾷ σὸν νέκυν ἠχθοφόρευν. -πένθος δʼ, οὐχ ὑμέναιον ἀνωρύοντο γονῆες· -αἰαῖ, τὰς μαστῶν ψευδομένας χάριτας, -καὶ κενεὰς ὠδῖνας· ἰὼ κακοπάρθενε Μοῖρα, -στεῖρα γονᾶς στοργὰν ἔπτυσας εἰς ἀνέμους. -τοῖς μὲν ὁμιλήσασι ποθεῖν πάρα, τοῖς δὲ τοκεῦσι -πενθεῖν, οἷς δʼ ἀγνώς, πευθομένοις ἐλεεῖν. -
-
- - -Chaeremon - - -εὔβουλόν τέκνωσεν Ἀθηναγόρης περὶ πάντων -ἥσσονα μὲν μοίρᾳ, κρέσσονα δʼ εὐλογίᾳ. -
-
- - -Meleager - - - - εἶπον ἀνειρομένῳ τίς καὶ τίνος ἐσσί. φίλαυλος - Εὐκρατίδεω. ποδαπὸς δʼ εὔχεαι - - Ἔζησας δὲ τίνα στέργων βίον; οὐ τὸν ἀρότρου, -οὐδὲ τὸν ἐκ νηῶν, τὸν δὲ σοφοῖς ἕταρον. - - γήραϊ δʼ ἢ νηῶν βίον ἔλλιπες; ἤλυθον ᾍδαν -αὐτοθελεί, Κείων γευσάμενος κυλίκων. - - - ἠ πρέσβυς; καὶ κάρτα. λάχοι νύ σε -βῶλος ἐλαφρὴ -σύμφωνον πινυτῷ σχόντα λόγῳ βίοτον. -
-
- - -Callimachus - - -εἴπας Ἥλιε, χαῖρε Κλεόμβροτος Ὡμβρακιώτης -ἥλατʼ ἀφʼ ὑψηλοῦ τείχεος εἰς ἀΐδαν, -ἄξιον οὐδὲν ἰδὼν θανάτου κακόν, ἀλλὰ Πλάτωνος -ἓν τὸ περὶ ψυχῆς γράμμʼ ἀναλεξάμενος. -
-
- - -Leonidas - - -μυρίος ἦν, ἄνθρωπε, χρόνος προτοῦ, ἄχρι πρὸς ἠῶ -ἦλθες, χὠ λοιπὸς μυρίος εἰς ἀίδην. -τίς μοῖρα ζωῆς ὑπολείπεται, ἢ ὅσον ὅσσον -στιγμὴ καὶ στιγμῆς εἴ τι χαμηλότερον; -μικρή σευ ζωὴ τεθλιμμένη· οὐδὲ γὰρ αὐτὴ -ἡδεῖʼ, ἀλλʼ ἐχθροῦ στυγνοτέρη θανάτου. -ἐκ τοίης ὥνθρωποι ἀπηκριβωμένοι ὀστῶν -ἁρμονίης, †† ὕψιστʼ ἠέρα καὶ νεφέλας· -ὦνερ, ἴδʼ ὡς ἀχρεῖον, ἐπεὶ περὶ νήματος ἄκρον -εὐλὴ ἀκέρκιστον λῶπος ἐφεζομένη· -οἷον τὸ † † ψαλα, θρῖον ἀπεψιλωμένον οἷον, -πόλλον ἀραχναίου στυγνότερον σκελετοῦ. -ἠοῦν ἐξ ἠοῦς ὅσσον σθένος, ὦνερ, ἐρευνῶν -εἴης ἐν λιτῇ κεκλιμένος βιοτῇ· -αἰὲν τοῦτο νόῳ μεμνημένος ἄχρις ὁμιλῇς -ζωοῖς, ἐξ οἵης ἡρμόνισαι καλάμης. - -
-
- - -Leonidas - - -χειμέριον ζωὴν ὑπαλεύεο, νεῖο δʼ ἐς ὅρμον, -ὡς κἠγὼ Φείδων ὁ Κρίτου εἰς ἀίδην. -
-
- - -Aristodicus - - -Δαμὼ καὶ Μάθυμνα τὸν ἐν τριετηρίσιν Ἥρας -Εὔφρονα λυσσατὰν ὡς ἐπύθοντο νέκυν, -ζωὰν ἀρνήσαντο, τανυπλέκτων δʼ ἀπὸ μιτρᾶν -χερσὶ δεραιούχους ἐκρεμάσαντο βρόχους. -
-
- - -Anonymi Epigrammatici - - -εἷς ὅδε Νικάνδρου τέκνων τάφος· ἓν φάος ἀοῦς -ἄνυσε τὰν ἱερὰν Λυσιδίκας γενεάν. -
-
- - -Diotimus - - -νυμφίον Εὐαγόρην ποτὶ πενθερὸν ἡ Πολυαίνου -Σκυλλὶς ἀνʼ εὐρείας ἦλθε βοῶσα πύλας, -παῖδα τὸν Ἡγεμάχειον ἐφέστιον οὐδʼ ἄρʼ ἐκείνη -χήρη πατρῴους αὖθις ἐσῆλθε δόμους, -δαιμονίη· τριτάτῳ δὲ κατέφθιτο μηνὶ δυσαίων -οὐλομένῃ ψυχῆς δύσφρονι τηκεδόνι. -τοῦτο δʼ ἐπʼ ἀμφοτέροισι πολύκλαυτον φιλότητος -ἕστηκεν λείῃ μνῆμα παρὰ τριόδῳ. -
-
- - -Meleager - - -δάκρυά σοι καὶ νέρθε διὰ χθονός, Ἡλιοδώρα, -δωροῦμαι, στοργᾶς λείψανον, εἰς ἀίδαν, -δάκρυα δυσδάκρυτα· πολυκλαύτῳ δʼ ἐπὶ τύμβῳ -σπένδω μνᾶμα πόθων, μνᾶμα φιλοφροσύνας. - -οἰκτρὰ γὰρ οἰκτρὰ φίλαν σε καὶ ἐν φθιμένοις Μελέαγρος -αἰάζω, κενεὰν εἰς Ἁχέροντα χάριν. -αἰαῖ, ποῦ τὸ ποθεινὸν ἐμοὶ θάλος; ἅρπασεν ᾍδας, -ἅρπασεν ἀκμαῖον δʼ ἄνθος ἔφυρε κόνις. -ἀλλά σε γουνοῦμαι, Γᾶ παντρόφε, τὰν πανόδυρτον -ἠρέμα σοῖς κόλποις, μᾶτερ, ἐναγκάλισαι. -
-
- - -Tymnes - - -μή σοι τοῦτο, Φιλαινί, λίην ἐπικάρδιον ἔστω, -εἰ μὴ πρὸς Νείλῳ γῆς μορίης ἔτυχες, -ἀλλὰ ς1ʼ Ἐλευθέρνης ὅδʼ ἔχει τάφος· ἔστι γὰρ ἲση˘ -πάντοθεν εἰς ἀίδην ἐρχομένοισιν ὁδός. -
-
- - -Leonidas - - -τίς ποτʼ ἄρʼ εἶ; τίνος ἆρα παρὰ τρίβον ὀστέα ταῦτα -τλήμονʼ ἐν ἡμιφαεῖ λάμνακι γυμνὰ μένει; -μνῆμα δὲ καὶ τάφος αἰὲν ἀμαξεύοντος ὁδίτεω -ἄξονι καὶ τροχιᾖ λιτὰ παραξέεται· -ἤδη σου καὶ πλευρὰ παρατρίψουσιν ἄμαξαι, -σχέτλιε, σοὶ δʼ οὐδεὶς οὐδʼ ἐπὶ δάκρυ βαλεῖ. -
-
- - -Theodoridas - - -Πέτρος ἐγὼ τὸ πάλαι γυρὴ καὶ ἄτριπτος ἐπιβλὴς -τὴν Ἡρακλείτου ἔνδον ἔχω κεφαλὴν -αἰών μʼ ἔτριψεν κροκάλαις ἴσον ἐν γὰρ ἀμάξῃ -παμφόρῳ αἰζηῶν εἰνοδίη τέταμαι. -ἀγγέλλω δὲ βροτοῖσι, καὶ ἄστηλός περ ἐοῦσα, -θεῖον ὑλακτητὴν δήμου ἔχουσα κύνα. - -
-
- - -Leonidas - - -ἤδη μευ τέτριπται ὑπεκκεκαλυμμένον ὀστεῦν -ἁρμονίᾐ τʼ, ὦνερ, πλὰξ ἐπικεκλιμένη· -ἤδη καὶ σκώληκες ὑπὲκ σοροῦ αὐγάζονται -ἡμετέρης· τί πλέον γῆν ἐπιεννύμεθα; -ἦ γὰρ τὴν οὔπω πρὶν ἰτὴν ὁδὸν ἐτμήξαντο -ἄνθρωποι, κατʼ ἐμῆς νισσόμενοι κεφαλῆς. -ἀλλὰ πρὸς ἐγγαίων, Ἀϊδωνέος Ἑρμεία τε -καὶ Νυκτός, ταύτης ἐκτὸς ἴτʼ ἀτραπιτοῦ. -
-
- - -Philitas - - -α στάλα βαρύθουσα λέγει τάδε· “ τὰν μινύωρον - τὰν μικκὰν Ἀίδας ἅρπασε Θειοδόταν.” -χἀ μικκὰ τάδε πατρὶ λέγει πάλιν· “ ἴσχεο λύπας, - Θειόδοτε· θνατοὶ πολλάκι δυστυχέες.” -
-
- - -Anonymi Epigrammatici - - -οὔπω τοι πλόκαμοι τετμημένοι, οὐδὲ σελάνας -τοὶ τριετεῖς μηνῶν ἁνιοχεῦντο δρόμοι, -Κλεύδικε, Νικασὶς ὅτε σὰν περὶ λάρνακα μάτηρ, -τλῆμον, ἐπʼ αἰακτᾷ πόλλʼ ἐβόα στεφάνα, -καὶ γενέτας Περίκλειτος· ἐπʼ ἀγνώτῳ δʼ Ἀχέροντι -ἡβάσεις ἥβαν, Κλεύδικʼ, ἀνοστοτάταν. -
-
- - -Anonymi Epigrammatici - - -Ἀίδη ἀλλιτάνευτε καὶ ἄτροπε, τίπτε τοι οὕτω -Κάλλαισχρον ζωᾶς νήπιον ὠρφάνισας; -ἔσται μὰν ὅ γε παῖς ἐν δώμασι Φερσεφονείοις -παίγνιον· ἀλλʼ οἴκοι λυγρὰ λέλοιπε πάθη. - -
-
- - -Dioscorides - - -πέντε κόρας καὶ πέντε Βιὼ Διδύμωνι τεκοῦσα -ἄρσενας, οὐδὲ μιᾶς οὐδʼ ἑνὸς ὠνάσατο· -ἣ μέγʼ ἀρίστη ἐοῦσα καὶ εὔτεκνος οὐχ ὑπὸ παίδων, -ὀθνείαις δʼ ἐτάφη χερσὶ θανοῦσα Βιώ. -
-
- - -Dioscorides - - -Βάλλεθʼ ὑπὲρ τύμβου πολιὰ κρίνα, καὶ τὰ συνήθη -τύμπανʼ ἐπὶ στήλῃ ῥήσσετʼ Ἀλεξιμένευς, -καὶ περιδινήσασθε μακρῆς ἀνελίγματα χαίτης -Στρυμονίην ἄφετοι θυιάδες ἀμφὶ πόλιν, -ἣ γλυκερὰ πνεύσαντος ἐφʼ ὑμετέροισιν † ἀδάπταις -πολλάκι πρὸς μαλακοὺς τοῦδʼ ἐχόρευε νόμους. -
-
- - -Anyte - - -πολλάκι τῷδʼ ὀλοφυδνὰ κόρας ἐπὶ σάματι Κλείνα -μάτηρ ὠκύμορον παῖδʼ ἐβόασε φίλαν, -ψυχὰν ἀγκαλέουσα Φιλαινίδος, ἃ πρὸ γάμοιο -χλωρὸν ὑπὲρ ποταμοῦ χεῦμʼ Ἀχέροντος ἔβα. -
-
- - -Perses - - -ὤλεο δὴ πρὸ γάμοιο, Φιλαίνιον, οὐδέ σε μάτηρ -Πυθιὰς ὡραίους ἤγαγεν εἰς θαλάμους -νυμφίου· ἀλλʼ ἐλεεινὰ καταδρύψασα παρειὰς -τεσσαρακαιδεκέτιν τῷδʼ ἐκάλυψε τάφῳ. -
-
- - -Mnasalces - - -αἰαῖ Ἀριστοκράτεια, σὺ μὲν βαθὺν εἰς Ἀχέροντα -οἴχεαι ὡραίου κεκλιμένα πρὸ γάμου· -ματρὶ δὲ δάκρυα σᾷ καταλείπεται, ἅ ς1ʼ ἐπὶ τύμβῳ -πολλάκι κεκλιμένα κωκύει ἐκ † κεφαλᾶς. - -
-
- - -Sappho - - -Τιμάδος ἅδε κόνις, τὰν δὴ πρὸ γάμοιο θανοῦσαν -δέξατο Φερσεφόνας κυάνεος θάλαμος, -ἇς καὶ ἀποφθιμένας πᾶσαι νεοθᾶγι σιδάρῳ -ἅλικες ἱμερτὰν κρατὸς ἔθεντο κόμαν. -
-
- - -Anyte - - -παρθένον Ἀντιβίαν κατοδύρομαι, ἇς ἐπὶ πολλοὶ -νυμφίοι ἱέμενοι πατρὸς ἵκοντο δόμον, -κάλλευς καὶ πινυτᾶτος ἀνὰ κλέος· ἀλλʼ ἐπὶ πάντων -ἐλπίδας οὐλομένα Μοῖρʼ ἐκύλισε πρόσω. -
-
- - -Mnasalces - - -αἰαῖ παρθενίας ὀλοόφρονος, ἇς ἄπο φαιδρὰν -ἔκλασας ἁλικίαν, ἱμερόεσσα Κλεοῖ· -καδδέ ς1ʼ ἀμυξάμεναι περιδάκρυες αἵδʼ ἐπὶ τύμβῳ -λᾶες Σειρήνων ἕσταμες εἰδάλιμοι. -
-
- - -Anyte - - -Ὠχόμεθʼ, ὦ Μίλητε, φίλη πατρί, τῶν ἀθεμίστων -τὰν ἄνομον Γαλατᾶν κύπριν ἀναινόμεναι, -παρθενικαὶ τρισσαὶ πολιήτιδες, ἃς ὁ βιατὰς -Κελτῶν εἰς ταύτην μοῖραν ἔτρεψεν Ἄρης. -οὐ γὰρ ἐμείναμεν ἅμμα τὸ δυσσεβὲς οὐδʼ Ὑμέναιον -νυμφίον, ἀλλʼ Ἀίδην κηδεμόνʼ εὑρόμεθα. - -
-
- - -Antipater - - -οὐ νούσῳ Ῥοδόπα τε καὶ ἁ γενέτειρα Βοΐσκα -οὐδʼ ὑπὸ δυσμενέων δούρατι κεκλίμεθα -ἀλλʼ αὐταί, πάτρας ὁπότʼ ἔφλεγεν ἄστυ Κορίνθου -γοργὸς Ἄρης, ἀίδαν ἄλκιμον εἱλόμεθα. -ἔκτανε γὰρ μάτηρ με διασφακτῆρι σιδάρῳ, -οὐδʼ ἰδίου φειδὼ δύσμορος ἔσχε βίου, -ἇψε δʼ ἐναυχενίῳ δειρὰν βρόχῳ· ἦς γὰρ ἀμείνων -δουλοσύνας ἁμῖν πότμος ἐλευθέριος. -
-
- - -Anonymi Epigrammatici - - -ἐν πόντῳ Σώδαμος ὁ Κρὴς θάνεν, ᾧ φίλα, Νηρεῦ, -δίκτυα καὶ τὸ σὸν ἦν κεῖνο σύνηθες ὕδωρ, -ἰχθυβολεὺς ὁ περισσὸς ἐν ἀνδράσιν. ἀλλὰ θάλασσα -οὔ τι διακρίνει χείματος οὐδʼ ἁλιεῖς. -
-
- - -Alcaeus - - -στυγνὸς ἐπʼ Ἀρκτούρῳ ναύταις πλόος· ἐκ δὲ Βορείης -λαίλαπος Ἀσπάσιος πικρὸν ἔτευξα μόρον, -οὗ στείχεις παρὰ τύμβον, ὁδοιπόρε· σῶμα δὲ πόντος -ἔκρυψʼ Αἰγαίῳ ῥαινόμενον πελάγει. -ἠϊθέων δακρυτὸς ἅπας μόρος· ἐν δὲ θαλάσσῃ -πλεῖστα πολυκλαύτου κήδεα ναυτιλίης. -
-
- - -Simonides - - -ἠερίη Γεράνεια, κακὸν λέπας, ὤφελεν Ἴστρον -τῆλε καὶ ἐκ Σκυθέων μακρὸν ὁρᾶν Τάναϊν, - -μηδὲ πέλας ναίειν Σκειρωνικὸν οἶδμα θαλάσσης, -ἄγκεα νιφομένης ἀμφὶ Μεθουριάδος. -νῦν δʼ ὁ μὲν ἐν πόντῳ κρυερὸς νέκυς· οἱ δὲ βαρεῖαν -ναυτιλίην κενεοὶ τῇδε βοῶσι τάφοι. -
-
- - -Damagetus - - -καί ποτε Θυμώδης, τὰ παρʼ ἐλπίδα κήδεα κλαίων, -παιδὶ Λύκῳ κενεὸν τοῦτον ἔχευε τάφον -οὐδὲ γὰρ ὀθνείην ἔλαχεν κόνιν, ἀλλά τις ἀκτὴ -Θυνιὰς ἢ νήσων ποντιάδων τις ἔχει· -ἔνθʼ ὅγε που πάντων κτερέων ἄτερ ὀστέα φαίνει -γυμνὸς ἐπʼ ἀξείνου κείμενος αἰγιαλοῦ. -
-
- - -Antipater - - -Δᾶμις ὁ Νυσαιεὺς ἐλαχὺ σκάφος ἔκ ποτε πόντου -Ἰονίου ποτὶ γᾶν ναυστολέων Πέλοπος, -φορτίδα μὲν καὶ πάντα νεὼς ἐπιβήτορα λαόν, -κύματι καὶ συρμῷ πλαζομένους ἀνέμων, -ἀσκηθεῖς ἐσάωσε· καθιεμένης δʼ ἐπὶ πέτραις -ἀγκύρης, ψυχρῶν κάτθανεν ἐκ νιφάδων -ἠμύσας ὁ πρέσβυς. ἴδʼ ὡς λιμένα γλυκὺν ἄλλοις -δούς, ξένε, τὸν Λήθης αὐτὸς ἔδυ λιμένα. -
-
- - -Theaetetus - - -ναυτίλοι ὦ πλώοντες, ὁ Κυμηναῖος Ἀρίστων -πάντας ὑπὲρ Ξενίου λίσσεται ὔμμε Διός, -εἰπεῖν πατρὶ Μένωνι, παρʼ Ἰκαρίαις ὅτι πέτραις -κεῖται, ἐν Αἰγαίῳ θυμὸν ἀφεὶς πελάγει. - -
-
- - -Asclepiades - - -ὦ παρʼ ἐμὸν στείχων κενὸν ἠρίον, εἶπον, ὁδῖτα, -εἰς Χίον εὖτʼ ἂν ἵκῃ, πατρὶ Μελησαγόρῃ, -ὡς ἐμὲ μὲν καὶ νῆα καὶ ἐμπορίην κακὸς Εὖρος -ὤλεσεν, Εὐίππου δʼ αὐτὸ λέλειπτʼ ὄνομα. -
-
- - -Perses - - -Εὔρου χειμέριαί σε καταιγίδες ἐξεκύλισαν, -Φίλλι, πολυκλύστῳ γυμνὸν ἐπʼ ἠιόνι, -οἰνηρῆς Λέσβοιο παρὰ σφυρὸν αἰγίλιπος δέ -πέτρου ἁλιβρέκτῳ κεῖσαι ὑπὸ πρόποδι. -
-
- - -Nicaenetus - - -ἠρίον εἰμὶ Βίτωνος, ὁδοιπόρε· εἰ δὲ Τορώνην -λείπων εἰς † αὐτὴν ἔρχεαι Ἀμφίπολιν, -εἰπεῖν Νικαγόρᾳ, παίδων ὅτι τὸν μόνον αὐτῷ -Στρυμονίης ἐρίφων ὤλεσε πανδυσίῃ. -
-
- - -Leonidas - - - - ἀρχαίης ὦ θινὸς ἐπεστηλωμένον ἄχθος, -εἴποις ὅντινʼ ἔχεις, ἢ τίνος, ἢ ποδαπόν. - - Φίντωνʼ Ἑρμιονῆα Βαθυκλέος, ὃν πολὺ κῦμα -ὤλεσεν, Ἀρκτούρου λαίλαπι χρησάμενον. -
-
- - -Leonidas - - -Πάρμις ὁ Καλλιγνώτου ἐπακταῖος καλαμευτής, -ἄκρος καὶ κίχλης καὶ σκάρου ἰχθυβολεύς, - -καὶ λάβρου πέρκης δελεάρπαγος, ὅσσα τε κοίλας -σήραγγας πέτρας τʼ ἐμβυθίους νέμεται, -ἄγρης ἐκ πρώτης ποτʼ ἰουλίδα πετρήεσσαν -δακνάζων, ὀλοὴν ἐξ ἁλὸς ἀράμενος, -ἔφθιτʼ ὀλισθηρὴ γὰρ ὑπʼ ἐκ χερὸς ἀίξασα -ᾤχετʼ ἐπὶ στεινὸν παλλομένη φάρυγα. -χὠ μὲν μηρίνθων καὶ δούνακος ἀγκίστρων τε -ἐγγὺς ἀπὸ πνοιὴν ἧκε κυλινδόμενος, -νήματʼ ἀναπλήσας ἐπιμοίρια· τοῦ δὲ θανόντος -Γρίπων ὁ γριπεὺς τοῦτον ἔχωσε τάφον. -
-
- - -Sappho - - -τῷ γριπεῖ Πελάγωνι πατὴρ ἐπέθηκε Μενίσκος -κύρτον καὶ κώπαν, μνᾶμα κακοζοΐας. -
-
- - -Leonidas - - -κἠν γῇ καὶ πόντῳ κεκρύμμεθα· τοῦτο περισσὸν -ἐκ Μοιρέων Θάρσυς Χαρμίδου ἠνύσατο. -ἦ γὰρ ἐπʼ ἀγκύρης ἔνοχον βάρος εἰς ἅλα δύνων, -Ἰόνιὸν θʼ ὑγρὸν κῦμα κατερχόμενος, -τὴν μὲν ἔσως1ʼ, αὐτὸς δὲ μετάτροπος ἐκ βυθοῦ ἔρρων -ἤδη καὶ ναύταις χεῖρας ὀρεγνύμενος, -ἐβρώθην τοῖόν μοι ἐπʼ ἄγριον εὖ μέγα κῆτος -ἦλθεν, ἀπέβροξεν δʼ ἄχρις ἐπʼ ὀμφαλίου. -χἤμισυ μὲν ναῦται, ψυχρὸν βάρος, ἐξ ἁλὸς ἡμῶν -ἤρανθʼ, ἥμισυ δὲ πρίστις ἀπεκλάσατο· -ᾐόνι δʼ ἐν ταύτῃ κακὰ λείψανα Θάρσυος, ὦνερ, -ἔκρυψαν πάτρην δʼ οὐ πάλιν ἱκόμεθα. - -
-
- - -Simonides - - -ἄνθρωπʼ, οὐ Κροίσου λεύσσεις τάφον, ἀλλὰ γὰρ ἀνδρὸς -χερνήτεω μικρὸς τύμβος, ἐμοὶ δʼ ἱκανός. -
-
- - -Simonides - - -οὐκ ἐπιδὼν νύμφεια λέχη κατέβην τὸν ἄφυκτον -Γόργιππος ξανθῆς Φερσεφόνης θάλαμον. -
-
- - -Simonides - - -Παυσανίην ἰητρὸν ἐπώνυμον, Ἀγχίτεω υἱόν, -τόνδʼ, Ἀσκληπιάδην, πατρὶς ἔθαψε Γέλα, -ὃς πλείστους κρυεραῖσι μαραινομένους ὑπὸ νούσοις -φῶτας ἀπέστρεψεν Φερσεφόνης θαλάμων. -
-
- - -Simonides - - -σῆμα Θεόγνιδός εἰμι Σινωπέος, ᾧ μʼ ἐπέθηκεν -Γλαῦκος ἑταιρείης ἀντὶ πολυχρονίου. -
-
- - -Simonides - - -σῶμα μὲν ἀλλοδαπὴ κεύθει κόνις· ἐν δέ σε πόντῳ, -Κλείσθενες, Εὐξείνῳ μοῖρʼ ἔκιχεν θανάτου -πλαζόμενον γλυκεροῦ δὲ μελίφρονος οἴκαδε νόστου -ἤμπλακες, οὐδʼ ἵκευ Χῖον ἐπʼ ἀμφιρύτην. -
-
- - -Simonides - - -σῆμα καταφθιμένοιο Μεγακλέος εὖτʼ ἂν ἴδωμαι, -οἰκτείρω σε, τάλαν Καλλία, οἷʼ ἔπαθες. - -
-
- - -Simonides - - -τῶνδε διʼ -ἀνθρώπων ἀρετὰν οὐχ ἵκετο καπνὸς -αἰθέρα δαιομένης εὐρυχόρου Τεγέας, -οἳ βούλοντο πόλιν μὲν ἐλευθερίᾳ τεθαλυῖαν -παισὶ λιπεῖν, αὐτοὶ δʼ ἐν προμάχοισι θανεῖν. -
-
- - -Simonides - - -φῆ ποτε Πρωτόμαχος, πατρὸς περὶ χεῖρας ἔχοντος, -ἡνίκʼ ἀφʼ ἱμερτὴν ἔπνεεν ἡλικίην -“ὦ, Τιμηνορίδη, παιδὸς φίλου οὔ ποτε λήξεις - οὔτʼ ἀρετὴν ποθέων οὔτε σαοφροσύνην.” -
-
- - -Simonides - - -αἰδὼς καὶ Κλεόδημον ἐπὶ προχοῇσι Θεαίρου -ἀενάου στονόεντʼ ἤγαγεν εἰς θάνατον, -Θρηικίῳ κύρσαντα λόχῳ· πατρὸς δὲ κλεεννὸν -Διφίλου αἰχμητὴς υἱὸς ἔθηκʼ ὄνομα. -
-
- - -Simonides - - -αἰαῖ, νοῦσε βαρεῖα· τί δὴ ψυχαῖσι μεγαίρεις -ἀνθρώπων ἐρατῇ πὰρ νεότητι μένειν ; -ἣ καὶ Τίμαρχον γλυκερῆς αἰῶνος ἄμερσας -ἠίθεον, πρὶν ἰδεῖν κουριδίην ἄλοχον. -
-
- - -Simonides - - -οἱ μὲν ἐμὲ κτείναντες ὁμοίων ἀντιτύχοιεν, -Ζεῦ Ξένιʼ οἱ δʼ ὑπὸ γᾶν θέντες ὄναιντο βίου, - -
-
- - -Callimachus - - -Ἠῷοι Μελάνιππον ἐθάπτομεν, ἠελίου δὲ -δυομένου Βασιλὼ κάτθανε παρθενικὴ -αὐτοχερί· ζώειν γάρ, ἀδελφεὸν ἐν πυρὶ θεῖσα, -οὐκ ἔτλη. δίδυμον δʼ οἶκος ἐσεῖδε κακὸν -πατρὸς Ἀριστίπποιο· κατήφησεν δὲ Κυρήνη -πᾶσα, τὸν εὔτεκνον χῆρον ἰδοῦσα δόμον. -
-
- - -Callimachus - - -Ἀστακίδην τὸν Κρῆτα, τὸν αἰπόλον, ἥρπασε Νύμφη -ἐξ ὄρεος καὶ νῦν ἱερὸς Ἀστακίδης. -οὐκέτι Δικταίῃσιν ὑπὸ δρυσίν, οὐκέτι Δάφνιν -ποιμένες, Ἀστακίδην δʼ αἰὲν ἀεισόμεθα. -
-
- - -Callimachus - - -δαίμονα τίς δʼ εὖ οἶδε τὸν Αὔριον, ἁνίκα καὶ σέ, -Χάρμι, τὸν ὀφθαλμοῖς χθιζὸν ἐν ἁμετέροις, -τᾷ ἑτέρᾳ κλαύσαντες ἐθάπτομεν; οὐδὲν ἐκείνου -εἶδε πατὴρ Διοφῶν χρῆμʼ ἀνιαρότερον. -
-
- - -Callimachus - - -ἢν δίζῃ Τίμαρχον ἐν Ἄϊδος, ὄφρα πύθηαι -ἤ τι περὶ ψυχῆς, ἢ πάλι πῶς ἔσεαι, -δίζεσθαι φυλῆς Πτολεμαΐδος, υἱέα πατρὸς -Παυσανίου· δήεις δʼ αὐτὸν ἐν εὐσεβέων. -
-
- - -Callimachus - - -Κύζικον ἢν ἔλθῃς, ὀλίγος πόνος Ἱππακὸν εὑρεῖν -καὶ Διδύμην ἀφανὴς οὔτι γάρ ἡ γενεή· -καί σφιν ἀνιηρὸν μὲν ἐρεῖς ἔπος, ἔμπα δὲ λέξαι -τοῦθʼ, ὅτι τὸν κείνων ὧδʼ ἐπέχω Κριτίην. - -
-
- - -Callimachus - - -Τιμονόη, τίς δʼ ἐσσί; μὰ δαίμονας, οὒ ς1ʼ ἂν ἐπέγνων, - -εἰ μὴ Τιμοθέου πατρὸς ἐπῆν ὄνομα - -στήλῃ, καὶ Μήθυμνα τεὴ πόλις. ἦ μέγα φημὶ -χῆρον ἀνιᾶσθαι σὸν πόσιν Εὐθυμένη. -
-
- - -Callimachus - - -οἵτινες Ἀλείοιο παρέρπετε σᾶμα Κίμωνος -ἴστε τὸν Ἱππαίου παῖδα παρερχόμενοι. -
-
- - -Callimachus - - - - ἦ ῥʼ ὑπὸ σοὶ Χαρίδας ἀναπαύεται; εἰ τὸν Ἀρίμμα -τοῦ Κυρηναίου παῖδα λέγεις, ὑπʼ ἐμοί. - - ὦ Χαρίδα, τί τὰ νέρθε; γ. πολὺς σκότος. αἱ δʼ ἄνοδοι τί; - - ψεῦδος. ὁ δὲ Πλούτων; μῦθος. ἀπωλόμεθα. - - οὗτος ἐμὸς λόγος ὔμμιν ἀληθινός· εἰ δὲ τὸν ἡδὺν -βούλει, Πελλαίου βοῦς μέγας εἰν ἀίδῃ. -
-
- - -Callimachus - - -ὅστις ἐμὸν παρὰ σῆμα φέρεις πόδα, Καλλιμάχου με -ἴσθι Κυρηναίου παῖδά τε καὶ γενέτην. -εἰδείης δʼ ἄμφω κεν ὁ μέν κοτε πατρίδος ὅπλων -ἦρξεν· ὁ δʼ ἤεισεν κρέσσονα βασκανίης. -οὐ νέμεσις· Μοῦσαι γὰρ ὅσους ἴδον ὄμματι παῖδας -μὴ λοξῷ πολιοὺς οὐκ ἀπέθεντο φίλους. - -
-
- - -Nicander - - -Ζεῦ πάτερ, Ὀθρυάδα τίνα φέρτερον ἔδρακες ἄλλον, -ὃς μόνος ἐκ Θυρέας οὐκ ἐθέλησε μολεῖν -πατρίδʼ ἐπὶ Σπάρταν, διὰ δὲ ξίφος ἤλασε πλευρᾶν, -δοῦλα καταγράψας σκῦλα κατʼ Ἰναχιδᾶν; -
-
- - -Theodoridas - - -Θεύδοτε, κηδεμόνων μέγα δάκρυον, οἵ σε θανόντα -κώκυσαν, μέλεον πυρσὸν ἀναψάμενοι, -αἰνόλινε, τρισάωρε· σὺ δʼ ἀντὶ γάμου τε καὶ ἥβης -κάλλιπες ἡδίστῃ ματρὶ γόους καὶ ἄχη. -
-
- - -Theodoridas - - -Εὐρύσορον περὶ σῆμα τὸ Φαιναρέτης ποτὲ κοῦραι -κέρσαντο ξανθοὺς Θεσσαλίδες πλοκάμους, -πρωτοτόκον καὶ ἄποτμον ἀτυζόμεναι περὶ νύμφην -Λάρισσαν δὲ φίλην ἤκαχε καὶ τοκέας. -
-
- - -Theodoridas - - -τόλμα καὶ εἰς ἀίδαν καὶ ἐς οὐρανὸν ἄνδρα κομίζει, -ἃ καὶ Σωσάνδρου παῖδʼ ἐπέβασε πυρᾶς, -Δωρόθεον Φθίᾳ γὰρ ἐλεύθερον ἦμαρ ἰάλλων -ἐρραίσθη Σηκῶν μεσσόθι καὶ Χιμέρας. -
-
- - -Antipater - - -μούναν σὺν τέκνοις νεκυοστόλε δέξο με πορθμεῦ -τὰν λάλον ἀρκεῖ σοι φόρτος ὁ Τανταλίδης· -πληρώσει γαστὴρ μία σὸν σκάφος· εἴσιδε κούρους -καὶ κούρας, Φοίβου σκῦλα καὶ Ἀρτέμιδος. - -
-
- - -Antipater - - -αὐτά τοι, τρέσσαντι παρὰ χρέος, ὤπασεν ᾅδαν, -βαψαμένα κοίλων ἐντὸς ἄρη λαγόνων, -μάτηρ ἅ ς1ʼ ἔτεκεν, Δαμάτριε· φᾶ δὲ σίδαρον -παιδὸς ἑοῦ φύρδαν μεστὸν ἔχουσα φόνου, -ἀφριόεν κοναβηδὸν ἐπιπρίουσα γένειον, -δερκομένα λοξαῖς, οἷα Λάκαινα, κόραις -“ λεῖπε τὸν Εὐρώταν, ἴθι Τάρταρον· ἁνίκα δειλὰν -οἶσθα φυγάν, τελέθεις οὔτʼ ἐμὸς οὔτε Λάκων.” -
-
- - -Isidorus - - -ἔκ με γεωμορίης Ἐτεοκλέα πόντιος ἐλπὶς -εἵλκυσεν, ὀθνείης ἔμπορον ἐργασίης· -νῶτα δὲ Τυρσηνῆς ἐπάτευν ἁλός· ἀλλʼ ἅμα νηὶ -πρηνιχθεὶς κείνης ὕδασιν ἐγκατέδυν, -ἀθρόον ἐμβρίσαντος ἀήματος. οὐκ ἄρʼ ἀλωὰς -αὑτὸς ἐπιπνείει κεἰς ὀθόνας ἄνεμος. -
-
- - -Dionysius - - -καὶ Διὶ καὶ Βρομίῳ με διάβροχον οὐ μέγʼ ὀλισθεῖν, -καὶ μόνον ἐκ δοιῶν, καὶ βροτὸν ἐκ μακάρων. -
-
- - -Alexander - - -ἄνθρωπε, ζωῆς περιφείδεο, μηδὲ παρʼ ὥρην -ναυτίλος ἴσθι· καὶ ὣς οὐ πολὺς ἀνδρὶ βίος. -δείλαιε Κλεόνικε, σὺ δʼ εἰς λιπαρὴν Θάσον ἐλθεῖν -ἠπείγευ, Κοίλης ἔμπορος ἐκ Συρίης, -ἔμπορος, ὦ Κλεόνικε· δύσιν δʼ ὑπὸ Πλειάδος αὐτὴν -ποντοπορῶν, αὐτῇ Πλειάδι συγκατέδυς. - -
-
- - -Meleager - - -οὐκέθʼ ὁμοῦ χιμάροισιν ἔχειν βίον, οὐκέτι ναίειν -ὁ τραγόπους ὀρέων Πὰν ἐθέλω κορυφάς. -τί γλυκύ μοι, τί ποθεινὸν ἐν οὔρεσιν; ὤλετο Δάφνις, -Δάφνις ὃς ἡμετέρῃ πῦρ ἔτεκε κραδίῃ. -ἄστυ τόδʼ οἰκήσω· θηρῶν δέ τις ἄλλος ἐπʼ ἄγρην -στελλέσθω. τὰ πάροιθʼ οὐκέτι Πανὶ φίλα. -
-
- - -Alcaeus - - -οὐδὲ θανὼν ὁ πρέσβυς ἑῷ ἐπιτέτροφε τύμβῳ -βότρυν ἀπʼ οἰνάνθης ἥμερον, ἀλλὰ βάτον, -καὶ πνιγόεσσαν ἄχερδον, ἀποστύφουσαν ὁδιτῶν -χείλεα καὶ δίψει καρφαλέον φάρυγα. -ἀλλά τις Ἱππώνακτος ἐπὴν παρὰ σῆμα νέηται, -εὐχέσθω κνώσσειν εὐμενέοντα νέκυν. -
-
- - -Phanias - - -ἠρίον οὐκ ἐπὶ πατρί, πολυκλαύτου δʼ ἐπὶ παιδὸς -Λῦσις ἄχει κενεὴν τήνδʼ ἀνέχωσε κόνιν, -οὔνομα ταρχύσας, ἐπεὶ οὐχ ὑπὸ χεῖρα τοκήων -ἤλυθε δυστήνου λείψανα Μαντιθέου. -
-
- - -Anyte - - -Μάνης οὗτος ἀνὴρ ἦν ζῶν ποτε· νῦν δὲ τεθνηκὼς -ἶσον Δαρείῳ τῷ μεγάλῳ δύναται. - -
-
- - -Perses - - -οὐ προϊδών, Θεότιμε, κακὴν δύσιν ὑετίοιο -ἀρκτούρου, κρυερῆς ἥψαο ναυτιλίης, -ἥ σε, διʼ Αἰγαίοιο πολυκλήιδι θέοντα -νηί, σὺν οἷς ἑτάροις ἤγαγεν εἰς ἀίδην. -αἰαῖ, Ἀριστοδίκη δὲ καὶ Εὔπολις, οἳ ς1ʼ ἐτέκοντο, -μύρονται, κενεὸν σῆμα περισχόμενοι. -
-
- - -Damagetus - - -πρὸς σὲ Διὸς Ξενίου γουνούμεθα, πατρὶ Χαρίνῳ -ἄγγειλον Θήβην, ὦνερ, ἐπʼ Αἰολίδα -μῆνιν καὶ Πολύνικον ὀλωλότε, καὶ τόδε φαίης, -ὡς οὐ τὸν δόλιον κλαίομεν ἄμμι μόρον, -καίπερ ὑπὸ Θρῃκῶν φθίμενοι χερός, ἀλλὰ τὸ κείνου -γῆρας ἐν ἀργαλέῃ κείμενον ὀρφανίῃ. -
-
- - -Damagetus - - -ἔστης ἐν προμάχοις, Χαιρωνίδη, ὧδʼ ἀγορεύσας, - -ἢ μόρον, ἢ νίκαν, Ζεῦ, πολέμοιο δίδου, - -ἡνίκα τοι περὶ Τάφρον Ἀχαιίδα τῇ τότε νυκτὶ -δυσμενέες θρασέος δῆριν ἔθεντο πόνου. -ναὶ μὴν ἀντʼ ἀρετῆς σε διακριδὸν Ἆλις ἀείδει, -θερμὸν ἀνὰ ξείνην αἷμα χέαντα κόνιν. -
-
- - -Statyllius flaccus - - -Ἕβρου χειμερίοις ἀταλὸς κρυμοῖσι δεθέντος -κοῦρος ὀλισθηροῖς ποσσὶν ἔθραυσε πάγον, - -τοῦ παρασυρομένοιο περιρραγὲς αὐχένʼ ἔκοψεν -θηγαλέον ποταμοῦ Βιστονίοιο τρύφος. -καὶ τὸ μὲν ἡρπάσθη δίναις μέρος· ἡ δὲ τεκοῦσα -λειφθὲν ὕπερθε τάφῳ μοῦνον ἔθηκε κάρα. -μυρομένη δὲ τάλαινα, τέκος, τέκος, εἶπε, “τὸ -μέν σου -πυρκαϊή, τὸ δέ σου πικρὸν ἔθαψεν ὕδωρ.” -
-
- - -Anonymi Epigrammatici - - -πάντα τις ἀρήσαιτο φυγεῖν πλόον, ὁππότε καὶ σύ, -Θεύγενες, ἐν Λιβυκῷ τύμβον ἔθευ πελάγει, -ἡνίκα σοι κεκμηὸς ἐπέπτατο φορτίδι νηὶ -οὖλον ἀνηρίθμων κεῖνο νέφος γεράνων. -
-
- - -Anonymi Epigrammatici - - -εἰπέ, ποτὶ Φθίαν εὐάμπελον ἢν ποθʼ ἵκηαι -καὶ πόλιν ἀρχαίαν, ὦ ξένε, Θαυμακίαν. -ὡς δρυμὸν Μαλεαῖον ἀναστείβων ποτʼ ἔρημον -εἶδες Λάμπωνος τόνδʼ ἐπὶ παιδὶ τάφον -Δερξίᾳ, ὅν ποτε μοῦνον ἕλον δόλῳ, οὐδʼ ἀναφανδόν, -κλῶπες ἐπὶ Σπάρταν δῖαν ἐπειγόμενον. -
-
- - -Hegesippus - - -τὴν ἀπὸ πυρκαϊῆς ἐνδέξια φασι κέλευθον -Ἑρμῆν τοὺς ἀγαθοὺς εἰς Ῥαδάμανθυν ἄγειν, -ᾗ καὶ Ἀριστόνοος, Χαιρεστράτου οὐκ ἀδάκρυτος -παῖς, ἡγησίλεω δῶμʼ Ἄϊδος κατέβη. - -
-
- - -Anonymi Epigrammatici - - -εἶχε κορωνοβόλον πενίης λιμηρὸν Ἀρίστων -ὄργανον, ᾧ πτηνὰς ἠκροβόλιζε χένας, -ἦκα παραστείχων δολίην ὁδόν, οἷος ἐκείνας -ψεύσασθαι λοξοῖς ὄμμασι φερβομένας. -νῦν δʼ ὁ μὲν εἰν ἀίδῃ· τὸ δὲ οἱ βέλος ὀρφανὸν ἤχου -καὶ χερός· ἡ δʼ ἄγρη τύμβον ὑπερπέταται. -
-
- - -Julius leonidas - - -τὰν στάλαν ἐχάραξε Βιάνωρ οὐκ ἐπὶ ματρί, -οὐδʼ ἐπὶ τῷ γενέτᾳ, πότμον ὀφειλόμενον, -παρθενικᾷ δʼ ἐπὶ παιδί· κατέστενε δʼ, οὐχ Ὑμεναίῳ, -ἀλλʼ Ἀίδᾳ νύμφαν δωδεκέτιν κατάγων. -
-
- - -Julius leonidas - - - - - -τίς Δαίμων Ἀργεῖος ἐπʼ ἠρίῳ; ἆρα σύναιμος -ἐστὶ Δικαιοτέλους; ἐστὶ Δικαιοτέλους. - - - -ἠχὼ τοῦτʼ ἐλάλησε πανύστατον, ἢ τόδʼ ἀληθές, -κεῖνος ὅδʼ ἐστὶν ἀνήρ; κεῖνος ὅδʼ ἐστὶν ἀνήρ. -
-
- - -Julius leonidas - - -Πέτρος ἔτʼ ἐν Σιπύλῳ Νιόβη θρήνοις ἀναλύζει -ἑπτὰ δὶς ὠδίνων δυρομένη θάνατον -λήξει δʼ οὐδʼ αἰῶνι γόου. τί δʼ ἀλαζόνα μῦθον -φθέγξατο, τὸν ζωῆς ἅρπαγα καὶ τεκέων ; - -
-
- - -Julius leonidas - - -Ναυηγὸς γλαυκοῖο φυγὼν Τρίτωνος ἀπειλὰς -Ἀνθεὺς Φθιώτην οὐ φύγεν αἰνόλυκον· -Πηνειοῦ παρὰ χῦμα γὰρ ὤλετο. φεῦ τάλαν ὅστις -Νηρεΐδων Νύμφας ἔσχεν ἀπιστοτέρας. -
-
- - -Agathias Scholasticus - - -Λητόιος καὶ Παῦλος ἀδελφεὼ ἄμφω ἐόντε -ξυνὴν μὲν βιότου συζυγίην ἐχέτην, -ξυνὰ δὲ καὶ Μοίρης λαχέτην λίνα, καὶ παρὰ θῖνα -Βοσπορίην ξυνὴν ἀμφεβάλοντο κόνιν. -οὐδὲ γὰρ ἀλλήλοιν ζώειν ἀπάνευθε δυνάσθην, -ἀλλὰ συνετρεχέτην καὶ παρὰ Φερσεφόνην. -χαίρετον ὦ γλυκερὼ καὶ ὁμόφρονε· σήματι δʼ ὑμέων -ὤφελεν ἱδρῦσθαι βωμὸς Ὁμοφροσύνης. -
-
- - -Agathias Scholasticus - - - - ὦ ξένε, τί κλαίεις; διὰ σὸν μόρον. οἶσθα τίς εἰμι; - - οὐ μὰ τὸν ἀλλʼ ἔμπης οἰκτρὸν ὁρῶ τὸ τέλος. -ἐσσὶ δὲ τίς; Περίκλεια. γυνὴ τίνος; ἀνδρὸς ἀρίστου, -ῥήτορος, ἐξ Ἀσίης, οὔνομα Μεμνονίου. - - πῶς δέ σε Βοσπορίη κατέχει κόνις; εἴρεο μοῖραν, -ἥ μοι τῆλε πάτρης ξεῖνον ἔδωκε τάφον. - - παῖδα λίπες ; τριέτηρον, ὃς ἐν μεγάροισιν ἀλύων -ἐκδέχεται μαζῶν ἡμετέρων σταγόνα. - - αἴθε καλῶς ζώοι. ναί, ναί, φίλος, εὔχεο κείνῳ, -ὄφρα μοι ἡβήσας δάκρυ φίλον σταλάοι. - -
-
- - -Damascius - - -Ζωσίμη, ἡ πρὶν ἐοῦσα μόνῳ τῷ σώματι δούλη, -καὶ τῷ σώματι νῦν εὗρεν ἐλευθερίην. -
-
- - -Philippus - - -Λατύπος Ἀρχιτέλης Ἀγαθάνορι παιδὶ θανόντι -χερσὶν ὀιζυραῖς ἡρμολόγησε τάφον, -αἰαῖ, πέτρον ἐκεῖνον, ὃν οὐκ ἐκόλαψε σίδηρος, -ἀλλʼ ἐτάκη πυκινοῖς δάκρυσι τεγγόμενος.. -φεῦ, στήλη φθιμένῳ κούφη μένε, κεῖνος ἵνʼ εἴπῃ· - - ὄντως πατρῴη χεὶρ ἐπέθηκε λίθον. - -
-
- - -Joannes barbucallus - - -ἐς πόσιν ἀθρήσασα παρʼ ἐσχατίης λίνα μοίρης -ᾔνεσα καὶ χθονίους, ᾔνεσα καὶ ζυγίους· -τοὺς μὲν, ὅτι ζωὸν λίπον ἀνέρα· τοὺς δʼ, ὅτι τοῖον. -ἀλλὰ πατήρ μίμνοι παισὶν ἐφʼ ἡμετέροις. -
-
- - -Joannes barbucallus - - -τοῦτο σαοφροσύνας ἀντάξιον εὕρεο, Νοστώ· -δάκρυά σοι γαμέτας σπεῖσε καταφθιμένᾳ. -
-
- - -Theodorus - - -νηλειὴς Ἀίδης· ἐπὶ σοὶ δʼ ἐγέλασσε θανόντι, -Τίτυρε, καὶ νεκύων θῆκέ σε μιμολόγον. -
-
- - -Flavius Cyrus - - -τρεῖς ἐτέων δεκάδες, Μαίης χρόνος· ἐς τρία δʼ ἄλλα -ἔτρεχεν, ἀλλʼ Ἀίδης πικρὸν ἔπεμψε βέλος· -θηλυτέρην δʼ ἥρπαξε ῥόδων καλύκεσσιν ὁμοίην, -πάντʼ ἀπομαξαμένην ἔργα τὰ Πηνελόπης. - -
-
- - -Anonymi Epigrammatici - - -ᾌδης μὲν σύλησεν ἐμῆς νεότητος ὀπώρην, -κρύψε δὲ παππῴῳ μνήματι τῷδε λίθος. -οὔνομα Ῥουφῖνος γενόμην, παῖς Αἰθερίοιο, -μητρὸς δʼ ἐξ Ἀγάθης· ἀλλὰ μάτην γενόμην. -ἐς γὰρ ἄκρον μούσης τε καὶ ἥβης ἧκον ἐλάσσας, -φεῦ, σοφὸς εἰς ἀίδην, καὶ νέος εἰς ἔρεβος. -κώκυε καὶ σὺ βλέπων τάδε γράμματα μακρόν, ὁδῖτα· -δὴ γὰρ ἔφυς ζῳῶν ἢ πάις ἠὲ πατήρ. -
-
- - -Theosebeia - - -εἶδεν Ἀκεστορίη τρία πένθεα· κείρατο χαίτην -πρῶτον ἐφʼ Ἱπποκράτει, καὶ δεύτερον ἀμφὶ Γαληνῷ· -καὶ νῦν Ἀβλαβίου γοερῷ περὶ σήματι κεῖται, -αἰδομένη μετὰ κεῖνον ἐν ἀνθρώποισι φανῆναι. -
-
- - -Paulus Silentiarius - - -εἰ καὶ ἐπὶ ξείνης σε, Λεόντιε, γαῖα καλύπτει, -εἰ καὶ ἐρικλαύτων τῆλʼ ἔθανες γονέων, -πολλά σοι ἐκ βλεφάρων ἐχύθη περιτύμβια φωτῶν -δάκρυα, δυστλήτῳ πένθεϊ δαπτομένων. -πᾶσι γὰρ ἦσθα λίην πεφιλημένος, οἷά τε πάντων -ξυνὸς ἐὼν κοῦρος, ξυνὸς ἐὼν ἕταρος. -αἰαῖ, λευγαλέη καὶ ἀμείλιχος ἔπλετο Μοῖρα, -μηδὲ τεῆς ἥβης, δύσμορε, φεισαμένη. -
-
- - -Julianus - - -ἡ Φύσις ὠδίνασα πολὺν χρόνον ἀνέρʼ ἔτικτεν -ἄξιον εἰς ἀρετὴν τῶν προτέρων ἐτέων, - -τὸν Κρατερὸν σοφίην τε καὶ οὔνομα, τὸν καὶ ἀνιγροῖς -κινήσαντα γόῳ δάκρυον ἀντιπάλοις. -εἰ δὲ νέος τέθνηκεν, ὑπέρτερα νήματα Μοίρης -μέμφεο, βουλομένης κόσμον ἄκοσμον ἔχειν. -
-
- - -Julianus - - -ὦ φθέγμα Κρατεροῖο, τί σοι πλέον εἴ γε καὶ αὐδῆς -ἔπλεο καὶ σιγῆς αἴτιον ἀντιπάλοις; -ζῶντος μὲν γὰρ ἅπαντες ἐφώνεον· ἐκ δὲ τελευτῆς -ὑμετέρης ἰδίην αὖθις ἔδησαν ὄπα. -οὔτις γὰρ μετὰ σεῖο μόρον τέτληκε τανύσσαι -ὦτα λόγοις· κρατερῷ δʼ ἓν τέλος ἠδὲ λόγοις. -
-
- - -Paulus Silentiarius - - -σιγᾷς Χρυσεόμαλλε τὸ χάλκεον, οὐκέτι δʼ ἡμῖν -εἰκόνας ἀρχεγόνων ἐκτελέεις μερόπων -νεύμασιν ἀφθόγγοισι· τεὴ δʼ, ὄλβιστε, σιωπὴ -νῦν στυγερὴ τελέθει, τῇ πρὶν ἐθελγόμεθα. -
-
- - -Anonymi Epigrammatici - - -τῇδὲ ποτʼ ἀκτερέιστον ἐδέξατο γαῖα χανοῦσα -Λαοδίκην, δηΐων ὕβριν ἀλευομένην. -σῆμα δʼ ἀμαλδύναντος ἀνωίστοιο χρόνοιο, -Μάξιμος ἔκδηλον θῆκʼ Ἀσίης ὕπατος, -καὶ κούρης χάλκειον ἐπεὶ τύπον ἐφράσατʼ ἄλλῃ -κείμενον ἀκλειῶς, τῷδʼ ἐπέθηκε κύκλῳ. - -
-
- - -Julianus - - -αὐτὴν Θειοδότην ὁ ζωγράφος. αἴθε δὲ τέχνης -ἤμβροτε, καὶ λήθην δῶκεν ὀδυρομένοις. -
-
- - -Macedonius II - - -γαῖα, καὶ Εἰλείθυια, σὺ μὲν τέκες, ἡ δὲ καλύπτεις· -χαίρετον ἀμφοτέρας ἤνυσα τὸ στάδιον. -εἶμι δέ, μὴ νοέων πόθι νίσομαι· οὐδὲ γὰρ ὑμέας -ἢ τίνος ἢ τίς ἐὼν οἶδα πόθεν μετέβην. -
-
- - -Agathias Scholasticus - - -Κανδαύλου τόδε σῆμα· δίκη δʼ ἐμὸν οἶτον ἰδοῦσα -οὐδὲν ἀλιτραίνειν τὴν παράκοιτιν ἔφη. -ἤθελε γὰρ δισσοῖσιν ὑπʼ ἀνδράσι μηδὲ φανῆναι, -ἀλλʼ ἢ τὸν πρὶν ἔχειν, ἢ τὸν ἐπιστάμενον. -χρῆν ἄρα Κανδαύλην παθέειν κακὸν οὐ γὰρ ἂν ἔτλη -δεῖξαι τὴν ἰδίην ὄμμασιν ἀλλοτρίοις. -
-
- - -Agathias Scholasticus - - -ἑπτά με δὶς λυκάβαντας ἔχουσαν ἀφήρπασε δαίμων, -ἣν μούνην Διδύμῳ πατρὶ Θάλεια τέκεν. -ἆ Μοῖραι, τί τοσοῦτον ἀπηνέες, οὐδʼ ἐπὶ παστοὺς -ἠγάγετʼ οὐδʼ ἐρατῆς ἔργα τεκνοσπορίης; -οἱ μὲν γὰρ γονέες με γαμήλιον εἰς Ὑμέναιον -μέλλον ἄγειν στυγεροῦ δʼ εἰς Ἀχέροντος ἔβην. -ἀλλὰ θεοί, λίτομαι, μητρός γε γόους πατέρος τε -παύσατε, τηκομένων εἵνεκʼ ἐμεῦ φθιμένης. - -
-
- - -Agathias Scholasticus - - -ναὶ λίτομαι, παροδῖτα, φίλῳ κατάλεξον ἀκοίτῃ, -εὖτʼ ἂν ἐμὴν λεύσσῃς πατρίδα Θεσσαλίην -“ κάτθανε σὴ παράκοιτις, ἔχει δέ μιν ἐν χθονὶ τύμβος, - αἰαῖ, Βοσπορίης ἐγγύθεν ἠιόνος· -ἀλλά μοι αὐτόθι τεῦχε κενήριον ἐγγύθι σεῖο, -ὄφρʼ ἀναμιμνῄσκῃ τῆς ποτε κουριδίης.” -
-
- - -Anonymi Epigrammatici - - -Δουλκίτιον μὲν ἄνακτες ἄκρον βιότοιο πρὸς ὄλβον -ἤγαγον ἐξ ἀρετῆς καὶ κλέος ἀνθυπάτων -ὡς δὲ Φύσις μιν ἔλυσεν ἀπὸ χθονός, ἀθάνατοι μὲν -αὐτὸν ἔχουσι θεοί, σῶμα δὲ σηκὸς ὅδε. -
-
- - -Leontius Minotaurus - - -Ὀρφέος οἰχομένου, τάχα τις τότε λείπετο Μοῦσα· -σεῦ δέ, Πλάτων, φθιμένου, παύσατο καὶ κιθάρη· -ἦν γὰρ ἔτι προτέρων μελέων ὀλίγη τις ἀπορρὼξ -ἐν σαῖς σῳζομένη καὶ φρεσὶ καὶ παλάμαις. -
-
- - -Agathias Scholasticus - - -οὐχ ὁσίοις λεχέεσσιν ἐτέρπετο λάθριος ἀνήρ, -λέκτρον ὑποκλέπτων ἀλλοτρίης ἀλόχου· -ἐξαπίνης δὲ δόμων ὀροφὴ πέσε, τοὺς δὲ κακούργους -ἔσκεπεν, ἀλλήλοις εἰσέτι μισγομένους. -ξυνὴ δʼ ἀμφοτέρους κατέχει παγίς· εἰν ἑνὶ δʼ ἄμφω -κεῖνται, συζυγίης οὐκέτι παυόμενοι. - -
-
- - -Leontius Minotaurus - - -Χειρεδίου τόδε σῆμα, τὸν ἔτρεφεν Ἀτθὶς ἄρουρα -εἰκόνα ῥητήρων τῆς προτέρης δεκάδος, -ῥηιδίως πείθοντα δικασπόλον· ἀλλὰ δικάζων -οὔποτε τῆς ὀρθῆς οὐδʼ ὅσον ἐτράπετο. -
-
- - -Agathias Scholasticus - - -θεσμοὶ μὲν μεμέληντο συνήθεες Ἀγαθονίκῳ· -μοῖρα δὲ δειμαίνειν οὐ δεδάηκε νόμους· -ἀλλά μιν ἁρπάξασα σοφῶν ἤμερσε θεμίστων, -οὔπω τῆς νομίμης ἔμπλεον ἡλικίης. -οἰκτρὰ δʼ ὑπὲρ τύμβοιο κατεστονάχησαν ἑταῖροι -κείμενον, οὗ θιάσου κόσμον ὀδυρόμενοι· -ἡ δὲ κόμην τίλλουσα γόῳ πληκτίζετο μήτηρ, -αἰαῖ, τὸν λαγόνων μόχθον ἐπισταμένη. -ἔμπης ὄλβιος οὗτος, ὃς ἐν νεότητι μαρανθεὶς -ἔκφυγε τὴν βιότου θᾶσσον ἀλιτροσύνην. -
-
- - -Leontius Minotaurus - - -σῆμα Ῥόδης· Τυρίη δὲ γυνὴ πέλεν ἀντὶ δὲ πάτρης -ἵκετο τήνδε πόλιν, κηδομένη τεκέων. -αὕτη ἀειμνήστοιο λέχος κόσμησε Γεμέλλου, -ὃς πάρος εὐνομίης ἴδμονα θῆκε πόλιν. -γρηῢς μὲν μόρον εὗρεν, ὄφελλε δὲ μυρία κύκλα -ζώειν τῶν ἀγαθῶν οὐ δεχόμεσθα κόρον. -
-
- - -Julianus - - - - κάτθανες, ὦ Πύρρων; ἐπέχω. πυμάτην μετὰ μοῖραν -φὴς ἐπέχειν; ἐπέχω. σκέψιν ἔπαυσε τάφος. - -
-
- - -Julianus - - -ὅστις με τριόδοισι μέσαις τάρχυσε θανόντα, -λυγρὰ παθὼν τύμβου μηδʼ ὀλίγοιο τύχοι, -πάντες ἐπεὶ Τίμωνα νέκυν πατέουσιν ὁδῖται, -καὶ μόρος ἄμμι μόνοις ἄμμορος ἡσυχίης. -
-
- - -Agathias Scholasticus - - -τὸν κρατερὸν Πανοπῆα, τὸν ἀγρευτῆρα λεόντων, -τὸν λασιοστέρνων παίγνια παρδαλίων, -τύμβος ἔχει· γλαφυρῆς γὰρ ἀπὸ χθονὸς ἔκτανε δεινὸς -σκορπίος, οὐτήσας ταρσὸν ὀρεσσιβάτην. -αἰγανέη δὲ τάλαινα σίγυνά τε πὰρ χθονὶ κεῖται, -αἰαῖ, θαρσαλέων παίγνια δορκαλίδων. -
-
- - -Leontius Minotaurus - - -Πέτρου ὁρᾷς ῥητῆρος ἀεὶ γελόωσαν ὀπωπήν, -ἐξόχου εἰν ἀγοραῖς, ἐξόχου. ἐν φιλίῃ. -ἐν δὲ Διωνύσου θηεύμενος ὤλετο μοῦνος, -ὑψόθεν ἐκ τέγεος σὺν πλεόνεσσι πεσών, -βαιὸν ἐπιζήσας, ὅσον ἤρκεσε. τοῦτον ἔγωγε -ἄγριον οὐ καλέω, τὸν δὲ φύσει θάνατον. -
-
- - -Julianus - - -οὔποτέ με κρύψεις ὑπὸ πυθμένα νείατον αἴης -τόσσον, ὅσον κρύψαι πάνσκοπον ὄμμα Δίκης. -
-
- - -Julianus - - -ἀντὶ φόνου τάφον ἄμμι χαρίζεαι, ἀλλὰ καὶ αὐτὸς -ἴσων ἀντιτύχοις οὐρανόθεν χαρίτων. - -
-
- - -Julianus - - -χαῖρέ μοι, ὦ ναυηγέ, καὶ εἰς Ἀίδαο περήσας -μέμφεο μὴ πόντου κύμασιν, ἀλλʼ ἀνέμοις. -κεῖνοι μὲν ς1ʼ ἐδάμασσαν ἁλὸς δέ σε μείλιχον ὕδωρ -ἐς χθόνα καὶ πατέρων ἐξεκύλισε τάφους. -
-
- - -Agathias Scholasticus - - -Ἀβάλε μηδʼ ἐγένοντο γάμοι, μὴ νύμφια λέκτρα· -οὐ γὰρ ἂν ὠδίνων ἐξεφάνη πρόφασις. -νῦν δʼ ἡ μὲν τριτάλαινα γυνὴ τίκτουσα κάθηται, -γαστρὶ δὲ δυσκόλπῳ νεκρὸν ἔνεστι τέκος· -τρισσὴ δʼ ἀμφιλύκη δρόμον ἤνυσεν, ἐξότε μίμνει -τὸ βρέφος ἀπρήκτοις ἐλπίσι τικτόμενον. -κούφη σοὶ τελέθει γαστήρ, τέκος, ἀντὶ κονίης· -αὕτη γάρ σε φέρει, καὶ χθονὸς οὐ χατέεις. -
-
- - -Julianus - - -Πλώεις ναυηγόν με λαβὼν καὶ σήματι χώσας ; -πλῶε, Μαλειάων ἄκρα φυλασσόμενος· -αἰεὶ δʼ εὐπλοΐην μεθέποις φίλος· ἢν δέ τι ῥέξῃ -ἄλλο Τύχη, τούτων ἀντιάσαις χαρίτων. -
-
- - -Julianus - - -Μύγδων τέρμα βίοιο λαχὼν, αὐτόστολος ἦλθεν -εἰς ἀίδην, νεκύων πορθμίδος οὐ χατέων. -ἣν γὰρ ἔχε ζώων βιοδώτορα, μάρτυρα μόχθων, -ἄγραις εἰναλίαις πολλάκι βριθομένην, - -τήνδε καὶ ἐν θανάτῳ λάχε σύνδρομον, εὖτε τελευτὴν -εὕρετο συλλήξας ὁλκάδι καιομένῃ. -οὕτω πιστὸν ἄνακτι πέλεν σκάφος, οἶκον ἀέξον -Μύγδονι, καὶ σύμπλουν ἐς βίον, ἐς θάνατον, -
-
- - -Julianus - - -οὔτι σε πόντος ὄλεσσε καὶ οὐ πνείοντες ἀῆται, -ἀλλʼ ἀκόρητος ἔρως φοιτάδος ἐμπορίης. -εἴη μοι γαίης ὀλίγος βίος· ἐκ δὲ θαλάσσης -ἄλλοισιν μελέτω κέρδος ἀελλομάχον. -
-
- - -Julianus - - - -χθών σε τέκεν, πόντος δὲ διώλεσε, δέκτο δὲ θῶκος -Πλουτῆος· κεῖθεν δʼ οὐρανὸν εἰσανέβης. -οὐχ ὡς ναυηγὸς δὲ βυθῷ θάνες, ἀλλʼ ἵνα πάντων -κλήροις ἀθανάτων, Πάμφιλε, κόσμον ἄγῃς. -
-
- - -Paulus Silentiarius - - -Δαμόχαρις Μοίρης πυμάτην ὑπεδύσατο σιγήν. -φεῦ· τὸ καλὸν Μούσης βάρβιτον ἠρεμέει· -ὤλετο γραμματικῆς ἱερὴ βάσις. ἀμφιρύτη Κῶς, -καὶ πάλι πένθος ἔχεις οἷον ἐφʼ Ἱπποκράτει. -
-
- - -Agathias Scholasticus - - -μηδὲν ἀπαγγείλειας ἐς Ἀντιόχειαν, ὁδῖτα, -μὴ πάλιν οἰμώξῃ χεύματα Κασταλίης, - -οὕνεκεν ἐξαπίνης Εὐστόργιος ἔλλιπε μοῦσαν, -θεσμῶν τʼ Αὐσονίων ἐλπίδα μαψιδέην, -ἑβδόματον δέκατόν τε λαχὼν ἔτος· ἐς δὲ κονίην -ἠμείφθη κενεὴν εὔσταχυς ἡλικίη. -καὶ τὸν μὲν κατέχει χθόνιος τάφος· ἀντὶ δʼ ἐκείνου -οὔνομα καὶ γραφίδων χρώματα δερκόμεθα. -
-
- - -Julianus - - - - κλεινὸς Ἰωάννης. θνητός, λέγε. γαμβρὸς ἀνάσσης. - - θνητὸς ὅμως. γενεῆς ἄνθος Ἀναστασίου. - - θνητοῦ κἀκείνου. βίον ἔνδικος. οὐκέτι τοῦτο -θνητὸν ἔφης· ἀρεταὶ κρείσσονές εἰσι μόρου. -
-
- - -Julianus - - -Ὑπατίου τάφος εἰμί· νέκυν δʼ οὔ φημι καλύπτειν -τόσσου τόσσος ἐὼν Αὐσονίων προμάχου· -γαῖα γὰρ αἰδομένη λιτῷ μέγαν ἀνέρα χῶσαι -σήματι, τῷ πόντῳ μᾶλλον ἔδωκεν ἔχειν. -
-
- - -Julianus - - -αὐτὸς ἄναξ νεμέσησε πολυφλοίσβοισι θαλάσσης -κύμασιν, Ὑπατίου σῶμα καλυψαμένοις· -ἤθελε γάρ μιν ἔχειν γέρας ὕστατον, οἷα θανόντα, -καὶ μεγαλοφροσύνης κρύψε θάλασσα χάριν. -ἔνθεν, πρηϋνόου κραδίης μέγα δεῖγμα, φαεινὸν -τίμησεν σήματι σήματι τῷδε νέκυν. - -
-
- - -Agathias Scholasticus - - -τὰν πάρος ἀνθήσασαν ἐν ἀγλαΐᾳ καὶ ἀοιδᾷ, -τὰν πολυκυδίστου μνάμονα θεσμοσύνας, -Εὐγενίαν κρύπτει χθονία κόνις· αἱ δʼ ἐπὶ τύμβῳ -κείραντο πλοκάμους Μοῦσα, Θέμις, Παφίη. -
-
- - -Julianus - - -μνῆμα σόν, ὦ Θεόδωρε, πανατρεκές, οὐκ ἐπὶ τύμβῳ, -ἀλλʼ ἐνὶ βιβλιακῶν μυριάσιν σελίδων, -αἷσιν ἀνεζώγρησας ἀπολλυμένων, ἀπὸ λήθης -ἁρπάξας, νοερῶν μόχθον ἀοιδοπόλων. -
-
- - -Julianus - - -κάτθανε μὲν Θεόδωρος· ἀοιδοπόλων δὲ παλαιῶν -πληθὺς οἰχομένη νῦν θάνεν ἀτρεκέως. -πᾶσα γὰρ ἐμπνείοντι συνέπνεε, πᾶσα δʼ ἀπέσβη -σβεννυμένου· κρύφθη δʼ εἰν ἑνὶ πάντα τάφῳ. -
-
- - -Agathias Scholasticus - - -ναὶ μὰ τὸν ἐν γαίῃ πύματον δρόμον, οὔτε μʼ ἄκοιτις -ἔστυγεν, οὔτʼ αὐτὸς Θεύδοτος Εὐγενίης -ἐχθρὸς ἑκὼν γενόμην ἀλλὰ φθόνος ἠέ τις ἄτη -ἡμέας ἐς τόσσην ἤγαγεν ἀμπλακίην. -νῦν δʼ ἐπὶ Μινῴην καθαρὴν κρηπῖδα μολόντες -ἀμφότεροι λευκὴν ψῆφον ἐδεξάμεθα. - -
-
- - -Julianus - - -ἡ γλυκερὸν μέλψασα καὶ ἄλκιμον, ἡ θρόον αὐδῆς -μούνη θηλυτέρης στήθεσι ῥηξαμένη, -κεῖται σιγαλέη· τόσον ἔσθενε νήματα Μοίρης, -ὡς λιγυρὰ κλεῖσαι χείλεα Καλλιόπης. -
-
- - -Julianus - - -οὔτε φύσις θήλεια, καὶ οὐ πολιοῖο καρήνου -ἀδρανίη φωνῆς σῆς κατέλυσε βίην -ἀλλὰ μόλις ξυνοῖσι νόμοις εἴξασα τελευτῆς, -φεῦ, φεῦ, Καλλιόπη, σὴν κατέλυσας ὄπα. -
-
- - -Julianus - - -οὔνομα μὲν Κάλη, φρεσὶ δὲ πλέον ἠὲ προσώπῳ, -κάτθανε· φεῦ, Χαρίτων ἐξαπόλωλεν ἔαρ. -καὶ γὰρ ἔην Παφίῃ πανομοίιος, ἀλλὰ συνεύνῳ -μούνῳ· τοῖς δʼ ἑτέροις Παλλὰς ἐρυμνοτάτη. -τίς λίθος οὐκ ἐγόησεν, ὅτʼ ἐξήρπαξεν ἐκείνην -εὐρυβίης Ἀίδης ἀνδρὸς ἀπʼ ἀγκαλίδων ; -
-
- - -Julianus - - -ὥριος εἷχέ σε παστάς, ἀώριος εἷλέ σε τύμβος, -εὐθαλέων Χαρίτων ἄνθος, Ἀναστασίη. -σοὶ γενέτης, σοὶ πικρὰ πόσις κατὰ δάκρυα λείβει, -σοὶ τάχα καὶ πορθμεὺς δακρυχέει νεκύων -οὐ γὰρ ὅλον λυκάβαντα διήνυσας ἄγχι συνεύνου, -ἀλλʼ ἑκκαιδεκέτιν, φεῦ, κατέχει σε τάφος. - -
-
- - -Julianus - - -φεῦ, φεῦ, ἀμετρήτων χαρίτων ἔαρ ἡδὺ μαραίνει -ἀμφὶ σοὶ ὠμοφάγων χεῖμα τὸ νερτερίων. -καὶ σὲ μὲν ἥρπασε τύμβος ἀπʼ ἠελιώτιδος αἴγλης, -πέμπτον ἐφʼ ἑνδεκάτῳ πικρὸν ἄγουσαν ἔτος, -σὸν δὲ πόσιν γενέτην τε κακαῖς ἀλάωσεν ἀνίαις, -οἷς πλέον ἠελίου λάμπες, Ἀναστασίη. -
-
- - -Agathias Scholasticus - - -Εὐστάθιε, γλυκερὸν μὲν ἔχεις τύπον ἀλλά σε κηρὸν -δέρκομαι, οὐδʼ ἔτι σοι κεῖνο τὸ λαρὸν ἔπος -ἕζεται ἐν στομάτεσσι· τεὴ δʼ εὐάνθεμος ἥβη, -αἰαῖ, μαψιδίη νῦν χθονός ἐστι κόνις. -πέμπτου καὶ δεκάτου γὰρ ἐπιψαύσας ἐνιαυτοῦ -τετράκις ἓξ μούνους ἔδρακες ἠελίους· -οὐδὲ τεοῦ πάππου θρόνος ἤρκεσεν, οὐ γενετῆρος -ὄλβος. πᾶς δὲ τεὴν εἰκόνα δερκόμενος -τὴν ἄδικον Μοῖραν καταμέμφεται, οὕνεκα τοίην, -ἆ μέγα νηλειής, ἔσβεσεν ἀγλαΐην. -
-
- - -Julianus - - - - ἄγριός ἐστι Χάρων. πλέον ἤπιος. ἥρπασεν ἤδη -τὸν νέον. ἀλλὰ νόῳ τοῖς πολιοῖσιν ἴσον. - - τερπωλῆς δʼ ἀπέπαυσεν. Ἀπεστυφέλιξε δὲ μόχθων. - - οὐκ ἐνόησε γάμους. οὐδὲ γάμων ὀδύνας. - -
-
- - -Paulus Silentiarius - - -λέκτρα σοι ἀντὶ γάμων ἐπιτύμβια, παρθένε κούρη, -ἐστόρεσαν παλάμαις πενθαλέαις γενέται. -καὶ σὺ μὲν ἀμπλακίας βιότου καὶ μόχθον Ἐλευθοῦς -ἔκφυγες· οἱ δὲ γόων πικρὸν ἔχουσι νέφος. -δωδεκέτιν γὰρ μοῖρα, Μακηδονίη, σε καλύπτει, -κάλλεσιν ὁπλοτέρην, ἤθεσι γηραλέην. -
-
- - -Julianus - - -σοὶ σορὸν εὐλάιγγα, Ῥοδοῖ, καὶ τύμβον ἐγείρει, -ῥύσιά τε ψυχῆς δῶρα πένησι νέμει, -ἀντʼ εὐεργεσίης γλυκερὸς πόσις· ὅττι θανοῦσα -ὠκύμορος κείνῳ δῶκας ἐλευθερίην. -
-
- - -Paulus Silentiarius - - -Πρηΰς, ἐλευθερίην ἐπιειμένος, ἡδὺς ἰδέσθαι, -ἐν βιότῳ προλιπὼν υἱέα γηροκόμον, -τύμβον ἔχει Θεόδωρος ἐπʼ ἐλπίδι κρέσσονι μοίρης, -ὄλβιος ἐν καμάτοις, ὄλβιος ἐν θανάτῳ. -
-
- - -Palladas - - -Ψυλλὼ πρεσβυγενὴς τοῖς κληρονόμοις φθονέσασα, -αὐτὴ κληρονόμος τῶν ἰδίων γέγονεν -ἁλλομένη δὲ τάχος κατέβη δόμον εἰς Ἀίδαο, -ταῖς δαπάναις τὸ ζῆν σύμμετρον εὑρομένη. -πάντα φαγοῦσα βίον συναπώλετο ταῖς δαπάναισιν -ἥλατο δʼ εἰς ἀίδην, ὡς ἀπεκερμάτισεν, - -
-
- - -Eutolmius - - -υἱέος ὠκυμόρου θάνατον πενθοῦσα Μενίππη -κωκυτῷ μεγάλῳ πνεῦμα συνεξέχεεν, -οὐδʼ ἔσχεν παλίνορσον ἀναπνεύσασα γοῆσαι· -ἀλλʼ ἅμα καὶ θρήνου παύσατο καὶ βιότου. -
-
- - -Paulus Silentiarius - - -Ἀττικὸς ἐς ξυνήν με παναγρέος ἐλπίδα Μοίρης -θυμῷ θαρσαλέῳ ζῶν ἐλάχηνε τάφον, -παίζων ἐξ ἀρετῆς θανάτου φόβον. ἀλλʼ ἐπὶ δηρὸν -ἠέλιος σοφίης μιμνέτω ἠελίῳ. -
-
- - -Palladas - - -ἥρπασέ τις νύμφην, καὶ τὸν γάμον ἥρπασε δαίμων, -ψυχῶν συλήσας τερπομένην ἀγέλην. -εἷς γάμος εἰκοσιπέντε τάφους ἔπλησε θανόντων. -πάνδημος δὲ νεκρὼν εἷς γέγονεν θάλαμος. -νύμφη Πενθεσίλεια πολύστονε, νυμφίε Πενθεῦ, -ἀμφοτέρων ὁ γάμος πλούσιος ἐν θανάτοις. -
-
- - -Eutolmius - - -παρθενικὴν Ἑλένην μετʼ ἀδελφεὸν ἄρτι θανόντα -δειλαίη μήτηρ κόψατο διπλασίως. -μνηστῆρες δʼ ἐγόησαν ἴσον γόον ἦν γὰρ ἑκάστῳ -θρηνεῖν τὴν μήπω μηδενὸς ὡς ἰδίην. - -
-
- - -Agathias Scholasticus - - -φεῦ, φεῦ, τὴν δεκάτην Ἑλικωνίδα, τὴν λυραοιδὸν -Ῥώμης καὶ Φαρίης, ἥδε κέκευθε κόνις. -ὤλετο φορμίγγων τερετίσματα, λῆξαν ἀοιδαί, -ὥσπερ Ἰωάννῃ πάντα συνολλύμενα. -καὶ τάχα θεσμὸν ἔθηκαν ἐπάξιον ἐννέα Μοῦσαι, -τύμβον Ἰωάννης ἀνθʼ Ἑλικῶνος ἔχειν. -
-
- - -Diogenes - - - -σοὶ τόδε, Διόγενες, θαλερῆς μνημήιον ἥβης -πόντῳ ἐν Εὐξείνῳ θήκατο Φρὺξ γενέτης, -φεῦ, πάτρης ἑκὰς ὅσσον. ἄγεν δέ σε νεῦμα Θεοῖο, -πατρὸς ἀδελφειῷ πένθος ὀφειλόμενον, -ὅς σε περιστείλας ἱερῇ παλάμῃ τε καὶ εὐχῇ -γείτονα τῆς μακάρων θῆκε χοροστασίης. -
-
- - -Agathias Scholasticus - - -Ἑλλανὶς τριμάκαιρα καὶ ἁ χαρίεσσα Λάμαξις -ἤστην μὲν πάτρας φέγγεα Λεσβιάδος· -ὅκκα δʼ Ἀθηναίῃσι σὺν ὁλκάσιν ἐνθάδε κέλσας -τὰν Μυτιληναίων γᾶν ἀλάπαξε Πάχης, -τᾶν κουρᾶν ἀδίκως ἠράσσατο, τὼς δὲ συνεύνως -ἔκτανεν, ὡς τήνας τῇδε βιησόμενος. -ταὶ δὲ κατʼ Αἰγαίοιο ῥόου πλατὺ λαῖτμα φερέσθην, -καὶ ποτὶ τὰν κραναὰν Μοψοπίαν δραμέτην -δάμῳ δʼ ἀγγελέτην ἀλιτήμονος ἔργα Πάχητος, -μέσφα μιν εἰς ὀλοὴν κῆρα συνηλασάτην.. - -τοῖα μὲν, ὦ κούρα, πεπονήκατον ἂψ δʼ ἐπὶ πάτραν -ἥκετον, ἐν δʼ αὐτᾷ κεῖσθον ἀποφθιμένα· -εὖ δὲ πόνων ἀπόνασθον, ἐπεὶ ποτὶ σᾶμα συνεύνων -εὕδετον, ἐς κλεινᾶς μνᾶμα σαοφροσύνας· -ὑμνεῦσιν δʼ ἔτι πάντες ὁμόφρονας ἡρωίνας, -πάτρας καὶ ποσίων πήματα τισαμένας. -
-
- - -Anonymi Epigrammatici - - -Εὐμόλπου φίλον υἱὸν ἔχει τὸ Φαληρικὸν οὖδας -Μουσαῖον, φθίμενον σῶμʼ ὑπὸ τῷδε τάφῳ. -
-
- - -Anonymi Epigrammatici - - -ὧδε Λίνον Θηβαῖον ἐδέξατο γαῖα θανόντα, -Μούσης Οὐρανίης υἱὸν ἐυστεφάνου. -
-
- - -Anonymi Epigrammatici - - -Θρήικα χρυσολύρην τῇδʼ Ὀρφέα Μοῦσαι ἔθαψαν, -ὃν κτάνεν ὑψιμέδων Ζεὺς ψολόεντι βέλει. -
-
- - -Anonymi Epigrammatici - - -ἄνδρα σοφὸν Κλεόβουλον ἀποφθίμενον καταπενθεῖ -ἥδε πάτρα Λίνδος πόντῳ ἀγαλλομένη. -
-
- - -Anonymi Epigrammatici - - -πλούτου καὶ σοφίης πρύτανιν πατρὶς ἥδε Κόρινθος -κόλποις ἀγχίαλος γῆ Περίανδρον ἔχει. - -
-
- - -Diogenes Laertius - - -μήποτε λυπήσῃ σε τὸ μή σε τυχεῖν τινος, ἀλλὰ -τέρπεο πᾶσιν ὁμῶς οἷσι δίδωσι θεός· -καὶ γὰρ ἀθυμήσας ὁ σοφὸς Περίανδρος ἀπέσβη, -οὕνεκεν οὐκ ἔτυχεν πρήξιος ἧς ἔθελεν. -
-
- - -Anonymi Epigrammatici - - -ἐνθάδʼ ἐγὼ Σοφοκλῆς στυγερὸν δόμον Ἄϊδος ἔσβην -κάμμορος, εἴδατι Σαρδῴῳ σελίνοιο γελάσκων. -ὣς μὲν ἐγών, ἕτεροι δʼ ἄλλως· πάντες δέ τε πάντως. -
-
- - -Antiphilus - - -Βόρχος ὁ βουποίμην ὅτʼ ἐπὶ γλυκὺ κηρίον εἷρπεν, -αἰγίλιπα σχοίνῳ πέτρον ἐπερχόμενος, -εἵπετό οἱ σκυλάκων τις ὁ καὶ βοσίν, ὃς φάγε λεπτὴν -σχοῖνον ἀνελκομένῳ χραινομένην μέλιτι· -κάππεσε δʼ εἰς Ἀίδαο· τὸ δʼ ἀτρυγὲς ἀνδράσιν ἄλλοις -κεῖνο μέλι ψυχῆς ὤνιον εἰρύσατο. -
-
- - -Aemilianus - - -ἕλκε, τάλαν, παρὰ μητρὸς ὃν οὐκέτι μαστὸν ἀμέλξεις· -ἕλκυσον ὑστάτιον νᾶμα καταφθιμένης· -ἤδη γὰρ ξιφέεσσι λιπόπνοος· ἀλλὰ τὰ μητρὸς -φίλτρα καὶ εἰν ἀίδῃ παιδοκομεῖν ἔμαθεν. - -
-
- - -Diodorus - - -ἔρροις, Ἰονίοιο πολυπτοίητε θάλασσα, -νηλὴς, Ἀίδεω πορθμὲ κελαινοτάτου, -ἣ τόσσους κατέδεξο. τίς ἂν τεά, κάμμορε, λέξαι -αἴσυλα, δυστήνων αἶσαν ὀπιζόμενος; -Αἰγέα καὶ Λαβέωνα σὺν ὠκυμόροισιν ἑταίροις -νηί τε σὺν πάσῃ βρύξας ἁλιρροθίῃ. -
-
- - -Antipater - - -εἰδότα κἠπʼ -Ἄτλαντα τεμεῖν πόρον, εἰδότα Κρήτης -κύματα καὶ Πόντου ναυτιλίην Μέλανος, -Καλλιγένευς Διόδωρον Ὀλύνθιον ἴσθι θανόντα -ἐν λιμένι, πρῴρης νύκτερον ἐκχύμενον, -δαιτὸς ἐκεῖ τὸ περισσὸν ὅτʼ ἤμεεν. ἆ πόσον ὕδωρ -ὤλεσε τὸν τόσσῳ κεκριμένον πελάγει. -
-
- - -Anonymi Epigrammatici - - -ἐσχατιαὶ Λιβύων Νασαμωνίδες, οὐκέτι θηρῶν -ἔθνεσιν ἠπείρου νῶτα βαρυνόμεναι, -ἠχοῖ ἐρημαίαισιν ἐπηπύσεσθε λεόντων -ὠρυγαῖς ψαμάθους ἄχρις ὑπὲρ Νομάδων, -φῦλον ἐπεὶ νήριθμον ἐν ἰχνοπέδαισιν ἀγρευθὲν -ἐς μίαν αἰχμηταῖς Καῖσαρ ἔθηκεν ὁ παῖς· -αἱ δὲ πρὶν ἀγραύλων ἐγκοιτάδες ἀκρώρειαι -θηρῶν, νῦν ἀνδρῶν εἰσὶ βοηλασίαι. - -
-
- - -Diodorus Zonas - - -ἡμιτελῆ θάλαμόν τε καὶ ἐγγύθι νυμφικὰ λέκτρα, -κοῦρε, λιπὼν ὀλοὴν οἶμον ἔβης Ἀίδου· -Θύνιον Ἀστακίην δὲ μάλʼ ἤκαχες, ἥ σε μάλιστα -οἰκτρὰ τὸν ἡβητὴν κώκυεν ἠίθεον, -Ἱππάρχου κλαίουσα κακὸν μόρον, εἴκοσι ποίας -μοῦνον ἐπεὶ βιότου πλήσαο καὶ πίσυρας. -
-
- - -Crinagoras - - -ἠρνήσαντο καὶ ἄλλαι ἑὸν πάρος οὔνομα νῆσοι -ἀκλεές, ἐς δʼ ἀνδρῶν ἦλθον ὁμωνυμίην· -κληθείητε καὶ ὔμμες Ἐρωτίδες· οὐ νέμεσίς τοι, -ὀξεῖαι, ταύτην κλῆσιν ἀμειψαμέναις. -παιδὶ γάρ, ὃν τύμβῳ Δίης ὑπεθήκατο βώλου, -οὔνομα καὶ μορφὴν αὐτὸς ἔδωκεν Ἔρως. -ὦ χθὼν σηματόεσσα, καὶ ἡ παρὰ θινὶ θάλασσα, -παιδὶ σὺ μὲν κούφη κεῖσο, σὺ δʼ ἡσυχίη. -
-
- - -Antipater - - -ἦ χθαμαλὴν ὑπέδυς ὁ τόσος κόνιν; εἰς σέ τις ἀθρῶν, -Σώκρατες, Ἑλλήνων μέμψεται ἀκρισίην· -νηλέες, οἳ τὸν ἄριστον ἀπώλεσαν, οὐδὲ ἓν αἰδοῖ -δόντες. τοιοῦτοι πολλάκι Κεκροπίδαι. -
-
- - -Antiphilus - - -ἤδη που πάτρης πελάσας σχεδόν, αὔριον, εἶπον, - - ἡ μακρὴ κατʼ ἐμοῦ δυσπλοΐη κοπάσει. - -οὔπω χεῖλος ἔμυσε, καὶ ἦν ἴσος Ἄϊδι πόντος, -καί με κατέτρυχεν κεῖνο τὸ κοῦφον ἔπος. -πάντα λόγον πεφύλαξο τὸν αὔριον· οὐδὲ τὰ μικρὰ -λήθει τὴν γλώσσης ἀντίπαλον Νέμεσιν. - -
-
- - -Apollonides - - - ἢν ἄρα Μιλήτου Φοιβήιον 〈ὅρμον〉 ἵκησθε, -λέξατε Διογένει πένθιμον ἀγγελίην, -παῖς ὅτι οἱ ναυηγὸς ὑπὸ χθονὶ κεύθεται Ἄνδρου -Δίφιλος, Αἰγαίου κῦμα πιὼν πελάγευς. -
-
- - -Diodorus - - -κλίμακος ἐξ ὀλίγης ὀλίγον βρέφος ἐν Διοδώρου -κάππεσεν, ἐκ δʼ ἐάγη καίριον ἀστράγαλον, -δινηθεὶς προκάρηνος. ἐπεὶ δʼ ἴδε θεῖον ἄνακτα -ἀντόμενον, παιδνὰς αὐτίκʼ ἔτεινε χέρας. -ἀλλὰ σὺ νηπιάχου δμωός, κόνι, μήποτε βρίθειν -ὀστέα, τοῦ διετοῦς φειδομένη Κόρακος. -
-
- - -Crinagoras - - -καὶ αὐτὴ ἤχλυσεν ἀκρέσπερος ἀντέλλουσα -μήνη, πένθος ἑὸν νυκτὶ καλυψαμένη, -οὕνεκα τὴν χαρίεσσαν ὁμώνυμον εἶδε Σελήνην -ἄπνουν εἰς ζοφερὸν δυομένην ἀίδην. -κείνῃ γὰρ καὶ κάλλος ἑοῦ κοινώσατο φωτὸς, -καὶ θάνατον κείνης μίξεν ἑῷ κνέφεϊ. -
-
- - -Antiphilus - - -Νεκροδόκον κλιντῆρα Φίλων ὁ πρέσβυς ἀείρων -ἐγκλιδόν, ὄφρα λάβοι μισθὸν ἐφημέριον, -σφάλματος ἐξ ὀλίγοιο πεσὼν θάνεν ἦν γὰρ ἕτοιμος -εἰς ἀίδην, ἐκάλει δʼ ἡ πολιὴ πρόφασιν -ὃν δʼ ἄλλοις ἐφόρει νεκυοστόλον, αὐτὸς ἐφʼ αὑτῷ -ἀσκάντην ὁ γέρων ἀχθοφορῶν ἔλαθεν. - -
-
- - -Antiphilus - - -ναῦν Ἱεροκλείδης ἔσχεν σύγγηρον, ὁμόπλουν, -τὴν αὐτὴν ζωῆς καὶ θανάτου σύνοδον, -πιστὴν ἰχθυβολεῦντι συνέμπορον. οὔτις ἐκείνης -πώποτʼ ἐπέπλωσεν κῦμα δικαιοτέρη· -γήραος ἄχρις ἔβοσκε πονευμένη· εἶτα θανόντα -ἐκτέρισεν· συνέπλω δʼ ἄχρι καὶ Ἀίδεω. -
-
- - -Crinagoras - - -ποιμὴν ὦ μάκαρ, εἴθε κατʼ οὔρεος ἐπροβάτευον -κἠγὼ, ποιηρὸν τοῦτʼ ἀνὰ λευκόλοφον, -κριοῖς ἁγητῆρσι ποτʼ ἐβληχημένα βάζων, -ἢ πικρῇ βάψαι νήοχα πηδάλια -ἅλμῃ. τοιγὰρ ἔδυν ὑποβένθιος· ἀμφὶ δὲ ταύτην -θῖνά με ῥοιβδήσας Εὖρος ἐφωρμίσατο. -
-
- - -Antipater - - -Πύρρος ὁ μουνερέτης ὀλίγῃ νηῒ λεπτὰ ματεύων -φυκία καὶ τριχίνης μαινίδας ἐκ καθέτης, -ἠιόνων ἀποτῆλε τυπεὶς κατέδουπε κεραυνῷ· -νηῦς δὲ πρὸς αἰγιαλοὺς ἔδραμεν αὐτομάτη -ἀγγελίην θείῳ καὶ λιγνύϊ μηνύουσα, -καὶ φράσαι Ἀργῴην οὐκ ἐπόθησε τρόπιν. -
-
- - -Crinagoras - - -παίδων ἀλλαχθέντι μόρῳ ἔπι τοῦτʼ ἐλεεινὴ -μήτηρ ἀμφοτέρους εἶπε περισχομένη· -“ καὶ νέκυν οὐ σέο, τέκνον, ἐπʼ ἤματι τῷδε γοήσειν - ἤλπισα, καὶ ζωοῖς οὐ σὲ μετεσσόμενον.ὄψεσθαι· -νῦν δʼ οἱ μὲν ἐς ὑμέας ἠμείφθησαν - δαίμονες, ἄψευστον δʼ ἵκετο πένθος ἐμοί.” - -
-
- - -Antipater - - -πᾶσα θάλασσα θάλασσα· τί Κυκλάδας στενὸν Ἕλλης -κῦμα καὶ Ὀξείας ἠλεὰ μεμφόμεθα; -ἄλλως τοὔνομʼ ἔχουσιν ἐπεὶ τί με, τὸν προφυγ́οντα -κεῖνα, Σκαρφαιεὺς ἀμφεκάλυψε λιμήν; -νόστιμον εὐπλοΐην ἀρῷτό τις· ὡς τά γε πόντου -πόντος, ὁ τυμβευθεὶς οἶδεν Ἀρισταγόρης. -
-
- - -Antipater - - -ῥιγηλὴ ναύταις ἐρίφων δύσις, ἀλλὰ Πύρωνι -πουλὺ γαληναίη χείματος ἐχθροτέρη· -νῆα γὰρ ἀπνοΐῃ πεπεδημένου ἔφθασε ναύταις -ληιστέων ταχινὴ δίκροτος ἐσσυμένη· -χεῖμα δέ μιν προφυγόντα γαληναίῳ ἐπʼ ὀλέθρῳ -ἔκτανον ἆ λυγρῆς δειλὲ καχορμισίης. -
-
- - -Antiphilus - - -σῆμα δυωδεκάμοιρον ἀφεγγέος ἠελίοιο, -τοσσάκις ἀγλώσσῳ φθεγγόμενον στόματι, -εὖτʼ ἂν θλιβομένοιο ποτὶ στενὸν ὕδατος ἀὴρ -αὐλὸν ἀποστείλῃ πνεῦμα διωλύγιον, -θῆκεν Ἀθήναιος δήμῳ χάριν, ὡς ἂν ἐναργὴς -εἴη κἠν φθονεραῖς ἠέλιος νεφέλαις. -
-
- - -Apollonides - - -Σύρου καὶ Δήλοιο κλύδων μέσος υἷα Μενοίτην -σὺν φόρτῳ Σαμίου κρύψε Διαφανέος, -εἰς ὅσιον σπεύδοντα πλόου τάχος· ἀλλὰ θάλασσα -ἐχθρὴ καὶ νούσῳ πατρὸς ἐπειγομένοις. - -
-
- - -Crinagoras - - -Ὑμνίδα τὴν Εὐάνδρου, ἐράσμιον αἰὲν ἄθυρμα -οἰκογενές, κούρην αἱμύλον εἰναέτιν, -ἥρπασας, ὦ ἄλλιστʼ Ἀίδη, τί πρόωρον ἐφιεὶς -μοῖραν τῇ πάντως σεῖὸ ποτʼ ἐσσομένῃ; -
-
- - -Bianor - - -ὕστατον ἐθρήνησε τὸν ὠκύμορον Κλεαρίστη -παῖδα, καὶ ἀμφὶ τάφῳ πικρὸν ἔπαυσε βίον -κωκύσασα γὰρ ὅσσον ἐχάνδανε μητρὸς ἀνίη, -οὐκέτʼ ἐπιστρέψαι πνεύματος ἔσχε τόνους. -θηλύτεραι, τί τοσοῦτον ἐμετρήσασθε τάλαιναι -θρῆνον, ἵνα κλαύσητʼ ἄχρι καὶ Ἀίδεω; -
-
- - -Crinagoras - - -τί δύστηνʼ ὄλβοιο Φιλόστρατε, ποῦ σοι ἐκεῖνα -σκῆπτρα καὶ αἱ βασιλέων ἄφθονοι ἐντυχίαι,˘ -αἷσιν ἐπῃώρησας ἀεὶ βίον; ἦ ἐπὶ Νείλῳ - δαίοις ὢν περίοπτος ὅροις; -ὀθνεῖοι καμάτους τοὺς σοὺς διεμοιρήσαντο, -
-
- - -Anyte - - -λοίσθια δὴ τάδε πατρὶ φίλῳ περὶ χεῖρε βαλοῦσα -εἶπʼ Ἐρατὼ, χλωροῖς δάκρυσι λειβομένα· -“ ὦ πάτερ, οὔ τοι ἔτʼ εἰμί, μέλας δʼ ἐμὸν ὄμμα καλύπτει -ἤδη ἀποφθιμένης κυάνεος θάνατοσ” - -
-
- - -Simonides - - -ὕστατα δὴ τάδʼ ἔειπε φίλην ποτὶ μητέρα Γοργὼ -δακρυόεσσα, δέρης χερσὶν ἐφαπτομένη· -“ αὖθι μένοις παρὰ πατρί, τέκοις δʼ ἐπὶ λῴονι μοίρᾳ - ἄλλαν, σῷ πολιῷ γήραϊ καδεμόνα.” -
-
- - -Leonidas - - -ἐσθλὸς Ἀριστοκράτης ὅτʼ ἀπέπλεεν εἰς Ἀχέροντα, -εἶπʼ ὀλιγοχρονίης ἁψάμενος κεφαλῆς· -“ παίδων τις μνήσαιτο, καὶ ἑδνώσαιτο γυναῖκα, -εἰ καί μιν δάκνοι δυσβίοτος πενίη· - ζωὴν στυλώσαιτο· κακὸς δʼ ἄστυλος ἰδέσθαι -οἶκος· ὃ δʼ αὖ λῷστον,˘ τἀνέρος ἐσχαρεὼν -εὐκίων φαίνοιτο, καὶ ἐν πολυκαέι ὄγκῳ -ἐμπρέποι,˘ αὐγάζων δαλὸν ἐπεσχάριον” -ᾔδει Ἀριστοκράτης τὸ κρήγυον ἀλλὰ γυναικῶν, -ὤνθρωπʼ, ἤχθαιρεν τὴν ἀλιτοφροσύνην. -
-
- - -Anyte - - -ἀντί τοι εὐλεχέος θαλάμου σεμνῶν θʼ ὑμεναίων -μάτηρ στῆσε τάφῳ τῷδʼ ἐπὶ μαρμαρίνῳ -παρθενικάν, μέτρον τε τεὸν καὶ κάλλος ἔχοισαν, -Θερσί· ποτιφθεγκτὰ δʼ -ἔπλεο καὶ φθιμένα. -
-
- - -Statyllius flaccus - - -φεῦγε θαλάσσια ἔργα, βοῶν δʼ -ἐπιβάλλευ ἐχέτλῃ, -εἲ τί τοι ἡδὺ μακρῆς πείρατʼ ἰδεῖν βιοτῆς· -ἠπείρῳ γὰρ ἔνεστι μακρὸς βίος· εἰν ἁλὶ δʼ οὔ πως -εὐμαρὲς εἰς πολιὴν ἀνδρὸς ἰδεῖν κεφαλήν. - -
-
- - -Euphorion - - -οὐχ ὁ τρηχὺς ἔλαιος ἐπʼ ὀστέα κεῖνα καλύπτει, -οὐδʼ ἡ κυάνεον γράμμα λαλοῦσα πέτρη· -ἀλλὰ τὰ μὲν Δολίχης τε καὶ αἰπεινῆς Δρακάνοιο -Ἰκάριον ῥήσσει κῦμα περὶ κροκάλαις· -ἀντὶ δʼ ἐγὼ ξενίης Πολυμήδεος ἡ κενεὴ χθὼν -ὠγκώθην Δρυόπων διψάσιν ἐν βοτάναις. -
-
- - -Leonidas - - -ἠχήεσσα θάλασσα, τί τὸν Τιμάρεος οὕτως -πλώοντʼ οὐ πολλῇ νηὶ Τελευταγόρην, -ἄγρια χειμήνασα, κατεπρηνώσαο πόντῳ -σὺν φόρτῳ, λάβρον κῦμʼ ἐπιχευαμένη; -χὠ μέν που καύηξιν ἢ ἰχθυβόροις λαρίδεσσιν -τεθρήνητʼ ἄπνους εὐρεῖ ἐπʼ αἰγιαλῷ· -Τιμάρης δὲ κενὸν τέκνου κεκλαυμένον ἀθρῶν -τύμβον, δακρύει παῖδα Τελευταγόρην. -
-
- - -Pancrates - - -ὤλεσεν Αἰγαίου διὰ κύματος ἄγριος ἀρθεὶς -λὶψ Ἐπιηρείδην Ὑάσι δυομέναις, -αὐτὸν ἑῇ σὺν νηὶ καὶ ἀνδράσιν ᾧ τόδε σῆμα -δακρύσας κενεὸν παιδὶ πατὴρ ἔκαμεν. -
-
- - -Leonidas - - -αἰεὶ ληισταὶ καὶ ἁλιφθόροι, οὐδὲ δίκαιοι -Κρῆτες· τίς Κρητῶν οἶδε δικαιοσύνην; -ὡς καὶ ἐμὲ πλώοντα σὺν οὐκ εὐπίονι φόρτῳ -Κρηταιεῖς ὦσαν Τιμόλυτον καθʼ ἁλός, -δείλαιον. κἠγὼ μὲν ἁλιζώοις λαρίδεσσι -κέκλαυμαι, τύμβῳ δʼ οὐχ ὕπο Τιμόλυτος. - -
-
- - -Leonidas - - -ἀρκεῖ μοι γαίης μικρὴ κόνις· ἡ δὲ περισσὴ -ἄλλον ἐπιθλίβοι πλούσια κεκλιμένον -στήλη, τὸ σκληρὸν νεκρῶν βάρος· εἴ με θανόντα -γνώσοντʼ, Ἀλκάνδρῳ τοῦτο τί Καλλιτέλευς; -
-
- - -Leonidas - - -τὴν ὀλίγην βῶλον καὶ τοῦτʼ ὀλιγήριον, ὦνερ, -σῆμα ποτίφθεγξαι τλάμονος Ἀλκιμένευς, -εἰ καὶ πᾶν κέκρυπται ὑπʼ ὀξείης παλιούρου -καὶ βάτου, ἥν ποτʼ ἐγὼ δήϊον Ἀλκιμένης. -
-
- - -Leonidas - - -ποιμένες οἳ ταύτην ὄρεος ῥάχιν οἰοπολεῖτε -αἶγας κεὐείρους ἐμβοτέοντες ὄις, -Κλειταγόρῃ, πρὸς Γῆς, ὀλίγην χάριν, ἀλλὰ προσηνῆ -τίνοιτε, χθονίης εἵνεκα Φερσεφόνης. -βληχήσαιντʼ ὄιές μοι, ἐπʼ ἀξέστοιο δὲ ποιμὴν -πέτρης συρίζοι πρηέα βοσκομέναις· -εἴαρι δὲ πρώτῳ λειμώνιον ἄνθος ἀμέρσας -χωρίτης στεφέτω τύμβον ἐμὸν στεφάνῳ, -καί τις ἀπʼ εὐάρνοιο καταχραίνοιτο γάλακτι -οἰός, ἀμολγαῖον μαστὸν ἀνασχόμενος, -κρηπῖδʼ ὑγραίνων ἐπιτύμβιον εἰσὶ θανόντων -εἰσὶν ἀμοιβαῖαι κἀν φθιμένοις χάριτες. -
-
- - -Leonidas - - -γνώσομαι εἴ τι νέμεις ἀγαθοῖς πλέον, ἢ καὶ ὁ δειλὸς -ἐκ σέθεν ὡσαύτως ἶσον, ὁδοιπόρʼ, ἔχει. - - χαιρέτω οὗτος ὁ τύμβος, ἐρεῖς, “ ἐπεὶ Εὐρυμέδοντος -κεῖται τῆς ἱερῆς κοῦφος ὑπὲρ κεφαλῆς.” - -
-
- - -Leonidas - - -νήπιον υἱὸν ἔλειπες· ἐν ἡλικίῃ δὲ καὶ αὐτός, -Εὐρύμεδον, τύμβου τοῦδε θανὼν ἔτυχες. -σοὶ μὲν ἕδρη θείοισι παρʼ ἀνδράσι· τὸν δὲ πολῖται -τιμησεῦντι, πατρὸς μνώμενοι ὡς ἀγαθοῦ. -
-
- - -Leonidas - - -ξεῖνε, Συρακόσιός τοι ἀνὴρ τόδʼ ἐφίεται Ὄρθων, -“ χειμερίας μεθύων μηδαμὰ νυκτὸς ἴῃς· - καὶ γὰρ ἐγὼ τοιοῦτον ἔχω μόρον, ἀντὶ δὲ [ πολλῆς - πατρίδος ὀθνείαν κεῖμαι ἐφεσσάμενος.” -
-
- - -Leonidas - - -Εὐσθένεος τὸ μνῆμα· φυσιγνώμων ὁ σοφιστής, -δεινὸς ἀπʼ ὀφθαλμοῦ καὶ τὸ νόημα μαθεῖν. -εὖ μιν ἔθαψαν ἑταῖροι ἐπὶ ξείνης ξένον ὄντα, -χὐμνοθέτης ἐν τοῖς δαιμονίως φίλος ὤν. -πάντων ὧν ἐπέοικεν ἔχειν τεθνεῶθʼ ὁ σοφιστής, -καίπερ ἄκικυς ἐὼν, εἶχʼ ἄρα κηδεμόνας. -
-
- - -Leonidas - - -ἡ παῖς ᾤχετʼ ἄωρος ἐν ἑβδόμῳ ἥδʼ ἐνιαυτῷ -εἰς ἀίδην, πολλῆς ἡλικίης προτέρη, -δειλαίη, ποθέουσα τὸν εἰκοσάμηνον ἀδελφόν, -νήπιον ἀστόργου γευσάμενον θανάτου. -αἰαῖ, λυγρὰ παθοῦσα Περιστέρη, ὡς ἐν ἑτοίμῳ -ἀνθρώποις δαίμων θῆκε τὰ δεινότατα. - -
-
- - -Leonidas - - -ὁ μικκὸς τόδʼ ἔτευξε τᾷ Θραΐσσᾳ -Μήδειος τὸ μνᾶμʼ ἐπὶ τᾷ ὁδῷ, κἠπέγραψε “ Κλείτας. -” ἑξεῖ τὰν χάριν ἁ γυνὰ ἀντʼ ἐκείνων -ὧν τὸν κῶρον ἔθρεψε. τί μάν; ἔτι χρησίμα καλεῖται. -
-
- - -Leonidas - - -Ἀρχίλοχον καὶ στᾶθι καὶ εἴσιδε τὸν πάλαι ποιητὰν -τὸν τῶν ἰάμβων, οὗ τὸ μυρίον κλέος -διῆλθε κἠπὶ νύκτα καὶ ποτʼ ἀῶ. -ἦ ῥά νιν αἱ Μοῦσαι καὶ ὁ Δάλιος ἠγάπευν Ἀπόλλων, -ὡς ἐμμελής τʼ ἔγεντο κἠπιδέξιος -ἔπεά τε ποιεῖν, πρὸς λύραν τʼ ἀείδειν. -
-
- - -Leonidas - - -μήτε μακρῇ θαρσέων ναυτίλλεο μήτε βαθείῃ -νηί· κρατεῖ παντὸς δούρατος εἷς ἄνεμος. -ὤλεσε καὶ Πρόμαχον πνοιὴ μία, κῦμα δʼ ἓν αὔτως -ἀθρόον ἐς κοίλην ἐστυφέλιξεν ἅλα. -οὐ μὴν οἱ δαίμων πάντῃ κακός· ἀλλʼ ἐνὶ γαίῃ -πατρίδι καὶ τύμβου καὶ κτερέων ἔλαχεν -κηδεμόνων ἐν χερσίν, ἐπεὶ τρηχεῖα θάλασσα -νεκρὸν πεπταμένους θῆκεν ἐπʼ αἰγιαλούς. -
-
- - -Antipater - - -οὗτος ὁ Λειάνδροιο διάπλοος, οὗτος ὁ πόντου -πορθμὸς, ὁ μὴ μούνῳ τῷ φιλέοντι βαρύς· -ταῦθʼ Ἡροῦς τὰ πάροιθεν ἐπαύλια, τοῦτο τὸ πύργου; -λείψανον, ὁ προδότης ὧδʼ ἐπέκειτο λύχνος. -κοινὸς δʼ ἀμφοτέρους ὅδʼ ἔχει τάφος, εἰσέτι καὶ νῦν -κείνῳ τῷ φθονερῷ μεμφομένους ἀνέμῳ. - -
-
- - -Anonymi Epigrammatici - - -ἐν τῷ ναῷ τῆς ἁγίας Αναστασίας ἐν Θεσσαλόνικᾐ -τίπτε μάτην γοόωντες ἐμῷ παραμίμνετε τύμβῳ; -οὐδὲν ἔχω θρήνων ἄξιον ἐν φθιμένοις. -λῆγε γόων καὶ παῦε, πόσις, καὶ παῖδες ἐμεῖο -χαίρετε, καὶ μνήμην σῴζετʼ Ἀμαζονίης. -
-
- - -Julius leonidas - - -Οὐδʼ εἴ μοι γελόωσα καταστορέσειε Γαλήνη -κύματα, καὶ μαλακὴν φρῖκα φέροι Ζέφυρος, -νηοβάτην ὄψεσθε· δέδοικα γάρ οὓς πάρος ἔτλην -κινδύνους ἀνέμοις ἀντικορυσσόμενος, -
-
- - -Plato - - -ἀστέρας εἰσαθρεῖς ἀστήρ ἐμός. εἴθε γενοίμην -οὐρανός, ὡς πολλοῖς ὄμμασιν εἰς σὲ βλέπω. -
-
- - -Plato - - -ἀστὴρ πρὶν μὲν ἔλαμπες ἐνὶ ζωοῖσιν Ἑῷος· -νῦν δὲ θανὼν λάμπεις Ἕσπερος ἐν φθιμένοις. -
-
- - -Bianor - - -πάντα Χάρων ἄπληστε, τί τὸν νέον ἥρπασας αὕτως -Ἄτταλον; οὐ σὸς ἔην, κἂν θάνε γηραλέος; - -
-
- - -Anonymi Epigrammatici - - - -χθὼν μὲν ἔχει δέμας ἐσθλόν, ἔχει κλυτὸν οὐρανὸς ἦτορ -Ἀνδρέω, ὃς Δαναοῖσι καὶ Ἰλλυριοῖσι δικάσσας, -οὐχ ὁσίων κτεάνων καθαρὰς ἐφυλάξατο χεῖρας. -
-
- - -Anonymi Epigrammatici - - -εἰ γένος εὐσεβέων ζώει μετὰ τέρμα βίοιο, -ναιετάον κατὰ θεσμὸν ἀνὰ στόμα φωτὸς ἑκάστου, -Ἀνδρέα, σὺ ζώεις, οὐ κάτθανες· ἀλλά σε χῶρος -ἄμβροτος ἀθανάτων ἁγίων ὑπέδεκτο καμόντα. -
-
- - -Hadrianus Imperator - - -Ἀρχιλόχου τόδε σῆμα, τὸν ἐς λυσσῶντας ἰάμβους -ἤγαγε Μαιονίδῃ Μοῦσα χαριζομένη. -
-
- - -Julius leonidas - - -ἄτρομος ἐκ τύμβου λύε πείσματα ναυηγοῖο -χἠμῶν ὀλλυμένων ἄλλος ἐνηοπόρει. -
-
- - -Anonymi Epigrammatici - - -δοῦλος Ἐπίκτητος γενόμην, καὶ σῶμʼ ἀνάπηρος, -καὶ πενίην Ἶρος, καὶ φίλος ἀθανάτοις. - -
-
- - -Simonides - - -μνῆμα τόδε κλεινοῖο Μεγιστίου, ὅν ποτε Μῆδοι -Σπερχειὸν ποταμὸν κτεῖναν ἀμειψάμενοι, -μάντιος, ὃς τότε κῆρας ἐπερχομένας σάφα εἰδὼς -οὐκ ἔτλη Σπάρτης ἡγεμόνας προλιπεῖν. -
-
- - -Anonymi Epigrammatici - - -πληρώσας στρατιὴν Σωτήριχος ἐνθάδε κεῖμαι, -ὄλβον ἐμῶν καμάτων γλυκεροῖς τεκέεσσιν ἐάσας. -ἦρξα δʼ ἐν ἱππήεσσι, Γερήνιος οἷά τε Νέστωρ· -ἐξ ἀδίκων τε πόνων κειμήλιον οὐδὲν ἔτευξα. -τοὔνεκα καὶ μετὰ πότμον ὁρῶ φάος Οὐλύμποιο. -
-
- - -Sophronius - - - - Τύμβε, τίς ἢ πόθεν, ἦν δʼ ἔτι παῖς τίνος, ἔργα καὶ ὄλβον, -νεκρός, ὃν ἔνδον ἔχεις, ἔννεπε, κευθόμενον. - - οὗτος Ἰωάννης, Κύπριος γένος, υἱὸς ἐτύχθη -εὐγενέος Στεφάνου· ἦν δὲ νομεὺς Φαρίης. -κτήμασι μὲν πολύολβος ὅλων πλέον ὧν τρέφε Κύπρος, -ἐκ πατέρος πατέρων, ἐξ ὁσίων τε πόνων -ἔργα δὲ θέσκελα πάντα λέγειν, ἅπερ ἐν χθονὶ τεῦξεν, -οὐδʼ ἐμοῦ ἐστι νόου, οὐδʼ ἑτέρων στομάτων -πάντα γὰρ ἄνδρα παρῆλθε φαεινοτάταις ἀρετῇσι -δόξαντα κρατέειν ταῖς ἀρεταῖς ἑτέρων. -τοῦ καὶ κάλλεα πάντα, τάπερ πτόλις ἔλλαχεν αὕτη, -εἰσὶ φιλοφροσύνης κόσμος ἀρειοτάτης. - -
-
- - -Sophronius - - -ἀρχὸς Ἰωάννης Φαρίης ἀρετῶν ἱερήων -ἐνθάδε νῦν μετὰ τέρμα φίλῃ παρὰ πατρίδι κεῖται· -θνητὸν γὰρ λάχε σῶμα, καὶ εἰ βίον ἄφθιτον ἕξει, -ἀθανάτους πρήξεις τε κατὰ χθόνα ῥέξεν ἀπείρους. -
-
- - -Palladas - - -οὐκ ἀπεδήμησας τιμῆς χάριν, ἀλλὰ τελευτῆς· -καὶ χωλός περ ἐὼν ἔδραμες εἰς ἀίδην, -Γέσσιε Μοιράων τροχαλώτερε· ἐκ προκοπῆς γὰρ -ἧς εἶχες κατὰ νοῦν, ἐξεκόπης βιότου. -
-
- - -Palladas - - -Γέσσιος οὐ τέθνηκεν ἐπειγόμενος παρὰ Μοίρης· -αὐτὸς τὴν Μοῖραν προὔλαβεν εἰς ἀίδην. -
-
- - -Palladas - - - - μηδὲν ἄγαν τῶν ἑπτὰ σοφῶν ὁ σοφώτατος εἶπεν -ἀλλὰ σὺ μὴ πεισθείς, Γέσσιε, ταῦτʼ ἔπαθες· -καὶ λόγιός περ ἐὼν ἀλογώτατον ἔσχες ὄνειδος, -ὡς ἐπιθυμήσας οὐρανίης ἀνόδου. -οὕτω Πήγασος ἵππος ἀπώλεσε Βελλεροφόντην, -βουληθέντα μαθεῖν ἀστροθέτους κανόνας· -ἀλλʼ ὁ μὲν ἵππον ἔχων καὶ θαρσαλέον σθένος ἥβης, -Γέσσιος οὐδὲ χεσεῖν εὔτονον ἦτορ ἔχων. - -
-
- - -Palladas - - -μηδεὶς ζητήσῃ μερόπων ποτὲ καὶ θεὸς εἶναι, -μηδʼ ἀρχὴν μεγάλην, κόμπον ὑπερφίαλον. -Γέσσιος αὐτὸς ἔδειξε· κατηνέχθη γὰρ ἐπαρθείς, -θνητῆς εὐτυχίης μηκέτʼ ἀνασχόμενος. -
-
- - -Palladas - - -ζητῶν ἐξεῦρες βιότου τέλος εὐτυχίης τε, -ἀρχὴν ζητήσας πρὸς τέλος ἐρχομένην. -ἀλλʼ ἔτυχες τιμῆς, ὦ Γέσσιε, καὶ μετὰ μοῖραν -σύμβολα τῆς ἀρχῆς ὕστατα δεξάμενος. -
-
- - -Palladas - - -Γέσσιον ὡς ἐνόησεν ὁ Βαύκαλος ἄρτι θανόντα -χωλεύοντα πλέον, τοῖον ἔλεξεν ἔπος· -“ Γέσσιε, πῶς, τί παθὼν κατέβης δόμον Ἄϊδος εἴσω - γυμνός, ἀκήδεστος, σχήματι καινοτάφῳ ;” -τὸν δὲ μέγʼ ὀχθήσας προσέφη καὶ Γέσσιος εὐθύς· - - Βαύκαλε, τὸ στρῆνος καὶ θάνατον παρέχει. - -
-
- - -Palladas - - -τὴν Ἀμμωνιακὴν ἀπάτην ὅτε Γέσσιος ἔγνω -τοῦ ξενικοῦ θανάτου ἐγγύθεν ἐρχόμενος, -τὴν ἰδίαν γνώμην κατεμέμψατο, καὶ τὸ μάθημα, -καὶ τοὺς πειθομένους ἀστρολόγοις ἀλόγοις. -
-
- - -Palladas - - -οἱ δύο Κάλχαντες τὸν Γέσσιον ὤλεσαν ὅρκοις, -τῶν μεγάλων ὑπάτων θῶκον ὑποσχόμενοι. -ὦ γένος ἀνθρώπων ἀνεμώλιον, αὐτοχόλωτον, -ἄχρι τέλους βιότου μηδὲν ἐπιστάμενον. - -
-
- - -Anonymi Epigrammatici - - -ἐνθάδε σῶμα λέλοιπεν Ἀπελλιανὸς μέγʼ ἄριστος -ψυχὴν δʼ ἐν χείρεσσιν ἑὴν παρακάτθετο Χριστῷ. -
-
- - -Anonymi Epigrammatici - - -οὐδὲ θανὼν κλέος ἐσθλὸν ἀπώλεσας ἐς χθόνα πᾶσαν, -ἀλλʼ ἔτι σῆς ψυχῆς ἀγλαὰ πάντα μένει, -ὅσς1ʼ ἔλαχὲς τʼ ἔμαθές τε, φύσει μῆτιν πανάριστε· -τῷ ῥα καὶ ἐς μακάρων νῆσον ἔβης, Πυθέα. -
-
- - -Anonymi Epigrammatici - - -Ἄλκηστις νέη εἰμί· θάνον δʼ ὑπὲρ ἀνέρος ἐσθλοῦ, -Ζήνωνος, τὸν μοῦνον ἐνὶ στέρνοισιν ἐδέγμην, -ὃν φωτὸς γλυκερῶν τε τέκνων προὔκρινʼ ἐμὸν ἦτορ, -οὔνομα Καλλικράτεια, βροτοῖς πάντεσσιν ἀγαστή. -
-
- - -Philippus - - -γλύκων, τὸ Περγαμηνὸν Ἀσίδι κλέος, -ὁ παμμάχων κεραυνός, ὁ πλατὺς πόδας, -ὁ καινὸς Ἄτλας, αἳ τʼ ἀνίκατοι χέρες -ἔρροντι· τὸν δὲ πρόσθεν οὔτʼ ἐν Ἰταλοῖς, -οὔθʼ Ἑλλάδι προωστόν, οὔτʼ ἐν Ἀσίδι, -ὁ πάντα νικῶν Ἀίδης ἀνέτραπεν. -
-
- - -Apollonides - - -Γλῆνιν παρῃονῖτις ἀμφέχω χερμάς, -πικρῇ κατασπασθέντα κύματος δίνῃ, -ὅτʼ ἰχθυάζετʼ ἐξ ἄκρης ἀπορρῶγος· -χῶσαν δὲ μʼ ὅσσος λαὸς ἦν συνεργήτης, -Πόσειδον, οὓς σὺ σῷζε, καὶ γαληναίην -αἰὲν διδοίης ὁρμιηβόλοις θῖνα. - -
-
- - -Adaeus - - -ἢν παρίῃς ἥρωα, Φιλοπρήγμων δὲ καλεῖται, -πρόσθε Ποτιδαίης κείμενον ἐν τριόδῳ, -εἰπεῖν οἷον ἐπʼ ἔργον ἄγεις πόδας· εὐθὺς ἐκεῖνος -εὑρήσει σὺν σοὶ πρήξιος εὐκολίην. -
-
- - -Anonymi Epigrammatici - - -ὁρᾷς πρόσωπον Κασσίας τῆς σώφρονος. -εἰ καὶ τέθνηκε, ταῖς ἀρεταῖς γνωρίζεται -ψυχῆς τὸ κάλλος μᾶλλον ἢ τοῦ σώματος. -
-
- - -Archias - - -Αἰωρῇ θήρειον ἱμασσόμενος δέμας αὔραις -τλᾶμον, ἀορτηθεὶς ἐκ λασίας πίτυος, -αἰωρῇ· Φοίβῳ γὰρ ἀνάρσιον εἰς ἔριν ἔστης, -πρῶνα Κελαινίτην ναιετάων, Σάτυρε. -σεῦ δὲ βοὰν αὐλοῖο μελίβρομον οὐκέτι Νύμφαι, -ὡς πάρος, ἐν Φρυγίοις οὔρεσι πευσόμεθα. -
-
- - -Christodorus - - -οὗτος Ἰωάννην κρύπτει τάφος, ὃς ῥʼ Ἐπιδάμνου -ἄστρον ἔην, ἣν πρὶν παῖδες ἀριπρεπέες -ἔκτισαν Ἡρακλῆος· ὅθεν καὶ μέρμερος ἥρως -αἰεὶ τῶν ἀδίκων σκληρὸν ἔκοπτε μένος. -εἶχε δʼ ἀπʼ εὐσεβέων προγόνων ἐρικυδέα πάτρην -Λυχνιδόν, ἣν Φοῖνιξ Κάδμος ἔδειμε πόλιν. - -ἔνθεν λύχνος ἔην Ἑλικώνιος, οὕνεκα Κάδμος -στοιχείων Δαναοῖς πρῶτος ἔδειξε τύπον. -εἰς ὑπάτους δʼ ἀνέλαμψε, καὶ Ἰλλυριοῖσι δικάζων -Μούσας καὶ καθαρὴν ἐστεφάνωσε Δίκην. -
-
- - -Christodorus - - -αὐτὸς Ἰωάννης Ἐπιδάμνιος ἐνθάδε κεῖται, -τηλεφανὴς ὑπάτων κόσμος ἀειφανέων -ὁ γλυκύ μοι Μουσέων πετάσας φάος, ὁ πλέον ἄλλων -εὐρύνας ξενίου δαίμονος ἐργασίην, -παμφόρβην παλάμην κεκτημένος, ἥντινα μούνην -οὐκ ἴδε δωτίνῃς μέτρον ὁριζόμενον. -αἰπυτάτην δʼ ηὔξησε [ νόμοις πατρίοισιν ἀπήνην, -φαιδρύνας καθαρῆς ἔργα Δικαιοσύνης. -ὦ πόποι, οὐκ ἔζησε πολὺν χρόνον, ἀλλʼ ἐνιαυτοὺς -μοῦνον ἀναπλήσας τεσσαράκοντα δύο, -ᾤχετο μουσοπόλοισι ποθὴν πάντεσσιν ἐάσας, -οὓς ἐπόθει πατέρων φέρτερα γειναμένων. -
-
- - -Anonymi Epigrammatici - - -Ἰκάρου ὦ νεόφοιτον ἐς ἠέρα πωτηθέντος -Ἰκαρίη πικρῆς τύμβε κακοδρομίης, -ἀβάλε μήτε σε κεῖνος ἰδεῖν, μήτʼ αὐτὸς ἀνεῖναι -τρίτων Αἰγαίου νῶτον ὑπὲρ πελάγευς. -οὐ γάρ σοι σκεπανή τις ὑφόρμισις, οὔτε βόρειον -ἐς κλίτος, οὔτʼ ἀγὴν κύματος ἐς νοτίην. -ἔρροις, ὦ δύσπλωτε, κακόξενε· σεῖο δὲ τηλοῦ -πλώοιμι, στυγεροῦ ὅσσον ἀπʼ Ἀίδεω. -
-
- - -Diodorus - - -ἴστω νυκτὸς ἐμῆς, ἥ μʼ ἔκρυφεν, οἰκία ταῦτα -λάινα, Κωκυτοῦ τʼ ἀμφιγόητον ὕδωρ, - -οὔτι μʼ ἀνήρ, ὃ λέγουσι, κατέκτανεν ἐς γάμον ἄλλης -παπταίνων· τί μάτην οὔνομα Ῥουφιανός; -ἀλλά με Κῆρες ἄγουσι μεμορμέναι. οὐ μία δήπου -παῦλα Ταραντίνη κάτθανεν ὠκύμορος. -
-
- - -Diodorus - - -ἰφθίμῳ τόδʼ ἐπʼ ἀνδρὶ φίλη πόλις ἤνυς1ʼ Ἀχαιῷ -γράμμα παρʼ εὐΰδρου νάμασιν Ἀσκανίης. -κλαῦσε δέ μιν Νίκαια· πατὴρ δʼ ἐπὶ οἱ Διομήδης -λάινον ὑψιφαῆ τόνδʼ ἀνέτεινε τάφον, -δύσμορος, αἰάζων ὀλοὸν κακόν. ἦ γὰρ ἐῴκει -υἱέα οἱ τίνειν ταῦτα κατοιχομένῳ. -
-
- - -Apollonides - - -Ἰχθυοθηρητῆρα Μενέστρατον ὤλεσεν ἄγρη -δούνακος, ἑξαμίτης ἐκ τριχὸς ἑλκομένη, -εἶδαρ ὅτʼ ἀγκίστρου φόνιον πλάνον ἀμφιχανοῦσα -ὀξείην ἐρυθρὴ φυκὶς ἔβρυξε πάγην· -ἀγνυμένη δʼ ὑπʼ ὀδόντι κατέκτανεν, ἅλματι λάβρῳ -ἐντὸς ὀλισθηρῶν δυσαμένη φαρύγων. -
-
- - -Myrinus - - -Θύρσις ὁ κωμήτης, ὁ τὰ νυμφικὰ μῆλα νομεύων, -Θύρσις ὁ συρίζων Πανὸς ἴσον δόνακι, -ἔνδιος οἰνοπότης σκιερὰν ὑπὸ τὰν πίτυν εὕδει· -φρουρεῖ δʼ αὐτὸς ἑλὼν ποίμνια βάκτρον Ἔρως. -ἆ Νύμφαι, Νύμφαι, διεγείρατε τὸν λυκοθαρσῆ -βοσκόν, μὴ θηρῶν κύρμα γένηται Ἔρως. - -
-
- - -Anonymi Epigrammatici - - -ἐμοῦ θανόντος γαῖα μιχθήτω πυρί· -οὐδὲν μέλει μοι· τἀμὰ γὰρ καλῶς ἔχει. -
-
- - -Antipater - - -Στρυμόνι καὶ μεγάλῳ πεποτισμένον Ἑλλησπόντῳ -ἠρίον Ἠδωνῆς Φυλλίδος, Ἀμφίπολι, -λοιπά τοι Αἰθοπίης Βραυρωνίδος ἴχνια νηοῦ -μίμνει, καὶ ποταμοῦ τἀμφιμάχητον ὕδωρ, -τὴν δὲ ποτʼ Αἰγείδαις μεγάλην ἔριν ὡς ἁλιανθὲς -τρῦχος ἐπʼ ἀμφοτέραις δερκόμεθʼ ἠιόσιν. -
-
- - -Diogenes Laertius - - -ἰλιγγίασε Βάκχον ἐκπιὼν χανδὸν -Χρύσιππος, οὐδʼ ἐφείσατο -οὐ τῆς στοᾶς, οὐχ ἧς πάτρας, οὐ τῆς ψυχῆς, -ἀλλʼ ἦλθε δῶμʼ ἐς Ἀίδεω. -
-
- - -Dioscorides - - -κἠγὼ Σωσιθέου κομέω νέκυν, ὅσσον ἐν ἄστει -ἄλλος ἀπʼ αὐθαίμων ἡμετέρων Σοφοκλῆν, -Σκίρτος ὁ πυρρογένειος. ἐκισσοφόρησε γὰρ ὡνὴρ -ἄξια Φλιασίων, ναὶ μὰ χορούς, Σατύρων -κἠμὲ τὸν ἐν καινοῖς τεθραμμένον ἤθεσιν ἤδη -ἤγαγεν εἰς μνήμην πατρίδʼ ἀναρχαΐσας· - -καὶ πάλιν εἰσώρμησα τὸν ἄρσενα Δωρίδι Μούσῃ -ῥυθμόν, πρὸς τʼ αὐδὴν ἑλκόμενος μεγάλην -† † ἑπτὰ δέ μοι ἔρσων τύπος οὐ χερὶ καινοτομηθεὶς -τῇ φιλοκινδύνῳ φροντίδι Σωσιθέου. -
-
- - -Dioscorides - - -τῷ κωμῳδογράφῳ, κούφη κόνι, τὸν φιλάγωνα -κισσὸν ὑπὲρ τύμβου ζῶντα Μάχωνι φέροις· -οὐ γὰρ ἔχεις κηφῆνα παλίμπλυτον, ἀλλά τι τέχνης -ἄξιον ἀρχαίης λείψανον ἠμφίεσας. -τοῦτο δʼ ὁ πρέσβυς ἐρεῖ· “ Κέκροπος πόλι, καὶ παρὰ Νείλῳ - ἔστιν ὅτʼ ἐν Μούσαις δριμὺ πέφυκε θύμον.” -
-
- - -Alexander - - -Σάρδιες ἀρχαῖαι, πατέρων νομός, εἰ μὲν ἐν ὑμῖν -ἐτρεφόμαν, κερνᾶς ἦν τις ἂν ἢ βακέλας -χρυσοφόρος, ῥήσσων καλὰ τύμπανα· νῦν δέ μοι Ἀλκμὰν -οὔνομα, καὶ Σπάρτας εἰμὶ πολυτρίποδος, -καὶ Μούσας ἐδάην Ἑλικωνίδας, αἵ με τυράννων -θῆκαν Δασκύλεω μείζονα καὶ Γύγεω. -
-
- - -Erinna - - -Στᾶλαι, καὶ Σειρῆνες ἐμαί, καὶ πένθιμε κρωσσέ, -ὅστις ἔχεις Ἀίδα τὰν ὀλίγαν σποδιάν, -τοῖς ἐμὸν ἐρχομένοισι παρʼ ἠρίον εἴπατε χαίρειν, -αἴτʼ ἀστοὶ τελέθωντʼ, αἴθʼ ἑτέρας πόλιος· - -χὤτι με νύμφαν εὖσαν ἔχει τάφος, εἴπατε καὶ τό· -χὤτι πατήρ μʼ ἐκάλει Βαυκίδα, χὤτι γένος -Τηνία, ὡς εἰδῶντι· καὶ ὅττι μοι ἁ συνεταιρὶς -Ἤριννʼ ἐν τύμβῳ γράμμʼ ἐχάραξε τόδε. -
-
- - -Antipater - - -ἤδη μὲν κροκόεις Πιτανάτιδι πίτνατο νύμφᾳ -Κλειναρέτᾳ χρυσέων παστὸς ἔσω θαλάμων, -καδεμόνες δʼ ἤλποντο διωλένιον φλόγα πεύκας -ἅψειν ἀμφοτέραις ἀνσχόμενοι παλάμαις, -Δημὼ καὶ Νίκιππος· ἀφαρπάξασα δὲ νοῦσος -παρθενικὰν Λάθας ἄγαγεν ἐς πέλαγος· -ἀλγειναὶ δʼ ἐκάμοντο συνάλικες, οὐχὶ θυρέτρων, -ἀλλὰ τὸν Ἀίδεω στερνοτυπῆ πάταγον. -
-
- - -Erinna - - -νύμφας Βαυκίδος ἐμμί· πολυκλαύταν δὲ παρέρπων -στάλαν τῷ κατὰ γᾶς τοῦτο λέγοις Ἀίδᾳ· - - βάσκανός ἐσς1ʼ, Ἀίδα· τὰ δέ τοι καλὰ σάμαθʼ ὁρῶντι -ὠμοτάταν Βαυκοῦς ἀγγελέοντι τύχαν, -ὡς τὰν παῖδʼ, Ὑμέναιος ἐφʼ αἷς ἀείδετο πεύκαις, -ταῖσδʼ ἐπὶ καδεστὰς ἔφλεγε πυρκαϊᾷ -καὶ σὺ μέν, ὦ Ὑμέναιε, γάμων μολπαῖον ἀοιδὰν -ἐς θρήνων γοερὸν φθέγμα μεθηρμόσαο, -
-
- - -Antipater - - -Παυροεπὴς Ἤριννα, καὶ οὐ πολύμυθος ἀοιδαῖς· -ἀλλʼ ἔλαχεν Μούσας τοῦτο τὸ βαιὸν ἔπος. - -τοιγάρτοι μνήμης οὐκ ἤμβροτεν, οὐδὲ μελαίνης -νυκτὸς ὑπὸ σκιερῇ κωλύεται πτέρυγι· -αἱ δʼ ἀναρίθμητοι νεαρῶν σωρηδὸν ἀοιδῶν -μυριάδες λήθῃ, ξεῖνε, μαραινόμεθα. -λωίτερος κύκνου μικρὸς θρόος ἠὲ κολοιῶν -κρωγμὸς ἐν εἰαριναῖς κιδνάμενος νεφέλαις. -
-
- - -Anonymi Epigrammatici - - -Ῥήγιον Ἰταλίης τεναγώδεος ἄκρον ἀείδω, -αἰεὶ Θρινακίου γευομένην ὕδατος, -οὕνεκα τὸν φιλέοντα λύρην φιλέοντά τε παῖδας -Ἴβυκον εὐφύλλῳ θῆκεν ὑπὸ πτελέῃ, -ἡδέα πολλὰ παθόντα· πολὺν δʼ ἐπὶ σήματι κισσὸν -χεύατο καὶ λευκοῦ φυταλιὴν καλάμου. -
-
- - -Leonidas - - -πολλὸν ἀπʼ Ἰταλίης κεῖμαι χθονός, ἔκ τε Τάραντος -πάτρης· τοῦτο δέ μοι πικρότερον θανάτου. -τοιοῦτος πλανίων ἄβιος βίος· ἀλλά με Μοῦσαι -ἔστερξαν, λυγρῶν δʼ ἀντὶ μελιχρὸν ἔχω. -οὔνομα δʼ οὐκ ἤμυσε Λεωνίδου· αὐτά με δῶρα -κηρύσσει Μουσέων πάντας ἐπʼ ἠελίους. -
-
- - -Dionysius - - -πρώιος, ἀλλὰ ποθεινὸς ὅσοι πόλιν Ἰαλύσοιο -ναίομεν, εἰς Λήθης πικρὸν ἔδυς πέλαγος, -δρεψάμενος σοφίην ὀλίγον χρόνον ἀμφὶ δὲ τύμβῳ -σεῖο καὶ ἀκλαυτοι γλαῦκες ἔθεντο γόον, -Φαινόκριτʼ οὐδὲν ὅμοιον ἐπεσσομένοισιν ἀοιδὸς -φθέγξεται, ἀνθρώπους ἄχρι φέρωσι πόδες. - -
-
- - -Anonymi Epigrammatici - - -νηιάδες καὶ ψυχρὰ βοαύλια ταῦτα μελίσσαις -οἶμον ἐπʼ εἰαρινὴν λέξατε νισσομέναις, -ὡς ὁ γέρων Λεύκιππος ἐπʼ ἐπʼ.ἀρσιπόδεσσι λαγωοῖς -ἔφθιτο χειμερίᾐ νυκτὶ λοχησάμενος. -σμήνεα δʼ οὐκέτι οἱ κομέειν φίλον· αἱ δὲ τὸν ἄκρης -γείτονα ποιμένιαι πολλὰ ποθοῦσι νάπαι. -
-
- - -Nossis - - -ὦ ξεῖνʼ, εἰ τύ γε πλεῖς ποτὶ καλλίχορον Μυτιλάναν, -τᾶν Σαπφὼ χαρίτων ἄνθος ἐναυσαμέναν, -εἰπεῖν, ὡς Μούσαισι φίλαν τήνᾳ τε Λοκρὶς γᾶ -τίκτεν ἴσαν ὅτι θʼ οἱ τοὔνομα Νοσσίς· ἴθι. -
-
- - -Leonidas - - -Τέλληνος ὅδε τύμβος· ἔχω δʼ ὑποβωλέα πρέσβυν -τῆνον τὸν πρᾶτον γνόντα γελοιομελεῖν. -
-
- - -Chaeremon - - -Κλεύας Οὑτυμοκλεῖος, ὑπὲρ Θυρεᾶν δόρυ τείνας, -κάτθανες ἀμφίλογον γᾶν ἀποτεμνόμενος, -
-
- - -Chaeremon - - -τοῖς Ἄργει Σπάρτηθεν ἶσαι χέρες, ἶσα δὲ τεύχη -συμβάλομεν Θυρέαι δʼ ἦσαν ἄεθλα δορός. -ἄμφω δʼ ἀπροφάσιστα τὸν οἴκαδε νόστον ἀφέντες -οἰωνοῖς θανάτου λείπομεν ἀγγελίαν. - -
-
- - -Theodoridas - - -Δηρίφατον κλαίω Τιμοσθένη, υἷα Μολοσσοῦ, -ξεῖνον ἐπὶ ξείνῃ Κεκροπίᾳ φθίμενον. -
-
- - -Anonymi Epigrammatici - - -ἁ πάρος ἄδμητος καὶ ἀνέμβατος, ὦ Λακεδαῖμον, -καπνὸν ἐπʼ Εὐρώτᾳ δέρκεαι Ὠλένιον, -ἄσκιος· οἰωνοὶ δὲ κατὰ χθονὸς οἰκία θέντες -μύρονται· μήλων δʼ οὐκ ἀίουσι λύκοι. -
-
- - -Anyte - - -ἦ ῥα μένος σε, Πρόαρχʼ, ὄλες1ʼ ἐν δαΐ, δῶμά τε πατρὸς -Φειδία ἐν δνοφερῷ πένθει ἔθου φθίμενος· -ἀλλὰ καλόν τοι ὕπερθεν ἔπος τόδε πέτρος ἀείδει, -ὡς ἔθανες πρὸ φίλας μαρνάμενος πατρίδος. -
-
- - -Callimachus - - - - Αἴνιε, καὶ σὺ γὰρ ὧδε, Μενέκρατες, οὐκ ἐπὶ πουλὺ -ἦσθα τί σε, ξείνων λῷστε, κατειργάσατο; -ἦ ῥα τὸ καὶ Κένταυρον; ὅ μοι πεπρωμένος ὕπνος -ἦλθεν, ὁ δὲ τλήμων οἶνος ἔχει πρόφασιν. -
-
- - -Leonidas - - -ἑσπέριον κἠῷον ἀπώσατο πολλάκις ὕπνον -ἡ γρηῢς πενίην Πλατθὶς ἀμυνομένη· - -καί τι πρὸς ἠλακάτην καὶ τὸν συνέριθον ἄτρακτον -ἤεισεν, πολιοῦ γήραος ἀγχίθυρος, -κἄτι παριστίδιος δινευμένη ἄχρις ἐπʼ ἠοῦς -κεῖνον Ἀθηναίης σὺν Χάρισιν δόλιχον, -ἢ ῥικνῇ ῥικνοῦ περὶ γούνατος ἄρκιον ἱστῷ -χειρὶ στρογγύλλους1ʼ ἱμερόεσσα κρόκην. -ὀγδωκονταέτις δʼ Ἀχερούσιον ηὔγασεν ὕδωρ -ἡ καλὴ καλῶς Πλατθὶς ὑφηναμένη. -
-
- - -Theaetetus - - -τὰν γνώμαν ἐδόκει Φιλέας οὐ δεύτερος ἄλλου -εἶμεν ὁ δὲ φθονερὸς κλαιέτω ἔσκε θάνῃ. -ἀλλʼ ἔμπας δόξας κενεὰ χάρις· εἰν ἀίδᾳ γὰρ -Μίνω Θερσίτας οὐδὲν ἀτιμότερος. -
-
- - -Callimachus - - -Ἱερέη Δήμητρος ἐγώ ποτε, καὶ πάλιν Καβείρων, -ὦνερ, καὶ μετέπειτα Δινδυμήνης, -ἡ γρηῢς γενόμην, ἡ νῦν κόνις, ἡνο -πολλῶν προστασίη νέων γυναικῶν. -καί μοι τέκνʼ ἐγένοντο δύʼ ἄρσενα, κἠπέμυς1ʼ ἐκείνων -εὐγήρως ἐνὶ χερσίν. ἕρπε χαίρων. -
-
- - -Tymnes - - -εὐειδὴς Τριτωνὶς ἐπʼ οὐκ ἀγαθαῖς ἐλοχεύθη -κλῃδόσιν οὐ γὰρ ἂν ὧδʼ ὤλετο δαιμονίη -ἀρτιτόκος· τὰ δὲ πολλὰ κατήγαγεν ἓν βρέφος ᾅδην -σὺν κείνῃ· δεκάτην δʼ οὐχ ὑπερῆρεν ἕω. - -
-
- - -Perses - - -δειλαία Μνάσυλλα, τί τοι καὶ ἐπʼ ἠρίῳ οὗτος -μυρομένᾳ κούραν γραπτὸς ἔπεστι τύπος -Νευτίμας; ἇς δὴ ποκʼ ἀπὸ ψυχὰν ἐρύσαντο -ὠδῖνες, κεῖται δʼ οἷα κατὰ βλεφάρων -ἀχλύι πλημμύρουσα φίλας ὑπὸ ματρὸς ἀγοστῷ· -αἰαῖ Ἀριστοτέλης δʼ οὐκ ἀπάνευθε πατὴρ -δεξιτερᾷ κεφαλὰν ἐπεμάσσετο. ὦ μέγα δειλοί, -οὐδὲ θανόντες ἑῶν ἐξελάθεσθʼ ἀχέων· -
-
- - -Leonidas - - -“ ἄμπελος ὣς ἤδη κάμακι στηρίζομαι αὐτῷ - σκηπανίῳ· καλέει μʼ εἰς ἀίδην Θάνατος. - δυσκώφει μὴ Γόργε· τί τοι χαριέστερον, ἢ τρεῖς -ἢ πίσυρας ποίας θάλψαι ὑπʼ ἠελίῳ;” -ὧδʼ εἴπας οὐ κόμπῳ, ἀπὸ ζωὴν ὁ παλαιὸς -ὤσατο, κἠς πλεόνων ἦλθε μετοικεσίην. -
-
- - -Theodoridas - - - -ᾬχευ ἔτʼ ἀσκίπων Κινησία, Ἑρμόλα υἱὲ -ἐκτίσων Ἀίδῃ χρεῖος ὀφειλόμενον, -γήρᾳ ἔτʼ ἄρτια πάντα φέρων· χρήστην δὲ δίκαιον -εὑρών σε στέρξει παντοβίης Ἀχέρων. -
-
- - -Diotimus - - -† Αἰνόμενοι δύο γρῆες ὁμήλικες ἦμεν, Ἀναξὼ -καὶ Κληνώ, δίδυμοι παῖδες Ἐπικράτεος -Κληνὼ μὲν Χαρίτων ἱερή, Δήμητρι δʼ Ἀναξὼ -ἐν ζωῇ προπολεῦς1ʼ ἐννέα δʼ ἠελίων - -ὀγδωκονταέτεις ἔτι λειπόμεθʼ ἐς τόδʼ ἱκέσθαι -τῆς μοίρης· ἐτέων δʼ οὐ φθόνος † ἰσοσίη. -καὶ πόσιας καὶ τέκνα φιλήσαμεν αἱ δὲ παλαιαὶ -πρῶθʼ ἡμεῖς Ἀίδην πρηῢν ἀνυσσάμεθα. -
-
- - -Anonymi Epigrammatici - - -† ἦξεν ὅλατιτυτειδεστι. τί γάρ; νέκυς ω ποτι παίδων -τῶν ἀγαθῶν ἠδʼ ἦν ἀρχιγέρων ὁ γέρων, -ἀλλὰ φίλος γʼ ὦ πρέσβυ, γένοιτό τευ ὄλβια τέκνα -ἐλθεῖν καὶ λευκῆς ἐς δρόμον ἡλικίης. -
-
- - -Damagetus - - -ὑστάτιον, Φώκαια, κλυτὴ πόλι, τοῦτο Θεανὼ -εἶπεν ἐς ἀτρύγετον νύκτα κατερχομένη· -“ οἴμοι ἐγὼ δύστηνος· Ἀπέλλιχε, ποῖον, ὅμευνε, - ποῖον ἐπʼ ὠκείῃ νηὶ περᾷς πέλαγος; -αὐτὰρ ἐμεῦ σχεδόθεν μόρος ἵσταται. ὡς ὄφελόν γε - χειρὶ φίλην τὴν σὴν χεῖρα λαβοῦσα θανεῖν.” -
-
- - -Leonidas - - -μὴ φθείρευ, ὤνθρωπε, περιπλάνιον βίον ἕλκων, -ἄλλην ἐξ ἄλλης εἰς χθόνʼ ἀλινδόμενος, -μὴ φθείρευ, κἂν εἴ σε περιστέψαιτο καλιὴ -ἣν θάλποι μικκὸν πῦρ ἀνακαιόμενον, -εἰ καί σοι λιτή τε καὶ οὐκ εὐάλφιτος εἴη -φυστὴ ἐνὶ γρώνῃ μασσομένη παλάμαις, -ἢ καί σοι γλήχων, ἢ καὶ θύμον, ἢ καὶ ὁ πικρὸς -ἁδυμιγὴς εἴη χόνδρος ἐποψίδιος. -
-
- - -Anonymi Epigrammatici - - -ἐνθάδʼ ἐγὼ λῃστῆρος ὁ τρισδείλαιος ἄρηι -ἐδμήθην κεῖμαι δʼ οὐδενὶ κλαιόμενος. - -
-
- - -Theodoridas - - -Κληῖδες Κύπρου σε καὶ ἐσχατιαὶ Σαλαμῖνος, -Τίμαρχʼ, ὑβριστής τʼ ὤλεσε Λὶψ ἄνεμος, -νηί τε σὺν φόρτῳ τε· κόνιν δέ σου ἀμφιμέλαιναν -δέξαντʼ οἰζυροί, σχέτλιε, κηδεμόνες. -
-
- - -Phaedimus - - -αἰάζω Πολύανθον, ὃν εὐνέτις, ὦ παραμείβων, -νυμφίον ἐν τύμβῳ θῆκεν Ἀρισταγόρη, -δεξαμένη σποδιήν τε καὶ ὀστέα ʽ τὸν δὲ δυσαὲς -ὤλεσεν Αἰγαίου κῦμα περὶ Σκίαθονʼ, -δύσμορον ὀρθρινοί μιν ἐπεὶ νέκυν ἰχθυβολῆες, -ξεῖνε, Τορωναίων εἵλκυσαν ἐς λιμένα. -
-
- - -Leonidas - - -αὐτὰ ἐπὶ Κρήθωνος ἐγὼ λίθος, οὔνομα κείνου -δηλοῦσα· Κρήθων δʼ ἐν χθονίοις σποδιά. -ὁ πρὶν καὶ Γύγῃ παρισεύμενος ὄλβον, ὁ τὸ πρὶν -βουπάμων, ὁ πρὶν πλούσιος αἰπολίοις, -ὁ πρὶν — τί πλείω μυθεῦμαι; ὁ πᾶσι μακαρτός, -φεῦ, γαίης ὅσσης ὅσσον ἔχει μόριον. -
-
- - -Crinagoras - - -Ὀθρυάδην, Σπάρτης τὸ μέγα κλέος, ἢ Κυνέγειρον -ναύμαχον, ἢ πάντων ἔργα κάλει πολέμων -Ἄρεος αἰχμητὴς Ἰταλὸς παρὰ χεύμασι Ῥήνου -κλινθείς, ἐκ πολλῶν ἡμιθανὴς βελέων, -αἰετὸν ἁρπασθέντα φίλου στρατοῦ ὡς ἴδʼ ὑπʼ ἐχθροῖς, -αὖτις ἀρηιφάτων ἄνθορεν ἐκ νεκύων -κτείνας δʼ ὃς σφʼ ἐκόμιζεν, ἑοῖς ἀνεσώσατο ταγοῖς, -μοῦνος ἀήττητον δεξάμενος θάνατον. - -
-
- - -Apollonides - - -οὐκέτι Τιμόκλεια τεῶν φάος ὤλεσας ὄσσων -κούρους δοιοτόκῳ νηδύι γειναμένη· -ὄμμασι δʼ ἐν πλεόνεσσιν ἀθρεῖς πυριθαλπὲς ʽὄχημα -ἠελίου, προτέρης οὖσα τελειοτέρη. -
-
- - -Antipater - - -εἴκοσιν Ἑρμοκράτεια καὶ ἐννέα τέκνα τεκοῦσα -οὔτε ἑνὸς οὔτε μιᾶς αὐγασάμην θάνατον. -οὐ γὰρ ἀπωίστευσεν ἐμοὺς υἱῆας Ἀπόλλων, -οὐ βαρυπενθήτους Ἄρτεμις εἷλε κόρας· -ἔμπαλι δʼ ἁ μὲν ἔλυσεν ἐμὰν ὠδῖνα μολοῦσα, -Φοῖβος δʼ εἰς ἥβαν ἄρσενας ἀγάγετο -ἀβλαβέας νούσοισιν. ἴδʼ ὡς νίκημι δικαίως -παισὶν καὶ γλώσσῃ σώφρονι Τανταλίδα. -
-
- - -Diogenes Laertius - - -ἐν Μέμφει λόγος ἐστὶ μαθεῖν ἰδίην ποτε μοίρην -εὔδοξόν παρὰ τοῦ καλλίκερω ταύρου· -κοὐδὲν ἔλεξε· πόθεν; βοῒ γὰρ λόγον οὐ πόρε φύτλη, -οὐδὲ λάλον μόσχῳ Ἄπιδι στόμα· -ἀλλὰ παρʼ αὐτὸν λέχριος στὰς ἐλιχμήσατο στόλον, -προφανῶς τοῦτο διδάσκων “ Ἀποδύσῃ βιοτὴν -ὅσσον οὔπω.” διὸ καὶ οἱ ταχέως ἦλθε μόρος, δεκάκις -πέντε καὶ τρεῖς εἰσιδόντα ποίας. -
-
- - -Antipater - - -Ἴβυκε, ληισταί σε κατέκτανον ἔκ ποτε νηὸς· -βάντʼ ἐς ἐρημαίην ἄστιβον ἠιόνα, -ἀλλʼ ἐπιβωσάμενον γεράνων νέφος, αἵ τοι ἵκοντο -μάρτυρες ἄλγιστον ὀλλυμένῳ θάνατον - -οὐδὲ μάτην ἰάχησας, ἐπεὶ ποινῆτις Ἐρινὺς -τῶνδε διὰ κλαγγὴν τίσατο σεῖο φόνον -Σισυφίην κατὰ γαῖαν. ἰὼ φιλοκερδέα φῦλα -ληιστέων, τί θεῶν οὐ πεφόβησθε χόλον; -οὐδὲ γὰρ ὁ προπάροιθε κανὼν Αἴγισθος ἀοιδὸν -ὄμμα μελαμπέπλων ἔκφυγεν Εὐμενίδων. -
-
- - -Pittacus - - - -ὧδε μέγας κεῖται Ζάν ὃν Δία κικλήσκουσιν. -
-
- - -Libanius - - -Ἰουλιανὸς μετὰ Τίγριν ἀγάρροον ἐνθάδε κεῖται, -ἀμφότερον, βασιλεὺς τʼ ἀγαθὸς κρατερός τʼ αἰχμητής. -
-
- - -Antipater - - -τίς τόδε μουνόγληνος ἅπαν δωμήσατο Κύκλωψ -λάινον Ἀσσυρίης χῶμα Σεμιράμιος, -ἢ ποῖοι χθονὸς υἷες ἀνυψώσαντο Γίγαντες -κείμενον ἑπταπόρων ἀγχόθι Πληιάδων -ἀκλινές, ἀστυφέλικτον, Ἀθωέος ἶσον ἐρίπνᾳ -φυρηθὲν γαίης εὐρυπέδοιο βάρος; -δᾶμος ἀεὶ μακαριστός, ὃς ἄστεσιν Ἡρακλείης -οὐρανίων [νεφέων τεῦξεν ἐπʼ] εὐρυάλων. -
-
- -
- -
- - -Gregorius Nazianzenus - - - -ἐνθάδε τύμβος ἔχει θεοειδέας ἀνέρας ἐσθλούς, -θεῖον Ἰωάννην, τὸν πάνυ Θευδόσιον, -ὧν ἀρετὴ πολύολβος ἐς οὐρανοῦ ἄντυγας ἦλθε, -καὶ φωτὸς μετόχους δεῖξεν ἀκηρασίου, -
-
- - -Gregorius Nazianzenus - - - -σῶμα δίχα ψυχῆς ζώειν πάρος ἢ ἐμὲ σεῖο, -Βασίλιε, Χριστοῦ λάτρι, φίλʼ, ὠιόμην -ἀλλʼ ἔτλην καὶ ἔμεινα. τί μέλλομεν; οὒ μʼ ἀναείρας -θήσεις ἐς μακάρων σήν τε χοροστασίην; -μή με λίπῃς, μή, τύμβον ἐπόμνυμι· οὔ ποτε σεῖο -λήσομαι, οὐδὲ θέλων. Γρηγορίοιο λόγος. -
-
- - -Gregorius Nazianzenus - - - -ἡνίκα Βασιλίοιο θεόφρονος ἥρπασε πνεῦμα -ἡ Τριὰς ἀσπασίως ἔνθεν ἐπειγομένου, -πᾶσα μὲν οὐρανίη στρατιὴ γήθησεν ἰόντι, -πᾶσα δὲ Καππαδοκῶν ἐστονάχησε πόλις -οὐκ οἶον κόσμος δὲ μέγʼ ἴαχεν “ὤλετο κῆρυξ, -ὤλετο εἰρήνης δεσμὸς ἀριπρεπέος ” -
-
- - -Gregorius Nazianzenus - - - -κόσμος ὅλος μύθοισιν ὑπʼ ἀντιπάλοισιν ἀεικῶς -σείεται, ὁ Τριάδος κλῆρος ὁμοσθενέος· -αἰαῖ· Βασιλίου δὲ μεμυκότα χείλεα σιγᾷ. -ἔγρεο· καὶ στήτω σοῖσι λόγοισι σάλος -σαῖς τε θυηπολίῃσι· σὺ γὰρ μόνος ἶσον ἔφηνας -καὶ βίοτον ἔφηνας καὶ βιότητι λόγον. -
-
- - -Gregorius Nazianzenus - - - -εἷς θεὸς ὑψιμέδων ἕνα δʼ ἄξιον ἀρχιερῆα -ἡμετέρη γενεὴ εἶδέ σε, Βασίλιε, -ἄγγελον ἀτρεκίης ἐριηχέα, ὄμμα φαεινὸν -Χριστιανοῖς, ψυχῆς κάλλεσι λαμπόμενον, -Πόντου Καππαδοκῶν τε μέγα κλέος εἰσέτι καὶ νῦν, -λίσσομʼ, ὑπὲρ κόσμου ἵστασο δῶρʼ ἀνάγων. -
-
- - -Gregorius Nazianzenus - - - -ἐνθάδε Βασιλίοιο Βασίλιον ἀρχιερῆα -θέντο με Καισαρέες, Γρηγορίοιο φίλον, -ὃν περὶ κῆρι φίλησα· θεὸς δέ οἱ ὄλβια δοίη -ἄλλα τε, καὶ ζωῆς ὡς τάχος ἀντιάσαι -ἡμετέρης· τί δʼ ὄνειαρ ἐπὶ χθονὶ δηθύνοντα -τήκεσθʼ, οὐρανίης μνωόμενον φιλίης; -
-
- - -Gregorius Nazianzenus - - - -τυτθὸν ἔτι πνείεσκες ἐπὶ χθονί, πάντα δὲ Χριστῷ -δῶκας ἄγων, ψυχήν, σῶμα, λόγον, παλάμας, -Βασίλιε, Χριστοῖο μέγα κλέος, ἕρμʼ ἱερήων, -ἕρμα πολυσχίστου νῦν πλέον ἀτρεκίης. - -
-
- - -Gregorius Nazianzenus - - - -ὦ μύθοι, ὦ ξυνὸς φιλίης δόμος, ὦ φίλʼ Ἀθῆναι, -ὦ θείου βιότου τηλόθε συνθεσίαι, -ἴστε τόδʼ, ὡς Βασίλειος ἐς οὐρανόν, ὡς ποθέεσκεν., -Γρηγόριος δʼ ἐπὶ γῆς χείλεσι δεσμὰ φέρων. -
-
- - -Gregorius Nazianzenus - - - -Καισαρέων μέγʼ ἄεισμα, φαάντατε ὦ Βασίλειε, -βροντὴ σεῖο λόγος, ἀστεροπὴ δὲ βίος· -ἀλλὰ καὶ ὣς ἕδρην ἱερὴν λίπες· ἤθελεν οὕτω -Χριστός, ὅπως μίξῃ ς1ʼ ὡς τάχος οὐρανίοις. -
-
- - -Gregorius Nazianzenus - - - -βένθεα πάντʼ ἐδάης τὰ πνεύματος, ὅσσα τʼ ἔασι -τῆς χθονίης σοφίης· ἔμπνοον ἱρὸν ἔης. -
-
- - -Gregorius Nazianzenus - - - -ὀκτάετες λαοῖο θεόφρονος ἡνία τείνας, -τοῦτο μόνον τῶν σῶν, ὦ Βασίλειʼ, ὀλίγον. -
-
- - -Gregorius Nazianzenus - - - -χαίροις, ὦ Βασίλειε, καὶ εἰ λίπες ἡμέας, ἔμπης· -Γρηγορίου τόδε σοι γράμμʼ ἐπιτυμβίδιον, -μῦθος ὅδʼ ὃν φιλέεσκες· ἔχοις χερός. ὦ Βασίλειε, -τῆς φιλίης καὶ σοὶ δῶρον ἀπευκτότατον. -Γρηγόριος, Βασίλειε, τεῇ κόνι τήνδʼ ἀνέθηκα -τῶν ἐπιγραμματίων, θεῖε, δυωδεκάδα. - -
-
- - -Gregorius Nazianzenus - - - -ἔνθʼ ἑκατονταέτης, ζωῆς βροτέης καθύπερθε, -πνεύματι καὶ θώκῳ τεσσαρακονταέτης, -μείλιχος, ἡδυεπής, λαμπρὸς Τριάδος ὑποφήτης, -νήδυμον ὕπνον ἔχω, Γρηγορίοιο δέμας· -ψυχὴ δὲ πτερόεσσα λάχεν Θεόν. ἀλλʼ ἱερῆες -ἁζόμενοι κείνου καὶ τάφον ἀμφέπετε. -
-
- - -Gregorius Nazianzenus - - - -ἔκ με πικρῆς ἐκάλεσσε Θεός μέγας ἀγριελαίης, -ποίμνης δʼ ἡγεμόνα θῆκε τὸν οὐδʼ ὀίων -ἔσχατον ἐκ πλευρῆς δὲ θεόφρονος ὄλβον ἔνειμεν -γῆρας δʼ ἐς λιπαρὸν ἱκόμεθʼ ἀμφότεροι,. -ἱρὸς ἐμῶν τεκέων ἀγανώτατος· εἰ δὲ τελευτὴν -ἔτλην Γρηγόριος, οὐ μέγα· θνητὸς ἔην. -
-
- - -Gregorius Nazianzenus - - - -εἴ τις ὄρους καθύπερθεν ἁγνῆς ὀπὸς ἔπλετο μύστης -Μωσῆς, καὶ μεγάλου Γρηγορίοιο νόος, -ὅν ποτε τηλόθʼ ἐόντα χάρις μέγαν ἀρχιερῆα -θήκατο νῦν δʼ ἱερῆς ἐγγὺς ἔχει Τριάδος. -
-
- - -Gregorius Nazianzenus - - - -αὐτὸς νηὸν ἔρεψα Θεῷ, καὶ δῶχʼ ἱερῆα -Γρηγόριον καθαρῇ λαμπόμενον Τριάδι, -ἄγγελον ἀτρεκίης ἐριηχέα, ποιμένα λαῶν, -ἠίθεον σοφίης ἀμφοτέρης πρύτανιν. - -
-
- - -Gregorius Nazianzenus - - - -τέκνον ἐμόν, τὰ μὲν ἄλλα πατρὸς καὶ φέρτερος εἴης, -τὴν δʼ ἀγανοφροσύνην ἄξιος ʽοὔ τι πλέον -εὔξασθαι θέμις ἐστἴ· καὶ ἐς βαθὺ γῆρας ἵκοιο, -τοίου κηδεμόνος, ὦ μάκαρ, ἀντιάσας. -
-
- - -Gregorius Nazianzenus - - - -οὐκ ὄις, εἶτʼ ὀίων προφερέστατος1· αὐτὰρ ἔπειτα -ποιμήν, εἶτα πατήρ, καὶ νομέων νομέας, -θνητοὺς ἀθάνατόν τε Θεὸν μέγαν εἰς ἓν ἀγείρων, -κεῖμαι Γρηγόριος Γρηγορίου γενέτης. -ὄλβιος, εὐγήρως, εὔπαις θάνον, ἀρχιερῆος -ἀρχιερεύς τε πατήρ, Γρηγόριος· τί πλέον; -
-
- - -Gregorius Nazianzenus - - - -οὔτι μὲν ἐς πολύκαρπον ἀλωὴν ὄρθριος ἦλθον, -ἔμπα δὲ τῶν προτέρων πλείονα μισθὸν ἔχω -Γρηγόριος, ποιμήν τε καλὸς καὶ πλείονα ποίμνην -Χριστῷ ἀναθρέψας ἤθεσι μειλιχίοις. -
-
- - -Gregorius Nazianzenus - - - -οὐχ ὁσίης ῥίζης μὲν ἐγὼ θάλος, εὐαγέος δὲ -συζυγίης κεφαλὴ καὶ τεκέων τριάδος· -ποίμνης ἡγεμόνευσα ὁμόφρονος· ἔνθεν ἀπῆλθον -πλήρης καὶ χθονίων κοὐρανίων ἐτέων. -
-
- - -Gregorius Nazianzenus - - - -Γρηγόριος, τὸ δὲ θαῦμα, χάριν καὶ πνεύματος αἴγλην -ἔνθεν ἀειρόμενος ῥῖψʼ ἐπὶ παιδὶ φίλῳ. - -
-
- - -Gregorius Nazianzenus - - - -τυτθὴ μάργαρός ἐστιν, ἀτὰρ λιθάκεσσιν ἀνάσσει, -τυτθὴ καὶ Βηθλέμ, ἔμπα δὲ χριστοφόρος· -ὣς δʼ ὀλίγην μὲν ἐγὼ ποίμνην λάχον, ἀλλὰ φερίστην -Γρηγόριος, τὴν σύ, παῖ φίλε, λίσσομʼ, ἄγοις. -
-
- - -Gregorius Nazianzenus - - - -Ποιμενίην σύριγγα τεαῖς ἐν χερσὶν ἔθηκα -Γρηγόριος· σὺ δέ μοι τέκνον ἐπισταμένως -σημαίνειν ζωῆς δὲ θύρας πετάσειας ἅπασιν, -ἐς δὲ τάφον πατέρος ὥριος ἀντιάσαις. -
-
- - -Gregorius Nazianzenus - - - -Στράψε μὲν οἷς τὸ πάροιθεν ἐν οὔρεϊ Χριστὸς ἀμείφθη, -στράψε δὲ Γρηγορίου τοῦ καθαροῖο νόῳ, , -τῆμος ὅτʼ εἰδώλων ἔφυγε ζόφον ὡς δʼ ἐκαθάρθη, -ᾗσι θυηπολίαις λαὸν ὃν εἰσέτʼ ἄγει. -
-
- - -Gregorius Nazianzenus - - - -παντός σοι μύθοιο καὶ ἔργματος ἦεν ἄριστον -ἦμαρ κυριακόν. πένθεϊ πένθος ἅπαν, -μῆτερ ἐμή, τίουσα, μόναις ὑπόεικες ἑορταῖς. -εὐφροσύνης, ἀχέων ἵστορα νηὸν ἔχεις· -χῶρος ἅπας δάκρυσι τεοῖς σφρηγίζετο, μῆτερ -μούνῳ δὲ σταυρῷ πήγνυτο καὶ δάκρυα. -
-
- - -Gregorius Nazianzenus - - - -οὔποτε σεῖο τράπεζα, θυηδόχος ἔδρακε νῶτα, -οὐδὲ διὰ στομάτων ἦλθε βέβηλον ἔπος· -οὐδὲ γέλως μαλακῇσιν ἐφίζανε, μύστι, παρειαῖς. -σιγήσω κρυφίους σεῖο, μάκαιρα, πόνους. -καὶ τὰ μὲν ἔνδοθι τοῖα, τὰ δʼ ἔκτοθι πᾶσι πέφανται· -τοὔνεκα καὶ θείῳ σῶμʼ ἀπέλειπες ἕδει. - -
-
- - -Gregorius Nazianzenus - - - -πῶς ἐλύθη Νόννης καλὰ γούνατα; πῶς δὲ μέμυκεν -χείλεα; πῶς ὄσσων οὐ προχέει λιβάδας; -ἄλλοι δʼ αὖ βοόωσι παρʼ ἠρίον ἡ δὲ τράπεζα -οὐκέτʼ ἔχει καρποὺς τῆς μεγάλης παλάμης· -χῶρος δʼ ἐστὶν ἔρημος ἁγνοῦ ποδός, οἱ δʼ ἱερῆες -οὐκέτʼ ἐπὶ τρομερὴν κρατὶ βαλοῦσι χέρα. -χῆραι δʼ ὀρφανικοί τε, τί ῥέξετε; παρθενίη δὲ -καὶ γάμος εὐζυγέων, κέρσατʼ ἄπο πλοκάμους, - -τοῖσιν ἀγαλλομένη κρατὸς φέρε πάντα χαμᾶζε, -τῆμος ὅτʼ ἐν νηῷ ῥικνὸν ἀφῆκε δέμας, -
-
- - -Gregorius Nazianzenus - - - -Σάρρα σοφὴ τίουσα φίλον πόσιν ἀλλὰ σύ, μῆτερ, -πρῶτα Χριστιανόν, εἶθʼ ἱερῆα μέγαν, -σὸν πόσιν ἐσθλὸν ἔθηκας ἀπόπροθι φωτὸς ἐόντα. -Ἄννα, σὺ δʼ υἷα φίλον καὶ τέκες εὐξαμένη, -καὶ νηῷ μιν ἔδωκας ἁγνὸν θεράποντα Σαμουήλ -ἡ δʼ ἑτέρη κόλποις Χριστὸν ἔδεκτο μέγαν -Νόννα δʼ ἀμφοτέρων ἔλαχε κλέος· ὑστάτιον δὲ -νηῷ λισσομένη πάρθετο σῶμα φίλον. -
-
- - -Gregorius Nazianzenus - - - -Ἐμπεδόκλεις, σὲ μὲν αὐτίκʼ ἐτώσια φυσιόωντα -καὶ βροτὸν Αἰτναίοιο πυρὸς κρητῆρες ἔδειξαν -Νόννα δʼ οὐ κρητῆρας ἐσήλατο, πρὸς δὲ τραπέζῃ -τῇδέ ποτʼ εὐχομένη καθαρὸν θύος ἔνθεν ἀέρθη, -καὶ νῦν θηλυτέρῃσι μεταπρέπει εὐσεβέεσσι, -Σουσάννῃ, Μαριάμ τε καὶ Ἄνναις, ἕρμα γυναικῶν. - -
-
- - -Gregorius Nazianzenus - - - -Ἥρακλες, Ἐμπεδότιμε, Τροφώνιε, εἴξατε μύθων, -καὶ σὺ γʼ Ἀρισταίου κενεαυχέος ὀφρὺς ἄπιστε· -ὑμεῖς μὲν θνητοὶ καὶ οὐ μάκαρες παθέεσσι· -θυμῷ δʼ ἄρρενι Νόννα βίου τμήξασα κέλευθον, -χριστοφόρος, σταυροῖο λάτρις, κόσμοιο περίφρων, -ἥλατʼ ἐπουρανίην εἰς ἄντυγα ὡς ποθέεσκεν, -τρίσμακαρ ἐν νηῷ σῶμʼ ἀποδυσαμένη. -
-
- - -Gregorius Nazianzenus - - - -Γρηγόριον βοόωσα παρʼ ἀνθοκόμοισιν ἀλωαῖς -ἤντεο, μῆτερ ἐμή, ξείνης ἄπο νισσομένοισι, -χεῖρας δʼ ἀμπετάσασα φίλας τεκέεσσι φίλοισι, -Γρηγόριον βοόωσα· τὸ δʼ ἔζεεν αἷμα τεκούσης -ἀμφοτέροις ἐπὶ παισί, μάλιστα δὲ θρέμματι θηλῆς· -τοὔνεκα καὶ σὲ τόσοις ἐπιγράμμασι, μῆτερ, ἔτισα. -
-
- - -Gregorius Nazianzenus - - - -ἄλλη μὲν κλεινή τις ἐνοικιδίοισι πόνοισιν, -ἄλλη δʼ ἐκ χαρίτων ἠδὲ σαοφροσύνης, -ἄλλη δʼ εὐσεβίης ἔργοις καὶ σαρκὸς ἀνίαις, -δάκρυσιν, εὐχωλαῖς, χερσὶ πενητοκόμοις· -Νόννα δʼ ἐν πάντεσσιν ἀοίδιμος· εἰ δὲ τελευτὴν -τοῦτο θέμις καλέειν, κάτθανεν εὐχομένη. -
-
- - -Gregorius Nazianzenus - - - -τέκνον ἐμῆς θηλῆς, ἱερὸν θάλος, ὡς ἐπόθησα, -οἴχομαι εἰς ζωήν, Γρηγόριʼ, οὐρανίην - -καὶ γὰρ πόλλʼ ἐμόγησας ἐμὸν κομέων πατέρος τε -γῆρας, ἃ καὶ Χριστοῦ βίβλος ἔχει μεγάλη· -ἀλλά, φίλος, τοκέεσσιν ἐφέσπεο, καί σε τάχιστα -δεξόμεθʼ ἡμετέροις φάεσι προφρονέως. -
-
- - -Gregorius Nazianzenus - - - -ψυχὴ μὲν πτερόεσσα πρὸς οὐρανὸν ἤλυθε Νόννης, -σῶμα δʼ ἄρʼ ἐκ νηοῦ Μάρτυσι παρθέμεθα. -Μάρτυρες, ἀλλʼ ὑπόδεχθε θύος μέγα, τὴν πολύμοχθον -σάρκα καὶ ὑμετέροις αἵμασιν ἑσπομένην, -αἵμασιν ὑμετέροισιν, ἐπεὶ ψυχῶν ὀλετῆρος -δηναιοῖσι πόνοις κάρτος ἔπαυσε μέγα. -
-
- - -Gregorius Nazianzenus - - - -οὐ μόσχων θυσίην σκιοειδέα, οὐδὲ χιμάρρων, -οὐδὲ πρωτοτόκων Νόννʼ ἀνέθηκε Θεῷ· -ταῦτα νόμος προτέροισιν, ὅτʼ εἰκόνες· ἡ δʼ ἄρʼ ἑαυτὴν -δῶκεν ὅλην βιότῳ, μάνθανε, καὶ θανάτῳ. -
-
- - -Gregorius Nazianzenus - - - -εὐχομένη βοόωσα παρʼ ἁγνοτάτῃσι τραπέζαις -Νόννα λύθη, φωνὴ δʼ ἐδέθη καὶ χείλεα καλὰ -γηραλέης. τί τὸ θαῦμα; θεὸς θέλεν ὑμνήτειραν -γλῶσσαν ἐπʼ εὐφήμοισι λόγοις κληῖδα βαλέσθαι· -καὶ νῦν οὐρανόθεν μέγʼ ἐπεύχεται ἡμερίοισιν. -
-
- - -Gregorius Nazianzenus - - - -εὐχωλαῖς καὶ πόντον ἐκοίμισε Νόννα θεουδὴς -οἷς τεκέεσσι φίλοισι, καὶ ἐκ περάτων συνάγειρεν -ἀντολίης δύσιός τε, μέγα κλέος, οὐ δοκέοντας, -μητρὸς ἔρως· νοῦσόν τε πικρὴν ἀποέργαθεν ἀνδρός· -λισσομένη, τὸ δὲ θαῦμα, λίπεν βίον ἔνδοθι νηοῦ. - -
-
- - -Gregorius Nazianzenus - - - -πολλάκις ἔκ με νόσων τε καὶ ἀργαλέων ὀρυμαγδῶν, -σεισμῶν τε κρυερῶν, καὶ ἄγρια κυμαίνοντος -οἴδματος ἐξεσάωσας, ἐπεὶ Θεὸν ἵλαον εἶχες· -ἀλλὰ σάω καὶ νῦν με, πάτερ, μεγάλῃσι λιτῇσι, -καὶ σύ, τεκοῦσα, μάκαιρα ἐν εὐχωλῇσι θανοῦσα. -
-
- - -Gregorius Nazianzenus - - - -Νόνναν ἐπουρανίοισιν ἀγαλλομένην φαέεσσι, -καὶ ῥίζης ἱερῆς πτόρθον ἀειθαλέα, -Γρηγορίου ἱερῆος ὁμόζυγα, καὶ πραπίδεσσιν -εὐαγέων τεκέων μητέρα, τύμβος ἔχω. -
-
- - -Gregorius Nazianzenus - - - -εὐχαί τε στοναχαί τε φίλαι καὶ νύκτες ἄυπνοι, -καὶ νηοῖο πέδον δάκρυσι δευόμενον, -σοί, Νόννα ζαθέη, τοίην βιότοιο τελευτὴν -ὤπασαν, ἐν νηῷ ψῆφον ἑλεῖν θανάτου. -
-
- - -Gregorius Nazianzenus - - - -μούνη σοὶ φωνὴ περιλείπετο, Νόννα φαεινή, -πάνθʼ ἄμυδις ληνοῖς ἐνθεμένη μεγάλοις, -ἐκ καθαρῆς κραδίης ἁγνὸν θύος· ἀλλʼ ἄρα καὶ τὴν -ὑστατίην νηῷ λεῖπες ἀειρομένη. -
-
- - -Gregorius Nazianzenus - - - -οὐδὲ θάνεν νηοῖο θυώδεος ἔκτοθι Νόννα, -φωνὴν δὲ προτέρην ἥρπασε Χριστὸς ἄναξ -λισσομένης· πόθεεν γὰρ ἐν εὐχωλῇσι τελέσσαι -τόνδε βίον πάσης ἁγνότερον θυσίης. - -
-
- - -Gregorius Nazianzenus - - - -Νόννʼ ἱερή, σὺ δὲ πάντα Θεῷ βίον ἀντείνασα -ὑστάτιον ψυχὴν δῶκας ἁγνὴν θυσίην -τῇδε γὰρ εὐχομένη ζωὴν λίπες· ἡ δὲ τράπεζα, -μῆτερ ἐμή, τῷ σῷ δῶκε κλέος θανάτῳ. -
-
- - -Gregorius Nazianzenus - - - -τῆσδε πατήρ μὲν ἐμὸς λάτρις μέγας ἦε τραπέζης -μήτηρ δʼ εὐχομένη πὰρ ποσὶ λῆξε βίου, -Γρηγόριος Νόννα τε μεγακλέες· εὔχομʼ ἄνακτι -τοῖαν ἐμοὶ ζωὴν καὶ τέλος ἀντιάσαι. -
-
- - -Gregorius Nazianzenus - - - -“ πολλά, τράπεζα φίλη, Νόννης καὶ δάκρυʼ ἐδέξω· - δέχνυσο καὶ ψυχήν, τὴν πυμάτην θυσίην.” -εἶπε καὶ ἐκ μελέων κέαρ ἔπτατο· ἓν δʼ ἄρα μοῦνον, -παῖδʼ ἐπόθει, τεκέων τὸν ἔτι λειπόμενον. -
-
- - -Gregorius Nazianzenus - - - -ἔνθα ποτʼ εὐχομένης τόσσον νόος ἔπτατο Νόννης, -μέσφʼ ὅτε καὶ ψυχὴ ἕσπετʼ ἀειρομένῳ· -εὐχομένης δὲ νέκυς ἱερῇ παρέκειτο τραπέζῃ. -γράψατʼ ἐπερχομένοις θαῦμα τόδʼ, εὐσεβέες. -
-
- - -Gregorius Nazianzenus - - - -τίς θάνεν ὡς θάνε Νόννα, παρʼ εὐαγέεσσι τραπέζαις, -τῶν ἱερῶν σανίδων χερσὶν ἐφαπτομένη; -τίς λύσεν εὐχομένης Νόννης τύπον; ὡς ἐπὶ δηρὸν -ἤθελεν ἔνθα μένειν καὶ νέκυς εὐσεβέων. - -
-
- - -Gregorius Nazianzenus - - - -ἔνθα ποτʼ εὐχομένῃ Νόννῃ Θεὸς εἶπεν ἄνωθεν -ἔρχεο· ἡ δʼ ἐλύθη σώματος ἀσπασίως, -χειρῶν ἀμφοτέρων τῇ μὲν κατέχουσα τράπεζαν, -τῇ δʼ ἔτι λισσομένη· ἵλαθι, Χριστὲ ἄναξ. - -
-
- - -Gregorius Nazianzenus - - - -ῥίζης εὐσεβέος γενόμην καὶ σὰρξ ἱερῆος, -καὶ μήτηρ· Χριστῷ σῶμα, βίον, δάκρυα, -πάντʼ ἐκένωσα φέρουσα· τὸ δʼ ἔσχατον, ἔνθεν ἀέρθην -νηῷ γηραλέον Νόννα λιποῦσα δέμας. -
-
- - -Gregorius Nazianzenus - - - -πίστις Ἐνὼχ μετέθηκε καὶ Ἠλίαν, ἐν δὲ γυναιξὶ -μητέρʼ ἐμὴν πρώτην οἶδε τράπεζα τόδε, -ἔνθεν ἀναιμάκτοισιν ὁμοῦ θυέεσσιν ἀέρθη -εἰσέτι λισσομένη σώματι Νόννα φίλη. -
-
- - -Gregorius Nazianzenus - - - -οὐ νόσος, οὐδέ σε γῆρας ὁμοίιον, οὔ σὲ γʼ ἀνίη, -καίπερ γηραλέην, μῆτερ ἐμή, δάμασεν -ἀλλʼ ἄτρωτος, ἄκαμπτος ἁγνοῖς ὑπὸ ποσσὶ τραπέζης, -εὐχομένη Χριστῷ, Νόννʼ, ἀπέδωκας ὄπα. -
-
- - -Gregorius Nazianzenus - - - -δῶκε Θεῷ θυσίην Ἀβραὰμ πάιν, ὣς δὲ θύγατρα -κλεινὸς Ἰεφθάε, ἀμφότεροι μεγάλην -μῆτερ ἐμή, σὺ δʼ ἔδωκας ἁγνὸν βίον, ὑστάτιον δὲ -ψυχήν, εὐχωλῆς, Νόννα, φίλον σφάγιον. - -
-
- - -Gregorius Nazianzenus - - - -Σάρρα φίλη, πῶς τὸν σὸν Ἰσαὰκ λίπες, ἦ ποθέουσα -τῶν Ἀβραὰμ κόλπων ὡς τάχος ἀντιάσαι, -Νόννα, Γρηγορίοιο θεόφρονος; ἦ μέγα θαῦμα -μηδὲ θανεῖν νηῶν ἔκτοθι καὶ θυέων. -
-
- - -Gregorius Nazianzenus - - - -Μάρτυρες, ἱλήκοιτε· μόγοις γε μὲν οὔτι χερείων -Νόννα φίλη, κρυπτῷ κἀμφαδίῳ πολέμῳ· -τοὔνεκα καὶ τοίης κύρσεν βιότοιο τελευτῆς, -εὐχῆς καὶ ζωῆς ἓν τέλος εὑραμένη. -
-
- - -Gregorius Nazianzenus - - - -ἡ Τριὰς ἣν ποθέεσκες, ὁμὸν σέλας, ἕν τε σέβασμα, -ἐκ νηοῦ μεγάλου σε πρὸς οὐρανὸν ἥρπασε, Νόννα, -εὐχομένην ζωῆς δὲ τέλος καθαρώτερον εὗρες. -οὔποτε χείλεα μίξας ἀνάγνοις χείλεσιν ἁγνά, -οὐδʼ ἀθέῳ παλάμῃ καθαρὰν χέρα μέχρις ἐδωδῆς, -μῆτερ ἐμή· μισθὸς δὲ λιπεῖν βίον ἐν θυέεσσιν. -
-
- - -Gregorius Nazianzenus - - - -ἄγγελος αἰγλήεις σὲ φαάντατος ἥρπασε, Νόννα, -ἔνθα ποτʼ εὐχομένην, καθαρὴν μελέεσσι νόῳ τε· -καὶ τὸ μὲν ἥρπασε σεῖο, τὸ δʼ ἐνθάδε κάλλιπε νηῷ. -
-
- - -Gregorius Nazianzenus - - - -νηὸς ὅδʼ ʽοὐ γὰρ ὅλην Νόνναν θέμις ἦεν ἐρύξαἰ, -ψυχῆς οἰχομένης, μοῦνον ἐπέσχε δέμας, -ὡς πάλιν ἐγρομένη καθαρώτερον ἔνθεν ἀερθῇ, -σώματι τῷ μογερῷ δόξαν ἐφεσσομένη. - -
-
- - -Gregorius Nazianzenus - - - -ἄλλοις μὲν Νόννης τις ἁγνῶν ἐσθλοῖσιν ἐρίζοι, -εὐχωλῆς δὲ μέτροισιν ἐριζέμεν οὐ θέμις ἐστὶν -τέκμαρ καὶ βιότοιο τέλος λιτῇσι λυθέντος. -
-
- - -Gregorius Nazianzenus - - - -ὦ στοναχῶν δακρύων τε καὶ ἐννυχίων μελεδώνων -ὦ Νόννης ζαθέης τετρυμένα γυῖα πόνοισι -ποῦ ποτʼ ἔην, νηὸς μόχθων λύσε γῆρας ἄκαμπτον. -
-
- - -Gregorius Nazianzenus - - - - - Νόννη Φιλτατίου. καὶ ποῦ θάνε; τῷδʼ -ἐνὶ νηῷ. - - καὶ πῶς; Εὑχομένη. πηνίκα; Γηραλέη. - - ὦ καλοῦ βιότοιο καὶ εὐαγέος θανάτοιο. -
-
- - -Gregorius Nazianzenus - - - -ἅρματι μὲν πυρόεντι πρὸς οὐρανὸν Ἠλίας ἦλθεν -Νόνναν δʼ εὐχομένην Πνεῦμʼ ὑπέδεκτο μέγα. -
-
- - -Gregorius Nazianzenus - - - -ἐνθάδε Νόννα φίλη κοιμήσατο τὸν βαθὺν ὕπνον, -ἵλαος ἑσπομένη ᾧ πόσι Γρηγορίῳ. -
-
- - -Gregorius Nazianzenus - - - -τάρβος ὁμοῦ καὶ χάρμα· πρὸς οὐρανὸν ἔνθεν ἀέρθη -εὐχῆς ἐκ μεσάτης Νόννα λιποῦσα βίον. - -
-
- - -Gregorius Nazianzenus - - - -εὐχῆς καὶ βιότου Νόννῃ τέλος· ἡ δὲ τράπεζα -μάρτυς ἀφʼ ἧς ἤρθη ἄπνοος ἐξαπίνης. -
-
- - -Gregorius Nazianzenus - - - -Νόννης ἠρίον εἰμὶ σαόφρονος, ἥ ῥα πύλῃσιν -ἔχριμψʼ οὐρανίαις, πρὶν βιότοιο λυθῇ. -
-
- - -Gregorius Nazianzenus - - - -δακρύετε θνητούς, θνητῶν γένος· εἰ δέ τις οὕτως -ὡς Νόννʼ εὐχομένη κάτθανεν, οὐ δακρύω. -
-
- - -Gregorius Nazianzenus - - - -Νόννης ἁζόμενος ἁγνὸν βίον, ἅζεο μᾶλλον -καὶ τέλος· ἐν νηῷ κάτθανεν εὐχομένη. -
-
- - -Gregorius Nazianzenus - - - -ἔνθα ποτʼ εὐχομένη πρηνὴς θάνε Νόννα φαεινή -νῦν δʼ ἄρʼ ἐν εὐσεβέων λίσσεται ἱσταμένη. -
-
- - -Gregorius Nazianzenus - - - -στήλη σοι θανάτου μελιηδέος ἥδε τράπεζα, -Νόννα, παρʼ ᾗ λύθης εὐχομένη πύματα. -
-
- - -Gregorius Nazianzenus - - - -μικρὸν ἔτι ψυχῆς ἦν τὸ πνέον ἀλλʼ ἄρα καὶ τὸ -Νόννʼ ἀπέδωκε Θεῷ ἔνθα ποτʼ εὐχομένη. - -
-
- - -Gregorius Nazianzenus - - - -πέμψατε ἐκ νηοῦ θεοειδέα Νόνναν ἅπαντες, -πρέσβειραν μεγάλην πέμψατʼ ἀειρομένην. -
-
- - -Gregorius Nazianzenus - - - -ἔκ με Θεὸς καθαροῖο πρὸς οὐρανὸν ἥρπασε νηοῦ -Νόνναν, ἐπειγομένην οὐρανίοις πελάσαι. -
-
- - -Gregorius Nazianzenus - - - -Νόννʼ ἀπανισταμένη νηοῦ μεγάλου τόδʼ ἔειπε· - - τῶν πολλῶν καμάτων μείζονα μισθὸν ἔχω. - -
-
- - -Gregorius Nazianzenus - - - -Νόννα φίλης εὐχῆς ἱερήιον ἐνθάδε κεῖται· -Νόννα ποτʼ εὐχομένη τῇδʼ ἐλύθη βιότου. -
-
- - -Gregorius Nazianzenus - - - -ἔνθα ποτʼ εὐχομένης ψυχὴ δέμας ἔλλιπε Νόννης -ἔνθεν ἀνηέρθη Νόννα λιποῦσα δέμας. -
-
- - -Gregorius Nazianzenus - - - -Εκ νηοῦ μεγάλοιο θύος μέγα Νόννʼ ἀπανέστη· -νηῷ Νόννʼ ἐλύθη· χαίρετε, εὐσεβέες. -
-
- - -Gregorius Nazianzenus - - - -ἥδε τράπεζα Θεῷ θεοειδέα Νόνναν ἔπεμψεν. - -
-
- - -Gregorius Nazianzenus - - - -εἴη σοι βίος ἐσθλὸς ἐπʼ εὐλογίῃσιν ἁπάσαις -ὁσσάτιαι τοκέων υἱέσι γηροκόμοις· -καὶ κούφης βιότοιο τυχεῖν ὁσίης τε τελευτῆς, -οἵην ἡμετέρῳ γήραϊ δῶκεν ἄναξ, -ἠιθέων λογίων τὸ μέγα κράτος, ἠδʼ ἱερήων, -καὶ πολιῆς σκίπων, Γρηγόριʼ, ἡμετέρης. -
-
- - -Gregorius Nazianzenus - - - -ἀσπάσιοι χθόνα τήνδε φίλαις ὑπὸ χείρεσι παιδὸς -ἑσσάμεθʼ εὐσεβέος Γρηγορίου τοκέες· -ὃς καὶ γῆρας ἔθηκεν ἑοῖς μόχθοισιν ἐλαφρὸν -ἡμέτερον, καὶ νῦν ἀμφιέπει θυσίαις. -ἄμπνεε γηροκόμων καμάτων, μέγα φέρτατε παίδων -Γρηγόριʼ, εὐαγέας Μάρτυσι παρθέμενος -σοὺς τοκέας· μισθὸς δὲ μέγαν Πατέρʼ ἵλαον εἶναι, -πνευματικῶν τε τυχεῖν εὐσεβέων τεκέων. -
-
- - -Gregorius Nazianzenus - - - -λᾶας ὁ μὲν γενέτην τε καὶ υἱέα κυδήεντας -κεύθω Γρηγορίους, εἷς λίθος ἶσα φάη, -ἀμφοτέρους ἱερῆας· ὁ δʼ εὐπατέρειαν ἐδέγμην -Νόνναν σὺν μεγάλῳ υἱέι Καισαρίῳ. -τὼς ἐδάσαντο τάφους τε καὶ υἱέας· ἡ δὲ πορείη, -πάντες ἄνω· ζωῆς εἷς πόθος οὐρανίης. -
-
- - -Gregorius Nazianzenus - - - -πρῶτος Καισάριος ξυνὸν ἄχος· αὐτὰρ ἔπειτα -Γοργόνιον, μετέπειτα πατὴρ φίλος· οὐ μετὰ δηρὸν -μήτηρ. ὦ λυπρὴ παλάμη καὶ γράμματα λυπρὴ -Γρηγορίου· γράψω καὶ ἐμὸν μόρον ὑστατίου περ. - -
-
- - -Gregorius Nazianzenus - - - -πρῶτα μὲν εὐξαμένῃ με Θεὸς πόρε μητρὶ φαεινῇ· -δεύτερον, ἐκ μητρὸς δῶρον ἔδεκτο φίλον -τὸ τρίτον αὖ, θνῄσκοντά μʼ ἁγνὴ ἐσάωσε τράπεζα· -τέτρατον, ἀμφήκη μῦθον ἔδωκε Λόγος· -πέμπτον, παρθενίη με φίλοις προσπτύξατʼ ὀνείροις· -ἕκτον, Βασιλίῳ σύμπνοα ἱρὰ φέρον -ἕβδομον, ἐκ βυθίων με Φερέσβιος ἥρπασε κόλπων -ὄγδοον εὗ νούσοις ἐξεκάθηρα χέρας· -εἴνατον ὁπλοτέρῃ Τριάδʼ ἤγαγον, ὦ ἄνα, Ῥώμῃ· -βέβλημαι δέκατον λάεσιν ἠδὲ φίλοις. -
-
- - -Gregorius Nazianzenus - - - -Ἑλλὰς ἐμὴ, νεότης τε φίλη, καὶ ὅσσα πεπάσμην, -καὶ δέμας, ὡς Χριστῷ εἴξατε προφρονέως. -εἰ δʼ ἱερῆα φίλον με Θεῷ θέτο μητέρος εὐχὴ -καὶ πατρὸς παλάμη, τίς φθόνος; ἀλλά, μάκαρ, -σοῖς με, Χριστέ, χοροῖσι δέχου, καὶ κῦδος ὀπάζοις -υἱέι Γρηγορίου σῷ λάτρι Γρηγορίῳ. -
-
- - -Gregorius Nazianzenus - - - -Γρηγορίου Νόννης τε φίλον τέκος ἐνθάδε κεῖται -τῆς ἱερῆς Τριάδος Γρηγόριος θεράπων, -καὶ σοφίῃ Σοφίης δεδραγμένος, ἠίθεός τε -οἶον πλοῦτον ἔχων ἐλπίδʼ ἐπουρανίην. -
-
- - -Gregorius Nazianzenus - - - -τυτθὸν ἔτι ζώεσκες ἐπὶ χθονί, πάντα δὲ Χριστῷ -δῶκας ἑκών, σὺν τοῖς καὶ πτερόεντα λόγον -νῦν δʼ ἱερῆα μέγαν σε καὶ οὐρανίοιο χορείης -οὐρανὸς ἐντὸς ἔχει, κύδιμε Γρηγόριε. - -
-
- - -Gregorius Nazianzenus - - - -ἔκ με βρέφους ἐκάλεσσε Θεὸς νυχίοισιν ὀνείροις· -ἤλυθον ἐς σοφίης πείρατα, σάρκα Λόγῳ -ἥγνισα καὶ κραδίην· κόσμου φλόγα γυμνὸς ἀλύξας, -ἔστην σὺν Ἀαρὼν Γρηγορίῳ γενέτῃ. -
-
- - -Gregorius Nazianzenus - - - -πατρὸς ἐγὼ ζαθέοιο καὶ οὔνομα καὶ θρόνον ἔσχον, -καὶ τάφον· ἀλλά, φίλος, μνώεο Γρηγορίου, -Γρηγορίου, τὸν μητρὶ θεόσδοτον ὤπασε Χριστὸς -φάσμασιν ἐννυχίοις, δῶκε δʼ ἔρον σοφίης. -
-
- - -Gregorius Nazianzenus - - - -σχέτλιός ἐστιν ὁ τύμβος. ἔγωγε μὲν οὔποτʼ ἐώλπειν, -ὥς ῥα κατακρύψει τοὺς πυμάτους προτέρους -αὐτὰρ ὃ Καισάριον, ἐρικυδέα υἷα τοκήων, -τῶν προτέρων πρότερον δέξατο· ποῖα δίκη; -
-
- - -Gregorius Nazianzenus - - - -οὐκ ἔσθʼ ὁ τύμβος αἴτιος· μὴ λοιδόρει. -φθόνου τόδʼ ἐστὶν ἔργον πῶς δʼ ἤνεγκεν ἂν -νέον γερόντων εἰσορῶν σοφώτερον; -
-
- - -Gregorius Nazianzenus - - - -Γρηγόριε, θνητῶν μὲν ὑπείροχον ἔλλαχες υἷα -κάλλεϊ καὶ σοφίῃ, καὶ βασιλῆι φίλον -κρείσσονα δʼ οὐκέτι πάμπαν ἀπηλεγέος θανάτοιο. -ἦ μὴν ὠιόμην ἀλλὰ τί φησὶ τάφος; -“ τέτλαθι· Καισάριος μὲν ἀπέφθιτο· ἀλλὰ μέγιστον -υἱέος εὖχος ἔχεις, υἱέος ἀντὶ φίλου.” -
- -
- - -Gregorius Nazianzenus - - - -ὥριοι εἰς τάφον ἦμεν, ὅτʼ ἐνθάδε τοῦτον ἔθηκαν -λᾶαν ἐφʼ ἡμετέρῳ γήραϊ λαοτόμοι· -ἀλλʼ ἡμῖν μὲν ἔθηκαν ἔχει δέ μιν οὐ κατὰ κόσμον -Καισάριος, τεκέων ἡμετέρων πύματος. -ἔτλημεν πανάποτμα, τέκος, τέκος· ἀλλὰ τάχιστα -δέξαι ἐς ὑμέτερον τύμβον ἐπειγομένους. -
-
- - -Gregorius Nazianzenus - - - -τόνδε λίθον τοκέες μὲν ἑὸν τάφον ἐστήσαντο, -ἐλπόμενοι ζωῆς μοῖραν ἔχειν ὀλίγην -Καισαρίῳ δʼ υἱῆι πικρὴν χάριν οὐκ ἐθέλοντες -δῶκαν, ἐπεὶ πρότερος τοῦδε λύθη βιότου. -
-
- - -Gregorius Nazianzenus - - - -γῆρας ἐμὸν δήθυνεν ἐπὶ χθονί· ἀντὶ δὲ πατρὸς -λᾶαν ἔχεις, τεκέων φίλτατε, Καισάριε. -τίς νόμος; οἷα δίκη; θνητῶν ἄνα, πῶς τόδʼ ἔνευσας; -ὦ μακροῦ βιότου, ὦ ταχέος θανάτου. -
-
- - -Gregorius Nazianzenus - - - -οὐκ ἄγαμʼ, οὐκ ἄγαμαι δῶρον τόδε· τύμβον ἐδέξω -μοῦνον ἀφʼ ἡμετέμων, Καισάριε, κτεάνων, -γηραλέων τοκέων πικρὸν λίθον ὁ Φθόνος οὕτως -ἤθελεν. ὦ ζωῆς πήμασι μακροτέρης. - -
-
- - -Gregorius Nazianzenus - - - -πᾶσαν ὅση σοφίη λεπτῆς φρενὸς ἐν μερόπεσσιν -ἀμφὶ γεωμετρίην καὶ θέσιν οὐρανίων, -καὶ λογικῆς τέχνης τὰ παλαίσματα, γραμματικήν τε -ἠδʼ ἰητορίην, ῥητορικῆς τε μένος, -Καισάριος πτερόωντι νόῳ μοῦνος καταμάρψας, -αἰαῖ· πᾶσιν ὁμῶς νῦν κόνις ἐστʼ ὀλίγη. -
-
- - -Gregorius Nazianzenus - - - -πάντα κασιγνήτοισιν ἑοῖς λίπες· ἀντὶ δὲ πάντων -τύμβον ἔχεις ὀλίγον, κύδιμε Καισάριε· -ἡ δὲ γεωμετρίη τε, καὶ ἀστέρες ὧν θέσιν ἔγνως, -ἥ τʼ ἰητορίη οὐδὲν ἄκος θανάτου. -
-
- - -Gregorius Nazianzenus - - - -κάλλιμον ἐκ πατρίης σὲ μεγακλέα τηλόθʼ ἐόντα, -ἄκρα φέροντα πάσης, Καισάριε, σοφίης, -πέμψαντες βασιλῆι τὸν ἔξοχον ἰητήρων, -φεῦ, κόνιν ἐκ Βιθυνῶν δεξάμεθʼ αὖ σε πέδου. -
-
- - -Gregorius Nazianzenus - - - -σεισμῶν μὲν κρυερῶν ἔφυγες στονόεσσαν ἀπειλήν, -ἡνίκα Νικαίης ἄστυ μίγη δαπέδῳ· -νούσῳ δʼ ἀργαλέῃ ζωὴν λίπες. ὦ νεότητος -σώφρονος, ὦ σοφίης, κάλλιμε Καισάριε. -
-
- - -Gregorius Nazianzenus - - - -Γρηγορίου Νόννης τε θεουδέος υἷα φέριστον -τύμβος ὅδʼ εὐγενέτην Καισάριον κατέχω, -ἔξοχον ἐν λογίοισιν, ὑπείροχον ἐν βασιλῄοις, -ἀστεροπὴν γαίης πείρασι λαμπομένην. - -
-
- - -Gregorius Nazianzenus - - - -Καισαρίου φθιμένοιο κατήφησαν βασιλῆος -αὐλαί, Καππαδόκαι δʼ ἤμυσαν ἐξαπίνης· -καὶ καλὸν εἴ τι λέλειπτο μετʼ ἀνθρώποισιν ὄλωλεν, -οἱ δὲ λόγοι σιγῆς ἀμφεβάλοντο νέφος. -
-
- - -Gregorius Nazianzenus - - - -εἴ τινα δένδρον ἔθηκε γόος, καὶ εἴ τινα πέτρην, -εἴ τις καὶ πηγὴ ῥεῦσεν ὀδυρομένη, -πέτραι καὶ ποταμοὶ καὶ δένδρεα λυπρὰ πέλοισθε, -πάντες Καισαρίῳ γείτονες ἠδὲ φίλοι· -Καισάριος πάντεσσι τετιμένος, εὖχος ἀνάκτων, -αἰαῖ τῶν ἀχέωνʼ ἤλυθεν εἰς ἀίδην. -
-
- - -Gregorius Nazianzenus - - - -χεὶρ τάδε Γρηγορίοιο· κάσιν ποθέων τὸν ἄριστον, -κηρύσσω θνητοῖς τόνδε βίον στυγέειν. -Καισαρίῳ τίς κάλλος ὁμοίιος; ἢ τίς ἁπάντων -τόσσος ἐὼν τόσσης εἷλε κλέος σοφίης; -οὔτις ἐπιχθονίων ἀλλʼ ἔπτατο ἐκ βιότοιο -ὡς ῥόδον ἐξ ἀνθέων, ὡς δρόσος ἐκ πετάλων. -
-
- - -Gregorius Nazianzenus - - - -γείτονες εὐμενέοιτε καὶ ἐν κόλποισι δέχοισθε, -Μάρτυρες, ὑμετέροις αἷμα τὸ Γρηγορίου, -Γρηγορίου Νόννης τε μεγακλέος, εὐσεβίῃ τε -καὶ τύμβοις ἱεροῖς εἰς ἓν ἀγειρομένους. - -
-
- - -Gregorius Nazianzenus - - - -κλῦθι, Ἀλεξάνδρεια· Φιλάγριος ὤλεσε μορφὴν -τῆς λογικῆς ψυχῆς οὔτι χερειοτέρην, -Καισάριον δὲ νέον Φθόνος ἥρπασεν οὔποτε τοῖα -πέμψεις εὐίπποις ἄνθεα Καππαδόκαις. -
-
- - -Gregorius Nazianzenus - - - -Γρηγορίου Νόννης τε φίλον τέκος ἐνθάδε κεῖμαι -Γοργόνιον, ζωῆς μύστις ἐπουρανίης. -
-
- - -Gregorius Nazianzenus - - - -οὐδὲν Γοργόνιον γαίῃ λίπεν, ὀστέα μοῦνα· -πάντα δʼ ἔθηκεν ἄνω, Μάρτυρες ἀθλοφόροι. -
-
- - -Gregorius Nazianzenus - - - -κτῆσιν ἑὴν σάρκας τε καὶ ὀστέα πάντʼ ἀναθεῖσα -Γοργόνιον Χριστῷ, μοῦνον ἀφῆκε πόσιν -οὐ μὰν οὐδὲ πόσιν δηρὸν χρόνον ἀλλʼ ἄρα καὶ τὸν -ἥρπασεν ἐξαπίνης κύδιμον Ἀλύπιον. -ὄλβιε ὀλβίστης ἀλόχου πόσι· τοῖς ῥα λοετροῖς -λύματʼ ἀπωσάμενοι ζῆτε παλιγγενέες. -
-
- - -Gregorius Nazianzenus - - - -εἴ τις Τάνταλός ἐστιν ἐν ὕδασιν αὖος ἀπίστοις, -εἴ τις ὑπὲρ κεφαλῆς πέτρος ἀεὶ φοβέων, -δαπτόμενόν τʼ ὄρνισιν ἀγήραον ἧπαρ ἀλιτροῦ, -καὶ πυρόεις ποταμὸς, καὶ ζόφος ἀθάνατος, -ταρτάρεοί τε μυχοὶ καὶ δαίμονες ἀγριόθυμοι, -ἄλλαι τε φθιμένων τίσιες εἰν ἀίδι· -ὅστις Μαρτινιανὸν ἀγακλέα δηλήσαιτο -τύμβον ἀνοχλίζων, δείματα πάντα φέροι. - -
-
- - -Gregorius Nazianzenus - - - -οὔρεά σοι καὶ πόντος, ἀτάσθαλε, καὶ πεδίοισι -τέρπῃ πυροφόροις τετραπόδων τʼ ἀγέλαις· -καὶ χρυσοῖο τάλαντα καὶ ἄργυρος, εὐγενέες τε -λᾶες καὶ Σηρῶν νήματα λεπταλέα, -πάντα βίος ζωοῖσι· λίθοι δʼ ὀλίγοι τε φίλοι τε -τοῖς φθιμένοις. σὺ δέ μοι κἀνθάδε χεῖρα φέρεις, -οὐδὲ σὸν αἰδόμενος, τλῆμον, τάφον, ὅν τις ὀλέσσει -ἄλλος σοῖσι νόμοις, χερσὶ δικαιοτέραις, -
-
- - -Gregorius Nazianzenus - - - -ἡνίκα Μαρτινιανὸς ἔδυ χθόνα, μητέρα πάντων, -πᾶσα μὲν Αὐσονίων ἐστονάχησε πόλις· -πᾶσα δὲ Σικανίη τε, καὶ εὐρέα πείρατα γαίης -κείρατʼ, ἀπʼ ἀνθρώπων οἰχομένης Θέμιδος. -ἡμεῖς δʼ ἀντί νυ σεῖο τάφον μέγαν ἀμφιέποντες, -αἰὲν ἐπερχομένοις δώσομεν ὥς τι σέβας· -
-
- - -Gregorius Nazianzenus - - - -οἱ Χριστὸν φορέοντες ἀκούσατε, οἵ τε θέμιστας -εἰδότες ἡμερίων καὶ φθιμένων ὁσίην -πάντα λιπών, βασιλῆα, πάτρην, γένος, εὖχος ὑπάρχων, -αἰαῖ, πᾶσιν ὁμῶς νῦν κόνις εἴμʼ ὀλίγη, -Μαρτινιανὸς πᾶσι τετιμένος· ἀλλʼ ἐπὶ τύμβῳ -βάλλειν ἡμετέρῳ δάκρυα, μὴ παλάμας. - -
-
- - -Gregorius Nazianzenus - - - -μουσοπόλον, ῥητῆρα, δικασπόλον, ἄκρον ἅπαντα, -τύμβος ὅδʼ εὐγενέτην Μαρτινιανὸν ἔχω, -ναυμάχον ἐν πελάγεσσιν, ἀρήιον ἐν πεδίοισιν -ἀλλʼ ἀποτῆλε τάφου, πρίν τι κακὸν παθέειν. -
-
- - -Gregorius Nazianzenus - - - -μὴ πόλεμον φθιμένοισιν — ἅλις ζώοντες, ἀλιτροὶ — -μὴ πόλεμον φθιμένοις Μαρτινιανὸς ἐγὼ -ταῦτα πάσιν ζῴοις ἐπιτέλλομαι. οὐ θέμις ἐστὶν -τῶν ὀλίγων φθονέειν τοῖς φθιμένοισι λίθων. -
-
- - -Gregorius Nazianzenus - - - - -Θέμι, τῆς πολλοῖσιν ἐγὼ νώμησα τάλαντα -ὦ φοβεραὶ ψυχῶν μάστιγες οὐχ ὁσίων -οὗτος ἐμοῖσι λίθοισι φέρει στονόεντα σίδηρον -οὗτος ἐμοί. φεῦ, φεῦ· ποῦ δὲ λίθος Σισύφου ; -
-
- - -Gregorius Nazianzenus - - - -ὄλβιος, εὐγήρως, ἄνοσος θάνον, ἐν βασιλῆος -πρῶτα φέρων, ἱερῆς ἄκρον ἔχων σοφίης· -εἴ τινα Μαρτινιανὸν ἀκούετε· ἀλλʼ ἀπὸ τύμβου, -μηδὲ φέρειν ἐπʼ ἐμοὶ δυσμενέας παλάμας. -
-
- - -Gregorius Nazianzenus - - - -χάζεο, χάζεο τῆλε· κακὸν τὸν ἄεθλον ἐγείρεις, -λᾶας ἀνοχλίζων καὶ τάφον ἡμέτερον· -χάζεο· Μαρτινιανὸς ἐγώ, καὶ ζῶσιν ὄνειαρ -καὶ νέκυς οὐκ ὀλίγον ἐνθάδε κάρτος ἔχω. - -
-
- - -Gregorius Nazianzenus - - - -Καππαδοκῶν μέγʼ -ἄεισμα, φαάντατε Μαρτινιανέ, -σεῖο, βροτῶν γενεή, καὶ τάφον αἰδόμεθα· -ὃς ποτʼ ἔης βασιλῆος ἐν ἕρκεσι κάρτος ὑπάρχων, -δουρὶ δὲ Σικανίην κτήσαο καὶ Λιβύην. -
-
- - -Gregorius Nazianzenus - - - -Ὄμνυμεν ἀθανάτοιο Θεοῦ κράτος ὑψιμέδοντος, -καὶ ψυχὰς νεκύων, κύδιμε, σήν τε κόνιν, -μήποτε, Μαρτινιανέ, τεοῖς ἐπὶ χεῖρας ἐνέγκαι -στήλῃ καὶ τύμβῳ· οὐδὲ γὰρ οὐδʼ ἱεροῖς. -
-
- - -Gregorius Nazianzenus - - - -Ῥώμη καὶ βασιλῆες ἐμοὶ καὶ πείρατα γαίης -στῆλαι Μαρτινιανῷ, τὰς χρόνος οὐ δαμάσει· -ἀλλʼ ἔμπης ὀλίγῳ περιδείδια, μή τι πάθῃσι, -τῷδε τάφῳ πολλῶν οὐχ ὁσίαι παλάμαι. -
-
- - -Gregorius Nazianzenus - - - -Μαρτινιανοῦ σῆμα μεγακλέος, εἲ τινʼ ἀκούεις -Καππαδοκῶν Ῥώμης πρόθρονον εὐγενέων, -παντοίαις ἀρετῇσι κεκασμένον, ἀλλὰ κόνιν περ -ἁζόμενοι στήλην καὶ τάφον ἀμφιέπειν. -
-
- - -Gregorius Nazianzenus - - - -οὔποτʼ ἐγὼ φθιμένοισιν ἐπέχραον, οὐδʼ ἀπὸ τύμβων -ἔργον ἔγειρα, Δίκην ὄμνυμι καὶ φθιμένους· -τοὔνεκα μηδʼ ἐπʼ ἐμοῖσι φέρειν λάεσσι σίδηρον -εἰ δὲ φέροις, τὴν σὴν ἐς κεφαλὴν πεσέτω. -Μαρτινιανὸς ἐγὼ τάδε λίσσομαι· εἴ τις ἐμεῖο -κύδεός ἐστι χάρις, τύμβος ἀεὶ μενέτω. - -
-
- - -Gregorius Nazianzenus - - - -εἷς δόμος, ἀλλʼ ὑπένερθε τάφος, καθύπερθε δὲ σηκός· -τύμβος δειμαμένοις, σηκὸς ἀεθλοφόροις· -καὶ ῥʼ οἱ μὲν γλυκερὴν ἤδη κόνιν ἀμφεβάλοντο -ὡς σὺ μάκαιρα δάμαρ Ἀμφιλόχου, Λιβίη, -κάλλιμὲ θʼ υἱήων, Εὐφήμιε· τούσδʼ ὑπόδεχθε, -μάρτυρες ἀτρεκίης, τοὺς ἔτι λειπομένους. -
-
- - -Gregorius Nazianzenus - - - -ὤφελες, ὦ Λιβία, ζώειν τεκέεσσι φίλοισιν -ὤφελες ἄχρι πύλης γήραος ἐμπελάσαι· -νῦν δέ σε μοῖρʼ ἐδάμασσεν ἀώριον, εἰσέτι καλήν, -εἰσέτι κουριδίοις ἄνθεσι λαμπομένην. -αἰαῖ· Ἀμφίλοχος δὲ τεὸς πόσις ἀντὶ δάμαρτος -ἐσθλῆς καὶ πινυτῆς τλήμονα τύμβον ἔχει. -
-
- - -Gregorius Nazianzenus - - - -αἰαῖ· καὶ Λιβίαν κατέχει κόνις. οὔποτʼ ἔγωγε -ὠισάμην θνητὴν ἔμμεναι, εἰσορόων -εἶδος, μειλιχίην τε σαοφροσύνην τε γυναικός, -τοῖς φῦλον πασέων καίνυτο θηλυτέρων -τοὔνεκα καὶ τοίῳ σε τάφῳ κύδηνε θανοῦσαν -σῶν τε τριὰς τεκέων καὶ πόσις Ἀμφίλοχος. -
-
- - -Gregorius Nazianzenus - - - -ἦν δυὰς ἦν ἱερή, ψυχὴ μία, σώματα δισσά, -πάντα κασιγνήτω, αἷμα, κλέος, σοφίην, -υἱέες Ἀμφιλόχου, Εὐφήμιος Ἀμφίλοχός τε, -πᾶσιν Καππαδόκαις ἀστέρες ἐκφανέες. -δεινὸν δʼ ἀμφοτέρους Φθόνος ἔδρακε· τὸν μὲν ἄμερσε -ζωῆς, τὸν δʼ ἔλιπεν ἥμισυν Ἀμφίλοχον. - -
-
- - -Gregorius Nazianzenus - - - -ῥήτωρ ἐν ῥητῆρσιν, ἀοιδοπόλος δʼ ἐν ἀοιδοῖς, -κῦδος ἑῆς πάτρης, κῦδος ἑῶν τοκέων, -ἄρτι γενειάσκων Εὐφήμιος, ἄρτι δʼ ἔρωτας -ἐς θαλάμους καλέων, ὤλετο· φεῦ παθέων -ἀντὶ δὲ παρθενικῆς τύμβον λάχεν, ἠδʼ ὑμεναίων -ἤματα νυμφιδίων ἦμαρ ἐπῆλθε γόων. -
-
- - -Gregorius Nazianzenus - - - -Εἰκοσέτης πᾶσαν Εὐφήμιος, ὡς μίαν οὔτις, -Ἑλλάδα κʼ Αὐσονίην μοῦσαν ἐφιπτάμενος, -στράπτων ἀγλαΐῃ τε καὶ ἤθεσιν ἦλθʼ ὑπὸ γαῖαν. -αἰαῖ· τῶν ἀγαθῶν ὡς μόρος ὠκύτερος. -
-
- - -Gregorius Nazianzenus - - - -Χρυσείης γενεῆς Εὐφήμιος ἦν ἔτι τυτθὸν -λείψανον, εὐγενέτης ἤθεα καὶ πραπίδας, -μείλιχος, ἡδυεπής, εἶδος Χαρίτεσσιν ὁμοῖος· -τοὔνεκα καὶ θνητοῖς οὐκ ἐπὶ δὴν ἐμίγη. -
-
- - -Gregorius Nazianzenus - - - -Στράψε μέγʼ ἀνθρώποις Εὐφήμιος, ἀλλʼ ἐπὶ τυτθὸν -καὶ γὰρ καὶ στεροπῆς οὐ μακρόν ἐστι σέλας· -στράψεν ὁμοῦ σοφίῃ τε καὶ εἴδεϊ καὶ πραπίδεσσιν· -τὰ πρὶν Καππαδόκαις ἦν κλέα, νῦν δὲ γόος. -
-
- - -Gregorius Nazianzenus - - - -τίς; τίνος; — “ Ἀμφιλόχου Εὐφήμιος ἐνθάδε κεῖται, -οὗτος ὁ Καππαδόκαις πᾶσι διὰ στόματος· -οὗτος ὃν αἱ Χάριτες Μούσαις δόσαν οἱ δʼ ὑμέναιοι - ἀμφὶ θύρας· ἦλθεν δʼ ὁ Φθόνος ὠκύτερος.” - -
-
- - -Gregorius Nazianzenus - - - -ἔρνος ἀμώμητον, Μουσῶν τέκος, εἶαρ ἑταίρων, -καὶ χρύσεον Χαρίτων πλέγμα ἰοστεφέων, -ᾤχετο ἐκ μερόπων Εὐφήμιος· οὑδʼ ἔτʼ ἀνίσχεν, -αἰαῖ, σοῖς θαλάμοις πυρσὸς ὃν ἧψεν Ἔρως. -
-
- - -Gregorius Nazianzenus - - - -αἱ Χάριτες Μούσαισι· “τί ῥέξομεν; οὐκέτʼ ἄγαλμα - χειρῶν ἡμετέρων Εὐφήμιος ἐν μερόπεσσιν.” -χαἰ Μοῦσαι Χαρίτεσσιν “ ἐπεὶ Φθόνος ἐστὶν ἀλιτρός, - τόσσον ἔχοι· ἡμῖν δὲ τόδʼ ὅρκιον ἔμπεδον ἔστω, - μηκέτʼ ἀναστῆσαι τοῖον μερόπεσσιν ἄγαλμα.” -
-
- - -Gregorius Nazianzenus - - - -κρῆναι καὶ ποταμοὶ καὶ ἄλσεα, καὶ λαλαγεῦντες -ὄρνιθες λιγυροὶ καλὸν ἐπʼ ἀκρεμόνων, -αὖραί τε μαλακὸν συρίγμασι κῶμα φέρουσαι, -καὶ κῆποι Χαρίτων εἰς ἓν ἀγειρομένων, -κλαύσατε. ὦ χαρίεσς1ʼ Εὐφημιάς· ὥς σε θανών περ -Εὐφήμιος κλεινὴν θήκατʼ ἐπωνυμίην. -
-
- - -Gregorius Nazianzenus - - - -κάλλιμος ἠιθέων Εὐφήμιος, εἴποτʼ ἔην γε· -κάλλιμος ἐν χώροις χῶρος ὅδʼ ἠλύσιος· -τοὔνεκεν εἰς ἓν ἄγερθεν ἐπεὶ ζωὴν μὲν ἔλειψεν, -οὔνομα δʼ ἐν χώρῳ κάλλιπεν ἠγαθέῳ. -
-
- - -Gregorius Nazianzenus - - - -ἤλυθε κʼ Ἀμφιλόχοιο φίλον δέμας ἐς μέγα σῆμα, -ψυχὴ δʼ ἐς μακάρων ᾤχετʼ ἀποπταμένη. - -πηοῖς πάντα πέπασσο, μακάρτατε· βίβλον ἔῳξας -πᾶσαν ὅση θνητῶν, κεἴ τις ἐπουρανίη. -γηραλέος φιλίην ὑπέδυς χθόνα· τέκνα λέλοιπας -κρείσσονα καὶ τοκέων τὸ πλέον οὐ μερόπων. -
-
- - -Gregorius Nazianzenus - - - -ἄσμενος ᾗ τε δάμαρτι καὶ υἱέι πάρθετο σῶμα -Ἀμφίλοχος, λιπαροῦ γήραος ἀντιάσας, -ὄλβιος, εὐγενέτης, μύθων κράτος, ἄλκαρ ἁπάντων, -πηῶν, εὐσεβέων, εὐγενέων, λογίων, -καὶ μύθοιο δοτὴρ περιώσιος. ἠνίδʼ ἑταίρων -σῶν ἑνός, ὦ φιλότης, γράμμʼ ἐπιτυμβίδιον. -
-
- - -Gregorius Nazianzenus - - - -ὦ μάκαρ, ὦ ξυνὸν πενίης ἄκος, ὦ πτερόεντες -μῦθοι, καὶ πηγὴ πᾶσιν ἀρυομένη, -ἄσθματι πάντα λίπες πυμάτῳ· τὸ δʼ ἅμʼ ἕσπετο μοῦνον -ἔνθεν ἀειρομένῳ κῦδος ἀεὶ θαλέθον. -Γρηγόριος τάδʼ ἔγραψα, λόγῳ λόγον ὃν παρὰ σεῖο -Ἀμφίλοχʼ, ἐξεδάην ἀντιχαριζόμενος. -
-
- - -Gregorius Nazianzenus - - - -Ἀμφίλοχος τέθνηκεν ἀπώλετο εἴ τι λέλειπτο -καλὸν ἐν ἀνθρώποις, ῥητορικῆς τε μένος, -καὶ Χάριτες Μούσαισι μεμιγμέναι· ἔξοχα δʼ αὖ σε -ἡ Διοκαισαρέων μύρατο πάτρα φίλη. -
-
- - -Gregorius Nazianzenus - - - -τυτθὸν μὲν πτολίεθρον, ἀτάρ πολὺν ἀνέρα δῶκα -βήμασιν ἰθυδίκοις ἡ Διοκαισαρέων, -Ἀμφίλοχον φθιμένῳ δὲ συνέφθιτο καὶ πυρόεσσα -ῥήτρη, καὶ πάτρης εὖχος ἀριστοτόκου. - -
-
- - -Gregorius Nazianzenus - - - -τὸν ῥήτρην πυρόεσσαν ἐπʼ ἀντιπάλοισι φέροντα, -τὸν μέλιτος γλυκίω ἤθεα καὶ πραπίδας -Ἀμφίλοχον κατέχω τυτθὴ κόνις, ἔκτοθι πάτρης, -υἱέα Φιλτατίου Γοργονίας τε μέγαν. -
-
- - -Gregorius Nazianzenus - - - -ῥητῆρες, φθέγγοισθε· μεμυκότα χείλεα σιγῇ -Ἀμφιλόχου μεγάλου τύμβος ὅδʼ ἀμφὶς ἔχω. -
-
- - -Gregorius Nazianzenus - - - -ἠρίον Ἀμφιλόχοιο μελίφρονος, ὅς ποτε ῥήτρῃ -πάντας Καππαδόκας καίνυτο καὶ πραπίσιν. -
-
- - -Gregorius Nazianzenus - - - -οἴχεαι, ὦ Νικόμηδες, ἐμὸν κλέος ἡ δὲ συνωρὶς -σῶν καθαρὴ τεκέων πῶς βίον ἐξανύσει; -τίς δὲ τέλος νηῷ περικάλλεϊ χεὶρ ἐπιθήσει; -τίς δὲ Θεῷ πέμψει φρὴν τελέην θυσίην, -σεῖο, μάκαρ, μιχθέντος ἐπουρανίοισι τάχιστα; -ὦ γενεὴ τλήμων, οἷα πάθες, μερόπων, -
-
- - -Gregorius Nazianzenus - - - -Δέρκεο καὶ τύμβον Νικομήδεος, εἲ τινʼ ἀκούεις, -ὃς νηὸν Χριστῷ δειμάμενος μεγάλῳ, -αὑτὸν μὲν πρώτιστον, ἔπειτα δὲ τὴν περίβωτον -δῶκεν ἁγνὴν θυσίην παρθενίην τεκέων, -φέρτερον οὐδὲν ἔχων, ἱερεύς, γενέτης τε φέριστος. -τοὔνεκα καὶ μεγάλῃ ὦκα μίγη Τριάδι, - -
-
- - -Gregorius Nazianzenus - - - -ὕστατος ἐς βίον ἦλθες ἀοίδιμον, ἀλλὰ τάχιστα -ἔνθεν ἀνηέρθης· τίς τάδʼ ἔνευσε δίκη; -Χριστὸς ἄναξ, Νικόμηδες, ὅπως σέο λαὸν ἄνωθεν -ἰθύνοις τεκέων σὺν ἱερῇ δυάδι. -
-
- - -Gregorius Nazianzenus - - - -πῆ με λιπὼν πολύμοχθον ἐπὶ χθονί, φίλταθʼ ἑταίρων, -ἤλυθες ἁρπαλέως, κύδιμε Καρτέριε; -πῆ ποτʼ ἔβης νεότητος ἐμῆς οἰήια νωμῶν, -ἦμος ἐπʼ ἀλλοδαπῆς μῦθον ἐμετρεόμην, -ὃς βιότῳ μʼ ἔζησας ἀσαρκέι; ἦ ῥʼ ἐτεόν σοι -Χριστὸς ἄναξ πάντων φίλτερος, ὅν νυν ἔχεις. -
-
- - -Gregorius Nazianzenus - - - -Ἀστεροπὴ Χριστοῖο μεγακλέος, ἕρκος ἄριστον -ἠιθέων, ζωῆς ἡνίοχʼ ἡμετέρης, -μνώεο Γρηγορίοιο, τὸν ἔπλασας ἤθεσι κεδνοῖς, -ἦν ὅτε ἦν, ἀρετῆς κοίρανε Καρτέριε. -
-
- - -Gregorius Nazianzenus - - - -ὦ πηγαὶ δακρύων, ὦ γούνατα, ὦ θυέεσιν -ἁγνοτάτοις παλάμαι Χριστὸν ἀρεσσάμεναι -Καρτερίου· πῶς λῆξεν ὁμῶς πάντεσσι βροτοῖσιν; -ἤθελεν ὑμνοπόλον κεῖθι χοροστασίη. -
-
- - -Gregorius Nazianzenus - - - -ἥρπασας, ὦ Νικόμηδες, ἐμὸν κέαρ· ἥρπασας ὦκα -Καρτέριον, τῆς σῆς σύζυγον εὐσεβίης. - -
-
- - -Gregorius Nazianzenus - - - -ὦ Ξώλων ζαθέων ἱερὸν πέδον, οἷον ἔρεισμα -σταυροφόρων κόλποις Καρτέριον κατέχεις. -
-
- - -Gregorius Nazianzenus - - - -Βάσσε φίλος, Χριστῷ μεμελημένος ἔξοχον ἄλλων, -τῆλε τεῆς πάτρης ληΐστορι χειρὶ δαμάσθης, -οὐδέ σε τύμβος ἔχει πατρώϊος· ἀλλὰ καὶ ἔμπης -πᾶσιν Καππαδόκεσσι μέγʼ οὔνομα σεῖο λέλειπται, -καὶ στῆλαι παγίων μέγʼ ἀμείνονες, αἷς ἐνιγράφθης. -Γρηγορίου τόδε σοι μνημήιον, ὃν φιλέεσκες. -
-
- - -Gregorius Nazianzenus - - - -ὡς Ἀβραὰμ κόλποισι τεθεὶς ὑποδέχνυσο, Βάσσε, -σὸν τέκος Ἀβραὰμ πνεύματι Καρτέριον· -αὐτὰρ ἐγών, εἰ καί σε τάφος σὺν πατρὶ καλύπτοι, -οὔποτʼ ἀφʼ ὑμετέρης στήσομʼ ὁμοζυγίης. -
-
- - -Gregorius Nazianzenus - - - -ἠίθεον μεγάλοιο μέγαν κοσμήτορα λαοῦ -χθὼν ἱερὴ κεύθω Φιλτατίοιο δέμας. -
-
- - -Gregorius Nazianzenus - - - -Εὐσέβιον, Βασίλισσα, μεγακλέες, ἐνθάδε κεῖνται, -Ξώλων ἠγαθέων θρέμματα χριστοφόρα, -καὶ Νόννης ζαθέης ἱερὸν δέμας. ὅστις ἀμείβεις -τούσδε τάφους, ψυχῶν μνώεο τῶν μεγάλων. - -
-
- - -Gregorius Nazianzenus - - - -αἰεί σοι νόος ἦεν ἐς οὐρανὸν, οὐδʼ ἐπὶ γαίης -ἤρειδες χθαμαλῆς ἴχνιον οὐδʼ ὀλίγον -τοὔνεκεν ὡς τάχος ἦλθες ἀπὸ χθονός· Εὐλάλιος δὲ -σὴν κόνιν ἀμφιέπει σὸς κάσις, Ἑλλάδιε. -
-
- - -Gregorius Nazianzenus - - - -τὸν νεαρόν, Χριστῷ δὲ μέγαν, πολιόν τε νόημα, -χῶρος ὅδʼ ἀθλοφόρων Ἑλλάδιον κατέχω· -οὐ νέμεσις· κείνοις γὰρ ὁμοίιον ἄλγος ἀνέτλη, -σβεννὺς ἀντιπάλου τοῦ φθονεροῖο μόθον. -
-
- - -Gregorius Nazianzenus - - - -μικρὸν μὲν πνείεσκες ἐπὶ χθονὶ σαρκὸς ἀνάγκῃ, -πλείονα δὲ ζωῆς ὑψόθι μοῖραν ἔχεις, -Ἑλλάδιε, Χριστοῖο μέγα κλέος· εἰ δὲ τάχιστα -δεσμῶν ἐξελύθης τοῦτο γέρας καμάτων. -
-
- - -Gregorius Nazianzenus - - - -καὶ σὺ Γεωργίοιο φίλον δέμας, ἐνθάδε κεῖσαι, -ὃς πολλὰς Χριστῷ πέμψας ἁγνὰς θυσίας· -σὺν δὲ κασιγνήτη σῶμα, φρένας, ἡ Βασίλισσα -ξυνὸν ἔχει μεγάλη καὶ τάφον ὡς βίοτον. -
-
- - -Gregorius Nazianzenus - - - -χώρης τῆσδʼ ἱερῆς Εὐπράξιον ἀρχιερῆα -ἥδʼ Ἀριανζαίη χθὼν μεγάλη κατέχω, -Γρηγορίοιο φίλον καὶ ἥλικα, καὶ συνοδίτην -τοὔνεκα καὶ τύμβου γείτονος ἠντίασεν. - -
-
- - -Gregorius Nazianzenus - - - -Ἰχθυβόλον ποτʼ ἔλυε λίνον βυθίης ἀπὸ πέτρης -Ναυκράτιος, δίναις ἐν ποταμοῦ βρυχίαις· -καὶ τὸ μὲν οὐκ ἀνέλυσεν ὁ δʼ ἔσχετο· πῶς ἁλιῆα -εἴρυσεν ἀνθʼ ἁλίης δίκτυον, εἰπέ, Λόγε, -Ναυκράτιον, καθαροῖο βίου νόμον, ὥσπερ ἐίσκω, -καὶ χάριν ἐλθέμεναι καὶ μόρον ἐξ ὑδάτων. -
-
- - -Gregorius Nazianzenus - - - -Ναυκράτιος στροφάλιγγι θάνε φθονεροῦ ποταμοῖο, -δεσμοῖσιν βυθίης ἄρκυος ἐνσχόμενος· -ὥς κε μάθῃς σύ, θνητέ, τὰ παίγνια τοῦδε βίοιο, -ἔνθεν ἀνηέρθη πῶλος ὅδʼ ἄκρα θέων. -
-
- - -Gregorius Nazianzenus - - - -Ναυκράτιος πλεκτοῖο λίνου δεσμοῖσιν ἐλυσθείς, -δεσμῶν τοῦδε βίου ἐξ ἁλίης ἐλύθη. -
-
- - -Gregorius Nazianzenus - - - -αἵματος εὐγενέος γενόμην, βασιλῆος ἐν αὐλαῖς -ἔστην, ὀφρὺν ἄειρα κενόφρονα. πάντα κεδάσσας, -Χριστὸς ἐπεί με κάλεσσε, βίου πολλαῖσιν ἀταμποῖς -ἴχνος ἔρεισα πόθοιο τινάγμασιν, ἄχρις ἀνεῦρον -τὴν σταθερὴν· Χριστῷ τῆξα δέμας ἄλγεσι πολλοῖς· -καὶ νῦν κοῦφος ἄνω Μαξέντιος ἔνθεν ἀνέπτην. -
-
- - -Gregorius Nazianzenus - - - -Πάλλετʼ ἐμοὶ κραδίη, Μαξέντιε, σεῖο γράφουσα -οὔνομα, ὃς στυφελὴν ἦλθες ὁδὸν βιότου, -ἄμβροτον, αἰπήεσσαν, ἀτερπέα· σεῖο, φέριστε, -ἄτρομος οὐδὲ τάφῳ χριστιανὸς πελάει. - -
-
- - -Gregorius Nazianzenus - - - -Ἐμμέλιον τέθνηκε· τίς ἔφρασεν; ἥ γε τοσούτων -καὶ τοίων τεκέων δῶκε φάος βιότῳ, -υἱέας ἠδὲ θύγατρας ὁμόζυγας ἀζυγέας τε· -εὔπαις καὶ πολύπαις ἥδε μόνη μερόπων. -τρεῖς μὲν τῆσδʼ ἱερῆες ἀγακλέες, ἡ δʼ ἱερῆος -σύζυγος· οἱ δὲ πέλας ὡς στρατὸς εὐαγέων. -
-
- - -Gregorius Nazianzenus - - - -θάμβος ἔχεν μʼ ὁρόωντα τόσον γόνον Ἐμμελίοιο -καὶ τοῖον, μεγάλης νηδύος ὄλβον ὅλον -ὡς δʼ αὐτὴν φρασάμην Χριστοῦ κτέαρ, εὐσεβὲς αἷμα, -Ἐμμέλιον, τόδʼ ἔφην οὐ μέγα· ῥίζα τόση. - -τοῦτό σοι εὐσεβίης ἱερὸν γέρας, ὦ παναρίστη, -τιμὴ σῶν τεκέων, οἷς πόθον εἶχες ἕνα. -
-
- - -Gregorius Nazianzenus - - - -παρθένον αἰγλήεσσαν ἔχω κόνις, εἲ τινʼ ἀκούεις -Μακρίναν, Ἐμμελίου πρωτότοκον μεγάλης· -ἣ πάντων ἀνδρῶν λάθεν ὄμματα· νῦν δʼ ἐνὶ πάντων -γλώσσῃ καὶ πάντων φέρτερον εὖχος ἔχει. -
-
- - -Gregorius Nazianzenus - - - -καὶ σὺ Θεοσσέβιον, κλεινῆς τέκος Ἐμμελίοιο, -Γρηγορίου μεγάλου σύζυγε ἀτρεκέως, -ἐνθάδε τὴν ἱερὴν ὑπέδυς χθόνα, ἔμμα γυναικῶν -εὐσεβέων βιότου δʼ ὥριος ἐξελύθης. - -
-
- - -Gregorius Nazianzenus - - - -Γρηγόριον μήτρως, ἱερεὺς μέγας, ἐνθάδʼ ἔθηκε -Γρηγόριος, καθαροῖς Μάρτυσι παρθέμενος, -ἠίθεον, θαλέθοντα, νεόχνοον αἱ δὲ πάροιθεν -τῆς γηροτροφίης ἐλπίδες ἥδε κόνις. -
-
- - -Gregorius Nazianzenus - - - -εἰ φίλον ὀρχησταῖς ἀθλήματα, καὶ φίλον ἔστω -θρύψις ἀεθλοφόροις· ταῦτα γάρ ἀντίθετα. -εἰ δʼ οὐκ ὀρχησταῖς ἀθλήματα, οὐδὲ ἀθληταῖς -ἡ θρύψις, πῶς σὺ Μάρτυσι δῶρα φέρεις -ἄργυρον, οἶνον, βρῶσιν, ἐρεύγματα; ἦ ῥα δίκαιος -ὃς πληροῖ θυλάκους, ἂν ἀδικώτατος ᾖ; -
-
- - -Gregorius Nazianzenus - - - -Μάρτυρες, εἴπατε ἄμμιν ἀληθῶς, εἰ φίλον ὑμῖν - -αἱ σύνοδοι; τί μὲν οὖν ἥδιον; ἀντί τίνος; - -τῆς ἀρετῆς· πολλοὶ γὰρ ἀμείνους ὧδε γένοιντʼ ἄν, - -εἰ τιμῷτʼ ἀρετή. τοῦτο μὲν εὖ λέγετε. - -ἡ δὲ μέθη, τό τε γαστρὸς ὑπάρχειν τοὺς θεραπευτὰς -ἄλλοις· ἀθλοφόρων ἔκλυσις ἀλλοτρία. -
-
- - -Gregorius Nazianzenus - - - -μὴ ψεύδεσθʼ ὅτι γαστρὸς ἐπαινέται εἰσὶν ἀθληταί· -λαιμῶν οἵδε νόμοι, ὦ ʼγαθοί, ὑμετέρων· -μάρτυσι δʼ εἰς τιμὴν ἓν ἐπίσταμαι· ὕβριν ἐλαύνειν -ψυχῆς καὶ δαπανᾶν δάκρυσι τὴν πιμελήν. - -
-
- - -Gregorius Nazianzenus - - - -Μαρτύρομʼ, ἀθλοφόροι καὶ μάρτυρες· ὕβριν ἔθηκαν -τιμὰς ὑμετέρας οἱ φιλογαστορίδαι. -οὐ ζητεῖτε τράπεζαν ἐύπνοον, οὐδὲ μαγείρους· -οἱ δʼ ἐρυγὰς παρέχους1ʼ ἀντʼ ἀρετῆς τὸ γέρας. -
-
- - -Gregorius Nazianzenus - - - -Τρισθανέες, πρῶτον μὲν ἐμίξατε σώματʼ ἀνάγνων -ἀθλοφόροις, τύμβοι δὲ θυηπόλον ἀμφὶς ἔχουσι· -δεύτερον αὖτε τάφους τοὺς μὲν ἐμίξατε σώματʼ ἀθέσμως, -αὐτοὶ σήματʼ ἔχοντες ὁμοίια· τοὺς δʼ ἀπέδοσθε, -πολλάκι καὶ τρὶς ἕκαστον ὃ δὲ τρίτον, ἱεροσυλεῖς -μάρτυρας οὓς φιλέεις· Σοδομίτιδες ἤξατε πηγαί. -
-
- - -Gregorius Nazianzenus - - - -παῖδες χριστιανῶν τόδʼ ἀκούσατε· οὐδὲν ὁ τύμβος· -πῶς οὖν ὑμετέρους χώννυτʼ ἀριπρεπέας; -ἀλλʼ ἔστιν καὶ πᾶσι γέρας τόδε, μηδὲ τάφοισιν -βάλλειν ἀλλοτρίοις δυσμενέας παλάμας. -εἰ δʼ ὅτι μὴ νέκυς οἶδε τὰ ἐνθάδε, τοῦτʼ ἀδίκαστον, -πείθομαι, ἢν σὺ φέρῃς πατρὸς ὕβριν φθιμένου. -
-
- - -Gregorius Nazianzenus - - - -Τυμβολέται, γάστρωνες, ἐρευγόβιοι, πλατύνωτοι, -μέχρι τίνος· τύμβοις Μάρτυρας ἀλλοτρίοις -τιμᾶτʼ, εὐσεβέοντες ἃ μὴ θέμις; ἴσχετε λαιμούς, -καὶ τότε πιστεύσω Μάρτυσιν ἦρα φέρειν. - -
-
- - -Gregorius Nazianzenus - - - -τιμὴ Μάρτυσίν ἐστιν ἀεὶ θνῄσκειν βιότητι, -αἵματος οὐρανίου μνωομένους μεγάλου, -τύμβοι δὲ φθιμένοις· ὃς βήματα δʼ ἡμὶν ἐγείρει -ἀλλοτρίοισι λίθοις, μηδὲ τάφοιο τύχοι. -
-
- - -Gregorius Nazianzenus - - - -Μάρτυρες, αἷμα Θεῷ μεγάλην ἐσπείσατε λοιβήν, -καὶ μέντοι θεόθεν ἄξια δῶρʼ ἔχετε, -βήμαθʼ, ὕμνους, λαούς, εὐχῶν σέβας. ἀλλʼ ἀπὸ τύμβων -φεύγετε, νεκροκόμοι, Μάρτυσι πειθόμενοι. -
-
- - -Gregorius Nazianzenus - - - -δαίμοσιν εἰλαπίναζον, ὅσοις τὸ πάροιθε μεμήλει -δαίμοσιν ἦρα φέρειν, οὐ καθαρὰς θαλίας· -τούτου χριστιανοὶ λύσιν εὕρομεν, ἀθλοφόροισι -στησάμεθʼ ἡμετέροις πνευματικὰς συνόδους. -νῦν δέ τι τάρβος ἔχει με· ἀκούσατε οἱ φιλόκωμοι· -πρὸς τοὺς δαιμονικοὺς αὐτομολεῖτε τύπους. -
-
- - -Gregorius Nazianzenus - - - -μηκέτι πηκτὸν ἄροτρον ἀνήρ ἐπὶ γαῖαν ἐλαύνοι, -μὴ πέλαγος πλώοι,. μὴ δόρυ θοῦρον ἔχοι· -ἀλλὰ φέρων σκαπάνην τε καὶ ἄγριον ἐν φρεσὶ θυμόν, -ἐς τύμβους πατέρων χρυσὸν ἴοι ποθέων -ὁππότε καὶ τοῦτόν τις ἐμὸν περικαλλέα τύμβον -σκάψεν ἀτασθαλέων εἵνεκα κερδοσύνης. - -
-
- - -Gregorius Nazianzenus - - - -ἑπτὰ βίοιο πέλει τάδε θαύματα· τεῖχος, ἄγαλμα, -κῆποι, πυραμίδες, νηός, ἄγαλμα, τάφος· -ὄγδοον ἔσκον ἔγωγε πελώριος ἐνθάδε τύμβος, -ὑψιπαγής, σκοπέλων τῶνδʼ ἀποτῆλε θέων -πρῶτος δʼ ἐν φθιμένοισιν ἀοίδιμος, ἔργον ἄπληστον -τῆς σῆς, ἀνδροφόνε, μαινομένης παλάμης. -
-
- - -Gregorius Nazianzenus - - - -ἦν ὅτε ἦν ἀτίνακτος ἐγὼ τάφος οὔρεος ἄκρην -πουλὺς ὑπερτέλλων τηλεφανὴς σκόπελος· -νῦν δέ με θὴρ ἐτίναξεν ἐφέστιος εἵνεκα χρυσοῦ· -ὧδε δʼ ἐτινάχθην γείτονος ἐν παλάμαις. -
-
- - -Gregorius Nazianzenus - - - -τὸν τύμβοιο τόσου ληίστορα, ὃν πέρι πάντῃ -λάων τετραπέδων ἀμφιθέει στέφανος, -ἄξιον αὐτίκʼ ἔην, αὐτῷ ἐνὶ σήματι θέντας -αὖθις ἐπικλεῖσαι χάσματα δυσσεβέι. -
-
- - -Gregorius Nazianzenus - - - -ἔργον ἀλιτρὸν ὄπωπα, κεχηνότα τύμβον, ὁδεύων -χρυσοῦ ταῦτα πέλει ἔργματα τοῦ δολίου· -εἰ μὲν χρυσὸν ἔχεις, εὗρες κακὸν εἰ δʼ ἄρα κεινὸς -ἔνθεν ἔβης, κενεὴν μήσαο δυσσεβίην. -
-
- - -Gregorius Nazianzenus - - - -ὁσσάτιον παράμειψα βροτῶν βίον οὐδʼ ἄρʼ ἔμελλον -ἐκφυγέειν παλάμας γείτονος οὐλομένας, -ὅς με καὶ αἰπὺν ἐόντα χαμαὶ βάλε νηλέι θυμῷ, -οὔτε Θεὸν δείσας, οὐθʼ ὁσίην φθιμένων. - -
-
- - -Gregorius Nazianzenus - - - -τὸν τύμβων κακοεργὸν ἀλάστορα φεύγετε πάντες· -ἠνίδʼ ὅσην σκοπιὴν ῥήξατο ῥηιδίως· -οὐ μὲν ῥηιδίως ἐρρήξατο· ἀλλʼ ἀποτῆλε -χάζεσθε· φθιμένους ὧδʼ ἂν ἀρεσσάμεθα. -
-
- - -Gregorius Nazianzenus - - - -αἰαῖ ὥς τι κακὸν προτιόσσομαι ἐγγύθεν ἤδη -τοῖσί τε τυμβορύχοις, τοῖς τε περικτιόσιν, -σήματος ὑψιθέοντος ὀλωλότος· ἀλλὰ τὸν ἐχθρὸν -οἶδε δίκη· δακρύειν δʼ ἡμέτερον φθιμένους. -
-
- - -Gregorius Nazianzenus - - - -Μαυσώλου τάφος ἐστὶ πελώριος, ἀλλὰ Κάρεσσι -τίμιος· οὔτις ἐκεῖ τυμβολέτις παλάμη· -Καππαδόκεσσιν ἔγωγε μέγʼ ἔξοχος, ἀλλὰ δέδορκας -οἷα πάθον στήλῃ γράψατε νεκροφόνον. -
-
- - -Gregorius Nazianzenus - - - -τοῖχος ἐνὶ προπόδεσσι καὶ ὄρθιος· ἔνθεν ἔπειτα -ὕπτιος, ἐκ λαγόνων εἰς ἓν ἀγειρομένων -τύμβος ἔην, καθύπερθε λόφου λόφος· ἀλλὰ τί ταῦτα -οὐδὲν χρυσοφίλαις οἳ μʼ ἐτίναξαν ὅλον. -
-
- - -Gregorius Nazianzenus - - - -νεκρῶν νεκρὰ πέλοι καὶ μνήματα· ὃς δʼ ἀνεγείρει -τύμβον ἀριπρεπέα τῇ κόνι, τοῖα πάθοι· -οὐ γὰρ ἂν οὗτος ἀνήρ τὸν ἐμὸν τάφον ἐξαλάπαξεν, -εἰ μὴ χρυσὸν ἔχειν ἤλπετο ἐκ νεκύων. - -
-
- - -Gregorius Nazianzenus - - - -τίς τίνος; οὐκ ἐρέει στήλη· πρὸ γὰρ ὤλετο τύμβου. - -τίς χρόνος; ἀρχαίης σῆμα τόδʼ ἐργασίης. - -τίς δὲ ς1ʼ ἐνήρατο; εἰπέ φόνος τόδε. χεῖρες ἀλιτραὶ - -γείτονος. ὡς τί λάβῃ; χρυσόν. ἔχοι σκοτίην. - -
-
- - -Gregorius Nazianzenus - - - -ὅστις ἐμὸν παρὰ σῆμα φέρεις πόδα, ἴσθι με ταῦτα -τοῦ νεοκληρονόμου χερσὶ παθόντʼ ἀδίκως· -οὐ γὰρ ἔχον χρυσόν τε καὶ ἄργυρον, ἀλλʼ ἐδοκήθην, -κάλλεϊ μαρμαίρων τοσσατίων λαγόνων. -
-
- - -Gregorius Nazianzenus - - - -στῆθι πέλας, καὶ κλαῦσον ἰδὼν τόδε σῆμα θανόντος, -εἴποτʼ ἔην, νῦν αὖτε τάφον δηλήμονος ἀνδρός· -σῆμα πέλω μὴ τύμβον ἐγείρειε βροτὸς ἄλλος. -τί πλέον, εἰ παλάμαισι φιλοχρύσοισιν ὀλεῖται; -
-
- - -Gregorius Nazianzenus - - - -αἰὼν καὶ κληῖδες ἀμειδήτου θανάτοιο, -καὶ λήθη, σκοτίης βένθεα, καὶ νέκυες, -πῶς ἔτλη τύμβον τις ἐμὸν ἔπι χεῖρας ἐνεγκεῖν; -πῶς ἔτλη; φθιμένων κήδεται οὐδʼ ὁσίη; -
-
- - -Gregorius Nazianzenus - - - -τέτρωμαι πληγῇσιν ἀεικελίῃσιν ὁ τύμβος -τέτρωμʼ, ὥς τις ἀνὴρ ἐν δαῒ λευγαλέῃ. -ταῦτα φίλα θνητοῖσι; τὸ δʼ αἴτιον ὡς ἀθέμιστον -τὸν νέκυν οἶον ἔχων, χρυσὸν ἀποξέομαι, - -
-
- - -Gregorius Nazianzenus - - - -πρός σε Θεοῦ ξενίου λιτάζομαι, ὅστις ἀμείβεις -τύμβον ἐμόν, φράζειν τοῖα πάθοις ὁ δράσας. - -οὐκ οἶδʼ ὅντινα τύμβος ἔχει νέκυν ἀλλʼ ἐρέω γε -δάκρυʼ ἐπισπένδων τοῖα πάθοις ὁ δράσας. - -
-
- - -Gregorius Nazianzenus - - - -πάντα λιπών, γαίης τε μυχοὺς καὶ πείρατα πόντου, -ἦλθες ἔχειν ποθέων χρυσὸν ἐμοῦ νέκυος. -νεκρὸν ἔχω καὶ μῆνιν ὀλωλότος· ἤν τις ἐπέλθῃ, -ταῦτʼ εἰ λείζῃ, δώσομεν ἀσπασίως. -
-
- - -Gregorius Nazianzenus - - - -εἴ σοι χρυσὸν ἔδωκα μόνῳ μόνος,, οὐκ ἐφύλασσες -τοῦθʼ ὅπερ εἰλήφεις; ἢ κακὸς ἦσθʼ ἂν ἄγαν. -εἰ δὲ τάφον σκάπτεις, τὴν αἰδέσιμον παραθήκην, -καὶ τόδʼ ἐπὶ χρυσῷ, ἄξιος, εἰπέ, τίνος; -
-
- - -Gregorius Nazianzenus - - - -τοὺς ζῶντας κατόρυσσε· τί γὰρ νεκροὺς κατορύσσεις; -ἄξιοί εἰσι τάφων, οἳ σὲ ζῆν εἴασαν οὕτω, -τὸν τῶν οἰχομένων ὑβριστὴν καὶ φιλόχρυσον. -
-
- - -Gregorius Nazianzenus - - - -καὶ σύ, τάλαν, παλάμῃσι τεαῖς ἢ μύστιν ἐδωδὴν -δέξῃ θαρσαλέως, ἢ Θεὸν ἀγκαλέσεις -χείρεσιν αἷς διόρυξας ἐμὸν τάφον; ἦ ῥα δίκαιοι -οὐδὲν ἔχουσι πλέον, εἰ σὺ τάλαντα φύγοις. - -
-
- - -Gregorius Nazianzenus - - - -φησὶ Δίκη· “τίς πίστις, ὅτʼ ὤλεσας ὃν λαγόνεσσι -σῇσιν ἔδωκα, νέκυν, γαῖα φίλη, φθίμενον;” -“ οὐ γαίη μʼ ἐτίναξεν ἀτάσθαλος ὤλεσεν ἀνήρ, - καὶ φιλοκερδείης εἵνεκα. τοῦτον ἔχε.” -
-
- - -Gregorius Nazianzenus - - - -πρόσθε τάδʼ ἦεν ἄσυλα· θεός, νέκυς. ἀλλὰ Θεὸς μὲν -ἵλαος· εἰ δὲ νέκυς, ὄψεθʼ ὁ τυμβολέτης. -
-
- - -Gregorius Nazianzenus - - - -ἦ ῥά σε δινήσουσιν Ἐρινύες· αὐτὰρ ἔγωγε -κλαύσομʼ ἀποφθιμένους, κλαύσομʼ ἄγος παλάμης. -
-
- - -Gregorius Nazianzenus - - - -Λήξατε, τυμβοχόοι, ναὶ λήξατε βένθεσι γαίης -κεύθειν τοὺς φθιμένους· εἴξατε τυμβολέταις. -νεκρῶν καὶ τάδε γʼ ἐστὶ σοφίσματα, ὡς φιλόχρυσον -εὕρωσιν παλάμην, σήματα τοῖα χέειν. -
-
- - -Gregorius Nazianzenus - - - -τίς ς1ʼ ἀνέηκεν, ἄπληστε, τόσον κακὸν ἀντὶ τόσοιο -κέρδεος ἀλλάξαι, μηδὲ παρεσταότος; -
-
- - -Gregorius Nazianzenus - - - -στῆλαι καὶ τύμβοι, μέγα χαίρετε, σήματα νεκρῶν -οὐκέτι κηρύξω μνήμασι τοὺς φθιμένους, -ἡνίκα τὸν περίφαντον ἐμὸν τάφον ὤλεσε γείτων. -γαῖα φίλη, σὺ δέ μοι δέχνυσο τοὺς φθιμένους. - -
-
- - -Gregorius Nazianzenus - - - -στῆλαι, καὶ πλακόεντες ἐν οὔρεσιν, ἔργα Γιγάντων, -τύμβοι, καὶ φθιμένων ἄφθιτε μνημοσύνη, -σεισμὸς πάντα βράσειεν, ἐμοῖς νεκύεσσιν ἀρήγων, -οἷς ἔπι χεὶρ ὀλοὴ ἦλθε σιδηροφόρος. -
-
- - -Gregorius Nazianzenus - - - -ἡνίκα τὸν περίβωτον ἐπʼ οὔρεος, ἄγριε Τιτάν, -τύμβον ἀνερρήξω, πῶς ἔσιδες νέκυας, -ὡς δʼ ἔσιδες, πῶς χεῖρες ἐπʼ ὀστέα; ἦ τάχα κέν σε -τῇ σχέθον, εἰ θέμις ἦν τοῖσδʼ ἕνα τύμβον ἔχειν. -
-
- - -Gregorius Nazianzenus - - - -σήματα, καὶ σποδιή, καὶ ὀστέα, οἵ τε πάρεδροι -δαίμονες, οἵ φθιμένου ναίετε τόνδε λόφον, -τόνδʼ ἀλιτρὸν τίννυσθε, ὃς ὑμέας ἐξαλάπαξεν. -τῶν δὲ περικτιόνων δάκρυον ὕμμιν ὅσον. -
-
- - -Gregorius Nazianzenus - - - -Τύμβοι, καὶ σκοπιαί, καὶ οὔρεα, καὶ παροδῖται, -κλαύσατε τύμβον ἐμόν, κλαύσατε τυμβολέτην -ἠχὼ δʼ ἐκ σκοπέλων Πυματηγόρος ἀντιαχείτω -τῶνδε περικτιόνων κλαύσατε τυμβολέτην. - -
-
- - -Gregorius Nazianzenus - - - -κτείνετε, ληίζεσθε, κακοὶ κακοκερδέες ἄνδρες· -οὔτις ἐπισχήσει τὴν φιλοχρημοσύνην. -εἰ τάδʼ ἔτλης, κακοεργέ, κακόφρονος εἵνεκα χρυσοῦ, -πᾶσι τεὴν ἐπέχειν ἁρπαλέην παλάμην. - -
-
- - -Gregorius Nazianzenus - - - -οὗτος ἔπερσεν ἐμὸν φίλιον τάφον ἐλπίδι κούφῃ, -ὃν μοῦνον κτεάνων ἔνθεν ἀπῆλθον ἔχων -καὶ τοῦτόν τις ἀλιτρὸς ἑαῖς παλάμαις ὀλέσειεν, -ἐκ δʼ ὀλέσας τύμβου τῆλε βάλοι πατέρων. -
-
- - -Gregorius Nazianzenus - - - -τίς τὸν ἐμὸν διέπερσε φίλον τάφον, οὔρεος ἄκρης -τῆσδʼ ἀναειρόμενον ἡλίκον ὁσσατίης; -χρυσὸς ἔθηξε μάχαιραν ἐπʼ ἀνδράσι· χρυσὸς ἄπληστον -κύμασι χειμερίοις ὤλεσε ναυσιβάτην -κἀμὲ χρυσὸς ἔπερσε μέγαν περικαλλέα τύμβον -ἐλπισθείς· χρυσοῦ δεύτερα πάντʼ ἀδίκοις. -
-
- - -Gregorius Nazianzenus - - - -πολλάκι ναυηγοῖο δέμας κατέχωσεν ὁδίτης -κύμασι πλαζόμενον, πολλάκι θηρολέτου· -ἤδη καὶ πολέμῳ τις ὃν ὤλεσεν ἀλλʼ ἐμὲ γείτων -χωσθέντʼ ἀλλοτρίαις χερσὶν ἔπερσε τάφον. -
-
- - -Gregorius Nazianzenus - - - -ὦ χρυσοῦ δολίοιο, πόσον κακὸν ἔπλεο θνητοῖς· -ζῶσιν καὶ φθιμένοις χεῖρα φέρεις ἀδικῶν -οἷς γὰρ ἐμὸν τύμβον τε καὶ ὀστέα δῶκα φυλάσσειν, -τῶνδʼ ὑπὸ ταῖς μιαραῖς ἐξολόμην παλάμαις. -
-
- - -Gregorius Nazianzenus - - - -πάντʼ ἔθανεν νεκύεσσι. τί παίζομεν; οὔτις ἔτʼ αἰδὼς -ἐκ ζώντων φθιμένοις· δέρκεο τόνδε τάφον, -ὃν γʼ ἐλπὶς χρυσοῖο διώλεσε, τόσσον ἐόντα -θαῦμα παρερχομένοις, θαῦμα περικτίοσιν. - -
-
- - -Gregorius Nazianzenus - - - -λίσσομαι· ἤν γε θάνω, ποταμῷ δέμας ἠὲ κύνεσσιν -ῥίψατε, ἠὲ πυρὶ δάψατε παντοφάγῳ· -λώιον ἢ παλάμῃσι φιλοχρύσοισιν ὀλέσθαι. -δείδια, τόνδε τάφον τοῖα παθόνθʼ ὁρόων. -
-
- - -Gregorius Nazianzenus - - - -δήποτε Κῦρος ἄναξ βασιλήιον ὡς ἀνέῳξεν -τύμβον ἐπὶ χρυσῷ, γράμμα τόδʼ εὗρε μόνον - - οἴγειν ἀπλήστοιο τάφους χερός. ὣς δὲ σὺ τόσσον -σῆμα τόδʼ οὐχ ὁσίαις οἶξας, ἄνερ, παλάμαις. -
-
- - -Gregorius Nazianzenus - - - -ὃς κακὸς οὐ φθιμένοισι, τάχʼ ἂν φθιμένοισιν ἀρήγοι -ὃς δʼ οὐδὲ φθιμένοις, οὔποτʼ ἂν οὐ φθιμένοις. -ὣς δὲ σὺ τοῖς φθιμένοισιν ἐπεὶ τάφον ἐξαλάπαξας, -οὔποτʼ ἂν οὐ φθιμένοις χεῖρα φέροις ὁσίην. -
-
- - -Gregorius Nazianzenus - - - -Μαρτύρομʼ· οὐδὲν ἔχω· πτωχὸς νέκυς ἐνθάδε κεῖμαι· -μή με τεαῖς ἀτίσῃς τυμβοφόνοις παλάμαις· -οὐδὲ γὰρ οὗτος ἔχεν;χρυσὸν τάφος, ἀλλʼ ἐδαΐχθη· -πάντα φιλοχρύσοις ἔμβατα· φεῦγε Δίκη. -
-
- - -Gregorius Nazianzenus - - - -οἱ τύμβοι φθιμένοισιν ἀρήξατε εἶπον ἅπαντες, -ἡνίχʼ ὁ λυσσήεις τόνδʼ ἐτίνασσε τάφον. -οἱ νέκυες τύμβοισι· “ῥέξομεν; αὖθις ἀέρθη -ὡς ἐπὶ βουκτασίᾐ γαῖαν ἀφεῖσα Δίκη.” - -
-
- - -Gregorius Nazianzenus - - - -ἤλυθεν εἰς Ἀίδην τις· ὁ δʼ -ἔπτατο· ἄλλος ὄλεσσε -θῆρας· ὁ δὲ πλεκτὸν υἱέϊ τεῦξε δόμον -τούτων οὗτος ἀνήρ οὐ δεύτερον ἔργον ἔρεξεν, -τόνδε τάφον ῥήξας χείρεσιν οὐχ ὁσίαις. -
-
- - -Gregorius Nazianzenus - - - -εἰ τόσον ἔργον ἔγειρας ὀλωλότι, οὐ μέγα θαῦμα· -εἰ δὲ τόσον διέπερσας, ἀοίδιμος ἐσσομένοισιν -καὶ σέ τις ἐν μεγάλοισιν ἀριθμήσει κακοεργοῖς, -τύμβον ἀναρρήξανθʼ, ὃν καὶ τρομέουσι φονῆες. -
-
- - -Gregorius Nazianzenus - - - -χρυσὸς μὲν Ῥοδίοισιν ἐπέκλυσε· σοὶ δʼ ἀπὸ τύμβων -χρυσὸν φέρει σίδηρος, ὃς κακὸν φέρει· -ὄρυσς1ʼ ὄρυσσε πάντας· ἦ τάχʼ -ἂν σέ τις -τύμβος κʼ ἐξολέσειε πεσών, νεκύεσσι δʼ ἀρήγοι. -
-
- - -Gregorius Nazianzenus - - - -τύμβος ἔην νῦν δʼ -εἰμὶ λίθων χύσις, οὐκέτι τύμβος. -ταῦτα φιλοχρύσοις εὔαδε· ποῖα δίκη. -
-
- - -Gregorius Nazianzenus - - - -αἰαῖ καὶ τέφρη γενόμην, καὶ χεῖρας ἀλιτρῶν -οὐκ ἔφυγον χρυσοῦ τίπτε χερειότερον; - -
-
- - -Gregorius Nazianzenus - - - -ἅζομαι ἀνδρομέης γενεῆς ὕπερ, εἴ σε τις ἔτλη, -τύμβε, χαμαὶ βαλέειν οὐχ ὁσίαις παλάμαις. -
-
- - -Gregorius Nazianzenus - - - -τύμβος ἐγώ, σκοπιή τις ἀπʼ οὔρεος· ἀλλά με χεῖρες -θῆκαν ἴσον δαπέδῳ· τίς τάδʼ ἄνωξε νόμος; -
-
- - -Gregorius Nazianzenus - - - -οὗτος ἐμὸς δόμος ἦεν ὀλωλότος· ἀλλὰ σίδηρος -ἦλθʼ ἐπʼ ἐμῷ τύμβῳ· σὸν δόμον ἄλλος ἔχοι. -
-
- - -Gregorius Nazianzenus - - - -τὴν σκαπάνην ἐπʼ ἄρουραν, ἐμῷ δʼ ἐπὶ σήματι βάλλειν -δάκρυα, μὴ παλάμας· ἥδε δίκη φθιμένων. -
-
- - -Gregorius Nazianzenus - - - -τὴν σκαπάνην ἐπʼ -ἄρουραν ἐμοῦ δʼ ἀποχάζεο τύμβου, -χάζεο· οὐδὲν ἔχω πλὴν ζακότων νεκύων. -
-
- - -Gregorius Nazianzenus - - - -εἴ ς1ʼ, ἄπληστε, τάφων δηλήμονα τοῖον ἐώλπειν, -πάσσαλος ἂν τῇδε καὶ τροχὸς ἐκρέματο. -
-
- - -Gregorius Nazianzenus - - - -τίπτε μʼ ἀνοχλίζεις κενεὸν τάφον; ὀστέα μοῦνα -κεύθω καὶ σποδιὴν τοῖσιν ἐπερχομένοις. - -
-
- - -Gregorius Nazianzenus - - - -τύμβος ἐγώ, τύμβων πανυπέρτατος· ἀλλʼ ἐμὲ ᾦξεν, -ὥς τινα τῶν πολλῶν, ἀνδροφόνος παλάμη· -ἀνδροφόνος παλάμη με διώλεσε· λήξατε τύμβων, -θνητοί, καὶ κτερέων. δεῦτʼ ἐπὶ νεκρά, κύνες· -δεῦτʼ ἐπὶ νεκρά, κύνες. χρυσοῦ διφήτορες ἄνδρες -ἤδη καὶ νεκύων χρυσολογοῦσι κόνιν. -
-
- - -Gregorius Nazianzenus - - - -ἄλλος τύμβον ἔγειρε, σὺ δʼ ὤλεσας· ἄλλος ἐγείροι -σὸν τάφον, εἴγε θέμις· ἄλλος ἔραζε βάλοι. -
-
- - -Gregorius Nazianzenus - - - -ἤδη καὶ νεκύεσσιν ἐπέχραον οἱ φιλόχρυσοι· -φεύγετε ἐκ τύμβων, εἰ σθένος, οἱ φθίμενοι. -
-
- - -Gregorius Nazianzenus - - - -τίπτε μʼ -ἀνοχλίζεις; νεκύων ἀμενηνὰ κάρηνα -μοῦνα φέρω· τύμβων ὀστέα πλοῦτος ἅπας. -
-
- - -Gregorius Nazianzenus - - - -δαίμονας, οἵ με ἔχουσιν, ἀλεύεο· οὔτι γὰρ ἄλλο -τύμβος ἔχω· τύμβων ὀστέα πλοῦτος ἅπας. -
-
- - -Gregorius Nazianzenus - - - -εἰ χρυσοῦ δόμος ἦεν ὅλος τάφος, ὦ φιλόχρυσε, -οὔποτʼ ἔδει τοίην χεῖρα φέρειν φθιμένοις. - -
-
- - -Gregorius Nazianzenus - - - -λήθη καὶ σιγὴ νεκύων γέρας· ὃς δʼ ἀλάπαξεν, -οὗτος ἐμὸν πολλοῖς θῆκεν ἄεισμα τάφον. -
-
- - -Gregorius Nazianzenus - - - -πάντʼ ἔχετε ζώοντες· ἐμοὶ δʼ ὀλίγοι τε φίλοι τε -λᾶες τῷ φθιμένῳ· φείδεο τοῦ νέκυος. -
-
- - -Gregorius Nazianzenus - - - -οὐ χρυσοῦ δόμος εἰμί· τί τέμνομαι; αὐτὸς ἔγωγε -τύμβος, ὃν ὀχλίζεις· πλοῦτος ἐμοῦ νέκυες. -
-
- - -Gregorius Nazianzenus - - - -τύμβος ἐγὼ κλέος ἦα περικτιόνων ἀνθρώπων -νῦν δʼ εἰμὶ στήλη χειρὸς ἀλιτροτάτης. -
-
- - -Gregorius Nazianzenus - - - -εἰ λίην φιλόχρυσον ἔχεις κέαρ, ἄλλον ὀρύσσειν -χρυσὸν ἐμοὶ δʼ οὐδὲν πλὴν φθιμένων κτερέων. -
-
- - -Gregorius Nazianzenus - - - -μὴ δείξῃς μερόπεσσι γυμνὸν νέκυν, ἤ σε γυμνώσει -ἄλλος· ὁ δὲ χρυσὸς πολλάκις ἐστὶν ὄναρ. -
-
- - -Gregorius Nazianzenus - - - -οὐχ ἅλις ἦε βροτοῖσι βροτοὺς ἐπὶ χεῖρας ἰάλλειν, -ἀλλὰ καὶ ἐκ νεκύων σπεύδετε χρυσὸν ἔχειν; - -
-
- - -Gregorius Nazianzenus - - - -ὑμετέροις τύμβοισιν ἀρήξατε, οἱ τόδʼ ὁρῶντες -σῆμα δαϊχθὲν ὅσον. λεύσατε τυμβολέτην. -
-
- - -Gregorius Nazianzenus - - - -τίς με τὸν ἐξ αἰῶνος ἀκινήτοισι λίθοισι -κευθόμενον θνητοῖς δεῖξε πένητα νέκυν; -
-
- - -Gregorius Nazianzenus - - - -τίπτε τάφον διέκερσας ἐμόν, τάλαν ; ὣς διακέρσαι -σοί γε Θεὸς βιοτήν, ὦ φιλόχρυσον ἄγος. -
-
- - -Gregorius Nazianzenus - - - -μῦθος Τάρταρος ἦεν, ἐπεὶ τάφον οὐκ ἂν ἔῳξεν -οὗτος ἀνήρ οἴμοι, ὡς βραδύπους σύ, Δίκη. -
-
- - -Gregorius Nazianzenus - - - -ὡς βραδύπους σύ, Δίκη, καὶ Τάρταρος οὐκέτι δεινός· -οὐ γὰρ ἂν οὗτος ἀνὴρ τόνδʼ ἀνέῳξε τάφον. -
-
- - -Gregorius Nazianzenus - - - -ὤμοσα τοὺς φθιμένους, καὶ ὤμοσα Τάρταρον αὐτὸν, -μήποτε τυμβολέταις εὐμενὲς ὄμμα φέρειν. -
-
- - -Gregorius Nazianzenus - - - -οὔρεα καὶ πρῶνες τὸν ἐμὸν τάφον ὥς τινʼ ἑταῖρον -κλαύσατε· πᾶς δὲ πέσοι τῷ σφε τεμόντι λίθος. - -
-
- - -Gregorius Nazianzenus - - - -πλούσιός εἰμι πένης· τύμβῳ πολύς, ἔνδον ἄχρυσος· -ἴσθι καθυβρίζων νεκρὸν ἀσυλότατον. -
-
- - -Gregorius Nazianzenus - - - -κἂν στῇς πυθμένος ἄχρις ἐμοὺς κευθμῶνας ὀρύσσων, -μόχθος σοὶ τὸ πέρας ὀστέα μοῦνον ἔχει. -
-
- - -Gregorius Nazianzenus - - - -τέμνετε, τέμνετε ὧδε· πολύχρυσος γὰρ ὁ τύμβος -τοῖς ποθέουσι λίθους· τἆλλα δὲ πάντα κόνις. -
-
- - -Gregorius Nazianzenus - - - -γαῖα φίλη, μὴ σοῖσι θανόνθʼ ὑποδέχνυσο κόλποις -τὸν τυμβωρυχίης κέρδεσι τερπόμενον. -
-
- - -Gregorius Nazianzenus - - - -ὑβριστὴς ἐπʼ ἔμʼ ἦλθε τὸν οὐ ζώοντα σίδηρος· -καὶ χρυσὸν ποθέων εὗρε πένητα νέκυν. -
-
-
- - - diff --git a/data/tlg7000/tlg001/tlg7000.tlg001.perseus-grc3.tracking.json b/data/tlg7000/tlg001/tlg7000.tlg001.perseus-grc3.tracking.json deleted file mode 100644 index 3353018d3..000000000 --- a/data/tlg7000/tlg001/tlg7000.tlg001.perseus-grc3.tracking.json +++ /dev/null @@ -1,14 +0,0 @@ -{ - "epidoc_compliant": false, - "fully_unicode": true, - "git_repo": "canonical-greekLit", - "has_cts_metadata": false, - "has_cts_refsDecl": false, - "id": "2008.01.0474", - "last_editor": "", - "note": "", - "src": "texts/sdl/Anth/03_gk.xml", - "status": "migrated", - "target": "canonical-greekLit/data/tlg7000/tlg001/tlg7000.tlg001.perseus-grc3.xml", - "valid_xml": true -} \ No newline at end of file diff --git a/data/tlg7000/tlg001/tlg7000.tlg001.perseus-grc3.xml b/data/tlg7000/tlg001/tlg7000.tlg001.perseus-grc3.xml deleted file mode 100644 index 091193217..000000000 --- a/data/tlg7000/tlg001/tlg7000.tlg001.perseus-grc3.xml +++ /dev/null @@ -1,10600 +0,0 @@ - - - - - - - Ἀνθολογία, Volume II - William Roger Paton - Perseus Project, Tufts University - Gregory Crane - - Prepared under the supervision of - Lisa Cerrato - Rashmi Singhal - Bridget Almas - - The National Endowment for the Humanities - Google Digital Humanities Awards Program - - - Trustees of Tufts University - Medford, MA - Perseus Digital Library Project - Perseus 4.0 - tlg7000.tlg001.perseus-grc8.xml - - Available under a Creative Commons Attribution-ShareAlike 4.0 International License - - - - - - - The Greek Anthology - William Roger Paton - - London - William Heinemann Ltd. - New York, NY - G. P. Putnam's Sons - 1917 - - 3 - - The Internet Archive - - - - - - - - - -

optical character recognition

- - - - - -

This pointer pattern extracts book and epigram.

- - -

This pointer pattern extracts book.

- - - - - - - Greek - Latin - - - - - Epidoc and CTS conversion and header review for best practices - tagged and parsed - - - - - -
- -
- -
- - -Polyaenus - - - -δορκάδος ἀρτιτόκοιο τιθηνητήριον οὖθαρ -ἔμπλεον ἠμῦσαν ˘ πικρὸς ἔτυψεν ἔχις. -νεβρὸς δʼ ἰομιγῆ θηλὴν σπάσε, καὶ τὸ δυσαλθὲς -τραύματος ἐξ ὀλοοῦ πικρὸν ἔβροξε γάλα. -ᾅδην δʼ ἠλλάξαντο, καὶ αὐτίκα νηλέι μοίρῃ, -ἣν ἔπορεν γαστήρ, μαστὸς ἀφεῖλε χάριν. -
-
- - -tiberius - - -Κεμμάδος ἀρτιτόκου μαζοῖς βρίθουσι γάλακτος -ἡ φονίη δακέτων ἰὸν ἐνῆκεν ἔχις· -φαρμαχθὲν δʼ ἰῷ μητρὸς γάλα νεβρὸς ἀμέλξας -χείλεσι, τὸν κείνης ἐξέπιεν θάνατον. -
-
- - -Antipater - - -εἰνοδίην καρύην με παρερχομένοις ἐφύτευσαν -παισὶ λιθοβλήτου παίγνιον εὐστοχίης. - -πάντας δʼ ἀκρεμόνας τε καὶ εὐθαλέας ὀροδάμνους -κέκλασμαι, πυκιναῖς χερμάσι βαλλομένη. -δένδρεσιν εὐκάρποις οὐδὲν πλέον ἦ γὰρ ἔγωγε -δυσδαίμων ἐς ἐμὴν ὕβριν ἐκαρποφόρουν. -
-
- - -Cyllenius - - -ἡ πάρος ἐν δρυμοῖσι νόθης ζείδωρος ὀπώρης -ἀχράς, θηροβότου πρέμνον ἐρημοσύνης, -ὀθνείοις ὄζοισι μετέμφυτος, ἥμερα θάλλω, -οὐκ ἐμὸν ἡμετέροις κλωσὶ φέρουσα βάρος. -πολλή σοι, φυτοεργέ, πόνου χάρις· εἵνεκα σεῖο -ἀχρὰς ἐν εὐκάρποις δένδρεσιν ἐγγράφομαι. -
-
- - -Palladas - - -Ὄχνη, χειρὸς ἐμῆς γλυκερὸς πόνος, ᾗ μὲν ἐφʼ ὑγρῷ -φλοιῷ φύλλον ἔδησα θέρει· πτόρθος δʼ ἐπὶ δένδρῳ -ῥιζωθεὶς δένδροιο τομῇ, καὶ καρπὸν ἀμείψας, -νέρθε μὲν ἀχρὰς ἔτʼ ἐστίν, ὕπερθε δʼ ἄρʼ εὔπνοος ὄχνη. -
-
- - -Palladas - - -ἀχρὰς ἔην θῆκας σέο χερσὶ μυρίπνοον ὄχνην, -δένδρῳ πτόρθον ἐνείς· σὴν χάριν εἰς σὲ φέρω, -
-
- - -Julius Polyaenus - - -εἰ καί σευ πολύφωνος ἀεὶ πίμπλησιν ἀκουὰς -ἢ φόβος εὐχομένων, ἢ χάρις εὐξαμένων, -Ζεῦ Σχερίης ἐφέπων ἱερὸν πέδον, ἀλλὰ καὶ ἡμέων -κλῦθι, καὶ ἀψευδεῖ νεῦσον ὑποσχεσίῃ, -ἤδη μοι ξενίης εἶναι πέρας, ἐν δέ με πάτρῃ -ζώειν, τῶν δολιχῶν παυσάμενον καμάτων. - -
-
- - -Julius Polyaenus - - -ἐλπὶς ἀεὶ βιότου κλέπτει χρόνον ἡ πυμάτη δὲ -ἠὼς τὰς πολλὰς ἔφθασεν ἀσχολίας. -
-
- - -Julius Polyaenus - - -πολλάκις εὐξαμένῳ μοι ἀεὶ θυμῆρες ἔδωκας -τέκμαρ ἀκυμάντου, Ζεῦ πάτερ, εὐπλοΐης· -δῴης μοι καὶ τοῦτον ἔτι πλόον, ἠδὲ σαώσαις -ἤδη, καὶ καμάτων ὅρμισον εἰς λιμένας. -οἶκος καὶ πάτρη βιότου χάρις· αἱ δὲ περισσαὶ -φροντίδες ἀνθρώποις οὐ βίος, ἀλλὰ πόνος. -
-
- - -Antipater - - -Πούλυπος εἰναλίῃ ποτʼ ἐπὶ προβλῆτι τανυσθεὶς -ἠελίῳ ψύχειν πολλὸν ἀνῆκε πέδα· -οὔπω δʼ ἦν πέτρῃ ἴκελος χρόα, τοὔνεκα καί μιν -αἰετὸς ἐκ νεφέων ὀξὺς ἔμαρψεν ἰδών -πλοχμοῖς δʼ εἰλιχθεὶς πέσεν εἰς ἅλα δύσμορος· ἦ ῥα -ἄμφω καὶ θήρης ἤμβροτε καὶ βιότου. -
-
- - -isidorus - - -πηρὸς ὁ μὲν γυίοις, ὁ δʼ ἄρʼ ὄμμασιν ἀμφότεροι δὲ -εἰς αὑτοὺς τὸ τύχης ἐνδεὲς ἠράνισαν. -τυφλὸς γὰρ λιπόγυιον ἐπωμάδιον βάρος αἴρων -ταῖς κείνου φωναῖς ἀτραπὸν ὠρθοβάτει· -πάντα δὲ ταῦτʼ ἐδίδαξε πικρὴ πάντολμος ἀνάγκη, -ἀλλήλοις μερίσαι τοὐλλιπὲς εἰς τέλεον. - -
-
- - -Julius Leonidas - - -τυφλὸς ἀλητεύων χωλὸν πόδας ἠέρταζεν, -ὄμμασιν ἀλλοτρίοις ἀντερανιζόμενος. -ἄμφω δʼ ἡμιτελεῖς πρὸς ἑνὸς φύσιν ἡρμόσθησαν -τοὐλλιπὲς ἀλλήλοις ἀντιπαρασχόμενοι. -
-
- - -Plato Junior - - -ἀνέρα τις λιπόγυιον ὑπὲρ νώτοιο λιπαυγὴς -ἦρε, πόδας χρήσας, ὄμματα χρησάμενος. -
-
- - -Antiphilus - - -ἄμφω μὲν πηροὶ καὶ ἀλήμονες, ἀλλʼ ὁ μὲν ὄψεις, -ὃς δὲ βάσεις· ἄλλου δʼ ἄλλος ὑπηρεσίη· -τυφλὸς γὰρ χωλοῖο κατωμάδιον βάρος αἴρων -ἀτραπὸν ὀθνείοις ὄμμασιν ἀκροβάτει. -ἡ μία δʼ ἀμφοτέροις ἤρκει φύσις· ἐν γὰρ ἑκάστῳ -τοὐλλιπὲς ἀλλήλοις εἰς ὅλον ἠράνισαν. -
-
- - -Antiphilus - - -αἰγιαλοῦ τενάγεσσιν ὑποπλώοντα λαθραίῃ -εἰρεσίῃ Φαίδων εἴσιδε πουλυπόδην -μάρψας δʼ ὠκὺς ἔριψεν ἐπὶ χθόνα, πρὶν περὶ χεῖρας -πλέξασθαι βρύγδην ὀκτατόνους ἕλικας· -δισκευθεὶς δʼ ἐπὶ θάμνον ἐς οἰκία δειλὰ λαγωοῦ, -εἰληδὸν ταχινοῦ πτωκὸς ἔδησε πόδας· -εἷλε δʼ ἁλούς· σὺ δʼ ἄελπτον ἔχεις γέρας ἀμφοτέρωθεν -ἄγρης χερσαίης, πρέσβυ, καὶ εἰναλίης, - -
-
- - -Anonymi epigrammatici - - -αὐτὸ τὸ πῦρ καύσειν διζήμενος, οὗτος, ὁ νύκτωρ -τὸν καλὸν ἱμείρων λύχνον ἀναφλογίσαι, -δεῦρʼ ἀπʼ ἐμῆς ψυχῆς ἅψον σέλας· ἔνδοθι γάρ μου -καιόμενον πολλὴν ἐξανίησι φλόγα. -
-
- - -Meleager - - -τρισσαὶ μὲν Χάριτες, τρεῖς δὲ γλυκυπάρθενοι Ὧραι· -τρεῖς δʼ ἐμὲ θηλυμανεῖς οἰστοβολοῦσι Πόθοι. -ἦ γάρ τοι τρία τόξα κατήρτισεν, ὡς ἄρα μέλλων -οὐχὶ μίαν τρώσειν, τρεῖς δʼ ἐν ἐμοὶ κραδίας. -
-
- - -Germanicus caesar - - -οὔρεος ἐξ ὑπάτοιο λαγὼς πέσεν ἔς ποτε βένθος, -ἐκπροφυγεῖν μεμαὼς τρηχὺν ὀδόντα κυνός· -ἀλλʼ οὐδʼ ὣς ἤλυξε κακὸν μόρον αὐτίκα γάρ μιν -εἰνάλιος μάρψας πνεύματος ὠρφάνισεν. -ἐκ πυρός, ὡς αἶνος, πέσες ἐς φλόγα· ἦ ῥά σε δαίμων -κἠν ἁλὶ κἠν χέρσῳ θρέψε κύνεσσι βοράν. -
-
- - -Germanicus caesar - - -ἐκ κυνὸς εἷλε κύων με. τί τὸ ξένον; εἰς ἐμὲ θῆρες -ὑγροὶ καὶ πεζοὶ θυμὸν ἔχουσιν ἕνα. -αἰθέρα λοιπὸν ἔχοιτε, λαγοί, βατόν. ἀλλὰ φοβοῦμαι, -οὐρανέ· καὶ σὺ φέρεις ἀστερόεντα κύνα. - -
-
- - -Archias - - -ὁ πρὶν ἀελλοπόδων λάμψας πλέον Αἰετὸς ἵππων, -ὁ πρὶν ὑπαὶ μίτραις κῶλα καθαψάμενος, -ὃν Φοίβου χρησμῳδὸς ἀέθλιον ἔστεφε Πυθώ, -ὀρνύμενον πτανοῖς ὠκυπέταις ἴκελον, -καὶ Νεμέη βλοσυροῖο τιθηνήτειρα λέοντος, -Πῖσά τε, καὶ δοιὰς ᾐόνας Ἰσθμὸς ἔχων, -νῦν κλοιῷ δειρὴν πεπεδημένος, οἷα χαλινῷ, -καρπὸν ἐλᾷ Δηοῦς ὀκριόεντι λίθῳ, -ἴσαν μοῖραν ἔχων Ἡρακλέι· καὶ γὰρ ἐκεῖνος -τόσσ’ ἀνύσας δούλαν ζεῦγλαν ἐφηρμόσατο. -
-
- - -Anonymi epigrammatici - - -ὁ πρὶν ἐπʼ Ἀλφειῷ στεφανηφόρος, ὦνερ, ὁ τὸ πρὶν -δισσάκι κηρυχθεὶς Κασταλίης παρʼ ὕδωρ, -ὁ πρὶν ἐγὼ Νεμέῃ βεβοημένος, ὁ πρὶν ἐπʼ Ἰσθμῷ -πῶλος, ὁ πρὶν πτηνοῖς ἶσα δραμὼν ἀνέμοις, -νῦν ὅτε γηραιός, γυροδρόμον ἠνίδε πέτρον -δινεύω, στεφέων ὕβρις, ἐλαυνόμενος. -
-
- - -Anonymi epigrammatici - - -σοί, πατρὶ Θεσσαλίη πωλοτρόφε, μέμψιν ἀνάπτω -Πήγασος, ὡς ἀδίκου τέρματος ἠντίασα· -ὃς Πυθοῖ, κἠν Ἰσθμῷ ἐκώμασα, κἠπὶ Νέμειον -Ζᾶνα, καὶ Ἀρκαδικοὺς ἤλυθον ἀκρεμόνας· -νῦν δὲ βάρος πέτρης Νισυρίδος ἔγκυκλον ἕλκω, -λεπτύνων Δηοῦς καρπὸν ἀπʼ ἀσταχύων. - -
-
- - -Philippus - - -νηδύι βριθομένην δάμαλιν Λητωίδι κούρῃ] -στῆσαν νηοκόροι θῦμα χαριζόμενοι, . -ἧς ἀίδην μέλλοντα προέφθασεν εὔστοχος ὠδίς, -πέμφθη δʼ εἰς ἀγέλην τεκνογονεῖν ἄφετος. -ἡ θεὸς ὠδίνων γὰρ ἐπίσκοπος οὐδʼ ἐδίκαζεν -τικτούσας κτείνειν, ἃς ἐλεεῖν ἔμαθεν. -
-
- - -Antipater - - -Γειαρότης Ἄρχιππος, ὅτʼ ἐκ νούσοιο βαρείης -ἄρτι λιποψυχέων ἔρρεεν εἰς ἀίδην, -εἶπε τάδʼ υἱήεσσιν “ἰὼ φίλα τέκνα, μάκελλαν -καὶ τὸν ἀροτρίτην στέρξατέ μοι βίοτον -μὴ σφαλερῆς αἰνεῖτε πόνον στονόεντα θαλάσσης, -καὶ βαρὺν ἀτηρῆς ναυτιλίης κάματον. -ὅσσον μητρυιῆς γλυκερωτέρη ἔπλετο μήτηρ, -τόσσον ἁλὸς πολιῆς γαῖα ποθεινοτέρη.ʼ” -
-
- - -Leonidas - - -ἄστρα μὲν ἠμαύρωσε καὶ ἱερὰ κύκλα σελήνης -ἄξονα δινήσας ἔμπυρος ἠέλιος· -ὑμνοπόλους δʼ ἀγεληδὸν ἀπημάλδυνεν Ὅμηρος, -λαμπρότατον Μουσῶν φέγγος ἀνασχόμενος. -
-
- - -Leonidas - - -γράμμα τόδʼ Ἀρήτοιο δαήμονος, ὅς ποτε λεπτῇ -φροντίδι δηναιοὺς ἀστέρας ἐφράσατο, - -ἀπλανέας τʼ ἄμφω καὶ ἀλήμονας, οἷσιν ἐναργὴς -ἰλλόμενος κύκλοις οὐρανὸς ἐνδέδεται. -αἰνείσθω δὲ καμὼν ἔργον μέγα, καὶ Διὸς εἶναι -δεύτερος, ὅστις ἔθηκʼ ἄστρα φαεινότερα. -
-
- - -Antipater - - -τάσδε θεογλώσσους Ἑλικὼν ἔθρεψε γυναῖκας -ὕμνοις, καὶ Μακεδὼν Πιερίας σκόπελος, -Πρήξιλλαν, Μοιρώ, Ἀνύτης στόμα, θῆλυν Ὅμηρον, -Λεσβιάδων Σαπφὼ κόσμον ἐυπλοκάμων, -Ἤρινναν, Τελέσιλλαν ἀγακλέα, καὶ σέ, Κόριννα, -θοῦριν Ἀθηναίης ἀσπίδα μελψαμέναν, -Νοσσίδα θηλύγλωσσον, ἰδὲ γλυκυαχέα Μύρτιν, -πάσας ἀενάων ἐργάτιδας σελίδων. -ἐννέα μὲν Μούσας μέγας Οὐρανός, ἐννέα δʼ αὐτὰς -γαῖα τέκεν, θνατοῖς ἄφθιτον εὐφροσύναν. -
-
- - -Parmenion - - -Εὔφημος γλώσσῃ παραμείβεο τὰν λάλον Ἠχὼ, -κοὐ λάλον ἤν τι κλύω, τοῦτʼ ἀπαμειβομέναν. -εἰς σὲ γὰρ ὃν σὺ λέγεις στρέψω λόγον ἢν δὲ σιωπᾷς, -σιγήσω. τίς ἐμεῦ γλῶσσα δικαιοτέρη; -
-
- - -Pompeius macer Junior - - -εἰ καὶ ἐρημαίη κέχυμαι κόνις ἔνθα Μυκήνη, -εἰ καὶ ἀμαυροτέρη παντὸς ἰδεῖν σκοπέλου, - -Ἴλου τις καθορῶν κλεινὴν πόλιν, ἧς ἐπάτησα -τείχεα, καὶ Πριάμου πάντʼ ἐκένωσα δόμον, -γνώσεται ἔνθεν ὅσον πάρος ἔσθενον. εἰ δέ με γῆρας -ὕβρισεν, ἀρκοῦμαι μάρτυρι Μαιονίδῃ. -
-
- - -Antiphilus - - -τόλμα, νεῶν ἀρχηγὲ ʽσὺ γὰρ δρόμον ηὕραο πόντου, -καὶ ψυχὰς ἀνδρῶν κέρδεσιν ἠρέθισασʼ, -οἷον ἐτεκτήνω δόλιον ξύλον, οἷον ἐνῆκας -ἀνθρώποις θανάτῳ κέρδος ἐλεγχόμενον; -ἦν ὄντως μερόπων χρύσεον γένος, εἰ γʼ ἀπὸ χέρσου -τηλόθεν, ὡς Ἀίδης, πόντος ἀπεβλέπετο. -
-
- - -Lollius bassus - - -ἐκλάσθην ἐπὶ γῆς ἀνέμῳ πίτυς· ἐς τί με πόντῳ -στέλλετε ναυηγὸν κλῶνα πρὸ ναυτιλίης; -
-
- - -Anonymi epigrammatici - - -ἐς τί πίτυν πελάγει πιστεύετε, γομφωτῆρες, -ἧς πολὺς ἐξ ὀρέων ῥίζαν ἔλυσε Νότος; -αἴσιον οὐκ ἔσομαι πόντου σκάφος, ἐχθρὸν ἀήταις -δένδρεον ἐν χέρσῳ τὰς ἁλὸς οἶδα τύχας. -
-
- - -Anonymi epigrammatici - - -Ἀρτιπαγῆ ῥοθίαισιν ἐπὶ κροκάλαισί με νῆα, -καὶ μήπω χαροποῦ κύματος ἁψαμέναν, -οὐδʼ ἀνέμεινε θάλασσα· τὸ δʼ ἄγριον ἐπλήμμυρεν -χεῦμα καὶ ἐκ σταθερῶν ἥρπασεν ἠιόνων -ὁλκάδα τὰν δείλαιον % ἀεὶ κλόνος, ᾗ γε τὰ πόντου -χεύματα κἠν χέρσῳ λοίγια κἠν πελάγει. - -
-
- - -Cyllenius - - -οὔπω ναῦς, καὶ ὄλωλα· τί δʼ ἂν πλέον, εἰ βυθὸν ἔγνων, -ἔτλην; φεῦ, πάσαις ὁλκάσι μοῖρα κλύδων, -
-
- - -Antiphilus - - -μυρία με τρίψασαν ἀμετρήτοιο θαλάσσης -κύματα, καὶ χέρσῳ βαιὸν ἐρεισαμένην, -ὤλεσεν οὐχὶ θάλασσα, νεῶν φόβος, ἀλλʼ ἐπὶ γαίης -Ἥφαιστος. τίς ἐρεῖ πόντον ἀπιστότερον; -ἔνθεν ἔφυν ἀπόλωλα· παρʼ ἠιόνεσσι δὲ κεῖμαι, -χέρσῳ τὴν πελάγευς ἐλπίδα μεμφομένη. -
-
- - -Antiphilus - - -ἄρτι με πηγνυμένην ἀκάτου τρόπιν ἔσπασε γείτων -πόντος, κἠν χέρσῳ εἰς ἐμὲ μηνάμενος. -
-
- - -Secundus - - -ὁλκὰς ἀμετρήτου πελάγους ἀνύσασα κέλευθον, -καὶ τοσάκις χαροποῖς κύμασι νηξαμένη, -ἣν ὁ μέλας οὔτʼ Εὖρος ἐπόντισεν, οὔτʼ ἐπὶ χέρσον -ἤλασε χειμερίων ἄγριον οἶδμα Νότων, -ἐν πυρὶ νῦν ναυηγὸς ἐγὼ χθονὶ μέμφομʼ ἀπίστῳ, -νῦν ἁλὸς ἡμετέρης ὕδατα διζομένη. - -
-
- - -Statyllius flaccus - - - - - σιγήσας ἄρυσαι. τίνος οὕνεκα ; μηκέτʼ ἀρύου. - - τεῦ χάριν; ἡσυχίης ἡδὺ λέλογχα ποτόν. - - δύσκολος ἡ κρήνη. γεῦσαι, καὶ μᾶλλον ἐρεῖς με -δύσκολον. ὢ πικροῦ νάματος. ὢ λαλιῆς. -
-
- - -Anonymi epigrammatici - - -εἰ μὲν ἀνὴρ ἥκεις, ἄρυσαι, ξένε, τῆσδʼ ἀπὸ πηγῆς· -εἰ δὲ φύσει μαλακός, μή με πίῃς πρόφασιν. -ἄρρεν ἐγὼ ποτόν εἰμι, καὶ ἀνδράσι μοῦνον ἀρέσκω· -τοῖς δὲ φύσει μαλακοῖς ἡ φύσις ἐστὶν ὕδωρ. -
-
- - -Musicius - - -ἁ Κύπρις Μούσαισι· “ κοράσια, τὰν Ἀφροδίταν -τιμᾶτʼ, ἢ τὸν Ἔρων ὔμμιν ἐφοπλίσομαι.” -χαἰ Μοῦσαι ποτὶ Κύπριν “Ἄρει τὰ στωμύλα ταῦτα· -ἡμῖν δʼ οὐ πέτεται τοῦτο τὸ παιδάριον.” -
-
- - -Ζosimus - - -οὐ μόνον ὑσμίνῃσι καὶ ἐν στονόεντι κυδοιμῷ -ῥύομʼ ἀρειτόλμου θυμὸν Ἀναξιμένους, -ἀλλὰ καὶ ἐκ πόντου, ὁπότʼ ἔσχισε νῆα θάλασσα, -ἀσπίς, ἐφʼ ἡμετέρης νηξάμενον σανίδος. -εἰμὶ δὲ κἠν πελάγει καὶ ἐπὶ χθονὸς ἐλπὶς ἐκείνῳ, -τὸν θρασὺν ἐκ διπλῶν ῥυσαμένη θανάτων. - -
-
- - -theon - - -ἡ πάρος ἀντιπάλων ἐπιήρανος ἀσπὶς ἀκόντων, -ἡ φόνιον στυγνοῦ κῦμα φέρουσα, μόθου, -ἄγριον οὐδʼ ὅτε πόντος ἐπὶ κλόνον ἤλασε φωτί, -καὶ πικρὴ ναυτέων ἔπλεθʼ ἁλιφθορίη, -συζυγίης ἀμέλησα· καλὸν δέ σε φόρτον ἄγουσα, -ναὶ φίλος, εὐκταίων ἄχρις ἔβην λιμένων. -
-
- - -Julius Leonidas - - -εἰν ἑνὶ κινδύνους ἔφυγον δύο Μυρτίλος ὅπλῳ, -τὸν μέν, ἀριστεύσας· τὸν δʼ, ἐπινηξάμενος, -ἀργέστης ὅτʼ ἔδυσε νεὼς τρόπιν ἀσπίδα δʼ ἔσχον -σωθεὶς κεκριμένην κύματι καὶ πολέμῳ. -
-
- - -Parmenion - - -ἀρκεῖ μοι χλαίνης λιτὸν σκέπας, οὐδὲ τραπέζαις -δουλεύσω, Μουσέων ἄνθεα βοσκόμενος. -μισῶ πλοῦτον ἄνουν, κολάκων τροφόν, οὐδὲ παρʼ ὀφρὺν -στήσομαι οἶδʼ ὀλίγης δαιτὸς ἐλευθερίην. -
-
- - -Statyllius flaccus - - -χρυσὸν ἀνὴρ εὑρὼν ἔλιπε βρόχον αὐτὰρ ὁ χρυσὸν -ὃν λίπεν οὐχ; εὑρὼν ἧψεν ὃν εὗρε βρόχον. - -
-
- - -Statyllius flaccus - - -χρυσὸν ἀνὴρ ὁ μὲν εὗρεν, ὁ δʼ ὤλεσεν· ὧν ὁ μὲν εὑρὼν -ῥῖψεν, ὁ δʼ οὐχ εὑρὼν λυγρὸν ἔδησε βρόχον. -
-
- - -Antipater - - -πηρὸς ἄπαις, ἢ φέγγος ἰδεῖν ἢ παῖδα τεκέσθαι -εὐξαμένη, δοιῆς ἔμμορεν εὐτυχίης· -τίκτε γὰρ εὐθὺς ἄελπτα μετʼ οὐ πολύ, καὶ τριποθήτου -αὐτῆμαρ γλυκερὸν φέγγος ἐσεῖδε φάους. -Ἄρτεμις ἀμφοτέροισιν ἐπήκοος, ἥ τε λοχείης -μαῖα, καὶ ἀργεννῶν φωσφόρος ἡ σελάων. -
-
- - -Anonymi epigrammatici - - -τὸν λύκον ἐξ ἰδίων μαζῶν τρέφω οὐκ ἐθέλουσα, -ἀλλὰ μʼ ἀναγκάζει ποιμένος ἀφροσύνη. -αὐξηθεὶς δʼ ὑπʼ ἐμοῦ, κατʼ ἐμοῦ πάλι θηρίον ἔσται· -ἡ χάρις ἀλλάξαι τὴν φύσιν οὐ δύναται. -
-
- - -Anonymi epigrammatici - - -Ζεὺς κύκνος, ταῦρος, σάτυρος, χρυσὸς διʼ ἔρωτα -Λήδης, Εὐρώπης, Ἀντιόπης, Δανάης. -
-
- - -Anonymi epigrammatici - - -ἐλπὶς καὶ σύ, Τύχη, μέγα χαίρετε· τὸν λιμένʼ εὗρον -οὐδὲν ἐμοὶ χʼ ὑμῖν· παίζετε τοὺς μετʼ ἐμέ. - -
-
- - -Mimnermus - - -τὴν σαυτοῦ φρένα τέρπε· δυσηλεγέων δὲ πολιτῶν -ἄλλος τίς σε κακῶς, ἄλλος ἄμεινον ἐρεῖ. -
-
- - -Plato - - -αἰὼν πάντα φέρει· δολιχὸς χρόνος οἶδεν ἀμείβειν -οὔνομα καὶ μορφὴν καὶ φύσιν ἠδὲ τύχην. -
-
- - -Carphyllides - - -ἰχθύας ἀγκίστρῳ τις ἀπʼ ᾐόνος εὔτριχι βάλλων -εἵλκυσε ναυηγοῦ κρᾶτα λιποτριχέα. -οἰκτείρας δὲ νέκυν τὸν ἀσώματον, ἐξ ἀσώματον -χειρὸς ἐπισκάπτων λιτὸν ἔχωσε τάφον. -εὗρε δὲ κευθόμενον χρυσοῦ κτέαρ. ἦ ῥα δικαίοις -ἀνδράσιν εὐσεβίης οὐκ ἀπόλωλε χάρις. -
-
- - -nicodemus - - -Ἱπποκράτης φάος ἦν μερόπων, καὶ σῴετο λαῶν -ἔθνεα, καὶ νεκύων ἦν σπάνις εἰν ἀίδῃ. -
-
- - -Menecrates - - -γῆρας ἐπὰν μὲν ἀπῇ, πᾶς εὔχεται· ἢν δὲ ποτʼ ἔλθῃ, -μέμφεται· ἔστι δʼ ἀεὶ κρεῖσσον ὀφειλόμενον. -
-
- - -Menecrates - - -εἴ τις γηράσας ζῆν εὔχεται, ἄξιός ἐστι -γηράσκειν πολλῶν εἰς ἐτέων δεκάδας. - -
-
- - -Philippus - - -Ἕβρου Θρηικίου κρυμῷ πεπεδημένον ὕδωρ -νήπιος εἰσβαίνων οὐκ ἔφυγεν θάνατον -ἐς ποταμὸν δʼ ἤδη λαγαρούμενον ἴχνος ὀλισθὼν, -κρυμῷ τοὺς ἁπαλοὺς αὐχένας ἀμφεκάρη. -καὶ τὸ μὲν ἐξεσύρη λοιπὸν δέμας· ἡ δὲ μένουσα -ὄψις ἀναγκαίην εἶχε τάφου πρόφασιν. -δύσμορος ἧς ὠδῖνα διείλατο πῦρ τε καὶ ὕδωρ· -ἀμφοτέρων δὲ δοκῶν, οὐδενός ἐστιν ὅλως. -
-
- - -Pamphilus - - -τίπτε παναμέριος, Πανδιονὶ κάμμορε κούρα,, -μυρομένα κελαδεῖς τραυλὰ διὰ στομάτων; -ἤ τοι παρθενίας πόθος ἵκετο, τάν τοι ἀπηύρα -Θρηίκιος Τηρεὺς αἰνὰ βιησάμενος; -
-
- - -Antipater - - -καὶ κραναᾶς Βαβυλῶνος ἐπίδρομον ἅρμασι τεῖχος -καὶ τὸν ἐπʼ Ἀλφειῷ Ζᾶνα κατηυγασάμην, -κάπων τʼ αἰώρημα, καὶ Ἠελίοιο κολοσσόν, -καὶ μέγαν αἰπεινᾶν πυραμίδων κάματον, -μνᾶμά τε Μαυσώλοιο πελώριον ἀλλʼ ὅτʼ ἐσεῖδον -Ἀρτέμιδος νεφέων ἄχρι θέοντα δόμον, -κεῖνα μὲν ἠμαύρωτο † δεκηνιδε νόσφιν Ὀλύμπου -ἅλιος οὐδέν πω τοῖον ἐπηυγάσατο. - -
-
- - -Antipater - - -τέσσαρες αἰωροῦσι τανυπτερύγων ἐπὶ νώτων -νῖκαι ἰσηρίθμους υἱέας ἀθανάτων -ἁ μὲν Ἀθηναίαν πολεμαδόκον, ἁ δʼ Ἀφροδίταν, -ἁ δὲ τὸν Ἀλκείδαν, ἁ δʼ ἀφόβητον Ἄρη, -σεῖο κατʼ εὐόροφον γραπτὸν τέγος· ἐς δὲ νέονται -οὐρανόν, ὦ Ῥώμας Γαῖε πάτρας ἔρυμα. -θείη ἀνίκατον μὲν ὁ βουφάγος. ἁ δέ σε Κύπρις -εὔγαμον, εὔμητιν Παλλάς, ἄτρεστον Ἄρης. -
-
- - -Diodorus - - -πύργος ὅδʼ εἰναλίης ἐπὶ χοιράδος, οὔνομα νήσῳ -ταὐτὸν ἔχων, ὅρμου σύμβολόν εἰμι Φάρος. -
-
- - -Anonymi epigrammatici - - -γυμνὸν ἰδοῦσα Λάκαινα παλίντροπον ἐκ πολέμοιο -παῖδʼ ἑὸν ἐς πάτραν ὠκὺν ἱέντα πόδα, -ἀντίη ἀίξασα διʼ ἥπατος ἤλασε λόγχαν, -ἄρρενα ῥηξαμένα φθόγγον ἐπὶ κταμένῳ· -“ ἀλλότριον Σπάρτας, εἶπεν, γένος, ἔρρε πρὸς ᾅδαν, -ἔρρʼ, ἐπεὶ ἐψεύσω πατρίδα καὶ γενέταν.” -
-
- - -euenus - - -ξεῖνοι, τὴν περίβωτον ἐμὲ πτόλιν, Ἴλιον ἱρήν, -τὴν πάρος εὐπύργοις τείχεσι κλῃζομένην, -αἰῶνος τέφρη κατεδήδοκεν· ἀλλʼ ἐν Ὁμήρῳ -κεῖμαι χαλκείων ἕρκος ἔχουσα πυλῶν. -οὐκέτι με σκάψει Τρωοφθόρα δούρατʼ Ἀχαιῶν, -πάντων δʼ Ἑλλήνων κείσομαι ἐν στόμασιν. - -
-
- - -Asclepiades - - -Λυδὴ καὶ γένος εἰμὶ καὶ οὔνομα· τῶν δʼ ἀπὸ Κόδρου -σεμνοτέρη πασῶν εἰμι διʼ Ἀντίμαχον. -τίς γὰρ ἔμʼ οὐκ ἤεισε; τίς οὐκ ἀνελέξατο Λύδην, -τὸ ξυνὸν Μουσῶν γράμμα καὶ Ἀντιμάχου; -
-
- - -Asclepiades - - -αὐταὶ ποιμαίνοντα μεσημβρινὰ μῆλά σε Μοῦσαι -ἔδρακον ἐν κραναοῖς οὔρεσιν, Ἡσίοδε, -καί σοι καλλιπέτηλον, ἐρυσσάμεναι περὶ πᾶσαι, -ὤρεξαν δάφνας ἱερὸν ἀκρεμόνα, -δῶκαν δὲ κράνας Ἑλικωνίδος ἔνθεον ὕδωρ, -τὸ πτανοῦ πώλου πρόσθεν ἔκοψεν ὄνυξ· -οὗ σὺ κορεσσάμενος μακάρων γένος ἔργα τε μολπαῖς -καὶ γένος ἀρχαίων ἔγραφες ἡμιθέων. -
-
- - -Anonymi epigrammatici - - -γῇ μὲν ἔαρ κόσμος πολυδένδρεον, αἰθέρι δʼ ἄστρα, -Ἑλλάδι δʼ ἥδε χθών, οἵδε δὲ τῇ πόλεϊ. -
-
- - -Antipater - - -Μναμοσύναν ἕλε θάμβος, ὅτʼ ἔκλυε τᾶς μελιφώνου -Σαπφοῦς, μὴ δεκάταν Μοῦσαν ἔχουσι βροτοί. - -
-
- - -Anonymi epigrammatici - - -στήλην μητρυιῆς, μακρὰν λίθον, ἔστεφε κοῦρος, -ὡς βίον ἠλλάχθαι καὶ τρόπον οἰόμενος· -ἡ δὲ τάφῳ κλινθεῖσα κατέκτανε παῖδα πεσοῦσα. -φεύγετε μητρυιῆς καὶ τάφον οἱ πρόγονοι. -
-
- - -Anonymi epigrammatici - - -μητρυιαὶ προγόνοισιν ἀεὶ κακόν· οὐδὲ φιλοῦσαι -σῴζουσιν Φαίδρην γνῶθι καὶ Ἱππόλυτον. -
-
- - -Parmenion - - -μητρυιῆς δύσμηνις ἀεὶ χόλος, οὐδʼ ἐν ἔρωτι -ἤπιος· οἶδα πάθη σώφρονος Ἱππολύτου. -
-
- - -Mnasalces - - -Τραυλὰ μινυρομένα, Πανδιονὶ παρθένε, φωνᾷ, -Τηρέος οὐ θεμιτῶν ἁψαμένα λεχέων, -τίπτε παναμέριος γοάεις ἀνὰ δῶμα, χελιδόν; -παύεʼ, ἐπεί σε μένει καὶ κατόπιν δάκρυα. -
-
- - -Antiphilus - - -κλῶνες ἀπῃόριοι ταναῆς δρυός, εὔσκιον ὕψος -ἀνδράσιν ἄκρητον καῦμα φυλασσομένοις, -εὐπέταλοι, κεράμων στεγανώτεροι, οἰκία φαττῶν, -οἰκία τεττίγων, ἔνδιοι ἀκρεμόνες, -κἠμὲ τὸν ὑμετέραισιν ὑποκλινθέντα κόμαισιν -ῥύσασθʼ, ἀκτίνων ἠελίου φυγάδα, - -
-
- - -Antipater - - -εὔκολος Ἑρμείας, ὦ ποιμένες, ἐν δὲ γάλακτι -χαίρων καὶ δρυΐνῳ σπενδομένοις μέλιτι· -ἀλλʼ οὐχ Ἡρακλέης· ἕνα δὲ κτίλον ἢ παχὺν ἄρνα -αἰτεῖ, καὶ πάντως ἓν θύος ἐκλέγεται. -ἀλλὰ λύκους εἴργει. τί δὲ τὸ πλέον, εἰ τὸ φυλαχθὲν -ὄλλυται εἴτε λύκοις, εἴθʼ ὑπὸ τοῦ φύλακος; -
-
- - -Antiphilus - - -Εὐβοϊκοῦ κόλποιο παλινδίνητε θάλασσα, -πλαγκτὸν ὕδωρ, ἰδίοις ῥεύμασιν ἀντίπαλον, -ἠελίῳ κἠν νυκτὶ τεταγμένον ἐς τρίς, ἄπιστον -ναυσὶν ὅσον πέμπεις χεῦμα δανειζόμενον -θαῦμα βίου, θαμβῶ σε τὸ μυρίον, οὑ δὲ ματεύω -σὴν στάσιν ἀρρήτῳ ταῦτα μέμηλε φύσει. -
-
- - -Anonymi epigrammatici - - -ἀγρὸς Ἀχαιμενίδου γενόμην ποτέ, νῦν δὲ Μενίππου· -καὶ πάλιν ἐξ ἑτέρου βήσομαι εἰς ἕτερον. -καὶ γὰρ ἐκεῖνος ἔχειν μὲ ποτʼ ᾤετο, καὶ πάλιν οὗτος -οἴεται· εἰμὶ δʼ ὅλως οὐδενός, ἀλλὰ Τύχης. -
-
- - -euenus - - -κἤν με φάγῃς ἐπὶ ῥίζαν, ὅμως ἔτι καρποφορήσω -ὅσσον ἐπισπεῖσαι σοί, τράγε, θυομένῳ. - -
-
- - -Antipater - - -Δισσᾶν ἐκ βροχίδων ἁ μὲν μία πίονα κίχλαν, -ἁ μία δʼ ἱππείᾳ κόσσυφον εἷλε πάγᾳ· -ἀλλʼ ἁ μὲν κίχλας θαλερὸν δέμας ἐς φάος Ἠοῦς -οὐκέτʼ ἀπὸ πλεκτᾶς ἧκε δεραιοπέδας, -ἁ δʼ αὖθις μεθέηκε τὸν ἱερόν. ἦν ἄρʼ ἀοιδῶν -φειδὼ κἠν κωφαῖς, ξεῖνε, λινοστασίαις. -
-
- - -Antipater - - -Πριομένα κάλλει Γανυμήδεος εἶπέ ποθʼ Ἥρα, -θυμοβόρον ζάλου κέντρον ἔχουσα νόῳ -“ ἄρσεν πῦρ ἔτεκεν Τροία Διί· τοιγὰρ ἐγὼ πῦρ -πέμψω ἐπὶ Τροίᾳ, πῆμα φέροντα Πάριν· -ἥξει δʼ Ἰλιάδαις οὐκ ἀετός, ἀλλʼ ἐπὶ θοίναν -γῦπες, ὅταν Δαναοὶ σκῦλα φέρωσι πόνων.” -
-
- - -Julius Leonidas - - -μὴ μέμψῃ μʼ ἀπέπειρον ἀεὶ θάλλουσαν ὀπώρην -ἀχράδα, τὴν καρποῖς πάντοτε βριθομένην. -ὁππόσα γὰρ κλαδεῶσι πεπαίνομεν, ἄλλος ἐφέλκει· -ὁππόσα δʼ ὠμὰ μένει, μητρὶ περικρέμαται. -
-
- - -Julius Leonidas - - -Αὐτοθελὴς καρποὺς ἀποτέμνομαι, ἀλλὰ πεπείρους· -πάντοτε μὴ σκληροῖς τύπτε με χερμαδίοις. -μηνίσει καὶ Βάκχος ἐνυβρίζοντι τὰ κείνου -ἔργα· Λυκούργειος μὴ λαθέτω σε τύχη. - -
-
- - -Julius Leonidas - - -μάντιες ἀστερόεσσαν ὅσοι ζητεῖτε κέλευθον, -ἔρροιτʼ, εἰκαίης ψευδολόγοι σοφίης. -ὑμέας ἀφροσύνη μαιώσατο, Τόλμα δʼ ἔτικτεν, -τλήμονας, οὐδʼ ἰδίην εἰδότας ἀκλεΐην. -
-
- - -Crinagoras - - -μὴ εἴπῃς θάνατον βιοτῆς ὅρον εἰσὶ καμοῦσιν, -ὡς ζωοῖς, ἀρχαὶ συμφορέων ἕτεραι. -ἄθρει Νικίεω Κῴου μόρον ἤδη ἔκειτο -εἰν ἀίδῃ, νεκρὸς δʼ ἦλθεν ὑπʼ ἠέλιον -ἀστοὶ γὰρ τύμβοιο μετοχλίσσαντες ὀχῆας, -εἴρυσαν ἐς ποινὰς τλήμονα δυσθανέα. -
-
- - -Antipater - - -%2Μηδʼ ὅτʼ ἐπʼ ἀγκύρης, ὀλοῇ πίστευε θαλάσσῃ, -ναυτίλε, μηδʼ εἴ τοι πείσματα χέρσος ἔχοι. -καὶ γὰρ Ἴων ὅρμῳ ἔνι κάππεσεν ἐς δὲ κόλυμβον -ναύτου τὰς ταχινὰς οἶνος ἔδησε χέρας. -φεῦγε χοροιτυπίην ἐπινήιον ἐχθρὸς Ἰάκχῳ -πόντος· Τυρσηνοὶ τοῦτον ἔθεντο νόμον. -
-
- - -Philippus - - -νηὸς ἐπειγομένης ὠκὺν δρόμον ἀμφεχόρευον -δελφῖνες, πελάγους ἰχθυφάγοι σκύλακες. - -καπροφόνος δὲ κύων θηρσὶν κείνους ἰκελώσας -δύσμορος, ὡς ἐπὶ γῆν εἰς βυθὸν ἐξέθορεν. -ὤλετο δʼ ἀλλοτρίης θήρης χάριν· οὐ γὰρ ἐλαφρὸς -πάντων ἐστὶ κυνῶν ὁ δρόμος ἐν πελάγει. -
-
- - -Antiphanes - - -νηὸς ἁλιστρέπτου πλαγκτὸν κύτος εἶδεν ἐπʼ ἀκτῆς -μηλοβότης, βλοσυροῖς κύμασι συρόμενον, -χεῖρα δʼ ἐπέρριψεν· τὸ δʼ ἐπεσπάσατʼ ἐς βυθὸν ἅλμης -τὸν σῴζονθʼ οὕτως πᾶσιν ἀπηχθάνετο· -ναυηγὸν δʼ ὁ νομεὺς ἔσχεν μόρον. ὢ διʼ ἐκείνην -καὶ δρυμοὶ χῆροι πορθμίδα καὶ λιμένες. -
-
- - -Philippus - - -νῆα μὲν ὤλεσε πόντος, ἐμοὶ δʼ ἔπορεν πάλι δαίμων -πλαζομένῳ φύσεως νῆα ποθεινοτέρην· -πατρὸς ἰδὼν γὰρ ἐγὼ δέμας εἰς ἐμὲ καίριον ἐλθόν, -μουνερέτης ἐπέβην, φόρτος ὀφειλόμενος. -ἤγαγεν εἰς λιμένας δὲ καὶ ἔσπειρεν δὶς ὁ πρέσβυς, -νήπιον ἐν γαίῃ, δεύτερον ἐν πελάγει. -
-
- - -Antiphilus - - -Παμφάγος ἑρπηστὴς κατὰ δώματα λιχνοβόρος μῦς, -ὄστρεον ἀθρήσας χείλεσι πεπταμένον, -πώγωνος διεροῖο νόθην ὠδάξατο σάρκα -αὐτίκα δʼ ὀστρακόεις ἐπλατάγησε δόμος, -ἁρμόσθη δʼ ὀδύναισιν ὁ δʼ ἐν κλείθροισιν ἀφύκτοις -ληφθεὶς αὐτοφόνον τύμβον ἐπεσπάσατο. - -
-
- - -Marcus argentarius - - -μηκέτι νῦν μινύριζε παρὰ δρυΐ, μηκέτι φώνει -κλωνὸς ἐπʼ ἀκροτάτου, κόσσυφε, κεκλιμένος· -ἐχθρόν σοι τόδε δένδρον ἐπείγεο δʼ, ἄμπελος ἔνθα -ἀντέλλει γλαυκῶν σύσκιος ἐκ πετάλων -κείνης ταρσὸν ἔρεισον ἐπὶ κλάδον;, ἀμφὶ τʼ ἐκείνῃ -μέλπε, λιγὺν προχέων ἐκ στομάτων κέλαδον. -δρῦς γὰρ ἐπʼ ὀρνίθεσσι φέρει τὸν ἀνάρσιον ἰξόν, -ἁ δὲ βότρυν στέργει δʼ ὑμνοπόλους Βρόμιος. -
-
- - -Philippus - - -μεμφομένη Βορέην ἐπεπωτώμην ὑπὲρ ἅλμης· -πνεῖ γὰρ ἐμοὶ Θρῄκης ἤπιος οὐδʼ ἄνεμος. -ἀλλά με τὴν μελίγηρυν ἀηδόνα δέξατο νώτοις -δελφίν, καὶ πτηνὴν πόντιος ἡνιόχει. -πιστοτάτῳ δʼ ἐρέτῃ πορθμευομένη, τὸν ἄκωπον -ναύτην τῇ στομάτων θέλγον ἐγὼ κιθάρῃ. -εἰρεσίην δελφῖνες ἀεὶ Μούσῃσιν ἄμισθον -ἤνυσαν οὐ ψεύστης μῦθος Ἀριόνιος. -
-
- - -Philippus - - -λιμὸν ὀιζυρὴν ἀπαμυνομένη πολύγηρως -Νικὼ σὺν κούραις ἠκρολόγει στάχυας· -ὤλετο δʼ ἐκ θάλπους· τῇ δʼ ἐκ καλάμης συνέριθοι -νῆσαν πυρκαϊὴν ἄξυλον ἀσταχύων. -μὴ νεμέσα, Δήμητερ, ἀπὸ χθονὸς εἰ βροτὸν οὖσαν -κοῦραι τοῖς γαίης σπέρμασιν ἠμφίεσαν. - -
-
- - -Alpheus - - -νηῶν ὠκυπόρων ὃς ἔχεις κράτος, ἵππιε δαῖμον, -καὶ μέγαν Εὐβοίης ἀμφικρεμῆ σκόπελον, -οὔριον εὐχομένοισι δίδου πλόον Ἄρεος ἄχρις -ἐς πόλιν, ἐκ Συρίης πείσματα λυσαμένοις -
-
- - -Archias - - -Ἑρμῆ Κωρυκίων ναίων πόλιν, ὦ ἄνα, χαίροις, -Ἑρμῆ, καὶ λιτῇ προσγελάσαις ὁσίῃ. -
-
- - -Antipater - - -ἀρκεῖ τέττιγας μεθύσαι δρόσος· ἀλλὰ πιόντες -ἀείδειν κύκνων εἰσὶ γεγωνότεροι. -ὣς καὶ ἀοιδὸς ἀνήρ, ξενίων χάριν, ἀνταποδοῦναι -ὕμνους εὐέρκταις οἶδε, παθὼν ὀλίγα. -τοὔνεκά σοι πρώτως μὲν ἀμείβομαι· ἢν δʼ ἐθέλωσιν -Μοῖραι, πολλάκι μοι κείσεαι ἐν σελίσιν. -
-
- - -Antipater - - -Ἀντίπατρος Πείσωνι γενέθλιον ὤπασε βίβλον -μικρήν, ἐν δὲ μιῇ νυκτὶ πονησάμενος. -ἵλαος ἀλλὰ δέχοιτο, καὶ αἰνήσειεν ἀοιδόν, -Ζεὺς μέγας ὡς ὀλίγῳ πειθόμενος λιβάνῳ. -
-
- - -isidorus - - -Πούλυπον ἀγρεύσας ποτὲ Τύννιχος, ἐξ ἁλὸς εἰς γῆν -ἔρριψεν, δείσας θηρὸς ἱμαντοπέδην. - -ἀλλʼ ὃ γʼ ἐφʼ ὑπνώοντα πεσὼν συνέδησε λαγωόν, -φεῦ, τάχα θηρευτὰς ἄρτι φυγόντα κύνας. -ἀγρευθεὶς ἤγρευσεν· ὁ δʼ εἰς ἅλα Τύννιχος ἰχθὺν -ἧκε πάλιν ζωόν, λύτρα λαγωὸν ἔχων. -
-
- - -Alpheus - - -Χειμερίαις νιφάδεσσι παλυνομένα τιθὰς ὄρνις -τέκνοις εὐναίας ἀμφέχεε πτέρυγας, -μέσφα μιν οὐράνιον κρύος ὤλεσεν ἦ γὰρ ἔμεινεν -αἴθριος, οὐρανίων ἀντίπαλος νεφέων. -Πρόκνη καὶ Μήδεια, κατʼ Ἄϊδος αἰδέσθητε -μητέρες ὀρνίθων ἔργα διδασκόμεναι. -
-
- - -Antipater - - -Ἀντιγένης ὁ Γελῷος ἔπος ποτὲ τοῦτο θυγατρὶ -εἶπεν, ὅτʼ ἦν ἤδη νεύμενος εἰς Ἀίδην -“ παρθένε καλλιπάρῃε, κόρη δʼ ἐμή, ἴσχε συνεργὸν -ἠλακάτην, ἀρκεῦν κτῆμα πένητι βίῳ· -ἢν δʼ ἵκᾐ εἰς ὑμέναιον, Ἀχαιίδος ἤθεα μητρὸς -χρηστὰ φύλασσε, πόσει προῖκα βεβαιοτάτην.” -
-
- - -Alpheus - - -Ἀνδρομάχης ἔτι θρῆνον ἀκούομεν, εἰσέτι Τροίην -δερκόμεθʼ ἐκ βάθρων πᾶσαν ἐρειπομένην, -καὶ μόθον Αἰάντειον, ὑπὸ στεφάνῃ τε πόληος -ἔκδετον ἐξ ἵππων Ἕκτορα συρόμενον, -Μαιονίδεω διὰ μοῦσαν, ὃν οὐ μία πατρὶς ἀοιδὸν -κοσμεῖται, γαίης δʼ ἀμφοτέρης κλίματα. - -
-
- - -Statyllius flaccus - - -Οἰδίποδες δισσοί σε, καὶ Ἠλέκτρη βαρύμηνις, -καὶ δείπνοις ἐλαθεὶς Ἀτρέος Ἠέλιος, -ἄλλα τε πουλυπαθέσσι, Σοφόκλεες, ἀμφὶ τυράννοις -ἄξια τῆς Βρομίου βύβλα χοροιτυπίης, -ταγὸν ἐπὶ τραγικοῖο κατῄνεσσαν θιάσοιο, -αὐτοῖς ἡρώων φθεγξάμενον στόμασι. -
-
- - -Leonidas - - -Ἴξαλος εὐπώγων αἰγὸς πόσις ἒν ποθʼ ἁλωῇ -οἴνης τοὺς ἁπαλοὺς πάντας ἔδαψε κλάδους. -τῷ δʼ ἔπος ἐκ γαίης τόσον ἄπυε· “κεῖρε, κάκιστε, -γναθμοῖς ἡμέτερον κλῆμα τὸ καρποφόρον· -ῥίζα γάρ ἔμπεδος οὖσα πάλιν γλυκὺ νέκταρ ἀνήσει, -ὅσσον ἐπισπεῖσαι σοί, τράγε, θυομένῳ.” -
-
- - -Alpheus - - -Λητοῦς ὠδίνων ἱερὴ τροφέ, τὴν ἀσάλευτον -Αἰγαίῳ Κρονίδης ὡρμίσατʼ ἐν πελάγει, -οὒ νύ σε δειλαίην, μὰ τεούς, δέσποινα, βοήσω, -δαίμονας, οὐδὲ λόγοις ἕψομαι Ἀντιπάτρου· -ὀλβίζω δʼ, ὅτι Φοῖβον ἐδέξαο, καὶ μετʼ Ὄλυμπον -Ἄρτεμις οὐκ ἄλλην ἢ σὲ λέγει πατρίδα. -
-
- - -Alpheus - - -ἡρώων ὀλίγαι μὲν ἐν ὄμμασιν, αἱ δʼ ἔτι λοιπαὶ -πατρίδες οὐ πολλῷ γʼ αἰπύτεραι πεδίων - -οἵην καὶ σέ, τάλαινα, παρερχόμενός γε Μυκήνην -ἔγνων, αἰπολίου παντὸς ἐρημοτέρην, -αἰπολικὸν μήνυμα· γέρων δέ τις, ἡ πολύχρυσος, - -εἶπεν, Κυκλώπων τῇδʼ ἐπέκειτο πόλις. - -
-
- - -Antonius - - -ἡ πρὶν ἐγὼ Περσῆος ἀκρόπτολις αἰθερίοιο -ἡ πικρὸν Ἰλιάδαις ἀστέρα θρεψαμένη, -αἰπολίοισιν ἔναυλον ἐρημαίοισιν ἀνεῖμαι, -τίσασα Πριάμου δαίμοσιν ὀψὲ δίκας. -
-
- - -Mundus munatius - - -ἡ πολύχρυσος ἐγὼ τὸ πάλαι πόλις, ἡ τὸν Ἀτρειδῶν -οἶκον ἀπʼ οὐρανίου δεξαμένη γενεῆς, -ἡ Τροίην πέρσασα θεόκτιτον, ἡ βασίλειον -ἀσφαλὲς Ἑλλήνων οὖσά ποθʼ ἡμιθέων, -μηλόβοτος κεῖμαι καὶ βούνομος ἔνθα Μυκήνη, -τῶν ἐν ἐμοὶ μεγάλων τοὔνομʼ ἔχουσα μόνον. -Ἴλιον ἆ Νεμέσει μεμελημένον, εἴ γε, Μυκήνης -μηκέθʼ ὁρωομένης, ἐσσί, καὶ ἐσσὶ πόλις. -
-
- - -Alpheus - - -Ἄργος, Ὁμηρικὲ μῦθε, καὶ Ἑλλάδος ἱερὸν οὖδας, -καὶ χρυσέη τὸ πάλαι Περσέος ἀκρόπολι, -ἐσβέσαθʼ ἡρώων κείνων κλέος, οἵ ποτε Τροίης -ἤρειψαν κατὰ γῆς θειόδομον στέφανον. -ἀλλʼ ἡ μὲν κρείσσων ἐστὶν πόλις· αἱ δὲ πεσοῦσαι -δείκνυσθʼ εὐμύκων αὔλια βουκολίων. - -
-
- - -Anonymi epigrammatici - - -ἐκλάσθην ἀνέμοισι πίτυς. τί με τεύχετε νῆα, -ναυηγῶν ἀνέμων χερσόθι γευσαμέναν; ˘ -
-
- - -Julius Leonidas - - -ὁλκάδα πῦρ μʼ ἔφλεξε, τόσην ἅλα μετρήσασαν, -ἐν χθονί, τῇ πεύκας εἰς ἐμὲ κειραμένᾐ, -ἣν πέλαγος διέσωσεν, ἐπʼ ᾐόνος· ἀλλὰ θαλάσσης -τὴν ἐμὲ γειναμένην εὗρον ἀπιστοτέρην. -
-
- - -Leonidas - - -τὴν μικρήν με λέγουσι, καὶ οὐκ ἴσα ποντοπορεύσαις -ναυσὶ διιθύνειν ἄτρομον εὐπλοΐην -οὐκ ἀπόφημι δʼ ἐγώ· βραχὺ μὲν σκάφος, ἀλλὰ θαλάσσῃ -πᾶν ἴσον οὐ μέτρων ἡ κρίσις, ἀλλὰ τύχης. -ἔστω πηδαλίοις ἑτέρῃ πλέον ἄλλο γὰρ ἄλλῃ -θάρσος· ἐγὼ δʼ εἴην δαίμοσι σῳζομένη. -
-
- - -Anonymi epigrammatici - - -ὁ Ζεὺς πρὸς τὸν Ἔρωτα· βέλη τὰ σὰ πάντʼ ἀφελοῦμαι· - -χὠ πτανός· Βρόντα, καὶ πάλι κύκνος ἔσῃ. - -
-
- - -Julius Diocles - - -οὐκ οἶδʼ εἴτε σάκος λέξαιμί σε, τὴν ἐπὶ πολλοὺς -ἀντιπάλους πιστὴν σύμμαχον ὡπλισάμην, - -εἴτε σε βαιὸν ἐμοὶ πόντου σκάφος, ἥ μʼ ἀπὸ νηὸς -ὀλλυμένης κόμισας νηκτὸν ἐπʼ ἠιόνας. -Ἄρεος ἐν πολέμοις ἔφυγον χόλον, ἔν τε θαλάσσῃ -Νηρῆος· σὺ δʼ ἄρʼ ἦς ὅπλον ἐν ἀμφοτέροις. -
-
- - -Alpheus - - -οὐ στέργω βαθυληίους ἀρούρας, -οὐκ ὄλβον πολύχρυσον, οἷα Γύγης. -αὐτάρκους ἔραμαι βίου, Μακρῖνε· -τὸ Μηθὲν γὰρ ἄγαν ἄγαν με τέρπει. -
-
- - -Archias - - -Θρήικας αἰνείτω τις, ὅτι στοναχεῦσι μὲν υἷας -μητέρος ἐκ κόλπων πρὸς φάος ἐρχομένους, -ἔμπαλι δʼ ὀλβίζουσιν ὅσους αἰῶνα λιπόντας -ἀπροϊδὴς Κηρῶν λάτρις ἔμαρψε Μόρος. -οἱ μὲν γὰρ ζώοντες ἀεὶ παντοῖα περῶσιν -ἐς κακά, τοὶ δὲ κακῶν εὗρον ἄκος φθίμενοι. -
-
- - -Antipater - - -τρὶς δέκα με πνεύσειν καὶ δὶς τρία μάντιες ἄστρων -φασὶν ἐμοὶ δʼ ἀρκεῖ καὶ δεκὰς ἡ τριτάτη· -τοῦτο γὰρ ἀνθρώποις βιοτῆς ὅρος· ἡ δʼ ἐπὶ τούτοις -Νέστορι· καὶ Νέστωρ δʼ ἤλυθεν εἰς ἀίδην, -
-
- - -Parmenion - - -οἱ κόρις ἄχρι κόρου κορέσαντό μου· ἀλλʼ ἐκορέσθην -ἄχρι κόρου καὐτὸς τοὺς κόρις ἐκκορίσας. - -
-
- - -Parmenion - - -παιδὸς ἀφʼ ὑψηλῶν κεράμων ὑπὲρ ἄκρα μέτωπα -κύπτοντος ʽΜοῖρα νηπιάχοις ἄφοβονʼ, -μήτηρ ἐξόπιθεν μαζῷ μετέτρεψε νόημα· -δὶς δὲ τέκνῳ ζωὴν ἓν κεχάριστο γάλα, -
-
- - -Anonymi epigrammatici - - -ἀσπίδʼ Ἀχιλλῆος, τὴνἝκτορος αἷμα πιοῦσαν, -Λαρτιάδης Δαναῶν ἦρε κακοκρισίῃ·̓· -ναυηγοῦ δὲ θάλασσα κατέσπασε, καὶ παρὰ τύμβον -Αἴαντος νηκτὴν ὥρμισεν, οὐκ Ἰθάκῃ, -
-
- - -Anonymi epigrammatici - - -καλὰ Ποσειδάων δίκασεν πολὺ μᾶλλον Ἀθήνης· - -καὶ κρίσιν Ἑλλήνων στυγερὴν ἀπέδειξε θάλασσα, -καὶ Σαλαμὶς ἀπέχει κῦδος ὀφειλόμενον. -
-
- - -Anonymi epigrammatici - - -ἀσπὶς ἐν αἰγιαλοῖσι βοᾷ, καὶ σῆμα τινάσσει, -αὐτόν σ’ ἐκκαλέουσα, τὸν ἄξιον ἀσπιδιώτην - - ἔγρεο, παῖ Τελαμῶνος, ἔχεις σάκος Αἰακίδαο. - - -
-
- - -Statyllius flaccus - - -πένθιμον ἡνίκα πατρὶ Πολυξείνης ὑμέναιον -ἤνυσεν ὀγκωτοῦ Πύρρος ὕπερθε τάφου, -ὧδε πολυκλαύτοιο κόμας λακίσασα καρήνου -Κισσηὶς τεκέων κλαῦσε φόνους Ἑκάβη· -“ πρόσθε μὲν ἀξονίοις φθιτὸν εἴρυσας Ἕκτορα δεσμοῖς· -νῦν δὲ Πολυξείνης αἷμα δέχῃ φθίμενος· -Αἰακίδη, τί τοσοῦτον ἐμῇ ὠδύσσαο νηδυῖ; -παισὶν ἔφυς γὰρ ἐμοῖς ἤπιος οὐδὲ νέκυς.” -
-
- - -Besantinus - - -ὤ μοι ἐγὼν ἥβης καὶ γήραος οὐλομένοιο· -τοῦ μὲν ἐπερχομένου, τῆς δʼ ἀπονισαμένης, -
-
- - -Palladas - - -εἴ τις ἀνὴρ ἄρχων ἐθέλει κολάκων ἀνέχεσθαι, -πολλοὺς ἐκδώσει τοῖς μιαροῖς στόμασιν -ὥστε χρὴ τὸν ἄριστον, ἀπεχθαίροντα δικαίως, -ὡς κόλακας μισεῖν τοὺς κολακευομένους. -
-
- - -Pseudo-lucianus - - -φαῦλος ἀνὴρ πίθος ἐστὶ τετρημένος, εἰς ὃν ἁπάσας -ἀντλῶν τὰς χάριτας, εἰς κενὸν ἐξέχεας. -
-
- - -Anonymi epigrammatici - - -Σπάρτας καὶ Σαλαμῖνος ἐγὼ φυτὸν ἀμφήριστον -κλαίω δʼ ἠιθέων ἔξοχον ἢ προμάχων. - -
-
- - -euenus - - -Ἀτθὶ κόρα μελίθρεπτε, λάλος λάλον ἁρπάξασα -τέττιγα πτανοῖς δαῖτα φέρεις τέκεσιν, -τὸν λάλον ἁ λαλόεσσα, τὸν εὔπτερον ἁ πτερόεσσα, -τὸν ξένον ἁ ξείνα, τὸν θερινὸν θερινά; -κοὐχὶ τάχος ῥίψεις; οὐ γὰρ θέμις, οὐδὲ δίκαιον, -ὄλλυσθʼ ὑμνοπόλους ὑμνοπόλοις στόμασιν. -
-
- - -Julius Leonidas - - -ἐκ θοίνης φάος ἔσχεν ἐπʼ ἀχράδα μηκὰς ἰοῦσα, -ἐκ δʼ ἐφάνη τυφλὴν μηκέτʼ ἔχουσα κόρην· -δισσῶν τὴν ἑτέρην γὰρ ἐκέντρισεν ὀξὺς ἀκάνθης -ὄζος. ἴδʼ ὡς τέχνης δένδρον ἐνεργότερον. -
-
- - -Anonymi epigrammatici - - -ποῖ Φοῖβος πεπόρευται; Ἄρης ἀναμίγνυται Δάφνῃ. -
-
- - -Anonymi epigrammatici - - -θαρσαλέοι Κελτοὶ ποταμῷ ζηλήμονι Ῥήνῳ -τέκνα ταλαντεύουσι, καὶ οὐ πάρος εἰσὶ τοκῆες, -πρὶν πάιν ἀθρήσωσι λελουμένον ὕδατι σεμνῷ. -αἶψα γὰρ ἡνίκα μητρὸς ὀλισθήσας διὰ κόλπων -νηπίαχος πρῶτον προχέει δάκρυ, τὸν μὲν ἀείρας -αὐτὸς ἐπʼ ἀσπίδι θῆκεν ἑὸν πάιν, οὐδʼ ἀλεγίζει, -οὔπω γὰρ γενέταο φέρει νοῦν, πρὶν γʼ ἐπαθρήσῃ - -κεκριμένον λουτροῖσιν ἐλεγξιγάμου ποταμοῖο· -ἡ δὲ μετʼ εἰλείθυιαν ἐπʼ ἄλγεσιν ἄλγος ἔχουσα -μήτηρ, εἰ καὶ παιδὸς ἀληθέα οἶδε τοκῆα, -ἐκδέχεται τρομέουσα, τί μήσεται ἄστατον ὕδωρ. -
-
- - -Anonymi epigrammatici - - -τίνας ἂν εἴποι λόγους Κλυταιμνήστρα Ὀρέστου μέλλοντος -αὐτὴν σφάξαι. -πῇ ξίφος ἰθύνεις; κατὰ γαστέρος, ἢ κατὰ μαζῶν; -γαστὴρ ἥδʼ ἐλόχευσεν, ἀνεθρέψαντο δὲ μαζοί. -
-
- - -Anonymi epigrammatici - - -ἂν περιλειφθῇ μικρὸν ἐν ἄγγεσιν ἡδέος οἴνου, -εἰς ὀξὺ τρέπεται τοῦτο τὸ λειπόμενον -οὕτω ἀπαντλήσας τὸν ὅλον βίον, εἰς βαθὺ δʼ ἐλθὼν -γῆρας, ὁ πρεσβύτης γίνεται ὀξύχολος. -
-
- - -nestor - - -εἷρπε δράκων, καὶ ἔπινεν ὕδωρ· σβέννυντο δὲ πηγαὶ -καὶ ποταμὸς κεκόνιστο, καὶ ἦν ἔτι διψαλέος θήρ. -
-
- - -nestor - - -εἷρπε τὸ μέν, τὸ δʼ ἔμελλε, τὸ δʼ ἦν ἔτι νωθρὸν ἐν εὐνῇ· -αὐτὰρ ὃ διψήσας ποταμῷ ὑπέθηκε γένειον. -πᾶς δʼ ἄρα Κηφισὸς εἴσω ῥέεν ἀργαλέον δὲ -ἀνθερεὼν κελάρυζε. κατερχομένου δὲ ῥεέθρου, -Κηφισὸν κώκυον ὀλωλότα πολλάκι Νύμφαι. - -
-
- - -Anonymi epigrammatici - - -Παλλάδος εἰμὶ φυτόν· Βρομίου τί με θλίβετε κλῶνες -ἄρατε τοὺς βότρυας· παρθένος οὐ μεθύω. -
-
- - -Anonymi epigrammatici - - -οὔρεσιν ἐν δολιχοῖς βλωθρὴν πίτυν ὑέτιός με -πρόρριζον γαίης ἐξεκύλισε Νότος· -ἔνθεν ναῦς γενόμην, ἀνέμοις πάλιν ὄφρα μάχωμαι, -ἄνθρωποι τόλμης οὔ ποτε φειδόμενοι. -
-
- - -Anonymi epigrammatici - - -σωφροσύνη καὶ Ἔρως κατεναντίον ἀλλήλοισιν -ἐλθόντες ψυχὰς ὤλεσαν ἀμφότερον· -Φαίδρην μὲν κτεῖνεν πυρόεις πόθος Ἱππολύτοιο· -Ἱππόλυτον δʼ ἁγνὴ πέφνε σαοφροσύνη·. -
-
- - -Anonymi epigrammatici - - -εἴ τις ἅπαξ γήμας πάλι δεύτερα λέκτρα διώκει, -ναυηγὸς πλώει δὶς βυθὸν ἀργαλέον. -
-
- - -Anonymi epigrammatici - - -

-This epigram has been joined with 135. -

-
-
- - -Anonymi epigrammatici - - -ἐλπὶς, καὶ σὺ Τύχη, μέγα χαίρετε· τὴν ὁδὸν εὗρον -οὐκέτι γὰρ σφετέροις ἐπιτέρπομαι. ἔρρετε ἄμφω, -οὕνεκεν ἐν μερόπεσσι πολυπλανέες μάλα, ἐστέ. -ὅσσα γὰρ ἀτρεκέως οὐκ ἔσσεται, ὔμμες ἐν ἡμῖν -φάσματα, ὡς ὕπνῳ, ἐμβάλλετε, οἷά τʼ ἐόντα. -ἔρρε κακὴ γλήνη, πολυώδυνε· ἔρρετε ἄμφω. - -παίζοιτʼ, εἴγε θέλοιτε, ὅσους ἐμεῦ ὕστερον ὄντας -εὕροιτʼ οὐ νοέοντας ὅπερ θέμις ἐστὶ νοῆσαι. -ἀτρεκέως μάλα πᾶσι πλάνη Τύχη ἐστὶ βροτοῖσιν -ἔστι γὰρ ἀδρανέη, τὸ δʼ ἐπιπλέον οὐδὲ πέλουσα. -γράψε τίς; οἶδε θεός· τίνος εἵνεκεν; οἶδε καὶ αὐτός. -
-
- - -Flavius Cyrus - - -αἴθε πατήρ μʼ ἐδίδαξε δασύτριχα μῆλα νομεύειν, -ὥς κεν ὑπὸ πτελέῃσι καθήμενος, ἢ ὑπὸ πέτρῃς -συρίσδων καλάμοισιν ἐμὰς τέρπεσκον ἀνίας. -Πιερίδες, φεύγωμεν ἐυκτιμένην πόλιν ἄλλην -πατρίδα μαστεύσωμεν. ἀπαγγελέω δʼ ἄρα πᾶσιν -ὡς ὀλοοὶ κηφῆνες ἐδηλήσαντο μελίσσας. -
-
- - -hadrianus imperator - - - -ἥμισύ μου τέθνηκε, τὸ δʼ ἥμισυ λιμὸς ἐλέγχει· -σῶσόν μου, βασιλεῦ, μουσικὸν ἡμίτονον. -πρὸς ὃν ὁ βασιλεὺς Ἁδριανὸς ἀπεκρίνατο -ἀμφοτέρους ἀδικεῖς καὶ Πλουτέα καὶ Φαέθοντα· -τὸν μὲν ἔτʼ εἰσορόων, τοῦ δʼ ἀπολειπόμενος. -
-
- - -Anonymi epigrammatici - - -ἦν νέος, ἀλλὰ πένης· νῦν γηρῶν πλούσιός εἰμι, -ὦ μόνος ἐκ πάντων οἰκτρὸς ἐν ἀμφοτέροις· -ὃς τότε μὲν χρῆσθαι δυνάμην, ὁπότʼ οὐδὲ ἓν εἶχον, -νῦν δʼ ὁπότε χρῆσθαι μὴ δύναμαι, τότʼ ἔχω. - -
-
- - -Claudianus - - -Μαχλὰς ἐϋκροτάλοισιν ἀνευάζουσα χορείαις, -δίζυγα παλλομένοισι τινάγμασι χαλκὸν ἀράσσει· - -τῆς μὲν ὑποκλέπτων πολιὴν τρίχα, γείτονα μοίρης. -ἠλεμάτοις ἀκτῖσι χαράσσεται ὄμματος αὐγή -ψευδόμενον δʼ ἐρύθημα κατέγραφεν ἄχροος αἰδώς, -ἀγλαΐῃ στέψασα νόθῃ κεκαλυμμένα μῆλα. -
-
- - -Claudius claudianus - - -ἕδρην χαλκεόπεζον ἐπὶ προθύροις Ἑλικῶνος -εἱστήκει θεράπων τις ὑπὲρ νώτοιο μεμαρπώς, -οὐδʼ ἔθελεν μογέοντι πορεῖν ἐπίβαθρον ἀοιδῆς· -τοὔνεκά μευ θώρηξε νόον πολύμητις ἀνάγκη. -
-
- - -Anonymi epigrammatici - - -κοινῇ πὰρ κλισίῃ ληθαργικὸς ἠδὲ φρενοπλὴξ -κείμενοι, ἀλλήλων νοῦσον ἀπεσκέδασαν. -ἐξέθορε κλίνης γὰρ ὁ τολμήεις ὑπὸ λύσσης, -καὶ τὸν ἀναίσθητον παντὸς ἔτυπτε μέλους. -πληγαὶ δʼ ἀμφοτέροις ἐγένοντʼ ἄκος, αἷς ὁ μὲν αὐτῶν -ἔγρετο, τὸν δʼ ὕπνῳ πουλὺς ἔριψε κόπος. -
-
- - -Anonymi epigrammatici - - -Κρημνοβάταν, δίκερων, Νυμφῶν ἡγήτορα Πᾶνα -ἁζόμεθʼ, ὃς πετρίνου τοῦδε κέκηδε δόμου, -ἵλαον ἔμμεναι ἄμμιν, ὅσοι λίβα τήνδε μολόντες -ἀενάου πόματος, δίψαν ἀπωσάμεθα. - -
-
- - -Antipater - - -λιτός τοι δόμος οὗτος ʽ ἐπεὶ παρὰ κύματι πηγῷ -ἵδρυμαι νοτερῆς δεσπότις ἠιόνοσʼ, -ἀλλὰ φίλος· πόντῳ γὰρ ἐπὶ πλατὺ δειμαίνοντι -χαίρω, καὶ ναύταις εἰς ἐμὲ σῳζομένοις. -ἱλάσκευ τὴν Κύπριν ἐγὼ δέ σοι ἢ ἐν ἔρωτι -οὔριος, ἢ χαροπῷ πνεύσομαι ἐν πελάγει. -
-
- - -Anyte - - -Κύπριδος οὗτος ὁ χῶρος, ἐπεὶ φίλον ἔπλετο τήνᾳ, -αἰὲν ἀπʼ ἠπείρου λαμπρὸν ὁρῆν πέλαγος, -ὄφρα φίλον ναύτῃσι τελῇ πλόον ἀμφὶ δὲ πόντος -δειμαίνει, λιπαρὸν δερκόμενος ξόανον. -
-
- - -Anonymi epigrammatici - - -ἐλθὼν εἰς ἀίδην, ὅτε δὴ σοφὸν ἤνυσε γῆρας, -Διογένης ὁ κύων Κροῖσον ἰδὼν ἐγέλα, -καὶ στρώσας ὁ γέρων τὸ τριβώνιον ἐγγὺς ἐκείνου, -τοῦ πολὺν ἐκ ποταμοῦ χρυσὸν ἀφυσσαμένου, -εἶπεν “ἐμοὶ καὶ νῦν πλείων τόπος· ὅσσα γὰρ εἶχον, -πάντα φέρω σὺν ἐμοί· Κροῖσε, σὺ δʼ οὐδὲν ἔχεις.” -
-
- - -Anonymi epigrammatici - - -ἐλπίδα καὶ Νέμεσιν Εὔνους παρὰ βωμὸν ἔτευξα, -τὴν μὲν, ἵνʼ ἐλπίζῃς· τὴν δʼ, ἵνα μηδὲν ἔχῃς. - -
-
- - -Antagoras - - -ὦ ἴτε Δήμητρος πρὸς ἀνάκτορον, ὦ ἴτε, μύσται, -μὴ δʼ ὕδατος προχοὰς δείδιτε χειμερίους. -τοῖον γὰρ Ξενοκλῆς [ὁ Ξείνιδος ἀσφαλὲς ὔμμιν -ζεῦγμα διὰ πλατέος τοῦδʼ ἔβαλεν ποταμοῦ. -
-
- - -Anonymi epigrammatici - - -τὸν βίον, Ἡράκλειτε, πολὺ πλέον ἤπερ ὅτʼ ἔζης -δάκρυε· νῦν ὁ βίος ἔστʼ ἐλεεινότερος. -τὸν βίον ἄρτι γέλα, Δημόκριτε, τὸ πλέον ἢ πρὶν -νῦν ὁ βίος πάντων ἐστὶ γελοιότερος. -εἰς ὑμέας δὲ καὶ αὐτὸς ὁρῶν, τὸ μεταξὺ μεριμνῶ -πῶς ἅμα σοὶ κλαύσω, πῶς ἅμα σοὶ γελάσω. -
-
- - -Antipater - - -εἶχεν Ἀριστείδης ὁ βοκέρριος οὐκ ἀπὸ πολλῶν -πολλά, μιῆς δʼ ὄιος καὶ βοὸς εὐπορίην. -ἀλλὰ γὰρ οὐδʼ ὁ πένης ἔφυγε φθόνον ἤματι δʼ αὐτῷ -θῆρες ὄιν, τὴν βοῦν δʼ ὤλεσε δυστοκίη. -μισήσας δʼ ἀβληχὲς ἐπαύλιον, ἅμματι πήρης -ἐκ ταύτης βιοτὴν ἀχράδος ἐκρέμασεν. -
-
- - -Antipater - - -πλοῦτος Ἀριστείδῃ δάμαλις μία καὶ τριχόμαλλος -ἦν ὄις· ἐκ τούτων λιμὸν ἔλαυνε θύρης. -ἤμβροτε δʼ ἀμφοτέρων· ἀμνὴν λύκος, ἔκτανε δʼ ὠδὶς -τὴν δάμαλιν πενίης δʼ ὤλετο βουκόλιον. -πηροδέτῳ δʼ ὃ γʼ ἱμάντι κατʼ αὐχένος ἅμμα λυγώσας, -οἰκτρὸς ἀμυκήτῳ κάτθανε πάρ καλύβᾐ, - -
-
- - -Antipater - - -ποῦ τὸ περίβλεπτον κάλλος σέο, Δωρὶ Κόρινθε; -ποῦ στεφάναι πύργων, ποῦ τὰ πάλαι κτέανα, -ποῦ νηοὶ μακάρων, ποῦ δώματα, ποῦ δὲ δάμαρτες -Σισύφιαι, λαῶν θʼ αἱ ποτε μυριάδες; -οὐδὲ γὰρ οὐδʼ ἴχνος, πολυκάμμορε, σεῖο λέλειπται, -πάντα δὲ συμμάρψας ἐξέφαγεν πόλεμος. -μοῦναι ἀπόρθητοι Νηρηίδες, Ὠκεανοῖο -κοῦραι, σῶν ἀχέων μίμνομεν ἁλκυόνες. -
-
- - -Agathias scholasticus - - -ἅδε ποθʼ ἁ κλεινὰ Πριάμου πόλις, ἃν ἀλαπάξαι -Ἑλλάνων δεκέτης οὐκ ἐτάλασσεν ἄρης -ἀμφαδόν, ἀλλʼ ἵπποιο κακὸν ξύλον. αἴθε δʼ Ἐπειὸς -κάτθανε πρὶν τεῦξαι δουρατέαν παγίδα. -οὐ γὰρ ἄν, Ἀτρειδᾶν ὀροφηφάγον ἁψαμένων πῦρ, -οὕτω ἐφʼ ἁμετέροις λάεσιν ἠριπόμαν. -
-
- - -Agathias scholasticus - - -ὦ πόλι, πῆ σέο κεῖνα τὰ τείχεα, πῆ πολύολβοι -νηοί; πῆ δὲ βοῶν κράατα τεμνομένων; -πῆ Παφίης ἀλάβαστρα, καὶ ἡ πάγχρυσος ἐφεστρίς; -πῆ δὲ Τριτογενοῦς δείκελον ἐνδαπίης; -πάντα μόθος χρονίη τε χύσις καὶ Μοῖρα κραταιὴ -ἥρπασεν, ἀλλοίην ἀμφιβαλοῦσα τύχην. -καί σε τόσον νίκησε βαρὺς φθόνος· ἀλλʼ ἄρα μοῦνον -οὔνομα σὸν κρύψαι καὶ κλέος οὐ δύναται. - -
-
- - -Agathias scholasticus - - -ἱλήκοις, πολιοῦχε. σὲ μὲν χρυσαυγέι νηῷ, -ὡς θέμις, ἁ τλάμων Ἴλιος ἠγασάμην -ἀλλὰ σύ με προλέλοιπας ἑλώριον· ἀντὶ δὲ μήλου -πᾶσαν ἀπεδρέψω τείχεος ἀγλαΐην. -ἄρκιον ἦν θνᾴσκειν τὸν βουκόλον εἰ γὰρ ἄθεσμος -ἔπλετο, τᾶς πάτρας οὐκ ἀλίτημα τόδε. -
-
- - -Agathias scholasticus - - -εἰ μὲν ἀπὸ Σπάρτης τις ἔφυς, ξένε, μή με γελάσσῃς· -οὐ γὰρ ἐμοὶ μούνῃ ταῦτα τέλεσσε Τύχη. -εἰ δέ τις ἐξ Ἀσίης, μὴ πένθεε· Δαρδανικοῖς γὰρ -σκήπτροις Αἰνεαδῶν πᾶσα νένευκε πόλις. -εἰ δὲ θεῶν τεμένη καὶ τείχεα καὶ ναετῆρας -ζηλήμων δηίων ἐξεκένωσεν ἄρης, -εἰμὶ πάλιν βασίλεια. σὺ δʼ, ὦ τέκος, ἄτρομε Ῥώμη, -βάλλε καθʼ Ἑλλήνων σῆς ζυγόδεσμα δίκης. -
-
- - -Antiphilus - - -Δέρκεο τὸν Τροίας % δεκέτη λόχον εἴσιδε πῶλον -εὐόπλου Δαναῶν ἔγκυον ἡσυχίης. -τεκταίνει μὲν Ἐπειός, Ἀθηναίη δὲ κελεύει -ἔργον· ὑπὲκ νώτου δʼ Ἑλλὰς ὅλα δύεται. -ἦ ῥα μάταν ἀπόλοντο τόσος στρατός, εἰ πρὸς Ἄρηα -ἦν δόλος Ἀτρείδαις ἐσθλότερος πολέμου. - -
-
- - -Anonymi epigrammatici - - -τίς θεὸν εἶπεν Ἔρωτα; θεοῦ κακὸν οὐδὲν ὁρῶμεν -ἔργον ὁ δʼ ἀνθρώπων αἵματι μειδιάει. -οὐ θοὸν ἐν παλάμαις κατέχει ξίφος; ἠνίδʼ ἄπιστα -τῆς θειοδμήτου σκῦλα μιαιφονίης. -μήτηρ μὲν σὺν παιδὶ κατέφθιτο αὐτὰρ ἐπʼ αὐτοῖς -ποίνιμος ἔκτεινεν φῶτα λιθοκτονίη. -καὶ ταῦτʼ οὔτʼ Ἄϊδος, οὔτʼ Ἄρεος, ἔργα δʼ Ἔρωτος -λεύσσομεν, οἷς παίζει κεῖνος ὁ νηπίαχος. -
-
- - -Anonymi epigrammatici - - -αἱ τρισσαί ποτε παῖδες ἐν ἀλλήλαισιν ἔπαιζον -κλήρῳ, τίς προτέρη βήσεται εἰς ἀίδην -καὶ τρὶς μὲν χειρῶν ἔβαλον κύβον, ἦλθε δὲ πασῶν -ἐς μίαν· ἡ δʼ ἐγέλα κλῆρον ὀφειλόμενον. -ἐκ τέγεος γὰρ ἄελπτον ἔπειτʼ ὤλισθε πέσημα -δύσμορος, ἐς δʼ ἀίδην ἤλυθεν, ὡς ἔλαχεν. -ἀψευδὴς ὁ κλῆρος, ὅτῳ κακὸν ἐς δὲ τὸ λῷον -οὔτʼ εὐχαὶ θνητοῖς εὔστοχοι, οὔτε χέρες. -
-
- - -Anonymi epigrammatici - - -κρανίον ἐν τριόδοισι κατοιχομένου τις ἐσαθρῶν -εἰκόνα τὴν κοινὴν οὐκ ἐδάκρυσε βίου· -δεξιτερὴν δʼ ἔρριψεν ἐπὶ χθόνα, καὶ λίθον ἧκεν, -κωφὸν μὲν δοκέοντʼ, ἀλλὰ πνέοντα δίκης. -ὀστέον ὡς γὰρ ἔπληξεν, ἀφήλατο, καὶ τὸν ἀφέντα -πήρωσεν, γλυκεροῦ βλέμματος ὀρφανίσας. -καὶ πάλιν εἰς ἀίδην ἐκολάζετο, τὴν ἰδίην δὲ -ἔκλαυσεν χειρῶν εὔστοχον ἀφροσύνην. - -
-
- - -Anonymi epigrammatici - - -Ἡρόδοτος Μούσας ὑπεδέξατο· τῷ δʼ ἄρʼ ἑκάστη -ἀντὶ φιλοξενίης βίβλον ἔδωκε μίαν. -
-
- - -Marcus argentarius - - -Ἡσιόδου ποτὲ βίβλον ἐμαῖς ὑπὸ χερσὶν ἑλίσσων -Πύρρην ἐξαπίνης εἶδον ἐπερχομένην -βίβλον δὲ ῥίψας ἐπὶ γῆν χερί, τοῦτʼ ἐβόησα· -ἔργα τί μοι παρέχεις, ὦ γέρον Ἡσίοδε; - -
-
- - -Anonymi epigrammatici - - -ἤμην ἀχρεῖον κάλαμος φυτὸν ἐκ γὰρ ἐμεῖο -οὐ σῦκʼ, οὐ μῆλον φύεται, οὐ σταφυλή· -ἀλλὰ μʼ ἀνὴρ ἐμύησ’ ἑλικωνίδα, λεπτὰ τορήσας -χείλεα, καὶ στεινὸν ῥοῦν ὀχετευσάμενος. -ἐκ δὲ τοῦ εὖτε πίοιμι μέλαν ποτόν, ἔνθεος οἷα, -πᾶν ἔπος ἀφθέγκτῳ τῷδε λαλῶ στόματι. -
-
- - -Anonymi epigrammatici - - -ἐκ πυρὸς Ἰλιακοῦ δοράτων μέσον ἥρπασεν ἥρως -Αἰνείας, ὅσιον παιδὶ βάρος, πατέρα· -ἔκλαγε δʼ Ἀργείοις· “μὴ ψαύετε· μικρὸν ἐς ἄρη -κέρδος ὁ γηραλέος, τῷ δὲ φέροντι μέγα.” -
-
- - -Anonymi epigrammatici - - -τίς σε, Δικαιοσύνη, βροτὸς ἤκαχεν; — οὗτος ὁ κλέπτης -ἐνθάδε με στήσας, οὐδὲν ἔχων πρὸς ἐμέ. - -
-
- - -Palladas - - -ὀργὴ τοῦ Διός ἐστι γυνή, πυρὸς ἀντιδοθεῖσα -δῶρον, ἀνιηρὸν τοῦ πυρὸς ἀντίδοτον. -ἄνδρα γὰρ ἐκκαίει ταῖς φροντίσιν ἠδὲ μαραίνει, -καὶ γῆρας προπετὲς τῇ νεότητι φέρει. -οὐδʼ ὁ Ζεὺς ἀμέριμνος ἔχει χρυσόθρονον Ἥρην -πολλάκι γοῦν αὐτὴν ῥῖψεν ἀπʼ ἀθανάτων, -ἠέρι καὶ νεφέλῃσι μετῄορον· οἶδεν Ὅμηρος, -καὶ Δία συγγράψας τῇ γαμετῇ χόλιον. -οὕτως οὐδέποτʼ ἐστὶ γυνὴ σύμφωνος ἀκοίτῃ, -οὐδὲ καὶ ἐν χρυσέῳ μιγνυμένη δαπέδῳ. -
-
- - -Palladas - - -πᾶσαν Ὅμηρος ἔδειξε κακὴν σφαλερήν τε γυναῖκα, -σώφρονα καὶ πόρνην, ἀμφοτέρας ὄλεθρον. -ἐκ γὰρ τῆς Ἑλένης μοιχευσαμένης φόνος ἀνδρῶν, -καὶ διὰ σωφροσύνην Πηνελόπης θάνατοι. -Ἰλιὰς οὖν τὸ πόνημα μιᾶς χάριν ἐστὶ γυναικός· -αὐτὰρ Ὀδυσσείῃ Πηνελόπη πρόφασις. -
-
- - -Palladas - - -ὁ Ζεὺς ἀντὶ πυρὸς πῦρ ὤπασεν ἄλλο, γυναῖκας. -εἴθε δὲ μήτε γυνή, μήτε τὸ πῦρ ἐφάνη· -πῦρ μὲν δὴ ταχέως καὶ σβέννυται· ἡ δὲ γυνὴ πῦρ -ἄσβεστον, φλογερόν, πάντοτʼ ἀναπτόμενον. -
-
- - -Palladas - - -μῆνιν οὐλομένην γαμετὴν ὁ τάλας γεγάμηκα, -καὶ παρὰ τῆς τέχνης μήνιδος ἀρξάμενος. - -ὤμοι ἐγὼ πολύμηνις, ἔχων διχόλωτον ἀνάγκην, τέχνης -γραμματικῆς καὶ γαμετῆς μαχίμης. -
-
- - -Palladas - - -μῆνις Ἀχιλλῆος καὶ ἐμοὶ πρόφασις γεγένηται -οὐλομένης πενίης γραμματικευσαμένῳ. -εἴθε δὲ σὺν Δαναοῖς με κατέκτανε μῆνις -ἐκείνη, πρὶν χαλεπὸς λιμὸς γραμματικῆς ὀλέσει. ἀλλʼ ἵνʼ -ἀφαρπάξῃ Βρισηίδα πρὶν Ἀγαμέμνων, -τὴν Ἑλένην δʼ ὁ Πάρις, πτωχὸς ἐγὼ γενόμην. -
-
- - -Palladas - - -νηδὺν ἀναίσχυντον στιβαροῖς ᾔσχυνα λογισμοῖς, -σωφροσύνῃ κολάσας ἔντερον ἀργαλέον εἰ γὰρ ἔχω τὸν νοῦν -ἐπικείμενον ὑψόθι γαστρός, πῶς μὴ νικήσω τὴν ὑποτασσομένην; -
-
- - -Palladas - - -πωλῶ, εἰς ἑτέρας τέχνης ἔργα μετερχόμενος. Πιερίδες, -σῴζοισθε· λόγοι, συντάσσομαι ὑμῖν· σύνταξις γὰρ ἐμοὶ καὶ -θάνατον παρέχει. -
-
- - -Palladas - - -ἐλπίδος οὐδὲ Τύχης -ἔτι μοι μέλει, οὐδʼ ἀλεγίζω λοιπὸν τῆς ἀπάτης· ἤλυθον εἰς -λιμένα. εἰμὶ πένης ἄνθρωπος, ἐλευθερίῃ δὲ συνοικῶ· -ὑβριστὴν πενίης πλοῦτον ἀποστρέφομαι. - -
-
- - -Palladas - - -ἀρχὴ γραμματικῆς πεντάστιχός ἐστι κατάρα· -πρῶτος μῆνιν ἔχει· δεύτερος οὐλομένην, -καὶ μετὰ δʼ οὐλομένην, Δαναῶν πάλιν ἄλγεα πολλά· -ὁ τρίτατος ψυχὰς εἰς Ἀίδην κατάγει· -τοῦ δὲ τεταρταίου τὰ ἑλώρια καὶ κύνες ἀργοί· -πέμπτου δʼ οἰωνοί, καὶ χόλος ἐστὶ Διός. -πῶς οὖν γραμματικὸς δύναται μετὰ πέντε κατάρας, -καὶ πέντε πτώσεις, μὴ μέγα πένθος ἔχειν; -
-
- - -Palladas - - -ἐνθάδε παιδεύουσιν ὅσοις κεχόλωτο Σάραπις, -τοῖσιν ἀπʼ οὐλομένης μήνιδος ἀρχομένοις· -ἔνθα τροφὸς κατὰ μῆνα φέρει μισθὸν μετʼ ἀνάγκης, -βύβλῳ καὶ χάρτῃ δησαμένη πενίην -ὡς δὲ κάπνισμα τιθεῖ παρὰ τὸν θρόνον, ὡς παρὰ τύμβον, -τὸν μικρὸν χάρτην, τὸν παραριπτόμενον. -κλέπτει δʼ ἐξ ὀλίγου μισθοῦ, καὶ χαλκὸν ἀμείβει, -καὶ μόλιβον μίσγει, καὶ τὸ ἔθος δέχεται. -εἰ δέ τις εἰς ἐνιαυτὸν ἄγοι χρυσοῖο νόμισμα, -ἑνδεκάτῳ μηνί, πρὶν προφέρειν, μετέβη, -ἀγνώμων τε φανείς, καὶ τὸν πρότερον διασύρας -γραμματικὸν στερέσας μισθὸν ὅλου ἔτεος. -
-
- - -Palladas - - -Καλλίμαχον πωλῶ καὶ Πίνδαρον, ἠδὲ καὶ αὐτὰς -πτώσεις γραμματικῆς, πτῶσιν ἔχων πενίης. - -Δωρόθεος γὰρ ἐμὴν τροφίμην σύνταξιν ἔλυσε, -πρεσβείην κατʼ ἐμοῦ τὴν ἀσεβῆ τελέσας. -ἀλλὰ σύ μου πρόστηθι, Θέων φίλε, μηδὲ μʼ ἐάσῃς -συνδέσμῳ πενίης τὸν βίον ἐξανύσαι. -
-
- - -Palladas - - -ἐκλήθην παρὰ σοῦ τοῦ ῥήτορος· εἰ δʼ ἀπελείφθην, -τὴν τιμὴν ἀπέχω, καὶ πλέον εἰμὶ φίλος. -οὐδὲ γὰρ ἡ ψυχὴ τὸ φαγεῖν κρίνουσα γέγηθεν, -ἀλλὰ μόνον τιμῆς αἰσθομένη τρέφεται. -
-
- - -Anonymi epigrammatici - - -Αἴαντος παρὰ τύμβον ἀταρβήτοιο παραστὰς -Φρὺξ ἥρωι κακῆς ἦρχεν ἐπεσβολίης· - - Αἴας οὐκέτʼ ἔμιμνεν ὁ δʼ ἀντεγέγωνεν ἔνερθε· - - μίμνεν· ὁ δʼ οὐκέτʼ ἔτλη ζωὸς ἀποφθίμενον. -
-
- - -Antiphilus - - -ὡς πάρος Ἀελίου, νῦν Καίσαρος ἁ Ῥόδος εἰμὶ -νᾶσος, ἴσον δʼ αὐχῶ φέγγος ἀπʼ ἀμφοτέρων. -ἤδη σβεννυμέναν με νέα κατεφώτισεν ἀκτίς, -Ἅλιε, καὶ παρὰ σὸν φέγγος ἔλαμψε Νέρων. -πῶς εἴπω τίνι μᾶλλον ὀφείλομαι; ὃς μὲν ἔδειξεν -ἐξ ἁλός, ὃς δʼ ἤδη ῥύσατο δυομέναν. - -
-
- - -Leonidas - - -Τοξοβόλον τὸν Ἔρωτα τίς ἔξεσεν ἐκ λιβανωτοῦ, -τόν ποτε μηδʼ αὐτοῦ Ζηνὸς ἀποσχόμενον; -ὀψέ ποθʼ Ἡφαίστῳ κεῖται σκοπός, ὃν καθορᾶσθαι -ἔπρεπεν οὐκ ἄλλως ἢ πυρὶ τυφόμενον. -
-
- - -Palladas - - -τύχη καπηλεύουσα πάντα τὸν βίον, -ἀσυγκέραστον τὴν φύσιν κεκτημένη, -καὶ συγκυκῶσα καὶ μεταντλοῦσ’ αὖ πάλιν, -καὐτὴ κάπηλός ἐστι νῦν τις, οὐ θεά, -τέχνην λαχοῦσα τὴν τρόπων ἐπαξίαν. -
-
- - -Palladas - - -ἀνεστράφησαν, ὡς ὁρῶ, τὰ πράγματα, -καὶ τὴν Τύχην νῦν δυστυχοῦσαν εἴδομεν. -
-
- - -Palladas - - -καὶ σὺ Τύχη δέσποινα, τύχην ἀτυχῆ πόθεν ἔσχες; -ἡ παρέχουσα τύχας πῶς ἀτυχὴς γέγονας; -μάνθανε καὶ σὺ φέρειν τὰ σὰ ῥεύματα, καὶ σὺ διδάσκου -τὰς ἀτυχεῖς πτώσεις, ἃς παρέχεις ἑτέροις. -
-
- - -Palladas - - -καὶ σὺ Τύχη λοιπὸν μεταβαλλομένη καταπαίζου, -μηδὲ τύχης τῆς σῆς ὕστατα φεισαμένη· - -ἣ πρὶν νηὸν ἔχουσα, καπηλεύεις μετὰ γῆρας, -θερμοδότις μερόπων νῦν ἀναφαινομένη. -νῦν ὁσίως στένε καὶ σὺ τεὸν πάθος, ἄστατε δαῖμον, -τὴν σήν, ὡς μερόπων, νῦν μετάγουσα τύχην. -
-
- - -Anonymi epigrammatici - - -Πίνδαρε, Μουσάων ἱερὸν στόμα, καὶ λάλε Σειρήν, -Βακχυλίδη, Σαπφοῦς τʼ Αἰολίδες χάριτες, -γράμμα τʼ Ἀνακρείοντος, Ὁμηρικὸν ὃς τʼ ἀπὸ ῥεῦμα -ἔσπασας οἰκείοις, Στησίχορʼ, ἐν καμάτοις, -ἥ τε Σιμωνίδεω γλυκερὴ σελίς, ἡδύ τε Πειθοῦς, -Ἴβυκε, καὶ παίδων ἄνθος ἀμησάμενε, -καὶ ξίφος Ἀλκαίοιο, τὸ πολλάκις αἷμα τυράννων -ἔσπεισεν, πάτρης θέσμια ῥυόμενον, -θηλυμελεῖς τʼ Ἀλκμᾶνος ἀηδόνες, ἵλατε, πάσης -ἀρχὴν οἳ λυρικῆς καὶ πέρας ἐστάσατε. -
-
- - -Anonymi epigrammatici - - -Ἀρχιλόχου τάδε μέτρα καὶ ἠχήεντες ἴαμβοι, -θυμοῦ καὶ φοβερῆς ἰὸς ἐπεσβολίης. -
-
- - -Antipater - - -βίβλοι Ἀριστοφάνευς, θεῖος πόνος, αἷσιν Ἀχαρνεὺς -κισσὸς ἐπὶ χλοερὴν πουλὺς ἔσεισε κόμην. -ἠνίδʼ ὅσον Διόνυσον ἔχει σελίς, οἷα δὲ μῦθοι -ἠχεῦσιν, φοβερῶν πληθόμενοι χαρίτων. -ὦ καὶ θυμὸν ἄριστε, καὶ Ἑλλάδος ἤθεσιν ἶσα, -κωμικέ, καὶ στύξας ἄξια καὶ γελάσας. - -
-
- - -Anonymi epigrammatici - - -αὐταί σοι στομάτεσσιν ἀνηρείψαντο μέλισσαι -ποικίλα Μουσάων ἄνθεα δρεψάμεναι· -αὐταὶ καὶ Χάριτές σοι δωρήσαντο, Μένανδρε, -στωμύλον εὐτυχίην δράμασιν ἐνθέμεναι. -ζώεις εἰς αἰῶνα τὸ δὲ κλέος ἐστὶν Ἀθήναις -ἐκ σέθεν οὐρανίων ἁπτόμενον νεφέων. -
-
- - -Anonymi epigrammatici - - -Ἀτθίδος εὐγλώσσου στόμα φέρτατον, οὐ σέο μεῖζον -φθέγμα Πανελλήνων πᾶσα κέκευθε σελίς· -πρῶτος δʼ εἴς τε θεὸν καὶ ἐς οὐρανὸν ὄμμα τανύσσας -θεῖε Πλάτων, ἤθη καὶ βίον ηὐγάσαο, -Σωκρατικῷ Σάμιον κεράσας μυκτῆρι φρόνημα, -κάλλιστον σεμνῆς σῆμα διχοστασίης, -
-
- - -Anonymi epigrammatici - - -ἔλθετε πρὸς τέμενος ταυρώπιδος ἀγλαὸν Ἥρης, -Λεσβίδες, ἁβρὰ ποδῶν βήμαθʼ ἑλισσόμεναι, -ἔνθα καλὸν στήσασθε θεῇ χορὸν ὔμμι δʼ ἀπάρξει -Σαπφὼ χρυσείην χερσὶν ἔχουσα λύρην, -ὄλβιαι ὀρχηθμοῦ πολυγηθέος· ἦ γλυκὺν ὕμνον -εἰσαΐειν αὐτῆς δόξετε Καλλιόπης. -
-
- - -Anonymi epigrammatici - - -Λέσβιον Ἠρίννης τόδε κηρίον εἰ δέ τι μικρόν, -ἀλλʼ ὅλον ἐκ Μουσέων κιρνάμενον μέλιτι. -οἱ δὲ τριηκόσιοι ταύτης στίχοι ἶσοι Ὁμήρῳ, -τῆς καὶ παρθενικῆς ἐννεακαιδεκέτευς· - -ἣ καὶ ἐπʼ ἠλακάτῃ μητρὸς φόβῳ, ἣ καὶ ἐφʼ ἱστῷ -ἑστήκει Μουσέων λάτρις ἐφαπτομένη. -Σαπφὼ δʼ Ἠρίννης ὅσσον μελέεσσιν ἀμείνων, -Ἤριννα Σαπφοῦς τόσσον ἐν ἑξαμέτροις. -
-
- - -Anonymi epigrammatici - - -οὐκ ἂν ἐν ἡμετέροισι πολυγνάμπτοις λαβυρίνθοις -ῥηιδίως προμόλοις ἐς φάος, αἴκε τύχῃς· -τοίους γὰρ Πριαμὶς Κασσάνδρη φοίβασε μύθους, -ἄγγελος οὓς βασιλεῖ ἔφρασε λοξοτρόχις. -εἰ δέ σε φίλατο Καλλιόπη, λάβε μʼ ἐς χέρας· εἰ δὲ -νῆις ἔφυς Μουσέων, χερσὶ βάρος φορέεις. -
-
- - -Antiphilus - - - - αἱ βίβλοι, τίνες ἐστέ; τί κεύθετε; θυγατέρες μὲν -Μαιονίδου, μύθων δʼ ἵστορες Ἰλιακῶν -ἁ μία μὲν μηνιθμὸν Ἀχιλλέος, ἔργα τε χειρὸς -Ἑκτορέας, δεκέτους τʼ ἆθλα λέγει πολέμου· -ἁ δʼ ἑτέρα μόχθον τὸν -Ὀδυσσέος, ἀμφί τε λέκτροις -χηρείοις ἀγαθᾶς δάκρυα Πηνελόπας. - - Ἵλατε σὺν Μούσαισι· μεθʼ ὑμετέρας γὰρ ἀοιδὰς -εἶπεν ἔχειν αἰὼν ἕνδεκα Πιερίδας. -
-
- - -Philostorgius - - -ἱστορίην ἐτέλεσσα Θεοῦ χαρίτεσσι σοφῇσι, -πράγματʼ ἀληθείης ποικίλʼ ὑφηνάμενος. - -
-
- - -Anonymi epigrammatici - - -γράμματα δώδεκʼ ἔχει Φιλοστόργιος, οὔνομα καλόν. -τοὔνεκα δὴ κατὰ γράμμα λόγους ἀνεγράψατο τούτους, -ἀρξάμενος πρώτου ἀπὸ γράμματος, εἶτεν ἐφεξῆς· -καὶ διὰ τῆς αὐτῶν ἀρχῆς ἑὸν οὔνομα γράψας. -
-
- - -Anonymi epigrammatici - - -Κωνσταντινιάδης Ἀσκληπιὸς ἄστυ γεραίρων -γράψεν Ἀναζαρβοῦ πάτρια κυδαλίμης. -
-
- - -Marinus - - - -ἀθανάτοισι θεοῖς κεχαρισμένα πάντοτε ῥέζων -καὶ τάδʼ ἐπʼ εὐσεβέοντι νόῳ συνέγραψε Μαρῖνος.· -
-
- - -Marinus - - -καὶ τόδε σῆς ζαθέης κεφαλῆς περιώσιον ἔργον, -Πρόκλε μάκαρ, πάντων βρέτας ἔμπνοον ὅττι Μαρῖνον -ἀθανάτων, μερόπεσσι βοηθόον εὐσεβέεσσιν, -ἀντὶ τεῆς ἱερῆς κεφαλῆς ψυχοσσόον ἄλκαρ -κάλλιπες, ὃς βιοτὴν θεοτερπέα σεῖο λιγαίνων -γράψε τάδʼ ἐσσομένοις μνημήια σῶν ἀρετάων. -
-
- - -Anonymi epigrammatici - - -Νόννος ἐγώ· Πανὸς μὲν ἐμὴ πόλις· ἐν Φαρίῃ δὲ -ἔγχεϊ φωνήεντι γονὰς ἤμησα Γιγάντων. - -
-
- - -Anonymi epigrammatici - - -Δίου Ὀρειβασίοιο, τὸν ἀθανάτην διὰ τέχνην -πολλάκι δειμαίνουσα μίτους ἀνεβάλλετο Μοίρη, -
-
- - -Leo philosophus - - -βίβλος μηχανική· Κύρινος δέ μιν ἐξεπόνησε, -Μαρκέλλου γνωτοῖο συνερχομένου κατὰ μόχθον. -
-
- - -Leo philosophus - - -θέσφατα μαντῴης Φοιβηίδος ὄργια τέχνης -ἀστρολόγων Παῦλὸς μʼ ἐδιδάξατο κύδιμος ἀνήρ. -
-
- - -Leo philosophus - - -βίβλος Θέωνος καὶ Πρόκλου, τῶν πανσόφων -βίβλος πόλου τε καὶ χθονὸς φέρει μέτρα. -Θέων πόλον μέν, καὶ Πρόκλος μετρεῖ χθόνα· -Πρόκλος μὲν οὖν γῆν, καὶ Θέων μετρεῖ πόλον. -ἄμφω δʼ ἐπίσης τῶν ἐπαίνων ἄξιοι, -ἄμφω δʼ ἀμοιβὴν τῶν λόγων τετεύχατον. -Θέων Πρόκλου γὰρ λαμβάνων σοφὰς θέσεις, -δείκνυσι ταύταις τοὺς δρόμους τῶν ἀστέρων -Πρόκλος δὲ δείξεις τοῦ Θέωνος λαμβάνων, -ταύταις ἀναλύει καὶ προβάλλει τὰς θέσεις. -ἀλλʼ, ὦ σοφὴ ξυνωρί, χαῖρέ μοι λίαν -χαίροις Θέων ἄριστε, πάνσοφον κάρα, -ὁ νῦν πυκάζων τὴν Ἀλεξάνδρου πόλιν -χαίροις δὲ καὶ σύ, Πρόκλε, τοῦ Σαρπηδόνος -ἄριστον αἷμα τοῖς ὅλοις βοώμενον, - -
-
- - -Leo philosophus - - -ἔρωτα πικρόν, ἀλλὰ σώφρονα βίον -ὁ Κλειτοφῶντος ὥσπερ ἐμφαίνει λόγος· -ὁ Λευκίππης δὲ σωφρονέστατος βίος -ἅπαντας ἐξίστησι· πῶς τετυμμένη, -κεκαρμένη τε καὶ κατηχρειωμένη, -τὸ δὴ μέγιστον, τρὶς θανοῦσ’ ἐκαρτέρει. -εἴπερ δὲ καὶ σὺ σωφρονεῖν θέλεις, φίλος, -μὴ τὴν πάρεργον τῆς γραφῆς σκόπει θέαν, -τὴν τοῦ λόγου δὲ πρῶτα συνδρομὴν μάθε· -νυμφοστολεῖ γὰρ τοὺς ποθοῦντας ἐμφρόνως. -
-
- - -Agathias scholasticus - - -μή με τὸν Αἰάντειον ἀνοχμάσσειας, ὁδῖτα, -πέτρον, ἀκοντιστὴν στήθεος Ἑκτορέου. -εἰμὶ μέλας τρηχύς τε· σὺ δʼ εἴρεο θεῖον ὅμηρον, -πῶς τὸν Πριαμίδην ἐξεκύλισα πέδῳ. -νῦν δὲ μόλις βαιόν με παροχλίζουσιν ἀρούρης -ἄνθρωποι, γενεῆς αἴσχεα λευγαλέης. -ἀλλὰ μέ τις κρύψειεν ὑπὸ χθονός· αἰδέομαι γὰρ -παίγνιον οὐτιδανοῖς ἀνδράσι γινόμενος. -
-
- - -Artemidorus - - -Βωκολικαὶ Μοῖσαι σποράδες ποκά, νῦν δʼ ἅμα πᾶσαι -ἐντὶ μιᾶς μάνδρας, ἐντὶ μιᾶς ἀγέλας. -
-
- - -eupithius - - -Στίξαντος τὴν Καθόλου -Ταυτολόγων κανόνων φεῦ πληθύος, ἠδʼ ἀιδήλων -ξυσμάων, λεπτὸς τὰς ἐχάραξε δόναξ. - -ὄμματά μευ κέκμηκε, τένων, ῥάχις, ἰνίον, ὦμοι· -τῆς Καθόλου δὲ φέρω τὴν ὀδύνην καθόλου, -
-
- - -Anonymi epigrammatici - - -μῆτιν Ἐπικτήτοιο τεῷ ἐνικάτθεο θυμῷ, -ὄφρα κεν εἰσαφίκηαι ἐς οὐρανίους κενεῶνας, -ψυχὴν ὑψικέλευθον ἐλαφρίζων ἀπὸ γαίης. -
-
- - -Anonymi epigrammatici - - -ὅς κεν Ἐπικτήτοιο σοφὴν τελέσειε μενοινήν, -μειδιάει, βιότοιο γαληνιόων ἐνὶ πόντῳ, -καὶ μετὰ ναυτιλίην βιοτήσιον εἰσαφικάνει -οὐρανίην ἁψῖδα καὶ ἀστερίην περιωπήν. -
-
- - -Anonymi epigrammatici - - - -τίπτε μετοκλάζεις πωτωμένη ὄζον ἀπʼ ὄζου; -τοῖα καὶ ἄλλη ἔρεξε, καὶ οὐ φύγεν ἰξοφορῆας -ἡμετέρους δόνακας, περὶ δὲ πτερὰ πυκνὰ βαλοῦσα -ἤλυθε τεχνήεντα, καὶ οὐκ ἐθέλουσα, πρὸς ἄνδρα. -
-
- - -Anonymi epigrammatici - - - -Δέρκεό μοι κρατερῶν καμάτων ἐγκύμονα βίβλον -ἣν πάρος Ἀδριανὸς μὲν ἄναξ ἔχεν ἐν πολέμοισι, -κρύψε δʼ ἀεργίη χρόνον ἄσπετον ἐγγύθι λήθης. -ἀλλʼ ὑπὸ καρτερόχειρος Ἀναστασίου βασιλῆος - -ἤλυθον ἐς φάος αὖθις, ἵνα στρατιῇσιν ἀρήξω. -οἶδα γὰρ ἀνδροφόνου καμάτους πολέμοιο διδάσκειν -οἶδα δὲ πῶς μετʼ ἐμεῖο καὶ ἑσπερίης ἁλὸς ἄνδρας -καὶ Πέρσας ὀλέσεις καὶ αἰνομόρους Σαρακηνούς, -καὶ θοὸν ἱπποκέλευθον ἀρειμανέων γένος Οὔννων, -πετράων τʼ ἐφύπερθεν ἀλυσκάζοντας Ἰσαύρους. -πάντα δʼ ὑπὸ σκήπτροισιν Ἀναστασίοιο τελέσσω, -ὃν καὶ Τραϊανοῖο φαάντερον ἤγαγεν αἰών. -
-
- - -Anonymi epigrammatici - - -Παιήων, Χείρων, Ἀσκληπιός, Ἱπποκράτης τε· -τοῖς δʼ ἔπι Νίκανδρος προφερέστερον ἔλλαχεν εὖχος. -
-
- - -Anonymi epigrammatici - - -φάρμακα πολλὰ μὲν ἐσθλὰ μεμιγμένα, πολλὰ δὲ λυγρὰ -Νίκανδρος κατέλεξεν, ἐπιστάμενος περὶ πάντων -ἀνθρώπων. ἦ γὰρ Παιήονός ἐστι γενέθλης. -
-
- - -Anonymi epigrammatici - - -καὶ Κολοφὼν ἀρίδηλος ἐνὶ πτολίεσσι τέτυκται, -δοιοὺς θρεψαμένη παῖδας ἀριστονόους, -πρωτότοκον μὲνὍμηρον, ἀτάρ Νίκανδρον ἔπειτα, -ἀμφοτέρους Μούσαις οὐρανίῃσι φίλους. -
-
- - -Leo philosophus - - -τῇ τῶν λόγων σου κογχύλῃ, Πορφύριε, -βάπτεις τὰ χείλη, καὶ στολίζεις τὰς φρένας. - -
-
- - -Antipater - - -αἰεὶ θηλυτέρῃσιν ὕδωρ κακὸν Ἑλλήσποντος, -ξεῖνε· Κλεονίκης πεύθεο Δυρραχίδος. -πλῶε γὰρ ἐς Σηστὸν μετὰ νυμφίον ἐν δὲ μελαίνῃ -φορτίδι τὴν Ἕλλης μοῖραν ἀπεπλάσατο. -Ἡροῖ δειλαίη, σὺ μὲν ἀνέρα,, Δηίμαχος δὲ -νύμφην, ἐν παύροις ὠλέσατε σταδίοις. -
-
- - -honestus - - -Ἁρμονίης ἱερὸν φήσεις γάμον ἀλλʼ ἀθέμιστος -Οἰδίποδος. λέξεις Ἀντιγόνην ὁσίην -ἀλλὰ κασίγνητοι μιαρώτατοι. ἄμβροτος Ἰνώ· -ἀλλʼ Ἀθάμας τλήμων. τειχομελὴς κιθάρη -ἀλλʼ αὐλὸς δύσμουσος. ἴδʼ ὡς ἐκεράσσατο Θήβῃ -δαίμων, ἐσθλὰ κακοῖς δʼ εἰς ἓν ἔμιξεν ἴσα. -
-
- - -quintus mucius scaevola - - -αἱ χίμαροι, τί ποτʼ ἆρα τὰ μὲν θύμα καὶ τιθύμαλλα -λείπετε καὶ χλοερὴν αἰγίνομον βοτάνην, -γυρὰ δʼ ἐπʼ ἀλλήλαις σκιρτήματα γαῦρα τίθεσθε -ἀμφὶ τὸν ὑλιβάτην ἁλλόμεναι Νόμιον; -οὐκ ἀπὸ πυγμαχίης ἀποπαύσετε; μὴ ποτʼ ἀπεχθὴς -ἀντήσῃ κορύνη χειρὸς ἀπʼ αἰπολικῆς. -
-
- - -Aemilianus - - -Ἀβάλε χειμερίου με κατέκλυσε κύματα πόντου -δειλαίην, νεκύων φόρτον ἀμειψαμένην. - -αἰδέομαι σωθεῖσα. τί μοι πλέον ὅρμον ἱκέσθαι, -δευομένῃ φωτῶν πείσματα δησομένων; -Κωκυτοῦ με λέγοιτε βαρὺ σκάφος· ὤλεσα φῶτας, -ὤλεσα· ναυηγοὶ δʼ εἰσὶν ἔσω λιμένος. -
-
- - -Diodorus - - -Αἰγιβότου Σκύροιο λιπὼν πέδον Ἴλιον ἔπλω -οἷος Ἀχιλλείδης πρόσθε Νεοπτόλεμος, -τοῖος ἐν Αἰνεάδῃσι Νέρων ἀγὸς ἄστυ Ῥέμοιο -νεῖται, ἐπʼ ὠκυρόην Θύβριν ἀμειψάμενος, -κοῦρος ἔτʼ ἀρτιγένειον ἔχων χνόον. ἀλλʼ ὁ μὲν ἔγχει -θῦεν ὁ δʼ ἀμφοτέροις, καὶ δορὶ καὶ σοφίῃ. -
-
- - -Antonius thallus - - -ἁ χλοερὰ πλατάνιστος ἴδʼ ὡς ἔκρυψε φιλεύντων -ὄργια, τὰν ἱερὰν φυλλάδα τεινομένα. -ἀμφὶ δʼ ἄρʼ ἀκρεμόνεσσιν ἑοῖς κεχαρισμένος ὥραις -ἡμερίδος λαρῆς βότρυς ἀποκρέμαται. -οὕτως, ὦ πλατάνιστε, φύοις· χλοερὰ δʼ ἀπὸ σεῖο -φυλλὰς ἀεὶ κεύθοι τοὺς Παφίης ἑτάρους. -
-
- - -Marcus argentarius - - -Αὐγάζω τὸν ἄφυκτον ἐπὶ σφραγῖδος Ἔρωτα -χερσὶ λεοντείαν ἁνιοχεῦντα βίαν, -ὡς τᾷ μὲν μάστιγα κατʼ αὐχένος, ᾇ δὲ χαλινοὺς -εὐθύνει· πολλὰ δʼ ἀμφιτέθηλε χάρις. -φρίσσω τὸν βροτολοιγὸν ὁ γὰρ καὶ θῆρα δαμάζων -ἄγριον, οὐδʼ ὀλίγον φείσεται ἁμερίων. - -
-
- - -Antiphilus - - -ἀνέρα θήρ, χερσαῖον ὁ πόντιος, ἄπνοον ἔμπνους, -ἀράμενος λοφιῆς ὑγρὸν ὕπερθε νέκυν, -εἰς ψαμάθους ἐκόμισσα. τί δὲ πλέον; ἐξ ἁλὸς εἰς γῆν -νηξάμενος, φόρτου μισθὸν ἔχω θάνατον -δαίμονα δʼ ἀλλήλων ἠμείψαμεν ἡ μὲν ἐκείνου -χθὼν ἐμέ, τὸν δʼ ἀπὸ γῆς ἔκτανε τοὐμὸν ὕδωρ. -
-
- - -Bianor - - -ἀγγελίην πὰρ Ζηνὸς ἐπεὶ φέρεν ἠεροδίνης -αἰετός, οἰωνῶν μοῦνος ἐνουράνιος, -οὐκ ἔφθη τὸν Κρῆτα· θοὴν δʼ ἐπετείνατο νευρήν, -πτηνὸν δʼ ὁ πτερόεις ἰὸς ἐλεηίσατο. -Ζηνὸς δʼ οὔτι Δίκην ἔλαθεν μόνος· ἔμπεσε δʼ ὄρνις -ἀνδρί, τὰ δʼ εὐστοχίης ἀνταπέτισε βέλη. -αὐχένι δʼ ἰὸν ἔπηξεν, ὃν ἥπατι κοίμισεν αὐτός· -ἓν δὲ βέλος δισσῶν αἷμʼ ἔπιεν θανάτων. -
-
- - -Crinagoras - - -αἶγά με τὴν εὔθηλον, ὅσων ἐκένωσεν ἀμολγεὺς -οὔθατα πασάων πουλυγαλακτοτάτην, -γευσάμενος, μελιηδὲς ἐπεὶ τʼ ἐφράσσατο πῖαρ -Καῖσαρ, κἠν νηυσὶν σύμπλοον εἰργάσατο. -ἥξω δʼ αὐτίκα που καὶ ἐς ἀστέρας· ᾧ γὰρ ἐπέσχον -μαζὸν ἐμόν, μείων οὐδʼ ὅσον Αἰγιόχου. - -
-
- - -honestus - - -Ἀσωπὶς κρήνη καὶ Πηγασίς, ὕδατʼ ἀδελφά, -ἵππου καὶ ποταμοῦ δῶρα ποδορραγέα -χὠ μὲν ἔκοψʼ Ἑλικῶνος, ὁ δὲ φλέβας Ἀκροκορίνθου -ἔπληξʼ. ὢ πτέρνης εἰς ἴσον εὐστοχίη. -
-
- - -Diodorus zonas - - -αἰ δʼ ἄγετε ξουθαὶ σιμβληίδες ἄκρα μέλισσαι -φέρβεσθʼ ἠὲ θύμων ῥικνὰ περικνίδια, -ἢ πετάλας μάκωνος, ἢ ἀσταφιδίτιδα ῥῶγα, -ἢ ἴον, ἢ μάλων χνοῦν ἐπικαρπίδιον· -πάντα περικνίξασθε, καὶ ἄγγεα κηρώσασθε, -ὄφρα μελισσοσόος Πὰν ἐπικυψέλιος -γεύσηται τὸ μὲν αὐτός, ὁ δὲ βλιστηρίδι χειρὶ -καπνώσας βαιὴν κὔμμι λίπῃ μερίδα. -
-
- - -Bianor - - -Ἀκταίην παρὰ θῖνα διαυγέος ἔνδοθεν ἅλμας -ἰχθύα πουλυπόδην ἔδρακεν ἰχθυβόλος· -νηχομένῳ δʼ ἐπόρουσε καὶ ἐξ ἁλὸς ἧκʼ ἐπὶ χέρσον -ἁρπάγδην, ἄγρης δεσμὸν ὑποφθάμενος. -αὐτὰρ ὁ δισκηθεὶς κατακαίριος ἔμπεσε δειλῷ -πτωκὶ ταχύς· σχοίνῳ κεῖτο γὰρ ὑπναλέος. -τὸν δὲ χυθεὶς περὶ πάντα πεδήσατο, φωτὶ δʼ ὑπʼ ἄγρης -ἐμβυθίης ἄγρη χερσόθεν ἠντίασε·. -
-
- - -Apollonides - - -ἀγγελίης ἤκουσεν ἀνωΐστου Μελίτεια, -υἱέα σὺν φόρτῳ κύματι κρυπτόμενον· - -ἠιόσιν δʼ ἐπικέλσαν ἁλίκλυστον δέμας ἄλλου -δύσμορος οἰκείης σύμβολον εἶδε τύχης, -υἱέα δʼ ὣς ἔστειλε. Δίων δʼ ἐπὶ νηὸς ἀθραύστου -ἤλυθεν εὐκταίης σῶος ἀπʼ ἐμπορίης. -μητέρες ὡς ἀνίσου μοίρης λάχον ἡ μὲν ἄελπτον -ζωὸν ἔχει, κείνη δʼ ὄψεται οὐδὲ νέκυν. -
-
- - -Marcus argentarius - - -ἀρχαίη σύνδειπνε, καπηλικὰ μέτρα φιλεῦσα, -εὔλαλε, πρηΰγελως, εὔστομε, μακροφάρυξ, -αἰὲν ἐμῆς πενίης βραχυσύμβολε μύστι, λάγυνε, -ἦλθες ὅμως ὑπʼ ἐμὴν χεῖρά ποτε χρόνιος. -αἴθʼ ὄφελες καὶ ἄμικτος ἀνύμφευτός τε παρείης, -ἄφθορος ὡς κούρη πρὸς πόσιν ἐρχομένη. -
-
- - -honestus - - -Ἀμβαίνων Ἑλικῶνα μέγαν κάμες, ἀλλʼ ἐκορέσθης -Πηγασίδος κρήνης νεκταρέων λιβάδων -οὕτως καὶ σοφίης πόνος ὄρθιος· ἢν δʼ ἄρʼ ἐπʼ ἄκρον -τέρμα μόλῃς, ἀρύσῃ Πιερίδων χάριτας, -
-
- - -Antipater - - -αὔην με πλατάνιστον ἐφερπύζουσα καλύπτει -ἄμπελος· ὀθνείῃ δʼ ἀμφιτέθηλα κόμῃ, -ἡ πρὶν ἐμοῖς θαλέθουσιν ἐνιθρέψασ’ ὀροδάμνοις -βότρυας, ἡ ταύτης οὐκ ἀπετηλοτέρη· - -τοίην μέντοι ἔπειτα τιθηνείσθω τις ἑταίρην, -ἥτις ἀμείψασθαι καὶ νέκυν οἶδε μόνη. -
-
- - -Philippus - - -Ἀδριακοῖο κύτους λαιμὸς τὸ πάλαι μελίγηρυς, -ἡνίκʼ ἐγαστροφόρουν Βακχιακὰς χάριτας, -νῦν κλασθεὶς κεῖμαι νεοθηλέι καρτερὸν ἕρκος -κλήματι, πρὸς τρυφερὴν τεινομένῳ καλύβην. -αἰεί τοι Βρομίῳ λατρεύομεν· ἢ γεραὸν γὰρ -φρουροῦμεν πιστῶς, ἢ νέον ἐκτρέφομεν. -
-
- - -Erycius - - -αὖά τοι ἐκτάμνοντι γεράνδρυα, κάμμορε Μίνδων, -φωλὰς ἀραχναίη σκαιὸν ἔτυψε πόδα, -νειόθεν ἀντιάσασα χύδην δʼ ἔβρυξε μελαίνῃ -σηπεδόνι χλωρὴν σάρκα κατʼ ἀστραγάλους. -ἐτμήθη δʼ ἀπὸ τῆς στιβαρὸν γόνυ, καὶ σὲ κομίζει -μουνόποδα βλωθρῆς σκηπάνιον κοτίνου. -
-
- - -Crinagoras - - -ἄχρι τεῦ, ἆ δείλαιε, κεναῖσιν ἐπʼ ἐλπίσι, θυμέ, -πωτηθεὶς ψυχρῶν ἀσσοτάτω νεφέων, -ἄλλοις ἄλλʼ ἔπʼ ὄνειρα διαγράψεις ἀφένοιο; -κτητὸν γὰρ θνητοῖς οὐδὲ ἓν αὐτόματον. -Μουσέων ἀλλʼ ἐπὶ δῶρα μετέρχεο· ταῦτα δʼ ἀμυδρὰ -εἴδωλα ψυχῆς ἠλεμάτοισι μέθες. -
-
- - -Crinagoras - - -Ἄγχουροι μεγάλαι κόσμου χθόνες, ἃς διὰ Νεῖλος -πιμπλάμενος μελάνων τέμνει ἀπʼ Αἰθιόπων, - -ἀμφότεραι βασιλῆας ἐκοινώσασθε γάμοισιν, -ἓν γένος Αἰγύπτου καὶ Λιβύης θέμεναι. -ἐκ πατέρων εἴη παισὶν πάλι τοῖσιν ἀνάκτων -ἔμπεδον ἠπείροις σκῆπτρον ἐπʼ ἀμφοτέραις. -
-
- - -Lollius bassus - - -Ἄρρηκτοι Μοιρῶν πυμάτην ἐσφράγισαν ὅρκοι -τῷ Φρυγὶ πὰρ βωμῷ τὴν Πριάμου θυσίην. -ἀλλὰ σοί, Αἰνεία, στόλος ἱερὸς Ἰταλὸν ἤδη -ὅρμον ἔχει, πάτρης φροίμιον οὐρανίης. -ἐς καλὸν ὤλετο πύργος ὁ Τρώιος· ἦ γὰρ ἐν ὅπλοις -ἠγέρθη κόσμου παντὸς ἄνασσα πόλις. -
-
- - -erycius - - - - βουκόλε, πρὸς τῶ Πανός, ὁ φήγινος, εἰπέ, κολοσσὸς -οὗτος, ὅτῳ σπένδεις τὸ γλάγος, ἔστι τίνος; - - τῶ λειοντοπάλα Τιρυνθίω. οὐ δὲ τὰ τόξα, -νήπιε, καὶ σκυτάλην ἀγριέλαιον ὁρῇς; -χαίροις Ἀλκείδα δαμαληφάγε, καὶ τάδε φρούρει -αὔλια, κἠξ ὀλίγων μυριόβοια τίθει. -
-
- - -Antipater - - -βούπαις ὡπόλλων τόδε χάλκεον ἔργον Ὀνατᾶ, -ἀγλαΐης Λητοῖ καὶ Διὶ μαρτυρίη, -οὔθʼ ὅτι τῆσδε μάτην Ζεὺς ἤρατο, χὤτι κατʼ αἶνον -ὄμματα καὶ κεφαλὴν ἀγλαὸς ὁ Κρονίδης. -οὐδʼ Ἥρῃ νεμεσητὸν ἐχεύατο χαλκὸν Ὀνατᾶς, -ὃν μετʼ Ἐλειθυίης τοῖον ἀπεπλάσατο. - -
-
- - -Crinagoras - - -βίβλων ἡ γλυκερὴ λυρικῶν ἐν τεύχεϊ τῷδε -πεντὰς ἀμιμήτων ἔργα φέρει Χαρίτων. -δῶρον δʼ εἰς ἱερὴν Ἀντωνίῃ ἥκομεν ἠῶ, -κάλλευς καὶ πραπίδων ἔξοχʼ ἐνεγκαμένῃ. -
-
- - -Philippus - - -βαιὸν ἀποπλανίην λιπομήτορα παῖδα Καλύπτρης -κριὸς ἑλιξόκερως θεῖνε θρασυνόμενος. -κάπρος δʼ Ἡράκλειος ἀπορρήξας ἀπὸ δεσμῶν, -ἐς νηδὺν κριοῦ πᾶσαν ἔβαψε γένυν -ζωὴν νηπιάχῳ δʼ ἐχαρίσσατο. ἆρʼ † ἀπὸ Ἥρης -Ἡρακλέης βρεφέων ᾤκτισεν ἡλικίην; -
-
- - -Antipater - - -βουκόλος ἔπλεο, Φοῖβε, Ποσειδάων δὲ καβάλλης, -κύκνος Ζεύς, Ἄμμων δʼ ὡμφιβόητος ὄφις, -χοἰ μὲν ἐπʼ ἠιθέας, σὺ δὲ παιδικός, ὄφρα λάθοιτε· -ἐστὲ γὰρ οὐ πειθοῦς εὐνέται, ἀλλὰ βίης. -Εὐαγόρας δʼ ὢν χαλκὸς ἄτερ δόλου αὐτὸς ἐναργὴς -πάντας καὶ πάσας, οὐ μεταβαλλόμενος. -
-
- - -Antiphilus - - -Γλαῦκος ὁ νησαίοιο διαπλώουσιν ὁδηγὸς -πορθμοῦ, καὶ Θασίων ἔντροφος αἰγιαλῶν, -πόντου ἀροτρευτὴρ ἐπιδέξιος, οὐδʼ, ὅτʼ ἔκνωσσεν, -πλαζομένῃ στρωφῶν πηδάλιον παλάμῃ, - -μυριέτης, ἁλίοιο βίου ῥάκος, οὐδʼ, ὅτʼ ἔμελλεν -θνῄσκειν, ἐκτὸς ἔβη γηραλέης σανίδος· -τοὶ δὲ κέλυφος ἔκαυσαν ἐπʼ ἀνέρι, τόφρʼ ὁ γεραιὸς -πλώσῃ ἐπʼ οἰκείης εἰς ἀίδην ἀκάτου. -
-
- - -Apollonides - - -γήθησαν περὶ παιδὸς Ἀριστίπποιο τοκῆες, -καὶ κλαῦσαν μοίρης δʼ ἦμαρ ἓν ἀμφοτέρης. -εὖτε γὰρ αἰθόμενον δόμον ἔκφυγεν, ἰθὺ κεραυνοῦ -Ζεὺς κατὰ οἱ κεφαλῆς ἄσπετον ἧκε σέλας. -τοῦτο δʼ ἔπος τότʼ ἔλεξαν ὅσοι νέκυν ὠδύροντο· - - ὦ πυρὶ δαιμονίῳ τλῆμον ὀφειλόμενε. - -
-
- - -Apollonides - - -Δειματόεις ἐλάφων κεραὸς λόχος, εὖτε κρυώδεις -πλῆσαν ὀρῶν κορυφὰς χιόνεαι νιφάδες, -δείλαιαι ποταμοῖσιν ἐφώρμισαν, ἐλπίδι φροῦδοι -χλιῆναι νοτεροῖς ἄσθμασιν ὠκὺ γόνυ. -τὰς δὲ περιφράξας ἐχθρὸς ῥόος ἀθρόον ἄφνω -χειμερίῃ στυγεροῦ δῆσε πάγοιο πέδῃ. -πληθὺς δʼ ἀγροτέρων ἀλίνου θοινήσατο θήρης, -ἣ φύγεν ἁρπεδόνην πολλάκι καὶ στάλικα. -
-
- - -Antiphanes - - -Δυσμοίρων θαλάμων ἐπὶ παστάσιν οὐχ Ὑμέναιος, -ἀλλʼ Ἀίδης ἔστη πικρογάμου Πετάλης. -δείματι γὰρ μούνην πρωτόζυγα Κύπριν ἀνʼ ὄρφνην -φεύγουσαν, ξυνὸν παρθενικαῖσι φόβον, -φρουροδόμοι νηλεῖς κύνες ἔκτανον· ἣν δὲ γυναῖκα -ἐλπὶς ἰδεῖν, ἄφνως ἔσχομεν οὐδὲ νέκυν. - -
-
- - -Marcus argentarius - - -Ἐθραύσθης, ἡδεῖα παρʼ οἰνοπόταισι λάγυνε, -νηδύος ἐκ πάσης χευαμένη Βρόμιον. -τηλόθε γὰρ λίθος εἰς σὲ βαρύστονος, οἷα κεραυνός, -οὐ Διὸς ἐκ χειρῶν, ἀλλὰ Δίωνος ἔβη. -ἦν δὲ γέλως ἐπὶ σοὶ καὶ σκώμματα πυκνά, τυπείσης, -καὶ πολὺς ἐξ ἑτάρων γινόμενος θόρυβος. -οὐ θρηνῶ σε, λάγυνε, τὸν εὐαστῆρα τεκοῦσαν -Βάκχον, ἐπεὶ Σεμέλη καὶ σὺ πεπόνθατʼ ἴσα. -
-
- - -Philippus - - -Εὐθηλῆ πλάτανόν με Νότου βαρυλαίλαπες αὖραι -ῥίζης ἐξ αὐτῆς ἐστόρεσαν δαπέδοις· -λουσαμένη Βρομίῳ δʼ ἔστην πάλιν, ὄμβρον ἔχουσα -χείματι καὶ θάλπει τοῦ Διὸς ἡδύτερον. -ὀλλυμένη δʼ ἔζησα· μόνη δὲ πιοῦσα Λυαῖον, -ἄλλων κλινομένων, ὀρθοτέρη βλέπομαι. -
-
- - -Boethus - - -εἰ τοῖος Διόνυσος ἐς ἱερὸν ἦλθεν Ὄλυμπον, -κωμάζων Λήναις σύν ποτε καὶ Σατύροις, -οἷον ὁ τεχνήεις Πυλάδης ὠρχήσατο κεῖνον, -ὀρθὰ κατὰ τραγικῶν τέθμια μουσοπόλων, -παυσαμένη ζήλου Διὸς ἂν φάτο σύγγαμος Ἥρη· - - ἐψεύσω, Σεμέλη, Βάκχον ἐγὼ δʼ ἔτεκον. - - -
-
- - -quintus maecius - - -Εὐπέταλον γλαυκὰν ἀναδενδράδα τάνδε παρʼ ἄκραις -ἱδρυθεὶς λοφιαῖς Πὰν ὅδʼ ἐπισκοπέω. -εἰ δέ σε πορφύροντος ἔχει πόθος, ὦ παροδῖτα, -βότρυος, οὐ φθονέω γαστρὶ χαριζομένῳ· -ἢν δὲ χερὶ ψαύσῃς κλοπίῃ μόνον, αὐτίκα δέξῃ -ὀζαλέην βάκτρου τήνδε καρηβαρίην. -
-
- - -honestus - - -ἔστην ἐν φόρμιγγι, κατηρείφθην δὲ σὺν αὐλῷ -Θήβη· φεῦ Μούσης ἔμπαλιν ἁρμονίης· -κωφὰ δέ μοι κεῖται λυροθελγέα λείψανα πύργων, -πέτροι μουσοδόμοις τείχεσιν αὐτόμολοι, -σῆς χερός, Ἀμφίων, ἄπονος χάρις· ἑπτάπυλον γὰρ -πάτρην ἑπταμίτῳ τείχισας ἐν κιθάρῃ. -
-
- - -euenus - - -ἐχθίστη Μούσαις σελιδηφάγε, λωβήτειρα -φωλάς, ἀεὶ σοφίης κλέμματα φερβομένη, -τίπτε, κελαινόχρως, ἱεραῖς ψήφοισι λοχάζῃ, -σίλφη, τὴν φθονερὴν εἰκόνα πλαττομένη; -φεῦγʼ ἀπὸ Μουσάων, ἴθι τηλόσε, μηδʼ ὅσον ὄψει -βάσκανον † ἐν ψήφῳ δόξαν ἐπεισαγάγῃς. -
-
- - -Anonymi epigrammatici - - -ἐς βαθὺν ἥλατο Νεῖλον ἀπʼ ὀφρύος ὀξὺς ὁδίτης, -ἡνίκα λαιμάργων εἶδε λύκων ἀγέλην. - -ἀλλά μιν ἀγρεύσαντο διʼ ὕδατος· ἔβρυχε δʼ ἄλλος -ἄλλον, ἐπουραίῳ δήγματι δραξάμενος. -μακρὰ γεφυρώθη δὲ λύκοις βυθός, ἔφθανε δʼ ἄνδρα -νηχομένων θηρῶν αὐτοδίδακτος ἄρης. -
-
- - -Philippus - - -ἐν Θήβαις Κάδμου κλεινὸς γάμος, ἀλλὰ μυσαχθὴς -Οἰδίποδος· τελετὰς Εὔιος ἠσπάσατο, -ἃς γελάσας Πενθεὺς ὠδύρατο τείχεα χορδαῖς -ἔστη, καὶ λωτοῖς ἔστενε λυόμενα· -Ἀντιόπης ὁσίη, χαλεπὴ δʼ ὠδὶς Ἰοκάστης· -ἦν Ἰνὼ φιλόπαις, ἀλλʼ ἀσεβὴς Ἀθάμας. -† οἰκτρὸν ἀεὶ πτολίεθρον ἴδʼ ὡς ἐσθλῶν περὶ Θήβας -μύθων καὶ στυγνῶν ἤρκεσεν ἱστορίη. -
-
- - -Philippus - - -ἡ πυρὶ πάντα τεκοῦσα Φιλαίνιον, ἡ βαρυπενθὴς -μήτηρ, ἡ τέκνων τρισσὸν ἰδοῦσα τάφον, -ἀλλοτρίαις ὠδῖσιν ἐφώρμισα· ἦ γὰρ ἐώλπειν -πάντως μοι ζήσειν τοῦτον ὃν οὐκ ἔτεκον. -ἡ δʼ εὔπαις θετὸν υἱὸν ἀνήγαγον ἀλλά με δαίμων -ἤθελε μηδʼ ἄλλης μητρὸς ἔχειν χάριτα. -κληθεὶς ἡμέτερος γὰρ ἀπέφθιτο· νῦν δὲ τεκούσαις -ἤδη καὶ λοιπαῖς πένθος ἐγὼ γέγονα. -
-
- - -Philippus - - -ἠρίθμει πολὺν ὄλβον Ἀριστείδης ὁ πενιχρὸς -τὴν ὄιν ὡς ποίμνην, τὴν βόα δʼ ὡς ἀγέλην - -ἤμβροτε δʼ ἀμφοτέρων· ἀμνὴν λύκος, ἔκτανε δʼ ὠδὶς -τὴν δάμαλιν, πενίης δʼ ὤλετο βουκόλιον· -πηροδέτῳ δʼ ὃ γʼ ἱμάντι κατʼ αὐχένος ἅμμα πεδήσας -οἰκτρὸς ἀμυκήτῳ κάτθανε πὰρ καλύβῃ. -
-
- - -Antiphanes - - -ἥμισύ μευ ζώειν ἐδόκουν ἔτι, κεῖνο δʼ ἔφυσεν -ἓν μόνον αἰπυτάτου μῆλον ἐπʼ ἀκρεμόνος· -ἡ δὲ κύων δένδρων καρποφθόρος, ἡ πτιλόνωτος -κάμπἠ, καὶ τὸ μόνον βάσκανος ἐξέφαγεν. -ὁ Φθόνος εἰς πολὺν ὄγκον ἀπέβλεπεν ὃς δὲ τὰ μικρὰ -πορθεῖ, καὶ τούτου χείρονα δεῖ με λέγειν. -
-
- - -Apollonides - - -ἡ Καθαρὴ ʽ Νύμφαι γὰρ ἐπώνυμον ἔξοχον ἄλλων -κρήνῃ πασάων δῶκαν ἐμοὶ λιβάδωνʼ, -ληιστὴς ὅτε μοι παρακλίντορας ἔκτανεν ἄνδρας, -καὶ φονίην ἱεροῖς ὕδασι λοῦσε χέρα, -κεῖνον ἀναστρέψασα γλυκὺν ῥόον, οὐκέθʼ ὁδίταις -βλύζω· τίς γὰρ ἐρεῖ τὴν Καθαρὴν ἔτι με; -
-
- - -Antiphanes - - -ἡ πάρος εὐύδροισι λιβαζομένη προχοαῖσι, -πτωχὴ νῦν νυμφῶν μέχρι καὶ εἰς σταγόνα· -λυθρώδεις γὰρ ἐμοῖσιν ἐνίψατο νάμασι χεῖρας -ἀνδροφόνος, κηλῖδʼ ὕδασιν ἐγκεράσας· -ἐξ οὗ μοι κοῦραι φύγον ἥλιον, εἰς ἕνα Βάκχον, - -εἰποῦσαι, νύμφαι μισγόμεθʼ, οὐκ ἐς Ἄρη. - - -
-
- - -Bianor - - -ἤριπεν ἐξ ἄκρης δόμος ἀθρόος, ἀλλʼ ἐπὶ παιδὶ -νηπιάχῳ Ζεφύρου πολλὸν ἐλαφρότερος· -φείσατο κουροσύνης καὶ ἐρείπιον. ὦ μεγάλαυχοι -μητέρες, ὠδίνων καὶ λίθος αἰσθάνεται. -
-
- - -Secundus - - -ἡ τὸ πάλαι Λαῒς πάντων βέλος, οὐκέτι Λαΐς -ἀλλʼ ἐτέων φανερὴ πᾶσιν ἐγὼ Νέμεσις. -οὐ μὰ Κύπριν ʽτί δὲ Κύπρις ἐμοὶ γʼ ἔτι, πλὴν ὅσον ὅρκος;ʼ -γνώριμον οὐδʼ αὐτῇ Λαΐδι Λαῒς ἔτι. -
-
- - -Epigonus - - -ἡ πάρος εὐπετάλοισιν ἐν οἰνάνθαις νεάσασα, -καὶ τετανῶν βοτρύων ῥᾶγα κομισσαμένη, -νῦν οὕτω γραιοῦμαι. ἴδʼ ὁ χρόνος οἷα δαμάζει· -καὶ σταφυλὴ γήρως αἰσθάνεται ῥυτίδων. -
-
- - -Philippus - - -ἠρίθμουν ποτὲ πάντες Ἀριστοδίκην κλυτόπαιδα -ἑξάκις ὠδίνων ἄχθος ἀπωσαμένην -ἤρισε δʼ εἰς αὐτὴν ὕδωρ χθονί· τρεῖς γὰρ ὄλοντο -νούσῳ, λειπόμενοι δʼ ἤμυσαν ἐν πελάγει. -αἰεὶ δʼ ἡ βαρύδακρυς, ἐπὶ στήλαις μὲν ἀηδών, -μεμφομένη δὲ βυθοῖς ἀλκυονὶς βλέπεται. -
-
- - -Antiphilus - - -ἡ γραῦς Εὐβούλη, ὅτε οἱ καταθύμιον ἦν τι, -Φοίβου τὸν πρὸ ποδῶν μάντιν ἄειρε λίθον, - -χείρεσι πειράζουσα· καὶ ἦν βαρύς, ἡνίκα μή τι -ἤθελεν εἰ δὲ θέλοι, κουφότερος πετάλων. -αὐτὴ δὲ πρήσσουσα τὸ οἱ φίλον, ἤν ποθʼ ἁμάρτῃ, -Φοίβῳ τὰς ἀνίσους χεῖρας ἐπεγράφετο. -
-
- - -Philippus - - -θάμνου ποτʼ ἄκρους ἀμφὶ κλῶνας ἥμενος -τέττιξ πτερῷ, φλέγοντος ἡλίου μέσου, -νηδὺν ῥαπίζων, δαίδαλʼ αὐτουργῷ μέλει -ἡδὺς κατωργάνιζε τῆς ἐρημίας. -Κρίτων δʼ, ὁ πάσης ἰξοεργὸς Πιαλεὺς -θήρης, ἀσάρκου νῶτα δουνακεύσατο. -τίσιν δʼ ἔτισεν εἰς γὰρ ἠθάδας πάγας -σφαλεὶς ἀλᾶται παντὸς ἱμείρων πτεροῦ. -
-
- - -Philippus - - -Ἰοτυπὴς Διὸς ὄρνις ἐτίσατο Κρῆτα φαρέτρης, -οὐρανόθεν τόξῳ τόξον ἀμυνόμενος· -κεῖνον δʼ εὐθὺς ἄκοντι παλινδρομέοντι κατέκτα -ἠέριος, πίπτων δʼ ἔκτανεν ὡς ἔθανεν. -μηκέτʼ ἐφʼ ὑμετέροις ἀψευδέσι Κρῆτες ὀιστοῖς -αὐχεῖθʼ· ὑμνείσθω καὶ Διὸς εὐστοχίη. -
-
- - -Antipater - - -ἵμερον αὐλήσαντι πολυτρήτων διὰ λωτῶν -εἶπε λιγυφθόγγῳ Φοῖβος ἐπὶ Γλαφύρῳ· - -“ Μαρσύη, ἐψεύσω τεὸν εὕρεμα, τοὺς γὰρ Ἀθήνης -αὐλοὺς ἐκ Φρυγίης οὗτος ἐληΐσατο· -εἰ δὲ σὺ τοιούτοις τότʼ ἐνέπνεες, οὐκ ἂν Ὕαγνις -τὴν ἐπὶ Μαιάνδρῳ κλαῦσε δύσαυλον ἔριν.” -
-
- - -Philippus - - -Ἰκαρίην πλώων [ πρῴην] ἅλα, νηὸς ὀλισθὼν -Δᾶμις ὁ Νικαρέτου κάππεσεν εἰς πέλαγος. -πολλὰ πατὴρ δʼ ἠρᾶτο πρὸς ἀθανάτους, καὶ ἐς ὕδωρ -φθέγγεθʼ, ὑπὲρ τέκνου κύματα λισσόμενος. -ὤλετο δʼ οἰκτίστως βρυχθεὶς ἁλί· κεῖνο δὲ πατρὸς -ἔκλυεν ἀράων οὐδὲ πάλαι πέλαγος. -
-
- - -Antipater - - -Κρῆσσα κύων ἐλάφοιο κατʼ ἴχνιον ἔδραμε Γοργώ, -ἔγκυος, ἀμφοτέρην Ἄρτεμιν εὐξαμένη· -τίκτε δʼ ἀποκτείνουσα· θοὴ δʼ ἐπένευσεν Ἐλευθὼ -ἄμφω, εὐαγρίης δῶρα καὶ εὐτοκίης· -καὶ νῦν ἐννέα παισὶ διδοῖ γάλα. φεύγετε, Κρῆσσαι -κεμμάδες, ἐκ τοκάδων τέκνα διδασκόμεναι. -
-
- - -Antipater - - -Κλασθείσης ποτὲ νηὸς ἐν ὕδατι δῆριν ἔθεντο -δισσοὶ ὑπὲρ μούνης μαρνάμενοι σανίδος. -τύψε μὲν Ἀνταγόρης Πεισίστρατον οὐ νεμεσητόν, -ἦν γὰρ ὑπὲρ ψυχῆς· ἀλλʼ ἐμέλησε Δίκῃ. - -νῆχε δʼ ὁ μὲν, τὸν δʼ εἷλε κύων ἁλός. ἦ παναλάστωρ -κηρῶν οὐδʼ ὑγρῷ παύεται ἐν πελάγει. -
-
- - -Marcus argentarius - - -κωμάζω, χρύσειον ἐς ἑσπερίων χορὸν ἄστρων -λεύσσων, οὐδʼ ἄλλων λὰξ ἐβάρυνʼ ὀάρους· -στρέψας δʼ ἀνθόβολον κρατὸς τρίχα, τὴν κελαδεινὴν -πηκτίδα μουσοπόλοις χερσὶν ἐπηρέθισα. -καὶ τάδε δρῶν εὔκοσμον ἔχω βίον οὐδὲ γὰρ αὐτὸς -κόσμος ἄνευθε λύρης ἔπλετο καὶ στεφάνου. -
-
- - -Apollonides - - -καὶ πότε δὴ νήεσσ’ ἄφοβος πόρος, εἰπέ, θάλασσα, -εἰ καὶ ἐν ἀλκυόνων ἤμασι κλαυσόμεθα, -ἀλκυόνων, αἷς πόντος ἀεὶ στηρίξατο κῦμα -νήνεμον, ὡς κρῖναι χέρσον ἀπιστοτέρην; -ἀλλὰ καὶ ἡνίκα μαῖα καὶ ὠδίνεσσιν ἀπήμων -αὐχεῖς, σὸν φόρτῳ δῦσας Ἀριστομένην. -
-
- - -Bianor - - -Καρφαλέος δίψει Φοίβου λάτρις εὖτε γυναικὸς -εἶδεν ὑπὲρ τύμβου κρωσσίον ὀμβροδόκον, -κλάγξεν ὑπὲρ χείλους, ἀλλʼ οὐ γένυς ἥπτετο βυσσοῦ. -Φοῖβε, σὺ δʼ εἰς τέχνην ὄρνιν ἐκαιρομάνεις· -χερμάδα δὲ % ψαλμῶν σφαῖρον ποτὸν ἅρπαγι χείλει -ἔφθανε μαιμάσσων λαοτίνακτον ὕδωρ. - -
-
- - -Bianor - - -καύματος ἐν θάμνοισι λαλίστατος ἡνίκα τέττιξ -φθέγξατο διγλώσσῳ μελπόμενος στόματι, -δουνακόεντα Κρίτων συνθεὶς δόλον, εἷλεν ἀοιδὸν -ἠέρος, οὐκ ἰδίην ἰξοβολῶν μελέτην. -ἄξια δʼ οὐχ ὁσίης θήρης πάθεν οὐ γὰρ ἔτʼ ἄλλων -πήξατʼ ἐπʼ ὀρνίθων εὔστοχον ὡς πρὶν ἄγρην. -
-
- - -Philippus - - -καὶ τὸν; ἀρουραῖον γυρήτομον αὔλακα τέμνει -μηροτυπεῖ κέντρῳ πειθομένη δάμαλις· -καὶ μετʼ ἀροτροπόνους ζεύγλας πάλι τῷ νεοθηλεῖ -πινομένη μόσχῳ δεύτερον ἄλγος ἔχει. -μὴ θλίψῃς αὐτὴν ὁ γεωμόρος· οὗτος ὁ βαιὸς -μόσχος, ἐὰν φείσῃ, σοὶ τρέφεται δαμάλης. -
-
- - -Macedonius i - - -κάπρον μὲν χέρσῳ Κόδρος ἔκτανε· τὴν δὲ ταχεῖαν -εἰν ἁλὶ καὶ χαροποῖς κύμασιν εἷλʼ ἔλαφον. -εἰ δʼ ἦν καὶ πτηνὴ θηρῶν φύσις, οὐδʼ ἂν ἐν αἴθρῃ -τὴν κείνου κενεὴν Ἄρτεμις εἶδε χέρα. -
-
- - -Crinagoras - - -λῶπος ἀποκλύζουσα παρὰ κροκάλαισι θαλάσσης -χερνῆτις, διεροῦ τυτθὸν ὕπερθε πάγου, -χέρσον ἐπεκβαίνοντι κατασπασθεῖσα κλύδωνι, -δειλαίη πικροῦ κῦμʼ ἔπιεν θανάτου· -πνεῦμα δʼ ὁμοῦ πενίῃ ἀπελύσατο. τίς κʼ ἐνὶ νηὶ -θαρσήσαι πεζοῖς τὴν ἀφύλακτον ἅλα; - -
-
- - -Antiphilus - - -Λαβροπόδη χείμαρρε, τί δὴ τόσον ὧδε κορύσσῃ, -πεζὸν ἀποκλείων ἴχνος ὁδοιπορίης; -ἦ μεθύεις ὄμβροισι, καὶ οὐ Νύμφαισι διαυγὲς -νᾶμα φέρεις, θολεραῖς δʼ ἠράνισαι νεφέλαις. -ὄψομαι ἠελίῳ σε κεκαυμένον, ὅστις ἐλέγχειν -καὶ γόνιμον ποταμῶν καὶ νόθον οἶδεν ὕδωρ. -
-
- - -Bianor - - -λάρνακα πατρῴων ἔτι λείψανα κοιμίζουσαν -νεκρῶν χειμάρρῳ παῖς ἴδε συρομένην -καί μιν ἄχος τόλμης ἐπλήσατο, χεῦμα δʼ ἀναιδὲς -εἰσέθορεν, πικρὴν δʼ ἦλθʼ ἐπὶ συμμαχίην. -ὀστέα μὲν γὰρ ἔσωσεν ἀφʼ ὕδατος, ἀντὶ δὲ τούτων -αὐτὸς ὑπὸ βλοσυροῦ χεύματος ἐφθάνετο. -
-
- - -Lollius bassus - - -Ληθαίης ἀκάτοιο τριηκοσίους ὅτε ναύτας -δεύτερον ἔσχʼ Ἀίδης, πάντας ἀρηϊφάτους, - - Σπάρτας ὁ στόλος, εἶπεν “ἴδʼ ὡς πάλι πρὸςθια πάντα -τραύματα, καὶ στέρνοις δῆρις ἔνεστι μόνοις -νῦν γε μόθου κορέσασθε, καὶ εἰς ἐμὸν ἀμπαύσασθε -ὕπνον, ἀνικάτου δῆμος Ἐνυαλίου.” -
-
- - -Apollonides - - -Λαίλιος, Αὐσονίων ὑπάτων κλέος, εἶπεν ἀθρήσας -Εὐρώταν· Σπάρτης χαῖρε φέριστον ὕδωρ. - - -Μουσάων δʼ ἐπὶ χεῖρα βαλὼν πολυΐστορι βίβλῳ, -εἶδεν ὑπὲρ κορυφῆς σύμβολον εὐμαθίης· -κίτται, μιμηλὸν βιότου πτερόν, ἐν σκιεροῖσιν -ἄγκεσι παμφώνων μέλπον ἀπὸ στομάτων. -ὡρμήθη δʼ ἐπὶ ταῖσι. τί δʼ οὐ ζηλωτὸς ὁ μόχθος, -εἰ καὶ πτηνὰ ποθεῖ -
-
- - -Apollonides - - -ξυνὸν ὁπηνίκα θαῦμα κατείδομεν Ἀσὶς ἅπασα, -πῶλον ἐπʼ ἀνδρομέαν σάρκα φριμασσόμενον, -Θρηικίης φάτνης πολιὸς λόγος εἰς ἐμὸν ὄμμα -ἤλυθε δίζημαι δεύτερον Ἡρακλέα. -
-
- - -Antipater - - -ξεῖνοι, παρθένος εἰμὶ τὸ δένδρεον εἴπατε δάφνης -φείσασθαι δμώων χερσὶν ἑτοιμοτόμοις· -ἀντὶ δʼ ἐμεῦ κομάρου τις ὁδοιπόρος ἢ τερεβίνθου -δρεπτέσθω χθαμαλὴν ἐς χύσιν οὐ γὰρ ἑκάς· -ἀλλʼ ἀπʼ ἐμεῦ ποταμὸς μὲν ὅσον τρία, τοῦ δʼ ἀπὸ πηγῶν -ὕλη πανθηλὴς δοιὰ πέλεθρʼ ἀπέχει. -
-
- - -Crinagoras - - -οὔρεα Πυρηναῖα καὶ αἱ βαθυάγκεες Ἄλπεις, -αἳ Ῥήνου προχοὰς ἐγγὺς ἀποβλέπετε, - -μάρτυρες ἀκτίνων, Γερμανικὸς ἃς ἀνέτειλεν, -ἀστράπτων Κελτοῖς πουλὺν ἐνυάλιον. -οἱ δʼ ἄρα δουπήθησαν ἀολλέες· εἶπε δʼ Ἐνυὼ -Ἄρεϊ· τοιαύταις χερσὶν ὀφειλόμεθα. - -
-
- - -Crinagoras - - -οἵους ἀνθʼ οἵων οἰκήτορας, ὦ ἐλεεινή, -εὕραο. φεῦ μεγάλης Ἑλλάδος ἀμμορίης. -αὐτίκα καὶ γαίης χθαμαλωτέρη εἴθε, Κόρινθε, -κεῖσθαι, καὶ Λιβυκῆς ψάμμου ἐρημοτέρη, -ἢ τοίοις διὰ πᾶσα παλιμπρήτοισι δοθεῖσα -θλίβειν ἀρχαίων ὀστέα Βακχιαδῶν. -
-
- - -Philippus - - -οὐκέτι πυργωθεὶς ὁ φαλαγγομάχας ἐπὶ δῆριν -ἄσχετος ὁρμαίνει μυριόδους ἐλέφας, -ἀλλὰ φόβῳ στείλας βαθὺν αὐχένα πρὸς ζυγοδέσμους, -ἄντυγα διφρουλκεῖ Καίσαρος οὐρανίου. -ἔγνω δʼ εἰρήνης καὶ θὴρ χάριν ὄργανα ῥίψας -Ἄρεος, εὐνομίης ἀντανάγει πατέρα. -
-
- - -Marcus argentarius - - -ὄρνι, τί μοι φίλον ὕπνον ἀφήρπασας; ἡδὺ δὲ Πύρρης -εἴδωλον κοίτης ᾤχετʼ ἀποπτάμενον. -ἢ τάδε θρέπτρα τίνεις, ὅτι θῆκά σε, δύσμορε, πάσης -ᾠοτόκου κραίνειν ἐν μεγάροις ἀγέλης; -ναὶ βωμὸν καὶ σκῆπτρα Σαράπιδος, οὐκέτι νυκτὸς -φθέγξεαι, ἀλλʼ ἕξεις βωμὸν ὃν ὠμόσαμεν. - -
-
- - -Apollonides - - -ὁ πρὶν ἐγὼ Ῥοδίοισιν ἀνέμβατος ἱερὸς ὄρνις, -ὁ πρὶν Κερκαφίδαις αἰετὸς ἱστορίη, -ὑψιπετῆ τότε ταρσὸν ἀνὰ πλατὺν ἠέρʼ ἀερθεὶς -ἤλυθον, Ἠελίου νῆσον ὅτʼ εἶχε Νέρων -κείνου δʼ αὐλίσθην ἐνὶ δώμασι, χειρὶ συνήθης -κράντορος, οὐ φεύγων Ζῆνα τὸν ἐσσόμενον. -
-
- - -tullius geminus - - -οὗτος ὁ Κεκροπίδῃσι βαρὺς λίθος Ἄρεϊ κεῖμαι, -ξεῖνε, Φιλιππείης σύμβολον ἠνορέης, -ὑβρίζων Μαραθῶνα καὶ ἀγχιάλου Σαλαμῖνος -ἔργα, Μακηδονίης ἔγχεσι κεκλιμένα. -ὄμνυε νῦν νέκυας, Δημόσθενες· αὐτάρ ἔγωγε -καὶ ζωοῖς ἔσομαι καὶ φθιμένοισι βαρύς. -
-
- - -Lollius bassus - - -οὐλόμεναι νήεσσι Καφηρίδες, αἵ ποτε νόστον -ὠλέσαθʼ Ἑλλήνων καὶ στόλον Ἰλιόθεν, -πυρσὸς ὅτε ψεύστας χθονίης δνοφερώτερα νυκτὸς -ἧψε σέλα, τυφλὴ δʼ ἔδραμε πᾶσα τρόπις -χοιράδας ἐς πέτρας, Δαναοῖς πάλιν Ἴλιος ἄλλη -ἔπλετε, καὶ δεκέτους ἐχθρότεραι πολέμου. -καὶ τὴν μὲν τότʼ ἔπερσαν ἀνίκητος δὲ Καφηρεύς. -Ναύπλιε σοὶ χάρμην Ἑλλὰς ἔκλαυσε δάκρυ. - -
-
- - -Philippus - - -ὅτʼ ἐξ ἀήτου Λίβυος, ἐκ ζαοῦς Νότου; -συνεζοφώθη πόντος, ἐκ δὲ νειάτων -μυχῶν βυθῖτις ψάμμος ἐξηρεύγετο, -ἱστὸς δὲ πᾶς ὤλισθεν εἰς ἁλὸς πτύχας, -φορτὶς δʼ ἐσύρετʼ ἐς ἀίδαν πλανωμένη, -ἀρωγοναύτας δαίμονας Λυσίστρατος -ἐλιπάρησεν οἱ δὲ τῷ νεωκόρῳ -μούνῳ θάλασσαν ἀγρίαν ἐκοίμισαν, -
-
- - -Crinagoras - - -†οὐδʼ ἢν Ὠκεανὸς πᾶσαν πλήμμυραν ἐγείρῃ, -οὐδʼ ἢν Γερμανίη Ῥῆνον ἅπαντα πίῃ, -Ῥώμης οὐδʼ ὅσσον βλάψει σθένος, ἄχρι κε μίμνῃ -δεξιὰ σημαίνειν Καίσαρι θαρσαλέη. -οὕτως χαἰ ἱεραὶ Ζηνὸς δρύες ἔμπεδα ῥίζαις -ἑστᾶσιν, φύλλων δʼ αὖα χέουσ’ ἄνεμοι. -
-
- - -honestus - - -παίδων ὃν μὲν ἔκαιεν Ἀρίστιον, ὃν δʼ ἐσάκουσε -ναυηγὸν δισσὸν δʼ ἄλγος ἔτηξε μίαν. -αἰαῖ μητέρα Μοῖρα διείλετο, τὴν ἴσα τέκνα -καὶ πυρὶ καὶ πικρῷ νειμαμένην ὕδατι. -
-
- - -Philippus - - -πουλὺ Λεωνίδεω κατιδὼν δέμας αὐτοδάικτον -Ξέρξης ἐχλαίνου φάρεϊ πορφυρέῳ· - -κἠκ νεκύων δʼ ἤχησεν ὁ τᾶς Σπάρτας πολὺς ἥρως· -“οὐ δέχομαι προδόταις μισθὸν ὀφειλόμενον -ἀσπὶς ἐμοὶ τύμβου κόσμος μέγας· αἶρε τὰ Περσῶν -χἤξω κεἰς ἀΐδην ὡς Λακεδαιμόνιοσ” -
-
- - -Antiphilus - - - - πορφυρέαν τοι τάνδε, Λεωνίδα, ὤπασε χλαῖναν -Ξέρξης, ταρβήσας ἔργα τεᾶς ἀρετᾶς. - - οὐ δέχομαι· προδόταις αὕτα χάρις. ἀσπὶς ἔχοι με -καὶ νέκυν ὁ πλοῦτος δʼ οὐκ ἐμὸν ἐντάφιον. - - ἀλλʼ ἔθανες· τί τοσόνδε καὶ ἐν νεκύεσσιν ἀπεχθὴς -Πέρσαις; οὐ θνᾴσκει ζᾶλος ἐλευθερίας. -
-
- - -Bianor - - -πῶλον, τὸν πεδίων ἀλλʼ οὐχ ἁλὸς ἱππευτῆρα, -νηὶ διαπλώειν πόντον ἀναινόμενον, -μὴ θάμβει χρεμέθοντα καὶ ἐν ποσὶ λὰξ πατέοντα -τοίχους, καὶ θυμῷ δεσμὰ βιαζόμενον. -ἄχθεται εἰ φόρτου μέρος ἔρχεται· οὐ γάρ ἐπʼ ἄλλοις -κεῖσθαι τὸν πάντων ἔπρεπεν ὠκύτατον. -
-
- - -Apollonides - - -Σκύλλος, ὅτε Ξέρξου δολιχὸς στόλος Ἑλλάδα πᾶσαν -ἤλαυνεν, βυθίην εὕρετο ναυμαχίην, -Νηρῆος λαθρίοισιν ὑποπλεύσας τενάγεσσι, -καὶ τὸν ἀπʼ ἀγκύρης ὅρμον ἔκειρε νεῶν. -αὔτανδρος δʼ ἐπὶ γῆν ὠλίσθανε Περσὶς ἄναυδος -ὀλλυμένη, πρώτη πεῖρα Θεμιστοκλέους. - -
-
- - -Antipater - - -Στέλλευ ἐπʼ Εὐφρήτην, Ζηνὸς τέκος· εἰς σὲ γὰρ ἤδη -ἠῷοι Πάρθων αὐτομολοῦσι πόδες. -στέλλευ, ἄναξ· δήεις δὲ φόβῳ κεχαλασμένα τόξα, -Καῖσαρ· πατρῴων δʼ ἄρξαι ἀπʼ ἐντολέων -Ῥώμην δʼ, ὠκεανῷ περιτέρμονα πάντοθεν, αὐτὸς -πρῶτος ἀνερχομένῳ σφράγισαι ἠελίῳ. -
-
- - -Antiphilus - - -Σκίπων με πρὸς νηὸν ἀνήγαγεν, ὄντα βέβηλον -οὐ μοῦνον τελετῆς, ἀλλὰ καὶ ἠελίου· -μύστην δʼ ἀμφοτέρων με Θεαὶ θέσαν οἶδα δʼ ἐκείνῃ -νυκτὶ καὶ ὀφθαλμῶν νύκτα καθηράμενος. -ἀσκίπων δʼ εἰς ἄστυ κατέστιχον, ὄργια Δηοῦς -κηρύσσων γλώσσης ὄμμασι τρανότερον. -
-
- - -Philippus - - -ταῦροι πρηϋτένοντες, ἀροτρευτῆρες ἀρούρης, -εἰν ἁλὶ τοὺς γαίης ἀντέχομεν καμάτους· -αὔλακα τὴν ἀσίδαρον ἐν ὕδασιν ἕλκομεν ἄμφω, -μακροτόνων σχοίνων ἅμμα σαγηνόδετον -ἰχθύσι δʼ ἐκ σταχύων λατρεύομεν. ἆ ταλαεργοί· -ἤδη κἠν πελάγει καρπὸν ἀροῦσι βόες. -
-
- - -Adaeus - - -Ταύρῳ φρικαλέον νάπος ἐκβαίνοντι Δοβήρου -Πευκέστης ἵππῳ καρτερὸς ἠντίασεν. - -ἀλλʼ ὁ μὲν ὡρμήθη πρηὼν ἅτε τοῦ δʼ ἁπαλοῖο -Παιονίδα λόγχην ἧκε διὰ κροτάφου· -συλήσας κεφαλῆς δὲ διπλοῦν κέρας, αἰὲν ἐκείνῳ -ζωροποτῶν ἐχθροῦ κόμπον ἔχει θανάτου. -
-
- - -Secundus - - -τίπτε τὸν ὀγκητὴν βραδύπουν ὄνον ἄμμιγʼ ἐν ἵπποις -γυρὸν ἀλωειναῖς ἐξελάατε δρόμον; -οὐχ ἅλις, ὅττι μύλοιο περίδρομον ἄχθος ἀνάγκῃ -σπειρηδὸν σκοτόεις κυκλοδίωκτος ἔχω; -ἀλλʼ ἔτι καὶ πώλοισιν ἐρίζομεν. ἦ ῥʼ ἔτι λοιπὸν -νῦν μοι τὴν σκολιὴν αὐχένι γαῖαν ἀροῦν. -
-
- - -Antipater - - -τὸ βρέφος Ἑρμώνακτα διεχρήσασθε μέλισσαι -ʽφ̔εῦ κύνεσ̓ ἑρπυστήν, κηρία μαιόμενον -πολλάκι δʼ ἐξ ὑμέων ἐψισμένον ὠλέσατʼ, αἰαῖ, -κέντροις. εἰ δʼ ὀφίων φωλεὰ μεμφόμεθα, -πείθεο Λυσιδίκῃ καὶ Ἀμύντορι μηδὲ μελίσσας -αἰνεῖν κἀκείναις πικρὸν ἔνεστι μέλι. -
-
- - -Adaeus - - -τῇ βαιῇ Καλαθίνῃ ὑπὸ σκυλάκων μογεούσῃ -Λητωὶς κούφην εὐτοκίην ἔπορεν. -μούναις οὔ τι γυναιξὶν ἐπήκοος, ἀλλὰ καὶ αὐτὰς -συνθήρους σῴζειν Ἄρτεμις οἶδε κύνας. -
-
- - -Parmenion - - -τὸν γαίης καὶ πόντου ἀμειφθείσαισι κελεύθοις -ναύτην ἠπείρου, πεζοπόρον πελάγους, -ἐν τρισσαῖς δοράτων ἑκατοντάσιν ἔστεγεν ἄρης -Σπάρτης. αἰσχύνεσθʼ, οὔρεα καὶ πελάγη. - -
-
- - -Antipater - - -ὕδατος ἀκρήτου κεκορημένῳ ἄγχι παραστὰς -χθιζὸν ἐμοὶ λεχέων Βάκχος ἔλεξε τάδε· -“ εὕδεις ἄξιον ὕπνον ἀπεχθομένων Ἀφροδίτῃ· -εἰπέ μοι, ὦ νήφων, πεύθεαι Ἱππολύτου; -τάρβει, μή τι πάθῃς ἐναλίγκιον.” ὣς ὁ μὲν εἰπὼν -ᾤχετʼ ἐμοὶ δʼ ἀπὸ τῆς οὐκέτι τερπνὸν ὕδωρ. -
-
- - -Antiphilus - - -ὑλοτόμοι παύσασθε, νεῶν χάριν. οὐκέτι πεύκη -κύματος, ἀλλʼ ἤδη ῥινὸς ἐπιτροχάει· -γόμφος δʼ οὐδʼ ἔτι χαλκὸς ἐν ὁλκάσιν, οὐδὲ σίδηρος, -ἀλλὰ λίνῳ τοίχων ἁρμονίη δέδεται. -τὰς δʼ αὐτὰς ποτὲ πόντος ἔχει νέας, ἄλλοτε γαῖα -πτυκτὸν ἀμαξίτην φόρτον ἀειρομένας. -Ἀργὼ μὲν προτέροισιν ἀοίδιμος· ἀλλὰ Σαβίνῳ -καινοτέρην πῆξαι Παλλὰς ἔνευσε τρόπιν. -
-
- - -Philippus - - -Φοῖβον ἀνηναμένη Δάφνη ποτέ, νῦν ἀνέτειλεν -Καίσαρος ἐκ βωμοῦ κλῶνα μελαμπέταλον -ἐκ δὲ θεοῦ θεὸν εὗρεν ἀμείνονα· Λητοΐδην γὰρ -ἐχθήρασα, θέλει Ζῆνα τὸν Αἰνεάδην. -ῥίζαν δʼ οὐκ ἀπὸ γῆς μητρὸς βάλεν, ἀλλʼ ἀπὸ πέτρης. -Καίσαρι μὴ τίκτειν οὐδὲ λίθος δύναται. - -
-
- - -Bianor - - -φῶρες ὅτʼ εἰνάλιοι Τυρσηνίδος ἀγχόθι δίνης -φορμικτὰν ἀκάτου θῆκαν ὕπερ βύθιον, -αὐτίκα μιν κιθάρῃ λιγυαχέι δέξατο δελφὶν -σύνθροον, ἐκ δὲ βυθοῦ νήχετʼ ἐρυσσάμενος,˘ -μέχρις ἐπʼ ἰσθμὸν ἔκελσε Κορίνθιον. ἆρα θάλασσα -ἰχθῦς ἀνθρώπων εἶχε δικαιοτέρους; -
-
- - -Antipater - - -χειμέριον καίουσαν ἐφʼ ἑστίῃ ἄνθρακα Γοργὼ -τὴν γρηῢν βροντῆς ἐξεπάταξε φόβος· -πνεύμονα δὲ ψυχθεῖσα κατήμυσεν. ἦν ἄρα μέσσῃ -γήρως καὶ θανάτου λειπομένη πρόφασις. -
-
- - -Antiphilus - - -Ψῆγμʼ ἄπυρον χρυσοῖο σιδηρείων ὑπʼ ὀδόντων -ῥινηθέν, Λιβυκῆς κουφότερον ψαμάθου, -μῦς ὀλίγος βαρὺ δεῖπνον ἐδαίσατο· πᾶσα δὲ νηδὺς -συρομένη βραδύπουν θῆκε τὸν ὠκύτατον. -ληφθεὶς δʼ ἐκ μεσάτης ἀνετέμνετο κλέμματα γαστρός· -ἦς ἄρα κἠν ἀλόγοις, χρυσέ, κακοῦ πρόφασις, -
-
- - -Philippus - - -ὠκείαις ἐλάφοισι κύων ἰσάμιλλα δραμοῦσα -ἔγκυος ἡλκώθη παιδοπόρον γένεσιν - -πᾶσα δὲ συγκατέμυσε κατουλωθεῖσα χρόνοισιν, -ἤδη δʼ ἡ τοκετῶν ὥριος ἦν βάσανος· -πολλὰ δʼ ἐπωρύουσαν ἀνὴρ ἐσιδηροτόμησεν, -καὶ σκύλακες φίλιοι νηδύος ἐξέθορον. -Ἀρτέμιδος λέλυται λοχίων χάρις· ἔμπαλι δʼ Ἄρης -ἦρκται μαιοῦσθαι γαστέρα θηλυτέραις, -
-
- - -Diodorus zonas - - -ὦνερ, τᾶν βαλάνων τὰν ματέρα φείδεο κόπτειν, -φείδεο· γηραλέαν δʼ ἐκκεράϊζε πίτυν, -ἢ πεύκαν, ἢ τάνδε πολυστέλεχον παλίουρον, -ἢ πρῖνον, ἢ τὰν αὐαλέαν κόμαρον -τηλόθι δʼ ἴσχε δρυὸς πέλεκυν κοκύαι γάρ ἔλεξαν -ἁμῖν ὡς πρότεραι ματέρες ἐντὶ δρύες. -
-
- - -Anyte - - -ἵζευ ἅπας ὑπὸ καλὰ δάφνας εὐθαλέα φύλλα, -ὡραίου τʼ ἄρυσαι νάματος ἁδὺ πόμα, -ὄφρα τοι ἀσθμαίνοντα πόνοις θέρεος φίλα γυῖα -ἀμπαύσῃς, πνοιῇ τυπτόμενα Ζεφύρου. -
-
- - -Anyte - - -Ἑρμᾶς τᾷδʼ ἔστακα παρʼ ὄρχατον ἠνεμόεντα -ἐν τριόδοις, πολιᾶς ἐγγύθεν ἀιόνος, -ἀνδράσι κεκμηῶσιν ἔχων ἄμπαυσιν ὁδοῖο· -ψυχρὸν δʼ ἀχραὲς κράνα † ὑποϊάχει. -W. H. D. Bouse, An Echo of Greek Song, p. 62. - -
-
- - -nicias - - -ἵζευ ὑπʼ αἰγείροισιν, ἐπεὶ κάμες, ἐνθάδʼ, ὁδῖτα, -καὶ πῖθʼ ἆσσον ἰὼν πίδακος ἁμετέρας· -μνᾶσαι δὲ κράναν καὶ ἀπόπροθι, ᾇ ˘ ἔπι Γίλλῳ -Σῖμος ἀποφθιμένῳ παιδὶ παριδρύεται. -
-
- - -Leonidas - - -ὦ τάνδε στείχοντες ἀταρπιτόν, αἴτε ποτʼ ἀγροὺς -δαμόθεν, αἴτʼ ἀπʼ ἀγρῶν νεῖσθε ποτʼ ἀκρόπολιν, -ἄμμες ὅρων φύλακες, δισσοὶ θεοί, ὧν ὁ μέν, Ἑρμᾶς, -οἷον ὁρῇς μʼ, οὗτος δʼ ἅτερος, Ἡρακλέης· -ἄμφω μὲν θνατοῖς εὐάκοοι, ἀλλὰ ποθʼ αὑτούς — -αἰ ξύνᾷ παραθῇς ἀχράδας, ἐγκέκαφεν -ναὶ μὰν ὡσαύτως τοὺς βότρυας, αἴτε πέλονται -ὥριμοι, αἴτε χύδαν ὄμφακες, εὐτρέπικεν. -μισέω τὰν μετοχάν, οὐδʼ ἥδομαι· ἀλλʼ ὁ φέρων τι, -ἀμφίς, μὴ κοινᾷ, τοῖς δυσὶ παρτιθέτω, -καὶ λεγέτω· τὶν τοῦθʼ, Ἡράκλεες· ἄλλοτε, “ τοῦτο -Ἑρμᾷ·” καὶ λύοι τὰν ἔριν ἀμφοτέρων. -
-
- - -Anonymi epigrammatici - - - - χαίρω τὸν λακόρυζον ὁρῶν θεὸν εἰς τὸ φάλανθον -βρέγμʼ ὑπὸ τᾶν ὀχνᾶν, αἰπόλε, τυπτόμενον. - - αἰπόλε, τοῦτον ἐγὼ τρὶς ἐπύγισα· τοὶ δὲ τραγίσκοι -εἰς ἐμὲ δερκόμενοι τὰς χιμάρας ἐβάτευν. - - - ὄντως σ’, Ἑρμαφρόδιτε, πεπύγικεν; οὐ μὰ τὸν Ἑρμᾶν, -αἰπόλε. ναὶ τὸν Πᾶνʼ, αἰπόλε, κἀπιγελῶν. -
-
- - -Leonidas - - -Εὐμάραθον πρηῶνα καὶ εὐσκάνδικα λελογχώς, -Ἑρμῆ, καὶ ταύταν, ἆ φίλος, αἰγίβοσιν, -καὶ λαχανηλόγῳ ἔσσο καὶ αἰγινομῆι προσηνής· -ἕξεις καὶ λαχάνων καὶ γλάγεος μερίδα. -
-
- - -Philoxenus - - -Τληπόλεμός ὁ Μυρεὺς Ἑρμᾶν ἀφετήριον ἕρμα -[ἱροδρόμοις θῆκεν παῖς ὁ Πολυκρίτεω, -δὶς δέκʼ ἀπὸ σταδίων ἐναγώνιον ἀλλὰ πονεῖτε, -μαλθακὸν ἐκ γονάτων ὄκνον ἀπωσάμενοι. -
-
- - -Leonidas - - -εἶπέ ποκʼ Εὐρώτας ποτὶ τὰν Κύπριν “ἢ λάβε τεύχη, -ἢ ʼξιθι τᾶς Σπάρτας· ἁ πόλις ὁπλομανεῖ.” -ἁ δʼ ἁπαλὸν γελάσασα, καὶ ἔσσομαι αἰὲν ἀτευχής, - -εἶπε, καὶ οἰκήσω τὰν Λακεδαιμονίαν. - -χἀμῖν Κύπρις ἄνοπλος· ἀναιδέες οἵδε λέγουσιν -ἵστορες, ὡς ἁμῖν χἀ θεὸς ὁπλοφορεῖ. -
-
- - -Antimachus - - -τίπτε, μόθων ἄτλητος, Ἐνυαλίοιο λέλογχας, -Κύπρι; τίς ὁ ψεύστας στυγνὰ καθᾶψε μάτην - -ἔντεα; σοὶ γὰρ Ἔρωτες ἐφίμεροι, ἅ τε κατʼ εὐνὰν -τέρψις, καὶ κροτάλων θηλυμανεῖς ὄτοβοι. -δούρατα δʼ αἱματόεντα κάθες· Τριτωνίδι δίᾳ -ταῦτα· σὺ δʼ εὐχαίταν εἰς Ὑμέναιον ἴθι. -
-
- - -Leonidas - - -οὐκ ἐμὰ ταῦτα λάφυρα τίς ὁ θριγκοῖσιν ἀνάψας -Ἄρηος ταύταν τὰν ἄχαριν χάριτα; -ἄθλαστοι μὲν κῶνοι, ἀναίμακτοι δὲ γανῶσαι -ἀσπίδες, ἄκλαστοι δʼ αἱ κλαδαραὶ κάμακες. -αἰδοῖ πάντα πρόσωπʼ ἐρυθαίνομαι, ἐκ δὲ μετώπου -ἱδρὼς πιδύων στῆθος ἐπισταλάει. -παστάδα τις τοιοῖσδε καὶ ἀνδρειῶνα καὶ αὐλὰν -κοσμείτω καὶ τὸν νυμφίδιον θάλαμον -Ἄρευς δʼ αἱματόεντα διωξίπποιο λάφυρα -νηὸν κοσμοίη τοῖς γὰρ ἀρεσκόμεθα,. -
-
- - -Antipater - - -τίς θέτο μαρμαίροντα βοάγρια; τίς δʼ ἀφόρυκτα -δούρατα, καὶ ταύτας ἀρραγέας κόρυθας, -ἀγκρεμάσας Ἄρηι μιάστορι κόσμον ἄκοσμον; -οὐκ ἀπʼ ἐμῶν ῥίψει ταῦτά τις ὅπλα δόμων; -ἀπτολέμων τάδʼ ἔοικεν ἐν οἰνοπλῆξι τεράμνοις -πλάθειν, οὐ θριγκῶν ἐντὸς Ἐνυαλίου. -σκῦλά μοι ἀμφίδρυπτα, καὶ ὀλλυμένων ἅδε λύθρος -ἀνδρῶν, εἴπερ ἔφυν ὁ βροτολοιγὸς Ἄρης. -
-
- - -Mnasalces - - -ἁ σῦριγξ, τί μοι ὧδε παρʼ Ἀφρογένειαν ὄρουσας; -τίπτʼ ἀπὸ ποιμενίου χείλεος ὧδε πάρει; -οὔ τοι πρῶνες ἔθʼ ὧδʼ οὔτʼ ἄγκεα, πάντα δʼ ἔρωτες -καὶ Πόθος· ἁ δʼ ἀγρία Μοῦσ’ ἐν ὄρει νέμεται. - -
-
- - -Anonymi epigrammatici - - -πρὶν μὲν ἁλικλύστου πέτρας ἐνὶ βένθεσιν ἥμαν -εὐαλδὲς πόντου φῦκος ἐπεννυμένα· -νῦν δέ μοι ἱμερόεις κόλπων ἔντοσθεν ἰαύει -λάτρις ἐϋστεφάνου Κύπριδος ἁβρὸς Ἔρως. -
-
- - -Leonidas - - -πέτρης ἐκ δισσῆς ψυχρὸν κατεπάλμενον ὕδωρ, -χαίροις, καὶ Νυμφέων ποιμενικὰ ξόανα, -πίστραι ˘ τε κρηνέων, καὶ ἐν ὕδασι κόσμια ταῦτα -ὑμέων, ὦ κοῦραι, μυρία τεγγόμενα, -χαίρετʼ· Ἀριστοκλεης δʼ ὅδʼ ὁδοιπόρος, ᾧπερ ἀπῶσα -δίψαν βαψάμενος τοῦτο δίδωμι γέρας. -
-
- - -hermocreon - - -νύμφαι ἐφυδριάδες, ταῖς Ἑρμοκρέων τάδε δῶρα -εἵσατο, καλλινάου πίδακος ἀντιτυχών, -χαίρετε, καὶ στείβοιτʼ ἐρατοῖς ποσὶν ὑδατόεντα -τόνδε δόμον, καθαροῦ πιμπλάμεναι πόματος. -
-
- - -Anonymi epigrammatici - - -νύμφαι Νηιάδες, καλλίρροον αἳ τόδε νᾶμα -χεῖτε κατʼ οὐρείου πρωνὸς ἀπειρέσιον, -ὔμμιν ταῦτα πόρεν Δαμόστρατος Ἀντίλα υἱὸς -ξέσματα, καὶ δοιῶν ῥινὰ κάπρων λάσια. - -
-
- - -Leonidas - - -νύμφαι ἐφυδριάδες, Δώρου γένος, ἀρδεύοιτε -τοῦτον Τιμοκλέους κᾶπον ἐπεσσύμεναι· -καὶ γὰρ Τιμοκλέης ὔμμιν, κόραι, αἰὲν ὁ καπεὺς -κάπων ἐκ τούτων ὥρια δωροφορεῖ. -
-
- - -nicarchus i - - - - κράνας εὐύδρου παρὰ νάμασι καὶ παρὰ Νύμφαις, -ἔστασέν με Σίμων, Πᾶνα τὸν αἰγιπόδην. - - τεῦ δὲ χάριν; λέξω τοι· ὅσον ποθέεις ἀπὸ κράνας -καὶ πίε, καὶ κοίλαν κάλπιν ἑλὼν ἄρυσαι· -ποσσὶ δὲ μὴ ποτὶ νίπτρα φέρειν κρυστάλλινα Νυμφᾶν -δῶρα, τὸν ὑβριστὰν εἰς ἐμὲ δερκόμενος. - - ὦ σέμνʼ — - οὐ λέξεις ἕτερον λόγον, ἀλλὰ παρέξεις -πυγίξαι· τούτοις χρῶμαι ὁ Πὰν νομίμοις. -ἢν δὲ ποιῇς ἐπίτηδες, ἔχων πάθος, ἔστι καὶ ἄλλα -τέχνα· τῷ ῥοπάλῳ τὰν κεφαλὰν λέπομες. -
-
- - -Meleager - - -αἱ Νύμφαι τὸν Βάκχον, ὅτʼ ἐκ πυρὸς ἥλαθʼ ὁ κοῦρος, -νίψαν ὑπὲρ τέφρης ἄρτι κυλιόμενον. -τοὔνεκα σὺν Νύμφαις Βρόμιος φίλος· ἢν δέ νιν εἴργῃς -μίσγεσθαι, δέξῃ πῦρ ἔτι καιόμενον. - -
-
- - -nossis - - -Ἐλθοῖσαι ποτὶ ναὸν ἰδώμεθα τᾶς Ἀφροδίτας -τὸ βρέτας, ὡς χρυσῷ διαδαλόεν τελέθει. -εἵσατό μιν Πολυαρχίς, ἐπαυρομένα μάλα πολλὰν -κτῆσιν ἀπʼ οἰκείου σώματος ἀγλαΐας. -
-
- - -Mnasalces - - -στῶμεν ἁλιρράντοιο παρὰ χθαμαλὰν χθόνα † πόντου, -δερκόμενοι τέμενος Κύπριδος Εἰναλίας, -κράναν τʼ αἰγείροιο κατάσκιον, ἇς ἄπο νᾶμα -ξουθαὶ ἀφύσσονται χ;χείλεσιν ἀλκυόνες. -
-
- - -Perses - - -κἀμὲ τὸν ἐν σμικροῖς ὀλίγον θεὸν ἢν ἐπιβώσῃς -εὐκαίρως, τεύξῃ μὴ μεγάλων δὲ γλίχου. -ὡς ὅ τι δημοτέρων δύναται θεὸς ἀνδρὶ πενέστῃ -δωρεῖσθαι, τούτων κύριός εἰμι Τύχων -
-
- - -Leonidas - - -Ὑλοφόρου τὠγάλμαθʼ, ὁδοιπόρε, Μικκαλίωνος· -Ἑρμῆς, ἀλλʼ ἴδε τὸν κρήγυον ὑλοφόρον, -ὡς ἐξ οἰζυρῆς ἠπίστατο δωροδοκῆσαι -ἐργασίης· αἰὲν δʼ ὦ ʼγαθὸς ἐστʼ ἀγαθός. -
-
- - -Callimachus - - -ἥρως Αἰετίωνος ἐπίσταθμος Ἀμφιπολίτεω -ἵδρυμαι μικρῷ μικρὸς ἐπὶ προθύρῳ, - -λοξὸν ὄφιν καὶ μοῦνον ἔχων ξίφος· ἀνδρὶ † ιπείωι -θυμωθεὶς πεζὸν κἀμὲ παρῳκίσατο. -
-
- - -Leonidas - - -Εὐάγρει, λαγόθηρα, καὶ εἰ πετεεινὰ διώκων -ἰξευτὴς ἥκεις τοῦθʼ ὑπὸ δισσὸν ὄρος, -κἀμὲ τὸν ὑληωρὸν ἀπὸ κρημνοῖο βόασον -Πᾶνα· συναγρεύω καὶ κυσὶ καὶ καλάμοις. -
-
- - -theocritus - - -εὕδεις φυλλοστρῶτι πέδῳ, Δάφνι, σῶμα κεκμακὸς -ἀμπαύων στάλικες δʼ ἀρτιπαγεῖς ἀνʼ ὄρη. -ἀγρεύει δέ τυ Πάν, καὶ ὁ τὸν κροκόεντα Πρίηπος -κισσὸν ἐφʼ ἱμερτῷ κρατὶ καθαπτόμενος, -ἄντρον ἔσω στείχοντες ὁμόρροθοι. ἀλλὰ τὺ φεῦγε, -φεῦγε, μεθεὶς ὕπνου κῶμα καταρχόμενον. -
-
- - -Archias - - -ἔν ποτε παμφαίνοντι μέλαν πτερὸν αἰθέρι νωμῶν -σκορπίον ἐκ γαίης εἶδε θορόντα κόραξ, -ὃν μάρψων ὤρουσεν ὁ δʼ ἀίξαντος ἐπʼ οὖδας -οὐ βραδὺς εὐκέντρῳ πέζαν ἔτυψε βέλει, -καὶ ζωῆς μιν ἄμερσεν. ἴδʼ ὡς ὃν ἔτευχεν ἐπʼ ἄλλῳ, -ἐκ κείνου τλήμων αὐτὸς ἔδεκτο μόρον. -
-
- - -Dioscorides - - -αὐλοὶ τοῦ Φρυγὸς ἔργον Ὑάγνιδος, ἡνίκα Μήτηρ -ἱερὰ τἀν Κυβέλοις πρῶτʼ ἀνέδειξε θεῶν, -καὶ πρὸς ἐμὸν φώνημα καλὴν ἀνελύσατο χαίταν -ἔκφρων Ἰδαίης ἀμφίπολος θαλάμης· - -εἰ δὲ Κελαινίτης ποιμὴν πάρος † ουπερ ἀείσας -ἐγνώσθη, Φοίβου κεινὸν ἔδειρεν ˘ ἔρις. -
-
- - -Glaucus - - - - νύμφαι, πευθομένῳ φράσατʼ ἀτρεκές, εἰ παροδεύων -Δάφνις τὰς λευκὰς ὧδʼ ἀνέπαυσ’ ἐρίφους. - - ναὶ ναί, Πὰν συρικτά, καὶ εἰς αἴγειρον ἐκείναν -σοί τι κατὰ φλοιοῦ γράμμʼ ἐκόλαψε λέγειν -Πάν, Πάν, πρὸς Μαλέαν, πρὸς ὄρος Ψωφίδιον ἔρχευ· -ἱξοῦμαι. νύμφαι, χαίρετʼ· ἐγὼ δʼ ὑπάγω. -
-
- - -Parmenion - - -φημὶ πολυστιχίην ἐπιγράμματος οὐ κατὰ Μούσας -εἶναι. μὴ ζητεῖτʼ ἐν σταδίῳ δόλιχον· -πόλλʼ ἀνακυκλοῦται δολιχὸς δρόμος· ἐν σταδίῳ δὲ -ὀξὺς ἐλαυνόμενος πνεύματός ἐστι τόνος. -
-
- - -Archias - - -αὐταῖς σὺν κίχλαισιν ὑπὲρ φραγμοῖο διωχθεὶς -κόσσυφος ἠερίης κόλπον ἔδυ νεφέλης. -καὶ τὰς μὲν συνοχηδὸν ἀνέκδρομος ὤχμασε θώμιγξ, -τὸν δὲ μόνον πλεκτῶν αὖθι μεθῆκε λίνων. -ἱρὸν ἀοιδοπόλων ἔτυμον γένος. ἦ ἄρα πολλὴν -καὶ κωφαὶ πτανῶν φροντίδʼ ἔχουσι πάγαι. - -
-
- - -Julius Leonidas - - -ἦν ὁπότε γραμμαῖσιν ἐμὴν φρένα μοῦνον ἔτερπον, -οὐδʼ ὄναρ εὐγενέταις γνώριμος Ἰταλίδαις· -ἀλλὰ τανῦν πάντεσσιν ἐράσμιος· ὀψὲ γὰρ ἔγνων -ὁππόσον Οὐρανίην Καλλιόπη προφέρει. -
-
- - -Julius Leonidas - - -οὐδὲ τοσόνδʼ Ἀθάμας ἐπεμήνατο παιδὶ Λεάρχῳ, -ὅσσον ὁ Μηδείης θυμὸς ἐτεκνοφόνα, -ζῆλος ἐπεὶ μανίης μεῖζον κακὸν εἰ δὲ φονεύῃ -μήτηρ, ἐν τίνι νῦν πίστις ἔτʼ ἐστὶ τέκνων; -
-
- - -Julius Leonidas - - -αἶαν ὅλην νήσους τε διιπταμένη σὺ χελιδών, -Μηδείης γραπτῇ πυκτίδι νοσσοτροφεῖς· -ἔλπῃ δʼ ὀρταλίχων πίστιν σέο τήνδε φυλάξειν -Κολχίδα, μηδʼ ἰδίων φεισαμένην τεκέων; -
-
- - -Julius Leonidas - - -οὐ μόνον εὐάροτον βόες οἴδαμεν αὔλακα τέμνειν, -ἀλλʼ ἴδε κἠκ πόντου νῆας ἐφελκόμεθα· -ἔργα γὰρ εἰρεσίης δεδιδάγμεθα· καὶ σύ, θάλασσα, -δελφῖνας γαίῃ ζεῦξον ἀροτροφορεῖν. -
-
- - -Julius Leonidas - - -ὁ σταφυλοκλοπίδας Ἑκατώνυμος εἰς Ἀίδαο -ἔδραμε, μαστιχθεὶς κλήματι φωριδίῳ. - -
-
- - -Julius Leonidas - - -ὕδατά σοι Κοτίλεια γενέθλιον ἦμαρ ὁρῶντι, -Καῖσαρ, ἐπιβλύζοι σωρὸν ἀκεσφορίης, -ὄφρα σε κόσμος ἅπας πάππον αὐγάζηται, -ὡς πατέρα τρισσῆς εἴσιδεν εὐτοκίης. -
-
- - -Julius Leonidas - - -Ἤτριά μοι βύβλων χιονώδεα σὺν καλάμοισιν -πέμπεις, Νειλορύτου δῶρον ἀπὸ προβολῆς. -μουσοπόλῳ δʼ ἀτελῆ, Διονύσιε, μηκέτι πέμπε -ὄργανα· τίς τούτων χρῆσις ἄτερ μέλανος; -
-
- - -Julius Leonidas - - -Λυσίππης ὁ νεογνὸς ἀπὸ κρημνοῦ πάις ἕρπων -Ἀστυανακτείης ἤρχετο δυσμορίης· -ἡ δὲ μεθωδήγησεν ἀπὸ στέρνων προφέρουσα -μαζόν, τὸν λιμοῦ ῥύτορα καὶ θανάτου. -
-
- - -Julius Leonidas - - -Νεῖλος ἑορτάζει παρὰ Θύμβριδος ἱερὸν ὕδωρ, -εὐξάμενος θύσειν Καίσαρι σῳζομένῳ· -οἱ δʼ ἑκατὸν βουπλῆγες ἑκούσιον αὐχένα ταύρων -ᾕμαξαν βωμοῖς Οὐρανίοιο Διός. -
-
- - -Julius Leonidas - - -καὶ λόγον ἱστορίῃ κοσμούμενον ἠκρίβωσας -καὶ βίον ἐν φιλίῃ, Πάππε, βεβαιότατον. - -τοῦτο δʼ ἑορτάζοντι γενέθλιον ἠριγένειαν -δῶρον ὁ Νειλαιεὺς πέμπει ἀοιδοπόλος. -
-
- - -Julius Leonidas - - -ὅν πόλεμος δεδιὼς οὐκ ὤλεσε, νῦν ὑπὸ νούσου -θλίβομαι, ἐν δʼ ἰδίῳ τήκομʼ ὅλος πολέμῳ. -ἀλλὰ διὰ στέρνων ἴθι φάσγανον ὡς γὰρ ἀριστεὺς -θνῄξομʼ ἀπωσάμενος καὶ νόσον ὡς πόλεμον. -
-
- - -Julius Leonidas - - -οὐράνιον μίμημα γενεθλιακαῖσιν ἐν ὥραις -τοῦτʼ ἀπὸ Νειλογενοῦς δέξο Λεωνίδεω, -Ποππαία, Διὸς εὖνι, Σεβαστιάς· εὔαδε γάρ σοι -δῶρα τὰ καὶ λέκτρων ἄξια καὶ σοφίης. -
-
- - -Julius Leonidas - - -Οἴγνυμεν ἐξ ἑτέρης πόμα πίδακος, ὥστʼ ἀρύσασθαι -ξεῖνον μουσοπόλου γράμμα Λεωνίδεω· -δίστιχα γὰρ ψήφοισιν ἰσάζεται. ἀλλὰ σύ, Μῶμε, -ἔξιθι, κεἰς ἑτέρους ὀξὺν ὀδόντα βάλε. -
-
- - -Anonymi epigrammatici - - -τέσσαρὲς εἰσιν ἀγῶνες ἀνʼ Ἑλλάδα, τέσσαρες ἱροί, -οἱ δύο μὲν θνητῶν, οἱ δύο δʼ ἀθανάτων -Ζηνός, Λητοΐδαο, Παλαίμονος, Ἀρχεμόροιο. -ἆθλα δὲ τῶν, κότινος, μῆλα, σέλινα, πίτυς. - -
-
- - -Anonymi epigrammatici - - -εἴ με Πλάτων οὐ γράψε, δύω ἐγένοντο Πλάτωνες. -Σωκρατικῶν ὀάρων ἄνθεα πάντα φέρω· -ἀλλὰ νόθον μʼ ἐτέλεσσε Παναίτιος. ὃς ῥʼ ἐτέλεσσε -καὶ ψυχὴν θνητήν, κἀμὲ νόθον τελέσει. -
-
- - -Posidippus - - -ποίην τις βιότοιο τάμῃ τρίβον; εἰν ἀγορῇ μὲν -νείκεα καὶ χαλεπαὶ πρήξιες· ἐν δὲ δόμοις -φροντίδες· ἐν δʼ ἀγροῖς καμάτων ἅλις· ἐν δὲ θαλάσσῃ -τάρβος· ἐπὶ ξείνης δʼ, ἢν μὲν ἔχῃς τι, δέος· -ἢν δʼ ἀπορῇς, ἀνιηρόν. ἔχεις γάμον; οὐκ ἀμέριμνος -ἔσσεαι· οὐ γαμέεις; ζῇς ἔτʼ ἐρημότερος· -τέκνα πόνοι, πήρωσις ἄπαις βίος· αἱ νεότητες -ἄφρονες, αἱ πολιαὶ δʼ ἔμπαλιν ἀδρανέες. -ἦν ἄρα τοῖν δισσοῖν ἑνὸς αἵρεσις, ἢ τὸ γενέσθαι -μηδέποτʼ, ἢ τὸ θανεῖν αὐτίκα τικτόμενον. -
-
- - -Metrodorus - - -παντοίην βιότοιο τάμοις τρίβον εἰν ἀγορῇ μὲν -κύδεα καὶ πινυταὶ πρήξιες· ἐν δὲ δόμοις -ἄμπαυμʼ ἐν δʼ ἀγροῖς φύσιος χάρις· ἐν δὲ θαλάσσῃ -κέρδος. ἐπὶ ξείνης, ἢν μὲν ἔχῃς τι, κλέος· -ἢν δʼ ἀπορῇς, μόνος οἶδας. ἔχεις γάμον; οἶκος ἄριστος -ἔσσεται· οὐ γαμέεις; ζῇς ἔτʼ ἐλαφρότερος. - -τέκνα πόθος, ἄφροντις ἄπαις βίος· αἱ νεότητες -ῥωμαλέαι, πολιαὶ δʼ ἔμπαλιν εὐσεβέες. -οὐκ ἄρα τῶν δισσῶν ἑνὸς αἵρεσις, ἢ τὸ γενέσθαι -μηδέποτʼ, ἢ τὸ θανεῖν πάντα γὰρ ἐσθλὰ βίῳ. -
-
- - -Leo philosophus - - -μῆτερ ἐμὴ δύσμητερ, ἀπηνέα θυμὸν ἔχουσα, -λίην ἄχθομαι ἕλκος, ὅ με βροτὸς οὔτασεν ἀνήρ -νύκτα διʼ ὀρφναίην, ὅτε θʼ εὕδουσι βροτοὶ ἄλλοι, -γυμνὸς ἄτερ κόρυθός τε καὶ ἀσπίδος, οὐδʼ ἔχεν ἔγχος. -πᾶν δʼ ὑπεθερμάνθη ξίφος αἵματι· αὐτὰρ ἔπειτα -οὐρόν τε προέηκεν ἀπήμονά τε λιαρόν τε. -
-
- - -Anonymi epigrammatici - - -ἱμερόεις Ἀλφειέ, Διὸς στεφανηφόρον ὕδωρ, -ὃς διὰ Πισαίων πεδίων κεκονιμένος ἕρπεις, -ἡσύχιος τὸ πρῶτον, ἐπὴν δʼ ἐς πόντον ἵκηαι, -ὀξὺς ἀμετρήτοιο πεσὼν ὑπὸ κῦμα θαλάσσης, -νυμφίος αὐτοκέλευθος ἑῶν ὀχετηγὸς ἐρώτων, -ἐς Σικελὴν Ἀρέθουσαν ἐπείγεαι ὑγρὸς ἀκοίτης, -ἡ δέ σε κεκμηῶτα καὶ ἀσθμαίνοντα λαβοῦσα, -φῦκος ἀποσμήξασα καὶ ἄνθεα πικρὰ θαλάσσης, -χείλεα μὲν στομάτεσσι συνήρμοσεν· οἷα δὲ νύμφη -νυμφίον ἀμφιχυθεῖσα περίπλοκον ἡδέι δεσμῷ -κείμενον ἐν κόλποισιν Ὀλύμπιον εὔνασεν ὕδωρ -καὶ φονίᾐ ῥαθάμιγγι λιβὰς κατεκίρνατο πηγή. -οὐδὲ Συρακοσίης ἔτι σοι μέλεν ἵμερος εὐνῆς· - -πορφυρέᾐ δʼ ἀνέκοπτες ὕδωρ πεπιεσμένον αἰδοῖ, -φειδόμενος καὶ πόντον ὁμοῦ καὶ λέκτρα μιῆναι. -πολλάκι δʼ εὐναίων ὀάρων βεβιημένος ὁρμῇ, -αὐτὴν ἐς φιλότητα χυτῆς ἀλόχοιο περήσας, -ἑστήκεις ἄχραντον ὁρῶν Ἀρεθούσιον ὕδωρ· -ἡ δέ σε παπταίνουσα Πελωριάδος κατὰ πέτρης -δάκρυσι κυμαίνοντα, κατοικτείρουσα καὶ αὐτὴ -εὐειδὴς Ἀρέθουσα φίλους ἀνεκόπτετο μαζούς, -καὶ δρόσος οἷα ῥόδοισιν ἐτήκετο· μυρομένῳ δὲ -Πισαίῳ ποταμῷ Σικελὴ προσεμύρετο πηγή. -οὐδὲ Δίκην ἔλαθεν πανδερκέα φοίνιος ἀνὴρ -Ἑλλάδος ἀμώων ἄγαμον στάχυν, ᾧ ἔπι πολλαὶ -ἡρώων ἄλοχοι, μινυώρια τέκνα τεκοῦσαι -μαψιδίως ὠδῖνας ἀνεκλαύσαντο γυναῖκες. -
-
- - -Meleager - - -χείματος ἠνεμόεντος ἀπʼ αἰθέρος οἰχομένοιο, -πορφυρέη μείδησε φερανθέος εἴαρος ὥρη. -γαῖα δὲ κυανέη χλοερὴν ἐστέψατο ποίην, -καὶ φυτὰ θηλήσαντα νέοις ἐκόμησε πετήλοις. -οἱ δʼ ἁπαλὴν πίνοντες ἀεξιφύτου δρόσον Ἠοῦς -λειμῶνες γελόωσιν, ἀνοιγομένοιο ῥόδοιο. -χαίρει καὶ σύριγγι νομεὺς ἐν ὄρεσσι λιγαίνων, -καὶ πολιοῖς ἐρίφοις ἐπιτέρπεται αἰπόλος αἰγῶν. -ἤδη δὲ πλώουσιν ἐπʼ εὐρέα κύματα ναῦται -πνοιῇ ἀπημάντῳ Ζεφύρου λίνα κολπώσαντος. -ἤδη δʼ εὐάζουσι φερεσταφύλῳ Διονύσῳ, -ἄνθεϊ βοτρυόεντος ἐρεψάμενοι τρίχα κισσοῦ, -ἔργα δὲ τεχνήεντα βοηγενέεσσι μελίσσαις -καλὰ μέλει, καὶ σίμβλῳ ἐφήμεναι ἐργάζονται -λευκὰ πολυτρήτοιο νεόρρυτα κάλλεα κηροῦ - -πάντῃ δʼ ὀρνίθων γενεὴ λιγύφωνον ἀείδει, -ἀλκυόνες περὶ κῦμα, χελιδόνες ἀμφὶ μέλαθρα, -κύκνος ἐπʼ ὄχθαισιν ποταμοῦ, καὶ ὑπʼ ἄλσος ἀηδών. -εἰ δὲ φυτῶν χαίρουσι κόμαι, καὶ γαῖα τέθηλεν, -συρίζει δὲ νομεὺς, καὶ τέρπεται εὔκομα μῆλα, -καὶ ναῦται πλώουσι, Διώνυσος δὲ χορεύει, -καὶ μέλπει πετεεινά, καὶ ὠδίνουσι μέλισσαι, -πῶς οὐ χ;χρὴ καὶ ἀοιδὸν ἐν εἴαρι καλὸν ἀεῖσαι; -
-
- - -nestor - - -Σπείσατέ μοι, Μοῦσαι, λιγυρὴν εὐτερπέα φωνήν, -ἡδὺν ἀπὸ στομάτων Ἑλικωνίδος ὄμβρον ἀοιδῆς. -ὅσσοι γὰρ προχέουσιν ἀοιδοτόκου πόμα πηγῆς, -ὑμετέρων ἐπέων λιγυρῇ τέρπονται ἀοιδῇ. -
-
- - -Flavius Claudius Julianus Imperator - - -ἀλλοίην ὁρόω δονάκων φύσιν. ἦπου ἀπʼ ἄλλης -χαλκείης τάχα μᾶλλον ἀνεβλάστησαν ἀρούρης, -ἄγριοι, οὐδʼ ἀνέμοισιν ὑφʼ ἡμετέροις δονέονται· -ἀλλʼ ἀπὸ ταυρείης προθορὼν σπήλυγγος ἀήτης -νέρθεν ἐϋτρήτων καλάμων ὑπὸ ῥίζαν ὁδεύει· -καί τις ἀνὴρ ἀγέρωχος ἔχων θοὰ δάκτυλα χειρῶν, -ἵσταται ἀμφαφόων κανόνας συμφράδμονας αὐλῶν -οἱ δʼ ἁπαλὸν σκιρτῶντες ἀποθλίβουσιν ἀοιδήν. -
-
- - -Anonymi epigrammatici - - - -ἑπτὰ σοφῶν ἐρέω κατʼ ἔπος πόλιν, οὔνομα, φωνήν. - -μέτρον μὲν Κλεόβουλος ὁ Λίνδιος εἶπεν ἄριστον - - -Χίλων δʼ ἐν κοίλῃ Λακεδαίμονι, γνῶθι σεαυτόν. - -ὃς δὲ Κόρινθον ἔναιε Χόλου κρατέειν Περίανδρος. -Πιττακός, οὐδὲν ἄγαν, ὃς ἔην γένος ἐκ Μυτιλήνης. - -τέρμα δʼ ὁρᾶν βιότοιο, Σόλων ἱεραῖς ἐν Ἀθήναις. - -τοὺς πλέονας κακίους δὲ Βίας ἀπέφηνε Πριηνεύς, - -ἐγγύην φεύγειν δὲ Θαλῆς Μιλήσιος ηὔδα. -
-
- - -Pseudo-lucianus - - -τὸν πατρικὸν πλοῦτον νέος ὢν Θήρων ὁ Μενίππου -αἰσχρῶς εἰς ἀκρατεῖς ἐξέχεεν δαπάνας· -ἀλλά μιν Εὐκτήμων, πατρικὸς φίλος, ὡς ἐνόησεν -ἤδη καρφαλέῃ τειρόμενον πενίῃ, -καί μιν δακρυχέων ἀνελάμβανε, καὶ πόσιν αὐτὸν -θῆκε θυγατρὸς ἑῆς, πόλλʼ ἐπὶ μείλια δούς. -αὐτάρ ἐπεὶ Θήρωνα περὶ φρένας ἤλυθε πλοῦτος, -αὐτίκα ταῖς αὐταῖς ἐτρέφετʼ ἐν δαπάναις, -γαστρὶ χαριζόμενος πᾶσαν χάριν οὐ κατὰ κόσμον, -τῇ θʼ ὑπὸ τὴν μιαρὰν γαστέρα μαργοσύνῃ. -οὕτως μὲν Θήρωνα τὸ δεύτερον ἀμφεκάλυψεν -οὐλομένης πενίης κῦμα παλιρρόθιον. -Εὐκτήμων δʼ ἐδάκρυσε τὸ δεύτερον, οὐκέτι κεῖνον, -ἀλλὰ θυγατρὸς ἑῆς προῖκά τε καὶ θάλαμον. -ἔγνω δʼ ὡς οὐκ ἔστι κακῶς κεχρημένον ἄνδρα -τοῖς ἰδίοις εἶναι πιστὸν ἐν ἀλλοτρίοις. -
-
- - -Flavius Claudius Julianus Imperator - - -τίς πόθεν εἶς Διόνυσε; μὰ γὰρ τὸν ἀληθέα Βάκχον, -οὔ σ’ ἐπιγιγνώσκω· τὸν Διὸς οἶδα μόνον. -κεῖνος νέκταρ ὄδωδε· σὺ δὲ τράγου. ἦ ῥά σε Κελτοὶ -τῇ πενίᾐ βοτρύων τεῦξαν ἀπʼ ἀσταχύων. - -τῷ σε χρὴ καλέειν Δημήτριον, οὐ Διόνυσον, -πυρογενῆ μᾶλλον καὶ Βρόμον, οὐ Βρόμιον· -
-
- - -Cyrillus - - -πάγκαλὸν ἐστʼ ἐπίγραμμα τὸ δίστιχον ἢν δὲ παρέλθῃς -τοὺς τρεῖς, ῥαψῳδεῖς, κοὐκ ἐπίγραμμα λέγεις. -
-
- - -tiberius - - -οὐ κύνες, οὐ στάλικές με κατήνυσαν, οὐχὶ κυνηγοὶ -δορκάδα τὸν δʼ ἀπὸ γῆς εἰν ἁλὶ πλῆσα μόρον. -ἐξ ὕλης πόντῳ γὰρ ἐνέδραμον εἶτά με πλεκταὶ -ἕλξαν ἐπʼ αἰγιαλοὺς δικτυβόλων παγίδες. -ἤλιτον ἡ χέρσοιο μάτην φυγάς· οὐδʼ ἀδίκως με -εἷλε σαγηνευτὴς τἀμὰ λιποῦσαν ὄρη. -οὔποτʼ ἄγρης, ἁλιῆες, ἔτʼ ἄστοχον οἴσετε χεῖρα, -χέρσῳ καὶ πελάγει κοινὰ πλέκοντες ὕφη. -
-
- - -Anonymi epigrammatici - - -δίκτυον ἐκθρώσκοντα πολύπλοκον ἄρτι λαγωὸν -σεῦε κύων θερμοῖς ἴχνεσιν ὠκυπόδην. -τρηχὺν ὁ δʼ ἐκνεύσας ταχινῶς πάγον, ἐς βαθὺ πόντου -ἥλατʼ ἀλυσκάζων κῦμα παρακτίδιον. -εἰνάλιος τὸν δʼ αἶψα κύων βρυχηδὸν ὀδοῦσιν -μάρψε. κυσὶν τλήμων ἦν ἄρʼ·ʼ ὀφειλόμενος. - -
-
- - -Anonymi epigrammatici - - -λεπτὸν ὑφηναμένα ῥαδινοῖς ὑπὸ ποσσὶν ἀράχνα -τέττιγα σκολιαῖς ἔνδετον εἶχε πάγαις. -ἀλλʼ οὐ μὰν λεπταῖσιν ἐπαιάζοντα ποδίστραις -τὸν φιλαοιδὸν ἰδὼν παῖδα παρετρόχασα· -λύσας δʼ ἐκ βροχίδων ἀπεκούφισα, καὶ τόδʼ ἔλεξα· - - σῴζου μουσείῳ φθεγγόμενος κελάδᾠ . -
-
- - -Anonymi epigrammatici - - -τίπτε με τὸν φιλέρημον ἀναιδέϊ ποιμένες ἄγρῃ; -τέττιγα δροσερῶν ἕλκετʼ ἀπʼ ἀκρεμόνων, -τὴν Νυμφῶν παροδῖτιν ἀηδόνα, κἤματι μέσσῳ -οὔρεσι καὶ σκιεραῖς ξουθὰ λαλεῦντα νάπαις; -ἠνίδε καὶ κίχλην καὶ κόσσυφον, ἠνίδε τόσσους -ψᾶρας, ἀρουραίης ἅρπαγας εὐπορίης· -καρπῶν δηλητῆρας ἑλεῖν θέμις· ὄλλυτʼ ἐκείνους· -φύλλων καὶ χλοερῆς τίς φθόνος ἐστὶ δρόσου; -
-
- - -Anonymi epigrammatici - - -ἀέναον Καθαρήν με παρερχομένοισιν ὁδίταις -πηγὴν ἀμβλύζει γειτονέουσα νάπη· -πάντῃ δʼ εὖ πλατάνοισι καὶ ἡμεροθηλέσι δάφναις -ἔστεμμαι, σκιερὴν ψυχομένη κλισίην -τοὔνεκα μή με θέρευς παραμείβεο· δίψαν ἀλαλκὼν -ἄμπαυσον παρʼ ἐμοὶ καὶ κόπον ἡσυχίῃ. -
-
- - -Anonymi epigrammatici - - -τίς ποτʼ ἀκηδέστως οἰνοτρόφον ὄμφακα Βάκχου -ἀνήρ ἀμπελίνου κλήματος ἐξέταμεν, - -χείλεα δὲ στυφθεὶς ἀπό μιν βάλεν, ὡς ἂν ὁδίταις -εἴη νισσομένοις ἡμιδακὲς σκύβαλον; -εἴη οἱ Διόνυσος ἀνάρσιος, οἷα Λυκοῦργος -ὅττι % μιν αὐξομέναν ἔσβεσεν εὐφροσύναν. -τοῦδε γὰρ ἂν τάχα τις διὰ πώματος ἢ πρὸς ἀοιδὰς -ἤλυθεν, ἢ γοεροῦ κάδεος ἔσχε λύσιν. -
-
- - -Anonymi epigrammatici - - -τίπτε με τὴν ἀνέμοισιν ἁλώσιμον, ἠλεὲ τέκτον, -τήνδε πίτυν τεύχεις νῆα θαλασσοπόρον, -οὐδʼ οἰωνὸν ἔδεισας; ὅ τοι Βορέης μʼ ἐδίωξεν -ἐν χθονί· πῶς ἀνέμους φεύξομαι ἐν πελάγει; -
-
- - -Palladas - - -Τάνταλος οὐδὲν ἔτρωγε· τινασσομένων γὰρ ὕπερθεν -καρπὸς ὑπὲρ κεφαλῆς αὐτὸν ἔφευγε φυτῶν, -καὶ διὰ· τοῦτο τροφῆς κεχρημένος ἧττον ἐδίψα· -εἰ δὲ καὶ ἔτρωγεν σῦκα πεπαινόμενα, -καὶ βραβύλους καὶ μῆλα, τί τηλίκον ἀνδράσι νεκροῖς -δίψος ἀπὸ χλωρῶν γίνεται ἀκροδρύων; -ἡμεῖς δʼ ἐσθίομεν κεκλημένοι ἁλμυρὰ πάντα, -χέννια, καὶ τυρούς, χηνὸς ἁλιστὰ λίπη, -ὄρνια καὶ μόσχεια· μίαν δʼ ἐπιπίνομεν αὐτοῖς. -πάσχομεν οὐκοῦν σεῦ, Τάνταλε, πικρότερα. -
-
- - -Palladas - - -ἀνδροφόνῳ σαθρὸν παρὰ τειχίον ὑπνώοντι -νυκτὸς ἐπιστῆναι φασὶ Σάραπιν ὄναρ, -καὶ χρησμῳδῆσαι· “ κατακείμενος οὗτος, ἀνίστω, -καὶ κοιμῶ μεταβάς, ὦ τάλας, ἀλλαχόθι.” - -ὃς δὲ διυπνισθεὶς μετέβη. τὸ δὲ σαθρὸν ἐκεῖνο -τειχίον ἐξαίφνης εὐθὺς ἔκειτο χαμαί. -σῶστρα δʼ ἕωθεν ἔθυε θεοῖς χαίρων ὁ κακοῦργος, -ἥδεσθαι νομίσας τὸν θεὸν ἀνδροφόνοις. -ἀλλʼ ὁ Σάραπις ἔχρησε πάλιν, διὰ νυκτὸς ἐπιστάς· -“ κήδεσθαί με δοκεῖς, ἄθλιε, τῶν ἀδίκων; -εἰ μὴ νῦν σε μεθῆκα θανεῖν, θάνατον μὲν ἄλυπον -νῦν ἔφυγες, σταυρῷ δʼ ἴσθι φυλαττόμενος.” -
-
- - -Palladas - - -φασὶ παροιμιακῶς· κἂν ὗς δάκοι ἄνδρα πονηρὸν - -ἀλλὰτόδʼ οὐχ οὕτω φημὶ προσῆκε λέγειν -ἀλλὰ “ δάκοι κἂν ὗς ἀγαθοὺς καὶ ἀπράγμονας ἄνδρας, -τὸν δὲ κακὸν δεδιὼς δήξεται οὐδὲ δράκων.” -
-
- - -Anonymi epigrammatici - - -εἰ κύκνῳ δύναται κόρυδος παραπλήσιον ᾅδειν -τολμῷεν δʼ ἐρίσαι σκῶπες ἀηδονίσιν, -εἰ κόκκυξ τέττιγος ἐρεῖ λιγυρώτερος εἶναι, -ἶσα ποεῖν καὶ ἐγὼ Παλλαδίῳ δύναμαι. -
-
- - -Anonymi epigrammatici - - - -ἀκτῇ ἐπὶ προὐχούσῃ, ἐπὶ πλατεῖ Ἑλλησπόντῳ, -παρθένος αἰδοίη ὑπερώιον εἰσαναβᾶσα -πύργῳ ἐφειστήκει γοόωσά τε μυρομένη τε· -χρύσεον λύχνον ἔχουσα, φάος περικαλλὲς ἐποίει, -κεῖνον ὀιομένη τὸν κάμμορον, εἴ ποθεν ἔλθοι -νηχόμενος — καὶ λαῖτμα τάχισθʼ ἁλὸς ἐκπεράασκε - -νύκτα διʼ ἀμβροσίην, ὅτε θʼ εὕδουσι βροτοὶ ἄλλοι· -ῥόχθει γὰρ μέγα κῦμα ποτὶ ξερὸν ἠπείροιο. -ὅσσαι γὰρ νύκτες τε καὶ ἡμέραι ἐκγεγάασι, -παρθένος ἠίθεὸς τʼ ὀαρίζετον ἀλλήλοισιν, -εἰς εὐνὴν φοιτῶντε, φίλους λήθοντε τοκῆας, -οἳ Σηστὸν καὶ Ἄβυδον ἔχον καὶ δῖαν Ἀρίσβην. -
-
- - -Anonymi epigrammatici - - - -ὦ φίλοι, ἥρωες Δαναοί, θεράποντες Ἄρηος, -ψεύσομαι, ἢ ἔτυμον ἐρέω; κέλεται δέ με θυμός. -ἀγροῦ ἐπʼ ἐσχατιῆς, ὅθι δένδρεα μακρὰ πεφύκει, -ναίει ἐϋπλόκαμος δεινὴ θεὸς αὐδήεσσα, -ἢ θεός, ἠὲ γυνή· τοὶ δὲ φθέγγοντο καλεῦντες. -εἰ δὲ φθεγξαμένου του ἢ αὐδήσαντος ἀκούσῃ, -αὖτις ἀριζήλως εἰρημένα μυθολογεύει. -ἀλλὰ τίη τοι ταῦτα διεξέρχεσθαι ἕκαστα; -τὴν δʼ οὔτʼ ἀθρῆσαι δύναμʼ ἀντίον, οὔτε νοῆσαι. -ὁπποῖὸν κʼ εἴπῃσθα ἔπος, τοῖὸν κʼ ἐπακούσαις. -
-
- - -Anonymi epigrammatici - - -πρῶτος Θὼθ ἐδάη δρεπάνην ἐπὶ βότρυν ἐγείρειν. -ἰχθυβόλοισι Φαωφὶ φέρει πανδήμιον ἄγρην. -πληιάδων φαίνουσαν Ἀθὺρ τεκμαίρεται ὥρην. -Χοιὰκ σπειρομένων σταχύων δείκνυσι γενέθλην. -Τυβὶ δὲ πορφύρεον βουληφόρον εἷμα τιταίνει. -σημαίνει πλωτῆρσι Μεχεὶρ πλόον ἀμφιπολεύειν. -Ἄρεος ὅπλα φέρειν Φαμενὼθ δείκνυσι μαχηταῖς. -εἰαρινῶν Φαρμουθὶ ῥόδων πρωτάγγελός ἐστι· - -λήια δʼ αὐανθέντα Παχὼν δρεπάνῃσι φυλάσσει· -εὐκάρπου δὲ Παϋνὶ προάγγελός ἐστιν ὀπώρης· -καὶ σταφυλὴν κατέχων εὐάμπελός ἐστιν Ἐπηφί·. -καὶ Μεσορὶ Νείλοιο φέρει φυσίζοον ὕδωρ. -
-
- - -Anonymi epigrammatici - - -ἐξ ἐμέθεν λυκάβαντος ὑπηελίοιο θύρετρα, -Αὐσονίης θʼ ˘ ὕψος δέρκεται Ἠέλιος. -αὐτὰρ ἐγὼ θαμινῇσι γύην νιφάδεσσι διαίνω, -τεύχων εἰαρινῆς ἔγκυον ἀγλαΐης. -ἄρχετʼ Ἄρης ἀπʼ ἐμεῖο, καὶ ἄνθεα καὶ γλάγος ἡδύ· -ἴση δʼ εἰκοστῷ ἤματι νὺξ τελέθει. -ἐντύνοι τημόσδε φυτοσκάφος, ἔρνεα τάμνων, -ῥίζᾐ ἐπʼ ἀγροτέρῃ ἥμερον ἀκρεμόνα. -οἴγεται ἄρτι θάλασσα· ἐφοπλίζοιτε δὲ νῆας· -ὥριον ἀκλύστων ἐκτὸς ἄγειν λιμένων. -μεσσάτιος ῥόδου εἰμὶ καὶ ἀργεννοῖο κρίνοιο, -καὶ ξανθῆς κεράσου βρίθομαι ἀκρεμόσιν. -καρκίνον Ἠέλιος μετανίσσεται· ἀστάχυας δὲ -καρφαλέους κείρει γειοπόνος δρεπάνῃ. -κρίνω ἐγὼ Δηὼ καὶ ἀχυρμιάς· ἐν δὲ Λέοντι -ἀτρεκέα τελέθει χεύματα Νηιάδων. -βρίθω ἐγὼ σταφυλῇ, βρίθω δʼ ἐπὶ πάσῃ ὀπώρῃ·̓· -αὖθις δʼ ἰσοπαλὴς γίνεται ἤματι νύξ. -τίς δὲ κʼ ἐμεῖο πέλοι γλυκερώτερος, ὃς μέθυ χεύω, -ληνῷ ἐπεὶ κατάγω Βάκχον ἀπʼ οἰνοπέδου; -εἴ τοι Ἀθηναίης πέλει ἔρνεα, ὥριον ἤδη -καρπὸν ἀποθλίβειν, μνῆστιν ἔχειν καμάτων. -παύσασθαι νειοῦ κέλομαι· γλαγόωντι γὰρ ἤδη -σπέρματι ῥιγεδανὴ πηγυλὶς ἀντιάσει. - -
-
- - -Stephanus - - - -ἄλφα λιτὰς Χρύσου, λοιμὸν στρατοῦ, ἔχθος ἀνάκτων, -βῆτα δʼ ὄνειρον ἔχει, ἀγορήν, καὶ νῆας ἀριθμεῖ. -γάμμα δʼ ἄρʼ ἀμφʼ Ἑλένης οἴοις μόθος ἐστὶν ἀκοίταις. -Δέλτα θεῶν ἀγορή, ὅρκων χύσις, ἄρεος ἀρχή. -εἶ, βάλλει Κυθέρειαν Ἄρηά τε Τυδέος υἱός· -ζῆτα δʼ ἄρʼ Ἀνδρομάχης καὶ Ἕκτορός ἐστʼ ὀαριστύς. -ἦτα δʼ, Αἴας πολέμιζε μόνῳ μόνος Ἕκτορι δίῳ. -θῆτα, θεῶν ἀγορή, Τρώων κράτος, Ἕκτορος εὖχος. -ἐξεσίη δʼ Ἀχιλῆος ἀπειθέος ἐστὶν Ἰῶτα· -κάππα δʼ ἄρʼ ἀμφοτέρων σκοπιαζέμεν ἢλυθον ἄνδρες. -λάμβδα δʼ, ἀριστῆας Δαναῶν βάλον Ἕκτορος ἄνδρες. -Μῦ Τρώων παλάμῃσι κατήριπε τεῖχος Ἀχαιῶν. -νῦ δέ, Ποσειδάων Δαναοῖς κράτος ὤπασε λάθρῃ. -Ξῖ, Κρονίδην λεχέεσσι σὺν ὕπνῳ τʼ ἤπαφεν Ἥρη. -οὖ, Κρονίδης κεχόλωτο Ποσειδάωνι καὶ Ἥρῃ. -πῖ, Πάτροκλον ἔπεφνεν ἀρήιον Ἕκτορος αἰχμή. -ῥῶ, Δαναοὶ Τρῶές τε νέκυν πέρι χεῖρας ἔμισγον. -σῖγμα, Θέτις Ἀχιλῆι παρʼ Ἡφαίστου φέρεν ὅπλα· -ταῦ δʼ, ἀπέληγε χόλοιο, καὶ ἔκθορε δῖος Ἀχιλλεύς. -ὗ, μακάρων ἔρις ὦρτο, φέρει δʼ ἐπὶ κάρτος Ἀχαιοῖς. -φῖ, κρατερῶς κατὰ χεύματʼ ἐδάμνατο Τρῶας Ἀχιλλεύς. -Χῖ δʼ ἄρα, τρὶς περὶ τεῖχος ἄγων κτάνεν Ἕκτορʼ Ἀχιλλεύς· -Ψῖ, Δαναοῖσιν ἀγῶνα διδοὺς ἐτέλεσσεν Ἀχιλλεύς. -ὦ, Πριάμῳ νέκυν υἷα λαβὼν γέρα δῶκεν Ἀχιλλεύς. - -
-
- - -Anonymi epigrammatici - - -ἁ Κύπρις πρῴαν γυμνὰν σ’ ἐβόασεν ἰδοῦσα· -“ φεῦ, φεῦ, πῶς σταγόνων ἔκτοθεν Οὐρανίων, -ζαλώσας ὠδῖνα Θαλάσσας, ὁ θρασὺς ἄλλαν -Νεῖλος ἀπὸ γλυκερῶν Κύπριν ἀνῆκε βυθῶν;” -
-
- - -hadrianus imperator - - -Ἕκτορ, Ἀρήιον αἷμα, κατὰ χθονὸς εἴ που ἀκούεις, -χαῖρε, καὶ ἄμπνευσον βαιὸν ὑπὲρ πατρίδος. -Ἴλιον οἰκεῖται κλεινὴ πόλις, ἄνδρας ἔχουσα -σοῦ μὲν ἀφαυροτέρους, ἀλλʼ ἔτʼ ἀρηιφίχους· -Μυρμιδόνες δʼ ἀπόλοντο. παρίστασο, καὶ λέγʼ Ἀχιλλεῖ -Θεσσαλίην κεῖσθαι πᾶσαν ὑπʼ Αἰνεάδαις. -
-
-

-See 389. -

-
-
- - -trajanus imperator - - -πρὸς ταῦτα ὑπέγραψε στρατιώτης· φασὶ δὲ Τραϊανοῦ εἶναι. -Θάρσυνοι· οὐ γὰρ ἐμῆς κόρυθος λεύσσουσι μέτωπον. -εἶτα τοὖ Βασιλέως ἐπαινέσαντος, καὶ γράψαντος “δήλωσὸν -μοι τίς εἶ,” ἀντέγραψεν· -εἰμὶ μὲν εὐθώρηκος Ἐνυαλίου πολεμιστής· -εἰμὶ δὲ καὶ θεράπων Ἑλικωνίου Ἀπόλλωνος, -αὐτοῖς ἐν πρώτοισι λελεγμένος ἀσπιδιώταις. -
-
- - -Menecrates - - -παισὶν ἐπὶ προτέροις ἤδη τρίτον ἐν πυρὶ μήτηρ -θεῖσα, καὶ ἀπλήστῳ δαίμονι μεμφομένη, - -τέτρατον ἄλγος ἔτικτε, καὶ οὐκ ἀνέμεινεν ἀδήλους -ἐλπίδας, ἐν δὲ πυρὶ ζωὸν ἔθηκε βρέφος, - -οὐ θρέψω λέξασα· “τί γὰρ πλέον; Ἄϊδι μαστοὶ -κάμνετε· κερδήσω πένθος ἀμοχθότερον.” -
-
- - -Diotimus - - -τὰν ἥβαν ἐς ἄεθλα πάλας ἤσκησε κραταιᾶς -ἅδε Ποσειδῶνος καὶ Διὸς ἁ γενεά. -κεῖται δέ σφιν ἀγὼν οὐ χάλκεος ἀμφὶ λέβητος, -ἀλλʼ ὅστις ζωὰν οἴσεται ἢ θάνατον. -Ἀνταίου τὸ πτῶμα· πρέπει δʼ Ἡρακλέα νικᾶν -τὸν Διός. Ἀργείων ἁ πάλα, οὐ Λιβύων. -
-
- - -Anonymi epigrammatici - - -εἴ τις ἀπάγξασθαι μὲν ὀκνεῖ, θανάτου δʼ ἐπιθυμεῖ, -ἐξ Ἱερᾶς Πόλεως ψυχρὸν ὕδωρ πιέτω. -
-
- - -Palladas - - -οὐδεὶς καὶ καθαρὸς καὶ μείλιχος ἤλυθεν ἄρχων -ἓν γὰρ ἑνὸς δοκέει δόγματος ἀντίπαλον -τὸ γλυκὺ τοῦ κλέπτοντος, ὑπερφιάλου δὲ τὸ ἁγνόν. -ὄργανα τῆς ἀρχῆς ταῦτα δύʼ ἐστὶ πάθη. -
-
- - -Palladas - - -Χρυσέ, πάτερ κολάκων, ὀδύνης καὶ φροντίδος υἱέ, -καὶ τὸ ἔχειν σε, φόβος· καὶ μὴ ἔχειν σ’, ὀδύνη. -
-
- - -Palladas - - - - ὡς οὐδὲν γλύκιον ἧς πατρίδος, εἶπεν Ὀδυσσεύς· -ἐν γὰρ τοῖς Κίρκης ἔκχυτον οὐκ ἔφαγεν, - -οὗ μόνον εἰ καὶ καπνὸν ἀποθρῴσκοντʼ ἐνόησεν, -εἶπεν ἂν οἰμώζειν καὶ δέκα Πηνελόπαις. -
-
- - -Paulus silentiarius - - -ὄρθριος εὐπλέκτοιο λίνου νεφοειδέι κόλπῳ -ἔμπεσε σὺν κίχλῃ κόσσυφος ἡδυβόας. -καὶ τὰν μὲν πανάφυκτος ἕλε βρόχος· ὠκὺ δʼ ἀπέπτα -ἐξ ὀρνιθοπέδας ᾠδὸς ἐρημοφίλας. -ἦ τάχα που τριμάκαιρα φιλαγρέτις ὄρνιν ἀοιδὸν -Ἄρτεμις εὐμόλπῳ λῦσεν ἄνακτι λύρης. -
-
- - -Palladas - - -φεῦγε Λάκων ποτὲ δῆριν ὑπαντιάσασα δὲ μήτηρ -εἶπε, κατὰ στέρνων ἆορ ἀνασχομένη· -“ ζώων μὲν σέο μητρὶ διαμπερὲς αἶσχος ἀνάπτεις, -καὶ κρατερῆς Σπάρτης πάτρια θεσμὰ λύεις· -ἢν δὲ θάνῃς παλάμῃσιν ἐμαῖς, μήτηρ μὲν ἀκούσω -δύσμορος, ἀλλʼ ἐν ἐμῇ πατρίδι σῳζομένη.” -
-
- - -Julianus - - -ὁλκὰς ὕδωρ προφυγοῦσα πολυφλοίσβοιο θαλάσσης -ἐν χθονὸς ἀγκοίναις ὤλετο μητριάσιν. -ἱσταμένην γὰρ πυρσὸς ἐπέφλεγε· καιομένη δὲ -δυσμενέων ὑδάτων συμμαχίην ἐκάλει. -
-
- - -Anonymi epigrammatici - - -ἠέλιον νίκησε τεὸς νόος ἡδὺ φαείνων, -αἰὲν ἀπαστράπτων βροτοφεγγέα πάνσοφον αἴγλην, -ἡδυφαῆ, χαρίεσσαν, ἀπαστράπτουσαν ἀλύπως. - -
-
- - -Palladas - - -ὅταν βλέπω σε, προσκυνῶ, καὶ τοὺς λόγους, -τῆς παρθένου τὸν οἶκον ἀστρῷον βλέπων -εἰς οὐρανὸν γάρ ἐστί σου τὰ πράγματα, -Ὑπατία σεμνή, τῶν λόγων εὐμορφία, -ἄχραντον ἄστρον τῆς σοφῆς παιδεύσεως. -
-
- - -Palladas - - -ἡ φύσις ἐξεῦρεν, φιλίης θεσμοὺς ἀγαπῶσα, -τῶν ἀποδημούντων ὄργανα συντυχίης, -τὸν κάλαμον, χάρτην, τὸ μέλαν, τὰ χαράγματα, χειρός, -σύμβολα τῆς ψυχῆς τηλόθεν ἀχνυμένης. -
-
- - -hadrianus imperator - - -τῷ ναοῖς βρίθοντι πόση σπάνις ἔπλετο τύμβου. -
-
- - -quintus maecius - - -αὐτὸς ἄναξ ἔμβαινε θοῷ πηδήματι, ληνοῦ -λακτιστής, ἔργου δʼ ἡγέο νυκτερίου, -λεύκωσαι πόδα γαῦρον, ἐπίρρωσαι δὲ χορείην -λάτριν, ὑπὲρ κούφων ζωσάμενος γονάτων -εὔγλωσσον δʼ ὀχέτευε κενούς, μάκαρ, ἐς πιθεῶνας -οἶνον ἐπὶ ψαιστοῖς καὶ λασίᾐ χιμάρῳ, -
-
- - -Antiphilus - - -ἆ καλὸν αὐτοπόνητον ἐν αἰθέρι ῥεῦμα μελισσῶν, -κἄπλαστοι χειρῶν αὐτοπαγεῖς θαλάμαι, - -προίκιος ἀνθρώπων βιότῳ χάρις, οὐχὶ μακέλλας, -οὐ βοός, οὐ γαμψῶν δευομένα δρεπάνων, -γαυλοῦ δὲ σμικροῖο, τόθι γλυκὺ νᾶμα μέλισσα -πηγάζει σκήνευς δαψιλὲς ἐξ ὀλίγου. -χαίροιτʼ εὐαγέες, καὶ ἐν ἄνθεσι ποιμαίνεσθε, -αἰθερίου πτηναὶ νέκταρος ἐργάτιδες. -
-
- - -Diodorus - - -Ἀδρήστειά σε δῖα, καὶ ἰχναίη σε φυλάσσοι -παρθένος, ἡ πολλοὺς ψευσαμένη, Νέμεσις. -δείδια σόν τε φυῆς ἐρατὸν τύπον, ἠδὲ σά, κοῦρε, -δήνεα, θεσπεσίης καὶ μένος ἠνορέης, -καὶ σοφίην, καὶ μῆτιν ἐπίφρονα. τοιάδε τέκνα, -Δροῦσε, πέλειν μακάρων πευθόμεθʼ ἀθανάτων. -
-
- - -Antigonus - - -ἀργυρέη κρηνίς με, τὸν οὐκέτι μακρὰ βοῶντα -βάτραχον, οἰνηραῖς ἔσχεν ὑπὸ σταγόσιν -κεῖμαι δʼ ἐν Νύμφαις, κείναις φίλος, οὐδὲ Λυαίῳ -ἐχθρός, ὑπʼ ἀμφοτέρων λουόμενος σταγόσιν. -ὀψὲ ποτʼ εἰς Διόνυσον ἐκώμασα. φεῦ τίνες ὕδωρ -πίνουσιν, μανίην σώφρονα μαινόμενοι. -
-
- - -Antipater - - -Δμώιον Ἱπποκράτευς ἔθανε βρέφος, ἐς πλατὺ πόντου -χεῖλος γειτοσύνης ἑρπύσαν ἐκ καλύβης, - -πλεῖον ἐπεὶ μαζῶν ἔπιεν ποτόν. ἔρρε θάλασσα -ἣ βρέφος ὡς μήτηρ ψεύσαο δεξαμένη. -
-
- - -Apollonides - - -εἴθε με παντοίοισιν ἔτι πλάζεσθαι ἀήταις -ἢ Λητοῖ στῆναι μαῖαν ἀλωομένῃ· -οὐκ ἂν χητοσύνην τόσον ἔστενον. οἱ ἐμὲ δειλήν, -ὅσσαις Ἑλλήνων νηυσὶ παραπλέομαι, -δῆλος ἐρημαίη, τὸ πάλαι σέβας. ὀψέ πη Ἥρη -Λητοῦς, ἀλλʼ οἰκτρὴν τήνδʼ ἐπέθηκε δίκην. -
-
- - -Antiphanes - - -εἴ τινα μὴ τέρπει λωτοῦ † χέλυς,˘ ἢ γλυκὺς ἦχος -ψαλμῶν, ἢ τριγέρων νεκτάρεος Βρόμιος, -ἢ πεῦκαι, κῶμοι,˘ στέφανοι, μύρα, λιτὰ δὲ δειπνῶν -λαθροπόδας τρώκταις χερσὶ τίθησι τόκους, -οὗτος ἐμοὶ τέθνηκε † περὶ μνῆστιν δὲ παρέρπω -νεκρόν, ἐς ἀλλοτρίους φειδόμενον φάρυγας· -
-
- - -tullius sabinus - - -Σμίνθος, ὁ παντοίης δαιτὸς λίχνος, οὐδὲ μυάγρης -δειλός, ὁ κἀκ θανάτου κέρδεα λῃζόμενος, -νευρολάλον Φοίβου χορδὴν θρίσεν ἡ δʼ ἐπὶ πῆχυν -ἑλκομένη θηρὸς λαιμὸν ἀπεβρόχισεν. -τόξων εὐστοχίην θαυμάζομεν ὃς δὲ κατʼ ἐχθρῶν -ἤδη καὶ κιθάρην εὔστοχον ὅπλον ἔχει. - -
-
- - -quintus maecius - - -Ἤλλακτʼ ἐξαπίνης Κορνήλιος, οὐδʼ ἔτι λιτῷ -τέρπεται ἡμετέρῳ μουσοχαρεῖ βιότῳ· -κούφης δʼ αἰωρεῖται ἀπʼ ἐλπίδος· οὐκέτι δʼ ἡμεῖς -οἱ πάρος, ἀλλʼ ἑτέρης ἐλπίδος ἐκκρέμαται. -εἴκωμεν, ψυχή· πεπαλαίσμεθα, μηδὲ βιάζου· -εἰς ἔδαφος τέχνης κείμεθʼ ὑπʼ ἀργυρέης. -
-
- - -Philodemus - - -ἤδη καὶ ῥόδον ἐστί, καὶ ἀκμάζων ἐρέβινθος, -καὶ καυλοὶ κράμβης, Σωσύλε, πρωτοτόμου, -καὶ μαίνη ʽʼσαλαγεῦσα, καὶ ἀρτιπαγὴς ἁλίτυρος, -καὶ θριδάκων οὔλων ἁβροφυῆ πέταλα. -ἡμεῖς δʼ οὔτʼ ἀκτῆς ἐπιβαίνομεν, οὔτʼ ἐν ἀπόψει -γινόμεθʼ, ὡς αἰεί, Σωσύλε, τὸ πρότερον; -καὶ μὴν Ἀντιγένης καὶ Βάκχιος ἐχθὲς ἔπαιζον· -νῦν δʼ αὐτοὺς θάψαι σήμερον ἐκφέρομεν. -
-
- - -Antiphilus - - -ἡ τερεβινθώδης ὀλιγάμπελος οἷά τε βαιὴ -νησίς, ἀλλʼ ὁμαλὴ πᾶσα καὶ ἀστύφελος· -αἱ δʼ ἀγχοῦ, μεγάλαι τε καὶ εὐρέες, ἀλλʼ ἐπὶ πουλὺ -τρηχεῖαι· μεγέθει τοῦτο περισσότεραι. -καρποῖς, οὐ σταδίοισιν ἐρίζομεν οὐδὲ γὰρ αὖλαξ -Αἰγύπτου Λιβύης ψάμμου ἐπιστρέφεται. -
-
- - -tullius geminus - - -ἡ παλίουρος ἐγώ, τρηχὺ ξύλον, οὖρος ἐν ἕρκει· -τίς μʼ ἄφορον λέξει, τὴν φορίμων φύλακα; - -
-
- - -Antiphilus - - -ἤμην καὶ προπάροιθε συνέμπορος ἀνέρι κέρδους, -ἡνίκα δημοτέρην Κύπριν ἐναυτολόγει· -κεῖθεν καὶ συνέπηξεν ἐμὴν τρόπιν, ὄφρα με λεύσσῃ -Κύπρις, τὴν ἀπὸ γῆς εἰν ἁλὶ ῥεμβομένην. -ἔστιν ἑταίρειος μὲν ἐμοὶ στόλος, εἰσὶ δὲ λεπτὰ -κάρπασα, καὶ λεπτὸν φῦκος ὑπὲρ σανίδων. -ναυτίλοι, ἀλλʼ ἄγε πάντες ἐμῆς ἐπιβαίνετε πρύμνης -θαρραλέως· πολλοὺς οἶδα φέρειν ἐρέτας. -
-
- - -Philippus - - -ἡ ναῦς ἀπʼ ἔργων Κύπριδος γομφουμένη, -πρὸς τὸν γενάρχην πόντον ἤλυθον θεοῦ· -ἀνὴρ γὰρ ὥρης μʼ ἔμπορος τεκτήνατο, -καλέσας Ἑταίρην εἰμὶ γὰρ πᾶσιν φίλη. -ἔμβαινε θαρρῶν μισθὸν οὐκ αἰτῶ βαρύν. -ἐλθόντα δέχομαι πάντα· βαστάζω ξένον -ἀστὸν τʼ· ἐπὶ γαίης κἠν βυθῷ μʼ ἐρέσσετε. -
-
- - -Antipater - - -θηρευτὴν Λάμπωνα Μίδου κύνα δίψα κατέκτα, -καίπερ ὑπὲρ ψυχῆς πολλὰ πονησάμενον. -ποσσὶ γὰρ ὤρυσσεν νοτερὸν πέδον, ἀλλὰ τὸ νωθὲς -πίδακος ἐκ τυφλῆς οὐκ ἐτάχυνεν ὕδωρ· -πῖπτε δʼ ἀπαυδήσας· ἡ δʼ ἔβλυσεν. ἦ ἄρα, Νύμφαι, -Λάμπωνι κταμένων μῆνιν ἔθεσθʼ ἐλάφων. - -
-
- - -Antipater - - -ἴσχετε χεῖρα μυλαῖον, ἀλετρίδες· εὕδετε μακρά, -κἢν ὄρθρον προλέγῃ γῆρυς ἀλεκτρυόνων· -Δηὼ γὰρ Νύμφαισι χερῶν ἐπετείλατο μόχθους· -αἱ δὲ κατʼ ἀκροτάτην ἁλλόμεναι τροχιήν, -ἄξονα δινεύουσιν ὁ δʼ ἀκτίνεσσιν ἑλικταῖς -στρωφᾷ Νισυρίων κοῖλα βάρη μυλάκων. -γευόμεθʼ ἀρχαίου βιότου πάλιν, εἰ δίχα μόχθου -δαίνυσθαι Δηοῦς ἔργα διδασκόμεθα. -
-
- - -Crinagoras - - -κἢν μυχὸν Ἑρκυναῖον, ἢ ἐς πύματον Σολόεντα -ἔλθῃ καὶ Λιβυκῶν κράσπεδον Ἑσπερίδων -Καῖσαρ ὁ πουλυσέβαστος, ἅμα κλέος εἶσιν ἐκείνῳ -πάντῃ. Πυρήνης ὕδατα μαρτύρια· -οἷσι γὰρ οὐδὲ πέριξ δρυτόμοι ἀπεφαιδρύναντο, -λουτρὰ καὶ ἠπείρων ἔσσεται ἀμφοτέρων. -
-
- - -Antipater - - -μὴ κλαίων τὸν Ἔρωτα δόκει, Τηλέμβροτε, πείσειν, -μηδʼ ὀλίγῳ παύσειν ὕδατι πῦρ ἀτενές. -χρυσὸς Ἔρωτος ἀεὶ παιώνιος· ἐσβέσθη δὲ -οὐδὲ τότʼ ἐν πολλῷ τικτόμενος πελάγει. -
-
- - -Antipater - - -νῆσοι ἐρημαῖαι, τρύφεα χθονός, ἃς κελαδεινὸς -ζωστὴρ Αἰγαίου κύματος ἐντὸς ἔχει, - -Σίφνον ἐμιμήσασθε καὶ αὐχμηρὴν Φολέγανδρον, -τλήμονες, ἀρχαίην δʼ ὠλέσατʼ ἀγλαΐην. -ἦ ῥʼ ὑμᾶς ἐδίδαξεν ἕνα τρόπον ἥ ποτε λευκὴ -δῆλος, ἐρημαίου δαίμονος ἀρξαμένη. -
-
- - -Apollonides - - - - πρὸς παίδων εἶπεν “γουνάζομαι, ἤν με θανοῦσαν -στείλῃς, μὴ σπεῖσαι δεύτερα φίλτρα γάμου.” -εἶπεν ὁ δʼ εἰς ἑτέρην ἐσπούδασεν. ἀλλὰ Φίλιννα -Διογένην λήθης τίσατο καὶ φθιμένη· -νυκτὶ γὰρ ἐν πρώτῃ θάλαμον σχάσε μῆνις ἄφυκτος, -ὡς μὴ λέκτρον ἰδεῖν δεύτερον ἠέλιον. -
-
- - -Bianor - - -Σάρδιες αἱ τὸ πάλαι Γύγου πόλις, αἳ τʼ Ἀλυάττου -Σάρδιες, αἱ βασιλεῖ Περσὶς ἐν Ἀσιάδι, -αἳ χρυσῷ τὸ παλαιὸν ἐπλινθώσασθε μέλαθρον, -ὄλβον Πακτωλοῦ ῥεύματι δεξάμεναι· -νῦν δὴ ὅλαι δύστηνοι ἐς ἓν κακὸν ἁρπασθεῖσαι, -ἐς βυθὸν ἐξ ἀχανοῦς χάσματος ἠρίπετε, -Βοῦρα καὶ εἰς Ἑλίκην ˘ κεκλυσμέναι· αἱ δʼ ἐνὶ χέρσῳ -Σάρδιες ἐμβυθίαις εἰς ἓν ἔκεισθε τέλος. -
-
- - -Duris - - -ἠέριαι νεφέλαι, πόθεν ὕδατα πικρὰ πιοῦσαι -νυκτὶ σὺν ἀστεμφεῖ πάντα κατεκλύσατε; -οὐ Λιβύης, Ἐφέσου δὲ τὰ μυρία κεῖνα ταλαίνης -αὔλια καὶ μακάρων ἐξ ἐτέων κτέανα, - -ποῦ δὲ σαωτῆρες τότε δαίμονες ἔτραπον ὄμμα; -αἰαῖ τὴν Ἰάδων πολλὸν ἀοιδοτάτην. -κεῖνα δὲ κύμασι πάντα κυλινδομένοισιν ὁμοῖα -εἰς ἅλα σὺν ποταμοῖς ἔδραμε πεπταμένοις. -
-
- - -Joannes Βarbucallus - - -ἅδʼ ἐγὼ ἁ τλάμων ἄπολις πόλις, ἄμμιγα νεκροῖς -ἐνναέταις κεῖμαι, ἆ, παναποτμοτάτα. -Ἥφαιστός μʼ ἐδάμασσε μετὰ κλόνον Ἐννοσιγαίου. -φεῦ, ἀπὸ τοσσατίου κάλλεός εἰμι κόνις. -ἀλλὰ παραστείχοντες ἐμὰν στοναχήσατε μοῖραν -σπείσατε Βηρυτῷ δάκρυ καταφθιμένᾳ. -
-
- - -Joannes Βarbucallus - - -ποῦ τελέθει Κύπρις πολιήοχος, ὄφρα νοήσῃ -ἔνδιον εἰδώλων τὴν πρὶν ἕδος Χαρίτων; -τύμβος ἀταρχύτων μερόπων πόλις, ἧς ὑπὸ τέφρην -αἱ Βερόης πολλαὶ κείμεθα χιλιάδες. -γράψαθʼ ἑνὸς καθύπερθε λίθου, φίλα λείψανα φωτῶν· - - Βηρυτὸς γοερὴ κεῖται ὑπὲρ δαπέδων. - -
-
- - -Joannes Βarbucallus - - -Ναυτίλε, μὴ στήσῃς δρόμον ὁλκάδος εἵνεκʼ ἐμεῖο· -λαίφεα μὴ λύσῃς· χέρσον ὁρᾷς λιμένα. -τύμβος ὅλη γενόμην ἕτερον δʼ ἐς ἀπενθέα χῶρον -δουπήσεις κώπη νηὸς ἐπερχομένης. -τοῦτο Ποσειδάωνι φίλον, ξενίοις τε θεοῖσιν -χαίρεθʼ ἁλιπλανέες, χαίρεθʼ ὁδοιπλανέες. - -
-
- - -Antipater - - -σοί με, Θρηϊκίης σκυληφόρε, Θεσσαλονίκη -μήτηρ ἡ πάσης πέμψε Μακηδονίης. -ἀείδω δʼ ὑπὸ σοὶ δεδμημένον Ἄρεα Βεσσῶν, -ὅσσ’ ἐδάην πολέμου πάντʼ ἀναλεξάμενος. -ἀλλά μοι ὡς θεὸς ἔσσο κατήκοος, εὐχομένου δὲ -κλῦθι. τίς ἐς Μούσας οὔατος ἀσχολίη; -
-
- - -Crinagoras - - -τὸν σκοπὸν Εὐβοίης ἁλικύμονος ᾖσεν Ἀριστὼ -Ναύπλιον ἐκ μολπῆς δʼ ὁ θρασὺς ἐφλεγόμην. -ὁ ψεύστης δʼ ὑπὸ νύκτα Καφηρείης ἀπὸ πέτρης -πυρσὸς ἐμὴν μετέβη δυσμόρον ἐς κραδίην. -
-
- - -Crinagoras - - -τῆς ὄιος γενεὴ μὲν Ἀγαρρική, † ἐντὸς Ἀράξεω -ὕδωρ πιλοφόροις πίνεται Ἀρμενίοις· -χαῖται δʼ, οὐ μήλοις ἅτε που μαλακοὶ ἔπι μαλλοί, -ψεδναὶ δʼ, ἀγροτέρων τρηχύτεραι χιμάρων. -νηδὺς δὲ τριτοκεῖ ἀνὰ πᾶν ἔτος, ἐκ δὲ γάλακτος -θηλὴ ἀεὶ μαστοῦ πλήθεται οὐθατίου· -βληχὴ δʼ ἀσσοτάτω τερένης μυκήματι μόσχου· -ἄλλα γὰρ ἀλλοῖαι πάντα φέρουσι γέαι. -
-
- - -Anonymi epigrammatici - - - -καὶ χρυσὸν φιλέω καὶ δήιον ἄρεα φεύγω. - -
-
- - -theocritus - - -ὦ δείλαιε τὺ Θύρσι, τί τοι πλέον, εἰ καταταξεῖς -δάκρυσι διγλήνως ὦπας ὀδυρόμενος; -οἴχεται ἁ χίμαρος, τὸ καλὸν τέκος, οἴχετʼ ἐς ᾅδαν· -τραχὺς γὰρ χαλαῖς ἀμφεπίαξε λύκος· -αἱ δὲ κύνες κλαγγεῦντι. τί τοι πλέον, ἁνίκα τήνας -ὀστίον οὐδὲ τέφρα λείπετʼ ἀποιχομένας; -
-
- - -theocritus - - -Λῆς, ποτὶ τᾶν Μοισᾶν, διδύμοις αὐλοῖσιν ἀεῖσαι -ἁδὺ τί μοι; κἠγὼ πακτίδʼ ἀειράμενος -ἀρξεῦμαί τι κρέκειν· ὁ δὲ βωκόλος ἐγγύθεν ᾀσεῖ -Δάφνις, κηροδέτῳ πνεύματι μελπόμενος. -ἐγγὺς δὲ στάντες λασιαύχενος ἔνδοθεν ἄντρου -Πᾶνα τὸν αἰγιβάταν ὀρφανίσωμες ὕπνου. -
-
- - -theocritus - - -ἄλλος ὁ Χῖος· ἐγὼ δὲ Θεόκριτος, ὃς τάδʼ ἔγραψα, -εἷς ἀπὸ τῶν πολλῶν εἰμὶ Συρακοσίων, -υἱὸς Πραξαγόραο περικλειτῆς τε Φιλίννης· -μοῦσαν δʼ ὀθνείαν οὔ τινʼ ἐφελκυσάμαν. -
-
- - -theocritus - - -ἀστοῖς καὶ ξείνοισιν ἴσον νέμει ἅδε τράπεζα· -θεὶς ἀνελεῦ, ψήφου πρὸς λόγον ἐρχομένης. -ἄλλος τις πρόφασιν λεγέτω· τὰ δʼ ὀθνεῖα Κάικος -χρήματα, καὶ νυκτὸς βουλομένοις ἀριθμεῖ. - -
-
- - -Anonymi epigrammatici - - - -ἀρχαῖα τὠπόλλωνι τἀναθήματα -ὑπῆρχεν ἡ βάσις δὲ τοῖς μὲν εἴκοσι, -τοῖς δʼ ἑπτά, τοῖς δὲ πέντε, τοῖς δὲ δώδεκα, -τοῖς δὲ διηκοσίοισι νεωτέρη ἥδʼ ἐνιαυτοῖς· -τοσσόσδʼ ἀριθμὸς ˘ ἐξέβη μετρούμενος. . -
-
- - -theocritus - - -τήναν τὰν λαύραν, ὅθι ταὶ δρύες, αἰπόλε, κάμψας, -σύκινον εὑρήσεις ἀρτιγλυφὲς ξόανον, -τρισκελές, αὐτόφλοιον, ἀνούατον· ἀλλὰ φάλητι -παιδογόνῳ δυνατὸν Κύπριδος ἔργα τελεῖν. -ἕρκος δʼ εὐίερον περιδέδρομεν ἀέναον δὲ -ῥεῖθρον ἀπὸ σπιλάδων πάντοσε τηλεθάει -δάφναις καὶ μύρτοισι καὶ εὐώδει κυπαρίσσῳ, -ἔνθα πέριξ κέχυται βοτρυόπαις ἕλικι -ἄμπελος· εἰαρινοὶ δὲ λίγγυφθόγγοισιν ἀοιδαῖς -κόσσυφοι ἀχεῦσιν ποικιλότραυλα μέλη· -ξουθαὶ δʼ ἀδονίδες μινυρίσμασιν ἀνταχεῦσαι -μέλπουσι στόμασιν τὰν μελίγηρυν ὄπα. -ἕζεο δὴ τηνεὶ, καὶ τῷ χαρίεντι Πριάπῳ -εὔχου ἀποστέρξαι τοὺς Δάφνιδός με πόθους, -κεὐθὺς ἀπορρέξαι χίμαρον καλόν. ἢν δʼ ἀνανεύῃ, -τοῦδε τυχὼν ἐθέλω τρισσὰ θύη τελέσαι· -ῥέξω γὰρ δαμάλαν, λάσιον τράγον, ἄρνα τὸν ἴσχω -σακίταν νεύοι δʼ εὐμενέως ὁ θεός. -
-
- - -Philippus - - -Βωλοτόμοι μύρμηκες, ὁ γῆς στρατός, ἡνίκʼ ἔτενδε -γειομόρου μελιχρὴν σμηνοδόκου χάριτα, - -μηνίσας ὁ πρέσβυς, ἐς ὕδατα κρωσσὸν ἔβαψεν, -ἐνθάδε τοὺς ἀπὸ γῆς οὐ δοκέων πελάσειν. -οἱ δὲ νέας κάρφας ἀχυρίτιδας ἀντιφέροντες, -αὐτοκυβερνῆται πρὸς κύτος ἐτρόχασαν. -ἦ ῥα φίλη γαστὴρ καὶ βαιοτάτους ἀνέπεισεν -ἐκ χθονὸς εἰς Νύμφας καινοτάτους ἐρέτας. -
-
- - -Crinagoras - - -βρέγμα πάλαι λαχναῖον, ἐρημαῖόν τε κέλυφος -ὄμματος, ἀγλώσσου θʼ ἁρμονίη στόματος, -ψυχῆς ἀσθενὲς ἕρκος., ἀτυμβεύτου θανάτοιο -λείψανον, εἰνόδιον δάκρυ παρερχομένων, -κεῖσο πέλας πρέμνοιο παρʼ ἀτραπόν, ὄφρα μάθῃ τις - -ἀθρήσας, τί πλέον φειδομένῳ βιότου. -
-
- - -Moschus - - - -ἁ Κύπρις τὸν Ἔρωτα τὸν υἱέα μακρὸν ἐβώστρει· -“ εἴ τις ἐνὶ τριόδοισι πλανώμενον εἶδεν Ἔρωτα, -δραπετίδας ἐμός ἐστιν· ὁ μανυτὰς γέρας ἑξεῖ. -μισθός τοι τὸ φίλαμα τὸ Κύπριδος· ἢν δʼ ἀγάγῃς νιν, -οὐ γυμνὸν τὸ φίλαμα, τὺ δʼ, ὦ ξένε, καὶ πλέον ἑξεῖς. -ἔστι δʼ ὁ παῖς περίσαμος· ἐν εἴκοσι πᾶσι μάθοις νιν. -χρῶτα μὲν οὐ λευκός, πυρὶ δʼ εἴκελος· ὄμματα δʼ αὐτοῦ -δριμύλα καὶ φλογόεντα· κακαὶ φρένες, ἁδὺ λάλημα· -οὐ γὰρ ἴσον νοέει καὶ φθέγγεται· ὡς μέλι φωνά -ἢν δὲ χολᾷ, νόος ἐστὶν ἀνάμερος· ἠπεροπευτάς, -οὐδὲν ἀλαθεύων, δόλιον βρέφος, ἄγρια παίσδει. -εὐπλόκαμον τὸ κάρανον ἔχει δʼ ἰταμὸν τὸ πρόσωπον. - -μικκύλα μὲν τήνῳ τὰ χερύδρια, μακρὰ δὲ βάλλει· -βάλλει δʼ εἰς Ἀχέροντα καὶ Ἀίδεω βασιλῆα. -γυμνὸς μὲν τό γε σῶμα, νόος δʼ οἱ ἐμπεπύκασται· -καὶ πτερόεις ὅσον ὄρνις ἐφίπταται ἄλλοτʼ ἐπʼ ἄλλως -ἀνέρας ἠδὲ γυναῖκας, ἐπὶ σπλάγχνοις δὲ κάθηται -τόξον ἔχει μάλα βαιόν, ὑπὲρ τόξω δὲ βέλεμνον -τυτθὸν ἑοῖ τὸ βέλεμνον, ἐς αἰθέρα δʼ ἄχρι φορεῖται· -καὶ χρύσεον περὶ νῶτα φαρέτριον ἔνδοθι δʼ ἐντὶ -τοὶ πικροὶ κάλαμοι, τοῖς πολλάκι κἀμὲ τιτρώσκει. -πάντα μὲν ἄγρια, πάντα· πολὺ πλέον ἁ δαῒς αὐτῷ -βαιὰ λαμπὰς ἐοῖσα, τὸν Ἃλιον αὐτὸν ἀναίθει. -ἢν τὺ γʼ ἕλῃς τῆνον, δήσας ἄγε, μηδʼ ἐλεήσῃς· -κἢν ποτʼ ἴδῃς κλαίοντα, φυλάσσεο μή σε πλανήσῃ· -κἢν γελάῃ, τύ νιν ἕλκε· καὶ ἢν ἐθέλῃ σε φιλᾶσαι, -φεῦγε· κακὸν τὸ φίλαμα, τὰ χείλεα φάρμακον ἐντί. -ἢν δὲ λέγῃ, Λάβε ταῦτα, χαρίζομαι ὅσσα μοι ὅπλα, -μὴ τὺ θίγῃς πλάνα δῶρα· τὰ γάρ πυρὶ πάντα βέβαπται.” -
-
- - -Palladas - - -τὸν Διὸς ἐν τριόδοισιν ἐθαύμασα χάλκεον υἷα, -τὸν πρὶν ἐν εὐχωλαῖς, νῦν παραριπτόμενον. -ὀχθήσας δʼ ἄρʼ ἔειπον “ Ἀλεξίκακε τρισέληνε, -μηδέποθʼ ἡττηθείς, σήμερον ἐξετάθης.” -νυκτὶ δὲ μειδιόων με θεὸς προσέειπε παραστάς· - -καιρῷ δουλεύειν καὶ θεὸς ὢν ἔμαθον. - -
-
- - -Agathias scholasticus - - -γριπεύς τις μογέεσκεν ἐπʼ ἰχθύσι· τὸν δʼ ἐσιδοῦσα -εὐκτέανος κούρη θυμὸν ἔκαμνε πόθῳ, - -καί μιν θῆκε σύνευνον ὁ δʼ ἐκ βιότοιο πενιχροῦ -δέξατο παντοίης ὄγκον ἀγηνορίης. -ἡ δὲ Τύχη γελόωσα παρίστατο, καὶ ποτὶ Κύπριν, - - οὐ τεὸς οὗτος ἀγών, ἀλλʼ ἐμός ἐστιν, ἔφη. -
-
- - -Paulus silentiarius - - -μή ποτε κοιλήνῃς παφίῃ νόον ἀντιτύπου γὰρ -εὐθὺς ἀποθρώσκει κοῦφος Ἔρως κραδίης. -οἶστρος ὀλισθήεσσαν ἔχει φύσιν· ἤν τις ὀιστοῦ -ἄκρον ἕλῃ φλογεροῦ, δύεται ἐντὸς ὅλος. -ἐλπίδι μὴ θέλξῃς φρένα μαχλάδι· γυιοβόρον γὰρ -πῦρ ὑποριπίζει, θυμὸν ἐφελκομένη. ˘ -
-
- - -Eratosthenes Scholasticus - - -καλὰ τὰ παρθενίης κειμήλια· παρθενίη δὲ -τὸν βίον ὤλεσσ’ ἂν πᾶσι φυλασσομένη. -τοὔνεκεν εὐθέσμως ἄλοχον λάβε, καί τινα κόσμῳ -δὸς βροτὸν ἀντὶ σέθεν· φεῦγε δὲ μαχλοσύνην. -
-
- - -Julianus - - -ἤθελε μὲν βασιλεύς σε βοηθόον εἰσέτι πέμπειν -ἄστεσι τειρομένοις δευομένων μερόπων, -Τητιανὲ χρύσειε· σὺ δʼ ἐν βιότοιο γαλήνῃ -πατρίδα καὶ κλῆρον σὸν προβέβουλας ἔχειν, -αὔξων σῶν προγόνων κτέρας ἔνδικον ἀρχομένων γὰρ -πλοῦτον ὅτι στυγέεις σύνθρονος οἶδε Δίκη. -
-
- - -Julianus - - -ἡδέα πάντα κέλευθα λάχεν βίος· ἄστεϊ μέσσῳ -εὖχος, ἑταιρεῖαι· κρυπτὰ δόμοισιν ἄχη· - -ἀγρὸς τέρψιν ἄγει, κέρδος πλόος, ἀλλοδαπὴ χ;χθὼν -γνώσιας· ἐκ δὲ γάμων οἶκος ὁμοφρονέει, -τοῖς δʼ ἀγάμοις ἄφροντις ἀεὶ βίος· ἕρκος ἐτύχθη -πατρὶ τέκος, φροῦδος τοῖς ἀγόνοισι φόβος· -ἠνορέην νεότης, πολιὴ φρένας οἶδεν ὀπάσσαι· -ἔνθεν θάρσος ἔχων ζῶε, φύτευε γένος. -
-
- - -Julianus - - -μήτηρ υἷα λιπόντα μάχην μετὰ πότμον ἑταίρων -ἔκτανεν, ὠδίνων μνῆστιν ἀνηναμένη. -καὶ γὰρ γνήσιον αἷμα διακρίνει Λακεδαίμων -ἀλκῇ μαρναμένων, οὐ γενεῇ βρεφέων. -
-
- - -Anonymi epigrammatici - - - -ἐρώτησις Ὁμήρου -ἄνδρες ἀπʼ Ἀρκαδίης ἁλιήτορες, ἦ ῥʼ ἔχομέν τι; - - -ἀνταπόκρισις Ἀρκάδων -ὅσσʼ ἕλομεν λιπόμεσθʼ, ὅσσ’ οὐχ ἕλομεν φερόμεσθα. - -
-
- - -Anonymi epigrammatici - - -τίνας ἂν εἴποι λόγους Ἔρως ἐρῶν -τίς πυρὶ πῦρ ἐδάμασσε; τίς ἔσβεσε λαμπάδι πυρσόν; -τίς κατʼ ἐμῆς νευρῆς ἑτέρην ἐτανύσσατο νευρήν; -καινὸς Ἔρως κατʼ Ἔρωτος ἐμῷ μένει ἰσοφαρίζει - -
-
- - -Philemon - - -εἰ ταῖς ἀληθείαισιν οἱ τεθνηκότες -αἴσθησιν εἶχον, ἄνδρες ὥς φασίν τινες, -ἀπηγξάμην ἄν, ὥστʼ ἰδεῖν Εὐριπίδην. -
-
- - -Anonymi epigrammatici - - -τίνας ἂν εἴποι λόγους πρὸς Πρόκνην τὴν ἀδελφὴν Φιλομήλη -σός με πόσις κακοεργὸς ἐνὶ σπήλυγγι βαθείῃ -μουνώσας βαρύποτμον, ἐμὴν ἀπέκερσε κορείην -στυγνὰ δέ μοι πόρεν ἕδνα πολυτλήτοιο γάμοιο· -γλῶσσαν ἐμὴν ἐθέρισσε, καὶ ἔσβεσεν ἑλλάδα φωνήν. -
-
- - -Anonymi epigrammatici - - - -χαῖρε, Πρόκνη, παρὰ σεῖο κασιγνήτης Φιλομήλης, -χαίρειν εἰ τόδε γʼ ἔστιν ἐμοῦ δέ σοι ἄλγεα θυμοῦ -πέπλος ἀπαγγείλειε, τά μοι λυγρὸς ὤπασε Τηρεύς, -ὃς μʼ ἕρξας βαρύποτμον ἐν ἕρκεσι μηλονομήων, -πρῶτον παρθενίης, μετέπειτα δʼ ἐνόσφισε φωνῆς. -
-
- - -Anonymi epigrammatici - - -αὐτὸς ὁ βοῦς ἱκέτης ἐπιβώμιος, αἰθέριε Ζεῦ, -μυκᾶται, ψυχὴν ῥυόμενος θανάτου. -ἀλλὰ μέθες, Κρονίδη, τὸν ἀροτρέα· -καὶ σὺ γὰρʼ αὐτὸς -πορθμεὺς Εὐρώπης ταῦρος, ἄναξ, ἐγένου. - -
-
- - -Anonymi epigrammatici - - -τίνας ἂν εἴποι λόγους Καλλιόπη εἰς Γεώργιον -οὗτος ἐμὸς γενέτης γνήσιος, οὐ Κρονίδης. -
-
- - -Anonymi epigrammatici - - -τίνας ἂν εἴποι λόγους Ἀπόλλων περὶ Ὁμήρου -Ἤειδον μὲν ἐγών, ἐχάρασσε δὲ θεῖος Ὅμηρος, -
-
- - -Anonymi epigrammatici - - - -Πασιφάη πρὸς τὸν Ἔρωτα -εἰ ποθέειν μʼ ἐδίδαξας ἐν οὔρεσι ταῦρον ἀλήτην, -μυκηθμόν με δίδαξον, ὅτῳ φίλον ἄνδρα καλέσσω. -
-
- - -Anonymi epigrammatici - - - -ἔγνως νῦν, Ἀγάμεμνον, ἐμὸν φθισήνορα θυμόν· -ἔγνως ἐν σταδίῃσιν ὅσον σθένος Ἕκτορός ἐστι. -νῦν γὰρ πάντες ὄλοντο τεῇ πολυπήμονι λώβῃ· -σοὶ δʼ αὐτῷ μέγα πῆμα φάνη, θανάτοιο χέριον. -ἀφροσύνης κακὰ ἔργα καὶ ἄσχετα πένθεα πάσχεις, -ὃς πᾶσιν Δαναοῖσιν ἀρήιον ἕρκος ἐτύχθης. -
-
- - -Anonymi epigrammatici - - - -χαῖρʼ Ἰθάκη· μετʼ ἄεθλα, μετʼ ἄλγεα πικρὰ θαλάσσης -ἀσπασίως τεὸν οὖδας ἱκάνομαι, ὄφρα νοήσω - -Λαέρτην, ἄλοχόν τε καὶ ἀγλαὸν υἱέα μοῦνον -σὸς γὰρ ἔρως κατέθελξεν ἐμὸν νόον. οἶδα καὶ αὐτός, - - ὡς οὐδὲν γλύκιον ἧς πατρίδος οὐδὲ τοκήων. - -
-
- - -Anonymi epigrammatici - - - -ἀτρεκέως πάντων πολυμήχανός ἐστιν Ὀδυσσεύς -ζωὸς ἐὼν ἐνόησεν ἃ μὴ θέμις ἐστὶν ἰδέσθαι, -νερτέριον κευθμῶνα καὶ ἄλγεα πικρὰ θανόντων. -πῶς δʼ ἔτλη προλιπεῖν ἱερὸν φάος; ἢ τίς ἀνάγκη -ἤγαγεν οὐκ ἐθέλοντα; δόλων ἀκόρητος ἐτύχθη -ἐν χθονὶ καὶ πελάγεσσι καὶ ἐν νεκύεσσιν Ὀδυσσεύς. -
-
- - -Anonymi epigrammatici - - - -μῆτερ, τεύχεα ταῦτα καὶ ἀγλαὰ δῶρα κομίζεις -ἀγχεμάχῳ σέο παιδί, τὰ μὴ πάρος ἔδρακεν ἀνήρ· -οἶδα δὲ νῦν ὅτι Παλλὰς ἐφʼ Ἕκτορι χεῖρα κορύσσει -ἡμετέρην, καὶ Τρωσὶν ἀεικέα λοιγὸν ἐγείρει. -
-
- - -Anonymi epigrammatici - - - -μόχθος ἐμοῦ γενετῆρος ἀμύμονος οὐ τέλος εὗρεν -αὐτὰρ ἐγὼ Τρώεσσι φόνον πάντεσσι κορύσσων -ἤλυθον· ἠνορέῃ γὰρ ὑπέρτερον εὖχος ἀείρω, -καὶ Πρίαμον βασιλῆα, καὶ οὓς προλέλοιπεν Ἀχιλλεύς, -πάντας ὁμοῦ κατὰ μῶλον ἐμὸν μένος οἶδεν ὀλέσσαι, -καὶ Τροίης πτολίεθρον ἀρήιον ἐξαλαπάξω, -καὶ Δαναοῖς δεκέτηρον ἐμὸν δόρυ μόχθον ἀνύσσει. - -
-
- - -Anonymi epigrammatici - - - -πᾶσαν ἐμῆς κραδίης χαλεπὴν ἀπέπαυσας ἀνίην, -ὑμετέρου γενετῆρος Ἀχιλλέος εἵνεκα πότμου, -ὃν Τροίη στονόεσσα κατέκτανεν. ἀλλὰ σὺ πᾶσαν -Ἴλιον ἐξαλάπαξας· ἐελδομένοισι δʼ Ἀχαιοῖς -ἄφθιτον ὤπασας εὖχος, -μὴ δεκέτηρος ἐνυοῦς -πᾶσιν μαρναμένοις Δαναοῖς χρόνος εὗρεν ἀνύσσαι. -
-
- - -Anonymi epigrammatici - - -τί ἂν εἴποι Ἕκτωρ ὁρῶν τὸν Ἀχιλλέα ἐν τοῖς ὅπλοις -Πηλείδην κοτέουσα πάλιν θώρηξεν Ἀθήνη -ἔντεσιν ἀθανάτοις. ἦ ῥίγιον ἔσσεται ἄλγος -αἰνομόροις Τρώεσσι, καὶ Ἕκτορι, καὶ γενετῆρι, -ὁππόταν ἔντεα ταῦτα θεὸς πόρεν ἀνέρι τῷδε. -
-
- - -Anonymi epigrammatici - - -τί ἂν εἴποι Πάρις τρωθέντος Μενελάου -ἔρρετε οἱ ξύμπαντες, ἐλεγχέες, Αἰγιαλῆες, -ἄρτι θανὼν Μενέλαος ἐμὸν μέγα κῦδος ἀέξει. -
-
- - -Anonymi epigrammatici - - -τίνας ἂν εἴποι λόγους Ἀλθαία παρακαλοῦσα τὸν Μελέαγρον -τέκνον ἐμόν, γενεῆς ἐπιλήθεαι, οὐδʼ ἀλεγίζῃ -πατρίδος ὀλλυμένης, βριαρὴν δʼ ἀπόειπες ἀκωκήν, -αἰσχύνων Καλυδῶνα καὶ Οἰνέα καὶ ναετῆρας. - -
-
- - -Anonymi epigrammatici - - - -ἠνορέης κλυτὰ ἔργα τεὴν ἔστεψαν ἀπήνην, -καὶ νύμφην βοόωσιν ἀριστοπόνοις ὑμεναίοις. -
-
- - -Anonymi epigrammatici - - - -Πηλιάδες σκοπιαί, κουροτρόφοι, εἴπατε παιδί, -ὃν Χείρων ἐδίδαξεν ἀριστεύειν ἐνὶ χάρμῃ, -μῆνιν ἀπορρῖψαι καὶ λοίγιον ἔχθος Ἀχαιοῖς. -
-
- - -Anonymi epigrammatici - - - -σῆς ἀρετῆς ἱδρῶτι καλὴν ἀπέδωκεν ἀμοιβὴν -σὸς γενέτης, Ἥρακλες, ἐπεὶ πόνος ἄσπετον εὖχος -ἀνδράσιν οἶδεν ἄγειν μετʼ ἀπείρονα κύκλον ἀέθλων. -
-
- - -Anonymi epigrammatici - - - -σοὶ χάριν ἐξετέλεσσε πόνος καὶ ἀθέσφατος ἱδρώς, -χῶρον ἔχειν πολύολβον, ὃν οὐ πάρος ἔλλαχεν ἀνήρ. -
-
- - -Anonymi epigrammatici - - -τί ἂν εἴποι Ἀχιλλεὺς πρὸς τὸν Αἴαντα φιλιωθῆναι -οὐ θέμις ἐν φθιμένοισιν ἔχειν κότον ἄλγεα γαίης -καλλείψας ἀγάπαζε τεὸν φίλον οὐ γὰρ Ὀδυσσεὺς - -ἤλιτεν εἰς σὲ θέλων, βριαρὴ δὲ σ’ ἔπεφνεν Ἀθήνη, -Ζεύς τε πατήρ, καὶ Μοῖρα, καὶ ἠεροφοῖτις Ἐρινύς. -αἴθε δὲ τεύχεα ῥῖψεν ἐς ἁλμυρὰ βένθεα πόντου -δῖα Θέτις, καὶ νεῖκος ἀπέσβεσε σεῖο μενοινῆς. -
-
- - -Anonymi epigrammatici - - -τίνας ἂν εἴποι λόγους Νέστωρ ἀκούσας Ὀδυσσέα ἐπανελθόντα -ἐσθλὸς ἀνὴρ φύγε πόντον ἀπηνέα καὶ μετὰ μόχθον -ἐς πάτρην ἀφίκανεν;, ἐμοῦ δέ κε φέρτερος εἴη, -εὖ δεδαὼς πτόλιάς τε καὶ ἤθεα καὶ νόον ἀνδρῶν. -
-
- - -Anonymi epigrammatici - - -πολλὰ καμὼν νόστησεν ἀνὴρ τλήθυμος Ὀδυσσεύς, -ἀλλʼ ἔμπης κλέος ἔσχεν ἀνὰ χθόνα καὶ κατὰ πόντον -ἀνδράσιν ἐσσομένοισιν ἀεὶ πτολίπορθος Ὀδυσσεύς. -
-
- - -Anonymi epigrammatici - - -τίνας ἂν εἴποι λόγους ὁ Ἀγαμέμνων καθοπλισθέντος Ἀχιλλέως -Ἴλιος ὀφρυόεσσα κατήριπεν, ἄρτι δὲ πᾶσαν -ληιδίην Δαναοῖσι θεὸς πόρεν, ὁππότʼ Ἀχιλλεύς, -μῆνιν ἀπορρίψας, φθισήνορα χεῖρα κορύσσει. -
-
- - -Anonymi epigrammatici - - -τί ἂν εἴποι Εἰδοθέα ἰδοῦσα τὴν Ἑλένην ἐν Φάρῳ -οἰκτείρω σὸν κάλλος, ἐπεὶ Διός ἐσσι γενέθλη. -εἰσορόω γὰρ ἄγαλμα διοτρεφές· ἀτρεκέως δὲ - -Τρωσί τε καὶ Δαναοῖσι μάχη δεκέτηρος ἐτύχθης. -ποῦ Διὸς αἰγιόχοιο, τεοῦ γενετῆρος, ἀρωγαί; -ἔμπης δʼ ἔρχεο θᾶσσον, ἀπήμονα νόστον ἑλοῦσα -Εἰδοθέης ἰότητι, κακῆς ἐπὶ νῶτα θαλάσσης. -
-
- - -Anonymi epigrammatici - - - -Εὐρώπης Ἀσίης τε δορισθενέες βασιλῆες, -ὑμῖν ἀμφοτέροισιν ἐπὶ ξυροῦ ἵσταται ἀκμῆς, -τίς κεν ἐμὲ τλήθυμος ἕλοι δύστηνον ἀκοίτης· -Ζεὺς δὲ πατὴρ δικάσειεν, ἄνευθε δὲ Κυπρογενείης, -μὴ πάλιν ἄλλος ἕλῃ με γαμοκλόπος, αἶσχος Ἀχαιοῖς. -
-
- - -Anonymi epigrammatici - - -τί ἂν εἴποι Ἕκτωρ, τοῦ Πατρόκλου μὴ δυνηθέντος -βαστάσαι τὸ δόρυ Ἀχιλλέως -Ἐζημίωσας ἀσθενῶν τὸν Ἕκτορα· -φέρεις γὰρ ἡμῖν ἐλλιπῆ σκυλεύματα. -
-
- - -Anonymi epigrammatici - - -τί ἂν εἴποι ἡ Θέτις, τοῦ Τηλέφου σκελισθέντος ὑπὸ τῆς ἀμπέλου -Ἄμπελε, τί πράξωμεν, ὅταν Δαφναῖος Ἀπόλλων -πτόρθον ἐμὸν κλίνῃ διʼ Ἀλεξάνδροιο βελέμνων; - -
-
- - -Anonymi epigrammatici - - - -τὰ δῶρα λαμπρὰ προσφέρεις τῇ πατρίδι. -
-
- - -Anonymi epigrammatici - - - -σεῖο νόον πέτρωσεν ἀμείλιχα δέσμια πέτρης, -καὶ λίθον ἐκτελέσειε τεὸν δέμας ὄμμα Μεδούσης. -
-
- - -Anonymi epigrammatici - - - - - ἀπεστράφης νῦν, ὡς λαβὼν ἐξουσίαν - - ταύτῃ γὰρ οὐ πέφυκε συντρέχειν Ἔρως· -ἔρως γὰρ ἄλλην ἀνταμείβεται τρίβον. -
-
- - -Julianus - - -βραδύτερον παρελθόντος -ἑσπέριὸς μʼ ἐδάμασσεν ὁμοῦ καὶ πρώιος ὕπνος, -ὅς μὲν ἐπιβρίσας, ὃς δέ με μὴ καλέσας· -ὧν ἐξ ἀμφοτέρων ὁ μὲν ἐρρέτω, ὃς δὲ παρείη -ἵλαος, ὡράων μέτρον ἐπιστάμενος. - -
-
- - -Agathias scholasticus - - -Οὐτιδανοὶ μερόπων, εἰ καὶ μέγα ῥέξαμεν ἔργον, -οὔτινος εἰς μνήμην δηρὸν ἐπερχόμεθα· -οἱ δʼ ἀγαθοί, κἢν μηδέν, ἀναπνεύσωσι δὲ μοῦνον, -ὡς Λίβυς εἶπεν ἀνήρ, τοῦτʼ ἀδάμαντι μένει. -δήποτε γὰρ Ζήνωνα πολισσοῦχον βασιλῆα, -παίγνιον ἀφράστων ἐκτελέοντα κύβων, -τοίη ποικιλότευκτος ἕλεν θέσις, εὖτʼ ἀπὸ λευκοῦ, -τοῦ καὶ ὀπισθιδίην εἰς ὁδὸν ἐρχομένου, -ἑπτὰ μὲν ἕκτος ἔχεν, μίαν εἴνατος· αὐτὰρ ὁ σοῦμμος -δισσὰς ἀμφιέπων ἶσος ἔην δεκάτῳ· -ὅς τε πέλει μετὰ σοῦμμον ἔχεν δύο, μουνάδα δʼ ἄλλην -ψῆφον τὴν πυμάτην ἀμφιέπεσκε δίβος. -ἀλλὰ μέλας δισσὰς μὲν ἐν ὀγδοάτῳ λίπε χώρῳ -καὶ τόσσας ἑτέρας ἐς θέσιν ἑνδεκάτην -ἀμφὶ δυωδέκατον δὲ διέπρεπον εἴκελοι ἄλλαι, -καὶ τρισκαιδεκάτῳ ψῆφος ἔκειτο μία· -δίζυγες Ἀντίγονον διεκόσμεον ἀλλὰ καὶ αὐτῷ -ἶσος ἔμιμνε τύπος πεντεπικαιδεκάτῳ, -ὀκτωκαιδεκάτῳ πανομοίιος· εἰσέτι δʼ ἄλλας -εἶχεν διχθαδίας τέτρατος ἐκ πυμάτου. -αὐτάρ ἄναξ λευκοῖο λαχὼν σημήια πεσσοῦ, -καὶ τὴν ἐσσομένην οὐ νοέων παγίδα, -τριχθαδίας ἀδόκητα βαλὼν ψηφῖδας ἀπʼ ἠθμοῦ, -πύργου δουρατέου κλίμακι κευθομένῃ], -δοιὰ καὶ ἓξ καὶ πέντε κατήγαγεν αὐτίκα δʼ ὀκτὼ -ἄζυγας εἶχεν ὅλας πρόσθε μεριζομένας, -τάβλην φεύγετε πάντες, ἐπεὶ καὶ κοίρανος αὐτὸς -κείνης τὰς ἀλόγους οὐχ ὑπάλυξε τύχας. - -
-
- - -Anonymi epigrammatici - - -ἐκ φονίων Περσῶν φόνιον φυτὸν ἤγαγε Περσεύς, -παιδὶ Θεογνώστου τοῦ θανάτου πρόφασιν. -
-
- - -Palladas - - -ἀσκὸν τῶν ἀνέμων ἔλαβέν ποτε δῶρον Ὀδυσσεὺς -πόντον ἐπιπλείων χρῆμα γὰρ ἦν τι μέγα. -ἀλλʼ ἐμὸς Αἰόλος οὗτος ἔχων ἀνεμώλιον ἦτορ, -ὄρνεον ἐκπέμπει τῶν ἀνέμων γεμίσας. -πνεύματά μοι πτερόεντα, φίλος, ναὶ πνεύματα πέμπεις· -οὐ δύναμαι δὲ φαγεῖν θλιβομένους ἀνέμους. -
-
- - -heliodorus - - -τὰν Θέτιν ἀείδω, χρυσοέθειρα Θέτιν, -Νηρέος ἀθανάταν εἰναλίοιο κόραν, -τὰν Διὸς ἐννεσίῃ Πηλέι γημαμέναν, -τὰν ἁλὸς ἀγλαΐαν, ἁμετέραν Παφίην -ἃ τὸν δουριμανῆ, τὸν δʼ Ἄρεα πτολέμων, -Ἑλλάδος ἀστεροπάν, ἐξέτεκεν λαγόνων -δῖον Ἀχιλλῆα, τοῦ κλέος οὐράνιον -τῷ ὕπο Πύρρα τέκεν παῖδα Νεοπτόλεμον, -περσέπολιν Τρώων, ῥυσίπολιν Δαναῶν. -ἱλήκοις ἥρως ἄμμι Νεοπτόλεμε, -ὄλβιε, Πυθιάδι νῦν χθονὶ κευθόμενε· -δέχνυσο δʼ εὐμενέων τάνδε θυηπολίην, -πᾶν δʼ ἀπέρυκε δέος ἁμετέρας πόλιος. -τὰν Θέτιν ἀείδω, χρυσοέθειρα Θέτιν. - -
-
- - -Palladas - - -τὴν λαπάραν, τὴν αὐτὸς ἀποσφίγξας ἀποπέμπεις, -εὗρεν ὁ παῖς λύσας φῦσαν ὑπηνέμιον. -
-
- - -Palladas - - -βρώματά μοι χοίρων συκιζομένων προέθηκας, -ξηρῶν, διψαλέων, Κυπρόθεν ἐρχομένων. -ἀλλʼ ἐμὲ συκωθέντα μαθὼν ἢ σφάξον ἑτοίμως, -ἢ σβέσον ἐκ δίψης νάματι τῷ Κυπρίῳ. -
-
- - -tryphon - - -τέρπης εὐφόρμιγγα κρέκων σκιάδεσσιν ἀοιδὰν -κάτθανʼ † ενοστησας ἐν Λακεδαιμονίοις, -οὐκ ἄορι πληγείς, οὐδʼ ἐν βέλει, ἀλλʼ ἐνὶ σύκῳ -χείλεα. φεῦ· προφάσεων οὐκ ἀπορεῖ θάνατος. -
-
- - -Palladas - - -γραμματικοῦ θυγάτηρ ἔτεκεν φιλότητι μιγεῖσα -παιδίον ἀρσενικόν, θηλυκόν, οὐδέτερον. -
-
- - -heliodorus - - -Παντάρβην φορέουσα πυρὸς μὴ τάρβει ἐρωήν -ῥηιδίως Μοίραις καὶ τἀδόκητα πέλει. -
-
- - -theon - - -Μονόστιχον εἰς -τὴν ἑβδομάδα -Ζεύς, Ἄρης, Παφίη, Μήνη, Κρόνος, Ἥλιος, Ἑρμῆς. - -
-
- - -Anonymi epigrammatici - - - -κεῖτο δʼ ὁμοῦ σάκος, ἔγχος, ἄκων, θώρηξ, κόρυς, ἵππος. -
-
- - -Anonymi epigrammatici - - -ἀσπίς, τόξα, βέλεμνα, κόρυς, ξίφος, ἄλκιμον ἔγχος. -
-
- - -Anonymi epigrammatici - - -ἰός, τόξα, σάκος, κυνέη, δόρυ, φάσγανα, θώρηξ. -
-
- - -Anonymi epigrammatici - - -Ἑλλάδος ἐνναετῆρες, ἀμεμφέες ἡγεμονῆες, -μηκέτι πιστὰ φέροιτε δολοφρονέουσι γυναιξί. -θηλυτέρη μʼ ἐδάμασσε, τὸν οὐ κτάνε δήϊος Ἕκτωρ. -
-
- - -Athenaeus - - -ὦ Στοϊκῶν μύθων εἰδήμονες, ὦ πανάριστα -δόγματα, ταῖς ἱεραῖς ἐνθέμενοι σελίσιν, -τὰν ἀρετὰν ψυχᾶς ἀγαθὸν μόνον ἅδε γὰρ ἀνδρῶν -μούνα καὶ βίοτον ῥύσατο καὶ πόλιας. -σαρκὸς δʼ ἁδυπάθημα, φίλον τέλος ἀνδράσιν ἄλλοις, -ἡ μία τῶν Μνήμης ᾔνεσε θυγατέρων· -
-
- - -Crates - - -ἔρωτα παύει λιμός· εἰ δὲ μή, χρόνος -ἐὰν δὲ μηδὲ ταῦτα τὴν φλόγα σβέσῃ, -θεραπεία σοι τὸ λοιπὸν ἠρτήσθω βρόχος. - -
-
- - -Anonymi epigrammatici - - -μὴ θάπτειν τὸν ἄθαπτον, ἔα κυσὶ κύρμα γενέσθαι· -γῆ πάντων μήτηρ μητροφθόρον οὐ δέχετʼ ἄνδρα, -
-
- - -Anonymi epigrammatici - - -σιγαλέως φέρεται πολιὸς χρόνος· ἀλλὰ παρέρπων -καὶ φωνὰς κλέπτει φθεγγομένων μερόπων, -καὶ μὴ φαινόμενος τοὺς φαινομένους ἀφανίζει, -καὶ μὴ φαινομένους εἰς φανερὸν προφέρει. -ὦ ζωῆς ἀόριστος ἐν ἀνθρώποισι τελευτή, -ἦμαρ ἐπʼ ἦμαρ ἀεὶ πρὸς ζόφον ἐρχομένων. -
-
- - -Anonymi epigrammatici - - -μηκέτι κληρονόμους ὀνομάζετε φέγγος ὁρῶντας· -τοὺς δʼ ἀποθνῄσκοντας κληρονόμους λέγετε. -οἱ νῦν κληρονόμοι νέκυες μέγα κέρδος ἔχουσι, -τὴν ἀναχώρησιν τοῦ μογεροῦ βιότου. -
-
- - -Anonymi epigrammatici - - -τὴν πόλιν οἱ νέκυες πρότερον ζῶσαν κατέλειψαν·;, -ἡμεῖς δὲ ζῶντες τὴν πόλιν ἐκφέρομεν. -
-
- - -Palladas - - -Κονδίτου μοι δεῖ. τὸ δὲ κονδῖτον πόθεν ἔσχεν -τοὔνομα; τῆς φωνῆς ἐστι γὰρ ἀλλότριον -τῆς τῶν Ἑλλήνων εἰ Ῥωμαϊκῶς δὲ καλεῖται, -αὐτὸς ἂν εἰδείης, Ῥωμαϊκώτατος ὤν. -σκεύασον οὖν μοι τοῦτο· τὸ γὰρ κατέχον με νόσημα -τοῦ στομάχου χρῄζει τοῦδε, λέγουσι, ποτοῦ. - -
-
- - -Palladas - - -οὐκ ἀλόγως ἐν διζύφοις δύναμίν τινα θείαν -εἶναι ἔφην. χθὲς γοῦν † δίζυφον ἐν χρονίῳ -ἠπιάλῳ κάμνοντι τεταρταίῳ περιῆψα, -καὶ γέγονεν ταχέως, οἷα κρότων, ὑγιής. -
-
- - -Anonymi epigrammatici - - - -Καλλιόπη σοφίην ἡρωίδος εὗρεν ἀοιδῆς· -Κλειὼ καλλιχόρου κιθάρης μελιηδέα μολπὴν -Εὐτέρπη τραγικοῖο χοροῦ πολυηχέα φωνὴν -Μελπομένη θνητοῖσι μελίφρονα βάρβιτον εὗρε· -Τερψιχόρη χαρίεσσα πόρεν τεχνήμονας αὐλούς· -ὕμνους ἀθανάτων Ἐρατὼ πολυτερπέας εὗρε· -τέρψιας ὀρχηθμοῖο Πολύμνια πάνσοφος εὗρεν -[ἁρμονίην πάσῃσι Πολύμνια δῶκεν ἀοιδαῖς·] -Οὐρανίη πόλον εὗρε καὶ οὐρανίων χορὸν ἄστρων -κωμικὸν εὗρε Θάλεια βίον καὶ ἤθεα κεδνά. -
-
- - -Anonymi epigrammatici - - - -οὐκ ἴδε Τερψιχόρην ὁ ζωγράφος, ἀλλʼ ὑπὸ τέχνας -ψεύδεται ὀφθαλμοὺς δείκελον ἀτρεκίῃ. -εἴ ποτε τερψινόοιο, φίλος, φόρμιγγος ἀκούσῃς, -τὴν Ἐρατὼ θαύμαζε τόσης εἰδήμονα τέχνης. -Εὐτέρπη δονάκεσσι πολυτρήτοισι λιγαίνει, -πνεῦμα σοφῆς ὀχετηγὸν ἐπισπείρουσα μελίσσης. - -κωμικὸν ἀμφιέπω Θάλεια μέλος, ἔργα δὲ φωτῶν -οὐχ ὁσίων θυμέλῃσι φιλοκροτάλοισιν ἀθύρω. -εἰκόνα σῆς σοφίης ποτιδέρκεο· Καλλιόπης γὰρ -εἰκόνα σῇ κραδίῃ λάμβανε τὴν σοφίην. -Δαφνοκόμοις Φοίβοιο παρὰ τριπόδεσσι πολεύω -Κλειώ, μαντοσύνης Μοῦσα καὶ ἱστορίης. -Οὐρανίη ψήφοιο θεορρήτῳ τινὶ μέτρῳ -ἀστρῴην ἐδίδαξα παλινδίνητον ἀνάγκην. -σκέπτεο χαλκεόφωνον ἐπισπέρχουσαν ἀοιδὴν -Μελπομένην, ἐρατῆς ἵστορα εὐεπίης. -σιγῶ, φθεγγομένη παλάμης θελξίφρονα παλμόν, -νεύματι φωνήεσσαν ἀπαγγέλλουσα σιωπήν. -
-
- - -Plato - - -ἐννέα τὰς Μούσας φασίν τινες· ὡς ὀλιγώρως· -ἠνίδε καὶ Σαπφὼ Λεσβόθεν ἡ δεκάτη. -
-
- - -Callimachus - - -Ἡσιόδου τὸ τʼ ἄεισμα καὶ ὁ τρόπος· οὐ τὸν ἀοιδῶν -ἔσχατον, ἀλλʼ ὀκνέω μὴ τὸ μελιχρότατον -τῶν ἐπέων ὁ Σολεὺς ἀπεμάξατο. χαίρετε, λεπταὶ -ῥήσιες, Ἀρήτου σύμβολον ἀγρυπνίης. - -
-
- - -Palladas - - -ὅταν θέλῃ τις ἡμέραν ἰδεῖν καλήν, -συντυγχάνων σοι γίνεται καλήμερος -τοὐναντίον δὲ καί τις εἰ θέλοι παθεῖν, -μὴ συντυχών σοι γίνεται κακήμερος. -
-
- - -Lysistratus - - -Κωλιάδες δὲ γυναῖκες ἐρετμοῖσι φρύξουσιν. -
-
- - -Anonymi epigrammatici - - -γῆμε Κριτωνιανός με, Σόλων ἐτέκνωσεν ἐκλήθην -Μελτίνη· πλάσθην ἀνδρὸς ἐμοῦ παλάμαις. -
-
- - -Anonymi epigrammatici - - -Χιονέην τρίχα, Παιήων ἐκέλευέ με χρυσῷ -δαιδάλλειν ἀγανοφροσύνῃ, ἐτέλεσσα δὲ χαίρων, -οὕνεκεν ἐξ ἐμέθεν τόδε οἱ θυμῆρες ἔκρινεν. -
-
- - -Anonymi epigrammatici - - - -εὐμενέως Πρώτοιο δεδεγμένος ὄργια βίβλου -φιλοπόνου γραφίδεσσι δεδειγμένα βένθεα μύθων, -κοιράνου Αὐσονίοισι διδάσκαλε, ἵλαος εἴης. -
-
- - -Crinagoras - - -δράμασιν ἐν πολλοῖσι διέπρεπες, ὅσσα Μένανδρος -ἔγραφεν, ἢ Μουσέων σὺν μιῇ ἢ Χαρίτων. - -
-
- - -Anonymi epigrammatici - - -ἐς γάμον εὖ ξέσσεν με νεοζεύκτοιο Προκίλλης -τὸν νυμφῶν θαλάμοις αἰὲν ἀειδόμενον, -εὐξάμενος τάδε Μῆνις ὁ κωμικός· “Ὑμέναιε, -ἔρχεο καὶ νύμφῃ καὶ γαμέοντι φίλος.ʼ” -
-
- - -Anonymi epigrammatici - - -τρεῖς εἰσ’ αἱ Χάριτες· σὺ δὲ δὴ μία ταῖς τρισὶ ταύταις -γεννήθης, ἵνʼ ἔχωσ’ αἱ Χάριτες Χάριτα. -
-
- - -Crinagoras - - -ἔρδοι τὴν ἔμαθέν τις, ὅπου καὶ ὑπʼ Ἄλπιας ἄκρας -ληισταὶ λασίαις ἀμφίκομοι κεφαλαῖς, -φωρῆς ἁπτόμενοι, φύλακας κύνας ὧδʼ ἀλέονται -χρίονται νεφροῖς πῖαρ ἔπεστιν ὅσον, -ψευδόμενοι ῥινῶν ὀξὺν στίβον. ὦ κακὸν εὑρεῖν -ῥηΐτεραι Λιγύων μήτιες ἢ ἀγαθόν. -
-
- - -Antipater - - -Ὀρφεὺς θῆρας ἔπειθε, σὺ δʼ Ὀρφέα· Φοῖβος ἐνίκα -τὸν Φρύγα, σοὶ δʼ εἴκει μελπομένῳ, Γλάφυρε, -οὔνομα καὶ τέχνης καὶ σώματος. οὔ κεν Ἀθήνη -ἔρριψεν λωτοὺς τοῖα μελιζομένη, -οἷα σὺ ποικιλοτερπές· ἀφυπνώσαι κεν ἀκούων -αὐτὸς Πασιθέης Ὕπνος ἐν ἀγκαλίσιν. - -
-
- - -Alcaeus - - -Μακύνου τείχη, Ζεῦ Ὀλύμπιε· πάντα Φιλίππῳ -ἀμβατά· χαλκείας κλεῖε πύλας μακάρων. -χθὼν μὲν δὴ καὶ πόντος ὑπὸ σκήπτροισι Φιλίππου -δέδμηται· λοιπὰ δʼ ἁ πρὸς Ὄλυμπον ὁδός. -
-
- - -Alcaeus - - -πίομαι, ὦ Ληναῖε, πολὺ πλέον ἢ πίε Κύκλωψ -νηδὺν ἀνδρομέων πλησάμενος κρεάων -πίομαι, ὡς ὄφελόν γε καὶ ἔγκαρον ἐχθροῦ ἀράξας -βρέγμα Φιλιππείης ἐξέπιον κεφαλῆς· -ὅσπερ ἑταιρείοιο παρὰ κρητῆρι φόνοιο -γεύσατʼ, ἐν ἀκρήτῳ φάρμακα χευάμενος. -
-
- - -Anonymi epigrammatici - - -Ἀλκαίου τάφος οὗτος, ὃν ἔκτανεν ἡ πλατύφυλλος -τιμωρὸς μοιχῶν γῆς θυγάτηρ ῥάφανος. -
-
- - -Anonymi epigrammatici - - - -οὐκ ἄρα σοί γε ὄλιζον ἐπὶ κλέος ὤπασε Μοῖρα -ἤματι, τῷ πρώτῳ φῶς ἴδες ἀελίου, -Σαπφοῖ· σοὶ γὰρ ῥῆσιν ἐνεύσαμεν ἄφθιτον εἶμεν, -σὺν δὲ πατὴρ πάντων νεῦσεν ἐρισφάραγος· -μέλψῃ δʼ ἐν πάντεσσιν ἀοίδιμος ἁμερίοισιν, -οὐδὲ κλυτᾶς φάμας ἔσσεαι ἠπεδανά. - -
-
- - -Anonymi epigrammatici - - -Ἰλιάς, ὦ μέγα ἔργον, -Ὀδυσσείης τε τὸ σῶφρον -γράμμα, τὸ καὶ Τροίῃ θῆκεν ἴσην Ἰθάκην, -τόν με γέροντʼ αὔξοιτʼ ἐς ἀεὶ νέον ἡ γὰρ Ὁμήρου -σειρὴν ὑμετέρων ῥεῖται ἀπὸ στομάτων. -
-
- - -Anonymi epigrammatici - - -Καλλιόπη πολύμυθε μελισσοβότου Ἑλικῶνος, -τίκτε μοι ἄλλον Ὅμηρον, ἐπεὶ μόλεν ἄλλος Ἀχιλλεύς. -
-
- - -Anonymi epigrammatici - - - -μέλπωμεν βασιλῆα φιλεύιον,, εἰραφιώτην, -ἁβροκόμην, ἀγροῖκον, ἀοίδιμον, ἀγλαόμορφον, -Βοιωτόν, βρόμιον, βακχεύτορα, βοτρυοχαίτην, -γηθόσυνον, γονόεντα, γιγαντολέτην, γελόωντα, -Διογενῆ, δίγονον, διθυραμβογενῆ, Διόνυσον, -εὔιον, εὐχαίτην, εὐάμπελον, ἐγρεσίκωμον, -ζηλαῖον, ζάχολον, ζηλήμονα, ζηλοδοτῆρα, -ἤπιον, ἡδυπότην, ἡδύθροον, ἠπεροπῆα, -θυρσοφόρον, Θρήικα, θιασώτην, θυμολέοντα, -Ἰνδολέτην, ἱμερτόν, ἰοπλόκον, ἰραφιώτην, -κωμαστήν, κεραόν, κισσοστέφανον, κελαδεινόν, - -Λυδόν, ληναῖον, λαθικηδέα, λυσιμέριμνον, -μύστην, μαινόλιον, μεθυδώτην, μυριόμορφον, -νυκτέλιον, νόμιον, νεβρώδεα, νεβριδόπεπλον, -ξυστοβόλον, ξυνόν, ξενοδώτην, ξανθοκάρηνον, -ὀργίλον, ὀβριμόθυμον, ὀρέσκιον, οὐρεσιφοίτην, -πουλυπότην, πλαγκτῆρα, πολυστέφανον, πολύκωμον, -ῥηξίνοον, ῥαδινόν, ῥικνώδεα, ῥηνοφορῆα, -σκιρτητόν, Σάτυρον, Σεμεληγενέτην, Σεμελῆα, -τερπνόν, ταυρωπόν, Τυρρηνολέτην, ταχύμηνιν, -ὑπνοφόβην, ὑγρόν, ὑμενήιον, ὑλήεντα, -φηρομανῆ, φρικτόν, φιλομειδέα, φοιταλιώτην, -χρυσόκερων, χαρίεντα, χαλίφρονα, χρυσεομίτρην, -ψυχοπλανῆ, ψεύστην, ψοφομηδέα, ψυχοδαϊκτήν, -ὥριον, ὠμηστήν, ὠρείτροφον, ὠρεσίδουπον. -μέλπωμεν βασιλῆα φιλεύιον, εἰραφιώτην, -
-
- - -Anonymi epigrammatici - - - -ὑμνέωμεν Παιᾶνα μέγαν θεὸν Ἀπόλλωνα, -ἄμβροτον, ἀγλαόμορφον, ἀκερσεκόμην, ἁβροχαίτην, -βριθύνοον, βασιλῆα, βελεσσιχαρῆ, βιοδώτην, -γηθόσυνον, γελόωντα, γιγαντολέτην, γλυκύθυμον, - -Διογενῆ, Διόπαιδα, δρακοντολέτην, δαφνογηθῆ, -εὔλαλον, εὐρυβίην, ἑκατηβόλον, ἐλπιδοδώτην, -ζῳογόνον, ζάθεον, Ζηνόφρονα, ζηλοδοτῆρα, -ἤπιον, ἡδυεπῆ, ἡδύφρονα, ἠπιόχειρα, -θηροφόνον θαλερόν, θελξίφρονα, θελγεσίμυθον, -ἰαφέτην, ἱμερτόν, ἰήιον, ἱπποκορυστήν, -κοσμοπλόκον, Κλάριον, κρατερόφρονα, καρπογένεθλον, -Λητογενῆ, λαρόν, λυρογηθέα, λαμπετόωντα, -μυστιπόλον, μάντιν, μεγαλήτορα, μυριόμορφον, -νευροχαρῆ, νοερόν, νηπενθέα, νηφαλιῆα, -ξυνοχαρῆ, ξυνόν, ξυνόφρονα, ξυνοδοτῆρα, -ὄλβιον, ὀλβιοεργόν, Ὀλύμπιον, οὐρεσιφοίτην, -πρηΰν, πανδερκῆ, παναπήμονα, πλουτοδοτῆρα, -ῥυσίπονον, ῥυσίπονον, ῥηξήνορα, ῥηξικέλευθον, -σιγαλόεντα, σοφόν, σελαηγενέτην, σωτῆρα, -τερψίχορον, Τιτᾶνα, τελέστορα, τιμήεντα, -ὑμναγόρην, ὕπατον, ὑψαύχενα, ὑψήεντα, -Φοῖβον, φοιβάζοντα, φιλοστέφανον, φρενογηθῆ, -χρησμαγόρην, χρύσεον, χρυσόχροα, χρυσοβέλεμνον, -ψαλμοχαρῆ, ψάλτην, ψευσίστυγα, ψυχοδοτῆρα, -ὠκύπον, ὠκυεπῆ, ὠκύσκοπον, ὡρεσιδώτην. -ὑμνέωμεν Παιᾶνα μέγαν θεὸν Ἀπόλλωνα. - -
-
- - -Alpheus - - -Κλεῖε, θεός, μεγάλοιο πύλας ἀκμῆτας Ὀλύμπου· -φρούρει, Ζεῦ, ζαθέαν αἰθέρος ἀκρόπολιν. -ἤδη γὰρ καὶ πόντος ὑπέζευκται δορὶ Ῥώμης, -καὶ χθών· οὐρανίη δʼ οἶμος ἔτʼ ἔστʼ ἄβατος. -
-
- - -Anonymi epigrammatici - - -τλῆθι λέων ἄτλητα παθὼν τετληότι θυμῷ -οὐδεὶς ἀνθρώπων ἀδικῶν τίσιν οὐκ ἀποτίσει, -
-
- - -Palladas - - - -Χριστιανοὶ γεγαῶτες Ὀλύμπια δώματʼ ἔχοντες -ἐνθάδε ναιετάουσιν ἀπήμονες· οὐδὲ γὰρ αὐτοὺς -χώνη φόλλιν ἄγουσα φερέσβιον ἐν πυρὶ θήσει. -
-
- - -Anonymi epigrammatici - - -ἐς κλινάριον πόρνης ἀπὸ δάφνης -λέκτρον ἑνὸς φεύγουσα λέκτρον πολλοῖσιν ἐτύχθην. -
-
- - -Anonymi epigrammatici - - - -οὐκ ἐθέλουσα Τύχη σε προήγαγεν, ἀλλʼ ἵνα δείξῃ, -ὡς ὅτι καὶ μέχρι σοῦ πάντα ποιεῖν δύναται, - -
-
- - -Anonymi epigrammatici - - - -αὔραις ἶσα θέουσιν, ὅθεν λάχον οὔνομα τοῦτο. -
-
- - -Anonymi epigrammatici - - - -εἰπέ μοι, ὦ κολόκυνθε, τίνος χάριν εἰσέτι καὶ νῦν -οὐ σικύων ἐφάνη διερὸν γένος, οὐ κολοκύνθων. -ὁ κολόκυνθος πρὸς ταῦτα -Ζηνὸς ἐπομβρήσαντος ἐπεκλύσθησαν ἄρουραι, -ἡμετέρην δʼ ἀέκουσαν ἔτι κρύπτουσι γενέθλην. -
-
- - -Anonymi epigrammatici - - - -κοντὸν ἀνὴρ κατέπηξε, δέμας δʼ εἰς ἀέρα ῥίψας -ἰδνώθη προκάρηνος, ἀνεγρομένοιο δʼ ὕπερθεν -θηρὸς ὑπερκατέβαινεν ἐϋστρέπτοισι πόδεσσιν -οὐδὲ λάβεν λαοὶ δὲ μέγʼ ἴαχον ἔκφυγε δʼ ἀνήρ. -
-
- - -Anonymi epigrammatici - - - -Ἄρτεμις ἱδρώουσα προάγγελός ἐστι κυδοιμοῦ. -
-
- - -Anonymi epigrammatici - - -κισσῷ μὲν Διόνυσος ἀγάλλεται, αἰγίδι δὲ Ζεύς, -οἱ ναέται ξείνοις, ἡ δὲ πόλις ναέταις. - -
-
- - -Anonymi epigrammatici - - - -ἄβροχον ἐν πελάγεσσι διʼ ὕδατος ἔπλεεν ὕδωρ. -
-
- - -nestor - - -τίπτε με θρυλήσαντες ἐμὴν ἀπεπαύσατʼ ἀοιδήν; -ἱππεὺς ἱππεύειν ἐδάη, καὶ ἀοιδὸς ἀείδειν -ἢν δέ τις ἱππεύειν δεδαὼς ἐθέλῃσιν ἀείδειν, -ἀμφοτέρων ἥμαρτε, καὶ ἱπποσύνης καὶ ἀοιδῆς· -
-
- - -Anonymi epigrammatici - - -ἔχει τὰ κδ γράμματα -Ἁβροχίτων δʼ ὁ φύλαξ θηροζυγοκαμψιμέτωπος· -
-
- - -Anonymi epigrammatici - - - -ἁβρὸς δʼ ἐν προχοαῖς Κύκλωψ φθογγάζετο μύρμηξ. -
-
- - -Anonymi epigrammatici - - -μὴ ταχὺς Ἡρακλείτου ἐπʼ ὀμφαλὸν εἴλεε βίβλον -τοὐφεσίου· μάλα τοι δύσβατος ἀτραπιτός. -ὄρφνη καὶ σκότος ἐστὶν ἀλάμπετον ἢν δέ σε μύστης -εἰσαγάγῃ, φανεροῦ λαμπρότερʼ ἠελίου. -
-
- - -Antipater - - -Θειογένης Πείσωνι τὰ τεχνήεντα κύπελλα -πέμπει· χωροῦμεν δʼ οὐρανὸν ἀμφότερα· - -δοιὰ γὰρ ἐκ σφαίρης τετμήμεθα, καὶ τὸ μὲν ἡμῶν -τοὺς νοτίους, τὸ δʼ ἔχει τείρεα τἀν Βορέῃ. -ἀλλὰ σὺ μηκέτʼ Ἄρητον ἐπίβλεπε· δισσὰ γὰρ ἀμφοῖν -μέτρα πιὼν ἀθρεῖς πάντα τὰ φαινόμενα. -
-
- - -Crinagoras - - -θάρσει καὶ τέτταρσι διαπλασθέντα προσώποις -μῦθον καὶ τούτων γράψαι ἔτι πλέοσιν -οὔτε σὲ γὰρ λείψουσι, Φιλωνίδη, οὔτε Βάθυλλον, -τὸν μὲν ἀοιδάων, τὸν δὲ χερῶν χάριτες. -
-
- - -Philippus - - -Θεσσαλίης εὔιππος ὁ ταυρελάτης χορὸς ἀνδρῶν, -χερσὶν ἀτευχήτοις θηρσὶν ὁπλιζόμενος, -κεντροτυπεῖς πώλους ζεῦξε σκιρτήματι ταύρων, -ἀμφιβαλεῖν σπεύδων πλέγμα μετωπίδιον· -ἀκρότατον δʼ ἐς γῆν κλίνας ἅμα κεὔροπον ἅμμα -θηρὸς τὴν τόσσην ἐξεκύλισε βίην. -
-
- - -Adaeus - - -Ἰνδὴν βήρυλλόν με Τρύφων ἀνέπεισε Γαλήνην -εἶναι, καὶ μαλακαῖς χερσὶν ἀνῆκε κόμας· - -ἠνίδε καὶ χείλη νοτερὴν λειοῦντα ˘ θάλασσαν, -καὶ μαστούς, τοῖσιν θέλγω ἀνηνεμίην. -ἢν δέ μοι ἡ φθονερὴ νεύσῃ λίθος, ὡς ἐν ἑτοίμῳ -ὥρμημαι, γνώσῃ καὶ τάχα νηχομένην. -
-
- - -Crinagoras - - -Καλλιμάχου τὸ τορευτὸν ἔπος τόδε· δὴ γὰρ ἐπʼ αὐτῷ -ὡνὴρ τοὺς Μουσέων πάντας ἔσεισε κάλους. -ἀείδει δʼ Ἑκάλης τε φιλοξείνοιο καλιὴν -καὶ Θησεῖ Μαραθὼν οὓς ἐπέθηκε πόνους, -τοῦ σοὶ καὶ νεαρὸν χειρῶν σθένος εἴη ἀρέσθαι, -Μάρκελλε, κλεινοῦ τʼ αἶνον ἴσον βιότου. -
-
- - -Antiphilus - - -κἠν πρύμνῃ λαχέτω μέ ποτε στιβάς, αἳ θʼ ὑπὲρ αὐτῆς -ἠχεῦσαι ψακάδων τύμματι διφθερίδες, -καὶ πῦρ ἐκ μυλάκων βεβιημένον, ἥ τʼ ἐπὶ τούτων -χύτρη, καὶ κενεὸς πομφολύγων θόρυβος, -καί κε ῥυπῶντʼ ἐσίδοιμι διήκονον ἡ δὲ τράπεζα -ἔστω μοι στρωτὴ νηὸς ὕπερθε σανίς· -δὸς λάβε, καὶ ψιθύρισμα τὸ ναυτικόν· εἶχε τύχη τις -πρῴην τοιαύτη τὸν φιλόκοινον ἐμέ. -
-
- - -Anonymi epigrammatici - - -τὰ εἴκοσι τέσσαρα στοιχεῖα -τρηχὺν δʼ ὑπερβὰς φραγμὸν ἐξήνθιζε κλώψ. - -
-
- - -Bianor - - -κοῦρον; ἀποπλανίην ἐπιμάζιον Ἑρμώνακτα, -φεῦ, βρέφος ὡς ἀδίκως εἵλετε βουγενέες. -ἠγνοίησεν ὁ δειλὸς ἐς ὑμέας οἷα μελίσσας -ἐλθών· αἱ δʼ ἔχεων ἦτε χερειότεραι·, -ἀντὶ δέ οἱ θοίνης ἐνεμάξατε φοίνια κέντρα, -ὦ πικραί, γλυκερῆς ἀντίπαλοι χάριτος. -
-
- - -Antiphilus - - - - κρηναῖαι λιβάδες, τί πεφεύγατε; ποῦ τόσον ὕδωρ; -τίς φλὸξ ἀενάους ἔσβεσεν ἠελίου; - - δάκρυσιν Ἀγρικόλαο τετρύμεθα· πᾶν δʼ ὅσον ἡμῖν -ἦν ποτὸν ἡ κείνου διψὰς ἔχει σποδιή. -
-
- - -Antipater - - -κλεινὴν οὐκ ἀπόφημι· σὲ γὰρ προπάροιθεν ἔθηκαν -κλῄζεσθαι πτηνοί, Τῆνε, Βορηιάδαι. -ἀλλὰ καὶ Ὀρτυγίην εἶχε κλέος, οὔνομα δʼ αὐτῆς -ἤρχετο Ῥιπαίων ἄχρις Ὑπερβορέων. -νῦν δὲ σὺ μὲν ζώεις, ἡ δʼ οὐκέτι· τίς κεν ἐώλπει -ὄψεσθαι Τήνου Δῆλον ἐρημοτέρην; -
-
- - -Antiphilus - - -Καλχαδὼν δύστηνον ἐρωδιὸν ἐχθρὰ κολάζει· -τεῦ χάριν ὁ προδότης ὄρνις ἀεὶ λέγεται, -† Φοῖβοσἐρεῖ· τεναγῖτιν ὅτʼ εἰς ἅλα κῶλον ἐλαφρὸν -στήσας, ψαμμίτην δόρπον [ ἐθημολόγει, - -δυσμενέες τότʼ ἔβησαν ἐπὶ πτόλιν ἀντιπέρηθεν, -ὀψὲ διδασκόμενοι πεζοβατεῖν πέλαγος. -βάλλετε δὴ κακὸν ὄρνιν, ἐπεὶ βαρὺν ἤρατο μισθὸν -ἐκ δηίων, κόχλους καὶ βρύον, ὁ προδότης. -
-
- - -Antipater - - -καὶ Μακεδὼν ὁ σίδηρος ἐν ἄορι, καὶ τὰ πρὸς ἀλκὴν -τῆς ἀπʼ Ἀλεξάνδρου χειρὸς ἐπιστάμενος, -Πείσων, σὴν ποθέων ἱκόμην χέρα· τοῦτο δὲ φωνῶ· - - χαίρων δεξιτερὴν εὗρον ὀφειλομένην. - -
-
- - -Anonymi epigrammatici - - -Λευκάδος ἀντί με Καῖσαρ, ἰδʼ Ἀμβρακίης ἐριβώλου, -Θυρρείου τε πέλειν, ἀντὶ τʼ Ἀνακτορίου, -Ἄργεος Ἀμφιλόχου τε, καὶ ὁππόσα ῥαίσατο κύκλῳ -ἄστεʼ ἐπιθρώσκων δουρομανὴς πόλεμος, -εἵσατο Νικόπολιν, θείην πόλιν ἀντὶ δὲ νίκης -Φοῖβος ἄναξ ταύτην δέχνυται Ἀκτιάδος. -
-
- - -Marcus argentarius - - -Λάθριος Ἡράκλεια καλῶν ὑπὸ χείλεσιν ἕλκεις -κεῖνο· πάλαι κατὰ σοῦ τοῦτʼ ἐβόησε πόλις. -πῶς ἔτλης αἶσχος ῥέξαι κακόν; ἦ σε βιαίως -εἵλκυσέ τις θαλερῶν δραξάμενος πλοκάμων; -ἤ σοι τοὔνομα τερπνὸν ἀφʼ Ἡρακλῆος ἐχούσῃ, -μάχλε, φιλεῖν ἥβην κέκριται ἠιθέων; - -
-
- - -Crinagoras - - -νῆσον τήν, εἰ καί με περιγράψαντες † ἔχουσιν -μετρῆσαι, βαιήν, ἑπτὰ μόνον σταδίους, -ἔμπης καὶ τίκτουσαν ἐπʼ αὔλακα πῖαρ ἀρότρου -ὄψει, καὶ παντὸς κάρπιμον ἀκροδρύου, -καὶ πολλοῖς εὔαγρον ὑπʼ ἰχθύσι, καὶ ὑπὸ μαίρῃ -εὐάνεμον, λιμένων τʼ ἤπιον ἀτρεμίῃ, -ἀγχόθι Κορκύρης Φαιηκίδος. ἀλλὰ γελᾶσθαι -† τῷ ἔπʼ ἐωρίσθην, τοῦτʼ ἐθέμην ὄνομα. -
-
- - -Diodorus zonas - - -νύμφαι ἐποχθίδιαι, Νηρηίδες, εἴδετε Δάφνιν -χθιζόν, ἐπαχνιδίαν ὡς ἀπέλουσε κόνιν, -ὑμετέραις λιβάδεσσιν ὅτʼ ἔνθορε σειριόκαυτος, -ἠρέμα φοινιχθεὶς μᾶλα παρηίδια. -εἴπατέ μοι, καλὸς ἦν; ἢ ἐγὼ τράγος οὐκ ἄρα κνάμαν -μοῦνον ἐγυιώθην, ἀλλʼ ἔτι καὶ κραδίαν; -
-
- - -Antipater - - -ὁ σταδιεὺς Ἀρίης ὁ Μενεκλέος οὐ κατελέγχει -Περσέα, σὸν κτίστην, Ταρσὲ Κίλισσα πόλι. -τοῖοι γὰρ παιδὸς πτηνοὶ πόδες· οὐδʼ ἂν ἐκείνῳ -οὐδʼ αὐτὸς Περσεὺς νῶτον ἔδειξε θέων. -ἢ γὰρ ἐφʼ ὑσπλήγων ἢ τέρματος εἶδέ τις ἄκρου -ἠΐθεον, μέσσῳ δʼ οὒ ποτʼ ἐνὶ σταδίῳ. - -
-
- - -erycius - - -ὁ τράγος ὁ Κλήσωνος ὅλαν διὰ πάννυχον ὄρφναν -αἶγας ἀκοιμάτους θῆκε φριμασσόμενος -ὀδμὰ γάρ μιν ἔτυψε λύκου χιμαροσφακτῆρος -τηλόθι, πετραίαν αὖλιν ἀνερχομένου· -μέσφα κύνες κοίτας ἀνεγέρμονες ἐπτοίασαν -θῆρα μέγαν τραγίνους δʼ ὕπνος ἔμυσε κόρας. -
-
- - -Crinagoras - - -πλοῦς μοι ἐπʼ Ἰταλίην ἐντύνεται· ἐς γὰρ ἑταίρους -στέλλομαι, ὧν ἤδη δηρὸν ἄπειμι χρόνον. -διφέω δʼ ἡγητῆρα περίπλοον , ὅς μʼ ἐπὶ νήσους -Κυκλάδας, ἀρχαίην τʼ ἄξει ἐπὶ Σχερίην. -σὺν τί μοι ἀλλὰ Μένιππε λάβευ φίλος, ἵστορα κύκλον -γράψας, ὦ πάσης ἴδρι γεωγραφίης. -
-
- - -Crinagoras - - -Ῥιγηλὴ πασῶν ἔνοσι χθονός, εἴτε σε πόντου, -εἴτʼ ἀνέμων αἴρει ῥεῦμα τινασσόμενον, -οἰκία μοι ῥύευ νεοτευχέα· δεῖμα γὰρ οὔπω -ἄλλο τόσον γαίης οἶδʼ ἐλελιζομένης. -
-
- - -Philippus - - -τίς σε πάγος δυσέρημος, ἀνήλιος, ἐξέθρεψεν -Βορραίου Σκυθίης, ἄμπελον ἀγριάδα; -ἢ Κελτῶν νιφοβλῆτες ἀεὶ κρυμώδεες Ἄλπεις, -τῆς τε σιδηροτόκου βῶλος Ἰβηριάδος; -ἣ τοὺς ὀμφακόραγας ἐγείναο, τοὺς ἀπεπάντους -βότρυας, οἳ στυφελὴν ἐξέχεον σταγόνα. - -δίζημαι, Λυκόεργε, τεὰς χέρας, ὡς ἀπὸ ῥίζης -κλήματος ὠμοτόκου βλαστὸν ὅλον θερίσῃς. -
-
- - -Crinagoras - - -Ψιττακὸς ὁ βροτόγηρυς, ἀφεὶς λυγοτευχέα κύρτον, -ἤλυθεν ἐς δρυμοὺς ἀνθοφυεῖ πτέρυγι. -αἰεὶ δʼ ἐκμελετῶν ἀσπάσμασι Καίσαρα κλεινόν, -οὐδʼ ἀνʼ ὄρη λήθην ἤγαγεν οὐνόματος· -† ἔδραμε δʼ ὠκυδίδακτος ἅπας οἰωνός, βρίζων -τίς φθῆναι δύναται δαίμονι χαῖρʼ ἐνέπειν. -Ὀρφεὺς θῆρας ἔπεισεν ἐν οὔρεσι· καὶ δὲ σέ, Καῖσαρ, -νῦν ἀκέλευστος ἅπας ὄρνις ἀνακρέκεται. -
-
- - -Leonidas - - -τὸν φιλοπωριστὴν Δημόκριτον ἤν που ἐφεύρῃς, -ὤνθρωπʼ, ἄγγειλον τοῦτο τὸ κοῦφον ἔπος, -ὡς ἡ λευκοόπωρος ἐγὼ καὶ ἐφώριος ἤδη -κείνῳ συκοφορῶ τὰς ἀπύρους ἀκόλους· -σπευσάτω, οὐκ ὀχυρὴν γὰρ ἔχω στάσιν, εἴπερ ὀπώρην -ἀβλήτου χρῄζει δρέψαι ἀπʼ ἀκρεμόνος. -
-
- - -nicias - - -Αἰόλον ἱμεροθαλὲς ἔαρ φαίνουσα, μέλισσα -ξουθά, ἐφʼ ὡραίοις ἄνθεσι μαινομένα, -χῶρον ἐφʼ ἡδύπνοον πωτωμένα, ἔργα τίθευ σύ, -ὄφρα τεὸς πλήθῃ κηροπαγὴς θάλαμος. - -
-
- - -Callimachus - - -ἦλθε Θεαίτητος καθαρὴν ὁδὸν εἰ δʼ ἐπὶ κισσὸν -τὸν τεὸν οὐχ αὕτη, Βάκχε, κέλευθος ἄγει, -ἄλλων μὲν κήρυκες ἐπὶ βραχὺν οὔνομα καιρὸν -φθέγξονται, κείνου δʼ Ἑλλὰς ἀεὶ σοφίαν. -
-
- - -Callimachus - - -μικρή τις, Διόνυσε, καλὰ πρήσσοντι ποιητῇ -ῥῆσις ὁ μὲν νικῶ φησὶ τὸ μακρότατον -ᾧ δὲ σὺ μὴ πνεύσῃς ἐνδέξιος, ἤν τις ἔρηται, - - πῶς ἔβαλες; φησί, σκληρὰ τὰ γιγνόμενα. - -τῷ μερμηρίξαντι τὰ μἤνδικα τοῦτο γένοιτο -τοὖπος· ἐμοὶ δʼ, ὦναξ, ἡ βραχυσυλλαβίη. -
-
- - -Antipater - - -ἡ καὶ ἔτʼ ἐκ βρέφεος κοιμωμένη Ἀντιοδημὶς -πορφυρέων, Παφίης νοσσίς, ἐπὶ κροκύδων, -ἡ τακεραῖς λεύσσουσα κόραις μαλακώτερον ὕπνου, -Λύσιδος ἀλκυονίς, τερπνὸν ἄθυρμα Μέθης, -ὑδατίνους φορέουσα βραχίονας, ἣ μόνη ὀστοῦν -οὐ λάχεν ʽἦν γὰρ ὅλη τοὐν ταλάροισι γάλἀ, -Ἰταλίην ἤμειψεν, ἵνα πτολέμοιο καὶ αἰχμῆς -ἀμπαύσῃ Ῥώμην μαλθακίνῃ χάριτι. -
-
- - -Dioscorides - - -αὖλιν Ἀρισταγόρεω καὶ κτήματα μυρίος ἀρθείς, -Νεῖλε, μετʼ εἰκαίης ἐξεφόρησας ὁδοῦ. - -αὐτὸς δʼ οἰκείης ὁ γέρων ἐπενήξατο βώλου -ναυηγός, πάσης ἐλπίδος ὀλλυμένης, -γείτονος ἡμίθραυστον ἐπʼ αὔλιον, “ὦ πολύς, εἴπας, -μόχθος ἐμός, πολιῆς τʼ ἔργα περισσὰ χερός, -ὕδωρ πᾶν ἐγένεσθε· τὸ δὲ γλυκὺ τοῦτο γεωργοῖς -κῦμʼ ἐπʼ Ἀρισταγόρην ἔδραμε πικρότατον.” -
-
- - -Empedocles - - -ἤδη γάρ ποτʼ ἐγὼ γενόμην κοῦρός τε κόρη τε, -θάμνος τʼ, οἰωνός τε καὶ ἐξ ἁλὸς ἔμπυρος ἰχθῦς. -ὦ φίλοι, οἳ μέγα ἄστυ κατὰ ξανθοῦ Ἀκράγαντος -ναίετʼ ἀνʼ ἄκρα πόλιος, ἀγαθῶν μελεδήμονες ἔργων, χαίρετʼ· -ἐγὼ δʼ ὔμμιν θεὸς ἄμβροτος, οὐκέτι θνητός, -πωλεῦμαι μετὰ πᾶσι τετιμένος, ὥσπερ ἔοικεν, -ταινίαις τε περίστεπτος στέφεσίν τε θαλείοις, -
-
- - -Philodemus - - -Ξανθώ, κηρόπλαστε, μυρόχροε, μουσοπρόσωπε, -εὔλαλε, διπτερύγων καλὸν ἄγαλμα Πόθων, -ψῆλόν μοι χερσὶ δροσιναῖς μύρον· “ἐν μονοκλίνῳ -δεῖ με λιθοδμήτῳ δή ποτε πετριδίῳ -εὕδειν ἀθανάτως πουλὺν χρόνον” ᾆδε πάλιν μοι, -Ξανθάριον, ναί, ναί, τὸ γλυκὺ τοῦτο μέλος. -[οὐκ ἀίεις, ὤνθρωφʼ, ὁ τοκογλύφος; ἐν μονοκλίνῳ -δεῖ σὲ βιοῦν αἰεί, δύσμορε, πετριδίῳ.] ˘ - -
-
- - -Anonymi epigrammatici - - - -ἔκλαγεν ἐκ Θηβῶν μέγα Πίνδαρος· ἔπνεε τερπνὰ -ἡδυμελεῖ φθόγγῳ μοῦσα Σιμωνίδεω· -λάμπει Στησίχορός τε καὶ Ἴβυκος· ἦν γλυκὺς Ἀλκμὰν -λαρὰ δʼ ἀπὸ στομάτων φθέγξατο Βακχυλίδης· -πειθὼ Ἀνακρείοντι συνέσπετο· ποικίλα δʼ αὐδᾷ -Ἀλκαῖος † κύκνω Λέσβιος Αἰολίδι. -ἀνδρῶν δʼ οὐκ ἐνάτη Σαπφὼ πέλεν, ἀλλʼ ἐρατειναῖς -ἐν Μούσαις δεκάτη Μοῦσα καταγράφεται. -
-
- - -Lucillius - - -“ Μουσάων Ἑλικωνιάδων ἀρχώμεθʼ ἀείδειν -” ἔγραφε ποιμαίνων, ὡς λόγος, Ἡσίοδος. - - μῆνιν ἄειδε, θεά, καὶ “ἄνδρα μοι ἔννεπε, Μοῦσα -εἶπεν” Ὁμηρείῳ Καλλιόπη στόματι· -κἀμὲ δὲ δεῖ γράψαι τι προοίμιον. ἀλλά τί γράψω, -δεύτερον ἐκδιδόναι βιβλίον ἀρχόμενος; -“ Μοῦσαι Ὀλυμπιάδες, κοῦραι Διός, οὐκ ἂν ἐσώθην, -εἰ μή μοι Καῖσαρ χαλκὸν ἔδωκε Νέρων.” -
-
- - -Ammianus - - -μὴ σύ γʼ ἐπʼ ἀλλοτρίης, ὤνθρωφʼ, ἵζοιο τραπέζης, -ψωμὸν ὀνείδειον γαστρὶ χαριζόμενος, -ἄλλοτε μὲν κλαίοντι καὶ ἐστυγνωμένῳ ὄμμα -συγκλαίων, καὖθις σὺν γελόωντι γελῶν, -οὔτε σύ γε κλαυθμοῦ κεχρημένος, οὔτε γέλωτος, -καὶ κλαιωμιλίη, καὶ γελοωμιλίη. - -
-
- - -Anonymi epigrammatici - - -Ἡμάξευσα καὶ αὐτὸς ὁ τρισδύστηνος Ἄναξις -τοῦτον δύσζῳον κοὐ βίοτον βίοτον. -οὐ μὴν πολλὸν ἐπὶ χρόνον ἤλασα· λὰξ δὲ πατήσας -λυσσώδη ζωήν, ἤλυθον εἰς Ἀίδεω. -
-
- - -Philippus - - -οὐρανὸς ἄστρα τάχιον ἀποσβέσει, ἢ τάχα νυκτὸς -ἠέλιος φαιδρὴν ὄψιν ἀπεργάσεται, -καὶ γλυκὺ νᾶμα θάλασσα βροτοῖς ἀρυτήσιμον ἕξει, -καὶ νέκυς εἰς ζωῶν χῶρον ἀναδράμεται, -ἤ ποτε Μαιονίδαο βαθυκλεὲς οὔνομʼ Ὁμήρου -λήθη γηραλέων ἁρπάσεται σελίδων. -
-
- - -nicarchus ii - - -παρθένε Τριτογένεια, τί τὴν Κύπριν ἄρτι με λυπεῖς, -ἁρπάξασα δʼ ἐμὸν δῶρον ἔχεις παλάμῃ; -μέμνησαι τὸ πάροιθεν ἐν Ἰδαίοις σκοπέλοισιν -ὡς Πάρις οὐ σὲ καλήν, ἀλλʼ ἔμʼ ἐδογμάτισεν. -σὸν δόρυ καὶ σάκος ἐστὶν ἐμὸν δὲ τὸ μῆλον ὑπάρχει· -ἀρκεῖ τῷ μήλῳ κεῖνος ὁ πρὶν πόλεμος. -
-
- - -Claudius ptolemaeus - - -οἶδʼ ὅτι θνατὸς ἐγὼ καὶ ἐφάμερος· ἀλλʼ ὅταν ἄστρων -μαστεύω πυκινὰς ἀμφιδρόμους ἕλικας, -οὐκέτʼ ἐπιψαύω γαίης ποσίν, ἀλλὰ παρʼ αὐτῷ -Ζανὶ θεοτρεφέος πίμπλαμαι ἀμβροσίης. - -
-
- - -Leo philosophus - - - -ὧν ἥδε βίβλος ἔνδον ὠδίνω, φίλε, -βαθὺς χαρακτὴρ καὶ περισκελὴς ἄγαν· -δεῖται κολυμβητοῦ δὲ πάντως Δηλίου. -εἰ δʼ αὖ κυβιστήσει τις εἰς ἐμοὺς μυχοὺς -καὶ πᾶν μεταλλεύσειεν ἀκριβῶς βάθος, -γεωμετρῶν τὰ πρῶτα λήψεται γέρα, -σοφὸς δʼ ἀναμφίλεκτος εἰσκριθήσεται. -τούτων δὲ μάρτυς ἐγγυητής τε Πλάτων· -
-
- - -Leo philosophus - - -σχῆμα παλαιοτάτων ἀνδρῶν κηρύκιον ἄθρει, -Θρινακίης οἰκιστὰ Κορίνθιε, ὃς ποτʼ ἔπινες -ἀμφιβόητα ῥέεθρα Συρηκοσίης Ἀρεθούσης. -
-
- - -Anonymi epigrammatici - - - -μὴν ὑπάτων πρῶτος. ὁ δὲ δεύτερος αὔλακα τέμνει. -ὁ τρίτος Αὐσονίων γενεὴν ἐπὶ μῶλον ἐγείρει. -τέτρατος ἀγγέλλει ῥοδοδάκτυλον εἴαρος ὥρην. -εἰμὶ ῥόδων γενέτης. καὶ ἐγὼ κρίνα λευκὰ κομίζω. -οὗτος ἀμαλλοδέτης. τὰ δʼ ἐμὰ πτερὰ Νεῖλον ἐγείρει. -οὗτος ἐρισταφύλῳ πεφιλημένος ἔπλετο Βάκχῳ. -τεύχω δʼ οἶνον ἐγὼ μελιηδέα, χάρμα βροτοῖσι. -δαῖτα φέρω χαρίεσσαν ἐς οὔνομα φωτὸς ἑκάστου. -φορμίζειν δεδάηκα καὶ ὑπνώοντας ἐγείρειν. - -
-
- - -Anonymi epigrammatici - - -τοξότα, Πιερίδων μεδέων, ἑκατηβόλε Φοῖβε, -εἰπὲ κασιγνήτῃ, κρατεροὺς ἵνα θῆρας ἐγείρῃ, -ὅσσον ἐπιψαῦσαι μερόπων δέμας, ὅσσον ἀῦσαι -λαῶν τερπομένων ἱερὸν στόμα· μηδὲ νοήσω, -Ζηνὸς Μειλιχίοιο λαχὼν θρόνον, ἀνέρος οἶτον -
-
- - -Anonymi epigrammatici - - -Ἀρμενίων τάδε φῦλα καὶ ἄλκιμον ἔθνος Ἰβήρων, -Χριστοῦ ζῆλον ἔχοντες ἑκούσιον ἐς ζυγὸν ἦλθον, -θεσμῷ ὑποδρήσσοντες ἀνικήτων βασιλήων. -
-
- - -Anonymi epigrammatici - - - -ὦ φίλος, εἰ σοφὸς εἶ, λάβε μʼ ἐς χέρας· εἰ δέ γε πάμπαν -νῆϊς ἔφυς Μουσέων, ῥῖψον ἃ μὴ νοέῃς. -εἰμὶ γὰρ οὐ πάντεσσι βατός· παῦροι δʼ ἀγάσαντο -Θουκυδίδην Ὀλόρου, Κεκροπίδην τὸ γένος. -
-
- - -Anonymi epigrammatici - - -Εὔνομον, ὤπολλον, σύ μὲν οἶσθά με, πῶς ποτʼ ἐνίκων -Σπάρτιν ὁ Λοκρὸς ἐγώ· πευθομένοις δʼ ἐνέπω. - -αἰόλον ἐν κιθάρᾳ νόμον ἔκρεκον, ἐν δὲ μεσεύσᾳ -ᾠδᾷ μοι χορδὰν πλᾶκτρον ἀπεκρέμασεν. -καί μοι φθόγγον ἑτοῖμον ὁπανίκα καιρὸς ἀπῄτει, -εἰς ἀκοὰς ῥυθμῶν τὠτρεκὲς οὐκ ἔνεμεν -καί τις ἀπʼ αὐτομάτω κιθάρας ἐπὶ πῆχυν ἐπιπτὰς -τέττιξ ἐπλήρου τοὐλλιπὲς ἁρμονίας. -νεῦρα γὰρ ἓξ ἐτίνασσον ὅθʼ ἑβδομάτας δὲ μελοίμαν -χορδᾶς, τὰν τούτω γῆρυν ἐκιχράμεθα· -πρὸς γὰρ ἐμὰν μελέταν ὁ μεσαμβρινὸς οὔρεσιν ᾠδὸς -τῆνο τὸ ποιμενικὸν φθέγμα μεθηρμόσατο, -καὶ μὲν ὅτε φθέγγοιτο σὺν ἀψύχοις τόκα νευραῖς -τῷ μεταβαλλομένῳ συμμετέπιπτε θρόῳ. -τοὔνεκα συμφώνῳ μὲν ἔχω χάριν ὃς δὲ τυπωθεὶς -χάλκεος ἁμετέρας ἕζεθʼ ὑπὲρ κιθάρας, -
-
- - -Anonymi epigrammatici - - - -τέσσαρές εἰσιν Ἔρωτες· ὁ μὲν στέφος ἀμφικαλύπτει -μητρὸς ἑῆς· ὁ δὲ χεῖλος ἔχει ποτὶ πίδακι μαζοῦ· -οἱ δὲ δύω παίζουσι παρʼ ἴχνεσιν εἷμα δὲ κρύπτει -μηρῷ γείτονα χῶρον ὅλης γυμνῆς Ἀφροδίτης. -
-
- - -Cometas chartularius - - - - εἰπὲ νομεῦ, τίνος εἰσὶ φυτῶν στίχες; αἱ μὲν ἐλαῖαι, -Παλλάδος· αἱ δὲ πέριξ ἡμερίδες, Βρομίου. - - καὶ τίνος οἱ στάχυες; Δημήτερος. ἄνθεα ποίων -εἰσὶ θεῶν; Ἥρης καὶ ῥοδέης Παφίης. - - Πὰν φίλε, πηκτίδα μίμνε τεοῖς ἐπὶ χείλεσι σύρων· -ἠχὼ γὰρ δήεις τοῖσδʼ ἐνὶ θειλοπέδοις. - -
-
- - -eutolmius - - - -Βάκχῳ καὶ Νύμφαις μέσος ἵσταμαι· ἐν δὲ κυπέλλοις -αἰεὶ τόνδε χέω τὸν παραλειπόμενον. -
-
- - -Alcaeus - - -οἷον ὁρῇς, ὦ ξεῖνε, τὸ χάλκεον εἰκόνι λῆμα -Κλειτομάχου, τοίαν Ἑλλὰς ἐσεῖδε βίαν -ἄρτι γὰρ αἱματόεντα χερῶν ἀπελύετο πυγμᾶς -ἔντεα, καὶ γοργῷ μάρνατο παγκρατίῳ· -τὸ τρίτον οὐκ ἐκόνισεν ἐπωμίδας, ἀλλὰ παλαίσας -ἀπτὼς, τοὺς τρισσοὺς Ἰσθμόθεν εἷλε πόνους. -μοῦνος δʼ Ἑλλάνων τόδʼ ἔχει γέρας· ἑπτάπυλοι δὲ -Θῆβαι καὶ γενέτωρ ἐστέφεθʼ Ἑρμοκράτης. -
-
- - -Anonymi epigrammatici - - - -αὐτὴν μητρυιὴν τεχνήσατο· τοὔνεκα μαζὸν -εἰς νόθον ὁ πλάστης οὐ προσέθηκε γάλα. -
-
- - -Anonymi epigrammatici - - - - -ἡ τέχνη συνάγειρεν ἃ μὴ φύσις εἶπεν ὁ πλάστης, - - μῆτερ νόσφι τόκων, νυμφίε νόσφι γάμων. - - -
-
- - -Anonymi epigrammatici - - - -Ἄρεα καὶ Παφίην ὁ ζωγράφος εἰς μέσον οἴκου -ἀμφιπεριπλέγδην γέγραφεν ἀμφοτέρους -ἐκ θυρίδος δὲ μολὼν Φαέθων πολυπάμφαος αἴγλῃ -ἔστη ἀμηχανόων ἀμφοτέρους σκοπέων. -ἠέλιος βαρύμηνις ἕως τίνος; οὐδʼ ἐπὶ κηροῦ -ἤθελεν ἀψύχου τὸν χόλον ἐξελάσαι. -
-
- - -Anonymi epigrammatici - - - -ὦ πόσον εὐήθης ὁ ζωγράφος, ὅττι χαράσσει -κοίρανον εἰρήνης ἀσπίδι τικτόμενον. -
-
- - -Anonymi epigrammatici - - - -οἶκτον ὁμοῦ καὶ λύσσαν ἐτήτυμον ἔνθεος ἀνὴρ -μαρμάρῳ ἐγκατέμιξε, βιαζομένην δʼ ὑπὸ τέχνης -λαϊνέην Μήδειαν ὅλης ἔμνησεν ἀνίης. -
-
- - -Anonymi epigrammatici - - -ζωγράφε τὰν μορφὰν ἀπομάξας, αἴθʼ ἐνὶ κηρῷ -καὶ ψυχὰν ἐδάης Σωκρατικὰν βαλέειν. -
-
- - -Anonymi epigrammatici - - - -

αὐτὸς ἑαυτὸν ἐν εἰκόνι γράψεν Ἀπελλῆς. - -

-
-
- - -Anonymi epigrammatici - - - -τόνδε δοριστέφανος Σπάρτα Χείλωνα φύτευσεν, -ὃς τῶν ἑπτὰ Σοφῶν πρῶτος ἔφυ σοφίᾳ. -
-
- - -Cometas scholasticus - - - -νωθρὸς ἐγὼ τελέθεσκον ἀπʼ ἰξύος ἐς πόδας ἄκρους -τῆς πρὶν ἐνεργείης δηρὸν ἀτεμβόμενος, -ζωῆς καὶ θανάτοιο μεταίχμιον, Ἄϊδι γείτων, -μοῦνον ἀναπνείων, τἆλλα δὲ πάντα νέκυς. -ἀλλὰ σοφός με Φίλιππος, ὃν ἐν γραφίδεσσι δοκεύεις, -ζώγρησεν, κρυερὴν νοῦσον ἀκεσσάμενος· -αὖθις δʼ Ἀντωνῖνος, ἅπερ πάρος, ἐν χθονὶ βαίνω, -καὶ ποσὶ πεζεύω, καὶ ὅλος αἰσθάνομαι. -
-
- - -theocritus - - -τὸν τῶ Ζανὸς ὅδʼ ὗμιν υἱὸν ὡνήρ, -τὸν λειοντομάχαν, τὸν ὀξύχειρα, -πρᾶτος τῶν ἐπάνωθε μουσοποιῶν -Πείσανδρος συνέγραψεν οὑκ Καμείρου, -χὄσσους ἐξεπόνασεν εἶπʼ ἀέθλους· -τοῦτον δʼ αὐτὸν ὁ δᾶμος, ὡς σάφʼ εἰδῇς, -ἔστασ’ ἐνθάδε χάλκεον ποήσας, -πολλοῖς μησὶν ὄπισθε κἠνιαυτοῖς. - -
-
- - -theocritus - - -θᾶσαι τὸν ἀνδριάντα τοῦτον, ὦ ξένε, -σπουδᾷ, καὶ λέγʼ, ἐπὰν ἐς οἶκον ἔνθῃς, -“ Ἀνακρέοντος εἰκόνʼ εἶδον ἐν Τέῳ, -τῶν πρόσθʼ εἴ τι περισσὸν ᾠδοποιοῦ.” -προσθεὶς δὲ χὤτι τοῖς νέοισιν ἅδετο, -ἐρεῖς ἀτρεκέως ὅλον τὸν ἄνδρα. -
-
- - -theocritus - - -ἅ τε φωνὰ Δώριος, χὠνὴρ ὁ τὰν κωμῳδίαν -εὑρὼν Ἐπίχαρμος. -ὦ Βάκχε, χάλκεόν νιν ἀντʼ ἀλαθινοῦ -τὶν ὧδʼ ἀνέθηκαν -τοὶ Συρακόσσαις ἐνίδρυνται, πελωρίστᾳ πόλει, -οἷʼ ἀνδρὶ πολίτᾳ· -σοφῶν ἔοικε ῥημάτων μεμναμένους -τελεῖν ἐπίχειρα· -πολλὰ γὰρ ποττὰν ζόαν τοῖς παισὶν εἶπε χρήσιμα· -μεγάλα χάρις αὐτῷ. -
-
- - -Anonymi epigrammatici - - -τὸ ξόανον τὸ περισσὸν Ἀεξιμένης Ἀφροδίτᾳ -εἵσατο, τῆς πάσης ναυτιλίης φύλακι. -χαῖρʼ , ὦ πότνια Κύπρι, διδοῦσα δὲ κέρδεα, πλοῦτον -ἄρμενον, εἰδήσεις ναῦς ὅτι κοινότατον. - -
-
- - -euenus - - -ἅ ποτε παρθενικαῖσιν ἱλασκομένα παλάμῃσιν -Κύπριδα, σὺν πεύκαις καὶ γάμον εὐξαμένα, -κουριδίους ἤδη θαλάμῳ λύσασα χιτῶνας, -ἀνδρὸς ἄφαρ μηρῶν ἐξελόχευσα τύπους· -νυμφίος ἐκ νύμφης δὲ κικλήσκομαι, ἐκ δʼ Ἀφροδίτης -Ἄρεα καὶ βωμοὺς ἔστεφον Ἡρακλέους. -Θῆβαι Τειρεσίην ἔλεγόν ποτε· νῦν δέ με Χαλκὶς -τὴν πάρος ἐν μίτραις ἠσπάσατʼ ἐν χλαμύδι. -
-
- - -Antipater - - -πέντε Διωνύσοιο θεραπνίδες αἵδε Σαώτεω -ἐντύνουσι θοᾶς ἔργα χοροστασίης· -ἁ μὲν ἀερτάζουσα δέμας βλοσυροῖο λέοντος, -ἁ δὲ Λυκαόνιον καλλίκερων ἔλαφον, -ἁ τριτάτα δʼ οἰωνὸν ἐΰπτερον, ἁ δὲ τετάρτα -τύμπανον, ἁ πέμπτα χαλκοβαρὲς κρόταλον -πᾶσαι φοιταλέαι τε παρηόριόν τε νόημα, -ἐκπλαγέες λύσσᾳ δαίμονος εὐιάδι. -
-
- - -nossis - - -Θαυμαρέτας μορφὰν ὁ πίναξ ἔχει· εὖ γε τὸ γαῦρον -τεῦξε τὸ θʼ ὡραῖον τᾶς ἀγανοβλεφάρου. -σαίνοι κέν σ’ ἐσιδοῖσα καὶ οἰκοφύλαξ σκυλάκαινα, -δέσποιναν μελάθρων οἰομένα ποθορῆν. -
-
- - -nossis - - -τὸν πίνακα ξανθᾶς Καλλὼ δόμον εἰς Ἀφροδίτας -εἰκόνα γραψαμένα πάντʼ ἀνέθηκεν ἴσαν. - -ὡς ἀγανῶς ἕστακεν ἴδʼ ἁ χάρις ἁλίκον ἀνθεῖ. -χαιρέτω· οὔ τινα γὰρ μέμψιν ἔχει βιοτᾶς. -
-
- - -Anonymi epigrammatici - - - -ἣν τὸ πάρος φιλέεσκεν Ἄρης, σκοπίαζε.Κυθείρην -ἐνθάδε λουομένην νάμασι φαιδροτάτοις· -δέρκεο νηχομένην μὴ δείδιθι· οὐ γὰρ Ἀθήνην -παρθένον εἰσοράᾳς, οἷά τε Τειρεσίας. -
-
- - -Anonymi epigrammatici - - -αἱ Χάριτες λούσαντο· ἀμειψάμεναι δὲ λοετρὸν -δῶκαν ἑῶν ῥεθέων ὕδασιν ἀγλαΐην. -
-
- - -Anonymi epigrammatici - - -ἢ τοῖον Κυθέρειαν ὕδωρ τέκεν, ἢ Κυθέρεια -τοῖον τεῦξεν ὕδωρ, ὃν χρόα λουσαμένη. -
-
- - -Anonymi epigrammatici - - -τῶν Χαρίτων τόδε λουτρὸν ἀθύρματα· καὶ γὰρ ἐκείνας -μοῦνας ἔσω παίσδειν τὰς Χάριτας δέχεται. -
-
- - -Anonymi epigrammatici - - -ὄντως δὴ Χαρίτων λουτρὸν τόδε· οὐδὲ γὰρ ἄλλους -πλείους χωρῆσαι τοῦτο τριῶν δύναται. -
-
- - -Anonymi epigrammatici - - -μικρὰ μὲν ἔργα τάδʼ ἐστίν, ἔχει δʼ ἡδεῖαν ὀπωπὴν, -ὡς ῥόδον ἐν κήποις, ὡς ἴον ἐν ταλάροις. - -
-
- - -Anonymi epigrammatici - - -ἐν μικρῷ μεγάλη λουτρῷ χάρις. ἐν δʼ ἐλαχίστῳ -νάματι λουομένοις ἡδὺς ἔπεστιν Ἔρως. -
-
- - -Anonymi epigrammatici - - -ὡς δένδρον βραχύφυλλον, ἔχει δʼ ἡδεῖαν ὀδωδήν, -οὕτως λουτρὰ τάδε μικρὰ μέν, ἀλλὰ φίλα. -
-
- - -Anonymi epigrammatici - - - -τῆς Μαρίης τὸ λοετρὸν ἰδὼν ὑπεδάκρυε Μῶμος, -εἰπών, ὡς Μαρίην, καὶ σὲ παρερχόμεθα. - -
-
- - -Leontius minotaurus - - - -μὴ νεμέσα, Ζεύξιππε, παραντέλλοντι λοετρῷ· -καὶ μεγάλην παρʼ Ἅμαξαν ἐρωτύλος ἡδὺ φαείνει. -
-
- - -Anonymi epigrammatici - - - -χῶρος, τίς μερόπων σε λιπαυγέα τὸ πρὶν ἐόντα -πλούσιον ἐν φέγγει θήκατο λουομένοις; -τίς δὲ καὶ αἰθαλόεντι ῥύπῳ πεπαλαγμένον ἄρτι, -κεῖνον ἀιστώσας, φαιδρὸν ἔδειξε δόμον; -φρὴν σοφὴ ὡς πᾶσιν Θεοδωριάς, ὣς ἐτεὸν δὴ -κἀν τούτῳ καθαρὴν δεικνύμενος κραδίην - -ὃς γὰρ ἐὼν πόλιος κτεάνων ταμίης τε πατήρ τε, -κέρδεσιν ἐξ αὐτῶν οὐκ ἐμίηνε χέρας. -ἀλλὰ θεὸς φιλόπατριν, ἐρισθενές, ἄφθιτε Χριστέ, -πήματος αὐτὸν ἄτερ σῷζε τεῇ παλάμῃ. -
-
- - -Anonymi epigrammatici - - -ἐνθάδε λουσαμένων Χαρίτων ποτέ, θέσκελα πέπλα -βαιὸς Ἔρως ἔκλεψε, καὶ ᾤχετο· τὰς δʼ ἔλιπʼ αὐτοῦ -γυμνάς, αἰδομένας θυρέων ἔκτοσθε φανῆναι. -
-
- - -Anonymi epigrammatici - - - -τὸν ποταμόν, βαλανεῦ, τίς ἐτείχισε; τίς βαλανεῖον -τὴν κρήνην ψευδῶς τήνδε μετωνόμασεν; -αἰόλος Ἱπποτάδης φίλος ἀθανάτοισι θεοῖσιν -ὧδε μετοικήσας ἤγαγε τοὺς ἀνέμους. -πρὸς τί δὲ καὶ σανίδες δύο τοῖς ποσὶν αἵδʼ ὑπόκεινται; -οὐ διὰ τὴν θέρμην, τῆς χιόνος δʼ ἕνεκα. -Φρίξου καὶ Νάρκης οὗτος τόπος. ἀλλʼ ἐπίγραψον· - - τῷ Μεσορὶ λοῦσαι· πνεῖ γὰρ ἔσω Βορέας. - -
-
- - -Anonymi epigrammatici - - - -λωτὸν ἐρεπτομένους προτέρων οὐ ψεύσατο μῦθος· -πίστιν ἀληθείης τοῦτο τὸ λουτρὸν ἔχει. -εἰ γὰρ ἅπαξ καθαροῖσι λοέσσεται ὕδασιν ἀνήρ, -οὐ ποθέει πάτρην, οὐκ ἐθέλει γενέτας. - -
-
- - -Agathias scholasticus - - - -νῦν ἔγνων, Κυθέρεια, πόθεν νίκησας ἀγῶνα, -τὴν πρὶν Ἀλεξάνδρου ψῆφον ὑφαρπαμένη. -ἐνθάδε γὰρ τέγγουσα τεὸν δέμας, εὗρες ἐλέγξαι -Ἥρην Ἰναχίοις χεύμασι λουσαμένην. -νίκησεν τὸ λοετρὸν ἔοικε δὲ τοῦτο βοώσῃ -Παλλάς· ἐνικήθην ὕδασιν, οὐ Παφίῃ. - -
-
- - -Paulus silentiarius - - - -ἄγχι μὲν ἐλπὶς ἔρωτος· ἑλεῖν δʼ οὐκ ἔστι γυναῖκας· -εἶρξε πυλὶς Παφίην τὴν μεγάλην ὀλίγη. -ἀλλʼ ἔμπης γλυκὺ τοῦτο ποθοβλήτοις γὰρ ἐπʼ ἔργοις -ἐλπὶς ἀληθείης ἐστὶ μελιχροτέρη. -
-
- - -Anonymi epigrammatici - - - -Ὅσσαις θηλυτέραις ἐστὶν πόθος ʽ ἔστι δὲ πάσαισʼ, -δεῦρʼ ἴτε, φαιδροτέρης τευξόμεναι χάριτος. -χἠ μὲν ἔχουσα πόσιν, τέρψει πόσιν ἡ δʼ ἔτι κούρη -ὀτρυνέει πλείστους ἕδνα πορεῖν λεχέων -ἡ δὲ φέρουσα πόρους ἀπὸ. σώματος, ἑσμὸν ἐραστῶν -ἕξει ἐπὶ προθύροις, ἐνθάδε λουσαμένη. -
-
- - -Anonymi epigrammatici - - - -εἴτε σε κουριδίης ἀλόχου γλυκὺς ἵμερος ἴσχει, -λούεο, φαιδρότερος τῇδε φανησόμενος· - -εἴτε σε μισθοφόρους ἐπὶ μαχλάδας οἶστρος ὀρίνει, -λήψῃ, κοὐ δώσεις, ἐνθάδε λουσάμενος. -
-
- - -Flavius cyrus - - - -Κύπρις σὺν Χαρίτεσσι καὶ υἱέι χρυσοβελέμνῳ -ἐνθάδε λουσαμένη, μισθὸν ἔδωκε χάριν. -
-
- - -Leontius minotaurus - - - -Δείματό με ξυνοῖο παρὰ προθύροισι λοετροῦ -ἀστὸς ἀνήρ, ἀρετῆς εἵνεκεν, οὐκ ἔριδος. -κεῖνο μέλοι πλεόνεσσιν ἐγὼ δʼ ὀλίγοις τε φίλοις τε -ἐντύνω προχοὰς καὶ μύρα καὶ χάριτας,. -
-
- - -Macedonius ii - - - -πιστότατος μερόπων τις ἔοι πυλαωρὸς ἐμεῖο, -κρίνων λουομένων καιρὸν ἐσηλυσίης, -μή τινα Νηιάδων τις ἐμοῖς ἐνὶ χεύμασι γυμνήν, -ἢ μετὰ καλλικόμων Κύπριν ἴδοι Χαρίτων -οὐκ ἐθέλων χαλεποὶ δὲ θεοὶ φαίνεσθαι ἐναργεῖς· - -τίς γὰρ Ὁμηρείοις ἀντιφέροιτο λόγοις; -
-
- - -Marianus - - - -μητέρα Κύπριν ἔλουσεν Ἔρως ποτὲ τῷδε λοετρῷ, -αὐτὸς ὑποφλέξας λαμπάδι καλὸν ὕδωρ. - -ἱδρὼς δʼ ἀμβροσίοιο χυθεὶς χροὸς ἄμμιγα λευκοῖς -ὕδασι, φεῦ πνοιῆς ὅσσον ἀνῆψεν ἔαρ· -ἔνθεν ἀεὶ ῥοδόεσσαν ἀναζείουσιν ἀυτμήν, -ὡς ἔτι τῆς χρυσῆς λουομένης Παφίης, -
-
- - -Marianus - - - -τᾷδʼ ὑπὸ τὰς πλατάνους ἁπαλῷ τετρυμένος ὕπνῳ -εὗδεν Ἔρως, Νύμφαις λαμπάδα παρθέμενος. -νύμφαι δʼ ἀλλήλῃσι, “τί μέλλομεν; αἴθε δὲ τούτῳ -σβέσσαμεν,” εἶπον, ὁμοῦ πῦρ κραδίης μερόπων. - -λαμπὰς δʼ ὡς ἔφλεξε καὶ ὕδατα, θερμὸν ἐκεῖθεν -νύμφαι Ἐρωτιάδες λουτροχοεῦσιν ὕδωρ. -
-
- - -Joannes Βarbucallus - - - -ἵππον ἐϋρρείτην χρονίᾐ μάστιγι δαμέντα -χρυσείῳ πολύολβος ἄναξ ἤγειρε χαλινῷ. -
-
- - -Joannes Βarbucallus - - - -αἴθε σέ, Πίνδαρε, μᾶλλον ἐμοῖς ἐκάθηρα ῥεέθροις, -καί κεν ἄριστον ὕδωρ τοὐμὸν ἔφησθα μόνον. - -
-
- - -Leontius minotaurus - - - -θερμὰ τάδʼ ἀτρεκέως βασιλήια· τήνδε γὰρ αὐτοῖς -οἱ πρὶν ἀγασσάμενοι θῆκαν ἐπωνυμίην. -οὐ γὰρ ὑπὸ βροτέῳ πυρὶ θάλπεται ἀγλαὸν ὕδωρ, -αὐτομάτη δὲ λιβὰς τίκτεται αἰθομένη· -οὐδὲ ῥόου ψυχροῦ ποτιδεύεαι ἀμφὶ λοετρά, -ἀλλʼ οἷον ποθέεις, τοῖον ὑπεκφέρεται. -
-
- - -Agathias scholasticus - - - -χῶρος ἐγὼ Δαναοῖς μεμελημένος, ἔνθα μολόντες -τῆς Ποδαλειρείης ἐξελάθοντο τέχνης. -ἕλκεα γὰρ μετὰ δῆριν ἐμοῖς ἀκέσαντο ῥεέθροις, -βαρβαρικῆς λόγχης ἰὸν ἀπωσάμενοι. -ἔνθεν ἀεξήθην ὀροφηφόρος· ἀντὶ δὲ τιμῆς -τὴν Ἀγαμεμνονέην εὗρον ἐπωνυμίην. -
-
- - -Anonymi epigrammatici - - - -χθὼν μυχάτων γυάλων κοιλώμασιν ἀέναον πῦρ -ἔστʼ ἂν ἔχῃ, φλοξὶν δὲ περιζείῃ κρυφίαισιν, -ἀτμὸς ἄνω βαίνων εἰς αἰθέρα θερμός, ἔνερθεν -θλιβόμενος, πυριθαλπὲς ἐπεύγεται ἰκμάσιν ὕδωρ. -
-
- - -Damocharis - - - -Ἥρῃ καὶ Παφίῃ καὶ Παλλάδι τοῦτο λοετρὸν -ὥς ποτε τὸ χρυσοῦν ἤρεσε μῆλον ἔχειν· -καὶ τάχα τῆς μορφῆς κρίσις ἔσσεται οὐ Πάρις αὐταῖς, -εἰκὼν δʼ ἀργυφέοις νάμασι δεικνυμένη. - -
-
- - -Anonymi epigrammatici - - -ὤμοσαν αἱ Χάριτες φερεαυγέα κοίρανον αἴγλης -ἐνθάδε ναιετάειν ἢ παρὰ τῇ Παφίῃ. -
-
- - -Anonymi epigrammatici - - -δάφνης εὐπετάλοιο φερώνυμόν ἐστι λοετρόν. -
-
- - -Anonymi epigrammatici - - -τοῦτο ἰδὼν τὸ λοετρὸν ὁ πάνσοφος εἶπεν Ὅμηρος· - - νηπενθές ἄχολόν τε, κακῶν ἐπίληθον ἁπάντων. - -
-
- - -Anonymi epigrammatici - - -ἐνθάδε λουσαμένη δέμας ἄμβροτον αὐτίκα Κύπρις -δεῖξεν Ἀλεξάνδρῳ, καὶ ἀέθλιον ἥρπασε μῆλον. -
-
- - -Anonymi epigrammatici - - -αἱ τρεῖς Ὀρχομενοῦ Χάριτες τὸ λοετρὸν ἔτευξαν -τοὔνεκα χωρῆσαι τέσσαρας οὐ δύναται. -
-
- - -Anonymi epigrammatici - - -Κύπρις, Ἔρως, Χάριτες, Νύμφαι, Διόνυσος, Ἀπόλλων -ὤμοσαν ἀλλήλοις ἐνθάδε ναιετάειν. -
-
- - -Anonymi epigrammatici - - -ἀθάνατοι λούονται ἀνοιγομένου βαλανείου, -πέμπτῃ δʼ ἡμίθεοι, μετέπειτα δὲ πήματα πάντα. - -
-
- - -Agathias scholasticus - - - -καὶ σὺ μεθʼ Ἑσπερίην ὑψαύχενα, καὶ μετὰ Μήδων -ἔθνεα καὶ πᾶσαν βαρβαρικὴν ἀγέλην, -Σαγγάριε, κρατερῇσι ῥοὰς ἀψῖσι πεδηθείς, -οὕτω ἐδουλώθης κοιρανικῇ παλάμῃ· -ὁ πρὶν δὲ σκαφέεσσιν ἀνέμβατος, ὁ πρὶν ἀτειρὴς, -κεῖσαι λαϊνέῃ σφιγκτὸς ἀλυκτοπέδῃ. -
-
- - -Agathias scholasticus - - - -πᾶν τὸ βροτῶν σπατάλημα, καὶ ἡ πολύολβος ἐδωδὴ -ἐνθάδε κρινομένη τὴν πρὶν ὄλεσσε χάριν. -οἱ γὰρ φασιανοί τε καὶ ἰχθύες, αἳ θʼ ὑπὲρ ἴγδιν -τρίψιες, ἥ τε τόση βρωματομιξαπάτη -γίνεται ἐνθάδε κόπρος· ἀποσσεύει δʼ ἄρα γαστὴρ -ὁππόσα πειναλέη δέξατο λαυκανίη. -ὀψὲ δὲ γινώσκει τις, ὅτʼ ἄφρονα μῆτιν ἀείρων -χρυσοῦ τοσσατίου τὴν κόνιν ἐπρίατο, -
-
- - -Agathias scholasticus - - - -τί στενάχεις κεφαλὴν κεκακωμένος; ἐς τί δὲ πικρὰ -οἰμώζεις, μελέων πάγχυ βαρυνομένων; -ἐς τί δὲ γαστέρα σεῖο ῥαπίσμασιν ἀμφιπατάσσεις, -ἐκθλίψαι δοκέων μάστακος ἐργασίην; -μόχθων τοσσατίων οὔ σοι χρέος, εἰ παρὰ δαιτὶ -μὴ τοῦ ἀναγκαίου πουλὺ παρεξετάθης. - -ἀλλʼ ἐπὶ μὲν στιβάδος φρονέεις μέγα, καὶ στόμα τέρπεις -βρώμασιν, εὐτυχίην κεῖνα λογιζόμενος· -ἐνθάδε δʼ ἀσχάλλεις· μούνη δʼ ἀλιτήματα λαιμοῦ -ἡ γαστὴρ τίνει πολλάκι τυπτομένη. -
-
- - -Agathias scholasticus - - - -εὖγε μάκαρ τλήθυμε γεωπόνε· σοὶ βίος αἰεὶ -μίμνειν καὶ σκαπάνης ἄλγεα καὶ πενίης· -λιτὰ δέ σοι καὶ δεῖπνα, καὶ ἐν ξυλόχοισι καθεύδεις, -ὕδατος ἐμπλήσας λαιμὸν ἀμετροπότην. -ἔμπης ἀρτίπος ἐσσί, καὶ ἐνθάδε βαιὰ καθεσθεὶς -αὐτίκα γαστέρα σὴν θῆκας ἐλαφροτάτην -οὐδὲ καταψήχεις ἱερὴν ῥάχιν, οὐδέ τι μηροὺς -τύπτεις, ἀρτεμίης φόρτον ἀρωσάμενος. -τλήμονες οἱ πλουτοῦντες ἰδʼ οἱ ˘ κείνοισι συνόντες -οἷς πλέον ἀρτεμίης εὔαδεν εἰλαπίνη. -
-
- - -Macedonius ii - - -Τμώλῳ ὑπʼ ἀνθεμόεντι, ῥοὴν πάρα Μαίονος Ἕρμου, -Σάρδιες, ἡ Λυδῶν ἔξοχός εἰμι πόλις. -μάρτυς ἐγὼ πρώτη γενόμην Διός· οὐ γὰρ ἐλέγχειν -λάθριον υἷα Ῥέης ἤθελον ἡμετέρης. -αὐτὴ καὶ Βρομίῳ γενόμην τροφός· ἐν δὲ κεραυνῷ -ἔδρακον εὐρυτέρῳ φωτὶ φαεινόμενον· -πρώταις δʼ ἡμετέρῃσιν ἐν ὀργάσιν οἰνὰς ὀπώρη -οὔθατος ἐκ βοτρύων ξανθὸν ἄμελξε γάνος. -πάντα με κοσμήσαντο· πολὺς δέ με πολλάκις αἰὼν -ἄστεσιν ὀλβίστοις εὗρε μεγαιρομένην. - -
-
- - -Anonymi epigrammatici - - - -εἰ πόλιν Ἡρακλῆος ὁμώνυμον οἶσθα καὶ ἄλλην, -ἴσθι με τὴν πόντου μηδὲν ἀτιμοτέρην. -
-
- - -Anonymi epigrammatici - - - -Ῥώμη παμβασίλεια, τὸ σὸν κλέος οὔποτʼ ὀλεῖται· -νίκη γάρ σε φυγεῖν ἄπτερος οὐ δύναται. -
-
- - -Macedonius ii - - - -ἀστὸς ἐμοὶ καὶ ξεῖνος ἀεὶ φίλος· οὐ γὰρ ἐρευνᾷν -τίς, πόθεν, ἠὲ τίνων, ἐστὶ φιλοξενίης. -
-
- - -Macedonius ii - - - -Εὐσεβίη τὸ μέλαθρον ἀπὸ πρώτοιο θεμείλου -ἄχρι καὶ ὑψηλοὺς ἤγαγεν εἰς ὀρόφους. -οὐ γὰρ ἀπʼ ἀλλοτρίων κτεάνων ληίστορι χαλκῷ -ὄλβον ἀολλίζων τεῦξε Μακηδόνιος· -οὐδὲ λιπερνήτης κενεῷ καὶ ἀκερδέι μόχθῳ -κλαῦσε, δικαιοτάτου μισθοῦ ἀτεμβόμενος. -ὡς δὲ πόνων ἄμπαυμα φυλάσσεται ἀνδρὶ δικαίῳ, -ὧδε καὶ εὐσεβέων ἔργα μένοι μερόπων. - -
-
- - -Leontius minotaurus - - - -ἐν μὲν τῇ Ζεύξιππον ἔχω πέλας, ἡδὺ λοετρὸν -ἐκ δʼ ἑτέρης ἵππων χῶρον ἀεθλοφόρων. -τοὺς ῥα θεησάμενος, καὶ τῷδʼ ἔνι χρῶτα λοέσσας -δεῦρο καὶ ἄμπνευσον δαιτὶ παρʼ ἡμετέρῃ· -καί κε πάλιν σταδίοις ποτὶ δείελον ὥριος ἔλθοις, -ἐγγύθεν ἐγγὺς ἰὼν γείτονος ἐκ θαλάμου. -
-
- - -Paulus silentiarius - - - -Τρισσόθεν εἰσορόω πολυτερπέα νῶτα θαλάσσης, -πάντοθεν ἠματίῳ φέγγεϊ βαλλόμενος· -εἰς ἐμὲ γὰρ κροκόπεπλος ὅταν περικίδναται Ἠώς, -τερπομένη, στείχειν πρὸς δύσιν οὐκ ἐθέλει. -
-
- - -Julianus - - - -ὥρῃ ἀναψύχω θέρεος, καὶ χείματι θάλπω, -τοὐλλιπὲς ὡράων ἐξ ἐμέθεν παρέχων. -
-
- - -Agathias scholasticus - - - - - τῆς Ἀρετῆς ἱδρῶτα θεοὶ προπάροιθεν ἔθηκαν, - -ἔννεπεν Ἀσκραῖος, δῶμα τόδε προλέγων. - -κλίμακα γὰρ ταναὴν περόων κεκαφηότι ταρσῷ, -ἱδρῶτι πλαδαρὴν ἀμφεδίηνα κόμην -ὑψόθι δʼ εἰσενόησα θαλασσαίην περιωπήν. -ναὶ τάχα τῆς Ἀρετῆς πιστότερον ˘ θάλαμος. -
-
- - -Julianus - - - -κερδαλέους δίζεσθε δόμους, ληΐστορες, ἄλλους· -τοῖσδε γάρ ἐστι φύλαξ ἔμπεδος ἡ πενίη. -
-
- - -Anonymi epigrammatici - - - -ὀτραλέως τολύπευσαν τόνδε δόμον βασιλῆες, -αἰχμὴν ὀλβοδότειραν ἀπὸ σταυροῖο λαχόντες, -αὐτὸς ἄναξ Ἡρακλῆς σὺν Κωνσταντίνῳ υἷι. -
-
- - -Anonymi epigrammatici - - - -οἶκος Ἀναστασίοιο τυραννοφόνου βασιλῆος -μοῦνος ὑπερτέλλω πανυπείροχος ἄστεσι γαίης, -θαῦμα φέρων πάντεσσιν, ἐπεὶ κοσμήτορες ἔργων -ὕψος ὁμοῦ μῆκός τε καὶ ἄπλετον εὖρος ἰδόντες, -ἀσκεπὲς ἐφράσσαντο πελώριον ἔργον ἐᾶσαι· -ἀλλὰ πολυκμήτοιο λαχὼν πρεσβήϊα τέχνης - -αἰθέριος πολύϊδρις ἐμὴν τεχνήσατο μορφήν, -ἀχράντῳ βασιλῆι φέρων πρωτάγρια μόχθων. -ἔνθεν ἀπειρέσιον μέγεθος περὶ παντὶ τιταίνων, -Αὐσονίης νίκησα βοώμενα θαύματα γαίης. -εἶξον ἀρειοτέροισι, χάρις Καπετωλίδος αὐλῆς, -εἰ καὶ χαλκείων ὀρόφων ἀμαρύγματα πέμπεις· -κρύψον ἀμετρήτων μεγάρων στεινούμενον αὐλαῖς, -Πέργαμε, φαιδρὸν ἄγαλμα τεόν, Ῥουφίνιον ἄλσος· -μηδὲ τανυπλεύροισιν ἀρηρότα, Κύζικε, πέτροις -Ἀδριανοῦ βασιλῆος ἀμεμφέα νηὸν ἀείσεις. -οὔ μοι Πυραμίδων ἰκέλη κρίσις, οὐδὲ Κολοσσοῦ, -οὐδὲ Φάρου· μεγάλην μοῦνος δʼ ὑπερέδραμον ἴλην. -αὐτὸς ἐμὸς σκηπτοῦχος Ἰσαυροφόνον μετὰ νίκην -χρυσοφαές μʼ ἐτέλεσσεν ἐδέθλιον Ἠριγενείης, -πάντῃ τετραπόρων ἀνέμων πεπετασμένον αὔραις. -
-
- - -Marianus - - - -ὁππόθι τεμνομένης χθονὸς ἄνδιχα πόντον ἀνοίγει -πλαγκτὸς ἁλικλύστων πορθμὸς ἐπʼ ἠιόνων, -χρύσεα συλλέκτρῳ τάδʼ ἀνάκτορα θῆκεν ἀνάσσῃ -τῇ πολυκυδίστῃ θεῖος ἄναξ Σοφίῃ. -ἄξιον, ὦ Ῥώμη μεγαλοκρατές, ἀντία σεῖο -κάλλος ἀπʼ Εὐρώπης δέρκεαι εἰς Ἀσίην. -
-
- - -Paulus silentiarius - - - -κόσμον Ἰουστῖνος βασιλεὺς ῥυπόωντα καθήρας -καὶ τὰ μέγιστα Δίκης ἠγλάισεν τεμένη· - -σοῖς δὲ πόνοις, Δομνῖνε, κατηφέα νύκτα διώκεις -ἐκ Θέμιδος μεγάρων, ἐκ βιοτῆς μερόπων. -
-
- - -theaetetus - - - -ὡς ἀγαθὸν καὶ παῖς ἐπὶ γήραϊ· φαιδροτέρους γάρ -Δομνῖνος θαλάμους μητρὸς ἔτευξε Δίκης. -λάμπω ἐγὼ διὰ παιδός, ὁ παῖς διʼ ἐμεῖο φαείνει· -κύδεα δʼ ἀλλήλοις ἀντιχαριζόμεθα, -
-
- - -Anonymi epigrammatici - - - -χῶρος ἐγὼ θεσμοῖσιν ἀνειμένος· ἐνθάδε πηγὴ -ἄφθονος Αὐσονίων ἐκκέχυται νομίμων, -ἣ πᾶσιν τέταται μὲν ἀείναος, ἠιθέοις δὲ -ἐνθάδʼ ἀγειρομένοις πάντα δίδωσι ῥόον. -
-
- - -Julianus - - - -δένδρον ἐγὼ μακαριστόν, ἐπεί ποτε μεσσόθεν ὕλης -ἱστάμενον λιγυροῖς ἐτρεφόμην ἀνέμοις, -ὀρνίθων ἐπίβαθρον ἐΰθροον· ἀλλὰ σιδήρῳ -ἐτμήγην, κλήρῳ κρείσσονος εὐτυχίης· -ἀντὶ γὰρ ὀρνίθων, Κρατεροῦ κρατεροῖς ὑπὸ μύθοις -ἄρδομαι, εὐμούσοις χεύμασι τηλεθάον. - -
-
- - -Agathias scholasticus - - -χῶρος ἐγὼ τὸ πρὶν μὲν ἔην στυγερωπὸς ἰδέσθαι, -πηλοδόμοις τοίχοις ἀμφιμεριζόμενος. -ἐνθάδε δὲ ξείνων τε καὶ ἐνδαπίων καὶ ἀγροίκων -νηδὺς ἐπεγδούπει λύματα χευομένη. -ἀλλὰ πατήρ με πόληος ἐναλλάξας Ἀγαθίας -θῆκεν ἀρίζηλον τὸν πρὶν ἀτιμότατον. -
-
- - -Paulus silentiarius - - - -πόντος ὑποκλύζει χθονὸς ἕδρανα· πλωτὰ δὲ χέρσου -νῶτα θαλασσαίοις ἄλσεσι τηλεθάει. -ὡς σοφὸς ὅστις ἔμιξε βυθὸν χθονί, φύκια κήποις, -Νηιάδων προχοαῖς χεύματα Νηρεΐδων· -
-
- - -Paulus silentiarius - - - -ἐνθάδʼ ἐριδμαίνουσι τίνος πλέον ἔπλετο χῶρος, -νύμφαι Νηιάδες, Νηρεΐς, Ἀδρυάδες· -ταῖς δὲ θεμιστεύει μεσάτη Χάρις, οὐ δὲ δικάζειν -οἶδεν, ἐπεὶ ξυνὴν τέρψιν ὁ χῶρος ἔχει. -
-
- - -Agathias scholasticus - - - -εἶξον ἐμοί Δάφνης ἱερὸν κλέτας, ἔκτοθι πόντου -κείμενον, ἀγραύλου ἀγραύλου ἐρημοσύνης. - -ἐνθάδε γὰρ Νύμφαι δενδρίτιδες, αἳ τʼ ἐνὶ πόντῳ -Νηρεΐδες ξυνὴν θέντο συνηλυσίην -ἀμφʼ ἐμὲ γὰρ μάρναντο· δίκασσε δὲ Κυανοχαίτης, -καί με παρʼ ἀμφοτέραις μέσσον ἔθηκεν ὅρον. -
-
- - -Anonymi epigrammatici - - - -οὐ μέγας οὐδʼ ὁ Ἔρως, ἀλλʼ εὔχαρις· ὡς καὶ ἐγώ τοι -οὐ μέγας ἐν κήποις, ἀλλὰ γέμω χαρίτων. -
-
- - -Arabius - - - -ὕδασι καὶ κήποισι καὶ ἄλσεσι καὶ Διονύσῳ -καὶ πόντου πλήθω γείτονος εὐφροσύνῃ. -τερπνὰ δέ μοι γαίης τε καὶ ἐξ ἁλὸς ἄλλοθεν ἄλλος -καὶ γριπεὺς ὀρέγει δῶρα καὶ ἀγρονόμος. -τοὺς δʼ ἐν ἐμοὶ μίμνοντας ἢ ὀρνίθων τις ἀείδων, -ἢ γλυκὺ πορθμήων φθέγμα παρηγορέει. -
-
- - -Marianus - - - -ἦ καλὸν ἄλσος Ἔρωτος, ὅπου καλὰ δένδρεα ταῦτα -πρηῢς ἐπιπνείων ἀμφιδονεῖ Ζέφυρος· -ᾗχι καὶ ἑρσήεις ἀμαρύσσεται ἄνθεσι λειμὼν, -πουλὺν ἰοστεφάνων κόσμον ἀνεὶς καλύκων -καὶ γλυκερῆς τρίστοιχος ἐπεμβαδὸν ἄλλος ἐπʼ ἄλλῳ -μαστὸς ἀναθλίβει χεύματα Ναϊάδος· -ὁππόθι δενδρήεντα γέρων παρανήχεται Ἶρις -χῶρον, Ἁμαδρυάδων ἔνδιον ἁβροκόμων, - -καὶ λιπαρῆς εὔβοτρυν ἀνʼ ὀργάδα καρπὸς ἐλαίης -θάλλει ἐρισταφύλων πάντοσε θειλοπέδων -αἱ δὲ πέριξ λαλαγεῦσιν ἀηδόνες· ὃς δὲ μελίζει -ἀντῳδὸν τέττιξ φθέγματος ἁρμονίαν. -ἀλλὰ τὸν ἀκλήιστον ὅπως, ξένε, μή με παρέλθῃς -τόνδε δόμον, λιτῆς δʼ ἀντίασον ξενίης. -
-
- - -Marianus - - - -δεῦρʼ ἴθι, βαιόν, ὁδῖτα, πεσὼν ὑπὸ δάσκιον ἄλσος, -ἄμπαυσον καμάτου γυῖα πολυπλανέος, -χλωρὸν ὅπου πλατάνων αὐτόρρυτον ἐς μέσον ὕδωρ -καλὰ πολυκρούνων ἐκπρορέει στομάτων -ὁππόθι πορφυρέης ὑπὲρ αὔλακος εἴαρι θάλλει -ὑγρὸν ἴον ῥοδέῃ κιρνάμενον κάλυκι. -ἠνίδε πῶς δροσεροῖο πέδον λειμῶνος ἐρέψας -ἔκχυτον εὐχαίτης κισσὸς ἔπλεξε κόμην. -ἐνθάδε καὶ ποταμὸς λασίην παραμείβεται ὄχθην, -πέζαν ὑποξύων αὐτοφύτοιο νάπης. -οὗτος Ἔρως· τί γὰρ ἄλλο καὶ ἔπρεπεν οὔνομα χώρῳ, -πάντοθεν ἱμερτῶν πληθομένῳ Χαρίτων; -
-
- - -Anonymi epigrammatici - - - - - τίς βυθὸν ἠπείρωσε; τίς ἐν ῥοθίοισιν ἔτευξεν -ἀκτὴν ἀμφιρύτην λάεσι μαρμαρέοις; -τίς δʼ ἐνὶ κύμασι τεῦξε ποτὸν πλωτῆρας ἀφύσσειν, -αὐτῶν ἐκ νηῶν χερσὶν ἀρυομένους; - - οὗτος ὁ ποικιλόμητις ἀνὴρ Βενέτιος ἀμύμων, -κτίσμασι νικήσας Θησέα καὶ Πέλοπα. - -
-
- - -Anonymi epigrammatici - - - -α. τίς τόσον ἔργον ἔτευξε; τίς ἡ πόλις; ἢ τὸ -γέρας τί; - - ἀμβρόσιος Μυλασεὺς τὸν φάρον ἀνθύπατος. -
-
- - -Anonymi epigrammatici - - - -εἰ τραφερῆς πάσης ἁλιτέρμονα κύκλον ὁδεύσῃς, -οὒ ποτὲ μοί τινα χῶρον ἀρείονα τοῦδε νοήσεις, -θέσκελον οἷον ἔτευξεν ἀγακλυτὸς Ἰωάννης, -κυδαίνων βασίλειαν ὅλης χθονός· ἐκ ῥοθίων γὰρ -τερπωλὴν ἀκόρητον ἐν ἀστεϊ θῆκεν Ὁμήρου. -
-
- - -Anonymi epigrammatici - - - -Ἱππολύτῃ καὶ τοῦτʼ Ἀσκληπιὸς ὤπασεν ἔργον -
-
- - -Anonymi epigrammatici - - - -πύργος ἐγὼ ναύτῃσιν ἀλωομένοισιν ἀρήγων -εἰμί, Ποσειδάωνος ἀπενθέα πυρσὸν ἀνάπτων, -καί με πεσεῖν μέλλοντα βαρυγδούποισιν ἀήταις -στῆσεν ἑοῖς καμάτοις Ἀμμώνιος, ὃς βασιλῆος -ἐστὶ πατήρ κείνῳ δὲ μετʼ ἄγρια κύματα ναῦται -χεῖρας ἀερτάζουσιν, ἅτε κλυτῷ Ἐννοσιγαίῳ. - -
-
- - -Anonymi epigrammatici - - - -μηκέτι δειμαίνοντες ἀφεγγέα νυκτὸς ὁμίχλην, -εἰς ἐμὲ θαρσαλέως πλώετε, ποντοπόροι. -πᾶσιν ἀλωομένοις τηλαυγέα δαλὸν ἀνάπτω, -τῶν Ἀσκληπιαδῶν μνημοσύνην καμάτων. -
-
- - -Anonymi epigrammatici - - - -ταῖς Προύσης Νύμφαις ὑποείκομεν ἀλλὰ καὶ αὐταὶ -κρέσσονες ἡμείων χαίρετε Πυθιάδες· -αἱ δʼ ἄλλαι πᾶσαι μετὰ Πύθια καὶ μετὰ Προῦσαν -ἡμετέραις Νύμφαις εἴξατε Νηιάδες. -
-
- - -Agathias scholasticus - - - -τεῦξέ με πολλὰ καμὼν Μουσώνιος οἶκον ἀγητὸν -τηλίκον, ἀρκτῴοις ἄσθμασι βαλλόμενον. -ἔμπης οὐκ ἀπέειπεν ἀφεγγέα δώματα Μοίρης, -ἀλλά με καλλείψας ἐν χθονὶ ναιετάει. -καὶ ῥʼ ὁ μὲν εἰς ὀλίγην κεῖται κόνιν ἡ δὲ περισσὴ -τέρψις ἐπὶ ξείνοις ἀνδράσιν ἐκκέχυμαι. -
-
- - -Anonymi epigrammatici - - - -οἷον ἔτλης καὶ τοῦτον, Ἀγακλείδη, μέγαν ἆθλον, -θυμῷ τολμητῇ κῦδος ἄριστον ἑλών -νύμφης ἀρχαίης Βάσσης πολυκαγκέα χώρην -ὕδασι καὶ λουτροῖς θῆκας ἀφνειοτέρην· - -
-
- - -Anonymi epigrammatici - - - -πᾶσα μὲν Ἀξιόχῳ πόλις εὔχεται· ἄλλο γὰρ ἄλλης -πῆμα παραστείχων, ὡς θεός, ἠκέσατο· -ἔξοχα δὲ κραναῇ ῥόον ὕδατος ὤπασεν Ἄσσῳ, -πολλῶν πετράων σκληρὰ μέτωπα τεμών. -μηκέτι φεύγετε πάντες ἀποπρὸ θέοντες, ὁδῖται· -πλημμύρῳ ψυχροῖς ὕδασιν Ἀξιόχου. -
-
- - -Anonymi epigrammatici - - - -τὰς τρεῖς μοι Χάριτας λεύσσεις, ξένε· ποντομέδων -γείτονος ἐκ πόντου τὴν μίαν εἰργάσατο· -τὴν δʼ ἑτέρην ἐτέλεσσε φυτῶν εὔκαρπος ἀλωή· -τὴν δʼ ὑπολειπομένην τοῦτο τὸ λουτρὸν ἔχει. -
-
- - -Leontius minotaurus - - - -ἆ μέγα σοι, Διόνυσε, χαρίζομαι· εἰς ἐμὲ Κύπρις -λούεται· ἐξ αὐτῆς σοὶ τὰ κύπελλα φέρω. -
-
- - -Anonymi epigrammatici - - - -κίονα τετράπλευρον, ἀεὶ χθονὶ κείμενον ἄχθος, -μοῦνος ἀναστῆσαι Θευδόσιος βασιλεὺς -τολμήσας, Πρόκλον ἐπεκέκλετο, καὶ τόσος ἔστη -κίων ἠελίοις ἐν τριακονταδύο, - -
-
- - -Anonymi epigrammatici - - -Ἀλφεὸς ἄρρεν ὕδωρ, Ἀρεθούσιόν ἐστι τὸ θῆλυ· -καὶ γάμον εὗρεν Ἔρως, κιρναμένων ὑδάτων. -
-
- - -Anonymi epigrammatici - - - -Ὠκεανοῦ θυγάτηρ καὶ Τηθύος εἰμὶ Νύχεια -κρήνη· Τηλεβόαι γάρ με τόδʼ ὠνόμασαν -νύμφαις μὲν προχέω λουτρόν, θνητοῖσι δʼ ὑγείην -θῆκε δέ με Πτερέλας υἱὸς Ἐνυαλίου. -
-
- - -Anonymi epigrammatici - - - -μὴ κίνει Καμάριναν, ἀκίνητος γὰρ ἀμείνων, -μή ποτε κινήσας τὴν μείονα μείζονα θείης. -
-
- - -Anonymi epigrammatici - - - -ἠνορέης ὀλετῆρα ὑπερφιάλου Βαβυλῶνος -καὶ σέλας ἀκτεάνοιο δίκης Βασίλειον ὕπαρχον, -ξεῖνε, νόῳ σκίρτησον, ἰδὼν ἐφύπερθε πυλάων. -εὐνομίης ποτὶ χῶρον ἀριστογένεθλον ὁδεύεις, -βάρβαρον οὐ τρομέεις, οὐκ ἄρρενας ἀρρενοκοίτας. -ὅπλα Λάκων, σὺ δὲ τεῖχος ἔχεις βασίλειον ἄγαλμα. - -
-
- - -Anonymi epigrammatici - - -μορφὰς ὁ γράψας, ἤθελον καὶ τοὺς τρόπους· -ἀνεσείρασε δέ μου τὴν ὄρεξιν ἡ τέχνη. -κάλει δὲ μʼ Ἀλέξανδρον εὔλαλον, φίλος· -
-
- - -Anonymi epigrammatici - - - -τήνδε πύλην λάεσσιν ἐυξέστοις ἀραρυῖαν, -ἀμφότερον, κόσμον τε πάτρῃ] καὶ θάμβος ὁδίταις, -τεῦξε Κλέης Κλεάδας ἀγανῆς πόσις εὐπατερείης, -Λερναίων ἀδύτων περιώσιος ὀργιοφάντης, -τερπόμενος δώροισιν ἀγασθενέων βασιλήων· -
-
- - -Anonymi epigrammatici - - - -οὗτος Ἰουλιανὸς λαοσσόα τείχεα πήξας, -στῆσε τρόπαιον, ἑῆς σύμβολον ἀγρυπνίης, -σφάζειν ἀντιβίους ἐχθροὺς ἀπάνευθε μενοινῶν, -ἢ πόλεως προπάροιθʼ ἐκκροτέειν πολέμους, -
-
- - -Anonymi epigrammatici - - - -Θευδόσιος τόδε τεῖχος ἄναξ, καὶ ὕπαρχος Ἑῴας -Κωνσταντῖνος ἔτευξαν ἐν ἤμασιν ἑξήκοντα. - -
-
- - -Anonymi epigrammatici - - - -ἤμασιν ἑξήκοντα φιλοσκήπτρῳ βασιλῆϊ -Κωνσταντῖνος ὕπαρχος ἐδείματο τείχεϊ τεῖχος· -
-
- - -Anonymi epigrammatici - - -Βιβιανοῦ τόδε ἔργον, ὃν ἀντολίαι δύσιές τε -μέλπουσιν γεραρῶς εἵνεκεν εὐνομίης. -
-
- - -Anonymi epigrammatici - - -τόνδε Τύχης ἀνέγειρε δόμον Δημήτριος ἀρχὸς, -τὴν πόλιν οἰκτείρας, ὡς πάις Ἱερίου· -αὐτοῦ καὶ βουλῇ τάδʼ ἐδείματο, οὔτε πόληος -οὔτε τι δημοτέροις χρήμασιν, ἀλλʼ ἰδίοις. -
-
- - -Anonymi epigrammatici - - - -Μεσσαλινοῖο γόνος τόδε θέσκελον ἔκτισε τόξον -
-
- - -Anonymi epigrammatici - - - -ὁρᾷς τὸ κάλλος ὅσσον ἐστὶ τῆς λίθου -ἐν ταῖς ἀτάκτοις τῶν φλεβῶν εὐταξίαις. -
-
- - -Anonymi epigrammatici - - - -Τετραπόροις ἁψῖσι πόλιν Θεόδωρος ἐγείρας, -ἄξιός ἐστι πόλιν καὶ τέτρατον ἡνιοχεῦσαι. - -
-
- - -Anonymi epigrammatici - - - -ἔπρεπε σοί, Θεόδωρε, Τύχης ἐυκίονα νηὸν; -ἔργου κοσμῆσαι θαύματι τοσσατίου, -δῶρά τε κυδήεντα πορεῖν χ;χρυσάσπιδι Ῥώμῃ, -ἥ σ’ Ὕπατον τεῦξεν, καὶ τρισέπαρχον ὁρᾷ. -
-
- - -Anonymi epigrammatici - - -Μόψου τήνδʼ ἐσορᾷς κλεινὴν πόλιν, ἥν ποτε μάντις -δείματο, τῷ ποταμῷ κάλλος ὑπερκρεμάσας. -
-
- - -Anonymi epigrammatici - - - -ἔνθεν Ἀλέξανδρος Μακεδὼν πίεν ἀγλαὸν ὕδωρ· -μητρὸς δʼ εἶπε γάλακτι πανείκελα ῥεύματα πηγῆς, -ᾗ καὶ Ὀλυμπιάδος πόρεν οὔνομα, σῆμα δὲ τοῦτο. -
-
- - -Simonides - - -γράψε Πολύγνωτος, Θάσιος γένος, Ἀγλαοφῶντος -υἱός, περθομένην Ἰλίου ἀκρόπολιν. -
-
- - -Anonymi epigrammatici - - - -αὐτοῦ Ζηνὸς ὅδʼ οἶκος ἐπάξιος· οὐδʼ ἂν Ὄλυμπος -μέμψεται οὐρανόθεν Ζῆνα κατερχόμενον. - -
-
- - -Anonymi epigrammatici - - - -Κεκροπίδαι Διὶ τόνδʼ ἔθεσαν δόμον, ὡς ἀπʼ Ὀλύμπου -νισσόμενος ποτὶ γᾶν, ἄλλον Ὄλυμπον ἔχοι. -
-
- - -Anonymi epigrammatici - - -

Τεάρου ποταμοῦ κεφαλαὶ ὕδωρ ἄριστόν τε καὶ κάλλιστον παρέχονται πάντων ποταμῶν καὶ ἐπʼ αὐτὰς ἀπίκετο ἐλαύνων ἐπὶ Σκύθας στρατὸν ἀνήρ κάλλιστος καὶ ἄριστος πάντων ἀνθρώπων Δαρεῖος ὁ Ὑστάσπεος, Περσέων τε καὶ πάσης τῆς ἠπείρου βασιλεύς.

-
-
- - -Anonymi epigrammatici - - -τήκει καὶ πέτρην ὁ πολὺς χρόνος ἀλλʼ ἀρετάων -Ἀσκληπιοδότου τὸ κλέος ἀθάνατον, -ὅσσα καὶ οἷα πόρεν γέρα πατρίδι· τοῖς ἐπὶ πᾶσι -καὶ τόδε μετρείσθω κοῖλον ἔρεισμα θόλου. -
-
- - -Anonymi epigrammatici - - -δῶρον Τερμησσοῖο δικασπολίης χάριν ἁγνῆς· -Εὐσέβιος θεράπων θῆκε θεῷ τὸ γέρας. -
-
- - -Antipater - - -δένδρεον ἱερόν εἰμι· παρερχόμενός με φυλάσσευ -πημαίνειν· ἀλγῶ, ξεῖνε, κολουομένη. - -μέμνεο, παρθένιός μοι ἔπι φλόος, οὐχ ἅπερ ὠμαῖς -ἀχράσιν· αἰγείρων τίς γένος οὐκ ἐδάη; -εἰ δὲ περιδρύψῃς με παρατραπίην περ ἐοῦσαν, -δακρύσεις· μέλομαι καὶ ξύλον Ἠελίῳ. -
-
- - -tullius geminus - - -εἰμὶ μὲν ἐν ποταμοῖς, πελάγει δʼ ἴσα μέτρα διώκω, -Στρυμών, Ἠμαθίης τὸ γλυκερὸν πέλαγος· -βένθος ὁμοῦ καὶ ἄρουρα διʼ ὕδατος· ἦ γὰρ ἐγείρω -ὀμπνιακῶν χαρίτων ἡδύτερον τρίβολον. -ἔστι καὶ Ἠμαθίης γόνιμος βυθός· ἄμμι δέ, Νεῖλε, -κρείσσων ἔσθʼ ὁ φέρων τὸν στάχυν, οὐχ ὁ τρέφων. -
-
- - -Philippus - - -ἔζευξʼ Ἑλλήσποντον ὁ βάρβαρος ἄφρονι τόλμῃ, -τοὺς δὲ τόσους καμάτους πάντας ἔλυσε χρόνος· -ἀλλὰ Δικαιάρχεια διηπείρωσε θάλασσαν, -καὶ βυθὸν εἰς χέρσου σχῆμα μετεπλάσατο· -λᾶα, βαθὺ στήριγμα, κατερρίζωσε πέλωρον, -χερσὶ Γιγαντείαις δʼ ἔστασε νέρθεν ὕδωρ. -ἦν ἅλʼ ἀεὶ πλώειν διοδευομένη δʼ ὑπὸ ναύταις -ἄστατος, εἰς πεζοὺς ὡμολόγησε μένειν. -
-
- - -Philippus - - -Εὐρώταν ὡς ἄρτι διάβροχον ἔν τε ῥεέθροις -εἵλκυσ’ ὁ τεχνίτης ἐν πυρὶ λουσάμενον - -πᾶσι γὰρ ἐν κώλοις ὑδατούμενος ἀμφινένευκεν -ἐκ κορυφῆς ἐς ἄκρους ὑγροβατῶν ὄνυχας. -ἁ δὲ τέχνα ποταμῷ συνεπήρικεν· ἆ τίς ὁ πείσας -χαλκὸν κωμάζειν ὕδατος ὑγρότερον; -
-
- - -Anonymi epigrammatici - - - -Ὄσσαν ἐπʼ Οὐλύμπῳ καὶ Πήλιον ὑψωθέντα -ψευδὴς ἱστορίης ῥῆσις ἀνεπλάσατο· -πυραμίδες δʼ ἔτι νῦν Νειλωίδες ἄκρα μέτωπα -κύρουσιν χρυσέοις ἀστράσι Πληιάδων. -
-
- - -Ζenobius - - -αὐτὴν Γραμματικὴν ὁ ζωγράφος ἤθελε γράψαι· -Βίκτορα δὲ γράψας, τὸν σκοπόν, εἶπεν, ἔχω. - -
-
- - -Metrodorus - - -αὐτὸν Ἰωάννην ὁ γέρων ὅτʼ ἐδέξατο θεσμός, -εἶπεν ἀνηβήσας· αὖθις ἔχω σε, Σόλων. - -
-
- - -Anonymi epigrammatici - - - -βοίδιόν εἰμι Μύρωνος, ἐπὶ στήλης δʼ ἀνάκειμαι. -βουκόλε, κεντήσας εἰς ἀγέλην μʼ ἄπαγε. -
-
- - -Anonymi epigrammatici - - -τίπτε, Μύρων, μὲ τὸ βοίδιον ἐνταυθοῖ παρὰ βωμοῖς -ἔστασας; οὐκ ἐθέλεις εἰσαγέμεν μέγαρον; - -
-
- - -Anacreon - - -βουκόλε, τὰν ἀγέλαν πόρρω νέμε, μὴ τὸ Μύρωνος -βοίδιον ὡς ἔμπνουν βουσὶ συνεξελάσῃς. -
-
- - -Anacreon - - -Βοίδιον οὐ χοάνοις τετυπωμένον, ἀλλʼ ὑπὸ γήρως -χαλκωθὲν σφετέρῃ ψεύσατο χειρὶ Μύρων. -
-
- - -euenus - - -ἢ τὸ δέρας χάλκειον ὅλον βοῒ τᾷδʼ ἐπίκειται -ἔκτοθεν, ἢ ψυχὴν ἔνδον ὁ χαλκὸς ἔχει. -
-
- - -euenus - - -αὐτὸς ἐρεῖ τάχα τοῦτο Μύρων “οὐκ ἔπλασα ταύταν -τὰν δάμαλιν, ταύτας δʼ εἰκόνʼ ἀνεπλασάμην.” -
-
- - -Leonidas - - -οὐκ ἔπλασέν με Μύρων, ἐψεύσατο· βοσκομέναν δὲ -ἐξ ἀγέλας ἐλάσας, δῆσε βάσει λιθίνῳ. -
-
- - -Antipater - - -εἰ μή μου ποτὶ τᾷδε Μύρων πόδας ἥρμοσε πέτρᾳ, -ἄλλαις ἂν νεμόμαν βουσὶν ὁμοῦ δάμαλις. -
-
- - -Antipater - - -Μόσχε, τί μοι λαγόνεσσι προσέρχεαι; τίπτε δὲ μυκᾷ; -ἁ τέχνα μαζοῖς οὐκ ἐνέθηκε γάλα. - -
-
- - -Antipater - - -ἡ βοῦς ἐξ ἀρότου νέον ἤλυθε, καὶ διὰ τοῦτο -ὀκνεῖ, κοὐκ ἐθέλει βῆμʼ ἐπίπροσθεν ἄγειν. -
-
- - -Antipater - - -τὰν δάμαλιν, βουφορβέ, παρέρχεο, μηδʼ ἀπάνευθε -συρίσδῃς· μαστῷ πόρτιν ἀπεκδέχεται. -
-
- - -Antipater - - -ἁ μόλιβος κατέχει με καὶ ἁ λίθος· εἵνεκα δʼ ἂν σεῦ, -πλάστα Μύρων, λωτὸν καὶ θρύον ἐδρεπόμαν. -
-
- - -Antipater - - -ἁ δάμαλις, δοκέω, μυκήσεται· ἦ ῥʼ ὁ Προμηθεὺς -οὐχὶ μόνος, πλάττεις ἔμπνοα καὶ σὺ Μύρων. -
-
- - -Anonymi epigrammatici - - -βοῦν ἰδίαν ποτὲ βουσὶ Μύρων μιχθεῖσαν ἐζήτει· -εὗρε μόλις δʼ αὐτὴν, τὰς βόας ἐξελάσας. -
-
- - -Anonymi epigrammatici - - -ἁ βοῦς ἁ τίκτουσ’ ἀπὸ γαστέρος ἔπλασε τὰν βοῦν -ἁ δὲ Μύρωνος χεὶρ οὐ πλάσεν, ἀλλʼ ἔτεκεν. -
-
- - -Anonymi epigrammatici - - -καὶ χαλκῆ περ ἐοῦσα λάλησεν ἂν ἁ κεραὴ βοῦς, -εἲ οἱ σπλάγχνα Μύρων ἔνδον ἐτεχνάσατο. - -
-
- - -Antipater - - -ἁ δάμαλις, δοκέω, μυκήσεται· ἢν δὲ βραδύνῃ, -χαλκὸς ὁ μὴ νοέων αἴτιος, οὐχὶ Μύρων. -
-
- - -Anonymi epigrammatici - - -πηκτόν μοί τις ἄροτρον ἐπʼ αὐχένι καὶ ζυγὰ θέσθω· -εἵνεκα γὰρ τέχνας σεῖο, Μύρων, ἀρόσω. -
-
- - -Demetrius - - -ἤν μʼ ἐσίδῃ μόσχος, μυκήσεται· ἢν δέ γε ταῦρος, -βήσεται· ἢν δὲ νομεύς, εἰς ἀγέλαν ἐλάσει. -
-
- - -Anonymi epigrammatici - - -ὧδε Μύρων μʼ ἔστησε τὸ βοίδιον οἱ δὲ νομῆες -βάλλουσίν με λίθοις, ὡς ἀπολειπόμενον. -
-
- - -Marcus argentarius - - -βουκόλον ἢν ἐσίδῃς τὸν ἐμόν, ξένε, τοῦτʼ ἔπος αὐτῷ -εἶπον, ὅθʼ ὁ πλάστης ὧδὲ μʼ ἔδησε Μύρων. -
-
- - -Anonymi epigrammatici - - -τὰν βοῦν τάνδε Μύρων, ξεῖνʼ, ἔπλασεν, ἃν ὅδε μόσχος -ὡς ζῶσαν σαίνει, ματέρα δερκόμενος. -
-
- - -Dioscorides - - -ταῦρε, μάτην ἐπὶ μόσχον ἐπείγεαι· ἔστι γὰρ ἄπνους -ἀλλὰ σ’ ὁ βουπλάστας ἐξαπάτησε Μύρων. - -
-
- - -Anonymi epigrammatici - - -σεῖο Μύρων, δαμάλει παρακάτθανε μόσχος ἀλαθείς, -καὶ γάλα πιστεύων χαλκὸν ἔσωθεν ἔχειν. -
-
- - -Anonymi epigrammatici - - - -φεῦ σὺ Μύρων, πλάσσας οὐκ ἔφθασας· ἀλλά σὲ χαλκός, -πρὶν ψυχὴν βαλέειν, ἔφθασε πηγνύμενος. -
-
- - -Anonymi epigrammatici - - -χαλκείαν τύπτεις δάμαλιν μέγα σ’ -ἤπαφε τέχνα, -βουκόλε· τὰν ψυχὰν οὐ προσέθηκε Μύρων. -
-
- - -Julianus - - -ἐν βοῒ τᾷδʼ ἐμάχοντο Φύσις καὶ πότνια Τέχνα· -ἀμφοτέραις δὲ Μύρων ἶσον ὄπασσε γέρας· -δερκομένοις μὲν γὰρ Φύσιος κράτος ἥρπασε Τέχνα· -αὐτάρ ἐφαπτομένοις ἡ Φύσις ἐστὶ φύσις. -
-
- - -Julianus - - -ἤπαφε καὶ σὲ μύωπα Μύρων, ὅτι κέντρον ἐρείδεις -πλευραῖς χαλκοχύτοις ἀντιτύποιο βοός. -οὐ νέμεσις δὲ μύωπι· τί γὰρ τόσον; εἴ γε καὶ αὐτοὺς -ὀφθαλμοὺς νομέων ἠπερόπευσε Μύρων. -
-
- - -tullius geminus - - -ἡ βάσις ἡ κατέχουσα τὸ βοίδιον, ᾗ πεπέδηται· -ἢν δʼ ἀφεθῇ ταύτης, φεύξεται εἰς ἀγέλην. - -μυκᾶται γὰρ ὁ χαλκός· ἴδʼ ὡς ἔμπνουν ὁ τεχνίτας -θήκατο· κἂν ζεύξῃς ἄλλον, ἴσως ἀρόσει. -
-
- - -Anonymi epigrammatici - - -χάλκεος ἦς, ἐπὶ σοὶ δὲ γεωτόμος εἷλκεν ἄροτρον -καὶ ζυγόδεσμα φέρων, ψευδομένα δάμαλι. -ἀλλὰ Μύρων τέχνᾳ πανυπείροχος, ὅς σε διʼ ἔργων -ἔμπνουν, ὥς τινα βοῦν ἐργάτιν εἰργάσατο. -
-
- - -Philippus - - -ἄπαιρέ μου τένοντος, ὦ γεωπόνε, -λέπαδνα, καὶ σίδαρον αὐλακεργάταν· -χαλκὸν γὰρ ἁμῶν οὐκ ἐσάρκωσεν Μύρων, -τέχνα δὲ ζωπόνησεν ὄψιν ἔμπνοον, -ὡς πολλάκις με κἀπομυκᾶσθαι θέλειν· -εἰς ἔργα δʼ οὐκ εἴασε, προσδήσας βάσει. -
-
- - -theodoridas - - -Θεσσαλαὶ αἱ βόες αἵδε· παρὰ προθύροισι δʼ Ἀθάνας -ἑστᾶσιν, καλὸν δῶρον, Ἰτωνιάδος· -πᾶσαι χάλκειαι, δυοκαίδεκα, Φράδμονος ἔργον, -καὶ πᾶσαι γυμνῶν σκῦλον ἀπʼ Ἰλλυριῶν. -
-
- - -Leonidas - - -ᾨγινόμοι Σώσων καὶ Σίμαλος, οἱ πολύαιγοι, -οἷα βαθυσχίνων, ᾦ ξένε, % παρολκίδαν -Ἑρμᾷ τυρευτῆρι καὶ εὔγλαγι τὸν χιμάραρχον -χάλκεον εὐπώγωνʼ ὧδʼ ἀνέθεντο τράγον. - -
-
- - -Anyte - - -Θάεο τὸν Βρομίου κεραὸν τράγον, ὡς ἀγερώχως -ὄμμα κατὰ λασιᾶν γαῦρον ἔχει γενύων, -κυδιόων ὅτι οἱ θάμʼ ἐν οὔρεσιν ἀμφὶ παρῇδα -βόστρυχον εἰς ῥοδέαν Ναῒς ἔδεκτο χέρα. -
-
- - -Polemon i - - - -ἑπτὰ βοῶν σφραγῖδα βραχὺς λίθος εἶχεν ἴασπις, -ὡς μίαν, ὡς πάσας ἔμπνοα δερκομένας. -καὶ τάχα κἂν † ἀπέρεψε τὰ βοίδια· νῦν δὲ κέκλειται -τῇ χρυσῇ μάνδρᾳ τὸ βραχὺ βουκόλιον. -
-
- - -Plato - - -εἰκόνα πέντε βοῶν μικρὰ λίθος εἶχεν ἴασπις, -ὡς ἤδη πάσας ἔμπνοα βοσκομένας. -καὶ τάχα κἂν ἀπέφευγε τὰ βοίδια· νῦν δὲ κρατεῖται -τῇ χρυσῇ μάνδρῃ τὸ βραχὺ βουκόλιον. -
-
- - -Plato Junior - - - -ἡ λίθος ἔστʼ ἀμέθυστος, ἐγὼ δʼ ὁ πότης Διόνυσος· -ἢ νήφειν πείσῃ μʼ, ἢ μαθέτω μεθύειν. - -
-
- - -oenomaus - - - -ἐν κυάθῳ τὸν Ἔρωτα τίνος χάριν; ἀρκετὸν οἴνῳ -αἴθεσθαι κραδίην μὴ πυρὶ πῦρ ἔπαγε. -
-
- - -Archias - - - -τὰς βοῦς καὶ τὸν ἴασπιν ἰδὼν περὶ χειρὶ δοκήσεις -τὰς μὲν ἀναπνείειν, τὸν δὲ χλοηκομέειν. -
-
- - -Plato Junior - - -ἁ σφραγὶς ὑάκινθος· Ἀπόλλων δʼ ἐστὶν ἐν αὐτῇ -καὶ Δάφνη· ποτέρου μᾶλλον ὁ Λητοΐδας; -
-
- - -Asclepiades - - -εἰμὶ Μέθη τὸ γλύμμα σοφῆς χερός, ἐν δʼ ἀμεθύστῳ -γέγλυμμαι· τέχνης δʼ ἡ λίθος ἀλλοτρίη. -ἀλλὰ Κλεοπάτρης ἱερὸν κτέαρ· ἐν γὰρ ἀνάσσης -χειρὶ θεὸν νήφειν καὶ μεθύουσαν ἔδει. -
-
- - -Claudius claudianus - - - -Χιονέη κρύσταλλος ὑπʼ ἀνέρος ἀσκηθεῖσα -δεῖξεν ἀκηρασίοιο παναίολον εἰκόνα κόσμου, -οὐρανὸν ἀγκὰς ἔχοντα βαρύκτυπον ἔνδοθι πόντον. - -
-
- - -Claudius claudianus - - - - εἴπʼ ἄγε μοι, κρύσταλλε, λίθῳ πεπυκασμένον ὕδωρ, -τίς πῆξεν; Βορέης. ἢ τίς ἔλυσε; νότος, -
-
- - -Anonymi epigrammatici - - - -εἰ μὴ χαλκὸς ἔλαμπεν, ἐμάνυε δʼ ἔργον ἄνακτος -ἔμμεναι Ἡφαίστου δαιδαλέοιο τέχνας, -αὐτὴν ἄν τις Σκύλλαν ὀίσσατο τηλόθι λεύσσων -ἑστάμεν, ἐκ πόντου γαῖαν ἀμειψαμέναν -τόσσον ἐπισσείει, τόσσον κότον ἀντία φαίνει, -οἷον ἀπὸ πελάγευς συγκλονέουσα νέας. -
-
- - -Aemilianus - - -τέχνας εἵνεκα σεῖο καὶ ἁ λίθος οἶδε βρυάζειν, -Πραξίτελες· λῦσον, καὶ πάλι κωμάσομαι. -νῦν δʼ ἡμῖν οὐ γῆρας ἔτʼ ἀδρανές, ἀλλʼ ὁ πεδητὰς -Σειληνοῖς κώμων βάσκανός ἐστι λίθος. -
-
- - -Simonides - - -Ἰφίων τόδʼ ἔγραψε Κορίνθιος. οὐκ ἔνι· μῶμος -χερσίν, ἐπεὶ δόξας ἔργα πολὺ προφέρει. -
-
- - -Simonides - - -Κίμων ἔγραψε τὴν θύραν τὴν δεξιάν· -τὴν δʼ ἐξιόντων δεξιὰν Διονύσιος. - -
-
- - -Anonymi epigrammatici - - -εἷς λίθος, ἅρμʼ, ἐλατήρ, ἵπποι, ζυγόν, ἡνία, μάστιξ. -
-
- - -Anonymi epigrammatici - - -εἷς λίθος, ἅρμʼ, ἐλατήρ, πῶλοι, ζυγός, ἡνία, Νίκη, -
-
- - -Anonymi epigrammatici - - - -μικροῦ κατέσχον τὸν βότρυν τοῖς δακτύλοις, -ὑπεραπατηθεὶς τῇ θέᾳ τῶν χρωμάτων. -
-
- - -Ablabius - - - -Ἥφαιστός μʼ ἐτέλεσσε καμὼν χρόνον ἀλλὰ Κυθείρη -ἀνδρὸς ἑοῦ θαλάμων εἵλετο λαθριδίως, -Ἀγχίσῃ δʼ ἔπορεν κρυφίης μνημήιον εὐνῆς· -καὶ μʼ Ἀσκληπιάδης εὗρε παρʼ Αἰνεάδαις. -
-
- - -Julianus - - - -ἢν μὲν ἀλιτραίνῃς, πέλεκυν βλεφάροισι δοκεύεις· -ἢν δὲ σαοφρονέῃς, ἄργυρός εἰμι μόνον. - -
-
- - -Paulus silentiarius - - - -οὐ βριαρόν τινα θῆρα, καὶ οὔ τινα πόντιον ἰχθύν, -οὐ πτερὸν ἀγρεύω πλέγμασιν ἡμετέροις, -ἀλλὰ βροτοὺς ἐθέλοντας· ἀλεξήτειρα δὲ τέχνη -ἀνέρα μυιάων κέντρον ἀλευόμενον -ἐκ θαλίης ἀβρῶτα μεσημβριάοντα φυλάσσει, -οὐδὲν ἀφαυροτέρη τείχεος ἀστυόχου. -ὕπνου δʼ ἀστυφέλικτον ἄγω χάριν ἀλλὰ καὶ αὐτοὺς -δμῶας μυιοσόβου ῥύομαι ἀτμενίης. -
-
- - -Paulus silentiarius - - - -Καλλιγάμοις λέκτροις περικίδναμαι· εἰμὶ δὲ κεδνῆς -δίκτυον οὐ Φοίβης, ἀλλʼ ἁπαλῆς Παφίης. -ἀνέρα δʼ ὑπνώοντα μίτῳ πολύσπι καλύπτω, -ζῳοφόρων ἀνέμων οὐδὲν ἀτεμβόμενον. -
-
- - -Agathias scholasticus - - - -πλέγμασι μὲν σκοπός ἐστι περισφίγξαι πετεηνῶν -ἔθνεα καὶ ταχινοὺς ἔνδοθεν ὀρταλίχους· -αὐτὰρ ἐγὼ σεύειν ἐπιτέρπομαι, οὐδὲ καλύπτω -ἔνδοθεν, ἀλλʼ εἴργω μᾶλλον ἐπειγομένους. -οὐδέ μέ τις λήσειε, καὶ εἰ βραχὺς ἔπλετο, κώνωψ -ἡμετέρης διαδὺς πλέγμα λινοστασίης. -ὄρνεά που σῴζω· μερόπεσσι δὲ λέκτρα φυλάσσω. -ἦ ῥά τις ἡμείων ἐστὶ δικαιότερος; - -
-
- - -Agathias scholasticus - - - -ἑζόμενος μὲν τῇδε παρʼ εὐλάιγγι τραπέζῃ -παίγνια κινήσεις τερπνὰ βολοκτυπίης. -μήτε δὲ νικήσας μεγαλίζεο, μήτε ἀπολειφθεὶς -ἄχνυσο, τὴν ὀλίγην μεμφόμενος βολίδα. -καὶ γὰρ ἐπὶ σμικροῖσι νόος διαφαίνεται ἀνδρός, -καὶ κύβος ἀγγέλλει βένθος ἐχεφροσύνης. -
-
- - -Agathias scholasticus - - - -παίγνια μὲν τάδε πάντα· τύχης δʼ ἑτερότροπος ὁρμὴ -ταῖς ἀλόγοις ταύταις ἐμφέρεται βολίσιν -καὶ βροτέου βιότου σφαλερὸν μίμημα νοήσεις, -νῦν μὲν ὑπερβάλλων, νῦν δʼ ἀπολειπόμενος. -αἰνέομεν δὴ κεῖνον, ὃς ἐν βιότῳ τε κύβῳ τε -χάρματι καὶ λύπῃ μέτρον ἐφηρμόσατο. -
-
- - -Agathias scholasticus - - - -τοῖς μὲν πρηϋνόοις τάδε παίγνια, τοῖς δʼ ἀκολάστοις -λύσσα καὶ ἀμπλακίη καὶ πόνος αὐτόματος. -ἀλλὰ σὺ μὴ λέξῃς τι θεημάχον ὕστατος ἕρπων, -μηδʼ ἀναροιβδήσῃς ῥινοβόλῳ πατάγῳ. -δεῖ γὰρ μήτε πονεῖν ἐν ἀθύρμασι, μήτε τι παίζειν -ἐν σπουδῇ· καιρῷ δʼ ἴσθι νέμειν τὸ πρέπον. - -
-
- - -Paulus silentiarius - - - -χεῖλος Ἀνικήτεια τὸ χρύσεον εἰς ἐμὲ τέγγει· -ἀλλὰ παρασχοίμην καὶ πόμα νυμφίδιον. -
-
- - -Julianus - - - -ὄντως Βάκχον ἔδεκτο Θέτις· νῦν μῦθος Ὁμήρου -ὀψὲ μέν, ἀλλʼ εὗρεν πίστιν ἐτητυμίης. -
-
- - -Phocas diaconus - - - -οἰνοχόῳ φίλον εἰμὶ μόνῳ δέπας, οὕνεκεν αὐτῷ -Βάκχον ἀολλίζω τὸν περιλειπόμενον. -
-
- - -Palladas - - -χαλκοτύπος τὸν Ἔρωτα μεταλλάξας ἐπόησε -τήγανον, οὐκ ἀλόγως, ὅττι καὶ αὐτὸ φλέγει. -
-
- - -Glaucus - - -ἁ βάκχα Παρία μέν, ἐνεψύχωσε δʼ ὁ γλύπτας -τὸν λίθον ἀνθρῴσκει δʼ ὡς βρομιαζομένα. -ὦ Σκόπα, ἁ θεοποιὸς ἄπιστον ἐμήσατο τέχνα -θαῦμα, χιμαιροφόνον θυιάδα μαινομέναν. - -
-
- - -Glaucus - - -ἡ βάκχη Κρονίδην Σάτυρον θέτο· εἰς δὲ χορείαν -θρῴσκει μαινομένων ὡς βρομιαζόμενος, -
-
- - -Diodorus - - -Ζεύξιδος ἡ χροιή τε καὶ ἡ χάρις· ἐν δέ με μικρῇ -κρυστάλλῳ τὸ καλὸν δαίδαλον Ἀρσινόῃ -γράψας τοῦτʼ ἔπορεν Σατυρήϊος. εἰμὶ δʼ ἀνάσσης -εἰκὼν, καὶ μεγάλης λείπομαι οὐδʼ ὀλίγον. -
-
- - -Philippus - - -ἴδʼ ὡς ὁ πῶλος χαλκοδαιδάλῳ τέχνᾳ -κορωνιῶν ἕστηκε· δριμὺ γὰρ βλέπων -ὑψαυχενίζει, καὶ διηνεμωμένας -κορυφῆς ἐθείρας οὐρίωκεν ἐς δρόμον. -δοκέω, χαλινοὺς εἴ τις ἡνιοστρόφος -ἐναρμόσῃ γένυσσι κἀπικεντρίσᾐ, -ὁ σὸς πόνος, Λύσιππε, καὶ παρʼ ἐλπίδας -τάχʼ ἐκδραμεῖται· τᾷ τέχνᾳ γὰρ ἐμπνέει· -
-
- - -Philippus - - -γαῖαν τὴν φερέκαρπον ὅσην ἔζωσε περίχθων -ὠκεανὸς μεγάλῳ Καίσαρι πειθομένην, -καὶ γλαυκήν με θάλασσαν ἀπηκριβώσατο Καρπὼ -κερκίσιν ἱστοπόνοις πάντʼ ἀπομαξαμένη· -Καίσαρι δʼ † ακείνου χάρις ἤλθομεν ἦν γὰρ ἀνάσσης -δῶρα φέρειν τὰ θεοῖς καὶ πρὶν ὀφειλόμενα. - -
-
- - -Anonymi epigrammatici - - - -δῶρον Ἰουστίνοιο τυραννοφόνου βασιλῆος -καὶ Σοφίης ἀλόχου, φέγγος ἐλευθερίης, -ὡράων σκοπίαζε σοφὸν σημάντορα χαλκὸν -αὐτῆς ἐκ μονάδος μέχρι δυωδεκάδος, -ὅντινα συληθέντα Δίκης θρόνον ἡνιοχεύων -εὗρεν Ἰουλιανὸς χερσὶν ἀδωροδόκοις. -
-
- - -Anonymi epigrammatici - - - -ὠρανὸν ἁ χωροῖσα σοφὰ λίθος, ἁ διὰ τυτθοῦ -γνώμονος ἀελίῳ παντὶ μερισδομένα. -
-
- - -Anonymi epigrammatici - - - -ἢν κλείσῃς μʼ, ἀνέῳγα· καὶ ἢν οἴξῃς μʼ ἐπικλείσεις.˘ -τοῖος ἐὼν τηρεῖν σὸν δόμον οὐ δύναμαι. - -
-
- - -Paulus silentiarius - - - -ἐνθάδε μιστύλλουσι δρόμον Φαεθοντίδος αἴγλης -ἀνέρες ὡράων ἀμφὶ δυωδεκάδι· -ὕδασι δʼ ἠελίοιο ταλαντεύουσι κελεύθους, -ἐς πόλον ἐκ γαίης μῆτιν ἐρεισάμενοι. -
-
- - -Anonymi epigrammatici - - - -ἀνδράσιν Ἑρμῆς εἰμι, γυναιξὶ δὲ Κύπρις ὁρῶμαι -ἀμφοτέρων δὲ φέρω σύμβολά μοι τοκέων. -τοὔνεκεν οὐκ ἀλόγως με τὸν Ἑρμαφρόδιτον ἔθεντο -ἀνδρογύνοις λουτροῖς παῖδα τὸν ἀμφίβολον. -
-
- - -Anonymi epigrammatici - - - -μὴ νεμέσα βαιοῖσι χάρις βαιοῖσιν ὀπηδεῖ· -βαιὸς καὶ Παφίης ἔπλετο κοῦρος Ἔρως. -
-
- - -Anonymi epigrammatici - - - -Μηνᾶς χρύσεον ἔργον ἐδείματο πᾶσιν ὁδίταις, -κυδαίνων πτολίεθρον ἐριχρύσων βασιλήων. -
-
- - -Anonymi epigrammatici - - -τόνδε καθιδρύσαντο θεῷ περικαλλέα βωμόν, -λευκῆς καὶ Πτελεοῦ μέσσον ὅρον θέμενοι - -ἐνναέται, χώρης σημήιον ἀμμορίης δὲ -αὐτὸς ἄναξ μακάρων ἐστὶ μέσος Κρονίδης. -
-
- - -Sophronius - - - -ὁ πρὶν ἀλωόμενος καὶ ἀνέστιον ἴχνος ἐλαύνων, -εἴτʼ ἀφʼ ὁδοιπορίης, εἴτʼ ἀπὸ ναυτιλίης, -ἐνθάδε νῦν προσιὼν στῆσον, ξένε, σὸν πόδα δεῦρο, -ναιετάειν ἐθέλων, οἶκον ἕτοιμον ἔχων. -εἰ δέ με καὶ τίς ἔτευξεν ἀνακρινέοις, πολιῆτα -Εὐλόγιος, Φαρίης ἀρχιερεὺς ἀγαθός. -
-
- - -Anonymi epigrammatici - - -ὄλβιον ἀνθρώποισιν ἔχει φάος ἄμβροτος αἰὼν -σῇσιν ὑπʼ ἐννεσίῃσ’, εὐγενέτειρα Τύχη. -νεύματι γὰρ σῷ πάντα φέρει κλέος ᾧ ποτε χειρὶ -δεξιτερῇ παρέχῃς αὐχένα θεσπέσιον. -τούτῳ καὶ βασιλῆες ἀμύμονες ἁρμόζονται, -καὶ λογίων ἀγέλης ἄμβροτοι ἡγεμόνες· -καὶ νῆες λιμένεσσι σαώτερον ἀμπαύονται -σὴν διʼ ἀρηγοσύνην σῳζόμεναι πελάγει· -καὶ πόλιες χαίρουσιν ἀκύμονες, ἠδέ τε λαοί, -καὶ θαλερῶν πεδίων λείμακες ἀμβρόσιοι. -τοὔνεκα σὸν θεράποντα πρὸς ὄλβιον ἀθρήσασα - -
-
- - -Anonymi epigrammatici - - -τέκτονά με σκοπίαζε σοφῶν κοσμήτορα μύθων, -ἰθύνοντα τέχνην εὐεπίης κανόνι. - -
-
- - -Antipater - - -τίς ποκʼ ἀπʼ Οὐλύμποιο μετάγαγε παρθενεῶνα, -τὸν πάρος οὐρανίοις ἐμβεβαῶτα δόμοις, -ἐς πόλιν Ἀνδρόκλοιο, θοῶν βασίλειαν Ἰώνων, -τὰν δορὶ καὶ Μούσαις αἰπυτάταν Ἔφεσον; -ἦ ῥα σὺ φιλαμένα, Τιτυοκτόνε, μέζον Ὀλύμπου -τὰν τροφόν, ἐν ταύτᾳ τὸν σὸν ἔθευ θάλαμον. -
-
- - -Apollonides - - -μητρὶ περιστεφέος σηκοῦ, Κυθέρεια, θαλάσσῃ -κρηπῖδας βυθίας οἴδματι πηξαμένη· -χαίρει δʼ ἀμφὶ σὲ πόντος, ἐπὶ ζεφύροιο πνοῇσιν -ἀφρὸν ὑπὲρ νώτου κυάνεον γελάσας. -εἵνεκα δʼ εὐσεβίης, νηοῦ θʼ ὃν ἐγείρατο σεῖο -Πόστουμος, αὐχήσῃ μέζον, † αφλοισι Πάφου. -
-
- - -Antipater - - -Νικίεω πόνος οὗτος· ἀειζώουσα Νεκυία -ἤσκημαι πάσης ἠρίον ἡλικίης· -δώματα δʼ Αἰδωνῆος ἐρευνήσαντος Ὁμήρου -γέγραμμαι κείνου πρῶτον ἀπʼ ἀρχετύπου. - -
-
- - -Julianus - - - -πόρτιν τήνδε Μύρωνος ἰδὼν, τάχα τοῦτο βοήσεις· - -ἢ φύσις ἄπνοός ἐστιν, ἢ ἔμπνοος ἔπλετο τέχνη. - -
-
- - -Julianus - - - -βουκόλε, πῇ προθέειν με βιάζεαι; ἴσχεο νύσσων -οὐ γάρ μοι τέχνη καὶ τόδʼ ὄπασσεν ἔχειν. -
-
- - -Julianus - - - -ἢ χαλκὸν ζώωσε Μύρων σοφός, ἢ τάχα πόρτιν -χάλκωσε ζωὰν ἐξ ἀγέλας ἐρύσας. -
-
- - -Julianus - - - -Πλάστα Μύρων, σέο πόρτιν ὁδοιπόρος ἦλθεν ἐλάσσων -χαλκοῦ δὲ ψαύσας, φὼρ κενὸς ἐξεφάνη· -
-
- - -Julianus - - - -εἰσορόων με λέων χαίνει στόμα, χερσὶ δʼ ἀείρει -γειοπόνος ζεύγλην, ἀγρονόμος κορύνην. - -
-
- - -Julianus - - - -τλῆθι, Μύρων τέχνη σε βιάζεται· ἄπνοον ἔργον. -ἐκ φύσεως τέχνη· οὐ γὰρ φύσιν εὕρετο τέχνη. -
-
- - -Anonymi epigrammatici - - - -εὔνους μὲν βασιλεῖ Μουσήλιος· ἔργα βοῶσιν -δημόσια· σθεναρὴν πράγματα πίστιν ἔχει. -Μουσεῖον Ῥώμῃ δʼ ἐχαρίσσατο, καὶ βασιλῆος -εἰκόνα θεσπεσίην ἐντὸς ἔγραψε δόμων, -τιμὴν μουσοπόλοις, πόλεως χάριν, ἐλπίδα κούρων, -ὅπλα δὲ τῆς ἀρετῆς, χρήματα τοῖς ἀγαθοῖς. -
-
- - -Anonymi epigrammatici - - -ἐν τῷ αὐτῷ -ταῦτα λόγοις ἀνέθηκεν ἑκὼν Μουσήλιος ἔργα, -πιστεύων καθαρῶς ὡς Θεός ἐστι Λόγος. -
-
- - -Anonymi epigrammatici - - -ἐν τῷ αὐτῷ -Μουσείου τὰ μὲν αὐτὸς ἐτεύξατο, πολλὰ δὲ σώσας -ἑστῶτα σφαλερῶς, ἵδρυσεν ἀσφαλέως. - -
-
- - -Anonymi epigrammatici - - - -μορφὴν τήνδʼ ὁράᾳς ζωῷ ἐναλίγκιον ἵππῳ, -Μαρκιανὸν φορέοντι, βροτῶν βασιλῆα γενέθλης· -δεξιτερὴν δʼ ἐτάνυσσε, θέοντα δὲ πῶλον ἐπείγει -δυσμενέος καθύπερθεν, ὅτις κεφαλῇ μιν ἀείρει. -
-
- - -Anonymi epigrammatici - - - -Αὐσονίων δέσποιναν Ἰουλιανὸς πολιοῦχος -ὡς σοφίης μεστὴν ἄνθετο τὴν Σοφίην. -
-
- - -Anonymi epigrammatici - - - -Ἰουστίνον κατὰ χρέος τὸν δεσπότην -Ἰουλιανὸς ὕπαρχος, ὡς εὐεργέτην. -
-
- - -Anonymi epigrammatici - - - -εἰσόκε θούριος οὗτος ἐπὶ χθονὶ κέκλιται Ἄρης, -οὔποτε Θρηικίης ἐπιβήσεται ἔθνεα Γότθων. -
-
- - -Anonymi epigrammatici - - - -κῆπος ἔην ὅδε χῶρος· ἀπὸ σκιερῶν δὲ πετήλων -νυκτοφανὴς τελέθων ἔσκεπεν ἠέλιον. - -νῦν δὲ παναιγλήεντα καὶ εὔδιον εὗρε τελέσσαι -Σέργιος αὐτόπτης μυστιπόλος Τριάδος, -ἔνθα λίθος στατὸς οὗτος ἀειδίνητον ἀνάγκην -ἑπτάκις ἀγγέλλει ἄντυγος οὐρανίης. -
-
- - -Anonymi epigrammatici - - -μηχανικὴ Φαέθοντα βιάζεται ἁρμονικοῖσι -γνώμοσιν ἀγρεύειν τὸν δρόμον ἠελίου· -βαιὸς δʼ ἀμφιέπει λίθος ἄντυγας Ἠριγενείης -ὡρονόμῳ σοφίῃ καὶ σκιόεντι τύπῳ. -Σεργίου ἀρχιερῆος ἐπουρανίῃσιν ἐφετμαῖς -τοῦτο συνειργάσθη ἔργον ἐπιχθονίων. -
-
- - -Flavius cyrus - - - -Δείματο Μαξιμίνος νεοπηγέος ἔνδοθι Ῥώμης, -αὐταῖς ἠιόνεσσι θεμείλια καρτερὰ πήξας, -ἀγλαΐη δέ μοι ἀμφὶς ἀπειρεσίη τετάνυσται. -τῇ καὶ τῇ καὶ ὄπισθεν ἔχω πτόλιν ἀλλὰ καὶ ἄντην -πάνθʼ ὁρόω γαίης Βιθυνηίδος ἀγλαὰ ἔργα. -ἡμετέροις δʼ ὑπένερθεν ἐρισθενέεσσι θεμέθλοις -πόντος ἁλὸς προχοῇσι κυλίνδεται εἰς ἅλα δῖαν, -τόσσον ἐπιψαύων, ὁπόσον χθονὸς ἄκρα διῆναι. -πολλάκι δʼ ἐξ ἐμέθεν τις ἑὸν μέγα θυμὸν ἰάνθη -βαιὸν ὑπερκύψας, ἐπεὶ εἴσιδεν ἄλλοθεν ἄλλα, -δένδρεα, δώματα, νῆας, ἅλα, πτόλιν, ἠέρα, γαῖαν. - -
-
- - -Flavius cyrus - - - -Πίνδαρον ἱμερόεντα παρʼ ὕδασι Κῦρος ἐγείρει, -οὕνεκα φορμίζων εἶπεν ἄριστον ὕδωρ. - -
-
- - -Anonymi epigrammatici - - -οὗτος Ἰουστῖνος Σοφίῃ σχεδὸν ἀμφότεροι δὲ -χρύσεον ἔργον ἔτευξαν ἀπʼ Ἀσσυρίοιο θριάμβου. -
-
- - -Anonymi epigrammatici - - -φαιδρὸν Ἰουστινιανὸς ἄναξ ἐμὲ χῶρον ἐγείρει, -ἠελίῳ παρέχων θάμβος ἀνερχομένῳ. -οὔποτε γὰρ τοιοῦτον ἐπὶ χθονὸς ἔδρακε κάλλος -ὑψόθεν οὐρανίην οἶμον ἐπερχόμενος. -
-
- - -Anonymi epigrammatici - - - -θεῖον Ἰουστῖνον, καθαρὸν φρουρήτορα θεσμῶν, -Δομνῖνος καθαροῖς ἐν προθύροισι Δίκης. -
-
- - -Anonymi epigrammatici - - - -τῆς Σοφίης τόδʼ ἄγαλμα Δίκης προπάροιθε θυράων -οὐ γὰρ ἄνευθε δίκης ἔπρεπε τὴν σοφίην. - -
-
- - -Anonymi epigrammatici - - - -νύμφαι Νηιάδες, μετανάστιοι, οὐχ ἅμα πάσας -εἴξειν ὠιόμην χεύμασιν ἡμετέροις· -εἰ δὲ τόσην τὸ λοετρὸν ἔχει χάριν, οὐδὲν ὀνήσει -ὁ φθόνος, εἰ Νύμφαι πᾶν ἀπέλειπον ὕδωρ. -
-
- - -Anonymi epigrammatici - - -ξεῖνε, τί νῦν σπεύδεις ὁρόων ἀκεσώδυνον ὕδωρ; -εὐφροσύνης τὸ λοετρὸν ἀπορρύπτει μελεδῶνας· -μόχθον ἐλαφρίζει· τόδε γὰρ ποίησε Μιχαήλ, -ὃς κρατερῆς βασιληίδος αὐλῆς ἡγεμονεύει. -
-
- - -Anonymi epigrammatici - - - -ἀντία Τηλεμάχοιο καὶ ἐγγύθι Πηνελοπείης -τίπτε, πολυφράδμων, πολυταρβέα χεῖρα τιταίνεις; -οὐκ ἐρέει μνηστῆρσι τεόν ποτε νεῦμα τιθήνη. -
-
- - -Anonymi epigrammatici - - - -ἐν τῇ τραπέζῃ τῶν ἀχράντων θυμάτων -πάθη τυθέντων τῶν ὑπὲρ Χριστοῦ γράφω· -οὕσπερ γὰρ αἰτῶ πρὸς σκέπην ἔχειν Πέτρος -φρικτοῦ τέθεικα τοῖς σκεπάσμασιν τόπου. - -
-
- - -Anonymi epigrammatici - - - -καὶ Πέτρος ἄλλος, τὸν τάφον τοῦ Κυρίου -τὸν ζωοποιὸν εἰσιδεῖν μὴ συμφθάσας, -ἔγλυψα δίσκον, μνήματος θείου τύπον, -ἐν ᾧ τὸ Χριστοῦ σῶμα κύψας προσβλέπω. -
-
- - -Anonymi epigrammatici - - - -κρατὴρ νοητὸς Πνεύματος θείου βλύσει -κατανύξεως ῥοῦν ἐγχέω ταῖς καρδίαις. -
-
- - -Anonymi epigrammatici - - - -τοῦτον Ἰουστινιανὸς ἀγακλέα δείματο χῶρον -ὕδατι καὶ γαίῃ κάλλος ἐπικρεμάσας. -
-
- - -Anonymi epigrammatici - - - -κοίρανοι, ὑμετέρην ἀρετὴν κάρτος τε καὶ ἔργα -αὐδήσει χρόνος αἰέν, ἕως πόλος ἀστέρας ἕλκῃ, -
-
- - -Anonymi epigrammatici - - - -ἀργύρεος πόλος οὗτος, ὅπῃ Φαέθοντα Σελήνη -δέρκεται ἀντιτύπων πιπλαμένη φαέων· - -ἀπλανέες δʼ ἑκάτερθε καὶ ἀντιθέοντες ἀλῆται -ἀνδρομέης γενεῆς πᾶσαν ἄγουσι τύχην. -
-
- - -Plato - - -σιγάτω λάσιον Δρυάδων λέπας, οἳ τʼ ἀπὸ πέτρας -κρουνοί, καὶ βληχὴ πουλυμιγὴς τοκάδων, -αὐτὸς ἐπεὶ σύριγγι μελίζεται εὐκελάδῳ Πάν, -ὑγρὸν ἱεὶς ζευκτῶν χεῖλος ὑπὲρ καλάμων -αἱ δὲ πέριξ θαλεροῖσι χορὸν ποσὶν ἐστήσαντο -Ὑδριάδες Νύμφαι, Νύμφαι Ἁμαδρυάδες. -
-
- - -erycius - - -Εὔστοχα θηροβολεῖτε, κυναγέται, οἱ ποτὶ ταύταν -Πανὸς ὀρειώτα νισσόμενοι σκοπιάν, -αἴτε λίνοις βαίνοιτε πεποιθότες, αἴτε σιδάρῳ, -αἴτε καὶ ἰξευταὶ λαθροβόλῳ δόνακι· -κἀμέ τις ὑμείων ἐπιβωσάτω· οἶδά ποδάγραν -κοσμεῖν, καὶ λόγχαν, καὶ λίνα, καὶ καλάμους. -
-
- - -Anonymi epigrammatici - - - -Πᾶνά με τὸν δυσέρωτα καὶ ἐξ ὑδάτων φύγεν Ἠχώ. - -
-
- - -Anonymi epigrammatici - - - -τὸν Βρομίου Σάτυρον τεχνήσατο δαιδαλέη χείρ, -μούνη θεσπεσίως πνεῦμα βαλοῦσα λίθῳ. -εἰμὶ δὲ ταῖς Νύμφαισιν ὁμέψιος· ἀντὶ δὲ τοῦ πρὶν -πορφυρέου μέθυος λαρὸν ὕδωρ προχέω. -εὔκηλον δʼ ἴθυνε φέρων πόδα, μὴ τάχα κοῦρον -κινήσῃς, ἁπαλῷ κώματι θελγόμενον. -
-
- - -Ammonius - - - -εἰμὶ μὲν εὐκεράοιο φίλος θεράπων Διονύσου, -λείβω δʼ ἀργυρέων ὕδατα Ναϊάδων -θέλγω δʼ ἠρεμέοντα νέον περὶ κώματι παῖδα - -
-
-
- - - diff --git a/data/tlg7000/tlg001/tlg7000.tlg001.perseus-grc4.tracking.json b/data/tlg7000/tlg001/tlg7000.tlg001.perseus-grc4.tracking.json deleted file mode 100644 index dc0774be6..000000000 --- a/data/tlg7000/tlg001/tlg7000.tlg001.perseus-grc4.tracking.json +++ /dev/null @@ -1,14 +0,0 @@ -{ - "epidoc_compliant": false, - "fully_unicode": true, - "git_repo": "canonical-greekLit", - "has_cts_metadata": false, - "has_cts_refsDecl": false, - "id": "2008.01.0475", - "last_editor": "", - "note": "", - "src": "texts/sdl/Anth/04_gk.xml", - "status": "migrated", - "target": "canonical-greekLit/data/tlg7000/tlg001/tlg7000.tlg001.perseus-grc4.xml", - "valid_xml": true -} \ No newline at end of file diff --git a/data/tlg7000/tlg001/tlg7000.tlg001.perseus-grc4.xml b/data/tlg7000/tlg001/tlg7000.tlg001.perseus-grc4.xml deleted file mode 100644 index f1a7675d9..000000000 --- a/data/tlg7000/tlg001/tlg7000.tlg001.perseus-grc4.xml +++ /dev/null @@ -1,10072 +0,0 @@ - - - - - - - Ἀνθολογία, Volume IV - William Roger Paton - Perseus Project, Tufts University - Gregory Crane - - Prepared under the supervision of - Lisa Cerrato - Rashmi Singhal - Bridget Almas - - The National Endowment for the Humanities - Google Digital Humanities Awards Program - - - Trustees of Tufts University - Medford, MA - Perseus Digital Library Project - Perseus 4.0 - tlg7000.tlg001.perseus-grc9.xml - - Available under a Creative Commons Attribution-ShareAlike 4.0 International License - - - - - - - The Greek Anthology - William Roger Paton - - London - William Heinemann Ltd. - New York, NY - G. P. Putnam's Sons - 1918 - - 4 - - The Internet Archive - - - - - - - - -

optical character recognition

- - - - - -

This pointer pattern extracts book and epigram.

- - -

This pointer pattern extracts book.

- - - - - - - Greek - Latin - - - - - Epidoc and CTS conversion and header review for best practices - tagged and parsed - - - - - - -
- -
-
- - -leonidas - - - -ὀ πλόος ὡραῖος· καὶ γὰρ λαλαγεῦσα χελιδὼν -ἤδη μέμβλωκεν, χὠ χαρίεις Ζέφυρος· -λειμῶνες δʼ ἀνθεῦσι, σεσίγηκεν δὲ θάλασσα -κύμασι καὶ τρηχεῖ πνεύματι βρασσομένη. -ἀγκύρας ἀνέλοιο, καὶ ἐκλύσαιο γύαια, -ναυτίλε, καὶ πλώοις πᾶσαν ἐφεὶς ὀθόνην. -ταῦθʼ ὁ Πρίηπος ἐγὼν ἐπιτέλλομαι ὁ λιμενίτας, -ὤνθρωφʼ, ὡς πλώοις πᾶσαν ἐπʼ ἐμπορίην. -
-
- - -antipater - - -Ἀκμαῖος ῥοθίῃ νηὶ δρόμος, οὐδὲ θάλασσα -πορφύρει τρομερῇ φρικὶ χαρασσομένη· -ἤδη δὲ πλάσσει μὲν ὑπώροφα γυρὰ χελιδὼν -οἰκία, λειμώνων δʼ ἁβρὰ γελᾷ πέταλα. - -τοὔνεκα μηρύσασθε διάβροχα, πείσματα ναῦται, -ἕλκετε δʼ ἀγκύρας φωλάδας ἐκ λιμένων· -λαίφεα δʼ εὐυφέα προτονίζετε. ταῦθʼ ὁ Πρίηπος -ὔμμιν ἐνορμίτας παῖς ἐνέπω Βρομίου. -
-
- - -anonymi epigrammatici - - -εἰς ἀίδην ἰθεῖα κατήλυσις, εἴτʼ ἀπʼ Ἀθηνῶν -στείχοις, εἴτε νέκυς νίσεαι ἐκ Μερόης. -μὴ σὲ γʼ ἀνιάτω πάτρης ἀποτῆλε θανόντα· -πάντοθεν εἷς ὁ φέρων εἰς ἀίδην ἄνεμος. -
-
- - -marcus argentarius - - -λῦσον ἀπʼ εὐόρμων δολιχὰ πρυμνήσια νηῶν, -εὔτροχα δʼ ἐκπετάσας λαίφεα ποντοπόρει, -ἔμπορεʼ χειμῶνες γὰρ ἀπέδραμον, ἄρτι δὲ κῦμα -γλαυκὸν θηλύνει πρηΰγελως Ζέφυρος· -ἤδη καὶ φιλότεκνος ὑπὸ τραυλοῖσι χελιδὼν -χείλεσι καρφίτην πηλοδομεῖ θάλαμον -ἄνθεα δʼ ἀντέλλουσι κατὰ χθόνα· τῷ σὺ Πριήπῳ -πειθόμενος πάσης ἅπτεο ναυτιλίης. -
-
- - -thyillus - - -ἤδη πηλοδομεῦσι χελιδόνες, ἤδη ἀνʼ οἶδμα -κολποῦται μαλακὰς εἰς ὀθόνας ζέφυρος· -ἤδη καὶ λειμῶνες ὑπὲρ πετάλων ἐχέαντο -ἄνθεα, καὶ τρηχὺς σῖγα μέμυκε πόρος. -σχοίνους μηρύεσθε, ἐφʼ ὁλκάδα φορτίζεσθε -ἀγκύρας, καὶ πᾶν λαῖφος ἔφεσθε κάλοις. -ταῦτʼ ὔμμιν πλώουσιν ἐπʼ ἐμπορίην ὁ Πρίηπος -ὁ λιμενορμίτης ναυτιλίην γράφομαι, - -
-
- - -satyrus - - -ἤδη μὲν Ζεφύροιο ποητόκου ὑγρὸν ἄημα -ἠρέμα λειμῶνας πίτνει ἐπʼ ἀνθοκόμους· -Κεκροπίδες δʼ ἠχεῦσι· γαληναίη δὲ θάλασσα -μειδιάει, κρυερῶν ἄτρομος ἐξ ἀνέμων. -ἀλλʼ ἴτε θαρσαλέοι, πρυμνήσια λύετε, ναῦται, -πίτνατε δὲ πτερύγων λεπταλέας στολίδας. -ὦ ἴτʼ ἐπʼ ἐμπορίην πίσυνοι χαρίεντι Πριήπῳ, -ὦ ἴτε δὴ λιμένων δαίμονι πειθόμενοι. -
-
- - -archias - - -τοῦδέ με κυμοπλῆγος ἐπὶ σκοπέλοιο Πρίηπον -ναῦται Θρηικίου θέντο πόρου φύλακα, -πολλάκις οἷς ἤιξα ταχὺς καλέουσιν ἀρωγός, -ξεῖνε, κατὰ πρύμνης ἡδὺν ἄγων Ζέφυρον. -τοὔνεκεν οὔτʼ ἄκνισον, ὅπερ θέμις, οὔτʼ ἐπιδευῆ -εἴαρος ἀθρήσεις βωμὸν ἐμὸν στεφάνων, -ἀλλʼ αἰεὶ θυόεντα καὶ ἔμπυρον· οὐδʼ ἑκατόμβη -τόσσον ὅσον τιμὴ δαίμοσιν ἁνδάνεται. -
-
- - -archias - - -βαιὸς ἰδεῖν ὁ Πρίηπος ἐπαιγιαλίτιδα ναίω -χηλήν, αἰθυίας οὔποτε % ἀντιβίας, -φοξός, ἄπους, οἷόν κεν ἐρημαίῃσιν ἐπʼ ἀκταῖς -ξέσσειαν μογερῶν υἱέες ἰχθυβόλων. -ἀλλʼ ἤν τις γριπεύς με βοηθόον ἢ καλαμευτὴς -φωνήσῃ, πνοιῆς ἵεμαι ὀξύτερος. -λεύσσω καὶ τὰ θέοντα καθʼ ὕδατος· ἦ γὰρ ἀπʼ ἔργων -δαίμονες, οὐ μορφᾶς γνωστὸν ἔχουσι τύπον. - -
-
- - -anonymi epigrammatici - - -τὸν βραχύν, ἰχθυβολῆες, ὑπὸ σχίνῳ με Πρίηπον -στειλάμενοι κώπαις τὰν ὀλίγαν ἄκατον, -ʽδ̔ίκτυʼ ἄγʼ ἁπλώσασθε,ʼ πολὺν δʼ ἁλινηχέα βῶκα -καὶ σκάρον, οὐ θρίσσης νόσφιν, ἀρυσσάμενοι, -γλαυκὸν ἐνιδρυνθέντα νάπῃ σημάντορα θήρης -τίετʼ, ἀπʼ οὐκ ὀλίγων βαιὸν ἀπαρχόμενοι. -
-
- - -archias - - -Πᾶνά με τόνδʼ ἱερῆς ἐπὶ λισσάδος, αἰγιαλίτην -Πᾶνα, τὸν εὐόρμων τῇδʼ ἔφορον λιμένων, -οἱ γριπῆες ἔθεντο· μέλω δʼ ἐγὼ ἄλλοτε κύρτοις, -ἄλλοτε δʼ αἰγιαλοῦ τοῦδε σαγηνοβόλοις. -ἀλλὰ παράπλει, ξεῖνε· σέθεν δʼ ἐγὼ οὕνεκα ταύτης -εὐποιΐης πέμψω πρηΰν ὄπισθε νότον. -
-
- - -satyrus - - -εἴτε σὺ γʼ ὀρνεόφοιτον ὑπὲρ καλαμῖδα παλύνας -ἰξῷ ὀρειβατέεις, εἴτε λαγοκτονέεις, -Πᾶνα κάλει. κυνὶ Πὰν λασίου ποδὸς ἴχνια φαίνει· -σύνθεσιν ἀκλινέων Πὰν ἀνάγει καλάμων. -
-
- - -anonymi epigrammatici - - -τῇδʼ ὑπὸ τὰν ἄρκευθον ἴτʼ ἀμπαύοντες, ὁδῖται, -γυῖα παρʼ Ἑρμείᾳ σμικρὸν ὁδοῦ φύλακι, - -μὴ φύρδαν, ὅσσοι δὲ βαρεῖ γόνυ κάμνετε μόχθῳ -καὶ δίψᾳ, δολιχὰν οἶμον ἀνυσσάμενοι. -πνοιὴ γὰρ καὶ θῶκος ἐύσκιος. ἅ θʼ ὑπὸ πέτρᾳ -πῖδαξ εὐνήσει γυιοβαρῆ κάματον -ἔνδιον δὲ φυγόντες ὀπωρινοῦ κυνὸς ἄσθμα, -ὡς θέμις, Ἑρμείην εἰνόδιον τίετε. -
-
- - -satyrus - - -ἦ καλὸν αἱ δάφναι, καλὸν δʼ ὑπὸ πυθμέσιν ὕδωρ -πιδύει, πυκινὸν δʼ ἄλσος ὑποσκιάει -τηλεθάον, ζεφύροισιν ἐπίδρομον, ἄλκαρ ὁδίταις -δίψης καὶ καμάτου καὶ φλογὸς ἠελίου. -
-
- - -agathias scholasticus - - -εὔδια μὲν πόντος πορφύρεται· οὐ γὰρ ἀήτης -κύματα λευκαίνει φρικὶ χαρασσόμενα· -οὐκέτι δὲ σπιλάδεσσι περικλασθεῖσα θάλασσα -ἔμπαλιν ἀντωπὸς πρὸς βάθος εἰσάγεται. -οἱ ζέφυροι πνείουσιν, ἐπιτρύζει δὲ χελιδὼν -κάρφεσι κολλητὸν πηξαμένη θάλαμον. -θάρσει, ναυτιλίης ἐμπείραμε, κἂν παρὰ Σύρτιν, -κἂν παρὰ Σικελικὴν ποντοπορῇς κροκάλην -μοῦνον ἐνορμίταο παραὶ βωμοῖσι Πριήπου -ἢ σκάρον ἢ βῶκας φλέξον ἐρευθομένους. -
-
- - -paulus silentiarius - - -ἤδη μὲν ζεφύροισι μεμυκότα κόλπον ἀνοίγει -εἴαρος εὐλείμων θελξινόοιο χάρις· -ἄρτι δὲ δουρατέοισιν ἐπωλίσθησε κυλίνδροις -ὁλκὰς ἀπʼ ἠιόνων ἐς βυθὸν ἑλκομένη. - -λαίφεα κυρτώσαντες ἀταρβέες ἔξιτε, ναῦται, -πρηῢν ἀμοιβαίης φόρτον ἐς ἐμπορίης. -πιστὸς νηυσὶ Πρίηπος, ἐπεὶ Θέτιν εὔχομαι εἶναι -ἡμετέρου πατρὸς ξεινοδόκον Βρομίου. -
-
- - -theaetetus - - -ἤδη καλλιπέτηλον ἐπʼ εὐκάρποισι λοχείαις -λήιον ἐκ ῥοδέων ἀνθοφορεῖ καλύκων -ἤδη ἐπʼ ἀκρεμόνεσσιν ἰσοζυγέων κυπαρίσσων -μουσομανὴς τέττιξ θέλγει ἀμαλλοδέτην· -καὶ φιλόπαις ὑπὸ γεῖσα δόμους τεύξασα χελιδὼν -ἔκγονα πηλοχύτοις ξεινοδοκεῖ θαλάμοις. -ὑπνώει δὲ θάλασσα, φιλοζεφύροιο γαλήνης -νηοφόροις νώτοις εὔδια πεπταμένης, -οὐκ ἐπὶ πρυμναίοισι καταιγίζουσα κορύμβοις, -οὐκ ἐπὶ ῥηγμίνων ἀφρὸν ἐρευγομένη. -ναυτίλε, ποντομέδοντι καὶ ὁρμοδοτῆρι Πριήπῳ -τευθίδος ἢ τρίγλης ἀνθεμόεσσαν ἴτυν, -ἢ σκάρον αὐδήεντα παραὶ βωμοῖσι πυρώσας, -ἄτρομος Ἰονίου τέρμα θαλασσοπόρει. -
-
- - -antiphilus - - -Ἀρχέλεω, λιμενῖτα, σὺ μέν, μάκαρ, ἠπίῳ αὔρῃ -πέμπε κατὰ σταθερῆς οἰχομένην; ὀθόνην -ἄχρις ἐπὶ Τρίτωνα· σὺ δʼ ἠόνος ἄκρα λελογχὼς -τὴν ἐπὶ Πυθείου ῥύεο ναυστολίην· -κεῖθεν δʼ, εἰ Φοίβῳ μεμελήμεθα πάντες ἀοιδοί, -πλεύσομαι εὐαεῖ θαρσαλέως ζεφύρῳ. - -
-
- - -marcus argentarius - - -Γῶβρυ, Διώνυσός σε καὶ ἡ φιλεράστρια Κύπρις -τέρποι, καὶ γλυκεραὶ γράμμασι Πιερίδες· -ὧν μὲν γὰρ σοφίην ἀποδρέπτεο· τῆς δʼ ἐς ἔρωτας -ἔρχεο· τοῦ δὲ φίλας λαβροπότει κύλικας. -
-
- - -apollonides - - -ἡδὺ παρειάων πρῶτον θέρος ἤματι τούτῳ -κείρεο, καὶ γενύων ἠιθέους ἕλικας, -Γάιε· σὸν δὲ πατὴρ χερὶ δέξεται εὐκτὸν ἴουλον -Λεύκιος, αὐξομένου πουλὺν ἐς ἠέλιον. -δωρεῦνται χρυσέοισιν, ἐγὼ δʼ ἱλαροῖς ἐλέγοισιν -οὐ γὰρ δὴ πλούτου Μοῦσα χερειοτέρη. -
-
- - -adaeus - - -ἤν τινα καλὸν ἴδῃς, εὐθὺς τὸ πρῆγμα κροτείσθω· -βάζʼ ἃ φρονεῖς· ὄρχεων δράσσεο χερσὶν ὅλαις· -ἢν δʼ εἴπῃς, τίω σε, καὶ ἔσσομαι οἷά τʼ ἀδελφός, - -αἰδώς σου κλείσει τὴν ἐπὶ τοὔργον ὁδόν. -
-
- - -philodemus - - -Κύπρι γαληναίη, φιλονύμφιε, Κύπρι δικαίων -σύμμαχε, Κύπρι Πόθων μῆτερ ἀελλοπόδων, -Κύπρι, τὸν ἡμίσπαστον ἀπὸ κροκέων ἐμὲ παστῶν, -τὸν χιόσι ψυχὴν Κελτίσι νιφόμενον, -Κύπρι, τὸν ἡσύχιόν με, τὸν οὐδενὶ κοῦφα λαλεῦντα, -τὸν σέο πορφυρέῳ κλυζόμενον πελάγει, - -Κύπρι φιλορμίστειρα, φιλόργιε, σῷζέ με, Κύπρι, -Ναϊακοὺς ἤδη, δεσπότι, πρὸς λιμένας. -
-
- - -bianor - - -μὴ πόδα γυμνὸν ἔρεσσε διʼ ὑλάεσσαν ἀταρπὸν -Αἰγύπτου· χαροπῶν φεῦγε διὲξ ὀφίων, -ἀγρεῦ δουνακόδιφα· τὸν ἐκ χέρσου δὲ φύλαξαι -ἰόν, ὁ τοξεύειν ὄρνιν ἐπειγόμενος. -
-
- - -automedon - - -Νικήτης ὀλίγοις μὲν ἐπὶ προτόνοισιν, ἀήτης -οἷάτε, πρηείης ἄρχεται ἐκ μελέτης· -ἀλλʼ ὅταν ἐμπνεύσῃ, κατὰ δʼ ἱστία πάντα φέρηται, -λαίφεα πακτώσας, μέσσα θέει πελάγη, -ναῦς ἅτε μυριόφορτος, ἕως ἐπὶ τέρματα μύθων -ἔλθῃ ἀκυμάντους † ἔμπροσθεν εἰς λιμένας. -
-
- - -crinagoras - - -φρὴν ἱερὴ μεγάλου Ἐνοσίχθονος, ἔσσο καὶ ἄλλοις -ἠπίη, Αἰγαίην οἳ διέπουσιν ἅλα· -κἠμοὶ γὰρ Θρήικι διωκομένῳ ὑπʼ ἀήτῃ -ὤρεξας πρηεῖʼ ἀσπασίῳ λιμένας. -
-
- - -antipater - - -Φοῖβε, Κεφαλλήνων λιμενοσκόπε, θῖνα Πανόρμου -ναίων, τρηχείης ἀντιπέρην Ἰθάκης, - -δός με διʼ εὐπλώτοιο πρὸς Ἀσίδα κύματος ἐλθεῖν, -Πείσωνος δολιχῇ νηὶ συνεσπόμενον -καὶ τὸν ἐμὸν βασιλῆα τὸν ἄλκιμον εὖ μὲν ἐκείνῳ -ἵλαον, εὖ δʼ ὕμνοις ἄρτισον ἡμετέροις. -
-
- - -pseudo-lucianus - - -ὡς τεθνηξόμενος τῶν σῶν ἀγαθῶν ἀπόλαυε, -ὡς δὲ βιωσόμενος φείδεο σῶν κτεάνων. -ἔστι δʼ ἀνὴρ σοφὸς οὗτος, ὃς ἄμφω ταῦτα νοήσας -φειδοῖ καὶ δαπάνῃ μέτρον ἐφηρμόσατο. -
-
- - -pseudo-lucianus - - -ἀνθρώπους μὲν ἴσως λήσεις ἄτοπόν τι ποιήσας, -οὐ λήσεις δὲ θεοὺς οὐδὲ λογιζόμενος. -
-
- - -pseudo-lucianus - - -τοῖσι μὲν εὖ πράττουσιν πᾶς ὁ βίος βραχύς; ἐστιν, -τοῖς δὲ κακῶς μία νὺξ ἄπλετός ἐστι χρόνος. -
-
- - -pseudo-lucianus - - -οὐχ ὁ Ἔρως ἀδικεῖ μερόπων γένος, ἀλλʼ ἀκολάστοις -ψυχαῖς ἀνθρώπων ἔσθʼ ὁ Ἔρως πρόφασις. -
-
- - -anonymi epigrammatici - - -ὠκεῖαι χάριτες γλυκερώτεραι· ἢν δὲ βραδύνῃ, -πᾶσα χάρις κενεή, μηδὲ λέγοιτο χάρις. - -
-
- - -pseudo-lucianus - - -θνητὰ τὰ τῶν θνητῶν, καὶ πάντα παρέρχεται ἡμᾶς -ἢν δὲ μή, ἀλλʼ ἡμεῖς αὐτὰ παρερχόμεθα. -
-
- - -palladas - - -πολλὰ μεταξὺ πέλει κύλικος, καὶ χείλεος ἄκρου, -
-
- - -anonymi epigrammatici - - -ἐσθλὰ λέγειν αἰεὶ πάντας, καλὸν αἰσχρὰ δέ, δεινόν, -κἂν ὦσιν τούτων ἄξιοι ὧν λέγομεν. -
-
- - -palladas - - -εἰ τὸ μέλειν δύναταί τι, μερίμνα καὶ μελέτω σοι· -εἰ δὲ μέλει περὶ σοῦ δαίμονι, σοὶ τί μέλει; -οὔτε μεριμνήσεις δίχα δαίμονος, οὔτʼ ἀμελήσεις· -ἀλλʼ ἵνα σοί τι μέλῃ, δαίμονι τοῦτο μέλει. -
-
- - -pseudo-lucianus - - -εὖ πράττων, φίλος εἶ θνητοῖς, φίλος εἶ μακάρεσσι, -καί σευ ῥηιδίως ἔκλυον εὐξαμένου· -ἢν πταίσῃς, οὐδεὶς ἔτι σοι φίλος, ἀλλʼ ἅμα πάντα -ἐχθρά, Τύχης ῥιπαῖς συμμεταβαλλόμενα. -
-
- - -pseudo-lucianus - - -οὐδὲν ἐν ἀνθρώποισι Φύσις χαλεπώτερον εὗρεν -ἀνθρώπου καθαρὰν ψευδομένου φιλίην - -οὐ γὰρ ἔθʼ ὡς ἐχθρὸν προφυλασσόμεθʼ, ἀλλʼ ἀγαπῶντες -ὡς φίλον, ἐν τούτῳ πλείονα βλαπτόμεθα. -
-
- - -pseudo-lucianus - - -ἡ βραδύπους βουλὴ μέγʼ ἀμείνων ἡ δὲ ταχεῖα -αἰὲν ἐφελκομένη τὴν μετάνοιαν ἔχει. -
-
- - -dionysius - - -ὥρη ἐρᾶν, ὥρη δὲ γαμεῖν, ὥρη δὲ πεπαῦσθαι. -
-
- - -anonymi epigrammatici - - -θησαυρὸς μέγας ἔστʼ ἀγαθὸς φίλος, Ἡλιόδωρε -τῷ καὶ τηρῆσαι τοῦτον ἐπισταμένῳ. -
-
- - -theognis - - -μή ποτε, τὸν παρεόντα παρεὶς φίλον, ἄλλον ἐρεύνα, -δειλῶν ἀνθρώπων ῥήμασι πειθόμενος. -
-
- - -pseudo-lucianus - - -πλοῦτος ὁ τῆς ψυχῆς πλοῦτος μόνος ἐστὶν ἀληθής· -τἆλλα δʼ ἔχει λύπην πλείονα τῶν κτεάνων. -τόνδε πολυκτέανον καὶ πλούσιον ἐστι δίκαιον -κλῄζειν, ὃς χρῆσθαι τοῖς ἀγαθοῖς δύναται. -εἰ δέ τις ἐν ψήφοις κατατήκεται, ἄλλον ἐπʼ ἄλλῳ -σωρεύειν αἰεὶ πλοῦτον ἐπειγόμενος, -οὗτος ὁποῖα μέλισσα πολυτρήτοις ἐνὶ σίμβλοις -μοχθήσει, ἑτέρων δρεπτομένων τὸ μέλι. - -
-
- - -pseudo-lucianus - - -ἀρρήτων ἐπέων γλώσσῃ σφραγὶς ἐπικείσθω· -κρείσσων γὰρ μύθων ἢ κτεάνων φυλακή. -
-
- - -anonymi epigrammatici - - -ἓξ ὧραι μόχθοις ἱκανώταται αἱ δὲ μετʼ αὐτὰς -γράμμασι δεικνύμεναι ζῆθι λέγουσι βροτοῖς. -
-
- - -palladas - - -ἢν ὁ φίλος τι λάβῃ, δόμινε φράτερ εὐθὺς ἔγραψεν -ἢν δʼ αὖ μή τι λάβῃ, τὸ φράτερ εἶπε μόνον -ὤνια γὰρ καὶ ταῦτα τὰ ῥήματα. αὐτὰρ ἔγωγε - -οὐκ ἐθέλω δόμινε, οὐ γὰρ ἔχω δόμεναι. - -
-
- - -palladas - - -ἂν μνήμην, ἄνθρωπε, λάβῃς, ὁ πατήρ σε τί ποιῶν -ἔσπειρεν, παύσῃ τῆς μεγαλοφροσύνης. -ἀλλʼ ὁ Πλάτων σοὶ τῦφον ὀνειρώσσων ἐνέφυσεν, -ἀθάνατόν σε λέγων καὶ φυτὸν οὐράνιον. -ἐκ πηλοῦ γέγονας· τί φρονεῖς μέγα; τοῦτο μὲν οὕτως -εἶπʼ ἄν τις, κοσμῶν πλάσματι σεμνοτέρῳ. -εἰ δὲ λόγον ζητεῖς τὸν ἀληθινόν, ἐξ ἀκολάστου -λαγνείας γέγονας καὶ μιαρᾶς ῥανίδος. - -
-
- - -palladas - - -ἡ μεγάλη παίδευσις ἐν ἀνθρώποισι σιωπή· -μάρτυρα Πυθαγόραν τὸν σοφὸν αὐτὸν ἔχω, -ὅς, λαλέειν εἰδὼς, ἑτέρους ἐδίδασκε σιωπᾷν, -φάρμακον ἡσυχίης ἐγκρατὲς εὑρόμενος. -
-
- - -palladas - - -ἔσθιε, πῖνε, μύσας ἐπὶ πένθεσιν οὐ γὰρ ἔοικεν -γαστέρι πενθῆσαι νεκρόν Ὅμηρος ἔφη· -καὶ γὰρ ὁμοῦ θάψασαν ὀλωλότα δώδεκα τέκνα -σίτου μνησαμένην τὴν Νιόβην παράγει. -
-
- - -palladas - - -μήποτε δουλεύσασα γυνὴ δέσποινα γένοιτο, -ἐστὶ παροιμιακόν. τῷδε δʼ ὅμοιον ἐρῶ· -μήτε δίκην δικάσειεν ἀνὴρ γεγονὼς δικολέκτης, -μηδʼ ὅταν Ἰσοκράτους ῥητορικώτερος ᾖ. -πῶς γὰρ ὁ μισθαρνεῖν εἰθισμένος οὐδὲν ἑταίρας -σεμνότερον, δικάσαι μὴ ῥυπαρῶς δύναται; -
-
- - -palladas - - -καὶ μύρμηκι χολὴν καὶ σέρφῳ φασὶν ἐνεῖναι· -εἶτα χολὴν μὲν ἔχει ζῷα τὰ φαυλότατα, -ἐκκεῖσθαι δʼ ἐμὲ πᾶσι χολὴν μὴ ἔχοντα κελεύεις, -ὡς μηδὲ ψιλοῖς ῥήμασιν ἀνταδικεῖν -τοὺς ἔργοις ἀδικοῦντας; ἀποφράξαντα δεήσει -λοιπὸν ὁλοσχοίνῳ τὸ στόμα, μηδὲ πνέειν. - -
-
- - -palladas - - -τὴν Κίρκην οὔ φημι, καθὼς εἴρηκεν Ὅμηρος, -ἀντʼ ἀνδρῶν ποιεῖν ἢ σύας ἠὲ λύκους -τοὺς αὐτῇ προσιόντας· ἑταίρα δʼ οὖσα πανοῦργος, -τοὺς δελεασθέντας πτωχοτάτους ἐποίει· -τῶν δʼ ἀνθρωπείων ἀποσυλήσασα λογισμῶν, -εἶτʼ ἀπὸ τῶν ἰδίων μηδὲν ἔχοντας ἔτι -ἔτρεφεν ἔνδον ἔχουσα δίκην ζῴων ἀλογίστων. -ἔμφρων δʼ ὢν Ὀδυσεύς, τὴν νεότητα φυγών, -οὐχ Ἑρμοῦ, φύσεως δʼ ἰδίας ἐμφύντα λογισμὸν -εἶχε γοητείας φάρμακον ἀντίπαλον. -
-
- - -palladas - - -ὁ φθόνος οἰκτιρμοῦ, κατὰ Πίνδαρον, ἐστιν ἀμείνων -οἱ βασκαινόμενοι λαμπρὸν ἔχουσι βίον -τοὺς δὲ λίαν ἀτυχεῖς οἰκτείρομεν. ἀλλά τις εἴην -μήτʼ ἄγαν εὐδαίμων, μήτʼ ἐλεεινὸς ἐγώ. -ἡ μεσότης γὰρ ἄριστον, ἐπεὶ τὰ μὲν ἄκρα πέφυκεν -κινδύνους ἐπάγειν, ἔσχατα δʼ ὕβριν ἔχει. -
-
- - -palladas - - -εὖγε λέγων, τὸν Καιρὸν ἔφης θεόν, εὖγε, Μένανδρε, -ὡς ἀνὴρ Μουσῶν καὶ Χαρίτων τρόφιμος -πολλάκι γὰρ τοῦ σφόδρα μεριμνηθέντος ἄμεινον -προσπεσὸν εὐκαίρως εὗρέ τι ταὐτόματον. -
-
- - -palladas - - -εἰ τοὺς ἀνδροφόνους εὐδαίμονας ὄντας ὁρῶμεν, -οὐ πάνυ θαυμάζω· τοῦ Διός ἐστι γέρας. - -τὸν γὰρ γεννήσαντα μεμισηκὼς καὶ ἐκεῖνος -κτεῖνεν ἄν, εἰ ὁ Κρόνος θνητὸς ἐτύγχανεν ὤν· -ἀντὶ δὲ τοῦ κτεῖναι σὺν τοῖς Τιτῆσι κολάζει, -δέσμιον, ὡς λῃστήν, εἰς τὸ βάραθρον ἐνείς. -
-
- - -palladas - - -οὐ ποιεῖ θάνατον μόνον ἡ φθίσις· ἀλλὰ τὸν αὐτὸν -καὶ πολλὴ παχύτης πολλάκις εἰργάσατο. -τοῦδʼ ὁ τυραννήσας Διονύσιος Ἡρακλείας -τῆς ἐν τῷ Πόντῳ μάρτυς, ὁ τοῦτο παθών. -
-
- - -palladas - - -ἂν πάνυ κομπάζῃς προστάγμασι μὴ ὑπακούειν -τῆς γαμετῆς, ληρεῖς· “οὐ γὰρ ἀπὸ δρυὸς εἶ, -οὐδʼ ἀπὸ πέτρης,” φησὶν ὃ θʼ οἱ πολλοὶ κατʼ ἀνάγκην -πάσχομεν, ἢ πάντες, καὶ σὺ γυναικοκρατᾖ. -εἰ δʼ, οὐ σανδαλίῳ, φὴς, “ τύπτομαι, οὐδʼ, ἀκολάστου -οὔσης μοι γαμετῆς, χρή με μύσαντα φέρειν” -δουλεύειν σε λέγω μετριώτερον, εἴ γε πέπρασαι -σώφρονι δεσποίνῃ μηδὲ λίαν χαλεπῇ. -
-
- - -palladas - - -οὐδὲν σωφροσύνης τεκμήριόν ἐστι πρόδηλον· -τοῖς ἐμπαιζομένοις ἀνδράσι ταῦτα λέγω. -οὔτε τὸ δύσμορφον πάντως ἀνύποπτον ὑπάρχει, -οὔτʼ ἀκολασταίνειν πᾶσα πέφυκε καλή, -καὶ γάρ τις διὰ τὴν ὥραν τοῖς πολλὰ διδοῦσιν -οὐχ ἕπεται· πολλὰς δʼ ἔστι γυναῖκας ἰδεῖν - -οὐχὶ καλὰς τὴν ὄψιν, ὀπυιομένας ἀκορέστως, -καὶ τοῖς χ;χρησαμένοις πολλὰ χαριζομένας. -οὐκ εἴ τις συνάγει τὰς ὀφρύας, οὐδὲ γελῶσα -φαίνεται, ὀφθῆναὶ τʼ ἀνδράσιν ἐκτρέπεται, -σωφροσύνης τρόπος οὗτος ἐχέγγυος· ἀλλά τις εὕροι -μαχλάδα; μὲν κρύβδην τὴν πάνυ σεμνοτάτην, -τὰς δʼ ἱλαρὰς καὶ πᾶσι φιλανθρώπως προσιούσας -σώφρονας, εἰ σώφρων ἐστὶ γυνή τις ὅλως. -ἡλικίᾳ τοίνυν τάδε κρίνεται; ἀλλʼ Ἀφροδίτης -οἴστρων εἰρήνην οὐδὲ τὸ γῆρας ἔχει. -ὅρκοις λοιπὸν ἄγει τε πεποίθαμεν ἀλλὰ μεθʼ ὅρκον -ζητεῖν ἔστι θεοὺς δώδεκα και † νερεου. -
-
- - -palladas - - -γαστέρα μισήσειε θεὸς καὶ βρώματα γαστρός· -εἵνεκα γὰρ τούτων σωφροσύνα λύεται. -
-
- - -palladas - - -γῆς ἐπέβην γυμνός, γυμνός θʼ ὑπὸ γαῖαν ἄπειμι· -καὶ τί μάτην μοχθῶ, γυμνὸν ὁρῶν τὸ τέλος; -
-
- - -palladas - - -Προσδοκίη θανάτου πολυώδυνός ἐστιν ἀνίη· -τοῦτο δὲ κερδαίνει θνητὸς ἀπολλύμενος. -μὴ τοίνυν κλαύσῃς τὸν ἀπερχόμενον βιότοιο· -οὐδὲν γὰρ θανάτου δεύτερόν ἐστι πάθος. - -
-
- - -palladas - - -πλουτεῖς· καὶ τί τὸ λοιπόν; ἀπερχόμενος μετὰ σαυτοῦ -τὸν πλοῦτον σύρεις, εἰς σορὸν ἑλκόμενος; -τὸν πλοῦτον συνάγεις δαπανῶν χρόνον οὐ δύνασαι δὲ -ζωῆς σωρεῦσαι μέτρα περισσότερα. -
-
- - -palladas - - -φεύγετε τοὺς πλουτοῦντας, ἀναιδέας, οἰκοτυράννους, -μισοῦντας πενίην μητέρα σωφροσύνας. -
-
- - -palladas - - -οὐ λόγον, οὐ νόμον οἶδε Τύχη, μερόπων δὲ τυραννεῖ, -τοῖς ἰδίοις ἀλόγως ῥεύμασι συρομένη. -μᾶλλον τοῖς ἀδίκοισι ῥέπει, μισεῖ δὲ δικαίους, -ὡς ἐπιδεικνυμένη τὴν ἄλογον δύναμιν. -
-
- - -palladas - - -μηδέποτε ζήσας ὁ πένης βροτὸς οὐδʼ ἀποθνῄσκει· -καὶ ζῆν γὰρ δοκέων, ὡς νέκυς ἦν ὁ τάλας. -οἱ δὲ τύχας μεγάλας καὶ χρήματα πολλὰ λαχόντες, -οὗτοι τὸν θάνατον πτῶσιν ἔχουσι βίου. -
-
- - -agathias scholasticus - - -ἦ ῥά γε ποῦ τὸ φρύαγμα τὸ τηλίκον; οἱ δὲ περισσοὶ -πῆ ἔβαν ἐξαίφνης ἀγχίποροι κόλακες; - -νῦν γὰρ ἑκὰς πτόλιος φυγὰς ᾤχεο· τοῖς πρότερον δε -οἰκτροῖς τὴν κατὰ σοῦ ψῆφον ἔδωκε Τύχη. -πολλὴ σοί, κλυτοεργὲ Τύχη, χάρις, οὕνεχʼ ὁμοίως -πάντας ἀεὶ παίζεις, κεἰσέτι τερπόμεθα.. -
-
- - -palladas - - -πλοῦς σφαλερὸς τὸ ζῆν χειμαζόμενοι γὰρ ἐν αὐτῷ -πολλάκι ναυηγῶν πταίομεν οἰκτρότερα. -τὴν δὲ Τύχην βιότοιο κυβερνήτειραν ἔχοντες, -ὡς ἐπὶ τοῦ πελάγους, ἀμφίβολοι πλέομεν, -οἱ μὲν ἐπʼ εὐπλοΐην, οἱ δʼ ἔμπαλιν ἀλλʼ ἅμα πάντες -εἰς ἕνα τὸν κατὰ γῆς ὅρμον ἀπερχόμεθα. -
-
- - -agathias scholasticus - - -εὖτέ τις ἐκ πενίης πλούτου τύχοι ἠδὲ καὶ ἀρχῆς, -οὐκέτι γινώσκει, τίς πέλε τὸ πρότερον. -τήν ποτε γὰρ φιλίην ἀπαναίνεται· ἀφρονέων δε -τέρψιν ὀλισθηρῆς οὐ δεδάηκε Τύχης. -ἦς ποτε γὰρ πτωχὸς ταλαπείριος· οὐκ ἐθέλεις δέ, -αἰτίζων ἀκόλους, νῦν ἑτέροις παρέχειν. -πάντα, φίλος, μερόπεσσι παρέρχεται· εἰ δʼ ἀπιθήσεις, -ἔμπαλιν αἰτίζων μάρτυρα σαυτὸν ἔχοις. -
-
- - -macedonius ii - - -μνήμη καὶ Λήθη, μέγα χαίρετον ἡ μὲν ἐπʼ ἔργοις -μνήμη τοῖς ἀγαθοῖς, ἡ δʼ, ἐπὶ λευγαλέοις. - -
-
- - -agathias scholasticus - - -καλὸν μὲν στυγόδεμνον ἔχειν νόον εἰ δʼ ἄρʼ ἀνάγκη, -ἀρσενικὴ φιλότης μὴ ποτέ σε κλονέοι. -θηλυτέρας φιλέειν ὀλίγον κακόν, οὕνεκα κείναις -Κυπριδίους ὀάρους πότνα δέδωκε φύσις. -δέρκεο τῶν ἀλόγων ζῴων γένος· ἦ γὰρ ἐκείνων -οὐδὲν ἀτιμάζει θέσμια συζυγίης· -ἄρσενι γὰρ θήλεια συνάπτεται· οἱ δʼ ἀλεγεινοὶ -ἄνδρες ἐς ἀλλήλους ξεῖνον ἄγουσι γάμον. -
-
- - -agathias scholasticus - - -τὸν θάνατον τί φοβεῖσθε, τὸν ἡσυχίης γενετῆρα, -τὸν παύοντα νόσους καὶ πενίης ὀδύνας; -μοῦνον ἅπαξ θνητοῖς παραγίνεται, οὐδέ ποτʼ αὐτὸν -εἶδέν τις θνητῶν δεύτερον ἐρχόμενον -αἱ δὲ νόσοι πολλαὶ καὶ ποικίλαι, ἄλλοτʼ ἐπʼ ἄλλον -ἐρχόμεναι θνητῶν, καὶ μεταβαλλόμεναι. -
-
- - -macedonius ii - - -εἰ βίον ἐν μερόπεσσι Τύχης παίζουσιν ἑταῖραι -ἐλπίδες ἀμβολάδην πάντα χαριζόμεναι, -παίζομαι, εἰ βροτός εἰμι. βροτὸς δʼ εὖ οἶδα καὶ αὐτὸς -θνητὸς ἐών δολιχαῖς δʼ ἐλπίσι παιζόμενος, -αὐτὸς ἑκοντὶ γέγηθα πλανώμενος, οὐδὲ γενοίμην -ἐς κρίσιν ἡμετέρην πικρὸς Ἀριστοτέλης. -τὴν γὰρ Ἀνακρείοντος ἐνὶ πραπίδεσσι φυλάσσω -παρφασίην, ὅτι δεῖ φροντίδα μὴ κατέχειν. - -
-
- - -macedonius ii - - -Πανδώρης ὁρόων γελόω πίθον, οὐδὲ γυναῖκα -μέμφομαι, ἀλλʼ αὐτῶν τὰ πτερὰ τῶν Ἀγαθῶν. -ὡς γὰρ ἐπʼ Οὐλύμποιο μετὰ χθονὸς ἤθεα πάσης -πωτῶνται, πίπτειν καὶ κατὰ γῆν ὄφελον. -ἡ δὲ γυνὴ μετὰ πῶμα κατωχρήσασα παρειὰς -ὤλεσεν ἀγλαΐην ὧν ἔφερεν χαρίτων. -ἀμφοτέρων δʼ ἥμαρτεν ὁ νῦν βίος, ὅττι καὶ αὐτὴν -γηράσκουσαν ἔχει, καὶ πίθος οὐδὲν ἔχει. -
-
- - -palladas - - -σκηνὴ πᾶς ὁ βίος καὶ παίγνιον· ἢ μάθε παίζειν, -τὴν σπουδὴν μεταθείς, ἢ φέρε τὰς ὀδύνας. -
-
- - -palladas - - -εἰ τὸ φέρον σε φέρει, φέρε καὶ φέρου· εἰ δʼ ἀγανακτεῖς -καὶ σαυτὸν λυπεῖς, καὶ τὸ φέρον σε φέρει. -
-
- - -paulus silentiarius - - -μήτε βαθυκτεάνοιο τύχης κουφίζεο ῥοίζῳ, -μήτε σέο γνάμψῃ φροντὶς ἐλευθερίην. -πᾶς γὰρ ὑπʼ ἀσταθέεσσι βίος πελεμίζεται αὔραις, -τῇ καὶ τῇ θαμινῶς ἀντιμεθελκόμενος. -ἡ δʼ ἀρετὴ σταθερόν τι καὶ ἄτροπον, ἧς ἔπι μούνης -κύματα θαρσαλέως ποντοπόρει βιότου. - -
-
- - -palladas - - -ἠέρα λεπταλέον μυκτηρόθεν ἀμπνείοντες -ζώομεν, ἠελίου λαμπάδα δερκόμενοι, -πάντες ὅσοι ζῶμεν κατὰ τὸν βίον ὄργανα δʼ ἐσμέν, -αὔραις ζῳογόνοις πνεύματα δεχνύμενοι. -εἰ δέ τις οὖν ὀλίγην παλάμῃ σφίγξειεν ἀυτμήν, -ψυχὴν συλήσας εἰς Ἀίδην κατάγει. -οὕτως οὐδὲν ἐόντες, ἀγηνορίῃ τρεφόμεσθα, -πνοιῆς ἐξ ὀλίγης ἠέρα βοσκόμενοι. -
-
- - -paulus silentiarius - - -οὐ τὸ ζῆν χαρίεσσαν ἔχει φύσιν, ἀλλὰ τὸ ῥῖψαι -φροντίδας ἐκ στέρνων τὰς πολιοκροτάφους. -πλοῦτον ἔχειν ἐθέλω τὸν ἐπάρκιον· ἡ δὲ περισσὴ -θυμὸν ἀεὶ κατέδει χρυσομανὴς μελέτη. -ἔνθεν ἐν ἀνθρώποισιν ἀρείονα πολλάκι δήεις -καὶ πενίην πλούτου, καὶ βιότου θάνατον. -ταῦτα σὺ γινώσκων κραδίης ἴθυνε κελεύθους, -εἰς μίαν εἰσορόων ἐλπίδα, τὴν σοφίην. -
-
- - -palladas - - -τίπτε μάτην, ἄνθρωπε, πονεῖς καὶ πάντα ταράσσεις, -κλήρῳ δουλεύων τῷ κατὰ τὴν γένεσιν; -τούτῳ σαυτὸν ἄφες, τῷ δαίμονι μὴ φιλονείκει -σὴν δὲ τύχην στέργων, ἡσυχίην ἀγάπα· -μᾶλλον ἐπʼ εὐφροσύνην δὲ βιάζεο, καὶ παρὰ μοίρην, -εἰ δυνατόν, ψυχὴν τερπομένην μετάγειν. - -
-
- - -palladas - - -ῥῖπτε γόους, μὴ κάμνε, πόσον χρόνον ἐνθάδε μίμνων, -ὡς πρὸς ἐκεῖνον ὅλον τὸν μετὰ ταῦτα βίον. -πρὶν τοίνυν σκώληκα βαλεῖν τύμβοις τε ῥιφῆναι, -μη δαμάσῃς ψυχὴν ζῶν ἔτι κρινομένην, -
-
- - -palladas - - -νυκτὸς ἀπερχομένης γεννώμεθα ἦμαρ ἐπʼ ἦμαρ, -τοῦ προτέρου βιότου μηδὲν ἔχοντες ἔτι, -ἀλλοτριωθέντες τῆς ἐχθεσινῆς διαγωγῆς, -τοῦ λοιποῦ δὲ βίου σήμερον ἀρχόμενοι. -μὴ τοίνυν λέγε σαυτὸν ἐτῶν, πρεσβῦτα, περισσῶν -τῶν γὰρ ἀπελθόντων σήμερον οὐ μετέχεις. -
-
- - -palladas - - -παίγνιόν ἐστι Τύχης μερόπων βίος, οἰκτρός, ἀλήτης, -πλούτου καὶ πενίης μεσσόθι ῥεμβόμενος. -καὶ τοὺς μὲν κατάγουσα πάλιν σφαιρηδὸν ἀείρει, -τοὺς δʼ ἀπὸ τῶν νεφελῶν εἰς ἀίδην κατάγει. -
-
- - -palladas - - -ὦ τῆς βραχείας ἡδονῆς τῆς τοῦ βίου· -τὴν ὀξύτητα τοῦ χρόνου πενθήσατε. -ἡμεῖς καθεζόμεσθα καὶ κοιμώμεθα, -μοχθοῦντες ἢ τρυφῶντες· ὁ δὲ χρόνος τρέχει, -τρέχει καθʼ ἡμῶν τῶν ταλαιπώρων βροτῶν, -φέρων ἑκάστου τῷ βίῳ καταστροφήν. - -
-
- - -palladas - - -ἄρα μὴ θανόντες τῷ δοκεῖν ζῶμεν μόνον, -Ἕλληνες ἄνδρες, συμφορᾷ πεπτωκότες -ὄνειρον εἰκάζοντες εἶναι τὸν βίον; -ἢ ζῶμεν ἡμεῖς, τοῦ βίου τεθνηκότος; -
-
- - -palladas - - -καὶ τὸ φρονεῖν πλουτεῦντι περίστασις, ὄχλος, -ἀνάγκη -† ζώνη ποικίλη καὶ κολάκων ἀνάγκη. -
-
- - -palladas - - -δακρυχέων γενόμην, καὶ δακρύσας ἀποθνῄσκω· -δάκρυσι δʼ ἐν πολλοῖς τὸν βίον εὗρον ὅλον. -ὦ γένος ἀνθρώπων πολυδάκρυτον, ἀσθενές, οἰκτρόν, -φαινόμενον κατὰ γῆς, καὶ διαλυόμενον, -
-
- - -palladas - - -πάντες τῷ θανάτῳ τηρούμεθα, καὶ τρεφόμεσθα -ὡς ἀγέλη χοίρων σφαζομένων ἀλόγως. -
-
- - -palladas - - -οὐ δαψιλῶς μέν, ἀλλʼ ὅμως κἀγὼ τρέφω -παῖδας, γυναῖκα, δοῦλον, ὄρνιθας, κύνα· -κόλαξ γὰρ οὐδεὶς τοὺς ἐμοὺς πατεῖ δόμους. -
-
- - -palladas - - -ἂν μὴ γελῶμεν τὸν βίον τὸν δραπέτην, -τύχην τε πόρνην ῥεύμασιν κινουμένην, -ὀδύνην ἑαυτοῖς προξενοῦμεν πάντοτε, -ἀναξίους ὁρῶντες εὐτυχεστέρους. - -
-
- - -palladas - - -σῶμα, πάθος ψυχῆς, ᾅδης, μοῖρʼ, ἄχθος, ἀνάγκη, -καὶ δεσμὸς κρατερός, καὶ κόλασις βασάνων. -ἀλλʼ ὅταν ἐξέλθῃ τοῦ σώματος, ὡς ἀπὸ δεσμῶν -τοῦ θανάτου, φεύγει πρὸς θεὸν ἀθάνατον. -
-
- - -palladas - - -εἰ θεὸς ἡ Φήμη, κεχολωμένη ἐστὶ καὶ αὐτὴ -Ἕλλησι, σφαλεροῖς ἐξαπατῶσα λόγοις. -φήμη δʼ, ἄν τι πάθῃς, ἀναφαίνεται εὐθὺς ἀληθής· -πολλάκι καὶ Φήμην ἔφθασεν ἡ ταχυτής. -
-
- - -palladas - - -ὦ τῆς μεγίστης τοῦ φθόνου πονηρίας· -τὸν εὐτυχῆ μισεῖ τις, ὃν θεὸς φιλεῖ. -οὕτως ἀνόητοι τῷ φθόνῳ πλανώμεθα, -οὕτως ἑτοίμως μωρίᾳ δουλεύομεν. -Ἕλληνές ἐσμεν ἄνδρες ἐσποδωμένοι, -νεκρῶν ἔχοντες ἐλπίδας τεθαμμένας· -ἀνεστράφη γὰρ πάντα νῦν τὰ πράγματα. -
-
- - -palladas - - -ὅταν στυγῇ τις ἄνδρα, τὸν θεὸς φιλεῖ, -οὗτος μεγίστην μωρίαν κατεισάγει· -φανερῶς γάρ αὐτῷ τῷ θεῷ κορύσσεται, -χόλον μέγιστον ἐκ φθόνου δεδεγμένος, -δεῖ γὰρ φιλεῖν ἐκεῖνον, ὃν θεὸς φιλεῖ. - -
-
- - -palladas - - - -ἐπεὶ δικάζεις καὶ σοφιστεύεις λόγοις, -κἀγὼ φέρω σοι τῆς ἐμῆς ἀηδόνος -ἐπίγραμμα σεμνόν, ἄξιον παρρησίας· -ὁ γὰρ σὲ μέλπων τῆς Δίκης ὕμνους χέει -
-
- - -palladas - - -βέλτερόν ἐστι Τύχης καὶ θλιβομένης ἀνέχεσθαι -ἢ τῶν πλουτούντων τῆς ὑπερηφανίης. -
-
- - -palladas - - -εἶναι νομίζω φιλόσοφον καὶ τὸν θεόν, -βλασφημίαις τὸν εὐθὺς οὐ θυμούμενον, -χρόνῳ δʼ ἐπαυξάνοντα τὰς τιμωρίας -τὰς τῶν πονηρῶν καὶ ταλαιπώρων βροτῶν, -
-
- - -palladas - - -μισῶ τὸν ἄνδρα τὸν διπλοῦν πεφυκότα, -χρηστὸν λόγοισι, πολέμιον δὲ τοῖς τρόποις. -
-
- - -palladas - - -ὅταν λογισμοῖς καταμάθω τὰ πράγματα, -καὶ τὰς ἀκαίρους μεταβολὰς τὰς τοῦ βίου, -καὶ ῥεῦμʼ ἄπιστον τῆς ἀνωμάλου Τύχης, -πῶς τοὺς πένητας πλουσίους ἐργάζεται, -καὶ τοὺς ἔχοντας χρημάτων ἀποστερεῖ, - -τότε κατʼ ἐμαυτὸν τῇ πλάνῃ σκοτούμενος -μισῶ τὰ πάντα, τῆς ἀδηλίας χάριν. -ποίῳ τρόπῳ γὰρ περιγένωμαι τῆς Τύχης, -τῆς ἐξ ἀδήλου φαινομένης ἐν τῷ βίῳ, -πόρνης γυναικὸς τοὺς τρόπους κεκτημένης; -
-
- - -palladas - - -λίτραν ἐτῶν ζήσας μετὰ γραμματικῆς βραχυμόχθου, -βουλευτὴς νεκύων πέμπομαι εἰς ἀίδην. -
-
- - -palladas - - -πᾶς τις ἀπαίδευτος φρονιμώτατός ἐστι σιωπῶν, -τὸν λόγον ἐγκρύπτων, ὡς πάθος αἰσχρότατον. -
-
- - -palladas - - -πολλάκι, Σέξστʼ, ἔστησα τεὴν φιλότητα καὶ ὕβριν -καὶ πολὺ κουφοτέρην τὴν φιλότητα μαθών, -λοιδορίην δὲ ῥέπουσαν, ἐχωρίσθην φιλότητος, -μηκέτι βαστάζων ὕβριν ἀτιμοτάτην. -
-
- - -antiphanes - - -ἀνθρώποις ὀλίγος μὲν ὁ πᾶς χρόνος, ὅν ποτε δειλοὶ -ζῶμεν, κἢν πολιὸν γῆρας ἅπασι μένῃ· -τῆς δʼ ἀκμῆς καὶ μᾶλλον. ὅτʼ οὖν χρόνος ὥριος ἡμῖν, -πάντα χύδην ἔστω, ψαλμός, ἔρως, προπόσεις. -χειμὼν τοὐντεῦθεν γήρως βαρύς· οὐδὲ δέκα μνῶν -στύσεις· τοιαύτη σ’ ἐκδέχετʼ ὀρχιπέδη. - -
-
- - -bianor - - -ἠνίδε καὶ χέρσου τὸ γεωτόμον ὅπλον ἐρέσσει -καὶ τὸν ὑπουθατίαν μόσχον ἄγει δάμαλις, -βούταν μὲν τρομέουσα διώκτορα, τὸν δὲ μένουσα -νήπιον, ἀμφοτέρων εὔστοχα φειδομένη. -ἴσχες, ἀροτροδίαυλε, πεδώρυχε, μηδὲ διώξῃς -τὰν διπλοῖς ἔργοις διπλὰ βαρυνομέναν. -
-
- - -lollius bassus - - -μήτε με χείματι πόντος ἄγοι θρασύς, οὐδὲ γαλήνης -ἀργῆς ἠσπασάμην τὴν πάλι νηνεμίην. -αἱ μεσότητες ἄρισται· ὅπῃ δέ τε πρήξιες ἀνδρῶν, -καὶ πάλι μέτρον ἐγὼ τἄρκιον ἠσπασάμην. -τοῦτʼ ἀγάπα, φίλε Λάμπι, κακὰς δʼ ἔχθαιρε θυέλλας· -εἰσί τινες πρηεῖς καὶ βιότου Ζέφυροι. -
-
- - -philodemus - - -τὴν † προτερον θυμέλην μήτʼ ἔμβλεπε, μήτε παρέλθῃς· -νῦν ἄπαγε δραχμῆς εἰς κολοκορδόκολα. -καὶ σῦκον δραχμῆς ἓν γίνεται· ἢν δʼ ἀναμείνῃς, -χίλια. τοῖς πτωχοῖς ὁ χρόνος ἐστὶ θεός. -
-
- - -crates - - -χαῖρε θεὰ δέσποινʼ, ἀνδρῶν ἀγαθῶν ἀγάπημα, -Εὐτελίη, κλεινῆς ἔγγονε Σωφροσύνης· -σὴν ἀρετὴν τιμῶσιν ὅσοι τὰ δίκαιʼ ἀσκοῦσιν. - -
-
- - -simonides - - -χαίρει τις Θεόδωρος, ἐπεὶ θάνον ἄλλος ἐπʼ αὐτῷ -χαιρήσει. θανάτῳ πάντες ὀφειλόμεθα. -
-
- - -anonymi epigrammatici - - -πολλοί τοι ναρθηκοφόροι, παῦροι δέ τε βάκχοι. -
-
- - -euripides - - -θεοῦ μὲν οὐδεὶς ἐκτὸς εὐτυχεῖ βροτός. -φεῦ τῶν βροτείων ὡς ἀνώμαλοι τύχαι· -οἱ μὲν γὰρ εὖ πράσσουσι, τοῖς δὲ συμφοραὶ -σκληραὶ πάρεισιν εὐσεβοῦσι πρὸς θεούς. -
-
- - -anonymi epigrammatici - - -Ζεῦ βασιλεῦ, τὰ μὲν ἐσθλὰ καὶ εὐχομένοις καὶ ἀνεύκτοις -ἄμμι δίδου· τὰ δὲ λυγρὰ καὶ εὐχομένων ἀπερύκοις. -
-
- - -anonymi epigrammatici - - -πᾶς λόγος ἐστὶ μάταιος ὁ μὴ τετελεσμένος ἔργῳ -καὶ πᾶσα πρᾶξις τὸν λόγον ἀρχὸν ἔχοι -
-
- - -aeschylus - - -οὐ χρὴ λέοντος σκύμνον ἐν πόλει τρέφειν -μάλιστα μὲν λέοντα μὴ πόλει τρέφειν· -ἢν δʼ ἐκτραφῇ τις, τοῖς τρόποις ὑπηρετεῖν. - -
-
- - -anonymi epigrammatici - - -ὁ φθόνος αὐτὸς ἑαυτὸν ἑοῖς βελέεσσι δαμάζει. -
-
- - -anonymi epigrammatici - - -οἶνος καὶ τὰ λοετρὰ καὶ ἡ περὶ Κύπριν ἐρωὴ -ὀξυτέρην πέμπει τὴν ὁδὸν εἰς ἀίδην. -
-
- - -theognis - - -οὐκ ἐθέλω πλουτεῖν, οὐκ εὔχομαι· ἀλλά μοι εἴη -ζῆν ἐκ τῶν ὀλίγων μηδὲν ἔχοντα κακόν. -
-
- - -anonymi epigrammatici - - -ἦ κρίσις ἐστὶ κάτω καὶ Τάνταλος· οὐδὲν ἀπιστῶ, -τῇ πενίῃ μελετῶν τὴν ὑπὸ γῆν κόλασιν. -
-
- - -anonymi epigrammatici - - -Ζῆσον λογισμῷ, καὶ μένεις ἀνενδεής. -
-
- - -anonymi epigrammatici - - - - -οὐκ ἔστι γήμας, ὅστις οὐ χειμάζεται, - -λέγουσι πάντες, καὶ γαμοῦσιν εἰδότες. -
-
- - -phocylides - - -γνήσιός εἰμι φίλος, καὶ τὸν φίλον ὡς φίλον οἶδα, -τοὺς δὲ κακοὺς διόλου πάντας ἀποστρέφομαι· -οὐδένα θωπεύω πρὸς ὑπόκρισιν· οὓς δʼ ἄρα τιμῶ, -τούτους ἐξ ἀρχῆς μέχρι τέλους ἀγαπῶ. - -
-
- - -anonymi epigrammatici - - -πῶς γενόμην; πόθεν εἰμί; τίνος χάριν ἦλθον; ἀπελθεῖν; -πῶς δύναμαί τι μαθεῖν, μηδὲν ἐπιστάμενος; -οὐδὲν ἐὼν γενόμην πάλιν ἔσσομαι ὡς πάρος ἦα· -οὐδὲν καὶ μηδὲν τῶν μερόπων τὸ γένος. -ἀλλʼ ἄγε μοι Βάκχοιο φιλήδονον ἔντυε νᾶμα· -τοῦτο γάρ ἐστι κακῶν φάρμακον ἀντίδοτον. -
-
- - -anonymi epigrammatici - - -σώματα πολλὰ τρέφειν, καὶ δώματα πόλλʼ ἀνεγείρειν -ἀτραπὸς εἰς πενίην ἐστὶν ἑτοιμοτάτη. -
-
- - -nonnus - - -πᾶσα γυνὴ φιλέει πλέον ἀνέρος· αἰδομένη δὲ -κεύθει κέντρον ἔρωτος, ἐρωμανέουσα καὶ αὐτή. -
-
- - -rarus - - -οὐχ οὕτω βλάπτει μισεῖν ὁ λέγων ἀναφανδόν, -ὥσπερ ὁ τὴν καθαρὰν ψευδόμενος φιλίαν. -τὸν μὲν γὰρ μισοῦντα προειδότες ἐκτρεπόμεσθα, -τὸν δὲ λέγοντα φιλεῖν οὐ προφυλασσόμεθα. -ἐχθρὸν ἐγὼ κρίνω κεῖνον βαρύν, ὅς ποτε λάθρῃ -τὴν ἀπὸ τῆς φιλίας πίστιν ἔχων ἀδικεῖ. - -
-
- - -pseudo-lucianus - - -πολλὰ τὸ δαιμόνιον δύναται, κἂν ᾖ παράδοξα· -τοὺς μικροὺς ἀνάγει, τοὺς μεγάλους κατάγει· -καὶ σοῦ τὴν ὀφρὺν καὶ τὸν τῦφον καταπαύσει, -κἂν ποταμὸς χρυσοῦ νάματά σοι παρέχῃ. -οὐ θρύον, οὐ μαλάχην ἄνεμός ποτε, τὰς δὲ μεγίστας -ἢ δρύας ἢ πλατάνους οἶδε χαμαὶ κατάγειν. -
-
- - -aesopus et aesopica - - -πῶς τις ἄνευ θανάτου σε φύγοι, βίε; μυρία γάρ σευ -λυγρά· καὶ οὔτε φυγεῖν εὐμαρὲς, οὔτε φέρειν. -ἡδέα μὲν γάρ σου τὰ φύσει καλά, γαῖα, θάλασσα, -ἄστρα, σεληναίης κύκλα καὶ ἠελίου· -τἆλλα δὲ πάντα φόβοι τε καὶ ἄλγεα· κἤν τι πάθῃ τις -ἐσθλόν, ἀμοιβαίην ἐκδέχεται νέμεσιν. -
-
- - -glycon - - -πάντα γέλως, καὶ πάντα κόνις, καὶ πάντα τὸ μηδέν· -πάντα γὰρ ἐξ ἀλόγων ἐστὶ τὰ γινόμενα. -
-
- - -anonymi epigrammatici - - -φροντίδες οἱ παῖδες· μέγα μὲν κακόν, εἴ τι πάθοιεν -εἰσὶ δὲ καὶ ζῶντες φροντίδες οὐκ ὀλίγαι. -ἡ γαμετή, χρηστὴ μὲν ἔχει τινὰ τέρψιν ἐν αὐτῇ, -ἡ δὲ κακὴ πικρὸν τὸν βίον ἀνδρὶ φέρει. - -
-
- - -anonymi epigrammatici - - -πρᾶγμα μὲν ἐσθʼ ὁ φίλος πάνυ δύσκολον εἰσὶ δὲ πολλοί, -καὶ σχεδὸν οἱ πάντες, μέχρι προσηγορίας. -
-
- - -anonymi epigrammatici - - -χρησαμένῳ θεράπων ὁ χρήσιμὸς ἐστʼ ἀγαθόν τι· -αὐτάρκης δὲ κακὸν τῶνδʼ ὁ πονηρότερος. -
-
- -
-
- - -nicarchus ii - - -Ἑρμαίοις ἡμῖν Ἀφροδίσιος ἓξ χόας οἴνου -αἴρων, προσκόψας πένθος ἔθηκε μέγα. -οἶνος καὶ Κένταυρον ἀπώλεσεν ὡς ὄφελεν δὲ -χἠμᾶς· νῦν δʼ ἡμεῖς τοῦτον ἀπωλέσαμεν. -
-
- - -callicter - - -Αἰσχυλίδα Θεόδωρε, τί μοι μεμάχηνται ἄριστοι; -οὐ διακωλύσεις; πάντες ἔχουσι λίθους -
-
- - -anonymi epigrammatici - - -ἤθελον ἂν πλουτεῖν, ὡς πλούσιος ἦν ποτε Κροῖσος -καὶ βασιλεὺς εἶναι τῆς μεγάλης Ἀσίης· -ἀλλʼ ὅταν ἐμβλέψω Νικάνορα τὸν σοροπηγόν, -καὶ γνῶ πρὸς τί ποιεῖ ταῦτα τὰ γλωσσόκομα, -ἀκτήν που πάσσας καὶ ταῖς κοτύλαις ὑποβρέξας, -τὴν Ἀσίην πωλῶ πρὸς μύρα καὶ στεφάνους. - -
-
- - -parmenion - - -αὐτῷ τις γήμας πιθανὴν τῷ γείτονι, ῥέγχει -καὶ τρέφεται· τοῦτʼ ἦν εὔκολος ἐργασία, -μὴ πλεῖν, μὴ σκάπτειν, ἀλλʼ εὐστομάχως ἀπορέγχειν, -ἀλλοτρίᾳ δαπάνῃ πλούσια βοσκόμενον, -
-
- - -callicter - - -ὅστις ἔσω πυροὺς καταλαμβάνει οὐκ ἀγοράζων, -κείνου Ἀμαλθείας ἁ γυνά ἐστι κέρας. -
-
- - -callicter - - -πτωχοῦ ἐστι γάμος κυνέα μάχα, εὐθὺ κυδοιμός, -λοιδορίαι, πλαγαί, ζημία, ἔργα, δίκαι. -
-
- - -nicarchus ii - - -οὐδεὶς τὴν ἰδίην συνεχῶς, Χαρίδημε, γυναῖκα -βινεῖν ἐκ ψυχῆς τερπόμενος δύναται· -οὕτως ἡ φύσις ἐστὶ φιλόκνισος, ἀλλοτριόχρως, -καὶ ζητεῖ διόλου τὴν ξενοκυσθαπάτην. -
-
- - -anonymi epigrammatici - - -μὴ μύρα, μὴ στεφάνους λιθίναις στήλαισι χαρίζου, -μηδὲ τὸ πῦρ φλέξῃς· ἐς κενὸν ἡ δαπάνη. -ζῶντί μοι, εἴ τι θέλεις, χάρισαι· τέφρην δὲ μεθύσκων -πηλὸν ποιήσεις, κοὐχ ὁ θανὼν πίεται. - -
-
- - -Julius leonidas - - -μὴ πάλι μοι μετὰ δόρπον, ὅτʼ οὐκέτι γαστέρα πείθω, -οὔθατα καὶ χοίρων ἄντα τίθει τεμάχη· -οὐδὲ γὰρ ἐργοπόνοισι μετὰ στάχυν ὄμβρος ἄκαιρος -χρήσιμος, οὐ ναύταις ἐν λιμένι ζέφυρος. -
-
- - -lucillius - - -τὸν τοῦ δειπναρίου νόμον οἴδατε· σήμερον ὑμᾶς, -Αὖλε, καλῶ καινοῖς δόγμασι συμποσίου. -οὐ μελοποιὸς ἐρεῖ κατακείμενος· οὔτε παρέξεις -οὔθʼ ἕξεις αὐτὸς πράγματα γραμματικά. -
-
- - -lucillius - - -οὐκ ᾔδειν σε τραγῳδόν, Ἐπίκρατες, οὐδὲ χοραύλην, -οὐδʼ ἄλλʼ οὐδὲν ὅλως, ὧν χορὸν ἔστιν ἔχειν -ἀλλʼ ἐκάλουν σε μόνον σὺ δʼ ἔχων χορὸν οἴκοθεν ἥκεις -ὀρχηστῶν, αὐτοῖς πάντα διδοὺς ὀπίσω. -εἰ δʼ οὕτω τοῦτʼ ἐστί, σὺ τοὺς δούλους κατάκλινον, -ἡμεῖς δʼ αὖ τούτοις πρὸς πόδας ἐρχόμεθα. -
-
- - -alcaeus - - -οἶνος καὶ Κένταυρον, Ἐπίκρατες, οὐχὶ σὲ μοῦνον, -ὤλεσεν, ἠδʼ ἐρατὴν Καλλίου ἡλικίην. -ὄντως οἰνοχάρων ὁ μονόμματος, ᾧ σὺ τάχιστα -τὴν αὐτὴν πέμψαις ἐξ Ἀίδεω πρόποσιν. - -
-
- - -ammianus - - -Ἠὼς ἐξ ἠοῦς παραπέμπεται, εἶτʼ, ἀμελούντων -ἡμῶν, ἐξαίφνης ἥξει ὁ πορφύρεος, -καὶ τοὺς μὲν τήξας, τοὺς δʼ ὀπτήσας, ἐνίους δὲ -φυσήσας, ἄξει πάντας ἐς ἓν βάραθρον. -
-
- - -ammianus - - -ἐχθὲς ἐπὶ ξενίαν κληθείς, ὅτε καιρὸς ὕπνου μοι, -τύλῃ ἐπεκλίνθην Γοργόνος ἢ Νιόβης, -ἣν οὐδεὶς ὕφηνεν, ἀπέπρισε δʼ, ἢ πελεκήσας -ἐκ τῶν λατομιῶν ἤγαγεν εἰς τὰ Πρόκλου. -ἐξ ἧς εἰ μὴ θᾶττον ἐπηγέρθην, Πρόκλος ἄν μοι -τὴν τύλην στήλην ἢ σορὸν εἰργάσατο. -
-
- - -ammianus - - -εἰ μὲν τοὺς ἀπὸ ἄλφα μόνους κέκρικας κατορύσσειν, -Λούκιε, βουλευτὰς καὶ τὸν ἀδελφὸν ἔχεις· -εἰ δʼ, ὅπερ εὔλογόν ἐστι, κατὰ στοιχεῖον ὁδεύεις, -ἤδη, σοὶ προλέγω, Ὠριγένης λέγομαι. -
-
- - -ammianus - - -Κύλλος καὶ Λεῦρος, δύο Θεσσαλοὶ ἐγχεσίμωροι· -Κύλλος δʼ ἐκ τούτων ἐγχεσιμωρότερος. - -
-
- - -nicarchus ii - - -ἦν Στέφανος πτωχὸς κηπεὺς θʼ ἅμα· νῦν δὲ προκόψας -πλουτεῖ, καὶ γεγένητʼ εὐθὺ Φιλοστέφανος, -τέσσαρα τῷ πρώτῳ Στεφάνῳ καλὰ γράμματα προσθείς· -ἔσται δʼ εἰς ὥρας Ἱπποκρατιππιάδης, -ἢ διὰ τὴν σπατάλην Διονυσιοπηγανόδωρος· -ἐν δʼ ἀγορανομίῳ παντὶ μένει Στέφανος. -
-
- - -nicarchus ii - - -οὐκ ἐν ʽγαστρὶ λαβοῦσα Φιλαίνιον Ἡλιοδώρῳ -θήλειαν τίκτει παῖδʼ ἀπὸ ταὐτομάτου. -τοῦ δʼ ἐπὶ θηλείῃ λυπουμένου, ἓξ διαλείπει -ἤματα, καὶ τίκτειν ἄρσενα παῖδʼ ἔφατο. -οὕτως Βούβαστις καταλύεται· εἰ γὰρ ἑκάστη -τέξεται ὡς αὐτή, τίς θεοῦ ἐστι λόγος; -
-
- - -straton - - -καὶ πίε νῦν καὶ ἔρα, Δαμόκρατες· οὐ γὰρ ἐς αἰεὶ -πιόμεθʼ, οὐδʼ αἰεὶ παισὶ συνεσσόμεθα. -καὶ στεφάνοις κεφαλὰς πυκασώμεθα, καὶ μυρίσωμεν -αὑτούς, πρὶν τύμβοις ταῦτα φέρειν ἑτέρους. -νῦν ἐν ἐμοὶ πιέτω μέθυ τὸ πλέον ὀστέα τἀμά· -νεκρὰ δὲ Δευκαλίων αὐτὰ κατακλυσάτω. - -
-
- - -antipater - - -φεύγεθʼ ὅσοι λόκκας ἢ λοφνίδας ἢ καμασῆνας -ᾄδετε, ποιητῶν φῦλον ἀκανθολόγων, -οἳ τʼ ἐπέων κόσμον λελυγισμένον ἀσκήσαντες, -κρήνης ἐξ ἱερῆς πίνετε λιτὸν ὕδωρ. -σήμερον Ἀρχιλόχοιο καὶ ἄρσενος ἦμαρ Ὁμήρου -σπένδομεν ὁ κρητὴρ οὐ δέχεθʼ ὑδροπότας. -
-
- - -straton - - -πρῴην τὴν σαύραν Ἀγάθων ῥοδοδάκτυλον εἶχεν -νῦν δʼ αὐτὴν ἤδη καὶ ῥοδόπηχυν ἔχει. -
-
- - -straton - - -ἔστι Δράκων τις ἔφηβος, ἄγαν καλός· ἀλλά, δράκων ὤν, -πῶς εἰς τὴν τρώγλην ἄλλον ὄφιν δέχεται; -
-
- - -antipater - - -ὠκύμορόν με λέγουσι δαήμονες ἀνέρες ἄστρων -εἰμὶ μέν, ἀλλʼ οὔ μοι τοῦτο, Σέλευκε, μέλει. -εἰς ἀίδην μία πᾶσι καταίβασις εἰ δὲ ταχίων -ἡμετέρη, Μίνω θᾶσσον ἐποψόμεθα. -πίνωμεν καὶ δὴ γὰρ ἐτήτυμον, εἰς ὁδὸν ἵππος -οἶνος, ἐπεὶ πεζοῖς ἀτραπὸς εἰς ἀίδην. - -
-
- - -antipater - - -ὦ Ἑλικὼν Βοιωτέ, σὺ μέν ποτε πολλάκις ὕδωρ -εὐεπὲς ἐκ πηγέων ἔβλυσας Ἡσιόδῳ· -νῦν δʼ ἡμῖν ἔθʼ ὁ κοῦρος ὁμώνυμος Αὔσονα Βάκχον -οἰνοχοεῖ κρήνης ἐξ ἀμεριμνοτέρης, -βουλοίμην δʼ ἂν ἔγωγε πιεῖν παρὰ τοῦδε κύπελλον -ἓν μόνον, ἢ παρὰ σεῦ χίλια Πηγασίδος. -
-
- - -apollonides - - -Ὑπνώεις, ὦ ʼταῖρε· τὸ δὲ σκύφος αὐτὸ,βοᾷ σε· -ἔγρεο, “μὴ τέρπου μοιριδίῃ μελέτῃ. -μὴ” φείσῃ, Διόδωρε· λάβρος δʼ εἰς Βάκχον ὀλισθὼν, -ἄχρις ἐπὶ σφαλεροῦ ζωροπότει γόνατος. -ἔσσεθʼ ὅτʼ οὐ πιόμεσθα, πολὺς πολύς· ἀλλʼ ἄγʼ ἐπείγου· -ἡ συνετὴ κροτάφων ἅπτεται ἡμετέρων. -
-
- - -marcus argentarius - - -σφάλλομαι ἀκρήτῳ μεμεθυσμένος· ἀλλὰ τίς ἆρα -σώσει μʼ ἐκ Βρομίου γυῖα σαλευόμενον; -ὡς ἄδικον θεὸν εὗρον, ὁθείνεκεν αὐτὸς ἐγὼ σέ, -Βάκχε, φέρων ὑπὸ σοῦ τἄμπαλι παρφέρομαι. -
-
- - -macedonius i - - -Συρρέντου τρηχεῖα μυρίπνοε, χαῖρε, κονίη, -καὶ Πολλεντίνων γαῖα μελιχροτάτη, -ἀστὴ θʼ ἡ τριπόθητος, ἀφʼ ἧς βρομιώδεα πηλὸν -φύρησαν Βάκχῳ τριζυγέες Χάριτες, - -πλούτου καὶ πενίης κοινὸν κτέαρ· οἷς μὲν ἀνάγκης -σκεῦος, τοῖς δὲ τρυφῆς χρῆσι περισσοτέρη. -
-
- - -marcus argentarius - - -πέντε θανὼν κείσῃ κατέχων πόδας, οὐδὲ τὰ τερπνὰ -ζωῆς, οὐδʼ αὐγὰς ὄψεαι ἠελίου· -ὥστε λαβὼν Βάκχου ζωρὸν δέπας ἕλκε γεγηθώς, -Κίγκιε, καλλίστην ἀγκὰς ἔχων ἄλοχον. -εἰ δέ σοι ἀθανάτου σοφίης νόος, ἴσθι Κλεάνθης -καὶ Ζήνων ἀίδην τὸν βαθὺν ὡς ἔμολον. -
-
- - -automedon - - -πέμπε, κάλει· πάντʼ ἐστὶν ἕτοιμά σοι. ἢν δέ τις ἔλθῃ, -τί πρήξεις; σαυτῷ δὸς λόγον, Αὐτόμεδον. -αὕτη γὰρ λαχάνου σισαρωτέρη, ἡ πρὶν ἀκαμπὴς -ζῶσα, νεκρὰ μηρῶν πᾶσα δέδυκεν ἔσω. -πόλλʼ ἐπὶ σοὶ γελάσουσιν, ἀνάρμενος ἂν παραβάλλῃ -πλώειν, τὴν κώπην μηκέτʼ ἔχων ἐρέτης. -
-
- - -philodemus - - -ὁ πρὶν ἐγὼ καὶ πέντε καὶ ἐννέα, νῦν, Ἀφροδίτη, -ἓν μόλις ἐκ πρώτης νυκτὸς ἐς ἠέλιον -οἴμοι καὶ . . τοῦτο κατὰ βραχὺ ʽ πολλάκι δʼ ἤδη -ἡμιθανὲσʼ θνῄσκει· τοῦτο τὸ τερμέριον. -ὦ γῆρας, γῆρας, τί ποθʼ ὕστερον, ἢν ἀφίκηαι, -ποιήσεις, ὅτε νῦν ὧδε μαραίνομεθα; - -
-
- - -antipater - - -οὔ μοι Πληιάδων φοβερὴ δύσις, οὐδὲ θαλάσσης -ὠρῦον στυφελῷ κῦμα περὶ σκοπέλῳ, -οὐδʼ ὅταν ἀστράπτῃ μέγας οὐρανός, ὡς κακὸν ἄνδρα -ταρβέω, καὶ μύθων μνήμονας ὑδροπότας. -
-
- - -honestus - - -Μούσης νουθεσίην φιλοπαίγμονος εὕρετο Βάκχος, -ὦ Σικυών, ἐν σοὶ κῶμον ἄγων Χαρίτων -δὴ γὰρ ἔλεγχον ἔχει γλυκερώτατον, ἔν τε γέλωτι -κέντρον· χὠ μεθύων ἀστὸν ἐσωφρόνισεν. -
-
- - -philippus - - -λάθριον ἑρπηστὴν σκολιὸν πόδα, κισσέ, χορεύσας, -ἄγχεις τὴν Βρομίου βοτρυόπαιδα χάριν -δεσμεῖς δʼ οὐχ ἡμᾶς, ὀλέκεις δὲ σέ· τίς γὰρ ἕλοιτʼ ἂν -κισσὸν ἐπὶ κροτάφοις, μὴ κεράσας Βρόμιον; -
-
- - -philodemus - - -Λευκοΐνους πάλι δὴ καὶ ψάλματα, καὶ πάλι Χίους -οἴνους, καὶ πάλι δὴ σμύρναν ἔχειν Συρίην, -καὶ πάλι κωμάζειν, καὶ ἔχειν πάλι διψάδα πόρνην -οὐκ ἐθέλω· μισῶ ταὺτα τὰ πρὸς μανίην. -ἀλλά με ναρκίσσοις ἀναδήσατε, καὶ πλαγιαύλων -γεύσατε, καὶ κροκίνοις χρίσατε γυῖα μύροις, -καὶ Μυτιληναίῳ τὸν πνεύμονα τέγξατε Βάκχῳ, -καὶ συζεύξατέ μοι φωλάδα παρθενικήν. - -
-
- - -philodemus - - -Κράμβην Ἀρτεμίδωρος, Ἀρίσταρχος δὲ τάριχον, -βολβίσκους δʼ ἡμῖν δῶκεν Ἀθηναγόρας, -ἡπάτιον Φιλόδημος, Ἀπολλοφάνης δὲ δύο μνᾶς -χοιρείου, καὶ τρεῖς ἦσαν ἀπʼ ἐχθὲς ἔτι. -ᾠόν, καὶ στεφάνους, καὶ σάμβαλα, καὶ μύρον ἡμῖν -λάμβανε, καὶ δεκάτης εὐθὺ θέλω παράγειν. -
-
- - -philippus - - -ἡνίκα μὲν καλὸς ἦς, Ἀρχέστρατε, κἀμφὶ παρειαῖς -οἰνωπαῖς ψυχὰς ἔφλεγες ἠιθέων, -ἡμετέρης φιλίης οὐδεὶς λόγος· ἀλλὰ μετʼ ἄλλων -παίζων, τὴν ἀκμὴν ὡς ῥόδον ἠφάνισας. -ὡς δʼ ἐπιπερκάζεις μιαρῇ τριχί, νῦν φίλον ἕλκων, -τὴν καλάμην δωρῇ, δοὺς ἑτέροις τὸ θέρος. -
-
- - -antipater - - -ἤδη τοι φθινόπωρον, Ἐπίκλεες, ἐκ δὲ Βοώτου -ζώνης Ἀρκτούρου λαμπρὸν ὄρωρε σέλας· -ἤδη καὶ σταφυλαὶ δρεπάνης ἐπιμιμνήσκονται, -καί τις χειμερινὴν ἀμφερέφει καλύβην. -σοὶ δʼ οὔτε χλαίνης θερμὴ κροκύς, οὔτε χιτῶνος -ἔνδον ἀποσκλήσῃ δʼ ἀστέρα μεμφόμενος. -
-
- - -polemon i - - -ἡ πτωχῶν χαρίεσσα πανοπλίη ἀρτολάγυνος -αὕτη, καὶ δροσερῶν ἐκ πετάλων στέφανος, - -καὶ τοῦτο φθιμένοιο προάστιον ἱερὸν ὀστεῦν -ἐγκεφάλου, ψυχῆς φρούριον ἀκρότατον. - -πῖνε, λέγει τὸ γλύμμα, “ καὶ ἔσθιε καὶ περίκεισο -ἄνθεα· τοιοῦτοι γινόμεθʼ ἐξαπίνης. -” -
-
- - -macedonius i - - -ἐχθές μοι συνέπινε γυνή, περὶ ἧς λόγος ἔρρει -οὐχ ὑγιής. παῖδες, θραύσατε τὰς κύλικας. -
-
- - -antistius - - -Εὐμένεος Κλεόδημος ἔτι βραχύς· ἀλλὰ χορεύει -σὺν παισὶν βαιῷ μικρὸς ἔτʼ ἐν θιάσῳ· -ἠνίδε καὶ στικτοῖο δορὴν ἐζώσατο νεβροῦ, -καὶ σείει ξανθῆς κισσὸν ὑπὲρ κεφαλῆς· -ὦνα σύ μιν Καδμεῖε τίθει μέγαν, ὡς ἂν ὁ μύστης -ὁ βραχὺς ἡβήτας αὖθις ἄγοι θιάσους. -
-
- - -philodemus - - -ἑπτὰ τριηκόντεσσιν ἐπέρχονται λυκάβαντες, -ἤδη μοι βιότου σχιζόμεναι σελίδες· -ἤδη καὶ λευκαί με κατασπείρουσιν ἔθειραι, -Ξανθίππη, συνετῆς ἄγγελοι ἡλικίης. -ἀλλʼ ἔτι μοι ψαλμός τε λάλος κῶμοί τε μέλονται, -καὶ πῦρ ἀπλήστῳ τύφετʼ ἐνὶ κραδίῃ. -αὐτὴν ἀλλὰ τάχιστα κορωνίδα γράψατε, Μοῦσαι, -ταύτην ἡμετέρης, δεσπότιδες, μανίης. -
-
- - -crinagoras - - -εἰ καί σοι ἑδραῖος ἀεὶ βίος, οὐδὲ θάλασσαν -ἔπλως, χερσαίας τʼ οὐκ ἐπάτησας ὁδούς, - -ἔμπης Κεκροπίης ἐπιβήμεναι, ὄφρʼ ἂν,ἐκείνας -Δήμητρος μεγάλας νύκτας ἴδῃς ἱερῶν, -τῶν ἄπο κἠν ζωοῖσιν ἀκηδέα, κεὖτʼ ἂν ἵκηαι -ἐς πλεόνων, ἕξεις θυμὸν ἐλαφρότερον. -
-
- - -diodorus zonas - - -δός μοι τοὐκ γαίης πεπονημένον ἁδὺ κύπελλον, -ἇς γενόμην, καὶ ὑφʼ ᾇ κείσομʼ ἀποφθίμενος. -
-
- - -philodemus - - -αὔριον εἰς λιτήν σε καλιάδα, φίλτατε Πείσων, -ἐξ ἐνάτης ἕλκει μουσοφιλὴς ἕταρος, -εἰκάδα δειπνίζων ἐνιαύσιον· εἰ δʼ ἀπολείψεις -οὔθατα καὶ Βρομίου χιογενῆ πρόποσιν, -ἀλλʼ ἑτάρους ὄψει παναληθέας, ἀλλʼ ἐπακούσῃ -Φαιήκων γαίης πουλὺ μελιχρότερα· -ἢν δέ ποτε στρέψῃς καὶ ἐς ἡμέας ὄμματα, Πείσων, -ἄξομεν ἐκ λιτῆς εἰκάδα πιοτέρην. -
-
- - -honestus - - -Αὐτοθελὴς ἥδιστος ἀεὶ πότος· ὃς δὲ κʼ ἀνάγκῃ, -ὑβριστὴς οἴνῳ τʼ ἐστὶ καὶ οἰνοπότῃ. -τὸν μὲν γὰρ γαίῃ προχέει κρύφα· τὸν δʼ ὑπὸ γαίῃ -πολλάκι πρὸς Λήθης ἤγαγε πικρὸν ὕδωρ. -πουλυμεθεῖς χαίροιτε· τὸ δʼ ὁππόσον ἡδὺ ποθῆναι, -μέτρον ἐμοὶ πάσης ἄρκιον εὐφροσύνης. - -
-
- - -automedon - - -ἄνθρωποι δείλης, ὅτε πίνομεν ἢν δὲ γένηται -ὄρθρος, ἐπʼ ἀλλήλους θῆρες ἐγειρόμεθα. -
-
- - -anacreon - - -οὔ μοι μέλει τὰ Γύγεω, -τοῦ Σαρδίων ἄνακτος, -οὔθʼ αἱρέει με χρυσός, -οὐκ αἰνέω τυράννους· -ἐμοὶ μέλει μύροισι -καταβρέχειν ὑπήνην -ἐμοὶ μέλει ῥόδοισι -καταστέφειν κάρηνα. -τὸ σήμερον μέλει μοι -τὸ δʼ αὔριον τίς οἶδεν; -
-
- - -anacreon - - -τὸν ἄργυρον τορεύσας -Ἥφαιστέ μοι ποίησον -πανοπλίαν μὲν οὐχί, -ποτήριον δὲ κοῖλον -ὅσον δύνῃ βάθυνον. -ποίει δέ μοι κατʼ αὐτοῦ -μηδʼ ἄστρα, μηδʼ ἁμάξας, -μὴ στυγνὸν Ὠρίωνα, -ἀλλʼ ἀμπέλους χλοώσας, -καὶ βότρυας γελῶντας, -σὺν τῷ καλῷ Λυαίῳ. - -
-
- - -euenus - - -Βάκχου μέτρον ἄριστον, ὃ μὴ πολύ, μηδʼ ἐλάχιστον· -ἔστι γάρ ἢ λύπης αἴτιος ἢ μανίης. -χαίρει κιρνάμενος δὲ τρισὶν Νύμφαισι τέταρτος· -τῆμος καὶ θαλάμοις ἐστὶν ἑτοιμότατος· -εἰ δὲ πολὺς πνεύσειεν, ἀπέστραπται μὲν Ἔρωτας, -βαπτίζει δʼ ὕπνῳ γείτονι τοῦ θανάτου. -
-
- - -automedon - - -εὐδαίμων, πρῶτον μὲν ὁ μηδενὶ μηδὲν ὀφείλων· -εἶτα δʼ ὁ μὴ γήμας τὸ τρίτον, ὅστις ἄπαις. -ἢν δὲ μανεὶς γήμῃ τις, ἔχει χάριν, ἢν κατορύξῃ -εὐθὺς τὴν γαμετήν, προῖκα λαβὼν μεγάλην. -ταῦτʼ εἰδὼς σοφὸς ἴσθι μάτην δʼ Ἐπίκουρον ἔασον -ποῦ τὸ κενὸν ζητεῖν, καὶ τίνες αἱ μονάδες. -
-
- - -anonymi epigrammatici - - -τῆς ὥρας ἀπόλαυε· παρακμάζει ταχὺ πάντα· -ἓν θέρος ἐξ ἐρίφου τρηχὺν ἔθηκε τράγον. -
-
- - -anonymi epigrammatici - - -Παιδείῳ, Θρασύβουλε, σαγηνευθεὶς ὑπʼ ἔρωτι -ἀσθμαίνεις, δελφὶς ὥς τις ἐπʼ αἰγιαλοῦ -κύματος ἱμείρων δρέπανον δέ σοι οὐδὲ τὸ Περσέως -ἀρκεῖ ἀποτμῆξαι δίκτυον ᾧ δέδεσαι. - -
-
- - -anonymi epigrammatici - - -τὸ ῥόδον ἀκμάζει βαιὸν χρόνον ἢν δὲ παρέλθῃ, -ζητῶν εὑρήσεις οὐ ῥόδον, ἀλλὰ βάτον. -
-
- - -palladas - - -γηραλέον με γυναῖκες ἀποσκώπτουσι, λέγουσαι -εἰς τὸ κάτοπτρον ὁρᾶν λεσίψανον ἡλικίης. -ἀλλʼ ἐγὼ εἰ λευκὰς φορέω τρίχας, εἴτε μελαίνας, -οὐκ ἀλέγω, βιότου πρὸς τέλος ἐρχόμενος. -εὐόδμοις δὲ μύροισι καὶ εὐπετάλοις στεφάνοισι -καὶ Βρομίῳ παύω φροντίδας ἀργαλέας. -
-
- - -palladas - - -δὸς πιέειν, ἵνα Βάκχος ἀποσκεδάσειε μερίμνας, -ἂψ ἀναθερμαίνων ψυχομένην κραδίην. -
-
- - -anonymi epigrammatici - - -πῖνε καὶ εὐφραίνου· τί γάρ αὔριον, ἢ τί τὸ μέλλον, -οὐδεὶς γινώσκει. μὴ τρέχε, μὴ κοπία, -ὡς δύνασαι, χάρισαι, μετάδος, φάγε, θνητὰ λογίζου· -τὸ ζῆν τοῦ μὴ ζῆν οὐδὲν ὅλως ἀπέχει. -πᾶς ὁ βίος τοιόσδε, ῥοπὴ μόνον ἂν προλάβῃς, σοῦ, -ἂν δὲ θάνῃς, ἑτέρου πάντα, σὺ δʼ οὐδὲν ἔχεις. -
-
- - -agathias scholasticus - - -γαστέρα μὲν σεσάλακτο γέρων εὐώδεϊ Βάκχῳ -Οἰνοπίων, ἔμπης δʼ οὐκ ἀπέθηκε δέπας· - -ἀλλʼ ἔτι διψώων ἰδίῃ κατεμέμφετο χειρί, -ὡς ἀπὸ κρητῆρος μηδὲν ἀφυσσαμένῃ. -οἱ δὲ νέοι ῥέγχουσι, καὶ οὐ σθένος οὐδʼ ἀπʼ ἀριθμοῦ -τὰς κύλικας γνῶναι τὰς ἔτι πινομένας. -πῖνε, γέρον, καὶ ζῆθι· μάτην δʼ ἄρα θεῖος Ὅμηρος -τείρεσθαι πολιὴν ἐκ νεότητος ἔφη. -
-
- - -macedonius ii - - -ἤθελον οὐ χρυσόν τε καὶ ἄστεα μυρία γαίης, -οὐδʼ ὅσα τὰς Θήβας εἶπεν Ὅμηρος ἔχειν -ἀλλʼ ἵνα μοι τροχόεσσα κύλιξ βλύσσειε Λυαίῳ, -χείλεος ἀενάῳ νάματι λουομένου, -καὶ γεραρῶν συνέπινε λάλος χορός, οἱ δὲ περισσοὶ -ἀνέρες ἐργατίναι κάμνον ἐφʼ ἡμερίσιν. -οὗτος ἐμοὶ πολὺς ὄλβος, ἀεὶ φίλος· οὐδʼ ἀλεγίζω -τῶν χρυσέων ὑπάτων, τὴν φιάλην κατέχων. -
-
- - -macedonius ii - - -Χανδοπόται, βασιλῆος ἀεθλητῆρες Ἰάκχου, -ἔργα κυπελλομάχου στήσομεν εἰλαπίνης, -Ἰκαρίου σπένδοντες ἀφειδέα δῶρα Λυαίου· -ἄλλοισιν μελέτω Τριπτολέμοιο γέρα, -ᾗχι βόες, καὶ ἄροτρα, καὶ ἱστοβοεύς, καὶ ἐχέτλη, -καὶ στάχυς, ἁρπαμένης ἴχνια Φερσεφόνης. -εἴ ποτε δὲ στομάτεσσι βαλεῖν τινα βρῶσιν ἀνάγκη, -ἀσταφὶς οἰνοπόταις ἄρκιος ἡ Βρομίου. -
-
- - -paulus silentiarius - - -σπείσομεν οἰνοποτῆρες ἐγερσιγέλωτι Λυαίῳ· -ὤσομεν ἀνδροφόνον φροντίδα ταῖς φιάλαις, - -σιτοδόκῳ δʼ ἄγραυλος ἀνὴρ βαρύμοχθος ἰάλλοι -γαστρὶ μελαμπέπλου μητέρα Φερσεφόνης· -ταυροφόνων δʼ ἀμέγαρτα καὶ αἱμαλέα κρέα δόρπων -θηρσὶ καὶ οἰωνοῖς λείψομεν ὠμοβόροις· -ὀστέα δʼ αὖ νεπόδων ταμεσίχροα χείλεσι φωτῶν -εἰξάτω οἷς Ἀίδης φίλτερος ἠελίου· -ἡμῖν δʼ ὀλβιόδωρον ἀεὶ μέθυ καὶ βόσις ἔστω -καὶ ποτὸν ἀμβροσίην δʼ ἄλλος ἔχειν ἐθέλοι. -
-
- - -macedonius ii - - -χθιζὸν ἐμοὶ νοσέοντι παρίστατο δήιος ἀνὴρ -ἰητρός, δεπάων νέκταρ ἀπειπάμενος· -εἶπε δʼ ὕδωρ πίνειν ἀνεμώλιος, οὐδʼ ἐδιδάχθη, -ὅττι μένος μερόπων οἶνον Ὅμηρος ἔφη. -
-
- - -palladas - - -πᾶσι θανεῖν μερόπεσσιν ὀφείλεται, οὐδέ τις ἐστὶν -αὔριον εἰ ζήσει θνητὸς ἐπιστάμενος. -τοῦτο σαφῶς, ἄνθρωπε, μαθὼν εὔφραινε σεαυτόν, -λήθην τοῦ θανάτου τὸν Βρόμιον κατέχων. -τέρπεο καὶ Παφίῃ, τὸν ἐφημέριον βίον ἕλκων· -τἆλλα δὲ πάντα Τύχῃ πράγματα δὸς διέπειν. -
-
- - -macedonius ii - - -ἀνέρες, οἷσι μέμηλεν ἀπήμονος ὄργια Βάκχου, -ἐλπίσιν ἡμερίδων ῥίψατε τὴν πενίην. -αὐτὰρ ἐμοὶ κρητὴρ μὲν ἔοι δέπας, ἄγχι δὲ ληνὸς -ἀντὶ πίθου, λιπαρῆς ἔνδιον εὐφροσύνης. - -αὐτίκα δʼ ἡμετέροιο πιὼν κρητῆρα Λυαίου -παισὶ Καναστραίοις μάρναμαι, ἢν ἐθέλῃς. -οὐ τρομέω δὲ θάλασσαν ἀμείλιχον, οὐδὲ κεραυνούς, -πιστὸν ἀταρβήτου θάρσος ἔχων Βρομίου. -
-
- - -agathias scholasticus - - -ἡμεῖς μὲν πατέοντες ἀπείρονα καρπὸν Ἰάκχου -ἄμμιγα βακχευτὴν ῥυθμὸν ἀνεπλέκομεν. -ἤδη δʼ ἄσπετον οἶδμα κατέρρεεν· οἷα δὲ λέμβοι -κισσύβια γλυκερῶν νήχεθʼ ὑπὲρ ῥοθίων, -οἷσιν ἀρυσσάμενοι σχέδιον ποτὸν ἤνομεν ἤδη, -θερμῶν Νηιάδων οὐ μάλα δευόμενοι. -ἡ δὲ καλὴ ποτὶ ληνὸν ὑπερκύπτουσα Ῥοδάνθη -μαρμαρυγῇς κάλλους νᾶμα κατηγλάισεν. -πάντων δʼ ἐκδεδόνηντο θοαὶ φρένες, οὐδέ τις ἡμέων -ἦεν, ὃς οὐ Βάκχῳ δάμνατο καὶ Παφίῃ. -τλήμονες, ἀλλʼ ὁ μὲν εἷρπε παραὶ ποσὶν ἄφθονος ἡμῖν -τῆς δʼ ἄρʼ ὑπʼ ἐλπωρῇ μοῦνον ἐπαιζόμεθα. -
-
- - -parmenion - - -λιμοῦ καὶ γραίης χαλεπὴ κρίσις. ἀργαλέον μὲν -πεινῆν, ἡ κοίτη δʼ ἔστʼ ὀδυνηροτέρα. -πεινῶν εὔχετο γραῦν κοιμώμενος εὔχετο λιμὸν -Φίλλις· ἴδʼ ἀκλήρου παιδὸς ἀνωμαλίην. - -
-
- - -antiphilus - - -κἢν τείνῃς ῥακόεντα πολυτμήτοιο παρειῆς -χρῶτα, καὶ ἀβλεφάρους ὦπας ἐπανθρακίσῃς, -καὶ λευκὴν βάψῃς μέλανι τρίχα, καὶ πυρίφλεκτα -βοστρύχια κροτάφοις οὖλα περικρεμάσῃς, -οὐδὲν ταῦτα, γελοῖα, καὶ ἢν ἔτι πλείονα ῥέξῃς, - - -
-
- - -myrinus - - -υ τετρηκόσιʼ ἐστὶν ἔχεις δὲ σὺ τοὺς ἐνιαυτοὺς -δὶς τόσσους, τρυφερὴ Λαῒ κορωνεκάβη, -Σισύφου ὦ μάμμη, καὶ Δευκαλίωνος ἀδελφή. -βάπτε δὲ τὰς λευκάς, καὶ λέγε πᾶσι τατᾶ. -
-
- - -lucillius - - -τὰς τρίχας, ὦ Νίκυλλα, τινὲς βάπτειν σε λέγουσιν, -ἃς σὺ μελαινοτάτας ἐξ ἀγορᾶς ἐπρίω. -
-
- - -lucillius - - -τὰς πολιὰς βάψασα Θεμιστονόη τρικόρωνος -γίνεται ἐξαπίνης οὐ νέα, ἀλλὰ Ῥέα. -
-
- - -Julius leonidas - - -Γρῆϋν ἔγημε Φιλῖνος, ὅτʼ ἦν νέος· ἡνίκα πρέσβυς, -δωδεκέτιν Παφίῃ δʼ ὥριος οὐδέποτε. -τοιγὰρ ἄπαις διέμεινέ ποτε σπείρων ἐς ἄκαρπα· -νῦν δʼ ἑτέροις γήμας, ἀμφοτέρων στέρεται. - -
-
- - -nicarchus ii - - -ἤκμασε Νικονόη· κἀγὼ λέγω· ἤκμασε δʼ αὐτή -ἡνίκα Δευκαλίων ἄπλετον εἶδεν ὕδωρ. -ταῦτα μὲν οὖν ἡμεῖς οὐκ οἴδαμεν, ἀλλʼ ὅτι ταύτην -οὐκ ἄνδρα ζητεῖν νῦν ἔδει, ἀλλὰ τάφον. -
-
- - -lollius bassus - - -ἡ πολιὴ κροτάφοισι Κυτώταρις, ἡ πολύμυθος -γραῖα, διʼ ἣν Νέστωρ οὐκέτι πρεσβύτατος, -ἡ φάος ἀθρήσασ’ ἐλάφου πλέον, ἡ χερὶ λαιῇ -γῆρας ἀριθμεῖσθαι δεύτερον ἀρξαμένη, -ζώει καὶ λεύσσουσα καὶ ἀρτίπος, οἷά τε νύμφη, -ὥστε με διστάζειν, μή τι πέπονθʼ Ἀίδης, -
-
- - -nicarchus ii - - -γραῖα καλὴ ʽτί γάρ;ʼ οἶσθας ὅτʼ ἦν νέα· ἀλλὰ τότʼ ᾔτει, -νῦν δʼ ἐθέλει δοῦναι μισθὸν ἐλαυνομένη. -εὑρήσεις τεχνῖτιν ὅταν δὲ πίῃ, τότε μᾶλλον -εἰς ὃ θέλεις αὐτὴν εὐεπίτακτον ἔχεις. -πίνει γὰρ καὶ τρεῖς καὶ τέσσαρας, ἢν ἐθελήσῃς, -ξέστας, κἀκ τούτου γίνετʼ ἄνω τὰ κάτω· -κολλᾶται, κνίζει, παθικεύεται· ἤν τι διδῷ τις, -λαμβάνει· ἢν μὴ δῷ, μισθὸν ἔχει τὸ πάθος. - -
-
- - -nicarchus ii - - -τὴν δύσκωφον γραῖαν, Ὀνήσιμε, πρὸς Διός, ἔξω -ἔκβαλε· πολλὰ λίην πράγματά μοι παρέχει. -ἢν αὐτῇ τυροὺς ἁπαλοὺς εἴπωμεν ἐνέγκαι, -οὐ τυρούς, πυροὺς δʼ ἔρχετʼ ἔχουσα νέους. -πρῴην τὴν κεφαλὴν ἐπόνουν, καὶ πήγανον αὐτὴν -ᾔτουν ἡ δʼ ἔφερεν τήγανον ὀστράκινον. -ἂν † ὀπὸν αἰτήσω, δοκὸν εἰσφέρει· ἄν, λάχανόν μοι. - -εἴπω δὸς πεινῶν, εὐθὺ φέρει λάσανον. -ὄξος ἐὰν αἰτῶ, τόξον φέρει· ἂν δέ γε τόξον, -ὄξος· ὅλως δʼ ὃ λέγω οὔποτʼ ἐπαισθάνεται. -αἰσχρὸν τῆς γραός με χάριν κήρυκα γενέσθαι, -καὶ μελετᾶν ἔξω, νυκτὸς ἐγειρόμενον. -
-
- - -lucillius - - -οὗτος ὁ νῦν τοιοῦτος Ὀλυμπικὸς εἶχε, Σεβαστέ, -ῥῖνα, γένειον, ὀφρῦν, ὠτάρια, βλέφαρα· -εἶτʼ ἀπογραψάμενος πύκτης ἀπολώλεκε πάντα, -ὥστʼ ἐκ τῶν πατρικῶν μηδὲ λαβεῖν τὸ μέρος· -εἰκόνιον γὰρ ἀδελφὸς ἔχων προενήνοχεν αὐτοῦ, -καὶ κέκριτʼ ἀλλότριος, μηδὲν ὅμοιον ἔχων. -
-
- - -lucillius - - -ῥύγχος ἔχων τοιοῦτον, Ὀλυμπικέ, μήτʼ ἐπὶ κρήνην -ἔλθῃς, μήτʼ ἐνόρα πρός τι διαυγὲς ὕδωρ. -καὶ σὺ γάρ, ὡς Νάρκισσος, ἰδὼν τὸ πρόσωπον ἐναργές, -τεθνήξῃ, μισῶν σαυτὸν ἕως θανάτου, - -
-
- - -lucillius - - -Εἰκοσέτους σωθέντος Ὀδυσσέος εἰς τὰ πατρῷα -ἔγνω τὴν μορφὴν Ἄργος ἰδὼν ὁ κύων· -ἀλλὰ σὺ πυκτεύσας, Στρατοφῶν, ἐπὶ τέσσαρας ὥρας, -οὐ κυσὶν ἄγνωστος, τῇ δὲ πόλει γέγονας. -ἢν ἐθέλῃς τὸ πρόσωπον ἰδεῖν ἐς ἔσοπτρον ἑαυτοῦ, - -οὐκ εἰμὶ Στρατοφῶν, αὐτὸς ἐρεῖς ὀμόσας. -
-
- - -lucillius - - -κόσκινον ἡ κεφαλή σου, Ἀπολλόφανες, γεγένηται, -ἢ τῶν σητοκόπων βιβλαρίων τὰ κάτω· -ὄντως μυρμήκων τρυπήματα λοξὰ καὶ ὀρθά, -γράμματα τῶν λυρικῶν Λύδια καὶ Φρύγια. -πλὴν ἀφόβως πύκτευε· καὶ ἢν τρωθῇς γὰρ ἄνωθεν, -ταῦθʼ ὅσ’ ἔχεις, ἕξεις· πλείονα δʼ οὐ δύνασαι. -
-
- - -lucillius - - -πύκτης ὢν κατέλυσε Κλεόμβροτος· εἶτα γαμήσας -ἔνδον ἔχει πληγῶν Ἴσθμια καὶ Νέμεα, -γραῦν μαχίμην, τύπτουσαν Ὀλύμπια, καὶ τὰ παρʼ αὐτῷ -μᾶλλον ἰδεῖν φρίσσων ἤ ποτε τὸ στάδιον. -ἂν γὰρ ἀναπνεύσῃ, δέρεται τὰς παντὸς ἀγῶνος -πληγάς, ὡς ἀποδῷ· κἂν ἀποδῷ, δέρεται. -
-
- - -lucillius - - -οἱ συναγωνισταὶ τὸν πυγμάχον ἐνθάδʼ ἔθηκαν -Ἆπιν οὐδένα γὰρ πώποτʼ ἐτραυμάτισεν. - -
-
- - -lucillius - - -πᾶσαν ὅσαν Ἕλληνες ἀγωνοθετοῦσιν ἅμιλλαν -πυγμῆς, Ἀνδρόλεως πᾶσαν ἀγωνισάμαν -ἔσχον δʼ ἐν Πίσῃ μὲν ἓν ὠτίον, ἐν δὲ Πλαταιαῖς -ἓν βλέφαρον· Πυθοῖ δʼ ἄπνοος ἐκφέρομαι· -Δαμοτέλης δʼ ὁ πατὴρ καρύσσετο σὺν πολιήταις -ἆραί με σταδίων ἢ νεκρὸν ἢ κολοβόν. -
-
- - -nicarchus ii - - - -πέντε μετʼ ἄλλων Χάρμος ἐν Ἀρκαδίᾳ δολιχεύων, -θαῦμα μέν, ἀλλʼ ὄντως ἕβδομος ἐξέπεσεν. - -ἓξ ὄντων, τάχʼ ἐρεῖς, πῶς ἕβδομος ; εἷς φίλος αὐτοῦ, - -θάρσει, Χάρμε, λέγων, ἦλθεν ἐν ἱματίῳ. -ἕβδομος οὖν οὕτω παραγίνεται· εἰ δʼ ἔτι πέντε -εἶχε φίλους, ἦλθʼ ἄν, Ζωίλε, δωδέκατος. -
-
- - -lucillius - - -τὸν σταδιῆ πρῴην Ἐρασίστρατον ἡ μεγάλη γῆ, -πάντων σειομένων, οὐκ ἐσάλευσε μόνον. -
-
- - -lucillius - - -οὔτε τάχιον ἐμοῦ τις ἐν ἀντιπάλοισιν ἔπιπτεν, -οὔτε βράδιον ὅλως ἔδραμε τὸ στάδιον -δίσκῳ μὲν γὰρ ὅλως οὐδʼ ἤγγισα, τοὺς δὲ πόδας μου -ἐξᾶραι πηδῶν ἴσχυον οὐδέποτε· -κυλλὸς δʼ ἠκόντιζεν ἀμείνονα· πέντε δʼ ἀπʼ ἄθλων -πρῶτος ἐκηρύχθην πεντετριαζόμενος, - -
-
- - -lucillius - - -νύκτα μέσην ἐποίησε τρέχων ποτὲ Μάρκος ὁπλίτης, -ὥστʼ ἀποκλεισθῆναι πάντοθε τὸ στάδιον. -οἱ γὰρ δημόσιοι κεῖσθαί τινα πάντες ἔδοξαν -ὁπλίτην τιμῆς εἵνεκα τῶν λιθίνων. -καὶ τί γάρ; εἰς ὥρας ἠνοίγετο· καὶ τότε Μάρκος -ἦλθε, προσελλείπων τῷ σταδίῳ στάδιον. -
-
- - -anonymi epigrammatici - - -τὸ στάδιον Περικλῆς εἴτʼ ἔδραμεν, εἴτʼ ἐκάθητο, -οὐδεὶς οἶδεν ὅλως· δαιμόνιος βραδυτής. -ὁ ψόφος ἦν ὕσπληγος ἐν οὔασι, καὶ στεφανοῦτο -ἄλλος, καὶ Περικλῆς δάκτυλον οὐ προέβη. -
-
- - -lucillius - - -Τιμόμαχον τὸν μακρὸν ὁ πεντόργυιος ἐχώρει -οἶκος, ὑπὲρ γαίης πάντοτε κεκλιμένον -στῆναι δʼ εἲ ποτʼ ἔχρῃζεν, ἔδει τοὺς παῖδας ἀπʼ ὄρθρου -τὴν ὀροφὴν τρῆσαι πέντʼ ἐπὶ πέντε πόδας. -
-
- - -lucillius - - -τὴν μικρὴν παίζουσαν Ἐρώτιον ἥρπασε κώνωψ· -ἡ δέ· τί, φησί, πάθω; Ζεῦ πάτερ, ἦ μʼ ἐθέλεις - -
-
- - -lucillius - - -ὁ βραχὺς Ἑρμογένης, ὅταν ἐκβάλῃ εἰς τὸ χαμαί τι, -ἕλκει πρὸς τὰ κάτω τοῦτο δορυδρεπάνῳ. - -
-
- - -lucillius - - -τῷ πατρὶ θυμωθείς, Διονύσιε, Μάρκος ὁ μικρός, -πυρῆνα στήσας, αὑτὸν ἀπηγχόνισεν. -
-
- - -lucillius - - -ἐν καλάμῳ πήξας ἀθέρα Στρατόνικος ὁ λεπτός, -καὶ τριχὸς ἐκδήσας, αὑτὸν ἀπηγχόνισεν -καὶ τί γάρ; οὐχὶ κάτω βρῖσεν βαρύς· ἀλλʼ ὑπὲρ αὐτῶν, -νηνεμίας οὔσης, νεκρὸς ἄνω πέταται. -
-
- - -lucillius - - -Γάιος ἐκπνεύσας τὸ πανύστατον ἐχθὲς ὁ λεπτὸς -εἰς τὴν ἐκκομιδὴν οὐδὲν ἀφῆκεν ὅλως· -καὶ πέρας εἰς ἀίδην καταβὰς οἷόσπερ ὅτʼ ἔζη, -τῶν ὑπὸ γῆν σκελετῶν λεπτότατος πέταται. -τὴν δὲ κενὴν κλίνην οἱ φράτορες ἦραν ἐπʼ ὤμων, -ἐγγράψαντες ἄνω· Γάιος ἐκφέρεται. - -
-
- - -lucillius - - -τῶν Ἐπικουρείων ἀτόμων ποτὲ Μάρκος ὁ λεπτός, -τῇ κεφαλῇ τρήσας, εἰς τὸ μέσον διέβη. -
-
- - -lucillius - - -Σαλπίζων ἔπνευσεν ὅσον βραχὺ Μάρκος ὁ λεπτός, -καὶ κατὰ τῆς κεφαλῆς ὀρθὸς ἀπῆλθε κάτω. -
-
- - -lucillius - - -τὸν μικρὸν Μάκρωνα θέρους κοιμώμενον εὑρὼν -εἰς τρώγλην μικρὸς τοῦ ποδὸς εἵλκυσε μῦς. -ὃς δʼ ἐν τῇ τρώγλῃ ψιλὸς τὸν μῦν ἀποπνίξας, - -Ζεῦ πάτερ, εἶπεν, ἔχεις δεύτερον Ἡρακλέα. - - -
-
- - -nicarchus ii - - -Ἀρκάδας οὐχ οὕτω Στυμφαλίδες, ὡς ἐμὲ κίχλαι -αἱ νέκυες ξηροῖς ἤκαχον ὀσταρίοις, -ἅρπυιαι, δραχμῆς ξηρὴ δεκάς. ὦ ἐλεειναὶ -λειμώνων ἐτύμως, ἔρρετε, νυκτερίδες. -
-
- - -ammianus - - -τῷ Στρατονικείῳ πόλιν ἄλλην οἰκοδομεῖτε, -ἢ τούτοις ἄλλην οἰκοδομεῖτε πόλιν. -
-
- - -ammianus - - -ἔστω μητρόπολις πρῶτον πόλις, εἶτα λεγέσθω -μητρόπολις· μὴ νῦν, ἡνίκα μηδὲ πόλις. -
-
- - -lucillius - - -τὸν λεπτὸν φυσῶντα τὸ πῦρ Πρόκλον ἦρεν ὁ καπνός, -καὶ διὰ τῶν θυρίδων ἔνθεν ἀπῆλθεν ἔχων. -ἀλλὰ μόλις νεφέλῃ προσενήξατο, καὶ διʼ ἐκείνης -προσκατέβη τρωθεὶς μυρία ταῖς ἀτόμοις. -
-
- - -lucillius - - -οὕτω κουφότατος πέλε Γάιος, ὥστʼ ἐκολύμβα -τοῦ ποδὸς ἐκκρεμάσας ἢ λίθον ἢ μόλιβον. -
-
- - -lucillius - - -ῥιπίζων ἐν ὕπνοις Δημήτριος Ἀρτεμιδώραν -τὴν λεπτήν, ἐκ τοῦ δώματος ἐξέβαλεν. - -
-
- - -nicarchus ii - -Others attribute this to Ammianus - -ἐξαίρων ποτʼ ἄκανθαν ὁ λεπτακινὸς Διόδωρος -αὐτὸς ἐτρύπησεν τῷ ποδὶ τὴν βελόνην. -
-
- - -lucillius - - -ἐξ ἀτόμων Ἐπίκουρος ὅλον τὸν κόσμον ἔγραψεν -εἶναι, τοῦτο δοκῶν, Ἄλκιμε, λεπτότατον. -εἰ δὲ τότʼ ἦν Διόφαντος, ἔγραψεν ἂν ἐκ Διοφάντου, -τοῦ καὶ τῶν ἀτόμων πουλύ τι λεπτοτέρου, -ἢ τὰ μὲν ἄλλʼ ἔγραψε συνεστάναι ἐξ ἀτόμων ἄν, -ἐκ τούτου δʼ αὐτάς, Ἄλκιμε, τὰς ἀτόμους. -
-
- - -lucillius - - -ἱππεύων μύρμηκι Μενέστρατος, ὡς ἐλέφαντι, -δύσμορος ἐξαπίνης ὕπτιος ἐξετάθη, -λακτισθεὶς δʼ ὡς εἶχε τὸ καίριον, ὦ φθόνε, φησίν, - -οὕτως ἱππεύων ὤλετο καὶ Φαέθων. - -
-
- - -lucillius - - -τὸν μέγαν ἐζήτουν Εὐμήκιον ὃς δʼ ἐκάθευδεν -μικρῷ ὑπʼ ὀξυβάφῳ τὰς χέρας ἐκτανύσας. -
-
- - -lucillius - - -ἀρθεὶς ἐξ αὔρης λεπτῆς ἐποτᾶτο διʼ αἴθρης -Χαιρήμων, ἀχύρου πολλὸν ἐλαφρότερος· - -καὶ τάχʼ ἂν ἐρροίζητο διʼ αἰθέρος, εἰ μὴ ἀράχνῃ -τοὺς πόδας ἐμπλεχθεὶς ὕπτιος ἐκρέματο. -αὐτοῦ δὴ νύκτας τε καὶ ἤματα πέντε κρεμασθεὶς -ἑκταῖος κατέβη νήματι τῆς ἀράχνης. -
-
- - -lucillius - - -αἰγείρου φύλλῳ πεφορημένῳ ἐξ ἀνέμοιο -πληγεὶς Χαιρήμων ὕπτιος ἐξετάθη. -κεῖται δʼ ἢ Τιτυῷ ἐναλίγκιος, ἢ πάλι κάμπῃ, -ἁπλώσας κατὰ γῆς σῶμα τὸ καννάβινον. -
-
- - -anonymi epigrammatici - - -Κόνων δίπηχυς, ἡ γυνὴ δὲ τεσσάρων -ἐν τῇ κλίνῃ δὲ τῶν ποδῶν ἰσουμένων, -σκόπει Κόνωνος ποῦ τὸ χεῖλος ἔρχεται, -
-
- - -anonymi epigrammatici - - -οὐδʼ ἐπικύψαι ἔχει Δημήτριος οὐδὲν ὁ μικρός· -ἀλλʼ † ἔρριπται χαμαὶ πάντοτʼ ἐπαιρόμενος. . -
-
- - -nicarchus ii - - -τρεῖς λεπτοὶ πρῴην περὶ λεπτοσύνης ἐμάχοντο, -τίς προκριθεὶς εἴη λεπτεπιλεπτότερος. -ὧν ὁ μὲν εἷς,Ἕρμων, μεγάλην ἐνεδείξατο τέχνην, -καὶ διέδυ ῥαφίδος τρῆμα, λίνον κατέχων -Δημᾶς δʼ ἐκ τρώγλης βαίνων ἐς ἀράχνιον ἔστη, -ἡ δʼ ἀράχνη νήθουσ’ αὐτὸν ἀπεκρέμασεν. -Σωσίπατρος δʼ ἐβόησεν “ ἐμὲ στεφανώσατʼ ἐγὼ -εἰ βλέπομʼ, ἥττημαι· πνεῦμα γάρ εἰμι μόνον.” - -
-
- - -lucillius - - -Βουλόμενόσποθʼ ὁ λεπτὸς ἀπάγξασθαι Διόφαντος, -νῆμα λαβὼν ἀράχνης αὑτὸν ἀπηγχόνισεν. -
-
- - -lucillius - - - -πρίν σ’ ἐναλείψασθαι, Δημόστρατε, χαῖρʼ, ἱερὸν φῶς, - -εἰπὲ τάλας· οὕτως εὔσκοπός ἐστι Δίων. -οὐ μόνον ἐξετύφλωσεν Ὀλυμπικόν, ἀλλὰ διʼ αὐτοῦ -εἰκόνος ἧς εἶχεν τὰ βλέφαρʼ ἐξέβαλεν. -
-
- - -lucillius - - -τοῦ λιθίνου Διὸς ἐχθὲς ὁ κλινικὸς ἥψατο Μάρκος· -καὶ λίθος ὢν καὶ Ζεύς, σήμερον ἐκφέρεται. -
-
- - -lucillius - - -Ἑρμογένην τὸν ἰατρὸν ὁ ἀστρολόγος Διόφαντος -εἶπε μόνους ζωῆς ἐννέα μῆνας ἔχειν. -κἀκεῖνος γελάσας, τί μὲν ὁ Κρόνος ἐννέα μηνῶν, - -φησί, λέγει, σὺ νόει· τἀμὰ δὲ σύντομά σοι. - -εἶπε, καὶ ἐκτείνας μόνον ἥψατο· καὶ Διόφαντος -ἄλλον ἀπελπίζων, αὐτὸς ἀπεσκάρισεν. -
-
- - -lucillius - - -ἤν τινʼ ἔχῃς ἐχθρόν, Διονύσιε, μὴ καταράσῃ -τὴν Ἶσιν τούτῳ, μηδὲ τὸν Ἁρποκράτην, -μηδʼ εἴ τις τυφλοὺς ποιεῖ θεός, ἀλλὰ Σίμωνα· -καὶ γνώσῃ, τί θεός, καὶ τί Σίμων δύναται, - -
-
- - -lucillius - - -εἰς Ἄϊδος κατέπεμψε πάλαι ποτέ, δέσποτα Καῖσαρ, -ὡς λόγος, Εὐρυσθεὺς τὸν μέγαν Ἡρακλέα· -νῦν δʼ ἐμὲ Μηνοφάνης ὁ κλινικός· ὥστε λεγέσθω -κλινικὸς Εὐρυσθεύς, μηκέτι Μηνοφάνης. -
-
- - -straton - - -ἰητρὸς Καπίτων Χρύσην ἐνέχρισεν, ὁρῶντα -ὀκτὼ μὲν μακρὸν πύργον ἀπὸ σταδίων, -ἄνδρα δʼ ἀπὸ σταδίου, διὰ δώδεκα δʼ ὄρτυγα πηχῶν, -φθεῖρα δʼ ἀπὸ σπιθαμῶν καὶ δύο δερκόμενον. -νῦν δʼ ἀπὸ μὲν σταδίου πόλιν οὐ βλέπει, ἐκ δὲ διπλέθρου -καιόμενον κατιδεῖν τὸν φάρον οὐ δύναται· -ἵππον ἀπὸ σπιθαμῆς δὲ μόλις βλέπει, ἀντὶ δὲ τοῦ πρὶν -ὄρτυγος οὐδὲ μέγαν στρουθὸν ἰδεῖν δύναται. -ἂν δὲ προσεγχρίσας αὐτὸν φθάσῃ, οὐδʼ ἐλέφαντα -οὐκέτι μήποτʼ ἴδῃ πλησίον ἑσταότα. -
-
- - -callicter - - -Οὔτʼ ἔκλυσεν Φείδων μʼ, οὔθʼ ἥψατο ἀλλὰ πυρέξας -ἐμνήσθην αὐτοῦ τοὔνομα, κἀπέθανον. -
-
- - -callicter - - -ἰητρὸς τὴν γραῦν εἴτʼ ἔκλυσεν, εἴτʼ ἀπέπνιξεν, -οὐδεὶς γινώσκει· δαιμόνιον τὸ τάχος. -ὁ ψόφος ἦν κλυστῆρος ἐν οὔασι, καὶ στεφανοῦτο -ἡ σορός, οἱ δʼ ἄλλοι τὸν φακὸν ηὐτρέπισαν. - -
-
- - -callicter - - -ὀρθῶσαι τὸν κυρτὸν ὑποσχόμενος Διόδωρον -Σωκλῆς τετραπέδους τρεῖς ἐπέθηκε λίθους -τοῦ κυρτοῦ στιβαροὺς ἐπὶ τὴν ῥάχιν ἀλλὰ πιεσθεὶς -τέθνηκεν, γέγονεν δʼ ὀρθότερος κανόνος. -
-
- - -callicter - - -χειρουργῶν ἔσφαξεν Ἀκεστορίδην Ἀγέλαος· - -ζῶν γὰρ χωλεύειν, φησίν, ἔμελλε τάλας. - -
-
- - -callicter - - -πέντʼ ἰητρὸς Ἄλεξις ἅμʼ ἔκλυσε, πέντʼ ἐκάθηρε, -πέντʼ ἴδεν ἀρρώστους, πέντʼ ἐνέχρισε πάλιν -καὶ πᾶσιν μία νύξ, ἓν φάρμακον, εἷς σοροπηγός, -εἷς τάφος, εἷς Ἀίδης, εἷς κοπετὸς γέγονεν. -
-
- - -hedylus - - -Ἆγις Ἀρισταγόρην οὔτʼ ἔκλυσεν, οὔτʼ ἔθιγʼ αὐτοῦ· -ἀλλʼ ὅσον εἰσῆλθεν, κᾤχετʼ Ἀρισταγόρης. -ποῦ τοίην ἀκόνιτος ἔχει φύσιν; ὦ σοροπηγοί, -Ἆγιν καὶ μίτραις βάλλετε καὶ στεφάνοις. -
-
- - -nicarchus ii - - - - ξεῖνε, τί μὰν πεύθῃ; τίνες ἐν χθονὶ τοῖσδʼ ὑπὸ τύμβοις; - - οὓς γλυκεροῦ φέγγους Ζώπυρος ἐστέρισεν, - -Δᾶμις, Ἀριστοτέλης, Δημήτριος, Ἀρκεσίλαος, -Σώστρατος, οἵ τʼ ὀπίσω μέχρι Παραιτονίου. -κηρύκιον γὰρ ἔχων ξύλινον, καὶ πλαστὰ πέδιλα, -ὡς Ἑρμῆς, κατάγει τοὺς θεραπευομένους. -
-
- - -anonymi epigrammatici - - -ἰητρὸς Κρατέας καὶ Δάμων ἐνταφιαστὴς -κοινὴν ἀλλήλοις θέντο συνωμοσίην. -καὶ ῥʼ ὁ μὲν οὓς κλέπτεσκεν ἀπʼ ἐνταφίων τελαμῶνας -εἰς ἐπιδεσμεύειν πέμπε φίλῳ Κρατέᾳ· -τὸν δʼ ἀπαμειβόμενος Κρατέας εἰς ἐνταφιάζειν -πέμπεν ὅλους αὐτῷ τοὺς θεραπευομένους. -
-
- - -anonymi epigrammatici - - -οὐ μήλῃ, τριόδοντι δʼ ἐνήλειψέν με Χαρῖνος, -σπόγγον ἔχων καινὸν τῶν γραφικῶν πινάκων -τὴν μήλην δʼ ἕλκων, ἐξέσπασε τὸ βλέφαρόν μου -ῥιζόθεν ἡ μήλη δʼ ἔνδον ἔμεινεν ὅλη. -ἂν δὲ δὶς ἐγχρίσῃ με πονῶν πάλιν οὐκ ἐνοχλήσω -ὀφθαλμοὺς αὐτῷ· πῶς γὰρ ὁ μηκέτʼ ἔχων; -
-
- - -pollianus - - - -εἰσὶ καὶ ἐν Μούσῃσιν Ἐρινύες, αἵ σε ποιοῦσιν -ποιητήν, ἀνθʼ ὧν πολλὰ γράφεις ἀκρίτως. -τοίνυν, σοῦ δέομαι, γράφε πλείονα· μείζονα γάρ σοι -εὔξασθαι ταύτης οὐ δύναμαι μανίαν. - -
-
- - -pollianus - - -εἰ μὴ χαίρω, Φλῶρε, γενοίμην δάκτυλος ἢ ποὺς -εἷς τῶν σῶν τούτων τῶν κατατεινομένων. -χαίρω, νὴ τὸν κλῆρον, ὃν εὐκλήρησας ἐν ἄθλοις, -ὡς περὶ χοιρείας τοῦ στεφάνου μερίδος. -τοιγὰρ θάρσει, Φλῶρε, καὶ εὔθυμος πάλι γίνου· -οὕτω νικῆσαι καὶ δόλιχον δύνασαι. -
-
- - -cerealius - - -ποιητὴς ἐλθὼν εἰς Ἴσθμια πρὸς τὸν ἀγῶνα, -εὑρὼν ποιητάς, εἶπε παρίσθμιʼ ἔχειν. -μέλλει δʼ ἐξορμᾶν εἰς Πύθια· κἂν πάλιν εὕρῃ, -εἰπεῖν οὐ δύναται, καὶ παραπύθιʼ ἔχω. - -
-
- - -pollianus - - -τοὺς κυκλίους τούτους, τοὺς αὐτὰρ ἔπειτα λέγοντας -μισῶ, λωποδύτας ἀλλοτρίων ἐπέων. -καὶ διὰ τοῦτʼ ἐλέγοις προσέχω πλέον οὐδὲν ἔχω γὰρ -Παρθενίου κλέπτειν ἢ πάλι Καλλιμάχου. -θηρὶ μὲν οὐατόεντι γενοίμην, εἴ ποτε γράψω, -εἴκελος, “ἐκ ποταμῶν χλωρὰ χελιδόνια. -οἱ” δʼ οὕτως τὀν Ὅμηρον ἀναιδῶς λωποδυτοῦσιν, -ὥστε γράφειν ἤδη μῆνιν ἄειδε, θεά. - -
-
- - -lucillius - - -οὔτʼ ἐπὶ Δευκαλίωνος ὕδωρ, ὅτε πάντʼ ἐγενήθη, -οὔθʼ ὁ καταπρήσας τοὺς ἐπὶ γῆς Φαέθων, -ἀνθρώπους ἔκτεινεν ὅσους Ποτάμων ὁ ποιητὴς, -καὶ χειρουργήσας ὤλεσεν Ἑρμογένης. -ὥστʼ ἐξ αἰῶνος κακὰ τέσσαρα ταῦτʼ ἐγενήθη, -Δευκαλίων, Φαέθων, Ἑρμογένης, Ποτάμων. -
-
- - -lucillius - - -μισῶ, δέσποτα Καῖσαρ, ὅσοις νέος οὐδέποτʼ οὐδεὶς -ἤρεσε, κἂν εἴπῃ, μῆνιν ἄειδε θεά, -ἀλλʼ ἢν μὴ Πριάμου τις ἔχῃ χρόνον ἡμιφάλακρος, -ἢ καὶ κυρτὸς ἄγαν, οὐ δύνατʼ ἄλφα γράφειν. -εἰ δʼ ὄντως οὕτως τοῦτʼ ἔστʼ ἔχον, ὦ ὕπατε Ζεῦ, -εἰς τοὺς κηλήτας ἔρχεται ἡ σοφία. -
-
- - -lucillius - - -τέθνηκʼ Εὐτυχίδης ὁ μελογράφος. οἱ κατὰ γαῖαν -φεύγετʼ ἔχων ᾠδὰς ἔρχεται Εὐτυχίδης· -καὶ κιθάρας αὑτῷ διετάξατο συγκατακαῦσαι -δώδεκα, καὶ κίστας εἰκοσιπέντε νόμων. -νῦν ὑμῖν ὁ Χάρων ἐπελήλυθε· ποῦ τις ἀπέλθῃ -λοιπόν, ἐπεὶ χᾄδην Εὐτυχίδης κατέχει; -
-
- - -lucillius - - -Ἀρχόμεθʼ, Ἡλιόδωρε; ποιήματα παίζομεν οὕτω -ταῦτα πρὸς ἀλλήλους; Ἡλιόδωρε, θέλεις; -ἆσσον ἴθʼ, ὥς κεν θᾶσσον ὀλέθρου καὶ γὰρ ἔμʼ ὄψει -μακροφλυαρητὴν Ἡλιοδωρότερον. - -
-
- - -lucillius - - -μηκέτι, μηκέτι, Μάρκε, τὸ παιδίον, ἀλλʼ ἐμὲ κόπτου -τὸν πολὺ τοῦ παρὰ σοὶ νεκρότερον τεκνίου, -εἰς ἐμὲ νῦν ἐλέγους ποίει πάλιν, εἰς ἐμὲ θρήνους, -δήμιε, τὸν στιχίνῳ σφαζόμενον θανάτῳ, -τοῦ σοῦ γὰρ πάσχω νεκροῦ χάριν, οἷα πάθοιεν -οἱ καταδείξαντες βιβλία καὶ καλάμους. -
-
- - -lucillius - - -οὐχ οὕτω κακοεργὸν ἐχαλκεύσαντο μάχαιραν -ἄνθρωποι, διὰ τὰς ἐξαπίνης ἐνέδρας, -οἷον ἀκήρυκτον, Καλλίστρατε, καὶ σὺ προσελθὼν -ποιεῖς μοι φονικῶν ἑξαμέτρων πόλεμον. -σάλπιγξον ταχέως ἀνακλητικὸν εἰς ἀνοχὰς γὰρ -καὶ Πρίαμος κλαύσας % ἡμερίων ἔτυχεν. -
-
- - -lucillius - - -Ὠμοβοείου μοι παραθεὶς τόμον, Ἡλιόδωρε, -καὶ τρία μοι κεράσας ὠμοβοειότερα, -εὐθὺ κατακλύζεις ἐπιγράμμασιν. εἰ δʼ ἀσεβήσας -βεβρώκειν τινὰ βοῦν τῶν ἀπὸ Τρινακρίας, -βούλομʼ ἅπαξ πρὸς κῦμα χανεῖν εἰ δʼ ἐστὶ τὸ κῦμα -ἔνθε μακράν, ἄρας εἰς τὸ φρέαρ με βάλε. - -
-
- - -lucillius - - - -ἂν τοῦ γραμματικοῦ μνησθῶ μόνον Ἡλιοδώρου, -εὐθὺ σολοικίζον τὸ στόμα μου δέδεται, -
-
- - -lucillius - - -γραμματικὸν Ζηνωνὶς ἔχει πώγωνα Μένανδρον, -τὸν δʼ υἱὸν τούτῳ φησὶ συνεστακέναι. -τὰς νύκτας δʼ αὐτῇ μελετῶν οὐ παύεται οὗτος -πτώσεις, συνδέσμους, σχήματα, συζυγίας. -
-
- - -lucillius - - -τούτοις τοῖς παρὰ δεῖπνον ἀοιδομάχοις λογολέσχαις, -τοῖς ἀπʼ Ἀριστάρχου γραμματολικριφίσιν, -οἷς οὐ σκῶμμα λέγειν, οὐ πεῖν φίλον, ἀλλʼ ἀνάκεινται -νηπυτιευόμενοι Νέστορι καὶ Πριάμῳ, -μή με βάλῃς κατὰ λέξιν ἕλωρ καὶ κύρμα γενέσθαι. -σήμερον οὐ δειπνῶ μῆνιν ἄειδε θεά. -
-
- - -lucillius - - - -χοιρίδιον καὶ βοῦν ἀπολώλεκα, καὶ μίαν αἶγα, -ὧν χάριν εἴληφας μισθάριον, Μενέκλεις· - -οὔτε δέ μοι κοινόν τι πρὸς Ὀθρυάδαν γεγένηται, -οὔτʼ ἀπάγω κλέπτας τοὺς ἀπὸ Θερμοπυλῶν -ἀλλὰ πρὸς Εὐτυχίδην ἔχομεν κρίσιν ὥστε τί ποιεῖ -ἐνθάδε μοι Ξέρξης καὶ Λακεδαιμόνιοι; -πλὴν κἀμοῦ μνήσθητι νόμου χάριν, ἢ μέγα κράξω· -ἄλλα λέγει Μενεκλῆς, ἄλλα τὸ χοιρίδιον. - -
-
- - -lucillius - - - -πολλοῦ δεῖ καὶ σφίν καὶ τρὶς παρʼ ἕκαστα “ δικασταὶ -ἄνδρες,” καὶ λέγε δὴ τὸν νόμον ἐνθάδε μοι, - -καὶ ταυτὶ καὶ μῶν καὶ τετταράκοντα καὶ ἄττα - -σκεψάμενος, καί τοι νὴ Δία, καὶ μὰ Δία, - -ῥήτωρ ἐστὶ Κρίτων, καὶ παιδία πολλὰ διδάσκει· -προσθήσει δʼ αὐτοῖς γρῦ, -φαθὶ καὶ μίν ἔτι. -
-
- - -lucillius - - -οὐ δέχεται Μάρκον τὸν ῥήτορα νεκρὸν ὁ Πλούτων, -εἰπών, “ ἀρκείτω Κέρβερος ὧδε κύων. -εἰ δʼ ἐθέλεις πάντως, Ἰξίονι καὶ Μελίτωνι -τῷ μελοποιητᾖ, καὶ Τιτυῷ μελέτα. -οὐδὲν γὰρ σοῦ χεῖρον ἔχω κακόν, ἄχρις ἂν ἐλθὼν -ὧδε σολοικίζῃ Ῥοῦφος ὁ γραμματικός.” -
-
- - -cerealius - - -οὐ τὸ λέγειν παράσημα καὶ Ἀττικὰ ῥήματα πέντε, -εὐζήλως ἐστὶν καὶ φρονίμως μελετᾷν· - -οὐδὲ γὰρ εἰ κάρκαιρε, καὶ εἰ κοναβεῖ τό τε σίζει - -καὶ κελάρυζε λέγεις, εὐθὺς Ὅμηρος ἔσῃ. -νοῦν ὑποκεῖσθαι δεῖ τοῖς γράμμασι, καὶ φράσιν αὐτῶν -εἶναι κοινοτέραν, ὥστε νοεῖν ἃ λέγεις. -
-
- - -anonymi epigrammatici - - -εἰκὼν ἡ Σέξστου μελετᾷ, Σέξστος δὲ σιωπᾷ. -εἰκὼν ἦν ῥήτωρ, ὁ δὲ ῥήτωρ εἰκόνος εἰκών. -
-
- - -ammianus - - -ἑπτὰ σολοικισμοὺς Φλάκκῳ τῷ ῥήτορι δῶρον -πέμψας, ἀντέλαβον πεντάκι διακοσίους· -καὶ νῦν μέν, φησίν, “ τούτους ἀριθμῷ σοι ἔπεμψα, -τοῦ λοιποῦ δὲ μέτρῳ, πρὸς Κύπρον ἐρχόμενος,” -
-
- - -ammianus - - -ῥήτωρ ἐξαπίνης Ἀσιατικός· οὐδὲν ἄπιστον -καὶ τοῦτʼ ἐν Θήβαις νῦν γέγονεν τὸ τέρας. -
-
- - -lucillius - - -μηδὲ λαλῶν πρῴην ἐσολοίκισε Φλάκκος ὁ ῥήτωρ, -καὶ μέλλων χαίνειν, εὐθὺς ἐβαρβάρισεν, -καὶ τῇ χειρὶ τὰ λοιπὰ σολοικίζει διανεύων, -κἀγὼ δʼ αὐτὸν ἰδὼν — τὸ στόμα μου δέδεται. - -
-
- - -anonymi epigrammatici - - -αὐτὸν ὁρῶ σέ, Μέδον, τὸν ῥήτορα. φεῦ, τί τὸ θαῦμα; -στειλάμενος σιγᾶς· οὐδὲν ὁμοιότερον. -
-
- - -ammianus - - -“ Ἀρκαδικὸν πῖλον κατʼ ἐνύπνιον Ἀρκάδι δῶρον -Ἑρμείῃ ῥήτωρ θῆκεν Ἀθηναγόρας.” -εἰ μὲν καὶ ῥήτωρ κατʼ ἐνύπνιον, οἴσομεν Ἑρμῇ· -εἰ δʼ ὕπαρ, ἀρκείτω· θῆκεν Ἀθηναγόρας. - -
-
- - -anonymi epigrammatici - - -ῥήτορος ἅδʼ εἰκών· ὁ δὲ ῥήτωρ, εἰκόνος εἰκών. -καὶ πῶς; οὐ λαλέει· οὐδὲν ὁμοιότερον. -
-
- - -ammianus - - -εἰ βούλει τὸν παῖδα διδάξαι ῥήτορα, Παῦλε, -ὡς οὗτοι πάντες, γράμματα μὴ μαθέτω. -
-
- - -lucillius - - - -εἶναι μὲν κυνικόν σε, Μενέστρατε, κἀνυπόδητον, -καὶ ῥιγοῦν οὐδεὶς ἀντιλέγει καθόλου· -ἂν δὲ παραρπάξῃς ἄρτους καὶ κλάσματʼ ἀναιδῶς, -κἀγὼ ῥάβδον ἔχω, καὶ σὲ λέγουσι κύνα. - -
-
- - -lucillius - - -πᾶς ὃς ἂν ᾖ πτωχὸς καὶ ἀγράμματος, οὐκέτʼ ἀλήθει, -ὡς τὸ πρίν, οὐδʼ αἴρει φορτία μισθαρίου· -ἀλλὰ τρέφει πώγωνα, καί, ἐκ τριόδου ξύλον ἄρας, -τῆς ἀρετῆς εἶναι φησὶν πρωτοκύων. -Ἑρμοδότου τόδε δόγμα τὸ πάνσοφον εἴ τις ἀχαλκεῖ, -μηκέτι πεινάτω, θεὶς τὸ χιτωνάριον. -
-
- - -lucillius - - -οὗτος ὁ τῆς ἀρετῆς ἀδάμας βαρύς, οὗτος ὁ πάντῃ -πᾶσιν ἐπιπλήσσων, οὗτος ὁ ῥιγομάχος, -καὶ πώγωνα τρέφων, ἑάλω. τί γάρ; ἀπρεπὲς εἰπεῖν -ἀλλʼ ἑάλω ποιῶν ἔργα κακοστομάτων. -
-
- - -ammianus - - -οἴει τὸν πώγωνα φρενῶν ποιητικὸν εἶναι, -καὶ διὰ τοῦτο τρέφεις, φίλτατε, μυιοσόβην. -κεῖρον ἐμοὶ πεισθεὶς ταχέως· οὗτος γὰρ ὁ πώγων -φθειρῶν ποιητής, οὐχὶ φρενῶν γέγονεν. -
-
- - -ammianus - - - -ὦ ʼγαθέ καὶ μῶν οὖν καὶ ποῖ δὴ καὶ πόθεν ὦ τᾶν - -καὶ θαμά καὶ φέρε δή καὶ κομιδῆ καὶ ἴθι, - -καὶ στόλιον, μάλιον, πωγώνιον, ὤμιον ἔξω, -ἐκ τούτων ἡ νῦν εὐδοκιμεῖ σοφία. - -
-
- - -antipater - - -αἰάζει πήρη τε, καὶ Ἡράκλειον ἄριστον -βριθὺ Σινωπίτου Διογένευς ῥόπαλον, -καὶ τὸ χύδην ῥυπόεντι πίνῳ πεπαλαγμένον ἔσθος -διπλάδιον, κρυερῶν ἀντίπαλον νιφάδων, -ὅττι τεοῖς ὤμοισι μιαίνεται· ἦ γὰρ ὁ μέν που -οὐράνιος, σὺ δʼ ἔφυς οὑν σποδιῇσι κύων. -ἀλλὰ μέθες, μέθες ὅπλα τὰ μὴ σέθεν· ἄλλο λεόντων, -ἄλλο γενειητῶν ἔργον ὄρωρε τράγων. -
-
- - -lucillius - - - -τῷ πατρί μου τὸν ἀδελφὸν οἱ ἀστρολόγοι μακρόγηρων -πάντες ἐμαντεύσανθʼ ὡς ἀφʼ ἑνὸς στόματος· -ἀλλʼ Ἑρμοκλείδης αὐτὸν μόνος εἶπε πρόμοιρον -εἶπε δʼ, ὅτʼ αὐτὸν ἔσω νεκρὸν ἐκοπτόμεθα. -
-
- - -lucillius - - -πάντες ὅσοι τὸν Ἄρην καὶ τὸν Κρόνον ὡροθετοῦσιν, -ἄξιοί εἰσι τυχεῖν πάντες ἑνὸς τυπάνου. -ὄψομαι οὐ μακρὰν αὐτοὺς τυχὸν εἰδότας ὄντως -καὶ τί ποεῖ ταῦρος, καὶ τί λέων δύναται. -
-
- - -lucillius - - -πρὸς τὸν μάντιν Ὄλυμπον Ὀνήσιμος ἦλθεν ὁ πύκτης, -εἰ μέλλει γηρᾶν βουλόμενος προμαθεῖν. -κἀκεῖνος, ναί, φησίν “ ἐὰν ἤδη καταλύσῃς· -ἂν δέ γε πυκτεύῃς, ὡροθετεῖ σε Κρόνος.” - -
-
- - -nicarchus ii - - -εἰς Ῥόδον εἰ πλεύσει τις Ὀλυμπικὸν ἦλθεν ἐρωτῶν -τὸν μάντιν, καὶ πῶς πλεύσεται ἀσφαλέως. -χὠ μάντις, πρῶτον μέν, ἔφη, “ καινὴν ἔχε τὴν ναῦν, -καὶ μὴ χειμῶνος, τοῦ δὲ θέρους ἀνάγου. -τοῦτο γὰρ ἂν ποιῇς, ἥξεις κἀκεῖσε καὶ ὧδε, -ἂν μὴ πειρατὴς ἐν πελάγει σε λάβῃ.” -
-
- - -lucillius - - -πρὸς τὸν μάντιν Ὄλυμπον Ὀνήσιμος ἦλθʼ ὁ παλαιστὴς, -καὶ πένταθλος Ὕλας, καὶ σταδιεὺς Μενεκλῆς, -τίς μέλλει νικᾶν αὐτῶν τὸν ἀγῶνα θέλοντες -γνῶναι. κἀκεῖνος τοῖς ἱεροῖς ἐνιδών, - -πάντες, ἔφη, “ νικᾶτε, μόνον μή τις σὲ παρέλθῃ, -καὶ σὲ καταστρέψῃ, καὶ σὲ παρατροχάσῃ.” -
-
- - -lucillius - - -εἶπεν ἐληλυθέναι τὸ πεπρωμένον, αὐτὸς ἑαυτοῦ -τὴν γένεσιν διαθεὶς Αὖλος ὁ ἀστρολόγος, -καὶ ζήσειν ὥρας ἔτι τέσσαρας· ὡς δὲ παρῆλθεν -εἰς πέμπτην, καὶ ζῆν εἰδότα μηδὲν ἔδει, -αἰσχυνθεὶς Πετόσιριν ἀπήγξατο· καὶ μετέωρος -θνῄσκει μέν, θνῄσκει δʼ οὐδὲν ἐπιστάμενος. -
-
- - -lucillius - - - -οὐ γλήχωνι Κρίτων ὁ φιλάργυρος, ἀλλὰ διχάλκῳ -αὑτὸν ἀποσφραίνει, θλιβομένου στομάχου, - -
-
- - -anonymi epigrammatici - - -πλουτεῖν φασί σε πάντες, ἐγὼ δέ σέ φημι πένεσθαι· -χρῆσις γὰρ πλούτου μάρτυς, Ἀπολλόφανες. -ἂν μετέχῃς αὐτῶν σύ, σὰ γίνεται; ἂν δὲ φυλάττῃς -κληρονόμοις, ἀπὸ νῦν γίνεται ἀλλότρια. -
-
- - -pollianus - - -χαλκὸν ἔχων, πῶς οὐδὲν ἔχεις μάθε. πάντα δανείζεις· -οὕτως οὐδὲν ἔχεις αὐτός, ἵνʼ ἄλλος ἔχῃ. -
-
- - -antiphanes - - -Ψηφίζεις, κακόδαιμον· ὁ δὲ χρόνος, ὡς τόκον, οὕτω -καὶ πολιὸν τίκτει γῆρας ἐπερχόμενος· -κοὔτε πιὼν, οὔτʼ ἄνθος ἐπὶ κροτάφοις ἀναδήσας, -οὐ μύρον, οὐ γλαφυρὸν γνοὺς ποτʼ ἐρωμένιον, -τεθνήξῃ, πλουτοῦσαν ἀφεὶς μεγάλην διαθήκην, -ἐκ πολλῶν ὀβολὸν μοῦνον ἐνεγκάμενος. -
-
- - -nicarchus ii - - -ἐχθὲς ἀπάγχεσθαι μέλλων Δείναρχος ὁ φείδων, -Γλαῦκε, διʼ ἓξ χαλκοῦς δύσμορος οὐκ ἔθανεν -ἓξ χαλκῶν ἦν γὰρ τὸ σχοινίον· ἀλλʼ ἐδυσώνει, -εὔωνον ζητῶν ἄλλον ἴσως θάνατον. -τοῦτο φιλαργυρίας δεινῆς ὅρος, ὃς γʼ ἀποθνῄσκων, -Γλαῦκε, διʼ ἓξ χαλκοῦς δύσμορος οὐκ ἔθανεν. - -
-
- - -nicarchus ii - - -δακρύει Φείδων ὁ φιλάργυρος, οὐχ ὅτι θνῄσκει, -ἀλλʼ ὅτι πέντε μνῶν τὴν σορὸν ἐπρίατο. -τοῦτʼ αὐτῷ χαρίσασθε, καί, ὡς τόπος ἐστὶν ἐν αὐτῇ, -τῶν πολλῶν τεκνίων ἕν τι προσεμβάλετε. -
-
- - -lucillius - - -θνῄσκων Ἑρμοκράτης ὁ φιλάργυρος ἐν διαθήκαις -αὑτὸν τῶν ἰδίων ἔγραφε κληρονόμον. -ψηφίζων δʼ ἀνέκειτο πόσον δώσει διεγερθεὶς -ἰητροῖς μισθοῦ, καὶ τί νοσῶν δαπανᾷ· -ὡς δʼ εὗρε πλείω δραχμὴν μίαν, ἢν διασωθῇ, - -λυσιτελεῖ θνῄσκειν, εἶπε, καὶ ἐξετάθη. -κεῖται δʼ οὐδὲν ἔχων ὀβολοῦ πλέον οἱ δὲ τὰ κείνου -χρήματα κληρονόμοι ἥρπασαν ἀσπασίως. -
-
- - -lucillius - - -γεννηθὲν τέκνον κατεπόντισεν Αὖλος ὁ κνιπός, -ψηφίζων αὐτοῦ σῳζομένου δαπάνας. -
-
- - -philippus - - -εἰ τὸ μὲν ἐκδεδάνεικας, ὃ δʼ ἄρτι δίδως, ὃ δὲ μέλλεις, -οὐδέποτʼ εἶ τοῦ σοῦ κύριος ἀργυρίου. -
-
- - -lucillius - - - -τὰν ἀναδυομέναν ἀπὸ ματέρος ἄρτι θαλάσσας -Κύπριν ὅλην χρυσῆν ἐχθὲς ἔκλεψε Δίων - -καὶ χερὶ προσκατέσυρεν ὁλοσφύρητον Ἄδωνιν, -καὶ τὸ παρεστηκὸς μικρὸν Ἐρωτάριον. -αὐτοὶ νῦν ἐρέουσιν ὅσοι ποτὲ φῶρες ἄριστοι· - -οὐκέτι σοὶ χειρῶν εἰς ἔριν ἐρχόμεθα - -
-
- - -lucillius - - -τὸν θεὸν αὐτὸν ἔκλεψεν, ὃν ὁρκίζεσθαι ἔμελλεν -Εὐτυχίδης, εἰπών οὐ δύναμαὶ σ’ ὀμόσαι. - -
-
- - -lucillius - - -τὸν πτανὸν Ἑρμᾶν, τὸν θεῶν ὑπηρέταν, -τὸν Ἀρκάδων ἄνακτα, τὸν βοηλάταν, -ἑστῶτα τῶνδε γυμνασίων ἐπίσκοπον, -ὁ νυκτικλέπτας Αὖλος εἶπε βαστάσας· - -πολλοὶ μαθηταὶ κρείσσονες διδασκάλων. - -
-
- - -lucillius - - -τὸν τῶν κλεπτόντων μανύτορα Φοῖβον ἔκλεψεν -Εὐτυχίδης, εἰπών, “μὴ πάνυ πολλὰ λάλει, -σύγκρινον δὲ τέχνην τέχνῃ, καὶ χείρεσι χρησμούς, -καὶ μάντιν κλέπτῃ, καὶ θεὸν Εὐτυχίδῃ· -τῶν δʼ ἀχαλινώτων στομάτων χάριν αὐτίκα πραθείς, -τοῖς ὠνησαμένοις πᾶν ὃ θέλεις με λέγε.” -
-
- - -lucillius - - -βουκόλε, τὰν ἀγέλαν πόρρω νέμε, μή σε Περικλῆς -ὁ κλέπτης αὐταῖς βουσὶ συνεξελάσῃ. - -
-
- - -lucillius - - -εἰ πόδας εἶχε Δίων οἵας χέρας, οὐκέτʼ ἂν Ἑρμῆς -πτηνὸς ἐν ἀνθρώποις, ἀλλὰ Δίων ἐκρίθη. -
-
- - -ammianus - - -εἰδοὺς οὐ κρίνει Πολέμων, νώναις κατακρίνει· -κἂν δῷς, κἂν μὴ δῷς, ἔστιν ἀεὶ Πολέμων. -
-
- - -ammianus - - -ἠδειμεν, Πολέμων, Ἀντώνιον ὄντα σε πάντες· -ἐξαπίνης τρία σοι γράμματα πῶς ἔλιπεν; -
-
- - -dionysius sophista - - -ΧΟΙΡΙ μέν, οὐκ ΙΔΙΟΝ δέ με θύετε· καί με καλεῖτε -χοιρίδιον, φανερῶς εἰδότες οὐκ ἴδιον. -
-
- - -lucillius - - -τὴν γένεσιν λυποῦντα μαθὼν Κρόνον Ἡλιόδωρος, -νύκτωρ ἐκ ναοῦ χρύσεον ἦρε Κρόνον, - -τίς πρῶτος κακοποιὸς ἐλήλυθε πείρασον, εἰπών, -“ δέσποτα, καὶ γνώσῃ τίς τίνος ἐστὶ Κρόνος· -ὃς δʼ ἄλλῳ κακὰ τεύχει, ἑῷ κακὸν ἥπατι τεύχει· -εὑρών μοι τιμήν, πᾶν ἀνάτελλʼ ὃ θέλεις.” - -
-
- - -lucillius - - -ἐκ τῶν Ἑσπερίδων τῶν τοῦ Διὸς ἦρε Μενίσκος, -ὡς τὸ πρὶν Ἡρακλέης, χρύσεα μῆλα τρία. -καὶ τί γάρ; ὡς ἑάλω, γέγονεν μέγα πᾶσι θέαμα, -ὡς τὸ πρὶν Ἡρακλέης ζῶν κατακαιόμενος. -
-
- - -lucillius - - - -Ἑλλήνων ἀπέλυε πόλιν ποτέ, δέσποτα Καῖσαρ, -εἰσελθὼν ᾆσαι Ναύπλιον Ἡγέλοχος. -Ναύπλιος Ἑλλήνεσσιν ἀεὶ κακόν· ἢ μέγα κῦμα -νηυσὶν ἐπεμβάλλων,˘ ἢ κιθαρῳδὸν ἔχων. -
-
- - -nicarchus ii - - -νυκτικόραξ ᾄδει θανατηφόρον ἀλλʼ ὅταν ᾅσῃ -Δημόφιλος, θνήσκει καὐτὸς ὁ νυκτικόραξ. -
-
- - -Julius leonidas - - -Σιμύλος ὁ ψάλτης τοὺς γείτονας ἔκτανε πάντας -νυκτὸς ὅλης ψάλλων, πλὴν ἑνὸς Ὠριγένους· -κωφὸν γὰρ φύσις αὐτὸν ἐθήκατο· τοὔνεκεν αὐτῷ -ζωὴν ἀντʼ ἀκοῆς δῶκε περισσοτέρην. -
-
- - -ammianus - - -Νικήτης ᾄδων τῶν ᾠδῶν ἐστιν Ἀπόλλων -ἂν δʼ ἰατρεύῃ, τῶν θεραπευομένων. - -
-
- - -lucillius - - -πέντʼ ὀβολῶν πέπρακεν Ἀπολλοφάνης ὁ τραγῳδὸς -πέντε θεῶν σκευήν, Ἡρακλέους ῥόπαλον, -Τισιφόνης τὰ φόβητρα, Ποσειδῶνος τριόδοντα, -ὅπλον Ἀθηναίης, Ἀρτέμιδος φαρέτρην. - -οἱ δὲ θεοὶ πὰρ Ζηνὶ καθήμενοι ἐξεδύθησαν -εἰς βραχὺ σιταρίου κέρμα καὶ οἰναρίου. -
-
- - -lucillius - - - -τὸν δασὺν Ἑρμογένην ζητεῖ πόθεν ἄρξεθʼ ὁ κουρεὺς -κείρειν τὴν κεφαλήν, ὄνθʼ ὅλον ὡς κεφαλήν. -
-
- - -lucillius - - - -Ἆρες Ἄρες βροτολοιγέ, μιαιφόνε, παύεο, κουρεῦ, -τέμνων οὐ γὰρ ἔχεις οὐκέτι ποῦ με τεμεῖς· -ἀλλʼ ἤδη μεταβὰς ἐπὶ τοὺς μύας ἢ τὰ κάτωθεν -τῶν γονάτων, οὕτω τέμνε με, καὶ παρέχω. -νῦν μὲν γὰρ μυιῶν ὁ τόπος γέμει· ἢν δʼ ἐπιμείνῃς, -ὄψει καὶ γυπῶν ἔθνεα καὶ κοράκων. -
-
- - -lucillius - - - -μακροτέρῳ σταυρῷ σταυρούμενον ἄλλον ἑαυτοῦ -ὁ φθονερὸς Διοφῶν ἐγγὺς ἰδὼν ἐτάκη. -
-
- - -anonymi epigrammatici - - -ὁ φθόνος ὡς κακόν ἐστιν· ἔχει δέ τι καλὸν ἐν αὑτῷ· -τήκει γὰρ φθονερῶν ὄμματα καὶ κραδίην. - -
-
- - -lucillius - - -Πανὶ φιλοσπήλυγγι καὶ οὐρεοφοιτάσι Νύμφαις, -καὶ Σατύροις, ἱεραῖς τʼ ἔνδον Ἁμαδρυάσιν, -σὺν κυσὶ καὶ λόγχαις συοφόντισι Μάρκος -μηδὲν ἑλὼν, αὐτοὺς τοὺς κύνας ἐκρέμασεν. -
-
- - -dioscorides - - -Γάλλον Ἀρισταγόρης ὠρχήσατο· τοὺς δὲ φιλόπλους -Τημενίδας ὁ καμὼν πολλὰ διῆλθον ἐγώ. -χὠ μὲν τιμηθεὶς ἀπεπέμπετο· τὴν δὲ τάλαιναν -Ὑρνηθὼ κροτάλων εἷς ψόφος ἐξέβαλεν. -εἰς πῦρ ἡρώων ἴτε πρήξιες· ἐν γὰρ ἀμούσοις -καὶ κόρυδος κύκνου φθέγξετʼ ἀοιδότερον. -
-
- - -lucillius - - - -ῥύγχος ἔχουσα Βιτὼ τριπιθήκινον, οἷον ἰδοῦσαν -τὴν Ἑκάτην αὑτὴν οἴομʼ ἀπαγχονίσαι, - -εἰμί, λέγει, σώφρων, Λουκίλλιε, καὶ μονοκοιτῶ. - -αἰδεῖται, γάρ ἴσως, παρθένος εἰμί, λέγειν. -εἰ δὲ γέ τις μισεῖ με, κακὸν τοιοῦτο γαμήσας, -τῆς αὐτῆς σχοίη τέκνα σαοφροσύνης. -
-
- - -lucillius - - -ἤθελε ΔΡΙΜΥΣ ἄγαν τὸ πρόσθʼ Ἱερώνυμος εἶναι· -νῦν δὲ τὸ ΔΡΙ μὲν ἔχει, ΛΟΣ δὲ τὸ ΜΥΣ γέγονεν. - -
-
- - -theodorus - - -Ἑρμοκράτης τᾶς ῥινός· ἐπεί, τὰν ῥῖνα λέγοντες -Ἑρμοκράτους, μικροῖς μακρὰ χαριζόμεθα. -
-
- - -Julius leonidas - - -ἰχθῦν ὁ γρυπὸς Σωσίπτολις οὐκ ἀγοράζει, -προῖκα δʼ ἔχει πολλὴν ἐξ ἁλὸς εὐβοσίην, -οὐ λίνον, οὐ κάλαμον προσάγων, τῇ ῥινὶ δὲ προσθεὶς -ἄγκιστρον, σύρει πάντα τὰ νηχόμενα. -
-
- - -Julius leonidas - - -Ζηνογένους οἶκος κατεκαίετο, πολλὰ δʼ ἐμόχθει -ἐκ θυρίδος ζητῶν αὑτὸν ὑπεκχαλάσαι· -ἰκρία συμπήξας οὐκ ἔφθανεν ὀψὲ δʼ ἐπιγνούς, -τὴν ῥῖνʼ Ἀντιμάχου κλίμακα θεὶς ἔφυγεν. -
-
- - -ammonides - - -Ἀντιπάτραν γυμνὴν εἴ τις Πάρθοισιν ἔδειξεν, -ἔκτοθεν ἂν στηλῶν Ἡρακλέους ἔφυγον. -
-
- - -anonymi epigrammatici - - -τὴν γραῦν ἐκκομίσας, φρονίμως πάνυ Μόσχος ἔγημε -παρθένον· ἡ φερνὴ δʼ ἔνδον ἔμεινεν ὅλη. -ἄξιον αἰνῆσαι Μόσχου φρένας, ὃς μόνος οἶδε -καὶ τίνα δεῖ κινεῖν καὶ τίνα κληρονομεῖν. - -
-
- - -anonymi epigrammatici - - -ἡ ῥὶς Κάστορός ἐστιν, ὅταν σκάπτῃ τι, δίκελλα· -σάλπιγξ δʼ, ἂν ῥέγχῃ· τῇ δὲ τρύγῃ, δρέπανον· -ἐν πλοίοις ἄγκυρα· κατασπείροντι δʼ ἄροτρον -ἄγκιστρον ναύταις ὀψοφάγοις κρεάγρα· -ναυπηγοῖς σχένδυλα· γεωργοῖς δὲ πρασόκουρον -τέκτοσιν ἀξίνη· τοῖς δὲ πυλῶσι κόραξ. -οὕτως εὐχρήστου σκεύους Κάστωρ τετύχηκε, -ῥῖνα φέρων πάσης ἄρμενον ἐργασίης. -
-
- - -palladas - - -ῥήτορα Μαῦρον ἰδὼν ἐτεθήπεα, ῥυγχελέφαντα, -χείλεσι λιτραίοις φθόγγον ἱέντα φόνον. -
-
- - -lucillius - - - -οὐδὲν ἀφῆκεν ὅλως, Διονύσιε, λείψανον Αὔλῳ -Εὐτυχίδης δειπνῶν, ἦρε πάντʼ ὀπίσω· -καὶ νῦν Εὐτυχίδης μὲν ἔχει μέγα δεῖπνον ἐν οἴκῳ, -μὴ κληθεὶς δʼ Αὖλος ξηροφαγεῖ καθίσας. -
-
- - -lucillius - - -οὕτω σοι πέψαι, Διονύσιε, ταῦτα γένοιτο -πάντα· νόμου δὲ χάριν, δός τι καὶ ὧδε φαγεῖν -κἀγὼ κέκλημαι, κἀμοὶ παρέθηκέ τι τούτων -γεύσασθαι Πόπλιος, κἀμὸν ἔπεστι μέρος· - -εἰ μὴ λεπτὸν ἰδών με δοκεῖς κατακεῖσθαι ἄρωστον, -εἶθʼ οὕτως τηρεῖς, μή σε λαθών τι φάγω. -
-
- - -lucillius - - -καὶ τρώγεις ὅσα πέντε λύκοι, Γάμε, καὶ τὰ περισσά, -οὐ τὰ σά, τῶν δὲ πέριξ, πάντα δίδως ὀπίσω. -πλὴν μετὰ τοῦ κοφίνου τοῦ πρὸς πόδας αὔριον ἔρχου, -πρίσματα καὶ σπόγγον καὶ σάρον εὐθὺς ἔχων. -
-
- - -lucillius - - -ἦν βραδὺς Εὐτυχίδας σταδιοδρόμος· ἀλλʼ ἐπὶ δεῖπνον -ἔτρεχεν, ὥστε λέγειν Εὐτυχίδας πέταται. - -
-
- - -ammianus - - -κἂν μέχρις Ἡρακλέους στηλῶν ἔλθῃς παρορίζων, -γῆς μέρος ἀνθρώποις πᾶσιν ἴσον σε μένει, -κείσῃ δʼ Ἴρῳ ὅμοιος, ἔχων ὀβολοῦ πλέον οὐδὲν, -εἰς τὴν οὐκέτι σὴν γῆν ἀναλυόμενος. -
-
- - -lucillius - - - -ἄνθρακα καὶ δάφνην παραβύεται ὁ στρατιώτης -Αὖλος, ἀποσφίγξας μήλινα λωμάτια. - -φρίσσει καὶ τὸ μάτην ἴδιον ξίφος. ἢν δὲ ποτʼ εἴπῃς, - -ἔρχοντʼ, ἐξαπίνης ὕπτιος ἐκτέταται. -οὐδενὶ δʼ οὐ Πολέμωνι προσέρχεται, οὐ Στρατοκλείδῃ· -ἀλλὰ φίλῳ χρῆται πάντοτε Λυσιμάχῳ. -
-
- - -lucillius - - -Γραπτὴν ἐν τοίχῳ Καλπούρνιος ὁ στρατιώτης, -ὡς ἔθος ἐστίν, ἰδὼν τὴν ἐπὶ ναυσὶ μάχην, -ἄσφυκτος καὶ χλωρὸς ὁ θούριος ἐξετανύσθη, - -ζωγρεῖτε, κράξας, Τρῶες ἀρηΐφιλοι. - -καὶ μὴ τέτρωται κατεμάνθανε, καὶ μόλις ἔγνω -ζῆν, ὅτε τοῖς τοίχοις ὡμολόγησε λύτρα. -
-
- - -lucillius - - - - -τεκνίον εὔμορφον, Διόδωρε, γράφειν σ’ ἐκέλευσα· - -ἀλλὰ σύ μοι προφέρεις τεκνίον ἀλλότριον, -τὴν προτομὴν αὐτῷ περιθεὶς κυνός· ὥστε με κλάειν -πῶς μοι Ζωπυρίων ἐξ Ἑκάβης γέγονεν. -καὶ πέρας ἓξ δραχμῶν Ἐρασίστρατος ὁ κρεοπώλης -ἐκ τῶν Ἰσείων υἱὸν Ἄνουβιν ἔχω. -
-
- - -Julius leonidas - - -εἰκόνα Μηνοδότου γράψας Διόδωρος ἔθηκεν -πλὴν τοῦ Μηνοδότου πᾶσιν ὁμοιοτάτην. - -
-
- - -lucillius - - -γράψας Δευκαλίωνα, Μενέστρατε, καὶ Φαέθοντα, -ζητεῖς τίς τούτων ἄξιός ἐστι τίνος. -τοῖς ἰδίοις αὐτοὺς τιμήσομεν ἄξιος ὄντως -ἐστὶ πυρὸς Φαέθων, Δευκαλίων δʼ ὕδατος. -
-
- - -lucillius - - -εἴκοσι γεννήσας ὁ ζωγράφος Εὔτυχος υἱούς, -οὐδʼ ἀπὸ τῶν τέκνων οὐδὲν ὅμοιον ἔχει. -
-
- - -lucillius - - - -τὸν φιλόπαιδα Κράτιππον ἀκούσατε· θαῦμα γὰρ ὑμῖν -καινὸν ἀπαγγέλλω· πλὴν μεγάλαι Νεμέσεις. -τὸν φιλόπαιδα Κράτιππον ἀνεύρομεν ἄλλο γένος τι -τῶν ἑτεροζήλων. ἤλπισα τοῦτʼ ἂν ἐγώ; -ἤλπισα τοῦτο, Κράτιππε· μανήσομαι εἰ, λύκος εἶναι -πᾶσι λέγων, ἐφάνης ἐξαπίνης ἔριφος; -
-
- - -lucillius - - -φεύγων τὴν ὑπόνοιαν Ἀπολλοφάνης ἐγάμησεν, -καὶ διὰ τῆς ἀγορᾶς νυμφίος ἦλθε μέσης, - -αὔριον εὐθύ, λέγων, ἕξω τέκνον. εἶτα προῆλθεν -αὔριον, ἀντὶ τέκνου τὴν ὑπόνοιαν ἔχων. - -
-
- - -crates - - -Χοίριλος Ἀντιμάχου πολὺ λείπεται· ἀλλʼ ἐπὶ πᾶσιν -Χοίριλον Εὐφορίων εἶχε διὰ στόματος, -καὶ κατάγλωσσ’ ἐπόει τὰ ποιήματα, καὶ τὰ Φιλητᾶ -ἀτρεκέως ᾔδει· καὶ γὰρ Ὁμηρικὸς ἦν. -
-
- - -antipater - - -οὐ προσέχω, καίτοι πιστοί τινες· ἀλλὰ μεταξύ, -πρὸς Διός, εἴ με φιλεῖς, Πάμφιλε, μή με φίλει. -
-
- - -anonymi epigrammatici - - -Ἀλφειοῦ στόμα φεῦγε· φιλεῖ κόλπους Ἀρεθούσης, -πρηνὴς ἐμπίπτων ἁλμυρὸν ἐς πέλαγος. -
-
- - -ammianus - - -οὐχ ὅτι τὸν κάλαμον λείχεις, διὰ τοῦτό σε μισῶ, -ἀλλʼ ὅτι τοῦτο ποιεῖς καὶ δίχα τοῦ καλάμου. -
-
- - -anonymi epigrammatici - - -Χείλων καὶ ΛΕΙΧΩΝ ἴσα γράμματα. ἐς τί δὲ τοῦτο; -λείχει γὰρ ΧΕΙΛΩΝ, κἂν ἴσα, κἂν ἄνισα. - -
-
- - -meleager - - -εἰ βινεῖ Φαβορῖνος ἀπιστεῖς· μηκέτʼ ἀπίστει· -αὐτός μοι βινεῖν εἶπʼ ἰδίῳ στόματι. -
-
- - -antipater - - -ἑστηκὸς τὸ Κίμωνος ἰδὼν πέος, εἶφʼ ὁ Πρίηπος· - -οἴμοι, ὑπὸ θνητοῦ λείπομαι ἀθάνατος. - -
-
- - -straton - - -ἡ κλίνη πάσχοντας ἔχει δύο, καὶ δύο δρῶντας, -οὓς σὺ δοκεῖς πάντας τέσσαρας· εἰσὶ δὲ τρεῖς. -ἢν δὲ πύθῃ. πῶς τοῦτο; τὸν ἐν μέσσῳ δὶς ἀρίθμει, -κοινὰ πρὸς ἀμφοτέρους ἔργα σαλευόμενον. -
-
- - -ammianus - - -εἴη σοι κατὰ γῆς κούφη κόνις, οἰκτρὲ Νέαρχε, -ὄφρα σε ῥηιδίως ἐξερύσωσι κύνες. -
-
- - -ammianus - - -θᾶττον ποιήσει μέλι κάνθαρος ἢ γάλα κώνωψ, -ἢ σύ τι ποιήσεις, σκορπίος ὤν, ἀγαθόν. -οὔτε γὰρ αὐτὸς ἑκοντὶ ποιεῖς, οὔτʼ ἄλλον ἀφίης, -ὡς ἀστὴρ Κρονικὸς πᾶσιν ἀπεχθόμενος. -
-
- - -ammianus - - -μητέρα τις, πατέρʼ ἄλλος ἀπέκτανεν, ἄλλος ἀδελφόν· -Πωλιανὸς τοὺς τρεῖς, πρῶτος ἀπʼ Οἰδίποδος. - -
-
- - -ammianus - - -ὀψὲ ποθʼ ἡ ποδάγρα τὸν ἑαυτῆς ἄξιον εὗρεν, -ὃν ποδαγρᾶν πρὸ ἐτῶν ἄξιον ἦν ἑκατόν. -
-
- - -ammianus - - -Μασταύρων ἀφελὼν δύο γράμματα, Μάρκε, τὰ πρῶτα, -ἄξιος εἶ πολλῶν τῶν ὑπολειπομένων. -
-
- - -ammianus - - -θηρίον εἶ παρὰ γράμμα, καὶ ἄνθρωπος διὰ γράμμα· -ἄξιος εἶ πολλῶν, ὧν παρὰ γράμμα γράφῃ. -
-
- - -calleas - - -αἰεὶ χρυσίον ἦσθα, Πολύκριτε· νῦν δὲ πεπωκὼς, -ἐξαπίνης ἐγένου λυσσομανές τι κακὸν -αἰεί μοι δοκέεις κακὸς ἔμμεναι. οἶνος ἐλέγχει -τὸν τρόπον· οὐκ ἐγένου νῦν κακός, ἀλλʼ ἐφάνης. -
-
- - -lucillius - - -Φαῖδρος πραγματικὸς καὶ ζωγράφος ἤρισε Ῥοῦφος -τίς θᾶσσον γράψει καὶ τίς ὁμοιότερον. -ἀλλʼ ἐν ὅσῳ Ῥοῦφος τρίβειν τὰ χρώματʼ ἔμελλεν, -Φαῖδρος ἔγραψε λαβὼν εἰκονικὴν ἀποχήν. - -
-
- - -lucillius - - -τοὺς πόδας εἰ Κρατερὸς καὶ τὰς χέρας εἶχʼ ὁλοκλήρους, -οὐκ αὖ τὴν κεφαλὴν εἶχε, τοιαῦτα γράφων. -
-
- - -demodocus - - -καὶ τόδε Δημοδόκου· Χῖοι κακοί· οὐχ ὁ μέν, ὃς δʼ οὔ· -πάντες, πλὴν Προκλέους· καὶ Προκλέης δὲ Χίος. -
-
- - -demodocus - - -πάντες μὲν Κίλικες κακοὶ ἀνέρες· ἐν δὲ Κίλιξιν -εἷς ἀγαθὸς Κινύρης, καὶ Κινύρης δὲ Κίλιξ. -
-
- - -demodocus - - -Καππαδόκην ποτʼ ἔχιδνα κακὴ δάκεν ἀλλὰ καὶ αὐτὴ -κάτθανε, γευσαμένη αἵματος ἰοβόλου, -
-
- - -demodocus - - -Καππαδόκαι φαῦλοι μὲν ἀεί, ζώνης δὲ τυχόντες -φαυλότεροι, κέρδους δʼ εἵνεκα φαυλότατοι. -ἢν δʼ ἄρα δὶς καὶ τρὶς μεγάλης δράξωνται ἀπήνης, -δὴ ῥα τότʼ εἰς ὥρας φαυλεπιφαυλότατοι. -μή, λίτομαι, βασιλεῦ, μὴ τετράκις, ὄφρα μὴ αὐτὸς -κόσμος ὀλισθήσῃ καππαδοκιζόμενος. - -
-
- - -lucillius - - -οὔτε Χίμαιρα τοιοῦτον ἔπνει κακὸν ἡ καθʼ Ὅμηρον -οὐκ ἀγέλη ταύρων, ὡς ὁ λόγος, πυρίπνους, -οὐ Λῆμνος σύμπασα, καὶ Ἁρπυιῶν τὰ περισσά, -οὐδʼ ὁ Φιλοκτήτου ποὺς ἀποσηπόμενος· -ὥστε σε παμψηφεὶ νικᾶν, Τελέσιλλα, Χιμαίρας, -σηπεδόνας, ταύρους, ὄρνεα, Λημνιάδας. -
-
- - -lucillius - - -οὐ μόνον αὐτὴ πνεῖ Δημοστρατίς, ἀλλὰ δὴ αὐτῆς -τοὺς ὀσμησαμένους πνεῖν πεποίηκε τράγου. -
-
- - -nicarchus ii - - -τὸ στόμα χὠ πρωκτὸς ταὐτόν, Θεόδωρε, σοῦ ὄζει, -ὥστε διαγνῶναι τοῖς φυσικοῖς καλὸν ἦν. -ἦ γράψαι σε ἔδει ποῖον στόμα, ποῖον ὁ πρωκτός. -νῦν δὲ λαλοῦντός σου βδεῖν σ’ ἐνόμιζον ἐγώ. -
-
- - -nicarchus ii - - -οὐ δύναμαι γνῶναι, πότερον χαίνει Διόδωρος, -ἢ βδῆσ’· ἓν γὰρ ἔχει πνεῦμα κάτω καὶ ἄνω. -
-
- - -nicarchus ii - - -λούσασθαι πεπόρευται Ὀνήσιμος εἰς βαλανεῖον -δωδεκάτῃ δύστρου μηνός, ἐπʼ Ἀντιφίλου, -παῖδα λιπὼν οἴκοις ἐπιτίτθιον, ὃν δύο τέκνων -ἄλλων εὑρήσει λουσάμενος πατέρα. -ἥξειν δʼ εἰς ὥρας ἡμῖν γράφει· οἱ βαλανεῖς γὰρ -εἰς τότε τάσσονται τὴν πυρίαν καθελεῖν. - -
-
- - -anonymi epigrammatici - - -ἠγόρασας χαλκοῦν μιλιάριον, Ἡλιόδωρε, -τοῦ περὶ τὴν Θρᾴκην ψυχρότερον Βορέου. -μὴ φύσα, μὴ κάμνε· μάτην τὸν καπνὸν ἐγείρεις· -εἰς τὸ θέρος χαλκῆν βαύκαλιν ἠγόρασας. -
-
- - -lucillius - - -οἱ τοῖχοι, Διόφαντε, τὰ κύματα πάντα δέχονται, -καὶ διὰ τῶν θυρίδων Ὠκεανὸς φέρεται· -δελφίνων δʼ ἀγέλαι καὶ Νηρέος ἀγλαὰ τέκνα -ἐν τῷ πλοίῳ σου νηχόμενα βλέπεται. -ἂν δʼ ἀναμείνωμεν, πλεύσει τάχα καί τις ἐν ἡμῖν -οὐ γὰρ ἔνεστιν ὕδωρ οὐκέτι τῷ πελάγει. -
-
- - -lucillius - - -ἐκ ποίων ἔταμες, Διονύσιε, τὰ ξύλα ταῦτα -λατομιῶν; ποίων τὸ σκάφος ἐστὶ μύλων; -εἰ γὰρ ἐγώ τι νοῶ, μολίβου γένος, οὐ δρυός ἐστιν, -οὐδʼ ἐλάτης, μικροῦ ῥιζοβολεῖ τὰ κάτω -καὶ τυχὸν ἐξαπίνης ἔσομαι λίθος· εἶτα, τὸ χεῖρον, -γράψει μʼ ὡς Νιόβην δρᾶμα σαπρὸν Μελίτων. -
-
- - -lucillius - - -ἦ ˘ πέλαγος πλέομεν, Διονύσιε, καὶ γεγέμισται -τὸ πλοῖον παντὸς πανταχόθεν πελάγους. - -ἀντλεῖται δʼ Ἀδρίας, Τυρρηνικός, Ἰσσικός, Αἴγων -οὐ πλοῖον, πηγὴ δʼ Ὠκεανοῦ ξυλίνη. -ὁπλίζου, Καῖσαρ· Διονύσιος ἄρχεται ἤδη -οὐκέτι ναυκληρεῖν, ἀλλὰ θαλασσοκρατεῖν, -
-
- - -bianor - - -τὸ σκάφος οὐ βυθὸς εἷλε ʽ πόθεν βυθός; οὐ γὰρ ἔπλωσενʼ, -οὐδὲ Νότος, πρὸ Νότου δʼ ὤλετο καὶ πελάγευς. -ἤδη γάρ μιν ἅπασαν ἐπὶ ζυγὰ γομφωθεῖσαν -ἤλειφον πεύκης τῇ λιπαρῇ νοτίδι· -πίσσα δʼ ὑπερβρασθεῖσα πυρὸς φλογὶ τὴν ἁλὶ πιστὴν -τευχομένην γαίῃ δεῖξεν ἀπιστοτέρην. -
-
- - -lucillius - - -ἀγρὸν Μηνοφάνης ὠνήσατο, καὶ διὰ λιμὸν -ἐκ δρυὸς ἀλλοτρίας αὑτὸν ἀπηγχόνισεν. -γῆν δʼ αὐτῷ τεθνεῶτι βαλεῖν οὐκ ἔσχον ἄνωθεν, -ἀλλʼ ἐτάφη μισθοῦ πρός τινα τῶν ὁμόρων. -εἰ δʼ ἔγνω τὸν ἀγρὸν τὸν Μηνοφάνους Ἐπίκουρος, -πάντα γέμειν ἀγρῶν εἶπεν ἄν, οὐκ ἀτόμων. -
-
- - -anonymi epigrammatici - - -τὸν παχὺν εὖ ἔγραψʼ ὁ ζωγράφος· ἀλλʼ ἀπόλοιτο, -εἰ δύο μισητοὺς ἀνθʼ ἑνὸς ὀψόμεθα. -
-
- - -nicarchus ii - - -Δυσκώφῳ δύσκωφος ἐκρίνετο· καὶ πολὺ μᾶλλον -ἦν ὁ κριτὴς τούτων τῶν δύο κωφότερος. - -ὧν ὁ μὲν ἀντέλεγεν τὸ ἐνοίκιον αὐτὸν ὀφείλειν -μηνῶν πένθʼ ὁ δʼ ἔφη νυκτὸς ἀληλεκέναι. -ἐμβλέψας δʼ αὐτοῖς ὁ κριτὴς λέγει, “ἐς τί μάχεσθε; -μήτηρ ἔσθʼ ὑμῶν ἀμφότεροι τρέφετε.” -
-
- - -nicarchus ii - - -εἴ με φιλεῖς, μισεῖς με· καὶ εἰ μισεῖς, σύ φιλεῖς με· -εἰ δέ με μὴ μισεῖς, φίλτατε, μή με φίλει. -
-
- - -lucillius - - -ἐκ ποίων ὁ πατήρ σε δρυῶν τέτμηκεν, Ἀρίστων, -ἢ ποίων σε μύλου κόψατο λατομιῶν; -ἦ γὰρ ἀπὸ δρυὸς ἐσσὶ παλαιφάτου ἢ ἀπὸ πέτρης -ὀρχηστής, Νιόβης ἔμπνοον ἀρχέτυπον -ὥστε με θαυμάζοντα λέγειν, ὅτι “ καὶ σύ τι Λητοῖ -ἤρισας· οὐ γὰρ ἂν ἦς αὐτομάτως λίθινος.” -
-
- - -lucillius - - -πάντα καθʼ ἱστορίην ὀρχούμενος, ἓν τὸ μέγιστον -τῶν ἔργων παριδὼν ἠνίασας μεγάλως. -τὴν μὲν γὰρ Νιόβην ὀρχούμενος, ὡς λίθος ἔστης, -καὶ πάλιν ὢν Καπανεύς, ἐξαπίνης ἔπεσες· -ἀλλʼ ἐπὶ τῆς Κανάκης ἀφυῶς, ὅτι καὶ ξίφος ἦν σοι -καὶ ζῶν ἐξῆλθες· τοῦτο παρʼ ἱστορίην, - -
-
- - -palladas - - -δάφνην καὶ Νιόβην ὠρχήσατο Μέμφις ὁ Σῖμος, -ὡς ξύλινος Δάφνην, ὡς λίθινος Νιόβην. -
-
- - -lucillius - - -λούεσθαί σε λέγουσι πολὺν χρόνον, Ἡλιοδώρα, -γραῖαν ἐτῶν ἑκατὸν μὴ καταλυομένην. -πλὴν ἔγνωκα τίνος ποιεῖς χάριν· ὡς ὁ παλαιὸς -ἐλπίζεις Πελίας ἑψομένη νεάσαι. -
-
- - -lucillius - - -Ἑρμογένη τὸν ἰατρὸν ἰδὼν Διόφαντος ἐν ὕπνοις -οὐκέτʼ ἀνηγέρθη, καὶ περίαμμα φέρων. -
-
- - -lucillius - - -τῷ Πίσης μεδέοντι τὸ κρανίον Αὖλος ὁ πύκτης, -ἓν καθʼ ἓν ἀθροίσας ὀστέον, ἀντίθεται. -σωθεὶς δʼ ἐκ Νεμέας, Ζεῦ δέσποτα, σοὶ τάχα θήσει -καὶ τοὺς ἀστραγάλους τοὺς ἔτι λειπομένους. -
-
- - -lucillius - - -Θεσσαλὸν ἵππον ἔχεις, Ἐρασίστρατε, ἀλλὰ σαλεῦσαι -οὐ δύνατʼ αὐτὸν ὅλης φάρμακα Θεσσαλίης, -ὄντως δούριον ἵππον, ὃν εἰ Φρύγες εἷλκον ἅπαντες -σὺν Δαναοῖς, Σκαιὰς οὐκ ἂν ἐσῆλθε πύλας· -ὃν στήσας ἀνάθημα θεοῦ τινος, εἰ προσέχεις μοι, -τὰς κριθὰς ποίει τοῖς τεκνίοις πτισάνην. - -
-
- - -anonymi epigrammatici - - -τοῦτο τὸ οὐλεύειν εἶχες πάλαι, ἀλλὰ τὸ βῆτα -οὐκ ἐπιγινώσκω· δέλτα γὰρ ἐγράφετο. -
-
- - -anonymi epigrammatici - - -υἱὸς Πατρικίου μάλα κόσμιος, ὃς διὰ Κύπριν -οὐχ ὁσίην ἑτάρους πάντας ἀποστρέφεται. -
-
- - -anonymi epigrammatici - - -Αἰθερίην διὰ νύκτα νέοι κατάγουσι Σελήνην -ἠίθεοι Φαρίης ἄνδιχα τεμνομένην. -
-
- - -palladas - - -Παύλῳ κωμῳδῷ κατʼ ὄναρ στὰς εἶπε Μένανδρος· - -οὐδὲν ἐγὼ κατὰ σοῦ, καὶ σὺ κακῶς με λέγεις. - -
-
- - -lucillius - - -ποιήσας δαπάνην ἐν ὕπνοις ὁ φιλάργυρος Ἕρμων -ἐκ περιωδυνίας αὑτὸν ἀπηγχόνισεν. -
-
- - -lucillius - - -εἰ μὲν ἐπʼ ἀττελάβους ἄγεται στρατός, ἢ κυνομυίας, -ἢ μύας, ἢ ψυλλῶν ἱππικὸν ἢ βατράχων, -Γάιε, καὶ σὺ φοβοῦ μὴ καὶ σέ τις ἐγκαταλέξῃ, -ὡς ἂν τῆς τούτων ἄξιον ὄντα μάχης. -εἰ δʼ ἀρετῆς ἀνδρῶν ἄγεται στρατός, ἄλλο τι παῖζε· -Ῥωμαίοις δʼ οὐδεὶς πρὸς γεράνους πόλεμος. - -
-
- - -lucillius - - -ψευδὲς ἔσοπτρον ἔχει Δημοσθενίς· εἰ γὰρ ἀληθὲς -ἔβλεπεν, οὐκ ἂν ὅλως ἤθελεν αὐτὸ βλέπειν. -
-
- - -anonymi epigrammatici - - -κερκίδος οὐ χρῄζεις ὁ λογιστικός, οὐδὲ μέλει σοι· -καὶ γὰρ ἀβασκάντως ῥῖνα τρίπηχυν ἔχεις. -
-
- - -anonymi epigrammatici - - -οὐ δύναται τῇ χειρὶ Πρόκλος τὴν ῥῖνʼ ἀπομύσσειν -τῆς ῥινὸς γὰρ ἔχει τὴν χέρα μικροτέρην· -οὐδὲ λέγει Ζεῦ σῶσον ἐὰν πταρῇ·̓· οὐ γάρ ἀκούει -τῆς ῥινός· πολὺ γὰρ τῆς ἀκοῆς ἀπέχει. -
-
- - -anonymi epigrammatici - - -ὁ τοῦ Διὸς παῖς καλλίνικος Ἡρακλῆς -οὐκ εἰμὶ Λούκιος, ἀλλʼ ἀναγκάζουσί με. -
-
- - -anonymi epigrammatici - - - -εἰκόνα σοί, βασιλεῦ κοσμοφθόρε, τήνδε σιδήρου -ἄνθεσαν, ὡς χαλκοῦ πολλὸν ἀτιμοτέρην, -ἀντὶ φόνου, πενίης τʼ ὀλοῆς, λιμοῦ τε, καὶ ὀργῆς, -οἷς πάντα φθείρεις ἐκ φιλοχρημοσύνης. - -
-
- - -anonymi epigrammatici - - -ἐγγύθι τῆς Σκύλλης χαλεπὴν στήσαντο Χάρυβδιν, -ἄγριον ὠμηστὴν τοῦτον Ἀναστάσιον. -δείδιθι καὶ σύ, Σκύλλα, τεαῖς φρεσί, μὴ σὲ καὶ αὐτὴν -βρώξῃ, χαλκείην δαίμονα κερματίσας. -
-
- - -anonymi epigrammatici - - - -ἀνέρας ἠρνήσαντο, καὶ οὐκ ἐγένοντο γυναῖκες· -οὔτʼ ἄνδρες γεγάασιν, ἐπεὶ πάθον ἔργα γυναικῶν· -οὔτε γυναῖκες ἔασιν, ἐπεὶ φύσιν ἔλλαχον ἀνδρῶν. -ἀνέρες εἰσὶ γυναιξί, καὶ ἀνδράσιν εἰσὶ γυναῖκες. -
-
- - -anonymi epigrammatici - - -χωλὸν ἔχεις τὸν νοῦν, ὡς τὸν πόδα καὶ γὰρ ἀληθῶς -εἰκόνα τῶν ἐντὸς σὴ φύσις ἐκτὸς ἔχει. -
-
- - -pseudo-lucianus - - -εἰπέ μοι εἰρομένῳ, Κυλλήνιε, πῶς κατέβαινεν -Λολλιανοῦ ψυχὴ δῶμα τὸ Φερσεφόνης ; -θαῦμα μέν, εἰ σιγῶσα· τυχὸν δέ τι καὶ σὲ διδάσκειν -ἤθελε. φεῦ, κείνου καὶ νέκυν ἀντιάσαι. -
-
- - -apollonius rhodius - - -Καλλίμαχος τὸ κάθαρμα, τὸ παίγνιον, ὁ ξύλινος νοῦς· -αἴτιος ὁ γράψας Αἴτια Καλλίμαχος. - -
-
- - -lucillius - - -εἰς φυλακὴν βληθείς ποτε Μάρκος ὁ ἀργός, ἑκοντί, -ὀκνῶν ἐξελθεῖν, ὡμολόγησε φόνον. -
-
- - -lucillius - - -τῆς νυκτὸς τροχάσας ἐν ὕπνοις ποτὲ Μάρκος ὁ ἀργός, -οὐκέτʼ ἐκοιμήθη μὴ πάλι που τροχάσῃ. -
-
- - -lucillius - - - -ἔξω παιδεύεις Πάριδος κακὰ καὶ Μενελάου. -ἔνδον ἔχων πολλοὺς σῆς Ἑλένης Πάριδας. -
-
- - -lucillius - - -οὐδεὶς γραμματικῶν δύναταί ποτε ἄρτιος εἶναι, -ὀργήν, καὶ μῆνιν, καὶ χόλον εὐθὺς ἔχων. -
-
- - -palladas - - -βέλτερον Ἡγέμονος λῃστοκτόνου ἐς κρίσιν ἐλθεῖν, -ἢ τοῦ χειρουργοῦ Γενναδίου παλάμας. -ὃς μὲν γὰρ φονέας ὁσίως στυγέων κατατέμνει· -ὃς δὲ λαβὼν μισθοὺς εἰς Ἀίδην κατάγει. -
-
- - -palladas - - - -Μάγνος ὅτʼ εἰς Ἀίδην κατέβη, τρομέων Ἀϊδωνεὺς -εἶπεν ἀναστήσων ἤλυθε καὶ νέκυας. - - -
-
- - -anonymi epigrammatici - - -τοὺς καταλείψαντας γλυκερὸν φάος οὐκέτι θρηνῶ, -τοὺς δʼ ἐπὶ προσδοκίῃ ζῶντας ἀεὶ θανάτου. -
-
- - -palladas - - - -πολλοὶ πολλὰ λέγουσιν, ὅμως δʼ οὐ πάντα δύνανται -ῥήμασιν ἐξειπεῖν ῥεύματα σῶν παθέων· -ἓν δʼ ἐπὶ σοῦ παράδοξον ἐθαυμάσαμεν καὶ ἄπιστον, -δάκρυα πῶς κλέπτων εἶχες ἑτοιμότατα. -Χαλκίδος ἐκ γαίης ἀπεχάλκισε τὴν πόλιν ἡμῶν, -κλέπτων, καὶ κλέπτων δάκρυσι κερδαλέοις, -
-
- - -palladas - - -ἐκ γῆς Λωτοφάγων μέγας ὄρχαμος ἦλθε Λυκάων -Χαλκίδος ἐκ γαίης ἀντιοχευόμενος. -
-
- - -palladas - - -Θηλυφανὲς παράδοξον ἐθαυμάσαμεν πάθος ἄλλο· -ἔκλαιεν κλέπτων, κλεπτομένους ἐλεῶν, -ὃς κλέπτων ἥγνευε, καὶ ἁγνεύων ἀπεσύλα, -μηδὲν ἔχων καθαρόν, μηδὲ τὸ σῶμα ῥύπου. - -
-
- - -palladas - - -οὐδὲν γυναικὸς χεῖρον, οὐδὲ τῆς καλῆς· -δούλου δὲ χεῖρον οὐδέν, οὐδὲ τοῦ καλοῦ· -χρῄζεις ὅμως οὖν τῶν ἀναγκαίων κακῶν. -εὔνουν νομίζεις δοῦλον εἶναι δεσπότῃ; -καλὸς δʼ ἂν εἴη δοῦλος ὁ τὰ σκέλη κλάσας. -
-
- - -palladas - - -ὁ τὴν γυναῖκα τὴν ἄμορφον δυστυχῶν, -λύχνους ἀνάψας ἑσπέρας σκότος βλέπει. -
-
- - -palladas - - -κουρεὺς καὶ ῥαφιδεὺς κατεναντίον ἦλθον ἀγῶνος, -καὶ τάχα νικῶσιν τὸ ξυρὸν αἱ ῥαφίδες. -
-
- - -palladas - - -ὦ τῆς ταχίστης ἁρπαγῆς τῆς τοῦ βίου· -ἀνὴρ δανειστὴς, τῶν χρόνων γλύφων τόκους, -τέθνηκεν εὐθὺς ἐν ῥοπῆς καιρῷ βραχεῖ, -ἐν δακτύλοισι τοὺς τόκους σφίγγων ἔτι. -
-
- - -palladas - - -Δακτυλικὴν ψῆφόν τις ἔχων πέρι δάκτυλα χειρῶν -ψήφῳ τοῦ θανάτου προὔλαβεν εἰς ἀίδην. -ζῇ δʼ ἡ ψῆφος νῦν τοῦ ψηφίζοντος ἐρήμη, -ψυχῆς ἁρπαγίμης ἔνθεν ἐλαυνομένης. - -
-
- - -palladas - - -τί ὠφέλησας τὴν πόλιν στίχους γράφων, -χρυσὸν τοσοῦτον λαμβάνων βλασφημίας, -πωλῶν ἰάμβους, ὡς ἔλαιον ἔμπορος; -
-
- - -palladas - - - -εἴς τινα φιλόσοφον γενόμενον ὕπαρχον πόλεως ἐπὶ Βαλεντινιανοῦ καὶ Βάλεντος -ἄντυγος οὐρανίης ὑπερήμενος, ἐς πόθον ἦλθες -ἄντυγος ἀργυρέης· αἶσχος ἀπειρέσιον -ἦσθά ποτε κρείσσων· αὖθις δʼ ἐγένου πολὺ χείρων. -δεῦρʼ ἀνάβηθι κάτω· νῦν γὰρ ἄνω κατέβης. -
-
- - -palladas - - -ἵππον ὑποσχόμενός μοι Ὀλύμπιος ἤγαγεν οὐράν, -ἧς ὀλιγοδρανέων ἵππος ἀπεκρέματο. -
-
- - -pseudo-lucianus - - -πλοῦτον μὲν πλουτοῦντος ἔχεις, ψυχὴν δὲ πένητος, -ὦ τοῖς κληρονόμοις πλούσιε, σοὶ δὲ πένης. -
-
- - -lucillius - - -εἴ τινʼ ἔχεις Διόνυσον ἐνὶ μεγάροισι τεοῖσι, -τὸν κισσὸν ἀφελὼν, θριδάκων φύλλοις στεφάνωσον. - -
-
- - -timon - - - -τίς δʼ οὗτος κτίλος ὣς ἐπιπωλεῖται στίχας ἀνδρῶν; -μωλύτης, ἐπέων λίθος Ἄσσιος, ὅλμος ἄτολμος. -
-
- - -anonymi epigrammatici - - - - - πῶς φιλέεις, ὦ μῆτερ, ἐμοῦ πλέον υἱέος οἶνον; -δὸς πιέειν οἴνοιο, ἐπεὶ γάλα τὸ πρὶν ἔδωκας. - - ὦ παῖ, σὴν μὲν δίψαν ἐμὸν γάλα τὸ πρὶν ἔπαυσε· -νῦν ἴθι πῖνε ὕδωρ, καὶ παύεο δίψαν ἑοῖο. -
-
- - -anonymi epigrammatici - - -Δέρκεο πῶς διψῶν υἱὸς χέρα μητέρι τείνει· -ἡ δὲ γυνή, ἅτε πᾶσα γυνή, κεκρατημένη οἴνῳ, -ἐν λαγύνῳ πίνουσα, τόδʼ ἔννεπε λοξὸν ἰδοῦσα· -“ ἐκ βρόχθου ὀλίγοιο τί σοι δῶ, τέκνον ἐμεῖο ; -ξέστας γὰρ τριάκοντα μόνους λάγυνὸς γʼ ὅδε χωρεῖ.” -“ μῆτερ, μητρυιῆς χαλεπὸν τρόπον ἀντικρατοῦσα, -ἀμπέλου ἡδυτάτης τάδε δάκρυα δός μοι ἀφύσσειν.” -“μῆτερ ἐμή, δύσμητερ, ἀπηνέα θυμὸν ἔχουσα, -εἰ φιλέεις με τὸν υἷα, δίδου μέ τι τυτθὸν ἀφύσσειν.” -
-
- - -palladas - - -ὑβρίζεις· τί τὸ θαῦμα; τί δυσχερές; ἀλλὰ φέρω σε· -τῶν γὰρ ὑβριζόντων ἡ θρασύτης κόλασις. - -
-
- - -palladas - - -πολλὰ λαλεῖς, ἄνθρωπε, χαμαὶ δὲ τίθῃ μετὰ μικρόν. -σίγα, καὶ μελέτα ζῶν ἔτι τὸν θάνατον. -
-
- - -palladas - - -ἥλιος ἀνθρώποις αὐγῆς θεός· εἰ δὲ καὶ αὐτὸς -ὕβριζεν φαίνων, οὐδὲ τὸ φῶς ἐπόθουν. -
-
- - -palladas - - -οὐκ ἐμέ, τὴν πενίην δὲ καθύβρισας· εἰ δὲ καὶ ὁ Ζεὺς -ἦν ἐπὶ γῆς πτωχός, καὐτὸς ἔπασχεν ὕβριν. -
-
- - -palladas - - -εἰ πένομαι, τί πάθω; τί με μισεῖς οὐκ ἀδικοῦντα; -πταῖσμα τόδʼ ἐστὶ Τύχης, οὐκ ἀδίκημα τρόπων. -
-
- - -palladas - - -πάντες μὲν δειλοὶ καὶ ἀλαζόνες εἰσί, καὶ εἴ τι -ἐν τοῖς ἀνθρώποις ἄλλο πέφυκε πάθος· -ἀλλʼ ὁ λογισμὸν ἔχων τῷ πλησίον οὐκ ἀναφαίνει, -ἔνδον ἀποκρύπτων τῇ συνέσει τὸ πάθος. -σῆς δὲ θύρα ψυχῆς ἀναπέπταται· οὐδένα λήθεις -οὔτε καταπτήσσων, οὔτε θρασυνόμενος. -
-
- - -palladas - - -τέκνον ἀναιδείης, ἀμαθέστατε, θρέμμα Μορίης, -εἰπέ, τί βρενθύῃ μηδὲν ἐπιστάμενος; - -ἐν μὲν γραμματικοῖς ὁ Πλατωνικός· ἂν δὲ Πλάτωνος -δόγματά τις ζητῇ, γραμματικὸς σὺ πάλιν. -ἐξ ἑτέρου ʽφεύγεις ἐπὶ θάτερον οὔτε δὲ τέχνην -οἶσθα γραμματικήν, οὔτε Πλατωνικὸς εἶ. -
-
- - -palladas - - -ἂν μετʼ Ἀλεξάνδρειαν ἐς Ἀντιόχειαν ἀπέλθῃς, -καὶ μετὰ τὴν Συρίην Ἰταλίας ἐπιβῇς, -τῶν δυνατῶν οὐδείς σε γαμήσει· τοῦτο γὰρ αἰεὶ -οἰομένη πηδᾷς εἰς πόλιν ἐκ πόλεως. -
-
- - -palladas - - -υἱὸν ἔχεις τὸν Ἔρωτα, γυναῖκα δὲ τὴν Ἀφροδίτην -οὐκ ἀδίκως, χαλκεῦ, τὸν πόδα χωλὸν ἔχεις. -
-
- - -lucillius - - -τὸν πόδα τῇ βελόνῃ τρυπῶν Κλεόνικος ὁ λεπτός, -αὐτὸς ἐτρύπησεν τῷ ποδὶ τὴν βελόνην. -
-
- - -lucillius - - -Θαρσύμαχε, πλοῦτον πολὺν ὤλεσας ἐξ ἐπιβουλῆς, -εἰς οὐδὲν δʼ ἥκεις ἄθλιος ἐξαπίνης, -φεισάμενος, δανίσας, τοκίσας τόκον, ὑδροποτήσας, -πολλάκι μηδὲ φαγών, ὥστε τι πλεῖον ἔχειν. -ἀλλʼ εἴ μοι λογίσαιο τὸ πεινῆν καὶ τότε καὶ νῦν, -οὐδὲν ἔλαττον ἔχεις ὧν τότʼ ἔδοξας ἔχειν. -
-
- - -lucillius - - -ἠγόρασας πλοκάμους, φῦκος, μέλι, κηρόν, ὀδόντας· -τῆς αὐτῆς δαπάνης ὄψιν ἂν ἠγόρασας. - -
-
- - -lucillius - - -οὕτως ἔστʼ ἀργὸς Πανταίνετος, ὥστε πυρέξας -μηκέτʼ ἀναστῆναι παντὸς ἐδεῖτο θεοῦ. -καὶ νῦν οὐκ ἐθέλων μὲν ἐγείρεται, ἐν δʼ οἱ αὐτῷ -κωφὰ θεῶν ἀδίκων οὔατα μεμφόμενος. -
-
- - -lucillius - - -οὐδενὸς ἐνθάδε νῦν τεθνηκότος, ὦ παροδῖτα, -Μάρκος ὁ ποιητὴς ᾠκοδόμηκε τάφον, -καὶ γράψας ἐπίγραμμα μονόστιχον, ὧδʼ ἐχάραξε· - -κλαύσατε δωδεκέτη Μάξιμον ἐξ Ἐφέσου. - -οὐδὲ γὰρ εἶδον ἐγώ τινα Μάξιμον εἰς δʼ ἐπίδειξιν -ποιητοῦ κλαίειν τοῖς παριοῦσι λέγω. -
-
- - -lucillius - - -ἀργυρέῃ λιμῷ τις, ἐς εἰλαπίνην με καλέσσας, -ἔκτανε, πειναλέους τοὺς πίνακας προφέρων. -ὀχθήσας δʼ ἄρʼ ἔειπον ἐν ἀργυροφεγγέι λιμῷ· - -ποῦ μοι χορτασίη ὀστρακίνων πινάκων; - -
-
- - -lucillius - - -ἐζήτουν πινάκων πόθεν οὔνομα τοῦτο καλέσσω, -καὶ παρὰ σοὶ κληθείς, εὗρον ὅθεν λέγεται. -πείνης γὰρ μεγάλης μεγάλους πίνακας παρέθηκας, -ὄργανα τοῦ λιμοῦ πειναλέους πίνακας. -
-
- - -lucillius - - -εἴσιδεν Ἀντίοχος τὴν Λυσιμάχου ποτὲ τύλην, -κοὐκέτι τὴν τύλην εἴσιδε Λυσίμαχος. - -
-
- - -anonymi epigrammatici - - -εἰς ἱερὸν ποτʼ ἀγῶνα Μίλων μόνος ἦλθʼ ὁ παλαιστής· -τὸν δʼ εὐθὺς στεφανοῦν ἀθλοθέτης ἐκάλει. -προσβαίνων δʼ ὤλισθεν ἐπʼ ἰσχίον οἱ δʼ ἐβόησαν -τοῦτον μὴ στεφανοῦν, εἰ μόνος ὢν ἔπεσεν. . -ἀνστὰς δʼ ἐν μέσσοις ἀντέκραγεν “οὐχὶ τρίʼ ἐστὶν -ἓν κεῖμαι· λοιπὸν τἆλλα μέ τις βαλέτω.” -
-
- - -palladas - - -Ἀντίσπαστον ἐμοί τις ὄνον μακρόθυμον ἔδωκεν, -τῶν βασταζομένων ὅρμον ὁδοιπορίης, -υἱὸν τῆς βραδυτῆτος ὄνον, πόνον, ὄκνον, .ὄνειρον, -τῶν ἀνακαμπτόντων ὑστάτιον πρότερον. -
-
- - -philodemus - - -Ἀντικράτης ᾔδει τὰ σφαιρικὰ μᾶλλον Ἀράτου -πολλῷ, τὴν ἰδίην δʼ οὐκ ἐνόει γένεσιν -διστάζειν γὰρ ἔφη, πότερʼ ἐν κριῷ γεγένηται -ἢ διδύμοις, ἢ τοῖς ἰχθύσιν ἀμφοτέροις. -εὕρηται δὲ σαφῶς ἐν τοῖς τρισί καὶ γὰρ ὀχευτὴς -καὶ μωρὸς μαλακὸς τʼ ἐστὶ καὶ ὀψοφάγος. -
-
- - -automedon - - -Ἀνθρακίων δέκα μέτρα φέρων, ἔσο καὶ σὺ πολίτης· -ἢν δὲ καὶ ὗν ἀγάγῃς, αὐτὸς ὁ Τριπτόλεμος. - -δεῖ δὲ καὶ Ἡρακλείδῃ ὑφηγητῆρι δοθῆναι -ἢ καυλοὺς κράμβης, ἢ φακόν, ἢ κοχλίας. -ταῦτʼ ἔχε, καὶ λέγε σαυτὸν Ἐρεχθέα, Κέκροπα, Κόδρον, -ὃν κʼ ἐθέλῃς· οὐδεὶς οὐδὲν ἐπιστρέφεται. -
-
- - -marcus argentarius - - -Ἀντιγόνην ἔστεργε Φιλόστρατος· ἦν δʼ παλαισταῖς -ὁ τλήμων Ἴρου πέντε πενιχρότερος. -εὗρε δʼ ὑπὸ κρυμοῦ γλυκὺ φάρμακον ἀντία γὰρ σχὼν -γούνατʼ ἐκοιμήθη, ξεῖνε, μετʼ Ἀντιγόνης. -
-
- - -philippus - - -γραμματικοὶ Μώμου στυγίου τέκνα, σῆτες ἀκανθῶν, -τελχῖνες βίβλων, Ζηνοδότου σκύλακες, -Καλλιμάχου στρατιῶται, ὃν ὡς ὅπλον ἐκτανύσαντες, -οὐδʼ αὐτοῦ κείνου γλῶσσαν ἀποστρέφετε, -συνδέσμων λυγρῶν θηρήτορες, οἷς τὸ μὶν ἢ - -σφὶν -εὔαδε, καὶ ζητεῖν εἰ κύνας εἶχε Κύκλωψ, -τρίβοισθʼ εἰς αἰῶνα κατατρύζοντες ἀλιτροὶ -ἄλλων ἐς δʼ ἡμᾶς ἰὸν ἀποσβέσατε. -
-
- - -antiphanes - - -γραμματικῶν περίεργα γένη, ῥιζωρύχα μούσης -ἀλλοτρίης, ἀτυχεῖς σῆτες ἀκανθοβάται, - -τῶν μεγάλων κηλῖδες, ἐπʼ Ἠρίννῃ δὲ κομῶντες, -πικροὶ καὶ ξηροὶ Καλλιμάχου πρόκυνες, -ποιητῶν λῶβαι, παισὶ σκότος ἀρχομένοισιν, -ἔρροιτʼ, εὐφώνων λαθροδάκναι κόριες. -
-
- - -palladas - - -ῥῶ καὶ Λάμβδα μόνον κόρακας κολάκων διορίζει· -λοιπὸν ταὐτὸ κόραξ βωμολόχος τε κόλαξ. -τοὔνεκά μοι, βέλτιστε, τόδε ζῷον πεφύλαξο, -εἰδὼς καὶ ζώντων τοὺς κόλακας κόρακας. -
-
- - -automedon - - - - δέξαι, Φοῖβε, τὸ δεῖπνον, ὅ σοι φέρω. ἤν τις ἐάσῃ, -δέξομαι. εἶτα φοβῇ καὶ σύ τι, Λητοΐδη; - - οὐδένα τῶν ἄλλων, πλὴν Ἄρριον οὗτος ἔχει -ἅρπαγος ἰκτίνου χεῖρα κραταιοτέρην, -ἀκνίσου βωμοῖο νεωκόρος· ἢν τελέσῃ δὲ -τὴν πομπήν, ἄρας ᾤχεθʼ ἅπαντα πάλιν. -ἐν Διὸς ἀμβροσίῃ πολλὴ χάρις· εἷς γὰρ ἂν ὑμέων -ἤμην, εἰ λιμοῦ καὶ θεὸς ᾐσθάνετο. -
-
- - -automedon - - -ἐχθὲς δειπνήσας τράγεον πόδα, καὶ δεκαταῖον -κανναβίνης κράμβης μήλινον ἀσπάραγον, -εἰπεῖν τὸν καλέσαντα φυλάσσομαι· ἔστι γὰρ ὀξύς, -καὶ φόβος οὐχ ὁ τυχὼν μή με πάλιν καλέσῃ. - -
-
- - -automedon - - -πώγων, καὶ λάσιαι μηρῶν τρίχες, ὡς ταχὺ πάντα -ὁ χρόνος ἀλλάσσει· Κόννιχε, τοῦτʼ ἐγένου. -οὐκ ἔλεγον; “μὴ πάντα βαρὺς θέλε μηδὲ βάναυσος -εἶναι· καὶ κάλλους εἰσί τινες Νεμέσεις.” -ἦλθες ἔσω μάνδρης, ὑπερήφανε· νῦν ὅτι βούλει -οἴδαμεν ἀλλʼ ἐξῆν καὶ τότʼ ἔχειν σε φρένας. -
-
- - -antipater - - -τὴν ξηρὴν ἐπὶ νῶτα Λυκαινίδα, τὴν Ἀφροδίτης -λώβην, τὴν ἐλάφου παντὸς ἀπυγοτέρην, -αἰπόλος ᾗ μεθύων οὐκ ἄν ποτε, φασί, συνῴκει, -γοῖ, γοῖ. τοιαῦται Σιδονίων ἄλοχοι. -
-
- - -nicarchus ii - - -τὴν μίαν Ἑρμογένης κἀγώ ποτε καὶ Κλεόβουλος -ἤγομεν εἰς κοινὴν κύπριν Ἀριστοδίκην· -ἧς ἔλαχον μὲν ἐγὼ πολιὴν ἅλα ναιέμεν αὐτός· -εἷς γὰρ ἕν, οὐ πάντες πάντα, διειλόμεθα. -Ἑρμογένης δʼ ἔλαχε στυγερὸν δόμον εὐρώεντα, -ὕστατον, εἰς ἀφανῆ χῶρον ὑπερχόμενος, -ἔνθʼ ἀκταὶ νεκύων, καὶ ἐρινεοὶ ἠνεμόεντες -δινεῦνται πνοιῇ δυσκελάδων ἀνέμων. -Ζῆνα δὲ θὲς Κλεόβουλον, ὃς οὐρανὸν εἰσαναβαίνειν, -τὸ ψολόεν κατέχων ἐν χερὶ πῦρ, ἔλαχεν. -γῆ δʼ ἔμενε ξυνὴ πάντων ψίαθον γὰρ ἐν αὐτῇ -στρώσαντες, τὴν γραῦν ὧδε διειλόμεθα. - -
-
- - -nicarchus ii - - -Δημῶναξ, μὴ πάντα κάτω βλέπε, μηδὲ χαρίζου -τῇ γλώσσῃ· δεινὴν χοῖρος ἄκανθαν ἔχει. -καὶ σὺ ζῇς † ἡμῖν, ἐν Φοινίκῃ δὲ καθεύδεις, -κοὐκ ὢν ἐκ Σεμέλης μηροτραφὴς γέγονας. -
-
- - -nicarchus ii - - -ἐκλήθην ἐχθές, Δημήτριε· σήμερον ἦλθον -δειπνεῖν. μὴ μέμψῃ, κλίμακʼ ἔχεις μεγάλην -ἐν ταύτᾐ πεποίηκα πολὺν χρόνον οὐδʼ ἂν ἐσώθην -σήμερον, ἀλλʼ ἀνέβην κέρκον ὄνου κατέχων. -ἧψαι τῶν ἄστρων Ζεὺς ἡνίκα τὸν Γανυμήδην -ἥρπασε, τῇδʼ αὐτόν, φαίνετʼ, ἔχων ἀνέβη. -ἔνθεν δʼ εἰς Ἀίδην ποτʼ ἀφίξεαι; οὐκ ἀφυὴς εἶ -εὕρηκας τέχνην πῶς ἒσῃ ἀθάνατος. -
-
- - -nicarchus ii - - -εἶχε Φίλων λέμβον Σωτήριχον ἀλλʼ ἐν ἐκείνῳ -σωθῆνʼ οὐδὲ Ζεὺς αὐτὸς ἴσως δύναται. -οὔνομα γὰρ μόνον ἦν Σωτήριχος, οἱ δʼ ἐπιβάντες -ἔπλεον ἢ παρὰ γῆν, ἢ παρὰ Φερσεφόνην. -
-
- - -nicarchus ii - - -οὐ πλεῖν, ἀλλʼ ἀντλεῖν ἡμᾶς Εἴκανδρος ὁ πρωρεὺς -εἰς τὴν εἰκόσορον φαίνεται ἐμβιβάσας· -οὐκ ὀλίγον γὰρ ἔνεστιν ὕδωρ ἔσω, ἀλλʼ ὁ Ποσειδῶν -ἐν ταύτῃ διαπλεῖν φαίνεται εἰς τὸ πέραν - -νῦν πρῶτον ναῦς ὦπται ὑδρωπική, ἀλλά γε [ δείδω] -μὴ σορὸν οὖσαν ἴδῃς τὴν πάλαι εἰκόσορον. -
-
- - -callicter - - -Φαρμακίοισι Ῥόδων λέπραν καὶ χοιράδας αἴρει· -τἆλλα δὲ πάντʼ αἴρει καὶ δίχα φαρμακίων. -
-
- - -anonymi epigrammatici - - -Δαμαγόραν καὶ λοιμὸν ἰσόψηφόν τις ἀκούσας -ἔστησ’ ἀμφοτέρων τὸν τρόπον ἐκ κανόνος· -εἰς τό μέρος δὲ καθείλκετʼ ἀνελκυσθὲν τὸ τάλαντον -Δαμαγόρου, λοιμὸν δʼ εὗρεν ἐλαφρότερον. -
-
- - -anonymi epigrammatici - - -ὦ τλῆμον Κυνέγειρε, καὶ ἐν ζωοῖς καὶ ἀπελθὼν, -ὡς αἰεὶ κόπτᾐ ῥήμασι καὶ κοπίσιν. -πρόσθε μὲν ἐν πολέμοισι τεὴ πέσε μαρναμένη χείρ· -νῦν δὲ σ’ ὁ γραμματικὸς καὶ ποδὸς ἐστέρισεν, -
-
- - -anonymi epigrammatici - - -τῆς Ἀσίης τὰ λάφυρα λαβὼν ἔπλευσε Καρῖνος -ἤματι χειμερίῳ, δυομένων ἐρίφων· -εἶδε καὶ Ἀδράδστεια τὸ φορτίον ὃς δʼ ἐφορώσης -ᾤχετο, καὶ πελάγους δαίμοσιν ἐγγελάσας. - -
-
- - -anonymi epigrammatici - - -Βουλεύεις, Ἀγαθῖνε· τὸ βῆτα δὲ τοῦτʼ ἐπρίω νῦν, -εἰπέ, πόσης τιμῆς; δέλτα γὰρ ἦν πρότερον. -
-
- - -anonymi epigrammatici - - -τὴν φωνὴν ἐνοπήν σε λέγειν ἐδίδαξεν Ὅμηρος· -τὴν γλῶσσαν δʼ ἐνοπὴν τίς σ’ ἐδίδαξεν ἔχειν; -
-
- - -anonymi epigrammatici - - -τὴν κεφαλὴν σείεις, καὶ τὴν πυγὴν ἀνασείεις· -ἓν μὲν μαινομένου, ἓν δὲ περαινομένου. -
-
- - -palladas - - -ὤμοσα μυριάκις ἐπιγράμματα μηκέτι ποιεῖν -πολλῶν γὰρ μωρῶν ἔχθραν ἐπεσπασάμην. -ἀλλʼ ὁπόταν κατίδω τοῦ Παφλαγόνος τὸ πρόσωπον -Πανταγάθου, στέξαι τὴν νόσον οὐ δύναμαι. -
-
- - -palladas - - -Αἰνίζειν μὲν ἄριστον, ὁ δὲ ψόγος ἔχθεος ἀρχή· -ἀλλὰ κακῶς εἰπεῖν, Ἀττικόν ἐστι μέλι. -
-
- - -anonymi epigrammatici - - -Κήλην κηλήτου μὴ φαινομένου προτέθεικας. -μή μοι τὴν κήλην αὐτὸν ἰδεῖν δέομαι. - -
-
- - -anonymi epigrammatici - - -Σιλβανὸς δύο παῖδας ἔχων, Οἶνόν τε καὶ Ὕπνον, -οὐκέτι τὰς Μούσας, οὐδὲ φίλους φιλέει· -ἀλλʼ ὁ μὲν ἐκ λεχέων νιν ἐύρροος ἐς φρένα θέλγει, -ἄλλος δʼ ἐς θαλάμους ῥεγχόμενον κατέχει. -
-
- - -anonymi epigrammatici - - - -Μητρόδοτος στυγέων πρασίνων αἰώνιον ἄχθος, -μνημοσύνην μίσους τήνδε τράπεζαν ἔχει. -
-
- - -anonymi epigrammatici - - -Μητρόφανες, κύκνοψι, δασύθριξ, δῖε πελαργέ, -τῇ καὶ τῇ κραδάων κεφαλὴν γεράνοισιν ὁμοίην, -μηκεδανὸν καράκαλλον ὑπὲκ δαπέδοιο κομίζεις. -
-
- - -automedon - - -μέχρι τίνος, Πολύκαρπε, κενῆς παράσιτε τραπέζης, -λήσῃ κερματίοις χρώμενος ἀλλοτρίοις; -οὐ γὰρ ἔτʼ εἰν ἀγορῇ σε βλέπω πολὺν ἀλλʼ ὑποκάμπτεις -ἤδη, καὶ ζητεῖς ποῖ σε φέρωσι πόδες. -πᾶσιν ἐπαγγέλλῃ· “ κόμισαι τὸ σὸν αὔριον· ἔρχου -καὶ λάβε·” κοὐδʼ ὀμόσας, οὐκέτι πίστιν ἔχεις. -Κυζικόθεν σε φέρων ἄνεμος Σαμόθρᾳξι πέλασσεν -τοῦτό σε τοῦ λοιποῦ τέρμα μένει βιότου. - -
-
- - -philippus - - -Χαίροιθʼ οἱ περὶ κόσμον ἀεὶ πεπλανηκότες ὄμμα, -οἳ τʼ ἀπʼ Ἀριστάρχου σῆτες ἀκανθολόγοι. -ποῖ γὰρ ἐμοὶ ζητεῖν, τίνας ἔδραμεν ἥλιος οἴμους, -καὶ τίνος ἦν Πρωτεὺς, καὶ τίς ὁ Πυγμαλίων; -γινώσκοιμʼ ὅσα λευκὸν ἔχει στίχον ἡ δὲ μέλαινα -ἱστορίη τήκοι τοὺς Περικαλλιμάχους. -
-
- - -antiphanes - - -θηρῶν βροτὲ μᾶλλον ἀνήμερε, πάντα σε μισεῖ, -πατρολέτωρ· πάντῃ δʼ ἐκδέχεταί σε μόρος. -ἢν ἐπὶ γῆς φεύγῃς, ἀγχοῦ λύκος· ἢν δὲ πρὸς ὕψος -δενδροβατῇς, ἀσπὶς δεῖμʼ ὑπὲρ ἀκρεμόνων. -πειράζεις καὶ Νεῖλον; ὁ δʼ ἐν δίναις κροκόδειλον -ἔτρεφεν, εἰς ἀσεβεῖς θῆρα δικαιότατον. -
-
- - -palladas - - -εἰπὲ πόθεν σὺ μετρεῖς κόσμον καὶ πείρατα γαίης -ἐξ ὀλίγης γαίης σῶμα φέρων ὀλίγον. -σαυτὸν ἀρίθμησον πρότερον καὶ γνῶθι σεαυτόν, -καὶ τότʼ ἀριθμήσεις γαῖαν ἀπειρεσίην. -εἰ δʼ ὀλίγον πηλὸν τοῦ σώματος οὐ καταριθμεῖς, -πῶς δύνασαι γνῶναι τῶν ἀμέτρων τὰ μέτρα; -
-
- - -agathias scholasticus - - - -νήπιε, πῶς σε λέληθε Δίκης ζυγόν, οὐ νοέεις δὲ -ἀνδράσιν οὐχ ὁσίοις ψῆφον ὀφειλομένην; - -ῥήτρῃ πιστεύεις πυκινόφρονι, σῇ τε μενοινῇ -ποικίλον αὐδῆσαι μῦθον ἐπισταμένῃ. -ἐλπίζειν ἔξεστι· Θέμιν δʼ οὐκ οἶδεν ἀμεῖψαι -τῆς σῆς ἠλεμάτου παίγνια φαντασίης. -
-
- - -palladas - - -τῷ πτισάνην πωλοῦντι τὸ κελλίον ἐχθὲς ἔδωκα, -καὶ φοβερὸν πύκτην σήμερον εὗρον ἔσω. -ὡς δʼ ἔλεγον, σὺ τίς εἶ; πόθεν ἤλυθες ἡμέτερον δῶ; - -πυγμαχίης κατʼ ἐμοῦ χεῖρας ἀνέσχεν ἄνω. -ψύττα δʼ ἐγὼ κατέτεινα, φοβεύμενος ἄγριον ἄνδρα, -τὸν πτιστὴν πύκτην ἐξαπίνης ὁρόων. -ἀλλά σε, πρὸς πύκτου Πολυδεύκεος ἠδὲ καὶ αὐτοῦ -Κάστορος, ἱκνοῦμαι, καὶ Διὸς ἱκεσίου, -τὸν πύκτην ἀπόκρουσον, ἐμὸν χόλον οὐ δύναμαι γὰρ -πυκτεύειν καθάπαξ μηνὸς ἐπερχομένου. -
-
- - -agathias scholasticus - - -τὸν σοφὸν ἐν κιθάρῃ], τὸν μουσικὸν Ἀνδροτίωνα -εἴρετό τις τοίην κρουματικὴν σοφίην -“ δεξιτερὴν ὑπάτην ὁπότε πλήκτροισι δόνησας, -ἡ λαιὴ νήτη πάλλεται αὐτομάτως -λεπτὸν ὑποτρίζουσα, καὶ ἀντίτυπον τερέτισμα -πάσχει, τῆς ἰδίης πλησσομένης ὑπάτης· -ὥστε με θαυμάζειν πῶς ἄπνοα νεῦρα ταθέντα -ἡ φύσις ἀλλήλοις θήκατο συμπαθέα.” -ὃς δὲ τὸν ἐν πλήκτροισιν Ἀριστόξεινον ἀγητὸν -ὤμοσε μὴ γνῶναι τήνδε θεημοσύνην -ἔστι δʼ, ἔφη, λύσις ἥδε· τὰ νευρία πάντα τέτυκται -ἐξ ὄιος χολάδων ἄμμιγα τερσομένων - - τοὔνεκεν εἰσιν ἀδελφά, καὶ ὡς ξύμφυλα συνηχεῖ, - ξυγγενὲς ἀλλήλων φθέγμα μεριζόμενα. - γνήσια γὰρ τάδε πάντα, μιῆς ἅτε γαστρὸς ἐόντα, - καὶ τῶν ἀντιτύπων κληρονομεῖ πατάγων. - καὶ γὰρ δεξιὸν ὄμμα κακούμενον ὄμματι λαιῷ - πολλάκι τοὺς ἰδίους ἀντιδίδωσι πόνους. -
-
- - -palladas - - -Ἑρμολύκου θυγάτηρ μεγάλῳ παρέλεκτο πιθήκῳ -ἡ δʼ ἔτεκεν πολλοὺς Ἑρμοπιθηκιάδας. -εἰ δʼ Ἑλένην ὁ Ζεὺς καὶ Κάστορα καὶ Πολυδεύκην -ἐκ Λήδης ἔτεκεν, κύκνον ἀμειψάμενος, -Ἑρμιόνῃ γε Κόραξ παρελέξατο· ἡ δὲ τάλαινα -φρικτῶν δαιμονίων ἑρμαγέλην ἔτεκεν. -
-
- - -agathias scholasticus - - -ἄλλον Ἀριστοτέλην, Νικόστρατον, ἰσοπλάτωνα, -σκινδαλαμοφράστην αἰπυτάτης σοφίης, -τοῖα περὶ ψυχῆς τις ἀνείρετο· “ πῶς θέμις εἰπεῖν -τὴν ψυχήν; θνητήν, ἢ πάλιν ἀθάνατον; -σῶμα δὲ δεῖ καλέειν, ἢ ἀσώματον; ἐν δὲ νοητοῖς -τακτέον, ἢ ληπτοῖς, ἢ τὸ συναμφότερον;” -αὐτάρ ὃ τὰς βίβλους ἀνελέξατο τῶν μετεώρων, -καὶ τὸ περὶ ψυχῆς ἔργον Ἀριστοτέλους, -καὶ παρὰ τῷ Φαίδωνι Πλατωνικὸν ὕψος ἐπιγνούς, -πᾶσαν ἐνησκήθη πάντοθεν ἀτρεκίην. -εἶτα περιστέλλων τὸ τριβώνιον, εἶτα γενείου -ἄκρα καταψήχων, τὴν λύσιν ἐξέφερεν - -“ εἴπερ ὅλως ἔστι ψυχῆς φύσις ʽοὐδὲ γὰρ οἶδἀ, -ἢ θνητὴ πάντως ἐστὶν ἢ ἀθάνατος, -στεγνοφυὴς ἢ ἄυλος· ὅταν δʼ Ἀχέροντα περήσῃς, -κεῖθι τὸ νημερτὲς γνώσεαι ὡς ὁ Πλάτων. -εἰ δʼ ἐθέλεις, τὸν παῖδα Κλεόμβροτον Ἀμβρακιώτην -μιμοῦ, καὶ τεγέων σὸν δέμας ἐκχάλασον -καί κεν ἐπιγνοίης δίχα σώματος αὐτίκα σαυτόν, -μοῦνον ὅπερ ζητεῖς τοῦθʼ ὑπολειπόμενος.” -
-
- - -palladas - - - -πάντα μὲν οἶδα, λέγεις· ἀτελὴς δʼ ἐν πᾶσιν ὑπάρχεις, -γευόμενος πάντων, οὐδὲν ἔχεις ἴδιον. -
-
- - -anonymi epigrammatici - - -εἰς σὲ καὶ ἀψευδὴς ἐψεύσατο βίβλος Ὁμήρου, -ὁπλοτέρων ἐνέπουσα μετήορα δήνεα φωτῶν. -
-
- - -palladas - - -υἱὸς καὶ γενετὴρ δῆριν φιλόνεικον ἔθεντο, -τίς πλέον ἐκδαπανῶν κλῆρον ἅπαντα φάγῃ. -καὶ μετὰ τὴν βρῶσιν τὴν χρηματικὴν μάλα πᾶσαν, -ὕστατον ἀλλήλους λοιπὸν ἔχουσι φαγεῖν. -
-
- - -anonymi epigrammatici - - -Ῥουφινιανός, Ῥοῦφος ὢν δισύλλαβος, -συνεξέτεινε τοῖς κακοῖς τὰς συλλαβάς· -οὐ λανθάνει δὲ τὴν δισύλλαβον Δίκην. -κληθήσεται γὰρ καὶ δισύλλαβος πάλιν, -Ῥοῦφος κακοῦργος καὶ γόης, ὡς ἦν ποτέ. - -
-
- - -anonymi epigrammatici - - -ὦ τῆς ἁπάσης δυνάμεως ὑπέρτατε, -σῶσόν με τὸν δύστηνον ἐκ παντὸς φθόνου. -θέλεις ἀκοῦσαι, βούλομαι κἀγὼ λέγειν -τὸ γὰρ θέλημα τὴν χάριν τίκτει διπλῆν, -διπλοῦν τε κάλλος τῷ λόγῳ χαρίζεται -λέγοντι κόσμος, καὶ κλύοντι σεμνότης. -φωστὴρ γὰρ εἶ σὺ καὶ λόγων καὶ τῶν νόμων, -νόμοις δικάζων καὶ λόγοισιν ἐκπρέπων. -αἴλουρον εἶδον χρυσίου τὸν πρίγκιπα, -ἢ βδέλλαν ὠμήν, χρυσοκόλλητον χόλον. -
-
- - -anonymi epigrammatici - - -νῦν ὁ στρατηγὸς Ἑρμανούβης ἐγένετο -κύων, ἀδελφοὺς συλλαβὼν Ἑρμᾶς δύο -ἀσημοκλέπτας, συνδεθέντας σχοινίῳ, -ψυχροὺς ἀώρους Ταρταρίους τε δαίμονας. -οὐκ οἶδα χῶρον τοῦ τρόπου κατήγορον -τρόπον δὲ χώρου τὸν κατήγορον λέγω. -
-
- - -automedon - - -ἡμίονοι σύγγηροι ἐμὴν κομέουσιν ἀπήνην, -ταῖσιν Ὁμηρείοις πάντα Λιταῖς ἴκελαι, -χωλαί τε, ῥυσαί τε, παραβλῶπὲς τʼ ὀφθαλμώ, -Ἡφαίστου πομπή, σκύτινα δαιμόνια, -οὔ ποτε γευσάμεναι, μὰ τὸν Ἥλιον, οὐδʼ ἐν ὀνείρῳ, -οὐ θέρεος κριθήν, οὐκ ἔαρος βοτάνην. -τοὔνεκʼ ἐμεῦ μὲν ἕκητι βίον ζώοιτε κορώνης -ἢ ἐλάφου, κενεὴν ἠέρα βοσκόμεναι. - -
-
- - -callimachus - - -εὐδαίμων ὅτι τἆλλα μανεὶς ὡρχαῖος Ὀρέστας, -Λεύκαρε, τὰν ἁμὰν οὐκ ἐμάνη μανίην, -οὐδʼ ἔλαβʼ ἐξέτασιν τῶ Φωκέος, ἅτις ἐλέγχει -τὸν φίλον, ἀλλʼ % αἰχʼ ἐν δρᾶμʼ ἐδίδαξε μόνον. -ἦ τάχα κα τὸν ἑταῖρον ἀπώλεσε τοῦτο ποήσας· -κἀγὼ τοὺς πολλοὺς οὐκέτʼ ἔχω Πυλάδας. -
-
- - -dioscorides - - -οὐκέτʼ Ἀλεξανδρεῦσι τὰ τίμια, χὠ Πτολεμαίου -μόσχος ἐν ἠιθέοις λαμπάδι κῦδος ἔχει· -ὁ Πτολεμαίου Μόσχος, ἰὼ πόλι· ποῦ δὲ τὰ μητρὸς -αἴσχεα, πάνδημοὶ τʼ ἐργασίαι τέγεος; -ποῦ δὲ συφόρβια; τίκτετε, πόρναι, -τίκτετε, τῷ Μόσχου πειθόμεναι στεφάνῳ. -
-
- - -bianor - - -οὗτος ὁ μηδέν, ὁ λιτός, ὁ καὶ λάτρις, οὗτος, ὁρᾶτε, -ἐστί τινος ψυχῆς κύριος ἀλλοτρίης. -
-
- - -agathias scholasticus - - -Καλλιγένης ἀγροῖκος, ὅτε σπόρον ἔμβαλε γαίῃ, -οἶκον Ἀριστοφάνους ἦλθεν ἐς ἀστρολόγου, - -ᾔτεε δʼ ἐξερέειν, εἴπερ θέρος αἴσιον αὐτῷ -ἔσται, καὶ σταχύων ἄφθονος εὐπορίη. -ὃς δὲ λαβὼν ψηφῖδας, ὑπὲρ πίνακός τε πυκάζων, -δάκτυλά τε γνάμπτων, φθέγξατο Καλλιγένει· -“ εἴπερ ἐπομβρηθῇ τὸ ἀρούριον ὅσσον ἀπόχρη, -μηδὲ τινʼ ὑλαίην τέξεται ἀνθοσύνην, -μηδὲ πάγος ῥήξῃ τὴν αὔλακα, μηδὲ χαλάζῃ -ἄκρον ἀποδρυφθῇ δράγματος ὀρνυμένου, -μηδὲ κεμὰς κείρῃσι τὰ λήια, μηδὲ τινʼ ἄλλην -ἠέρος ἢ γαίης ὄψεται ἀμπλακίην, -ἐσθλόν σοι τὸ θέρος μαντεύομαι, εὖ δʼ ἀποκόψεις -τοὺς στάχυας· μούνας δείδιθι τὰς ἀκρίδας.” -
-
- - -macedonius ii - - -φειδωλός τις ἀνὴρ ἁφόων θησαυρὸν ὀνείρῳ, -ἤθελʼ ἀποθνῄσκειν, πλούσιον ὕπνον ἔχων· -ὡς δʼ ἴδε τὴν προτέρην, σκιόεν μετὰ κέρδος ὀνείρου, -ἐξ ὕπνου πενίην, ἀντικάθευδε πάλιν. -
-
- - -Julianus - - -ὄψιν ἔχεις στρουθῷ πανομοίϊον. ἦ ῥά σε Κίρκη -ἐς πτηνὴν μετέθηκε φύσιν, κυκεῶνα πιόντα; -
-
- - -Julianus - - -Ἀμητὸς πολύς ἐστι τεὴν κατὰ δάσκιον ὄψιν -τῷ σε χρὴ δρεπάνοισι, καὶ οὐ ψαλίδεσσι καρῆναι. -
-
- - -Julianus - - -ἀσφαλέως οἴκησον ἐν ἄστεϊ, μή σε κολάψῃ; -αἵματι Πυγμαίων ἡδομένη γέρανος. - -
-
- - -macedonius ii - - -οὐ λαλέει τὸ κάτοπτρον· ἐγὼ δέ σε † πάλιν ἐλέγξω -τὴν νοθοκαλλοσύνην φύκεϊ χριομένην. -τοῦτο καὶ ἡδυλύρης ποτὲ Πίνδαρος ἐλέγχων, -εἶπεν ἄριστον ὕδωρ, φύκεος ἐχθρότατον. -
-
- - -palladas - - -μή με κάλει δίσκων ἐπιίστορα λιμοφορήων, -βρωτύν μοι φορέων τὴν κολοκυνθιάδα. -ἀργυρέην ὕλην οὐ τρώγομεν, ἣν παραβάλλεις, -λιμῷ κρητίζων τοὺς μελέους πίνακας. -ζήτει νηστεύοντας ἐς ἀργυρέην ἐπίδειξιν, -καὶ τότε θαυμάζῃ, κοῦφον ἄσημον ἔχων. -
-
- - -agathias scholasticus - - -σῶμα φέρων σκιοειδές, ἀδερκέϊ σύμπνοον αὔρῃ, -μή ποτε θαρσήσῃς ἄγχι τινὸς πελάσαι, -μή τις ἔσω μυκτῆρος ἀναπνείων σε κομίσσῃ -ἄσθματος ἠερίου πολλὸν ἀφαυρότερον. -οὐ σὺ μόρον τρομέεις· τότε γὰρ πάλιν οὐδὲν ἀμείψας -ἔσσεαι ὡσαύτως φάσμα, τόπερ τελέθεις. -
-
- - -palladas - - - -πάντων μουσοπόλων ἡ Καλλιόπη θεός ἐστιν -ἡ σὴ Καλλιόπη Ταβλιόπη λέγεται. - -
-
- - -macedonius ii - - -τῷ ψιμύθῳ μὲν ἀεὶ λιποσαρκέα τεῖνε παρειήν, -Λαοδίκη, λαοῖς ἔνδικα τινυμένη· -μή ποτε δʼ εὐρύνῃς σέο χείλεα· τίς γὰρ ὀδόντων -ὄρχατον ἐμπήξει φαρμακόεντι δόλῳ; -τὴν χάριν ἐξέρρευσας ὅσην ἔχες· οὐκ ἀπὸ πηγῆς ˘ -ἀγλαΐη μελέων ἕλκεται ἀενάου. -ὡς δὲ ῥόδον θαλέθεσκες ἐν εἴαρι· νῦν δʼ ἐμαράνθης. -γήραος αὐχμηρῷ καρφομένη θέρεϊ. -
-
- - -macedonius ii - - -ἔπταρον ἄγχι τάφοιο, καὶ,ἤθελον αὐτόθʼ ἀκοῦσαι -οἷά περ ὠισάμην, μοῖραν ἐμῆς ἀλόχου. -ἔπταρον εἰς ἀνέμους· ἄλοχον δέ μοι οὔ τι κιχάνει -λυγρὸν ἐν ἀνθρώποις, οὐ νόσος, οὐ θάνατος. -
-
- - -agathias scholasticus - - -ῥήτορα πρὸς Διόδωρον ἀνὴρ δείλαιος ἀπελθὼν -εἴρετό μιν τοίης ἀμφὶ δικασπολίης· -“ ἡμετέρη θεράπαινα φύγεν ποτέ· τὴν δέ τις εὑρὼν, -ἀλλοτρίην τʼ εἶναι λάτριν ἐπιστάμενος, -ζεῦξεν ἑῷ θεράποντι· τέκεν δʼ ὑπὸ παῖδας ἐκείνῳ· -καὶ τίνι δουλεύειν εἰσὶ δικαιότεροι;” -ὃς δʼ ὅτε μερμήριξε, καὶ ἔδρακε βίβλον ἑκάστην, -εἶπεν ἐπιστρέψας γυρὸν ἐπισκύνιον -ἢ “σοί, ἢ τῷ ἑλόντι τεὴν θεράπαιναν ἀνάγκη -δουλεύειν κείνους, ὧν χάριν ἐξερέεις· -δίζεο δʼ εὐμενέοντα δικασπόλον, αἶψα δʼ ἀποίσῃ -ψῆφον ἀρειοτέρην, εἴ γε δίκαια λέγεις.” - -
-
- - -palladas - - -ὄρνεον ἠσθίομεν κεκλημένοι ἄθλιον ἄνδρες -ἄλλων ὀρνίθων βρώματα γινόμενοι· -καὶ τὸν μὲν Τιτυὸν κατὰ γῆς δύο γῦπες ἔδουσιν, -ἡμᾶς δὲ ζῶντας τέσσαρες αἰγυπιοί. -
-
- - -palladas - - -οὐ δύναμαι γαμετῆς καὶ γραμματικῆς ἀνέχεσθαι, -γραμματικῆς ἀπόρου, καὶ γαμετῆς ἀδίκου. -ἀμφοτέρων τὰ πάθη θάνατος καὶ μοῖρα τέτυκται. -τὴν οὖν γραμματικὴν νῦν μόλις ἐξέφυγον -οὐ δύναμαι δʼ ἀλόχου τῆς ἀνδρομάχης ἀναχωρεῖν -εἴργει γὰρ χάρτης καὶ νόμος Αὐσόνιος. -
-
- - -agathias scholasticus - - -οὔ τις ἀλοιητῆρας ἰδεῖν τέτληκεν ὀδόντας -ὑμετέρους, ἵνα σοῖς ἐν μεγάροις πελάσῃ· -εἰ γὰρ ἀεὶ βούβρωστιν ἔχεις Ἐρυσίχθονος αὐτοῦ, -ναὶ τάχα δαρδάψεις καὶ φίλον ὃν καλέεις. -ἀλλʼ οὐ σεῖο μέλαθρά με δέξεται· οὐ γὰρ ἔγωγε -βήσομαι ὑμετέρῃ γαστρὶ φυλαξόμενος. -εἰ δὲ ποτʼ ἐς τεὸν οἶκον ἐλεύσομαι, οὐ μέγʼ ἄνυσσεν -Λαρτιάδης Σκύλλης χάσμασιν ἀντιάσας· -ἀλλʼ ἔσομαι πολύτλας τις ἐγὼ πλέον, εἰ σὲ περήσω, -Κύκλωπος κρυεροῦ μηδὲν ἐλαφρότερον. -
-
- - -macedonius ii - - -παρθένος εὐπατέρεια Δίκη, πρέσβειρα πολήων, -οὐ τὸν ἐν εὐσεβίῃ χρυσὸν ἀποστρέφεται· - -ἀλλὰ καὶ αὐτὰ τάλαντα Διὸς πάγχρυσα τελέσθη, -οἷσι ταλαντεύει πάντα νόμον βιότου· - -καὶ τότε δὴ χρύσεια πατὴρ ἐτίταινε τάλαντα, - -εἰ μὴ Ὁμηρείων ἐξελάθου χαρίτων. -
-
- - -palladas - - -πᾶσα γυνὴ χόλος ἐστὶν ἔχει δʼ ἀγαθὰς δύω ὥρας, -τὴν μίαν ἐν θαλάμῳ, τὴν μίαν ἐν θανάτῳ. -
-
- - -agathias scholasticus - - -κεῖτο μὲν Ἀλκιμένης κεκακωμένος ἐκ πυρετοῖο, -καὶ περὶ λαυκανίην βραγχὰ λαρυγγιόων, -νυσσόμενός τε τὸ πλευρὸν ἅτε ξιφέεσσιν ἀμυχθέν, -καὶ θαμὰ δυσκελάδοις ἄσθμασι πνευστιόων -ἦλθε δὲ Καλλίγνωτος ὁ Κώιος, ὁ πλατυλέσχης, -τῆς παιωνιάδος πληθόμενος σοφίης, -πᾶσαν ἔχων πρόγνωσιν ἐν ἄλγεσιν, οὔ τι περιττὸν -ἄλλο προαγγέλλων ἢ τὸ γενησόμενον. -Ἀλκιμένους δʼ ἐδόκευεν ἀνάκλισιν, ἔκ τε προσώπου -φράζετο, καὶ παλάμης ψαῦεν ἐπισταμένως, -καὶ τὸ περὶ κρισίμων φαέων ἐλογίζετο γράμμα, -πάντʼ ἀναπεμπάζων οὐχ ἑκὰς Ἱπποκράτους. -καὶ τότε τὴν πρόγνωσιν ἐς Ἀλκιμένην ἀνεφώνει -σεμνοπροσωπήσας καὶ σοβαρευόμενος· -“ εἴ γε φάρυγξ βομβεῦσα, καὶ ἄγρια τύμματα πλευροῦ, -καὶ πυρετῷ λήξει πνεῦμα δασυνόμενον, -οὐκέτι τεθνήξει πλευρίτιδι· τοῦτο γὰρ ἡμῖν -σύμβολον ἐσσομένης ἐστὶν ἀπημοσύνης. - -θάρσει τὸν νομικὸν δὲ κάλει, καὶ χρήματα σαυτοῦ , -εὖ διαθείς, βιότου λῆγε μεριμνοτόκου, -καί με τὸν ἰητρόν, προρρήσιος εἵνεκεν ἐσθλῆς, -ἐν τριτάτᾐ μοίρᾐ κάλλιπε κληρονόμον.ʼ” -
-
- - -palladas - - -ἦν ἄρα καὶ κάνθωσι Τύχη χαλεπή τε καὶ ἐσθλή, -καὶ Κρόνος ὡρονομεῖ τετραπόδων γένεσιν. -ἐξότε γὰρ καὶ τοῦτον ὄνον χαλεπὸς χρόνος ἔσχεν, -ἐξ ἀλαβαρχείης γραμματικοῦ γέγονεν. -τλῆθι φέρειν λοιπόν, κανθήλιε· γραμματικοῖς γὰρ -οὐδὲ τέλος κριθᾖ, κρῖ δὲ μόνον λέγεται. -
-
- - -palladas - - -εἰ μοναχοί, τί τοσοίδε; τοσοίδε δέ, πῶς πάλι μοῦνοι; -ὦ πληθὺς μοναχῶν ψευσαμένη μονάδα. -
-
- - -palladas - - -πλαστὸν ἔχεις τὸν ἔρωτα, φόβῳ δὲ φιλεῖς καὶ ἀνάγκῃ· -τοῦ δὲ φιλεῖν οὕτως οὐδὲν ἀπιστότερον. -
-
- - -palladas - - -στυγνὴν τὴν Νίκην τις ἰδὼν κατὰ τὴν πόλιν ἐχθὲς -εἶπε· θεὰ Νίκη, τίπτε πέπονθας ἄρα ; - -ἡ δʼ ἀποδυρομένη καὶ μεμφομένη κρίσιν, εἶπεν - -οὐκ ἔγνως σὺ μόνος ; Πατρικίῳ δέδομαι. - - -ἦν ἄρα καὶ Νίκη πολυώδυνος, ἣν παρὰ θεσμὸν -πατρίκιος ναύτης ἥρπασεν ὡς ἄνεμον. -
-
- - -palladas - - -πάντες ἅπαξ τρώγουσιν· ὅταν δὲ τρέφῃ Σαλαμῖνος, -οἴκαδʼ ἀριστῶμεν δεύτερον ἐρχόμενοι. -
-
- - -lucillius - - -ἄχρις ἂν ᾖς ἄγαμος, Νουμήνιε, πάντα δοκεῖ σοι -ἐν τῷ ζῆν εἶναι τῶν ἀγαθῶν ἀγαθά· -εἶθʼ ὅταν εἰσέλθῃ γαμετή, πάλιν εὐθὺ δοκεῖ σοι -ἐν τῷ ζῆν εἶναι πάντα κακῶν τὰ κακά. - -ἀλλὰ χάριν τεκνίων — ἕξεις, Νουμήνιε, τέκνα, -χαλκὸν ἔχων πτωχὸς δʼ οὐδὲ τὰ τέκνα φιλεῖ. -
-
- - -lucillius - - -εἰ μὲν ζῇς ἐλάφου ταναὸν χρόνον, ἠὲ κορώνης, -συγγνώμη πλεῖστον πλοῦτον ἀγειρομένῳ· -εἰ δὲ τίς ἐσσι βροτῶν, οὓς αὐτίκα γῆρας ἰάπτει, -μὴ σὲ γʼ ἀπειρεσίων οἶστρος ἕλῃ κτεάνων -μὴ σὺ μὲν ἀτλήτοισιν ἐν ἄλγεσι θυμὸν ὀλέσσῃς, -χρήσωνται δʼ ἄλλοι σοῖς ἀγαθοῖς ἀπόνως. -
-
- - -lucillius - - -εἴ με φιλεῖς, ἔργῳ με φίλει, καὶ μὴ μʼ ἀδικήσῃς, -ἀρχὴν τοῦ βλάπτειν τὴν φιλίαν θέμενος. - -πᾶσι γὰρ ἀνθρώποισιν ἐγὼ πολὺ κρέσσονα φημι -τὴν φανερὰν ἔχθραν τῆς δολερῆς φιλίας. -φασὶ δὲ καὶ νήεσσιν ἁλιπλανέεσσι χερείους -τὰς ὑφάλους πέτρας τῶν φανερῶν σπιλάδων. -
-
- - -lucillius - - -μῦν Ἀσκληπιάδης ὁ φιλάργυρος εἶδεν ἐν οἴκῳ, -καὶ τί ποιεῖς, φησίν, φίλτατε μῦ, παρʼ ἐμοὶ ; - -ἡδὺ δʼ ὁ μῦς γελάσας. “ μηδέν, φίλε, φησί, φοβηθῇς, -οὐχὶ τροφῆς παρὰ σοὶ χρῄζομεν, ἀλλὰ μονῆς.” -
-
- - -lucillius - - -μύρμηκος πτερόεντος ὑπὲρ νώτοιο καθεσθεὶς -Ἄδραστος ῥήτωρ τοῖον ἔλεξεν ἔπος· - -Ἵπτασο· τὸν σὸν ἔχεις, ὦ Πήγασε, Βελλεροφόντην, - -φέρτατον ἡρώων, ἡμιθανῆ σκελετόν. -
-
- - -lucillius - - -οὐκ ἔστιν θυγατρὸς μεῖζον βάρος· εἰ δὲ δοκεῖ σοι, -Εὐκτήμων, εἶναι κοῦφον, ἄκουσον ἐμοῦ. -ἔστιν σοὶ κήλη, κἀμοὶ θυγάτηρ· λάβε ταύτην, -καὶ δός μοι κήλας ἀντὶ μιᾶς ἑκατόν. -
-
- - -anonymi epigrammatici - - -ποιητὴς πανάριστος ἀληθῶς ἐστιν ἐκεῖνος, -ὅστις δειπνίζει τοὺς ἀκροασαμένους. -ἢν δʼ ἀναγινώσκῃ, καὶ νήστιας οἴκαδε πέμπῃ, -εἰς αὑτὸν τρεπέτω τὴν ἰδίαν μανίην. - -
-
- - -nicarchus ii - - -πορδὴ ἀποκτέννει πολλοὺς ἀδιέξοδος οὖσα· -πορδὴ καὶ σῴζει τραυλὸν ἱεῖσα μέλος. -οὐκοῦν εἰ σῴζει, καὶ ἀποκτέννει πάλι πορδή, -τοῖς βασιλεῦσιν ἴσην πορδὴ ἔχει δύναμιν. -
-
- - -pseudo-lucianus - - -πολλάκις οἶνον ἔπεμψας ἐμοί, καὶ πολλάκις ἔγνων -σοὶ χάριν, ἡδυπότῳ νέκταρι τερπόμενος. -νῦν δʼ εἴπερ με φιλεῖς, μὴ πέμψῃς· οὐ δέομαι γὰρ -οἴνου τοιούτου, μηκέτʼ ἔχων θρίδακας. -
-
- - -pseudo-lucianus - - -πολλὰς μυριάδας ψηφίζων Ἀρτεμίδωρος, -καὶ μηδὲν δαπανῶν, ζῇ βίον ἡμιόνων, -πολλάκις αἳ χρυσοῦ τιμαλφέα φόρτον ἔχουσαι -πολλὸν ὑπὲρ νώτου, χόρτον ἔδουσι μόνον. -
-
- - -nicarchus ii - - -τὴν κεφαλὴν βάπτων τις ἀπώλεσε τὰς τρίχας αὐτὰς, -καὶ δασὺς ὢν λίαν, ᾠὸν ἅπας γέγονεν. -τοῦτο βαφεὺς ἐπόησε, τὸ μηκέτι κουρέα τέμνειν -μήτε κόμην λευκὴν μήτε μελαινομένην. -
-
- - -apollinarius - - -γραμματικὸς ποτʼ ὄνῳ ἐποχούμενος ἐξεκυλίσθη, -καὶ τῆς γραμματικῆς, ὡς λόγος, ἐξέπεσεν· -εἶθʼ ἑξῆς ἐβίου κοινὸν βίον, ὡς ἰδιώτης, -ὧν ἐδίδασκεν ἀεὶ μηδὲν ἐπιστάμενος. - -ἀλλὰ Γλύκων ἔπαθεν τοὐναντίον ὢν γὰρ ἄπειρος -καὶ κοινῆς γλώττης, οὐχ ὅτι γραμματικῆς, -νῦν Λιβυκοὺς κάνθωνας ὀχούμενος, εἶτʼ ἀποπίπτων -πολλάκις, ἐξαίφνης γραμματικὸς γέγονεν. -
-
- - -pseudo-lucianus - - -ἵλαθι, Γραμματικὴ φυσίζοε, ἵλαθι λιμοῦ -φάρμακον εὑρομένη μῆνιν ἄειδε θεά. - -νηὸν ἐχρῆν καὶ σοὶ περικαλλέα δωμήσασθαι, -καὶ βωμὸν θυέων μή ποτε δευόμενον. -καὶ γὰρ σοῦ μεσταὶ μὲν ὁδοί, μεστὴ δὲ θάλασσα -καὶ λιμένες, πάντων δέκτρια Γραμματική. -
-
- - -pseudo-lucianus - - -ἰητήρ τις ἐμοὶ τὸν ἑὸν φίλον υἱὸν ἔπεμψεν, -ὥστε μαθεῖν παρʼ ἐμοὶ ταῦτα τὰ γραμματικά. -ὡς δὲ τὸ μῆνιν ἄειδε καὶ “ ἄλγεα μυρίʼ ἔθηκεν -” ἔγνω, καὶ τὸ τρίτον τοῖσδʼ ἀκόλουθον ἔπος - -πολλὰς δʼ ἰφθίμους ψυχὰς Ἄϊδι προΐαψεν, - -οὐκέτι μιν πέμπει πρός με μαθησόμενον. -ἀλλὰ μʼ ἰδὼν ὁ πατήρ, σοὶ μὲν χάρις, εἶπεν, “ἑταῖρε· -αὐτὰρ ὁ παῖς παρʼ ἐμοὶ ταῦτα μαθεῖν δύναται· -καὶ γὰρ ἐγὼ πολλὰς ψυχὰς Ἄϊδι προϊάπτω, -καὶ πρὸς τοῦτʼ οὐδὲν γραμματικοῦ δέομαι.” -π. ; τρανσλατιονς, ξηιεφλψ φρομ τηε γρεεκ αντηολογψ, π.. -
-
- - -pseudo-lucianus - - -μηδείς μοι ταύτην, Ἐρασίστρατε, τὴν σπατάλην σου -ποιήσειε θεῶν, ᾗ σὺ κατασπαταλᾷς, - -ἔσθων ἐκτραπέλως στομάχων κακά, χείρονα λιμοῦ, -οἷα φάγοιεν ἐμῶν ἀντιδίκων τεκνία. -πεινάσαιμι γὰρ αὖθις ἔτι πλέον, ἢ πρὶν ἐπείνων, -ἢ χορτασθείην τῆς παρὰ σοὶ σπατάλης. -
-
- - -pseudo-lucianus - - - -Μισόπτωχε θεά, μούνη πλούτου δαμάτειρα, -ἡ τὸ καλῶς ζῆσαι πάντοτʼ ἐπισταμένη, -εἰ δὲ καὶ ἀλλοτρίοις ἐπιιζομένη ποσὶ χαίρεις, -πιλοφορεῖν τʼ οἶδας, καὶ μύρα σοι μέλεται, -τέρπει καὶ στέφανός σε, καὶ Αὐσονίου πόμα Βάκχου. -ταῦτα παρὰ πτωχοῖς γίνεται οὐδέποτε. -τοὔνεκα νῦν φεύγεις πενίης τὸν ἀχάλκεον οὐδόν, -τέρπᾐ δʼ αὖ πλούτου πρὸς πόδας ἐρχομένη. -
-
- - -pseudo-lucianus - - -οὐδέποτʼ εἰς πορθμεῖον ὁ κηλήτης Διόφαντος -ἐμβαίνει μέλλων εἰς τὸ πέραν ἀπίναι· -τῆς κήλης δʼ ἐπάνωθε τὰ φορτία πάντα τεθεικὼς -καὶ τὸν ὄνον, διαπλεῖ σινδόνʼ ἐπαράμενος. -ὥστε μάτην Τρίτωνες ἐν ὕδασι δόξαν ἔχουσιν, -εἰ καὶ κηλήτης ταὐτὸ ποιεῖν δύναται. -
-
- - -pseudo-lucianus - - -ὁ γρυπὸς Νίκων ὀσφραίνεται οἴνου ἄριστα, -οὐ δύναται δʼ εἰπεῖν οἷος ἂν ᾖ ταχέως. - -ἐν τρισὶν ὥραις γὰρ θεριναῖς μόλις αἰσθάνετʼ αὐτὸς, -ὡς ἂν ἔχων πηχῶν ῥῖνα διακοσίων. -ὦ μεγάλου μυκτῆρος· ὅταν ποταμὸν διαβαίνῃ, -θηρεύει τούτῳ πολλάκις ἰχθύδια. -
-
- - -nicarchus ii - - -τοῦ γρυποῦ Νίκωνος ὁρῶ τὴν ῥῖνα, Μένιππε· -αὐτὸς δʼ οὐ μακρὰν φαίνεται εἶναι ἔτι. -πλὴν ἥξει, μείνωμεν ὅμως· εἰ γὰρ πολύ, πέντε -τῆς ῥινὸς σταδίους, οἴομαι, οὐκ ἀπέχει. -ἀλλʼ αὐτὴ μέν, ὁρᾷς, προπορεύεται· ἢν δʼ ἐπὶ βουνὸν -ὑψηλὸν στῶμεν, καὐτὸν ἐσοψόμεθα. -
-
- - -nicarchus ii - - -τὸν λεπτὸν θακεῦντα Μενέστρατον εἴαρος ὥρῃ -μύρμηξ ἐξελθὼν εἵλκυσεν εἰς ῥαγάδα· -μυῖα δʼ ἐπιπτᾶσ’ αὐτὸν ἀνήρπασεν, ὡς Γανυμήδη -αἰετὸς εἰς θαλάμους οὐρανίους Κρονίδεω· -πίπτεν δʼ ἐκ χειρῶν μυίης, κοὐδʼ ὣς θίγε γαίης, -ἐκ δʼ ἀράχνης ἱστοῦ τῶν βλεφάρων κρέμαται. -
-
- - -lucillius - - -τὴν κεφαλὴν βάπτεις, τὸ δὲ γῆρας οὔποτε βάψεις, -οὐδὲ παρειάων ἐκτανύσεις ῥυτίδας. -μὴ τοίνυν τὸ πρόσωπον ἅπαν ψιμύθῳ κατάπλαττε,, -ὥστε προσωπεῖον, κοὐχὶ πρόσωπον ἔχειν. -οὐδὲν γὰρ πλέον ἐστί· τί μαίνεαι; οὔποτε φῦκος -καὶ ψίμυθος τεύξει τὴν Ἑκάβην Ἑλένην. - -
-
- - -gaetulicus ii - - -τετράκις ἀμφορέως περὶ χείλεσι χείλεα θεῖσα -Σειληνὶς πάσας ἐξερόφησε τρύγας. -εὐχαίτα Διόνυσε, σὲ δʼ ὕδασιν οὐκ ἐμίηνεν -ἀλλʼ οἷος πρώτης ἦλθες ἀπʼ οἰνοπέδης, -τοῖόν σε προὔπινεν ἀφειδέως, ἄγγος ἔχουσα -εἰσότε καὶ νεκύων ἦλθεν ἐπὶ ψάμαθον. -
-
- - -pseudo-lucianus - - -τοῦ πωγωνοφόρου κυνικοῦ, τοῦ βακτροπροσαίτου, -εἴδομεν ἐν δείπνῳ τὴν μεγάλην σοφίαν. -θέρμων μὲν γὰρ πρῶτον ἀπέσχετο καὶ ῥαφανίδων, -μὴ δεῖν δουλεύειν γαστρὶ λέγων ἀρετήν. -εὖτε δʼ ἐν ὀφθαλμοῖσιν ἴδεν χιονώδεα βόλβαν -στρυφνήν, ἣ πινυτὸν ἤδη ἔκλεπτε νόον, -ᾔτησεν παρὰ προσδοκίαν, καὶ ἔτρωγεν ἀληθῶς, -κοὐδὲν ἔφη βόλβαν τὴν ἀρετὴν ἀδικεῖν, -
-
- - -anonymi epigrammatici - - - -τοῦτο πυρὰν μᾶλλον κλῄζειν δεῖ, κοὐ βαλανεῖον, -ἥν ποθʼ ὁ Πηλείδης ἧψε Μενοιτιάδῃ, -ἢ τὸν Μηδείης στέφανον, τὸν % γείτονα Ἐρινὺς -ἐν θαλάμοις Γλαύκης εἵνεκεν Αἰσονίδου. -φεῖσαί μου, βαλανεῦ, πρὸς τοῦ Διός· εἰμὶ γὰρ ἀνὴρ -πάντα γράφων τὰ βροτῶν ἔργα καὶ ἀθανάτων, -εἰ δὲ πρόκειταί σοι πολλοὺς ζῶντας κατακαίειν. -ἅπτε πυρὰν ξυλίνην, δήμιε, μὴ λιθίνην - -
-
- - -antiochus - - -ψυχὴν μὲν γράψαι χαλεπόν, μορφὴν δὲ χαράξαι -ῥᾴδιον ἀλλʼ ἐπὶ σοὶ τοὔμπαλιν ἀμφότερον. -τῆς μὲν γὰρ ψυχῆς τὸ διάστροφον ἔξω ἄγουσα -ἐν τοῖς φαινομένοις ἡ Φύσις εἰργάσατο· -τὸν δʼ ἐπὶ τῆς μορφῆς θόρυβον καὶ σώματος ὕβριν -πῶς ἄν τις γράψαι, μηδʼ ἐσιδεῖν ἐθέλων; -
-
- - -ammianus - - -ὡς κῆπον τεθυκὼς, δεῖπνον παρέθηκεν Ἀπελλῆς, -οἰόμενος βόσκειν ἀντὶ φίλων πρόβατα. -ἦν ῥαφανίς, σέρις ἦν, τῆλις, θρίδακες, πράσα, βολβοί, -ὤκιμον, ἡδύοσμον, πήγανον, ἀσπάραγος· -δείσας δʼ ἐκ τούτων μὴ καὶ χόρτον παραθῇ μοι, -δειπνήσας θέρμους ἡμιβρεχεῖς, ἔφυγον. -
-
- - -hedylus - - -Λυσιμελοῦς Βάκχου καὶ λυσιμελοῦς Ἀφροδίτης -γεννᾶται θυγάτηρ λυσιμελὴς ποδάγρα. -
-
- - -nicarchus ii - - -τίς σοῦ, Μεντορίδη, προφανῶς οὕτως μετέθηκεν -τὴν πυγήν, οὗπερ τὸ στόμʼ ἔκειτο πρὸ τοῦ; -βδεῖς γάρ, κοὐκ ἀναπνεῖς, φθέγγῃ δʼ ἐκ τῶν καταγείω -θαῦμὰ μʼ ἔχει τὰ κάτω πῶς σου ἄνω γέγονεν. -
-
- - -anonymi epigrammatici - - -χρήματα καὶ πόρναις παραγίνεται· οὐκ ἀλεγίζω. -μισείτω με τάλας χρυσὸς ὁ πορνοφίλας. - -
-
- - -anonymi epigrammatici - - -ἐπὶ γυναικὶ πρεσβυτέρᾳ νέῳ ἐνοχλησάσῃ; -ἄλλην δρῦν βαλάνιζε, Μενέσθιον οὐ γὰρ ἔγωγε -ἔκκαιρον μήλων προσδέχομαι ῥυτίδα· -ἀλλʼ αἰεὶ πεπόθηκα συνακμάζουσαν ὀπώρην. -ὥστε τί πειράζεις λευκὸν ἰδεῖν κόρακα; -
-
- - -traJanus imperator - - -ἀντίον ἠελίου στήσας ῥίνα καὶ στόμα χάσκων, -δείξεις τὰς ὥρας πᾶσι παρερχομένοις. -
-
- - -philo - - -αἱ πολιαὶ σὺν νῷ γεραρώτεραι· αἱ γὰρ ἄτερ νοῦ -μᾶλλον τῶν πολλῶν εἰσὶν ὄνειδος ἐτῶν. -
-
- - -anonymi epigrammatici - - -αἱ τρίχες, ἢν σιγᾷς, εἰσὶ φρένες· ἢν δὲ λαλήσῃς, -ὡς αἱ τῆς ἥβης, οὐ φρένες, ἀλλὰ τρίχες. -
-
- - -apollinarius - - -ἄν μὲν ἀπόντα λέγῃς με κακῶς, οὐδὲν ἀδικεῖς με, -ἂν δὲ παρόντα καλῶς, ἴσθι κακῶς με λέγων. -
-
- - -antiochus - - - -Βήσας, εἰ φρένας εἶχεν, ἀπήγχετο· νῦν δʼ ὑπʼ ἀνοίας -καὶ ζῇ καὶ πλουτεῖ, καὶ μετὰ τὴν πάροδον. - -
-
- - -helladius - - -βάπτων πάντα, βαφεῦ, καὶ χρωματίοις μεταβάλλων, -καὶ πενίην βάψας, πλούσιος ἐξεφάνης. -
-
- - -piso - - -γαίης ἐκ Γαλατῶν μηδʼ ἄνθεα, ἧς ἀπὸ κόλπων -ἀνθρώποις ὀλέτειραι Ἐρινύες ἐβλάστησαν. -
-
- - -anonymi epigrammatici - - -γινώσκειν σε θέλω, Πλακιανέ, σαφῶς, ὅτι πᾶσα -ἔγχαλκος γραῖα πλουσία ἐστὶ σορός. -
-
- - -anonymi epigrammatici - - - -γράμμα περισσὸν ἔχεις τὸ προκείμενον ἢν ἀφέλῃ τις -τοῦτό σοι, οἰκεῖον κτήσῃ ἁπλῶς ὄνομα. -
-
- - -pseudo-lucianus - - -δαίμονα πολλὰ λαλῶν ὀζόστομος ἐξορκιστὴς -ἐξέβαλʼ, οὐχ ὅρκων, ἀλλὰ κόπρων δυνάμει. -
-
- - -pseudo-lucianus - - -εἰς τί μάτην νίπτεις δέμας Ἰνδικόν; ἴσχεο τέχνης· -οὐ δύνασαι δνοφερὴν νύκτα καθηλιάσαι. - -
-
- - -pseudo-lucianus - - -ἐν πᾶσιν μεθύουσιν Ἀκινδυνος ἤθελε νήφειν, -τοὔνεκα καὶ μεθύειν αὐτὸς ἔδοξε μόνος. -
-
- - -pseudo-lucianus - - -εἰ τὸ τρέφειν πώγωνα δοκεῖς σοφίαν περιποιεῖν, -καὶ τράγος εὐπώγων αἶψʼ ὅλος ˘ ἐστὶ Πλάτων. -
-
- - -pseudo-lucianus - - -εἰ ταχὺς εἰς τὸ φαγεῖν καὶ πρὸς δρόμον ἀμβλὺς ὑπάρχεις -τοῖς ποσί σου τρῶγε, καὶ τρέχε τῷ στόματι, -
-
- - -pseudo-lucianus - - -ἔσβεσε τὸν λύχνον μῶρος, ψυλλῶν ὑπὸ πολλῶν -δακνόμενος, λέξας· οὐκέτι με βλέπετε. - -
-
- - -pseudo-lucianus - - -ζωγράφε, τὰς μορφὰς κλέπτεις μόνον οὐ δύνασαι δὲ -φωνὴν συλῆσαι χρώματι πειθόμενος. -
-
- - -pseudo-lucianus - - -ἢν ἐσίδῃς κεφαλὴν μαδαράν, καὶ στέρνα,, καὶ ὤμους, -μηδὲν ἐρωτήσῃς· μῶρον ὁρᾷς φαλακρόν, -
-
- - -pseudo-lucianus - - -θαυμάζειν μοι ἔπεισιν, ὅπως Βύτος ἐστὶ σοφιστὴς, -οὔτε λόγον κοινόν, οὔτε λογισμὸν ἔχων. - -
-
- - -pseudo-lucianus - - -θᾶττον ἔην λευκοὺς κόρακας πτηνάς τε χελώνας -εὑρεῖν, ἢ δόκιμον ῥήτορα Καππαδόκην. -
-
- - -aratus - - -αἰάζω Διότιμον, ὃς ἐν πέτραισι κάθηται, -Γαργαρέων παισὶν βῆτα καὶ ἄλφα λέγων. -
-
- - -menander - - -Κορινθίῳ πίστευε, καὶ μὴ χρῶ φίλῳ. -
-
- - -diphilus - - -τὸ μὲν Ἄργος ἵππιον, οἱ δʼ ἐνοικοῦντες λύκοι. -
-
- - -pittacus - - -Μεγαρεῖς δὲ φεῦγε πάντας· εἰσὶ γὰρ πικροί. -
-
- - -philiscus - - -ὁ Πειραιεὺς κάρυον μέγʼ ἐστὶ καὶ κενόν. -
-
- - -anonymi epigrammatici - - -τρίς με τυραννήσαντα τοσαυτάκις ἐξεδίωξεν -δῆμος Ἐρεχθῆος, καὶ τρὶς ἐπηγάγετο, -τὸν μέγαν ἐν βουλῇ Πεισίστρατον, ὃς τὸν Ὅμηρον -ἤθροισα, σποράδην τὸ πρὶν ἀειδόμενον -ἡμέτερος γὰρ κεῖνος ὁ χρύσεος ἦν πολιήτης, -εἴπερ Ἀθηναῖοι Σμύρναν ἀπῳκίσαμεν. -
-
- -
- -καὶ τίς ἂν εἴην εἰ πάντων σοι τῶν εἰρημένων τὴν γνῶσιν ἐκθέμενος τὴν Στράτωνος τοῦ Σαρδιανοῦ Παιδικὴν Μοῦσαν ἀπεκρυψάμην, ἢν αὐτὸς παίζων πρὸς τοὺς πλησίον ἀπεδείκνυτο, τέρψιν οἰκείαν τὴν ἀπαγγελίαν τῶν ἐπιγραμμάτων, οὐ τὸν νοῦν, ποιούμενος. ἔχου τοίνυν τῶν ἑξῆς· ἐν χορείαις γὰρ ἥ γε σώφρων, κατὰ τὸν τραγικόν, οὐ διαφθαρήσεται. -
- - -straton - - -ἐκ Διὸς ἀρχώμεσθα, καθὼς εἴρηκεν Ἄρατος· -ὑμῖν δʼ, ὦ Μοῦσαι, σήμερον οὐκ ἐνοχλῶ. -εἰ γὰρ ἐγὼ παῖδάς τε φιλῶ καὶ παισὶν ὁμιλῶ, -τοῦτο τί πρὸς Μούσας τὰς Ἑλικωνιάδας; -
-
- - -straton - - -μὴ ζήτει δέλτοισιν ἐμαῖς Πρίαμον παρὰ βωμοῖς, -μηδὲ τὰ Μηδείης πένθεα καὶ Νιόβης, -μηδʼ Ἴτυν ἐν θαλάμοις, καὶ ἀηδόνας ἐν πετάλοισιν -ταῦτα γὰρ οἱ πρότεροι πάντα χύδην ἔγραφον· -ἀλλʼ ἱλαραῖς Χαρίτεσσι μεμιγμένον ἡδὺν Ἔρωτα, -καὶ Βρόμιον τούτοις δʼ ὀφρύες οὐκ ἔπρεπον. -
-
- - -straton - - -τῶν παίδων, Διόδωρε, τὰ προσθέματʼ εἰς τρία πίπτει -σχήματα, καὶ τούτων μάνθανʼ ἐπωνυμίας. - -τὴν ἔτι μὲν γὰρ ἄθικτον ἀκμὴν λάλου ὀνόμαζε, -κωκὼ τὴν φυσᾶν ἄρτι καταρχομένην· -τὴν δʼ ἤδη πρὸς χεῖρα σαλευομένην, λέγε σαύραν -τὴν δὲ τελειοτέρην, οἶδας ἃ χρή σε καλεῖν. -
-
- - -straton - - -ἀκμῇ δωδεκέτους ἐπιτέρπομαι· ἔστι δὲ τούτου -χὠ τρισκαιδεκέτης πουλὺ ποθεινότερος· -χὠ τὰ δὶς ἑπτὰ νέμων, γλυκερώτερον ἄνθος Ἐρώτων -τερπνότερος δʼ ὁ τρίτης πεντάδος ἀρχόμενος· -ἑξεπικαιδέκατον δὲ θεῶν ἔτος· ἑβδόματον δὲ -καὶ δέκατον ζητεῖν οὐκ ἐμόν, ἀλλὰ Διός. -εἰ δʼ ἐπὶ πρεσβυτέρους τις ἔχει πόθον, οὐκέτι παίζει, -ἀλλʼ ἤδη ζητεῖ τὸν δʼ ἀπαμειβόμενος. - -
-
- - -straton - - -τοὺς λευκοὺς ἀγαπῶ, φιλέω δʼ ἅμα τοὺς μελιχρώδεις -καὶ ξανθούς, στέργω δʼ ἔμπαλι τοὺς μέλανας. -οὐδὲ κόρας ξανθὰς παραπέμπομαι· ἀλλὰ περισσῶς -τοὺς μελανοφθάλμους αἰγλοφανεῖς τε φιλῶ. -
-
- - -straton - - -πρωκτὸς καὶ χρυσὸς τὴν αὐτὴν ψῆφον ἔχουσιν· -ψηφίζων δʼ ἀφελῶς τοῦτὸ ποθʼ εὗρον ἐγώ. -
-
- - -straton - - -Σφιγκτὴρ οὐκ ἔστιν παρὰ παρθένῳ, οὐδὲ φίλημα -ἁπλοῦν, οὐ φυσικὴ χρωτὸς ἐυπνοΐη, - -οὐ λόγος ἡδὺς ἐκεῖνος ὁ πορνικός, οὐδʼ ἀκέραιον -βλέμμα, διδασκομένη δʼ ἐστὶ κακιοτέρα. -ψυχροῦνται δʼ ὄπιθεν πᾶσαι· τὸ δὲ μεῖζον ἐκεῖνο, -οὐκ ἔστιν ποῦ θῇς τὴν χέρα πλαζομένην. -
-
- - -straton - - -εἶδον ἐγώ τινα παῖδα † ἐπανθοπλοκοῦντα κόρυμβον, -ἄρτι παρερχόμενος τὰ στεφανηπλόκια· -οὐδʼ ἄτρωτα παρῆλθον· ἐπιστὰς δʼ ἥσυχος αὐτῷ -φημὶ πόσου πωλεῖς τὸν σὸν ἐμοὶ στέφανον; - -μᾶλλον τῶν καλύκων δʼ ἐρυθαίνετο, καὶ κατακύψας -φησὶ μακρὰν χώρει, μή σε πατὴρ ἐσίδῃ. - -ὠνοῦμαι προφάσει στεφάνους, καὶ οἴκαδʼ ἀπελθὼν -ἐστεφάνωσα θεούς, κεῖνον ἐπευξάμενος. -
-
- - -straton - - -ἄρτι καλός, Διόδωρε, σύ, καὶ φιλέουσι πέπειρος· -ἀλλὰ καὶ ἢν γήμῃς, οὐκ ἀπολειψόμεθα. -
-
- - -straton - - -εἰ καί σοι τριχόφοιτος ἐπεσκίρτησεν ἴουλος, -καὶ τρυφεραὶ κροτάφων ξανθοφυεῖς ἕλικες, -οὐδʼ οὕτω φεύγω τὸν ἐρώμενον ἀλλὰ τὸ κάλλος -τούτου, κἂν πώγων, κἂν τρίχες, ἡμέτερον. -
-
- - -straton - - -ἐχθὲς ἔχων ἀνὰ νύκτα Φιλόστρατον, οὐκ ἐδυνήθην, -κείνου, πῶς εἴπω; πάντα παρασχομένου. -ἀλλʼ ἐμὲ μηκέτʼ ἔχοιτε φίλοι φίλον, ἀλλʼ ἀπὸ πύργου -ῥίψατʼ, ἐπεὶ λίην Ἀστυάναξ γέγονα, - -
-
- - -statyllius flaccus - - -ἄρτι γενειάζων ὁ καλὸς καὶ στερρὸς ἐρασταῖς -παιδὸς ἐφᾷ Λάδων. σύντομος ἡ Νέμεσις. -
-
- - -straton - - -ἰητροὺς εὗρόν ποτʼ ἐγὼ λείους δυσέρωτας, -τρίβοντας φυσικῆς φάρμακον ἀντιδότου. -οἱ δέ γε φωραθέντες, ἔχʼ ἡσυχίην ἐδέοντο· -κἀγὼ ἔφην σιγῶ, καὶ θεραπεύσετέ με. - -
-
- - -dioscorides - - -Δημόφιλος τοιοῖσδε φιλήμασιν εἰ πρὸς ἐραστὰς -χρήσεται ἀκμαίην, Κύπρι, καθʼ ἡλικίην, -ὡς ἐμὲ νῦν ἐφίλησεν ὁ νήπιος, οὐκέτι νύκτωρ -ἥσυχα τῇ κείνου μητρὶ μενεῖ πρόθυρα. -
-
- - -straton - - -εἰ Γραφικοῦ πυγαῖα σανὶς δέδαχʼ ἐν βαλανείῳ, -ἄνθρωπος τί πάθω; καὶ ξύλον αἰσθάνεται. -
-
- - -straton - - -μὴ κρύπτῃς τὸν ἔρωτα, Φιλόκρατες· αὐτὸς ὁ δαίμων -λακτίζειν κραδίην ἡμετέρην ἱκανός· -ἀλλʼ ἱλαροῦ μετάδος τι φιλήματος. ἔσθʼ ὅτε καὶ σὺ -αἰτήσεις τοιάνδʼ ἐξ ἑτέρων χάριτα. -
-
- - -anonymi epigrammatici - - -οὔ μοι θῆλυς ἔρως ἐγκάρδιος, ἀλλά με πυρσοὶ -ἄρσενες ἀσβέστῳ θῆκαν ὑπʼ ἀνθρακιῇ. -πλειότερον τόδε θάλπος· ὅσον δυνατώτερος ἄρσην -θηλυτέρης, τόσσον χὠ πόθος ὀξύτερος. - -
-
- - -alpheus - - -τλήμονες, οἷς ἀνέραστος ἔφυ βίος· οὔτε γὰρ ἔρξαι -εὐμαρὲς, οὔτε εἰπεῖν ἐστί τι νόσφι πόθων. -καὶ γὰρ ἐγὼ νῦν εἰμι λίην βραδύς· εἰ δʼ ἐπίδοιμι -Ξεινόφιλον, στεροπῆς πτήσομαι ὀξύτερος. -τοὔνεκεν οὐ φεύγειν γλυκὺν ἵμερον, ἀλλὰ διώκειν, -πᾶσι λέγω. ψυχῆς ἐστὶν Ἔρως ἀκόνη. -
-
- - -anonymi epigrammatici - - -οὐ δύναμαί σε θέλων θέσθαι φίλον οὔτε γὰρ αἰτεῖς, -οὔτʼ αἰτοῦντι δίδως, οὔθʼ ἃ δίδωμι δέχῃ. -
-
- - -Julius leonidas - - -ὁ Ζεὺς Αἰθιόπων πάλι τέρπεται εἰλαπίναισιν, -ἢ χρυσὸς Δανάης εἵρπυσεν εἰς θαλάμους· -θαῦμα γὰρ εἰ Περίανδρον ἰδὼν οὐχ ἥρπασε γαίης -τὸν καλὸν ἢ φιλόπαις οὐκέτι νῦν ὁ θεός. -
-
- - -straton - - -Κλέψομεν ἄχρι τίνος τὰ φιλήματα, καὶ τὰ λαθραῖα -νεύσομεν ἀλλήλοις ὄμμασι φειδομένοις; -μέχρι τίνος δʼ ἀτέλεστα λαλήσομεν, ἀμβολίαισι -ζευγνύντες κενεὰς ἔμπαλιν ἀμβολίας; -μέλλοντες τὸ καλὸν δαπανήσομεν ἀλλὰ πρὶν ἐλθεῖν -τὰς φθονεράς, Φείδων, θῶμεν ἐπʼ ἔργα λόγοις. -
-
- - -scythinus - - -ἦλθέν μοι μέγα πῆμα, μέγας πόλεμος, μέγα μοι πῦρ, -Ἤλισσος πλήρης τῶν ἐς ἔρωτʼ ἐτέων, - -αὐτὰ τὰ καίριʼ ἔχων ἑκκαίδεκα, καὶ μετὰ τούτων -πάσας καὶ μικρὰς καὶ μεγάλας χάριτας, -καὶ πρὸς ἀναγνῶναι φωνὴν μέλι, καὶ τὸ φιλῆσαι -χείλεα, καὶ τὸ λαβεῖν ἔνδον, ἀμεμπτότατον. -καὶ τί πάθω; φησὶν γὰρ ὁρᾶν μόνον ἦ ῥʼ ἀγρυπνήσω -πολλάκι, τῇ κενεῇ Κύπριδι χειρομαχῶν. -
-
- - -meleager - - -Ἠγρεύθην ὁ πρόσθεν ἐγώ ποτε τοῖς δυσέρωσι -κώμοις ἠιθέων πολλάκις ἐγγελάσας· -καὶ μʼ ἐπὶ σοῖς ὁ πτανὸς Ἔρως προθύροισι, Μυΐσκε, -στῆσεν ἐπιγράψας σκῦλʼ ἀπὸ Σωφροσύνης. - -
-
- - -tullius laurea - - -εἴ μοι χαρτὸς ἐμὸς Πολέμων καὶ σῶος ἀνέλθοι, -οἷος α - Δήλου κοίρανε, πεμπόμενος, -ῥέξειν οὐκ ἀπόφημι τὸν ὀρθροβόην παρὰ βωμοῖς -ὄρνιν, ὃν εὐχωλαῖς ὡμολόγησα τεαῖς· -εἰ δέ τι τῶν ὄντων τότε οἱ πλέον ἢ καὶ ἔλασσον -ἔλθοι ἔχων, λέλυται τοὐμὸν ὑποσχέσιον. -ἦλθε δὲ σὺν πώγωνι. τόδʼ εἰ φίλον αὐτὸς ἑαυτῷ -εὔξατο, τὴν θυσίην πρᾶσσε τὸν εὐξάμενον. -
-
- - -statyllius flaccus - - -σῶόν μοι Πολέμωνα μολεῖν, ὅτʼ ἔπεμπον, Ἀπόλλω -ᾐτούμην, θυσίην ὄρνιν ὑποσχόμενος. -ἦλθε δέ μοι Πολέμων λάσιος γένυν. οὐ μὰ σέ, Φοῖβε, -ἦλθεν ἐμοί, πικρῷ δʼ ἐξέφυγέν με τάχει. -οὐκέτι σοι θύω τὸν ἀλέκτορα. μή με σοφίζου, -κωφήν μοι σταχύων ἀντιδιδοὺς καλάμην. - -
-
- - -statyllius flaccus - - -εἴ μοι σῳζόμενος Πολέμων ὃν ἔπεμπον ἀνέλθοι -φοινίξειν βωμοὺς ὡμολόγησα τεούς. -νῦν θʼ αὑτῷ Πολέμων ἀνασῴζεται· οὐκέτʼ ἀφῖκται, -Φοῖβε, δασὺς δʼ ἥκων οὐκέτι σῶος ἐμοί. -αὐτὸς ἴσως σκιάσαι γένυν εὔξατο· θυέτω αὐτὸς, -ἀντία ταῖσιν ἐμαῖς ἐλπίσιν εὐξάμενος. -
-
- - -statyllius flaccus - - -σαῖς ἴκελον προὔπεμπον ἐγὼ Πολέμωνα παρειαῖς, -ἢν ἔλθῃ, θύσειν ὄρνιν ὑποσχόμενος· -οὐ δέχομαι φθονεροῖς, Παιάν, φρίσσοντα γενείοις, -τοιούτου τλήμων εἵνεκεν εὐξάμενος. -οὐδὲ μάτην τίλλεσθαι ἀναίτιον ὄρνιν ἔοικεν, -ἢ συντιλλέσθω, Δήλιε, καὶ Πολέμων. -
-
- - -numenius - - -Κῦρος κύριός ἐστι· τί μοι μέλει, εἰ παρὰ γράμμα; -οὐκ ἀναγινώσκω τὸν καλόν, ἀλλὰ βλέπω. -
-
- - -alcaeus - - -Πρώταρχος καλός ἐστι, καὶ οὐ θέλει· ἀλλὰ θελήσει -ὕστερον· ἡ δʼ ὥρη λαμπάδʼ ἔχουσα τρέχει. -
-
- - -alcaeus - - -ἡ κνήμη, Νίκανδρε, δασύνεται· ἀλλὰ φύλαξαι, -μή σε καὶ ἡ πυγὴ ταὐτὸ παθοῦσα λάθῃ· -καὶ γνώσῃ φιλέοντος ὅση σπάνις. ἀλλʼ ἔτι καὶ νῦν -τῆς ἀμετακλήτου φρόντισον ἡλικίης. - -
-
- - -phanias - - -ναὶ Θέμιν, ἀκρήτου καὶ τὸ σκύφος ᾧ σεσάλευμαι, -Πάμφιλε, βαιὸς ἔχει τὸν σὸν ἔρωτα χρόνος· -ἤδη γὰρ καὶ μηρὸς ὑπὸ τρίχα, καὶ γένυς ἡβᾷ, -καὶ Πόθος εἰς ἑτέρην λοιπὸν ἄγει μανίην. -ἀλλʼ ὅτε σοι σπινθῆρος ἔτʼ ἴχνια βαιὰ λέλειπται, -φειδωλὴν ἀπόθου· καιρὸς Ἔρωτι φίλος. -
-
- - -thymocles - - -μέμνῃ που, μέμνῃ, ὅτε τοι ἔπος ἱερὸν εἶπον· -ὥρη κάλλιστον, χʼ ὥρη ἐλαφρότατον -ὥρην οὐδʼ ὁ τάχιστος ἐν αἰθέρι παρφθάσει ὄρνις. -νῦν ἴδε, πάντʼ ἐπὶ γῆς ἄνθεα σεῦ κέχυται. -
-
- - -meleager - - -ἦν καλὸς Ἡράκλειτος, ὅτʼ ἦν ποτε· νῦν δὲ παρʼ ἥβην -κηρύσσει πόλεμον δέρρις ὀπισθοβάταις. -ἀλλά, Πολυξενίδη, τάδʼ ὁρῶν, μὴ γαῦρα φρυάσσου· -ἔστι καὶ ἐν γλουτοῖς φυομένη Νέμεσις. -
-
- - -automedon - - -πρὸς τὸν παιδοτρίβην Δημήτριον ἐχθὲς ἐδείπνουν, -πάντων ἀνθρώπων τὸν μακαριστότατον. -εἷς αὐτοῦ κατέκειθʼ ὑποκόλπιος, εἷς ὑπὲρ ὦμον, -εἷς ἔφερεν τὸ φαγεῖν, εἷς δὲ πιεῖν ἐδίδου· -ἡ τετρὰς ἡ περίβλεπτος. ἐγὼ παίζων δὲ πρὸς αὐτὸν -φημί σὺ καὶ νύκτωρ, φίλτατε, παιδοτριβεῖς; - - -
-
- - -Julius diocles - - -χαῖρέ ποτʼ οὐκ εἰπόντα προσεῖπέ τις· ἀλλʼ ὁ περισσὸς -κάλλεϊ νῦν Δάμων οὐδὲ τὸ χαῖρε λέγει. -ἥξει τις τούτου χρόνος ἔκδικος· εἶτα δασυνθεὶς -ἄρξῃ χαῖρε λέγειν οὐκ ἀποκρινομένοις. -
-
- - -diotimus - - -νῦν αἰτεῖς, ὅτε λεπτὸς ὑπὸ κροτάφοισιν ἴουλος -ἕρπει καὶ μηροῖς ὀξὺς ἔπεστι χνόος· -εἶτα λέγεις ἥδιον ἐμοὶ τόδε. καὶ τίς ἂν εἴποι -κρείσσονας αὐχμηρὰς ἀσταχύων καλάμας; -
-
- - -dioscorides - - -πυγὴν Σωσάρχοιο διέπλασεν Ἀμφιπολίτεω -μυελίνην παίζων ὁ βροτολοιγὸς Ἔρως, -Ζῆνα θέλων ἐρεθίξαι, ὁθούνεκα τῶν Γανυμήδους -μηρῶν οἱ τούτου πουλὺ μελιχρότεροι. -
-
- - -rhianus - - -ὧραί σοι Χάριτές τε κατὰ γλυκὺ χεῦαν ἔλαιον, -ὦ πυγά· κνώσσειν δʼ οὐδὲ γέροντας ἐᾷς. -λέξον μοι. τίνος ἐσσὶ μάκαιρα τύ, καὶ τίνα παίδων -κοσμεῖς; ἁ πυγὰ δʼ εἶπε· Μενεκράτεος. - -
-
- - -anonymi epigrammatici - - -ἐσβέσθη Νίκανδρος, ἀπέπτατο πᾶν ἀπὸ χροιῆς -ἄνθος, καὶ χαρίτων λοιπὸν ἔτʼ οὐδʼ ὄνομα, -ὃν πρὶν ἐν ἀθανάτοις ἐνομίζομεν. ἀλλὰ φρονεῖτε -μηδὲν ὑπὲρ θνητούς, ὦ νέοι· εἰσὶ τρίχες. - -
-
- - -anonymi epigrammatici - - -μὴ κδύσῃς, ἄνθρωπε, τὸ χλαινίον, ἀλλὰ θεώρει -οὕτως ἀκρολίθου κἀμὲ τρόπον ξοάνου. -γυμνὴν Ἀντιφίλου ζητῶν χάριν, ὡς ἐπʼ ἀκάνθαις -εὑρήσεις ῥοδέαν φυομένην κάλυκα, -
-
- - -meleager - - -οὐκέτι μοι Θήρων γράφεται καλός, οὐδʼ ὁ πυραυγὴς -πρίν ποτε, νῦν δʼ ἤδη δαλός, Ἀπολλόδοτος. -στέργω θῆλυν ἔρωτα· δασυτρώγλων δὲ πίεσμα -λασταύρων μελέτω ποιμέσιν αἰγοβάταις. -
-
- - -dioscorides - - -βλέψον ἐς Ἑρμογένην πλήρει χερί, καὶ τάχα πρήξεις -παιδοκόραξ ὧν σοι θυμὸς ὀνειροπολεῖ, -καὶ στυγνὴν ὀφρύων λύσεις τάσιν· ἢν δʼ ἁλιεύῃ -ὀρφανὸν ἀγκίστρου κύματι δοὺς κάλαμον, -ἕλξεις ἐκ λιμένος πολλὴν δρόσον οὐδὲ γὰρ αἰδὼς -οὐδʼ ἔλεος δαπάνῳ κόλλοπι συντρέφεται, -
-
- - -callimachus - - -ἐχθαίρω τὸ ποίημα τὸ κυκλικόν, οὐδὲ κελεύθῳ -χαίρω τίς πολλοὺς ὧδε καὶ ὧδε φέρει· -μισῶ καὶ περίφοιτον ἐρώμενον, οὐδʼ ἀπὸ κρήνης -πίνω· σικχαίνω πάντα τὰ δημόσια. -Λυσανίη, σὺ δὲ ναίχι καλὸς καλός· ἀλλὰ πρὶν εἰπεῖν -τοῦτο σαφῶς, ἠχὼ φησί τις ἄλλος ἔχει. - - -
-
- - -glaucus - - -ἦν ὅτε παῖδας ἔπειθε πάλαι ποτὲ δῶρα φιλεῦντας -ὄρτυξ, καὶ ῥαπτὴ σφαῖρα, καὶ ἀστράγαλοι· -νῦν δὲ λοπὰς καὶ κέρμα· τὰ παίγνια δʼ οὐδὲν ἐκεῖνα -ἰσχύει. ζητεῖτʼ ἄλλο τι, παιδοφίλαι. -
-
- - -posidippus - - -ναὶ ναὶ βάλλετʼ, Ἔρωτες· ἐγὼ σκοπὸς εἷς ἅμα πολλοῖς -κεῖμαι. μὴ φείσησθʼ, ἄφρονες· ἢν γὰρ ἐμὲ -νικήσητʼ, ὀνομαστοὶ ἐν ἀθανάτοισιν ἔσεσθε -τοξόται, ὡς μεγάλης δεσπόται ἰοδόκης. -
-
- - -asclepiades - - -οὐκ εἴμʼ οὐδʼ ἐτέων δύο κεἴκοσι, καὶ κοπιῶ ζῶν. -Ὥρωτες, τί κακὸν τοῦτο; τί με φλέγετε; -ἢν γὰρ ἐγώ τι πάθω, τί ποιήσετε; δῆλον, Ἔρωτες, -ὡς τὸ πάρος παίξεσθʼ ἄφρονες ἀστραγάλοις. -
-
- - -meleager - - -ματρὸς ἔτʼ ἐν κόλποισιν ὁ νήπιος ὀρθρινὰ παίζων -ἀστραγάλοις τοὐμὸν πνεῦμʼ ἐκύβευσεν Ἔρως. -
-
- - -meleager - - -κεῖμαι· λὰξ ἐπίβαινε κατʼ αὐχένος, ἄγριε δαῖμον. -οἶδά σε, ναὶ μὰ θεούς, καὶ ˘ βαρὺν ὄντα φέρειν -οἶδα καὶ ἔμπυρα τόξα. βαλὼν δʼ ἐπʼ ἐμὴν φρένα πυρσούς, -οὐ φλέξεις· ἤδη πᾶσα γάρ ἐστι τέφρη. - -
-
- - -meleager - - -Ζωροπότει, δύσερως, καὶ σοῦ φλόγα τὰν φιλόπαιδα -κοιμάσει λάθας δωροδότας Βρόμιος· -ζωροπότει, καὶ πλῆρες ἀφυσσάμενος σκύφος οἴνας, -ἔκκρουσον στυγερὰν ἐκ κραδίας ὀδύναν. -
-
- - -asclepiades - - -πῖνʼ, Ἀσκληπιάδη· τί τὰ δάκρυα ταῦτα; τί πάσχεις -οὐ σὲ μόνον χαλεπὴ Κύπρις ἐληίσατο, -οὐδʼ ἐπὶ σοὶ μούνῳ κατεθήξατο τόξα καὶ ἰοὺς -πικρὸς Ἔρως. τί ζῶν ἐν σποδιῇ τίθεσαι; -πίνωμεν Βάκχου ζωρὸν πόμα· δάκτυλος ἀώς· -ἦ πάλι κοιμιστὰν λύχνον ἰδεῖν μένομεν; -πίνωμεν, δύσερως· ˘ μετά τοι χρόνον οὐκέτι πουλύν, -σχέτλιε, τὴν μακρὰν νύκτʼ ἀναπαυσόμεθα. -
-
- - -callimachus - - -ἔγχει, καὶ πάλιν εἰπέ, Διοκλέος· οὐδʼ Ἀχελῷος -κείνου τῶν ἱερῶν αἰσθάνεται κυάθων. -καλὸς ὁ παῖς, Ἀχελῷε, λίην καλός· εἰ δέ τις οὐχὶ -φησὶν—ἐπισταίμην μοῦνος ἐγὼ τὰ καλά. -
-
- - -meleager - - -οὔριος ἐμπνεύσας ναύταις Νότος, ὦ δυσέρωτες, -ἥμισύ μευ ψυχᾶς ἅρπασεν Ἀνδράγαθον. - -τρὶς μάκαρες νᾶες, τρὶς δʼ ὄλβια κύματα πόντου, -τετράκι δʼ εὐδαίμων παιδοφορῶν ἄνεμος, -εἴθʼ εἴην δελφίς, ἵνʼ ἐμοῖς βαστακτὸς ἐπʼ ὤμοις -πορθμευθεὶς ἐσίδῃ τὰν γλυκόπαιδα Ῥόδον. -
-
- - -meleager - - -Εὔφορτοι νᾶες πελαγίτιδες, αἳ πόρον Ἕλλης -πλεῖτε, καλὸν κόλποις δεξάμεναι Βορέην, -ἤν που ἐπʼ ἠιόνων Κῴαν κατὰ νᾶσον ἴδητε -Φανίον εἰς χαροπὸν δερκομεναν πέλαγος, -τοῦτʼ ἔπος ἀγγείλαιτε, “καλαὶ νέες, ὥς με κομίζει -ἵμερος οὐ ναύταν, ποσσὶ δὲ πεζοπόρον. -εἰ” γὰρ τοῦτʼ εἴποιτʼ, εὐάγγελοι, αὐτίκα καὶ Ζεὺς -οὔριος ὑμετέρας πνεύσεται εἰς ὀθόνας. -
-
- - -meleager - - -ἀρνεῖται τὸν Ἔρωτα τεκεῖν ἡ Κύπρις, ἰδοῦσα -ἄλλον ἐν ἠιθέοις Ἵμερον Ἀντίοχον, -ἀλλά, νέοι, στέργοιτε νέον Πόθον ἦ γὰρ ὁ κοῦρος -εὕρηται κρείσσων οὗτος Ἔρωτος Ἔρως. -
-
- - -anonymi epigrammatici - - -Λητοΐδη, σὺ μὲν ἔσχες ἁλίρρυτον αὐχένα Δήλου, -κοῦρε Διὸς μεγάλου, θέσφατα πᾶσι λέγων· -Κεκροπίαν δʼ Ἐχέδημος, ὁ δεύτερος Ἀτθίδι Φοῖβος, -ᾧ καλὸν ἁβροκόμης ἄνθος ἔλαμψεν Ἔρως. -ἡ δʼ ἀνὰ κῦμʼ ἄρξασα καὶ ἐν χθονὶ πατρὶς Ἀθήνη -νῦν κάλλει δούλην Ἑλλάδʼ ὑπηγάγετο. - -
-
- - -meleager - - -εἰκόνα μὲν Παρίην ζωογλύφος ἄνυσ’ Ἔρωτος -Πραξιτέλης, Κύπριδος παῖδα τυπωσάμενος, -νῦν δʼ ὁ θεῶν κάλλιστος Ἔρως ἔμψυχον ἄγαλμα, -αὑτὸν ἀπεικονίσας, ἔπλασε Πραξιτέλην· -ὄφρʼ ὁ μὲν ἐν θνατοῖς, ὁ δʼ ἐν αἰθέρι φίλτρα βραβεύῃ, -γῆς θʼ ἅμα καὶ μακάρων σκηἸττροφορώσι Πόθοι, -ὀλβίστη Μερόπων ἱερὰ πόλις, ἃ θεόπαιδα -καινὸν Ἔρωτα νέων θρέψεν ὑφαγεμόνα. -
-
- - -meleager - - -Πραξιτέλης ὁ πάλαι ζωογλύφος ἁβρὸν ἄγαλμα -ἄψυχον, μορφᾶς κωφὸν ἔτευξε τύπον, -πέτρον ἐνειδοφορῶν· ὁ δὲ νῦν, ἔμψυχα μαγεύων, -τὸν τριπανοῦργον Ἔρωτʼ ἔπλασεν ἐν κραδίᾳ. -ἦ τάχα τοὔνομʼ ἔχει ταὐτὸν μόνον, ἔργα δὲ κρέσδω, -οὐ λίθον, ἀλλὰ φρενῶν πνεῦμα μεταρρυθμίσας. -ἵλαος πλάσσοι τὸν ἐμὸν τρόπον, ὄφρα τυπώσας -ἐντὸς ἐμὴν ψυχὴν ναὸν Ἔρωτος ἔχῃ. -
-
- - -rhianus - - -ἡ Τροιζὴν ἀγαθὴ κουροτρόφος· οὐκ ἂν ἁμάρτοις -αἰνήσας παίδων οὐδὲ τὸν ὑστάτιον. -τόσσον δʼ Ἐμπεδοκλῆς φανερώτερος, ὅσσον ἐν ἄλλοις -ἄνθεσιν εἰαρινοῖς καλὸν ἔλαμψε ῥόδον. - -
-
- - -meleager - - -Ἁβρούς, ναὶ τὸν Ἔρωτα, τρέφει Τύρος· ἀλλὰ Μυΐσκος -ἔσβεσεν ἐκλάμψας ἀστέρας ἠέλιος. -
-
- - -meleager - - -ἢν ἐνίδω Θήρωνα, τὰ πάνθʼ ὁρῶ· ἢν δὲ τὰ πάντα -βλέψω, τόνδε δὲ μή, τἄμπαλιν οὐδὲν ὁρῶ. -
-
- - -anonymi epigrammatici - - -ἄθρει· μὴ διὰ παντὸς ὅλαν κατάτηκʼ, Ἀρίβαζε, -τὰν Κνίδον ἁ πέτρα θρυπτομένα, φέρεται. -
-
- - -anonymi epigrammatici - - -ματέρες αἱ Περσῶν, καλὰ μὲν καλὰ τέκνα τέκεσθε -ἀλλʼ Ἀρίβαζος ἐμοὶ κάλλιον ἢ τὸ καλόν. -
-
- - -meleager - - -σιγῶν Ἡράκλειτος ἐν ὄμμασι τοῦτʼ ἔπος αὐδᾷ· - -καὶ Ζηνὸς φλέξω πῦρ τὸ κεραυνοβόλον. - -ναὶ μὴν καὶ Διόδωρος ἐνὶ στέρνοις τόδε φωνεῖ· - -καὶ πέτρον τήκω χρωτὶ χλιαινόμενον. - -δύστανος, παίδων ὃς ἐδέξατο τοῦ μὲν ἀπʼ ὄσσων -λαμπάδα, τοῦ δὲ πόθοις τυφόμενον γλυκὺ πῦρ. -
-
- - -alcaeus - - -Ζεύς Πίσης μεδέων, Πειθήνορα, δεύτερον υἷα -Κύπριδος, αἰπεινῷ στέψον ὑπὸ Κρονίῳ· - -μηδέ μοι οἰνοχόον κυλίκων σέθεν αἰετὸς ἀρθεὶς -μάρψαις ἀντὶ καλοῦ, κοίρανε, Δαρδανίδου. -εἰ δέ τι Μουσάων τοι ἐγὼ φίλον ὤπασα δῶρον, -νεύσαις μοι θείου παιδὸς ὁμοφροσύνην. -
-
- - -meleager - - -εἰ Ζεὺς κεῖνος ἔτʼ ἐστίν, ὁ καὶ Γανυμήδεος ἀκμὴν -ἁρπάξας, ἵνʼ ἔχῃ νέκταρος οἰνοχόον, -κἠμοὶ τὸν καλόν ἐστιν ἐνὶ σπλάγχνοισι Μυΐσκον -κρύπτειν, μή με λάθῃ παιδὶ βαλὼν πτέρυγας. -
-
- - -anonymi epigrammatici - - -Κρίνατʼ, Ἔρωτες, ὁ παῖς τίνος ἄξιος. εἰ μὲν ἀληθῶς -ἀθανάτων, ἐχέτω· Ζανὶ γὰρ οὐ μάχομαι. -εἰ δέ τι καὶ θνατοῖς ὑπολείπεται, εἴπατʼ, Ἔρωτες, -Δωρόθεος τίνος ἦν, καὶ τίνι νῦν δέδοται. -ἐν φανερῷ φωνεῦσιν· ἐμὴ χάρις. — “ ἀλλʼ ἀποχώρει. -μὴ % μετι πρὸς τὸ καλὸν καὶ σὺ μάταια φέρῃ.” -
-
- - -anonymi epigrammatici - - -τὸν καλὸν οὐχ ὁρόω Διονύσιον. ἆρά γʼ ἀναρθείς, -Ζεῦ πάτερ, ἀθανάτοις δεύτερος οἰνοχοεῖ; -αἰετέ, τὸν χαρίεντα, ποτὶ πτερὰ πυκνὰ τινάξας, -πῶς ἔφερες; μή που κνίσματʼ ὄνυξιν ἔχει; -
-
- - -meleager - - -οὐκ ἐθέλω Χαρίδαμον ὁ γὰρ καλὸς εἰς Δία λεύσσει, -ὡς ἤδη νέκταρ τῷ θεῷ οἰνοχοῶν - -οὐκ ἐθέλω· τί δέ μοι τὸν ἐπουρανίων βασιλῆα -ἄνταθλον νίκης τῆς ἐν ἔρωτι λαβεῖν; -ἀρκοῦμαι δʼ, ἢν μοῦνον ὁ παῖς ἀνιὼν ἐς Ὄλυμπον, -ἐκ γῆς νίπτρα ποδῶν δάκρυα τἀμὰ λάβῃ, -μναμόσυνον στοργῆς· γλυκὺ δʼ ὄμμασι νεῦμα δίυγρον -δοίη, καί τι φίλημʼ ἁρπάσαι ἀκροθιγές. -τἆλλα δὲ πάντʼ ἐχέτω Ζεύς, ὡς θέμις· εἰ δʼ ἐθελήσοι, -ἦ τάχα που κἠγὼ γεύσομαι ἀμβροσίας, -
-
- - -anonymi epigrammatici - - -Ζεῦ, προτέρω τέρπου Γανυμήδεϊ· τὸν δʼ ἐμόν, ὦναξ, -Δέξανδρον δέρκευ τηλόθεν οὐ φθονέω. -εἰ δὲ βίῃ τὸν καλὸν ἀποίσεαι, οὐκέτʼ ἀνεκτῶς -δεσπόζεις· ἀπίτω καὶ τὸ βιοῦν ἐπὶ σοῦ, -
-
- - -meleager - - -Στήσομʼ ἐγὼ καὶ Ζηνὸς ἐναντίον, εἴ σε, Μυΐσκε, -ἁρπάζειν ἐθέλοι νέκταρος οἰνοχόον. -καίτοι πολλάκις αὐτὸς ἐμοὶ τάδʼ ἔλεξε· “τί ταρβεῖς; -οὔ σε βαλῶ ζήλοις· οἶδα παθὼν ἐλεεῖν.” -χὠ μὲν δὴ τάδε φησὶν ἐγὼ δʼ, ἢν μυῖα παραπτῇ, -ταρβῶ μὴ ψεύστης Ζεὺς ἐπʼ ἐμοὶ γέγονεν. -
-
- - -callimachus - - -Θεσσαλικὲ Κλεόνικε τάλαν, τάλαν οὐ μὰ τὸν ὀξὺν -ἥλιον, οὐκ ἔγνων σχέτλιε, ποῦ γέγονας; -ὀστέα σοι καὶ μοῦνον ἔτι τρίχες. ἦ ῥά σε δαίμων -οὑμὸς ἔχει, χαλεπῇ δʼ ἤντεο θευμορίῃ; - -ἔγνων Εὐξίθεός σε συνήρπασε· καὶ σὺ γὰρ ἐλθὼν -τὸν καλόν, ὦ μόχθηρʼ, ἔβλεπες ἀμφοτέροις. -
-
- - -meleager - - -ἤδη μὲν γλυκὺς ὄρθρος· ὁ δʼ ἐν προθύροισιν ἄυπνος -Δᾶμις ἀποψύχει πνεῦμα τὸ λειφθὲν ἔτι, -σχέτλιος, Ἡράκλειτον ἰδών ἔστη γὰρ ὑπʼ αὐγὰς -ὀφθαλμῶν, βληθεὶς κηρὸς ἐς ἀνθρακιήν. -ἀλλά μοι ἔγρεο, Δᾶμι δυσάμμορε· καὐτὸς Ἔρωτος -ἕλκος ἔχων ἐπὶ σοῖς δάκρυσι δακρυχέω. -
-
- - -callimachus - - -ἥμισύ μευ ψυχῆς ἔτι τὸ πνέον, ἥμισυ δʼ οὐκ οἶδʼ -εἴτʼ Ἔρος εἴτʼ Ἀίδης ἥρπασε· πλὴν ἀφανές. -ἦ ῥὰ τινʼ ἐς παίδων πάλιν ᾤχετο; καὶ μὲν ἀπεῖπον -πολλάκι· τὴν δρῆστιν μὴ ὑποδέχεσθε, νέοι. - -† ουκισυ δίφησον ἐκεῖσε γὰρ ἡ λιθόλευστος -κείνη καὶ δύσερως οἶδʼ ὅτι που στρέφεται. -
-
- - -meleager - - -ἤν τι πάθω, Κλεόβουλε, ʽτὸ γὰρ πλέον ἐν πυρὶ παίδων -βαλλόμενος κεῖμαι λείψανον ἐν σποδιῇ·̓ -λίσσομαι, ἀκρήτῳ μέθυσον, πρὶν ὑπὸ χθόνα θέσθαι, -κάλπιν, ἐπιγράψας δῶρον Ἔρως Ἀίδῃ. - -
-
- - -asclepiades - - -εἰ πτερά σοι προσέκειτο, καὶ ἐν χερὶ τόξα καὶ ἰοί, -οὐκ ἂν Ἔρως ἐγράφη Κύπριδος, ἀλλὰ σύ, παῖς. - -
-
- - -meleager - - -εἰ μὴ τόξον Ἔρως, μηδὲ πτερά, μηδὲ φαρέτραν, -μηδὲ πυριβλήτους εἶχε πόθων ἀκίδας, -οὐκ, αὐτὸν τὸν πτανὸν ἐπόμνυμαι, οὔποτʼ ἂν ἔγνως -ἐκ μορφᾶς τίς ἔφυ Ζωίλος ἢ τίς Ἔρως. -
-
- - -posidippus - - -εἰ καθύπερθε λάβοις χρύσεα πτερά, καί σευ ἀπʼ ὤμων -τείνοιτʼ ἀργυρέων ἰοδόκος φαρέτρη, -καὶ σταίης παρʼ Ἔρωτα, φίλʼ, Ἄγλαον, οὐ μὰ τὸν Ἑρμῆν, -οὐδʼ αὐτὴ Κύπρις γνώσεται ὃν τέτοκεν. -
-
- - -meleager - - -εἰ χλαμύδʼ εἶχεν Ἔρως, καὶ μὴ πτερά, μηδʼ ἐπὶ νώτων -τόξα τε καὶ φαρέτραν, ἀλλʼ ἐφόρει πέτασον, -ναί, τὸν γαῦρον ἔφηβον ἐπόμνυμαι, Ἀντίοχος μὲν -ἦν ἂν Ἔρως, ὁ δʼ Ἔρως τἄμπαλιν Ἀντίοχος. -
-
- - -anonymi epigrammatici - - -Ἀντίπατρὸς μʼ ἐφίλησ’ ἤδη λήγοντος ἔρωτος, -καὶ πάλιν ἐκ ψυχρῆς πῦρ ἀνέκαυσε τέφρης· -δὶς δὲ μιῆς ἄκων ἔτυχον φλογός. ὦ δυσέρωτες, -φεύγετε, μὴ πρήσω τοὺς πέλας ἁψάμενος. -
-
- - -meleager - - -ψυχὴ δυσδάκρυτε, τί σοι τὸ πεπανθὲν Ἔρωτος -τραῦμα διὰ σπλάγχνων αὖθις ἀναφλέγεται; - -μή, μή, πρὸς σὲ Διός, μή, πρὸς Διός, ὦ φιλάβουλε, -κινήσῃς τέφρῃ πῦρ ὑπολαμπόμενον. -αὐτίκα γάρ, λήθαργε κακῶν, πάλιν εἴ σε φυγοῦσαν -λήψετʼ Ἔρως, εὑρὼν δραπέτιν αἰκίσεται. -
-
- - -meleager - - -Ψυχαπάται δυσέρωτες, ὅσοι φλόγα τὰν φιλόπαιδα -οἴδατε, τοῦ πικροῦ γευσάμενοι μέλιτος, -ψυχρὸν ὕδωρ † νίψαι, ψυχρόν, τάχος, ἄρτι τακείσης -ἐκ χιόνος τῇ μῇ χεῖτε περὶ κραδίῃ· -ἦ γὰρ ἰδεῖν ἔτλην Διονύσιον. ἀλλʼ, ὁμόδουλοι, -πρὶν ψαῦσαι σπλάγχνων, πῦρ ἀπʼ ἐμεῦ σβέσατε. -
-
- - -meleager - - -ἔσπευδον τὸν Ἔρωτα φυγεῖν ὁ δὲ βαιὸν ἀνάψας -φανίον ἐκ τέφρης, εὗρέ με κρυπτόμενον· -κυκλώσας δʼ οὐ τόξα, χερὸς δʼ ἀκρώνυχα δισσόν, -κνίσμα πυρὸς θραύσας, εἰς μὲ λαθὼν ἔβαλεν -ἐκ δὲ φλόγες πάντῃ μοι ἐπέδραμον. ὦ βραχὺ φέγγος -λάμψαν ἐμοὶ μέγα πῦρ, Φανίον, ἐν κραδίᾳ. -
-
- - -meleager - - -οὒ μʼ ἔτρωσεν Ἔρως τόξοις,. οὐ λαμπάδʼ ἀνάψας, -ὡς πάρος, αἰθομέναν θῆκεν ὑπὸ κραδίᾳ· -σύγκωμον δὲ Πόθοισι φέρων Κύπριδος μυροφεγγὲς -φανίον, ἄκρον ἐμοῖς ὄμμασι πῦρ ἔβαλεν -ἐκ δέ με φέγγος ἔτηξε. τὸ δὲ βραχὺ φανίον ὤφθη -πῦρ ψυχῆς τῇ μῇ καιόμενον κραδίᾳ. - -
-
- - -meleager - - -ὤνθρωποι, βωθεῖτε· τὸν ἐκ πελάγευς ἐπὶ γαῖαν -ἄρτι με πρωτόπλουν ἴχνος ἐρειδόμενον -ἕλκει τῇδʼ ὁ βίαιος Ἔρως· φλόγα δʼ οἷα προφαίνων -παιδὸς † ἀπεστρέπτει κάλλος ἐραστὸν ἰδεῖν. -βαίνω δʼ ἴχνος ἐπʼ ἴχνος, ἐν ἀέρι δʼ ἡδὺ τυπωθὲν -εἶδος ἀφαρπάζων χείλεσιν ἡδὺ φιλῶ. -ἆρά γε τὴν πικρὰν προφυγὼν ἅλα, πουλύ τι κείνης -πικρότερον χέρσῳ κῦμα περῶ Κύπριδος ; -
-
- - -meleager - - -Οἰνοπόται δέξασθε τὸν ἐκ πελάγευς, ἅμα πόντον -καὶ κλῶπας προφυγόντʼ, ἐν χθονὶ δʼ ὀλλύμενον. -ἄρτι γὰρ ἐκ νηός με μόνον πόδα θέντʼ ἐπὶ γαῖαν -ἀγρεύσας ἕλκει τῇδʼ ὁ βίαιος Ἔρως, -ἐνθάδʼ ὅπου τὸν παῖδα διαστείχοντʼ ἐνόησα· -αὐτομάτοις δʼ ἄκων ποσσὶ ταχὺς φέρομαι. -κωμάζω δʼ οὐκ οἶνον ὑπὸ φρένα, πῦρ δὲ γεμισθείς. -ἀλλὰ φίλοι, ξεῖνοι, βαιὸν ἐπαρκέσατε, -ἀρκέσατʼ , ὦ ξεῖνοι, κἀμὲ Ξενίου πρὸς Ἔρωτος -δέξασθʼ ὀλλύμενον τὸν φιλίας ἱκέτην. -
-
- - -meleager - - -ἁ Κύπρις θήλεια γυναικομανῆ] φλόγα βάλλει· -ἄρσενα δʼ αὐτὸς Ἔρως ἵμερον ἁνιοχεῖ. -ποῖ ῥέψω; ποτὶ παῖδʼ ἢ ματέρα; φαμὶ δὲ καὐτὰν -Κύπριν ἐρεῖν· νικᾷ τὸ θρασὺ παιδάριον - - -
-
- - -anonymi epigrammatici - - -τλῆμον Ἔρως, οὐ θῆλυν ἐμοὶ πόθον, ἀλλὰ τινʼ αἰεὶ -δινεύεις στεροπὴν καύματος ἀρσενικοῦ. -ἄλλοτε γὰρ Δήμωνι πυρούμενος, ἄλλοτε λεύσσων -Ἰσμηνόν, δολιχοὺς αἰὲν ἔχω καμάτους. -οὐ μούνοις δʼ ἐπὶ τοῖσι δεδόρκαμεν ἀλλʼ ἐπιπάντων -ἄρκυσι πουλυμανῆ κανθὸν ἐφελκόμεθα. -
-
- - -anonymi epigrammatici - - -δισσοί με τρύχουσι καταιγίζοντες ἔρωτες, -Εὔμαχε, καὶ δισσαῖς ἐνδέδεμαι μανίαις· -ᾗ μὲν ἐπʼ Ἀσάνδρου κλίνω δέμας, ᾗ δὲ πάλιν μοι -ὀφθαλμὸς νεύει Τηλέφου ὀξύτερος. -τμήξατʼ, ἐμοὶ τοῦθʼ ἡδύ, καὶ εἰς πλάστιγγα δικαίην -νειμάμενοι, κλήρῳ τἀμὰ φέρεσθε μέλη. -
-
- - -anonymi epigrammatici - - -Κύπρι, τί μοι τρισσοὺς ἐφʼ ἕνα σκοπὸν ἤλασας ἰούς, -ἐν δὲ μιῇ ψυχῇ τρισσὰ πέπηγε βέλη; -καὶ τῇ μὲν φλέγομαι, τῇ δʼ ἕλκομαι· ᾗ δʼ ἀπονεύσω, -διστάζω, λάβρῳ δʼ ἐν πυρὶ πᾶς φλέγομαι. -
-
- - -anonymi epigrammatici - - -οὐκέτʼ ἐρῶ. πεπάλαικα πόθοις τρισὶν εἷς μὲν ἑταίρης, -εἷς δέ με παρθενικῆς, εἷς δὲ μʼ ἔκαυσε νέου· -καὶ κατὰ πᾶν ἤλγηκα. γεγύμνασμαι μέν, ἑταίρης -πείθων τὰς ἐχθρὰς οὐδὲν ἔχοντι θύρας· - -ἔστρωμαι δὲ κόρης ἐπὶ παστάδος αἰὲν ἄυπνος, -ἓν τὸ ποθεινότατον παιδὶ φίλημα διδούς. -οἴμοι· πῶς εἴπω πῦρ τὸ τρίτον; ἐκ γὰρ ἐκείνου -βλέμματα καὶ κενεὰς ἐλπίδας οἶδα μόνον. -
-
- - -polystratus - - -Δισσὸς Ἔρως αἴθει ψυχὴν μίαν. ὦ τὰ περισσὰ -ὀφθαλμοὶ πάντῃ πάντα κατοσσόμενοι, -εἴδετε τὸν χρυσέαισι περίσκεπτον χαρίτεσσιν -Ἀντίοχον, λιπαρῶν ἄνθεμον ἠιθέων. -ἀρκείτω· τί τὸν ἡδὺν ἐπηυγάσσασθε καὶ ἁβρὸν -Στασικράτη, Παφίης ἔρνος ἰοστεφάνου; -καίεσθε, τρύχεσθε, καταφλέχθητέ ποτʼ ἤδη· -οἱ δύο γὰρʼ ψυχὴν οὐκ ἂν ἕλοιτε μίαν. -
-
- - -meleager - - -προδόται ψυχῆς, παίδων κύνες, αἰὲν ἐν ἰξῷ -Κύπριδος ὀφθαλμοὶ βλέμματα χριόμενοι, -ἡρπάσατʼ ἄλλον Ἔρωτʼ , ἄρνες λύκον, οἷα κορώνη -σκορπίον, ὡς τέφρη πῦρ ὑποθαλπόμενον. -δρᾶθʼ ὅ τι καὶ βούλεσθε. τί μοι νενοτισμένα χεῖτε -δάκρυα, πρὸς δʼ Ἱκέτην αὐτομολεῖτε τάχος; -ὀπτᾶσθʼ ἐν κάλλει, τύφεσθʼ ὑποκαόμενοι νῦν, -ἄκρος ἐπεὶ ψυχῆς ἐστὶ μάγειρος Ἔρως. -
-
- - -rhianus - - -οἱ παῖδες λαβύρινθος ἀνέξοδος· ᾗ γὰρ ἂν ὄμμα -ῥίψῃς, ὡς ἰξῷ τοῦτο προσαμπέχεται, - -τῇ μὲν γὰρ Θεόδωρος ἄγει ποτὶ πίονα σαρκὸς -ἀκμὴν καὶ γυίων ἄνθος ἀκηράσιον -τῇ δὲ Φιλοκλῆος χρύσεον ῥέθος, ὃς τὸ καθʼ ὕψος -οὐ μέγας, οὐρανίη δʼ ἀμφιτέθηλε χάρις. -ἢν δʼ ἐπὶ Λεπτίνεω στρέψῃς δέμας, οὐκέτι γυῖα -κινήσεις, ἀλύτῳ δʼ ὡς ἀδάμαντι μένεις -ἴχνια κολληθείς· τοῖον σέλας ὄμμασιν αἴθει -κοῦρος καὶ νεάτους ἐκ κορυφῆς ὄνυχας. -χαίρετε καλοὶ παῖδες, ἐς ἀκμαίην δὲ μόλοιτε -ἥβην, καὶ λευκὴν ἀμφιέσαισθε κόμην. -
-
- - -meleager - - -τερπνὸς μὲν Διόδωρος, ἐν ὄμμασι δʼ Ἡράκλειτος, -ἡδυεπὴς δὲ Δίων, ὀσφύι δʼ Οὐλιάδης. -ἀλλὰ σὺ μὲν ψαύοις ἁπαλόχροος, ᾧ δέ, Φιλόκλεις, -ἔμβλεπε, τῷ δὲ λάλει, τὸν δὲ τὸ λειπόμενον -ὡς γνῷς οἷος ἐμὸς νόος ἄφθονος· ἢν δὲ Μυΐσκῳ -λίχνος ἐπιβλέψῃς, μηκέτʼ ἴδοις τὸ καλόν. -
-
- - -meleager - - -εἴ σε Πόθοι στέργουσι, Φιλόκλεες, ἥ τε μυρόπνους -πειθώ, καὶ κάλλευς ἀνθολόγοι Χάριτες, -ἀγκὰς ἔχοις Διόδωρον, ὁ δὲ γλυκὺς ἀντίος ᾄδοι -Δωρόθεος, κείσθω δʼ εἰς γόνυ Καλλικράτης, -ἰαίνοι δὲ Δίων τόδʼ ἐύστοχον ἐν χερὶ τείνων -σὸν κέρας, Οὐλιάδης δʼ αὐτὸ περισκυθίσαι, -δοίη δʼ ἡδὺ φίλημα Φίλων, Θήρων δὲ λαλήσαι, -θλίβοις δʼ Εὐδήμου τιτθὸν ὑπὸ χλαμύδι. - -εἰ γάρ σοι τάδε τερπνὰ πόροι θεός, ὦ μάκαρ, οἵαν -ἀρτύσεις παίδων Ῥωμαϊκὴν λοπάδα. -
-
- - -anonymi epigrammatici - - -οὔτι μάταν θνατοῖσι φάτις τοιάδε βοᾶται, -ὡς οὐ πάντα θεοὶ πᾶσιν ἔδωκαν ἔχειν. -εἶδος μὲν γὰρ ἄμωμον, ἐπʼ ὄμμασι δʼ ἁ περίσαμος -αἰδώς, καὶ στέρνοις ἀμφιτέθαλε χάρις, -οἷσι καὶ ἠιθέους ἐπιδάμνασαι· ἀλλʼ ἐπὶ ποσσὶν -οὐκέτι τὰν αὐτὰν δῶκαν ἔχειν σε χάριν. -πλὴν κρηπὶς κρύψει ποδὸς ἴχνιον, ὠγαθὲ Πύρρε, -κάλλεϊ δὲ σφετέρῳ τέρψει ἀγαλλόμενον. -
-
- - -antipater - - -Εὐπάλαμος ξανθὸν μὲν ἐρεύθεται, ἶσον Ἔρωτι, -μέσφα ποτὶ Κρητῶν ποιμένα Μηριόνην· -ἐκ δέ νυ Μηριόνεω Ποδαλείριος οὐκέτʼ ἐς Ἠὼ -νεῖται· ἴδʼ ὡς φθονερὰ παγγενέτειρα φύσις. -εἰ γάρ τῷ τὰ τʼ ἔνερθε τὰ θʼ ὑψόθεν ἶσα πέλοιτο, -ἦν ἂν Ἀχιλλῆος φέρτερος Αἰακίδεω. -
-
- - -posidippus - - -τὸν Μουσῶν τέττιγα Πόθος δήσας ἐπʼ ἀκάνθαις -κοιμίζειν ἐθέλει, πῦρ ὑπὸ πλευρὰ βαλών· -ἡ δὲ πρὶν ἐν βίβλοις πεπονημένη ἄλλʼ ἀθερίζει -ψυχή, ἀνιηρῷ δαίμονι μεμφομένη. - -
-
- - -anonymi epigrammatici - - -Ἠγρεύθην ὑπʼ Ἔρωτος ὁ μηδʼ ὄναρ, οὐδʼ ἔμαθον πῦρ -ἄρσεν ˘ ποιμαίνειν θερμὸν ὑπὸ κραδίας, -ἠγρεύθην. ἀλλʼ οὔ με κακῶν πόθος, ἀλλʼ ἀκέραιον -σύντροφον αἰσχύνῃ βλέμμα κατηνθράκισεν. -τηκέσθω Μουσέων ὁ πολὺς πόνος· ἐν πυρὶ γὰρ νοῦς -βέβληται, γλυκερῆς ἄχθος ἔχων ὀδύνης. -
-
- - -anonymi epigrammatici - - -εἰς οἵων με πόθων λιμένα ξένον, ὦ Κύπρι, θεῖσα -οὐκ ἐλεεῖς, καὐτὴ πεῖραν ἔχουσα πόνων; -ἦ μʼ ἐθέλεις ἄτλητα παθεῖν καὶ τοῦτʼ ἔπος εἰπεῖν, - -τὸν σοφὸν ἐν Μούσαις Κύπρις ἔτρωσε μόνη; - -
-
- - -meleager - - -τόν με Πόθοις ἄτρωτον ὑπὸ στέρνοισι Μυΐσκος -ὄμμασι τοξεύσας, τοῦτʼ ἐβόησεν ἔπος· -“ τὸν θρασὺν εἷλον ἐγώ· τὸ δʼ ἐπʼ ὀφρύσι κεῖνο φρύαγμα -σκηπτροφόρου σοφίας ἠνίδε ποσσὶ πατῶ.” -τῷ δʼ, ὅσον ἀμπνεύσας, τόδʼ ἔφην “ φίλε κοῦρε, τί θαμβεῖς; -καὐτὸν ἀπʼ Οὐλύμπου Ζῆνα καθεῖλεν Ἔρως.” -
-
- - -callimachus - - -Ὡγρευτής, Ἐπίκυδες, ἐν οὔρεσι πάντα λαγωὸν -διφᾷ, καὶ πάσης ἴχνια δορκαλίδος, - -στίβῃ καὶ νιφετῷ κεχρημένος. ἢν δέ τις εἴπῃ, - -τῆ, τόδε βέβληται θηρίον, οὐκ ἔλαβεν. -χοὐμὸς ἔρως τοιόσδε· τὰ μὲν φεύγοντα διώκειν -οἶδε, τὰ δʼ ἐν μέσσῳ κείμενα παρπέταται. -
-
- - -anonymi epigrammatici - - -οἶδα φιλεῖν φιλέοντας· ἐπίσταμαι, ἢν μʼ ἀδικᾖ τις, -μισεῖν ἀμφοτέρων εἰμὶ γὰρ οὐκ ἀδαής. -
-
- - -anonymi epigrammatici - - -οὑμὸς ἔρως παρʼ ἐμοὶ μενέτω μόνον ἢν δὲ πρὸς ἄλλους -φοιτήσῃ, μισῶ κοινὸν ἔρωτα, Κύπρι, -
-
- - -asclepiades - - -μικρὸς Ἔρως ἐκ μητρὸς ἔτʼ εὐθήρατος ἀποπτάς, -ἐξ οἴκων ὑψοῦ Δάμιδος οὐ πέτομαι· -ἀλλʼ αὐτοῦ, φιλέων τε καὶ ἀζήλωτα φιληθείς, -οὐ πολλοῖς, εὐκρὰς δʼ εἷς ἑνὶ συμφέρομαι. -
-
- - -meleager - - -ἓν καλὸν οἶδα τὸ πᾶν, ἕν μοι μόνον οἶδε τὸ λίχνον -ὄμμα, Μυΐσκον ὁρᾶν τἆλλα δὲ τυφλὸς ἐγώ. -πάντα δʼ ἐκεῖνος ἐμοὶ φαντάζεται· ἆρʼ ἐσορῶσιν -ὀφθαλμοὶ ψυχῇ πρὸς χάριν, οἱ κόλακες; -
-
- - -anonymi epigrammatici - - -τὸν καλόν, ὦ Χάριτες, Διονύσιον, εἰ μὲν ἕλοιτο -τἀμά, καὶ εἰς ὥρας αὖθις ἄγοιτε καλὸν - -εἰ δʼ ἕτερον στέρξειε παρεὶς ἐμέ, μύρτον ἕωλον -ἐρρίφθω ξηροῖς φυρόμενον σκυβάλοις. -
-
- - -dionysius - - -εἰ μὲν ἐμὲ στέρξεις, εἴης ἰσόμοιρος, Ἄκρατε, -Χίῳ, καὶ Χίου πουλὺ μελιχρότερος· -εἰ δʼ ἕτερον κρίναις ἐμέθεν πλέον, ἀμφὶ σὲ βαίη -κώνωψ ὀξηρῷ τυφόμενος κεράμῳ. -
-
- - -meleager - - -ὁ τρυφερὸς Διόδωρος ἐς ἠιθέους φλόγα βάλλων -ἤγρευται λαμυροῖς ὄμμασι Τιμαρίου, -τὸ γλυκύπικρον Ἔρωτος ἔχων βέλος. ἦ τόδε καινὸν -θάμβος ὁρῶ· φλέγεται πῦρ πυρὶ καιόμενον. -
-
- - -meleager - - -ἤστραψε γλυκὺ κάλλος· ἰδοὺ φλόγας ὄμμασι βάλλει. -ἆρα κεραυνομάχαν παῖδʼ ἀνέδειξεν Ἔρως; -χαῖρε Πόθων ἀκτῖνα φέρων θνατοῖσι, Μυΐσκε, -καὶ λάμποις ἐπὶ γᾷ πυρσὸς ἐμοὶ φίλιος. -
-
- - -anonymi epigrammatici - - -πτανὸς Ἔρως, σὺ δὲ ποσσὶ ταχύς· τὸ δὲ κάλλος ὁμοῖον -ἀμφοτέρων. τόξοις, Εὔβιε, λειπόμεθα. -
-
- - -anonymi epigrammatici - - -εὐφαμεῖτε νέοι· τὸν Ἔρωτʼ ἄγει Ἀρκεσίλαος, -πορφυρέῃ δήσας Κύπριδος ἁρπεδόνῃ. - -
-
- - -meleager - - -καὐτὸς Ἔρως ὁ πτανὸς ἐν αἰθέρι δέσμιος ἥλω, -ἀγρευθεὶς τοῖς σοῖς ὄμμασι, Τιμάριον. -
-
- - -meleager - - -ἠοῦς ἄγγελε, χαῖρε, Φαεσφόρε, καὶ ταχὺς ἔλθοις -ἕσπερος, ἣν ἀπάγεις, λάθριος αὖθις ἄγων. -
-
- - -anonymi epigrammatici - - -ἄκρητον μανίην ἔπιον· μεθύων μέγα μύθοις -ὥπλισμαι πολλὴν εἰς ὁδὸν ἀφροσύναν. -κωμάσομαι τί δέ μοι βροντέων μέλει, ἢ τί κεραυνῶν; -ἢν βάλλῃ;, τὸν ἔρωθʼ ὅπλον ἄτρωτον ἔχων. -
-
- - -anonymi epigrammatici - - -κωμάσομαι· μεθύω γὰρ ὅλος μέγα. παῖ, λάβε τοῦτον -τὸν στέφανον, τὸν ἐμοῖς δάκρυσι λουόμενον -μακρὴν δʼ οὐχὶ μάτην ὁδὸν ἵξομαι· ἔστι δʼ ἀωρὶ -καὶ σκότος· ἀλλὰ μέγας φανὸς ἐμοὶ Θεμίσων. -
-
- - -meleager - - -Βεβλήσθω κύβος· ἅπτε· πορεύσομαι. “ἠνίδε, τόλμα, -οἰνοβαρές. τίνʼ ἔχεις φροντίδα;” Κωμάσομαι -κωμάσομαι; ποῖ, θυμέ, τρέπῃ; Τί δʼ ἔρωτι λογισμός; -ἅπτε τάχος. ποῦ δʼ ἡ πρόσθε λόγων μελέτη; - - -ἐρρίφθω σοφίας ὁ πολὺς πόνος· ἓν μόνον οἶδα -τοῦθʼ, ὅτι καὶ Ζηνὸς λῆμα καθεῖλεν Ἔρως. -
-
- - -callimachus - - -εἰ μὲν ἑκών, Ἀρχῖνʼ, ἐπεκώμασα, μυρία μέμφου· -εἰ δʼ ἀέκων ἥκω, τὴν προπέτειαν ὄρα· -ἄκρητος καὶ ἔρως μʼ ἠνάγκασαν ὧν ὁ μὲν αὐτῶν -εἷλκεν, ὁ δʼ οὐκ εἴα σώφρονα θυμὸν ἔχειν, -ἐλθὼν δʼ οὐκ ἐβόησα, τίς ἢ τίνος, ἀλλʼ ἐφίλησα -τὴν φλιὴν εἰ τοῦτʼ ἔστʼ ἀδίκημʼ, ἀδικῶ. -
-
- - -meleager - - -οἴσω, ναὶ μὰ σέ, Βάκχε, τὸ σὸν θράσος· ἁγέο, κώμων -ἄρχε· θεὸς θνατὰν ἁνιόχει κραδίαν -ἐν πυρὶ γενναθεὶς στέργεις φλόγα τὰν ἐν ἔρωτι, -καί με πάλιν δήσας τὸν σὸν ἄγεις ἱκέτην. -ἦ προδότας κἄπιστος ἔφυς· τεὰ δʼ ὄργια κρύπτειν -αὐδῶν, ἐκφαίνειν τἀμὰ σὺ νῦν ἐθέλεις. -
-
- - -posidippus - - -Εὐοπλῶ, καὶ πρὸς σὲ μαχήσομαι, οὐδʼ ἀπεροῦμαι -θνητὸς ἐών σὺ δʼ, Ἔρως, μηκέτι μοι πρόσαγε. -ἤν με λάβῃς μεθύοντʼ, ἄπαγʼ ἔκδοτον ἄχρι δὲ νήφω, -τὸν παραταξάμενον πρὸς σὲ λογισμὸν ἔχω. - -
-
- - -rhianus - - -ἦ ῥὰ νύ τοι, Κλεόνικε, διʼ ἀτραπιτοῖο κιόντι -στεινῆς ἤντησαν ταὶ λιπαραὶ Χάριτες· -καί σε ποτὶ ῥοδέαισιν ἐπηχύναντο χέρεσσιν, -κοῦρε; πεποίησαι δʼ ἡλίκος ἐσσὶ χάρις. -τηλόθι μοι μάλα χαῖρε· πυρὸς δʼ οὐκ ἀσφαλὲς ἆσσον -ἕρπειν αὐηρήν, ἆ φίλος, ἀνθέρικα. -
-
- - -meleager - - -ὦ Χάριτες, τὸν καλὸν Ἀρισταγόρην ἐσιδοῦσαι -ἀντίον, εἰς τρυφερὰς ἠγκαλίσασθε χέρας· -οὕνεκα καὶ μορφᾷ βάλλει φλόγα, καὶ γλυκυμυθεῖ -καίρια, καὶ σιγῶν ὄμμασι τερπνὰ λαλεῖ. -τηλόθι μοι πλάζοιτο. τί δὲ πλέον; ὡς γὰρ Ὀλύμπου -Ζεὺς νέον οἶδεν ὁ παῖς μακρὰ κεραυνοβολεῖν. -
-
- - -anonymi epigrammatici - - -πυγμῇ νικήσαντα τὸν Ἀντικλέους Μενέχαρμον -λημνίσκοις μαλακοῖς ἐστεφάνωσα δέκα, -καὶ τρισσῶς ἐφίλησα πεφυρμένον αἵματι πολλῷ· -ἀλλʼ ἐμοὶ ἦν σμύρνης κεῖνο μελιχρότερον. -
-
- - -anonymi epigrammatici - - -λάθρῃ παπταίνοντα παρὰ φλιὴν Ἐχέδημον -λάθριος ἀκρήβην τὸν χαρίεντʼ ἔκυσα. -δειμαίνω·̆ καὶ γάρ μοι ἐνύπνιος ἦλθε φαρέτρην -αἰωρῶν καὶ δοὺς ᾤχετʼ ἀλεκτρυόνας, - -ἄλλοτε μειδιόων, ὁτὲ δʼ οὐ φίλος. ἀλλὰ μελισσέων -ἑσμοῦ καὶ κνίδης καὶ πυρὸς ἡψάμεθα; -
-
- - -meleager - - -ἡδὺ τί μοι διὰ νυκτὸς ἐνύπνιον ἁβρὰ γελῶντος -ὀκτωκαιδεκέτους παιδὸς ἔτʼ ἐν χλαμύδι -ἤγαγʼ Ἔρως ὑπὸ χλαῖναν ἐγὼ δʼ ἁπαλῷ περὶ χρωτὶ -στέρνα βαλὼν κενεὰς ἐλπίδας ἐδρεπόμαν. -καὶ μʼ ἔτι νῦν θάλπει μνήμης πόθος· ὄμμασι δʼ ὕπνον -ἀγρευτὴν πτηνοῦ φάσματος αἰὲν ἔχω. -ὦ δύσερως ψυχή, παῦσαί ποτε καὶ διʼ ὀνείρων -εἰδώλοις κάλλευς κωφὰ χλιαινομένη. -
-
- - -meleager - - -ἦρκταί μευ κραδίας ψαύειν πόνος· ἦ γὰρ ἀλύων -ἀκρονυχεὶ ταύταν ἔκνισ’ ὁ θερμὸς Ἔρως· -εἶπε δὲ μειδήσας· “ἕξεις πάλι τὸ γλυκὺ τραῦμα -ὦ δύσερως, λάβρῳ καιόμενος μέλιτι.” -ἐξ οὗ δὴ νέον ἔρνος ἐν ἠϊθέοις Διόφαντον -λεύσσων οὔτε φυγεῖν οὔτε μένειν δύναμαι. -
-
- - -meleager - - -Εἰνόδιον στείχοντα μεσαμβρινὸν εἶδον Ἄλεξιν, -ἄρτι κόμαν καρπῶν κειρομένου θέρεος. -διπλαῖ δʼ ἀκτῖνές με κατέφλεγον· αἱ μὲν Ἔρωτος, -παιδὸς ἀπʼ ὀφθαλμῶν, αἱ δὲ παρʼ ἠελίου. -ἀλλʼ ἃς μὲν νὺξ αὖθις ἐκοίμισεν ἃς δʼ ἐν ὀνείροις -εἴδωλον μορφῆς μᾶλλον ἀνεφλόγισεν. - -λυσίπονος δʼ ἑτέροις ἐπʼ ἐμοὶ πόνον ὕπνος ἔτευξεν -ἔμπνουν πῦρ ψυχῇ κάλλος ἀπεικονίσας. -
-
- - -meleager - - -Αἰπολικαὶ σύριγγες, ἐν οὔρεσι μηκέτι Δάφνιν -φωνεῖτʼ, αἰγιβάτῃ Πανὶ χαριζόμεναι· -μηδὲ σὺ τὸν στεφθέντα, λύρη, Φοίβοιο προφῆτι, -δάφνῃ παρθενίῃ μέλφʼ Ὑάκινθον ἔτι. -ἦν γὰρ ὅτʼ ἦν Δάφνις μὲν Ὀρειάσι,˘ σοὶ δʼ Ὑάκινθος -τερπνός· νῦν δὲ Πόθων σκῆπτρα Δίων ἐχέτω. -
-
- - -aratus - - -Ἀργεῖος Φιλοκλῆς Ἄργει καλός· αἵ δὲ Κορίνθου -στῆλαι, καὶ Μεγαρέων ταὐτὸ ˘ βοῶσι τάφοι· -γέγραπται καὶ μέχρι λοετρῶν Ἀμφιαράου, -ὡς καλός. ἀλλʼ ὀλίγον ˘ γράμμασι λειπόμεθα· -τῷδʼ οὐ γὰρ πέτραι ἐπιμάρτυρες, ἀλλὰ Ῥιηνὸς ˘ -αὐτὸς ἰδών ἑτέρου δʼ ἐστὶ περισσότερος. -
-
- - -anonymi epigrammatici - - -εἶπα, καὶ αὖ πάλιν εἶπα· καλός, καλός· ἀλλʼ ἔτι φήσω, -ὡς καλός, ὡς χαρίεις ὄμμασι Δωσίθεος. - -οὐ δρυός, οὐδʼ ἐλάτης ἐχαράξαμεν, οὐδʼ ἐπὶ τοίχου -τοῦτʼ ἔπος· ἀλλʼ ἐν ἐμῇ καῦσεν ˘ Ἔρως κραδίᾳ. -εἰ δέ τις οὐ φήσει, μὴ πείθεο. ναὶ μὰ σέ, δαῖμον, -ψεύδετʼ ἐγὼ δʼ ὁ λέγων τἀτρεκὲς οἶδα μόνος. -
-
- - -posidippus - - -ἃ Κύπρον, ἅ τε Κύθηρα, καὶ ἃ Μίλητον ἐποιχνεῖς, -καὶ καλὸν Συρίης ἱπποκρότου δάπεδον, -ἔλθοις ἵλαος Καλλιστίῳ, ἣ τὸν ἐραστὴν -οὐδέ ποτʼ οἰκείων ὦσεν ἀπὸ προθύρων. -
-
- - -meleager - - -οὔ σοι ταῦτʼ ἐβόων, ψυχή; “ ναὶ Κύπριν, ἁλώσει, -ὦ δύσερως, ἰξῷ πυκνὰ προσιπταμένη· -οὐκ” ἐβόων; εἷλέν σε πάγη. τί μάτην ἐνὶ δεσμοῖς -σπαίρεις; αὐτὸς Ἔρως τὰ πτερά σου δέδεκεν, -καὶ σ’ ἐπὶ πῦρ ἔστησε, μύροις δʼ ἔρρανε λιπόπνουν, -δῶκε δὲ διψώσῃ δάκρυα θερμὰ πιεῖν -
-
- - -meleager - - -ἆ ψυχὴ βαρύμοχθε, σὺ δʼ ἄρτι μὲν ἐκ πυρὸς αἴθῃ, -ἄρτι δʼ ἀναψύχεις, πνεῦμʼ ἀναλεξαμένη. -τί κλαίεις; τὸν ἄτεγκτον ὅτʼ ἐν κόλποισιν Ἔρωτα -ἔτρεφες, οὐκ ᾔδεις ὡς ἐπὶ σοὶ τρέφετο; -οὐκ ᾔδεις; νῦν γνῶθι καλῶν ἄλλαγμα τροφείων, -πῦρ ἅμα καὶ ψυχρὰν δεξαμένη χιόνα. -αὐτὴ ταῦθʼ εἵλου· φέρε τὸν πόνον. ἄξια πάσχεις -ὧν ἔδρας, ὀπτῷ καιομένη μέλιτι. - -
-
- - -meleager - - -διψῶν ὡς ἐφίλησα θέρευς ἁπαλόχροα παῖδα, -εἶπα τότʼ αὐχμηρὰν δίψαν ἀποπροφυγών -“ Ζεῦ πάτερ, ἆρα φίλημα τὸ νεκτάρεον Γανυμήδευς -πίνεις, καὶ τόδε σοι χείλεσιν οἰνοχοεῖ; -καὶ γὰρ ἐγὼ τὸν καλὸν ἐν ἠιθέοισι φιλήσας -Ἀντίοχον, ψυχῆς ἡδὺ πέπωκα μέλι.” -
-
- - -callimachus - - -ἕλκος ἔχων ὁ ξεῖνος ἐλάνθανεν ὡς ἀνιηρὸν -πνεῦμα διὰ στηθέων, εἶδες, ἀνηγάγετο, -τὸ τρίτον ἡνίκʼ ἔπινε· τὰ δὲ ῥόδα φυλλοβολεῦντα -τὠνδρὸς ἀπὸ στεφάνων πάντʼ ἐγένοντο χαμαί. -ὤπτηται μέγα δή τι· μὰ δαίμονας, οὐκ ἀπὸ ῥυσμοῦ -εἰκάζω· φωρὸς δʼ ἴχνια φὼρ ἔμαθον. -
-
- - -asclepiades - - -οἶνος ἔρωτος ἔλεγχος· ἐρᾶν ἀρνεύμενον ἡμῖν -ἤτασαν αἱ πολλαὶ Νικαγόρην προπόσεις. -καὶ γὰρ ἐδάκρυσεν καὶ ἐνύστασε, καί τι κατηφὲς -ἔβλεπε, χὠ σφιγχθεὶς οὐκ ἔμενε στέφανος. -
-
- - -anonymi epigrammatici - - -ὄρνιθες ψίθυροι, τί κεκράγατε; μὴ μʼ ἀνιᾶτε, -τὸν τρυφερῇ παιδὸς σαρκὶ χλιαινόμενον, -ἑζόμεναι πετάλοισιν ἀηδόνες· εὗδε λάληθρον -θῆλυ γένος, δέομαι, μείνατʼ ἐφʼ ἡσυχίης. - -
-
- - -meleager - - -Ὀρθροβόας, δυσέρωτι κακάγγελε, νῦν, τρισάλαστε, -ἐννύχιος κράζεις πλευροτυπῆ κέλαδον, -γαῦρος ὑπὲρ κοίτας, ὅτε μοι βραχὺ τοῦτʼ ἔτι νυκτὸς -ζῇ τὸ φιλεῖν, ἐπʼ ἐμαῖς δʼ ἁδὺ γελᾷς ὀδύναις. -ἅδε φίλα θρεπτῆρι χάρις; ναὶ τὸν βαθὺν ὄρθρον, -ἔσχατα γηρύσῃ ταῦτα τὰ πικρὰ μέλη. -
-
- - -mnasalces - - -Ἄμπελε, μήποτε φύλλα χαμαὶ σπεύδουσα βαλέσθαι -δείδιας ἑσπέριον Πλειάδα δυομέναν; -μεῖνον ἐπʼ Ἀντιλέοντι πεσεῖν ὑπὸ τὶν γλυκὺν ὕπνον, -ἐς τότε, τοῖς καλοῖς πάντα χαριζομένα. -
-
- - -callimachus - - -ἔστι τι, ναὶ τὸν Πᾶνα, κεκρυμμένον, ἔστι τι ταύτῃ, -ναὶ μὰ Διώνυσον, πῦρ ὑπὸ τῇ σποδιῇ· -οὐ θαρσέω. μὴ δή με περίπλεκε· πολλάκι λήθει -τοῖχον ὑποτρώγων ἡσύχιος ποταμός. -τῷ καὶ νῦν δείδοικα, Μενέξενε, μή με παρεισδὺς -οὗτος ὁ † σειγαρνης εἰς τὸν ἔρωτα βάλῃ. -
-
- - -anonymi epigrammatici - - -τὸν καλὸν ὡς ἰδόμαν Ἀρχέστρατον, οὐ μὰ τὸν Ἑρμᾶν, -οὐ καλὸν αὐτὸν ἔφαν· οὐ γὰρ ἄγαν ἐδόκει. - -εἶπα, καὶ ἁ Νέμεσίς με συνάρπασε, κεὐθὺς ἐκείμαν -ἐν πυρί, παῖς ˘ δʼ ἐπʼ ἐμοὶ Ζεὺς ἐκεραυνοβόλει. -τὸν παῖδʼ ἱλασόμεσθʼ, ἢ τὰν θεόν; ἀλλὰ θεοῦ μοι -ἔστιν ὁ παῖς κρέσσων χαιρέτω ἁ Νέμεσις. -
-
- - -meleager - - -ἐφθέγξω, ναὶ Κύπριν, ἃ μὴ θεός, ὦ μέγα τολμᾶν -θυμὲ μαθών Θήρων σοὶ καλὸς οὐκ ἐφάνη· -σοὶ καλὸς οὐκ ἐφάνη Θήρων ἀλλʼ αὐτὸς ὑπέστης, -οὐδὲ Διὸς πτήξας πῦρ τὸ κεραυνοβόλον. -τοιγάρ, ἰδού, τὸν πρόσθε λάλον προὔθηκεν ἰδέσθαι -δεῖγμα θρασυστομίης ἡ βαρύφρων Νέμεσις. -
-
- - -rhianus - - -ἰξῷ Δεξιόνικος ὑπὸ χλωρῇ πλατανίστῳ -κόσσυφον ἀγρεύσας, εἷλε κατὰ πτερύγων -χὠ μὲν ἀναστενάχων ἀπεκώκυεν ἱερὸς ὄρνις. -ἀλλʼ ἐγώ, ὦ φίλʼ Ἔρως, καὶ θαλεραὶ Χάριτες, -εἴην καὶ κίχλη καὶ κόσσυφος, ὡς ἂν ἐκείνου -ἐν χερὶ καὶ φθογγὴν καὶ γλυκὺ δάκρν βάλω. -
-
- - -anonymi epigrammatici - - -Ἑρμῆ, τοξευθεὶς ἐξέσπασε πικρὸν ὀιστὸν - - ἐφήβῳ. - κἠγὼ τὴν αὐτήν, ξεῖνε, λέλογχα τύχην. -ἀλλὰ μʼ Ἀπολλοφάνους τρύχει πόθος. ὦ “ φιλάεθλε, -ἔφθασας· εἰς ἓν πῦρ οἱ δύʼ ἐνηλάμεθα.’” - -
-
- - -meleager - - -τί κλαίεις, φρενολῃστά; τί δʼ ἄγρια τόξα καὶ ἰοὺς -ἔρριψας, διφυῆ ταρσὸν ἀνεὶς πτερύγων; -ἦ ῥά γε καὶ σὲ Μυΐσκος ὁ δύσμαχος ὄμμασιν αἴθει; -ὡς μόλις οἷʼ ἔδρας πρόσθε παθὼν ἔμαθες. -
-
- - -anonymi epigrammatici - - -παύετε, παιδοφίλαι, κενεὸν πόνον· ἴσχετε μόχθων, -δύσφρονες· ἀπρήκτοις ἐλπίσι μαινόμεθα. -ἶσον ἐπὶ ψαφαρὴν ἀντλεῖν ἅλα, κἀπὸ Λιβύσσης -ψάμμου ἀριθμητὴν ἀρτιάσαι ψεκάδα, -ἶσον καὶ παίδων στέργειν πόθον, οἷς τὸ κεναυχὲς -κάλλος ἐνὶ χθονίοις ἡδὺ τʼ ἐν ἀθανάτοις. -δέρκεσθʼ εἰς ἐμὲ πάντες· ὁ γὰρ πάρος εἰς κενὸν ἡμῶν -μόχθος ἐπὶ ξηροῖς ἐκκέχυτʼ αἰγιαλοῖς. -
-
- - -rhianus - - -Ἀγρεύσας τὸν νεβρὸν ἀπώλεσα, χὠ μὲν ἀνατλὰς -μυρία, καὶ στήσας δίκτυα καὶ στάλικας, -σὺν κενεαῖς χείρεσσιν ἀπέρχομαι· οἱ δʼ ἀμόγητοι -τἀμὰ φέρουσιν, Ἔρως· οἷς σὺ γένοιο βαρύς. -
-
- - -meleager - - -Ἅρπασται τίς τόσσον ἐναιχμάσαι ἄγριος εἴη; -τίς τόσος ἀντᾶραι καὶ πρὸς Ἔρωτα μάχην; -ἅπτε τάχος πεύκας. καίτοι κτύπος· Ἡλιοδώρας. -βαῖνε πάλιν στέρνων ἐντὸς ἐμῶν, κραδίη. - -
-
- - -callimachus - - -οἶδʼ ὅτι μου πλούτου κενεαὶ χέρες· ἀλλά, Μένιππε, -μὴ λέγε, πρὸς Χαρίτων, τοὐμὸν ὄνειρον ἐμοί. -ἀλγέω τὴν διὰ παντὸς ἔπος τόδε πικρὸν ἀκούων -ναί, φίλε, τῶν παρὰ σοῦ τοῦτʼ ἀνεραστότατον. -
-
- - -callimachus - - - -Ληφθήσῃ, περίφευγε, Μενέκρατες· εἶπα Πανήμου -εἰκάδι, καὶ Λώου τῇ — τίνι; τῇ δεκάτῃ -ἦλθεν ὁ βοῦς ὑπʼ ἄροτρον ἑκούσιος. εὖγʼ ἐμὸς ἐμὸς, -εὖγʼ ἐμὸς οὐ παρὰ τὰς εἴκοσι μεμφόμεθα. -
-
- - -callimachus - - -ὡς ἀγαθὰν Πολύφαμος ἀνεύρατο τὰν ἐπαοιδὰν -τὠραμένῳ ναὶ Γᾶν, οὐκ ἀμαθὴς ὁ Κύκλωψ. -αἱ Μοῖσαι τὸν ἔρωτα κατισχναίνοντι, Φίλιππε· -ἦ πανακὲς πάντων φάρμακον ἁ σοφία. -τοῦτο, δοκέω, χἀ λιμὸς ἔχει μόνον ἐς τὰ πονηρὰ -τὠγαθόν, ἐκκόπτει τὰν φιλόπαιδα νόσον. -ἔσθʼ ἁμὶν † χἀκαστὰς ἀφειδέα πρὸς τὸν Ἔρωτα. -τοῦτʼ εἶπαι “Κείρευ τὰ πτερά, παιδάριον· -οὐδʼ ὅσον ἀττάραγόν σε δεδοίκαμες · αἱ γὰρ ἐπῳδαὶ -οἴκοι τῶ χαλεπῶ τραύματος ἀμφότεραι.” -
-
- - -anonymi epigrammatici - - -εἲ τινά που παίδων ἐρατώτατον ἄνθος ἔχοντα -εἶδες, ἀδιστάκτως εἶδες Ἀπολλόδοτον. - -εἰ δʼ ἐσιδών, ὦ ξεῖνε, πυριφλέκτοισι πόθοισιν -οὐκ ἐδάμης, πάντως ἢ θεὸς ἢ λίθος εἶ. -
-
- - -anonymi epigrammatici - - -Μάγνης Ἡράκλειτος, ἐμοὶ πόθος, οὔτι σίδηρον -πέτρῳ, πνεῦμα δʼ ἐμὸν κάλλει ἐφελκόμενος. -
-
- - -asclepiades - - -πρόσθε μοι Ἀρχεάδης ἐθλίβετο· νῦν δὲ τάλαιναν -οὐδʼ ὅσσον παίζων εἰς ἔμʼ ἐπιστρέφεται. -οὐδʼ ὁ μελιχρὸς Ἔρως ἀεὶ γλυκύς· ἀλλʼ ἀνιήσας -πολλάκις ἡδίων γίνετʼ ἐρῶσι θεός. -
-
- - -meleager - - -ἡδὺς ὁ παῖς, καὶ τοὔνομʼ ἐμοὶ γλυκύς ἐστι Μυΐσκος -καὶ χαρίεις· τίνʼ ἔχω μὴ οὐχὶ φιλεῖν πρόφασιν; -καλὸς γάρ, ναὶ Κύπριν, ὅλος καλός· εἰ δʼ ἀνιηρός, -οἶδε τὸ πικρὸν Ἔρως συγκεράσαι μέλιτι, -
-
- - -anonymi epigrammatici - - - - μὴ μʼ εἴπῃς πάλιν ὧδε. τί δʼ αἴτιος; αὐτὸς ἔπεμψε. - - δεύτερον οὖν φήσεις; δεύτερον. εἶπεν Ἴθι. -ἀλλʼ ἔρχευ, μὴ μέλλε. μένουσί σε. πρῶτον ἐκείνους -εὑρήσω, χἤξω· τὸ τρίτον οἶδα πάλαι. - -
-
- - -anonymi epigrammatici - - -εἰαρινῷ χειμῶνι πανείκελος, ὦ Διόδωρε, -οὑμὸς ἔρως, ἀσαφεῖ κρινόμενος πελάγει· -καί ποτε μὲν φαίνεις πολὺν ὑετόν, ἄλλοτε δʼ αὖτε -εὔδιος, ἁβρὰ γελῶν δʼ ὄμμασιν ἐκκέχυσαι. -τυφλὰ δʼ, ὅπως ναυηγὸς ἐν οἴδματι, κύματα μετρῶν -δινεῦμαι, μεγάλῳ χείματι πλαζόμενος. -ἀλλά μοι ἢ φιλίης ἔκθες σκοπὸν ἢ πάλι μίσους, -ὡς εἰδῶ ποτέρῳ κύματι νηχόμεθα. -
-
- - -meleager - - -Κύπρις ἐμοὶ ναύκληρος, Ἔρως δʼ οἴακα φυλάσσει -ἄκρον ἔχων ψυχῆς ἐν χερὶ πηδάλιον -χειμαίνει δʼ ὁ βαρὺς πνεύσας Πόθος, οὕνεκα δὴ νῦν -παμφύλῳ παίδων νήχομαι ἐν πελάγει. -
-
- - -meleager - - -σοί με Πόθων δέσποινα θεὴ πόρε, σοί με, Θεόκλεις, -ἁβροπέδιλος Ἔρως γυμνὸν ὑπεστόρεσεν, -ξεῖνον ἐπὶ ξείνης, δαμάσας ἀλύτοισι χαλινοῖς· -ἱμείρω δὲ τυχεῖν ἀκλινέος φιλίας. -ἀλλὰ σὺ τὸν στέργοντʼ ἀπαναίνεαι, οὐδέ σε θέλγει -οὐ χρόνος, οὐ ξυνῆς σύμβολα σωφροσύνης. -ἵλαθʼ, ἄναξ, ἵληθι· σὲ γὰρ θεὸν ὥρισε Δαίμων -ἐν σοί μοι ζωῆς πείρατα καὶ θανάτου. - -
-
- - -meleager - - -ἐν σοὶ τἀμά, Μυΐσκε, βίου πρυμνήσἰ ἀνῆπται· -ἐν σοὶ καὶ ψυχῆς πνεῦμα τὸ λειφθὲν ἔτι. -ναὶ γὰρ δὴ τὰ σά, κοῦρε, τὰ καὶ κωφοῖσι λαλεῦντα -ὄμματα, καὶ μὰ τὸ σὸν φαιδρὸν ἐπισκύνιον, -ἤν μοι συννεφὲς ὄμμα βάλῃς ποτέ, χεῖμα δέδορκα· -ἢν δʼ ἱλαρὸν βλέψῃς, ἠδὺ τέθηλεν ἔαρ, -
-
- - -anonymi epigrammatici - - -θαρσαλέως τρηχεῖαν ὑπὸ σπλάγχνοισιν ἀνίην -οἴσω, καὶ χαλεπῆς δεσμὸν ἀλυκτοπέδης. -οὐ γάρ πω, Νίκανδρε, βολὰς ἐδάημεν Ἔρωτος -νῦν μόνον, ἀλλὰ πόθων πολλάκις ἡψάμεθα. -καὶ σὺ μέν, Ἀδρήστεια, κακῆς ἀντάξια βουλῆς -τῖσαι, καὶ μακάρων πικροτάτη Νέμεσις. -
-
- - -asclepiades - - -Δόρκιον ἡ φιλέφηβος ἐπίσταται, ὡς ἁπαλὸς παῖς, -ἕσθαι πανδήμου Κύπριδος ὠκὺ βέλος, -ἵμερον ἀστράπτουσα κατʼ ὄμματος, ἠδʼ ὑπὲρ ὤμων - - -σὺν πετάσῳ γυμνὸν μηρὸν ἔφαινε χλαμύς. -
-
- - -asclepiades - - -οὔπω τοξοφορῶν οὐδʼ ἄγριος,˘ ἀλλὰ νεογνὸς -οὑμὸς Ἔρως παρὰ τὴν Κύπριν ὑποστρέφεται, -δέλτον ἔχων χρυσέην τὰ Φιλοκράτεος δὲ Διαύλου -τραυλίζει ψυχῆς φίλτρα κατʼ Ἀντιγένους. - -
-
- - -asclepiades - - -εὗρεν Ἔρως τί καλῷ μίξει καλόν, οὐχὶ μάραγδον -χρυσῷ, ὃ μήτʼ ἀνθεῖ, μήτε γένοιτʼ ἐν ἴσῳ, -οὐδʼ ἐλέφαντʼ ἐβένῳ, λευκῷ μέλαν, ἀλλὰ Κλέανδρον -Εὐβιότῳ, πειθοῦς ἄνθεα καὶ φιλίης. -
-
- - -meleager - - -ἡδὺ μὲν ἀκρήτῳ κεράσαι γλυκὺ νᾶμα μελισσῶν -ἡδὺ δὲ παιδοφιλεῖν καὐτὸν ἐόντα καλόν, -οἷα τὸν ἁβροκόμην στέργει Κλεόβουλον Ἄλεξις· -ἀθάνατον τούτω Κύπριδος οἰνόμελι. -
-
- - -meleager - - -Λευκανθὴς Κλεόβουλος· ὁ δʼ ἀντία τοῦδε μελίχρους -Σώπολις, οἱ δισσοὶ Κύπριδος ἀνθοφόροι. -τοὔνεκά μοι παίδων ἕπεται πόθος· οἱ γὰρ Ἔρωτες -ἐκ λευκοῦ πλέξαι ˘ φασί με καί μέλανος. -
-
- - -asclepiades - - -τοῦθʼ ὅ τί μοι λοιπὸν ψυχῆς, ὅ τι δή ποτʼ, Ἔρωτες, -τοῦτό γʼ ἔχειν πρὸς θεῶν ἡσυχίην ἄφετε· -ἢ μὴ δὴ τόξοις ἔτι βάλλετὲ μʼ, ἀλλὰ κεραυνοῖς· -ναὶ πάντως τέφρην θέσθε με κἀνθρακιήν. -ναί, ναί, βάλλετʼ, Ἔρωτες· ἐνεσκληκὼς γὰρ ἀνίαις, -ἐξ ὑμέων τοῦτʼ οὖν, εἴ γέ τι, βούλομʼ ἔχειν. - -
-
- - -meleager - - -χειμέριον μὲν πνεῦμα· φέρει δʼ ἐπὶ σοί με, Μυΐσκε, -ἁρπαστὸν κώμοις ὁ γλυκύδακρυς Ἔρως. -χειμαίνει δὲ βαρὺς πνεύσας Πόθος, ἀλλὰ μʼ ἐς ὅρμον -δέξαι, τὸν ναύτην Κύπριδος ἐν πελάγει. -
-
- - -posidippus - - -Ναννοῦς καὶ Λύδης ἐπίχει δύο, καὶ φιλεράστου -Μιμνέρμου, καὶ τοῦ σώφρονος Ἀντιμάχου· -συγκέρασον τὸν πέμπτον ἐμοῦ· τὸν δʼ ἕκτον ἑκάστου, -Ἡλιόδωρʼ, εἴπας, ὅστις ἐρῶν ἔτυχεν -ἕβδομον Ἡσιόδου, τὸν δʼ ὄγδοον εἶπον Ὁμήρου, -τὸν δʼ ἔνατον Μουσῶν, Μνημοσύνης δέκατον. -μεστὸν ὑπὲρ χείλους πίομαι, Κύπρι· τἆλλα δʼ ἔρωτες -νήφοντʼ οἰνωθέντʼ οὐχὶ λίην ἄχαριν. -
-
- - -dioscorides - - -ἐξέφυγον, Θεόδωρε, τὸ σὸν βάρος. ἀλλʼ ὅσον εἴπας - -ἐξέφυγον τὸν ἐμὸν δαίμονα πικρότατον, - -πικρότερός με κατέσχεν. Ἀριστοκράτει δὲ λατρεύων -μυρία, δεσπόσυνον καὶ τρίτον ἐκδέχομαι. -
-
- - -dioscorides - - -σπονδὴ καὶ λιβανωτέ, καὶ οἱ κρητῆρι μιγέντες -δαίμονες, οἳ φιλίης τέρματʼ ἐμῆς ἔχετε, -ὑμέας, ὦ σεμνοί, μαρτύρομαι, οὓς ὁ μελίχρως -κοῦρος Ἀθήναιος πάντας ἐπωμόσατο. - -
-
- - -dioscorides - - -τὸν καλόν, ὡς ἔλαβες, κομίσαις πάλι πρός με θεωρὸν -Εὐφραγόρην, ἀνέμων πρηΰτατε Ζέφυρε, -εἰς ὀλίγων τείνας μηνῶν μέτρον ὡς καὶ ὁ μικρὸς -μυριέτης κέκριται τῷ φιλέοντι χρόνος. -
-
- - -euenus - - -εἰ μισεῖν πόνος ἐστί, φιλεῖν πόνος, ἐκ δύο λυγρῶν -αἱροῦμαι χρηστῆς ἕλκος ἔχειν ὀδύνης. -
-
- - -philodemus - - -Δημώ με κτείνει καὶ Θέρμιον ἡ μὲν ἑταίρη, -Δημονόη ˘ δʼ οὔπω Κύπριν ἐπισταμένη. -καὶ τῆς μὲν ψαύω· τῆς δʼ οὐ θέμις. οὐ μὰ σέ, Κύπρι, -οὐκ οἶδʼ ἣν εἰπεῖν δεῖ με ποθεινοτέρην. -Δημάριον λέξω τὴν παρθένον οὐ γὰρ ἕτοιμα -βούλομαι, ἀλλὰ ποθῶ πᾶν τὸ φυλασσόμενον. -
-
- - -marcus cornelius fronto - - -μέχρι τίνος πολεμεῖς μʼ, ὦ φίλτατε Κῦρε; τί ποιεῖς; -τὸν σὸν Καμβύσην οὐκ ἐλεεῖς; λέγε μοι. -μὴ γίνου Μῆδος· Σάκας γὰρ ἔσῃ μετὰ μικρόν, -καί σε ποιήσουσιν ταὶ τρίχες Ἀστυάγην. -
-
- - -straton - - -ἢ μὴ ζηλοτύπει δούλοις ἐπὶ παισὶν ἑταίρους, -ἢ μὴ θηλυπρεπεῖς οἰνοχόους πάρεχε. - -τίς γὰρ ἀνὴρ ἐς ἔρωτʼ ἀδαμάντινος; ἢ τίς ἀτειρὴς -οἴνῳ; τίς δὲ καλοὺς οὐ περίεργα βλέπει; -ζώντων ἔργα τάδʼ ἐστὶν ὅπου δʼ οὐκ εἰσὶν ἔρωτες -οὐδὲ μέθαι, Διοφῶν, ἢν ἐθέλῃς, ἄπιθι· -κἀκεῖ Τειρεσίην ἢ Τάνταλον ἐς πότον ἕλκε, -τὸν μὲν ἐπʼ οὐδὲν ἰδεῖν, τὸν δʼ ἐπὶ μοῦνον ἰδεῖν. -
-
- - -straton - - -στυγνὸς δὴ τί, Μένιππε, κατεσκέπασαι μέχρι πέζης -ὁ πρὶν ἐπʼ ἰγνύης λῶπος ἀνελκόμενος; -ἢ τί κάτω κύψας με παρέδραμες, οὐδὲ προσειπών; -οἶδα τί με κρύπτεις· ἤλυθον ἃς ἔλεγον, -
-
- - -straton - - -ἑσπερίην Μοῖρίς με, καθʼ ἣν ὑγιαίνομεν ὥρην, -οὐκ οἶδʼ εἴτε σαφῶς, εἴτʼ ὄναρ, ἠσπάσατο. -ἤδη γὰρ τὰ μὲν ἄλλα μάλʼ ἀτρεκέως ἐνόησα, -χὠκόσα μοι προσέφη, χὠκόσ’ ἐπυνθάνετο -εἰ δέ με καὶ πεφίληκε τεκμαίρομαι· εἰ γὰρ ἀληθές, -πῶς ἀποθειωθεὶς πλάζομʼ ἐπιχθόνιος; -
-
- - -straton - - -Ἐξεφλέγην, ὅτε Θεῦδις ἐλάμπετο παισὶν ἐν ἄλλοις, -οἷος ἐπαντέλλων ἀστράσιν ἠέλιος, -τοὔνεκʼ ἔτι φλέγομαι καὶ νῦν, ὅτε νυκτὶ λαχνοῦται· -δυόμενος γάρ, ὅμως ἥλιός ἐστιν ἔτι. - -
-
- - -straton - - -ὤμοσά σοι, Κρονίδη, μηπώποτε, μηδʼ ἐμοὶ αὐτῷ -ἐξειπεῖν ὅ τι μοι Θεῦδις ἔειπε λαβεῖν. -ψυχὴ δʼ ἡ δυσάπιστος ἀγαλλομένη πεπότηται -ἠέρι, καὶ στέξαι τἀγαθὸν οὐ δύναται· -ἀλλʼ ἐρέω, σύγγνωθι σύ μοι, Κεῖνος δὲ πέπεισται. -Ζεῦ πάτερ, ἀγνώστου τίς χάρις εὐτυχίης; -
-
- - -straton - - -καῦμὰ μʼ ἔχει μέγα δή τι· σὺ δʼ, ὦ παῖ, παύεο λεπτὸν -ἠέρι δινεύων ἐγγὺς ἐμεῖο λίνον. -ἄλλο τι πῦρ ἐμοῦ ἔνδον ἔχω κυάθοισιν ἀναφθέν, -καὶ περὶ σῇ ῥιπῇ μᾶλλον ἐγειρόμενον. -
-
- - -straton - - -ψεύδεα μυθίζουσι, Θεόκλεες, ὡς ἀγαθαὶ μὲν -αἱ Χάριτες, τρισσαὶ δʼ εἰσὶ κατʼ Ὀρχομενὸν -πεντάκι γὰρ δέκα σεῖο περισκιρτῶσι πρόσωπα, -τοξοβόλοι, ψυχέων ἅρπαγες ἀλλοτρίων. -
-
- - -straton - - -ταῦτά με νῦν τὰ περισσὰ φιλεῖς, ὅτʼ ἔρωτος ἀπέσβη -πυρσός, ὅτʼ οὐδʼ ἄλλως ἡδὺν ἔχω σε φίλον. -μέμνημαι γὰρ ἐκεῖνα τὰ δύσμαχα· πλὴν ἔτι, Δάφνι, -ὀψὲ μέν, ἀλλʼ ἐχέτω καὶ μετάνοια τόπον. -
-
- - -straton - - -τίς χάρις, Ἡλιόδωρε, φιλήμασιν, εἴ με λάβροισιν -χείλεσι μὴ φιλέεις ἀντιβιαζόμενος, - -ἀλλʼ ἐπʼ ἄκροις ἀσάλευτα μεμυκόσιν, οἷα κατʼ οἴκους -καὶ δίχα σοῦ με φιλεῖ πλάσμα τὸ κηρόχυτον; -
-
- - -straton - - -μὴ σπεύσῃς Μενέδημον ἑλεῖν δόλῳ, ἀλλʼ ἐπίνευσον -ὀφρύσι, καὶ φανερῶς αὐτὸς ἐρεῖ· πρόαγε. - -οὐ γὰρ ἀνάβλησις· φθάνει δέ τε καὶ τὸν ἄγοντα· -οὐδʼ ἀμάρης, ποταμοῦ δʼ ἐστὶν ἑτοιμότερος. -
-
- - -straton - - -τοὺς σοβαροὺς τούτους καὶ τοὺς περιπορφυροσήμους -παῖδας, ὅσους ἡμεῖς οὐ προσεφιέμεθα, -ὥσπερ σῦκα πέτραισιν ἐπʼ ἀκρολόφοισι πέπειρα -ἔσθουσιν γῦπες, Δίφιλε, καὶ κόρακες. -
-
- - -straton - - -ἄχρι τίνος ταύτην τὴν ὀφρύα τὴν ὑπέροπτον, -Μέντορ, τηρήσεις, μηδὲ τὸ χαῖρε λέγων, -ὡς μέλλων αἰῶνα μένειν νέος, ἢ διὰ παντὸς -ὀρχεῖσθαι πυρίχην; καὶ τὸ τέλος πρόβλεπε. -ἥξει σοι πώγων, κακὸν ἔσχατον, ἀλλὰ μέγιστον -καὶ τότʼ ἐπιγνώσῃ τί σπάνις ἐστὶ φίλων. -
-
- - -straton - - -πῶς ἀναγινώσκειν, Διονύσιε, παῖδα διδάξεις, -μηδὲ μετεκβῆναι φθόγγον ἐπιστάμενος; - -ἐκ νήτης μετέβης οὕτως ταχὺς εἰς βαρύχορδον -φθόγγον, ἀπʼ ἰσχνοτάτης εἰς τάσιν ὀγκοτάτην. -πλὴν οὐ βασκαίνω· μελέτα μόνον ἀμφοτέρους δὲ -κρούων, τοῖς φθονεροῖς λάμβδα καὶ ἄλφα λέγε. -
-
- - -straton - - -εἴ σε φιλῶν ἀδικῶ καὶ τοῦτο δοκεῖς ὕβριν εἶναι, -τὴν αὐτὴν κόλασιν καὶ σὺ φίλει με λαβών. -
-
- - -straton - - -τίς σε κατεστεφάνωσε ῥόδοις ὅλον; εἰ μὲν ἐραστής, -ἆ μάκαρ· εἰ δʼ ὁ πατήρ, ὄμματα καὐτὸς ἔχει. -
-
- - -straton - - -ὄλβιος ὁ γράψας σε, καὶ ὄλβιος οὗτος ὁ κάλλει -τῷ σῷ νικᾶσθαι κηρὸς ἐπιστάμενος. -θριπὸς ἐγὼ καὶ σύρμα τερηδόνος εἴθε γενοίμην, -ὡς ἀναπηδήσας τὰ ξύλα ταῦτα φάγω. -
-
- - -straton - - -οὐκ ἐχθὲς παῖς ἦσθα; καὶ οὐδʼ ὄναρ οὗτος ὁ πώγων -ἤλυθε· πῶς ἀνέβη τοῦτο τὸ δαιμόνιον, -καὶ τριχὶ πάντʼ ἐκάλυψε τὰ πρὶν καλά; φεῦ, τί -τὸ θαῦμα; -ἐχθὲς Τρωίλος ὤν, πῶς ἐγένου Πρίαμος; - -
-
- - -straton - - -οὐ τέρπουσι κόμαι με, περισσότεροί τε κίκιννοι, -τέχνης, οὐ φύσεως ἔργα διδασκόμενοι· -ἀλλὰ παλαιστρίτου παιδὸς ῥύπος ὁ ψαφαρίτης, -καὶ χροιὴ μελέων σαρκὶ λιπαινομένη. -ἡδὺς ἀκαλλώπιστος ἐμὸς πόθος· ἡ δὲ γοῆτις -μορφὴ θηλυτέρης ἔργον ἔχει Παφίης. -
-
- - -straton - - -οὐδέ Σμυρναῖαι Νεμέσεις ὅ τι σοὶ πιλέγουσιν, -Ἀρτεμίδωρε, νοεῖς· μηδὲν ὑπὲρ τὸ μέτρον. - -ἀλλʼ οὕτως ὑπέροπτα καὶ ἄγρια κοὐδὲ πρέποντα -κωμῳδῷ φθέγγῃ, πάνθʼ ὑποκρινόμενος. -μνησθήσῃ τούτων, ὑπερήφανε· καὶ σὺ φιλήσεις, -καὶ κωμῳδήσεις τὴν Ἀποκλειομένην, - -
-
- - -straton - - -εἰ Ζεὺς ἐκ γαίης θνητοὺς ἔτι παῖδας ἐς αἴθρην -ἥρπαζεν, γλυκεροῦ νέκταρος οἰνοχόους, -αἰετὸς ἂν πτερύγεσσιν Ἀγρίππαν τὸν καλὸν ἡμῶν -ἤδη πρὸς μακάρων ἦγε διηκονίας. -ναὶ μὰ σὲ γάρ, Κρονίδη, κόσμου πάτερ, ἢν ἐσαθρήσῃς -τὸν Φρύγιον ψέξεις αὐτίκα Δαρδανίδην. -
-
- - -straton - - -ἄνθεσιν οὐ τόσσοισι φιλοζέφυροι χλοάουσι -λειμῶνες, πυκιναῖς εἴαρος ἀγλαΐαις, - -ὅσσους εὐγενέτας, Διονύσιε, παῖδας ἀθρήσεις, -χειρῶν Κυπρογενοῦς πλάσματα καὶ Χαρίτων. -ἔξοχα δʼ ἐν τούτοις Μιλήσιος ἠνίδε θάλλει, -ὡς ῥόδον εὐόδμοις λαμπόμενον πετάλοις. -ἀλλʼ οὐκ οἶδεν ἴσως, ἐκ καύματος ὡς καλὸν ἄνθος, -οὕτω τὴν ὥρην ἐκ τριχὸς ὀλλυμένην. -
-
- - -straton - - -ὀφθαλμοὺς σπινθῆρας ἔχεις, θεόμορφε Λυκῖνε, -μᾶλλον δʼ ἀκτῖνας, δέσποτα, πυρσοβόλους. -ἀντωπὸς βλέψαι βαιὸν χρόνον οὐ δύναμαί σοι· -οὕτως ἀστράπτεις ὄμμασιν ἀμφοτέροις. -
-
- - -straton - - - -Καρὸν γνῶθι σοφῶν τῶν ἑπτά τις, εἶπε, Φίλιππε -πάντα γὰρ ἀκμάζοντʼ ἐστὶν ἐραστότερα· -καὶ σίκυος πρῶτός που; ἐπʼ ἀνδήροισιν ὁραθεὶς -τίμιος, εἶτα συῶν βρῶμα πεπαινόμενος. -
-
- - -straton - - -ἡλικίης φίλος εἰμὶ καὶ οὐδένα παῖδα προτάσσω, -πρὸς τὸ καλὸν κρίνων ἄλλο γὰρ ἄλλος ἔχει. -
-
- - -straton - - -ἄρκιον ἤδη μοι πόσιος μέτρον εὐσταθίη γὰρ -λύεται ἥ τε φρενῶν ἥ τε διὰ στόματος. -χὠ λύχνος ἔσχισται διδύμην φλόγα, καὶ δὶς ἀριθμέω, -πολλάκι πειράζων, τοὺς ἀνακεκλιμένους. - -ἤδη δʼ οὐκέτι μοῦνον ἐπʼ οἰνοχόον σεσόβημαι, -ἀλλὰ πάρωρα βλέπω κἠπὶ τὸν ὑδροχόον. -
-
- - -straton - - -μισῶ δυσπερίληπτα φιλήματα, καὶ μαχιμώδεις -φωνάς, καὶ σθεναρὴν ἐκ χερὸς ἀντίθεσιν -καὶ μὴν καὶ τόν, ὅτʼ ἐστὶν ἐν ἀγκάσιν, εὐθὺ θέλοντα -καὶ παρέχοντα χύδην, οὐ πάνυ δή τι θέλω· -ἀλλὰ τὸν ἐκ τούτων ἀμφοῖν μέσον, οἷον ἐκεῖνον -τὸν καὶ μὴ παρέχειν εἰδότα καὶ παρέχειν. -
-
- - -straton - - -εἰ μὴ νῦν Κλεόνικος ἐλεύσεται, οὐκέτʼ ἐκεῖνον -δέξομʼ ἐγὼ μελάθροις, οὐ μὰ τὸν — οὐκ ὀμόσω. -εἰ γὰρ ὄνειρον ἰδὼν οὐκ ἤλυθεν, εἶτα παρείη -αὔριον, οὐ παρὰ τὴν σήμερον ὀλλύμεθα. -
-
- - -straton - - -πτηνὸς Ἔρως ἄγαγέν με διʼ ἠέρος, ἡνίκα, Δᾶμι, -γράμμα σὸν εἶδον, ὅ μοι δεῦρο μολεῖν σ’ ἔλεγεν -ῥίμφα δʼ ἀπὸ Σμύρνης ἐπὶ Σάρδιας· ἔδραμεν ἄν μου -ὕστερον εἰ Ζήτης ἔτρεχεν, ἢ Κάλαϊς. -
-
- - -straton - - -οὐκ ἐθέλοντα φιλεῖς με, φιλῶ δʼ ἐγὼ οὐκ ἐθέλοντα· -εὔκολος ἢν φεύγω, δύσκολος ἢν ἐπάγω. - -
-
- - -straton - - - -χρύσεα χαλκείων νῦν εἴπατε· δὸς λάβε παίζει -Σωσιάδας ὁ καλός, καὶ Διοκλῆς ὁ δασύς. -τίς κάλυκας συνέκρινε βάτῳ, τίς σῦκα μύκησιν; -ἄρνα γαλακτοπαγῆ τίς συνέκρινε βοΐ; -οἷα δίδως, ἀλόγιστε, καὶ ἔμπαλιν οἷα κομίζῃ· -οὕτω Τυδείδης Γλαῦκον ἐδωροδόκει. -
-
- - -straton - - -παῖς τις ὅλως ἁπαλὸς τοῦ γείτονος οὐκ ὀλίγως με -κνίζει· πρὸς τὸ θέλειν δʼ οὐκ ἀμύητα γελᾷ· -οὐ πλεῦν δʼ ἐστὶν ἐτῶν δύο καὶ δέκα. νῦν ἀφύλακτοι -ὄμφακες· ἢν δʼ ἀκμάσῃ, φρούρια καὶ σκόλοπες -
-
- - -straton - - - - ἢν τούτῳ † φωνῇς, τὸ μέσον λάβε, καὶ κατακλίνας -ζεύγνυε, καὶ πρώσας πρόσπεσε, καὶ κάτεχε. - - οὐ φρονέεις, Διόφαντε· μόλις δύναμαι γὰρ ἔγωγε -ταῦτα ποιεῖν· παίδων δʼ ἡ πάλη ἔσθʼ ἑτέρα. -μοχλοῦ καὶ μένε, Κῦρι, καὶ ἐμβάλλοντος ἀνάσχου· -πρῶτον συμμελετᾶν ἢ μελετᾷν μαθέτω. -
-
- - -straton - - -ἐχθὲς λουόμενος Διοκλῆς ἀνενήνοχε σαύραν -ἐκ τῆς ἐμβάσεως τὴν Ἀναδυομένην. - -ταύτην εἴ τις ἔδειξεν Ἀλεξάνδρῳ τότʼ ἐν Ἴδῃ, -τὰς τρεῖς ἂν ταύτης προκατέκρινε θεάς. -
-
- - -straton - - -εὐτυχές, οὐ φθονέω, βιβλίδιον ἦ ῥὰ σ’ ἀναγνοὺς -παῖς τις ἀναθλίψει, πρὸς τὰ γένεια τιθείς· -ἢ τρυφεροῖς σφίγξει περὶ χείλεσιν, ἢ κατὰ μηρῶν -εἰλήσει δροσερῶν, ὦ μακαριστότατον -πολλάκι φοιτήσεις ὑποκόλπιον, ἢ παρὰ δίφρους -βληθὲν τολμήσεις κεῖνα θιγεῖν ἀφόβως. -πολλὰ δʼ ἐν ἠρεμίῃ προλαλήσεις· ἀλλʼ ὑπὲρ ἡμῶν, -χαρτάριον, δέομαι, πυκνότερόν τι λάλει. -
-
- - -straton - - -μήτε λίην στυγνὸς παρακέκλισο, μήτε κατηφής, -Δίφιλε, μηδʼ εἴης παιδίον ἐξ ἀγέλης. -ἔστω που προύνικα φιλήματα, καὶ τὰ πρὸ ἔργων -παίγνια, πληκτισμοί, κνίσμα, φίλημα,˘ λόγος. -
-
- - -straton - - -τρεῖς ἀρίθμει τοὺς πάντας ὑπὲρ λέχος, ὧν δύο δρῶσιν, -καὶ δύο πάσχουσιν. θαῦμα δοκῶ τι λέγειν. -καὶ μὴν οὐ ψεῦδος· δυσὶν εἷς μέσσος γὰρ ὑπουργεῖ -τέρπων ἐξόπιθεν, πρόσθε δὲ τερπόμενος. -
-
- - -straton - - -εἰ μὲν ἔφυς ἀμύητος ἀκμὴν ὑπὲρ οὗ σ’ ἔτι πείθω, -ὀρθῶς ἂν δείσαις, δεινὸν ἴσως δοκέων. - -εἰ δέ σε δεσποτικὴ κοίτη πεποίηκε τεχνίτην, -τί φθονέεις δοῦναι, ταὐτὸ λαβὼν, ἑτέρῳ; -ὃς μὲν γὰρ καλέσας ἐπὶ τὸ χρέος, εἶτʼ ἀπολύσας, -εὕδει κύριος ὤν, μηδὲ λόγου μεταδούς· -ἄλλη δʼ ἔνθα τρυφή· παίξεις ἴσα, κοινὰ λαλήσεις, -τἆλλα δʼ ἐρωτηθεὶς κοὐκ ἐπιτασσόμενος. -
-
- - -straton - - -αἰαῖ μοι· τί πάλιν δεδακρυμένον, ἢ τί κατηφές, -παιδίον; εἶπον ἁπλῶς· μηδʼ ὀδύνα· τί θέλεις; -τὴν χέρα μοι κοίλην προσενήνοχας· ὡς ἀπόλωλα· -μισθὸν ἴσως αἰτεῖς· τοῦτʼ ἔμαθες δὲ πόθεν; -οὐκέτι σοι κοπτῆς φίλιαι πλάκες οὐδὲ μελιχρὰ -σήσαμα, καὶ καρύων παίγνιος εὐστοχίη· -ἀλλʼ ἤδη πρὸς κέρδος ἔχεις φρένας. ὡς ὁ διδάξας -τεθνάτω οἷόν μου παιδίον ἠφάνικεν. -
-
- - -straton - - -τῷ τοίχῳ κέκλικας τὴν ὀσφύα τὴν περίβλεπτον, -Κῦρι· τί πειράζεις τὸν λίθον; οὐ δύναται. -
-
- - -straton - - -δός μοι, καὶ λάβε χαλκόν. ἐρεῖς ὅτι πλούσιός εἰμι· - -δώρησαι τοίνυν τὴν χάριν, ὡς βασιλεύς. -
-
- - -straton - - -νῦν ἔαρ εἶ, μετέπειτα θέρος· κἄπειτα τί μέλλεις -Κῦρις; βούλευσαι, καὶ καλάμη γὰρ ἔσῃ. - -
-
- - -straton - - -νῦν ὀρθή, κατάρατε, καὶ εὔτονος, ἡνίκα μηδὲν -ἡνίκα δʼ ἦν ἐχθές, οὐδὲν ὅλως ἀνέπνεις. -
-
- - -straton - - -ἤδη ἐπὶ στρατιῆς ὁρμᾷς, ἔτι παῖς ἀδαὴς ὢν -καὶ τρυφερός. τί ποιεῖς, οὗτος, ὅρα μετάθου. -οἴμοι τίς σ’ ἀνέπεισε λαβεῖν δόρυ· τίς χερὶ πέλτην; -τίς κρύψαι ταύτην τὴν κεφαλὴν κόρυθι; -ὦ μακαριστὸς ἐκεῖνος, ὅτις ποτέ, καινὸς Ἀχιλλεὺς -τοίῳ ἐνὶ κλισίῃ τερπόμενος Πατρόκλῳ. -
-
- - -straton - - -μέχρι τίνος σε γελῶντα μόνον, μηδὲν δὲ λαλοῦντα -οἴσομεν; εἶπον ἁπλῶς ταῦτα σύ, Πασίφιλε. -αἰτῶ, καὶ σὺ γελᾷς· πάλιν αἰτῶ, κοὐκ ἀποκρίνῃ·̓· -δακρύω, σὺ γελᾷς. βάρβαρε, τοῦτο γέλως; -
-
- - -straton - - -καὶ μισθοὺς αἰτεῖτε, διδάσκαλοι; ὡς ἀχάριστοι -ἐστέ· τί γάρ; τὸ βλέπειν παιδία μικρὸν ἴσως; -καὶ τούτοισι λαλεῖν, ἀσπαζομένους τε φιλῆσαι; -τοῦτο μόνον χρυσῶν ἄξιον οὐχ ἑκατόν; -πεμπέτω, εἴ τις ἔχει καλὰ παιδία· κἀμὲ φιλείτω, -μισθὸν καὶ παρʼ ἐμοῦ λαμβανέτω τί θέλει, -
-
- - -straton - - -οὐχὶ τὸ πῦρ κλέψας δέδεσαι, κακόβουλε Προμηθεῦ, -ἀλλʼ ὅτι τὸν πηλὸν τοῦ Διὸς ἠφάνισας. - -πλάττων ἀνθρώπους, ἔβαλες τρίχας· ἔνθεν ὁ δεινὸς -πώγων, καὶ κνήμη παισὶ δασυνομένη. -εἶτά σε δαρδάπτει Διὸς αἰετός, ὃς Γανυμήδην -ἥρπασ’ ὁ γὰρ πώγων καὶ Διὸς ἐστʼ ὀδύνη. -
-
- - -straton - - -στεῖχε πρὸς αἰθέρα δῖον, ἀπέρχεο παῖδα κομίζων, -αἰετέ, τὰς διφυεῖς ἐκπετάσας πτέρυγας, -στεῖχε τὸν ἁβρὸν ἔχων Γανυμήδεα, μηδὲ μεθείης -τὸν Διὸς ἡδίστων οἰνοχόον κυλίκων -φείδεο δʼ αἱμάξαι κοῦρον γαμψώνυχι ταρσῷ, -μὴ Ζεὺς ἀλγήσῃ, τοῦτο βαρυνόμενος. -
-
- - -straton - - -εὐκαίρως ποτὲ παιδοτρίβης, λεῖον προδιδάσκων, -εἰς τὸ γόνυ γνάμψας, μέσσον ἐπαιδοτρίβει, -τῇ χερὶ τοὺς κόκκους ἐπαφώμενος. ἀλλὰ τυχαίως -τοῦ παιδὸς χρῄζων, ἦλθεν ὁ δεσπόσυνος· -ὃς δὲ τάχος τοῖς ποσσὶν ὑποζώσας ἀνέκλινεν -ὕπτιον, ἐμπλέξας τῇ χερὶ τὴν φάρυγα. -ἀλλʼ οὐκ ὢν ἀπάλαιστος ὁ δεσπόσυνος προσέειπεν· - -παῦσαι· πνιγίζεις, φησί, τὸ παιδάριον. - -
-
- - -straton - - -τερπνὸν ὅλως τὸ πρόσωπον ἐμοὶ προσιόντος ἀπαρκεῖ· -οὐκέτι δʼ ἐξόπιθεν καὶ παριόντα βλέπω. -οὕτω γὰρ καὶ ἄγαλμα θεοῦ καὶ νηὸν ὁρῶμεν -ἀντίον, οὐ πάντως καὶ τὸν ὀπισθόδομον, - -
-
- - -straton - - -εἰς ἀγαθὴν συνέβημεν ἀταρπιτόν, ἣν ἀπὸ πρώτης -φράζευ ὅπως ἔσται, Δίφιλε, καὶ μονίμη. -ἄμφω γὰρ πτηνόν τι λελόγχαμεν ἔστι μὲν ἐν σοὶ -κάλλος, ἔρως δʼ ἐν ἐμοί· καίρια δʼ ἀμφότερα. -ἄρτι μὲν ἁρμοσθέντα μένει χρόνον εἰ δʼ ἀφύλακτα -μίμνετον ἀλλήλων, ᾤχετʼ ἀποπτάμενα. -
-
- - -straton - - -οὐδέποτʼ ἠελίου φάος ὄρθριον ἀντέλλοντος -μίσγεσθαι ταύρῳ χρὴ φλογόεντα κύνα, -μή ποτε καρπολόχου Δημήτερος ὑγρανθείσης, -βρέξῃς τὴν λασίην Ἡρακλέους ἄλοχον. -
-
- - -straton - - -πάννυχα μυδαλόεντα πεφυρμένος ὄμματα κλαυθμῷ -ἄγρυπνον ἀμπαύω θυμὸν ἀδημονίῃ, -ἥ με κατʼ οὖν ἐδάμασσεν ἀποζευχθέντος ἑταίρου, -μοῦνον ἐπεί με λιπὼν εἰς ἰδίην Ἔφεσον -χθιζὸς ἔβη Θεόδωρος· ὃς εἰ πάλι μὴ ταχὺς ἔλθοι, -οὐκέτι μουνολεχεῖς κοῖτας ἀνεξόμεθα. -
-
- - -straton - - -ἤν τινα καὶ παριδεῖν ἐθέλω καλὸν ἀντισυναντῶν, -βαιὸν ὅσον παραβὰς εὐθὺ μεταστρέφομαι. -
-
- - -straton - - -παῖδα μὲν ἠλιτόμηνον ἐς ἄφρονα καιρὸν ἁμαρτεῖν, -τῷ πείθοντι φέρει πλεῖον ὕβρισμα φίλῳ. - -ἤδη δʼ ἐν νεότητι παρήλικα παιδικὰ πάσχειν, -τῷ παρέχοντι πάλιν τοῦτο δὶς αἰσχρότερον. -ἔστι δʼ ὅτʼ ἀμφοτέροις τὸ μὲν οὐκέτι, Μοῖρι, τὸ δʼ οὔπω -ἀπρεπές, οἷον ἐγὼ καὶ σὺ τὸ νῦν ἔχομεν. -
-
- - -straton - - -ὡς ἀγαθὴ θεός ἐστι, διʼ ἣν ὑπὸ κόλπον, Ἄλεξι, -πτύομεν, ὑστερόπουν ἁζόμενοι Νέμεσιν. -ἣν σὺ μετερχομένην οὐκ ἔβλεπες, ἀλλʼ ἐνόμιζες -ἕξειν τὸ φθονερὸν κάλλος ἀειχρόνιον. -νῦν δὲ τὸ μὲν διόλωλεν ἐλήλυθε δʼ ἡ τριχάλεπτος -δαίμων χοἰ θέραπες νῦν σε παρερχόμεθα. -
-
- - -callimachus - - -τὸν τὸ καλὸν μελανεῦντα Θεόκριτον, εἰ μὲν ἔμʼ ἔχθει, -τετράκι μισοίης· εἰ δὲ φιλεῖ, φιλέοις· -ναίχι πρὸς εὐχαίτεω Γανυμήδεος, Οὐράνιε Ζεῦ, -καὶ σὺ ποτʼ ἠράσθης. οὐκέτι μακρὰ λέγω. -
-
- - -straton - - -Εὐκλείδῃ φιλέοντι πατὴρ θάνεν ἆ μάκαρ αἰεί, -καὶ πρὶν ἐς ὅττι θέλοι χρηστὸν ἔχων πατέρα -καὶ νῦν εὔφρονα νεκρόν. ἐγὼ δʼ ἔτι λάθρια παίζω· -φεῦ μοίρης τε κακῆς καὶ πατρὸς ἀθανάτου. -
-
- - -scythinus - - -ὀρθὸν νῦν ἕστηκας ἀνώνυμον οὐδὲ μαραίνῃ, -ἐντέτασαι δʼ ὡς ἂν μή ποτε παυσόμενον - -ἀλλʼ ὅτε μοι Νεμεσηνὸς ὅλον παρέκλινεν ἑαυτόν, -πάντα διδούς ἃ θέλω, νεκρὸν ἀπεκρέμασο. -τείνεο, καὶ ῥήσσου, καὶ δάκρυε πάντα ματαίως, -οὐχ ἕξεις ἔλεον χειρὸς ἀφʼ ἡμετέρης. -
-
- - -marcus cornelius fronto - - -τὴν ἀκμὴν Θησαυρὸν ἔχειν, κωμῳδέ, νομίζεις, -οὐκ εἰδὼς αὐτὴν Φάσματος ὀξυτέρην. -ποιήσει σ’ ὁ χρόνος Μισούμενον, εἶτα Γεωργόν, -καὶ τότε μαστεύσεις τὴν Περικειρομένην. -
-
- - -straton - - -εἰ κάλλει καυχᾷ, γίνωσχʼ ὅτι καὶ ῥόδον ἀνθεῖ· -ἀλλὰ μαρανθὲν ἄφνω σὺν κοπρίοις ἐρίφη. -ἄνθος γὰρ καὶ κάλλος ἴσον χρόνον ἐστὶ λαχόντα· -ταῦτα δʼ ὁμῇ φθονέων ἐξεμάρανε χρόνος. -
-
- - -straton - - -εἰ μὲν γηράσκει τὸ καλόν, μετάδος, πρὶν ἀπέλθῃ -εἰ δὲ μένει, τί φοβῇ τοῦθʼ ὃ μένει διδόναι; -
-
- - -straton - - -εὐνοῦχός τις ἔχει καλὰ παιδία· πρὸς τίνα χρῆσιν; -καὶ τούτοισι βλάβην οὐχ ὁσίην παρέχει. -ὄντως ὡς ὁ κύων φάτνῃ ῥόδα, μωρὰ δʼ ὑλακτῶν -οὔθʼ αὑτῷ παρέχει τἀγαθὸν, οὔθʼ ἑτέρῳ. - -
-
- - -straton - - -χαῖρε σύ, μισοπόνηρε πεπλασμένε, χαῖρε, βάναυσε -ὁ πρῴην ὀμόσας μηκέτι μὴ διδόναι. -μηκέτι νῦν ὀμόσῃς. ἔγνωκα γάρ, οὐδέ με λήθεις· -οἶδα τὸ ποῦ, καὶ πῶς, καὶ τίνι, καὶ τὸ πόσου. -
-
- - -straton - - -ἀλλήλοις παρέχουσιν ἀμοιβαδίην ἀπόλαυσιν -οἱ κύνεοι πῶλοι μειρακιευόμενοι· -ἀμφαλλὰξ δʼ οἱ αὐτοὶ ἀπόστροφα νωτοβατοῦνται, -τὸ δρᾶν καὶ τὸ παθεῖν ἀντιπεραινόμενοι. -οὐ πλεονεκτεῖται δʼ οὐδʼ ἅτερος· ἄλλοτε μὲν γὰρ -ἵσταται ὁ προδιδοὺς ἄλλοτʼ ὄπισθε πάλιν. -τοῦτʼ ἐστὶν πάντως τὸ προοίμιον· εἰς γὰρ ἀμοιβήν, -ὡς λέγεται, κνήθειν οἶδεν ὄνος τὸν ὄνον. -
-
- - -straton - - -πέντʼ αἰτεῖς, δέκα δώσω· ἐείκοσι δʼ † ἀντία ἕξεις. -ἀρκεῖ σοι χρυσοῦς; ἤρκεσε καὶ Δανάῃ. -
-
- - -straton - - -ἤδη μοι πολιαὶ μὲν ἐπὶ κροτάφοισιν ἔθειραι, -καὶ πέος ἐν μηροῖς ἀργὸν ἀποκρέμαται· -ὄρχεις δʼ ἄπρηκτοι, χαλεπὸν δέ με γῆρας ἱκάνει. -οἴμοι· πυγίζειν οἶδα, καὶ οὐ δύναμαι. -
-
- - -straton - - -ἄγκιστρον πεπόηκας, ἔχεις ἰχθὺν ἐμέ, τέκνον· -ἕλκε μʼ ὅπου βούλει· μὴ τρέχε, μή σε φύγω. - -
-
- - -straton - - -πρῴην τὴν σαύραν ῥοδοδάκτυλον, Ἄλκιμʼ, ἔδειξας· -νῦν αὐτὴν ἤδη καὶ ῥοδόπηχυν ἔχεις. -
-
- - -straton - - -εἴ με τὸ πυγίζειν ἀπολώλεκε, καὶ διὰ τοῦτο -† ἐκτρέφομαι ποδαγρῶν, Ζεῦ, κρεάγραν με πόει. -
-
- - -straton - - -ἢν ἐσίδω τινὰ λευκόν, ἀπόλλυμαι· ἢν δὲ μελίχρουν, -καίομαι· ἢν ξανθὸν δʼ, εὐθὺς ὅλος λέλυμαι. -
-
- - -straton - - -πᾶν ἄλογον ζῷον βινεῖ μόνον οἱ λογικοὶ δὲ -τῶν ἄλλων ζῴων τοῦτʼ ἔχομεν τὸ πλέον, -πυγίζειν εὑρόντες. ὅσοι δὲ γυναιξὶ κρατοῦνται, -τῶν ἀλόγων ζῴων οὐδὲν ἔχουσι πλέον. -
-
- - -straton - - -ζεῦγος ἀδελφειῶν με φιλεῖ. οὐκ οἶδα τίνʼ αὐτῶν -δεσπόσυνον κρίνω· τοὺς δύο γὰρ φιλέω. -χὠ μὲν ἀποστείχει, ὁ δʼ ἐπέρχεται· ἔστι δὲ τοῦ μὲν -κάλλιστον τὸ παρόν, τοῦ δὲ τὸ λειπόμενον. -
-
- - -straton - - -οἷον ἐπὶ Τροίῃ ποτʼ ἀπὸ Κρήτης, Θεόδωρε, -Ἰδομενεὺς θεράποντʼ ἤγαγε Μηριόνην, - -τοῖον ἔχω σε φίλον περιδέξιον. ἦ γὰρ ἐκεῖνος -ἄλλα μὲν ἦν θεράπων, ἄλλα δʼ ἑταιρόσυνος· -καὶ σὺ τὰ μὲν βιότοιο πανήμερος ἔργα τέλει μοι· -νύκτα δὲ ˘ πειρῶμεν, ναὶ Δία, Μηριόνην. -
-
- - -straton - - -τίς δύναται γνῶναι τὸν ἐρώμενον εἰ παρακμάζει, -πάντα συνὼν αὐτῷ μηδʼ ἀπολειπόμενος; -τίς δύνατʼ οὐκ ἀρέσαι τὴν σήμερον, ἐχθὲς ἀρέσκων; -εἰ δʼ ἀρέσει, τί παθὼν αὔριον οὐκ ἀρέσει; -
-
- - -straton - - -Βουποίητε μέλισσα, πόθεν μέλι τοὐμὸν ἰδοῦσα -παιδὸς ἐφʼ ὑαλέην ὄψιν ὑπερπέτασαι; -οὐ παύσῃ βομβεῦσα, καὶ ἀνθολόγοισι θέλουσα -ποσσὶν ἐφάψασθαι χρωτὸς ἀκηροτάτου; -ἔρρʼ ἐπὶ σοὺς μελίπαιδας ὅποι ποτέ, δραπέτι, σίμβλους -μή σε δάκω· κἠγὼ κέντρον ἔρωτος ἔχω. -
-
- - -straton - - -νυκτερινὴν ἐπίκωμος ἰὼν μεταδόρπιον ὥρην -ἄρνα λύκος θυρέτροις εὗρον ἐφεσταότα, -υἱὸν Ἀριστοδίκου τοῦ γείτονος· ὃν περιπλεχθεὶς -ἐξεφίλουν ὅρκοις πολλὰ χαριζόμενος. -νῦν δʼ αὐτῷ τί φέρων δωρήσομαι; οὔτʼ ἀπάτης γὰρ -ἄξιος, Ἑσπερίης οὔτʼ ἐπιορκοσύνης. - -
-
- - -straton - - -πρόσθε μὲν ἀντιπρόσωπα φιλήματα καὶ τὰ πρὸ πείρας -εἴχομεν ἦς γὰρ ἀκμήν, Δίφιλε, παιδάριον. -νῦν δέ σε τῶν ὄπιθεν γουνάζομαι, οὐ παρεόντων -ὕστερον· ἔστω γὰρ πάντα καθʼ ἡλικίην. -
-
- - -straton - - -Ἐμπρήσω σε, θύρη, τῇ λαμπάδι, καὶ τὸν ἔνοικον -συμφλέξας μεθύων, εὐθὺς ἄπειμι φυγάς, -καὶ πλώσας Ἀδριανὸν ἐπʼ οἴνοπα πόντον, ἀλήτης -φωλήσω γε θύραις νυκτὸς ἀνοιγομέναις. -
-
- - -straton - - -δεξιτερὴν ὀλίγον δὸς ἐπὶ χρόνον, οὐχ ἵνα παύσῃς -κεἲ μʼ ὁ καλὸς χλεύην ἔσχἐ χοροιτυπίης. -ἀλλʼ, εἰ μὴ πλευρῇ παρεκέκλιτο πατρὸς ἀκαίρως, -οὐκ ἂν δή με μάτην εἶδε μεθυσκόμενον. -
-
- - -straton - - -ἐκ ποίου ναοῦ, πόθεν ὁ στόλος οὗτος Ἐρώτων, -πάντα καταστίλβων; ἄνδρες, ἀμαυρὰ βλέπω. -τίς τούτων δοῦλος, τίς ἐλεύθερος; οὐ δύναμʼ εἰπεῖν. -ἄνθρωπος τούτων κύριος; οὐ δύναται. -εἰ δʼ ἐστίν, μείζων πολλῷ Διός, ὃς Γανυμήδην -ἔσχε μόνως, θεὸς ὢν πηλίκος· ὃς δὲ πόσους; - -
-
- - -straton - - -οὐδʼ αὐτή σ’ ἡ λέξις, ἀκοινώνητε, διδάσκει, -ἐξ ἐτύμου φωνῆς ῥήμασιν ἑλκομένη; -πᾶς φιλόπαις λέγεται, Διονύσιε, κοὐ φιλοβούτταις. -πρὸς τοῦτʼ ἀντειπεῖν μή τι πάλιν δύνασαι; -Πύθιʼ ἀγωνοθετῶ, σὺ δʼ Ὀλύμπια· χοὒς ἀποβάλλων -ἐκκρίνω, τούτους εἰς τὸν ἀγῶνα δέχῃ. -
-
- - -meleager - - -πάγκαρπόν σοι, Κύπρι, καθήρμοσε, χειρὶ τρυγήσας -παίδων ἄνθος, Ἔρως ψυχαπάτην στέφανον. -ἐν μὲν γὰρ κρίνον ἡδὺ κατέπλεξεν Διόδωρον, -ἐν δʼ Ἀσκληπιάδην, τὸ γλυκὺ λευκόιον. -ναὶ μὴν Ἡράκλειτον ἐπέπλεκεν, ὡς ἀπʼ ἀκάνθης -† εἳς ῥόδον, οἰνάνθη δʼ ὥς τις ἔθαλλε Δίων -χρυσάνθη δὲ κόμαισι κρόκον Θήρωνα συνῆψεν -ἐν δʼ ἔβαλʼ ἑρπύλλου κλωνίον Οὐλιάδην, -ἁβροκόμην δὲ Μυΐσκον, ἀειθαλὲς ἔρνος ἐλαίης -ἱμερτοὺς δʼ Ἀρέτου κλῶνας ἀπεδρέπετο. -ὀλβίστη νήσων ἱερὰ Τύρος, ἣ τὸ μυρόπνουν -ἄλσος ἔχει παίδων Κύπριδος ἀνθοφόρον. -
-
- - -meleager - - -ἁ πύματον καμπτῆρα καταγγέλλουσα κορωνίς, -ἑρκοῦρος γραπταῖς πιστοτάτα σελίσιν, -φαμὶ τὸν ἐκ πάντων ἠθροισμένον εἰς ἕνα μόχθον -ὑμνοθετᾶν βύβλῳ τᾷδʼ ἐνελιξάμενον - -ἐκτελέσαι Μελέαγρον, ἀείμνηστον δὲ Διοκλεῖ -ἄνθεσι συμπλέξαι μουσοπόλον στέφανον. -οὖλα δʼ ἐγὼ καμφθεῖσα δρακοντείοις ἴσα νώτοις, -σύνθρονος ἵδρυμαι τέρμασιν εὐμαθίας. -
-
- - -straton - - -ἦ τάχα τις μετόπισθε κλύων ἐμὰ παίγνια ταῦτα, -πάντας ἐμοὺς δόξει τοὺς ἐν ἔρωτι πόνους· -ἄλλα δʼ ἐγὼν ἄλλοισιν ἀεὶ φιλόπαισι χαράσσω -γράμματʼ , ἐπεί τις ἐμοὶ τοῦτʼ ἐνέδωκε θεός. -
-
-
- - - diff --git a/data/tlg7000/tlg001/tlg7000.tlg001.perseus-grc5.tracking.json b/data/tlg7000/tlg001/tlg7000.tlg001.perseus-grc5.tracking.json deleted file mode 100644 index 717e7831b..000000000 --- a/data/tlg7000/tlg001/tlg7000.tlg001.perseus-grc5.tracking.json +++ /dev/null @@ -1,14 +0,0 @@ -{ - "epidoc_compliant": false, - "fully_unicode": true, - "git_repo": "canonical-greekLit", - "has_cts_metadata": false, - "has_cts_refsDecl": false, - "id": "2008.01.0476", - "last_editor": "", - "note": "", - "src": "texts/sdl/Anth/05_gk.xml", - "status": "migrated", - "target": "canonical-greekLit/data/tlg7000/tlg001/tlg7000.tlg001.perseus-grc5.xml", - "valid_xml": true -} \ No newline at end of file diff --git a/data/tlg7000/tlg001/tlg7000.tlg001.perseus-grc5.xml b/data/tlg7000/tlg001/tlg7000.tlg001.perseus-grc5.xml deleted file mode 100644 index 4bb8c0608..000000000 --- a/data/tlg7000/tlg001/tlg7000.tlg001.perseus-grc5.xml +++ /dev/null @@ -1,8359 +0,0 @@ - - - - - - - Ἀνθολογία, Volume V - William Roger Paton - Perseus Project, Tufts University - Gregory Crane - - Prepared under the supervision of - Lisa Cerrato - Rashmi Singhal - Bridget Almas - - The National Endowment for the Humanities - Google Digital Humanities Awards Program - - - Trustees of Tufts University - Medford, MA - Perseus Digital Library Project - Perseus 4.0 - tlg7000.tlg001.perseus-grc10.xml - - Available under a Creative Commons Attribution-ShareAlike 4.0 International License - - - - - - The Greek Anthology - William Roger Paton - - London - William Heinemann Ltd. - New York, NY - G. P. Putnam's Sons - 1918 - - 5 - - The Internet Archive - - - - - - - - -

optical character recognition

- - - - - -

This pointer pattern extracts book and epigram.

- - -

This pointer pattern extracts book.

- - - - - - - Greek - Latin - - - - - Epidoc and CTS conversion and header review for best practices - tagged and parsed - - - - - -
- -
-
- - -philippus - - - -Ἰίαίρβ θεὰ Παφίη· σὴν γὰ̆ ἀεὶ δύναμιν -κάλλος τʼ ἀθάνατον καὶ σέβας ἰμβρόβν -πάντες τιμῶσιν θνατοὶ ἐφαμέριοι -ἐν πᾶσιν μύθοις ἔργοισίν τε καλοῖς· -πάντῃ γὰρ πᾶσιν σὴν δηλοῖς τιμήν. -
-
- - -phaedimus - - - -Καλλίστρατός σοι, Ζηνὸς ὦ διάκτορε, -ἔθηκε μορφῆς ξυνὸν ἥλικος τύπον -Κηφισιεὺς ὁ κοῦρος· ᾧ χαρείς, ἄναξ, -Ἀπολλοδώρου παῖδα καὶ πάτραν σάω. -
-
- - -theocritus - - - -ὁ μουσοποιὸς ἐνθάδʼ Ἱππῶναξ κεῖται. -εἰ μὲν πονηρός, μὴ ποτέρχευ τῷ τύμβῳ· -εἰ δʼ ἐσσὶ κρήγυός τε καὶ παρὰ χρηστῶν, -θαρσέων καθίζευ, κἢν θέλῃς, ἀπόβριξον. - -
-
- - -anacreon - - - -ἀλκίμων σ’, ὦ ʼριστοκλείδη, πρῶτον οἰκτείρω φίλων -ὤλεσας δʼ ἥβην, ἀμύνων πατρίδος δουληίην. -
-
- - -phalaecus - - - -νικῶ δίαυλον. ἀλλʼ ἐγὼ παλαίων. -ἐγὼ δὲ πεντάεθλον. ἀλλʼ ἐγὼ πύξ. — -καὶ τίς τύ; — Τιμόδημος. ἀλλʼ ἐγὼ Κρής. -ἐγὼ δὲ Κρηθεύς. ἀλλʼ ἐγὼ Διοκλῆς. — -καὶ τίς πατήρ τοι; — Κλεῖνος. ὥσπερ ἄμμιν. — Ἔμπη δὲ νικῇς; — Ἰσθμοῖ. — τὺ δʼ ἔμπη; — -Νέμειον ἂν λειμῶνα, καὶ παρʼ Ἥρᾳ. -
-
- - -phalaecus - - - -τοῦτʼ ἐγὼ τὸ περισσὸν εἰκόνισμα -τοῦ κωμῳδογέλωτος, εἰς θρίαμβον -κισσῷ καὶ στεφάνοισιν ἀμπυκασθέν, -ἔστασ’, ὄφρα Λύκωνι σᾶμʼ ἐπείη. -ὅσσα γὰρ † καθύπερθε λαμπρὸς ἁνήρ· -μνᾶμα τοῦ χαρίεντος ἔν τε λέσχᾳ -ἒν τʼ οἴνῳ τόδε κἄτι τοῖς ἔπειτα -ἄγκειται, παράδειγμα τᾶς ὀπωπᾶς. - -
-
- - -callimachus - - - -ὁ Λύκτιος Μενοίτας τὰ τόξα ταῦτʼ ἐπειπὼν -ἔθηκε· “τῆ, κέρας τοι δίδωμι καὶ φαρέτρην, -Σάραπι· τοὺς δʼ ὀιστοὺς ἔχουσιν Ἑσπερῖται.” -
-
- - -theodoridas - - - - -ἐκ δολίχου τόνδε σφυρήλατον, ὡς τάχει κρατήσας, -Πᾶις Ἀριστομάχειος ἀνείλετο χάλκεον λέβητα. -
-
- - -callimachus - - - -ἔρχεται πολὺς μὲν Αἰγαῖον διατμήξας ἀπʼ οἰνηρῆς Χίου -ἀμφορεύς, πολὺς δὲ Λεσβίης ἄωτον νέκταρ οἰνάνθης ἄγων. -
-
- - -callimachus - - - -ἁ ναῦς, ἃ τὸ μόνον φέγγος ἐμὶν τὸ γλυκὺ τᾶς ζόας -ἅρπαξας, ποτὶ τὲ Ζανὸς ἱκνεῦμαι λιμενοσκόπω - -
-
- - -simonides - - - - - τίς εἰκόνα τάνδʼ ἀνέθηκεν; Δωριεὺς ὁ Θούριος. - - οὐ Ῥόδιος γένος ἦν; ναί, πρὶν φυγεῖν γε πατρίδα, -δεινᾷ γε χειρὶ πολλὰ ῥέξας ἔργα καὶ βίαια. -
-
- - -hegesippus - - - -ἐρρέτω ἦμαρ ἐκεῖνο, καὶ οὐλομένη σκοτόμαινα, -βρόμος τε δεινὸς ἠνεμωμένης ἁλός, -οἵ ποτε νῆʼ ἐκύλισαν, ἐφʼ ἧς ὁ τὰ πολλὰ μελίφρων -Ἀβδηρίων ἄπρηκτα θεοῖσιν εὔχετο· -ῥαίσθη γὰρ διὰ πάντα, προσηνέχθη δὲ κλύδωνι -τρηχεῖαν εἰς Σέριφον, αἰδοίων ὅθι -προξείνων ὑπὸ χερσὶ λαχὼν πυρός, ἵκετο πάτρην -Ἄβδηρα, κρωσσῷ χαλκέῳ περισταλείς. -
-
- - -anonymi epigrammatici - - - -τόνδε Πύρης ἀνέθηκε Πολυμνήστου φίλος υἱός, -εὐξάμενος δεκάτην Παλλάδι Τριτογενεῖ, -Κυδωνιάτας Κρησίλας εἰργάξατο. -
-
- - -simonides - - - -Ἀργεῖος Δάνδης σταδιοδρόμος ἐνθάδε κεῖται, -νίκαις ἱππόβοτον πατρίδʼ ἐπευκλεΐσας, - -Ὀλυμπίᾳ δίς, ἐν δὲ Πυθῶνι τρία, -δύω δʼ ἐν Ἰσθμῷ, πεντεκαίδεκʼ ἐν Νεμέᾳ· -τὰς δʼ ἄλλας νίκας οὐκ εὐμαρές ἐστʼ ἀριθμῆσαι. -
-
- - -anonymi epigrammatici - - - -εἰμὶ Δίκων υἱὸς Καλλιμβρότου· αὐτὰρ ἐνίκων -τετράκις ἐν Νεμέᾳ, δὶς Ὀλύμπια, πεντάκι Πυθοῖ, -τρὶς δʼ Ἰσθμῷ· στεφανῶ δʼ ἄστυ Συρακοσίων. -
-
- - -anonymi epigrammatici - - - -Σπάρτας μὲν βασιλῆες ἐμοὶ πατέρες καὶ ἀδελφοί· -ἅρμασι δʼ ὠκυπόδων ἵππων νικῶσα Κυνίσκα -εἰκόνα τάνδʼ ἔστησα. μόναν δέ με φαμι γυναικῶν -Ἑλλάδος ἐκ πάσας τόνδε λαβεῖν στέφανον. -
-
- - -anonymi epigrammatici - - - -Ἰφίων ἔγραψεν ἑᾷ χερί, τόν ποκα ὕδωρ -ἔθρεψε Πειρήνης ἄπο. -
-
- - -parmeniscus - - - -χάλκεα ἔργα, λέγοισθε θοῆς ἐπινίκια πώλου, -ἥτις κεντροραγὴς βαλοῦσα παῖδα, - -ψιλὴ λευρὸν ἔθυσε περὶ δρόμον. ἐκ δʼ ἄρʼ ἐκείνου -Παρμένων χρυσέης κύρησε νίκης. -Φώκριτε, σῷ δʼ ἄρα παιδὶ Ἀμυκλαΐδαι ˘ βασιλῆες -πατρῴων ἔδοσαν λαχεῖν ἀέθλων. -
-
- - -simonides - - - -ἄνθηκεν τόδʼ ἄγαλμα Κορίνθιος ὅσπερ ἐνίκα -ἐν Δελφοῖς ποσὶ Νικολᾴδας, -καὶ Παναθηναίοις στεφάνους λάβε πέντʼ ἐπʼ ἀέθλοις -ἑξῆς ἀμφιφορεῖς ἐλαίου· -Ἰσθμῷ δʼ ἐν ζαθέᾳ τρὶς ἐπισχερὼ οἶδεν ἑλόντα -ἀκτὴ Ποντομέδοντος ἆθλον· -καὶ Νεμέᾳ τρὶς ἐνίκησεν, καὶ τετράκις ἄλλα -Πελλάνᾳ, δύο δʼ ἐν Λυκαίῳ, -καὶ Τεγέᾳ, καὶ ἐν Αἰγίνᾳ, κρατερᾷ τʼ Ἐπιδαύρῳ, -καὶ Θήβᾳ, Μεγάρων τε δάμῳ· -ἐν δὲ Φλιοῦντι σταδίῳ, τά τε πέντε κρατήσας -ηὔφρανεν μεγάλαν Κόρινθον. -
-
- - -simonides - - - -συλλαβαῖς λεῖπον καὶ τὸ Ἀρχιλόχειον σκάζον τρίμετρον -πατρίδα κυδαίνων ἱερὴν πόλιν Ὦπις Ἀθανᾶς, -τέκνον μελαίνης γῆς, χαρίεντας αὐλοὺς -τούσδε σὺν Ἡφαίστῳ τελέσας, ἀνέθηκʼ Ἀφροδίτῃ.καλοῦ, -δαμασθεὶς ἱμέρῳ Βρύσωνος. - -
-
- - -theodoridas - - - -Μνασάλκεος τὸ σᾶμα τῶ Πλαταΐδα, -τῶ λεγῃοποιῶ· -ἁ Μῶσα δʼ αὐτῶ τᾶς Σιμωνίδα πλάτας -ἦς ἀποσπάραγμα· -κενά τε κλαγγὰν κἀπιλακυθίστρια διθυραμβοχάνα. -τέθνακε, μὴ βάλωμες· εἰ δέ κε ζόεν, -τύμπανὸν κʼ ἐφύση. -
-
- - -phaedimus - - - -τόξον μέν, ᾧ Γίγαντος ὤλεσας σθένος, -ἴσχε βίης, Ἑκάεργʼ ἀνάσσων· -† οὒ οἱ φαρέτρη λύεται λυκοκτόνος· -τοῖσδε δʼ ἐπʼ ἠιθέοις ὀιστὸν ˘ -στρέφειν Ἔρωτος, τόφρʼ ἀλέξωνται πάτρῃ, -θαρσαλέοι φιλότατι κούρων -πυροῖ γὰρ ἀλκήν,˘ καὶ θεῶν ὑπέρτατος -αἰὲν ὅδε προμάχους ἀέξειν. -Μελιστίωνος δʼ, ὦ πατρώιον σέβας -Σχοινιέων, ἐπίηρα δέχθαι. - -
-
- - -asclepiades - - - -ἰὼ παρέρπων, μικρόν, εἴ τι κἀγκονεῖς, ἄκουσον -τὰ Βότρυος περισσὰ δῆτα κήδη, -ὃς πρέσβυς ὀγδώκοντʼ ἐτῶν τὸν ἐννέων ἔθαψεν -ἤδη τι τέχνᾳ καὶ σοφὸν λέγοντα. -φεῦ τὸν τεκόντα, φεῦ δὲ καὶ σέ, Βότρυος φίλος παῖ, -ὅσων ἄμοιρος ἡδονῶν ἀπώλευ. -
-
- - -callimachus - - - -τὰ δῶρα τῇ Ἀφροδίτῃ -Σῖμον ἡ περίφοιτος εἰκόνʼ αὑτῆς -ἔθηκε, τήν τε μίτρην, -ἣ μαστοὺς ἐφίλησε τόν τε πανὸν -καὶ τοὺς ποτʼ ἀντίναξεν - -ἀυτοῦσ’ ἀν ὄρη τάλαινα θύρσους. -
-
- - -callimachus - - - -Δήμητρι τῇ Πυλαίῃ, τῇ τοῦτον οὑκ Πελασγῶν -Ἀκρίσιος τὸν νηὸν ἐδείματο, ταῦθʼ ὁ Ναυκρατίτης -καὶ τῇ κάτω θυγατρὶ τὰ δῶρα Τιμόδημος -εἵσατο, τῶν κερδέων δεκατεύματα· καὶ γὰρ εὔξαθʼ οὕτως. - -
-
- - -simonides - - - -μνήσομαι· οὐ γὰρ ἔοικεν ἀνώνυμον ἐνθάδʼ Ἀρχεναύτεω -κεῖσθαι θανοῦσαν ἀγλαὰν ἄκοιτιν, -Ξανθίππην Περιάνδρου ἀπέκγονον, ὃς ποθʼ ὑψιπύργου -σήμαινε λαοῖς τέρμʼ ἔχων Κορίνθου. -
-
- - -phalaecus - - - -Φῶκος ἐπὶ ξείνῃ μὲν ἀπέφθιτο· κῦμα γὰρ μέλαινα -νεῦς οὐχ ὑπεξήνεικεν, οὐδʼ % ἐδέξατο, -ἀλλὰ κατʼ Αἰγαίοιο πολὺν βυθὸν ˘ ᾤχετο πόντου, -βίῃ Νότου πρήσαντος ἐσχάτην ἅλα. -τύμβου δʼ ἐν πατέρων κενεοῦ λάχεν ὃν πέρι Προμηθὶς -μήτηρ, λυγρῇ ὄρνιθι πότμον εἰκέλη, -αἰαῖ κωκύει τὸν ἑὸν γόνον ἤματα πάντα, -λέγουσα τὸν πρόωρον ὡς ἀπέφθιτο. -
-
- - -callimachus - - - -

- -

-
-
- - -simonides - - - -πολλάκι δὴ φυλῆς Ἀκαμαντίδος ἐν χοροῖσιν Ὧραι -ἀνωλόλυξαν κισσοφόροις ἐπὶ διθυράμβοις -αἱ Διονυσιάδες, μίτραισι δὲ καὶ ῥόδων ἀώτοις -σοφῶν ἀοιδῶν ἐσκίασαν λιπαρὰν ἔθειραν, -οἳ τόνδε τρίποδά σφισι μάρτυρα Βακχίων ἀέθλων -ἔθηκαν· κείνους δʼ Ἀντιγένης ἐδίδασκεν ἄνδρας. -εὖ δʼ ἐτιθηνεῖτο γλυκερὰν ὄπα Δωρίοις Ἀρίστων -Ἀργεῖος ἡδὺ πνεῦμα χέων καθαρῶς ἐν αὐλοῖς· -τῶν ἐχορήγησεν κύκλον μελίγηρυν Ἱππόνικος -Στρούθωνος υἱός, ἅρμασιν ἐν Χαρίτων φορηθείς, -αἳ οἱ ἐπʼ ἀνθρώπους ὄνομα κλυτὸν ἀγλαάν τε νίκαν -θῆκαν ἰοστεφάνων θεᾶν ἕκατι Μοισᾶν. -
-
- - -nicaenetus - - - -οἶνός τοι χαρίεντι πέλει ταχὺς ἵππος ἀοιδῷ· -ὕδωρ δὲ πίνων οὐδὲν ἂν τέκοις σοφόν. -τοῦτʼ ἔλεγεν, Διόνυσε, καὶ ἔπνεεν οὐχ ἑνὸς ἀσκοῦ -Κρατῖνος, ἀλλὰ παντὸς ὠδώδει πίθου. -τοιγὰρ ὑπὸ στεφάνοις μέγας ἔβρυεν, εἶχε δὲ κισσῷ -μέτωπον ὥσπερ καὶ σὺ κεκροκωμένον. - -
-
- - -simonides - - - -μετάθεσιν τῆς λέξεως -Μοῦσά μοι Ἀλκμήνης καλλισφύρου υἱὸν ἄειδε. -υἱὸν Ἀλκμήνης ἄειδε Μοῦσά μοι καλλισφύρου. -
-
- - -timocreon - - - -Κηία με προσῆλθε φλυαρία οὐκ ἐθέλοντα. -οὐκ ἐθέλοντά με προσῆλθε Κηΐα φλυαρία. -
-
- -
-
- - -socrates - - - -Πολυκράτης -ὄλβιε Πυθαγόρη, Μουσέων Ἑλικώνιον ἔρνος, -εἰπέ μοι εἰρομένῳ, ὁπόσοι σοφίης κατʼ ἀγῶνα -σοῖσι δόμοισιν ἔασιν, ἀεθλεύοντες ἄριστα. - - -Πυθαγόρας -τοιγὰρ ἐγὼν εἴποιμι, Πολύκρατες· ἡμίσεες μὲν -ἀμφὶ καλὰ σπεύδουσι μαθήματα· τέτρατοι αὖτε -ἀθανάτου φύσεως πεπονήαται· ἑβδομάτοις δὲ -σιγὴ πᾶσα μέμηλε, καὶ ἄφθιτοι ἔνδοθι μῦθοι· -τρεῖς δὲ γυναῖκες ἔασι, Θεανὼ δʼ ἔξοχος ἄλλων. -τόσσους Πιερίδων ὑποφήτορας αὐτὸς ἀγινῶ. - -
-
- - -anonymi epigrammatici - - - -Παλλὰς ἐγὼ χρυσῆ σφυρήλατος· αὐτὰρ ὁ χρυσὸς -αἰζηῶν πέλεται δῶρον ἀοιδοπόλων. -ἥμισυ μὲν χρυσοῖο Χαρίσιος, ὀγδοάτην δὲ -Θέσπις, καὶ δεκάτην μοῖραν ἔδωκε Σόλων, -αὐτὰρ ἐεικοστὴν Θεμίσων τὰ δὲ λοιπὰ τάλαντα -ἐννέα, καὶ τέχνη δῶρον Ἀριστοδίκου. - -
-
- - -anonymi epigrammatici - - -ἁ Κύπρις τὸν Ἔρωτα κατηφιόωντα προσηύδα· - -τίπτε τοι, ὦ τέκος, ἄλγος ἐπέχραεν; ὃς δʼ ἀπάμειπτο· -“ Πιερίδες μοι μῆλα διήρπασαν ἄλλυδις ἄλλη, -αἰνύμεναι κόλποιο, τὰ δὴ φέρον ἐξ Ἑλικῶνος. -Κλειὼ μὲν μήλων πέμπτον λάβε· δωδέκατον δὲ -Εὐτέρπη· ἀτὰρ ὀγδοάτην λάχε δῖα Θάλεια· -Μελπομένη δʼ εἰκοστὸν ἀπαίνυτο· Τερψιχόρη δὲ -τέτρατον ἑβδομάτην δʼ Ἐρατὼ μετεκίαθε μοίρην -ἡ δὲ τριηκόντων με Πολύμνια νόσφισε μήλων, -Οὐρανίη δʼ ἑκατόν τε καὶ εἴκοσι· Καλλιόπη δὲ -βριθομένη μήλοισι τριηκοσίοισι βέβηκε. -σοὶ δʼ ἄρα κουφοτέρῃσιν ἐγὼ σὺν χερσὶν ἱκάνω, -πεντήκοντα φέρων τάδε λείψανα μῆλα θεάων.” -
-
- - -anonymi epigrammatici - - - -Αὐγείην ἐρέεινε μέγα σθένος Ἀλκεΐδαο, -πληθὺν βουκολίων διζήμενος· ὃς δʼ ἀπάμειπτο· -“ ἀμφὶ μὲν Ἀλφειοῖο ῥοάς, φίλος, ἥμισυ τῶνδε· -μοίρη δʼ ὀγδοάτη ὄχθον Κρόνου ἀμφινέμονται· -δωδεκάτη δʼ ἀπάνευθε Ταραξίπποιο παρʼ ἱρὸν -ἀμφὶ δʼ ἄρʼ Ἤλιδα δῖαν ἐεικοστὴ νεμέθονται· -αὐτὰρ ἐν Ἀρκαδίῃ γε τριηκοστὴν προλέλοιπα· -λοιπὰς δʼ αὖ λεύσσεις ἀγέλας τόδε πεντήκοντα.” - -
-
- - -anonymi epigrammatici - - -εἰμὶ πατρὸς λευκοῖο μέλαν τέκος, ἄπτερος ὄρνις, -ἄχρι καὶ οὐρανίων ἱπτάμενος νεφέων -κούραις δʼ ἀντομένῃσιν ἀπενθέα δάκρυα τίκτω· -εὐθὺ δὲ γεννηθεὶς λύομαι εἰς ἀέρα. -
-
- - -anonymi epigrammatici - - -Ὡρονόμων ὄχʼ ἄριστε, πόσον παρελήλυθεν ἠοῦς; - -ὅσσον ἀποιχομένοιο δύο τρίτα, δὶς τόσα λείπει. - -
-
- - -anonymi epigrammatici - - -χάλκεός εἰμι λέων κρουνοὶ δέ μοι ὄμματα δοιά, -καὶ στόμα, καὶ δὲ θέναρ δεξιτεροῖο ποδός. -πλήθει δὲ κρητῆρα δύʼ ἤμασι δεξιὸν ὄμμα, -καὶ λαιὸν τρισσοῖς, καὶ πισύροισι θέναρ· -ἄρκιον ἓξ ὥραις πλῆσαι στόμα· σὺν δʼ ἅμα πάντα, -καὶ στόμα καὶ γλῆναι καὶ θέναρ, εἰπὲ πόσον. -
-
- - -anonymi epigrammatici - - -ἕξ, ἕν, πέντε, δύο, τρία, τέσσαρα κῦβος ἐλαύνει. -
-
- - -anonymi epigrammatici - - -ἄνδρʼ ἐμὸν ἔκτανʼ ἑκυρός, ἑκυρὸν δʼ ἔκτανεν ἀνὴρ, -καὶ δαὴρ ἑκυρόν, καὶ ἑκυρὸς γενέτην. - -
-
- - -anonymi epigrammatici - - -λέβητας ἔγνων μὴ σιωπᾶν εἰδότας, -πλὴν ἄρτια τὸν χαλκὸν ἠχεῖν προτρέπειν, -ἀντικτυποῦντος τοῦ πρώτου τῷ δευτέρῳ, -καὶ μεταδιδόντος τῷ τετάρτῳ τοῦ τρίτου. -ἐὰν δὲ τὸ κινοῦν ἠρεμῇ καὶ μὴ πνέῃ, -ἄφωνος ὁ λέβης· τῇ φύσει γὰρ οὐ λάλος. -τῶν σῶν δὲ λεβήτων ἡ φύσις μὲν εὔστομος· -σῇ ˘ δʼ ἐντυχοῦσα γίνετʼ εὐστομωτέρα, -σιγῶσ’ ὅταν δεῖ, καὶ λαλοῦσ’ ὅταν δέοι. -
-
- - -anonymi epigrammatici - - -τοὺς χιλίους στατῆρας, οὓς ἐκτησάμην, -λαβεῖν κελεύω τοὺς ἐμοὺς παῖδας δύο· -πλὴν γνησίου τὸ πέμπτον ηὐξήσθω δέκα -μέτρου τετάρτου τῶν λαχόντων τῷ νόθῳ. -
-
- - -anonymi epigrammatici - - -ἓξ μνῶν ἓξ φιάλας Κροῖσος βασιλεὺς ἀνέθηκεν -δραχμῇ τὴν ἑτέρην μείζονα τῆς ἑτέρης. -
-
- - -anonymi epigrammatici - - -ἄμφω μὲν ἡμεῖς εἴκοσι μνᾶς ἕλκομεν, -Ζῆθός τε χὠ ξύναιμος· ἢν δέ μου λάβῃς - -τρίτον, τό τέτρατον τε τοῦδʼ Ἀμφίονος, -ἓξ πάντʼ ἀνευρὼν, μητρὸς εὑρήσεις σταθμόν. -
-
- - -anonymi epigrammatici - - -εἷς ἄνεμος· δύο νῆες· ἐρέττουσιν δέκα ναῦται· -εἷς δὲ κυβερνήτης ἀμφοτέρας ἐλάει. -
-
- - -anonymi epigrammatici - - -ἓξ πόδες ἐν χώραισι τόσαις μετροῦσιν ἴαμβον, -σπονδεῖος, χόριος, καὶ δάκτυλος ἠδʼ ἀνάπαιστος, -πυρρίχιος καὶ ἴαμβος· ἔχει δέ τε οἶκον ἕκαστος. -πυρριχίου τέλος ἔσθʼ ὃς μακρὰν οἶδεν ἐν ἀρχῇ, -πρώτη καὶ τριτάτη, πέμπτη δέ τε τούσδε κατίσχει. -οἱ δʼ ἄλλοι κατὰ πᾶσαν ὁμῶς βαίνουσιν ἀταρπόν· -μοῦνον ἴαμβον ἄνακτα φέρει τόπος, ὃν κʼ ἐθελήσῃ. -
-
- - -anonymi epigrammatici - - -νῆσος ὅλη, μύκημα βοός, φωνή τε δανειστοῦ. -
-
- - -anonymi epigrammatici - - -Θήρη μὲν πολέμου μελέτη· θήρη δὲ διδάσκει -κρυπτὸν ἑλεῖν, ἐπιόντα μένειν, φεύγοντα, διώκειν. - -
-
- - -anonymi epigrammatici - - -Ἕκτορα τὸν Ἕκτορα Διομήδης ἔκτανεν ἀνὴρ -Αἴας πρὸ Τρώων ἔγχεϊ μαρνάμενον. -
-
- - -anonymi epigrammatici - - -εἶδον ἐγώ ποτε θῆρα διʼ ὕλης τμητοσιδήρου -ὕπτιον ὀρθὰ τρέχοντα, ποσὶν δʼ οὐχ ἥπτετο γαίης. -
-
- - -anonymi epigrammatici - - -εἰ πυρὸς αἰθομένου μέσσην ἑκατοντάδα θείης, -παρθένου εὑρήσεις υἱέα καὶ φονέα. -
-
- - -anonymi epigrammatici - - -ἐς μέσον Ἡφαίστοιο βαλὼν ἑκατοντάδα μούνην, -παρθένου εὑρήσεις υἱέα καὶ φονέα. -
-
- - -anonymi epigrammatici - - -μὴ λέγε, καὶ λέξεις ἐμὸν οὔνομα. δεῖ δέ σε λέξαι; -ὧδε πάλιν, μέγα θαῦμα, λέγων ἐμὸν οὔνομα λέξεις. -
-
- - -anonymi epigrammatici - - -Νηρέος ὄντα με παῖδα φέρει γαιήιος υἱός, -τὸν Στυγὸς ἱμερτοῖς νάμασι δυόμενον. - -
-
- - -anonymi epigrammatici - - - -μεον Διόνυσον ὁρᾷς ἐμέ· τίκτε με νηδὺς -διχθαδίη, μνήμης δὲ πατήρ ἐμὸς ἡγεμονεύει. -θηροφόρον δέ με πρῶτον ἐγείνατο νηλεόθυμον -αὐτοκασιγνήτης δὲ προκὸς φίλον υἷα κατακτάς, -οὐκέτι θῆρα φέρω, ἀλλʼ οὐρανὸν ἠδὲ θάλασσαν, -καὶ χθόνα, καὶ μακάρων ἱερὸν χορὸν ἄφθιτον αἰεί. -
-
- - -anonymi epigrammatici - - -ὀφθαλμοὺς Σκύλλης ποθέω, τοὺς ἔσβεσεν αὐτὸς -ἠέλιος, μήνη τε· πατὴρ δέ με δείδιε κούρην -λοῦμαι δʼ ἀενάοισι δύω ποταμοῖσι θανοῦσα, -οὓς κορυφὴ προΐησιν ἐπʼ ὀφρυόεντι κολωνῷ. -
-
- - -anonymi epigrammatici - - -ξανθὴ μέν τις ἐγὼν ἤμην πάρος, ἀλλὰ κοπεῖσα -γίνομαι ἀργεννῆς λευκοτέρη χιόνος· -χαίρω δὲ γλυκερῷ τε καὶ ἰχθυόεντι λοετρῷ, -πρώτη δαιτυμόνων ἐς χορὸν ἐρχομένη. - -
-
- - -anonymi epigrammatici - - -παρθένον ἐν πελάγει ζητῶν τὴν πρόσθε λέοντα, -τηθὴν εὑρήσεις παιδοφόνου Ἑκάβης. -
-
- - -anonymi epigrammatici - - -ἐξ ἁλὸς ἰχθυόεν γένος ἔλλαχον· εἷς δὲ μʼ ἄεθλος -εἰς Διονυσιακοὺς οἶδεν ἀγῶνας ἄγειν· -καὶ δέμας ἐν σταδίοισιν ἀλειψάμενος λίπʼ ἐλαίῳ, -υἱέα μὲν Δηοῦς ὤλεσα χερσὶν ἐμαῖς· -δεύτερον αὖτε Γίγαντας ἀολλέας ἄλλοθεν ἄλλους -ἐκπέμπω πολλαῖς χείρεσιν ἑλκομένους. -
-
- - -anonymi epigrammatici - - -μούνῳ μοι φίλον ἐστὶ γυναιξί περ ἐν φιλότητι -μίγνυσθαι, αὐτῶν λισσομένων ποσίων. -
-
- - -anonymi epigrammatici - - -κριὸν ἔχω γενετῆρα, τέκεν δέ με τῷδε χελώνη· -τικτομένη δʼ ἄμφω πέφνον ἐμοὺς γονέας. - -
-
- - -anonymi epigrammatici - - -οἴνου τὴν ἑτέρην γράφε μητέρα, καὶ θὲς ἐπʼ ἄρθρῳ -ἄρθρον τοῦ πάτρη πατρὸς ἄκοιτις ὁρᾷς. -
-
- - -anonymi epigrammatici - - -Κτανθεὶς τὸν κτείναντα κατέκτανον· ἀλλʼ ὁ μὲν οὐδʼ ὣς -ἤλυθεν εἰς Ἀίδην αὐτάρ ἔγωγʼ ἔθανον. -
-
- - -anonymi epigrammatici - - -τόν με κατακτείναντα κατέκτανον, οὐ δέ μοι ἦδος· -θῆκε γὰρ ἀθάνατον τὸν κτάμενον θάνατος. -
-
- - -anonymi epigrammatici - - -νῆσός τις πόλις ἐστὶ φυτώνυμον αἷμα λαχοῦσα, -ἰσθμὸν ὁμοῦ καὶ πορθμὸν ἐπʼ ἠπείροιο φέρουσα· -ἔνθʼ ἀπʼ ἐμῆς ἔσθʼ αἷμα ὁμοῦ καὶ Κέκροπος αἷμα· -ἔνθʼ Ἥφαιστος ἔχει χαίρων γλαυκῶπιν Ἀθήνην -κεῖθι θυηπολίην πέμπειν κελόμην Ἡρακλεῖ. - -
-
- - -anonymi epigrammatici - - -ἀνθρώπου μέλος εἰμί ὃ καὶ τέμνει με σίδηρος· -γράμματος αἰρομένου δύεται ἠέλιος. -
-
- - -anonymi epigrammatici - - -πικρή μοι ζωή, θάνατος γλυκύς, ὕδατα δʼ ἄμφω· -θνῄσκω ἀναιμάκτοις ἔγχεσι νυσσόμενος· -ἢν δέ τις ἐν ζώοντι νέκυν τύμβῳ με καλύψῃ, -αἵματι συγγενέων πρῶτον ἀποβρέχομαι. -
-
- - -anonymi epigrammatici - - -Παλλάδος εἰμὶ φίλη, τίκτω δʼ ἀπερείσια τέκνα, -ἃ κατὰ πετράων ἄνδρες βάλον ὀλλυμένων δέ, -Πηλείδῃ φάος ἔσκε, βροτῶν ἄκος, ἕρκος ἀγώνων. -
-
- - -anonymi epigrammatici - - -κτεῖνα κάσιν, κτάνε δʼ αὖ με κάσις, θάνομεν δʼ ὑπὸ πατρός· -μητέρα δʼ ἀμφότεροι τεθναότες κτάνομεν. -
-
- - -anonymi epigrammatici - - -νῆσόν τις καλέων μʼ οὐ ψεύσεται· ὡς ἐτεὸν γὰρ -πολλοὺς ἐς κελάδους οὔνομʼ ἔθηκεν ἐμόν. - -
-
- - -anonymi epigrammatici - - -εἰσὶ κασίγνηται δύʼ ἀδελφεαί· ἡ μία τίκτει -τὴν ἑτέρην, αὐτὴ δὲ τεκοῦσ’ ἀπὸ τῆσδε τεκνοῦται· -ὥστε κασιγνήτας οὔσας ἅμα καὶ συνομαίμους, -αὐτοκασιγνήτας κοινῇ καὶ μητέρας εἶναι. -
-
- - -anonymi epigrammatici - - -μητέρʼ ἐμὴν τίκτω καὶ τίκτομαι εἰμὶ δὲ ταύτης -ἄλλοτε μὲν μείζων, ἄλλοτε μειοτέρη. -
-
- - -anonymi epigrammatici - - -παρθένος εἰμὶ γυνή, καὶ παρθένου εἰμὶ γυναικός, -καὶ κατʼ ἔτος τίκτω παρθένος οὖσα γυνή. -
-
- - -anonymi epigrammatici - - -εἰμὶ πόλου μίμημα· δύω δέ με θῆρες ἄγουσι, -πρόσθε μὲν Ἠριγόνης, Πασιφάης δʼ ὄπιθεν -Ἡρακλέους τηρεῖ με συνευνέτις, ἡ δέ με Φοίβου -τείρει νύμφα φίλη πολλάκι δαιομένη. -
-
- - -anonymi epigrammatici - - -νυκτὶ μιῇ καὶ Τρωσὶν ἐπήλυθα, καὶ τὰ Πελασγῶν -φῦλα διατμήξας εἷλον ἄνευ δόρατος· - -οὐ μὲν ὁ Τυδείδης, οὐδʼ ὁ πτολίπορθος Ὀδυσσεὺς -τὸν θρασὺν ἐκ νηῶν ἔσθενον ἐξελάσαι· -ἀλλὰ μένος καὶ θάρσος ἐνὶ στήθεσσιν ἀέξων -Ἀργείων στρατιὴν ὤλεσα καὶ Φρυγίων. -
-
- - -anonymi epigrammatici - - -εἰμὶ μέλας, λευκός, ξανθός, ξηρός τε καὶ ὑγρός· -εὖτε δὲ δουρατέων πεδίων ὕπερ ἐντανύσῃς με, -Ἄρεϊ καὶ παλάμῃ φθέγγομαι οὐ λαλέων. -
-
- - -anonymi epigrammatici - - -γράμματος ἀρνυμένου πληγὴν ποδὸς οὔνομα τεύχει -ἡμέτερον· πταίειν δὲ βροτῶν πόδας οὔποτʼ ἐάσει. -
-
- - -anonymi epigrammatici - - -εἵνεκα φωτὸς ἐγὼ φῶς ὤλεσα· φὼς δὲ παραστὰς -φῶς μοι ὄπασσε φίλον ποσσὶ χαριζόμενος. -
-
- - -anonymi epigrammatici - - -αἱ Χάριτες μήλων καλάθους φέρον, ἐν δὲ ἑκάστῃ -ἶσον ἔην πλῆθος. Μοῦσαι σφίσιν ἀντεβόλησαν - -ἐννέα, καὶ μήλων σφέας ᾔτεον αἳ δʼ ἄρʼ ἔδωκαν -ἶσον ἑκάστῃ πλῆθος, ἔχον δʼ ἴσα ἐννέα καὶ τρεῖς. -εἰπὲ πόσον μὲν δῶκαν, ὅπως δʼ ἴσα πᾶσαι ἔχεσκον. -
-
- - -anonymi epigrammatici - - -τεῦξόν μοι στέφανον, χρυσὸν χαλκόν τε κεράσσας, -κασσίτερὸν θʼ ἅμα τοῖσι, πολύκμητόν τε σίδηρον, -μνῶν ἑξήκοντα· χρυσὸς δʼ ἐχέτω μετὰ χαλκοῦ -δοιὰ μέρη τρισσῶν χρυσὸς δʼ ἅμα κασσίτερός τε -τρισσὰ μέρη τετόρων χρυσὸς δʼ αὖτʼ ἠδὲ σίδηρος -τόσσα μέρη τῶν πέντε. πόσον δʼ ἄρα δεῖ σε κεράσσαι -λέξον τοῦ χρυσοῦ, χαλκοῦ πόσον, ἀλλʼ ἔτι λέξον -κασσιτέροιο πόσον, λοιποῦ πόσον εἰπὲ σιδήρου, -ὥστε σε τὸν στέφανον τεῦξαι μνῶν ἑξήκοντα. -
-
- - -anonymi epigrammatici - - -τὸ τρίτον, ἀργυροποιέ, προσέμβαλε καὶ τὸ τέταρτον -τῆς φιάλης εἰς ἕν, καὶ τὸ δυωδέκατον, -εἰς δὲ κάμινον ἔλαυνε βαλὼν, καὶ πάντα κυκήσας -ἔξελέ μοι βῶλον μνᾶν δέ μοι ἑλκυσάτω. -
-
- - -anonymi epigrammatici - - - - ἔχω τὸν ἑξῆς, καὶ τὸ τοῦ τρίτου τρίτον. - - κἀγὼ τὸν ἑξῆς, καὶ τὸ τοῦ πρώτου τρίτον. - - κἀγὼ δέκα μνᾶς, καὶ τὸ τοῦ μέσου τρίτον. - -
-
- - -anonymi epigrammatici - - - -ἦν ὅτε σὺν Λαπίθῃσι καὶ ἀλκίμῳ Ἡρακλῆι -Κενταύρους διφυεῖς ὤλεσα μαρνάμενος· -ἦν ὅτε μουνογένεια κόρη θάνεν ἐν τρισὶ πληγαῖς -ἡμετέραις, Κρονίδην δʼ ἤκαχον εἰνάλιον -νῦν δέ με Μοῦσα τρίτη πυρίναις Νύμφαισι μιγέντα -δέρκεται ὑελίνῳ κείμενον ἐν δαπέδῳ. -
-
- - -anonymi epigrammatici - - - -Ἡφαίστῳ ποτὲ Παλλὰς ὑπʼ ἀγκοίνῃσι δαμεῖσα -εἰς εὐνὴν ἐμίγη Πηλέος ἐν θαλάμοις· -τοὶ δʼ ὡς οὖν λιπαρῇσι καλυφθήτην ὀθόνῃσιν, -αὐτίκʼ ἐγεννήθη νυκτιπόλος Φαέθων. -
-
- - -anonymi epigrammatici - - - -κἀμὲ σοφὴ ποίησε τέχνη Παιήονος ἔμπνουν -πῦρ ὑπὸ χαλκελάτοις χείλεσι κευθομένην -δειλῶν δʼ αἷμα κελαινὸν ἀπʼ ἀνθρώπων ἐρύουσα, -Ἥφαιστον κτείνω γαστρὶ περισχομένη. -
-
- - -anonymi epigrammatici - - - -μούνῳ μοι θέμις ἐστὶ γυναικῶν ἐν φιλότητι -μίσγεσθαι φανερῶς, λισσομένων ποσίων -μοῦνος δʼ ἠιθέοισι, καὶ ἀνδράσιν, ἠδὲ γέρουσιν, -παρθενικαῖς τʼ ἐπέβην ἀχνυμένων τοκέων. - -μαχλοσύνην ἤχθηρα· φιλεῖ δέ με παιονίη χείρ, -Ἀμφιτρυωνιάδην ἐκτελέοντα πόνον. -ἀμφὶ δʼ ὀπυιομένοισι καὶ ἂν Πλουτῆι μαχοίμην -αἰὲν ὑπὲρ ψυχῆς τῶν ὁπόσοις ἐμίγην. -εὔρινον δέ με παῖδα καὶ ἀργιόδοντα τίθησιν -ἰδρείῃ μερόπων αἰγὶ μιγεὶς ἐλέφας. -
-
- - -anonymi epigrammatici - - - -ἄν μʼ ἐσίδῃς, καὶ ἐγὼ σέ. σὺ μὲν βλεφάροισι δέδορκας, -ἀλλʼ ἐγὼ οὐ βλεφάροις· οὐ γὰρ ἔχω βλέφαρα. -ἂν δʼ ἐθέλῃς, λαλέω φωνῆς δίχα· σοὶ γὰρ ὑπάρχει -φωνή, ἐμοὶ δὲ μάτην χείλεʼ ἀνοιγόμενα. -
-
- - -anonymi epigrammatici - - - -οὔνομα μητρὸς ἔχω· γλυκερώτερός εἰμι τεκούσης· -ἀλλʼ ἡ μὲν δολιχή, τυτθὸς ἐγὼ δὲ πέλω· -ἄβρωτος κείνη πλὴν κράατος· εἰμὶ δʼ ἔγωγε -τρωκτὸς ἅπας, μοῦνον δʼ ἔντερʼ ἄβρωτα φέρω. -
-
- - -anonymi epigrammatici - - - -ἐγκέφαλον φορέω κεφαλῆς ἄτερ· εἰμὶ δὲ χλωρὴ -αὐχένος ἐκ δολιχοῦ γῆθεν ἀειρομένη· -σφαίρῃ δʼ ὡς ὑπὲρ αὐλὸν ἐείδομαι· ἢν δὲ ματεύσῃς -ἔνδον ἐμῶν λαγόνων, μητρὸς ἔχω πατέρα. - -
-
- - -anonymi epigrammatici - - - -υἷας πεντήκοντα μιῇ ἐνὶ γαστρὶ λαβοῦσα -† μηληστῶν πάντων ἔκτανον ἡγεμόνα. -αὐτὰρ ὃ δὶς τέθνηκεν, ἐπεὶ δύο γαστέρες αὐτὸν -τίκτον, χαλκείη, καὶ πάρος ἀνδρομέη. -
-
- - -anonymi epigrammatici - - - -ὕλη μέν με τέκεν, καινούργησεν δὲ σίδηρος· -εἰμὶ δὲ Μουσάων μυστικὸν ἐκδόχιον· -κλειομένη σιγῶ· λαλέω δʼ, ὅταν ἐκπετάσῃς με, -κοινωνὸν τὸν Ἄρη μοῦνον ἔχουσα λόγων. -
-
- - -anonymi epigrammatici - - -οὔρεσι μὲν γενόμην, δένδρον δέ μοι ἔπλετο μήτηρ, -πῦρ δὲ πατήρ, βῶλος δʼ εἰμὶ μελαινομένη· -ἢν δὲ μʼ ἔσω κεράμοιο πατήρ τήξῃσι βαθείης, -ἅρματος ὠτειλὰς ῥύομαι εἰναλίου. -
-
- - -anonymi epigrammatici - - - -λίην ἔντριχός εἰμι, τὰ φύλλα δέ μου κατακρύπτει -τὰς τρίχας, εἰ τρύπη φαίνεται οὐδαμόθεν -πολλοῖς παιδαρίοις ἐμπαίζομαι· εἰ δὲ τίς ἐστιν -εἰς τὸ βαλεῖν ἀφυής, ἵσταται ὥσπερ ὄνος.. - -
-
- - -mesomedes - - -ἕρπουσα, πετωμένα, βεβῶσα κούρα, -νόθον ἴχνος ἀραμένα δρομαία λέαινα, -πτερόεσσα μὲν ἦν τὰ πρόσω γυνά, -τὰ δὲ μέσσα βρέμουσα λέαινα θήρ. -τὰ δʼ ὄπισθεν ἑλισσόμενος δράκων. -οὔθʼ ὁλκὸς ἀπέτρεχεν, οὐ γυνά, -οὔτʼ ὄρνις ὅλον δέμας, οὔτε θήρ· -κόρη γὰρ ἐφαίνετʼ ἄνευ ποδῶν, -κεφαλὰν δʼ οὐκ ἔσχε βρέμουσα θήρ. -φύσιν εἶχεν ἄτακτα κεκραμέναν, -ἀτέλεστα τέλεια μεμιγμέναν. -
-
- - -anonymi epigrammatici - - - -ἔστι δίπουν ἐπὶ γῆς, καὶ τετράπον, οὗ μία φωνή, -καὶ τρίπον· ἀλλάσσει δὲ φυὴν μόνον, ὅσσ’ ἐπὶ γαῖαν -ἑρπετὰ κινεῖται, ἀνὰ τʼ αἰθέρα καὶ κατὰ πόντον. -ἀλλʼ ὁπόταν πλείστοισιν ἐρειδόμενον ποσὶ βαίνῃ, -ἔνθα τάχος γυίοισιν ἀφαυρότατον πέλει αὐτοῦ. -
-
- - -anonymi epigrammatici - - - -ἔστιν Ἴος νῆσος μητρὸς πατρίς, ἥ σε θανόντα -δέξεται· ἀλλὰ νέων παίδων αἴνιγμα φύλαξαι. -
-
- - -anonymi epigrammatici - - - -ὄλβιε καὶ δύσδαιμον ʽ ἔφυς γὰρ ἐπʼ ἀμφοτέροισἰ, -πατρίδα δίζηαι· μητρὸς δέ τοι, οὐ πατρός ἐστι -μητρόπολις ἐν νήσῳ ἀπὸ Κρήτης εὐρείης -Μίνωος γαίης οὔτε σχεδόν, οὔτʼ ἀποτηλοῦ - -ἐν τῇ μοῖρʼ ἐστίν σε τελευτῆσαι βιότοιο, -εὖτʼ ἂν ἀπὸ γλώσσης παίδων μὴ γνῷς ἐσακούσας -δυσξύνετον σκολιοῖσι λόγοις εἰρημένον ὕμνον -δοιὰς γὰρ ζωῆς μοίρας λάχες· ἣν μὲν ἀμαυρὰν -ἠελίων δισσῶν, τὴν δʼ ἀθανάτοις ἰσόμοιρον, -ζῶντί τε καὶ φθιμένῳ· φθίμενος δʼ ἔτι πολλὸν ἀγήρως. -
-
- - -anonymi epigrammatici - - - -Λάϊε Λαβδακίδη, παίδων γένος ὄλβιον αἰτεῖς. -δώσω τοι φίλον υἱὸν ἀτὰρ πεπρωμένον ἐστί, -τοῦ παιδὸς χερσὶν λείψειν φάος· ὣς γὰρ ἔνευσα. -
-
- - -anonymi epigrammatici - - - -Χείρωνος φίλε τέκνον ἀγακλειτοῖο, Κάρυστε, -Πηλίον ἐκπρολιπὼν Εὐβοίας ἄκρον ἱκέσθαι· -ἔνθʼ ἱερὰν χώραν κτίζειν σοι θέσφατόν ἐστιν. -
-
- - -anonymi epigrammatici - - - -ἥκεις, ὦ Λυκόοργε, ἐμὸν ποτὶ πίονα νηόν, -Ζηνὶ φίλος καὶ πᾶσιν Ὀλύμπια δώματʼ ἔχουσιν. -δίζω ἤ σε θεὸν μαντεύσομαι, ἠέπερ ἄνδρα· -ἀλλʼ ἔτι καὶ μᾶλλον θεὸν ἔλπομαι, ὦ Λυκόοργε. -
-
- - -anonymi epigrammatici - - - -μὴ μεμψιμοίρει μὴ θεοὺς μηδέν, ξένε· -ὥρην δὲ μέμφου, ᾗ πατὴρ ἔσπειρέ σε. - -
-
- - -anonymi epigrammatici - - - -ἁγνὸς πρὸς τέμενος καθαροῦ ξένε, δαίμονος ἔρχου -ψυχήν, νυμφαίου νάματος ἁψάμενος· -ὡς ἀγαθοῖς ἀρκεῖ βαιὴ λιβάς· ἄνδρα δὲ φαῦλον -οὐδʼ ἂν ὁ πᾶς νίψαι νάμασιν Ὠκεανός. -
-
- - -anonymi epigrammatici - - - -εὖτʼ ἂν ὑπὲρ γαίης ἀνέχῃ δρόμον ὄρθρια Τιτάν, -λύσας ἀκτῖσι ζοφερῆς δηλήματα νυκτός, -λάμπῃ δʼ αἰγλήεσσα νέον φάος Ἠριγένεια, -δὴ τότʼ ἄγων παρὰ θῖνας, ἁλιρράντους τε παρʼ ἀκτὰς -φῶτα στῆσον ἔναντα δεδορκότα πρὸς φάος αὐγῆς -ἠελίου. καὶ τὸν μὲν ἔσω πόδα χεύματος ἐντὸς -δεξιὸν ἐν δίναις ἐχέτω, λαιὸν δʼ ἐπὶ γαίης -στηρισάτω· χείρεσσι δʼ ἐπιψαύων ἑκάτερθε, -τῇ μὲν ἁλός, τραφερῆς δʼ ἑτέρῃ, πιστούμενος ὅρκον -οὐρανὸν ὀμνυέτω, χθόνα τʼ ἄσπετον, ἠδʼ ἁλὸς ὅρμους, -αἰθερίου τε πυρὸς βιοδώτορα ἡγεμονῆα· -τοῖον γὰρ θεοὶ ὅρκον ὑπὸ στομάτεσσιν ἀτίζειν -οὐδʼ αὐτοὶ τολμῶσιν, ἀγήνορες Οὐρανίωνες. -
-
- - -anonymi epigrammatici - - - -γαίης μὲν πάσης τὸ Πελασγικὸν Ἄργος ἄμεινον, -ἵπποι Θεσσαλικαί, Λακεδαιμόνιαί τε γυναῖκες, -ἄνδρες δʼ οἳ πίνουσιν ὕδωρ καλῆς Ἀρεθούσης· -ἀλλʼ ἔτι καὶ τῶν εἰσιν ἀμείνονες, οἳ τὸ μεσηγὺ -Τίρυνθος ναίουσι καὶ Ἀρκαδίης πολυμήλου, -Ἀργεῖοι λινοθώρηκες, κέντρα πτολέμοιο· -ὑμεῖς δʼ, ὦ Μεγαρεῖς, οὐδὲ τρίτοι, οὐδὲ τέταρτοι, -οὐδὲ δυωδέκατοι, οὔτʼ ἐν λόγῳ, οὔτʼ ἐν ἀριθμῷ. - -
-
- - -anonymi epigrammatici - - - -ἱρὰ θεῶν ἀγαθοῖς ἀναπέπταται, οὐδὲ καθαρμῶν -χρειώ· τῆς ἀρετῆς ἥψατο οὐδὲν ἄγος. -ὅστις δʼ οὐλοὸς ἦτορ, ἀπόστιχε· οὔποτε γὰρ σὴν -ψυχὴν ἐκνίψει σῶμα διαινόμενον. -
-
- - -anonymi epigrammatici - - - -εἰπὲ Ποσειδάωνι· “κασιηνήτοις πεπιθέσθαι -πρεσβυτέροις ἐπέοικεν· ἐμῆς ἐρικυδέος αὐλῆς -κίοσιν οὐ κατὰ κόσμον ἀγάλλεαι·” εἰπὲ τινάξας -τρὶς ἅλα μαρμαρέην, καὶ πείσεται. ἢν δʼ ἀπιθήσῃ, -φραζέσθω, μὴ πᾶσαν ἐνιπρήσαιμι θάλασσαν -οὐδὲ γὰρ οὐδὲ θάλασσα Διὸς σβέννυσι κεραυνόν. -
-
- - -anonymi epigrammatici - - - -Ἀρκαδίην μʼ αἰτεῖς· μέγα μʼ αἰτεῖς· οὔ τοι δώσω· -πολλοὶ ἐν Ἀρκαδίῃ βαλανηφάγοι ἄνδρες ἔασιν, -οἳ σ’ ἀποκωλύσουσιν ἐγὼ δέ τοι οὔτι μεγαίρω. -δώσω τοι Τεγέην ποσσίκροτον ὀρχήσασθαι, -καὶ καλὸν πεδίον σχοίνῳ διαμετρήσασθαι. -
-
- - -anonymi epigrammatici - - - -ὄλβιος οὗτος ἀνήρ, ὃς νῦν κατὰ λάινον οὐδὸν -Φοίβου Ἀπόλλωνος χρηστήριον εἰσαναβαίνει, -ἤλυθεν εὐνομίην διζήμενος· αὐτὰρ ἐγώ τοι -δώσω ἣν οὐκ ἄλλη ἐπιχθονίων πόλις ἕξει. - -
-
- - -anonymi epigrammatici - - - -ἔστι τις Ἀρκαδίης Τεγέη λευρῷ ἐνὶ χώρῳ· -ἔνθʼ ἄνεμοι πνείουσι δύο κρατερῆς ὑπʼ ἀνάγκης, -καὶ τύπος ἀντίτυπος καὶ πῆμʼ ἐπὶ πήματι κεῖται· -ἔνθʼ Ἀγαμεμνονίδην κατέχει φυσίζοος αἶα· -τὸν σὺ κομισσάμενος, Τεγέης ἐπιτάρροθος ἔσσῃ. -
-
- - -anonymi epigrammatici - - -Λυδὲ γένος, πολλῶν βασιλεῦ, μέγα νήπιε Κροῖσε, -μὴ βούλου πολύευκτον ἰὴν ἀνὰ δώματʼ ἀκούειν -παιδὸς φθεγγομένου· τὸ δέ σοι πολὺ λώιον ἀμφὶς -ἔμμεναι· αὐδήσει γὰρ ἐν ἤματι πρῶτον ἀνόλβῳ. -
-
- - -anonymi epigrammatici - - -τὴν πεπρωμένην μοίρην ἀδύνατά ἐστιν -ἀποφυγέειν καὶ θεῷ. -
-
- - -anonymi epigrammatici - - -ἰσθμὸν δὲ μὴ πυριγοῦτε, μηδʼ ὀρύσσετε· -Ζεὺς γάρ κʼ ἔθηκε νῆσον, εἲ κʼ ἐβούλετο. -
-
- - -anonymi epigrammatici - - -ἀλλʼ ὅταν ἐν Σίφνῳ πρυτανήϊα λευκὰ γένηται, -λεύκοφρύς τʼ ἀγορή, τότε δὴ δεῖ φράδμονος ἀνδρὸς -φράσσασθαι ξύλινόν τε λόχον κήρυκὰ τʼ ἐρυθρόν. - -
-
- - -anonymi epigrammatici - - -Βάττʼ, ἐπὶ φωνὴν ἦλθες· ἄναξ δέ σε Φοῖβος Ἀπόλλων -ἐς Λιβύην πέμπει μηλοτρόφον οἰκιστῆρα. -
-
- - -anonymi epigrammatici - - -αἰ τὺ ἐμεῦ Λιβύην μηλοτρόφον οἶδας ἄμεινον -μὴ ἐλθὼν ἐλθόντος, ἄγαν ἄγαμαι σοφίην σεῦ. -
-
- - -anonymi epigrammatici - - -ὃς δέ κεν ἐς Λιβύην πολυήρατον ὕστερον ἔλθῃ -γᾶς ἀναδαιομένας, μετὰ οἱ ποκά φημι μελήσειν. -
-
- - -anonymi epigrammatici - - -Ἠετίων, οὔ τίς σε τίει πολύτιτον ἐόντα. -λάβδα κύει, τέξει δʼ ὀλοίτροχον· ἐν δὲ πεσεῖται -ἀνδράσι μουνάρχοισι, δικαιώσει δὲ Κόρινθον. -
-
- - -anonymi epigrammatici - - - -αἰετὸς ἐν πέτρῃσι κύει, τέξει δὲ λέοντα -καρτερόν, ὠμηστὴν πολλῶν δʼ ὑπὸ γούνατα λύσει. - -
-
- - -anonymi epigrammatici - - -ὄλβιος οὗτος ἀνήρ, ὃς ἐμὸν δόμον ἐσκαταβαίνει, -Κύψελος Ἠετίδης, βασιλεὺς κλειτοῖο Κορίνθου, -αὐτὸς καὶ παῖδες, παίδων γε μὲν οὐκέτι παῖδες. -
-
- - -anonymi epigrammatici - - -καὶ τότε δή, Μίλητε, κακῶν ἐπιμήχανε ἔργων, -πολλοῖσιν δεῖπνόν τε καὶ ἀγλαὰ δῶρα γενήσῃ· -σαὶ δʼ ἄλοχοι πολλοῖσι πόδας νίψουσι κομήταις· -νηοῦ δʼ ἡμετέρου Διδύμοις ἄλλοισι μελήσει. -
-
- - -anonymi epigrammatici - - -ἀλλʼ ὅταν ἡ θήλεια τὸν ἄρσενα νικήσασα -ἐξελάσῃ, καὶ κῦδος ἐν Ἀργείοισιν ἄρηται, -πολλὰς Ἀργείων ἀμφιδρυφέας τότε θήσει· -ὥς ποτέ τις ἐρέει καὶ ἐπεσσομένων ἀνθρώπων· - -δεινὸς ὄφις ἀέλικτος ἀπώλετο δουρὶ δαμασθείς. - -
-
- - -anonymi epigrammatici - - -γλαῦκʼ Ἐπικυδείδη, τὸ μὲν αὐτίκα κέρδιον οὕτως, -ὅρκῳ νικῆσαι καὶ χρήματα ληίσσασθαι. -ὄμνυʼ, ἐπεὶ θάνατός γε καὶ εὔορκον μένει ἄνδρα. -ἀλλʼ Ὅρκου πάις ἐστὶν ἀνώνυμος, οὐδʼ ἔπι χεῖρες -οὐδὲ πόδες· κραιπνὸς δὲ μετέρχεται, εἰσόκε πᾶσαν -συμμάρψας ὀλέσῃ γενεὴν καὶ οἶκον ἅπαντα· -ἀνδρὸς δʼ εὐόρκου γενεὴ μετόπισθεν ἀμείνων. - -
-
- - -anonymi epigrammatici - - -ὦ μέλεοι, τί κάθησθε; λιπὼν φεῦγʼ ἔσχατα γαίης -δώματα καὶ πόλιος τροχοειδέος ἄκρα κάρηνα. -οὔτε γὰρ ἡ κεφαλὴ μενεῖ ἔμπεδον, οὔτε τὸ σῶμα, -οὔτε πόδες νέατοι, οὔτʼ ὦν χέρες, οὔτε τι μέσσης -λείπεται, ἀλλʼ ἄζηλα πέλει· κατὰ γάρ μιν ἐρείπει -πῦρ τε καὶ ὀξὺς Ἄρης, Συριηγενὲς ἅρμα διώκων -πολλὰ δὲ κἆλλʼ ἀπολεῖ πυργώματα, κοὐ τὸ σὸν οἶον -πολλοὺς δʼ ἀθανάτων ναοὺς μαλερῷ πυρὶ δώσει, -οἵ που νῦν ἱδρῶτι ῥεούμενοι ἑστήκασι, -δείματι παλλόμενοι· κατὰ δʼ ἀκροτάτοις ὀρόφοισιν -αἷμα μέλαν κέχυται, προϊδὸν κακότητος ἀνάγκην. -ἀλλʼ ἴτον ἐξ ἀδύτοιο, κακοῖς δʼ ἐπικίδνατε θυμόν. -
-
- - -anonymi epigrammatici - - -οὐ δύναται Παλλὰς Δίʼ Ὀλύμπιον ἐξιλάσασθαι, -λισσομένη πολλοῖσι λόγοις καὶ μήτιδι πυκνῇ· -σοὶ δὲ τόδʼ αὖτις ἔπος ἐρέω, ἀδάμαντι πελάσσας. -τῶν ἄλλων γὰρ ἁλισκομένων, ὅσα Κέκροπος οὖρος -ἐντὸς ἔχει, κευθμών τε Κιθαιρῶνος ζαθέοιο, -τεῖχος Τριτογενεῖ ξύλινον διδοῖ εὐρύοπα Ζεὺς -μοῦνον ἀπόρθητον τελέθειν, τὸ σὲ τέκνα τʼ ὀνήσει. -μηδὲ σὺ γʼ ἱπποσύνην τε μένειν καὶ πεζὸν ἰόντα -πολλὸν ἀπʼ ἠπείρου στρατὸν ἥσυχος, ἀλλʼ ὑποχωρεῖν, -νῶτον ἐπιστρέψας· ἔτι τοί ποτε κἀντίος ἔσσῃ. -ὦ θείη Σαλαμίς, ἀπολεῖς δὲ σὺ τέκνα γυναικῶν, -ἤ που σκιδναμένης Δημήτερος, ἢ συνιούσης. - -
-
- - -anonymi epigrammatici - - - -ἐχθρὲ περικτιόνεσσι, φίλʼ ἀθανάτοισι θεοῖσι, -εἴσω τὸν προβόλαιον ἔχων, πεφυλαγμένος ἧσο, -καὶ κεφαλὴν πεφύλαξο· καὶ δὲ τὸ σῶμα σαώσει. -
-
- - -anonymi epigrammatici - - - -ὦ νήπιοι, ἐπιμέμφεσθε ὅσα ὑμῖν ἐκ τῶν -Μενελάου τιμωρημάτων Μίνως ἔπεμψε μηνίων -δακρύματα, ὅτι οἱ μὲν οὐ συνεξεπροήξαντο αὐτῷ τὸν -ἐν Καμικῷ θάνατον γενόμενον, ὑμεῖς δὲ ἐκείνοισι -τὴν ἐκ Σπάρτης ἁρπαχθεῖσαν ὑπʼ ἀνδρὸς βαρβάρου γυναῖκα. -
-
- - -anonymi epigrammatici - - -ὑμῖν δʼ, ὦ Σπάρτης οἰκήτορες εὐρυχόροιο, -ἢ μέγα ἄστυ ἐρικυδὲς ὑπʼ ἀνδράσι Περσεΐδῃσι -πέρθεται· ἢ τὸ μὲν οὐχί, ἀφʼ Ἡρακλέους δὲ γενέθλης -πενθήσει βασιλῆ φθίμενον Λακεδαίμονος οὖρος. -οὐ γὰρ τὸν ταύρων σχήσει μένος οὐδὲ λεόντων -ἀντιβίην Ζηνὸς γὰρ ἔχει μένος· οὐδέ ἑ φημι -σχήσεσθαι, πρὶν τῶνδʼ ἕτερον διὰ πάντα δάσηται. -
-
- - -athenaeus - - - -φράζεο βαρβαρόφωνος ὅταν ζυγὸν εἰς ἅλα βάλλῃ -βύβλινον, Εὐβοΐης ἀπέχειν πολυμηκάδας αἶγας. - -
-
- - -athenaeus - - - -ἀλλʼ ὅταν Ἀρτέμιδος χρυσαόρου ἱερὸν ἀκτὴν -νηυσὶ γεφυρώσωσι καὶ εἰναλίην Κυνόσουραν -ἐλπίδι μαινομένῃ, λιπαρὰς πέρσαντες Ἀθήνας, -δῖα Δίκη σβέσσει κρατερὸν Κόρον,Ὕβριος υἱόν, -δεινὸν μαιμώωντα, δοκεῦντʼ ἀνὰ πάντα πιθέσθαι. -χαλκὸς γὰρ χαλκῷ συμμίξεται, αἵματι δʼ Ἄρης -πόντον φοινίξει· τότʼ ἐλεύθερον Ἑλλάδος ἦμαρ -εὐτύοπα Κρονίδης ἐπάγει καὶ πότνια Νίκη. -
-
- - -athenaeus - - -τὴν δʼ ἐπὶ Θερμώδοντι καὶ Ἀσωπῷ λεχεποίῃ -Ἑλλήνων σύνοδον καὶ βαρβαρόφωνον ἰυγήν, -τῇ πολλοὶ πεσέονται ὑπὲρ λάχεσίν τε μόρον τε -τοξοφόρων Μήδων, ὅταν αἴσιμον ἦμαρ ἐπέλθῃ. -
-
- - -anonymi epigrammatici - - - -τίπτε δύω βασιλῆες, ὁ μὲν Τρώων, ὁ δʼ Ἀχαιῶν, -οὐ ταὐτὰ φρονέοντες ἐμὸν δόμον εἰσανέβητε, -ἤτοι ὁ μὲν πώλοιο γόνον διζήμενος εὑρεῖν, -αὐτὰρ ὁ πῶλον ἄγειν; τί νυ μήσεαι, ὦ μεγάλε Ζεῦ; -
-
- - -cleobulus - - -εἷς ὁ πατήρ, παῖδες δυοκαίδεκα· τῶν δὲ ἑκάστῳ -παῖδες δὶς τριήκοντα διάνδιχα εἶδος ἔχουσαι· -αἱ μὲν λευκαὶ ἔασιν ἰδεῖν, αἱ δʼ αὖτε μέλαιναι· -ἀθάνατοι δὲ τʼ ἐοῦσαι, ἀποφθινύθουσιν ἅπασαι. - -
-
- - -anonymi epigrammatici - - - -ἄγνωστόν μʼ ἐρέεις γενεῆς καὶ πατρίδος αἴης -ἀμβροσίου Σειρῆνος· ἕδος δʼ Ἰθάκη τις Ὁμήρου· -Τηλέμαχος δὲ πατήρ, καὶ Νεστορέη Πολυκάστη -μήτηρ, ἥ μιν ἔτικτε βροτῶν πολυπάνσοφον ἄλλων. -
-
- - -anonymi epigrammatici - - - -εἴ με νέην ἔλαβες, τάχα μου πίες ἐκχυθὲν αἷμα -νῦν δʼ ὅτε γηραλέην μʼ ἐξετέλεσσε χρόνος, -ἔσθιε τὴν ῥυσαινομένην, ὑγρὸν οὐδὲν ἔχουσαν, -ὀστέα συνθραύων σαρκὶ σὺν ἡμετέρῃ. -
-
- - -anonymi epigrammatici - - -πήρην σὴν ὀπίσω, κάλαθον χερί, τὸν τράγον ὤμοις, -αἰπόλε, σῶν ἀγρῶν σύμβολα πάντα φέρεις. -
-
- - -anonymi epigrammatici - - -εἰμὶ χαμαίζηλον ζῴων μέλος· ἢν δʼ ἀφέλῃς μου -γράμμα μόνον, κεφαλῆς γίνομαι ἄλλο μέρος· -ἢν δʼ ἕτερον, ζῷον πάλιν ἔσσομαι· ἢν δὲ καὶ ἄλλο, -οὐ μόνον εὑρήσεις, ἀλλὰ διηκόσια. - -
-
- - -anonymi epigrammatici - - -τέσσαρα γράμματʼ ἔχων ἀνύω τρίβον ἢν δὲ τὸ πρῶτον -γράμμʼ ἀφέλῃς, ἀίω· καὶ τὸ μετʼ αὐτὸ πάλιν, -βορβόρῳ εὑρήσεις ἐμὲ φίλτατον· ἢν δὲ τὸ λοῖσθον -αἴρῃς, εὑρήσεις ἐπίρρημα τόπου. -
-
- - -anonymi epigrammatici - - -λαμπάδα μὲν προέηκεν Ἔρως καὶ τόξα καὶ ἰούς, -Αἰθιόπων δὲ κόνιν ἀντὶ βελῶν προχέει. -
-
- - -anonymi epigrammatici - - -οὐδὲν ἔσωθεν ἔχω, καὶ πάντα μοι ἔνδοθέν ἐστι, -προῖκα δʼ ἐμῆς ἀρετῆς πᾶσι δίδωμι χάριν. -
-
- - -anonymi epigrammatici - - -ἐν πυρὶ κοιμηθεῖσα κόρη θάνεν ὁ προδότης δὲ -οἶνος· ὑφʼ οὗ δὲ θάνεν, Παλλάδος ἦν στέλεχος· -ὁ κτείνας ναυηγός· ἐνὶ ζώοντι δὲ τύμβῳ -κεῖται μεμφομένη τὰς Βρομίου χάριτας. -
-
- - -anonymi epigrammatici - - -Παλλὰς καὶ Βρόμιος τε καὶ ὁ κλυτὸς Ἀμφιγυήεις, -οἱ τρεῖς τὴν μούνην παρθένον ἠφάνισαν. - -
-
- - -anonymi epigrammatici - - -οὐδεὶς βλέπων βλέπει με, μὴ βλέπων δʼ ὁρᾷ· -ὁ μὴ λαλῶν λαλεῖ, ὁ μὴ τρέχων τρέχει· ˘ -ψευδὴς δʼ ὑπάρχω, πάντα τἀληθῆ λέγων.˘ -
-
- - -anonymi epigrammatici - - -ἄγονος ἐξ ἀγόνων, βελεηφόρος, ἔμβρεφος, ἄρσις. -
-
- - -anonymi epigrammatici - - - -ἀλλʼ ὅταν ἡμίονος βασιλεὺς Μήδοισι γένηται, -καὶ τότε, Λυδὲ ποδαβρέ, πολυψήφιδα παρʼ Ἕρμον -φεύγειν, μηδὲ μένειν, μηδʼ αἰδεῖσθαι κακὸς εἶναι. -
-
- - -anonymi epigrammatici - - - -ἀθάνατός σοι παῖς καὶ ἀοίδιμος, ὦ Τελεσίκλεις, -ἔσσετʼ ἐν ἀνθρώποισιν, ὃς ἂν πρῶτός σε προσείπῃ -νηὸς σῆς ἀποβάντα φίλῃ ἐν πατρίδι γαίῃ. -
-
- - -anonymi epigrammatici - - - -Πέρσαι λάτριν ἐμὸν σημάντορα χειρὶ βιαίῃ -ἔκτανον, οἰκεία δὲ κόνις νέκυν ἀμφικαλύπτει· -τοῦ δʼ ἤν τις Φαέθοντι θοῶς λεύκʼ ὀστέα δείξῃ, -οὗτός τοι Περσῶν τὸ μέγα κράτος ἔνδοθι θραύσει· - -κεῖται δʼ Ἀσίδος ἐντὸς ὁριζομένᾐ ἐνὶ νήσῳ -δάφνῃ καὶ ῥείθροισι παραὶ Πελίοιο γέροντος· -φράζεο δʼ ἀνέρα μάντιν ὑφηγητῆρα κελεύθου -Φωκέα, ὃς ψαμάθοισιν Ἀπαρνίδος οἰκία ναίει. -
-
- - -anonymi epigrammatici - - - -λήθη κτίσαι πόλιν βασιλικήν, καὶ λαβὼν τὸν -χρησμὸν ἀνεχώρησεν καὶ κτίζει Κωνσταντινούπολιν -οὐ θέμις ἐν Τροίης σε πάλαι τμηθέντι θεμείλῳ -Ῥώμης ἱδρῦσαι νέον οὔνομα· βαῖνε δὲ χαίρων -ἐς Μεγαρήιον ἄστυ Προποντίδος ἄγχι θαλάσσης, -ἔνθʼ ἰχθῦς ἔλαφός τε νομὸν βόσκουσι τὸν αὐτόν. -
-
- - -anonymi epigrammatici - - -τίπτε με τῶν καρύων ἕνεκεν πληγῇσι πιέζεις, -ὦ μῆτερ; τάδε πάντα καλαὶ διεμοιρήσαντο -παρθένοι. ἦ γὰρ ἐμεῖο Μελίσσιον ἕβδομα δοιά, -ἡ δὲ δυωδέκατον Τιτάνη λάβεν· ἕκτον ἔχουσιν -καὶ τρίτον Ἀστυόχη φιλοπαίγμονες ἠδὲ Φίλιννα· -εἴκοσι δʼ ἁρπάξασα Θέτις λάβε, δώδεκα Θίσβη· -ἡ δʼ, ὅρα, ἡδὺ γελᾷ Γλαύκη παλάμῃσιν ἔχουσα -ἕνδεκα· τοῦτο δέ μοι κάρυον περιλείπεται οἶον. -
-
- - -anonymi epigrammatici - - - - ποῦ σοι μῆλα βέβηκεν, ἐμὸν τέκος; ἕκτα μὲν Ἰνὼ -δοιά, καὶ ὀγδοάτην μοῖραν ἔχει Σεμέλη· - -Αὐτονόη δὲ τέταρτον ἀφήρπασεν αὐτάρ Ἀγαυὴ -πέμπτον ἐμῶν κόλπων ᾤχετʼ ἀπαινυμένη· -σοὶ δʼ αὐτῇ δέκα μῆλα φυλάσσεται· αὐτάρ ἔγωγε, -ναὶ μὰ φίλην Κύπριν, ἓν τόδε μοῦνον ἔχω. -
-
- - -anonymi epigrammatici - - -Δρεψαμένη ποτὲ μῆλα φίλαις διεδάσσατο Μυρτώ· -Χρυσίδι μὲν μήλων πέμπτον πόρε, τέτρατον Ἡροῖ, -ἐννεακαιδέκατον Ψαμάθῃ, δέκατον Κλεοπάτρῃ· -αὐτάρ ἐεικοστον δωρήσατο Παρθενοπείῃ· -δώδεκα δʼ Εὐάδνῃ μοῦνον πόρεν αὐτάρ ἐς αὐτὴν -ἤλυθον ἐκ πάντων ἑκατὸν καὶ εἴκοσι μῆλα. -
-
- - -anonymi epigrammatici - - -Ἀντομέναις ποτὲ μῆλα φίλαις διεμοιρήσαντο -Ἰνὼ καὶ Σεμέλη δώδεκα παρθενικαῖς. -καὶ ταῖς μὲν Σεμέλη πόρεν ἄρτια· ταῖς δὲ περισσὰ -δῶκε κασιγνήτη· μῆλα δʼ ἔχεν πλέονα. -ἡ μὲν γὰρ τρισσῇσι τρίʼ ἕβδομα δῶκεν ἑταίραις, -ταῖς δὲ δύο πάντων πέμπτον ἔδωκε λάχος· -ἕνδεκα δʼ Ἀστυνόμη μιν ἀφείλατο, καὶ οἱ ἔλειπεν -μοῦνα κασιγνήταις μῆλα δύω φερέμεν. -ἡ δʼ ἑτέρη πισύρεσσι πόρεν δύο τέτρατα μήλων, -πέμπτῃ δʼ ἑκταίην μοῖραν ἔδωκεν ἔχειν· -τέσσαρα δʼ Εὐρυχόρῃ δῶρον πόρε· τέτρασι δʼ ἄλλοις -μήλοισιν Σεμέλη μίμνεν ἀγαλλομένη. - -
-
- - -anonymi epigrammatici - - -ἡ καρύη πολλοῖσιν ἐβεβρίθει καρύοισιν· -νῦν δέ τις ἐξαπίνης μιν ἀπέθρισεν ἀλλὰ τί φησιν; -“ ἐκ μὲν ἐμεῦ καρύων πέμπτον λάβε Παρθενόπεια· -ὀγδόατον δὲ Φίλιννα φέρει λάχος· ἡ δʼ Ἀγανίππη -τέτρατον· ἑβδομάτῳ δʼ ἐπιτέρπεται Ὠρείθυια· -ἕκτην δʼ Εὐρυνόμη καρύων ἐδρέψατο μοίρην -τρισσαὶ δʼ ἓξ ἑκατὸν Χάριτες διεμοιρήσαντο· -ἐννάκι δʼ ἐννέα Μοῦσαι ἐμεῦ λάβον ἑπτὰ δὲ λοιπὰ -δήεις ἀκρεμόνεσσιν ἐφήμενα τηλοτέροισιν.” -
-
- - -anonymi epigrammatici - - -ἑπτάλοφον ποτὶ ἄστυ Γαδειρόθεν, ἕκτον ὁδοῖο -Βαίτιος εὐμύκους ἄχρις ἐς ἠιόνας· -κεῖθεν δʼ αὖ πέμπτον Πυλάδου μετὰ Φώκιον οὖδας, -Ταύρη χθὼν, βοέης οὔνομʼ ἀπʼ εὐετίης· -Πυρήνην δέ τοι ἔνθεν ἐπʼ ὀρθόκραιρον ἰόντι -ὄγδοον, ἠδὲ μιῆς δωδέκατον δεκάτης. -Πυρήνης δὲ μεσηγὺ καὶ Ἄλπιος ὑψικαρήνου -τέτρατον· Αὐσονίης αἶψα δυωδέκατον -ἀρχομένης ἤλεκτρα φαείνεται Ἠριδανοῖο. -ὦ μάκαρ, ὃς δισσὰς ἤνυσα χιλιάδας, -πρὸς δʼ ἔτι πέντʼ ἐπὶ ταῖς ἑκατοντάδας ἔνθεν ἐλαύνων -ἡ γὰρ Ταρπείη μέμβλετʼ ἀνακτορίη. - -
-
- - -anonymi epigrammatici - - -Εὐβλεφάροιο Δίκης ἱερὰ κρήδεμνα μιήνας, -ὄφρα σε, πανδαμάτωρ χρυσέ, βλέποιμι τόσον, -οὐδὲν ἔχω· πίσυρας γὰρ ἐπʼ οὐκ ἀγαθοῖσι ταλάντων -οἰωνοῖσι μάτην δῶκα φίλοις δεκάδας· -ἥμισυ δʼ αὖ, τρίτατόν τε καὶ ὄγδοον, ὦ πολύμορφοι -ἀνθρώπων κῆρες, ἐχθρὸν ἔχοντα βλέπω. -
-
- - -anonymi epigrammatici - - -πέμπτον μοι κλήρου, παῖ, λάμβανε· δωδέκατον δὲ -δέξο, δάμαρ· πίσυρες δʼ υἱέος οἰχομένου -παῖδες, ἀδελφειοί τε δύω, καὶ ἀγάστονε μῆτερ, -ἑνδεκάτην κλήρου μοῖραν ἕκαστος ἔχε. -αὐτὰρ, ἀνεψιαδοῖ, δυοκαίδεκα δέχθε τάλαντα· -Εὔβουλος δʼ ἐχέτω πέντε τάλαντα φίλος. -πιστοτάτοις δμώεσσιν ἐλευθερίην καὶ ἄποινα, -μισθὸν ὑπηρεσίης, τοῖσδε δίδωμι τάδε· -ὧδε δὲ λαμβανέτωσαν Ὀνήσιμος εἴκοσι πέντε -μνᾶς ἐχέτω· Δᾶος δʼ εἴκοσι μνᾶς ἐχέτω, -πεντήκοντα Σύρος, Συνετὴ δέκα, Τίβιος ὀκτώ· -ἑπτὰ δὲ μνᾶς Συνετῷ παιδὶ δίδωμι Σύρου. -ἐκ δὲ τριηκόντων κοσμήσατε σῆμα ταλάντων, -ῥέζετε δʼ Οὐδαίῳ Ζανὶ θυηπολίην -δισσῶν ἔς τε πυρὴν καὶ ἄλφιτα καὶ τελαμῶνας, -εἰκαίην δοιῶν σῶμα χάριν λαβέτω. - -
-
- - -anonymi epigrammatici - - -ἠέλιος, μήνη τε καὶ ἀμφίθέοντος ἀλῆται -ξωοφόρου τοίην τοι ἐπεκλώσαντο γενέθλην -ἕκτην μὲν βιότοιο φίλῃ παρὰ μητέρι μεῖναι -ὀρφανὸν ὀγδοάτην δὲ μετʼ ἀντιβίοισιν ἀνάγκῃ -θητεύειν, νόστον τε γυναῖκά τε παῖδά τʼ ἐπʼ αὐτῇ -τηλύγετον δώσουσι θεοὶ τριτάτῃ ἐπὶ μοίρῃ· -δὴ τότε σοι Σκυθικοῖσιν ὑπʼ ἔγχεσι παῖς τε δάμαρ τε -ὄλλυνται. σὺ δὲ τοῖσιν ἐπʼ ἄλγεσι δάκρυα χεύσας, -ἑπτὰ καὶ εἴκοσ’ ἔτεσσι βίου ποτὶ τέρμα περήσεις. -
-
- - -anonymi epigrammatici - - -τύμβος ἐγώ· κεύθω δὲ πολύστονα τέκνα Φιλίννης, -τοῖον μαψιτόκων καρπὸν ἔχων λαγόνων -πέμπτον ἐν ἠιθέοις, τρίτατον δʼ ἐνὶ παρθενικῇσιν, -τρεῖς δέ μοι ἀρτιγάμους δῶκε Φίλιννα κόρας· -λοιποὶ δʼ ἠελίοιο πανάμμοροι ἠδὲ καὶ αὐδῆς -τέσσαρες ἐκ λαγόνων εἰς Ἀχέροντα πέσον. -
-
- - -anonymi epigrammatici - - -οὗτός τοι Διόφαντον ἔχει τάφος· ἆ μέγα θαῦμα· -καὶ τάφος ἐκ τέχνης μέτρα βίοιο λέγει. -ἕκτην κουρίζειν βιότου θεὸς ὤπασε μοίρην -δωδεκάτην δʼ ἐπιθείς, μῆλα πόρεν χνοάειν· -τᾖ δʼ ἄρʼ ἐφʼ ἑβδομάτῃ τὸ γαμήλιον ἥψατο φέγγος, -ἐκ δὲ γάμων πέμπτῳ παῖδʼ ἐπένευσεν ἔτει. - -αἰαῖ, τηλύγετον δειλὸν τέκος, ἥμισυ πατρὸς -† τοῦδε καὶ ἡ κρυερὸς μέτρον ἑλὼν βιότου. -πένθος δʼ αὖ πισύρεσσι παρηγορέων ἐνιαυτοῖς -τῇδε πόσου σοφίᾐ τέρμʼ ἐπέρησε βίου. -
-
- - -anonymi epigrammatici - - -παντός ὅσου βεβίωκε χρόνου παῖς μὲν τὸ τέταρτον -Δημοχάρης βεβίωκε· νεηνίσκος δὲ τὸ πέμπτον -τὸ τρίτον εἰς ἄνδρας· πολιὸν δʼ ὅτʼ ἀφίκετο γῆρας -ἔζησεν λοιπὰ τρισκαίδεκα γήραος οὐδῷ. -
-
- - -anonymi epigrammatici - - -οἷον ἀδελφειὸς μʼ ἐβιήσατο, πέντε τάλαντα -οὐχ ὁσίῃ μοίρῃ πατρικὰ δασσάμενος. -ἑπτὰ κασιγνήτοιο τόδʼ ἑνδεκάτων πολύδακρυς -πέμπτον ἔχω μοίρης. Ζεῦ, βαθὺν ὕπνον ἔχεις. -
-
- - -anonymi epigrammatici - - -εἶπε κυβερνητῆρι, πλατὺν πόρον Ἀδριακοῖο -τέμνων νηί, ἁλὸς πόσα λείπεται εἰσέτι μέτρα; - -τὸν δʼ ἀπαμείβετο· “ Ναῦτα, μέσον Κριοῖο μετώπου -Κρηταίου, Σικελῆς τε Πελωρίδος ἑξάκι μέτρα -χίλια, δοιῶν δʼ αὖτε παροιχομένοιο δρόμοιο -πέμπτων διπλάσιον Σικελὴν ἐπὶ πορθμίδα λείπει.” - -
-
- - -anonymi epigrammatici - - -τῶν πισύρων κρουνῶν ὁ μὲν ἤματι πλῆσεν ἅπασαν -δεξαμενήν, δυσὶ δʼ οὗτος, ὃ δʼ ἐν τρισὶν ἤμασιν οὗτος, -τέτρατος ἐν τετόρεσσι· πόσῳ πλήσουσιν ἅπαντες; -
-
- - -anonymi epigrammatici - - -οἶγέ με, καὶ πισύρεσσιν ἐνιπλήσω παρεοῦσαν -δεξαμενὴν ὥραις, κρουνὸς ἅλις προρέων· -δεξιτερὸς δʼ ἄρʼ ἐμεῖο τόσαις ἀπολείπεται ὥραις, -ὄφρα μιν ἐμπλήσει· δὶς δὲ τόσαις ὁ τρίτος. -εἰ δʼ ἄμφω σὺν ἐμοὶ προχέειν ῥόου ἑσμὸν ἀνώγοις, -εἰν ὀλίγῃ μοίρῃ πλήσομεν ἠματίῃ. -
-
- - -anonymi epigrammatici - - -Κύκλωψ † ἐγὼ Πολύφημος ὁ χάλκεος· οἷα δʼ ἐπʼ αὐτῷ -τεῦξέ τις ὀφθαλμὸν καὶ στόμα καὶ παλάμην, -κρουνοῖς συζεύξας· στάζοντι δὲ πάμπαν ἔοικεν, -ἠδʼ ἔτι καὶ βλύζων φαίνετʼ ἀπὸ στόματος. -κρουνῶν δʼ οὔτις ἄτακτος· ὁ μὲν παλάμης τρισὶ μούνοις -ἤμασιν ἐμπλήσει δεξαμενὴν προρέων -ἠμάτιος γλήνης· στόμα δʼ ἤματος ἐν δύο πέμπτοις. -τίς κʼ ἐνέποι τρισσοῖς ἶσα θέοντα χρόνον; -
-
- - -anonymi epigrammatici - - -ὡς ἀγαθὸν κρητῆρι θοοὶ κερόωσι ῥέεθρον -οἵδε δύω ποταμοί, καὶ Βρομίοιο Χάρις. -ἶσος δʼ οὐ πάντεσσι ῥόου δρόμος· ἀλλά μιν οἶος -Νεῖλος μὲν προρέων ἠμάτιος κορέσει, - -τόσσον ὕδωρ μαζῶν ἀπερεύγεται· ἐκ δʼ ἄρα Βάκχου; -θύρσος ἐνὶ τρισσοῖς ἤμασιν οἶνον ἱείς· -σὸν δὲ κέρας, Ἀχελῷε, δύʼ ἤμασι. νῦν δʼ ἅμα πάντες -ῥεῖτε καὶ εἰν ὥραις πλήσετέ μιν ὀλίγαις. -
-
- - -anonymi epigrammatici - - -ὦ γύναι, ὡς πενίης ἐπελήσαο· ἣ δʼ ἐπίκειται -αἰὲν ἀναγκαίῃ κέντρα φέρουσα πόνων. -μνᾶν ἐρίων νήθεσκες ἐν ἤματι πρεσβυτέρη δὲ -θυγατέρων καὶ μνᾶν καὶ τρίτον εἷλκε κρόκης· -ὁπλοτέρη δὲ μιῆς φέρεν ἥμισυ. νῦν δʼ ἅμα πάσαις -δόρπον ἐφοπλίζεις μνᾶν ἐρύσασα μόνον. -
-
- - -anonymi epigrammatici - - -οἵδε λοετροχόοι τρεῖς ἕσταμεν ἐνθάδʼ Ἔρωτες, -καλλιρόου πέμποντες ἐπʼ εὐρίποιο λοετρά. -δεξιτερὸς μὲν ἔγωγε τανυπτερύγων ἀπὸ ταρσῶν -ἤματος ἑκταίῃ μοίρῃ ἔνι τόνδε κορέσσω· -λαιὸς δʼ αὖ πισύρεσσιν ἀπʼ ἀμφιφορῆος ἐν ὥραις· -ἐκ δʼ ὁ μέσος τόξοιο κατʼ ἤματος αὐτὸ τὸ μέσσον. -φράζεο δʼ, ὡς ὀλίγῃ κεν ἐνιπλήσαιμεν ἐν ὥρῃ, -ἐκ πτερύγων τόξου τε καὶ ἀμφιφορῆος ἱέντες. -
-
- - -anonymi epigrammatici - - -Πλινθουργοί, μάλα τοῦτον ἐπείγομαι οἶκον ἐγεῖραι, -ἦμαρ δʼ ἀννέφελον τόδε σήμερον, οὐδʼ ἔτι πολλῶν -χρηίζω, πᾶσαν δὲ τριηκοσίῃσι δέουσαν -πλίνθον ἔχω. σὺ δὲ μοῦνος ἐν ἤματι τόσσον ἔτευχες· - -παῖς δέ τοι ἐκ καμάτοιο διηκοσίαις ἀπέληγεν -γαμβρὸς δʼ αὖ τόσσῃσι καὶ εἰσέτι πεντήκοντα. -τρισσαῖς συζυγίαις πόσσαις τόδε τεύχεται ὥραις; -
-
- - -anonymi epigrammatici - - -δάκρυ παρὰ στάξαντες ἀμείβετε· οἵδε γὰρ ἡμεῖς, -οὓς τόδε δῶμα πεσὸν ὤλεσεν Ἀντιόχου -δαιτυμόνας, ἴσης τε ˘ θεὸς δαιτός τε τάφου τε -τόνδʼ ἔπορεν χῶρον. τέσσαρες ἐκ Τεγέης -κείμεθα· Μεσσήνης δὲ δυώδεκα· ἐκ δέ τε πέντε -Ἄργεος· ἐκ Σπάρτης δʼ ἥμισυ δαιτυμόνων, -αὐτός τʼ Ἀντίοχος· πέμπτου δέ τε πέμπτον ὄλοντο -Κεκροπίδαι· σὺ δʼ Ὕλαν κλαῖε, Κόρινθε, μόνον. -
-
- - -anonymi epigrammatici - - -Νικαρέτη παίζουσα σὺν ἡλικιώτισι πέντε, -ὧν εἶχεν καρύων Κλεῖτʼ ἔπορεν τὸ τρίτον, -καὶ Σαπφοῖ τὸ τέταρτον, Ἀριστοδίκᾐ δὲ τὸ πέμπτον, -εἰκοστὸν Θεανοῖ καὶ πάλι δωδέκατον, -εἰκοστὸν τέτρατον δὲ Φιλιννίδι· καὶ περιῆν δὲ -πεντήκοντʼ αὐτῇ Νικαρέτῃ κάρυα. -
-
- - -anonymi epigrammatici - - -γνωμονικῶν Διόδωρε μέγα κλέος, εἰπέ μοι ὥρην, -ἡνίκʼ ἀπʼ ἀντολίης πόλον ἥλατο χρύσεα κύκλα -ἠελίου. “τοῦ δῆτοι ὅσον τρία πέμπτα δρόμοιο, -τετράκι τόσσον ἔπειτα μεθʼ Ἑσπερίην ἅλα λείπει.” - -
-
- - -anonymi epigrammatici - - -Ζεῦ μάκαρ, ἦ ῥά τοι ἔργα τάδʼ εὔαδεν, οἷα γυναῖκες -Θεσσαλικαὶ παίζουσι; μαραίνεται ὄμμα Σελήνης -ἐκ μερόπων ἴδον αὐτός· ἔην δʼ ἔτι νυκτὸς ἐπʼ ἠῶ -δὶς τόσον ὅσσα δύʼ ἕκτα καὶ ἕβδομον οἰχομένοιο. -
-
- - -anonymi epigrammatici - - -Ἀπλανέων ἄστρων, παρόδους τ ἐπὶ τοῖσιν ἀλητῶν -εἰπέ μοι, ἡνίκʼ ἐμὴ χθιζὸν ἔτικτε δάμαρ. -ἦμαρ “ ἔην, ὅσσον τε δὶς ἕβδομον ἀντολίηθεν, -ἑξάκι τόσσον ἔην Ἑσπερίην ἐς ἅλα.” -
-
- - -anonymi epigrammatici - - -ἔγρεσθʼ, Ἠριγένεια παρέδραμε· πέμπτον, ἔριθοι, -λειπομένης τρισσῶν οἴχεται ὀγδοάτων. -
-
- - -anonymi epigrammatici - - -Σύρτιος ἐν τενάγεσσι πατήρ θάνεν. ἐκ δʼ ἄρʼ ἐκείνης -πέντε τάλαντα φέρων ἤλυθε ναυτιλίης -οὗτος ἀδελφειῶν προφερέστατος· ἦ γὰρ ἔμοιγε -δῶκεν ἑῆς μοίρης διπλάσιον τριτάτων -δοιῶν, ἡμετέρης δὲ δύʼ ὄγδοα μητέρι μοίρης -ὤπασεν, οὐδὲ δίκης ἤμβροτεν ἀθανάτων. - -
-
- - -anonymi epigrammatici - - - - ἁ βάσις ἃν πατέω σὺν ἐμοὶ βάρος ἁλίκον ἕλκει. - - χἀ κρηπὶς σὺν ἐμοὶ τόσσα τάλαντα φέρει. - - ἀλλʼ ἐγὼ οἶος ἅπαξ τὰν σὰν βάσιν ἐς δὶς ἀνέλκω. - - κἠγὼ μοῦνος ἐὼν σὰν βάσιν ἐς τρὶς ἄγω. -
-
- - -anonymi epigrammatici - - - - δός μοι δέκα μνᾶς, καὶ τριπλοῦς σοῦ γίνομαι. - - κἀγὼ λαβὼν σοῦ τὰς ἴσας, σοῦ πενταπλοῦς. -
-
- - -anonymi epigrammatici - - - - δός μοι δύο μνᾶς, καὶ διπλοῦς σοῦ γίνομαι. - - κἀγὼ λαβὼν σοῦ τὰς ἴσας, σοῦ τετραπλοῦς. -
-
- - -homerus - - - -Ἑλλήνων πλῆθος τὸ κατὰ τῆς Ἰλίου στρατεῦσαν -ἑπτὰ ἔσαν μαλεροῦ πυρὸς ἐσχάραι· ἐν δὲ ἑκάστῃ -πεντήκοντʼ ὀβελοί, περὶ δὲ κρέα πεντήκοντα· -τρὶς δὲ τριηκόσιοι περὶ ἓν κρέας ἦσαν Ἀχαιοί. - -
-
- - -germanus - - - -γενέθλιον ἡμέραν ἐπιτελῶν ἑαυτοῦ διῆγεν περὶ -Κτησιφῶντα ἀγῶνας ἱππικοὺς θεώμενος -γηγενέων ποτὲ φῦλον ἐνήρατο μητίετα Ζεύς, -ἔχθιστον μακάρεσσιν Ὀλύμπια δώματʼ ἔχουσιν. -Ῥωμαίων βασιλεὺς Ἰουλιανὸς θεοειδὴς -μαρνάμενος πόλιας πόλιας καὶ τείχεα μακρὰ -ἀγχεμάχων διέπερσε πυρὶ κρατερῷ τε σιδήρῳ, -νωλεμέως δʼ ἐδάμασσε καὶ ἔθνεα πολλὰ καὶ ἄλλα· -ὃς ῥα καὶ ἑσπερίων ἀνδρῶν Ἀλαμανικὸν οὖδας -ὑσμίναις πυκναῖσιν ἑλὼν ἀλάπαξεν ἀρούρας. -
-
- - -anonymi epigrammatici - - - -περὶ ἐπιληψίας -μείζονʼ ἀειράμενος κεφαλῆς ποιμνηίου εὐλὴν -μηκάδος, ἀγρονόμοιο δέμας περικάββαλε μήλου, -ἑρπηστὰν πολύπλαγκτον ἐϋρρήνου ἀπὸ κόρσης. -
-
- - -anonymi epigrammatici - - - -ἀσκοῦ τὸν προὔχοντα ποδαιόνα, φίλτατε λαῶν, -μὴ λῦσαι, πρὶν γουνὸν Ἀθηναίων ἀφικέσθαι. -
-
- -
- -
- - -anonymi epigrammatici - - - -Ζωοτύπος τόλμησεν ἃ μὴ θέμις εἰκόνι γράψαι, -εὐεπίη δʼ ἐτέλεσσε φύσιν ψευδήμονα κόσμου, -ἐγγὺς ἀληθείης τε· γραφὴ δʼ ἐψεύσατο πάντα. -
-
- - -anonymi epigrammatici - - - -Καλλιχόρου τόδε τεῖχος ἀνηέξησε πόληος -Μαρκιανὸς σκηπτοῦχος, ὑπʼ ἐννεσίῃσιν ὑπάρχου -Παλλαδίου, θεσμοῖς τε περίφρονος Ἀρτεμεῶνος· -ἡ δὲ πόλις παλίνορσον ἑὸν χρόνῳ εὕρατο μέτρον. -
-
- - -anonymi epigrammatici - - - -ἑπτά με καὶ δέκα παῖδʼ ἐτέων ἀκέραιον, ἄχραντον, -Νίκανδρον πιστὸν μάρτυρα θῆκε θεός. - -
-
- - -anonymi epigrammatici - - - -Αὔχησον, Νίκαια, τὸν οὐρανομάκεα τύμβον, -καὶ τὰν ἀελίῳ γείτονα πυραμίδα· -ἃ τὸν ἐνὶ ζῳοῖς βεβοαμένον ἱεροφάνταν -κρύπτει ἀμετρήτῳ σάματι θαπτόμενον. -ἔστι Σακέρδωτος τόσον ἠρίον, ἔστι Σεουήρας -μνᾶμα τόδʼ ᾧ γείτων οὐρανός, οὐκ ἀίδας. -
-
- - -anonymi epigrammatici - - -οὐράνιον τὸ μνᾶμα καὶ ἁ χρυσήλατος ἀκτὶς -ἀνδρός, ἴσον βιότῳ καὶ τάφον εὑραμένου, -ἄστροις γειτονέοντα· φέρει δʼ ὅσον οὔτινα τύμβος -ἀνέρα,, τὸν τελετᾶς οὐρανίδος ζάκορον, -τὸν πάτραν ἐριποῦσαν ἀπὸ χθονὸς ὑψώσαντα, -τὸν φρενὸς ἢ γλώσσας ἄκρα λαχόντα γέρα· -ᾧ πέρι δηρίσαντο καὶ ἁ νέκυν ἐν πυρὶ θεῖσα -Ἀτθίς, χἀ κόλποις ὀστέα δεξαμένα. -
-
- - -anonymi epigrammatici - - -τοῦτο Σακέρδωτος μεγάλου μέγα σῆμα τέτυκται -παμφαές, Ἀσκανίης ἄστρον ἐπιχθόνιον, -ἀκτίνων ἀντωπὸν ὁ δʼ ἥσυχος ἔνδοθι δαίμων -κεῖται, ὁ καὶ πάτρᾐ δεξιτερὴν τανύσας -κεκλιμένῃ, καὶ στέμμα περὶ κροτάφοισιν ἀνάψας -ἱερὸνἐκ πατρὸς παιδὶ νεαζόμενον -ὃν πάτρη μὲν ἔδεκτο φίλον νέκυν, ἥγνισε δʼ Ἀτθὶς -πυρκαϊῇ, σέβεται δʼ Ἑλλὰς ἅπασα πόλις. - -
-
- - -anonymi epigrammatici - - -ἁ πάτρα Νίκαια, πατήρ δέ μοι ὀργιοφάντας -οὐρανοῦ, αὐτάρ ἐγὼ κλαρονόμος τελετᾶς· -οὗτος ὁ καὶ σεισθεῖσαν ἐμὰν πόλιν ἐξ ἀίδαο -ῥυσάμενος δώροις Αὐσονίοιο Διός· -θνᾴσκω δʼ Ἀσκανίας μὲν ἀπόπροθεν, ἠδʼ ἐπὶ γαίας -Ἀτθίδος ἀρχεγόνου πυρκαϊᾶς ἐπέβαν. -μνᾶμα δέ μοι περίσαμον ὁμώνυμος εὕρατο πάππῳ -παῖς ἐμός· ἁ δʼ ἀρετὰ λεύσσει ἐς ἀμφοτέρους. -
-
- - -anonymi epigrammatici - - -εἷς γάμος ἀμφοτέρων, ξυνὸς βίος, οὐδὲ θανόντων -μνήμονες ἀλλήλων ἔσχον ἀποικεσίην· -καὶ σ’ αἱ μὲν τελεταί τε καὶ ἄρρενος ἔργα, Σακέρδως, -κηρύξει βίοτον πάντας ἐς ἠελίους· -αὐτάρ ἐμὲ Σευουήραν ἀνήρ, τέκος, ἤθεα, κάλλος, -τῆς πρὶν Πηνελόπης θήσει ἀοιδοτέρην. -
-
- - -flavius cyrus - - -ἐγκώμιον εἰς Θεοδόσιον τὸν βασιλέα -πάντα μὲν Αἰακίδαο φέρεις ἀριδείκετα ἔργα, -νόσφι λοχαίου ἔρωτος· ὀιστεύεις δʼ ἅτε Τεῦκρος, -ἀλλʼ οὔ τοι νόθον ἦμαρ ἔχεις δʼ ἐρικυδέα μορφήν, -τὴν Ἀγαμεμνονέην, ἀλλʼ οὐ φρένας οἶνος ὀρίνει· -ἐς πινυτὴν δʼ Ὀδυσῆι δαΐφρονι πᾶν σε ἐΐσκω, -ἀλλὰ κακῶν ἀπάνευθε δόλων Πυλίου δὲ γέροντος -ἶσον ἀποστάζεις, βασιλεῦ, μελιηδέα φωνήν, -πρὶν χρόνον ἀθρήσεις τριτάτην ψαύοντα γενέθλην. - -
-
- - -anonymi epigrammatici - - -μάρτυρας ἐν πελάγει πόθεν εὕρομεν; εἴπατε πέτραι, -εἴπατε κύματα μακρά, πόσαις ἐμάχοντο θυέλλαις. -ναῦς ἐάγη, πέσεν ἱστός, ἔδυ τρόπις, ὤλετο φόρτος. -
-
- - -anonymi epigrammatici - - - -εὐρὺ μὲν ἀρχαίης Λίνδου κλέος, Ἀτρυτώνην -δεξαμένης ὄχθοις οὐρανίοισιν ἄκρης· -μέζων δʼ αὖ κατὰ γαῖαν ἐπήρατος ἔπλετο φῆμις -παρθενικῆς γλαυκῶν πλησαμένῃ χαρίτων. -νῦν γὰρ Ἀθηναίης βοάᾳ θαλερὸς ἔμεν οἶκος -χῶρος καρπογόνους δερκόμενοις σκοπέλους· -ἄνθεμα γὰρ τόδε λαρὸν Ἀθηναίῃ πόρεν ἱρεὺς -Ἀγλώχαρτος, ἑῶν νειμάμενος κτεάνων, -κρέσσων καὶ Κελεοῖο καὶ Ἰκαρίοιο κατʼ αἶαν -πάμπαν ἀεξῆσαι τὴν ἱερὴν ἐλέην. -
-
- - -leo philosophus - - -εὖγε Τύχη με ποεῖς, ἀπραγμοσύνῃ μʼ Ἐπικούρου -ἡδίστῃ κομέουσα, καὶ ἡσυχίῃ τέρπουσα· -τίπτε δέ μοι χρέος ἀσχολίης πολυκηδέος ἀνδρῶν; -οὐκ ἐθέλω πλοῦτον, τυφλὸν φίλον, ἀλλοπρόσαλλον, -οὐ τιμάς· τιμαὶ δὲ βροτῶν ἀμενηνὸς ὄνειρος. - -ἔρρε μοι, ὦ Κίρκης δνοφερὸν σπέος· αἰδέομαι γὰρ -οὐράνιος γεγαὼς βαλάνους ἅτε θηρίον ἔσθειν· -μισῶ Λωτοφάγων γλυκερὴν λιπόπατριν ἐδωδήν· -Σειρηνων τε μέλος καταγωγὸν ἀναίνομαι ἐχθρόν· -ἀλλὰ λαβεῖν θεόθεν ψυχοσσόον εὔχομαι ἄνθος, -μῶλυ, κακῶν δοξῶν ἀλκτήριον ὦτα δὲ κηρῷ -ἀσφαλέως κλείσας προφυγεῖν γενετήσιον ὁρμήν. -ταῦτα λέγων τε γράφων τε πέρας βιότοιο κιχείην, -
-
- - -constantinus - - - -εἰ μέν τις σοφός ἐσσι, ἐφέζεο· εἰ δέ γε Μούσης -δακτύλῳ ἀκροτάτῳ ἀπεγεύσαο, -πόρρω στῆθʼ ἀπʼ ἐμεῖο, καὶ ἄλλοθι δίζεο ἕδρην -κλισμὸς ἐγὼ φορέων σοφίης ἐπιΐστορας ἄνδρας. -
-
- - -theophanes confessor - - -ἀντίγραφον πρὸς ταῦτα -καὶ τί γε σῆμα φέρεις ἐξαίρετον, ὦ κενεαυχές, -ὅττι σοφοὺς φιλέεις μέν, ἀμούσους δʼ ἀνταπερύκεις; -οὐ χρυσὸν φορέεις, οὐκ ἄργυρον, οὐκ ἐλέφαντα, -ἀλλά σε τεκτονίης ἡγήτορες ἄνδρες ἔτευξαν, -Καλλιόπης ἀΐδρεις καὶ ἀπευθέες Ἡφαίστοιο, -πᾶσι σοφοῖς τʼ ἀσόφοις τε δορήϊον ἔμμεναι ἕδρην. - -
-
- - -constantinus - - - -Κωνσταντῖνος Ἰωάννου ἠδʼ Εὐδοκίης με -τέκνον ἔτευξεν ἀγακλυτόν, ὃν Λίνδος μεγάλαυχος -ἤνεγκε προτέρης γενεῆς προφερέστερον ἄνδρα, -καὶ πιστὸν θεράποντα σκηπτούχοιο Λέοντος· -ᾧ Ἀλέξανδρος ἀδελφὸς ἰδʼ υἱὸς Κωνσταντῖνος -σκῆπτρα θεοστήρικτα συνεξαγέτην βασιλείης. -
-
- - -constantinus - - - -ἅπαν μὲν ἔργον οὐ πρὸς ἀξίαν πέλει -τὴν σήν, ὑπερθαύμαστε κόσμου δεσπότι· -ἔργων γὰρ ἔξω καὶ φθορᾶς τὸ σὸν κλέος· -τὸ δʼ ἔργον, ὃ προσῆξέ σοι Κωνσταντίνος, -ἐπάξιον πέφυκεν, εἰ δή, Παρθένε, -τοῦ σοῦ τόκου τὸ σκῆπτρον εὖ διαγράφει, -καὶ σαρκὸς αὐτοῦ τὸ τρισόλβιον πάθος. -
-
- - -constantinus - - - -εἰ ζωγραφεῖν τις ἤθελέν σε, Παρθένε, -ἄστρων ἐδεῖτο μᾶλλον ἀντὶ χρωμάτων, -ἵνʼ ἐγράφης φωστῆρσιν, ὡς φωτὸς πύλη· - -ἀλλʼ οὐχ ὑπείκει ταῦτα τοῖς βροτῶν λόγοις· -ἃ δʼ οὖν φύσις παρέσχε καὶ γραφῆς νόμος, -τούτοις παρʼ ἡμῶν ἱστορῇ τε καὶ γράφῃ. -
-
- - -anonymi epigrammatici - - - -ὀστέα σου, Παλάμηδες, ἔδει πρισθέντα γενέσθαι -ὄργανα τῆς τέχνης τῆς ἀπὸ τοῦ πολέμου· -ἐν πολέμοις γὰρ ἐὼν ἕτερον πόλεμον κατέδειξας, -ἐν ξυλίνῳ σταδίῳ τὸν φιλικὸν πόλεμον. -
-
- - -anonymi epigrammatici - - - -Ἀσκληπιάδης ἰατρὸς ἥρπασεν κόρην. -μετὰ τὴν φθορὰν δὲ τοῦ γάμου τῆς ἁρπαγῆς -ἐκάλεσε πλῆθος εἰς τὸν αὐθέντην γάμον -ἀνδρῶν χορευτῶν καὶ γυναικῶν ἀθλίων· -τῆς οἰκίας δὲ συμπεσούσης ἑσπέρας, -πάντες κατηνέχθησαν εἰς ᾅδου δόμους, -νεκροὶ δʼ ἔκειντο περὶ νεκροῖς πεπτωκότες· -νυμφὼν δʼ ὁ σεμνὸς, ἐκ ῥόδων πεπλεγμένος, -ἐκ τῶν φόνων ἔσταξεν αἷμα φοίνιον. -
-
- - -palladas - - -σιγῶν παρέρχου τὸν ταλαίπωρον βίον, -αὐτὸν σιωπᾖ τὸν χρόνον μιμούμενος· -λαθὼν δὲ καὶ βίωσον, εἰ δὲ μή, θανών. - -
-
- - -theocritus - - -οὐδενὸς εὐνάτειρα, Μακροπτολέμοιο δὲ μάτηρ, -μαίας ἀντιπέτροιο θοὸν τέκεν ἰθυντῆρα, -οὐχὶ Κεράσταν, ὅν ποτʼ ἐθρέψατο ταυροπάτωρ, -ἀλλʼ οὗ πιλιπὲς αἶθε πάρος φρένα τέρμα σάκους, -οὔνομʼ ὅλον, δίζων, ὃς τᾶς Μέροπος πόθον -κούρας γηρυγόνας ἔχε τᾶς ἀνεμώδεος· -ὃς Μοίσᾳ λιγὺ πᾶξεν ἰοστεφάνῳ, -ἕλκος, ἄγαλμα πόθοιο πυρισμαράγω· -ὃς σβέσεν ἀνορέαν ἰσαυδέα -παπποφίνου Τυρίαν τʼ , -ᾧ τόδε τυφλοφόρων ἐρατὸν -πᾶμα Πάρις θέτο Σιμιχίδας. -ψυχάν, ᾇ βοτοβάμων, -στήτας οἶστρε Σαέττας, -κλωποπάτωρ, ἀπάτωρ, -λαρνακόγυιε, χαρεὶς -ἁδὺ μελίσδοις -ἔλλοπι κούρᾳ, -Καλλιόπᾳ, -νηλεύστῳ. - -
-
- - -simias - - - -Ἀνδροθέᾳ δῶρον ὁ Φωκεὺς κρατερᾶς μηδοσύνας ἦρα τίνων Ἀθάνᾳ -τᾶμος, ἐπεὶ τὰν ἱερὰν κηρὶ πυρίπνῳ πόλιν ᾐθάλωσεν -οὐκ ἐνάριθμος γεγαὼς ἐν προμάχοις Ἀχαιῶν, -νῦν δʼ ἐς Ὁμήρειον ἔβα κέλευθον, -τρὶς μάκαρ, ὃν σὺ θυμῷ -ὅδʼ ὄλβος -ἀεὶ πνεῖ. -ἵλαος ἀμφιδερχθῇς. -σὰν χάριν, ἁγνὰ πολύβουλε Παλλάς· -ἀλλʼ ἀπὸ κρανῶν ἰθαρᾶν νᾶμα κόμιζε δυσκλής· -Δαρδανιδᾶν, χρυσοβαφεῖς τʼ ἐστυφέλιξʼ ἐκ θεμέθλων ἄνακτας· -ὤπασ’ Ἐπειὸς πέλεκυν, τῷ ποκὰ πύργων θεοτεύκτων κατέρειψεν αἶπος. - - -Ἀνδροθέᾳ δῶρον ὁ Φωκεὺς κρατερᾶς μηδοσύνας ἦρα τίνων Ἀθάνᾳ -ὠπασ’ Ἐπειὸς πέλεκυν, τῷ ποκὰ πύργων θεοτεύκτων κατέρειψεν αἶπος, -τᾶμος, ἐπεὶ τὰν ἱερὰν κηρὶ πυρίπνῳ πόλιν ᾐθάλωσεν -Δαρδανιδᾶν, χρυσοβαφεῖς τʼ ἐστυφέλιξʼ ἐκ θεμέθλων ἄνακτας· -οὐκ ἐνάριθμος γεγαὼς ἐν προμάχοις Ἀχαιῶν, -ἀλλʼ ἀπὸ κρανῶν ἰθαρᾶν νᾶμα κέλευθον δυσκλής· -νῦν δʼ ἐς Ὁμήρειον ἔβα κέλευθον, -σὰν χάριν, ἁγνὰ πολύβουλε Παλλάς· -τρὶς μάκαρ ὃν σὺ θυμῷ -ἵλαος ἀμφιδερχθῇς. -ὅδʼ ὄλβος -ἀεὶ πνεῖ. - -
-
- - -anonymi epigrammatici - - - -εἰ λύπης κρατέειν ἐθέλεις, -τήνδε μάκαιραν ἀναπτύσσων -βίβλον ἐπέρχεο ἐνδυκέως, -ἧς ὕπο γνώμην ὀλβίστην -ῥεῖά κεν ὄψεαι ἐσσομένων, -ὄντων ἠδὲ παροιχομένων, -τερπωλὴν τʼ ἀνίην τε -καπνοῦ μηδὲν ἀρειοτέρην. - -
-
- - -simias - - -λεῦσσέ με τὸν Γᾶς τε βαθυστέρνου ἄνακτʼ, Ἀκμονίδαν τʼ ἄλλυδις ἑδράσαντα, -μηδὲ τρέσῃς, εἰ τόσος ὢν δάσκια βέβριθα λάχνᾳ γένεια. -τᾶμος ἐγὼ γὰρ γενόμαν, ἁνίκʼ ἔκραινʼ Ἀνάγκα, -πάντα δὲ Γᾶς εἶκε φραδαῖσι λυγραῖς -ἑρπετά, † πάνθʼ ὅσ’ ἕρπει -διʼ αἴθρας. -χάους δέ, -οὔτι γε Κύπριδος παῖς -ὠκυπέτας οὐδʼ Ἄρεος καλεῦμαι· -οὔτι γὰρ ἔκρανα βίᾳ, πραϋλόγῳ δὲ πειθοῖ· -εἶκε δέ μοι Γαῖα, Θαλάσσας τε μυχοί, χάλκεος Οὐρανός τε· -τῶν δʼ ἐγὼ ἐκνοσφισάμαν ὠγύγιον σκᾶπτρον, ἔκρινον δὲ θεοῖς θέμιστας. - -
-
- - -besantinus - - -Ὀλὸς οὔ με λιβρὸς ἱρῶν -Λιβάδεσσιν, οἷα κάλχη -Ὑποφοινίῃσι τέγγει· -Μαύλιες δʼ ὕπερθε πέτρης Ναξίας θοούμεναι -Παμάτων φείδοντο Πανός· οὐ στροβίλῳ λιγνύι -Ἰξὸς εὐώδης μελαίνει τρεχνέων με Νυσίων. -ἐς γὰρ βωμὸν ὁρῆς με μήτε γλούρου -πλίνθοις, μήτʼ Ἀλύβης παγέντα βώλοις· -οὐδʼ ὃν Κυνθογενὴς ἔτευξε φύτλη -λαβόντε μηκάδων κέρα, -Λισσαῖσιν ἀμφὶ δειράσιν -ὅσσαι νέμονται Κυνθίαις, -ἰσόρροπος πελοιτό μοι. -σὺν Οὐρανοῦ γὰρ ἐκγόνοις -εἰνὰς μʼ ἔτευξε γηγενής· -τάων ἀείζῳον τέχνην -ἔνευσε πάλμυς ἀφθίτων. -σὺ δʼ ὦ πιὼν κρήνηθεν, ἣν -ἶνις κόλαψε Γοργόνος, -Θύοις τʼ ἐπισπένδοις τέ μοι -Ὑμηττιαδᾶν πολὺ λαροτέρην -σπονδὴν ἄδην ἴθι δὴ θαρσέων -ἐς ἐμὴν τεῦξιν καθαρὸς γὰρ ἐγὼ -ἰὸν ἱέντων τεράων, οἷα κέκευθʼ ἐκεῖνος -ἀμφὶ Νέαις Θρηικίαις, ὃν σχεδόθεν Μυρίνης -σοί, Τριπάτωρ, πορφυρέου φώρ ἀνέθηκε κριοῦ. - -
-
- - -dosiadas - - -Εἱμάρσενός με στήτας -πόσις, μέροψ δίσαβος, -τεῦξʼ, οὐ σποδεύνας, ἶνις ἐμπούσας, μόρος -Τεύκροιο βούτα καὶ κυνὸς τεκνώματος, -Χρύσας δʼ ἀίτας, ἆμος ἑψάνδρα -τὸν γυιόχαλκον οὖρον ἔρραισεν, -ὃν ὡπάτωρ δίσευνος -μόρησε ματρόρριπτος. -ἐμὸν δὲ τεῦγμʼ ἀθρήσας -Θεοκρίτοιο κτάντας, -τριεσπέροιο καύτας, -θώυξεν † ἀνιύξας -χάλεψε γάρ νιν ἰῷ -σύργαστρος ἐκδὺς γῆρας. -τὸν δʼ † ἀεὶ λινεῦντʼ ἐν ἀμφικλύστῳ -Πανός τε ματρὸς εὐνέτας, φὼρ -δίζῳος, ἶνίς τʼ ἀνδροβρῶτος ἰλιοραιστᾶν -ἦρʼ ἀρδίων ἐς Τευκρίδʼ ἄγαγον τρίπορθον. - -
-
- - -simias - - - -Κωτίλας -τῆ τόδʼ ἄτριον νέον -πρόφρων δὲ θυμῷ δέξο· δὴ γὰρ ἁγνᾶς -τὸ μὲν θεῶν ἐριβόας Ἑρμᾶς ἔκιξε κᾶρυξ -ἄνωγε δʼ ἐκ μέτρου μονοβάμονος μέγαν πάροιθʼ ἀέξειν -θοῶς δʼ ὕπερθεν ὦκα λέχριον φέρων νεῦμα ποδῶν σποράδων πίφαυσκεν -θοαῖς ἴσ’ αἰόλαις νεβροῖς κῶλʼ ἀλλάσσων ὀρσιπόδων ἐλάφων τέκεσσιν -πᾶσαι κραιπνοῖς ὑπὲρ ἄκρων ἱέμεναι ποσὶ λόφων κατʼ ἀρθμίας ἴχνος τιθήνας -καί τις ὠμόθυμος ἀμφίπαλτον αἶψʼ αὐδὰν θὴρ ἐν κόλπῳ δεξάμενος θαλαμᾶν μυχοιτάτῳ -καἶτʼ ὦκα βοᾶς ἀκοὰν μεθέπων, ὅγʼ ἄφαρ λάσιον νιφοβόλων ἀνʼ ὀρέων ἔσσυται ἄγκος -ταῖσι δὴ δαίμων κλυτᾶς ἶσα θοοῖς δονέων ποσὶ πολύπλοκα μετίει μέτρα μολπᾶς -ῥίμφα πετρόκοιτον ἐκλιπὼν ὄρουσ’ εὐνάν, ματρὸς πλαγκτὸν μαιόμενος βαλίας ἑλεῖν τέκος -βλαχαὶ δʼ οἴων πολυβότων ἀνʼ ὀρέων νομὸν ἔβαν τανυσφύρων ἐς ἀνʼ ἄντρα Νυμφῶν -ταὶ δʼ ἀμβρότῳ πόθῳ φίλας ματρὸς ῥώοντʼ αἶψα μεθʼ ἱμερόεντα μαζὸν -ἴχνει θένων ταν παναίολον Πιερίδων μονόδουπον αὐδὰν -ἀριθμὸν εἰς ἄκραν δεκάδʼ ἰχνίων κόσμον νέμοντα ῥυθμῶν -φῦλʼ ἐς βροτῶν, ὑπὸ φίλας ἑλὼν πτεροῖσι ματρός -λιγειά μιν κάμʼ ἶφι ματρὸς ὠδίς -Δωρίας ἀηδόνος -ματέρος. - - - -Κωτίλας -ματέρος -τῆ τόδʼ ἄτριον νέον -Δωρίας ἀηδόνος -πρόφρων δὲ θυμῷ δέξο· δἢ; γὰρ ἁγνᾶς -λίγειά μιν κάμʼ ἶφι ματρὸς ὠδίς· -τὸ μὲν θεῶν ἐριβόας Ἐρμᾶς ἔκιξε κάρυξ -φῦλʼ ἐς βροτῶν, ὑπὸ φίλας ἑλὼν πτεροῖσι ματρός· -ἄνωγε δʼ ἐκ μέτρου μονοβάμονος μέγαν πάροιθʼ ἀέξειν -ἀριθμὸν εἰς ἄκραν δεκάδʼ ἰχνίων κόσμον νέμοντα ῥυθμῶν. -θοῶς δʼ ὕπερθεν ʽὦκα λέχριον φέρων νεῦμα ποδῶν σποράδων πίφαυσκεν -ἴχνει θένων . . ταν παναίολον Πιερίδων μονόδουπον αὐδάν, -θοαῖς ἴσ’ αἰόλαις αἰόλαις κῶλʼ ἀλλάσσων ὀρσιπόδων ἐλάφων τέκεσσιν· -ταὶ δʼ ἀμβρότῳ πόθῳ φίλας ματρὸς ῥώοντʼ αἶψα μεθʼ ἱμερόεντα μαζόν, -πᾶσαι κραιπνοῖς ὑπὲρ ἄκρων ἱέμεναι ποσὶ λόφων κατʼ ἀρθμίας ἴχνος τιθῆνας· -βλαχαὶ δʼ οἴων πολυβότων ἀνʼ ὀρέων νομὸν ἐβαν ταννσφνρων ἐς ἀνʼ ἄντρα Νυμφῶν· -καί τις ὠμόθυμος ἀμφίπαλτον αἶψʼ αὐδὰν θὴρ ἐν κόλπῳ δεξάμενος θαλαμᾶν μυχοιτάτῳ -ῥίμφα πετρόκοιτον ἐκλιπὼν ὄρουσ’ εὐνάν, ματρὸς πλαγκτὸν μαιόμενος βαλίας ἑλεῖν τέκος· -καἶιτʼ ὦκα Βοᾶς ἀκοὰν μεθέπων, ὅγʼ ἄφαρ λάσιον νιφοβόλων ἀνʼ ὀρέων ἔσσυται ἄγκος· -ταῖσι δὴ δαίμων κλυτᾶς ἶσα θοοῖς δονέων ποσὶ πολύπλοκα μετίει μέτρα μολπᾶς. - - -
- -
- - -anastasius traulus - - - -Χριστὸς ἐπὶ σταυροῖο πεπαρμένος ἦν ποτε γυμνός, -μεσσόθι, ληιστῆρας ἔχων ἑκάτερθε παγέντας· -καί μιν ἀκηχεμένη λιγέως ὀλοφύρετο μήτηρ -λύγδην ἱσταμένη, καὶ παρθένος ἄλλος ἑταῖρος· -καί μιν καγχαλόωντες ἐνείκεον ἄνδρες ὁδῖται -κάμμορον, οὐτιδανὸν καὶ ἀνάλκιδα φῶτα καλεῦντες· -καὶ οἱ διψαλέῳ στυγερὴν ὤρεξε ποτῆτα -λαὸς Ἰουδαίων ἀθεμίστιος, αἱματοχάρμης, -ὄξεϊ κιρνάμενος πικρὸν δέπας, εἶδαρ ὀλέθρου. -ἀλλʼ ἀκέων τετάνυστο καὶ οὐκ ἀπαμύνετο Χριστός, -Χριστός, ὁ καὶ Μαρίης καὶ ἀθανάτου πατρὸς υἱός. -ταῦτα τίς ἀνθρώπων ἀγέρωχος νήπιος ἔσται -κῆρι λογιζόμενος καὶ ὁρώμενος ἐν πινάκεσσιν· -ἀνδρὸς γὰρ θεός ἐστιν, ὁ δὲ βροτὸς οὐδὲν ἀρείων. -
-
- - -ignatius - - -Ἰγνάτιος πολλῇσιν ἐν ἀμπλακίῃσι βιώσας, -ἔλλιπον ἡδυφαοῦς ἠελίοιο σέλας· -καὶ νῦν ἐς δνοφερὸν κατακεύθομαι ἐνθάδε τύμβον, -οἴμοι· ψυχῇ μου μακρὰ κολαζόμενος. -ἀλλά, κριτὰ ʽβροτός εἰμι, σὺ δʼ ἄφθιτος ἠδʼ ἐλεήμωνʼ, -ἵλαθι, ἵλαθί μοι ὄμματι εὐμενέι. -
-
- - -ignatius - - - -σῶμα μέν, οὐκ ἀρετὴν ὅδε τύμβος νέρθε κέκευθε -κεδνοῦ Παύλοιο· ὥστε γὰρ ἠελίου - -τοῦδὲ γʼ ἀπαστράπτουσιν ἀριπρεπέες λόγοι αἴγλῃ, -ἠδʼ ἀρετῆς κάματοι εὖχος ἔχουσι μέγα. -εἴκοσιν ἐς λυκάβαντας ἰδὲ τρισὶν ἤρκεσε γαίῃ, -ζήσας δʼ αὖ λογικῶς ἐσθλὸν ἔδεκτο τέλος. -
-
- - -ignatius - - - -ἱερὸς ἐν λαγόνεσσι Σαμουὴλ κεύθεται γαίης, -πάντα λιπὼν βιότου, ὅσσα περ εἶχε, θεῷ· -καὶ νῦν εὐσεβέων εἰσέδραμε φαίδιμον αὐλὴν, -δόξαν ὑπὲρ μεγάλων ληψόμενος καμάτων. -
-
- - -arethas - - - -εἰ καί μοι λύχνον αἰῶνος ταχὺς ἔσβεσεν οἶτος, -λαμπάδος ἡμετέρης φέγγος ἀμερσάμενος, -ἀλλὰ γʼ ἄρʼ ἤρκεσε λύσσῃ ἑῆς κακότητος ὁ δαίμων -πᾶσαν ἐμὴν τελέσαι στυγναλέην βιοτὴν -θῆκέ με χήρην ἐγγὺς ἀειρομένου μοι μαζοῦ, -οὐδʼ ἐπὶ τέκνον ἴδον καλὸν ἀθυρόμενον, -ἡδὺ τοκεῦσιν ἄγαλμα παραγκάς· τῷ γέ με πένθος -ἄτλητον μαλερῷ τηκεδόνος δάμασε -πυρσῷ. τρεῖς πρὸς ἐείκοσ’ ἐποιχομένην ἐνιαυτοὺς -ἔσχεν τύμβος ὅδε ξεινοδόκος γενέθλης -ἡμετέρης· ἔνθʼ ὕφηνον γενετῆρες ἅπασι -γηραλέοι θρῆνον τιλλόμενοι πολιήν, -καὶ χορὸς εὐγενέων στενάχοντες ἀδελφῶν Ἄννης -μνώμενοι ἀσπασίως εἴδεος ἀγλαΐης. - -
-
- - -arethas - - - -τὸ σεμνὸν ἦθος, τὴν φιλάνθρωπον χάριν, -τὸ πρὸς τεκόντας τοῦ τρόπου πειθήνιον -ʽἁἰδὼς γὰρ ἦγεν ὡς διδάσκαλος μέγας -παρών̓, τὰ λαμπρὰ τοῦ γένους γνωρίσματα, -καὶ τὰς φιλάνδρους ἐνστάσεις πρὸς τὴν φύσιν -κλονοῦσαν ἀστήρικτα χηρείας βίᾳ, -ἀντεμπλοκῇ δὲ κρειττόνων ἡττωμένην -ʽἁ̓φʼ ὧν τὰ φαιδρὰ στέμματα πρὸς ἀξίαν -μόνανδρον ἐκλάμποντἁ τὴν παρρησίαν -Ἄννης ἀμαυροῦν οὐ δυνήσεται τάφος. -πάντων γὰρ αὐτῆς οὐδαμῶς λάθοι στόμα -καλὸν φερούσης νονθέτημα τῷ βίῳ -εἰ δʼ οὖν, λαλήσει καὶ γραφὴ πάντων πλέον -αὕτη παρʼ αὐτὸν τὸν τάφον τεθειμένη. -
-
- - -arethas - - - -Δρᾶσέ τί που καὶ νερτερίοις μετὰ πνεύμασιν ἀνδρῶν -Φεβρωνία ἑῆς σύμβολα συμπαθίης, -εἴ τις κἀνθάδε χρειὼ ἀφνειῶν ἦε πένησιν -οὐδὲ γὰρ οὐδʼ αὐτοῦ τῆς σφετέρης ἐς ἅπαν -ψυχαὶ λήθονται μεγαθύμων εὐεργείης· -ἔμπα γε μὴν αἰὼν ἡμετέρου βιότου -ἄρκιος εἴη θεῖον ἐπὶ προέμεν θάλαμόν μιν -Χριστοῦ, τὸν ῥα νυὸν σεμνὸν ἕλʼ ἀφθορίης, -λαμπάδʼ ἐλαίῳ φαιδρύνουσα φιλοπτωχείης· -ἧς τόδε σῆμʼ ὕπνου γνῶθι πολυχρονίου. - -
-
- - -theophanes confessor - - -εἴθε κρίνον γενόμην ἀργένναον, ὄφρα με χερσὶν -ἀρσαμένη μᾶλλον σῆς χροτιῆς κορέσῃς. -
-
- - -cometas grammaticus - - -ἀμφοτέρας, πολύμυθε, Κομητᾶς σεῖο ἀθρήσας -κύρβεις γηραλέας, θῆκεν ἀειθαλέας. -
-
- - -cometas grammaticus - - - -σεῖο βίβλους, μεγάθυμε, Κομητάς, Ὅμηρε, δύʼ ἄρδην -εὑρὼν γηραλέας, τεύξατο ὁπλοτέρας· -γῆρας ἀποξύσας γὰρ ἀριπρεπέας τε βροτοῖσι -πάμπαν ἔδειξε σοφοῖς, οἷσιν ἔνεστι νόος. -
-
- - -cometas grammaticus - - - -εὑρὼν Κομητᾶς τὰς Ὁμηρείους βίβλους -ἐφθαρμένας τε κοὐδαμῶς ἐστιγμένας, -στίξας διεσμίλευσα ταύτας ἐντέχνως, -τὴν σαπρίαν ῥύψας μὲν ὡς ἀχρηστίαν, -γράψας δʼ.ʼ ἐκαινούργησα τὴν εὐχρηστίαν. -ἐντεῦθεν οἱ γράφοντες οὐκ ἐσφαλμένως -μαθητιῶσιν, ὡς ἔοικε μανθάνειν. - -
-
- - -ignatius - - - -Ἰγνάτιος τάδε τεῦξε σοφῆς πολύιδρις ἀοιδῆς· -Ἰγνάτιος τάδε τεῦξεν, ὃς ἐς φάος ἤγαγε τέχνην -γραμματικὴν, λήθης κευθομένην πελάγει. -
-
- - -ignatius - - -τὰ τοῦ Πλάτωνος ἐξερευνήσας βάθη -τὰ τῶν λογισμῶν ἐξερίζωσας πάθη. -
-
- - -cometas grammaticus - - -ὁππότε Παμμεδέοντος ἐὺς πάις, ὄρχαμος ἀνδρῶν, -ὃς πᾶσι θνητοῖσι καὶ ἀθανάτοισιν ἀνάσσει, -ἀσπαλιεῦσιν ἔειπε μαθητῇσιν πινυτοῖσι· -“ Λάζαρος ἄμμι φίλος φάος ἔλλιπεν ἠελίοιο -οὔποτε, τόφρα κέκευθε τεθρήμερον ἄπλετος αἶα.” -ἀλλʼ ἄνεὠ ˘ μὲν ἔκειτο, μεμυκὼς χείλεα σιγῇ, -σῶμά τε πυθόμενος καὶ ὀστέα καὶ χρόα καλόν, -ψυχὴ δʼ ἐκ ῥεθέων πταμένη ἄιδόσδε κατῆλθεν, -ἄρρητον δὲ φίλοισι γόον καὶ πένθος ἔθηκεν, -ἐκ πάντων δὲ μάλιστα Μάρθῃ Μαρίῃ τε ὁμαίμοις -αὐτοκασιγνήταις· -ψυχῆς γὰρ φιλέεσκον ἀδελφεόν, ὅστις ἔκειτο -μεσσόθι ἐν νεκάδεσσιν ἀκήριος, ἄψυχος αὕτως. -τοῦ πότμον γοόωσαι ὀδυρόμεναί τε ἐθρήνευν, -σήματος ἔκτοθι οὖσαι καὶ ἑζόμεναι περὶ τύμβῳ. -ὄφρα μὲν ἠέλιος τρίτον ἠνυσεν ἦμαρ ἐς αἶαν, -τόφρα δὲ κἀν νεκάδεσσιν ἐτήκετο Λάζαρος ἄπνους· -ἀλλʼ ὅτε δὴ τετράτη ῥοδοειδὴς ἤλυθεν Ἠώς, - -καὶ τότε δὴ προσέειπε θεοῖο πάις μεγάλοιο -εὐπατρίδῃσι φίλοις, οἳ πὰρ θεοῦ ἐκγεγάαντο, -οἳ πέρι μὲν βουλῇ μερόπων, πέρι δʼ ἦον ἁπάντων, -οὓς ἔκπαγλʼ ἐφίλησ’, ὡσεὶ θεοῦ υἷας ἐόντας, -ὧν καὶ ἀπὸ γλώσσης γλυκίων μέλιτος ῥέεν αὐδὴ, -καὶ ἔπεα νιφάδεσσιν ἐοικότα χειμερίῃσιν -“ὦ φίλοι ἀγλαόθυμοι, ἐπεὶ θεὸς ἐστὶ σὺν ἄμμι, -κέκλυτέ μευ πάντες τε ὅσοι θεὸν ἔνδον ἔχοιτε, -ὄφρʼ εἴπω τά με θυμὸς ἐνὶ στήθεσσι κελεύει· -δεῦτʼ ἐς Βηθανίην, ὅθι Λάζαρον ἔλλιπε θυμός, -σπεύσομεν ὅττι τάχιστʼ, ὄφρα κλέος ἄφθιτον ἴσχω· -ἀνστῆσαι γὰρ ἔπειμι καὶ ἐξ Ἐρέβευς φίλον ἁμόν.” -τὸν δʼ αὖτε προσέειπον εὐήνορες ἀγλαόθυμοι· - -ἴομεν, ὡς ἐκέλευσας, ἀλίγκιε πατρὸς ἑοῖο. - -εἶπον ὃ δʼ αὐτὸς ἔβαινε, καὶ ἡγεμόνευε μαθηταῖς. -σπερχόμενοι δʼ εἵποντο μετʼ ἴχνια Παμμεδέοντος, -ἠύτε ἔθνεα εἶσι μελισσάων ἀδινάων, -πέτρης ἐκ γλαφυρῆς αἰεὶ νέον ἐρχομενάων -ὣς εἵποντο ὄπισθε θεοῦ μεγάλοιο μαθηταί. -ἀλλʼ ὅτε δὴ ῥʼ ἱκάνοντο πολυκλαύστῳ ἐνὶ τύμβῳ, -καὶ τότε δὴ λίσσοντο κυλινδόμεναι παρὰ ποσσὶν -Χριστὸν παμμεδέοντα κασίγνηταί τε ἔται τε· -“ Γουνούμεσθὰ σ’, ἄναξ, ὃς ὑπέρτατα δώματα ναίεις· -Λάζαρον ὃν φιλέεσκες, ἐν ἔγκασιν ἤλυθεν ᾅδου· -εἰ γὰρ τῇδε ἔησθα, ἄναξ νεκάδων Ἀϊδωνεὺς -οὔποτʼ ἔτλη μεῖναι, ἐπειὴ πολὺ φέρτατος ἦσθα· -ἀλλὰ καὶ ὣς ἐθέλων δύνασαι πάλιν αὐτὸν ἐγεῖραι.” -καὶ τότε δὴ ὕψιστος ἀμείβετο· ποῦ ποτε κεῖται; - -αἳ δʼ ἄρα ὀτραλέως ἀνὰ ἠρίον ἤλυθον ἄρδην -δὴ τότʼ ἐπεὶ δεῖξαν θεῷ αὐτὸν σῆμά τε λυγρόν, -εἶπεν ἄρʼ· ὁρμηθέντες ἀείρατε πῶμα τάφοιο - -αὐτὰρ ἐπεὶ ἀνέῳκτο τάφος λυγρὸς φθιμένοιο, - -καὶ τότε δὴ μέγʼ ἄυσε θεὸς μέγας ἠδὲ καὶ ἀνήρ - -Λάζαρε, δεῦρʼ ἴθι, κλῦθι ἐμεῖο, καὶ ἔρχεο ἔξω. - -ὡς οὖν νεκρὸς ἄκουσε θεοῖο Λόγου φήσαντος, -λυσιμελὴς ἀνέδυ, πεπεδημένος, ἔμπνους, ὀδωδώς. -τὸν καὶ ἰδόντες ὅμιλοι ἐθάμβεον ἐν κραδίῃσιν. -αὐτίκα δʼ ὑψιμέδοντα ἐκύδαινον θεὸν ἐσθλόν, -καὶ κλέος ἄφθιτον ἔσχε πατὴρ μέγας υἷος ἐῆος. -
-
- - -anonymi epigrammatici - - - -χάλκεος οὐκ ἔστης βιόων ἔτι, Κωνσταντῖνε· -ἀντὶ γὰρ εὐκλείης ἤρκεσε βασκανίη. -ὡς δὲ θάνες, τότε δή σε πόλις ξύμπασα γεραίρει -οἷς δύναται τί δὲ σῆς ἄξιον ἱπποσύνης; -
-
- - -anonymi epigrammatici - - -ἐξότε Κωνσταντῖνος ἔδυ δόμον Ἄϊδος εἴσω, -ᾤχετο σὺν κείνῳ πᾶν κλέος ἡνιόχων. -
-
- - -anonymi epigrammatici - - -χρύσεον ἀντʼ ἀρετῆς γέρας ἔπρεπε Κωνσταντίνῳ, -οὐδένα τῆς τέχνης τοῖον ἐνεγκαμένης. - -κουρίζων νίκησεν ἀειδομένους ἐλατῆρας· -γηραλέος δὲ νέους δεῖξεν ἀφαυροτέρους. -ὅντινα καὶ μετὰ πότμον ἀειμνήστῳ τινὶ θεσμῷ -δῆμος καὶ βασιλεὺς ἵδρυσαν ἁζόμενοι. -
-
- - -anonymi epigrammatici - - - -Πορφύριον λήξαντα πόνων, λύσαντά τε μίτρην, -καὶ πάρος ἀντʼ ἀρετῆς χάλκεον ἑσταότα, -τῇδε πάλιν χαλκοῦ τε καὶ ἀργύρου ἱδρύσαντο. -πρέσβυ, σὺ δὲ ξείνων ἀντιάσας γεράων, -δήμου μὲν βοόωντος ἕλες παλίνορσον ἱμάσθην, -ὡς δὲ δὶς ἡβήσας μαίνεαι ἐν σταδίοις. -
-
- - -anonymi epigrammatici - - - -τοῦτον Ἰουλιανόν, Τυρίης βλάστημα τιθήνης, -ἡνίοχον πολλοὺς δεξάμενον στεφάνους, -αὐτὸς ἄναξ καὶ δῆμος ἅπας καὶ πότνια βουλὴ -ἔστησαν, κοινὴν ψῆφον ἐνεγκάμενοι. -γήραϊ γὰρ σταδίων ἀπεπαύσατο· πᾶσι δὲ φίλτρον -κάλλιπεν, οἷσιν ἔρως ἤνθεεν ἀντιπάλων. -
-
- - -anonymi epigrammatici - - - -Πορφύριος Λίβυς οὗτος· ἀεθλοφόρων δʼ ἐπὶ δίφρων -μοῦνος παντοδαποὺς ἀμφέθετο στεφάνους. -νίκη γὰρ βασίλεια μεριζομένη κατὰ δῆμον, -χρώμασι καὶ πέπλοις συμμετάβαλλε τύχας· - -ἥρμοσε δʼ αὐτὸν ἔχειν Βενέτοις πλέον, ἔνθεν ἀνέστη -χρύσεος ἀντʼ ἀρετῆς, χάλκεος ἀντὶ πόνων. -
-
- - -anonymi epigrammatici - - -τοῦτον Πορφύριον Λιβύη τέκε, θρέψε δὲ Ῥώμη, -νίκη δʼ ἐστεφάνωσεν ἀμοιβαδόν, ἄλλοτʼ ἀπʼ ἄλλου -χρώματος ἄκρα φέροντα καρήατι σύμβολα νίκης. -πολλάκι γὰρ δήμους ἠλλάξατο, πολλάκι πώλους· -νῦν μὲν ἐὼν πρῶτος, τοτὲ δʼ ἔσχατος, ἄλλοτε μέσσος, -πάντας ὁμοῦ νίκησε καὶ ἀντιπάλους καὶ ἑταίρους. -
-
- - -anonymi epigrammatici - - - -ἶσον κυδαλίμοις, Φαυστινιάδῃ τε καὶ αὐτῷ -Φαυστίνῳ, βασιλεὺς στῆσε παρʼ ἀμφοτέροις -οὐράνιον, τῷ δῆμος ἀμετρήτους διὰ νίκας -ἠγαθέου Πέλοπος θῆκεν ἐπωνυμίην. -“ ὡς αἰεὶ τὸν ὁμοῖον ἄγει θεὸς ὡς τὸν ὁμοῖον -” τούσδε τις εἰσορόων φθέγξεται ἀτρεκέως. -
-
- - -anonymi epigrammatici - - -σοὶ καὶ ἀεθλεύοντι μόνῳ, λήξαντὶ τʼ ἀέθλων -τοῦτο γέρας Νίκη δὶς πόρεν, Οὐράνιε, -δήμου ἀπʼ ἀμφοτέροιο· σὺ γὰρ πάρος ἐν Βενέτοις μὲν -εἴκοσι κυδίστων στέμμα φέρεις ἐτέων. -παύσαο δʼ ἱπποσύνης· Πρασίνων δέ σε δίζετο δῆμος· -τοῖσδε σὺ μὲν νίκην, οἳ δʼ ἄρα σοὶ τὸ γέρας. - -
-
- - -anonymi epigrammatici - - -ὤφελες ὅπλα φέρειν, οὐ φάρεα ταῦτα κομίζειν, -ὡς ἐλατὴρ τελέθων, καὶ πολέμων πρόμαχος. -εὖτε γὰρ ἦλθεν ἄνακτος ὀλεσσιτύραννος ἀκωκή, -καὶ σὺ συναιχμάζων ἥψαο ναυμαχίης· -καὶ διπλῆς, πολύμητι, σοφῶς ἐδράξαο νίκης, -τῆς μὲν πωλομάχου, τῆς δὲ τυραννοφόνου. -
-
- - -archias - - - -χάλκεος, ἀλλʼ ἄθρησον ὅσον θράσος ἄνυσε κάπρου -ὁ πλάστας, ἔμπνουν θῆρα τυπωσάμενος, -χαίτας αὐχενίους πεφρικότα, θηκτὸν ὀδόντα -βρύχοντα, γλήναις φρικτὸν ἱέντα σέλας, -ἀφρῷ χείλεα πάντα δεδευμένον· οὐκέτι θάμβος, -εἰ λογάδα στρατιὴν ὤλεσεν ἡμιθέων. -
-
- -
-
- - -damagetus - - -οὔτʼ ἀπὸ Μεσσάνας, οὔτʼ Ἀργόθεν εἰμὶ παλαιστάς· -σπάρτα μοι Σπάρτα κυδιάνειρα πατρίς. -κεῖνοι τεχνάεντες· ἐγώ γε μέν, ὡς ἐπέοικε -τοῖς Λακεδαιμονίων παισί, βίᾳ κρατέω. -
-
- - -simonides - - -γνῶθι Θεόγνητον προσιδών, τὸν Ὀλυμπιονίκαν -παῖδα, παλαισμοσύνας δεξιὸν ἡνίοχον, -κάλλιστον μὲν ἰδεῖν, ἀθλεῖν δʼ οὐ χείρονα μορφῆς, -ὃς πατέρων ἀγαθῶν ἐστεφάνωσε πόλιν. -
-
- - -simonides - - -Ἴσθμια καὶ Πυθοῖ Διοφῶν ὁ Φίλωνος ἐνίκα, -ἅλμα, ποδωκείην, δίσκον, ἄκοντα, πάλην. - -
-
- - -anonymi epigrammatici - - -τίνας ἂν εἴποι λόγους Ἕκτωρ τιτρωσκόμενος ὑπὸ Ἑλλήνων -βάλλετε νῦν μετὰ πότμον ἐμὸν δέμας, ὅττι καὶ αὐτοὶ -νεκροῦ σῶμα λέοντος ἐφυβρίζουσι λαγωοί. -
-
- - -alcaeus - - -ἄγαγε καὶ Ξέρξης Πέρσαν στρατὸν Ἑλλάδος ἐς γᾶν, -καὶ Τίτος εὐρείας ἄγαγʼ ἀπʼ Ἰταλίας· -ἀλλʼ ὁ μὲν Εὐρώπᾳ δοῦλον ζυγὸν αὐχένι θήσων -ἦλθεν, ὁ δʼ ἀμπαύσων Ἑλλάδα δουλοσύνας. -
-
- - -anonymi epigrammatici - - -κοίρανος Εὐρώπας, ὁ καὶ εἰν ἁλὶ καὶ κατὰ χέρσον -τόσσον ἄναξ θνατῶν, Ζεὺς ὅσον ἀθανάτων, -Εἰνοδίᾳ τὰ λάφυρʼ Ἑκάτᾳ θρασέος Κιροάδα, -καὶ τέκνων, καὶ ὅλας γᾶς ἔθετʼ Ὀδρυσίδος, -υἱὸς ἐυμμελία Δαματρίου· ἁ δὲ Φιλίππου -δόξα πάλιν θείων ἄγχι βέβακε θρόνων. -
-
- - -Panteleus - - - - -ὤ κενεοῦ καμάτοιο καὶ ἀπρήκτου πολέμοιο· -ἡμετέρῳ βασιλῆι τί λέξομεν ἀθανάτους; -ὦ βασιλεῦ, τί μʼ ἔπεμπες ἐπʼ ἀθανάτους πολεμιστάς; -βάλλομεν, οὐ πίπτουσι· τιτρώσκομεν, οὐ φοβέονται. - -μοῦνος ἀνὴρ σύλησεν ὅλον στρατόν· ἐν δʼ ἄρα μέσσῳ -αἱματόεις ἕστηκεν, ἀτείρεος Ἄρεος εἰκών, -δένδρον δʼ ὡς ἕστηκε σιδηρείαις ὑπὸ ῥίζαις, -κοὐκ ἐθέλεν πεσέειν· τάχα δʼ ἔρχεται, ἔνδοθι νηῶν. -λῦε, κυβερνήτα, νέκυος προφύγωμεν ἀπειλάς. -
-
- - -alcaeus - - -σύμφωνον μαλακοῖσι κερασσάμενος θρόον αὐλοῖς -Δωρόθεος γοεροὺς ἔπνεε Δαρδανίδας, -καὶ Σεμέλας ὠδῖνα κεραύνιον, ἔπνεε δʼ ἵππου -ἔργματʼ, ἀειζώων ἁψάμενος Χαρίτων -μοῦνος δʼ εἰν ἱεροῖσι Διωνύσοιο προφήταις -μώμου λαιψηρὰς ἐξέφυγε πτέρυγας, -Θηβαῖος γενεήν, Σωσικλέος· ἐν δὲ Λυαίου -νηῷ φορβειὰν ˘ θήκατο καὶ καλάμους. -
-
- - -alcaeus - - -οὐκέτʼ ἀνὰ Φρυγίην πιτυοτρόφον, ὥς ποτε, μέλψεις, -κροῦμα διʼ εὐτρήτων φθεγγόμενος δονάκων, -οὐδʼ ἔτι σαῖς παλάμαις Τριτωνίδος ἔργον Ἀθάνας, -ὡς πρίν, ἐπανθήσει, νυμφογενὲς Σάτυρε. -δὴ γὰρ ἀλυκτοπέδαις σφίγγῃ χέρας, οὕνεκα Φοίβῳ, -θνατὸς ἐὼν, θείαν εἰς ἔριν ἠντίασας. - -λωτοὶ δʼ οἱ κλάζοντες ἴσον φόρμιγγι μελιχρὸν -ὤπασαν ἐξ ἀέθλων οὐ στέφος, ἀλλʼ ἀίδαν. -
-
- - -anonymi epigrammatici - - -ὦ γαστὴρ κυνόμυια, διʼ ἣν κόλακες παράσιτοι -ζωμοῦ πωλοῦσιν θεσμὸν ἐλευθερίης. -
-
-

῀.

-
-
- - -hermocreon - - -ἵζευ ὑπὸ σκιερὰν πλάτανον, ξένε, τάνδε παρέρπων, -ἇς ἁπαλῷ Ζέφυρος πνεύματι φύλλα δονεῖ, -ἔνθα με Νικαγόρας κλυτὸν εἵσατο Μαιάδος Ἑρμᾶν, -ἀγροῦ καρποτόκου ῥύτορα καὶ κτεάνων. -
-
- - -anonymi epigrammatici - - -ἔρχευ, καὶ κατʼ ἐμὰν ἵζευ πίτυν, ἃ τὸ μελιχρὸν -πρὸς μαλακοὺς ἠχεῖ κεκλιμένα ζεφύρους. -ἠνίδε καὶ κρούνισμα μελισταγές, ἔνθα μελίσδων -ἡδὺν ἐρημαίοις ὕπνον ἄγω καλάμοις. -
-
- - -plato - - -Ὑψίκομον παρὰ τάνδε καθίζεο φωνήεσσαν -φρίσσουσαν πυκινοῖς κῶνον ὑπὸ ζεφύροις, -καί σοι καχλάζουσιν ἐμοῖς παρὰ νάμασι σύριγξ -θελγομένων ἄξει κῶμα κατὰ βλεφάρων, - -
-
- - -zenodotus - - -τίς γλύψας τὸν Ἔρωτα παρὰ κρήνῃσιν ἔθηκεν, -οἰόμενος παύσειν τοῦτο τὸ πῦρ ὕδατι; -
-
- - -anonymi epigrammatici - - -ὁ πρὶν ἀεὶ Βρομίου μεμεθυσμένος οἰνάδι πηγῇ, -σύντροφος εὐασταῖς, αἰγοπόδης Σάτυρος -διχθάδιον κατὰ κῶλον ἀλυκτοπέδῃσι λυγωθεὶς -ἔντεα παιδὶ θεᾶς χαλκοτορεῖ Θέτιδος, -οὐ σοφὸν ἐκ τέχνας ἀσκῶν πόνον, ἀλλὰ πενιχρὰν -ἐργάτιν ἐκ μόχθων ῥυόμενος βιοτάν. -
-
- - -anonymi epigrammatici - - - - ποῦ σοι κεῖνα κύπελλα, λαφύστιε; ποῦ καλὰ θύρσων -† πήγματα, καὶ κῶμοι, σκιρτοπόδη Σάτυρε; -τίς σε παρὰ σμίλαισι, ποδίκροτον ἅμμα καθάψας, -θήκατο, τὸν Βρομίῳ σπάργανʼ ἑλιξάμενον; - - ἀσχήμων ἔνδεια, καὶ ἁ πάντολμος ἀνάγκα, -ἅ με παρʼ Ἡφαίστῳ θῆκε μαριλοπόταν. - -
-
- - -anonymi epigrammatici - - -πᾶν τὸ περιττὸν ἄκαιρον· ἐπεὶ λόγος ἐστὶ παλαιός, -ὡς καὶ τοῦ μέλιτος τὸ πλέον ἐστὶ χολή. -
-
- - -anonymi epigrammatici - - -ὦ Πάν, φερβομέναις ἱερὰν φάτιν ἄπυε ποίμναις, -κυρτὸν ὑπὲρ χρυσέων χεῖλος ἱεὶς δονάκων, -ὄφρʼ αἱ μὲν λευκοῖο βεβριθότα δῶρα γάλακτος -οὔθασιν ἐς Κλυμένου πυκνὰ φέρωσι δόμον, -σοὶ δὲ καλῶς βωμοῖσι παριστάμενος πόσις αἰγῶν -φοίνιον ἐκ λασίου στήθεος αἷμʼ ἐρύγῃ, -
-
- - -anonymi epigrammatici - - -τέρπε δανειζόμενος τὴν σὴν φρένα· τοῖς δὲ δανεισταῖς -κάλλιπε τὴν ψήφων δακτυλοκαμψοδύνην. -
-
- - -anonymi epigrammatici - - - -εἰρήνη πάντεσσιν, ἐπίσκοπος εἶπεν ἐπελθών. -πῶς δύναται πᾶσιν, ἣν μόνος ἔνδον ἔχει; -
-
- - -Herodicus - - -φεύγετʼ, Ἀριστάρχειοι, ἐπʼ εὐρέα νῶτα θαλάσσης -Ἑλλάδα, τῆς ξουθῆς δειλότεροι κεμάδος, - -γωνιοβόμβυκες μονοσύλλαβοι, οἷσι μέμηλε -τὸ σφὶν καὶ σφῶιν, καὶ τὸ μὶν ἠδὲ τό νίν. -τοῦθʼ ὑμῖν εἴη, δυσπέμφελοι· Ἡροδίκῳ δὲ -Ἑλλὰς ἀεὶ μίμνοι καὶ θεόπαις Βαβυλών. -
-
- - -palladas - - -ῥήτορα Μαῦρον ἰδὼν ἀπεθαύμασα, τὸν βαρύχειλον, -τέχνης ῥητορικῆς δαίμονα λευκοφόρον. -
-
- - -anonymi epigrammatici - - - -ὃς βασιλεῖς ἐδάμασσε, καὶ ἠνορέην κατέπαυσεν -ἀντιπάλων, πατέρων εἵνεκεν εὐνομίης, -οὗτος ὑπὸ σμικρῷ κατάκειται σήματι τῷδε, -ἀρχιερεὺς Χριστοῦ Νικόλεως γεγαώς. -ἀλλʼ ἀρετὴ πολύολβος ἐπέπτατο πείρατα κόσμου, -καὶ ψυχὴ μακάρων ἀμφιπολεῖ θαλάμους. -τοίην γὰρ βιοτὴν ποθέεσκεν ἐὼν ἐπὶ γαίης, -σῶμα καλὸν πιέσας κυδαλίμοις καμάτοις. -
-
- - -anonymi epigrammatici - - -στήλην εὐνομίης καὶ σωφροσύνης ἀνάθημα, -εἰκόνα Νικόλεω στήσατο Γρηγόριος. -
-
- - -simonides - - - - εἶπον, τίς, τίνος ἐσσί, τίνος πατρίδος, τί δὲ νικῇς; - - Κασμύλος, Εὐαγόρου, Πύθια πύξ, Ῥόδιος. - -
-
- - -simonides - - -Μίλωνος τόδʼ ἄγαλμα καλοῦ καλόν, ὃς ποτὶ Πίσῃ -ἑπτάκι νικήσας, ἐς γόνατʼ οὐκ ἔπεσεν. -
-
- - -philippus - - -τὸν ἐκ Σινώπης εἰ κλύεις Δαμόστρατον, -πίτυν λαβόντα τὴν κατʼ Ἰσθμὸν ἑξάκις, -τοῦτον δέδορκας· οὗ κατʼ εὔγυρον πάλην -ψάμμον πεσόντος νῶτον οὐκ ἐσφράγισεν. -ἴδʼ ἐς πρόσωπον θηρόθυμον, ὡς ἔτι -σῴζει παλαιὰν τὰν ὑπὲρ νίκας ἔριν. -λέγει δʼ ὁ χαλκός· “ἁ βάσις με λυσάτω -χὠς ἔμπνοος νῦν ἕβδομον κονίσομαι” -
-
- - -simonides - - -Δίρφυος ἐδμήθημεν ὑπὸ πτυχί· σῆμα δʼ ἐφʼ ἡμῖν -ἐγγύθεν Εὐρίπου δημοσίᾳ κέχυται, -οὐκ ἀδίκως· ἐρατὴν γὰρ ἀπωλέσαμεν νεότητα, -τρηχεῖαν πολέμου δεξάμενοι νεφέλην. -
-
- - -anonymi epigrammatici - - - -τοῦδʼ ἀρετὰ καὶ δόξα καθʼ Ἑλλάδα, πολλὰ μὲν ἀλλαῖς, -πολλὰ δὲ καὶ βουλαῖς ἔργα πονησαμένου -Ἀρκάδος αἰχμητᾶ Φιλοποίμενος, ᾧ μέγα κῦδος -ἕσπετʼ ἐνὶ πολέμῳ, δούρατος ἁγεμόνι· - -μανύει δὲ τρόπαια τετυγμένα δισσὰ τυράννων -Σπάρτας· αὐξαμέναν δʼ ἄρατο δουλοσύναν. -ὧν ἕνεκεν Τεγέα μεγαλόφρονα Κραύγιδος υἱὸν -στᾶσεν, ἀμωμήτου κράντορʼ ἐλευθερίας. -
-
- - -philippus - - - -Ἄφλοιος καὶ ἄφυλλος, ὁδοίπορε, τῷδʼ ἐπὶ νώτῳ -Ἀλκαίῳ σταυρὸς πήγνυται ἡλίβατος. -
-
- - -anonymi epigrammatici - - - -εὖ εἰδώς ὅτι θνητὸς ἔφυς, τὸν θυμὸν ἄεξε, -τερπόμενος θαλίῃσι· θανόντι σοι οὔτις ὄνησις. -καὶ γὰρ ἐγὼ σποδός εἰμι, Νίνου μεγάλης βασιλεύσας -τόσσ’ ἔχω ὅσσ’ ἔφαγον καὶ ἐφύβρισα,, καὶ μετʼ ἔρωτος -τέρπνʼ ἐδάην· τὰ δὲ πολλὰ καὶ ὄλβια κεῖνα λέλειπται, -ἥδε σοφὴ βιότοιο παραίνεσις ἀνθρώποισιν. -
-
- - -anonymi epigrammatici - - -Ἑλλὰς μὲν Θήβας προτέρας προὔκρινεν ἐν αὐλοῖς· -Θῆβαι δὲ Πρόνομον, παῖδα τὸν Οἰνιάδου. - -
-
- - -anonymi epigrammatici - - -εἴ τινα πώποτʼ ἄκουσας Ἐνυαλίου φίλον υἱὸν, -καὶ κρατερὸν δυνάμει καὶ θαρσαλέον πολεμίζειν, -Ἕκτορα τὸν Πριάμοιο νόει μοῦνον γεγενῆσθαι, -ὅν ποτε μαρνάμενον Διομήδης ἔκτανεν ἀνήρ, -αἴας πρὸ Τρώων Δαναοῖσι μάχην προφέροντα· -ὃν καὶ τῇδε θανόντα τάφος ὅδε ἀμφικαλύπτει. -
-
- - -tullius geminus - - -χείρ με Πολυγνώτου ˘ Θασίου κάμεν εἰμὶ δʼ ἐκεῖνος -Σαλμωνεύς, βρονταῖς ὃς Διὸς ἀντεμάνην, -ὅς με καὶ εἰν Ἀίδῃ πορθεῖ πάλι, καί με κεραυνοῖς -βάλλει, μισῶν μου κοὐ λαλέοντα τύπον. -ἴσχε, Ζεῦ, πρηστῆρα, μέθες χόλον εἰμὶ γὰρ ἄπνους . -ὁ σκοπός· ἀψύχοις εἰκόσι μὴ πολέμει. -
-
- - -speusippus - - -σῶμα μὲν ἐν κόλποις κατέχει τόδε γαῖα Πλάτωνος· -ψυχὴ δʼ ἰσόθεον τάξιν ἔχει μακάρων. -
-
- - -leontius minotaurus - - - -καὶ Φαέθων γραφίδεσσιν ἔχει τύπον ἀλλὰ χαράσσει -ἠέλιον τέχνη, κρυπτομένων φαέων, -καὶ σέ, σοφὲ πτολίαρχε, γράφει, Γαβριήλιε, τέχνη -ἐκτὸς σῶν ἀρετῶν, ἐκτὸς ὅλων καμάτων. - -
-
- - -theaetetus - - -τοῦτον Ἰουλιανόν, νομικῆς φάος, εἶπον ἰδοῦσαι - -Ῥώμη καὶ Βερόη· πάντα φύσις δύναται. - -
-
- - -leontius minotaurus - - - -κάλλεϊ μὲν νικᾷς κραδίης τόσον, ὅσσον ὀπωπῆς· -τῆς γὰρ ἐπωνυμίης ἄξια πάντα φέρεις. -αἰεὶ δʼ ἐν θαλάμοισι κατευνάζων βασιλῆα -πᾶσαν ὑποσπείρεις οὔασι μειλιχίην. -
-
- - -theodoretus - - - -ἐκ Φιλαδελφείης ξεινήια ταῦτα Φιλίππῳ. -φράζεο πῶς μνήμων ἡ πόλις εὐνομίης. -
-
- - -anonymi epigrammatici - - -μνήμονες οἱ Κᾶρες πολέων εὐεργεσιάων -Παλμᾶν ἰθυδίκην τόσσον ἀγασσάμενοι. -
-
- - -agathias scholasticus - - - -τὰς μὲν ὑπὲρ μύθων τε καὶ εὐτροχάλοιο μελίσσης -εἰκόνας ἱλήκοις δηρὸν ὀφειλόμενος· -νῦν δʼ ὑπὲρ ἱδρώτων τε καὶ ἀστυόχοιο μερίμνης -τῇδέ σε τῇ γραφίδι στήσαμεν, Ἡρακλάμον. -εἰ δʼ ὀλίγον τὸ γέρας, μὴ μέμφεο· τοῖσδε γὰρ ἡμεῖς -αἰεὶ τοὺς ἀγαθοὺς ἄνδρας ἀμειβόμεθα. - -
-
- - -leontius minotaurus - - -Πέτρον ὁρᾷς χρυσέοισιν ἐν εἵμασιν αἱ δὲ παρʼ αὐτὸν -ἀρχαὶ ἀμοιβαίων μάρτυρές εἰσι πόνων -ἀντολίης πρώτη, καὶ διχθαδίη μετὰ τήνδε -κόχλου πορφυρέης, καὶ πάλιν ἀντολίης. -
-
- - -Joannes barbucallus - - - -ἀνατεθεῖσαν ἐν Βηρυτῷ -οὐχὶ παρʼ Εὐρώτᾳ μόνον ἀνέρες εἰσὶ μαχηταί, -οὐδὲ παρʼ Ἰλισσῷ μνάμονές εἰσι δίκας· -ὡς ἀπὸ τᾶς Σπάρτας, ὡς αὐτᾶς ἀστὸν Ἀθάνας -Συνέσιον Νίκα καὶ Θέμις ἠγάσατο. -
-
- - -arabius - - - -Νεῖλος, Περσίς, Ἴβηρ, Σόλυμοι, Δύσις, Ἀρμενίς, Ἰνδοὶ -καὶ Κόλχοι σκοπέλων ἐγγύθι Καυκασίων, -καὶ πεδία ζείοντα πολυσπερέων Ἀγαρηνῶν -Λογγίνου ταχινῶν μάρτυρές εἰσι πόνων, -ὡς δὲ ταχὺς βασιλῆι διάκτορος ἦεν ὁδεύων, -καὶ ταχὺς εἰρήνην ὤπασε κευθομένην. - -
-
- - -crinagoras - - -γείτονες οὐ Τρισσαὶ μοῦνον Τύχαι ἔπρεπον εἶναι, -Κρίσπε, βαθυπλούτου σῆς ἕνεκεν κραδίης, -ἀλλὰ καὶ αἱ πάντων πᾶσαι· τί γὰρ ἀνδρὶ τοσῷδε -ἀρκέσει εἰς ἑτάρων μυρίον εὐφροσύνην; -νῦν δέ σε καὶ τούτων κρέσσων ἐπὶ μείζονʼ ἀέξοι -Καῖσαρ. τίς κείνου χωρὶς ἄρηρε τύχη; -
-
- - -agathias scholasticus - - - -Θωμᾶν, παμβασιλῆος ἀμεμφέα κηδεμονῆα, -ἄνθεσαν οἱ τὸ νέον τάγμα μετερχόμενοι, -θεσπεσίης ἄγχιστα συνωρίδος, ὄφρα καὶ αὐτῇ -εἰκόνι χῶρον ἔχῃ γείτονα κοιρανίης. -αὐτὸς γὰρ ζαθέοιο θρόνους ὕψωσε μελάθρου, -πλοῦτον ἀεξήσας, ἀλλὰ μετʼ εὐσεβίης. -εὔγνωμον τὸ πόνημα· τί γὰρ γραφὶς οἶδεν ὀπάσσαι, -εἰ μὴ τοῖς ἀγαθοῖς μνῆστιν ὀφειλομένην; -
-
- - -anonymi epigrammatici - - -τὸν μέγαν ἐν βουλαῖς Θεοδόσιον, Ἀσίδος ἀρχόν, -εἰκόνι μαρμαρέῃ στήσαμεν ἀνθύπατον, -οὕνεκα Σμύρναν ἔγειρε καὶ ἤγαγεν ἐς φάος αὖθις, -ἔργοις θαυμασίοις πολλὸν ἀειδομένην. - -
-
- - -anonymi epigrammatici - - -Δαμόχαρι, κλυτόμητι δικασπόλε, σοὶ τόδε κῦδος, -ὅττι γε τὴν Σμύρναν μετὰ λοίγια πήματα σεισμοῦ, -ἐσσυμένως πονέων, αὖθις πάλιν ἐξετέλεσσας. -
-
- - -anonymi epigrammatici - - -πᾶσα φύσις, βασίλεια, τεὸν κράτος αἰὲν ἀείδει, -οὕνεκα δυσμενέων στίχας ὤλεσας, οὕνεκα φέγγος -ἀνδράσι σωφρονέουσι κακὴν μετὰ δῆριν ἀνῆψας, -ἱππολύτης δʼ ἐκέδασσας ὁμόγνια πήματα χάρμης. -
-
- - -anonymi epigrammatici - - -ῥητῆρες Θεόδωρον ἐμέλλομεν εἰς ἓν ἰόντες -χρυσείαις γραφίδεσσιν ἀειμνήστοισι γεραίρειν, -εἰ μὴ χρυσὸν ἔφευγε καὶ ἐν γραφίδεσσιν ἐόντα. -
-
- - -anonymi epigrammatici - - -Νικήταν δορίτολμον ἄναξ, στρατός, ἄστεα, δῆμος -στῆσαν ὑπὲρ μεγάλων Μηδοφόνων καμάτων. - -
-
- - -anonymi epigrammatici - - -τὸν μέγαν ἐν πολέμοισι, τὸν ἄτρομον ἡγεμονῆα, -Νικήταν ἀρετῶν εἵνεκεν οἱ Πράσινοι. -
-
- - -anonymi epigrammatici - - -Πρόκλος ἐγὼ Παύλου, Βυζάντιος, ὃν περὶ δῶμα -τηλεθάοντα Δίκης βασιλήιος ἥρπασεν αὐλή, -ὄφρʼ εἴην στόμα πιστὸν ἐρισθενέος βασιλῆος. -ἀγγέλλει δʼ ὅδε χαλκὸς ὅσον γέρας ἐστὶν ἀέθλων. -καὶ τὰ μὲν εἴκελα πάντα καὶ υἱέι καὶ γενετῆρι· -ἐν δʼ ὑπάτων ῥάβδοισι πάις νίκησε τοκῆα. -
-
- - -apollonides - - -θαύμασε τὸν Κινύρην ὁ πάλαι χρόνος ἢ Φρύγας ἄμφω· -σὸν δέ, Λέων, ἡμεῖς κάλλος ἀεισόμεθα, -Κερκαφίδη περίβωτε· μακαρτάτη ἔστʼ ἄρα νήσων -καὶ Ῥόδος, ἣ τοίῳ λάμπεται ἠελίῳ. -
-
- - -apollonides - - -εἰ τοιόσδε Λέων λάχεν ἀντίος Ἡρακλῆι, -οὐκ ἦν Ἀλκίδεω τοῦτο τὸ δωδέκατον. -
-
- - -macedonius ii - - -τῷ ξοάνῳ τὸν παῖδα Θυώνιχον, οὐχ ἵνα λεύσσῃς -ὡς καλὸς ἐν τῇδε μνάματος ἀγλαΐᾳ, -ἀλλʼ ἵνα σοὶ τὸν ἄεθλον ὃν ἐξεπόνησε μαθόντι, -ὧ ʼγαθέ, τᾶς αὐτᾶς ζᾶλος ἔοι μανίας. -οὗτος ὁ μὴ κλίνας καμάτῳ πόδα, πάντα δʼ ἀγῶνι -ἅλικα νικήσας, ὁπλότερον, πρότερον. - -
-
- - -philippus - - -ἴσως με λεύσσων, ξεῖνε, ταυρογάστορα -καὶ στερρόγυιον, ὡς Ἄτλαντα δεύτερον, -θαμβεῖς, ἀπιστῶν εἰ βρότειος ἡ φύσις. -ἀλλʼ ἴσθι μʼ Ἡρᾶν Λαδικῆα πάμμαχον, -ὃν Σμύρνα καὶ δρῦς Περγάμου κατέστεφεν, -Δελφοί, Κόρινθος, Ἦλις, Ἄργος, Ἄκτιον -λοιπῶν δʼ ἀέθλων ἢν ἐρευνήσῃς κράτος, -καὶ τὴν Λίβυσσαν ἐξαριθμήσεις κόνιν. -
-
- - -anonymi epigrammatici - - -Λᾴδας τὸ στάδιον εἴθʼ ἥλατο, εἴτε διέπτη, -δαιμόνιον τὸ τάχος, οὐδὲ φράσαι δυνατόν. -
-
- - -anonymi epigrammatici - - -οἷος ἔης φεύγων τὸν ὑπήνεμον, ἔμπνοε Λᾴδα, -Θῦμον, ἐπʼ ἀκροτάτῳ † πνεύματι θεὶς ὄνυχα, -τοῖον ἐχάλκευσέν σε Μύρων, ἐπὶ παντὶ χαράξας -σώματι Πισαίου προσδοκίην στεφάνου. -
-
- - -anonymi epigrammatici - - -πλήρης ἐλπίδος ἐστίν, ἄκροις δʼ ἐπὶ χείλεσιν ἄσθμα -ἐμφαίνει κοίλων ἔνδοθεν ἐκ λαγόνων. -πηδήσει τάχα χαλκὸς ἐπὶ στέφος, οὐδὲ καθέξει -ἁ βάσις. ὦ τέχνη πνεύματος ὠκυτέρα. - -
-
- - -troilus - - - - εἰκών, τίς σ’ ἀνέθηκε, τίνος χάριν, ἢ τίνι, λέξον. - - ἀντὶ παλαισμοσύνης θῆκε Λύρωνι πόλις. -
-
- - -anonymi epigrammatici - - -ταύτην Εὐσεβίῳ Βυζαντιὰς εἰκόνα Ῥώμη -πρὸς δισσαῖς ἑτέραις, εἵνεκεν ἱπποσύνης. -οὐ γὰρ ὃ γʼ ἀμφήριστον ἑλὼν ἐστέψατο νίκην, -ἀλλὰ πολὺ κρατέων ποσσὶ καὶ ἠνορέῃ. -τοὔνεκεν ἀντιβίων ἔριν ἔσβεσεν ἀλλὰ καὶ αὐτὴν -δήμου τὴν προτέρην παῦσε διχοστασίην. -
-
- - -paulus silentiarius - - - -ἔκφρονα τὴν βάκχην οὐχ ἡ φύσις, ἀλλʼ ἡ τέχνη -θήκατο, καὶ μανίην ἐγκατέμιξε λίθῳ. -
-
- - -anonymi epigrammatici - - - -ἴσχετε τὴν βάκχην, μή, λαϊνέη περ ἐοῦσα, -οὐδὸν ὑπερθεμένη, νηὸν ὑπεκπροφύγᾐ. -
-
- - -agathias scholasticus - - - -οὔπω ἐπισταμένην τάχα κύμβαλα χερσὶ τινάξαι -Βάκχην αἰδομένην στήσατο λαοτύπος -οὕτω γὰρ προνένευκεν· ἔοικε δʼ τοῦτο βοώσῃ· - -ἔξιτε· καὶ παταγῶ, μηδένος ἱσταμένου. - -
-
- - -simonides - - - - τίς ἀδε; βάκχα. τίς δέ μιν ξέσε; Σκόπας - - τίς δʼ ἐξέμηνε, Βάκχος, ἢ Σκόπας; Σκόπας. -
-
- - -crinagoras - - -Ἀντολίαι, δύσιες, κόσμου μέτρα· καὶ τὰ Νέρωνος -ἔργα διʼ ἀμφοτέρων ἵκετο γῆς περάτων. -ἥλιος Ἀρμενίην ἀνιὼν ὑπὸ χερσὶ δαμεῖσαν -κείνου, Γερμανίην δʼ εἶδε κατερχόμενος. -δισσὸν ἀειδέσθω πολέμου κράτος· οἶδεν Ἀράξης -καὶ Ῥῆνος, δούλοις ἔθνεσι πινόμενοι. -
-
- - -anonymi epigrammatici - - - -ταῦτά σοι, ὦ βασιλεῦ Μηδοκτόνε, δῶρα κομίζει -σῆς Ῥώμης γενέτης καὶ πάϊς Εὐστάθιος, -πῶλον ὑπὲρ νίκης, Νίκην στεφανηφόρον ἄλλην, -καὶ σὲ μετηνεμίῳ πώλῳ ἐφεζόμενον. -ὑψόσ’, Ἰουστινιανέ, τεὸν κράτος· ἐν χθονὶ δʼ αἰεὶ -δεσμὸς ἔχοι Μήδων καὶ Σκυθέων προμάχους. - -
-
- - -anonymi epigrammatici - - - -πῶλον ὁμοῦ καὶ ἄνακτα καὶ ὀλλυμένην Βαβυλῶνα -χαλκὸς ἀπὸ σκύλων ἔπλασεν Ἀσσυρίων. -ἔστι δʼ Ἰουστινιανός, ὃν ἀντολίης ζυγὸν ἕλκων -στῆσεν Ἰουλιανός, μάρτυρα μηδοφόνον. -
-
- - -anonymi epigrammatici - - - -τοῦτο παρʼ αἰγιαλοῖσιν ἐγὼ Θεόδωρος ὕπαρχος -στῆσα φαεινὸν ἄγαλμα Ἰουστίνῳ βασιλῆι, -ὄφρα καὶ ἐν λιμένεσσιν ἑὴν πετάσειε γαλήνην. -
-
- - -anonymi epigrammatici - - - -Ἔκθορες ἀντολίηθε, φαεσφόρος ἥλιος ἄλλος, -Θευδόσιε, θνητοῖσι, πόλου μέσον, ἠπιόθυμε, -ὠκεανὸν παρὰ ποσσὶν ἔχων μετʼ ἀπείρονα γαῖαν, -πάντοθεν αἰγλήεις, κεκορυθμένος, ἀγλαὸν ἵππον -ῥηιδίως, μεγάθυμε, καὶ ἐσσύμενον κατερύκων. -
-
- - -anonymi epigrammatici - - -τὸν κρατερὸν Βύζαντα καὶ ἱμερτὴν Φιδάλειαν -εἰν ἑνὶ κοσμήσας ἄνθετο Καλλιάδης. - -
-
- - -anonymi epigrammatici - - -ἱμερτὴ Φιδάλεια δάμαρ Βύζαντος ἐτύχθην -εἰμὶ δὲ βουπαλέος δῶρον ἀεθλοσύνης. -
-
- - -posidippus - - -Κύπριδος ἅδʼ εἰκών φέρʼ ἰδώμεθα μὴ Βερενίκας· -διστάζω ποτέρᾳ φῇ τις ὁμοιοτέραν. -
-
- - -anonymi epigrammatici - - -Ζήνωνα πτολίαρχος Ἰουλιανὸς βασιλῆα· -Ζήνωνος παράκοιτιν Ἰουλιανὸς Ἀριάδνην. -
-
- - -anonymi epigrammatici - - -οἶκον Ἄναξ Ἑλικῶνος ἀνηβήσαντα νοήσας -κυδαλίμοις καμάτοισιν Ἰουλιανοῦ πολιάρχου, -Πιερικῶν προπάροιθε δόμων παγχρύσεος ἔστη. -
-
- - -anonymi epigrammatici - - -κῦδος Ἰουλιανοῦ παναοίδιμον, ὃς μετὰ κόσμον -Πιερίδων χρυσέην στῆσεν Ἀναστασίην. -
-
- - -anonymi epigrammatici - - -ἄλλον ὑπὲρ νίκας ἐναρηφόρον ἔνδοθι Σούσων -ὁ θρασὺς ἀνστήσει Μῆδος ἄνακτι τύπον· - -ἄλλον ἀκειρεκόμας Ἀβάρων στρατὸς ἔκτοθεν Ἴστρου, -κείρας ἐκ κεφαλῆς βόστρυχον αὐσταλέης· -τὸν δʼ ὑπὲρ εὐνομίας ἐριθηλέος ἐνθάδε τοῦτον -ἐξ ὑπάτου μίτρης στῆσεν ἄνασσα πόλις. -ἔμπεδος ἀλλὰ μένοις, Βυζαντιὰς ἔμμορε Ῥώμα, -θεῖον Ἰουστίνου κάρτος ἀμειψαμένα. -
-
- - -anonymi epigrammatici - - -οὗτος ὁ κοσμήσας Ὑπάτων θρόνον, ὃν τρισέπαρχρν -καὶ πατέρα βασιλῆες ἑὸν καλέσαντο μέγιστοι, -χρύσεος ἕστηκεν Αὐρηλιανός· τὸ δʼ ἔργον -τῆς βουλῆς, ἧς αὐτὸς ἑκὼν κατέπαυσεν ἀνίας. -
-
- - -anonymi epigrammatici - - - -Μῖξον μειλιχίῃ βαιὸν φόβον, ὅττι καὶ αὐτὴ -βομβήεσσα μέλισσα κορύσσεται ὀξέι κέντρῳ. -οὐ γὰρ ἄτερ μάστιγος ἰθύνεται ἵππος ἀγήνωρ· -οὐδὲ συῶν ἀγέλη ἐπιπείθεται ἀνδρὶ νομῆι, -πρὶν καὶ ἐριγδούποιο καλαύροπος ἦχον ἀκούσῃ. -
-
- - -antipater - - -Ζηνὶ καὶ Ἀπόλλωνι καὶ Ἄρεϊ τέκνον ἀνάκτων -εἴκελον, εὐκταίη μητέρος εὐτοκίη, -πάντα τοι ἐκ Μοιρέων βασιλήια, πάντα τέλεια -ἦλθεν ἐποιήθης δʼ ἔργον ἀοιδοπόλων. -Ζεὺς σκῆπτρον βασίλειον, Ἄρης δόρυ, καλλοσύνην δὲ -Φοῖβος ἔχει· παρὰ σοὶ δʼ ἀθρόα πάντα, Κότυ. - -
-
- - -synesius - - -οἱ τρεῖς Τυνδαρίδαι, Κάστωρ, Ἑλένη, Πολυδεύκης. -
-
- - -paulus silentiarius - - -ὄμματα μὲν κούρης μόλις ἡ γραφίς, οὔτε δὲ χαίτην, -οὔτε σέλας χροιῆς ἄκρον ἀπεπλάσατο. -εἴ τις μαρμαρυγὴν δύναται φαεθοντίδα γράψαι, -μαρμαρυγὴν γράψει καὶ Θεοδωριάδα -
-
- - -anonymi epigrammatici - - -βάσκανος ἡ γραφίς ἐσσι, καὶ εἰσορόωσι μεγαίρεις -χρύσεα κεκρυφάλοις βόστρυχα κρυψαμένη. -εἰ δʼ ὑπάτης κεφαλῆς ὑπάτην χάριν εἰκόνι κεύθεις, -οὐδʼ ἐπὶ τῷ λοιπῷ κάλλεϊ πίστιν ἔχεις. -πᾶσα γραφὶς μορφῇσι χαρίζεται· ἀλλὰ σὺ μούνη -τῆς Θεοδωριάδος κλέψας ἀπʼ ἀγλαΐας. -
-
- - -synesius - - - -τῆς χρυσῆς εἰκὼν ἢ Κύπριδος, ἢ Στρατονίκης. -
-
- - -agathias scholasticus - - -Μαχλὰς ἐγὼ γενόμην Βυζαντίδος ἔνδοθι Ῥώμης, -ὠνητὴν φιλίην πᾶσι χαριζομένη· -εἰμὶ δὲ Καλλιρόη πολυδαίδαλος, ἣν ὑπʼ ἔρωτος -οἰστρηθεὶς Θωμᾶς τῇδʼ ἔθετο γραφίδι, -δεικνὺς ὅσσον ἔχει πόθον ἐν φρεσὶν ἶσα γὰρ αὐτῷ -κηρῷ τηκομένῳ κραδίη ἡ κραδίη. - -
-
- - -philippus - - - -ἢ θεὸς ἦλθʼ ἐπὶ γῆν ἐξ οὐρανοῦ, εἰκόνα δείξων, -Φειδία· ἢ σὺ γʼ ἔβης τὸν θεὸν ὀψόμενος. -
-
- - -simonides - - -τὸν ἐν Ῥόδῳ κολοσσὸν ὀκτάκις δέκα -Χάρης ἐποίει πήχεων ὁ Λίνδιος. -
-
- - -anonymi epigrammatici - - - -αἶαν Τιμομάχου πλέον ἢ πατρός, ἥρπασετέχνα -τὴν φύσιν ὁ γράψας εἶδέ σε μαινόμενον, -καὶ συνελυσσήθη χεὶρ ἀνέρι, καὶ τὰ κεραστὰ -δάκρυα τοὺς λύπης πάντας ἔμιξε πόνους. -
-
- - -anonymi epigrammatici - - -οὐκ ἀδαὴς ἔγραψε Κίμων τάδε· παντὶ δʼ ἐπʼ ἔργῳ -μῶμος, ὃν οὐδʼ ἥρως Δαίδαλος ἐξέφυγεν. -
-
- - -anonymi epigrammatici - - -ἁ τέχνα τὸν ἔλεγχον ἀπώλεσεν οὐδὲ δὲ γὰρ αὐτὰ -μανῦσαι δύναται τῷ πόρε τὰν κεφαλάν. - -
-
- - -anonymi epigrammatici - - -Τοὐμπρασιῇ φύλακος μακρὰν ἀποτῆλε φύλαξαι. -τοῖος, ὁκοῖον ὁρᾷς, ὦ παρʼ ἔμʼ ἐρχόμενε -σύκινος, οὐ ῥίνῃ πεπονημένος, οὐδʼ ἀπὸ μίλτου, -ἀλλʼ ἀπὸ ποιμενικῆς αὐτομαθοῦς ξοΐδος -ἀχρείως γέλασόν με, τὰ δʼ Εὐκλείους πεφύλαξο -σίνεσθαι, μὴ καὶ σαρδάνιον γελάσῃς. -
-
- - -Julianus - - -τέχνης πυρσὸν ὄπασσα φερέσβιον ἐκ δʼ ἄρα τέχνης -καὶ πυρὸς ἀλλήκτου πήματος ὄψιν ἔχω. -ἦ μερόπων ἀχάριστον ἀεί γένος, εἴ γε Προμηθεὺς -ἀντʼ εὐεργεσίης ταῦθʼ ὑπὸ χαλκοτύπων. -
-
- - -Julianus - - -χαλκὸν μὲν καλέεσκεν ἀτειρέα βίβλος Ὁμήρου· -ἀλλά μιν ὁ πλάστης δεῖξεν ἐλεγχομένην. -δεῦρʼ ἴδε γὰρ στενάχοντα Προμηθέα, δεῦρʼ ἴδε χαλκοῦ -τειρομένου σπλάγχνων ἐκ μυχάτων ὀδύνας. -Ἥρακλες, νεμέσησον, ἐπεὶ μετὰ σεῖο φαρέτρην -Ἰαπετιονίδης ἄλγος ἄπαυστον ἔχει. - -
-
- - -gaius cornelius gallus - - - -οὗτος ὁ πρὶν μακάρεσσι συνέστιος, οὗτος ὁ νηδὺν -πολλάκι νεκταρέου πλησάμενος πόματος, -νῦν λιβάδος θνητῆς ἱμείρεται· ἡ φθονερὴ δὲ -κρᾶσις ἀεὶ χείλευς ἐστὶ ταπεινοτέρη. - -πῖνε, λέγει τὸ τόρευμα, “ καὶ ὄργια μάνθανε σιγῆς· -οἱ γλώσσῃ προπετεῖς ταῦτα κολαζόμεθα.” -
-
- - -anonymi epigrammatici - - -θλῖβε δρακοντείους περιμήκεας ὄβριμε δειρὰς -Ἥρακλες, δακέτων ἄγχε βαθεῖς φάρυγας. -ἐξέτι νηπιάχοιο χόλον ζηλήμονος Ἥρης -ἄμπαυσον μοχθεῖν γνῶθι καὶ ἐκ βρέφεος. -οὐ γάρ σοι κρητὴρ χαλκήλατος οὐδὲ, λέβητες, -ἀλλʼ ὁδὸς εἰς αὐλὴν Ζηνός, ἔπαθλον ἔφυ. -
-
- - -anonymi epigrammatici - - -δέρκεο μυριόμοχθε τεοὺς Ἥρακλες ἀγῶνας, -οὓς τλὰς ἀθανάτων οἶκον Ὄλυμπον ἔβης· -Γηρυόνην, κλυτὰ μῆλα, μέγαν πόνον Αὐγείαο, -πώλους, Ἱππολύτην, πουλυκάρηνον ὄφιν, - -κάπρον, θωυκτῆρα Χάους κύνα, θῆρα Νεμείης, -οἰωνούς, ταῦρον, Μαιναλίην ἔλαφον. -νῦν δὲ κατʼ ἄκρα πόληος ἀπορθήτοιο βεβηκὼς -Περγαμίης, μεγάλους ῥύεο Τηλεφίδας. -
-
- - -anonymi epigrammatici - - - -πρῶτα μὲν ἐν Νεμέῃ βριαρὸν κατέπεφνε λέοντα, -δεύτερον, ἐν Λέρνῃ πολυαύχενον ὤλεσεν ὕδραν. -τὸ τρίτον αὖτʼ ἐπὶ τοῖς Ἐρυμάνθιον ἔκτανε κάπρον. -χρυσόκερων ἔλαφον μετὰ ταῦτʼ ἤγρευσε, τέταρτον. -πέμπτον δʼ, ὄρνιθας Στυμφαλίδας ἐξεδίωξεν. -ἕκτον, Ἀμαζονίδος κόμισε ζωστῆρα φαεινόν. -ἕβδομον, Αὐγείου πολλὴν κόπρον ἐξεκάθηρεν. -ὄγδοον, ἐκ Κρήτηθε πυρίπνοον ἤλασε ταῦρον. -εἴνατον, ἐκ Θρῄκης Διομήδεος ἤγαγεν ἵππους. -Γηρυόνου, δέκατον, βόας ἤγαγεν ἐξ Ἐρυθείης. -Κέρβερον, ἑνδέκατον, κύνʼ ἀνήγαγεν ἐξ Ἀίδαο. -δωδέκατον, ἐκόμισσεν ἐς Ἑλλάδα χρύσεα μῆλα. -τὸ τρισκαιδέκατον, τοῖον λυγρὸν ἔσχεν ἄεθλον -μουνονυχὶ πεντήκοντα ξυνελέξατο κούραις. -
-
- - -philippus - - - -ὤλεσα τὸν Νεμέας θῆρʼ ἄπλετον, ὤλεσα δʼ ὕδρην -καὶ ταῦρον, κάπρου δʼ ἀμφετίναξα γένυν -ζωστῆρʼ ἑλκύσσας, πώλους Διομήδεος εἷλον -χρύσεα μᾶλα κλάσας, Γηρυόνην ἔλαβον -Αὐγείας μʼ ἐδάη· κεμὰς οὐ φύγεν ἔκτανον ὄρνις· -Κέρβερον ἠγαγόμην αὐτὸς Ὄλυμπον ἔχω. - -
-
- - -archias - - -μηκέτι ταυροβόροιο βαρὺ βρύχημα λέοντος -πτήσσετε, ληινόμοι γειαρόται Νεμέης· -ἦ γὰρ ὑφʼ Ἡρακλῆος ἀριστάθλοιο δέδουπεν, -αὐχένα θηροφόνοις ἀγχόμενος παλάμαις. -ποίμνας ἐξελάσασθε· πάλιν μυκηθμὸν ἀκούοι -ἠχώ, ἐρημαίης ἐνναέτειρα νάπης. -καὶ σύ, λεοντόχλαινε, πάλιν θωρήσσεο ῥινῷ -Ἥρης πρηΰνων μισονόθοιο χόλον. -
-
- - -damagetus - - -ἐκ Νεμέης ὁ λέων, ἀτὰρ ὁ ξένος Ἀργόθεν αἷμα, -πολλὸν ὁ μὲν θηρῶν λῷστος, ὁ δʼ ἡμιθέων. -ἔρχονται δʼ ἐς ἀγῶνα καταντίον ὄμμα βαλόντες -λοξὸν ὑπὲρ ζωᾶς ἀμφότεροι σφετέρας. -Ζεῦ πάτερ, ἀλλʼ εἴη τὸν ἀπʼ Ἄργεος ἀνέρα νικᾶν, -ἐμβατὸς ὡς αὖ τοι καὶ Νεμέα τελέθοι. -
-
- - -anonymi epigrammatici - - -τί πρῶτον, τί δʼ ἔπειτα φρεσίν, τί δὲ λοίσθιον ὄσσοις -θαυμάσομαι τέχνης ἀνέρος ἠδʼ ἐλάφου; -ὧν ὁ μὲν ἰξύι θηρὸς ἐπεμβεβαὼς γόνυ βρίθει, -εὐπτόρθων παλάμαις δραξάμενος κεράων· - -ἡ δʼ ὑπὸ χάσματι πολλὰ καὶ ἄσθματι φυσιόωσα -γλώσσῃ σημαίνει θλιβομένην κραδίην. -Ἥρακλες, γήθησον, ὅλη κεμὰς ἄρτι τέθηλεν -οὐ κέρασιν μούνοις, ἀλλὰ τέχνῃ χρυσέη. -
-
- - -anonymi epigrammatici - - -χαλκὸν ἀποιμώζοντα τίς ἔπλασε; τίς δʼ ὑπὸ τέχνας -καὶ πόνον ἐν μορφᾷ καὶ θράσος εἰργάσατο; -ἔμψυχον τὸ πλάσμα· καὶ οἰκτείρω μογέοντα, -καὶ φρίττω κρατερὸν τὸν θρασὺν Ἡρακλέην· -Ἀνταῖον γὰρ ἔχει πεπονημένον ἐκ παλαμάων -ἰδνωθεὶς δὲ δοκεῖ καὶ στοναχὰν ἱέναι. -
-
- - -anonymi epigrammatici - - - -οὗτος ὁ νῦν ὕπνῳ βεβαρημένος ἠδὲ κυπέλλῳ, -Κενταύρους νήφων οἰνοβαρεῖς ὄλεσεν. - -
-
- - -anonymi epigrammatici - - - -οὗτος ὁ πανδαμάτωρ, ὁ παρʼ ἀνδράσι δωδεκάεθλος -μελπόμενος κρατερῆς εἵνεκεν ἠνορέης, -οἰνοβαρὴς μετὰ δαῖτα μεθυσφαλὲς ἴχνος ἑλίσσει, -νικηθεὶς ἁπαλῷ λυσιμελεῖ Βρομίῳ. -
-
- - -anonymi epigrammatici - - - -χαίτην καὶ ῥόπαλον καὶ ἐν ὀφθαλμοῖσιν ἀταρβῆ -θυμὸν ὁρῶν, βλοσυρόν τʼ ἀνδρὸς ἐπισκύνιον, -ζήτει δέρμα λέοντος ἐπʼ εἰκόνι· κἢν μὲν ἐφεύρῃς, -Ἡρακλέης, εἰ δʼ οὔ, Λυσιμάχοιο πίναξ. -
-
- - -anonymi epigrammatici - - - -οἵῳ Θειοδάμας πρὶν ὑπήντεεν Ἡρακλῆι, -τοῖον ὁ τεχνίτης τὸν Διὸς εἰργάσατο, -βοῦν ἀρότην ἕλκοντα, καὶ ἀντανύοντα κορύνην· -ἀλλʼ οὐ τὴν ὀλοὴν γράψε βοοσφαγίην. -ναὶ τάχα Θειοδάμαντι γοήμονα χείλεσι φωνὴν -ἥρμοσεν, ἧς ἀίων φείδεται Ἡρακλέης. - -
-
- - -anonymi epigrammatici - - - -οἷον καὶ Κρονίδης ἔσπειρέ σε τῇ τρισελήνῳ -νυκτί, καὶ Εὐρυσθεὺς εἶδεν ἀεθλοφόρον, -κἠκ πυρὸς εἰς Οὔλυμπον ἐκώμασας, ὦ βαρύμοχθε -Ἀλκείδη, τοίην εἰκόνα σου βλέπομεν. -Ἀλκμήνης δʼ ὠδῖνας ἔχει λίθος· αἱ δὲ μεγαυχεῖς -Θῆβαι νῦν μύθων εἰσὶν ἀπιστότεραι. -
-
- - -tullius geminus - - - -Ἥρακλες, ποῦ σοι πτόρθος μέγας, ἥ τε Νέμειος -χλαῖνα, καὶ ἡ τόξων ἔμπλεος ἰοδόκη; -ποῦ σοβαρὸν βρίμημα; τί σ’ ἔπλασεν ὧδε κατηφῆ -Λύσιππος, χαλκῷ τʼ ἐγκατέμιξʼ ὀδύνην; -ἄχθῃ γυμνωθεὶς ὅπλων σέο· τίς δὲ σ’ ἔπερσεν; - -ὁ πτερόεις, ὄντως εἷς βαρὺς ἆθλος, Ἔρως. - -
-
- - -philippus - - - -Ἥρη τοῦτʼ ἄρα λοιπὸν ἐβούλετο πᾶσιν ἐπʼ ἄθλοις, -ὅπλων γυμνὸν ἰδεῖν τὸν θρασὺν Ἡρακλέα. -ποῦ χλαίνωμα λέοντος, ὃ τʼ εὐροίζητος ἐπʼ ὤμοις -ἰός, καὶ βαρύπους ὄζος ὁ θηρολέτης; -πάντα σ’ Ἔρως ἀπέδυσε· καὶ οὐ ξένον, εἰ Δία κύκνον -ποιήσας, ὅπλων νοσφίσαθʼ Ἡρακλέα. - -
-
- - -anonymi epigrammatici - - - -θαῦμα τέχνης ταύρου τε καὶ ἀνέρος, ὧν ὁ μὲν ἀλκᾷ -θῆρα βίῃ βρίθει, γυῖα τιταινόμενος -ἶνας δʼ αὐχενίους γνάμπτων, παλάμῃσιν ἔμαρψεν, -λαιῇ μυκτῆρας, δεξιτερῇ δὲ κέρας, -ἀστραγάλους δʼ ἐλέλιξε· καὶ αὐχένα θήρ ὑπὸ χερσὶν -δαμνάμενος κρατεραῖς ὤκλασεν εἰς ὀπίσω. -ἔστι δʼ ὀΐσσασθαι τέχνης ὕπο τῷδʼ ἐνὶ χαλκῷ -θῆρα μὲν ἐμπνείειν, ἄνδρα δʼ ἱδρῶτι ῥέειν. -
-
- - -anonymi epigrammatici - - - -εἰ τοῖος Θήβης Καπανεὺς -ἐπεμήνατο πύργοις, -ἄμβασιν ἠερίην κλίμακι μησάμενος, -εἷλεν ἂν ἄστυ βίῃ καὶ ὑπὲρ -μόρον. αἴδετο γάρ ῥα -καὶ σκηπτὸς Κρονίδου -τοῖον ἑλεῖν πρόμαχον. -
-
- - -Julianus - - - -Ἴκαρε, κηρὸς μέν σε διώλεσε· νῦν δὲ -σε κηρῷ -ἤγαγεν εἰς μορφὴν αὖθις ὁ χαλκοτύπος. -ἀλλά γε μὴ πτερὰ πάλλε κατʼ ἠέρα, -μὴ τὸ λοετρὸν, -ἠερόθεν πίπτων, Ἰκάριον τελέσῃς. - -
-
- - -Julianus - - - -Ἴκαρε, χαλκὸς ἐὼν μιμνῄσκεο· μηδέ σε τέχνη, -μηδʼ ἀπάφῃ πτερύγων ζεῦγος ἐπωμάδιον. -εἰ γὰρ ζωὸς ἐὼν πέσες ἐν πελάγεσσι θαλάσσης, -πῶς ἐθέλεις πτῆναι χάλκεον εἶδος ἔχων; -
-
- - -agathias scholasticus - - - -τῆς Φαίδρας -Ἱππόλυτος τῆς γρηὸς ἐπʼ οὔατι -νηλέα μῦθον -φθέγγεται· ἀλλʼ ἡμεῖς οὐ -δυνάμεσθα κλύειν. -ὅσσον δʼ ἐκ βλεφάροιο μεμηνότος -ἔστι νοῆσαι, -ὅττι παρεγγυάᾳ μηκέτʼ ἄθεσμα λέγειν. -
-
- - -flavius philostratus - - - -οὗτος ὁ Τευθρανίας πρόμος ἄσχετος, οὗτος ὁ τὸ πρὶν -Τήλεφος αἱμάξας φρικτὸν Ἄρη Δαναῶν, -Μυσὸν ὅτε πλήθοντα φόνῳ ἐκέρασσε Κάυκον, -οὗτος ὁ Πηλιακοῦ δούρατος ἀντίπαλος, -νῦν ὀλοὸν μηρῷ κεύθων βάρος, οἷα λιπόπνους -τήκεται, ἐμψύχῳ σαρκὶ συνελκόμενος. -οὗ καὶ τειρομένοιο περιπτώσσοντες Ἀχαιοὶ -φύρδην Τευθρανίας νεῦνται ἀπʼ ἠιόνος. - -
-
- - -glaucus - - - -καὶ τὸν ἀπὸ Τρηχῖνος ἰδὼν πολυώδυνον ἥρω, -τόνδε Φιλοκτήτην ἔγραφε Παρράσιος· -ἔν τε γὰρ ὀφθαλμοῖς ἐσκληκόσι κωφὸν ὑποικεῖ -δάκρυ, καὶ ὁ τρύχων ἐντὸς ἔνεστι πόνος. -ζῳογράφων ὦ λῷστε, σὺ μὲν σοφός, ἀλλʼ ἀναπαῦσαι -ἄνδρα πόνων ἤδη τὸν πολύμοχθον ἔδει. -
-
- - -anonymi epigrammatici - - - -ἐχθρὸς ὑπὲρ Δαναοὺς πλάστης ἐμός, ἄλλος Ὀδυσσεύς, -ὃς μʼ ἔμνησε κακῆς οὐλομένης τε νόσου. -οὐκ ἤρκει πέτρη, τρῦχος, λύθρον, ἕλκος, ἀνίη· -ἀλλὰ καὶ ἐν χαλκῷ τὸν πόνον εἰργάσατο. -
-
- - -Julianus - - - -οἶδα Φιλοκτήτην ὁρόων, ὅτι πᾶσι φαείνει -ἄλγος ἑόν, καὶ τοῖς τηλόθι δερκομένοις. -ἄγρια μὲν κομόωσαν ἔχει τρίχα· δεῦρʼ ἴδε κόρσης -χαίτην τρηχαλέοις χρώμασιν αὐσταλέην· -δέρμα κατεσκληκὸς δὲ φέρει καὶ ῥικνὸν ἰδέσθαι, -καὶ τάχα καρφαλέον χερσὶν ἐφαπτομέναις· -δάκρυα δὲ ξηροῖσιν ὑπὸ βλεφάροισι παγέντα -ἵσταται, ἀγρύπνου σῆμα δυηπαθίης. - -
-
- - -cosmas indicopleustes - - - -Πύρρος ἐγώ· σπεύδω δὲ πατρὸς χάριν ἡ δὲ κυνῶπις -Παλλάδα κικλήσκει, γνωτὸν ἔχουσα Πάριν. -
-
- - -flavius claudius Julianus imperator - - - -Ἀνδρόθεν ἐκκέχυθʼ ἵππος· ἀνέδραμε δʼ ἱππόθεν ἀνήρ, -ἀνὴρ νόσφι ποδῶν, κεφαλῆς δʼ ἄτερ αἰόλος ἵππος· -ἵππος ἐρεύγεται ἄνδρα, ἀνὴρ δʼ ἀποπέρδεται ἵππον. -
-
- - -euodus - - - -ἵππος ἔην ἀκάρηνος, ἀνὴρ δʼ ἀτέλεστος ἔκειτο, -ὅν γε Φύσις παίζουσα θοῷ ἐνεκέντρισεν ἵππῳ. -
-
- - -cornelius long(in)us - - - -οὔ σε, μάκαρ Κυνέγειρε, τοὶ ὡς Κυνέγειρον ἔγραψε -Φᾶσις, ἐπεὶ βριαραῖς ἄνθετο σὺν παλάμαις· -ἀλλὰ σοφός τις ἔην ὁ ζωγράφος, οὐδέ σε χειρῶν -νόσφισε, τὸν χειρῶν οὕνεκεν ἀθάνατον. - -
-
- - -paulus silentiarius - - - -Μηδοφόνους μὲν χεῖρας ὑπὲρ γαμψοῖο κορύμβου -ναὸς ἀπορνυμένης ἐξέταμον κοπίδες, -ἁνίκα που, Κυνέγειρε, φυγάς ποτε φορτὶς ἐκείνα -ὥσπερ ἀπʼ εὐναίας εἴχετο σᾶς παλάμας. -ἀλλὰ καὶ ὣς ἀπρὶξ δόρυ νήιον ἀμφιδακοῦσαι, -ἄπνοον ὡμάρτευν τάρβος Ἀχαιμενίοις· -καὶ τὰς μέν τις ἀνὴρ ἕλε βάρβαρος· ἁ δέ γε χειρῶν -νίκα Μοψοπίοις μίμνε παρʼ ἐνναέταις. -
-
- - -posidippus - - - -Λύσιππε, πλάστα Σικυώνιε, θαρσαλέη χείρ, -δάιε τεχνίτα, πῦρ τοι ὁ χαλκὸς ὁρῇ, -ὃν κατʼ Ἀλεξάνδρου μορφᾶς χέες. οὐκέτι μεμπτοὶ -Πέρσαι· συγγνώμη βουσὶ λέοντα φυγεῖν. -
-
- - -archelaus - - - -τόλμαν Ἀλεξάνδρου καὶ ὅλαν ἀπεμάξατο μορφὰν -Λύσιππος· τίνʼ ὁδὶ χαλκὸς ἔχει δύναμιν; -αὐδασοῦντι δʼ ἔοικεν ὁ χάλκεος ἐς Δία λεύσσων· - -γᾶν ὑπʼ ἐμοὶ τίθεμαι· Ζεῦ, σὺ δʼ Ὄλυμπον ἔχε. - - -
-
- - -anonymi epigrammatici - - - -αὐτὸν Ἀλέξανδρον τεκμαίρεο· ὧδε τὰ κείνου -ὄμματα, καὶ ζωὸν θάρσος ὁ χαλκὸς ἔχει· -ὃς μόνος, ἣν ἐφορῶσιν ἀπʼ αἰθέρος αἱ Διὸς αὐγαί, -πᾶσαν Πελλαίῳ γῆν ὑπέταξε θρόνῳ. -
-
- - -anonymi epigrammatici - - - -τοῦτον Ἀλέξανδρον, μεγαλήτορος υἷα Φιλίππου, -δέρκεαι ἀρτιλόχευτον, Ὀλυμπιὰς ὅν ποτε μήτηρ -καρτερόθυμον ἔτικτεν· ἀπʼ ὠδίνων δέ μιν Ἄρης -ἔργα μόθων ἐδίδασκε, Τύχη δʼ ἐκέλευσεν ἀνάσσειν. -
-
- - -anonymi epigrammatici - - -οὐ τὸν βουθοίναν Ἡρακλέα, παῖδες ἀγρῶται, -οὐκέτι κερδαλέοις ἐμβατὰ ταῦτα λύκοις, -φῶρές τε στείχειν κλοπίην ὁδὸν ἀρνήσονται, -εἰ καὶ κωμήτας ἄκριτος ὕπνος ἔχοι. -ἦ γάρ μʼ ἵδρυται Διονύσιος οὐκ ἄτερ εὐχῆς -χώρῳ τῷδʼ ἀγαθὸν σύμμαχον Ἡρακλέα. -
-
- - -anonymi epigrammatici - - -μὴ τρέσσῃς, ὅτι τόξον, ὁδοιπόρε, καὶ νεοθηγεῖς -ἰοὺς γυμνώσας, πρόσθε ποδῶν ἐθέμην, - -μηδʼ ὅτι βαστάζω ῥόπαλον χερί, μηδʼ ὅτι δέρμα -ἀμφʼ ὤμοις χαροποῦ τοῦτο λέοντος ἔχω· -πημαίνειν οὐ πάντας ἐπίσταμαι, ἀλλὰ κακούργους· -καὶ σῴζειν ἀγαθοὺς ἐξ ἀχέων δύναμαι. -
-
- - -anonymi epigrammatici - - -αἰεὶ Λαρτιάδῃ πόντος βαρύς· εἰκόνα χεῦμα -ἔκλυσε, κἀκ δέλτων τὸν τύπον ἠφάνισεν. -τί πλέον; εἰν ἐπέεσσιν Ὁμηρείοις γὰρ ἐκείνου -εἰκὼν ἀφθάρτοις ἐγγράφεται σελίσιν. -
-
- - -anonymi epigrammatici - - - -ὁ παῖς ὁ ταῦρος, ὁ κατὰ μηδὲν ἐντελής, -ὁ τῆς τεκούσης τοῦ πάθους κατήγορος, -ὁ μιξόθηρ ἄνθρωπος, ἡ διπλῆ φύσις, -ὁ ταυρόκρανος, ἡ πλάνη τῶν σωμάτων, -ὃς οὔτε βοῦς πέφυκεν, οὔτʼ ἀνὴρ ὅλως. -
-
- - -anonymi epigrammatici - - -τίς τὸν Θρήικα τόνδε μονοκρήπιδα Λυκοῦργον -χάλκεον, Ἠδωνῶν ταγόν, ἀνεπλάσατο; -Βακχιακὸν παρὰ πρέμνον ἴδʼ ὡς ἀγέρωχα μεμηνὼς -βριθὺν ὑπὲρ κεφαλᾶς ἀντέτακεν χάλυβα. -μανύει μορφὰ τὸ πάλαι θράσος· ἁ δʼ ἀγέρωχος -λύσσα καὶ,ἐν χαλκῷ κεῖνο τὸ πικρὸν ἔχει. - -
-
- - -anonymi epigrammatici - - - -μαίνεται Ἰφιγένεια· πάλιν δέ μιν εἶδος Ὀρέστου -ἐς γλυκερὴν ἀνάγει μνῆστιν ὁμαιμοσύνης· -τῆς δὲ χολωομένης καὶ ἀδελφεὸν εἰσοροώσης -οἴκτῳ καὶ μανίῃ βλέμμα συνεξάγεται. -
-
- - -anonymi epigrammatici - - - -ἐκ ζωῆς με θεοὶ τεῦξαν λίθον ἐκ -δὲ λίθοιο -ζωὴν Πραξιτέλης ἔμπαλιν εἰργάσατο. -
-
- - -Julianus - - - -δυστήνου Νιόβης ὁράᾳς παναληθέα μορφήν, -ὡς ἔτι μυρομένης πότμον ἑὼν τεκέων. -εἰ δʼ ἄρα καὶ ψυχὴν οὐκ ἔλλαχε, μὴ τόδε τέχνῃ -μέμφεο· θηλυτέρην εἴκασε λαϊνέην. -
-
- - -antipater - - - -Τανταλὶς ἅδε ποχʼ ἁ δίσσ’ ἑπτάκι τέκνα τεκοῦσα -γαστρὶ μιῇ, Φοίβῳ θῦμα καὶ Ἀρτέμιδι· - -κούρα γὰρ προὔπεμψε κόραις φόνον, ἄρρεσι δʼ ἄρσην -δισσοὶ γὰρ δισσὰς ἔκτανον ἑβδομάδας. -ἁ δὲ τόσας ἀγέλας μάτηρ πάρος, ἁ πάρος εὔπαις, -οὐδʼ ἐφʼ ἑνὶ τλάμων λείπετο γηροκόμῳ· -μάτηρ δʼ οὐχ ὑπὸ παισίν, ὅπερ θέμις, ἀλλʼ ὑπὸ ματρὸς -παῖδες ἐς ἀλγεινοὺς πάντες ἄγοντο τάφους. -Τάνταλε, καὶ δὲ σὲ γλῶσσα διώλεσε, καὶ σέο κούραν -χἀ μὲν ἐπετρώθη, σοὶ δʼ ἔπι δεῖμα λίθος. -
-
- - -theodoridas - - - -στᾶθι πέλας, δάκρυσον ἰδών, ξένε, μυρία πένθη -τᾶς ἀθυρογλώσσου Τανταλίδος Νιόβας, -ἇς ἐπὶ γᾶς ἔστρωσε δυωδεκάπαιδα λοχείην -ἄρτι, τὰ μέν, Φοίβου τόξα, τὰ δʼ, Ἀρτέμιδος. -ἁ δὲ λίθῳ καὶ σαρκὶ μεμιγμένον εἶδος ἔχουσα, -πετροῦται· στενάχει δʼ ὑψιπαγὴς Σίπυλος, -γλώσσᾳ θνατοῖσιν δολία νόσος, ἇς ἀχάλινος -ἀφροσύνα τίκτει πολλάκι δυστυχίαν. -
-
- - -antipater - - - -τίπτε, γύναι, πρὸς Ὄλυμπον ἀναιδέα χεῖρʼ ἀνένεικας, -ἔνθεον ἐξ ἀθέου κρατὸς ἀφεῖσα κόμαν; - -Λατοῦς παπταίνουσα πολὺν χόλον, ὦ πολύτεκνε, -νῦν στένε τὰν πικρὰν καὶ φιλάβουλον ἔριν. -ἁ μὲν γὰρ παίδων σπαίρει πέλας· ἁ δὲ λιπόπνους -κέκλιται· ᾇ δὲ βαρὺς πότμος ἐπικρέμαται. -καὶ μόχθων οὔπω τόδε σοι τέλος, ἀλλὰ καὶ ἄρσην -ἔστρωται τέκνων ἑσμὸς ἀποφθιμένων. -ὦ βαρὺ δακρύσασα γενέθλιον, ἄπνοος αὐτὰ -πέτρος ἔσῃ, Νιόβα, κάδεϊ τειρομένα. -
-
- - -meleager - - - -Τανταλὶ παῖ, Νιόβα, κλύʼ ἐμὰν φάτιν, ἄγγελον ἄτας· -δέξαι σῶν ἀχέων οἰκτροτάταν λαλιάν. -λῦε κόμας ἀνάδεσμον, ἰώ, βαρυπενθέσι Φοίβου -γειναμένα τόξοις ἀρσενόπαιδα γόνον -οὔ σοι παῖδες ἔτʼ εἰσίν. ἀτὰρ τί τόδʼ ἄλλο; τί λεύσσω; -αἶ, αἶ, πλημμυρεῖ παρθενικαῖσι φόνος. -ἁ μὲν γὰρ ματρὸς περὶ γούνασιν, ἁ δʼ ἐνὶ κόλποις -κέκλιται, ἁ δʼ ἐπὶ γᾶς, ἁ δʼ ἐπιμαστίδιος· -ἄλλα δʼ ἀντωπὸν θαμβεῖ βέλος· ἁ δʼ ἐπʼ ὀιστοῖς -πτώσσει· τᾶς δʼ ἔμπνουν ὄμμʼ ἔτι φῶς ὁράᾳ. -ἁ δὲ λάλον στέρξασα πάλαι στόμα, νῦν ὑπὸ θάμβευς -μάτηρ σαρκοπαγὴς οἷα πέπηγε λίθος. - -
-
- - -anonymi epigrammatici - - - -τέχνη Τιμομάχου στοργὴν -καὶ ζῆλον ἔμιξε -Μηδείης, τέκνων εἰς μόρον ἑλκομένων. -τῇ μὲν γὰρ συνένευσεν ἐπὶ -ξίφος, ᾗ δʼ ἀνανεύει, -σῴζειν καὶ κτείνειν -βουλομένη τέκεα. -
-
- - -antiphilus - - - -τὰν ὀλοὰν Μήδειαν ὅτʼ ἔγραφε Τιμομάχου χείρ, -ζάλῳ καὶ τέκνοις ἀντιμεθελκομέναν, -μυρίον ἄρατο μόχθον, ἵνʼ ἤθεα δισσὰ χαράξῃ, -ὧν τὸ μὲν εἰς ὀργὰν νεῦε, τὸ δʼ εἰς ἔλεον. -ἄμφω δʼ ἐπλήρωσεν· ὅρα τύπον ἐν γάρ ἀπειλᾷ -δάκρυον, ἐν δʼ ἐλέῳ θυμὸς ἀναστρέφεται. -ἀρκεῖ δʼ ἁ μέλλησις, ἔφα σοφός· αἷμα δὲ τέκνων -ἔπρεπε Μηδείῃ, κοὐ χερὶ Τιμομάχου. -
-
- - -philippus - - - -τίς σοῦ, Κολχὶς ἄθεσμε, συνέγραφεν εἰκόνι θυμόν; -τίς καὶ ἐν εἰδώλῳ βάρβαρον εἰργάσατο; -ἆρʼ αἰεὶ διψᾷς βρεφέων φόνον; ἦ τις Ἰήσων -δεύτερος, ἢ Γλαύκη τις πάλι σοι πρόφασις; - -ἔρρε, καὶ ἐν κηρῷ παιδοκτόνε. σῶν γὰρ ἀμέτρων -ζήλων † εἰς ἃ θέλεις καὶ γραφὶς αἰσθάνεται. -
-
- - -anonymi epigrammatici - - - -δεῦρʼ ἴδε παιδολέτειραν ἐν εἰκόνι, δεῦρʼ ἴδʼ ἄγαλμα, -Κολχίδα, Τιμομάχου χειρὶ τυπωσαμένου· -φάσγανον ἐν παλάμᾳ, θυμὸς μέγας, ἄγριον ὄμμα, -παισὶν ἐπʼ οἰκτίστοις δάκρυ κατερχόμενον· -πάντα δʼ ὁμοῦ συνέχευεν, ἀμικτότατʼ εἰς ἓν ἀγείρας, -αἵματι μὴ χρῶσαι φεισάμενος παλάμαν. -
-
- - -Julianus - - - -Τιμόμαχος Μήδειαν ὅτʼ ἔγραφεν, εἰκόνι μορφᾶς -ἀψύχου ˘ ψυχὰς θήκατο διχθαδίας· -ζᾶλον γὰρ λεχέων, τεκέων θʼ ἅμα φίλτρα συνάψας, -δεῖξεν ἐν ὀφθαλμοῖς ἀντιμεθελκομέναν. -
-
- - -anonymi epigrammatici - - - -δεῦρʼ ἴδε, καὶ θάμβησον ὑπʼ ὀφρύσι κείμενον οἶκτον -καὶ θυμόν, βλεφάρων καὶ πυρόεσσαν ἴτυν, - -καὶ μητρὸς παλάμην ἀλόχοιό τε πικρὰ παθούσης -ὁρμῇ φειδομένῃ πρὸς φόνον ἑλκομένην. -ζωγράφος εὖ δʼ ἔκρυψε φόνου τέλος, οὐκ ἐθελήσας -θάμβος ἀπαμβλῦναι πένθεϊ δερκομένων. -
-
- - -philippus - - - -Κολχίδα, τὴν ἐπὶ παισὶν ἀλάστορα, τραυλὲ χελιδών, -πῶς ἔτλης τεκέων μαῖαν ἔχειν ἰδίων; -ἧς ἔτι κανθὸς ὕφαιμος ἀπαστράπτει φόνιον πῦρ, -καὶ πολιὸς γενύων ἀφρὸς ἄπο σταλάει· -ἀρτιβρεχὴς δὲ σίδηρος ἐφʼ αἵματι. φεῦγε πανώλη -μητέρα, κἀν κηρῷ τεκνοφονοῦσαν ἔτι. -
-
- - -anonymi epigrammatici - - - -μαίνῃ καὶ λίθος οὖσα, καὶ ἐκ κραδίης σέο θυμὸς -ὄμματα κοιλήνας ἐς χόλον ηὐτρέπισεν. -ἔμπης οὐδὲ βάσις σε καθέξεται, ἀλλʼ ἄρα θυμῷ -πηδήσεις, τεκέων εἵνεκα μαινομένη. -ὤ, τίς ὁ τεχνίτης τόδε γʼ ἔπλασεν, ἢ τίς ὁ γλύπτης, -ὃς λίθον εἰς μανίην ἤγαγεν εὐτεχνίῃ - -
-
- - -antipater - - - -Μηδείης τύπος οὗτος· ἴδʼ ὡς τὸ μὲν εἰς χόλον αἴρει -ὄμμα, τὸ δʼ εἰς παίδων ἔκλασε συμπαθίην. -
-
- - -arabius - - - -ἕδνα γάμων ἔρριπτες, ἢ ἀμβολίην ταχυτῆτος, -τοῦτο γέρας κούρῃ χρύσεον, Ἱππόμενες; -ἄμφω μῆλον ἄνυσσεν, ἐπεὶ καὶ παρθένον ὁρμῆς -εἶργεν, καὶ ζυγίης σύμβολον ἦν Παφίης. -
-
- - -anonymi epigrammatici - - - -οὐ βροτὸς ὁ γλύπτας· οἵαν -δέ σε Βάκχος ἐραστὰς -εἶδεν ὑπὲρ πέτρας ἔξεσε κεκλιμέναν. -
-
- - -anonymi epigrammatici - - - -ξεῖνοι, λαϊνέας μὴ ψαύετε τᾶς Ἀριάδνας, -μὴ καὶ ἀναθρώσκῃ Θησέα διζομένη. - -
-
- - -antiphilus - - - -Αἰθιόπων ἁ βῶλος· ὁ δὲ πτερόεις τὰ πέδιλα, -Περσεύς· ἁ δὲ λίθῳ πρόσδετος Ἀνδρομέδα· -ἁ προτομὰ Γοργοῦς λιθοδερκέος· ἆθλον ἔρωτος, -κῆτος· Κασσιόπας ἁ λάλος εὐτεκνία· -χἁ μὲν ἀπὸ σκοπέλοιο χαλᾷ πόδας ἠθάδι νάρκᾳ -νωθρούς· χὡ μναστὴρ νυμφοκομεῖ τὸ γέρας -
-
- - -arabius - - - -Κηφεὺς Ἀνδρομέδην, ἢ ζωγράφος ἄνθετο πέτραις; -καὶ γάρ ἀπʼ ὀφθαλμῶν ἡ κρίσις ἀμφίβολος. -κῆτος δὲ σπιλάδεσσιν ἔπι γναμπτῇσι χαράχθη, -ἢ ἀπὸ Νηρῆος γείτονος ἐξανέδυ; -ἔγνων ταῦτα σοφός τις ἀνὴρ κάμε· δεινὸς ἀληθῶς -τεύξατο καὶ τεύξατο καὶ πραπίδων ἀπάτην. -
-
- - -arabius - - - -Ἀργείης Ἑλένης ἐρόεις τύπος, ἥν ποτε βούτης -ἥρπασε, τὸν Ξένιον Ζῆνα παρωσάμενος. - -
-
- - -pollianus - - -ἅδε Πολυκλείτοιο Πολυξένα, οὐδέ τις ἄλλα -χεὶρ ἔθιγεν τούτου δαιμονίου πίνακος. -Ἥρας ἔργον ἀδελφόν. ἴδʼ ὡς, πέπλοιο ῥαγέντος, -τὰν αἰδῶ γυμνὰν σώφρονι κρύπτε πέπλῳ -λίσσεται ἁ τλάμων ψυχᾶς ὕπερ· ἐν βλεφάροις δὲ -παρθενικᾶς ὁ Φρυγῶν κεῖται ὅλος πόλεμος. -
-
- - -anonymi epigrammatici - - - -ἀρχέτυπον Διδοῦς ἐρικυδέος, ὦ ξένε, λεύσσεις, -εἰκόνα θεσπεσίῳ κάλλεϊ λαμπομένην. -τοίη καὶ γενόμην, ἀλλʼ οὐ νόον, οἷον ἀκούεις, -ἔσχον, ἐπʼ εὐφήμοις δόξαν ἐνεγκαμένη. -οὐδὲ γὰρ Αἰνείαν ποτʼ ἐσέδρακον, οὐδὲ χρόνοισι -Τροίης περθομένης ἤλυθον ἐς Λιβύην· -ἀλλὰ βίας φεύγουσα Ἰαρβαίων ὑμεναίων -πῆξα κατὰ κραδίης φάσγανον ἀμφίτομον. -Πιερίδες, τί μοι ἁγνὸν ἐφωπλίσσασθε Μάρωνα -οἷα καθʼ ἡμετέρης ψεύσατο σωφροσύνης; -
-
- - -gauradas - - -ἀχὼ φίλα, μοὶ συγκαταίνεσόν τι. — τί; -ἐρῶ κορίσκας· ἁ δὲ μʼ οὐ φιλεῖ. — φιλεῖ. - -πρᾶξαι δʼ ὁ καιρὸς καιρὸς οὐ φέρει. — φέρει. -τὺ τοίνυν αὐτᾷ λέξον ὡς ἐρῶ. — ἐρῶ. - -καὶ πίστιν αὐτᾷ κερμάτων τὺ δός. — τὺ δός. -ἀχώ, τί λοιπόν, ἢ πόθου τυχεῖν; — τυχεῖν. - -
-
- - -satyrus - - - -Ποιμενίαν ἄγλωσσος ἀνʼ ὀργάδα μέλπεται Ἀχὼ -ἀντίθρουν πτανοῖς ὑστερόφωνον ὄπα. -
-
- - -archias - - - -ἠχὼ πετρήεσσαν ὁρᾷς, φίλε, Πανὸς ἑταίρην, -ἀντίτυπον φθογγὴν ἔμπαλιν ᾀδομένην, -παντοίων στομάτων λάλον εἰκόνα, ποιμέσιν ἡδὺ -παίγνιον. ὅσσα λέγεις, ταῦτα κλύων ἄπιθι. -
-
- - -euodus - - - -ἠχὼ μιμολόγον, φωνῆς τρύγα, ῥήματος οὐρήν. -
-
- - -anonymi epigrammatici - - - -Ἀρκαδικὰ θεός εἰμι, παρὰ προθύροις δὲ Λυαίου -ναίω, φθεγγόμενον μῦθον ἀμειβομένα· -οὐκέτι γὰρ στυγέω, Βακχεῦ φίλε, τὸν θιασώταν -τὸν τεόν. ἔρχεο, Πὰν ξυνὰ λέγωμεν ἔπη. - -
-
- - -Julianus - - - -τίπτε, Τριτογένεια, κορύσσεαι ἄστεϊ μέσσῳ; -εἶξε Ποσειδάων· φείδεο Κεκροπίης. -
-
- - -diotimus - - -ὡς πρέπει, Ἄρτεμίς εἰμʼ· εὖ δʼ Ἄρτεμιν αὐτὸς ὁ χαλκὸς -μανύει Ζηνός, κοὐχ ἑτέρου θύγατρα. -τεκμαίρου τὸ θράσος τᾶς παρθένου. ἦ ῥά κεν εἴποις· -πᾶσα χθὼν ὀλίγον τᾷδε κυναγέσιον. -
-
- - -anonymi epigrammatici - - - -τίς λίθον ἐψύχωσε; τίς ἐν χθονὶ -Κύπριν ἐσεῖδεν; -ἵμερον ἐν πέτρῃ τίς τόσον εἰργάσατο; -Πραξιτέλους χειρῶν ὅδε που πόνος, ἢ -τάχʼ Ὄλυμπος -χηρεύει, Παφίης ἐς Κνίδον ἐρχομένης. -
-
- - -plato - - - -ἡ Παφίη Κυθέρεια, διʼ οἴδματος ἐς Κνίδον ἦλθε, -βουλομένη κατιδεῖν εἰκόνα τὴν ἰδίην - -πάντῃ δʼ ἀθρήσασα περισκέπτῳ ἐνὶ χώρῳ, -φθέγξατο· ποῦ γυμνὴν εἶδέ με Πραξιτέλης; - -Πραξιτέλης οὐκ εἶδεν ἃ μὴ θέμις· ἀλλʼ ὁ σίδηρος -ἔξεσεν οἷʼ ἂν Ἄρης ἤθελε τὴν Παφίην. -
-
- - -plato - - -οὔτε σε Πραξιτέλης τεχνάσατο, οὔθʼ ὁ σίδαρος· -ἀλλʼ οὕτως ἔστης, ὥς ποτε κρινομένη. -
-
- - -anonymi epigrammatici - - -ἁ Κύπρις τὰν Κύπριν ἐνὶ Κνίδῳ εἶπεν ἰδοῦσα - -φεῦ, φεῦ· ποῦ γυμνὴν εἶδέ με Πραξιτέλης; - -
-
- - -pseudo-lucianus - - -τὴν Παφίην γυμνὴν οὐδεὶς ἴδεν εἰ δέ τις εἶδεν, -οὗτος ὁ τὴν γυμνὴν στησάμενος Παφίην. -
-
- - -pseudo-lucianus - - -σοὶ μορφῆς ἀνέθηκα τεῆς περικαλλὲς ἄγαλμα, -Κύπρι, τεῆς μορφῆς φέρτερον οὐδὲν ἔχων. -
-
- - -euenus - - -Παλλὰς καὶ Κρονίδαο συνευνέτις εἶπον, ἰδοῦσαι -τὴν Κνιδίην ἀδίκως τὸν Φρύγα μεμφόμεθα. - - -
-
- - -euenus - - -πρόσθε μὲν Ἰδαίοισιν ἐν οὔρεσιν αὐτὸς ὁ βούτας -δέρξατο τὰν κάλλευς πρῶτʼ ἀπενεγκαμέναν -Πραξιτέλης Κνιδίοις δὲ πανωπήεσσαν ἔθηκεν, -μάρτυρα τῆς τέχνης ψῆφον ἔχων Πάριδος. -
-
- - -antipater - - -φάσεις, τὰν μὲν Κύπριν ἀνὰ κραναὰν Κνίδον ἀθρῶν, -ἅδε που ὡς φλέξει καὶ λίθος εὖσα λίθον -τὸν δʼ ἐνὶ Θεσπιάδαις γλυκὺν Ἵμερον, οὐχ ὅτι πέτρον -ἀλλʼ ὅτι κἠν ψυχρῷ πῦρ ἀδάμαντι βαλεῖ. -τοίους Πραξιτέλης κάμε δαίμονας, ἄλλον ἐπʼ ἄλλας -γᾶς, ἵνα μὴ δισσῷ πάντα θέροιτο πυρί. -
-
- - -anonymi epigrammatici - - - -γυμνὴν εἶδε Πάρις με, καὶ Ἀγχίσης, καὶ Ἄδωνις· -τοὺς τρεῖς οἶδα μόνους· Πραξιτέλης δὲ πόθεν; -
-
- - -anonymi epigrammatici - - - -Ἀφρογενοῦς Παφίης ζάθεον περιδέρκεο κάλλος, - -καὶ λέξεις· αἰνῶ τὸν Φρύγα τῆς κρίσεως. - -Ἀτθίδα δερκόμενος πάλι Παλλάδα, τοῦτο βοήσεις, -ὡς βούτης ὁ Πάρις τήνδε παρετρόχασεν. - - -
-
- - -hermodorus - - - -τὰν Κνιδίαν Κυθέρειαν ἰδών, ξένε, τοῦτό κεν εἴποις· - -αὐτὰ καὶ θνατῶν ἄρχε καὶ ἀθανάτων. - -τὰν δʼ ἐνὶ Κεκροπίδαις δορυθαρσέα Παλλάδα λεύσσων, -αὐδάσεις· ὄντως βουκόλος ἦν ὁ Πάρις. - -
-
- - -leonidas - - - -Ἄρεος ἔντεα ταῦτα τίνος χάριν, ὦ Κυθέρεια, -ἐνδέδυσαι, κενεὸν τοῦτο φέρουσα βάρος; -αὐτὸν Ἄρη γυμνὴ γὰρ ἀφώπλισας· εἰ δὲ λέλειπται -καὶ θεός, ἀνθρώποις ὅπλα μάτην ἐπάγεις. -
-
- - -alexander - - -αὐτά που τὰν Κύπριν ἀπηκριβώσατο Παλλάς, -τᾶς ἐπʼ Ἀλεξάνδρου λαθομένα κρίσιος. -
-
- - -Julianus - - - -αἰεὶ μὲν Κυθέρεια φέρειν δεδάηκε φαρέτρην, -τόξα τε καὶ δολιχῆς ἔργον ἑκηβολίης· -αἰδομένη δʼ ἄρα θεσμὰ μενεπτολέμοιο Λυκούργου -φίλτρα φέρει Σπάρτῃ τεύχεσιν ἀγχεμάχοις. -ὑμεῖς δʼ ἐν θαλάμοισι, Λακωνίδες, ὅπλα Κυθήρης -ἁζόμεναι, παῖδας τίκτετε θαρσαλέους. - -
-
- - -anonymi epigrammatici - - - -Παλλὰς τὰν Κυθέρειαν ἔνοπλον -ἔειπεν ἰδοῦσα· - -Κύπρι, θέλεις οὕτως ἐς κρίσιν ἐρχόμεθα; - -ἡ δʼ ἁπαλὸν γελάσασα· “τί μοι -σάκος ἀντίον αἴρειν;” -
-
- - -anonymi epigrammatici - - -ἢ λίθος ὡς Παφίη θωρήξατο, ἢ τάχα μᾶλλον -εἶδε λίθον Παφίη, καὶ ὤμοσεν ἤθελον εἶναι. - -
-
- - -antipater - - -καὶ Κύπρις Σπάρτας· οὐκ ἄστεσιν οἷὰ τʼ ἐν ἄλλοις -ἵδρυται, μαλακὰς ἑσσαμένα στολίδας· -ἀλλὰ κατὰ κρατὸς μὲν ἔχει κόρυν ἀντὶ καλύπτρας, -ἀντὶ δὲ χρυσείων ἀκρεμόνων κάμακα. -οὐ γὰρ χρὴ τευχέων εἶναι δίχα τὰν παράκοιτιν -Θρᾳκὸς Ἐνυαλίου καὶ Λακεδαιμονίαν. -
-
- - -philippus - - -Κύπρι φιλομμειδής, θαλαμηπόλε, τίς σε μελιχρὴν -δαίμονα τοῖς πολέμων ἐστεφάνωσεν ὅπλοις; - -σοὶ παιὰν φίλος ἦν καὶ ὁ χρυσοκόμης Ὑμέναιος, -καὶ λιγυρῶν αὐλῶν ἡδυμελεῖς χάριτες. -ἐς τί δὲ ταῦτʼ ἐνέδυς ἀνδροκτόνα; μὴ θρασὺν Ἄρη -συλήσασ’ αὐχεῖς, Κύπρις ὅσον δύναται; -
-
- - -antipater - - - -τὰν ἀναδυομέναν ἀπὸ ματέρος ἄρτι θαλάσσας -Κύπριν, Ἀπελλείου μόχθον ὅρα γραφίδος, -ὡς χερὶ συμμάρψασα διάβροχον ὕδατι χαίταν -ἐκθλίβει νοτερῶν ἀφρὸν ἀπὸ πλοκάμων. - -
-
- - -archias - - - -αὐτὰν ἐκ πόντοιο τιθηνητῆρος Ἀπελλῆς -τὰν Κύπριν γυμνὰν εἶδε λοχευομέναν, -καὶ τοίαν ἐτύπωσε, διάβροχον ὕδατος ἀφρῷ -θλίβουσαν θαλεραῖς χερσὶν ἔτι πλόκαμον. -
-
- - -democritus - - - -Κύπρις ὅτε σταλάουσα κόμας ἁλιμυρέος ἀφροῦ -γυμνὴ πορφυρέου κύματος ἐξανέδυ, -οὕτω που κατὰ λευκὰ παρήια χερσὶν ἑλοῦσα -βόστρυχον, Αἰγαίην ἐξεπίεζεν ἅλα, -στέρνα μόνον φαίνουσα, τὰ καὶ θέμις· εἰ δὲ τοιήδε -κείνη, συγχείσθω θυμὸς Ἐνυαλίου. - -
-
- - -Julianus - - - -ἄρτι θαλασσαίης Παφίη προὔκυψε λοχείης, -μαῖαν Ἀπελλείην εὑραμένη παλάμην -ἀλλὰ τάχος γραφίδων ἀποχάζεο, μή σε διήνῃ -ἀφρὸς ἀποστάζων θλιβομένων πλοκάμων. -εἰ τοίη ποτὲ Κύπρις ἐγυμνώθη διὰ μῆλον, -τὴν Τροίην ἀδίκως Παλλὰς ἐληίσατο. -
-
- - -leonidas - - - -τὰν ἐκφυγοῦσαν ματρὸς ἐκ κόλπων, ἔτι -ἀφρῷ τε μορμύρουσαν, εὐλεχῆ Κύπριν -ἰδὼν Ἀπελλῆς, κάλλος ἱμερώτατον, -οὐ γραπτόν, ἀλλʼ ἔμψυχον ἐξεμάξατο. -εὖ μὲν γὰρ ἄκραις χερσὶν ἐκθλίβει κόμαν, -εὖ δʼ ὀμμάτων γαληνὸς ἐκλάμπει πόθος, -καὶ μαζός, ἀκμῆς ἄγγελος, κυδωνιᾷ· -αὐτὰ δʼ Ἀθάνα καὶ Διὸς συνευνέτις -φάσουσιν ὦ Ζεῦ, λειπόμεσθα τῇ κρίσει. - -
-
- - -anonymi epigrammatici - - - - - εἰπέ, τί σοὶ ξυνὸν καὶ Παλλάδι; τῇ γὰρ ἄκοντες -καὶ πόλεμοι, πέρι σοὶ δʼ εὔαδον εἰλαπίναι. - - μὴ προπετῶς, ὦ ξεῖνε, θεῶν πέρι τοῖα μετάλλα· -ἴσθι δʼ ὅσοις ἴκελος δαίμονι τῇδε πέλω. -καὶ γὰρ ἐμοὶ πολέμων φίλιον κλέος· οἶδεν ἅπας μοι -ἠῴου δμηθεὶς Ἰνδὸς ἀπʼ Ὠκεανοῦ, - -καὶ μερόπων δὲ φυὴν ἐγερήραμεν, ἡ μὲν ἐλαίῃ, -αὐτὰρ ἐγὼ γλυκεροῖς βότρυσιν ἡμερίδος. -καὶ μὴν οὐδʼ ἐπʼ ἐμοὶ μήτηρ ὠδῖνας ὑπέτλη· -λῦσα δʼ ἐγὼ μηρὸν πάτριον, ἡ δὲ κάρη. -
-
- - -antipater - - - -Αὐσονίῳ Πείσωνι συνασπιστὴς Διόνυσος -ἵδρυμαι μεγάρων φρουρὸς ἐπʼ εὐτυχίῃ. -ἄξιον, “ὦ Διόνυσ’, ἐσέβης δόμον. ἔπρεπεν ἄμφω, -καὶ μέγαρον Βάκχῳ, καὶ Βρόμιος μεγάρῳ.” -
-
- - -anonymi epigrammatici - - - -ἀμφότεροι Θήβηθε, καὶ ἀμφότεροι πολεμισταί, -κἠκ Ζηνός· θύρσῳ δεινός, ὁ δὲ ῥοπάλῳ. -ἀμφοῖν δὲ στῆλαι συντέρμονες· εἴκελα δʼ ὅπλα, -νεβρὶς λειοντῇ, κύμβαλα δὲ πλαταγῇ. -Ἥρη δʼ ἀμφοτέροις χαλεπὴ θεός. οἱ δʼ ἀπὸ γαίης -ἦλθον ἐς ἀθανάτους ἐκ πυρὸς ἀμφότεροι. -
-
- - -xenocritus - - - -Ἑρμῆς ὠκὺς ἐγὼ κικλήσκομαι· ἀλλὰ παλαίστρᾐ -μὴ κολοβὸν χειρῶν ἵστατε, μηδʼ ἄποδα· -ἢ πῶς ὠκὺς ἐγώ; πῶς δʼ ὄρθια χειρονομήσω, -ἐς βάσιν ἀμφοτέρων ὀρφανὸς ἱστάμενος; - -
-
- - -anonymi epigrammatici - - - -Ἑρμείῃ ξυλίνῳ τις ἐπηύχετο, καὶ ξύλον ἦεν. -εἶτά μιν ἀείρας χαμάδις βάλε· τοῦ δʼ ἄπο χρυσὸς -ἔρρευσεν καταγέντος. ὕβρις πόρε πολλάκι κέρδος. -
-
- - -nicias - - -εἰνοσίφυλλον ὄρος Κυλλήνιον αἰπὺ λελογχώς, -τῇδʼ ἕστηκʼ ἐρατοῦ γυμνασίου μεδέων, -Ἑρμῆς· ᾧ ἔπι παῖδες ἀμάρακον ἠδʼ ὑάκινθον -πολλάκι, καὶ θαλεροὺς θῆκαν ἴων στεφάνους. -
-
- - -anonymi epigrammatici - - -φρουρὸς ἐπὶ σμήνεσσι, Περιστράτου εἵνεκα, μίμνω -ἐνθάδε, Μαιναλίαν κλιτὺν ἀποπρολιπών, -κλῶπα μελισσάων δεδοκημένος. ἀλλʼ ἀλέασθε -χεῖρα, καὶ ἀγροτέρου κοῦφον ὄρεγμα ποδός. -
-
- - -leonidas - - -τᾶν αἰγῶν ὁ νομεὺς Μόριχος τὸν ἐπίσκοπον Ἑρμᾶν -ἔστασ’ αἰπολίων εὐδόκιμον φύλακα. -ἀλλά μοι αἳ τʼ ἀνʼ ὄρη χλωρᾶς κεκορεσμέναι ὕλας, -τοῦ γʼ ἁρπακτῆρος μή τι μέλεσθε λύκου. - -
-
- - -nicaenetus - - -αὐτόθεν ὀστράκινόν με καὶ ἐν ποσὶ γήινον Ἑρμῆν -ἔπλασεν ἁψῖδος κύκλος ἑλισσόμενος. -πηλὸς ἐφυράθην· οὐ ψεύσομαι. ἀλλʼ ἐφίλησα, -ὦ ξεῖνʼ, ὀστρακέων δύσμορον ἐργασίην. -
-
- - -anonymi epigrammatici - - -ὦ λῷστε, μὴ νόμιζε τῶν πολλῶν ἕνα -Ἑρμᾶν θεωρεῖν· εἰμὶ γὰρ τέχνα Σκόπα. -
-
- - -philippus - - - - κράμβης ἅψωμαι, Κυλλήνιε; μή, παροδῖτα. - - τίς φθόνος ἐκ λαχάνων; οὐ φθόνος, ἀλλὰ νόμος, -ἀλλοτρίων ἀπέχειν κλοπίμους χέρας. ὢ παραδόξου· -μὴ κλέπτειν Ἑρμῆς καινὸν ἔθηκε νόμον. -
-
- - -palladas - - - -χάλκειόν τις Ἔρωτα μετήγαγεν ἐκ πυρὸς εἰς πῦρ, -τήγανον ἁρμόζων τῇ κολάσει κόλασιν. - -
-
- - -satyrus - - - -τὸν πτερόεντα τίς ὧδε, τίς ἐν δεσμοῖσι θοὸν πῦρ -ὤχμασεν; αἰθομένης ἥψατο τίς φαρέτρης, -καὶ τὰς ὠκυβόλους περιηγέας ἐσφήκωσε -χεῖρας, ὑπὸ στιβαρῷ κίονι δησάμενος; -ψυχρὰ τάδʼ ἀνθρώποις παραμύθια. μὴ ποτʼ ἐκείνου -οὗτος ὁ δεσμώτης αὐτὸς ἔδησε φρένα ; -
-
- - -alcaeus - - - -τίς σε τὸν οὐχ ὁσίως ἠγρευμένον ὧδε πεδήσας -θήκατο; τίς πλέγδην σὰς ἐνέδησε χέρας, -καὶ πιναρὰν ὄψιν τεκτήνατο; ποῦ θοὰ τόξα, -νήπιε; ποῦ πικρὴ πυρφόρος ἰοδόκη ; -ἦ ῥα μάτην ἐπόνησε λιθοξόος, ὅς σε, τὸν οἴστρῳ -κυμήναντα θεούς, τῇδʼ ἐνέδησε πάγῃ. - -
-
- - -antipater - - - -τίς δὴ σὰς παλάμας πρὸς κίονα δῆσεν ἀφύκτοις -ἅμμασι; τίς πυρὶ πῦρ, καὶ δόλον -εἷλε δόλῳ ; -νήπιε, μὴ δὴ δάκρυ κατὰ γλυκεροῖο προσώπου -βάλλε· σὺ γὰρ τέρπῃ δάκρυσιν ἠιθέων. -
-
- - -quintus maecius - - - -κλαῖε δυσεκφύκτως σφιγχθεὶς χέρας, ἄκριτε δαῖμον, -κλαῖε μάλα, στάζων ψυχοτακῆ δάκρυα, -σωφροσύνας ὑβριστά, φρενοκλόπε, λῃστὰ λογισμοῦ, -πτανὸν πῦρ, ψυχᾶς τραῦμʼ ἀόρατον, Ἔρως. -θνατοῖς μὲν λύσις ἐστὶ γόων ὁ σός, ἄκριτε, δεσμός· -ᾧ σφιγχθεὶς κωφοῖς πέμπε λιτὰς ἀνέμοις. -ὃν δὲ βροτοῖς ἀφύλακτος ἐνέφλεγες ἐν φρεσὶ πυρσόν, -ἄθρει νῦν ὑπὸ σῶν σβεννύμενον δακρύων. -
-
- - -crinagoras - - - -καὶ κλαῖε καὶ στέναζε, συσφιγχθεὶς χεροῖν -τένοντας, ὦ ʼπίβουλε· τοῖά τοι πρέπει. -οὐκ ἔσθʼ ὁ λύσων μὴ λεείνʼ ὑπόβλεπε. -αὐτὸς γὰρ ἄλλων ἐκ μὲν ὀμμάτων δάκρυ - -ἔθλιψας, ἐν δὲ πικρὰ καρδίᾳ βέλη -πήξας ἀφύκτων ἰὸν ἔσταξας πόθων, -ἔρως· τὰ θνητῶν δʼ ἐστί σοι γέλως ἄχη -πέπονθας οἷʼ ἔρεξας. ἐσθλὸν ἡ δίκη. -
-
- - -moschus - - - -λαμπάδα θεὶς καὶ τόξα, βοηλάτιν εἵλετο ῥάβδον -οὖλος Ἔρως, πήρην δʼ εἶχε κατωμαδίην -καὶ ζεύξας ταλαεργὸν ὑπὸ ζυγὸν αὐχένα ταύρων -ἔσπειρεν Δηοῦς αὔλακα πυροφόρον. -εἶπε δʼ ἄνω βλέψας αὐτῷ Διί· “ πλῆσον ἀρούρας, -μή σε τὸν Εὐρώπης βοῦν ὑπʼ ἄροτρα βάλω.” -
-
- - -marianus - - - -ποῦ σοι τόξον ἐκεῖνο παλίντονον, οἳ τʼ ἀπὸ σεῖο -πηγνύμενοι μεσάτην ἐς κραδίην δόνακες; -ποῦ πτερά; ποῦ λαμπὰς πολυώδυνος; ἐς τί δὲ τρισσὰ -στέμματα χερσὶν ἔχεις, κρατὶ δʼ ἐπʼ ἄλλο φέρεις; — -“οὐκ ἀπὸ πανδήμου, ξένε, Κύπριδος, οὐδʼ ἀπὸ γαίης -εἰμί, καὶ ὑλαίης ἔκγονος εὐφροσύνης· -ἀλλʼ ἐγὼ ἐς καθαρὴν μερόπων φρένα πυρσὸν ἀνάπτω -εὐμαθίης, ψυχὴν δʼ οὐρανὸν εἰσανάγω. -ἐκ δʼ ἀρετῶν στεφάνους πισύρων πλέκω· ὧν ἀφʼ ἑκάστης -τούσδε φέρων, πρώτῳ τῷ σοφίης στέφομαι.” - -
-
- - -anonymi epigrammatici - - - -μή με τὸν ἐκ Λιβάνοιο λέγε, ξένε, τὸν φιλοκώμων -τερπόμενον νυχίοις ἠιθέων ὀάροις· -βαιὸς ἐγὼ Νύμφης ἄπο γείτονος ἀγροϊώτης, -μοῦνον ἐποτρύνων ἔργα φυτοσκαφίης. -ἔνθεν ἀπʼ εὐκάρπου με φίλης ἔστεψαν ἀλωῆς -τέσσαρες Ὡράων ἐκ πισύρων στέφανοι. -
-
- - -Julianus - - - -κλίνας αὐχένα γαῦρον ὑφʼ ἡμετέροισι πεδίλοις, -χερσί με ληϊδίαις ἔπλασε Πραξιτέλης. -αὐτὸν γὰρ τὸν Ἔρωτα τὸν ἔνδοθι κευθόμενόν με -χαλκεύσας, Φρύνᾐ δῶκε γέρας φιλίης· -ἡ δέ μιν αὖθις Ἔρωτι προσήγαγε· καὶ γὰρ ἐρῶντας -δῶρον Ἔρωτι φέρειν αὐτὸν Ἔρωτα θέμις. -
-
- - -simonides - - - -Πραξιτέλης ὃν ἔπασχε διηκρίβωσεν Ἔρωτα -ἐξ ἰδίης ἕλκων ἀρχέτυπον κραδίης, -Φρύνῃ μισθὸν ἐμεῖο διδοὺς ἐμέ. φίλτρα δὲ τίκτω -οὐκέτι τοξεύων, ἀλλʼ ἀτενιζόμενος. - -
-
- - -tullius geminus - - - -ἀντί μʼ ἔρωτος Ἔρωτα βροτῷ θεὸν ὤπασε Φρύνῃ -Πραξιτέλης, μισθὸν καὶ θεὸν εὑρόμενος. -ἡ δʼ οὐκ ἠρνήθη τὸν τέκτονα· δεῖσε γάρ οἱ φρήν, -μὴ θεὸς ἀντὶ τέχνης σύμμαχα τόξα λάβῃ. -ταρβεῖ δʼ οὐκέτι που τὸν Κύπριδος, ἀλλὰ τὸν ἐκ σοῦ, -Πραξίτελες, τέχνην μητέρʼ ἐπισταμένη. -
-
- - -leonidas - - - -Θεσπιέες τὸν Ἔρωτα μόνον θεὸν ἐκ Κυθερείης -ἅζοντʼ, οὐχ ἑτέρου γραπτὸν ἀπʼ ἀρχετύπου, -ἀλλʼ ὃν Πραξιτέλης ἔγνω θεόν· ὃν περὶ Φρύνῃ -δερκόμενος, σφετέρων λύτρον ἔδωκε πόθων -
-
- - -palladas - - -γυμνὸς Ἔρως· διὰ τοῦτο γελᾷ καὶ μείλιχός ἐστιν -οὐ γὰρ ἔχει τόξον καὶ πυρόεντα βέλη· -οὐδὲ μάτην παλάμαις κατέχει δελφῖνα καὶ ἄνθος· -τῇ μὲν γὰρ γαῖαν, τῇ δὲ θάλασσαν ἔχει. -
-
- - -gabrielius - - - -οὐδὲ κατακνώσσων, οὐδʼ ἄπνοος, οὐδʼ ἐνὶ δαιτὶ -νόσφι πυρισπάρτου δήγματός ἐστιν Ἔρως. - -
-
- - -anonymi epigrammatici - - -οὗτος ὁ τὸν δαλὸν φυσῶν, ἵνα λύχνον ἀνάψῃς, -δεῦρʼ ἀπʼ ἐμᾶς ψυχᾶς ἅψον· ὅλος φλέγομαι. -
-
- - -plato - - -ἄλσος δʼ ὡς ἱκόμεσθα βαθύσκιον, εὕρομεν ἔνδον -πορφυρέοις μήλοισιν ἐοικότα παῖδα Κυθήρης. -οὐδʼ ἔχεν ἰοδόκον φαρέτρην, οὐ καμπύλα τόξα· -ἀλλὰ τὰ μὲν δένδρεσσιν ὑπʼ εὐπετάλοισι κρέμαντο, -αὐτὸς δʼ ἐν καλύκεσσι ῥόδων πεπεδημένος ὕπνῳ -εὗδεν μειδιόων· ξουθαὶ δʼ ἐφύπερθε μέλισσαι -κηροχύτου μέλιτος ˘ λαροῖς ἐπὶ χείλεσι ῥαῖνον - -
-
- - -statyllius flaccus - - - -εὕδεις, ἀγρύπνους ἐπάγων θνητοῖσι μερίμνας· -εὕδεις, ἀτηρῆς ἆ τέκος Ἀφρογενοῦς, -οὐ πεύκην πυρόεσσαν ἐπηρμένος, οὐδʼ ἀφύλακτον -ἐκ κέραος ψάλλων ἀντιτόνοιο βέλος. -ἄλλοι θαρσείτωσαν· ἐγὼ δʼ, ἀγέρωχε, δέδοικα, -μή μοι καὶ κνώσσων πικρὸν ὄνειρον ἴδῃς. -
-
- - -alpheus - - - -ἁρπάσομαι πυρόεσσαν, Ἔρως, χερὸς ἐκ σέο πεύκην, -συλήσω δʼ ὤμων ἀμφικρεμῆ φαρέτρην, -εἲ γʼ ἐτύμως εὕδεις, πυρὸς ἔγγονε, καὶ σέο φῶτες -πρὸς βαιὸν τόξων εὐνομίην ἄγομεν. -ἀλλὰ καὶ ὥς σε δέδοικα, δολοπλόκε, μή τινα κεύθῃς -εἰς ἐμέ, κἠν ὕπνῳ πικρὸν ὄνειρον ἴδῃς. -
-
- - -straton - - -εἰ καί σοι πτέρυγες ταχιναὶ περὶ νῶτα τέτανται, -καὶ σκυθικαὶ τόξων ἀκροβολεῖς ἀκίδες, -φεύξομʼ, Ἔρως, ὑπὸ γᾶν σε. τί δὲ πλέον; οὐδὲ -γὰρ αὐτὸς -σὰν ἔφυγε ῥώμαν πανδαμάτωρ Ἀίδας. - -
-
- - -secundus - - - -σκυλοχαρεῖς ἴδʼ Ἔρωτας, ἴδʼ ὡς βριαροῖσιν ἐπʼ ὤμοις -ὅπλα φέρουσι θεῶν νήπιʼ ἀγαλλόμενοι, -τύμπανα καὶ θύρσον Βρομίου, Ζηνὸς δὲ κεραυνόν, -ἀσπίδʼ Ἐνυαλίου καὶ κόρυν ἠΰκομον, -Φοίβου δʼ εὔτοξον φαρέτρην, Ἁλίου δὲ τρίαιναν, -καὶ σθεναρῶν χειρῶν Ἡρακλέους ῥόπαλον. -τί πλέον ἀνθρώποισιν, Ἔρως ὅτε καὶ πόλον εἷλε, -τεύχεα δʼ ἀθανάτων Κύπρις ἐληίσατο; -
-
- - -philippus - - -συλήσαντες Ὄλυμπον ἴδʼ ὡς ὅπλοισιν Ἔρωτες -κοσμοῦντʼ ἀθανάτων, σκῦλα φρυασσόμενοι. -Φοίβου τόξα φέρουσι, Διὸς δὲ κεραυνόν,Ἄρηος -ὅπλον καὶ κυνέην, Ἡρακλέους ῥόπαλον, -ῥόπαλον τε θεοῦ τριβελὲς δόρυ, θύρσα τε Βάκχου, -πτηνὰ πέδιλʼ Ἑρμοῦ, λαμπάδας Ἀρτέμιδος. -οὐκ ἄχθος θνητοῖς εἴκειν βελέεσσιν ἐρώτων, -δαίμονες οἷς ὅπλων κόσμον ἔδωκαν ἔχειν. - -
-
- - -parmenion - - - -ὡργεῖος Πολύκλειτος, ὁ καὶ -μόνος ὄμμασιν Ἥρην -ἀθρήσας καὶ ὅσην εἶδε τυπωσάμενος, -θνητοῖς κάλλος ἔδειξεν, ὅσον -θέμις· αἱ δʼ ὑπὸ κόλποις -ἄγνωστοι μορφαὶ Ζηνὶ φυλασσόμεθα. -
-
- - -anonymi epigrammatici - - - -Καλλιόπη μὲν ἐγώ· Κύρῳ δʼ ἐμὸν ὤπασα μαζόν, -ὃς τρέφε θεῖον Ὅμηρον, ὅθεν πίε νήδυμος Ὀρφεύς. -
-
- - -Joannes barbucallus - - -ἤθελε Μελπομένην ὁ ζωγράφος εἰκόνι γράψαι, -ἀλλʼ ἀπολειπομένης, ἔγραφε Καλλιόπην. -
-
- - -Joannes barbucallus - - -σεῖο μὲν εἰκὼν ἥδε Πολύμνια, καὶ σὺ δέ, Μούσης. -ἓν γὰρ ἐπʼ ἀμφοτέραις οὔνομα καὶ τύπος εἷς. - -
-
- - -antipater - - - -Τρίζυγες αἱ Μοῦσαι τᾷδʼ ἕσταμεν· ἁ μία λωτούς, -ἁ δὲ φέρει παλάμαις βάρβιτον, ἁ δὲ χέλυν. -ἁ μὲν Ἀριστοκλῆος ἔχει χέλυν, ἁ δʼ Ἀγελάδα -βάρβιτον, ἁ Καναχᾶ δʼ ὑμνοπόλους δόνακας. -ἀλλʼ ἁ μὲν κράντειρα, τόνου πέλει, ἁ δὲ μελῳδὸς -χρώματος, ἁ δὲ σοφᾶς εὑρέτις ἁρμονίας. -
-
- - -theaetetus - - - -Χιονέην με λίθον παλιναυξέος ἐκ περιωπῆς -λαοτύπος τμήξας πετροτόμοις ἀκίσι -Μῆδος ἐποντοπόρευσεν, ὅπως ἀνδρείκελα τεύξῃ, -τῆς κατʼ Ἀθηναίων σύμβολα καμμονίης. -ὡς δὲ δαϊζομένοις Μαραθὼν ἀντέκτυπε Πέρσαις -καὶ νέες ὑγροπόρουν χεύμασιν αἱμαλέοις, -ἔξεσαν Ἀδρήστειαν ἀριστώδινες Ἀθῆναι, -δαίμονʼ ὑπερφιάλοις ἀντίπαλον μερόπων. -ἀντιταλαντεύω τὰς ἐλπίδας· εἰμὶ δὲ καὶ νῦν -νίκη Ἐρεχθείδαις, Ἀσσυρίοις Νέμεσις. - -
-
- - -parmenion - - - -Μήδοις ἐλπισθεῖσα τροπαιοφόρος λίθος εἶναι, -ἠλλάχθην μορφὴν καίριον εἰς Νέμεσιν, -ἔνδικος ἱδρυνθεῖσα θεὰ Ῥαμνοῦντος ἐπʼ ὄχθαις -νίκης καὶ σοφίης Ἀτθίδι μαρτύριον. -
-
- - -anonymi epigrammatici - - - -ἡ Νέμεσις προλέγει τῷ πήχεϊ, τῷ τε χαλινῷ, -μήτʼ ἄμετρόν τι ποιεῖν, μήτʼ ἀχάλινα λέγειν. -
-
- - -anonymi epigrammatici - - - -ἡ Νέμεσις πῆχυν κατέχω· τίνος οὕνεκα; λέξεις. - -πᾶσι παραγγέλλω· μηδὲν ὑπὲρ τὸ μέτρον. - -
-
- - -arabius - - - -ἦν τάχα συρίζοντος ἐναργέα Πανὸς ἀκούειν -πνεῦμα γὰρ ὁ πλάστης ἐγκατέμιξε τύπῳ· -ἀλλʼ ὁρόων φεύγουσαν ἀμήχανος ἄστατον Ἠχὼ, -πηκτίδος ἠρνήθη φθόγγον ἀνωφελέα. - -
-
- - -alcaeus - - - -ἔμπνει Πὰν λαροῖσιν ὀρειβάτα χείλεσι μοῦσαν, -ἔμπνει, ποιμενίῳ τερπόμενος δόνακι, -εὐκελάδῳ σύριγγι χέων μέλος, ἐκ δὲ συνῳδοῦ -κλάζε κατιθύνων ῥήματος ἁρμονίην -ἀμφὶ δὲ σοὶ ῥυθμοῖο κατὰ κρότον ἔνθεον ἴχνος -ῥησσέσθω Νύμφαις ταῖσδε μεθυδριάσιν. -
-
- - -anonymi epigrammatici - - -τᾷδε κατὰ χλοεροῖο ῥιφεὶς λειμῶνος, ὁδῖτα, -ἄμπαυσον μογεροῦ μαλθακὰ γυῖα κόπου, -ᾗχί σε καὶ Ζεφύροιο τινασσομένη πίτυς αὔραις -θέλξει, τεττίγων εἰσαΐοντα μέλος, -χὠ ποιμὴν ἐν ὄρεσσι μεσαμβρινὸν ἀγχόθι παγᾶς -συρίσδων, λασίας θάμνῳ ὕπο πλατάνου· -καῦμα δʼ ὀπωρινοῖο φυγὼν κυνὸς αἶπος ἀμείψεις -ὥριον Ἑρμείῃ τοῦτʼ ἐνέποντι πιθοῦ. -
-
- - -anyte - - -ξεῖνʼ, ὑπὸ τὰν πτελέαν τετρυμένα γυῖʼ ἀνάπαυσον· -ἁδύ τοι ἐν χλωροῖς πνεῦμα θροεῖ πετάλοις· -πίδακὰ τʼ ἐκ παγᾶς ψυχρὸν πίε· δὴ γὰρ ὁδίταις -ἄμπαυμʼ ἐν θερμῷ καύματι τοῦτο φίλον. - -
-
- - -anonymi epigrammatici - - - -ἐξ αὐτοῦ Διός ἐστιν ὁ φίλτατος -ἔκχυτος οὗτος· -μαρτυρίην δὲ φέρει τὴν ἐπάνω νεφέλην. -Ἑρμείαν γὰρ ἄνακτα τέκεν -νεφεληγερέτα Ζεύς· -αὐτὰρ ὅγʼ Ἑρμείας Πᾶνα τὸν αἰγελάτην. -
-
- - -leonidas - - -μὴ σὺ γʼ ἐπʼ οἰονόμοιο περίπλεον ἰλύος ὧδε -τοῦτο χαραδραίης θερμόν, ὁδῖτα, πίῃς· -ἀλλὰ μολὼν μάλα τυτθὸν ὑπὲρ δαμαλήβοτον ἄκραν -ταύταν, πὰρ κείνᾳ ποιμενίᾳ πίτυϊ -εὑρήσεις κελαρύζον ἐϋκρήνου διὰ πέτρης -νᾶμα, Βορειαίης ψυχρότερον νιφάδος. -
-
- - -anyte - - - - τίπτε κατʼ οἰόβατον, Πὰν ἀγρότα, δάσκιον ὕλαν -ἥμενος, ἁδυβόᾳ τῷδε κρέκεις δόνακι; - - ὄφρα μοι ἑρσήεντα κατʼ οὔρεα ταῦτα νέμοιντο -πόρτιες ἠυκόμων δρεπτόμεναι σταχύων. -
-
- - -simonides - - -τὸν τραγόπουν ἐμὲ Πᾶνα, τὸν Ἀρκάδα, τὸν κατὰ Μήδων, -τὸν μετʼ Ἀθηναίων, στήσατο Μιλτιάδης. - -
-
- - -theaetetus - - - -Ὑλοβάτας, φιλόδενδρος, ὀρεσσαύλου πόσις Ἀχοῦς, -Πάν, σκοπός, εὐκεράου μαλοφύλαξ ἀγέλας, -Πὰν ὁ δασυκνάμων, ὁ πολύσπορος, ὃς μετανάστας -ἔδραμον αἰχματᾶν ἐς δάιν Ἀσσυρίων, -Μιλτιάδου στήσαντος ὁμάσπιδα περσοδιώκτην, -ἵσταμαι, ἀκλήτου ξείνια συμμαχίης. -ἄλλοις ἀκροπόληες· ὁ μηδοφόνος δὲ δέδασται -ξυνὸς ἐμὶν Μαραθὼν καὶ μαραθωνομάχοις. -
-
- - -philodemus - - -Τρισσοὺς ἀθανάτους χωρεῖ λίθος· ἁ κεφαλὰ γὰρ -μανύει τρανῶς Πᾶνα τὸν αἰγόκερων, -στέρνα δὲ καὶ νηδὺς Ἡρακλέα, λοιπὰ δὲ μηρῶν -καὶ κνήμης Ἑρμῆς ὁ πτερόπους ἔλαχεν. -θύειν ἀρνήσῃ, ξένε, μηκέτι· τοῦ γὰρ ἑνός σοι -θύματος οἱ τρισσοὶ δαίμονες ἀντόμεθα, -
-
- - -apollonides - - -ἀγροτέρων θεός εἰμι· τί μοι χρυσέοις δεπάεσσι -σπένδετε, τοῦ δʼ Ἰταλοῦ χεῖτε μέθυ Βρομίου, -καὶ γυροὺς ταύρων πέτρῃ προσδεῖτε τένοντας; -φείσασθʼ· οὐ τούτοις θύμασι τερπόμεθα. - -Πὰν ὁ παρωρείτης, αὐτόξυλος, ἀρνεοθοίνης -εἰμί, καὶ ἐγχθονίου γλευκοπότης κύλικος. -
-
- - -peritas - - -αὐτοῦ ἐφʼ αἱμασιαῖσι τὸν ἀγρυπνοῦντα Πρίηπον - -ἔστησεν λαχάνων Δεινομένης φύλακα. - -ἀλλʼ ὡς ἐντέταμαι, φώρ, ἔμβλεπε. τοῦτο δʼ, ἐρωτᾷς, - -τῶν ὀλίγων λαχάνων εἵνεκα; τῶν ὀλίγων. - -
-
- - -tymnes - - - -πάντα πριηπίζω, κἂν ᾖ Κρόνος· οὐ διακρίνω - -οὐδένα φῶρʼ οὕτω ταῖσδε παρὰ πρασιαῖς. - -ἔπρεπε μὴ λαχάνων ἕνεκεν τάδε καὶ κολοκυνθῶν, - -φήσει τις, με λέγειν. ἔπρεπεν ἀλλὰ λέγω. - -
-
- - -pseudo-lucianus - - - -ὧδε Πρίηπον -Εὐτυχίδης, ξηρῶν κληματίδων φύλακα· -καὶ περιβέβλημαι κρημνὸν βαθύν. ὃς -δʼ ἂν ἐπέλθῃ, -οὐδὲν ἔχει κλέψαι πλὴν ἐμὲ τὸν φύλακα. - -
-
- - -apollonides - - -ἄνθετʼ Ἀναξαγόρης με, τὸν οὐκ ἐπὶ ποσσὶ Πρίηπον, -ἐν χθονὶ δʼ ἀμφοτέρῳ γούνατι κεκλιμένον· -τεῦξε δὲ Φυλόμαχος. Χαριτὼ δέ μοι ἀγχόθι καλὴν -ἀθρήσας, δίζευ μηκέτι πῶς ἔπεσον. -
-
- - -philippus - - - - ὡραίας γʼ ἐσορῶ τὰς ἰσχάδας· εἴ γε λαβεῖν μοι -συγχωρεῖς ὀλίγας. θίγγανε μηδεμιᾶς. - - ὀργίλος ὡς ὁ Πρίηπος. † ἐρεῖς ἔτι καὶ κενὸς ἥξεις. - - ναὶ λίτομαι. δός μοι· καὶ γὰρ ἐγὼ δέομαι. - - χρῄζεις γάρ, λέγε μοι, παρʼ ἐμοῦ τινος; ἔστι νόμος που· -δὸς λάβε. καὶ θεὸς ὢν ἀργυρίου σὺ - - ἄλλο τι χρῆμα φιλῶ. ποῖον τόδε; τἀμὰ κατέσθων -σῦκα, δὸς εὐθύμως ἰσχάδα τὴν ὀπίσω. -
-
- - -marcus argentarius - - - - Ὥριμος. Οἶδα καὶ αὐτός, ὁδοιπόρε. μηκέτʼ ἐπαίνει -ἰσχάδα, μηδʼ ἐσόρα τὸν πέλας ἀκρέμονα· - -καὶ λίην ὁ Πρίηπος ἐφίσταμαι ὀξὺ δεδορκὼς, -καὶ φυλακὴν σύκων ἣν ἐπέοικεν ἔχων. -ἢν δὲ μόνον σὺ θίγῃς τῆς ἰσχάδος, ἰσχάδα δώσεις· -ὡς ἰσότης πάντων ἐστὶ δικαιοτάτη. -
-
- - -erycius - - - -ὡς βαρὺ τοῦτο, Πρίηπε, καὶ εὖ τετυλωμένον ὅπλον -πᾶν ἀπὸ βουβώνων ἀθρόον ἐκκέχυκας -εἰς γάμον οὐκ ἀνέτοιμον ἔχει δέ σε δίψα γυναικῶν, -ὦ ʼγαθέ, καὶ σπαργᾷς θυμὸν ἅπαντα πόθοις. -ἀλλὰ καταπρήϋνε τὸν ἐξῳδηκότα φαλλὸν -τόνδε, καὶ ἀνθηρῇ κρύψον ὑπὸ χλαμύδι· -οὐ γὰρ ἐρημαῖον ναίεις ὄρος, ἀλλὰ παρʼ Ἕλλης -ᾐόνα τὴν ἱερὴν Λάμψακον ἀμφιπολεῖς. -
-
- - -antistius - - -Ἀγροφύλαξ ἕστηκα πολυκτεάνοις ἐν ἀρούραις, -Φρίκωνος καλύβην καὶ φυτὰ ῥυόμενος, -τοῦτο λέγων πρὸς ἕκαστον· ἐπὴν γελάσῃς ἐσιδών με -τοῦ σκεύους, χώρει τὴν κατὰ σαυτὸν ὁδόν. -ἢν δὲ παρεκβήῃς ἐς ἃ μὴ θέμις, οὔτι σ’ ὀνήσει -ἡ λάχνη· τρυπᾷν πάντας ἐπιστάμεθα. -
-
- - -agathias scholasticus - - - -αὐτομάτως, σατυρίσκε, δόναξ τεὸς ἦχον ἰάλλει; -ἢ τί παρακλίνας οὖας ἄγεις καλάμῳ; - -ὃς δὲ γελῶν σίγησεν· ἴσως δʼ ἂν φθέγξατο μῦθον, -ἀλλʼ ὑπὸ τερπωλῆς εἴχετο ληθεδόνι. -οὐ γὰρ κηρὸς ἔρυκεν· ἑκὼν δʼ ἠσπάζετο σιγήν, -θυμὸν ὅλον τρέψας πηκτίδος ἀσχολίῃ. -
-
- - -leontius minotaurus - - -τὸν Σάτυρον Διόνυσος ἰδὼν τόσον ἄλγος ἔχοντα, -καί μιν ἐποικτείρας, θήκατο λαΐνεον. -ἀλλʼ οὐδʼ ὣς ἀπέληξε βαρυτλήτων ὀδυνάων -εἰσέτι γὰρ μογέει, καὶ λίθος ὢν, ὁ τάλας. -
-
- - -anonymi epigrammatici - - -ἢ Σάτυρος τὸν χαλκὸν ὑπέδραμεν, ἢ διὰ τέχνης -χαλκὸς ἀναγκασθεὶς ἀμφεχύθη Σατύρῳ. -
-
- - -neilus - - - - - πάντες μὲν Σάτυροι φιλοκέρτομοι· εἰπὲ δὲ καὶ σύ, -τί πρὸς ἕκαστον ὁρῶν τόνδε γέλωτα χέεις; - - θάμβος ἔχων γελόω, πῶς, ἐκ λίθου ἄλλοθεν ἄλλης -συμφερτός, γενόμην ἐξαπίνης Σάτυρος. - -
-
- - -plato - - -τὸν Σάτυρον Διόδωρος ἐκοίμισεν, οὐκ ἐτόρευσεν. -ἢν νύξῃς, ἐγερεῖς· ἄργυρος ὕπνον ἔχει. -
-
- - -anonymi epigrammatici - - -δερκόμενος ξόανον καλὸν τόδε, τὰν Ἀφροδίταν, -ὤνθρωφʼ, ἱλάσκευ, πλατίον ἑζόμενος· -αἴνει δὲ Γλυκέραν Διονυσίου, ἅ μʼ ἀνέθηκε -πορφυρέας ἁπαλὸν κῦμα παρʼ ἠιόνος. -
-
- - -anonymi epigrammatici - - - -ὁ πτανὸς τὸν πτανὸν ἴδʼ ὡς ἄγνυσι κεραυνόν, -δεικνὺς ὡς κρεῖσσον πῦρ πυρός ἐστιν, Ἔρως. -
-
- - -anonymi epigrammatici - - -Πτανῷ πτανὸν Ἔρωτα τίς ἀντίον ἔπλασ’ Ἔρωτι; -ἁ Νέμεσις, τόξῳ τόξον ἀμυνομένα, -ὥς κε πάθῃ τὰ γʼ ἔρεξεν ὁ δὲ θρασύς, ὁ πρὶν ἀταρβὴς, -δακρύει, πικρῶν γευσάμενος βελέων, -ἐς δὲ βαθὺν τρὶς κόλπον ἀπέπτυσεν. ἆ μέγα θαῦμα· -φλέξει τις πυρὶ πῦρ· ἥψατʼ Ἔρωτος Ἔρως. - -
-
- - -anonymi epigrammatici - - -κἀγὼ Κύπριδος αἷμα· κασιγνήτῳ με μήτηρ -ᾔνεσε τόξα φέρειν ἀντία καὶ πτέρυγας. -
-
- - -anonymi epigrammatici - - - - - Ἄρτεμι, ποῦ σοι τόξα, παραυχενίη τε φαρέτρη; -ποῦ δὲ Λυκαστείων ἐνδρομὶς ἀρβυλίδων, -πόρπη τε χρυσοῖο τετυγμένη, ἠδὲ πρὸς ἄκρην -ἰγνύην φοῖνιξ πέπλος ἑλισσόμενος; - - κεῖνα μὲν εἰς ἄγρην ὁπλίζομαι· ἐς δὲ θυηλὰς -εἶμʼ αὕτως, ἱρῶν ἀντομένη θυέων. -
-
- - -anonymi epigrammatici - - - -ἱερὸν Ἑρμείῃ με παραστείχοντες ἔχευαν -ἄνθρωποι λίθινον σωρὸν ὁ δʼ ἀντʼ ὀλίγης -οὐ μεγάλην αὐτοῖς ἔγνων χάριν, ἀλλʼ ὅτι λοιπὰ -Αἰγὸς ἐπὶ κρήνην ἑπτὰ λέγω στάδια. -
-
- - -anonymi epigrammatici - - -Ὁδῖτα, μὴ πρόσερπε πρὸς τὰ κλήματα -μηδʼ αὖ τὰ μῆλα, μηδʼ ὅπῃ τὰ μέσπιλα -τηνεῖ δὲ πρὸς τὴν σχοῖνον ἐξαμείβεο, - -ὡς μή τι θράξῃς τῶνδε, μηδʼ ἀποθρίσῃς, -ἃ σὺν πόνῳ φυτουργὸς ἔκτηται Μίδων, -ὃς κἀμὲ θῆκεν ἢν δέ μευ παρακλύῃς, -γνώσῃ τὸν Ἑρμῆν, ὡς κακοὺς ἀμείβομαι. -
-
- - -anonymi epigrammatici - - -Ὀχθηρὸν τὸν χῶρον ἔχω καὶ ἔρημον, ὁδῖτα· -οὐκ ἐγώ, ὁ στάσας δʼ αἴτιος Ἀρχέλοχος. -οὐ γὰρ ὀρειοχαρὴς ὡρμᾶς, οὐδʼ ἀκρολοφίτας, -τὸ πλεῦν δʼ ἀτραπιτοῖς, ὦνερ, ἀρεσκόμενος. -Ἀρχέλοχος δʼ, ὡς αὐτὸς ἐρημοφίλας καὶ ἀγείτων, -ὦ παριών, τοῖον κἀμὲ παρῳκίσατο. -
-
- - -anonymi epigrammatici - - - -ἐκ πυρός, ὦ Διόνυσε, τὸ δεύτερον ἠνίδε χαλκοῦς -ἐξεφάνης· γενεὴν εὗρε Μύρων ἑτέρην. -
-
- - -anonymi epigrammatici - - - -Δικτύννης τοῖόν με καθʼ ἱερὸν ἔμπυρον ὁ Κρὴς -χάλκεον ἔστησεν Πᾶνα τὸν αἰγόνυχα. -δέρμα δʼ ἔχω, διπλοῦν τε λαγωβόλον ἐκ δὲ πετραίας -σπήλυγγος τείνω βλέμμα διπλοῦν πρὸς ὄρος. - -
-
- - -anonymi epigrammatici - - -πέτρης ἐκ Παρίης με πόλιν κατὰ Παλλάδος ἄκρην -στῆσαν Ἀθηναῖοι Πᾶνα τροπαιοφόρον. -
-
- - -anonymi epigrammatici - - -ἢν λαχάνων σ’ ὁ Πρίηπος ἴδω σχεδὸν ἴχνια θέντα, -αὐτᾖ γυμνώσω, φώρ, σὲ ποτὶ πρασιῇ. -αἰσχρὸν ἔχειν τοῦτʼ ἔργον ἐρεῖς θεὸν οἶδα καὶ αὐτὸς, -αἰσχρὸν ἀφιδρύνθην δʼ, ἴσθʼ ὅτι, τοῦδε χάριν. -
-
- - -leonidas - - -ἀμφοτέραις παρʼ ὁδοῖσι φύλαξ ἕστηκα Πρίηπος, -ἰθυτενὲς μηρῶν ὀρθιάσας ῥόπαλον. -εἵσατο γὰρ πιστόν με Θεόκριτος· ἀλλʼ ἀποτηλοῦ -φὼρ ἴθι, μὴ κλαύσῃς τὴν φλέβα δεξάμενος. -
-
- - -anonymi epigrammatici - - -ὁ τραγόπους, ὁ τὸν ἀσκὸν ἐπηρμένος, αἵ τε γελῶσαι -νύμφαι, Πραξιτέλους, ἥ τε καλὴ Δανάη. -λύγδινα πάντα, καὶ ἄκρα σοφαὶ χέρες. αὐτὸς ὁ Μῶμος -φθέγξεται· ἄκρητος, Ζεῦ πάτερ, ἡ σοφίη. - - -
-
- - -anonymi epigrammatici - - - -πρίν με λίθον Πέρσαι δεῦρʼ ἤγαγον, ὄφρα τρόπαιον -στήσονται νίκας· εἰμὶ δὲ νῦν Νέμεσις. -ἀμφοτέροις δʼ ἕστηκα, καὶ Ἑλλήνεσσι τρόπαιον -νίκας, καὶ Πέρσαις τοῦ πολέμου νέμεσις. -
-
- - -anonymi epigrammatici - - -Ἴσιδι καρποτόκῳ, σταχυμήτορι, μυριομόρφῳ, -λαϊνέῳ ταλάρῳ, μογερῶν ἀπάνευθεν ἀρότρων, -αὐτόματοι στείχουσιν ἑὴν πρὸς μητέρα καρποί. -
-
- - -anonymi epigrammatici - - -ταῖς Νύμφαις τόδʼ ἄγαλμα· μέλει δʼ αὐταῖσιν ὁ χῶρος. -ναὶ μέλοι, ὡς κρήναις ἄφθιτα ἄφθιτα ῥεῖθρα. -
-
- - -anonymi epigrammatici - - - -τίς τὸν ἐπʼ ἐσθλοῖσιν παμπενθέα καὶ τρισάλαστον -Μῶμον ἀμωμήτοις χερσὶν ἀνεπλκάσατο; -ὡς ὁ γέρων ἐπὶ γᾶς βεβλημένος, οἷά τις ἔμπνους -ἀμπαύει λύπας, γυῖα βαρυνόμενος. -μανύει δίστοιχος ὀλέθριος ὄγμος ὀδόντων, -πριομένων ἐπὶ τὰς τῶν πέλας εὐτυχίας, - -καὶ τὸ κατεσκληκὸς σκήνους βάρος· ᾇ μὲν ἐρείδει -ψιλὸν γηραιᾷ χειρὶ βαλὼν κρόταφον, -ᾇ δὲ σεσηρὼς βάκτρον ἀποστηρίζεται ἐς γᾶν, -κωφὰ πρὸς ἄψυχον πέτρον ἀπεχθόμενος. -
-
- - -anonymi epigrammatici - - - -Τάκεο δυστάνων ὀνύχων ἄπο παμφάγε Μῶμε, -τάκεο σὺ πρίων ἰοβόλους γένυας. -νεῦρά σε μανύει τετανυσμένα, καὶ φλέβες ἄρθρων, -καὶ κενεὰ σαρκῶν ψυχολιπὴς δύναμις, -καὶ ῥικνοῖς φρίσσουσα περὶ κροτάφοισιν ἔθειρα. - -ὥστε τίς ἔμψυχὸν σ’ ἀνδρὸς σίνιν ἄνυσε τέχνᾳ, -οὐδὲ τόπον δήκτᾳ σεῖο λιπὼν στόματι; -
-
- - -synesius - - - - - ὁππόθεν ὁ στήσας; Βυζάντιος. οὔνομα δὴ τίς; - - Εὑσέβιος. Σὑ δὲ τίς; Κώιος Ἱπποκράτης. - - τοῦ δʼ ἕνεκεν γέγραφέν σε; λόγων χάριν ἡ πόλις αὐτῷ -τῶν ἐς ἐμὲ γραφίδων ἀντιδέδωκε γέρας. - - καὶ τί μὴ αὐτὸς ἑὸν τύπον ἔγραφεν; ὅττι, γεραίρων -ἡμέας ἀνθʼ αὑτοῦ, κρέσσονα δόξαν ἔχει. - -
-
- - -anonymi epigrammatici - - -ἠὲ τεὴν φωνήν, Ἱππόκρατες, ἔγραφε Παιάν, -ἠὲ σὺ τῆς κείνου μάρτυς ἀκεστορίης -
-
- - -anonymi epigrammatici - - -οὗτος ἀκεστορίης κρυφίας ὤιξε κελεύθους, -Παιήων μερόπων, Κώιος Ἱπποκράτης, -
-
- - -magnus - - - -ἦν χρόνος, ἡνίκα γαῖα βροτοὺς διὰ σεῖο, Γαληνέ, -δέχνυτο μὲν θνητούς, ἔτρεφε δʼ ἀθανάτους, -χήρευεν δὲ μέλαθρα πολυκλαύτου Ἀχέροντος -σῇ παιηονίῃ χειρὶ βιαζόμενα. -
-
- - -anonymi epigrammatici - - - -ἰητὴρ μερόπων, Ἱππόκρατες, ἀλλὰ καὶ ἵππων, -Σώσανδρε, κρυφίης ἴστορʼ ἀκεστορίης, -ἢ τέχνην μεταμείψατʼ, ἢ οὔνομα· μηδὲ καλείσθω -ἅτερος ἐκ τέχνης, ἧς ἕτερος κρατέει, - -
-
- - -leontius minotaurus - - - -ὁ γλυκὺς ἐν πάντεσσιν Ἰάμβλιχος, ὃς ποτὶ γῆρας -ἤλυθεν ἁγνὸς ἐὼν Κυπριδίων ὀάρων· -ἔργα δʼ ἀκεστορίης ἐφέπων, σοφίην τε διδάσκων, -κέρδεσιν οὐδʼ ὁσίοις χεῖρας ὑπεστόρεσεν. -
-
- - -crinagoras - - - -αὐτός σοι Φοίβοιο πάις λαθικηδέα τέχνης -ἰδμοσύνην, πανάκῃ χεῖρα λιπηνάμενος, -Πρηξαγόρη, στέρνοις ἐνεμάξατο. τοιγὰρ ἀνῖαι -ὄρνυνται δολιχῶν ὁππόσαι ἐκ πυρετῶν, -καὶ ὁπόσα τμηθέντος ἐπὶ χροὸς ἄρκια θεῖναι -φάρμακα, πρηείης οἶσθα παρʼ Ἠπιόνης. -θνητοῖσιν δʼ εἰ τοῖοι ἐπήρκεον ἰητῆρες, -οὐκ ἂν ἐπορθμεύθη νεκροβαρὴς ἄκατος. -
-
- - -anonymi epigrammatici - - - -ἰητὴρ μέγας οὗτος Ἰουλιανοῦ βασιλῆος, -ἄξιος εὐσεβίης δῖος Ὀρειβάσιος. -εἶχε γὰρ οἷα μέλισσα σοφὸν νόον, ἄλλοθεν ἄλλα -ἰητρῶν προτέρων ἄνθεα δρεψάμενος. - -
-
- - -posidippus - - - - - τίς πόθεν ὁ πλάστης; Σικυώνιος. οὔνομα δὴ τίς; - - Λύσιππος. σὺ δὲ τίς; καιρὸς ὁ πανδαμάτωρ. - - τίπτε δʼ ἐπʼ ἄκρα βέβηκας; ἀεὶ τροχάω. τί δὲ ταρσοὺς -ποσσὶν ἔχεις διφυεῖς; Ἵπταμʼ ὑπηνέμιος. - - χειρὶ δὲ δεξιτερῇ τί φέρεις ξυρόν; ἀνδράσι δεῖγμα, -ὡς ἀκμῆς πάσης ὀξύτερος τελέθω. - - ἡ δὲ κόμη, τί κατʼ ὄψιν; Ὑπαντιάσαντι λαβέσθαι. - - νὴ Δία, τἀξόπιθεν δʼ εἰς τί φαλακρὰ πέλει; - - τὸν γὰρ ἅπαξ πτηνοῖσι παραθρέξαντά με ποσσὶν -οὔτις ἔθʼ ἱμείρων δράξεται ἐξόπιθεν. - - τοὔνεχʼ ὁ τεχνίτης σε διέπλασεν; εἵνεκεν ὑμέων, -ξεῖνε· καὶ ἐν προθύροις θῆκε διδασκαλίην. -
-
- - -bianor - - -ἔστησεν Περίανδρος Ἀρίονος εἰκόνα ταύτην, -καὶ τὸν ἀπολλυμένῳ σύνδρομα νηξάμενον -εἰνάλιον δελφῖνα. λέγει δʼ ἐπʼ Ἀρίονι μῦθος· -κτεινόμεθʼ ἀνθρώποις, ἰχθύσι σῳζόμεθα. - -
-
- - -paulus silentiarius - - - -σὸν μὲν κάλλος ἔδειξε μόλις γραφίς· αἴθε δὲ τεύχειν -ἔσθενε καὶ λιγυρῶν ἡδὺ μέλος στομάτων, -ὥς κεν ἐπʼ ὀφθαλμοῖσι καὶ οὔασιν, ἔκ τε προσώπου, -ἔκ τε λυροκτυπίης, ἶσον ἐθελγόμεθα. -
-
- - -paulus silentiarius - - - -πλῆκτρον ἔχει φόρμιγγος, ἔχει καὶ πλῆκτρον ἔρωτος· -κρούει δʼ ἀμφοτέροις καὶ φρένα καὶ κιθάρην. -τλήμονες, οἷς ἄγναμπτον ἔχει νόον ᾧ δʼ ἐπινεύσει, -ἄλλος ὅδʼ Ἀγχίσης, ἄλλος Ἄδωνις ὅδε. -εἰ δʼ ἐθέλεις, ὦ ξεῖνε, καὶ ἀμφιβόητον ἀκοῦσαι -οὔνομα καὶ πάτρην ἐκ Φαρίης Μαρίη. -
-
- - -anonymi epigrammatici - - - -τόν με λίθον μέμνησο τὸν ἠχήεντα, παρέρπων -Νισαίην ὅτε γὰρ τύρσιν ἐτειχοδόμει -Ἀλκάθοος, τότε Φοῖβος ἐπωμαδὸν ἦρε δομαῖον -λᾶα, Λυκωρείην ἐνθέμενος κιθάρην. -ἔνθεν ἐγὼ λυραοιδός ὑποκρούσας δέ με λεπτῇ -χερμάδι, τοῦ κόμπου μαρτυρίην κόμισαι. - -
-
- - -anonymi epigrammatici - - - -χρήμασι τοῖς Ἀγάθωνος ἐδείματο τῇδε λοετρὸν -δῆμος ὁ τῆς Τεγέης, θαῦμα καὶ ἐσσομένοις. -
-
- - -anonymi epigrammatici - - - -οὐ βαλανεῖον ἔην προπάροιθε τὸ νῦν βαλανεῖον, -ἀλλὰ τόπος σκυβάλων, χῶρος ἀποκρίσιος· -νῦν δὲ τὰ τερπνὰ τὰ πᾶσι βοώμενα καὶ χαρίεντα -ἀγλαΐῃ προφέρει. καὶ γὰρ Ἀλέξανδρος -Νικαέων ἱερεύς, σοφίης ἐρικυδέος ἀστήρ, -τεῦξέ μιν οἰκείοις χρήμασι καὶ δαπάναις. -
-
- - -palladas - - -νῖκαι πάρεσμεν, αἱ γελῶσαι παρθένοι, -νίκας φέρουσαι τῇ φιλοχρήστῳ πόλει. -ἔγραψαν ἡμᾶς οἱ φιλοῦντες τὴν πόλιν, -πρέποντα Νίκαις ἐντυποῦντες σχήματα. -
-
- - -leontius minotaurus - - - -Μουσάων δεκάτη, Χαρίτων Ῥοδόκλεια τετάρτη, -τερπωλὴ μερόπων, ἄστεος ἀγλαΐη. -ὄμμα δέ οἱ καὶ ταρσὰ ποδήνεμα, καὶ σοφὰ Χαρίτων -δάκτυλα καὶ Μουσῶν κρέσσονα καὶ Χαρίτων. - -
-
- - -leontius minotaurus - - - -εἰμὶ μὲν Ἑλλαδίη Βυζαντιάς, ἐνθάδε δʼ ἔστην -ᾗχι χοροστασίην εἴαρι δῆμος ἄγει, -ὁππόθι πορθμῷ γαῖα μερίζεται· ἀμφότεραι γὰρ -ἄντυγες ὀρχηθμοὺς ᾔνεσαν ἡμετέρους. -
-
- - -leontius minotaurus - - - -οὔ τις ἐπʼ Ἀνθούσῃ χρυσὸν βάλεν, ἀλλὰ καὶ αὐτῇ -ἀμφεχύθη Κρονίδης, ὡς τὸ πάρος Δανάῃ· -σώματι δʼ οὐκ ἐπέλασσεν, ἐπεὶ νόον ἔλλαβεν αἰδώς, -μή τινι Μουσάων μίσγεται οὐκ ἐθέλων. -
-
- - -leontius minotaurus - - -θῆλυς ἐν ὀρχηθμοῖς κρατέει φύσις· εἴξατε κοῦροι· -Μοῦσα καὶ Ἑλλαδίη τοῦτον ἔθεντο νόμον -ἡ μέν, ὅτι πρώτη κινήσιος εὕρετο ῥυθμούς, -ἡ δʼ, ὅτι τῆς τέχνης ἦλθεν ἐς ἀκρότατον. -
-
- - -leontius minotaurus - - -Ἕκτορα μέν τις ἄεισε, νέον μέλος· Ἑλλαδίη δέ, -ἑσσαμένη χλαῖναν, πρὸς μέλος ἠντίασεν. -ἦν δὲ πόθος καὶ δεῖμα παρʼ ὀρχηθμοῖσιν Ἐνυοῦς· -ἄρσενι γὰρ ῥώμῃ θῆλυν ἔμιξε χάριν. - -
-
- - -leontius minotaurus - - - -οὔνομʼ ἔχεις;λιβάνου, Χαρίτων δέμας, ἤθεα Πειθοῦς, -παρθένε, καὶ Παφίης κεστὸν ὑπὲκ λαγόνων. -αὐτὰρ ἐν ὀρχηθμοῖσιν, Ἔρως ἅτε κοῦφος,˘ ἀθύρεις, -κάλλεϊ καὶ τέχνῃ πάντας ἐφελκομένη. -
-
- - -anonymi epigrammatici - - - -αὐτὸν ὁρᾶν Ἰόβακχον ἐδόξαμεν, ἡνίκα Ληναῖς -ὁ πρέσβυς νεαρῆς ἦρχε χοροιμανίης, -καὶ Κάδμου τὰ πάρηβα χορεύματα, καὶ τὸν ἀφʼ ὕλης -ἄγγελον εὐιακῶν ἰχνελάτην θιάσων, -καὶ τὴν εὐάζουσαν ἐν αἵματι παιδὸς Ἀγαυὴν -λυσσάδα. φεῦ θείης ἀνδρὸς ὑποκρισίης. -
-
- - -antipater - - - -αὐτὸν βακχευτὴν ἐνέδυ θεόν, ἡνίκα βάκχας -ἐκ Θηβῶν Ἰταλὴν ἤγαγε πρὸς θυμέλην, -ἀνθρώποις Πυλάδης τερπνὸν δέος, οἷα χορεύων -δαίμονος ἀκρήτου πᾶσαν ἔπλησε πόλιν. - -Θῆβαι γιγνώσκουσι τὸν ἐκ πυρός· οὐράνιος δὲ -οὗτος, ὁ παμφώνοις χερσὶ λοχευόμενος. -
-
- - -anyte - - -Φριξοκόμᾳ τόδε Πανὶ καὶ αὐλιάσιν θέτο Νύμφαις -δῶρον ὑπὸ σκοπιᾶς Θεύδοτος οἰονόμος· -οὕνεχʼ ὑπʼ ἀζαλέου θέρεος μέγα κεκμηῶτα -παῦσαν, ὀρέξασαι χερσὶ μελιχρὸν ὕδωρ. -
-
- - -anonymi epigrammatici - - - -υἱὲ Μέλητος Ὅμημε, σὺ γὰρ κλέος Ἑλλάδι πάσῃ -καὶ Κολοφῶνι πάτρῃ θῆκας ἐς ἀΐδιον, -καὶ τάσδʼ ἀντιθέῳ ψυχῇ γεννήσαο κούρας, -δισσὰς ἐκ στηθέων γραψάμενος σελίδας· -ὑμνεῖ δʼ ἡ μὲν νόστον Ὀδυσσῆος πολύπλαγκτον, -ἡ δὲ τὸν Ἰλιακὸν Δαρδανιδῶν πόλεμον. -
-
- - -anonymi epigrammatici - - -τίς ποθʼ ὁ τὸν Τροίης πόλεμον σελίδεσσι χαράξας, -ἢ τίς ὁ τὴν δολιχὴν Λαρτιάδαο πλάνην; -οὐκ ὄνομʼ εὑρίσκω σαφές, οὐ πόλιν. οὐράνιε Ζεῦ, -μή ποτε σῶν ἐπέων δόξαν Ὅμηρος ἔχει; - -
-
- - -anonymi epigrammatici - - -ποίας ἀστὸν Ὅμηρον ἀναγραψώμεθα πάτρης, -κεῖνον, ἐφʼ ὃν πᾶσαι χεῖρʼ ὀρέγουσι πόλεις; -ἢ τὸ μέν ἐστιν ἄγνωστον, ὁ δʼ ἀθανάτοις ἴσος ἥρως -ταῖς Μούσαις ἔλιπεν πατρίδα καὶ γενεήν; -
-
- - -anonymi epigrammatici - - -οὐχὶ πέδον Σμύρνης ἐλοχεύσατο θεῖον Ὅμηρον, -οὐ Κολοφὼν τρυφερῆς ἄστρον Ἰηονίης, -οὐ Χίος, οὐκ Αἴγυπτος ἐύσπορος, οὐ Κύπρος ἁγνή, -οὐ νῆσος κραναὴ Λαρτιάδαο πάτρη, -οὐκ Ἄργος Δαναοῖο, κυκλωπείη τε Μυκήνη, -οὐδὲ τὸ Κεκροπιδῶν ἄστυ παλαιογόνων. -οὐ γὰρ ἔφυ χθονὸς ἔργον· ἀπʼ αἰθέρος ἀλλὰ ἑ Μοῦσαι -πέμψαν, ἵνʼ ἡμερίοις δῶρα ποθητὰ φέροι. -
-
- - -antipater - - -οἱ μέν σευ Κολοφῶνα τιθηνήτειραν, Ὅμηρε, -οἱ δὲ καλὰν Σμύρναν, οἱ δʼ ἐνέπουσι Χίον, -οἱ δʼ Ἴον, οἱ δʼ ἐβόασαν ἐΰκλαρον Σαλαμῖνα, -οἱ δέ νυ τῶν Λαπιθέων ματέρα Θεσσαλίην· -ἄλλοι δʼ ἄλλην μαῖαν ἀνίαχον. εἰ δέ με Φοίβου -χρὴ λέξαι πινυτὰς ἀμφαδὰ μαντοσύνας, -πάτρα σοι τελέθει μέγας οὐρανός, ἐκ δὲ τεκούσης -οὐ θνατᾶς, ματρὸς δʼ ἔπλεο Καλλιόπας, - -
-
- - -anonymi epigrammatici - - -ἑπτὰ ἐριδμαίνουσι πόλεις διὰ ῥίζαν Ὁμήρου, -Κύμη, Σμύρνα, Χίος, Κολοφών, Πύλος, Ἄργος, Ἀθῆναι. -
-
- - -anonymi epigrammatici - - -ἑπτὰ πόλεις μάρναντο σοφὴν διὰ ῥίζαν Ὁμήρου, -Σμύρνα, Χίος, Κολοφών, Ἰθάκη, Πύλος, Ἄργος, Ἀθῆναι. -
-
- - -anonymi epigrammatici - - - - Χῖος ἔφυς; οὔ φημι. τί δαί, Σμυρναῖος; ἀπαυδῶ. - - Κύμη δʼ ἢ Κολοφὼν πατρίς, Ὅμηρε, σέθεν; - - Οὑδετέρη. Σαλαμὶς δὲ τεὴ πόλις; οὐδʼ ἀπὸ ταύτης -ἐξέφυν. ἀλλʼ αὐτὸς λέξον ὅπῃ γέγονας. - - οὐκ ἐρέω. τίνος ἦρα; Πέπεισμʼ ὅτι τἀτρεκὲς εἰπὼν -ἕξω τὰς ἄλλας ἄμμιν ἀπεχθομένας. -
-
- - -anonymi epigrammatici - - -εἰς αἰῶνας, Ὅμηρε, καὶ ἐξ αἰῶνος ἀείδῃ, -οὐρανίης Μούσης δόξαν ἀειράμενος. -μῆνιν μὲν γὰρ ἄεισας Ἀχιλλέος, ἄεισας Ἀχαιῶν -στρομβηδὸν νηῶν σύγχυσιν ἐν πελάγει, -τειρόμενόν τε πλάνῃσιν Ὀδυσσέα ποικιλόβουλον, -τοῦ λέχος ἀσπασίως εἴσιδε Πηνελόπη, - -
-
- - -anonymi epigrammatici - - -εἰ θεός ἐστιν Ὅμηρος, ἐν ἀθανάτοισι σεβέσθω· -εἰ δʼ αὖ μὴ θεός ἐστι, νομιζέσθω θεὸς εἶναι. -
-
- - -anonymi epigrammatici - - -εὗρε Φύσις, μόλις εὗρε· τεκοῦσα δʼ ἐπαύσατο μόχθων, -εἰς ἕνα μοῦνον Ὅμηρον ὅλην τρέψασα μενοινήν. -
-
- - -anonymi epigrammatici - - -τίς ποθʼ Ὁμηρείης μεγάλης ὀπός ἐστιν ἀπευθής; -τίς χθών, τίς δὲ θάλασσα μάχην οὐκ οἶδεν Ἀχαιῶν; -δῆμος ὁ Κιμμερίων, πανδερκέος ἄμμορος αἴγλης -ἠελίου, Τροίης ὄνομʼ ἔκλυεν, ἔκλυεν Ἄτλας -οὐρανὸν εὐρύστερνον ἔχων ἐπικείμενον ὤμοις. -
-
- - -anonymi epigrammatici - - -διεξιών, Ὅμηρε, τὴν κεκαυμένην, -φθονεῖν ἀφῆκας τὰς ἀπορθήτους πόλεις. -
-
- - -antipater - - - -Νεβρείων ὁπόσον σάλπιγξ ὑπερίαχεν αὐλῶν, -τόσσον ὑπὲρ πάσας ἔκραγε σεῖο χέλυς· - -οὐδὲ μάτην ἁπαλοῖς περὶ χείλεσιν ἑσμὸς ἐκεῖνος -ἔπλασε κηρόδετον, Πίνδαρε, σεῖο μέλι. -μάρτυς ὁ Μαινάλιος κερόεις θεός, ὕμνον ἀείσας -τῶν σέο, καὶ νομίων λησάμενος δονάκων. -
-
- - -leonidas - - - -πρέσβυν Ἀνακρείοντα χύδαν σεσαλαγμένον οἴνῳ -θάεο δινωτοῦ στρεπτὸν ὕπερθε λίθου, -ὡς ὁ γέρων λίχνοισιν ἐπʼ ὄμμασιν ὑγρὰ δεδορκὼς -ἄχρι καὶ ἀστραγάλων ἕλκεται ἀμπεχόναν· -δισσῶν δʼ ἀρβυλίδων τὰν μὲν μίαν, οἷα μεθυπλήξ, -ὤλεσεν· ἐν δʼ ἑτέρᾳ ῥικνὸν ἄραρε πόδα. -μέλπει δʼ ἠὲ Βάθυλλον ἐφίμερον, ἠὲ Μεγιστέα, -αἰωρῶν παλάμᾳ τὰν δυσέρωτα χέλυν. -ἀλλὰ πάτερ Διόνυσε, φύλασσέ μιν οὐ γὰρ ἔοικεν -ἐκ Βάκχου πίπτειν Βακχιακὸν θέραπα. -
-
- - -leonidas - - -ἴδʼ ὡς ὁ πρέσβυς ἐκ μέθας Ἀνακρέων -ὑπεσκέλισται, καὶ τὸ λῶπος ἕλκεται -ἐσάχρι γυίων τῶν δὲ βλαυτίων τὸ μὲν -ὅμως φυλάσσει, θάτερον δʼ ἀπώλεσεν. -μελίσδεται δὲ τὰν χέλυν διακρέκων -ἤτοι Βάθυλλον, ἢ καλὸν Μεγιστέα. -φύλασσε, Βάκχε, τὸν γέροντα, μὴ πέσῃ. - -
-
- - -eugenes - - -τὸν τοῖς μελιχροῖς Ἱμέροισι σύντροφον, -Λυαῖʼ, Ἀνακρείοντα Τήιον κύκνον, -ἔσφηλας ὑγρῇ νέκταρος μεληδόνι. -λοξὸν γὰρ αὐτοῦ βλέμμα, καὶ περὶ σφυροῖς -ῥιφθεῖσα λώπευς πέζα, καὶ μονοζυγὲς -μέθην ἐλέγχει σάνδαλον χέλυς δʼ ὅμως -τὸν εἰς Ἔρωτας ὕμνον ἀθροΐζεται. -ἀπτῶτα τήρει τὸν γεραιόν, Εὔιε. -
-
- - -anonymi epigrammatici - - -Τήιον ἀμφοτέρων με βλέπεις ἀκόρεστον ἐρώτων -πρέσβυν, ἴσον κούροις, ἶσον ἁδόντα κόραις· -ὄμμα δέ μευ Βρομίῳ βεβαρημένον, ἠδʼ ἀπὸ κώμων -τερπνὰ φιλαγρύπνων σήματα παννυχίδων. -
-
- - -damocharis - - - -αὐτή σοι πλάστειρα Φύσις παρέδωκε τυπῶσαι -τὴν Μυτιληναίαν, ζωγράφε, Πιερίδα. -πηγάζει τὸ διαυγὲς ἐν ὄμμασι τοῦτο δʼ ἐναργῶς -δηλοῖ φαντασίην ἔμπλεον εὐστοχίης. -αὐτομάτως δʼ ὁμαλή τε καὶ οὐ περίεργα † κολῶσα -σάρξ ὑποδεικνυμένην τὴν ἀφέλειαν ἔχει. -ἄμμιγα δʼ ἐξ ἱλαροῖο καὶ ἐκ νοεροῖο προσώπου -μοῦσαν ἀπαγγέλλει Κύπριδι μιγνυμένην. - -
-
- - -anonymi epigrammatici - - - -Ὀππιανὸς σέλίδεσσιν ἁλίπλοα φῦλα συνάψας -θήκατο πᾶσι νέοις ὄψον ἀπειρέσιον. -
-
- - -anonymi epigrammatici - - - -Καλλιόπη βασίλεια Γεώργιον εἶπεν ἰδοῦσα· - -οὗτος ἐμὸς γενέτης γνήσιος, οὐ Κρονίδης. - -
-
- - -anonymi epigrammatici - - - - - Εἰκῶν, τίς σ’ ἄνεθηκε; λόγοι. τίνος εἶ; Πτολεμαίου. - - ποίου; τοῦ Κρητός. τεῦ χάριν; ἀντʼ ἀρετῆς. - - τῆς ποδαπῆς; πάσης. τῆς ἐς τίνας; ἐς δικολέκτας. - - καὶ ξύλον ἀρκεῖ; ναί· χρυσίον οὐ δέχεται. -
-
- - -arabius - - -εἰκόνα Λογγίνῳ χρυσέην πόλις εἶχεν ὀπάσσαι, -εἰ μὴ πότνα Δίκη χρυσὸν ἀπεστρέφετο. - -
-
- - -thomas - - -ῥητορικῆς φιλέω τρεῖς ἀστέρας, οὕνεκα μοῦνοι -πάντων ῥητήρων εἰσὶν ἀρειότεροι· -σεῖο πόνους φιλέω, Δημόσθενες· εἰμὶ δὲ λίην -καὶ φιλαριστείδης καὶ φιλοθουκυδίδης. -
-
- - -michaelius - - - -ἡ πόλις Ἀγαθίαν τὸν ῥήτορα, τὸν στιχαοιδόν, -δίζυγος εὐεπίης ῥυθμὸν ἀγασσαμένη, -ὡς μήτηρ ἐτέλεσσεν ἐφʼ υἱέι, καὶ πόρε τήνδε -εἰκόνα, καὶ στοργῆς μάρτυρα καὶ σοφίης· -Μεμνόνιον δὲ τοκῆα, κασίγνητόν τε σὺν αὐτῷ -ἔστησεν, γενεῆς σύμβολα σεμνοτάτης. -
-
- - -palladas - - -κωφὸν ἄναυδον ὁρῶν τὸν Γέσσιον, εἰ λίθος ἐστί, -Δήλιε, μαντεύου, τίς τίνος ἐστὶ λίθος. -
-
- - -anonymi epigrammatici - - - -τίς σὲ τὸν οὐ λαλέοντα τύπῳ ῥητῆρος ἔγραψε· -σιγᾷς, οὐ λαλέεις· οὐδὲν ὁμοιότερον. - -
-
- - -anonymi epigrammatici - - - -εἰκόνες ἀνθρώποισι φίλον γέρας· ἀλλὰ Μαρίνῳ -ὕβρις, ἐλεγχομένης εἴδεος ἀπρεπίης. -
-
- - -anonymi epigrammatici - - -[εἰς ἄγαλμα Ἀριστείδου ῥήτορος -νεῖκος Ἀριστείδης Ἰάδων -κατέπαυσε πολήων, -τὸ πρὶν Ὁμηρείης εἶχον -ὑπὲρ γενεῆς. -φασὶν γὰρ πᾶσαι “ Σμύρνη -τέκε θεῖον Ὅμηρον, -ἡ καὶ Ἀριστείδην ῥήτορα γειναμένη.” -
-
- - -anonymi epigrammatici - - -εἰκὼν Καλλίστου τοῦ ῥήτορος· οἱ δὲ παρʼ αὐτὴν -ἐρχόμενοι, Ἑρμῇ σπένδετε τῷ λογίῳ. -
-
- - -anonymi epigrammatici - - -Φύρμος με Φύρμον, πυρφόρος τὸν πυρφόρον, -ὁ παῖς ὁ ῥήτωρ τὸν πατέρα τὸν ῥήτορα, - -
-
- - -mesomedes - - -τὰν ὕελον ἐκόμιζε -κόψας ἐργάτας ἀνήρ -ἐς δὲ πῦρ ἔθηκε βῶλον, -ὡς σίδηρον εὐσθενῆ· -ἁ δʼ ὕελος, οἷα κηρός, -ἐξεχεῖτο, παμφάγοισι -φλοξὶν ἐκπυρουμένα· -θαῦμα δʼ ἦν ἰδεῖν βροτοῖς -ὁλκὸν ἐκ πυρὸς ῥέοντα, -καὶ τὸν ἐργάτην τρέμοντα, -μὴ πεσὼν διαρραγῇ. -ἐς δὲ διπτύχων ἀκμὰς -χηλέων ἔθηκε βῶλον. -
-
- - -anonymi epigrammatici - - -ἡ γραφὶς ἀργυρέη μὲν ὅτʼ ἐκ πυρὸς ἦλθον ἐτύχθην, -σαῖσι δὲ καὶ χρυσέη γίνομαι ἐν παλάμαις. -ὧδέ σοι, ὦ χαρίεσσα Λεόντιον, εὖ μὲν Ἀθήνη -τέχνης, εὖ δʼ εἴδους ἄκρα δέδωκε Κύπρις. -
-
- - -Julianus - - - -οὐ τὸν ἀναπτύσσοντα φύσιν πολύμητιν ἀριθμῶν -ἤθελεν ὁ πλάστης Πυθαγόραν τελέσαι, -ἀλλὰ τὸν ἐν σιγῇ πινυτόφρονι· καὶ τάχα φωνὴν -ἔνδον ἀποκρύπτει, καὶ τόδʼ ἔχων ὀπάσαι. - -
-
- - -anonymi epigrammatici - - - -αὐτὸν Πυθαγόραν ὁ ζωγράφος, ὃν μετὰ φωνῆς -εἶδες ἄν, εἴ γε λαλεῖν ἤθελε Πυθαγόρας. -
-
- - -Joannes barbucallus - - -ὡς σοφὸς ὁ γράψας· ζωὰν οὐκ ἔμβαλε κηρῷ, -Σωκράτεος ψυχᾷ τοῦτο χαριζόμενος. -
-
- - -anonymi epigrammatici - - -τὸν νοῦν διδάσκων αἰθερεμβατεῖν Πλάτων, -τοὺς τῶν ὑπὲρ νοῦν ἐξερεύγεται λόγους. - -
-
- - -anonymi epigrammatici - - - -οὗτος Ἀριστοτέλης μετρῶν χθόνα καὶ πόλον ἄστρων. -
-
- - -anonymi epigrammatici - - -νοῦς καὶ Ἀριστοτέλους ψυχή, τύπος ἀμφοτέρων εἷς. -
-
- - -agathias scholasticus - - - -σεῖο πολυκλήεντα τύπον στῆσαν, Χαιρωνεῦ -Πλούταρχε, κρατερῶν υἱέες Αὐσονίων, -ὅττι παραλλήλοισι βίοις Ἕλληνας ἀρίστους -Ῥώμης εὐπολέμοις ἥρμοσας ἐνναέταις. -ἀλλὰ τεοῦ βιότοιο παράλληλον βίον ἄλλον -οὐδὲ σὺ γʼ ἂν γράψαις· οὐ γὰρ ὅμοιον ἔχεις. - -
-
- - -agathias scholasticus - - - -εὖγε ποιῶν, Λύσιππε γέρων, Σικυώνιε πλάστα, -δείκελον Αἰσώπου στήσαο τοῦ Σαμίου -ἑπτὰ σοφῶν ἔμπροσθεν· ἐπεὶ κεῖνοι μὲν ἀνάγκην -ἔμβαλον, οὐ πειθώ, φθέγμασι τοῖς σφετέροις, -ὃς δὲ σοφοῖς μύθοις καὶ πλάσμασι καίρια λέξας, -παίζων ἐν σπουδῇ, πείθει ἐχεφρονέειν. -φευκτὸν δʼ ἡ τρηχεῖα παραίνεσις· ἡ Σαμίου δὲ -τὸ γλυκὺ τοῦ μύθου καλὸν ἔχει δέλεαρ. -
-
- - -antiphilus - - -ἡ πήρη καὶ χλαῖνα καὶ ὕδατι πιληθεῖσα -μάζα, καὶ ἡ πρὸ ποδῶν ῥάβδος ἐρειδομένη, -καὶ δέπας ἐκ κεράμοιο, σοφῷ κυνὶ μέτρα βίοιο -ἄρκια κἠν τούτοις ἦν τι περισσότερον -κοίλαις γὰρ πόμα χερσὶν ἰδὼν ἀρύοντα βοώτην, -εἶπε· τί καὶ σὲ μάτην, ὄστρακον, ἠχθοφόρουν; - - -
-
- - -antiphilus - - -γηράσκει καὶ χαλκὸς ὑπὸ χρόνου· ἀλλὰ σὸν οὔτι -κῦδος ὁ πᾶς αἰών, Διόγενες, καθελεῖ· -μοῦνος ἐπεὶ βιοτᾶς αὐτάρκεα δόξαν ἔδειξας -θνητοῖς, καὶ ζωῆς οἶμον ἐλαφροτάτην. -εἰς τὰς ἐν τῷ Ἱπποδρόμῳ Κωνσταντινουπόλεως -στήλας τῶν ἀθλητῶν ἐπιγράμματα. -
-
- - -anonymi epigrammatici - - - -Πορφύριον Κάλχαντος ἄναξ καὶ δῆμος ἐγείρει, -πολλοῖς εὐκαμάτοις βριθόμενον στεφάνοις, -πᾶσι μεθʼ ἡνιόχοισι νεώτατον, ὅσσον ἄριστον, -ἀλλὰ τόσον νίκης κάρτος ἐνεγκάμενον. -ἔπρεπε μὴν χρυσέῳ ἐν ἀγάλματι, μὴ δʼ ἐνὶ χαλκῷ -τοῦτον τοῖς ἄλλοις εἴκελον ἑστάμεναι. -
-
- - -anonymi epigrammatici - - -τέτραχα μὲν τὸ πάροιθε διακριδὸν ἴαχε δῆμος, -τὸν Καλχαντιάδην;Πορφύριον ποθέων· αὐτὰρ -ὃ δεξιτεροῖσιν ἀνακτορέοιο θοώκου -ἡνία καὶ ζώνην ἱππότιν ἀνθέμενος, - -κεῖθεν ἐπισπέρχων ἐλάᾳ· μεσσηγὺ δʼ ἀέθλων -χάλκεος ἱδρύνθη, πρῶτον ἴουλον ἔχων, -εἰ δʼ ἐτέων γέρας ἦλθε θοώτερον, ἀλλʼ ἐπὶ νίκαις -ὄψιμον, ἀλλὰ μόλις, πολλὰ μετὰ στέφεα. -
-
- - -anonymi epigrammatici - - -Ἀγχίσην Κυθέρεια, καὶ Ἐνδυμίωνα Σελήνη -φίλατο· καὶ Νίκη νῦν τάχα Πορφύριον, -ὃς καὶ ἑοὺς ἵππους καὶ ὁμόφρονος ἡνιοχῆος -ἐξ ἑτέρων ἑτέρους αἰὲν ἀμειβόμενος, -πολλάκι κρᾶτα πύκασσε πανημερίοισιν ἀέθλοις, -οὐ μογέων, ἑτάρου μοῦνον ἐφεσπομένου. -
-
- - -anonymi epigrammatici - - -τοῦτό σοι ἠϊθέῳ Νίκη γέρας, ὃ χρόνος ἄλλοις -ὀψὲ μόλις πολιοῖς ὤπασε, Πορφύριε. -καὶ γὰρ ἀριθμήσασα πολυστεφέας σέο μόχθους -εὕρετο γηραλέων κρέσσονας ἡνιόχων. -τί πλέον, ὅττι καὶ αὐτὸς ἐπευφήμησεν ἀύσας -σὸν κλέος ἀντιπάλων δῆμος ἀγασσάμενος; -ὀλβίη ἡ Βενέτων πανελεύθερός ἐστι γενέθλη, -σε μέγας βασιλεὺς δῶρον ἔνευσεν ἔχειν. -
-
- - -anonymi epigrammatici - - -ἄλκιμοι ἀλκήεντα, σοφοὶ σοφόν, υἱέα Νίκης , -οἱ Νίκης παῖδες Πορφύριον Βένετοι -ἄνθεσαν ἀμφοτέραις γὰρ ἀμειβομένοις ἐπὶ πώλοις -κυδιάει νίκαις, οἷς πόρεν, οἷς ἔλαβεν. - -
-
- - -anonymi epigrammatici - - -ἄλλοις παυσαμένοισιν, ἀεθλεύοντι δὲ μούνῳ -Πορφυρίῳ βασιλεὺς τοῦτο δέδωκε γέρας. -πολλάκι νικήσας γὰρ ἑοὺς πόρεν ὠκέας ἵππους, -λάζετο δʼ ἀντιπάλων, καὶ πάλιν ἐστέφετο. -ἔνθεν ἔην Πρασίνοις ἔρις ἄσπετος, ἔνθεν ἀυτή, - -ὃς Βενέτους τέρψει, Κοίρανε, καὶ Πρασίνους. - -
-
- - -anonymi epigrammatici - - -αἱ πάντων ψῆφοί με καὶ εἰσέτι διφρεύοντα -ἔστησαν Νίκης ἐγγύθι Πορφύριον. -δῆμος μὲν γὰρ ἐμὸς γέρας ᾔτεεν· οἱ δʼ ἕτεροί με -δίζοντʼ αὖτις ἔχειν, νεῖκος ἀπειπάμενοι. -μήτι δʼ ἡνιόχων περιγίγνομαι, οἷσι καὶ ἵππους -κρείσσονας ἀντιπορὼν, δεῖξα χερειοτέρους. -
-
- - -anonymi epigrammatici - - -αὐτὸν Πορφύριον μὲν ἀπηκριβώσατο χαλκῷ -ὁ πλάστης, ἔμπνουν οἷα τυπωσάμενος. -τίς δὲ χάριν, τίς ἄεθλα, τίς ἔνθεα δήνεα τέχνης -τεύξει, καὶ νίκην οὔποτʼ ἀμειβομένην; -
-
- - -anonymi epigrammatici - - -εἰκόνι χαλκείῃ τὸν χάλκεον ἡνιοχῆα -ἄνθετο νικητὴν κοίρανος Αὐσονίων, -ὡς σοφόν, ὡς Βενέτοις πεφιλημένον ἀλλʼ ἐπὶ νίκαις -Πορφυρίου πολλὰς εἰκόνας ὀψόμεθα. - -
-
- - -anonymi epigrammatici - - - - τίς τελέθεις, φίλε κοῦρε, γενειάδος ἄκρα χαράσσων; - - ὦ ξένε, Πορφύριος. τίς πατρίς; ἡ Λιβύη. - - τίς δέ σε νῦν τίμησεν; ἄναξ, χάριν ἱπποσυνάων. - - τίς μάρτυς τελέθει; δῆμος τῶν Βενέτων. - - ἔπρεπέ σοι Λύσιππον ἔχειν ἐπιμάρτυρα νίκης -τοσσατίης, πλάστην ἴδμονα, Πορφύριε. -
-
- - -anonymi epigrammatici - - -ἐγγύθι τῆς Νίκης καὶ Ἀλεξάνδρου βασιλῆος -ἔστης, ἀμφοτέρων κύδεα δρεψάμενος. -
-
- - -anonymi epigrammatici - - -πάντα Τύχης ὀφθαλμὸς ἐπέρχεται· ἀλλʼ ἐπὶ μούνοις -Πορφυρίου καμάτοις ἕλκεται ὄμμα Τύχης. -
-
- - -anonymi epigrammatici - - -σὴν τροχαλὴν μάστιγα καὶ ἀσπίδα δῆμος ἀγασθεὶς -ἤθελέ σε στῆσαι διπλόον, ὥσπερ ἔδει, -ἡνίοχον κρατερὸν καὶ ἀριστέα· διχθὰ δὲ χαλκὸς -οὐκ ἐχύθη, ψυχὴν σεῖο τυπωσάμενος. -
-
- - -anonymi epigrammatici - - -Πορφύριον σταδίοισι τίνος χάριν ἡνιοχῆα -δῆμος ὁ πρῶτα φέρων ἄνθετο τῶν ἄνθετο; -αὐτὸς ἄναξ κήρυξε. τί γὰρ πλέον, ὅττι γεραίρει -εἵνεκεν εὐνοίης, εἵνεκεν ἱπποσύνης; - -
-
- - -anonymi epigrammatici - - -Πορφυρίῳ μετʼ ἄεθλα γέρας πόρεν ἄξιον ἔργων -κοίρανος, ὁ Πρασίνοις τοῦτο χαριζόμενος. -πολλάκι γὰρ δῆμος προφερέστερα ἔργα κομίζων -ᾔνεσε Καλλιόπαν, καὶ πάλι Πορφύριον. -διπλόον οὔνομα τοῦτο, τόπερ λάχε χάλκεος ἥρως -οὗτος, ὁ τεθρίπποις κῦδος ἑλὼν ἀρετῆς. -
-
- - -anonymi epigrammatici - - -οὐ μόνον ἐν σταδίοις σε κατέστεφε πότνια Νίκη, -ἀλλὰ καὶ ἐν πολέμοις δεῖξεν ἀεθλοφόρον, -εὖτʼ ἄρʼ ἄναξ πολέμιζεν ἔχων Πρασίνους ὑποεργοὺς -ἄγρια μαινομένῳ ἐχθρῷ ἀνακτορέῳ, -καὶ πέσεν αἰνοτύραννος ἐπιφθιμένης τότε Ῥώμης, -ἦμαρ δʼ Αὐσονίης ἦλθεν ἐλευθερίης. -τοὔνεκα τοῖς μὲν ἔδωκεν ἄναξ γέρας, ὡς πάρος εἶχον, -σὸν δὲ τύπον τέχνη ἔξεσε, Πορφύριε. -
-
- - -anonymi epigrammatici - - -ὑμετέρων κήρυκες ἀμεμφέες εἰσὶν ἀγώνων -οἱ καὶ ἀπʼ ἀντιβίων, Πορφύριε, στέφανοι. -πάντας γὰρ σταδίοισιν ἀμοιβαδὸν αἰὲν ἐλέγχεις -ἀντιτέχνους, τῆς σῆς παίγνιον ἱπποσύνης. -τοὔνεκα καὶ ξεῖνον πρεσβήιον εὕραο μοῦνος, -εἰκόνα χαλκείην δήμῳ ἐν ἀμφοτέρῳ. - -
-
- - -anonymi epigrammatici - - -πλάστης χαλκὸν ἔτευξεν ὁμοίιον ἡνιοχῆι· -εἴθε δὲ καὶ τέχνης ὄγκον ἀπειργάσατο, -ὄγκον ὁμοῦ καὶ κάλλος· ὅπερ Φύσις ὀψὲ τεκοῦσα -ὤμοσεν ὠδίνειν δεύτερον οὐ δύναμαι. - -ὤμοσεν εὐόρκοις ὑπὸ χείλεσι· Πορφυρίῳ γάρ -πρώτῳ καὶ μούνῳ πᾶσαν ἔδωκε χάριν. -
-
- - -anonymi epigrammatici - - -εἰ φθόνος ἠρεμέοι, κρίνειν δʼ ἐθέλοιεν ἀέθλους, -πάντες Πορφυρίου μάρτυρές εἰσι πόνων -ναὶ τάχα καὶ φήσαιεν ἀριθμήσαντες ἀγῶνας· - -βαιὸν τοῦτο γέρας τοσσατίων καμάτων. - -ὅσσα γὰρ ἡνιοχῆας ἀεὶ μεμερισμένα κοσμεῖ, -εἰς ἓν ἀολλίσσας, τηλίκος ἐξεφάνη. -
-
- - -anonymi epigrammatici - - -αἰδομένη χαλκῷ σε πόλις, τριπόθητε, γεραίρει· -ἤθελε γὰρ χρυσῷ· ἀλλʼ ἴδεν ἐς Νέμεσιν. -εἰ δὲ τεὴν μέλπων οὐ παύεται ἠθάδα νίκην -εὐγνώμων δῆμος, Πορφύριε, Πρασίνων, -ἔμπνοά σοι ξύμπαντες ἀγάλματα· πᾶς δὲ περισσὸς -καὶ χρυσὸς τούτοις εἰς ἔριν ἐρχόμενος. -
-
- - -anonymi epigrammatici - - -οὔπω σοι μογέοντι Τύχη πόρεν ἄξια νίκης· -νῖκαι γὰρ τῆς σῆς μείζονες εὐτυχίης. - -ἀλλὰ μέρει πρώτῳ σταθερῷ καὶ ἀρείονι μίμνοις -τὴν φθονερὴν τήκων δυσμενέων κραδίην, -οἵ, σέθεν εἰσορόωντες ἀεὶ νικῶσαν ἱμάσθλην, -μέμφονται σφετέρην αἰὲν ἀτασθαλίην. -
-
- - -anonymi epigrammatici - - -ἄλλοις μὲν γεράων πρόφασις χρόνος· οἱ δʼ ἐπὶ νίκαις -κρινόμενοι πολιῆς οὐ χατέουσι κόμης, -ἀλλʼ ἀρετῆς, ὅθεν εὖχος ἀνάπτεται. εἷς ἀπὸ τοίων -Πορφύριος δώρων δὶς λάχεν ἀγλαΐην, -οὐκ ἐτέων δεκάδας, νίκης δʼ ἑκατοντάδας αὐχῶν -πολλάς, καὶ πάσας συγγενέας Χαρίτων. -
-
- - -leontius minotaurus - - -Ἀγχίσην Κυθέρεια, καὶ Ἐνδυμίωνα Σελήνη -φίλατο μυθεῦνται τοῖα παλαιγενέες. -νῦν δὲ νέος τις μῦθος ἀείσεται, ὡς τάχα Νίκη -ὄμματα καὶ δίφρους φίλατο Πορφυρίου. -
-
- - -anonymi epigrammatici - - - -πρεσβυτέρους κοῦρος μὲν ἐών, πρέσβυς δέ τε κούρους -νικᾷς, τεθρίππων κέντορας ἀθλοφόρων. -ἓξ δʼ ἐτέων ἀνύσας δεκάδας, στήλην ἐπὶ νίκαις -εἷλες, Καλλιόπα, νεύματι κοιρανίης, -ὄφρα μένοι καὶ ἔπειτα τεὸν κλέος. αἴθε τοι εἴη, -ὡς κλέος ἀθάνατον, καὶ δέμας ἀθάνατον. - -
-
- - -anonymi epigrammatici - - -σῆς τόδε διφρελάτειρα τὸ χάλκεον ἄνθετο Νίκα -εἴκηλον μορφᾶς, Καλλιόπα, ζαθέας, -πρέσβυς ὅτι σφριγόωντας ἐν ἱπποδάμῳ πλέον ἀλκᾷ -νίκησας, γεραροὺς δʼ ὢν νέος ἐν σοφίῃ. -ἔνθεν ἐλευθερόπαις Βενέτων σέο πήξατο δῆμος -δοιά, τὰ μὲν τέχνας ἆθλα, τὰ δὲ σθένεος. -
-
- - -anonymi epigrammatici - - -σὸν γῆρας νεότητα τεὴν ὑπερέδραμε νίκαις, -καὶ πάντων κρατέεις πάντοτε, Καλλιόπα. -ἔνθεν ἄναξ καὶ δῆμος ἐλεύθερος αὖθις ἐγείρει -τοῦτο γέρας, σοφίης μνῆμα καὶ ἠνορέης·. -
-
- - -anonymi epigrammatici - - -οὗτος, ἐγερσιθέατρε, τεὸς τύπος, ὅν τοι ἐγείρει -ἑσμὸς ἀριζήλων, Καλλιόπα, στεφάνων. -οὔτε γὰρ ἡνίοχός σε παρήπαφεν, οὔτε χαλινοῖς -δύσστομος ἱππείη σοῖς ἀπίθησε γένυς. -μοῦνος δὴ νίκης γέρας ἄρνυσαι. ἦ παρὰ πᾶσι -δόξαν ἔχεις ἀεθλῶν ἆθλα λιπεῖν ἑτέροις, -
-
- - -anonymi epigrammatici - - -Καλλιόπα κλυτόμοχθε, τί σοι πλέον, ὅττι γεραίρει -εἰκόνι χαλκοτύπῳ σοὺς βασιλεὺς καμάτους, -δῆμος ὁ μυριόφωνος, ὅλη πτόλις; εὖτε καὶ αὐτὴ -δυσμενέων παλάμη σοῖς ἐπένευσε πόνοις. - -
-
- - -anonymi epigrammatici - - - -μητέρες εὐάθλων γεράων φρένες, οὐ κράτος ἥβης, -οὐ τάχος ἱπποσύνης, οὐ χρόνος εὐτυχίης. -ἱλήκοι, Φαυστῖνε, τεὸς νόος, ᾧ τάδε πάντα -ἕσπεται, ᾧ Νίκη σύντροφος ἀθάνατος. -
-
- - -anonymi epigrammatici - - -πρίν σε νέον, Φαυστῖνε, νόος πεφόβητο γερόντων· -νῦν δέ σε πρεσβυγενῆ κάρτος ἔφριξε νέων. -δεύτερα δʼ εὕρετο πάντα τεὸς πόνος, ὅς σε γεραίρει -πρέσβυν ἐν ἠιθέοις, ἐν δὲ γέρουσι νέον. -
-
- - -anonymi epigrammatici - - - -ἐξότε Κωνσταντῖνος ἔδυ δόμον Ἄϊδος εἴσω, -πλῆτο κατηφείης ἱπποσύνης στάδιον, -τερπωλὴ δʼ ἀπέλειπε θεήμονας· οὐδʼ ἐν ἀγυιαῖς -κείνας τὰς φιλίας ἐστὶν ἰδεῖν ἔριδας. -
-
- - -anonymi epigrammatici - - -εἰκόνα, Κωνσταντῖνε, τεὴν ἀνέθεντο πολῖται, -μυρόμενοι, ψυχῆς τέρψιν ἀποιχομένης. -σοὶ κλέος ὁππότε δῆμος ἐπεσφρήγιζε θανόντι, -μνήσατο σῶν καμάτων καὶ μετὰ πότμον ἄναξ· -οὕνεκεν ἱπποσύνης φιλοκέρτομος ὤλετο τέχνη, -ἐν σοὶ παυσαμένη πᾶσα καὶ ἀρξαμένη. - -
-
- - -anonymi epigrammatici - - -εἰσέτι μὲν ζώοντι πόλις ποτὲ Κωνσταντίνῳ -εἰκόνα χαλκείην βαιὸν ἔκρινε γέρας· -ᾔδεε γὰρ πᾶς δῆμος ὅσους ἐπὶ κύδεϊ νίκης -αἰὲν ἀεθλεύων ἀμφέθετο στεφάνους. -ὡς δʼ ἔθανεν, ποθέουσα, φίλον τύπον ἄνθετο τοῦδε, -ὄφρα καὶ ἐσσομένοις μνῆστιν ἔχοι καμάτων. -
-
- - -anonymi epigrammatici - - -οἱ Βένετοι Πρασίνοισιν ἐναντίοι αἰὲν ἐόντες -εἰς ἕνʼ ὁμοφροσύνης ἐξεβόησαν ὅρον, -ὥστε σε, Κωνσταντῖνε, λαβεῖν ἐπιτύμβιον εὖχος, -πᾶσιν ἀειδόμενον, πᾶσιν ἀρεσκόμενον. -
-
- - -anonymi epigrammatici - - -Ἀντολίης, δύσιός τε, μεσημβρίης τε, καὶ ἄρκτου -σὸς δρόμος ὑψιφαὴς ἀμφιβέβηκεν ὅρους, -ἄφθιτε Κωνσταντῖνε. θανεῖν δέ σε μή τις ἐνίσπῃ· -τῶν γὰρ ἀνικήτων ἅπτεται οὐδʼ Ἀίδης. -
-
- - -anonymi epigrammatici - - -ἐγγύθι τῆς σφετέρης γενεῆς λάχεν εἰκόνα τήνδε· -ἔπρεπε γὰρ τρισσοῖς εἰν ἑνὶ χῶρον ἔχειν, -οἳ καὶ ἐνὶ σταδίοις ἀρετῆς κλέος εἴκελον εὗρον, -νηρίθμων στεφάνων ἐσμὸν ἑλόντες ἴσον. -
-
- - -anonymi epigrammatici - - -τὸν Φαυστινιάδην πόλις ἄνθετο Κωνσταντῖνον, -γείτονα μὲν γενεῆς, κρέσσονα δʼ ἡνιόχων. - -δὴν γὰρ ἀεθλεύσας οὐκ ἤμβροτεν, ἀλλʼ ἐπὶ νίκῃ -παύσατο, σὺν νίκῃ καὶ πάρος ἀρξάμενος, -ὃν καὶ κοῦρον ἐόντα παλαίτεροι ἡνιοχῆες, -στεψάμενοι σταδίοις, εἷσαν ἀγωνοθέτην. -
-
- - -anonymi epigrammatici - - -σοὶ τόδε, Κωνσταντῖνε, τεὴ τροφὸς ὤπασε Νίκη -παιδόθεν ἑσπομένη πᾶσαν ἐφʼ ἡλικίην. -πέντε γὰρ ἐν σταδίοις δεκάδας τελέσας ἐνιαυτῶν, -οὐδʼ ἴσον, οὐδʼ ὀλίγον εὕρεο λειπόμενον. -ἀλλʼ ἔτι κουρίζων τε καὶ ἄχνοος ἄνδρας ἐνίκας, -ἥλικας ἡβήσας, γηραλέος δὲ νέους. -
-
- - -anonymi epigrammatici - - -ἤθελε Κωνσταντῖνον ἀεὶ πτόλις ἡνιοχεύειν· -ἤθελεν, ἀλλὰ πόθῳ οὐκ ἐπένευσε Φύσις. -ἔνθεν ἑῶν τόδʼ ἄγαλμα παραίφασιν εὗρεν ἐρώτων, -ὄφρα ἑ μὴ λήθη καὶ χρόνος ἀμφιβάλοι, -ἀλλὰ μένοι ποθέουσιν ἔρως, ζῆλος δʼ ἐλατῆρσι, -κόσμος δὲ σταδίοις, ἐσσομένοις δὲ φάτις. -καί τις ἰδὼν μετόπισθε χερείονας ἡνιοχῆας -ὀλβίσσει προτέρην, ἥ μιν ἴδεν, γενεήν. -
-
- - -anonymi epigrammatici - - -πέντε καὶ εἴκοσι μοῦνος ἀέθλια Κωνσταντῖνος -εἰς μίαν ἠριγένειαν ἑλὼν, ἤμειψε μὲν ἵππους - -ἀντιπάλοις· κείνους δὲ λαβών, οὓς πρόσθεν ἐνίκα, -τοῖς αὐτοῖς πάλιν εἷλε μίαν τε καὶ εἴκοσι νίκας. -πολλάκι δʼ ἀμφοτέρων μερέων ἔρις ἔμπεσε δήμῳ, -τίς μιν ἔχοι· κείνῳ δὲ δόσαν κρίσιν ἐκ δύο πέπλων. -
-
- - -anonymi epigrammatici - - -ἔγρεο, Κωνσταντῖνε· τί χάλκεον ὕπνον ἰαύεις; -σεῖο δίφρους ποθέει δῆμος ἐνὶ σταδίοις, -σῆς τε διδασκαλίης ἐπιδευέες ἡνιοχῆες -εἵαται ὀρφανικοῖς παισὶν ὁμοιότατοι. -
-
- - -anonymi epigrammatici - - - -ἀμφοτέροις εἷς μοῦνος ἀριστεύσας παρὰ δήμοις -κῦδος ἀπʼ ἀμφοτέρων ἔλλαχεν Οὐράνιος, -εἰσέτι διφρεύων. τὸ δέ οἱ γέρας ἤλυθε πρῶτον -ἐκ Πρασίνων, οἷς δὴ γείτονα χῶρον ἔχει. -αὐτοὶ καὶ σταδίοιο πεπαυμένον ἤγαγον αὖθις -ἐς δίφρους, νίκης μνωόμενοι προτέρης. -
-
- - -anonymi epigrammatici - - -παυσάμενον σταδίων βασιλεὺς ἐπʼ ἀγακλέι νίκῃ -αὖθις ὑπὲρ δίφρων βῆσεν ἀεθλοφόρων -οὐράνιον δήμοισι, φέρων φέρων χάριν οὐ ποθέει γὰρ -ἡ πόλις Οὐρανίου νόσφιν ἀεθλοσύνας. -τοὔνεκα διφρεύοντα τὸ δεύτερον, ὑστατίης τε -νίκης καὶ προτέρης στῆσεν ἀγασσαμένη. - -
-
- - -anonymi epigrammatici - - -οὐράνιος Νίκαιαν ἔχει πέλας ὁπλοτέρην τε -Ῥώμην, τῆς μὲν ἐών, τῇ δʼ ἔνι κῦδος ἑλών. -νικᾷ δʼ ἀμφοτέρωθεν, ἐπεὶ περιδέξιος ἦεν -τῇ καὶ τῇ προθέειν ἠὲ παρεξελάαν. -τοὔνεκα καὶ χρυσέῳ μιν ἀνεγράψαντο μετάλλῳ, -κυδίστῳ κτεάνων κύδιμον ἡνίοχον. -
-
- - -thomas - - - -τὸν θρασὺν ἡνιοχῆα λελασμένον ἅρματος ἄθλων -ἐνθάδʼ Ἀναστάσιον κείμενον οὖδας ἔχει, -ὃς τόσσους ἀνεδήσατο πρὶν στεφάνους, ὅσα ἄλλοι -ἔδρακον ἡνιόχων ἤματα ἱππασίης. -
-
- - -anonymi epigrammatici - - - -ἐν γῇ κρατήσας παντὸς ἁρματηλάτου -καλῶς ἐπήρθη καὶ πρὸς αἰθέρα τρέχειν -Πορφύριος, τὸ θαῦμα δήμου Βενέτων. -νικῶν γὰρ οὗτος πάντα γῆς διφρηλάτην, -ἄνεισιν, ὡς ἂν καὶ σὺν ἡλίῳ δράμῃ. -
-
- - -anonymi epigrammatici - - -ἴουλον ἀνθῶν πρῶτον οὗτος ἡνίας -Πορφύριος Κάλχαντος εἷλκε Βενέτου. -ἐκπλήττομαι δὲ πῶς γράφει χεὶρ ἐμπνόους -τούτου τις ἵππους. ˘ καὶ γὰρ ἂν πλήξῃ πάλιν, -οἶμαι, δραμεῖται νῖκος εὑρεῖν καὶ πάλιν. - -
-
- - -anonymi epigrammatici - - - -σκόπει τὸ δρᾶμα μηχανουργοῦ τοῦ δόμου· -εἰ μὴ γὰρ ἐστέγαστο καρτερᾷ σκέπᾐ, -πρὸς οὐρανοὺς ἂν ὦρτο Φαυστῖνος τρέχων -ὡς ζῶν σὺν ἵπποις, τὸ κλέος πρὶν Πρασίνων. -ἆρον στέγος γάρ, καὶ φθάνει πρὸς αἰθέρα. -
-
- - -anonymi epigrammatici - - -Φαυστῖνος οὗτος, ὁ πρὶν ἁρματηλάτης, -ὃν δῆμος εὑρὼν τοῦ μέρους τῶν Πρασίνων -τὴν ἧτταν ἠγνόησε παντελῶς δρόμῳ. -γέρων μὲν ἦν γάρ, ὡς βλέπεις· τὸ δὲ σθένος -ἦν τις νεάζων, οὐδʼ ὅλως ἡττημένος. -
-
- - -anonymi epigrammatici - - - -λευκοῦ μεθέλκων ἡνίας Κωνσταντίνος, -ἂν μὴ καθεῖρκτο στερρότητι τοῦ δόμου, -τοὺς τρεῖς ἐνίκα, πρῶτος αἰθέρα φθάνων. -πνοῆς ἄνευθεν εἶδες αἰθεροδρόμον· -τέχνη με πείθει τοῦτον ἔμπνοον βλέπειν. -
-
- - -anonymi epigrammatici - - -Κωνσταντίνος γʼ ἦν, ἀλλὰ τοῖς πάλαι χρόνοις -λευκῆς χρόας τέθριππον ἕλκων εὐστρόφως. -ἀφʼ οὗ δὲ τοῦτον ἥρπασεν Χάρων, ἔδυ -τὸ φῶς ἁμίλλης ἱππικῶν δρομημάτων, -καὶ πᾶσα τέρψις τοῦ θεάτρου, καὶ τέχνη. - -
-
- - -anonymi epigrammatici - - - -χεὶρ οἶδε γεννᾶν τοὺς πάλαι τεθνηκότας. -Ἰουλιανὸς καὶ γὰρ ὡς πάλαι σθένει, -ἕλκων, μεθέλκων Ῥουσίου τὰς ἡνίας· -καὶ νῦν γραφεὶς ἕστηκεν ὑψοῦ σὺν δίφρῳ· -τὸ νεῦμα χεὶρ μένει δέ· τὴν νύσσαν δότε. -
-
- - -anonymi epigrammatici - - -Ἰουλιανὸς οὗτος ἅρμα Ῥουσίου -ἔχων, ἐνίκα τοὺς ἐναντίους δρόμῳ. -ἀλλʼ εἰ γραφεὺς παρεῖχε καὶ πνοῆς χάριν, -ἕτοιμός ἐστι καὶ πάλιν διφρηλάτης -καὶ πρόσθεν ἐλθεῖν, καὶ λαβεῖν καὶ τὸ στέφος. -
-
- - -Julianus - - -Στέφος πλέκων ποθʼ, εὗρον -ἐν τοῖς ῥόδοις Ἔρωτα· -καὶ τῶν πτερῶν κατασχὼν, -ἐβάπτισ’ εἰς τὸν οἶνον. -λαβὼν δʼ ἔπιον αὐτόν -καὶ νῦν ἔσω μελῶν μου -πτεροῖσι γαργαλίζει. -
-
-
- - -